PEKSANGA 16

 PEKSANGA 16

Sbk Pachuau

     "Engtin nge i theih zawk a! Nupui i mamawh tawh viau a nih te chuan kan innei thei reng alawm. Min hrilh mai ta che!"

     Ka office chhungah hmai sen vek khawpa thinrimin a rawn lut a, min ankhum buan buan a ni ber e.

     "Eng mah sawi lovin thutlukna i lo siam a, kan inkar pawh kan la tih tawp miah lo kha!"

     "Tih tawpa tih tawp loh turin kan inkarah tisa mamawh inpek tawn bak eng thil mah a awm lo!" Ka ti nghut a, ka ning țan riau mai. 

     "Chutiang ringawt a ni lo," țap aw lek leka Baby'n a tih chuan ka ngawi ngal a. 

     "Kan inngaizawng alawm! Kan inngaihzawn avangin sex pawh kan hmang dun fo bawk!" a tih zawm leh țiau a. 

     "I hre sual a nih chu. Tisa thilah bak inzawmna kan nei ngai lo."

     "Dawt! Dawt vek! Kan induh tawn a, kan inhmangaih bawk. Min hmangaihna kha i hrethiam lo mai mai a nih kha," ka kut rawn vawn pahin a ti a, ka lo thing thla hmak thung. 

     "En teh, ka sawi chiang tawk viau tawh. Hmeichhe fing tak i nih kha, thil engkim i hrethiam vek tih pawh ka hria. Tunah hian nupui ka nei dawn a, ka nupui tur chu duh taka ka thlan a ni bawk. Khawngaihin min chhuahsan tawh rawh, hna ka ngah a nia," ka ti ta hmiah a. 

    "kha hmeichhia khan a bum che a nih kha! Khatiang ruihhlo pawh zuar hreh lo hmeichhia khan a phû lo che! Amah pawh a inzuar tel hreh hauh..." 

     "A tawk! Tunah hian i chhuak nghal lo a nih chuan hmeichhia i ni tih ka theihnghilh palh ang e!"

     Ka vin êm avang chuan eng mah sawi zawm ngam lovin a ding ngawi ta reng a, chhuah erawh a la tum chuang eih lo.

     Ka thinur lutuk chu kut ka hum ruh ngawt ngawt a, Azuali chungchang a sawi dan khan ka thin a khei zak a, kut pawh ka thlak hman teuh hle a ni. Hetiang taka zak thei lo leh huangtaua a awm ngamna chhan hi keima zir loh tih ka hria; duhtawka nawmsip bawlpui țhintu kha ka ni miau a. Mahse, min lo ngaizawng tel reng tih rêng ka hre hauh lo, keimah ang bawka sex partner anga min en ve mai ka lo ring a, ka lo ring sual hle a lo ni.

     "Chhuak tawh rawh," aw dam deuh zawka ka tih leh chuan mittui tling piauvin min en a.

     "Khawngaih takin nupui nei suh," zuk la ti fan a!

      "Naktukah nupui ka nei dawn a, buaina i siam loh hram ka beisei," ka lo ti ve hmak thung.

     A la chet duh lo fo avangin Mafeli ka au a.

     "Mafel, khawngaihin kan inleng hi pawn lamah lo va thlah ta mai che."

     Chutia Mafeli ka koh tàkah chuan hreh hmel zetin a chhuak ta hram a, ka thaw huai mai.

     Naktukah kan innei tawh dawn a, loh theih loh vangin chawhma lam office ka kal a, hmanhmawh rilruk laia Baby-i lo lang chu ka lawm lo hle a, a rawn țawng tam ta viau bawk nen tunah tak phei chuan ka haw hlur mai a ni.

     Ka inpeih fel chuan rin ai takin a lo la hma a, rehearsal nei tur kan nih avangin in lama haw lovin Azuali te in lam panin ka tlan a, Freddy bia-in Azuali lam tura ka kal mek thu ka hrilh a, Sangpuii lo va sawm turin leh pastor quarter lama min lo nghak mai turin ka hrilh nghal zat bawk. 

     Office lama thil thleng khan ka rilru a ti pik riau kha a ni a, Azuali hmel ka hmuh chiah chuan hahdam sawng sawngin ka inhria a, a hlim hmel leh mitmeng nung sarh mai chu thlir hrehawm tak ni hek lo le! 

     Rehearsal neih zawha ka thlah leh chu haw tlang mai lovin an inah kan inzui lut a, khual khaw lam ațanga inneih hmang tura lo kal an chhung leh khat te an lo awm nual a, min chibai sap sap hlawm a.

     Zan lamah kan inhmuh theih dawn loh avangin Azuali chu a fala hmuh ka duh hle a, a room lama min kalpui lawk tura ka tih chuan ihe lovin min hruai ve mai bawk a.

     "A va pawimawh awm ve, a fala inbiak ngai meuh chu!" a room kawngkhar hawn pahin a ti a, keiin a bana lo vuanin room chhûngah chuan ka nawr lut a ni hrim a.

     Room chhung kan luh rualin ka taksa thlâwpin ka kuahbet nghal a, zawhna nei mitmeng nena min rawn en chho chiah chu eng mah sawi lovin a hmuiah ka fawp nghal siah a.

     Ani pawhin min thlahlel tih hriat taka min nghen hnaih sauh pahin min fawp let ve a, rei ngial kan infawh hnu chuan kan inthlah ta hram a.

     "Hei hi em ni pawimawh i sawi chu?" nui hmel pu chungin a ti a.

     "A pawimawh lo em ni?" Ka lo ti nghut a.

     "Pawimawh tho e," nuihza insum tum takin a ti a. 

     "Zaninah kan inhmu thei dawn si lo a, tuna ka fawh loh che chuan zanlai lo kal a ngai leh dawn asin!" 

     "Naktuk ațangin kan awm dun reng tawh dawn alawm." 

     "Naktuk a la ni hleinem," ka tih chuan a rawn nui chhuak hak a. 

     "Eng emaw chang hi chuan mipa naupang i ang ka ti țhin!" 

     "Eng vangin?" 

     "Thil nghah hi i thei lo lutuk țhin a!" 

     A sawi dik chiah a ni! Thil nghah lam hi ka thatchhiatna tak a ni a; a bikin, ama chungchangah ngat phei chuan minute khat lek nghah pawh harsa ka ti fo țhin rêng a ni. 

     "Zanin chu i bulah ka lo riak leh mai dâwn emaw ni le!" 

     "Teuh lo lutuk! Miin hre palh ta se, inneih dawn zana riah dunte chu engtin nge min sawi ang tih ngaihtuah la," uar deuh takin a ti a, ka lo nui hawk hawk thung. 

     A ngaihdan a ni dawn lo lutuk tih ka hriat vanga rawt der ka ni a, min chhan dan pawh ka rin ang chiah a ni e. 

     Ka fawp leh vawng vawng a, kham lo tak chungin ka hawsan ta hram a. In ka thlen chuan mikhual bakah ka ute nupa bakah an naute nen an lo ri laih laih hlawm a, a dan pangngai tê-in ka nu'n min lo ngaihven leh vat bawk. 

     Sangpuii chu Azuali'n țhiana a hman dawn avangin a nihna takah mipa lam ni mah se a hmeichhe lam chan a nih a ngai ta zawk a, an unau mai chauh an nih avangin inneih hun tur ruat fel a nih ațang khan Sangpuii chuan kawng engkimah a pui chawt a, a tangkai takzet a ni. 

******

     Ni chhuak chu tuk danga chhuak țhin tho kha ni mah se mawi danglam bik riauvin ka hria a, Azuali ka biak zawh hnu chuan intifai turin bathroom ka pan zui a.

     "A'u Mama, Anu'n i tho tawh em a ti," bathroom kawngkhar kik karh karh paha Mapuia rawn au lang lang chuan ka nuih a ti za kher mai!

     "Tho tawh a ti zu tih leh rawh le," nui chungin ka au let a, a kal leh nghal ni ngei tur a ni a thawm a reh zui hmak a. 

     Ka naute hi nu hran fa mah ni se nu berin a zir miau a, hrin hrang kan ni tih hriat loh khawpin kan awm a. Ka naute pahnih phei hi chuan nu hran ka nei tih hi an hre lo hrim hrim a, inen hranna awm miah lovin kan khawsa ho a ni. 

     An lian ve tawh uai naa an ngaihtuahna a la puitling lo dun ve hle a, thu an awihin tih an nuam tih lohah chuan la buaipui ngai ve tak mai an ni reuh a. Ka nu hian a enkawl țha êm a, à dun viau e ti lo chuan an rilru a țha-in mi dang sawiselna leh rêlna thu an Chhak chhuak ngai lo a, țawngkam mawi lo an hman ka hre ngai hek lo. 

     Thawmhnaw ka inbel mawlh mawlh laiin ka room kawngka an rawn kik a, ka nu aw ka hre zui zat bawk.

     Ka nu hnunga hmeichhe lo lut ve chu ka hai țhelh a! Kum eng emaw zat ka hmu tawh lo a, a address hre lova kan awmna chin pawh ka hre tawh lo hial a ni.

     "Mama, i nupui neih lawm turin i nu hi a lo kal vang vang a, lo inkawm lawk ta che u," ka nu'n a tih chuan sawi mai tur hre lovin ka ding ngawi reng a.

     "Ka fapa, i lo puitling tawh takzet a nih hi! I pa tlangval lai ang maiin i lian țha-in i hmel pawh a țha lutuk ringawt!"

     Ka nu, min hringtu ngei kha a la ni reng e. A țawngkam leh hawiherah a la inthlak danglam lo hle tih a hriat theih a, a ze ngai reng kha a la pu a nih hmel.

    "Tikhan lo inkawm ula, ka lo zu chhuk thla hmasa ang e," ka nu'n a tih chuan la awm ve rih tura dan mai chu ka duh rum rum a.

     "Ni e, lo zu chhuk rawh. Ka fapa hi ka'n kawm lawk ang e. Kan inhmu lo rei vang vang si a, ngaihte pawh ka ngai ve tawh a nia," ka piaha hmeichhe ding chuan a ti zat zat a.

     Tuna ka nu hi min hringtu ni se ka ti fo țhin. Ka nu tak hian kan naupan lai atang tawh khan min ngaihsak tak tak ngai lo a, a uire hnu khan ka pa nupui nei leh chu rawn thik thar lehin ka u a rawn kheuh khawlo hman viau kha a ni a. Ka nu dawhtheih leh inpekna azarah hmeichhe fel takah a chhuak thei ta hlauh zawk a, chuti ni lo se ka u kha mi pangngaiah a chhuak hauhin a rinawm loh.

     Ka nu tak chanchin hi a chhe zawnga sawi a phal ngai lo a, hringtu nu hlutzia min hrilh zawk fo țhin. Chuti chung chuan midang kâ ațangin a chanchin țha lo tak tak kan hre reng a, ka nu(hrawn) bula kan sawiin engah mah ngai lo tura min hrilh bakah a chanchin mawi lo lam chu sawi ve miah lo turin min khap tlat țhin.

     Pasal a nei a, a pasal neihnaa kal turin ka pi leh pu(ka nu nu leh pate) khan min rawn hruai a, kan unauvin kan va kal ve ngei a, ka nu hnena țanga ngaihsakna chhe te mah kan va dawng lo thung. A pasal nen chuan rei innei lovin an ințhen leh thuai a, vai sumdawng pasala neiin vairamah an awm tih kan hre leh tawp a, a bak eng mah a chanchin kan hre zui lo.

     Tunah hian engtin nge ka nupui neih tur a hriat ka hre lo naa min lawmpui turin a lo kal ve ngei chu a nih hmel a, han biak vel pawh ka phur lo ngei mai. Mahse, puitling ka ni tawh a, mawi lo taka lo dawnsawn erawh ka tum bik lo.

     A ze chapo larh mai kha a la chhawm tluang zel a, sum a awm chuan a hlim hle dawn tih pawh a lang reng mai. A pasal a hausa bawk a, duhtawkin nuam a chen thei ang chu!

     Thu ho deuh deuh sawiin a titi luam a, inneih zawha an awmna lama zin thla turin min sawm nasa hle bawk. Tunah chuan mahni inenkawl thei niin buaipui ngai rual ka ni tawh lo bawk a, chuti taka min rawn be țha pawh chu a hriatthiamawm viau mai.

     Inhnuaiah kan chhuk a, ka nu'n tukțhuan ei ve nghal turin a sawm naa a thlenna lama ei turin a haw ta zawk a.

     Inneih inkhawm hun chawhnu lam daih a nih avangin hmanhmawh lutuk lovin tukțhuan kan ei a, mikhual an awm ve diah bawk nen kan ri nak nak reng a. Nidang ang chu ni se ka ning leh viau maithei a ni. Ka nupui neih dawn vanga lo kal an ni bawk a, an bengchheng thawm chu ka ning phal lo a ni ber mai.

     Inneih dar ri chu ngaihnawm ti takin ka ngaithla a, ka bula ding tura a nuța-in hmeichhe nalh leh hmelțha tak a rawn kaih luh chu lungawi zetin ka lo thlir a, thinlung chhungril a hlim veng veng mai a ni.

     Thutiam kan chham lai chuan kan ti tak dun hle a, a mai maia tiam lovin chhungril ațanga hmangaihna lo chhuak nen kan tiam dun ni berin ka hria.

     Thla laa kan din lai chuan, mi tlem deuh lai chuhin ka hrilh ru zauh a, a sen zui țan țan chu ka hmuh hmaih hauh lo.

     "I ho!" tiin min nghawk pah zauh a. 

     "Ka ho em ni? Ka nghakhlel tawh a ni mai a!" ka tih leh chuan midangin an hriat ve hlauh hmel zetin a hawi chhuak vat a.

     "Sawi tawh suh," a rawn ti sap a.

     "I zak leh tawh em ni?"

     "Zak lo. Zak rual pawh ka ni tawh lo."

     Ka nuih a za viau naa ka chhaih zui duh ta lo a, thla min lakpui tur an rawn ding hnai leh ta bawk nen kan ngawi zui ta rih a. 

     A hranpaa mo hruai tih vel awm lovin a lawi tlang nghal a, a awlsam phian mai. Inthlak turin Azuali te țhian dun chu room lamah an chho a, an rei tàk êm avangin Freddy nen kan han chho ve a. 

     Khumah chuan an thawmhnaw pawh la thlak lovin an lo mu dun rial a, an chauh dun hmel hle bawk. Kan thawm hriain Azuali a rawn meng a, a țhu chhuak nghal zat a. 

     "Sangpuii hi mipui hu a zo lo a niang, a chau deuh a," inthiam loh hmel zetin a ti niah niah a. 

     Sangpuii muhil lai chu thlek zauhin, "A pawi lo. Hunserh vel a zo vek tawh tho a, tihian chawl hahdam rih rawh u," ka ti a. 

     "Ka kawr hnung kilhna hi ka ohelh thei si lo a, ka lo mu ve tawp a. Min lo phelhsak lawk mai dâwn em ni ang?" 

     "Ka awm ve reng laia inphelh i tum elo? Inpa hi i duhkhawp lo deuh a, min thlem ve i tum a ni chiang mai!" Freddy'n a lo ti zauh a. 

     "I zak lo lutuk aw! Nangni ang hi chu a hranpaa thlem in ngai ve hleinem," Azuali'n a ti let ve vat a. 

     "Kha, tunah pawh i țawng pahin min rawn ngaih melh reng kha... Inzep țalh lo mai rawh." 

     "Nang ang hi chu duh ila chuan hmanah khan pasal ka nei daih tawh ang." 

     "Hmanah chuan i la awm ve lo aw! Hmanni lawka piang i nih kha." 

     Hetiang hi a ni ka țhiante leh Azuali inbiak țhin dan tlangpui chu! Han thutak chang awm bawk mah se a tawpah fiamthuah bawk an lut leh nge nge țhin. Keimah ber hi ka ri le lu ngai lo a, fiamthu thawh lamah pawh ka pachhe viau; an infiam vel chânga lo nuih tawp chu ka tih ve awmchhun a ni deuh mai. 

     Zan lamah program awm lem lo mah se inleng kan nei nual a, zan rei tak thlenga leng erawh an awm lem lo. 

     Freddy leh Sangpuii haw tur kan thlah liam hnu chuan mu turin room lam kan pan nghal a. Inbual hmasa tura ka tih avangin inthlakna tur zawngin a bag chu a hai rak rak a, eng mah rem felna hun a la awm loh avangin a thawmhnaw pawh bag leh suitcase velah a la awm vek a, naktuk lamah an țhian dunin an la inrem fel ang chu. 

     'Inbual rual ila, " tiin bathroom a lut tur chu ka au zui a. 

    "Ngai lo." 

    "Ngai lo maw?" 

    "Aw..." 

     "I ruala inbual ka chak a nia." 

     "I ho!" tih leh bathroom kawngkhar nam hawn a rual a, ka zui luh ve hlau ni awm takin hmanhmawh zeta lutin a khar nghal vat a. 

     A chet dan naupangchhia țhin lutuk chu lawmin ka nui hawk hawk a, rilru puitling tak a neih phena naupangchhe rilru a pu leh zauh țhin hi eng tikah tak reh ang maw! 

     Ka inbual zawha bathroom ațanga ka chhuah chuan rizai sinin a lo mu fel than tawh a, muhil ang taka lan tum mah se a muhil miah lo tih ka hre thei a. 

    Rizai hlima a bula ka mut ve hnu pawh chuan a la chechang duh chuang lo a, a kawnga ka kuah takah chuan a rawn ip chaih a. Ka lam hawia ka kawih her pawhin a mit a la chhing tlat a, a zam hle tih ka hrethiam mai a. 

     A hmuiah dimtea fawpin a taksa ka chul kual a, a taksa lawnga ka khawih chuan a thaw halh a. Uar zawka fawpin ka duhthawh telh telh a, ani pawh insum zo tawh bik lovin min keih let ve tawn tawn a.

     A taksa mam nal han mai chu chul kualin a hnute-ah ka tawp a, ka kut awmna chu ka hmuia chhui thla zelin a hnute chu ka fawp a, a hnur chu liakin ka seh ner ner a, a thaw chu rawn rang sawtin a ngik leh feih feih țhin. Ka sam kara a kut rawlhin na deuh takin a țham a, a thaw halh halh bawk.

     A thawmhnaw ka phelh vek a, kei pawhin eng mah ka inbel tawh bik lo. A chunga lawnin a tak ram thleng tura chet ka lak dawn chuan zam leh hlauthawng hmel a pu deuh a.

     "I hreh viau chuan kan ti rih lo mai dâwn em ni?" Ka hmuia a hmui nulsak pahin ka ti sup a.

     "Aih, ti ang. Ka zam deuh mai chauh alawm," aw khur lek lekin a ti lawi rat a.

     "Tunah hian ka che leh a nih chuan ka insum thei tawh dawn miah lo a nia," a hnute chu țhamin a hmuiah duhthawh lutukin ka fawp zui zat bawk.

     Min fawp letin a taksa a siam rem deuh a. "Insum suh," tiin a phun ta sep a.

     Ka theihtawpa dimin ka che a, nâ ti viau mah se tawpsan thei ka ni tawh lo. Pasalin nupui chunga a tihtur ka hlen a, lungawi zetin ka àwmah ka pawm bet hle hle a. 

     Ngaihzawng ka neih khan sex hmanpui loh ka nei ngai lo a, ka ngaihzawng ni lem lote pawh ka mutpui fo. Virginity hi a hlu tih ka hre naa chuti tehchiamin ka lo ngai thutak ngai lem lo. Mipa leh hmeichhia inlungrual taka tisa mamawh kan inphuhru tawn kha a pawina awmin ka lo hre lo a, hun nuam tak hmangah ka inngai mai țhin. 

     Azuali chu a la thianghlim ngei dawn tih ka hria a, ka rin loh takin lo thianghlim tawh lo ta pawh ni se ka pawi ti lutuk lo maithei. Mahse, ka nupuiin a thianghlimna min hlan rual khan hmeichhe virgin lo hlutzia ka hriat phah ta a ni. Inneih zana nupui tana a hmasa ber nih nawmzia leh hlutzia chu ka ngaihtuah thiam lo zawk a, sawi chiam dan pawh ka hre hek lo. A hlu hle a ni tih chiah chu ka sawi theih awm chhun a ni ber mai. 

     Ka ban khama tui taka ka nupui muhil hmel chu ka thlir reng a, ka la sawi chhuak miah lo naa ka hmangaih ngawih ngawih a ni tawp mai. Hetianga hmeichhe țha leh fel lutuk ka nupui a ni hi vannei ka inti a, a tana mipa hmasa ber ka ni te chu chapopui tham niin ka hre hial a ni. 

     A rawn che sat sat a, a harh mai dâwn emaw tiin ka en reng a, a muthilh zui leh tàk daih avangin a chalah ka fawhsak zeuh a, muthilh ve tumin ka mit ka chhing ve ta nghal a.