PEKSANGA 12

 

PEKSANGA 12

Sbk Pachuau

 

     Ka rin ang ngeiin Zuala chu a reh ta rih a, a reh hlen erawh ka ring hauh lo. A țawngkam leh hawiherah khan a chapo ve tawk tih ka hria a, chuti maia tlawm chu a tum hauh lo vang. 

     Pi Siami thubuai ngaihtuah ni a lo thleng a, an dan ngaitein Azuali mawhpuh chu an rawn thupui leh hle. Police lamin a hlan lai ngei an hmu bawk si chu an tan țan chhan țha lutuk a ni a, dawt nena țang kawpin an insawi fihlim leh lek lek chu a ni e.

     Chutiang bawkin Azuali thubuai ngaihtuah niah pawh theihtawp chhuahin țang  mah ila police lamin țan chhan an neih țhat êm avangin a thiam lo lam kan la ni tluang zel a, hun min pek belh tura ka dilna erawh phalsak ka ni hlauh thung.

     Nunpuia a la țangkai tluang zel a, amahah kan innghat ta deuh tawp ti ila kan sawi sual hauh lo ang. Tunah chuan an che sual lai man chiah kan hmabak ta a, an la fimkhurin chet fuh loh palhna lakah an la inveng ve zel nen an chet pelh zeuh hun kan nghah a ngai a ni.

     Nunpuia zunah Cindy a uai nghet telh telh a, Nunpuia tan chet lak a awlsam chho tial tial bawk. Kan lehkha duh ber la la chhuak thei rih lo mah se an chet dan leh ruihhlo vawrh kawnga an inhnamhnawihna ti lang thei țhenkhat record a nei tawh a, a țha ber kan duh avangin kan la nghak rih mai chauh a ni.

     Inspector Chhuanga pawh pi Siami te inah a la leng lut reng a, Cindy a beisei ve tlat chuan Nunpuia dinhmun a ti derthawng ang tih kan hlauh viau rualin Nunpuia ka ring tawk a, a inbuaipui thei maiin ka ring a ni. Amah Chhuanga tak pawh chu kan thlun beh tel turte zinga mi a nih avangin țhiana a siam theih phei chuan duhthusam a ni a, an inhnaih poh leh kan tan thudik hailan a awlsam dawn a ni.

     Azuali an man theihna tura ruahmanna zawng zawng kha Chhuanga thluak hmang veka an tih a ni tih kan hre tawh a, sumin an invur hneh hle tih kan hre bawk. Dawt hmanga mi man leh ruihhlo zawrhnaa inhnamhnawih anga kan khin let theihna turin evidence țha zawk kan nghak mêk a ni a, a hmawr kan bawk thei țep tawh niin a lang. 

     Ka duh aiin Baby-i a rawn huangtau leh riau tawh a, min beisei viau naa mitmei ka hmuh duh hauh lo thung. Azuali ka nuna a rawn luh ațang khan vawikhat pawh ka mutpui nawn leh ta miah lo kha a ni a, nula à a ni lo a, ka ngaihsak lohna leh thlauhthlak dan chu a hai ka ring hauh lo. Mahse, min zar a bansan lo a, min la beisei reng a ni tih a ti lang hreh hauh lo bawk.

     Ka nu mit ti kham zawnga awm leh zauh a ching chho zui zel a, ngampa taka ka office-a min rawn pan mai bakah ka bedroom thlenga min luh khung a hreh bawk si lo, ka nu hnena țangin fimkhur tura fuihna thu ka dawng nasa khawp mai.

     Lalhriata te inneih hun tur an ruat fel a, dinpui turin min beisei viau mah se hun ka neih loh êm avangin duh ang taka țawiawm țhat theih loh ka hlau a, Freddy zawkin a dinpui dawn a ni.

     An inneih ni chuan chawhma lamah office kalin chawhnu lama an inneih hun nang hman tura inpeih fel hman tumin ka buai hle a, office ka chhuahsan meuh chuan duh aiin ka tlai tawh nghe nghe. Azuali chu nghah ngai lovin a lo inpeih thlap tawh a, ka intihfaia ka inthlak zawh hnu chuan țhu khawmuang lovin kan tlan chhuak ta nghal a.

     Țan hunah chiah kan thleng hman hram a, țhiante ni pawimawhah pawh țawiawm țha hman lo lêka ka buai chu nuam lo ka ti ru ve viau mai. Kan inhriat chian hlawm êm avangin vui leh vaiah la lovin kan inhre thiam leh zel zawk a, chuti ni lo se țhian inti tur kan awm tawh hauh lo ang.

     Sangtei chu a naupai a la hriat lutuk lem lo bawk a, a lang nalh hle a. Lalhriata pawh a sar vuah a, an inhmeh viau a ni. Dan hnihna mah ni se inneih lawmpui tura lo kal an țhahnem phian a, chhungkaw hung tak ve ve an nih vang te pawh a ni mahna.

     Thlalak chhung a rei angreng a, kan lakpui zawh hnuin țhutthleng awmna lamah Azuali chu ka pheipui ta daih a. Sangpuii leh a țhianpa an rawn țhu phei ve bawk a, a dan ngai tê-in Sangpuii a ri leh nghal bawrh bawrh a.

     "Bawih, kan pahnihin thla lakpui ve ang ka tia, ka hmuh loh laiin i lo bo daih a! Va lakpui ve lawk ila," ka koki rawn vawn pahin Baby-i'n a rawn ti a.

     "Kan lakpui tawh alawm," ka lo ti nghat a.

     "Kan pahnihin maw le," a ti leh hram a.

     "Lakpui tur an la awm nual sia, hun a awm tawh lo ang."

     "Va kal ila, kan lakpui thei a ni mai alawm."

     "Nichina ka lakpui kha ka duhtawk viau e," ka ti hmak a.

     "Țhianhovin kan la ve ang chu," a ti leh tlat a, ka ning hmel chu a haider hmiah bawk.

     "Remchang a awm tàk leh kan lakpui dawn nia. Tunah chuan ka phei peih tawh rih lo."

     "Anih chuan tihian nghak ila, mi an tlem deuh hunah va lakpui mai ang aw. Sen, țhu ve rih phawt ang. Sawlai kha chu mi an tam lutuk a, boruak ka zo lo," tih zat zat pahin ka bulah a rawn țhu thla ve nghal zat a.

     Amah ang thova hawi chapo larh mai, Seni tia a koh pawh chu țhutna awlah chuan a țhu ve mai bawk a.

     Baby-i min hnaih lutuk chu ngaithei lovin Azuali lamah ka tawlh phei a, awmzia a awm lem lo. A chhan chu, ka tawlh sawn rualin a rawn tawlh ve nghal zat a, min ngheng deuh titih lehnghal!

     An țhian dun chuan an titi mawlh mawlh a, awm ve dangte chu an ngaipawimawh lo dun kher mai. An titi changkang tak chu Sangpuii leh Azuali te ang, tluangtlam leh pangngai taka titi țhin tan chuan zawm ngaihna awm hek lo, an țhu ngawi tawp mai a ni.

     "I ruala haw ka tum avangin scooty pawh ka keng lo a nia. Chuan, hei ka țhiannu hian kan pahnihin an ina lêng turin min sawm a, haw hma deuh ila, leng lawk ang aw," min nek deuh salh pahin a ti a, ka banah a kut a rawn rawlh lut zat bawk.

     Azuali inla hrang ta deuh chu hrethiamin a kutah ka vawnsak vat a, a la sawn rang ngei mai. Ka ban leh pawh chuan ka khawih a duh ta hauh lo a, a kawngah ka kuah ta hmiah a.

     "Sangpui, tui min va inpui lawk teh aw. Boruak lum lutuk hi ka zo lo deuh tlat!" tih pahin a tho nghal a, a aw-a tih elna lo ri tel chu ka hai lo chiang hle.

     Sangpuii'n a chhan hmain ka pawt țhu leh nghal a, a tan han țan viau a rem si lo, țang țeuhin a țhu a, ka tawh erawh a duh lo bur thung.

    "Kei pawh lum ka ti riau. Nakinah thil vawt lam in tur kan va lei dawn nia, tunah chuan mi an la țhahnem rih êm mai, nghak lawk ang u," pangngai thei ang berin ka ti a, kal chu an tum lui ta bik lo. 

     "Kei pawh boruak hi a uap ka ti. Helai hmun ațanga kal sawn vat hi a chakawm! Phei har lovang u aw," Sangpuii'n a lo ti vat. Baby-i te țhian dun chu hnawk kan ti tlâng a ni ber.

     "Duat, haw hma a ngaih chu aw. Seni hian kan kal lo a nih chuan min țim nasa dawn lutuk, ka tuar peih teuh lo a nia," Baby-i'n a rawn ti leh a, zah a hre hlawl lo he nu hian!

     "Zan lam program kan lo set sa tawh a, ka hman ka ring lo," ka ti nghat a.

     "Naaa... Hman tum la, i hman a ni mai. A hrim hrimin kan awm dun khat tawh em hi! Ka ngai tawh che alawm."

     "Ka hman dawn lo a, min beisei lo law law rawh u."

     "I hman hun kan nghak mai dâwn alawm. Kan in lam chu a hmanhmawhthlak chuang lo," Seni'n a lo ti ve. Hei pawh a țhiannu ang chiaha zakthei lo!

     "Sangpui, zanina kan thil tihna tur kha in peih fel hman maw?" Seni țawng chu hre lo ang hmiahin Sangpuii ka zawt a.

     Ka mit siai zauh chu hrethiam takin, "Peih fel tehreng e. I duh dan ang thlapin kan ti fel e," phur hmel zetin a lo ti ve then a.

      "Ka rin ai daihin inkhawm kan țhahnem! An fel dun bawk a, lawmpuitu pawh an hmuh țhat phian hi maw le," Sangpuii țhianpa chuan a rawn ti ve boh a. Kan boruak țang ru țeuh chu hrethiamin titi dang a rawn vawrh a nih hmel.

     "An lawmpuiawm ngawt mai. Nupa hlim tak ni zel se!" Ka rilru tak tak ka sawi a ni.

     "Azuali nen in inneih ve hunah hei aia ropui hian kan la lawm mup mup ang chu le! Awi, ka va'n nghakhlel tawh tak!" Sangpuii'n a rawn ti hluai a, a rawn sawi chhuak lui ve deuh a nih ka lo ring mai a. 

     Baby-i awm dan a danglam nghal a, a hmu mawh ta riau tih hriat takin eng emaw hlekah Azuali lam chu a thlek leh zauh țhin. Eng emaw chen kan țhut hnu chuan in tur awmna lama kal chu kan rawt a, kan um e lutuk loh vang nge ni Baby-i te țhian dun chuan hmun dangah min kalsan ta hlauh a.

     "A va zakthei lo ve chiang tak! U Zualtei paw'n i nei ang tih a hlauh teh kha aw," an kal chiah tihah Sangpuii'n a ti nghal bawrh bawrh a, ka lo nui ringawt a.

     "A hmelțhat êm kha, a changkang bawk si. U Peksanga nen pawh an inhmeh khawp kha," Azuali'n a lo ti sap a, a lungawi vak lo tih ka hre mai a.

     "Nangmah nen hian kan inhmeh ber! A ni lo'm ni, Sangpui?" ka ti zauh a, Sangpuii a lo phur leh hle pek.

     "Dik chiah! In pahnih hian in inhmeh ber! Chuan, khatiang mihring zakthei lo lutuk vang khan in inkar hi ti chhe miah lovang che u. Azual, engah mah ngai duh lo la, u Peksanga hian nangmah bak duh a nei lo tih kha hre reng bawk la," a ti zui barh barh a, Azuali a lo ner sak thung.

     A lung a la awi zan lo tih hre reng chungin a kutah ka vuan lui tlat a, midangin min ngaihven loh lai chuhin a beng bulah,"I pasal ka nih loh chuan tu nupui mah i ni dawn bik lo. Ka nuna hmeichhe pawimawh ber i nih hi," tiin ka phun sup a.

     A mitmeng lian lam, fiah kek kawka min melhin awih lo hmel deuhin a ner nâng a, ka thu tak hmel a hmuh chuan min ring ve ta ni awm takin a nui  ta sak a.

     Zanriah ei khamah pawh hmanhmawh lovin kan țhu khawmuang a, Sangpuii pawh a țhianpa nen khan an la inzui ve dat dat reng a, a bialpa ni turah ka ngai ngawt a!

     Ruatpuia pawh nula pakhat nen an inzui ve ral ral a, Azuali sawi hmangin an in lamah pawh a hruai tawh ni awm tak a ni. Hmeichhe fel leh mawlmang tak, changkang lo ni leh chuang hauh si lo hmel a pu a, nelawm leh biak nuam tak a ni bawk. 

     Lalhriata chu Sangpuii chhungte lam haw turin an ko hrang deuh reng a, chibaia han titipui zui tate an awm nual avangin kan bulah a țhu ve hman mang lo a, Freddy pawhin a țawiawm țha viau e.

     Inleng zawng zawng an țin thlengin kan awm a, mi hnukhawiah kan haw ve ta chauh a. Zanlama a lawmna party han neih hran leh kha țhian țhenkhat leh an chhungte lamin rawt mah se țul an ti lem lo a, a nu leh pate bakah amah Lalhriata ngei pawhin neih kher ngaia a hriat loh avangin program pawh an siam ta lo a ni.

     In kan thleng a, motor ațanga Azuali chhuk tur chu dangin ka kuah bet a, tlaitluana tih ka lo châk êm êm chu tiin a hmui no nalh leh fawh nuam zet chu ka fawhsak vawng vawng a.

     "Baby-i kha i then chiang tawh tak tak maw?" ngaih la țha lutuk lo hmel pu hian min zawt a.

     "I hmel ka hmuh tirh ațanga tun thleng hian hmeichhe dang hi ka la tawk leh chhin miah lo."

     A awih emaw, awih lo emaw thudik a ni miau a, sawi uar lutukah ka inngai hauh lo.

     "A ngampa lutuk kha ka ngaih a țha lo  alawm! La inngaizawng reng ang maiin a rawn ngam che a, a tih dan vel che te kha a pasal ni hial awm i ni."

     Ka lo nui hawk a, rum zetin min melh râm râm a.

     "In lo la inngaizawng a nih vaih chuan aw..." sawi zawm lovin a ngawi daih a.

     "Hmeichhe dang i thik hian nuam ka ti," ka lo ti daih a.

     "Ka thik bawk lo."

     Ka nuih a za viau naa ka insum tlat a.

     "I sawi reng sia, i thik a niang chu ka lo ti a! I thik loh chuan min lo duh ve tak tak lo tihna a ni maw!" lungawi loh hmel deuhin ka ti nghat a.

     "Aih...Ka...aaa...chutiang pawh a ni lo." A sawi tur hre lo buai hmel chuan ka nuih a ti za zual sauh a, ka insum zo lo teuh kher mai.

      "Kei chuan tu mipa pawh nangmah hnaihtu apiang chu ka thik vek ang," ka tih leh chuan mangang hmel a pu lek lek tawh zawkin ka hria.

     "Ka thik lo ka tih awmzia chu... Ka thik tho a, aaa... nih leh ka thik!" Ka nûr hmel a hmuh chuan a ti ta ngawt a.

     A inthup thiam lo lutuk leh a lan dan duhawm lutuk avang chuan insum zo lovin ka fawp leh ta nge nge a, thil nuam lo tak chu a ni lo chiang alawm.

     An in luah lamah kan inzui thla a, Ruatpuia a lo awm tawh avangin rei pawh awm lovin ka haw chho leh ta thuai a. Ka room ka lut fel chiah tihah ka phone a rawn ri a.

     "Aw, Nunpui..." 

     "I buai em?"

     "Buai lo e. Sawi rawh."

     "Kha Inspector Chhuanga khan min ringhlel deuh tlatin ka hria! Zanin pawh haw mai duh lovin a țhu ve reng a, Remruata bulah ami rin zawng ka nih loh thu leh fimkhur taka awm a țul thu a hrilh vel a. Cindy hrim hrim hi chu ka lakah a la luangliam hneh êm a, buaina a la awm lem lo, " a rawn ti bal bal a.

    "Kan hmanhmawh lehzual a ngai a nih chu."

     "Kan duh ber kan la nghak chhuak thei tlat lo hi a buaithlak khawp mai. Tunkar tawp lama hna țan chungchang an sawi zauh tawh kha a ni a, kan Police Officer hian remruatna dang a neih hmel riau mai. A hun an sawn tak tak a nih chuan kan inpeih hman lovang tih a hlauhawm."

    "Nghak leh țang țang phawt ila, hrui dang valh belh a țul ta a nih leh kan valh leh mai a ni ang chu!" Ka tih chuan min rawn thlâwp hle.

     "Ni e, kawng dang eng emaw tal kan dap a nih loh chuan kan tlai palh ang tih ka hlau tawh riau; an chet chhuah hma theih deuhna tura eng emaw tih mai kha a sual hauh lo ang," a rawn ti ve thuai a.

     "Tih dan tur ka lo ngaihtuah ang," tiin kan inbiakna chu ka ti tawp zui a.

     Ruatpuia call-in ruahmanna ka siampui leh tê tê a, kan inbiak zawh hnu chuan inbual turin bathroom-ah ka lut ta chauh a. Ka inbual zawh meuh chuan zanlai a ni thuak tawh a, Azuali pawh be tawh lovin whatsapp-ah ka mangțha ta tawp a. 

     Azuali thubuai ngaihtuah a nih leh hma ngeia inpeih hman ka duh avangin ka hmanhmawh ru tawh hle a, ruahman anga thil a kal lo a nih hlauh phei chuan kan insawi chhuak zo lovang tih pawh ka hlau hlel lo e. 

     Lalhriata nupui nei hlim pawh inthlahrung viau mah ila ka ti buai lo thei lo a, a hreh hauh lo tih hre mah ila nupa inthlakhlelh hunlai a nih avangin nuam ka ti lo viau a, tih ngaihna dang awm ta lo chu ka awltir ngawt thei si lo a ni. 

     Freddy pawhin țhian nih a tlin takzet a, ka mamawh hun apiangah a hna lamah laklawh eng emaw tak a nei a nih loh chuan a rawn lang nghal zat thei a, țhian țha neih man a awm khawp mai. 

      Hna lamah pawh rilru ka pek hman meuh loh avangin min rawn pantute chu ka hnar vek rih a, min ruai laklawhtu te hna erawh theihtawp chhuahin ka thawk thung. Tum anga kan awm thei a nih chuan karte han ral se, kan thawk zawm leh thei tawh ang chu. 

    Kan vanneih a siamin kan tana hnawk ber Chhuanga chu hna lam kaihhnawih thilah zin chhuah a ngai hlauh mai a, chu hun țha chu bawhpelh ka tum hauh lo.

     Kan ruahmanna siam sa kha bawhzui tura hma lak vat a ngaih avangin Azuali te inah kan inhmu khawm hlawm a, hman deuha Ruatpuia'n a nau hmuh a duh avanga a kalpuipa lo va bumtu a țhianpa kha a tel ve bawk.

     "Ka sawi ang khan rinhlelhna awm lo thei tur ang bera lo dawngsawng turin i lo hrilh chiang tawh ang tiraw?" tiin Ruatpuia țhianpa, Zela chu ka zawt a.

     Lo buk nghauh pahin,"Kha lamah kha chuan venthawn tur a awm lo. Rin ngam tur an ni tih ka hriat avanga anmahni kher thlang kha ka ni a, hetiang lama tawnhriat lo nei tawh an nih avangin tih dan tur chu an thiam khawp ang," a ti a.

     "A țhat chu! Fel hlel leh an ngaih ti țha lo tur thil a awm lohna turin fimkhur hle a ngai dawn a, a bikin Nunpuia leh Zela in pawimawh dawn a ni," Freddy'n a lo ti ve a.

     "A hma lama thlen khawm kan tum dawn nia. Lalhriata pawh a naute nen an theih anga hmain lo awm an tum a, tumah tlai lova kan kim tlan a ngai dawn tih kha hria ila," ka tih chuan an hrethiam a ni tih hriat takin an lo bu nghat nghat hlawm a.

     "Fimkhur hle rawh u aw. Thil a kal sual a nih hlauh chuan a pawi dawn lutuk a nia!" hlauhthawn hmel takin Azuali'n a lo ti ve a.

     "Fimkhur lo rual kan awm hleinem. Kan rintlak tlâng bawk a, kan hlawhchham hauh lo ang," a rilru hneh tum takin ka ti a, hnem nana han kuah vawng vawng mai chu ka duh hial a ni.

******

     "Thil țha lo in tawk palh ang tih ka hlau êm mai! Theihtawpin fimkhur ula, țangkai ve theihna ka nei dawn a nih chuan min rawn ko vat rawh aw," ka awma bei tlan chungin a ti a, a zam aw kara huaisenna lo ri tel chu ka hriat hmaih hauh lo. 

     Khua a thim fel tawh a, chhuak turin kan inpeih vek tawh bawk. Ruatpuia'n kan in kawta motor ka dahna lamah min lo han chhohsan tawh a, kei erawh Azuali bulah ka la awm khawmuang rih lawk a ni. 

     "I tel ve ngai lo turin kan ching fel dawn alawm. Hetiang thila i tel leh hi ka phal tawh lo. Min lo ngaihtuah lutuk lo la, rilru hahdam takin lo awm ang che," a thei dawn hauh lo tih hre reng chungin ka ti a.

    "Khawi hmunah pawh awm la, eng thil pawh ti la ka ngaihtuahna che hi a lutuk fo rêng alawm," nuih seih paha a ti chu hmuhnawm a va ni chiang tak!

     Inthlahlel takin kan infawp a, vannei tura duhsakna min hlan hnuah Ruatpuia min nghahna lam panin ka chho ta nghal a.