PEKSANGA 19

 PEKSANGA 19

Sbk Pachuau

     Maziri'n an in awmna lai nia a sawi zawng chawpa kan va thlen chuan an veranda-ah a lo awm a, a bul lawkah kut kuangkuah thanin Freddy chu a lo ding hlun bawk.

     Ka nupuiin Maziri a pan laiin keiin ka țhianpa chu ka dinchilh thung a, thinur lutuk tih hriat takin a inseh ruh țeuh a, thil awm dan ka zawh chuan min chhang mai lovin Maziri lam chu a hawi daih a.

     Maziri sawi hmangin khual khaw lama a laizawn a boral avangin a nu chu tlaiah khan a zin thut a, a pahrawn erawh a kal ve lo a. A u-in haw hma tura a rawn tihna chhan pawh a pahrawn nen chauha awm dun a hreh vang leh a khawih leh ang tih a hlauh vang a lo nia, Sangpuiite thlama kan awm lai khan Maziri chuan a hre tawh naa kan hriatah a lo sawi duh lem lo a ni.

     Freddy nen an inzui luh lai chuan a pahrawn chu lungawi loh hmel zetin a lo țhu tûm buau a, zu rim a nam rum rum bawk. A u chu an room lamah awmin chhung lamah kawng a kalh tlat a, luh a tum pawha a hawnsak duh loh avangin a pahrawn chuan thinurin a tawng a, Faki lahin a hawng duh der mai si lo; a pahrawn tih ngaihna hre lo chu a lo țhu tûm bur a, thinur takin a ang tun tun bawk.

     Chutia mihrang an awm ve tàkah chuan a insum ve deuh nge ni Maziri pahrawn chu a țhu ngawi ta ngul a, hmun danga kal sawn pawh tum lovin Freddy awm chhung chu a țhu ve ta reng a.

     Freddy chuan a pahrawn muthilh thlenga len chu a tum ru viau naa mut mai tum lova a țhut ve kur reng avang chuan haw turin a chhuak ta ngawt a, Maziri'n pawn thleng thlahin buaina an tawk a nih phawt chuan eng hun pawh ni se hrilh ngei tura a chah hnu chuan a inkhalh chhuak ta a. 

     Ngaihțhat lohna lian tak a neih tlat avangin thui angreng tak a tlan hnuah a let leh a, Maziri te in piah deuhah a bike chu dahin ke-in a pan phei a. An veranda a rah ruala inchhung lama țanga thawm rawn chhuak a hriat chuan a ngaihțhat lohna chu a dik tih hre nghalin hmanhmawh zetin kawngkhar chu a hawng rawp a, an lo la kalh loh hlauh avangin awlsam takin a luh theih phah a ni.

    Țhutthlengsei pakhatah chuan rem lo zetin a pahrawn chuan Maziri chu a lo bawh run a, Faki chuan a theih ang anga a nau chung ațanga chhuktir tumin a pahrawn hnunga chum leh pawh a lo fawm a, hnuai lam ațang chuan theih ang angin Maziri a lo inveng ve bawk. 

     Freddy a luh rual chiahin a pahrawn chuan Faki chu a nam per nawk a, chhuat laiah a tlu phei nawk a. Freddy thinur lutuk chuan Maziri chunga țanga a pahrawn chu pawt tho lâwpin a hnek zui nghal bur bawk.

     "Nauva, i va ngampa ve maw le! Ka inchhûngah te kut min thlak ngam vel a, i va chawh dawn rua êm aw!" tih pahin Maziri pahrawn Rawna chuan Freddy chu a bawh phei pawp a.

     Freddy lo inring lutuk lo chu va bawh thluin chhuatah chuan an inbuan ta thial thial a, Maziri hlauthawng lutukin tawp tura a auh pawhin awmzia a awm lo chiang hle. A naupang zawk leh thahrui ngah zawk ta na nâ nâ chu Freddy chuan lehthalin a țhut bet ta tlat a, Rawna chuan tal chhuah han tum ve bawk mah se Freddy te ang palian ve tawk tak, tlangval tha za rual leh fit lutuk tak mai lak ațanga tal chhuah tum chu a har lam hret a ni.

      Maziri'n tho tura a vin tàk țhawtah chuan Freddy chu pu Rawna chung ațang chuan a tho chhuak ta hram a, sawisak hrep a châk hle ni tur a ni kut hum ruhin rum êm êmin a melh zui reng a, Maziri'n a chet leh mai hlauvin a banah vuanin a chelh zui zat bawk. 

     Chutia Freddy a khapna chhan chu a pahrawn a khawngaih vang a ni hauh lo a, amah Freddy hmakhua a ngaih vang zawka khap a ni. A chhan chu, a pahrawn hi a hre chiang a, Freddy chungah hian eng thil pawh a ti duh ngei dawn tih a hre tlat a, he mihring nunrawng leh zahngaihna nei lo lutuk hian eng thil țha lo chiah nge a tih ang tih pawh ngaihtuah ngam loh khawpa rapthlak a ni. Amah a buai thui lohna tur zawkin Freddy chu buaina siam lova haw daih turin a duh a, chutih rualin Freddy awm lo se zanin hian a u chunga thleng ang kha a chunga thleng thei a ni tih a hre chiang lutuk tlat thung. 

     Pu Rawna chu rawn tho ve țuih țuihin  a phun pah bul bul a, inbeng fai thuk thukin țhutthlengah a țhu a, huat hmel zetin Maziri leh Freddy chu a melh leh run run țhin.

     "Nangni unau kha in room-ah va inkalh khum leh rawh u! Nang pawh Zirsangzual, i inleng lak tlak loh zet hi hawtir rang rawh. Ka inchhungah hian a duh ang anga a rawn chet hi ka ngaithei hlek lo a nia," thle deuh lûk lûk chungin a ti chhur chhur a.

     "A duh vanga khatianga rawn che a ni lo a, nang ang pa lepchiah lutukin thil tenawm dang i tih leh hmain a rawn dang zawk che a nih kha," Faki'n a lo ti hmiah a.

     "In unau khawloh vanga keimah zawk lepchiah lutuk anga min han țawng khum chu le! In mitmenga min beiseina hi ka hmuh hmaih hleinem. Min beiseina tih puitlinsak che u ka tum mai chauh a ni," zak hauh lovin pu Rawna chuan a ti leh chhur chhur a.

     "Nang anga mihring zakthei lo leh dawt sawi hrat hi ka la hre lo. Kan unau hi min khawih i tum leh a nih chuan i inchhir ram ramna turin ka che tawh dawn tih lo hre rawh. He in hi 'ka in' tia i sawi ve ziah pawh kha sim hmak ang che. Ka pa in a ni a, a ni reng bawk ang."

    "I nu-in ka kutah engkim a dah vek tawh. Ka in ka tih chuan ka in a ni mai. Nang hmeichhe zakthei lo, zankhuaa hur bo țhin khan eng mah lo sawi ve lo mai teh!"

     "Khatiang khan ka u hi țawng khum ngam tur i ni miah lo! Nangmah vanga a nun chhiat nasatzia hre reng chungin inthiam lohna pakhat tê pawh nei lovin i la deusawh zui a, tun ațang chuan ka ngawi mai mai tawh dawn lo," Maziri'n a u thlavang a lo hauh vat a.

    "Ve khanglang che chuan! Nang pawh i u ang chiaha zakthei lo leh lepchiah, tlangval nena khaw thim thleng thlenga fawr bo vel mai mai țhin i nih kha! I tlangvalpa hi um haw nghal la a țha ang," a țhutna ațanga thawh țuih țuih pahin pu Rawna chuan a ti hmuk hmuk a. Dawhkana tui inchhawp chu novah thli chhuakin a in khulh khulh a.

    "Lepchiah leh zahthei lo chu keini ni lovin nangmah kha i ni zawk. U Freddy hi ka tlangval a ni lo a, zahawm taka min kawmtu a nih hi. Nang anga 'hur' leh hmeichhe mamawh huam huam chi a ni ve lo tlat!"

     Maziri hmai chu a ri thlawp a, Freddy chu dan hman loh khawpa rangin pu Rawna dinna lamah pheiin a hmaiah a hnek nghal siah a, au ruai chungin pu Rawna chuan a hnar a hup a, chhuatah a țhu sawp nuai bawk.

     A pahrawn hnar thi chu hmu mah se Faki chuan a ngaihven duh eih lo. A nau hmai, a pahrawnin a ben vanga sen deuh tal chu enin thinur zetin a phun hlak a, Freddy erawh a ding ngawi ngal thung.

     Maziri chuan a pahrawn hmel a enin Freddy tan nakinah buaina nasa zawk a thlen a hlau a, an rik leh hlut hmaa haw turin a tur ngial a, Freddy lah luhlul zetin a ding ngawi run mai si, a tih ngaihna hre lo lutukin inthlahrung tak chungin Azuali a rawn call ta ringawt mai a lo ni.

     Chutiang misual lutuk, nupuite fa pawh ita pawngsual hreh lotu chu țâng ngei ngei tlak a ni tih chu ka ngaih dan a ni a, ka han sawi chuan Freddy pawhin min thlâwp hle. Maziri erawh a tim deuh niin a lang a, min hnial erawh a tum bik chuang lem lo.

     "Jail-ah a tang lo a nih ngat chuan saw mitenawmpa saw ka sawisa leh chiang khawp ang. A ruh zawng zawng tliak vek khawpa ka sawisa lo saw a vannei a nih saw!" thinrim zetin Freddy chuan a ti chang fak a.

     Maziri u-in inchhung lama lut tura min auh tàkah chuan kan țhu lut a, a pahrawn hmel hmuh tur a awm lo a, room lamah a tawmbo a ni mahna!

     Nu ber awm bawk si lo nen anni unau chauh an pahrawn hova awmtir chu ni thei ngangin kan hre lo a, Freddy phei chuan chu ina a pahrawn awm chhung chu Maziri te unau riahtir loh mai te a rawt deuh titih hman hial a. Kan sawi ho fê hnuah ka nupui leh Faki te pawhin report mai țhaa an hriat thu an sawi ve tàkah chuan Lalhriata ka call ta nghal a.

     Police lamin pu Rawna an lak fel hnu chuan keini pawh haw mai tumin pawnah kan chhuak a, Maziri te unau pawhin kawt thlenga min thlah tumin min zui chhuak ve bawk a.

     "Lawmthu sawi dan pawh kan thiam lo a, kan lawm lutuk a nia. Nangni awm lo ula chuan kan him zo ang em tih pawh hriat a ni lo, kan lawm takzet a ni," tiin Faki'n lawmthu a sawi a.

     "Lawmthu sawi a ngai lo. Pui thei che ua kan awm hi a kan tan pawh a lawmawm. Tikha chuan rilru hahdam leh venthawn nei miah lovin in awm thei tawh ang," Azuali'n a lo ti thuai a.

     "Kan inhriatna a la rei lo a, chuti chung chuan min ngaihsakin min buaipui nasa êm êm hlawm a, kan unau tan hian in hlu takzet a ni," Maziri'n a lo ti ve bawk a.

     "Ka nu hian eng angin nge a ngaih ang tih hi tunah chuan ka rilru kaptu ber a ni ta rih a nih hi," Maziri bawkin a tih zawm leh zat a.

     "Nute na nâ nâ chuan fate thlavang hauh leh in dikna hmuhsak kha a tih tur a ni a, thil awm dan dik tak a hriat hunah in lamah a țang êm êm ang," Azuali'n a ti a.

      "Ka ring lo! Ka laka a pasal chet dan ka sawi apiangin ka hurherh vang leh keima zir loh vanga thlengah a ngai tlat a, vawikhat tê pawh ka thusawi min awihsakin ka thlavang hauhin a țawng ngai lo. Nu azawnga nu mak ber a ni hial ang chu!" Faki'n a lo tih hmak a.

    "Kan sawi theih a awm thui viau lo naa i nu chu titipui tura min duh phawt chuan in tan kan awm reng a nia aw. Inthlahrung hauh lovin min mamawh hun apiangah min ko ula, theih ang angin harsatna awm apiang su kiang turin hma kan la ho dawn nia," ka nupui chuan a ti dam dap a, chhuang ru takin ka lo melh vawng vawng a.

    "Kan ti buai nasa tawh si che u a, in zahawm tawh lutuk! Kan tan pawh a zahthlak zozai tawh alawm le," Faki'n a ti hluai a.

     "Zahthlak loh e. Țhian țha te laka in inthlahruna in zah viau chuan ințhian țhatnain awmzia a nei nang le," ka nupui bawkin a lo chhang ve zat a.

     "Kei chu ka rilru hi a la nuam fel thei lo, ka lung phû hi a su dup dupin ka hria!" Maziri'n a lo ti sep a.

     Freddy chuan Maziri kut chu lain a humsak vang vang a, a hmel chu a thutak ve hle bawk.

     "I rilru ti hah duh suh. Eng harsatna pawh in chungah thleng se in hmaah ka awm zel ang. Superman chu ka ni hauh lo naa keimahah innghat turin ka duh che a ni. I tan ka awm reng ang tih lo hria la ka duh a ni."

     Kan Freddy kha a ni ta lo emaw tih mai tura thutak leh romantic lutuk bawk sia a awm chu mak ti dawn viau a, Maziri a buaipui nasat dan ngaihtuahin a rilru a lo pe thuk ve tawh hle a ni tih ka hrethiam leh ta thuai a. Ka  lawmpui rualin an bul țanna erawh a hlimawm loh hlein ka hria a, ka khawngaih angreng viau bawk. A ngaihzawng hmasa a chân tawh a, tuna mi nen hi chuan buaina tawk lovin inkawp ve tawh se tih chu ka duhpui hle a ni.

     Maziri mitin chiang taka Freddy a melha a lu a bu nghat ka hmuh chuan hmangaihna kawng inang an zawh dun dawn tih ka hria a, eng ang buaina nge an la hmachhawn ang tih lam aiin inhmangaih tawn taka pumkhata an insiam hnu thlenga awm tura duhsakna thu hlan mai chu rilruah a lian rih mah zawk a ni.

     In kan thlena ka nu leh pate hnena report kan pek zawh meuh chuan khua a var hnai thuak tawh a, office lamah hna ka ngah bawk si nen kan mu ta nghal a.

     Zinga ka harh chuan ka nupuiin min lo thawhsan daih tawh a, mutna hun kan neih tlem tehreng nen chutia hma taka a tho leh chu țul lo tiin ka phun hluk a. Rawngbawl leh inchhung ti fel turin nula kan nei a, Azuali chet ve ngai miah lovin kan nula chuan a ti thei vek dawn tho a, ka khap fo naa awmzia a awm tam lo hle. Ka pa remti lo chung ka nu hian inchhung chet leh eng eng emaw tih hi a sim thei miah lo a, ka nupui lah chuti bawk. Ka nu ang maia luhlul nupui ka nei tih ka lo mangnghilh leh țhin!

     Inhnuai lam panna step-a ka chhuk lai chuan hmanhmawh zeta Azuali lo tlan chho nen kan intawk a, ka biak pawha min chhan loh avangin ka zui let ve nghal vut a.

     Kan room chhung ka luh chuan a lo ruak huai a, bathroom lamah thawm a awm avangin ka pan nghal a. Azuali chu bathroom chhuata țhuin a lo luak barh barh a, lut ve vatin a chalah ka dawmsak a. Chutia a awm ta thut mai chu ka buai chhe lo chauh a, ka mangang ngei mai.

     Tlema a zia tàkah chuan ka àwm nghengin a țhu zawi ngiai a, duat zeta kuahin eng tin chiah nge a awm tih chu ka zawt mawlh mawlh a.

     "Ka luak a rawn chhuak thut a..."

      "Eng emaw ei sual i nei a ni lo maw?"

      "Aih, chutiang a nih ka ring lo. Zingah khan luak chhuakin min ti harh a, ka va luak hnu khan ka zia leh mai a. Mami(kan nula) pui turin ka chhuk a, tun maiah khan a rawn ni leh thut a nih kha."

     "Tun hmain 'tiang hian i awm ngai em?"

     "Awm ngai miah lo."

     "Vawiinah inentir la a țha ang."

     "A ngai lo ang. Ka pum dik loh vang mai mai a nih ka ring a, ka zia chho leh mai ang," a ti ta tlat a.

     Ka nawr ngial pawha a duh tàk tlat lohah chuan lo inti hahdama eng mah ti lova awm mai mai turin ka chah a, rilru nuam lo tak chungin office kal turin ka chhuahsan a.

     Chawhnu lamah ka nu-in min lo call a, theih anga hmaa haw tura min rawn tih avangin Azuali vang a nih ringin hlauthawng zetin chanchin ka zawt vat a, Azuali chu a țhat thu leh ngaihtuahawm a nih loh thu sawiin haw lam erawh hmanhmawh deuh turin min la ti fan a.

     Chawhma lamah khan vawi thum lai a chanchin ngaichangin ka nupui chu ka be tawh a, a zia tawh thu min rawn hrilh avang khan ka ngaih a țha deuh tawh kha a ni a. Tunah ka nu-in ni danga a tih ngai loh angin haw hma turin min rawn nawr leh si a, ka nupui țhat thu min hrilh tho mah se ka ngaih a țha lo ru ta riau a, rilru nuam lo zetin ka awm ta reng a.

     Haw theih a nih rualin ka tlan haw nghal a, inchhung ka luh rualin ka nupui ka zawng a. Ka nu chuan ka hmelah lo hrethiamin kan room lam a melh zauh a. Chhoh nghal mai tuma ka pen tawh chu hawi let lehin ka nu chu haw hma tura min tihna chhan ka zawt leh hnuhnawh a. 

     "Chho phawt la, i hre mai ang," nui hmel pu chunga a tih chuan a ngaihna hre lo deuhin dar ka san àk a, muangchang lovin step-ah chuan ka pen chho ta pawk pawk a. 

     Kan room chhung ka luh chuan ka nupui chu khumah a lo mu a, chutia ani meuh lo mu ta chu ngaihțha lo zetin ka pan hnai nghal ruak a. 

     "Bawihi, i țha em?" 

     Chauh hmel zeta lo meng chhuakin min en a, ka nghawngah a kut zen chhovin nghet zetin min kuah a. A awmdan chu mak ka ti lek lek a, amah lah chu a lum ham ham mai si a, a khawsik sang lutuk buai a nih te ka hlauthawng rum rum a. 

    "Ka luak chau deuh a, ka nu-in mu turin min nawr reng bawk nen ka lo mu mai mai a nih hi." 

     "I luak leh em ni?" 

     "Umm..." 

     "Inentir tura ka tih che khan min hnial lo la țha tur a nia," ka ti nghat a. 

     "Thil ka hrilh ang che aw..." ka beng bulah a phun sep a. 

     "Sawi la..." 

     "Tho phawt la." 

     Ka tho ve mai bawk a. Ani pawh rawn thovin a dressing table drawer chu a va hawng a. 

     "I mit chhing rawh le!" 

     "Eng thil.." 

     "Ka ding reng peih lo a nia. Chhing vat rawh," a tih leh tàkah chuan mak ti rilru tak chungin ka chhing a. 

     Ka bulah min si chetin a rawn ding a, ka nghawngah kuahin a rawn dingdihlip tih hriat takin ka beng bulah a rawn phun sep a. 

     "Meng rawh le, ka pasal duhtak." 

     Ka men chhuah rualin min kuahna a la thla a, a kut pakhata eng thil emaw kengin ka hmaah a rawn lek chho a. 

     "Bawihi?" 

     A test kit ken chu laksakin ka en nawn leh ngat a, rinhlelh tur a awm lo. Kei hi pa ka ni tawh dawn! 

     Chhun lama a luak leh chiam avangin ka nu chuan nau pai vang a nih tàk hlauhin tiin test kit a lo va leitir a, Azuali chu tih dan tur hrilhin bathroom pawnah a lo nghak ran a. Azuali lo chhuah rual rualin a lo laksak a, rinsen pahnih chiang taka lo lang a hmuh chuan ka nu chu hlim êm êmin a nui hawk hawk a ni awm e. 

     A hlim lutuk insum zo lovin kei pawh kha min lo call-in haw hma turin min rawn hrilh a lo nia, ka ute chhungkua kan hnena zanriah ei turin a lo va sawm thlap tawh bawk. 

     "I hlim em?" 

     "Tunah hian khawvela mipa awm zawng zawng zingah ka hlim ber hial ang chu!" 

     A hmui thianghlim takah chuan ka fawhsak zauh a. 

     "Ka lawm e aw, Bawihi." 

     "Keimah chauha ka siam a nih loh kha," tiin a lo fiamthu leh zauh pek. 

     Ka nui chhuak hawk a, duh lutukin ka kuah vawng vawng a, ka nupui hi ka thinlung zawng zawngin ka hmangaih a ni! 

(Chapter hnih emaw thum emaw vel la awm turah ngai ang u auh)