PEKSANGA 20

 PEKSANGA 20

Sbk Pachuau

MAZIRI

     Maziri lo hlauhthawn lawk ang ngeiin a nu thinrim thawm chu a na hle a, a nu laka Faki lungawi lohna leh rilru nâ lo inup rei tawh rawn puak chhuak chu insum thei tawh bik lovin an inhau ta chiam a. Mahni pate pawh heka tantir duh khawpa rilru chhiaa a puh avangin a nu laka a thinrimna a sosang nasa tial tial mai si nen Faki chuan a nu a ni tih lam ngaihtuah lovin a chhang let ve ta fak fak a.

     "I pa lo chhuak se engtin nge in chungah kan chet dawn tih chu ka sawi lo mai ang. Mahni pate pawh heka mualpho taka siam duhtu hi ka sim dawn reng reng lo che u," pi Kimi chuan a ti tun tun a.

     "Ka nu i nih tak tak pawh hi ka ring ta lo! Tu nu mahin an fa hrinte lakah hetiang khawpa rilru chhia hi an pu duh hauh lo ang. Kan tan pawh nang ang mihring rapthlak lutuk nu atana neih ai chuan nu nei lova awm a hahdam zawk ang!"

     Maziri'n an thawm ngaihthlak hrehawm a tih êm avangin room lamah a luhsan ta daih a, a pa kha a ngai vawng vawng a. A pa damlai kha chuan chhungkaw hlim leh inlungrual tak, chhung inkhawm thlahthlam ngai lo kha an ni țhin a, tunah chuan hremhmun pate a ni ta ringawt mai si. A nu a dem a, a pahrawn rilru chhia leh nunrawng lutuk chu a haw ngawih ngawih bawk.

     A innghahna ve ber a u-in zan lama vah chhuah leh zu in a sim ta rih chu a lawm hle a, a tana vantirhkoh ni hiala mawi Freddy a tawng bawk nen a rilru pik lutuk a zia ve țan chauh a ni a. Tunah boruak rit lutukin a delh leh ta si a, a rilru a hahin ngaihtuahna mumal a pu mai thei lo a ni.

     Freddy a tawn hma hian mipa eng emaw zat a lo hnar ve tawh a, tlema han duh deuh te pawh nei ve bawk mah se an chhungkaw boruak chhe lutuk vangin ngaihzawng nei thei niin a inhre lo a, ngaihzawng tia sawi tur a la nei miah lo a ni. 

     An inhriat tirh khan Freddy te ang chu beisei phakah a ngai lo a, ani pawhin nula anga a en a ring lem lo bawk nen rilru pek loh law law țhain a hria a, an inhmuh apianga a rilrua a lian tial tial erawh a mang ang ru fo țhin. Khatia a pahrawn an mantir hnua a kut vuana a venhim tur thu a sawi khan ringhlel hauh lovin amahah a inchhung lut hmiah a, a hranpa takin hmangaih biahthu inhlan mah suh se thinlung chhungrilah inzawmna nghet tak neiin an inngaizawng ve chu a ni ta der a.

     An țhian zaho kha a tan chuan an hlu êm êm vek a, a vawikhat hmuhnaah pawh a ngainain an bula awm pawh nuam a ti nghal hle a nih kha! Kha Lawyer palian hmelțha zet leh a nupui duhawm tak te, police inspector fel zet leh atu mai pawh kha a chungah an țha êm êm vek a, inkiltawih hauh lo leh ngampa sarhin a awm ve theih phah a ni.

     A nu leh a u rawl chu a rin zual tàk êm avangin room ațanga tlan chhuakin a va ngaihven a, a nu-in a u ben tuma a phar lai tak chuan an kârah tlazepin a u chu a namsawn pah zat bawk.

     "Nang pawh chu i va zakthei lo reuh e! Khatiang tea i rawn tih ngam chu le!" rum zeta melhin a nu chuan a ti khar khar a.

     "Ka nu, i fate aia i pasal, pawngsual pawh pawisa lo khawpa tenawm saw i țan tlat zawkna chhan hi ka hre lo. Mahse, eng tikah emaw chuan i la inchhir dawn tih lo hria ang che." Maziri'n a ti chang ve ta fal a.

     "Nangmahni nikhua loh vanga mi dang puh kha sim rawh u! I pate ang pa țha lutuk saw in thlem a nih ngawt loh chuan khatianga che duh tur chi a ni lo."

     Ti el tih hriat deuha nuih hak pahin, "I pasal fel leh țha lutukin min tih luih avanga ka nun chhiatzia hmu reng chunga keini min la dem țalh hi mak ka ti ta lo. I pasal ang maia rapthlak leh zahngaihna nei lo i lo ni ve reng a, mahni rila rahte aia midang thusawi awih zawktu chuan han awih zel poh ta che, " Faki'n a lo ti fak fak a.

    "Chhuak rawh u! Ka in ațang hian chhuak ula, lo kir leh tawh ngai suh ang che u," thinrim aw khur hlawk hlawkin a nu chuan a ti a.

     "Ka pa in a ni a, kan chhuak dâwn lo. I duh leh i pasal hurherh zet nen khan chhuak ula ti nia," Faki'n a ti hmiah thung.

     "Ka nu, nakina i inchhir lutuk lohna turin tun aia thui hi chu kal tawh suh. Ka nau nen hian pasal kan nei a nih ngawt loh chuan he in hi kan chhuahsan dawn lo. A mitmu êm pawh a keh hmaa mipa dang mutpuitu hian ka pa in leh lovah hian thu neih tum lo la, i mualpho tlem a ni mai. Chuti a nih loh chuan kâ ka nei tih hi i hre nawn awn awn mai ang, a hma anga ngawih bo mai mai kha ka tum tawh reng reng lo a nia," a tih zawm leh sak sak a.

     Pi Kimi thinur lutuk chu a țawng thei tawh lo nge sawi tur a nei tawh lo zawk tih pawh hriat lohin tur êm êma mengin a fate pahnih chu a melh tawn a, eng mah sawi tawh lovin an room lam panin a kal tau ta nghawng nghawng a. A pasal bail a dilna lah a fanute tan him lo nia an hriat avangin court lamin an lo remtihsak si lo, a fanu te lahin an hlau tawh lo nasa mai bawk nen thinur lutukin an room chhûngah chuan a va insawh ta nghek nghek ringawt mai a ni.

     Ama dik lohna lam ngaihtuah duh se chu a hmaah thudik a inhung reng a, a mipa mamawh lutuk leh duh luat avanga a fate dinhmun derthawnga a dah te chu haider lui tlatin kha mihring laktlak loh zet thusawi kha a lo ring hmiah mai kha a ni a, nakinah a let a thlen hunah a tawrh zawh loh khawpa rita delhtu a la nei ngei dawn tih lam a ngaihtuah thleng duh rih tlat lo.

*****

     "Mazir, hetah eng nge in tih ve a?"

     A u pum a nawm theih loh avangin inentir turin a hruai a, test neuh neuh tur a awm nual avangin an tum aia rei daih a awm a, result țhenkhat nghaka an țhut laiin Sangpuii leh Azuali inentir haw turin an rawn hmu a lo nia.

    "Hei, ka u hi ka kalpui a. Nangni eng nge in tih zawk a?"

     "Anpa zanlam hnathawh rah a lang țan a, a inentir ka hruai a nih hi," Azuali kawh zauh pahin Sangpuii'n a ti a, an nuiho dar dar a.

    An hman tlang rih bawk a, inhnawh puar turin thingpui dawr lam an pan ta dial a. An duhzawng te lamin an titi bawrh bawrh hlawm a, Azuali erawh thil a la ei tui vak loh avangin eng tham mah a ei lo.

     Rei pawh an la țhut hmain nurse pakhat leh hmeichhe nalh deuh hi an rawn lut ve a, an changkan hmelin an chhe lo dun êma Maziri chuan a melh leh zauh țhin.

     "E heu! I bialpa hlui nupui te pawh an lo chawl ve a nih hi!" Nurse zawk chuan a țhiannu bulah a ti hluai a, an țhutna lam pan chuan an pen nghal zat bawk.

     "Inpa a dam maw?" a țhiannu zawk chuan Azuali chu a rawn bia a.

    "Aw, dam e." pangngai takin Azuali'n a lo chhang a.

     "A dam a, nimin lamah pawh in inhmuh reng kha," nurse zawk chuan a ti ham ham a.

     "Kan inhmu remchang êm a, ka'n zawt mai mai mawle," nuih sawh hmel zeta Azuali melh chungin a lo ti a.

     Maziri chuan chumi te țhian dun chu a ngainat zawng an ni dawn hauh lo tih a hriat mai piah lamah Azuali te țhian țha an ni miah lo tih a hmu thiam nghal mai a. Thil nih dan chiang zawka a la hriat loh avangin ngawi rengin a lo awm rih thung.

     "Ka rin aiin in innei rei ta phian a, Peksanga hian ka țhiannu hi a la thlah hleithei si lo a, i nuthlawi har tawh pawhin ka ring lo," nurse-i bawk chuan a ti leh zat zat a.

     "Țhiannu, khatin sawi mah ta che, a rilru a nawm loh phah ang asin. Bakah hei a țhiante an awm ve reng a, an zahawm alawm,' a zak tak tak lo tih hriat fahranin pakhat zawk chuan a ti vel a, Maziri'n a lo ei lo ngang mai.

    "Ni e, a țhiante pawh hi kan zahawm. Mi pangngai tan chuan kal sawn a hun tawh viau a ni," Sangpuii'n a lo ti chang ve ta fal a.

     "An duh leh la awm mai mai rawh se. Mi pasal ngaihzawn zahthlakzia hre lo tan tumah zah lehchuan tur an awm hleinem," Azuali'n a ti el ve salh a, Maziri a lo khi ru sak mai.

     An rin loh lutuk chhan letna an dawn tàkah chuan an nuam ti hmel kha thinrim hmelin a rawn inthlak a, Azuali lahin engah mah ngai lo ni awm fahranin thil dang a sawi san hmiah a, Sangpuii lahin nuam a lo tih hmel ve hliah hliah bawk.

     "Zawngi, lo hre rawh! I pasal hi ka ta a ni țhin a, a la ni leh bawk ang. Eng chena rei nge i hren beh theih kan hria ang chu!" thinur lutuk tih hriat fahrana sehchilh nakin form ha lo zawk chuan a ti a.

     "Ka pasal hi i ta a ni ngai lo a, a ni dawn bawk hek lo. Chuan, i hming Baby-i a ni ang chiah khan kei pawhin hming ka nei ve aw!" Azuali'n a lo ti hmak thung.

     "I va zakthei lo zawt zawt e!"

     "Zak thei e. Mi pasal pawmlai ngaizawng ve phei ila chuan ka zak nasa ngawt ang."

     "Zawngi..."

     "Hming ka nei ve tih ka sawi tawh kha."

     "I pasal nena kan inkawp dan i hre lo..."

     "Nang ai chuan ka pasal ka ring zawk a, in inkawp miah lo tih a sawi a, ka awih viau bawk. Chuan, ka pasal hian min hmangaih avangin tu hmeichhe dang mah a melh ngai lovang tih pawh ka hria," inring tawk lutuka Azuali țawng chuan a țhiante a ti thep suai suai thei hial a ni.

    "I pasal chuan a bum che a nih chu!"

     "Ka pasal hi ka hre chiang a, nang ang hmeichhe zakthei lo lutuk kawp tur khawpa mize hniam a ni lo tih pawh ka hria. Chuvangin, dawt dang i sawi leh hmain khawngaihin min kalsan tawh ta che u."

     "I la hre khawp ang!"

     "I hnen ațanga hriat duh dang ka neih tawh pawh ka ring lo."

     Thinur zeta an kal chhuak nghawng nghawng chu an thlir țhap a, an liam hnu chuan thawveng ta hawk ni awm takin an thaw huai hlawm a.

     "Ke țhian, eng tik ațang khan nge khatiang êm êma mi țawng el khum i lo thiam tak le! Ka țhiannu kha i ni ta lo emaw ka ti hman țep alawm," nui chungin Sangpuii'n a ti hliai a.

     "I duh vak nange?"

     "Duh lutuk e! Ka lo chhuang tawp che. Khatiang hmeichhe zakthei lo lutuk i han hnial thiam dan êm êm kha a hranpain i zir a ni hial lo maw?"

      An nui ta dar dar a. Azuali erawh chhungrilah a lo insang mar țeuh ni ngei tur a ni a chauh hmel hle a, thil a ei mumal lo nen a awm a nuam lo takzet a ni.

     Result a chhuah kim hnu chuan Faki chu pum lam damdawi an chawh nua a, a zu lo in nasat tawhna khan pumpui țha lo a siam a, pum nuam lova a awm reng pawh a lo mak lo e. 

     Zana Freddy va lêng chu a nu chuan țawngkam khat pawhin a lo be lo a, biak ahnekin mei nei zet zetin a țawng fek fek reng a. Engah mah an ngaih duh loh tlat avangin lungawi loh hmel zetin room lamah a lut bo ta daih a, Faki pawhin chhuanlam siamin an room lamah a luhsan ve zat bawk. 

     "Ka ngaihtuah chian hian kan dinhmun a inthlau si a, i tana zahpuiawm mai ka la ni dawn tlatin ka hria." 

     Țhutthlengseiah chep zetin an țhu dun a, Freddy chuan Maziri kut chu humsakin a malchungah a nghat a, zawi tê têa titiin an phun dun sep sep bawk.

    "Min duh ve tak tak em?" thil danga chhang lovin Freddy chuan a lo zawt let a.

     "Duh ve tak tak lo che ila i bulah hetiang hian ka awm dawn em ni?"

     "A nih chuan dinhmunah buai tawh suh."

     "Kan chhungkaw hming chhiatzia te hi ngaihtuah la. Ka nu lah..."

     "Ka thu awih la, chutiang lam ka ngaithla peih lo aw."

     "Mahse,.."

     "I țawng reng chuan ka fawp leh ang che."

     Maziri chu a ngawi ta hmak a. Freddy chuan a khabe-ah chawiin fawh tumin a kun hniam a, a lo thle sawn vat a.

     "Ka țawng tawh loh kha!"

     "I tawng loh pawhin ka fawp duh tho che alawm," tiin a khi suk a.

*******

AZUALI

     Chhun lama a thil tawn tehhrep avang khan a a tlai lam boruak chu a nuam lo zual hle a, thil ei țhat loh mai piah lamah zanah a mu tlem țhin bawk si; a langah Baby-i ngai pawimawh lutuk angin awm lo mah se chhungrilah a vaw chau hle a ni.

     A pasalin a biakna pawh a rul tawk chauh zelin a chhang a, zanriah pawh ei mumal lovin an room lamah mi turin a chho ta daih a. An room chhunga a pasal a lo luh ve chuan țawng vel a peih loh avangin a muhil der ta ringawt a.

     A bula a pasal a rawn muta a rawn kuah tàkah chuan insangmar țeuhin che lova awm a tumna lamah a inhumruh nasa hle bawk.

     "Le... I lungawi lohna chu min hrilh tawh la," a beng bulah a ti sup a.

     A la che duh miah lo a.

     "Muthilh der i thiam lohzia hi ka hrilh tawh che em?"

     A beng chu fawp zauhin a nghawngah a hmuiin a nul thla zel a, a kawr darbah chu pawt thlain a darah a fawhsak a. Insum thei tawh lova a thawk tàk halhah chuan a lamah kuai herin mitmeng zim deuh sanin a en a.

    "Sawi rawh le."

    "Sawi tur a awm lo."

     "Sangpuii ka biak a ngai dawn tihna a nih chu." tih leh thawh a rual a.

     Azuali chuan a pasal chu pawt letin nghet lutukin a kuah zui nghal a, naupai țantir rilru no leh thikna nen a mittui chu dang zo lovin a pasal awmah hmai phumin a inhnit hlap hlap a.

    "Shhh... Naute khan i țah chuan hrehawm a ti dawn asin, a pa pawhin hrehawm ka ti a nia," a nupui hnunga chul hauh hauh chungin a ti a.

     A lungchhe zualpui a reh hnuin Azuali chuan mittui la tling piau chungin a pasal chu a en chho a.

     "Ih..." sawi zawm lovin a ngawi leh ta daih a.

     "Baby-i a ni tiraw?"

     Chutia a rawn sawi mai chu mak ti hmel deuha a pasal en chungin a bu nghat a.

     "Tlaiah khan Sangpuii'n min rawn phone a, thil thleng kha min rawn hrilh vek alawm."

     "Chuti si eng mah hre lo ni awm takin i awm vel a!"

     "Nangma sawi ngei ka hriat duh vang a nia."

     "I ho."

     Țawngkaa chhang lovin a pasal chuan a hmuiah a rawn fawp a, a lo chhang let ve nghal zat a. Luak chhuakin a rawn nawr leh tàkah chuan rei erawh an infawp thei ta lo.

     Kar a vei hnu chuan a zia chho ve ta viau a, luak danna nen țangkawpa enkawl a nih chhoh tàkah phei chuan a thil ei a tuiin a mut pawh a tui chho ta hle a, amah pawh lang theiin a țha sawt sawt hial a ni. 

     A u Ruatpuia'n a rawn tlawh zauh zauh a, dawr lama a buai theih êm avangin duh angin an inhmu tam thei lo zawk a. A neih chhun tak meuh meuh a nih tawh avangin a u chu a ngai țhin hle a, a raino tir awm nawm lohlai te khan a u bula awm mai te kha a duh rum rum țhin. 

     "Bawihi, inleng kan nei a nia." 

     A pasalin a kaihthawh chuan peih lo zetin a meng a, inkhawm bana a tlu zal mai mai kha a lo muhil daih chu niin. A tho chhuak vat a, khua pawh a lo tlai duai tawh a nih hmel. 

     Inhnuai lam panin a pasal nen an inkai thla ral ral a, sitting room-a a u leh a bialnu lo țhu a hmuh chuan hlim zetin a u bulah a țhu nghal chat a. 

     "Ka pa lungphun dan tur chungchang sawipui che u ka duh a," Ruatpuia'n a tih chuan Peksanga pa chu a tho tharh a, chhuanlam siama kal mai chu a tum a. 

     "Pu Rin, kalsawn lovin ro min relpui la ka duh mang e! Mami nen hian chhung leh khat han hnim hnaih vak hi ka nei lem lo a, puitling taka ro min relpui turin nang leh ka makpa hi ka rawn pan tawp mai che u a nih hi," Ruatpuia'n a tih tàkah chuan a țhutna ngaiah chuan a țhui leh ta a. 

     A nu thingpui rawn chawi chu Azuali chuan a lo pui vat a, thingpui in pahin lungphun dan tur chungchang chu an sawi ho nghal a. Chutia anmahni rinchhana rorelpuitu atana a rawn pan tàkah chuan Pu Rina pawhin phur takin ro a lo relpui a, țul leh pawimawh nia an hriat te ngaihtuah kualin tih dan tur kawng a kawh hmuh nual bawk. Ruatpuiate unau tan chuan nu leh pa nih leh innghahna tlak an tling takzet a ni. 

     Zanriah ei ve nghal tura an sawm ngial pawhin Ruatpuia chuan a hnial tlat a, a bialnu chu a ina chaw eipui a tum avangin a hnial a lo nia. Kawt zawl ațanga an inphur chhuak chu a pasal rinchhana ding chungin lungawi zetin a thlir liam a, a unaupa chu hlimna leh malsawmna dawng zel turin a duhsak takzet a ni.

     Hna chungchanga a pasal zin a ngaih avangin a thawmhnaw ken tur chu a siamsak mawlh mawlh a. Hun rei tir ni dawn lo mah se a pasal awm lo tur chu a huphurh ru hle a, an inneih hnua a zinsanna hmasa ber tur a ni a, kal vena chi a ni bawk si lo. Zin lo tura ui beh maite chu a duh rum rum hial a ni.

     "Ka naute hian ka zin tur chu a huphurh viau a ni maw!" a nupui kuah hlu hlu chungin a ti a.

     Ani pawhin a nupui zinsan chu a hreh ve hle a, loh theih loh thil ni lo se țhulh leh maite chu a duh ve ngawih ngawih a, țhulh chi lah a ni mang si lo.

    "Ka rawn be ziah dawn che alawm. Lo indim la, hna lo thawk miah lo ang che."

     "Aw le. Nang pawh fimkhur la, min rawn ngaihtuah lutuk duh suh aw."

     "Ka zin loh pawhin ka ngaihtuah reng che a, ngaihtuah i duh loh chuan ka va buai awm ve!" a nupui rilru tih zangkhai tumin a fiam zauh a.

      "A nih leh, min ngaihtuah lo la, min ngai ringawt mai rawh," tiin a nui seih a.