PEKSANGA 23

 PEKSANGA 23

Sbk Pachuau

     "Khawngaihin hetiang hian ti suh! Min duh tak tak a nih chuan hetah ni lo, i khumah ngei a hmasa ber chu tih ka duh a ni," a mangang aw khur chu thup tum zet chungin Azuali'n a ti a.

     A beisei vak lo ni ngei tur a ni Azuali thusawi a hriat chuan a tawp deuh chut a, lawm deuh bawk si, ring lutuk si lovin a awm a ni ber e. 

    "A fin phakar a chhuah a nih kha, a thusawi kha awih miah suh!" room kawngkhar bula dingin Baby-i chuan a lo ti fiak țhak a.

     Zuala chu ngaih dan mumal pawh nei thei lo khawpa rilru fim lo a nih miau avangin a thu hriat hnuhnun apiang chuan a beng a luh a ni zel mai a, tha thawh thar lehin Azuali chu fawh tumin a kun hniam a, ani lah chuan duh lovin a lo hawi sawnsan zel a.

     "Ka thu sawi kha ka fiamthu miah lo a nia..."

     A sawi zawh hmain Baby-i bawkin a țawng chu a lo pawt chat leh a.

     "Zuala, ka sawi kha hre reng rawh. I taa i siam hma poh leh a rilru i hneh hma dawn ka tih kha. He hun țha hi i tan.... Eng thil nge ni phiangsen!"

     Kawngkhar ri bur chu mipakhat țe țhawt thawmin a zui zat a, Baby-i chu room chhûngah chuan nawr luh luih tih hriat takin a tei lut nawk a, Azuali te lo mutna khum chu a va bawh rawk nghe nghe.

     Zuala hawihai, chet nachang hre lo chu Azuali chung ațangin a phih tho nawk a, a hmaiah tak na mangkhenin a hnek zui siah bawk. Leia a tlu tawh chu khawih zui tumin a pan a, Lalhriata'n lo dangin a mitmeiin tawp turin a lo khap a. Chuti ni lo se a thinur thin tawt lutuk chuan tawp chin nei lo tawpa sawisa-in tual hial pawh a that lovang tih a sawi theih tlat loh a ni. 

     A țhianpa thu chu zawmin mangang taka a nupui lo țhu chu a pan phei a, khum ațanga pawt thovin nghet zetin a kuah nghal thlawp a.

     "I nupui kha a uire a nih kha! Mipa nen an mu dun lai i hmu a, tikhan i la pawm thei dawn..."

     "Ngawi hmak rawh! He i thil tih tenawm tak avang hian eng ang chiahin nge hremna i tawh dawn tih chu i la hre mai ang. Ka nupui chungchang hi kha i ka bawlhhlawh zet hmang khan vawikhat tê pawh sawi ri leh tawh ngai suh ang che!"

     Peksanga chu a vin hran lo. A aw-a hlauhawmna inphum ru erawh mi a tan lo chuan haider rual a ni lo thung.

    " Shhh... Bawihi, engkim a țha vek tawh a nia. I bulah ka awm tawh a, tuman ka lak ațangin an la hrang leh tawh ngai lovang che," tiin a nupui, a awma hmai phum chunga țap hlap hlap chu a kuah nghet sauh a.

     "Peksang, ka hmangaih che asin! Kha nu ai khan ka ti hlim thei daih zawk ang che. Khawngaihin min ngaidam la, min mantir lo hram rawh. Kha hmeichhia kha mipa dang a mutpui vang khan țhen daih la, kan pahnihin hlim deuhin kan awm dun tawh dawn alawm!"

     Baby-i chuan lungawi lo zeta a kuta kutkawl an buntir chu enin beisei nei hmel pu tak chungin Peksanga lam chu a hawi leh a. A rilru a fim hlawl lo tih a lang reng mai, Peksanga a duhna luangliam chuan khua a hmuhtir loh mai bakah rilru mumal pawh pu thei lo khawpin duhthusam ramah a chentir a, Peksanga'n duh ve tura a ngai tlat mai leh a nupui laka țanga pawh hran a tum tlat chu atna hlauhawm tak pakhat chu a ni chiang e!

     Khatia Azuali a bo hnu khan ei leh in chu sawi loh, mutmu pawh tuah thei lovin a Peksanga chuan a chhui zui char char a, a tirah rinhlehlhna chang hre nghal mai lo mah se rin tur dang awm ta lo chu Baby-i a pan hmasa ber kha a ni a. En thlak zui atana dah siin a lo chhu zui har deuh kha a ti fuh lo ta a ni. 

     Zuala enthlak hna chu a bei ngawrh ta zawk a, a pa damlo chhungkhat laina leh țhenrual țhate'n an menpui ngai khawpa a chauh zuallai a nih avangin duh anga hmain Zuala chu an chhui fuh thei ta mai si lo. 

     Chuti chung chuan beidawng duh miah lovin a mi rawihte chu Zuala leh Baby-i kal velna apiang hmaih nei miah lova en zui turin a chah a, loh theih loha Court-a inlan a ngaih avangin rilru khingbai deuh chungin a naute chu a kalsan ta kha a ni a. A hna lam aia a nupuiin a rilru a buk rih hneh êm avang chuan lehlam ukil chuan nidang ang lo a tih thu leh dam lo ang maia a lan thu a hrilh hial nghe nghe a ni.

      A case khawih laiah chuan rilru a pek theih ngang loh avangin hun pek belh turin a dil ta ngawt a, amah ruaitu pawh zahawm a ti viau a ni. Judge-in thubuai ngaihtuah leh hun tur a puan fel hnu chuan an zo ta hram a, a phone a phawrh nghal zat bawk.

     A nau chhawrte hnen ațanga missed call eng emaw zat lo awm a hmuh rualin a call let nghal a, Zuala leh Baby-i te chu an chhui fuh thu leh an pahniha in pakhat an pan ve ve thu an rawn sawi a, an awmna in bul maia an awm mek thu an rawn sawi bawk.

     A office pawh tlawh tawh lovin hmanhmawh zetin a tlan chhuak ta nghal a, Lalhriata a call-in thil awm dan a hrilh zui nghal mawlh mawlh a, hmanhmawh turin a tur pah zat bawk. Hmanhmawh rilruk mah nak alaiin traffic jam vangin duh angin a tlan chak thei si lo, a thin a rim hlur mai a ni. 

     A motor chu tlansana two wheeler taxi hman emaw ke-a tlan thlak maite chu a duh rum rum a, motor park maina tur a awm leh chuang si lo a, a naute chu inchhung lam thawm ngaithla paha fimkhur taka awm turin a chah nawn leh ta ngawt a. A thleng thla hman lo hlauh a nih pawhin thil thleng eng emaw a awma Azuali an kutah a awm ngei a ni tih an chian chuan chet lo la mai turin a chah bawk.

     Traffic jam a ziaawm tàkah chuan a hla lama kual lovin Sikupuikawn traffic point-ah a kual a, Kawltheihuan pan thlakna kawngah chuan a tlan thla ta a. Mission Vengthlang kawn a thlen thlak chuan a naute chu be lehin thawm lo ngaichang reng turin a chah nawn leh a, an awmna hmun nia an sawi lam pan chuan chak tawkin a tlan thla nghal a.

      A motor ațangin a chhuk chiah tihah Lalhriata te an lo thleng ve a, ngaihsak hma lovin a naute nen inbe pah zelin kawng an inhrilh a, step-a a tlan thlak lai chuan a hnungah Lalhriata leh constable pahnihin an rawn zui ve hlawk hlawk a. 

     Zuala țhianpa in a thleng thla a, a naute chuan an țawng ri an hriat ațangin Azuali chu inchhungah chuan a awm ngei tih an lo hrilh a, kawngkhar bula a din lai chuan Baby-i țawng lar lar ri a hria a, thinur lutukin kawngka chu a nam hawng rawk a. In neitupa chuan lo dan a tum ve sateh naa a vawikhat hnekah a awp nghal rawk rawk mai a ni. 

     Bedroom kawngkhara Baby-i lo ding chu nam per lâwpin room chhûngah chuan a lut a, a nupui chunga Zuala lo bawk vung chu dim hauh lova phih tho lâwpin a hnek zui nghal siah a. A hnek na bawk a, Zuala chu pai chawn chawnin bang bulah a va tlusawp nuai a. Sawisak zui hrep tuma pan a tum laiin a țhianpa'n a lo dang a, a nupui lam panin a kal ta zawk a. 

    Baby-i lo țawng zawt zawt chu hnek pawp a chak kher mai! Hmeichhia chu ni lo se na lutuk tak maia hneka sawisak chu a chak hluah hluah a, a hmel a hmuh ringawt pawhin a haw lutuk chu puak thei mai dawnin a inhria a, a hmuh phak loha hruai bo vat turin constable pakhat chu a hrilh ta hial nghe nghe a.

     Lalhriata leh a naute'n an mi mante chu station lamah an phur phei a, constable pakhat erawh a motor khalh tura a duh avangin a phei ve lo thung. A nupui chu a hnung seat-ah a țhutpui a, duat taka kuahin nghet zetin a kut a humsak bawk.

     In an thleng a, Sangpuii bakah a ute nupa an lo awm a, Ruatpuia leh Freddy an lo awm bawk. A nu-in Azuali a hmuh chuan mittui tla chungin a kuah ngawih ngawih a, a pa pawhin a kutah a lo humsak vang vang a. Eng mah sawi lo mah se a mitmenga amah a ngaihtuahna leh ngaihsakna chu a hmuh hmaih hauh lo.

     Peksanga chuan a nupui inbual chu puiin a inbual zawh chuan towel-in a hru hul leh vek a, thawmhnaw a inbel hnuin khumah chuan a muttir a. A nu-in eitur a siamsak chu chak lo hle mah se a taksa chau lutuk leh naute vangin a ei lui hram a, a rinai takin a ei thei ta phian a.

     Peksanga'n Remfela bia-in thil thlen dan tlangpui chu a hrilh thuak thuak a, naute tan thil țha lo thleng palh thei venthawnna atan ultrasound-a en a ngai ang em tihte chu a zawt a. Remfela chuan an doctor pangngai(Azuali naupai hnua an doctor) be tura hrilhin palh awm thei thilah check-up tura hruai a țhat a rin thu a lo sawi a.

     Tlai tawh deuh mah se ngaihțha lo taka awm ai chuan tiin hmeichhe lam doctor an pan țhin clinic chu Peksanga'n a bia a, doctor-i'n a en nghal thei dawn tih an rawn sawi tàkah chuan Azuali chu hahdam rih turin duh viau mah se hmanhmawhthlak thil nia an hriat avangin clinic lam pan chuan an inphur chhuak leh ta nghal a.

      Doctor hnena thil thlen dan kimchang Azuali'n a sawi chuan naute tana pawi lutuk a awm loh a rin thu sawiin sawisak leh khawih chhiat a ni lem lo bawk nen nau chhiat theihna chance a awm lo niin a sawi a. Muthilhna damdawi an pawlhna tui a lo in tam hman deuh avang erawh chuan ngaih tih țhatna turin ultrasound-a en turin a ti a.

     Hlauthawng leh rilru thlaphang taka a awm avang khan Azuali chu a thil tawn te a ngaihtuah reng chuan naute tan a țha lo thei a ni tih hrilhin inngaihtuah hah miah lo turin a chah a, ultrasound result-ah hlauhthawn tur thil a hmuh loh avanga rilru hahdam zawkin an haw leh ta a.

     A hunlai khan tuar thei viau leh pachang tak angin lang mah se a chunga thil thleng khan nun a nghawng nasa hle a, kar khat chhung deuhthaw mumangah te hmuin a muhil lai chu hlauhlawpin a harh fo a, a pasal tel lo chuan an room-ah pawh awm țha duh lovin a châng chuan a nu-in a awmpui a ngai hial țhin.

     A pasal chuan duatin ngaihsak hle mah se eng emaw châng chuan amah phatsan mai tur angtein a ngaihtuah a, rilru nuam lo takin a awm fo a. A ngaihtuahna kal dik lo vangin amah zawk chuan a pasal chu a hlat telh telh a, eng emaw chânga Baby-i thusawi țhenkhat a benga rawn ri leh țhin chuan a thunun titih fo mai bawk.

     A dinna hmun chu a hriat ngai pawh a ni lo a, thing hmun niin sava hram ri tih loh chu thawm dang a awm lo. Tui luang ri ni awm tak a hriatna lam pan chuan a kal a, nichina a dinna thlang lawkah khan lui lian tak a lo awm reng chu niin! A naupan laia a tlak tawh avangin tui tam tak awmna tawh phawt chu a nel ngai lo a, tunah pawh a chhak ațanga thlir chu a duhtawk viau a ni.

     Chutia a thlir reng lai chuan sava hram thawm te kha hriat tur awm lovin a reh ta duk a, a kuang lian deuh laia tui chu rawn val kual pap papin hlauthawng zeta a en reng lai chuan eng ramsa nge tih pawh hriat loh, hmel rapawm leh lian êm êm mai hi a rawn chhuak ta thut a. 

     Hmanhmawh baklenga tlan chhiat a tum chu lungte rap hrualin a tlu ta hlauh a, mangang lutuka thawh tuma a inbeng kan dawn lai tàk chuan chu ramsa hlauhawm zet chuan a rawn man dawn ta mai a, hlau lutukin a țe ta țhawt a.

     "Bawihi, harh teh!"

     A pasalin nghet zetin a lo kuah a, tal chhuah tumin ani'n a lo bei chiam a lo nia. A harh chian tàk hnu chuan a pasal àwm ngheng chuan a bei a, thui tak tlan zo hlim ang maiin hah zetin a thaw zui hlawp hlawp bawk.

     "I țha em?" a pasal chuan ngaihtuah tih hriat takin a zawt a.

     "Ka...aw...țha ang. Ka hre lo!"

     "Eng mah hlauh tur a awm lo. I bulah ka awm reng a nia," aw dam zetin a ti leh sup a.

     "Hmeichhe dang min neihsan miah suh aw!"

      A thu rawn sawi teh daih chuan Peksanga chu a țhawng angreng hle a.

     "Bawihi, eng thil nge i sawi hi?"

     "Midang min neihsan dawn tlata hriatna ka nei țhin," a ti sap a.

     "Engtin nge chutiang te i ngaihtuah theih zawk le! Ka hmangaih che a, nang lo chu tumah ka ngaihtuah ngai lo."

     "Baby-i sawi ang khan min kalsan i tum..."

     "Kha mi tenawmnu hming kha lam ri tawh suh! Dawt bak a kâ ațangin a chhuak ngai lo tih kha pawm hmiah la, a thil lo sawi chu eng pawh ni rawh se, thu tak a ni lo tih hria la, rilru tih hahna atan phei chuan hmang duh miah lovang che."

     "Min kal bosan miah suh aw!"

     "Khawiah mah, engtikah mah ka kalsan ngai lovang che. Ka kiangah i awm reng anga, kei pawh i kiangah ka awm reng bawk ang. Pumkhat kan ni tawh a, awm hrang thei kan ni tawh lo a, țhen hran theih pawh kan ni hek lo."

     "Min ngaihsak viau țhin mah la, i thinlung hian min hlat tlata hriatna ka nei leh thut țhin a. Ka chân ang che tih ka hlauh lutuk avangin ka hnaih țha ngam lo țhin che..." a pasal chuan a hmuiah a kut dahin a țawng lehzel tur chu a lo dang a.

     "Tun kar chhung zawng khan eng emaw vangin min hel dan ngawt i zawng tih ka hria alawm. Sawipui che ka duh viau naa min hlat dan ngawt i zawn avangin i rilru ka ti hel zual mai mai ang tih ka hlau a, hre lo angin ka awm ta ringawt a nih kha."

     "I hria maw?"

     "I mitmeng khan chhungrilah i hlim lo a ni tih a ti lang a, ni dang angin ka hna kal tur in thlah ngai lo a, ka lo haw-in min lo lawm ngai hek lo. A chhan chiah  chu ka hre lo naa i thil tawn rapthlak tak khan nangmahah nghawng a nei a nih ka ring a."

    "Ka tum miah loh hian ka lo ngaihtuah leh țhin a," a pasal kut khal neuh neuh chungin a ti sep a.

     "I hneh chho thei mai ang tih ka hria a ni. Ka thinlungin a hlat ngai lo che tih kha theihnghilh lo la, a eng zawngin hma lam hun thlir tawh bawk la, i hneh hun a la thleng dawn alawm."

     A pasal chu hmangaih leh duh ngawih ngawih chungin a en a, a lu chu kuai kunin hmuiah chuan lungchim zetin a fawp a.

     Engtin nge hetiang khawpa mipa rilru nghet leh țha hi a lo rinhlelh mai theih le! Chu pawh kha misual lutuk dawt sawi vang mai mai lehnghal! A nuna a luh tirh ațanga tun thleng hian a tan kawng engkimah inhumhimna a la ni char char a, ani anga innghahna tlak mipa hi an awm leh thei tawh hauh lo ang.

     Zuala leh Baby-i chu mi rukbo thubuai siamsakin thiam loh chantir an ni a, anni pahnih bakah kawng engkima an thurualpui, Baby-i țhiannu Seni pawh thubuai siamsak a ni bawk. 

     Khatia dawra a pa damdawi tur leia a kal khan Zuala chuan Seni chu bia-in Azuali a phurh thu leh a in tura pawlh atan muthilhna damdawi thawk chak deuh chi a hriat duh thu a hrilh a. A țhiannu tana phuba lakna hun remchangah ngaiin Seni chuan damdawi hming chu a hrilh ta vat a ni.

     Azuali a muthilh tàk hnu khan kalpui maina tur a hriat loh avangin Seni bawk chu a be leh a, a țhiannu-in Azuali pasal a ngaihzawn mai bakah amah Azuali chu a haw hle tih a hriat avangin dahna hmun tur ngaihtuahpui turin a ti a. Baby-i phur zawng tak lo niin Sakawrtuichhun lama an huanah dah turin an inbia a, Seni duty lai a lo ni lo hlauh bawk nen an pathumin an zu dah ta nghe nghe a ni.

     Zuala leh Seni te hi inchhung hnai tak an ni a, Zuala pa leh Seni nu hi unau inchhangbung niin an unau dang zawngte aiin an inhnaih bik hle a ni. An mizia leh rilru thlenga inanna nei ta chu anni unau pawh an inkawm ngeih fal hle a, Baby-i pawh Seni vang hian a hre țha hle nghe nghe.

****'

     A dul a len ve deuh tàkah chuan thawmhnaw hak tawk a nei ta mang lo a, a pasalin thawmhnaw thar lei tura a tih chuan a hna lama a buai țhin êm avangin a kalpui hman a ring lo a, a nu sawm mai chu a rilruk a. 

     "Lo insiam la, dar 12 velah ka rawn lam dawn che nia," a pasalin office kal tura a chhuah dawn chuan a ti a. 

     "I buai dawn lo em ni? Ka sawi awmzia chu min kalpui hman dawn tihna maw?" phur zetin a ti chul a. 

     "Ka nupui hi ka la bazarpui miah lo a, a ruala Bazar te pawh ka chak ve alawm," a bianga piaisak chungin a ti a, a nui suk bawk. 

     "I hman ka rin loh avangin ka sawm ngam lo che a, ka nu sawm mai ka lo tum a." 

     "Ka nu ruala bazar chu i duh zawk em ni?" 

     "Nangmah nena bazar chu ka châk alawm." 

     A hmuia fawhsak zauhin, "Lo insiam la aw," a ti leh sup a. 

     Dar 12 rik hma deuhin a pasal chu a lo thleng a, ani pawh a inpeih fel ve chiah a ni. Peksanga chu office lama let a ngaih tawh loh avangin hmanhmawh  a ngai lo a, muang changin bazar lam pan chuan an tlan a. 

     Kal kual vak ngai lovin Peksanga hmelhriat te dawrah a duh ang a lo awm nual a, hmun dang en buai lovin chuta mi chu a thlang ta a, a zia phian mai. 

     An duh ang an lak fel hnu chuan a nu-in eng emaw  a chah avangin chumi lei tur chuan an kal leh ta nghal a. 

     "U Azual, in bazar ve a ni maw?" ti ri a hriat chuan a hawi vat a, a lam pana rawn kal te pahnih a hmuh rual chuan hlim zetin a nui nghal hak a.