PEKSANGA 22

 PEKSANGA 22

Sbk Pachuau

     Pindan pawn lama mipa leh hmeichhe inbe thawm a hriat chuan kawngkhar bula kalin a va ngaithla a, an țawng rin loh êm avangin eng nge an sawi a hre thei lo a, tute nge an nih tih lah a hriat theih hek loh.

     A awmna room chhung chu a melh kual a, luah lum loh tih hriat takin bungrua a awm mang lo a, khum pakhat leh chair bakah dawhkan lian vak lo chu bungraw awmchhun a ni mai a, a hlui hmel hlawm viau bawk.

     Chhuna a thil ei bak kha eng mah a ei leh ta si lo a, a ril rawn țam riai riai chu hria-in a pum a dawm a, tlema a zia phah takin tiin dawhkana tui lo inchhawp chu a in khawlh khawlh a, tlem chuan a zia ta deuh e.

     A tui in ațanga rei loteah mut chhuakin a rawn zem leh a, men luih a tum ngial pawha a men theih tàk ngang loh avangin a mit chu a chhing leh ta nge nge a, tui êm êmin a muhil leh ta bawrh bawrh a.

     A harh leh chuan khua a lo var uar tawh a, bathroom țawp zetah chuan tui a lo awm hlauh avangin a insil thuak thuak a, a khum bul dawhkana eitur lo inchhawp chu châk lo tak chungin a ei lui ta a. 

     Khawiah nge a awm a hre lo a, Zuala khan khawiah emaw a khung bo tih zawng chu a hriat a ni mai a. A pasal a lo thleng tawh ngeiin a ring a, a lo awm loh mai bakah biak theih miah loha a awm avangin a hrilhhaiin a mangang viau ang tih a hria, a thinlung chu a na ngawih ngawih a. Eng vanga kha misual tenawm lutuk kha lo ring thei nge a nih tiin amah chu a indem a, a inhaw hlur mai a ni. 

     A phone chu sawi loh, a bag takngial pawh a hmuh phakah a awm lo a, a beisei phak baka rapthlak a chunga a thleng ta mai chu tu thiam loh mah ni lovin ama thiam lohah a pawm hmiah a.  A rilru thlaka insiam țha tawh emaw a tih kha a nunrawnzia leh rilru chhungril khakzia a lo hre tawk lo hle a lo ni a, amah a indem a, inchhirin awmzia a nei tawh der si lo. 

     Tui a in zawh apianga a mut chhuak lutuk țhin chu mak a ti a, tui satliah ni lovin eng damdawi emaw tak an telh a nih a ring thiam chho ve ta a, tui hal viau mah se dawhkana an bottle chhawp chu a in duh lovin a paih țhen a, tlemte chauh a in bang ang taka lang turin a dah a ni. A tuihal tawpah chuan a țul leh bathroom-a tui te pawh a in tawh mai a ni ang chu!

     Tlaia a muthilh hlan khan tu emaw chu lo lutin eitur an rawn dah leh tih a harh hnuin a hre chauh a, a mut ngheh theih dan êm êm chu a ngaih a țha ta lo a, a ngaihtuah neuh neuh hnuah a tui in hnuah zel insum ngaihna awm miah lo khawpin a mut a chhuak zel bawk nen rin dan a nei thiam ve ta mai a ni. 

     A pasal a ngai êm êm a, mangang taka a zawng vel tur a ngaihtuah ringawt pawhin a rilru hrehawm lutuk chu a khur thei hial a ni. A nu leh pate, a u mai bakah Sangpuiite mangan dan turte chu a ngaihtuah thui ngam lo zawk a, a chunga thil thleng vanga a nau paiin a tawrh vaih phei chuan eng tikah mah a inthiam thei tawh ngai lo ang. 

     A awmna chu a reh ngawih ngawih a, hla deuh hleka motor tlan thawm leh ui bauh ri a hriat chu thawm awm chhun a ni mai a. A awmna room kawngkhar chu pawh chet ngaihna awm lo khawpa nghet a ni a, tukverh lah bar a invuah vek bawk si, a hmuh theih chin zawng pawh kopang a ni tawp mai a ni. 

     A hmelma pawh ni se Zuala tal lo kal se a ti hle a, a muthilh lai khera a lo kal țhin chu a pawi a tiin eng tianga rei nge a la tan anga eng vanga chulai hmuna khung nge a nih tih tal chu hriat a duh êm êm a, mihring thawm hriat tur awm miah lo chuan a ti hlau hle bawk a ni. 

     Tui chu in tawh lo mah se a hmaa a lo in nasat hman vang nge ni khaw thim hnu lawk ațang chuan a mut chhuak chu a meng hleithei lo a, rei loteah a muhil leh ta siai siai a. 

     Phun ri sep sep thawmin a ti harh a, a sana a en chuan zanlai a lo pel tawh a. Hmeichhe aw a hriat tel leh avangin tu hmeichhia nge hetiang thil tenawmah hian inhnamhnawih duh ang tih chu a ngaihtuah a, a hmui phunin hming pakhat a lam ri sap a.

     A mutna room kawngkhar rawn ri rak a hriat rualin a muhil der vat a, room chhunga an rawn luh hmain a bân chu a mit hliah turin a dah hman hram bawk.

     "Engtia tih chi nge ni dawn?" hmeichhia chuan a ti sar sar a.

      "Kan sawi ang khan kan ti dawn nia. Mahse, tunah chuan eng mah tih theih a la ni lo a, zingah ka țhianpa in luah lamah kan sawn phei mai dâwn nia," Zuala chuan a ti a.

     "Kan dah sawn dawnah a harh êm lovang chu maw!"

     Hmeichhe dang aw a ni tlat! A awmzia chu, he thilah hian hmeichhe pahnih an inrawlh ve tihna a ni.

     "Harh lo turah ngai ang. A tui in turah  muthilhna kha ka pawlh zel a, a mu nghet țha viau ang," Zuala'n a ti a.

     "A hrim hrimin i pa pawh hi a ti mak ka ti e! A hma zawngin a ruak a, khawih lohin rei fê in dah tawh bawk a, tunah kan hmang țangkai chiah a, helai hmuna hnathawh a sawi kher a," an țhiannu chuan a ti hlak hlak a. 

     "Picnic spot siam a tumna hi chu tuna rawt chawp pawh a ni bik lo. A sawina a rei tawh a, hna thawh țan a duh hunah khan a mistiri rawih tum kha a hman lo a, a nghak leh rih alawm maw le. Kan mistiri zik zek lah kha, a hmaa hman mang si lo tuna taka a rawn hman leh thut hi ka ngei a nia!" tiin a țhiannu chu a lo chhang a. 

     "I riahpui tawh ang tiraw?" Zuala hnenah chuan a tih zawm zat a. 

     "Zanin pawh ka riak thei chuang lo. Ka pa a zual leh bawk  si a, ka riak bo a nih vaih chuan min menpuitu te'n mak min ti lutuk ang," tiin Zuala'n a lo chhang a. 

     "A la vannei tluang zel rih dawn a nih chu. Han mutpui thuai thuai la, a pasal tana neih zui chakawm loh turin siam vat vat la ka ti tawh takzet a ni!" 

     "A him rei tawh lo ang. Ka țhianpa in luaha kan dah hunah chuan kan in ațangin a hla lo bawk a, remchang a awm tawh dawn chiang alawm," nuihza aw deuha a tih chuan Azuali chu a lo ip ru chawih a. 

     "A pasalin a țhen huna a awm dan tur ka hmu chak tawh ngei mai."

     "A țhen phah kher ang em tih ka lo ngaihtuah a," hmeichhe pakhat chuan a lo ti sap a. 

     "Peksanga saw ka hre chiang a, a thil neih miin an țawmpui a duh dawn lo. Mipa dangin a nupui an mutpui tih a hriat rualin a pet chhuak ngei ngei dawn tih ka hria alawm," a țhiannu chuan inring tawk zetin a lo ti hmak a. 

     Rei awm lova an chhuah leh vat tàkah chuan a thaw huai a, an thawm a reh thleng chu țhu chhuak duh lovin a mu reng a, an motor tlan ri a reh fel hnuah a tho chhuak ta chauh a.

     Zing khawvar hnua an rawn hruai a ring kha a ni a, a rin aia hma daihin an rawn hruai a. Zuala țhianpa te in an thlen hnuah pawh khua a la var chiang lutuk lo nghe nghe.

     Motor-a an phurh khan a hnung seat-ah an muttir a, khua a la en loh bakah mu chunga chuang a ni bawk nen pawn lam pang hmuh a harsa hle a, a hmuh chian theih awm chhun chu thing kung zãr a ni mai a. Khua a la var loh avangin mihring mai bakah motor veivak thawm hriat tur a awm lo a, building sang deuh leh eng a lo tam tàkah chuan khawpui chhung an lut tih a hre thiam leh tawp a, a bak thil țangkai tur hriat a neih belh phah chuang lem lo a ni.

     A muhil der tih an hriat chu a hlau ber a, a muhil lo tih an hriat chuan a mut an tuamsak emaw a ni awm si a, a tan hawi ruk ngaihna a awm dawn miah lo a ni.

     Motor ațanga an lak chhuah ațang khan a theih ang tawka zau a melh kual ve a, a meng lai an hmuh fuh a hlauh avangin a hawi kual ngam der bawk si lo, a hmuh phak chin a zim viau a ni. Step-ah an chhuk thlakpui a, kawng lian vak lo, metal pawh ni lo hi a lo awm a, thui lo tê an kal leh hnu chuan in mal din pakhat lo awmah chuan an luhpui ta a. Kawng sira signboard lo intarah khan veng hming inziak a hmu hlauh a, a hma ngawt ai chuan hma a sawn ve hret e.

     An dah fel hnuah hmanhmawh zetin  Zuala chu a chhuak leh nghal a, a tui hal tawh lutuk chu thawm pawh dim duh lotuk lovin Zuala kal hnu chuan a tho chhuak a, dawhkana an bottle chhawp chu keng chungin bathroom-ah a lut a, tui chu herh haw-in a in nghal bawrh bawrh a. Filter ni lo mah se damdawi pawlh tui in ai chuan a zia zawkin a hria a, eng êm a ti lo turah a ngai a ni.

     Bathroom ațanga a chhuah chuan Zuala țhianpa kha a lo ding run a, a phu nasa kher mai. Insiam țha leh vatin nelawm thei ang berin a nuih a, hepa tal hi a hman țangkai theiha a siam a ngai a ni.

     Nizan zankhua khan a inngaihtuah a, rilru fim taka a ngaihtuahna a hmang a nih loh chuan a chungah eng pawh thleng thei a ni tih a hre chiang êm êm a. Chuvangin, luhlul chhuah hmasa lova Zuala lakah pawh nem zawka awm chu a tum tlat a, a mihring ten leh huat ngawih ngawih laka sihhnip hmel taka awm chu a thei kher ang em tih erawh Pathian chauhin a hria a ni.

     Tunah a țhianpa nen in khatah an awm dun dawn a nih hmel a, amah Zuala ai chuan a la hriat ngai loh chu mihring tenawm leh rilru chhe tàwp a nih loh chuan a tan pawh biak a harsa lo zawk maithei a, ten rilru tak chunga Zuala biak țhat ai chuan tiin a thiam dan ang anga biak lumlam chu a tum a ni.

     "Chhuah ruk tum leh thawm bengchheng siam lam kha mifing pangngai tan chuan tih chi a ni lo a nia aw. I au bengchheng a nih vaih chuan i au rualin i ka kha ka hnawh a ngai dawn a, chu chu i duh ka ring miah lo bawk."

     A hmel en aiin a țawng a nem phian a, a țawngkam hman chu duhawm lem lo mah se kha mi tenawmpa ngawt ai kha chuan a rilru pawh a nem hle turah a ngai ve tawp a ni.

    "En teh, țhianpa, au tur pawhin aw rawl chu sawi loh tha pawh ka nei vak tawh lo. Tunah tak hi chuan intih fai ka chak ber a, khawngaihin ka inti fai lawk thei ang em?"

     Tuna a tih tur țha ber chu a rin tura awm a ni. Chau lutuk leh taksa chak lo tak anga lang thei turin a mit chu a meng phî lui deuh a, țawng pawh a țawng ring vak duh lo bawk. Duh pawh ni se a mut nasat lutuk vang leh țawng lova a awm rei tawh avangin a aw chhuak chu a tham deuh hrim hrim a, ring taka au chhuah phei chu a theih a ring rih lo tawp mai a ni.

     Gamchha hlai lutuk lo hi a rawn pe a, lawmthu hrilhin bathroom-ah chuan a lut leh ta a. A chhuah leh chuan a lo awm tawh lo a, room kawngkhar chu hawn a tum chhin a, a lo rin lawk dan ang chiahin pawn lam ațangin a lo inkalh a.

     Ei tur a rawn pek chuan muthilhna a pawlh a hlauh avangin a lo hnar a, a ril chu țam hle mah se eng emaw chen chu ei lova a la awm theih a ring a ni.

     "Thil țha lo eng mah ka telh lo a nia. I ei loh chuan i chau zual zel mai ang," a ti dam dep a.

     "Ka ei chak lo alawm," tiin a lo hnial ve thung a.

     "I ei loh chuan i chau lutuk ang ka tih chu! Min ringhlel a nih ka ring, keimah ngei hian a hlauhawm lohzia ka'n hmuhtir ang che," tih pahin chupa chuan ei tur chu a ei ta mual mual a.

     Hmun thuma țhena hmun khat aia tlem hlek a ei hnu chuan a hmaah a va chhawp hnaihsak leh a, ngawi rengin room ațang chuan a chhuak ta daih a.

     A ei chak miah lo naa a nau pai tan eng mah ei lova awm reng chu a țha lovang tih a hlau si a, ngaih la țha lutuk lo chungin tlem chu a ei lui ve ta hram a.

     Khumah khup tawma țhuin engtianga tih zel nge a tan țha ber ang tih chu a ngaihtuah a, Zuala țhianpa hi chu a hranpa taka sual a nih a ring lo a. A phone hmansak dan awm se a ti ngawih ngawih a, nichina a rawn luh pawh kha a phone chu a hum țut a, han lak ruksak dan kawng a vâng viau bawk si. Au vak dawn se a au ri hre pha an awm lo a nih vaih chuan a au thlawn mai bakah a sawi ang khan a kâ chu a hnawhsak ngei ang a, a tan a hrehawm zualin a duh angin a awm theih loh phah dawn a, nghah leh phawta a tla chawpa ngaihtuah chhoh chu a tum ta rih a.

     "Heta kawl reng hi ka duh miah lo a nia. Eng emaw thlengin ka in hi rawn chhui thleng ta se man ka tawk ve ngei dawn a, chu chu ka duh lo. Mualpho mai bakah jail tan ka duh miah lo a nia."

     Tukțhuan ei kham hun awm velah Zuala lo kalin a biak châk thlawt loh avangin a lo muhil der leh tawp a, a muhil tak tak emaw a ti ni ngei tur a ni a bianga a chulsak zauh hnuin room ațang chuan a chhuak leh ta vut a. Mu chungin an titi chu ngaihthlak tumin a beng a chhi a, a tir lamah chuan an țawng rin lem loh avangin a hre țha thei lo a, chutia rawl an san tàkah chuan mumalin a hre thei ta chiah a ni.

     "A awm rei lo ang. Lo veng țha la, thawm bengchheng siam lo tur leh tlan chhuak lo turin lo veng țha hle bawk la, i lawmman tur chu a let ka pe dawn che nia. Chawhnu lamah ka lo kal leh ang a, chutah chuan hotel lama awm turin ka hruai daih dawn alawm," Zuala chuan a ti lung lung a, a aw ringawt pawh chuan a luak a ti chhuak ngawih ngawih mai a ni.

      A awmna room chu bang lam dep bawk niin khaw hawina eih a awm lo a, a hmingin tukverh pakhat chu awm ve mah se hawn theih pawh a ni lo. A pasalin a zawng ngeiin a ring a, eng tikah nge a rawn hmuh anga nung damin an inhmu leh ang em tih chu a ngaihtuah a, a thinlung chu a na vawng vawng a, țah hawm hawm maite chu a chak takzet a ni.

     Pachang tak leh chhel taka awmin a intih chak a ngai tih a hria a, rilru fim a put reng theihna turin a rilru hahna leh lungchhiatna chu inhnehtir loh hram a duh a, țah chu châk viau mah se a insum theih chhung chu țah loh a tum a, naute tan pawh a țha lovang tih a rin avangin a la insum thei rih viau bawk.

     Chawhnu lama lo kal tur anga a insawi avang khan a huphurh êm êm a, lehlamah chuan hotel lama sawn chhuah chungchang a sawi avang khan a tan mi dang signal pekna hun awm thei dawna a hriat avangin beiseina a neih phah thung.

     Hmeichhe aw a hriat rualin Zuala chu amah maiin a lo kal lo tih a hre nghal a, a chhungrila huatna leh thinurna inup chu a rawn puak chhuak mai ang tih hlauhawm khawpin an aw a hriat ringawt pawh chuan a sa phat thei hial a ni.

     "Kan miliannu chu a muhil deuh reng mai a ni maw!" room chhunga a rawn luh rualin a ti lar lar a.

     "Muthilhna damdawi kha kan pe tawh lo a, a mu tui vak tawh lo ang. I țawng thawmah pawh hian a harh tawh hial maithei a ni," Zuala'n nuih huk huk pawhin a ti a.

     Thawh chhuah lawka keh nawk nawk mai chu a chak ngawih ngawih a, a bula hmeichhia pawh chu na taka siam theih a chak a, tuna a rilru put dan hi Vanram luhpui tlak a ni lo tih hre mah se chu aia țha zawka an chungchang ngaihtuah chu a thei ngang rih lo a ni. 

     Zuala'n a mit hliahna kut a lak sawnsak tàkah chuan a meng chhuak a, zu rim a nam bawk nen Zuala hmel a hmuh rual chuan a luak a chhuak nghal up up thei hial a, Baby-i'n nuihsawh hmel lutuka a lo en a hmuh phei chuan țe chhuah nghek mai chu a châk takzet a ni. 

     "I pasal tan khan i lo ninawm țhin hle a nih ka ring! A zawng miah lo che chu thuhran ni se a nupui bo rualin hmeichhe dang a awmpui leh nghal zat mai a nia, nizan pawh khan kan hlim dun khawp asin," nui har har chungin Baby-i'n a ti a. 

     A awih hauh lo naa a rilru chhungril chu a na tho mai. A pasal hian a zawng tak tak lo nge nia tun thleng pawha a thawm hriat tur awm miah lo mai chu tiin rinhlelh tur a dap kual a, lehlamah chuan an dahna hmunin a zir êm avangin chhui chhuah mai a har a niang tiin a inhnem leh zat a. Chu bakah, a rilru nawm leh deuh chhan pakhat a la awm a; chu chu nizanah khan a pasal nen awm dun se zanlaiah a awmna hmunah khan a rawn kal a ring lo a ni. 

     "I rilru hi a  dik lo ka lo ti țhin a, dik lo satliah ni lovin a piangsual zawk a ni tih ka hre ta chiah e. Mi pasal ngaizawnga a nupui ru bo duh khawpa ngaihtuahna hrisel lo leh rapthlak neitu rilru tluka piangsual nasa an awm ngai lo ang," a lo ti let fak a. 

    "Zawngi, a hma ațang tawh khan hetia tih che hi ka chakna a rei tawh lutuk! Ka bialpa min laksak tirh ațang khan ka lo insum țang țang tawh a ni tih hre rawh!" a bianga ben thlawp pahin Baby-i'n a ti tuar a, a rawl a ring țha hle bawk. 

     "Khaih, ka duatpuii kha ben ka phal hleinem. Keimah hian ka'n duat ang e." 

     A biang Baby-i'n a benna a vawnlai chu Zuala chuan rawn banin a chulsak zui a, ten zetin a kut chu a lo pai thlaksak sawk a. 

     "I va huai salh salh reuh e! Zuala, mipa i nihna kha tih lan a va hun ve! Chet i lak hma poh leh kan thil tum a hlawhtling hma dawn a nia," tiin Baby-i chuan Zuala a lo fuihpawrh vel a. 

     Zuala lah a hmeichhe duh êm êm mai chutia a khawih phaka awm ta chu itna rilru tenawm rawn chhuak chawpchilhin a harhfim lutuk lo bawk nen Azuali chu khumah chuan a bawh thlu a. A kutah zanhnih ngawt awm tawh mah se a pa damlo a zual avangin in chhuahsan theiin a awm si lo, khawih thei lova a awm chhung pawh khan Azuali taksa nalh tak chuan a rilru chhungril a luah reng kha a ni a. Tunah hi chuan Baby-i'n a lo fuihpawrh vel bawk nen chhuah a tum tawh hauh lo. 

     "Lo va chhuak rawh. Ka duatpuii hi ka taah ka'n siam phawt ang a, kan awm zel dan tur kan rêl dawn nia," Baby-i hnenah chuan tiin Azuali duh lo tal vel chu delh bet sauh sauh a, a kut a vawn behsak hmiah bawk.