PEKSANGA 13

 PEKSANGA 13

Sbk Pachuau

      Kan awmna hmun tur kan thlen ațanga rei vak lovah Lalhriata'n a naute nen an awmna hmun turah an awm fel tawh tih min rawn hrilh a, eng thil mah a kal sual loh hram ka beisei.

     An thang lo kam dan ang chiahin, an tana rinhlelhawm miah si lohin kan veh let a, an zinga a thluak nei ber Chhuanga a awm miau loh avangin sum mena meng reng pi Siami te ang tan chuan kan țhang valh chu beng hupsan chi a ni mawlh lo. Kan tawktarh atana kan hman lah rinhlelhna tur awm lo khawpa che fimkhur thiam a lo ni lehzel bawk nen kan che sual hauh lovang tih ka ring a, zaninah ngei hian hnehna changin Azuali zalenna tur kan sual chhuak ngei dawn a ni.

     Zela leh Remruata an rawn thleng a, kan awmna hmun ațang chuan chiang taka an lan theih avangin an che zia engkim kan hmu thei a. Remruata'n hawi zuk zuk chunga an dinna piah lawka semi-concrete building a pan lai leh kawngka a kik laite chu Ruatpuia'n video-in a lo la a, evidence pawimawh leh țangkai lutuk tur a nih avangin a la uluk hle a ni.

     Remruata a kalsawn rualin Zela chu kan awmna lamah a rawn chho vat a, Remruata bike-a rawn inphur an nih avangin Remruata'n  kalpui nei angin insawi mah se police lamin amah chauh an hmuh miau si chuan Zela tan hlauhthawn tur a awm dawn hauh lo a ni. 

    Zanrei a la ni lo a, ualau taka inhlan chi ni bawk si lo chu inchhung lamah Remruata a lut bo ta a, minute 5 vel hnuah Lalhriata leh a naute chu rawn lang ve zatin inah chuan an lut ve nghal a. 

    Police uniform ha an lan tàkah chuan Remruata che a buai nghal vek a. In chhung ațanga a rawn tlan chhuak tur chuan police pakhat chu a su her lawih a, pawnlam pawh a la rah hma hauhin hnung lam ațanga pawttu awm tih hriat zetin a pai let nawk a. 

     Kan zu luh thlak ve chuan Remruata chu kutkawl an lo buntir ran tawh a, thinur êm êma min melh chungin anchhia min lo lawh nasa mai a. 

      "In thil tih tenawm tak hi a let in la hmu khawp ang. Min man mah ula ka chhuak leh vat dawn tho a, hetia min phiar ruk vang leh min man avang hian in la inchhir dawn lutuk!" a ti tun tun a.

     "Dawta mi dang in mantir avang te, in ruihhlo zawrh țhin vang te leh Court-a dawt in sawi zozai vang te khan chuti maia i chhuah chu ring duh hauh suh," ka lo ti hmiah thung.

     "Ka awhna tura in thangkamah hian kei chauh ka tang dawn lo tih kha lo hre phawt mai teh! Kha mihring laktlak loh zet Zela leh he in neitupa hi an him dawn bik lo. Ruihhlo leitu leh a zuartu chu thuhmun reng kan ni tlat!" Remruata'n a ti leh sak sak a.

    "Eng vangin nge anni pahnih chu an him loh ngawt ang? Zela hi i rualin a kal ve tih sawi sawmsarih mah la i bulah a awm lo a ni tih keini lamin kan sawi tlat si chuan a tan hlauh tur a awm miah lo. He in neitu lah eng anga nasa pawhin hek mah la kan mi leh sa a ni miau a, ama report pek avanga man thei che kan ni tih kan sawi tlat chuan roreltu lam tan chuan a dik lo zawk hriat a har tawh hauh lo ang, " Lalhriata'n a lo ti ve nghat nghat a.

    "Kan vehna che u hi a rei tawh, in vanneihna a la kal tluan avangin manna tur che u hun țha kan hmu har zawk a. Tunah chuan kan inman chiang bawk a, insawi chhuah leh mai chu tum buai miah lo ang che u, in thei dawn chuang lo," a tih zawm leh zat a.

     Azuali laka an khawsak dan leh an nekchep dante ka rilruah a rawn lang a,  zak hauh lova Remruata hawi pir vel hmaia hnek sawk chu ka châk kher mai! Thil țul ber nia ka hriat loh avang leh ani kutkawl bun, chet la ve thei tawh lo han khawih chu thil tih awm loh tak a ni bawk nen ka kut humruhin ka insum hram hram a. Tunah chuan a chan țha lam kan chang ve tawh a, eng anga chapo leh inla tak pawhin hawi vel mah se an beisei anga awlsam taka chhuah leh mai kha a theih tawh dawn loh tih ka hre chiang bawk a, thawpik lutuk pawh a kiang ta duak e.

     Kan intih fel meuh chuan zan pawh a lo rei ve tawh phian a, kan inah Azuali a chho tih ka hriat avangin Ruatpuia pawh haw thla nghal lova lo peng kawi ve rih turin ka sawm a. In chhung kan luh chuan Freddy pawh lo awmin a lo ri leh lûng lûng tawh a, ka pa pawh a lo nui ve hawk hawk a, Freddy bulah hi chuan ka pa meuh pawh a thutak thei țhin lo a ni ber e. 

     A u Ruatpuia'n zanina kan thil va tih tàk chanchin a sawi laia Azuali hlim hmel chu hmuhnawm ti takin ka lo thlir veng veng a, lungngaihna leh rilru hahna nei lo hmel dam dap mai chu thlir nin har tak a ni! 

     

*******

     Evidence kan nei țhat mai piah lamah chutianga chiang taka man an han tawh tàkah chuan a hmaa suma an lo tham lungawi tawhte kha tumah rawn inlan duh tawh hek lo, pi Siami chu thiam loh chantir niin Remruata pawh a insawi chhuak lo chiang khawp mai. Azuali erawh kan beisei ang ngeiin a zalen ta a, a hming lo chhe tawh erawh a reh mai dâwn lo; Mizote hi mi țhatna lam aia an chhiatna lam sawi nuam ti tak kan ni miau a! 

     Pi Siami leh Remruata jail-ah an lut a, rei pawh an tan hmain taksa hrisel lohna chhuanlamin pi Siami'n bail a dil a, a rawn chhuak leh rang hle. Mahse, chet la thei dinhmunah an ding tawh lo a, inluling thei a ni tawh lo bawk nen kan tan a hnawksak lem lo rih viau. 

     Ruatpuia leh Azuali an inah an haw leh tawh a, Cindy te nufa tan lo dan ngawt theih ni hek lo, lungawi lo țûnin an lo dawngsawng a, țha taka an inbiak zui chu a rinawm lem loh. Ruatpuia a awm ve tawh avangin Azuali chu ka ngaihtuah nep ta deuh a, a pa thurochhiah mai bakah LSC vel Azuali te unau kutah a awm ta bawk nen ngaih a țha thawkhat tawh hle a ni. 

     Nunpuia erawh a tum angin thil a kal ta lo a, a buai viau mai. Cindy'n duh tak tê-in a lo duh hman tawh a, kalsan a tum ngial pawhin zakthei lo ta na nâ nâ chu Cindy chuan a va pan hreh lo nasa mai si, ani Nunpuia tan lah duh duha tisa nawmna atana a kawih her theih awm reng ta chu a lo hnar hreh ve leh țhin bawk nen inngaizawng lutuk tia sawi theih chiah si lohin an inkawp zui ta reng a. 

     Nunpuia a kawp ațangin Cindy nun hi a danglam ve hrim hrim tawh a. Mipa hrang hrang a kawp țhin chu thlah hmiahin a zu in țhin Nunpuia'n a khap avangin a bansan hmak bawk. Pindan chhungril lamah a va ti ru em tih hriat a ni lo mai pawh a, hmuh theih chinah a danglam rih khawp mai.

     Azuali laka a chimawm leh tawrhhlelhawm lutuk pawh kha an dinhmunin a zir loh vang ni tho mah se a ze inthlak zingah a tel ve ni ngei tur a ni a sim ve tial tial a, rui lo hai lova awm reng ta chu a ze zahpuiawm tak kha a thlah ve tial tial niin a lang. 

     Inspector Chhuanga'n ka beisei angin chet a la ta mai lo chu ka buai rukna pakhat a la ni a, ruihhlo zawrh chungchangah a inhnamhnawih ve avang leh Azuali an man dan zawng zawngah a hnarkaitu ber a ni tih ka hriat avangin hrem loha chhuahtir ka tum hauh lo. Mi à a ni lo a, a sârhu laia chet lak chu him dawna a inhriat loh vangte pawh a ni mahna a la tawmim rih khawp mai.

     Azuali'n chiang takin hnar tawh mah se an in lama an haw leh tàkah chuan Zuala pawh a lêng lut leh ta zauh zauh a, pi Siami nen an la inbe țha tluang rih viau. Azuali chuan a mawiah a lo be ve satliah chauh țhin a, inneih lam sawi rik a duh tawh loh avangin a nuhrawn pawhin a sawi ri ngai tawh bik lo.

     Sangtei nau neih a hun a, zai turin an inpuahchah mêk tih Lalhriata'n min rawn hrilh chuan Azuali sawmin damdawi in lam kan pan nghal a, zaina room-a an lo nawr luh tawh avangin Lalhriata te lo țhutna bulah chuan kan țhu ve a. Freddy erawh chhungkaw pawimawha a zin avangin a awm ve lo thung.

     Tluang takin an zai a, nau pian țha tak niin a aw pawh a lian țha reuh hle. Lalhriata pawh fapa a neih tàk avanga lawm tih hriat takin a nui var var reng a, kei pawhin ka lawmpui takzet a ni.

     Zan a rei lutuk hmaa haw țhaa ka hriat avangin Sangtei an rawn nawr chhuah fel hnu chuan haw ka rawt a, Azuali te in lam panin kan tlan ta nghal a. Kan thlen hnu chuan chhuk mai lovin motor-ah chuan ka awmpui rih a, hna lama kan buai ve êm avang leh an in lamah pi Siami te nufa an awm ve bawk si avangin hun thawl kan nei ngai lo hle a, han induatna hun kan nei lo a ni ber mai.

     "Palai rawn tirh tawh mai ka duh," ka hmuia a biang nul zai zai chungin ka ti a.

     "Kei pawh..." thawk halh pahin a lo ti ve sep a.

     "I ute kan nghah dawn chuan a la rei dawn lutuk! Hmanhmawh deuh hlek tura nawr a ngai dawn a ni," ka ti nghat a, a lo nui hak thung.

     "Ka u a la hmanhmawh vak si lo a, i nghak chhuak zo lovang tih a va hlauhawm ve!" min chhaih pah tih hriat deuhin a ti a.

     "Ka nghak chhuak lo anga a ni mai alawm."

     "Anih chuan midang i nei dawn tihna em ni?" duhawm lutuka min melh chungin a ti leh a.

     "Aih, ka bialnu hi ka nei dawn," tih pahin a hmui ka zu bawh thuah a, duhthawh zetin kan infawp zui a.

     A bula ka awm chuan hunte hi kal chak riau hian ka hria a, ka kham thei ngai lo. Inneih vata awm dun reng tawh mai chu ka duh dan a ni a, amah chauha a u kalsan a duh bawk si lo. Ruatpuia lahin an inhriatna la rei loh chhhanlamin a hmanhmawh loh thu a sawi awlsam then a, ka rilru a hre lo lutuk chu ka haw lek lek mai a ni.

     "Zanin chu i bulah ka lo riak leh mai teh ang," duat taka kuah pahin ka ti a.

     "A ngai lo," rang fahranin a lo ti vat a.

     "Eng vangin?"

     "Ka insum zo lo palh ang!"

     Ka nui chhuak hawk a, ani pawh za takin a rawn nui ve har har a.

     A țawng tam lo naa thutak kara fiamthu han rawlh zauh te hi a thiam reuh phian a, hmeichhe dang bula ka awm dan ang lo takin a bulah chuan ka awm fo mai a ni. Thianghlim taka kan inkawmna kârah han induat zauh țhin mah ila, mipat hmeichhiatna lama kal thui lo turin min dang thiam êm êm a, a duh dan zawm loh chu thil har tak a ni țhin.

     Kham lo takin kan inthlah a, zan a rei tawh avangin zui ve lovin inchhunga a lutlai chu ka thlir liam a, a luh fel hnu chuan ka inkhalh chhuak ve ta chauh a.

     Naute thar neih lawmna ni pah fawma Lalhriata te'n chaw eia min rawn sawm chuan ka buai lai tak a nih avangin hun lo ka ti ru kher mai. Mahse, lo hnial chu thil mawi a nih loh bakah chaw ei chhung na nâ nâ chu ka awm ve hman dawn tho a tiin min sawmna chu ka lo pawm a, Azualite unau ka sawm tura ka kuta an dah erawh ka buai avangin lo hrilh mai zawk turin ka ti thung.

     Kan thubuai chai lai a khirhkhan deuh riau a, hnaa insawrbing tawp a ngai a ni ber e. Office ațanga ka chhuah meuh chuan khua a lo tlai duai tawh a, ina ka haw leh chuan khua a thim hman vek tawh dawn tih ka hriat avangin Azuali ka bia a, lo inpeih fel tura ka hrilh chuan a inpeih tawh tih min lo hrilh vat a, Ruatpuia erawh tel ve a tum lo a nih hmel.

     Lalhriata te in kan thlen chuan ka chhungte pawh an lo kim ve țhap a, Freddy pawh a chhungte an awm vang nge nungchang țhat hmel zetin a lo țhu ngawi ve kur a, ka nuih a ti za kher mai. Keimahni chauh min lo nghah tawh avangin kan thlen hnu chuan hunserh hmangin chaw ei an siam zui nghal deuh mai a.

      Tettê ațanga lo inkawm chho kan nih bakah kan pate pathum chu lo inkawmho leh college thlenga kalho an ni a, chhungkua ang maia awmin hun pawimawhah kan inhmaih ngai lo. Keini țhianho pawh inkawm reng hman lo mah ila țhian dang kan kawm chuang lo a, hun remchangah kan inhmu khawmin kan inkawm leh mai zel a ni.

      Freddy leh Lalhriata chhungte chuan Azuali chu a inthlahrun lohna turin an be bawrh bawrh reng a, ani pawhin nuam a tih hmel ve viau mai. Ka nu lahin a ngaihsak êm êm reng a, thleng vel sengfela chet ve a tum pawhin a phal lo a; mahse, midang buai laia lo țhut hle hle chu duh bik lovin a va pui ta tho a.

     An tih fel zawha ka bula a lo kal chuan a kutah ka lo vawnsak thuai a, midang mitmei veng tih hriat taka hawi kual nghal vatin a kut chu lak a tum a, ka lo vuan nghet sauh thung. Ka bulah țhuttirin a kawngah ka kuah nghal zat a.

     "Midang an awm ve hi," ka beng bulah a rawn ti sa sa a.

     "A pawi hleinem. Ka bialnu i ni tih an hre vek tho alawm," ka lo ti sam et a.

     "Chu pawh ni se, a zahthlak a nia," a ti leh a.

     "Zahthlak loh e. An hmuh lai hian ka fawh nghal loh che!"

     "I mak!"

     "Chutia law!"

     Naupangchhia deuh hian a awm leh zauh țhin a, inti naupang chhia chawp ni bawk si lova hetianga a awm hian a duhawm zual sauh ni mai hian ka hre țhin. Tunah pawh hian a chutiang chiah chuan a awm a, a landan duhawmzia leh a hmel pawisawi lo lutuk chu hmuhnawm ka lo tih fo tawh ang chiah kha a ni bawk.

     "A fawp tak tak hreh hauh lovang che," Freddy'n a rawn tih chuan Freddy chu a en vat a, ani lah a lo inla thutak nasa mai si, mangan hmel zet hian min rawn en ve leh a.

     "Kha... An hriat vek hi!" zah avanga sen deuh țan țan chungin a ti a, a va han duhawm tak!

     "Freddy hi i zah em ni?"

     "Aw.. Aih... Amah hrim hrim chu ka zah lo. I thil sawi vel kha a zahthlak alawm," a ti niah niah a.

     Freddy leh Lalhriata nuih a za hle a, kei pawh ka bâng chuang lo.

******

     "Tunah țha angin lang mah se chhungrilah an rilru chhia khan a la chenchilh reng tih theihnghilh lo la, fimkhur taka in awm kha a la pawimawh reng a ni. Hun țha an hmuh rualin chet an la duh ngei dawn tih a chiang vek a, inthlahdah miah loh kha a a pawimawh dawn a ni," duat taka Azuali kuah chungin ka ti a.

     Min hnar sateh mah se zanin chu ka tum luih tlat avangin a room-ah ka lut leh a, a khumah mu-in kan titi a. A khat tawka a hmui fawh nuam zet mai chu fawhsakin a aia thui erawh thlenpui ka tum lui bik lo.

    "U Cindy hi a châng chuan a fel tawh tak tak a nih ka ring deuh țhin a, ka la ring lutuk ngam chiah bawk si lo. A laka an thil lo tih tawh avang khan ka u hi a hlauh hmel thei lutuk a, biak pawh a be țha ngam vak lovin ka hria. Ka nu hi chu pawn lama a landanah chauh țha der a ni tih ka hmu thiam ve tlat thung. Kha Inspector hawisanga lah kha zan rei lama rawn luh leh nawlh hi a ching a, ka nu nen rei tak tak an inkawm țhin nghe nghe."

    "Ngaihțha taka awm thei kan la ni lo rêng a ni. I nu leh Chhuanga hian tum eng emaw tak an neih ka rinna a rei tawh a, ka rin aiin an che chhuak har tawh zawk nghe nghe. Engtia chet lak nge an tum ka hre hauh lo naa thil țha a ni dawn miah lo tih erawh ka hria a ni," ka ti sup a.

    "U Remruata hi a lo chhuak dâwn hnai tawh ang em? Hmanni khan ka nu bulah Chhuanga khan hruai chhuah dan a lo ngaihtuah tur thu a sawi ka hre fuh a," ka kut khal neuh neuh pahin a ti leh sep sep a.

     "Chuti maia awlsamin a la chhuak thei mai lo ang. Damlohna nasa tak a nei emaw a nih loh chuan chhuah theihna chance a la nei rih lo," ka tih chuan thawveng huai ni awm takin a thaw siai siai a.

     A țawng leh tur chu lo dangin a hmuiah ka fawp a, ani pawhin uar takin min chhang let ve a. Inthlahlel taka infawpin inthlah leh mai phal lo ve ve ni awm takin kan duhthawh dun telh telh lehnghal.

     Tawp a hun tih hre reng chungin ka fawh chhunzawm zel a, min lo dan bik loh avangin ka huangtau tawlh tawlh bawk. A kawngah zen lutin a taksa mam nal han mai chu ka zut kual a, a âwm lamah zut chho zelin a hnute ka zut thlen tàkah chuan a ip deuh chaih a. 

     Insum har ka tih tawh êm avang chuan tawp duh lovin a hnute chu ka zen chho a, kut lawnga ka khawih tàkah phei chuan a thawk dan a danglam vek tawh a. A nghawngah fawpin ka tawlh thla zel a, a kawr hlima a bra ka hlim leh hnu chuan a hnuteah ka bur ta chat a.

     A hnute hmur chu fawhsak ner nerin ka kut pawh a hlei sawt kher mai. Hnuailamah kal kualtirin a mawng vawng lah mai chu ka chul kual pah a, mu leh mal nei tawh lo tih hriat taka ka khawih ang anga awmin ka lu chu a lo țham leh ngawt ngawt țhin.

     A hmui no chek chu han fawp lehin ka kut pawh a la hlei tluang zel a, a hmeichhiatna ka tawh rual chiahin a khawng nghal lah a, insum tum tih hriat takin thawk a la zui kawk kawk bawk.

     Kei pawhin khawih lui tawh bik lovin ka taksa thunun tumin thaw ka la ham ham a, ka awmah kuahbetin pangngai taka kan awm dun leh hma chu țawng lovin kan awm dun hle hle a.

     "I bulah hi chuan inthunun har ka va'n ti țhin tak!" tlema kan zia hnu chuan a rawn ti chhuak sap a.

     "Nawr lui miah lo tur che ka nia."

     "Min nawr luih miah lo. Keima duh thu ngeiin ka chesual țep a nih kha! Min ti lui la chuan dang tur che ka awm miah lo ang."

     "Ka insum zawh loh vang zawk alawm. A tir ațang khan in-control ila chuan khatiang kha a thleng lo ang."

     "Kei pawh ka insum thei bik lo a nih kha. Hei vang hi a nia ngai hle che mah ila i bula awm fal tam ka duh loh țhin."

     "Inneih vat a ngai a ni mai," ka ti leh ngawt a.

     "Chu chu theih tawh se ka ti."

     "Engtin emaw tak i u chu nawr a țul a ni. A hmanhmawh loh viau chuan kan inneih khalh mai a ngai ang."

     A dan ngaitein dawhthei lo min tih hmel zetin a lo nui leh hak a.