PEKSANGA 14

 PEKSANGA 14

Sbk Pachuau

      "U Peksang, vawiinah min chhuahpui hman ang em?" Ka room kawngkhar nem hawn pahin Sangpuii'n  a rawn ti lut lawng lawng a.

     Ka kamis haklai kilh mawlh mawlh chungin, "Hman lo ang," ka lo ti hmak a. 

     A hmui ti pawrh vakin lungawi loh hmel zetin min en a.

     "I duh chuan i hman thei tih ka hria aw! I assistant pawh ka zawt vek tawh. Vawiinah court-a din i ngai lo a, chawhnu lam phei chu client thar i nei a nih loh chuan program eng mah i nei lo bawk,"a ti hmarh hmarh a.

    "Peih lo ta ila?"

    "Peih lo mah la ka hruai lui tho ang che. Min kalpui loh chuan Azuali hnenah Baby-i nen in la inzui țhin tiin ka hek mai ang che!" Hei pawh nula uaih tawh siin naupangchhe rilru paih thei lo chi bawk! 

     "A awih i ring em?" nuihza insum tak chungin ka ti a.

     "A țhiannu ka nia, eng vangin nge a awih loh ngawt ang?"

     "A bialpa thu hi lo awih zawk ta se?" 

     "Ka sawi vak vak anga, ka sawi a awih zawk mai ang." 

     Insum zo lovin ka nui chhuak ta hawk hawk a. Sangpuii pawh chuan nui har har chungin chawhnu lama min lo call tur thu leh harsatna eng mah siam lo turin min hrilh leh hram a. 

     Chawhnu lama chhuah ka tum avangin file vel en felin ka buai chawhma a, chhuah hma ka tum ni takin ka assistant Mafeli'n thil pawimawha haw hma a ngaih thu sawiin dar 2 velah min hawsan  daih lehnghal. Min be tura lo kal an awm lo hlauh a, mahnia awmin hna chu ka thawk mawlh mawlh a. 

     Kan hna ang hi chu Court-a kal loh niah pawh țhut hahdam der der theih a ni ve lo a, case kallai neih chuan ngaihtuahna zawng zawng nen țang kawpa thawh a țul țhin a, chawlh tak tak a awm thei ve lo a ni. 

     Sangpuii'n min rawn call chuan ka lo inpeih tawh avangin ka chhuak ta nghal a, an inah va lamin a inkeng bawr phian a, khawiah nge kan kal dawn tih ka zawh lahin min hrilh duh der lo lehnghal. Amah lah chu phur zetin a titi siam siam a, Azuali nena an inkawm nasat laia an thil tawn nuihzatthlak takte chu sawiin a nui har har reng bawk. 

     Ka beisei lohna lam daihah min kalpui a, Chite kama an huan awmna lam kan pan tih ka hre thiam ta mai a. Engti tura kal nge kan nih tih pawh zawt buai duh tawh lovin motor chu ka khalh mawp mawp tawp mai a ni. 

     Chhinga veng leh Armed veng inrina chhak kawn, taxi stand bulah min dintirin dawrah thil a va lei a, ka rin aia a rei tàk phian avangin ka phone chu la chhuakin Azuali ka call a. Signal a nei țha lo nge ni thawm ri nuai nuai ni awm tak ka hriat bak chu mumalin a țawng ka hre thei lo a, ka call nawn leh pawha awmzia a awm tàk lohah chuan ti nawn duh tawh lovin phone ka dah a, kan dinna bul vel chu ka thlir kual ta mai mai a. 

     Thlang lam thlanmual kawngpuia mipa pahnih ding chu ka en kan mai dâwn a, pakhat zawk chu ka hmuh hnu nia ka hriat avangin ka en nawn leh ngat a, kan police officer Chhuanga kha a lo ni a. A dinpuipa chu ka hre ngai lo naa veng khat parawn leh kohhran bel mi tak a nih ka ring lo ve tawp mai a ni. 

     Chulai hmun daih daiha ka hmu chu mak ka ti viau a, an awmna veng nen a inkarkik angreng hle si a; hna vang ti dawn ila uniform a hak loh bakah a inthuam smart lo viau mai bawk si, thil țha lam tia kal a nih rin lohna ka nei lian viau mai. 

     Sangpuii motor-a a rawn țhut luh leh hnu chuan Chhuanga te dinna lam chu melh leh zauhin ka tlan thla zui a, hremna tawk lova a awm rei ta lutuk chu amah man theihna tura a chet dan zawng zawng hriat tuma veh zui a hun tawh hle a ni. 

     Sangpuii te huan kan thleng thla a, an inte sak kawta ka pa motor leh ka țhiante pahnih motor lo ding ka hmuh chuan mak ka ti kher mai! Phur lutuka Sangpuii tlan lut chu motor ka park fel hnu chuan zui luh mai ka tum a, Sangpuii bawk chu scarf kenga rawn tlan chhuak lehin ka mit chu min tuamsak a. 

     "Ka kidnap dawn che a, ka thu ang zela i awm a ngai ang," tiin min kalpui zui zat a. 

     Inchhunga min kaih luh chuan ring vak lova rimawi ri riai riai ka hre nghal a, eng thil nge thleng dawn tih hre lo mah ila a țha lam turah ka ngai ngawt a. 

     "I mit tuamna ka phelh dawn a nia, lo inring rawh le," Sangpuii'n a tih chuan han inrin viau dan tur awm hek lo, ka lo ding mawl tawp a. 

     "Le..." tih paha ka mit tuamna a phelh chuan ka beisei loh lutuk thil ka hmuh avang chuan ka thaw hawk a. 

     'Happy birthday to you!' tih hla sa-in ka nu leh pa, ka naute bakah Azuali te unau, ka u te chhungkua leh ka țhian te bakah ka assistant Mafeli te chu an zai țhap țhap a, dawhkanah birthday cake nalh tak an lo chhawp thlap bawk. Kei hi ka piancham a ni tih hre hauh lovin ka lo awm nileng pek a nih chu! 

     Cake te zaiin hlim takin hun kan hmang a, tlangval senior lam mah tawh birthday han lawm chu ho ka tih rualin ka hriat hauh lova ruahmanna siama min han barakhaih tàkah chuan nuam ka ti phian ta phian a. Ka nu leh Azuali bakah Sangpuii te rawt chhuah niin ka hriat hlau takin an lo inbuatsaih nasa a lo ni a, ka nu leh Azuali chu chawhma lamah lo zu kalin eirawng te an lo bawl fel vek tawh bawk nen engkimah min barakhaih chiang hle a ni. 

     Khuangchawi thla, thla en vanglai tak a ni a, kan awmna hmunin a zir bawk nen thla chu zan dang zawng aiin a eng zual emaw tih mai turin lui tui luangte pawh chiang takin a hmuh theih vek a. Zanriah ei kham hnu chuan lui lamah chhukin ka leng kual hlawm a, boruak a dai nuamin khua a thiang țha bawk nen hah a dam sawng sawng thei hial a ni. 

     Zan rei hmaa haw ka pa-in a rawt avangin haw tumin an inbuatsaih hlawm a, Sangpuii a ute motor-ah chuangin keiin Azuali ka phur dawn thung a ni. 

     An tlan chhuak zo fel a, motor ațanga chhuaka Azuali ka kaih chhuah chuan mak a tih hmel viau a, eng mah sawi lova kaiin ka kut lehlamin Sangpuii hnena ațanga a ruka chabi ka lak chu ka vai lauh lauh bawk. Inchhungah luhpui lehin thlang lama balcony lian vak lo an siamah chuan ka țhutpui a. 

     Thla engin a hmel a chhun pawt riai chu ka en kham thei lo a, a khabe-ah vuanin tlemin ka kuai dak deuh a, a hmui lo kau deuh chu ka hmuiin ka chhin zui hmiah a. 

     Tumah ti buaitu awm lova chulai hmun reh leh boruak dai raih mai hnuaia duhtak te nena han awm chu a nuam danglam kher mai! Azuali hmela lungawina leh hlimna ka hmuh chuan min ti lawm a, keimahah a innghat thuk hle tih ka hriatna chuan nasa lehzuala a innghahna tlak ni ngei tura tumruhna min pe bawk. 

     "Ka rualin lo haw ve tawh mai ta che," ka tih chuan phawk hra-in min en a. 

     "I ti fiam a ni ti raw?" 

     "Ti fiam lo e. Zantina 'inmangțha' ngai ziah hi ka ning tawh!" 

     "Inmangțha tawh lo mai ila." 

     "Mahni chauha mut pawh ka ning tawh." 

     "Mapuia emaw, Nautei emaw mutpui mai la." 

      Nuihza insum tih hriat taka a hmui pet chungin mitmeng chimawm zetin min en a, keiin rum deuhin ka melh lui tlat thung. 

     Min biak pawhin ka chhang duh lo a, ka kuahna la sawnin kut ka kuangkuah tlat bawk. 

     Engah mah ngai lo ni awm takin a titi siam siam a, zawhna min zawt leh zauh zauh bawk. Ka chhang duh chuang lo a, rei fê hnuah pawh min la biak țawng zawh loh avangin beidawn hmel zetin a thaw hak a. 

     Ka rin loh lutukin ka malchungah rawn țhuin ka nghawngah a ban a rawn zen lut a, muang chânga rawn kun hniamin ka hmui chu a rawn si de de a. A rawn fawh zui tàkah chuan fawp let mai lo turin ka insum nasa ngei mai! Lungawi lo tak anga la awm rih ka duh avangin ka fawp let duh lo lui tlat a. 

     Chhanna a hmuh loh vang nge a hmui chu la sawnin ka malchung ațang chuan a tho zui zat a, rang lutuka pawt țhu lehin ka fawp nghal ngawng ngawng bawk. Uar zeta fawpin ka taksa si tam thei tur berin ka kuah bet chial a, ani pawhin ka sam kârah a kutzungțang rawlhin min fawp let ve tawn tawn bawk. 

     Duh aia thui kal leh a hlau tih hriat takin tlema ka sosan deuh tàkah chuan a inla hrang ta hram a, ani pawh a pangngai bik chuang hauh lo. 

      Ngai kan awh leh deuh hnu chuan ka kawr nghawng khalh neuh neuh pahin, "Ka u ka lo titipui dawn nia, kei pawhin i bula awm reng chu ka chak alawm," a ti niah niah a. 

     Kuah ngheh sauh pahin, "Ka thin a rim tak tak lo naa awmdun erawh ka hmanhmawh hle thung," ka lo ti nghat a. 

     "Khatianga min awm khum leh chuan ka kalsan zel tawh ang che," lungawi loh hmel fê hian a ti ve hmak a. 

     "Min kalsan theih athu!" 

     "Min thinrim khum theih chuan ka thei ve tho ang." 

     "Min kalsan theih i inring a maw!" 

     "Ka kalsan theih che i ring em?" tiin min zawt let hlauh a. 

     "Ring lo!" Ka lo ti nghat a. 

     "Eng vangin nge i rin loh?" 

     "Ka kalsan theih lo ang bawk chein nang pawh hian min kalsan thei dawn lo tih ka hriat vangin," inring tawk zetin ka lo ti hmiah a. 

     A mita mittui rawn tling pam chu thup a tum lem lo. Ngawi renga min en vang vang hnuah ka âwma rawn beiin nghet zetin min kuah bet a. 

    "Ka innghahna i ni a, ka engkim i ni bawk. Khawngaihin min ti nâ-in min phatsan ngai suh aw!" 

     "Ka ti na ngai hauh lovang che. Engtik lai pawhin i tan ka awm reng bawk ang," duat taka kuah let chungin ka ti sup a. 

     

*******

      A khat tawka ka pa check-up a ngaih avangin ka nu nen damdawi in lamah an kal a, dam fel tawh anga ngaih mah ni se palh awm thei thil a nih avangin a dinhmun en fiah tura check-up zui reng a ngai a ni. 

     Ka hna kaihhnawih thilah doctor hmuh ka ngaih avangin damdawi inah ka hmelhriat doctor hmu turin ka kal ve a, Ka doctor hmuh tur hi kan chhung hla deuh hlek tawh a ni naa kan inhre țha riau a, mamawha ka pan ber fo țhin a ni nghe nghe. 

      Ka thil hriat duhte min hrilh zawh hnu chuan a cabin ațanga inzui chhuakin ka pa inentirna lamah kan inzui phei a, ka pa chu lo inentir zo tawhin a result pawh a țha viau a, ka nu hmel pawh a hlimin hmuh a nuam leh pek hle. 

     Ka pate leh Doctor Remfela chu chhungkaw chanchinte inzawtin an inbe mawlh mawlh a, inhlat deuh tawh mah ila chhungkua erawh kan inhre țha thawkhat viau a, inhmuh a khat ngaihtuahin kan inpawh angreng phian bawk. 

     "Doctor, emergency case a awm a, casualty lamah an mamawh che a," rawn titu nurse chu ka hriat hnu a ni naa khawia ka hriat nge tih ka hre lem lo.

     "Pa Rin, ka kal phawt ang e. Lo inenkawl țha ula, lo dam zel rawh aw," tiin Remfela chuan min kalsan nghal a.

     "Peksanga tehmial chu! Eng nge hetah te i rawn tih ve a?" Remfela rawn kotu nurse chuan a rawn ti hluai a.

     "Hei, ka pa kan rawn entir a," tiin ka kal chhan dik tak chu ka sawi lang kher duh lo a.

     "Vawiin chu Baby-i pawh a lo kal dawn tak asin! A lo thleng țep tawh ang. Lo nghak la," a tih tàkah chuan Baby-i țhiannu Seni kha a ni tih ka hre ta chiah a.

     "Office lamah let leh ka ngai a, ka hmanhmawh deuh a," ka ti a.

     "A lo thleng har tawh nang, lo nghak ve lawk rawh. A hmuh che chuan nuam a ti dawn êm asin!"

     "Mama, hna i ngah si, hmanhmawhin office lam pan vat i ngaih kha! Awm khawmuang tawh lovin kal tawh rawh. Keini chu i pa nen kan lo va haw mai ang, lo ngaihtuah lo la," ka țawng hmain ka nu a lo inrawlh hlauh a, ka thaw huai mai. 

     Seni lunghnur hmel zet chu enin, "Ka kal phawt mai ang," ka'n ti mawihnai ngial a, min chhanna pawh nghak lovin ka kal nghal nal nal a.

     Office ka thlen chuan Nunpuia a lo awm mial a, min be hmasa lova chutia a lo kal chu mak ka ti angreng hle a.

     "Pawimawh a awm em ni?"

     "Pawimawh lutuk chu a ni lo naa pawimawh thawkhat ve tho mai. Phone-a rawn hrilh che ka tum a, min chhang thei bawk si lo a, ka lo kal tawp mai a nih hi."

     Ka phone chu phawrhin ka en a, a sawi ang chiahin missed call a lo awm nual mai. Remfela nena kan inbiak dawn khan silent-ah ka dah a, ka lo la ti ring leh lo a lo nia, ka ti ring nghal zat a.

    "Kan inspector kha damdawi zawrh lamah a inhnim thuk sawt viau a ni awm e! Ka hmelhriat addict pakhat ka ațanga ka hriat danin damdawi zuar țhenkhat kal tlangin a zuar țhin ni awm tak a ni. Chung ho chuan man an tawh lohna turin a nihna changchawiin a veng pah tlat a, ani'n a hlawkna a lo tel char char thung a nih hmel," Nunpuia'n a tih chuan ka lo chek tlak a.

     Ka rin ai daiha a lo chet ngap avang leh pawisak a neih loh chhoh tàkah chuan kan tan hun țha a inher chhuak leh dawn taah ka ngai hmiah a. Nunpuia hnenah a țhian addict chu lo kawm ngeih zui zel tur leh hriat tur pawimawh awm apiang hriat tum turin ka hrilh a, chumi rual chuan Cindy nu laka a mit len ngun zual turin ka chah bawk.

     Cindy nen an inkawp thuk viau tawh tih ka hria a, chuti chung chuan ka la ring tlat tho a, eng anga ril pawhin inkawp mah se pi Siami thil sual tih hum duh tur khawpa mipa à a ni tlat lo! Hmeichhe lamah a chak lo tih loh chu rilru nghet leh rinawm tak, mipa dik tak niin ka hre miau a, ka rin ang ngeiin a hna pawh a thawk țha viau reng a ni.

     Pi Siami hi țha ang takin lang mah se a chhungrila khakna awm chu a mitah lang chhuakin a thup seng lo a ni ber a, Azuali te lakah rilru țha a la pu hauh lo tih chiang takin ka hre bawk. Chuvang chuan Azuali te unau chhiatna turin eng hmanrua pawh a hmang hreh dawn lo a, fing khekrek taka in leh lo hneh chhuh a tum leh ngei dawn a ni.

     Chu mai bakah, an ruihhlo zawrh țhin phawrh mualpho a nih chungchangah Azuali chu thiam loh a chantir hle tih Cindy kâ ațangin kan hre leh si a, phuba lak tumin a la hmanhlel lovang tih pawh a sawi theih loh a ni.

     Amah ka thlakhlelh vang chu ni tho mah se Azuali chu him lo riauva ka hriat avangin an in ațanga hruai chhuah vat chu ka duh tawh a. Ruatpuia chu mipa te a ni bawk a, rui lo hai lova a awm chuan a chungah eng thil mah an ti thei dawn lo a, a hmaa a chunga thil thleng vang khan a fimkhur thiam hle tawh dawn bawk a ni.

     Remchang hmasa berah Ruatpuia chu ka titipui ta a, a farnu himna tur chu a ngaihtuah ve ber a nih tho avangin ka rawtna chu a hnial lem lo. Amah berin nupui neih a hmanhmawh miau si loh avang chuan ka tan hma lak mai pawh a inthlahrunawm loh deuh ang chu!

     Ka nu leh pa bia-in palai tirh mai țhaa ka hriat thu ka sawi a, ka nu a lo phur hle laiin ka pa erawh thil thui tak ngaihtuah ni awm takin a ngawi run reng a.

     "Saw mite nufa saw an awm chhung chuan ngaih a țha thei tlat lo! Azuali heta a rawn awm daih chuan Ruatpuia a mal dawn lutuk a, a inveng thei tih ringawt kha inhnemna a tling lem lo. Misual rilru chhe tawpkhawk, duhamna avanga eng thil pawh tih hreh lo tur nena amah chauha a khawsa tur ka ngaihtuahin rilru a nuam thei lo tlat!" rei fê a ngawih hnuin ka pa chuan a rawn ti chhuak ta nghat nghat a.

    "An innei thei rih lo i tihna nge ruahmanna dang ngaihtuah tur zawk?" Ka nu chuan pawi tih hmel zetin ka pa chu a zawt a.

      "In dangah a nuhrawnte nufa hi awm ta se ngaih a ngam deuh ang. Eng emaw chen inveng thei mah se Ruatpuia dinhmun derthawngah a ding reng dawn tihna a ni a, duh angin hma a lak chak theih bawk si lo nen thil awm dan a buaithlak vel vek!" 

     "A tawp kan khar țep tawh a, in an chhuahsan ngei ngei a ngaih hun a thleng țep tawh ang," tiin kan hma lak tawh dan leh chet lak kan tum zel dan te chu ka sawi nghal a. 

     Azuali te unau hminga a awm miau avangin in leh lo chungchangah eng mah tih theih a nei lo a, chu vang tak chuan a nuhrawn tan an hnawksak zual êm êm a. A ngaih danin a fapa lah Azuali vangin jail-ah a la awm reng lehnghal, phuba lak mai piah lamah rosum duh vangin eng thil mah tih hreh a nei dawn lo. Chutah tak chuan chet a lak ruala manin an in ațanga chhuahtir hmak mai chu kan tum dan a ni. 

     Palai tirh hrim hrim chu ka pa chuan a hnial lem lo a, inneih lam erawh hmanhmawh lutuk lo ila tiin a rêl a. Nghakhlel tawh viau mah ila kan tana țha ber tur a ni rih miau a, hnial enah ka en lem lo. 

     Palai kan tirh tur hre sa a ni bawk a, Ruatpuia'n patling takin a lo dawngsawng a. Pi Siamite nufa pawh rawn lem lovin a farnu dila va lêng te chu puitling takin a lo kawm a, a nuhrawn te tel lova engkim rêl fel chu a duh dan a ni ve tlat a, an chunga rilru țha pu miah lotu chu an unau chungchanga lo inrawlh ve turin a duh lo bur mai a ni. 

*****

     Ka phone a rawn rik chuan ka lo muhil hman titih tawh a, min rawn call-tu ka hmuh rualin ka chhang nghal vat a. 

     "Tunah hian amah ngei telin inhlan an tum mek a, a lan danah a tlem chhe lem lo bawk," a rawn ti sap a. 

     Zuang tho nghal zawkin Lalhriata ka call vat a, mut chhuak aw zeta min rawn chhang chu haiderin thil awm dan ka hrilh mawp mawp a, kan inbiak tawp lamah chuan ani pawh a harh țha tawh hle a ni. 

     Ka inha fel a, hmanhmawh zetin ka inkhalh chhuak ta nghal a. Țul ka tih lem loh avangin Freddy leh Ruatpuia chu ka hrilh duh lo a, an hriat hunah erawh an vui leh maithei a ni. 

     

(Ka tlai țhin viau mai, ka inthlahrung ve lutuk! Chhangchhenu tan chuan hma hi a har êm a ni. Tlai tak taka ka dah chung pawha min lo nghak țang țangtute chungah ka lawm a, rei tak tak ka mentir țhin che u vangin thupha lian tawk ka rawn chawi bawk e aw😊)