PEKSANGA 21

 PEKSANGA 21

Sbk Pachuau

[PEKSANGA]

 

     Ka beisei anga thil tih fel a harsat avangin duh angin ka che rang thei lo a, ka tum aia rei daih ka cham ta. Ka nupui ka ngaih mai bakah ka ngaihtuah hle a, ani pawhin min ngai tih ka hria. Haw vat vata duat taka kuaha a hmui fawh nuam tak kha fawh leh ka chak a, a bula hahdam taka awm leh chu ka thlahlel hle tawh a ni.

     Fur lai mah ni se Guwahati boruak chu a la rit hle a, lum huam huam ang kha awm tawh lo mah se a la uap deuh churh tho a, chhuah vah vel pawh a la peihawm loh reng tho mai.

     Ka inpeih fel hnu chuan haw nghal vang vang ka duh tehreng nen khaw awm danin a zir loh avangin thlawhna thlawh chhuah theih a ni lo a, ning tak chungin nikhat dang ka nghak leh ta phawt a.

     "Naktuk chu ka u dawr ka va nghahpui ve dawn aw? Ka nu leh pate bulah pawh ka sawi tawh a, an phal vek a nia," ka nupui chuan aw zangkhai vahin a rawn ti a.

     "Indim i ngaih kha, Bawihi."

     "Hna hahthlak a awm chuang hleinem. Counter-a pawisa dawng tura lo țhut kha a ni mai a, ka u pawhin chubak a beisei lo."

     "I intih khaw loh ka hlauh vang a nia!"

     "Ka hria alawm. Mahse, min ngaihtuah duh suh. Ka in-fit țha a, doctor pawhin rit ka chawi a nih loh chuan dawr nghah hrim hrim chu a pawi lo a tia."

     "Aw le, indim hle la, rit chu lo chawi miah lovang che. I u pawh rit chawitir lo tur chein ka lo hrilh ang," ka tih chuan a rawn nui hak a.

     "Hrilh lo mah la ani pawhin rit ka chawi chu a phal teuh lo. Dawrah ka awm ve dawn anih chuan pawisa dawn bak thil dang eng mah ngaihtuah ve lo turin min hrilh nasa alawm."

     "A țhat chu!"

     "Lo haw thei tawh la ka ti e!"

     "Kei pawhin ka ti!"

     "Tun ațang hian ni hi sa vak se!"

     "Ni chu a sa reng alawm."

     "Sa reng e. Ka sawi awmzia chu khua hi dur tawh lovin ni rawn lang reng tawh se ka tihna a nia," a rawn ti niah niah a.

     "Ni a lan reng chuan zan a awm dawn lo asin!"

     Han chhaih vel hi nuam ka ti riau țhin a, a'n lungawi lo ve deuh bâr bâr țhin naa rei loteah a lungawi leh mai a, a nui ri ngaihthlak te hi ka kham thei lo a ni ber mai.

     "I mak! Min ngai ve lo tawp a nih kha!" a rawn ti ta hmak mai rêng a, kei ka lo nui suk thung.

     "Ngai e, ka ngai lutuk che alawm."

     "Min ngai lo. Min ngai ni la ni sa thuai thuai se i ti ve tho ang!"

     "Keiin sa se ka tih ngai lovin a sa sa reng si alawm," ka tih chuan lungawi loh hmel zetin a rawn thaw halh a.

     "Kha... Ka thusawi pawh i hre thiam duh lo der vel a."

     "Ka hriat thiam loh pawh ka hre hleinem," ka lo ti liam puat a.

     "Min ngai lo bawk a, lo haw lo tawp rawh," lungawi lo tih hriat zet hian a rawn ti ta hmak a.

     Nuih chhuah hawk hawk pahin, "Bawihi, tunah te hian i bula awm kha ka chak lutuk a, thla chu nei ila ka rawn thlawk haw nghal vang vang ang. Ka ngai lutuk che."

     "Min ngai tak tak lo. Ka lungawina turin i rawn sawi mai mai a nih kha."

     "Ka ngaih tak tak leh tak tak loh che chu ka lo haw hunah i hre mai ang. I lungawina tura sawi ni lovin a nihna dik tak a nih vang zawka sawi ka ni a, tuna i lungawi lo hmel kha thlakin nui ver ver tawh rawh le," ka tih chuan a rawn 'hm' deuh hmak a.

    "Bawihi, naute khan nu tih tauh hrat deuh a nei dawn emaw a ti ang a, a lo chhuah hreh phah vek ang tih a hlauhawm a nia," ka tih chuan a rawn nui ta hak a.

     "Tih tauh ka hrat bawk lo aw. Ka fiam mai mai che a nih kha," tiin a rawn nui har har a, hnial duh lovin ka lo nui ve mai a.

     Thlawh chhuah theih loh ta chu a tuk nileng chuan ka hman hle a, ka tei chhuak peih bawk si lo nen ka thlenna hotel room-ah ka tawm nileng a, a khat tawkin Azuali ka be reng bawk. A indim thiam tawk lovang tih ka hlau viau naa a u Ruatpuia khan a lo mitmei ve reng tho ka rin avangin ka ngaih a țha deuh hlek a, eng emaw palh a tawk ang tih erawh ka la hlau ru reng tho mai.

     A tuk zingkar chu rin ai taka khua a thian tàk avangin haw theih ngei ka inring hle a, airport lam pana kan tlan laite chuan khua chu rawn dur tawh lo hram se tiin rilruin duhthu ka sam hial a. Rokhawlhna dang a awm tawh lo ngei tura ngaiin ka nupui dawr kal tur pawh haw hma turin ka chah thlap nghe nghe a ni.

     Airport-a ka awm laiin min rawn bia a, haw tura a insiam mek thu leh bazara kal kawi lawk a ngaih thu min rawn hrilh a. Fimkhur turin ka lo chah leh hram pek kha!

     Chhuah a hun hnai tial tial a, khaw awm dan a dik lo leh ta tawlh tawlh a. Ka hlauh ang ngei ngeiin kan chhuah hun turah kan chhuak thei ta lo. Nghah rih phawt mai loh chu tih tur dang awm hek lo ning chung chunga țhut a ngai leh ta chu a ni a, in thlen thuai thuai duh tawh laia chutia thlawh chhuah theih loha khua a rawn awm leh ta chu thin a rim hlur mai a ni.

     Ka nupui bia-in chanchin ka hrilh a, ani pawhin a thil lei tur a lei zo tawh tih leh haw a tum mek tih min hrilh a. In a thlen huna min be leh tura ka chah hnuin kan inbiakna chu kan ti tawp a, thinur ru țeuhin ka țhu leh ta ngat ngat a.

     Darkar khat chuang kan nghah hnuah khua chu a rawn eng ta deuh a, a thlawh chhuah theih dawn tih an rawn puan chuan ka thaw huai a. Ka nupui chu kan chhuak thei dawn tih hrilh tumin ka call a, a tlang theih loh avangin ka tum nawn leh a, a la tlang ta chuang lo. Signal chhiat vang a nih ringin ka call nawn duh ta lo a, ngaihțhat lohna pawh ka nei lem lo.

     Lengpui kan thleng a, Mizoram boruak chu a lo thiang nuam ta deuh bawk nen harh huai huaiin ka inhria a. Taxi la-in Aizawl lam panin kan tlan ta nghal a. Azuali call tum lehin a la tlang theih loh cheu avang chuan ka ngaih a țha ta chiah lo a, ka nu ka call ta thung a.

     "Aw, Mama?"

    "Ka nu, Azuali ka call tlang thei miah lo a, a lo thlenna a rei tawh em?"

     "Azuali maw? A lo la haw hleinem!"

    Ka ngaihțhat lohna chu hlauhthawnna-in a rawn belh chhah nghal a, ka nu hnena ka thlen chin ka hrilh hnu chuan Ruatpuia ka call leh nghal zat a.

     A u dawr lamah a let leh pawh a ni thei tia ka lo inhnemna chu Ruatpuia min chhanna chuan a hnawt bo nghal vek a, a nau chinchang lo ngaihven ve tura ka chah hnuin Lalhriata leh Freddy ka call ve ve a, thil awmdan ka hrilh lai chuan a auvin ka au a ni ber mai. 

     Taxi driver chu a chak thei ang bera tlan turin ka hrilh a, ka nu chu call lehin  driver rawn tira company peng vela motora min lo nghak turin ka hrilh leh a. Ka hmanhmawh lutuk tih ngaihna vak awm si lo chu thawk ka la vak vak ringawt mai a ni. 

     Phunchawng tawntirh kan thlen laiin ka phone a rawn ri a, ka pa a lo ni a. 

     "Mama, driver chuan Company pengah a lo nghak tawh che a, motor kha i rawn khalh a nih pawhin chak lutuka rawn tlan loh tur aw. I nu nen inah kan lo nghak reng che a nia," a rawn ti dam thlup a. 

     Ka pa hian min hre chiang bawk a, ka  rilru hah leh thin tawt lutukin driver khalhtir lovin keimah ngeiin ka khalh dawn tih a lo hre tlang nghal vek a. Ina haw tlang phawt tura min duh avangin ka nu nen min nghak tih a rawn sawi lang tel kher bawk. 

     Ka lo tum dan kha chuan in lama haw hmasa lovin ka țhiante hmuh hmasaka ka nupui kalna tur awm chhui zui nghal mawp mawp mai kha a ni a, ka pa thu chu hnial chi nia ka hriat loh avangin in lam chu kan pan ding ta nghal a. 

      In kan thlen chuan khua a la thim lo deuh a, ka mihring hriat tawh azawnga pa inthunun thei ber mai ka pa hmela hlauhthawnna ka hmuh chuan ka mangang zual kher mai. Ka nu chuan inbual faia rilru fim tak pu chunga hma lak dan tur ngaihtuah turin min ti a, ka nu thu chu awihin ka inbual sawk sawk a, ka inbual zawh chuan Freddy leh Lalhriata pawh an lo thleng fel ve chiah a. 

     Azuali phone chu switch off a intih tlat avangin chhui zui ngaihna a vang hle a, a last location chu Bazar a ni tlat mai bawk si nen eng tianga zawn țan tur nge tih hriat a har takzet a ni. 

     Ka nu-in eng emaw tal ei tura min tih chuan ka lo hnial a, eng thil mah ka ei chak lo a, ka nupui chanchin ka hriat hma chu eng mah ei ka tum bawk hek lo. Tunah te hian rilțam takin a awm reng maithei a, mangang taka a awm tur ka ngaihtuah chuan ka thin chu tawt up upin ka hria a, au vak maite chu ka duh hial a ni. 

     Bazar lamah kalin thil leia a kalna ni awma a rawn sawina hmunah chuan kan va kal ringawt a, awmzia a awm lo kher mai. Ruatpuia chuan an chhung hnai deuhte be kualin Azuali'n a tlawh leh tlawh loh a zawt hlawm a, chutianga eng mah sawi hmasa lova a len kual kan rin loh ang ngeiin an vai mai chuan a kal loh thuin an lo chhang vek a, thaw a pik tawlh tawlh mai a ni. 

     Ka laka lungawi lohna neia kal bo turin eng mah intih thiam lohna kan nei lo a, ka chhungte nen an inkar lah a țha êm êm bawk si. A kalna tur sawi lova chu chen chen thang bo tur chi a ni lo a, buaina tawk lo se engtin emaw tak chanchin min hrilh a tum ngeiin ka ring bawk. 

     Ka ngaihtuahnaah thil pakhat a rawn lang thut a, ka phone phawrhin Baby-i call tumin a number ka zawng a, ka lo nei tawh hauh lo. Țha ber nia kan hriat angin Lalhriata nen Baby-i te in lam panin kan tlan ta nghal a, Remfela call-in chhun lama Seni duty routine lo hre turin ka chah a, a duty hun azirin chhui zui a ngaiin a ngai lo thei ang chu! 

     Baby-i te in kan thleng a, rin loh takin inah a lo awm ve thlap mai. Chhun lamah a chhuak em tih kan zawh chuan a chhuah loh thu leh ina a awm nilen thu a sawi a. Rinhlelh tur kan hmuh lem loh avangin rei pawh țhu lovin kan kal leh nghal mai a. 

     Ka ngaihtuah chiang a, mak tih deuh hlek ka neih tàk chu, Baby-i kha zan lama leng chhuak țhin a ni a, ina a lo awm tlat kha a ni. A lo sim tawh te pawh a ni thei tho bawk. Chutih rualin kei min hmuh apianga a awm țhin dan ang lo takin zanin khan a awm a, min ngaihmelh leh ka bula țhut tum miah lova a awm kha thil mak dang a ni tlat! A inrawlh tih lanna awm chiah lo mah se enthlak zui ngei a ngai dawn a ni. 

     Ruatpuia leh Freddy te pahnih chuan khawpui chhung an rin zawn tawp a, hotel hrang hrang pawh an tlawh kim thawkhat viau mai. Sangpuii pawhin a theih ang angin in lam ațangin an țhiante phone kualin Azuali hmu an awm em tih a zawt hlawm a, beisei a bo tawlh tawlh mai a ni.

     Ruatpuia'n a nuhrawn a ringhlel hle a, an inah va kal chilhin vau titiha a zawh pawhin hmasawnna tur chhanna a dawng chuang lo. An inkara khi awm sa kha nasa takin a khik belh a, chu zawng chu a ni mai.

******

AZUALI

     A pasal a rawn haw dawn avangin a u bulah nilenga a awm hman dawn loh thu leh kal kualna tur a neih dawn avanga chhuah hma a duh thu chu a hrilh a, a nau pakhat chu thlah turin a ti naa a kal duhna nen rem țeuha a hriat loh avangin taxi lak mai a tum ta zawk a.

     Bazar-ah pengin a thil duh a lei hnu chuan taxi hman tumin a chang a, rin ai takin a vâng phian mai. Ke kham urha a din hnu pawhin taxi hmel hmuh a awm thei lo a, a lo tlan chhun lah passenger phur an ni zel mai si. Ke-a haw êm chu ka zuam si lo a, a u biaka a nau pakhat rawn tir tura tih mai chu a rilruk ta a. 

 

     Signal a lo nei miah lo a, a tum nawn leh ngial pawhin awmzia a awm lem lo 

     "Azual, taxi i chang em ni?" 

     A phone chu dah thlain rawn betu chu a en a, chhan loh mai a tum deuh a, mawi lo riauva a hriat avangin a chhang leh ta zawk a. 

     "Aw, ka châng ve chu a nih hi." 

     "In awmna lamah kan kal dawn tho a, kan rualin lo kal ve mai rawh." 

     Motor chhûngah chuan nu pakhat, upa lam hi a țhu a, Zuala chuan a nu a nih thu chu hrilhin Azuali nen chuan a inhmel hriattir zui a. A nu pawh chuan an ruala kal ve mai turin a sawm ve nghal zat a. 

     "Ka'n nghak leh zawk ang e, a lo kal har tawh êm lovang chu!" tiin a lo hnial a. 

   

     "Kan tan a buaithlakna a awm miah lo a nia, i lo inthlahrung te a nih chuan," Zuala'n a tih leh chuan lu a lo thin khum mai a. 

     A u chu call a tum leh chhin a, awmzia a la awm chuang lo. Zuala'n a motor-a chuang turin a lo nawr ve sek bawk nen a thinte chu a rim deuh hlur tawh a. 

     Hnung lama motor lian lo kal chu Zuala motor chuan a dal avangin horn a rawn pe tuar tuar a, Zuala lahin Azuali chu a nghak tlat mai si a, a tih ngaihna hre lo chu a lut ve ta ngawt a. A nu a chuan tel ve avang chuan a ngaih a țha deuh a, pasal nei tawh a nih vang pawhin a zah ve deuh turah ngaiin hlauhthawnna nei lem lovin a chuang ve tawp mai a ni. 

    

     Zuala chu a titi bawrh bawrh a, tunhmaa a rilru put hmang kha a paih ve tawh takzet a nih a ring ve tawp a. Tuna a lan danah hi chuan tlangval fel tak ang mai a ni a, pasal a neih tawh vangin beisei tinin a tin tawh miah lo emaw tih mai turin a awm a ni. A pa damdawi tur leia kawng laka an din bakah traffic jam vangin vawi eng emaw zat an ding bawk a, an kal sawt lo hle. 

     Ngaihțha taka a chuang chu an veng thlen hmain Zuala nu chu kalna tur a neih avangin  a chhuk leh ta daih si a, Azuali awm chu a nuam ta lo kher mai. Mahse, Zuala chu nelawm takin a la țawng suam suam reng a, tlem chuan a ngaih chu a'n ti țha lui leh ta deuh a. Traffic lah chu ni dang zawng aiin a jam nasa emaw tih mai turin kal a sawt mawh nasa mai si, chhuk daih maite chu a dub rum rum a. 

     A phone chu la chhuakin a pasal biak a tum a, signal a lo la nei chuang hauh lo a lo nia, rilru pik churhin a țhu a, Zuala chuan eng eng te nge a sawi tih pawh a hre mumal lo. 

     "I awm a va nawm loh hmel ve! Min hlau chu a ni êm lo maw?" fiamthu deuhin Zuala'n a ti a. 

     "Nia, ka chuang fuh lo deuh nge ni, ka rui deuh alawm maw le. Ka chhuk tawh mai dâwn emaw ni ka lo ti rilru deuh a," a lo ti vat a. 

     "Kan thleng țep tawh alawm. Hei tui hi in la, i zia deuh mai ang. Jam pawh a ziaawm sawt khawp hi," tih pahin tui bottle chu a pe nghal a. 

     "Ka chhuk zawk mai ang e. Kalna tur a thui lutuk tawh lo bawk a, ka thleng ve thei tawh mai ang," tiin a lo hnar thung a. 

     "Ti khan chuang mai mai teh. Kea kalna atan chuan a la hla phian a nia," tiin tui bottle chu a pe a, thil dang a sawi zawm zat a. 

     Chhuk luih mai a duh laiin traffic jam a zia deuh tawh avangin Zuala chu a tlan leh ta chiah si a, a rilru nuam lo lutuk chuan tui chu a in ta ringawt a. 

     A mut rawn chhuak ta riau riai chu a taksa chauh vangah ngaiin ngaihțhat lohna pawh a nei lem lo a, an in awmna an thlen dawn tawh avangin chhuk thuai thuai mawlh chu a nghakhlel a ni. 

     "In in kan thleng e," Zuala'n a tih chuan a mang hriat riai ruai a, a bak chu eng mah hriat a nei zawm ta lo. 

     A mit a men leh chuan a awmna hmun chu khawi lai nge a nih a hre ta hauh lo a, a mumang emaw a ti hman hial nghe nghe a, a mit chu a'n chhing leh vang vang phawt a. Muang chânga meng chhuakin an room chhung hmuh inbeisei taka a awm laiin a hmaa a awmna ngaiah tho khan a lo la awm a. 

     A rilru a fim tial tial a, a dinhmun duhawm lohzia a hre chiang telh telh bawk. 

(Zanin chu a tawi deuh tih ka hria. Ka inthlahrung khawp mai. Nizanah ka dah theih loh avangin dah ngei ka duh si a, lu na ngut ngut chungin ka type lui hram a, ka type peih chin ka rawh dah tawp. Min lo ngaidam leh phawt mai teh u, in fel êm kha...)