PEKSANGA 24

 PEKSANGA 24

Sbk Pachuau

     "Nia, thawmhnaw hak theih alawi ka nei tawh lo a..."

     "Naute-in i thawmhnaw a rawn țawmpui țan che a, in nufaa in hak dun theih tur thawmhnaw thar ngaihtuah a ngai tawh a ni maw?" nui var var chungin Freddy'n a lo ti a, Peksanga pawh a kiai suk mai.

     "Eng nge in tih ve zawk a?" Azuali'n a zawt let a.

     "U Freddy hian chhuahpuiah min sawm a, eng thil chiah nge kan tih dawn pawh ka hre lo," Maziri chuan Freddy melh zauh pahin a ti a.

     "Inhmuh remchan tàkah chuan innu hi thil min enpui turin ka duh a nia. Tih tur pawimawh in neih tawh lem loh chuan min kalpui lawk ula," Freddy chuan Peksanga lam hawiin a ti a.

     "Ngaihzawngte bula awm reng lai pawha kannu i beisei fo hi sim teh aw," Peksanga'n a lo ti fiamthu hlut a. 

     "Innu ka mamawh chhan hi i hre lo. Chuvangin, ngawi reng khan min rawn zui tawp mai teh u," tiin Freddy chu a kal nghal nulh a. 

     Chutia a kal tàkah chuan an zui ve ta zel a, Israel Market-ah lut thla-in an extend thar lam chu a pan a, hnuai lamah chuan a la chhuk thla ta deuh deuh a, an dawr pan mek awmna chu a pilril hle mai ti chungin a hnungah chuan an zui ve zel hlawm a.

     Israel Market building extension hnuai zawka shop number 12-ah chuan a lut ta tharh a, inhre țha tih hriat zetin dawr nghaktunu nen chuan an inbe nghal bawrh bawrh bawk.

      "Țhianpa, he nu hi i la hria em?" tiin Peksanga chu a zawt a.

       Chik zeta a en hnu chuan a hria tih lantirna'n Peksanga chuan a lu a bu nghat a, chibai tumin a kut a phar chhuak nghal zat bawk.

     "Zaii kha ni reng chuan! Inhmuh a va khat ve tiraw? I lo khal nalh tawh lutuk a, ka hre nghal mai lo che alawm," nui var var chungin a ti a.

     "Awii... Peksangzual, inla patling kual vel lutuk khan țawng lo mai teh. I nupui neihin min sawmna chang pawh i hre lo, ka lo vui ve êm êm a, nang lah chuan min la hai zui a nia," tiin Zaii tia a sawi chuan a chibai pah lâwp lâwp a.

     Zaii chu Lalhriata nen an tleirawl chhuah tirhin an inngaizawng reng tawh a, hmeichhe fel leh kawm nuam tak a lo ni bawk nen Peksanga leh Freddy te nen pawh inpawh tlang takin an inkawm thei a. Tleirawl tha za rual, vei la neih lutuk loh lai kha a ni bawka an inzui kawi ve nasain amah hmeichhe inla no chi a lo ni lo bawk nen an mipa kawm ve bawrh bawrh țhin a ni ber zawk.

     Khang hunlai khan Zaii chu tleirawl thau lem lo tak, cher chhe lutuk ni chuang si lo hi a ni reuh a. Tunah chuan tlemin a lo thau tawh deuh bakah a tleirawl hmel kha a paih ve tawh a, Peksanga'n a hmuh tirha a hre nghal mai lo pawh kha a awm viau a ni.

      A dawr chu silver tlereuh zawrhna dawr a ni a, hmeichhe duhzawng chu a awm kim vek ti ila kan sawi uar hauh lo ang. A man pawh hmun dang ngaihtuah chuan a ti tlawm hlawm phian a, dawra an awm chhung ringawt pawhin rawn pantu a nei nual a, mahni inbel tur lei an awm laiin țhenkhat chuan zawrh chhawn tur te pawhin an la nual bawk.

      "Azual, hei hi min lo enpui lawk teh," Freddy chuan zungbun inrem țhat awmna bih kual dun dun pahin a hui zauh a.

     Azuali'n a va en ve hnu chuan a mit nei hlir pathum chu an buk tawn vel a, a mit lawk lo ber chu lang zahawm bera a hriat bakah nalh a ti ber bawk a, Freddy pawh chuan a mit la bertu a ni tih sawiin chu zungbun chu a lek chhuak vâ vâ a.

     Maziri țhutna bulah chuan pheiin a kai tho a, a kut chu a vawnsak nghal zat bawk.

     "Hetia zungbun thlang chawpa a zawrhna dawr chhung ngeia nupuia tana insawm leh inbuntir hi mite tih dan a ni kher lo ang tih ka ring a, khawilai hmun fianrialah emaw romantic takin an inbuntir țhin tih pawh ka hria. Mahse, kei chuan hmun dang, hun dang  ka nghak hman tawh lo a, kan țhiante min hriatpui lai ngei hian min nei duh ang em tiin ka zawt che a ni. "

     A tirah khan a uang thil tih emaw an ti kha a ni a, a hmel a thutak ve nasa mai si; Maziri lahin makti, hlim leh lungchhe hmel deuh pu-in a lo melh ve reng a, a mitah mittui a tling a ni tih chu a hranpaa inhrilh ngai lovin an hmu thei vek bawk.

     Maziri'n a lu a buk nghat tàkah chuan zungbun chu a buntir a, a bun tawk chiah a nih bakah a kut nen a inremin a inhmeh êm êm bawk. Azuali'n a bun chhin khan a tawk chiah a, Freddy chuan Maziri kut nen a intiat vel a ring a, chuvanga buntir chhin pawh a ni rêng a. Engkim chu a tlachawpa thleng mah ni se ruahman lawk te pawh a ang zawk mah a, zungbun an inbuntir hnu chuan lawmpuina leh duhsakna thu an hlan hlawm a.

     "Ka zungbun zawrhin in inhual bawk a, in inneih hunah min sawm ve tawh ngei a ngai ang. Tu emaw anga țhian hlui te theihnghilh mai lovin min rawn sawm ngei ngei ang che," nui chungin Zaii'n a ti a.

     An inneih dawn khan buaina neuh neuh an neih bakah a hna lamah a buai bawk nen mi sawm tur kha a ngaihtuah hman lo a, a nu leh pate kutah a dah vek kha a ni a, hmaih an nei nual tih inneih zawh hnuah an hre chhuak leh a, an inthiam lo viau nghe nghe a nih kha. Peksanga chuan thupha te chu a'n chawi hnuhnawh leh ang nawk nawk a, an beisei loh lutuk boruak an tawng bawk nen rilru zangkhai deuhin an inkawm zui bawrh bawrh hlawm a.

      Zana an muthmunah pawh Azuali chuan Maziri te chu a lawmpui thu a la sawi siam siam reng a, la innei nghal mai dâwn lo mah se mi leplerh leh rilru le lo mi an ni lo ve ve a, an zuzi mai mai a ring lo ve tawp mai a ni.

     "Maziri'n Freddy a tawng hi keiin nang ka tawng che ang chiah hian malsawmna a ni ka ti lo thei lo. Harsatna leh buaina kârah ka tan dingin engtik lai pawhin min thlamuan tur leh ka rinchhan ni turin i awm reng țhin a, hlimna chhiar sen loh min pe ang hian Maziri tan pawh Freddy hi innghahna tlak leh hlim taka siam theitu a ni ve tlat a ni, " a ti sep sep a. 

    "Freddy hian a hmangaih ve hle a nih hmel! A ngaihzawng hmasain a boralsan hnu khan hmeichhia hi a ngaihven loh bakah a rilru ti nghing theitu an la awm miah lo. Maziri hi chu a tir ațangin ama'n a buaipui chho nghal a, a rilru a pe nghal chat ni berin a lang," a pasal chuan a ti ve sup sup a. 

    "An inchhung hrehawm tak ațang sawn la chhuak thuai se a țha ang, amah hringtunu ngeiin a thlavang hauh chu sawi loh an unau a dem zawk leh thiam loh a chantir tlat saw mak ka ti tawp thei lo  a ni." 

     "Pasal a neih chuan a u saw a ngaihtuahawm leh viau maithei a ni. A nunhluia a kir leh palh hlauh a nih chuan a pawi dawn êm a. Hmeichhia hi chu mualphona a hovin mipa tana tih awm rênga lang hi hmeichhe tan chuan mualphona a ni leh daih thei tlat a, pasal tur țha deuh tawngin nei ve daih se a tan a țha ber ang. "

    "Maziri nen hian kan dinhmun a inang ka ti țhin. A u chu che sual tawh lo se, nun bul țan țhain a hma lam hun atan eng emaw ngaihtuah ve se ka ti êm mai! Chuti a nih loh chuan a nunhluiah a kir leh mai ang tih a hlauhawm tlat!" 

     "Pathian thu thu a niang chu! Hmeichhe luhlul ve tak a nih hmel a, chuti maia awlsam chuan a let leh chu ka ring chiah lo." 

     "A pa kha a lo chhuak leh mai ang tih ka hlau tawp a." 

     "Chuti maiin a chhuak rih lo ang, hrisel lohna lian tak a neite a nih ngawt loh chuan!" 

     A nupui țawng tum chiah hmuiah chuan a fawhsak hmiah a, "Thil dang chu duhtawk rih ang. Tunah chuan keimah chauh hi min ngaihtuah turin ka duh che," ti supin a fawh zawm leh nghal zat a. 

     

****'***

[PEKSANGA] 

    

     Ka nupuiin min au ri chu ka mang hriat ruai a, muthilh leh mai ka tum lai chuan ka hming chu a lam ri leh sep a, ka țhu chhuak nghal zawt a. 

     Na tuar tih hriat tak maia sofa bawha ka nupui lo kun ngawih ngawih chu ka pan vat a, a nau neih hun a nih tawh avangin a vei țan a nih ka ring mai a. Ka nu chu call nghalin thil awm dan ka hrilh a, ka pa nen an rawn tlan lut rang khawp mai. 

      Ken țul leh mamawh tur nia a rin zawng Azuali'n a lo pack lawk vek tawh avangin insiam buai ngai lovin damdawi in lam kan pan nghal a, ka pa'n motor khalhin a bulah ka nu a țhu a, keiin a hnungah ka nupui chu ka țhutpui a, a na tawrh chu chhawk theih ka chak ngei mai. 

     Rin ai takin a vei rei ta phian a, a vei chhung zawng chu țhu hlei thei lovin ka vei sek a. Ka nu'n awm hahdam tura min tih pawhin ka'n țhu ve tak naa rei lo teah ka tho leh ta nge nge a. 

     Darkar hnih chuang ngawt a vei hnu chuan a nei ta hram a. Fapa duhawm tak, nau piang hlim ka hmuh tawh a zawnga hmelțha ber mai chu ka en kham thei lo. Ka thinlung chhungril ațanga hmangaihna lo chhuak chu amahah chuan a inchhung lut delh delh a, tawp chin nei miah lo tur khawpa thukin ka hmangaih nghal ngawih ngawih mai a ni. 

     Ka nupui chau tak chu a chalah fawksakin fapa duhawm tak min hrinsak avang chuan lawmthu ka hrilh a, a mitmeng chau tak kara hlimna zungzam rawn eng chhuak chuan lungawina min pein ka nuna mi pawimawh tak pahnihte chu thlir nin har ka ti takzet a ni. 

     Ruatpuia pawh a phur ve hle a, a tupa chu hmangaih tih hriat takin a en leh ngawih ngawih zel a, duat zetin a pawm leh hlu hlu țhin. Ni danga kan in lama leng tur pawha kan sawm chhuah hleihtheih țhin loh kha sawm ngai hauh lovin a lo kal ta reng reng a, dawr lama an buai viau pawhin a tupa hmu turin a rawn lang leh nawlh țhin. 

     A pu-in a hming atan 'Remruatkima' a sa a, Pathian ropuizia leh a remruatna fel tak bakah hmaih nei hauh lova engkim chunga roreltu a nihzia lanna tura chu hming chu thlang a ni. 

     "Bawihi, ka phone chu lo chhang lawk mai teh aw." 

     Bathroom ațanga ka chhuah chuan an lo la inbe mawlh mawlh a, ka thawm a hriat chuan ka lam lo hawiin leh lama rawn betu țawng chu a ngaithla leh vang vang phawt a. 

     "Hei amah nen hian inbe r'u aw? Phone hi ka'n pe ang e," tih leh ka phone min pek chu a rual a. 

     Hmui phuna tunge tih ka zawhna chu  hmui phun vékin min chhang a. "Ka nu" ti ni mai hian ka hria a. Number hlang a nih vangin mak ka ti deuh a, a phone keng lovin ka nu chu a leng chhuak ang a, tu emaw phone hmangin min rawn bia a nih ka ring ve ngawt a. 

     Min rawn betu aw ka hriat rual chuan ka insang mar nghal țeuh a, phone chu dah nghal hmak mai ka duh rum rum a ni. 

      "Mama, ka țawng i hre thei em?" a rawn tih leh chuan ka chhang ta hram a. 

     A aw chu tunhmaa anga mahni inring tawk tak leh fiah felfai fak kha a ang ta lo riau a, ka hre sual a nih loh chuan damlo chau tak aw ang mai a ni. 

     Thil pawimawh êm êm sawi lovin rei vak lo kan inbiak hnu chuan a dah leh ta daih lawi a, min rawn be ngai miah lo a, min rawn biak chhunah thu ho mai mai a rawn sawi chu mak ka ti deuh naa ngaihtuah zawm duh lovin khuma ka fapa muhil lo harh chiah chu ka ngaihven ta daih a. 

     Zanriah ei kham hnu chuan ka pa-in sawi tur pawimawh a neih avangin sitting room-ah kan țhu khawm a, ka nupui an kidnap avang khan a pa lung phun hun tura kan tinzawn deuh kha țhulh loh theih a ni ta lo a, nau kan han nei chho leh bawk nen a hun tur kan la ruat fel leh lo a. Vawiina Ruatpuia rawn lêng khan ka pa a sawipui leh a, chumi chungchang chu a sawi dawn a nih ka lo ring ve tawp a. 

     "Mama, i nu a țha vak lo a, Mizorama rawn let leh a duh si a, i zuk hruai a ngai dawn a ni," ka pa'n a tih chuan ka rin loh lam daih a sawi avangin ka bangbo deuh a. 

     "Engtiang taka țha lo nge a nih le?" Azuali chuan a lo ti a, kei ka la ngawi reng thung. 

     "Natna neuh neuh a nei nual a ni awm e! TB veiin a chuapah tui a tling a, a zun kawng lam a fel lo nasa bawk a nih hmel," ka nu chuan a lo ti dam dap a. 

Note - A tawi viau naa dah loh tawp ai ka rawn dah aw.