PEKHLUZUALI

PEKHLUZUALI

Sbk Pachuau

     "Ka nu i ni lo a, ka nu anga ka chunga thu neih tum hlek suh!"

     Ka mitah tak min en kar a, a zam map lo! A mitah chuan chiang takin min huatna zungzâm ka hmu thei a, hetiang khawpa nasaa min huatna tur hian a lakah eng thil nge ka tih sual ka hre lo, ka thinlung erawh a na ngang mai.

     Ka pasal nen hian thla ruk kal ta khan kan innei a, a nupui hmasa nen fa pahnih neiin Pekhluzuali hi a upa zawk niin kan hnenah a khawsa a, a nau Peksangzuala erawh hostel-ah a awm thung. Annu hi a uire vanga țhen a ni a, chu chu an fate hian an hre lo. Nupa inkar buaina satliah vanga ințhen ni-ah an ngai a, hei vang tak hian Pekhluzuali hian min ngaithei lo a, a nu luahlanah min ngaih tlat avangin a țawngkam leh mitmei țha ka la hmu lo tawp a ni mai.

     Zanriah ei laiin kanpa chuan zanah khawtlâng meeting pawimawhah kal a ngaih thu sawiin a chhuah hlana lêng chhuak lo turin a fanu chu a hrilh a, a pa a awm loh chuan a chhuak lui leh mai ang tih hlauhna vangin ka lo ip ru țeuh a.

     "U Rin, i theih anga hma-in lo haw rawh aw," a kawr hak, siam ngai miah lo  siamsak pah chuan ka ti sap a.

     "Ka nupui duhtak hian min lo ngaih dawn vang em ni haw hma tura min duh le!" tih pahin ka kawngah min kuah a, amah si chétin min pawt hnai nghal salh a.

     Ka ngaih vang chu ni tho mah se a fanu vang zawka sawi ka ni tih chu ka sawi duh ta êm lo, a nghawnga kuah ve pah chuan ka melh chho a.

    "Ni chiang e! Vawiin nilengin office ațangin min chhuah bosan tawh a, zanah lehzel pawh min chhuahsan a ngai leh sia, ka khua a har tawh alawm," ka theih tawka inti no chung chuan ka pangchang aw ka chhuah pah ngher ngher a, uar taka fawh ka hlawh chiang hle.

     Kan thawhna department a inang a, a nupui neih lai daih ațang tawha lo inhrawn reng tawh kan ni. Eng emaw chen kan inhrawn hnu-ah hmun dangah an sawn ta daih a, a hnu kum nga a vei leh meuh chuan office khatah kan thawk tlâng leh der tawh, kan inkarah eng mah a la awm lo. Kei aiin kum eng emaw zatin a upa a, ka pasal niin hetiang tak hian ka hmangaih ang tih ka ring chhin ngai miah lo a, fa hrawn ka nei ang tih phei chu ka mumangah takngial pawh ka la mang chhin ngai lo.

     A nupui hi office-ah a rawn kal ve fo avangin ka hre ve thawkhat viau. A hmelțhat piah lamah a changkang a, lu zo veh vawh tak niin chapo lo aia chapo lam mize pû a ni tih chu kan hre ru deuh vek! Pute nupui a ni a, atu amah chuan kan sawi ri tam viau lo. Ka țhiante pahnih hian kan țhian hova kan awm laiin an sawi ve țhin tih lohah chuan han sawi zui vak kan nei ngai lem lo, kan ei lo ru deuh vek tih erawh kan inhre tawn țhûm awm e. A pasal hnuaia mite kan nih vanga hnuaichhiah taka min rawn en ve ngawt țhin chu ka țhiante pahnih, Dingi leh Hlimpuii chuan an ngaithei țhak lo, a rukin an insawh nasa viau țhin a, ka lo nuih tawp zel.

     An ințhen hma daih ațangin an nupa kar hi a lo țha lo viau tawh a lo ni a, nupa anga an awm lohna pawh a lo rei viau tawh ni awm tak a ni. A nupui a uire ngei a ni tih a hriat chian takah chuan u Rina dawhtheihna-in a tlin tawh bik lo a, a chhuak duh lo chung chu a țhen lui a, mittui tla chunga ngaidam dila a rawn beisei leh pawhin a ngaihsak duh tawh der mai si lo a, an ințhen hlen chu a ni ta mai a. Hetia kan inneih tàk hnu pawh hian naupang chhuanlama hmangin rawn biak a ching hle a, u Rina hian a hawi tawh loh êm avangin thik enah ka en ngai bik lem lo.

     Ka hlauh ang ngeiin a pa a chhuak fel ta maw tihah Peki chu len tum tih hriat taka incheiin a room atangin a rawn chhuak a, min ngaipawimawh lo zetin min ner khum sak a, ngawi renga min kal pelin kawngka awmna lam a pan a.

     "I pa khan chhuak lo turin a tih che kha, fanu thuawih lo deuh neih chu a lawm vakin ka ring lo."

     Min zah lovin a nu atan min pawm lo viau mah se ka pasal fanu a ni miau a, kan cheng ho bawk a, ka mawhphurhna a ni tlat!

     "Ka nunah lo inrawlh lo turin ka hrilh tawh che kha, eng vanga min tih buai hi nuam ti viau nge i nih?" Cho tak maia min melh kal chungin a ti chang fal a.

     Ka mihring mihrinna chuan ben sawk mai chu a châk kher mai! Ka insum hram hram a, ka theih anga zaidamin zana hmeichhe tan chhuah a țhat lohzia chu ka hrilh a. A pa haw hmaa a lo haw loh phei chuan a pa thin a ti rim hle dawn a ni tihte chu sawiin ka thiam ang tawkin chhuak lo turin ka thlem a, chuta min chhan dan chu a beidawnthlak teh e!

     "Ka hmâ ngâi awm tak hian i țawng ve ziah a, min ngaihtuah ber ni awm tak hian i awm ve ziah mai. I rilru chhe lutuk kha ka hriat loh ring suh! Âpa hi a hausakna vang chauha nei i ni tih ka hria a, kan chhungkua leng darh hi i tum ber a ni tih pawh ka hria. Nangmah vanga ka nu leh pate an inneih leh theih loh vang hian ka hua che a, ka nuna thuneih i lo tum ve chhen vangte hian ka haw ngawih ngawih che!"

     Sawi tur ber hre lovin ka hmaa tleirawl ding chu ka melh ngawt ngawt a, a thil sawiin min den natzia chu nasa tak a ni! Ka ngaihtuahnaa awm ngai miah lo leh ka rilru ni miah lo anga min puh chu nâ ka tih piah lamah ani ang rual lekin chutiang rilru a pu chu mak ka ti lutuk a, ka tha a khur hial mai!

     Huat hmel zeta min melh râm râm chungin a inher nghat a, hawi sang vah chung chuan a chhuak ta nghal a, a nu a va han ang tehlul em!

     Pawl sawmpahnih zirlai a ni a, exam mai hmabakin a awm mek a ni. Hetianga a nun a hman reng chuan a fail mai ang tih ka hlau êm êm a, a pa nen kan inneihna a la rei lo nasa mai si a, ka mawhphurhna a nih ve miau avangin a fail hlauh chuan ka hming a chhe dawn lutuk tlat. Ka hming chhiat ka hlauhna ai mahin ka pasal fanu chu ka fanu a ni ve tlat a, a hlawhtlinna rah hmuh ve ngei ka duh avangin a țha thei ang bera zir turin ka duh tak meuh meuh a ni.

     Kan nupa roomah lutin, ni danga ka lo tih fo tawh țhin angin, chhuatah ka țhingțhi a, khumah ka kiu nghatin ka kut ka suih a, tih tak zetin ka țawngțai leh ta a. Tuna ka dinhmunah hi chuan țawngțaina baka thil ti thei a awm rih tlat lo a, theihtawp chhuaha Pathian țanpuina auh mai loh chu tih theih ka nei tlem êm a ni.

     "Bawihi, i țap elo?" Dilchhut hmel pu chungin min melh a, min ngaihtuah hle a ni tih a awm danah a lang bawk. Ka pasal hi ka hmangaih a, ka hmangaih reng dawn a ni tih hi ka chiang a ni.

     Ni e, ka țap a, kan fanu Pekhluzuali vangin nasa takin ka țap a ni! A nu atana min pawm loh avangin ka țap a, keimah vanga a nun a hlim loh vangin ka țap a, a laka ka rilru put dan nia a hriat kha a dik loh êm avang pawh khan ka țap a ni.

     "A nu luahlantu dinhmuna min dintir chhung hi chuan kan inkar hi a fuh thei dawn lo a, engtin nge hma ka lak ang tih ngaihtuahin ka bei hi a dawng lek lek tawh a ni. Ka theih tawp chhuah ve niin ka lo inhria a, a bak a lo la awm pawh a ni mahna!" Ka mittui rawn tla leh tur chu duh lovin ka khap sawk a.

     Duat takin min kuah a,"A la rei lo êm bawk a ni. I dawh hram hram a ngai rih a nih hi; a luhlulin a rilru a lian lutuk a, nang talin i dawh loh chuan kan boruak tur chu i hriat kha. I rilru dik tak a hriat hunah chuan i lamah a țang tlat dawn a ni tih hi ka hria a ni," ka hnunga chul riai riai chung chuan a ti sup a.

    "Nuhrawn hming pû ka nihna-in min hma khalh tlat hi a pawi a ni. Nang ka hmangaih êm vang che hian i thisen, i fate chu ka hmangaih tel ve thei a ni tih hi 'nuhrawn' tih thu hian a hliah tlat mai si a, Peki chauh lo, țhenawm khawvêngte pawhin chu chu an hmuh lansarh zawk a ni miau a, ka dinhmun hi a chuti viau rih lo tlat a ni," ka pasal kawr nghawng khal niap niap pahin ka ti a, ani chuan duat taka min kuahin ka chhipah a khabe a rawn nghat a.

    "I theihtawp i chhuah tih ka hria; ka ring che a, eng tikah emaw chuan hnehtu i la ni ngei ang. Chuvangin, beidawng lo la, harsa chung pawha i beih țang țangna hi a thlawn lovang tih ring chungin hma lam pan la, i la hlawhtling ngei ang tih ka ring tlat a ni."

     Ka pasal berin min rin miau avangin ka theihna zawng zawng hmanga beih leh tumin ka insangphek a, hmabak erawh a ko dawn hle a ni tih ka hriat avang chuan ka huphurh ngang thung.

     Peksangzuala a exam zawh tawh avangin hostel ațangin kan hruai chhuak a, ani hi chu mipa a nih bakah kan cheng ho tam hman lem lo bawk nen ka lakah chimawm chhuah leh min huat hmel lutuk angin a awm ve lem lo. A u-in exam a țan chho ve nghal a, nungchang țha pangngai tak, han khuahkhirh ngai ang chi a ni lem lo bawk nen a u lehkha zir ka ngaihven atalangin Peksanga chu ka buaipui zui viau lo. A leng chhuak ngai lo a, TV a en loh leh a roomah computer-ah games khelin a inkhung nileng a, a țhiante hian an rawn pan a, an awm khawm leh laih țhin bawk.

     Min ngaina lo a, a bula awm tam turin min duh lo tih hre reng chungin Pekhluzuali lehkha zir chu ka vil deuh reng a, amah ka ngaihven vanga a lehkha zir ka tih buai thu a sawi hnuah pawh ka menpui ziah a, a eitur siamin a bulah ka chhawp thlap a, a mutthluk hlekin ka kai tho vat zel bawk. Min haw tak zet a ni tih ka hriatna chuan min ti tîm deuh țhin naa ka luhlul ka chhuah lui tlat a, zanah a mut hma-in ka mu ngai lo a, zing hma takah ka kaitho ziah bawk. A pa a hlauh vang nge ka kaihthawh hian rei rial lovin a lo tho ve mai zel a, a inphihfai zawha a in turin a lehkha zirna dawhkanah thingpui leh a hmeh ka chhawpsak ziah bawk. Ka theihtawp ka chhuah ve tak meuh meuh a, min la haw reng a nih chuan ka thiam loh a ni ngawt thei tawh bik lo tiin ka rilru-in thiam ka inchantir hle.

     Exam an zo a, a hunawla a awm mai mai kan remtih loh avangin a pa nen a tih theih tawk tur kan ngaihtuah a, a vang viau mai. Ka thiannu dawr nei hian a dawr nghaktu nula pakhat a chhungte damloh vanga an khuaa a haw thut a ngaih thu leh a awm loh chhunga lo puitu tur a duh thu min hrilh hlauh a, u Rina ka hrilh vat a, a fanu chu a result chhuah hma dawr nghak turin a hrilh nghal hmiah.

     A pa hi a zah êm avangin a hnial ngam lo a, a châk lohzia erawh ka hai lo kher mai. Hreh viau mah se a pa berin a tih miau si avangin dawr nghak tur chuan a liam nitin ve ta a.

******

     "Mambawihi hi kutdawh fanu a ni lo! Engtin nge hna thawk tura i tih ngam zawk chu le!"

     A aw chu a ring țha țhak țhak kher mai! A thinrim hmel chu a sen awp awp a, huat hmel lutukin min melh râwm râwm a, min tham loh hmel zetin a hmui a ti sawi nâng bawk.

     Inrinni a ni a, ka pasal a awm lo; Peksanga a roomah games khelin a awm a, kan nula lah a insuk zarin in chung lamah a awm daih bawk.

     "A tana țha zawk tur nia kan hriat angin kan tih tir mai a ni. Hna hahthlak lutuk pawh a ni lo a, amah pawhin nuam a ti viau tawh asin," ka theih anga aw nemin ka chhang a.

     "Nuam a ti a! Heta ka rawn kal hma lawk khan țap chungin min rawn bia asin! Ka fanu hi ka hre chiang a, nangin hahthlak anga i ngaih loh kha a tan chuan a hahthlak dawn lutuk! Hna thawk ngai lo a ni a, a tan a hrehawm dan tur i hrethiam pha ve lo ang. Hetianga a tha i it viau dawn a nih chuan ka hnena awm turin ka hruai mai ang, ka kawng lo dal hlek suh ang che. Nang ang nuhrawn lak tlak loh zet a hrawn reng hi ka phal rêng rêng hleinem," a ti leh hmuar hmuar a, a hmel țhat ang aiin a țawngkam a chhia ka lo ti rilru mawlh mawlh thung.

     Zanah u Rina'n Peki a nu-in awmpui a tum tih a sawi a, ka rin aiin a che rang! Vawiin khan min ankhum hrep hnu-ah Peksanga a han hmu a, eng thil nge a sawipui ka hre lo naa a awm rei viau a ni tih erawh ka hre thung. A haw hnu khan u Rina a lo be nghal a, ka enkawlna hnuaia a awm chu a ngaih a țhat loh thu leh a nun a chhiat vek a hlauh thute a lo sawi a nih awm chu!

     A vawikhatna atan ka pasal thu ka hnial a, a nu hnena a awm chuan a nun a chhe zual sauh dawn tih ka hriat chian êm avangin ka remti lo bur. Ka remtih loh chhan sawi lang lem lovin kan inkar siam țha hmasa lova hmun danga awmtir ka duh rih loh thu ka sawi a, a ngawih vang vang hnu-ah ka thusawi chu a pawm tih lantirna'n a bu ta nghat a, ka lo thaw huai mai.

     Chuta țang phei chuan Peki țawngkam țha chu sawi loh, a biak pawh ka hlawh ngai ta lo. Ka biak pawhin min chhang duh lo a, a tana ka thil tih rêng rêng eng mah duh a nei ta lo bawk. A pa a awm ve reng lai pawhin min huatna a lantir hreh tawh lo a, nuhrawn sual ber enin min en a ni ber mai.

     An result a chhuak a, distinction-ah a pass ve hlauh mai, subject pathumah letter a hmu bawk. Ka lawm hle a, ka lawmna belh chhah turin an result chhuah ni chuan hlim hmel min hmuh ve bakah ka biakin min chhang bawk. Ka lawmna te chu a va tê tham ta si êm!

     A pass kan lawm ni chuan a nu a tawrhhlelhawm leh viau mai. Ka khing let duh lem lo; ka pasal ka lamah a țang tih ka hre chiang bawk a, mênah thlak ka tum ve tlat a, ka ngaipawimawh lo lui a, khing let lovin ka awm thei phian bawk.

     A college kalna tur buaipuiin ka phe nghal char char a, Pachhunga University College-a science zir a duh avangin seat chan loh hlauvin ka buaipui nghal a, a result a lo țha bawk nen vanneihthlak takin interview ngai lovin admission kan ti thei ta nghal a, awlsam taka kan ti fel thei ta chu ka lawm kher mai.

     A pa hnenah a țhiannu Masawmi pass lawmnaa kal a dil a, dawrah a kal tawh lo bawk nen a pa chuan a lo phal ve mai bawk a. A țhian te'n an rawn sawm a, a kal tur chu ka au zui leh pek.

     "Hetiang hmuna kal hian tum miah lohin humsual dai palh theih a ni a, fimkhur hle la ka duh. A hma thei ang bera lo haw i tum ang a, thil țha lo leh i nun ti chhe thei lam chu pumpelh i tum hram hram dawn nia aw," ka ti a, zan lamah an țhianhova awm khaw tlai an tum bawk nen ka ngaihtuah deuh a, ho tea hmingchhiat theih a nih miau avangin ka ngaihtuah a ni.

     Ka bulah rawh let lehin zam map lovin min melh a, hawi deuh larh chungin min din chilh hmiah.

    "A hma pawh khan ka nu anga awm lo turin ka hrilh tawh che! Eng vangin nge ka nuna thu nei ber awm ziazang hian i țawng ziah? Ka nu dinhmun hi i luah zo ngai dawn lo a, tum pawh tum chhin duh suh. Ka nun dan tur chu ka thu thu, i lo sawi ve tur a awm lo," tleirawl țawngka chhuak atana mawi lo leh rapthlak zetin min ti let ta erh a.

     Ka sa ve ta phat mai. Kha chen kan inkar chhia siam țhat tumin ka hmanhlel a, a pa nupui ka ni chungin a inphahhniam zawkah ka țang zel a, țawngkam na deuh taka min țawng khum pawhin ka ngawi mai zel a nih kha. Tunah chuan a lutuk ta mah mah e! Ka ngaihtuah leh buaipui nih duh lo nanana chu ka ngaihven malêk anga ti nia!

     "Pekhluzual, naupang tê si i va zak lo reuh ve maw le! Khatiang kha nute țawng khum dan tur a ni em ni? I nu hnenah khan ngaidam dil nghal vat rawh!"

     Ka pasal lam chu kan en nghal dawrh a, a lo kal lai ka hre miah lo! Peki chu luhlul zetin a din ngaiin a ding tlat a, rum lutukin min melh ngat ngat bawk.

    "Ka thu sawi chu i hre lo em ni? I nu hnena ngaihdam i dil hma chuan khawiah mah i chhuak lo ang," a pa chuan a rawn ti fiak leh țhak a, Peki erawh a la ding ngawi ngal thung.

     U Rina thinin a tuar ta lo ni ngei tur a ni a va pan hnai a, ben a tum tih ka hmuh rualin rang zetin ka va ban a, a banah chelhin ka pawt bet nghal a.

    "U Rin, a tawk rih e. A thiante'n an nghak reng tawh si a, kan mualpho lutuk palh ang e! Kaltir phawt mai rawh," aw khur deuh dar dar chungin ka ti a, a khawih lui ang tih hlauvin ka theih tawka nghetin ka kuah bet tlat a.

*******

     "Engtin nge khatiang êm êma nungchang mawi lo kha a neih theih! Ka fanu ngei chu a ni si a, hetiang khawp hian a nu zia a chhun tih ka lo hre ngai hauh lo. Aia upa zahna a neih loh bakah a nu i nihna anga zahna che lantir kha harsa a ti hle a nih kha! Tenawm lutuk!"

     U Rina thinur chu kan room tukverh bula dingin a inhrosa chiam a, ka lo ngawi reng thung. Dik tak chuan khati khawpa min zah lotu leh engah mah min ngai lotu lakah khan ka kut ka sil rilru tawh a, buaipui awmze awm lo a ni tiin ka rilru ka siam fel titih der tawh a, sawi ve tur ka nei lem lo a ni ber e. Tlema a inan thawl deuh hnu chuan khum lamah rawn pheiin ka bulah a rawn țhu a, ka samah chul thuakin min kuah zui a.

    "Ka lo ngawi rei mah mah a ni. I hneh mai turah ka lo ngai a, ka rin ai daihin a luhlul mai. Fuih khawlotu awm lo se khatiang taka țawngkam dengkhawng kha a hman ka ring lo!" a ti sup a. Chu chu kei pawhin ka lo ngaihtuah mêk a!

 ******

     Ka muhil tui lai chu eng emaw vangin chiang lutuk tak maiin ka harh a, ka țhu chhuak nghal hlawl bawk. Eng vang nge chu ka hre chiah lo naa ka rilru a nuam lo riau a, tui taka ka pasal muhil chu melh zeuhin tih harh hlau takin ka thawhsan ta țhem țhem a. Khum bula kan tui chhawp chu novah thli chhuakin ka in a, no la keng reng chung chuan room ațangin ka chhuak a.

     Peksanga room kawngkhar hawnna chu ka herh a, a lo inkalh avangin Peki room lam pan chuan ka pen phei leh nghal a. Ani pawh hian a rooma a awm hi chuan a inkalh khum ziah avangin hawn theih inring lo chungin ka va pan a, ka beisei miah lohin ka hawng ta mai si a, mak ka ti viau mai. A room chhung ka en chuan ka thaw ta hak a.

     Tunah zing lam dar khat a ri tawh a, tun thlengin a lo la haw lo a nih chu! Ka rilru nuam lo sa chu hlauhthawnna-in a rawn belh chhah a, ka tirilah ka khur nghal dar dar a, ngaihțhat lohna-in min rawn tuam nghal hlawp hlawp a ni ber e.

     A lakah a pa a lungawi lo sa tawh si a, tunah a lo la haw lo tih a hriat ngat phei chuan kut a thlak duh hial dawn a, a pa hriat hma ngeia koh haw a ngai dawn a ni. Kan room lamah ka let leh a, ka phone chu thawm dim thei ang bera la-in ka chhuak leh nghal a. Pekhluzuali number ka dial nghal a, a in-ring ral țhak! Ka call nawn leh pawhin chhanna a la awm chuang lo. Vawi nga ka call hnuah pawh min chhan theih tàk loh avangin ka mang a ang tawlh tawlh a, Peksanga ka call ta ngawt a.

     Ka rin loh takin min chhang rang hle, a la muhil lo a nih ka ring mai a. A u lo la haw loh thu leh a room pawna ka awm thu ka hrilh chuan a room kawngka chu a rawn hawng vat a, rang fahranin ka lut nghal a. Kan thawm a pa'n a hriat lohna'n fimkhur tura hrilhin a insiam chu ka nghak a, a kekawr bul hak chu a thlak a, jacket pan deuh a ha leh tawp a, a inpeih chu a ni der a.

     Kum la tling lo mah se a pa bike a khalh fo țhin avangin a hnehsawh ve hle tawh a, a phurha chuan pawh ka hlau lem lo; a u țhiannu Masawmi te in lam pan chuan kan tlan chhuak ta nghal a. Kan va thlen chuan a lo reh deuh țhiap a, kawngka bula kan din hnaih hnu chuan in chhung lama thawm awm kan hre thei ta a, kawngka chu ka kik nghal zat a.

     Masawmi'n kawngka a rawn hawn rual chuan Peki hruai tura kal kan nih thu ka sawi nghal a, phawk zetin min en a.

     "A lo la haw lo maw? Nichin deuh tawh khan kan țhianpa pakhat nen an rawn inphurh haw daih tawh kha!" a ti ta mai.

     "Dar eng zat vel nge i hre thei em?" ka zawt a.

     "Ka va'n hre chiang tawh lo tak! Dar 12 vel a niang," a ti niah niah a, a țawng zawng chuan zu rim a nam hak reuh a.

     An țhianpa hming ka zawh chuan Hriata a nih thu min hrilh a, an in awmna laite kan inzawh hnu chuan kan kal leh ta nghal a. Bike-a ka lawn tur chiah chu min rawn au lehin kan lam pan chuan a rawn phei a.

     "Ih... Eng lo... Lalhriata khan World Bank Road lama len kual a sawi tlatin ka hria a, an kal lo maithei bawk; ka lo sawi ve mai mai," inrintawk loh hmel zetin a ti a, kan chhanna pawh nghak lovin a inher a, in chhungah a lut ta daih a.

     Hriata te awmna tia a sawina lam pan chuan kan kal leh ta phawt a, kan thlen chuan a lo thim țhiap. Kan Peki hian ngaihtuah chiang mang hlei lovin pasal a um ve ngawt em maw ni dawn le! Ka mang a ang tawlh tawlh mai. Mi muhil tawh han kaihthawh chu kan hreh ve deuh a, beidawnna'n World Bank Road lama kal leh phawt chu kan tum ta a.

     A hmun kan thlen chuan han zawn viau ngaihna kan hre lo a, muang deuha tlanin kawng sir lam chu kan melh phei pah tawp a. Zinglam dar hnih a ri tawh a, thawm a la awm zeuh zeuh tho. Car tape play thawm hriat tur a awm pheuh pheuh a, kawng sira motor ding chhunga lo titi bawrh bawrh te, mipa leh hmeichhia lo induat ta viau te pawh hmuh tur an la awm nawk mai, kan zawn berte erawh an vang phian.

     Nula leh tlangval han awm duhna awm nia kan hriat chu kan en kual chhuak vek a, kan hmu zo lo. Beidawnga haw mai tumin kan let leh a, beisei nei vak chuang lovin kan la hawi kual nasa viau mai.

     Hmeichhe țe țhat ri ka hriat rual chuan Peksanga chu ding turin ka hrilh nghal a, a din rualin ka chhuk thla vat a. Pekhluzuali aw ni ngeia ka hriat avangin thawm lo chhuahna lam pan chuan ka pen nghal hmawk hmawk a, ka hnungah Peksanga'n min rawn zui bawk.

     A laka kutsil tum si khan zankhaw tairekah amah zawngin ka chhuak a, a chungchanga inrawlh tawh miah lo tura rilru siam zo chauh e ti lo chuan ka hmuh hma chu haw mai ka tum hauh lo bawk. Ka pasal fate hi ka lo hmangaih ve tak tak tawhte pawh a ni mahna!

     Thla eng deuh riai hnuaia mipa leh hmeichhe lo inbakkaih chat chat chu ka va hmu a, ka kal chak zual sauh a.

     "Min thlah rawh! Eng vangin nge hetia min tih?" hmeichhia zawk chuan lungchhe aw deuhin a ti a, kan fanu Pekhluzuali ngei a ni!

     "Zan rei hnua phurh kual mai mai theih hmeichhia te chu nawmsip bawlna atan bak eng atan nge ti se min tih? Țang khawtlai lo khan awm țha hle hle teh, ka ning țan riau a nia. Mipa bula zu in thei, zan rei tawha fawrpui mai mai theih i nih kha, fel ber ang maia țang reng lo khan ti vat vat ang," Hriata'n a ti hluk hluk a, a sawi zawh rualin a kat nghal nawk bawk.

    "Ka fanu hi i rawn tawk leh a nih chuan ka nam sawn satliah tawh lo ang che! I ngam chuan rawn hnaih leh rawh, eng ang nu nge ka nih i hre mai ang," nelawm lo zetin ka ti fiak țhak a, Peki lo ding khur hlak hlak chu ka kuah nghal zat bawk.

     Khati khawp khan a lakah lungawi lovin ngaihtuah loh tum mah ila, ka pasal fanu hi ka lo hmangaih hle tawh a lo ni. Eng anga chimawm leh huatthla la pawhin ka lakah awm mah se ka ngaihtuah bâng ngai dawn lo. Lungchhe taka a țap hlap hlap chu ngawi renga kuahin a lu-ah ka chulsak heuh heuh a, ka mittui a tla ve lo chauh bawk.

     Ka phone a rawn rik chuan ka phu deuh zawk a, ka pasal a lo ni a. Thil awm dan chipchiara sawi duh lovin Peki'n buaina a tawh vanga lam tura kal kan ni tih chauh ka sawi a, a bak chu in kan thlen hunah ka la hrilh fiah leh mai ang chu.

     Tih dan dang vak awm ta lo chu kan nufa thum chuan bike-in kan inphur haw ta ngawt a, in kan thlen chuan u Rina chu sitting room-ah a lo țhu a. A fanu hmel a hmuh rual chuan lo tho chhuakin a pan hnai vut a, Peki bul a thlen rualin a ner nghal sawk a.

     "Pekhluzual, zu te i in elo? Eng vanga lam ngai khawpa rawn haw tlai nge i nih sawi vat rawh!"

     U Rina aw chu a ring vak lo naa a fiah țha-in a lungawi lohzia a hriat theih vek a, Peki chuan a pa chu en ngam lovin lei lam a bih tlat a.

     "Ngawi reng lo khan min chhang vat rawh," a pa chuan a ti leh a.

     Zawi muanga rawn hawi chhuakin min rawn melh a, chuta a mitmeng chu ka theihnghilh leh theih ka ring lo tawp. Țanpui ngai ngawih ngawih leh ka chhan beiseina nen min melh a, rei erawh a ni lo. Mahse, kha hun reilote chhunga ka laka a beiseina mitmeng kha ka lo chhiar thiam hman vek!

     Peki chu ka va kuah a, u Rina banah ka chelh nghal zat bawk. Muang chângin thil awm dan ka sawi a, thil thlen dan dik hre lo mah ila Peki thlavang hauh ranin ka țawng thung.

     "Tun hi a thlavang hauh hun a ni lo, kha chen kha hauh leh sawisel ka tum apiangin min dang ziah a, tun țum chu ka ngawi thei tawh lo. A tih sual man hi a tuar ngei tur a ni," u Rina chuan a ti ngut mai si a, an inkhawih pafa ang tih ka lo hlau hle.

    "Thinrim laia thil tih hi a țha ber ngai lo a nia, insum rih la; khua lo var phawt se, Peki pawh a rilru a lo fim deuh tawh ang a, i zilhna pawh tun ai ngawt chuan a dawngsawng țha thei zawk ang," tlawn deuh titiha u Rina en chungin ka ti ve tlat a, min hnial ta êm lo e.

     Peki a roomah ka hruai lut a," Inti fai la, mu nghal ang che," ka ti. Engtin mah min chhang lo a, kan inhmuh hnu khan a la țawng lo hrim hrim bawk.

     Kan nupa-in mutnaah kan sawi zui a, a rawn haw har piah lamah zu rim a nam kher leh zawn ngai khawpa a awm kha a pa lung a awi thei ngang lo a, a fanu-in a nu zia a rawn chhun chho lutuk chu a lawm lo tak zet a, a thin a ur hlur mai a ni.

*******'

     Tukțhuan ei hunah pawh a la rawn thawh loh avangin Peki kaitho turin a room panin ka kal a, kohhran committee pawimawh zingkârah a awm avangin a pa a chhuak a, a lungawi lohna tih lanna hun a la nei lo hlauh.

     A kalh ziah țhin avangin a room kawngka chu hawn pawh tum lem lovin ka kik karh karh a, ka rin loh lutukin aw zawi sepin lut turin min lo au a, a room kawngka chu ka hawng nghal zat a, a lo kalh hauh lo a lo nia.

     "Ih, nizan khan beer chiah ka in a, ka rui lutuk kha mak ka ti tawp. A hma pawhin ka in ve fo tawh a, khatiang tak khan ka rui ngai miah lo. Ka in turah khan thil pawlh an nei a nih ka ring," a ti sep sep a.

     A muhil miah lo ni ngei tur a ni a mit chu a sen râm a, a țap tih hriat takin a bui lâk bawk. A khumah kan țhu dun a, zan lam chanchin a sawi chu ka ngaihthlaksak a.

    "Ka ruih êm avangin lo haw kha ka hreh a, kha pa khan leng kual phawt ang a tih avangin ka lo duh ve mai a. Ka ruih a reh deuh hnua haw ka rawt khan a duh ta tlat lo a, a tirah chuan min thlem phawt a, ka duh tàk lohah khan min khawih lui ta a. Ka theih ang angin ka sual let a, ka thil in vang khan ka tha a zawi deuh bawk si a, ka țang țha thei vak lo lehnghal. Lo kal lo ula chuan..."

     A kun a, a malchunga a kut dahah chuan a mittui a rawn far nghal kauh bawk. Ka lakah fel lovin ka thu awih lo hle mah se a sawi ang tak chu thil awm dan a nih ka ring hmiah a, khatiang thil thlen tawh hnu-ah a mizia enin dawta pha kual chi a ni lo tih ka hriat vang pawh a ni mahna!

     "I lakah ka sual êm êm chungin min ngaihtuah a, ngeiawm taka ka awm pawhin min hau ngai hek lo. Mahse, ka nu luahlantu ni anga ka ngaih vang che-in ka haw ngawih ngawih tho che a, mawi lo tak takin ka țawng khum thin bawk che. Khawngaih takin min ngaidam rawh aw, " a kut khur deuh dar dar chu a hum ruh tlat a, a la kun reng bawk.

     A darah ka kuah a, ka kuah lohna lamin a kut ka humsak bawk a.

    "I la naupang êm a, thil awm dan dik tak hre thiam lo tan chuan khatianga awm kha a àwm lutuk! Kei pawh ni ila i awm dan ang khan ka awm ve maithei a ni. Tunah chuan inhrethiam tawn takin bul kan țan thei tawh ang chu tiraw?" ka tih chuan muang chânga rawn hawi chhuakin a mita mittui la tling Pam chung chuan min en a.

    "Englo... Ih... Ânu kha a uire tih ka lo hre miah lo a, nizan khan Lalhriata khan a sawi a. A tirah chuan ka awih lo a; mahse, a uirena pa kha a lo hre chiang viau a lo nia, ka zahzia mai chu! 'Uire fanu mai mai' min tia, zah lo deuhin min khawih vel a..." sawi zo thei lovin a inhnit hlawp hlawp a.

     Han sawi zawm ngaihna mai ka hriat loh avangin ngawi rengin ka kuah tawp a, a lungchhe zualpui a reh chuan a rawn sawi zawm leh a.

    "Dik tak chuan, Ânu khan Âpa i neihna chhan chu a hausak vang tih a sawi a, kan inhmuh leh phone-a kan inbiak apiangin i chanchin a chhe zawng hlirin a sawi bawk a. Nang hi awm lo la chuan Âpa nen an inneih leh daih tawh tur thu te leh nangmah ka țawng khum dan tur che min hrilh ziah bawk. Tunah chuan Ânu aiin ka ring tawh zawk che."

    "Uire pawh ni se i nu a la ni reng tho a, a chhe zawnga a chanchin sawi loh hram tur a nia. A hmangaih reng tho che a ni tih theihnghilh lo la, tunah i hua a nih pawhin nute nge nge chu kan tan an hlu êm a, tih lan loh hram i tum dawn nia," ka ti malh malh a. A rilru a lian reuh si a, a nu rilru natna tur leh thinrimna turin a lo va țawng duh mai ang tih ka hlauthawng ru viau mai.

     A pa lo haw thawm kan hriat tàk avangin a room ațang chuan kan inzui chhuak dun a, a hmel ka hmuh rual chuan a fanu laka a lungawi lohna chu a la nasa hle tih ka hre thei nghal a. Buaina a chhuah hlauvin ka be nghal mawlh mawlh a, a haider lui hmiah thung. Rum lutuka a fanu en chungin a pan hnai a, Peki chuan a pa thinur hmel chu en ngam lovin hnuai lam a bih ta daih a.

      "I chhuak turin țawngkam mawi lo takin i nu i bia a, ka thu ngai pawimawh lova chhuak luiin nuam i va tawl bawk. Zu i in bakah zawn ngai khawpin i va khawsa bawk a, eng ang fanu nge maw i nih reuh le! I inchhirna tur khawpa nâ-in ka'n khawih teh ang che. " U Rina thinur lutuk chu a țawng a sehchilh nak mai.

     Ka pasal thinrim chu ka hlau lo a ni bik lo; mahse, Peki thlavang hauh chu ka tan tih makmawh a ni tlat! An pafa inkarah chuan ka va ding vat a.

    "U Rin, i inchhir lehna turin eng thil mah ka tih tir dawn lo che. Peki pawhin a chunga thil thleng hi inzirna'n a hmang ang a, a fel chho tawh dawn tih hi ka chiang a ni. A nungchang a thlak lo a nih chuan a mawh ka phur ngam e," ka ti a, ka pasal hmel ka en ran bawk.

    "Hetiang naupang sual, aia upa zahna châng hre lo leh ruih ching hi lo chhan hlek suh! Kha chen ka lo en liam tawh a, tun țum chu ka ngaidam thei tawh lo," tih pahin min nam sawn tumin min rawn vuan a, ka lo țang ve tlat thung.

     "A tawk! Khawih luih țalh i tum a nih chuan keimah hi min khawih hmasak a ngai ang. Chuti a nih loh chuan ka fanu hi ka khawihtir dawn lo che," ka ti rum ve al a, ka chhungrilah erawh ka khur nasa viau.

     Chutiang taka a thlavang ka hauh tàkah chuan a tum lui ta bik lo a, ka thaw ru suai suai mai. Peksanga ka au a, tukțhuan chu inbe mang lovin kan nam liam ta vel mai mai a. Tun boruak hi han reh se, boruak țha zawk kan nei chho zel tawh turah han ngai phawt ila.

*******

     Thla thum a liam a, Peki nungchang hmuh theihin a danglam vek! A pa chu a lawm hle a, lawmthu te min hrilh hial mai. Amah ai mahin ka lawmna a sang zawkin ka ring asin le!

     Tuk khat ka zing tho chu ka nuam lo hle a, a chhan ka hriat si loh hian ka ni deuh nghulh reng a. Kan nula thil kan rim te chu ni danga rim chhia ti ngai hlei lo kha ka luak a ti chhuak hlûi a, inring hman miah lovin ka uak tuar a, bathroom lam panin ka tlan nghal vat a.

     Ka luak zawh hnu chuan kan room lam ka pan nghal a, u Rina'n ngaihtuah hmel zetin min rawn zui vat bawk. Almirah ka hawng a, ka thil dah țhat chu phawrhin bathroom-ah ka lut a, kawngka nghengin min lo nghak run a, ka țha em tih min lo zawt sek bawk.

     Ka test kit ken chu ka en nawn leh a, rinhlelh tur a awm lo, pahniha inrin sen thla chuan a ti chiang e! Bathroom ațanga ka chhuah chuan u Rina'n min lo kuah nghal a, khum lamah dim zetin min kuah phei hlu hlu a.

     Ngawi rengin ka thil ken chu ka pe a, a thlek vung vung a. Chuta a rawn hawi chhuak leh hmel chu hmuh nuam ka va'n ti tak! Hlim lutuk tih hriat tak maiin a nui a, dimdawih ru tak si duhthawh zetin min fawp a, min kuah nghet ngei mai.

     Chaw ei laiin u Rina'n chhungkaw member kan pung dawn tih a sawi chuan Peksanga a lo kûk raih a, kan nula pawh a lo phûl ve hlut mai.

     "Nu, keima'n ka nau hming chu phuah ka duh a nia aw," Pekhluzuali'n a rawn ti a, hmangaih taka en chungin ka lu ka bu nghat a, a hlim hmel chu hmuh a nuam tak zet a ni.

    

     ******************