PEKSANGA 11

 PEKSANGA 11

Sbk Pachuau

     Lalhriata'n a inbual zawha min rawn biak chuan thil awmdan ka lo hrilh nial nual a, a bak chu inhmuh huna sawi zawmah kan ti ta a.

     Office chawlh a ni a, Azuali te inah ka chhuk thla a, Nautei leh Mapuia an lo awm leh ran tawh.  Rei pawh ka la țhu hman lovang tihah Lalhriata a rawn lut ve a, titi phunglêng mai mai sawi tur kan nih loh avangin ka naute pahnih chu Azuali'n kan in lamah a chhohpui ta thuai a, amahin a lo chhuk leh vat thung. 

     "Eng nge chanchin?" tiin Lalhriata ka zawt a.

     "A rilru hneh tak taka tun aia tlatlum tur chuan tisa taka han chul nel vel a ngaih hmel riau a, chu tak chu harsa ka ti a ni. Han khawih luih vel ngial ka tum pawhin ka ti hleithei tlat lo. Ama lamah chuan harsatna awm lovin a inhawng tlang vek a ni mai a, ka bawhzui thei lo hi ka buaina a ni ta a ni, " a tih chuan ka nuih a za deuh a. 

     Cindy hmel leh nungchang ka mitthla a, Lalhriata te ang mipa pian țha leh hmelchhe lem lo lakah chuan bel chhûnga sa ang a ni dawn tih a lang reng a, amah zawkin bul a țan hreh dawn hauh lo tih pawh a hriat reng mai. Nula chhe lo leh no nalh tak, duhawm zet mai a ni naa a duhzawng mipa tawh phawt chu chhuah lova kherh ngat ngat mai țhin, a hlawkna tur a nih phawt chuan a mipa duhzawng ni lem lo tan pawha inphal mai chi a nihna chuan han khawih vel a ti chakawm loh zo vek a ni.

     Duh duh thing thei khawpa tlangval pian thiam leh hmel pawh chhe lo tak Lalhriata te ang tan chuan chutiang taka che khawlo hmeichhia chu han buan vel a chakawm dawn hauh lo tih ka hria a, nawr luih chi-ah pawh ka ngai hek lo. Tisa taka inchulnel lo pawha tihdan a awm thei thovin ka ring a, kawng danga ar țalh tura inruahman mai a ngai dawn a ni.

     "U Cindy chu a chhe lovin a no țha nguak nguak sia, innu i hlauh avangin i insum a ni chiang mai!" Azuali'n a lo ti zauh a.

     "A teuh lo lutuk! A bula ka țhut ringawt pawhin ka luak lo chauh a ni. A tenin ka ten ngawih ngawih maw le!" tiin Lalhriata a lo țang nasa mai. 

    Azuali nuih a za hle a, hmasawnna awm êm êm lovin rilru han pik viau țhin mah se a kârah hlim taka nuihna tur a lo tlazep ve leh țhin chuan rilru hah a chhawk ve fo a, a zia viau mai.

    Ka hna lamah ka buai chu thuhran ni se duh ang taka chakin a kal theih loh a, kan thil chhuiah hma kan sawn mawh angreng bawk nen chet lak a har chho rih hle. Lalhriata rinai takin Cindy lakah a tlatlum chho ta phian a, pindan ril zawk thleng tur erawh chuan nghah a la ngaih hmel viau. Pawisak nei lovin chet la duh se zawng kan thil duh chu kan hmu tawh hial maithei a ni.

*****

     "A'u Mama, inlêng i nei a, Anu'n lo chhuk rawh a ti," Nautei'n a rawn ti lar lar a, towel vengin bathroom ațang chuan ka chhuak nghal a.

     "Tu nge lo lêng a, Naute?"

     "U Baby-i..."

     "Aw le, thawmhnaw ka hak zawhah ka lo chhuk ang."

     "Ih maw, A'u Mama, i room-a lo chhoh a tum a, Anu'n hetah lo nghak rawh a ti tlat a," Nautei'n a ti leh a.

     "In lo chhohtir mai lo a nih chu," ka nau chhaih pahin ka nui a.

     "Anu'n a phal lo alawm. 'Bakah a zaktheilo si, mipa room-a luh pawh a hreh lo a nia, khumah in mu vel ang tih a hlauhawm. Ni dangah pawh i room-ah hian hruai duh miah suh aw."

     Ka nui chhuak hawk hawk a, ka rin dan ang vel chiahin min chhang a ni. Ka naute pahnih tan chuan Azuali a țha ber a, hmeichhe dang ka biak hlek pawhin Azuali chauh be turin min ti a, an thikthu pawh a chhe dun ngang mai. Inngaizawng kan ni tih an hre thiam ve chiah em chu ka hre lo naa ka nupui tur cheiin an chei ve tawp mai a ni.

     Inhnuaia Nautei nen kan chhuk chuan inla chhelo zetin Baby-i chu sofa-ah a lo țhu a, ka nu-in dawhkanah pangpar a lo khawi mawlh mawlh bawk.

     "Ka zin haw hnuin min hmu tura i lo kal ka rin nen phone takngial pawhin min rawn be lo a, ka thil hawn che hi ka pe duh lo țep che a ni," min hmuh rualin a ti nghal a.

     Țhian laka vui derna țawngkam ang lekin midang hriatah chuan a ri maithei, a aw-a lungawi lohna inphum tel erawh an hrethiam ve hauh lo thung ang. Kei chuan ka hre naa ka ngai pawimawh lem lo.

    "Hna lamah ka buai ve deuh alawm maw le," ka ti țha ve mai a.

     T-shirt nalh zet min rawn hawn chu ka la hreh viau naa lak loh tawp chu thil mawi a ni si lo, phur lo zeta lawmthu hrilhin ka laksak ta hram a. A mit a fingin nalh leh mawi a hre bawk a, a thil min pek hi a nalh hlawm fu zel, ka ha zui ngai lo mai pawh a!

     "Ka țhiannu hmuh ka ngai a, min kalpui lawk la," meng sexy lam lek leka min melh chungin a ti a.

     Tunhma ang kha chu ni se min hip leh viau maithei; tunah erawh ka thinlung luahtuin a luah khat hneh rih êm a, midang lakah ka mit a hlei lovin ka rilru la peng thei dang an awm rih lo a ni ber.

     "Chhuah ka ngai tho a, ka thlah pah dawn che nia."

     A lungawi lo tih a hmelah a ti lang a, ka nu a awm ve avangin a riin eng mah a sawi lo thung. Motor-a kan țhut luh rualin a lungawi lohna a sawi nghal char char a, a phone call ka lak duh loh te leh a message ka chhan ngai loh thleng chuan min chhuahchhal a ni ber mai.

     "Ka buai tih ka sawi tawh kha," ka ti awlsam then a, a lungawi phah chuang hauh lo.

     "Khati zat ka rawn call che a, buai viau mah la vawikhat talte chu min rawn call let ve ka beisei a nia."

     "Tunah chuan i lo haw tawh a, hei kan inhmuin kan inbe reng thei tawh alawm."

     "I hnaah i buai a, ka tan hun i nei leh thei chuang lo ang."

     "Buai tak tak hi chuan hunawl neih hi a har êm a ni," ka ti ve leh hmiah a.

     "Tak takin, țhiante lakah ka'n pangchang ve lawk a nih kha. Ka vui deuh naa i buai tih ka hria alawm, i sawi ang khan ka lo haw tawh a, kan inhmu thei reng dawn tho a, ka ngaidam mai ang che," nui var var chungin a ti a, hmeichhe à lo ta na nâ nâ chuan min tih lungawi tuma mood han thlak vel chu a hnehsawh kher mai.

     A kal duhnaa ka dah chuan a ruala kal ve turin min sawm ngial a, tihtur pawimawh ka neih chhuanlamin ka kalsan thei ta hram a.

     Ka kalna tur hmun ka thlen chuan ka țhiante chu an lo awm țhap tawh a, ka tlai deuh avanga thupha chawiin hmalakna thar chu a hlawhtling thei dawn em tih ka zawt nghal zat bawk.

     "Hmasawnna tlem tlemin kan nei chho zel dawn a nih hmel. Kan nauva chu rinai takin a chhawr tlak dawn tlat! Nizan pawh a bulah a riak a ni awm e. Kan duh ber thil chu la hmu lo mah se a hmu chhuak har tawh lo turah ka ngai," Freddy'n a lo ti thuai a.

     Lalhriata'n pi Siami te bedroom vel ching let tura hun țha neih theihna ber Cindy a mutpui hreh êm avang khan a thawh ai thawk tur kan melh ru a, Freddy u te inhnuai tlangval, hmeichhe laka sihhnip ve tak, eng ang hmeichhia pawh mutpui hreh lo ang chi chu kan theh chhuak ta a ni. 

     He tlangval, Nunpuia hi hmeichhe lamah chak lo viau mah se a nunzia hrim hrim a țha tluang pangngai a, mi rinawm tak a ni bawk. Chu tak chu kan duhna chhan a ni a, kan tana rintlak an pawimawhin thuruk vawng thei tur leh thil țul lo sawi mai mai lo tur ang chi kha kan duh ber a ni.

      "A rintlak tluantling êm ang chu maw!" Lalhriata'n a lo ti vang vang a.

     "Ka hriatna a rei tawh a, a rintlak ve tawk chuan ka hria. Chu bakah a thla khat lakluh let zet kan tawktarh a, țha taka a thawh ngei ka ring," Freddy'n a lo ti thuai a.

     Nunpuia hian computer zirna a siam ve a, a hlawk êm êm lo naa nuamsa ve pangngaia a khawsak theihna tur erawh a thawk chhuak ve thei a. Chuti ni mah se sum țhahnem zawk hmuh theihna a nih chuan nula kawp a lo hnehsawh bawk nen kan thil hlui chu a hnar phal lo a, a dawr khar kher ngai lovin kan tan a thawk thei tho bawk nen chu tluka offer duhawm chu a vâng viau maithei a ni.

     Lalhriata chu hna zawm thar a nih bakah a thlak tàk officer kha che phuailuai chi a lo ni kher bawk nen a buaiin hna chinfel tur a nei nual a, țul tawpah lo chuan ka ko ngam țhin lo. Vawiin erawh vanneihthlak zetin hunawl kan nei tlâng hlauh a, chu hun țha chu chuhin inhmuh khawm kan rawt ta vat a ni.

     Ruatpuia'n Nunpuia chu koh ve a rawt avangin Freddy chuan a phone chawp leh hnuhnawh a, rei pawh rial lovin a rawn thleng ve nghal zat a.

     "In duh ber kha zawnna hun remchang a la awm lo deuh a, a nu saw inah a awm deuh reng avangin chet lak a chak thei rih tlat lo. Mahse, ka remruatna a fuh a nih chuan nghah ka ngai rei tawh lo ang," Nunpuia chuan a ti charh charh a.

     "Nangni ho nen hian kan inhria tih an hriat ka duh loh avangin in chanchin an sawi chang pawhin ka inrawlh duh ngai lo a, zawhna han zawh belh a rem țhin lo khawp mai. A ruih laiin vawikhat kha thurochhiah ziah danglam chungchang Cindy ka sawipui thei hlauh a, min rinhlelh ka hlauh avangin ka zawt thui viau ngam lo thung. Tih danglam ngei chu an tum ruh hmel khawp mai."

    "A nu room-a i luh theih a pawimawh rualin safe chahbi awmna i hriat a ngai tel ngei ngei tih kha theihnghilh lo la. Karleh thawhlehni hi pi Siami court leh hun tur kha a ni a, Cindy kaltir ve loh dan ngaihtuah la, inah awmpuiin a ruih viau kha duhtawka chet i lak theihna atana duhthusam a ni bawk ang, " ka lo ti zauh a.

    "Safe chahbi chu a bag pakhat, leather dum-ah khan a ak reng țhin a, a ah lohlai i châng fuh a nih loh chuan lak a har viau maithei," Ruatpuia'n a lo ti ve bawk a.

     "Tih dan a awm mai turah ngai ang. Zaninah ka riah leh ka ring a, chahbi lak ngawr ngawr chu hnaah ka lo nei phawt dawn nia. Taka, zawng tura min tih kha hman zan khan ka hmu tawh tak asin!" tih pahin Nunpuia chuan a kekawr ipte a zen a, Azuali tana phone ka leisak kha a rawn lek chhuak zui a.

      Azuali khan a chhuah dawn khan a phone chu a lo switch off hlauh a, a room-ah lah an lut ngai bawk si lo, a phone kawl chu an lo hmu chhuak lo a nih hmel.

     Nunpuia chu beisei ai takin a rintlak viau dawn niin ka hria a, rilru pawh a phur deuh sawt nghe nghe. Pi Siami te lamin sum hmangin mi an ti lungawi kual nasa mai si a, Azuali'n thiam a chan theihna atana an chetchhiatna kan nghah lah a la thleng mai bik rih si lo. Nunpuia a rintlak chhoh viau chuan Cindy ngawr ngawr lo deuh pawh tihtur dang siamsak a ngai ngei ang.

     Ka phone rawn ri chu ka en vat a, Baby a ni tih ka hmuh chuan chhang lovin ka ring raltir a, a rawn call nawn leh tàkah chuan ka phone chu switch off-in ka ak ta daih a.

     Lalhriata station lama a let leh a ngaih avangin a chhuak hmasa a, keini pawh rei awm lovin kan chhuak zui ve mai a. Freddy chu office lama let leh a ngaih tawh loh avangin a haw nghal a, Ruatpuia pawh revenue lamah Pi Siami te an va lang leh tawh em tih ngaihven turin Pu Liana te in lam panin a kal a, office ka chawlh avangin ka haw tlang thung.

     Azuali hmu tura kal ka rilruk deuh naa zanlama a phone pek paha len tumin kan inah ka lut tlang ta zawk a, ka room-ah lutin karleh lama Azuali te court ni atan ka inpuahchah a.

     Darkar khat vel ka țhu hman ang tihah ka room kawngkhar kik thawm leh ka nu min ko ri ka hre zui zat a.

    "Mama, i phone i off em ni?" a rawn ti lut a.

     Baby-i min rawn call khan ka off ta daih kha a ni a, ka lo la on leh miah lo a ni tih chu ka ngaihtuah a.

     Ka phone chu on pahin, "Nichin khan ka off a, ka lo la on leh lo a nih hi," ka ti awlsam mai a.

     "Azuali'n a call tlang thei lo che a, inah i awm em tih min rawn zawt a."

     "Ka lo call let mai dâwn nia," tiin ka phone ka en a, Azuali min rawn call tumna a lo awm nual mai.

     "Muang lo khan call teh. A aw kha dik lo riauvin ka hre mai!" Ka nu'n a tih leh chuan ka call nghal vat a.

     Ka phone a rawn chhan rual chuan thil dang pawh sawi lovin, "Lo chhuk rawh," a rawn ti nghal tawng a.

     Min call hmasa ngai lo a, message pawh zingkara min rawn 'good morning' țhin tih loh chu min thawn hmasa ngai hek lo. Chutia ka nu thleng thlenga a phone chu mak ka ti viau a, an ina chhuk tur min rawn tiin engmah dang sawi lovin a dah leh nghal daih bawk si, thil thleng eng emaw tak a awm a nih ringin ka tlan thla ta vat a.

     Azuali te inchhung ka luh ruala ka thil hmuh chu ka duh lo kher mai. Engtin nge chu lai hmunah chuan Azuali te an awm tih a hriat rêng rêng ni!

     Tlangnel hmel zeta Zuala lo țhu chu ka en reng a, ka mitmengin ngaihno a bei dawn lo nasa tih ka hria, ka ngai pawimawh eih lo thung. Azuali bula țhutna awlah chuan țhu-in amah si chetin ka țhu lui ve ngat a, ani pawhin ka rilru hria niawm takin min tawlh sawnsan bik lo.

     "Inneih dâwn aruaiah ngawi rengin min awm bosan daih a, hetah a lo awm reng chu niin! A awmna ka hriat rualin ka rawn pan nghal a nih hi. A chhungte lahin a awmna an hriat loh thu min hrilh reng ringawt a, an ngaihtuah lo lutuk saw an la tuar ang. An hna beisei pawh an hmu lo chiang khawp ang," Zuala chuan a ti nuah nuah a.

     A mit sen danah leh a lei li tawt danah a rui tih ka hre mai a, chhan zui takah ka ngai lem lo.

    "Min hrethiam la, nichina ka sawi ang khan u Peksanga te inah hian chaw ka ei chho dawn a, khawngaihin min lo va hawsan rih phawt mai dâwn em ni ang?" hawihhawm chhuah lui tih hriat takin Azuali'n a ti a.

     "Aw le, ka haw ang. Mahse, ka sawi ang khan zan lamah ka lo leng leh ang. Zanin chauh lo, zan dangah pawh ka lo leng reng reng ang. Ka nupui tur i nih kha lo theihnghilh lo la," tiin a țhutna ațangin a tho țuih țuih a.

     "Ka sawi tawh kha... Ka remtihna tel lovin in lo sawi rem a, kei chuan ka pawm ve lo. Ka nei dawn lo che ka tih kha ka ti tak tak a nia," Azuali'n a ti chang fak a.

     "Min neih leh neih loh chu kan hria ang chu! I chhungte leh ka chhungte an inrem vek tawh, ka neih theihna tur che a nih dawn phawt chuan eng thil pawh ka ti ang. Kan innei ang a, kan inah nuamsa deuhin i awm ang. Awmpui te tihtur hrilh leh min tih lawm bak tih tur i nei dawn lo, i duh zat zat pawisa hman tur i neih chuan i hlim hle dawn tih kha hre ringawt rawh," ding thle deuh lûk lûk chungin Zuala chuan a ti duah a.

    "Ka..."

    Azuali țawng tur chu ka dang vat a, a kut chu humsakin ka thawhpui ve nghal zat bawk.

     "Azuali hian pasal a nei dawn a nih chuan ama duhthlanna ngeiin a nei ang. Tikhan va haw la, helaiah hian lawm i hlawh lo tih hriain lo kal nawn duh tawh suh ang che. A bikin, zu rui chung phei chuan..." tiin ka vau pah deuh a.

     "Tu phiangsen nge nia i inhriata a nei dawn lo che de de dei dei i lo tih ve ngawt? Innei turin kan sawi fel vek tawh a, nanga lo sawi buai theih a awm lo," thinur meng sen rûma min melh khui chungin a ti a.

     "I neih tum berin a duh miau si lo che a, i tan chuan nupui neih a la hla deuh dawn a nih hmel," ka lo ti el sak a.

     "Eng vangin maw min neih duh loh? Kei aia țha i hmu dawn chuang lo. Nuamsa taka i awm theihna turin kan hausa tawk a, min nei lo a nih chuan i la inchhir khawp ang," Azuali ban lehlama rawn vawn pahin a ti leh chhur chhur a, Azuali'n a vawnna kut chu a lo thing thla vat thung.

    "Nang aia neih duh zawk a nei a nih ka ring. Nang ang zurui chapo hi chu tu hmeichhia mahin an neih duh ka ring lo," ka tih leh chuan thinur zetin min melh a.

     "Tu chu nge maw i niha i lo inrawlh ve sek le! Nangmah ni lovin ani hi a ni ka biak ni," Azuali kawk chungin a ti a.

      "I tana mi pawimawh chu ka ni miah lo; mahse, i hre duh țalh a nih chuan kei hi tuna nupuia tana neih i tum ve ngawt pasal tur hi ka ni e."

     Ka chhanna chuan a ti thinur zual ngang ni tur a ni thei leh thei lova min pan hnaiin ka kawrah a rawn țham a, awlsam zetin ka lo thing thla hmiah a.

     A kut rawn vai leh chu lo man betin bangah ka nam bet rawk rawk a, chet la thei miah lo turin ka nek bet nghal hmiah bawk.

     "Ka sawi kha hre reng ang che. He laiah hian ka hmu leh che emaw, buaina i siam zui a nih vaih chuan i tan a pawi khawp ang. Tunah hian haw nghal vang vang la, rawn lang leh tawh ngai suh ang che," chang beng bawngin ka ti a.

     A chan chhe zawk leh che thei lo zawk tan chuan tih ngaihna dang awm hek lo, hreh zetin a lu a bu ta nghut a, ka nek behna ka thlah rualin chhuatah a țhu thla nghal hnawk a.

     Step-a a chho hnuang hnuang chu thlirin a kal liam hnu chuan kawng ka khar a, hmel dâng beia țhutthlenga Azuali lo țhu chu panin ka kuah a, a chalah ka fawhsak zauh bawk.

     "I phone i off daih a!"

     A pangchang aw chuan ka beng a verh zar mai.

     "Pawi ka ti lutuk! Kha mihring kha a lo kal tih hria ila kha aia hma daiha lo kal tur kha ka ni asin!" tiin ka kuah nghet sauh a, ani pawhin a theih anga  nghetin min kuah let ve bawk.

     "Ka bula țhuta min khawih a tum a, ka insawnsan daih a, min umzui zel sia, ka ten lutuk!"

     "A khawih che em?"

     "Aih, khawih lo. Țawngkam na deuh hlekin ka vau a, min khawih lui a nih chuan ka be duh dawn lo tiin ka hrilh a, min pan lui ta bik lo."

     "Chuan...?"

     "Inneih chungchang min sawipui phet a tum a, ka nei dawn lo tih ka sawiin a awih duh bawk si lo. A lo kal leh ang tih ka hlau khawp mai," a ti leh sep sep a.

     "Hlauthawng suh. He laiah hi chuan a lo kal nawn duh tawh kher lo ang," a hnunga chul hauh hauh pahin ka ti a.

     "Kan tan a hnawksak zui ang em le?"

     "Maithei!" tiin ka lo chhang tawi tàk a.