PEKSANGA 9

 PEKSANGA 9

Sbk Pachuau

AZUALI

     Thil thleng chu a rang lutuk a, a ngaihtuahna a mang vek a, mumalin a rilru a hmang thei lo tawp a ni ber. 

    A u Remruata chu a petu zawka a țan țhin avangin chutiang leh turah chuan an ngai a, chuta an inhlanlai tak chuan Peksanga te khan rawn nangchingin man nghal theih an inbeisei kha a ni a. Amah zawk pe tura a tirh tàkah khan a rilru a buai ru takzet a, a rinhlelh a hlauh avangin a hnial hreh bawk si, ngaihțha zan lovin kal tura a tihna lam kha a pan a ni. 

    

     Kawngka a kik a, chhunglam ațanga an rawn hawn rual deuh thawin a chhak chiah in ațang chuan Chhuanga leh a hote an rawn chhuak a, ruihhlo zuar anga man a ni zui ta nghal bawk.

     A unaupa leh Peksanga hmel hmuh a inbeisei laiin a u chiah a rawn lang a, phatsan nia inhriain a rilru a nâ a, a chunga thil thleng vangin a na êm êm bawk. Ngaihtuahna hmang thei lo khawpin a chawmawlh vek a, amah mantute'n kal tura an tih chuan hnial buai lovin a kal ve tawp mai a ni.

     Police station an thleng a, lock-up chhunga an dah luh hnu chuan a rilru a fim tial tial a, a thin a rimin a thinlung a na ngawih ngawih a, Peksanga laka a lo innghat lutuk kha a inchhir ngawih ngawih a ni tawp.

     Darkar pawh a la ral lovang tiha Pekhlua leh a unaupa bakah, an ina lo chuang kai ve zeuh zeuh țhin tlangval pakhat an rawn luh chuan a thaw hawk a, beiseina tlem azawng chu a nei ve ta alawm le!

     Peksanga leh Lalhriata'n station OC an be nghal a, man a nih tawh miau avangin tih vak ngaihna a awm rih lo hle. Bail-a chhuah dil dawn pawh ni se court hawn hun a ngai a, zanah khawi court mah hawn thu awm hek lo a tuk an nghah mai chu a ngai a ni. Dan leh thil nihphung hre ve ve an ni bawk a, nawr chiamin awmzia a nei lo tih an hre ve ve. Tihngaihna dang awm si lo chu thinur leh thinlung tawt țunin Peksanga a awm a, OC nen inhre țha viau mah se dan chu dan a ni tlat si a ni.

     A lam pana Peksanga rawn kal a hmuhin a laka vuina rilru a lo put kha a inchhir nghal a, ngaihtuah lovin phatsan ni se tun ang hunah hian a rawn lang dawn hauh lo tih a hre chiang ve hle.

     "Bawihi, a rang thei ang berin heta țang hian ka hruai chhuak dâwn che. Chumi hma chu pachang takin lo awm leh phawt rawh aw."

     "A harsa viau ang em?"

     "Eng anga harsa pawh ni se ka hruai chhuah theihna tur chein theihtawp ka chhuah ang," Peksanga'n a ti nghat a.

     "Ruihhlo zuar ka ni si a..."

     "I ni lo! Ruihhlo zuar i ni lo a, i ni ngai hek lo ang." Azuali mittui luang ngiai ngiai chu bar kara țanga hruksakin a ti chang fal a.

     "Kha inspector khan ka pe lai ngei min man si a, chance ka nei chhe viau ang em?" aw khur deuh dar darin Azuali'n a zawt a. 

     "Nei chhe lo e, eng anga chiang pawhin man mah che sela, an ruahmanna tenawm tak hi ka chhui chhuak dâwn a, anmahni manna hmanrua atan ka hmang let ve dawn a ni. Chumi hunah chuan i chunga hetiang thil an ti hi an inchhir khawp ang!" Peksanga'n a ti nghat a. 

     "Mami, lo tuar hram hram la, Peksangate țhian dun nen theihtawp chhuahin hma kan lo la ang a, i chhuak thei vat mai ang," an sira lo ding Ruatpuia chuan lo ti vein a nau kut chu a humsak vang vang a. 

     "Rokhawmtu vel ziahna paper kha ka zawn nawn leh chiam pawhin ka hmu zo lo. Ka nu almirah-a safe chhûngah khan a awm a nih ka ring a, a kalh tlat bawk si, tihngaihna pawh ka hre lo. Chahbi lah a ak reng zel a, lakna hun remchang a awm thei lo rêng rêng," Azuali'n a u hnena a tih chuan thinur zetin Ruatpuia a insehruh a. 

    "Kan mihringnu chu a va huangtau mah mah ta ve le! Saw in leh lo saw neih tumin eng anga nasa pawhin bei mah se ka dang zel dawn a ni ringawt! Sawtiang mihring kutah sawn ka nu leh pate lo din dun in saw a awm tur a ni lo," thinur zetin Ruatpuia'n a ti nghat nghat a. 

    "Helai hmuna ka lo kal leh hunah ka rualin i haw ve ang. I mal lo tih hria la, i tan ka awm reng tih theihnghilh ngai bawk suh," Peksanga'n Azuali hnena a jacket pek pahin a ti a, tim daiin a lo ban a. 

     "Tlem tal muthilh lo tum ang che. Chuti lo chu i chau lutuk palh ang," Peksanga bawkin a ti leh a, Azuali kut chu lain a hum vang vang a. 

     Police station an thlen khan zinglam dar 2:00 a hnai thuak tawh a, OC an biak vel chhung khan hun a lo kal ve nual a, tunah phei chuan khua a var titih der tawh nghe nghe. Tlem tal muhil se an duh avangin Azuali chu an kalsan a, Peksanga leh Lahriata chu haw nghalin Ruatpuia erawh station kawta țhutthlengah chuan a țhu hmiah thung. Peksanga'n a rilru tur hrethiamin haw turin a sawm lui duh lo a, ani pawhin a nu leh pate hnenah thil awmdan sawi duh ni lo se haw lova awm tlang mai chu a duh dan a ni ve tho a ni. 

      Mu turin hrilh mah se Azuali tan chu lai hmuna muthilh tum chu thil harsa tak a ni. Khua a var a, ni a rawn chhuak a, hun chu kal chak lo tiin nidang zawng aia muang ni mai hian a hre hial a ni. 

     Peksanga'n a rawn bail chhuak meuh chuan chawhnu her a ni der tawh a, zan lama a muthilh loh bakah zing lamah thil a ei mumal loh avangin a chau ngawih ngawih a, a thinlung chhungril nâ-in a vaw chau bawk nen a hawi harh peih ngang lo a ni. 

     Duhsakin Peksanga nu-in eitur tui țha țha a siamsak a, a u Ruatpuia'n va pe-in theih anga tam ei turin an innawr a. A ka-ah lut mah se lem harsa a ti tlat mai si, Peksanga nu zahawm ti viau chungin a ei lui thei ngang lo a ni. 

    

     Peksanga te ina a vawikhat luhna a ni a, a luh dan lah tu hmeichhia mahin an ngaihzawngte ina an kal hmasak ber țuma thlenga tan an duh hauh loh tur angin a ni! A zak a, zahin awmzia a nei hauh si lo. Tlawmah la viau mah se an unau buaipuitu ber Peksanga thu chu hnial thei dinhmunah an ding lo a, zaha lakin awmzia a nei hek lo.

     A pa pianpui hmeichhe pahnihte an boral tawh a, a pa a boral ve tàk hnu phei kha chuan an inhmu ngai lo mai ni lovin phone hmanga inbiak takngial pawh an nei zui ta lo. A nu lama an chhungte lah, a thisen zawmpui te ho Aizawla awm an awm lo a, pur tur leh han pan mai tur an haihchham rih tlat a ni.

     Peksanga nu-in duat takin a lo dawngsawng a, inbualtirin thil a ei luihtir bawk. Inthlahrung hauh lova awm tura hrilhin a mutna tur room-ah a hruai lut a, inngaihtuah hah lova chawl hahdam tura hrilhin a chhuahsan a, a beisei loh zetin a mu tui ta phian lehnghal. A harh leh meuh chuan khua pawh a thim hnai tawh viau nghe nghe.

     Khum ațanga tho chhuakin bathroom-ah a inphihfai a, darthalanga a hmel lo lang chu lungawi lo zetin a en reng a. 

     A hmai chu a dângin a lang thù hle a, a mit khur thuk ta deuh leh a hnuai lo val deuh kalh chu a mut mumal loh vang a ni tih a hre thiam mai a. Hmel lan dana buai hman a ni lo tih hriain a rilru chuan a'n inhau leh rih thul. A hma lamah eng nge thleng dawn tih hriat a ni lo a, a chhe ber thleng thei tura rilru lo puahchah chu a tih tur niin a hre bawk. 

     Eng pawh thleng se huaisen taka hmachhawna a dikna humhalh chu a tih tur a ni a, an chenna in chungchangah pawh fim taka engkim ngaihtuaha an chan ti chhe thei zawnga chet lak miah loh chu a tum dan a ni. Tunah thil awm dan hetiang teh nuai hi ni rih mah se huaisen taka an beih let chuan a tawpah hnehna an chan ngei a beisei tlat a, suahsual rawng bawla râwng taka an che te a nih loh chuan a nuhrawn leh a fate tan hnutchhiah a tum lo bur mai a ni. 

     Peksanga'n ina a hruai haw hnu khan a case khawihlai pakhat hearing neih ni a nih avangin țhut pawh țhu khawmuang ve hman lovin court lamah a letsan leh kha a ni a, Zanriah ei hma hretin a lo haw leh ta chauh a. A u Ruatpuia'n a țhianpa nena an in luah lamah a hawsan tawh naa Peksanga naute pahnih, Nautei leh Mapuia te chuan an be seuh seuh reng a, inthlahrung leh zum lutuk lovin a awm theih phah ta hlauh a, a lawm ru viau mai. 

     A nu chu fel viau mah se an vawikhat inhmuhna te a ni bawk nen a bia a nih loh chuan a be hmasa hreh deuh tlat a, nu fel tak a nih avangin a zah lohna tur tawka tih dan a lo thiam hlauh zawk a. Chuti ni lo se hrehawm a tih viau a ring a ni. Nautei te unau pawh a nu-in Azuali kawm hlim tura a tih avangin thuawih takin, tunhmaa lo hre sa tawh ang maia nelin an be bawrh bawrh a, Mapuia phei chuan a homework te a zawt a, an la nau deuh naa an kawm theih ve hle a ni.

     Peksanga pa chu a țawng tam lo bawk a, a zah ru zual hle. Țawngkam hnih khat bakin a be lo a, Azuali tana inthlahrunna thamin a țawng tlem a ni. Ruihhlo vanga man ni si, an fapa-in an in chhunga a hruai lut ta mai chu a lawm lutuk lo a nih a ring ve tawp a, nuam lo a ti ru viau nghe nghe.

     "I pa hi a zahawm e! Hmeichhe khawlo deuh angah min ngai awm si a, ka zah ru riau, ka inthlahrung ru tlat!" Azuali'n a ti niah niah a, Peksanga'n a lu a lo thing nar nar thung.

     A nu-in inchung zawlah greenhouse a siam a, greenhouse pawn velah pawh pangpar chi hrang hrang a khawi nual a, a mawi hlawm hle. Thir țhutthleng an dahah chuan inngheng riala țhu dunin an titi a, Azuali'n a insitna thu a sawi apiangin Peksanga'n a lo hnial thla zat zat thung.

     "A țawng tam lo a, a rilru erawh a chhe hran lo. A duh dan ni lo se kan in chhûngah ka hruai lut ngam lovang che. Inthlahrun phahna atan hmang suh," Azuali kut hmet vang vang pahin a ti a.

     "Hetia awm ve ringawt chu zahthlak ka ti hrim hrim. Ka u hi a țhianpa nena in luah dun tawh lovin kan pahniha luah dun tur ngaihtuah ila ka lo ti deuh a."

      "Ka hmuh phak loh leh ka ven phak lohna che hmunah ka kaltir dawn lo che!" Peksanga'n a ti nghat a.

     "Hmun danga ka awm chuan min vengin min ngaihsak tawh dawn lo tihna em ni?" Azuali'n a lo ti ve thung.

     "Chutiang a ni lo. Khawiah pawh awm la, ka ngaihsak reng ang che. Tunah erawh chuan ka bul hnaiha i awm a țul rih."

     "Eng vangin?"

     "I chunga hetiang thil tenawm ti duh hian eng ruahmanna tenawm nge an neih leh dawn hriat a ni lo. Tunah pawh ruahmanna tenawm tak an lo nei r'u leh reng tawh zawk lovang tih pawh a sawi theih loh. Ka buaipui che tih an hria a, i case lak ațanga i fihlim an hlau ru viau maithei a ni," Peksanga'n a tih chuan dik a lo ti ru hle.

     "Mahse, hetia awm ve ringawt..."

     "Hetia awm ve ringawt i duh loh leh inru angin kan awm thei reng alawm!"

     "Chutiang ka duh teuh lo," Azuali'n rang fahranin a lo ti, Peksanga nuih a za ngang mai.

     "Min nei duh lo tihna em ni?" nuihza insum chungin a zawt a.

     "Neih duh loh lam a nih loh chu! Inruk kha ka duh lo alawm. A zahthlak! Chubakah, ka duh lo hrim hrim!" uar zeta Azuali'n a tih leh tàkah chuan Peksanga insum zo lo chu a nui chhuak ta hawk hawk a.

     Chutia a bula Peksanga hlim taka a nui ri hawk hawk chu hriat nuam a ti ngei mai. Thlamuang suai suaiin a inhria a, a awmah a lu nghatin a nui nghawr dat dat chu a ngaithla reng a.

     "I țhianpa kha u Cindy bialpa emaw ka lo tia!"

     "In ina tlangnel taka a luh theihna turin khatianga lem a chan kha a ngai alawm. A hreh viau naa a thawk țha thawkhat chuan ka hria. A bialnu lung a awi loh phah deuh a, an inruk tàk nghe nghe kha," la nui deuh sak sak chungin Peksanga'n a ti a.

     "Awii.. A va'n zia lo! Inruk kher chu a țha lo asin le! Keimahni vang vek!" pawi tih hmel zetin a ti vang vang a.

      "Nangmahni vang vek ni bik lo e, nau a pai a, inru lo thei lovin an awm alawm."

     "A zia lo e!"

     "An pahnih an induh tawn te chuan a țha mai alawm," Peksanga'n a ti awlsam then a, Azuali ngaih dan erawh a ni ve lo.

     "Induh tawn mah se thianghlim taka inneih tluk a awm lo asin le! Kei chu inneih hmaa nau paite hi a țha lo ka ti," a ti niah niah a, duhawm ti lutukin Peksanga'n kuah betin a biangah a fawhsak zeuh a.

     "Inhaw lo ta na nâ nâ chu an induat nasa deuhte pawh a ni ve ang chu. Duhtak te bulah chuan insum a harzia chu i hriat vek tawh kha."

     Kha zan, a thianghlimna Peksanga hnena a hlan țep zan kha a hre chhuak nghal a, zak deuh takin Peksanga awmah a hmai a phum ta daih a.

    "I zak leh tawh elo? Engtin mah kan awm loh kha," Peksanga'n a tih leh chuan a zak zual sauh a, hawi chhuak duh lovin a kun tlat a.

     A khabe-ah chawi dâk luiin a hmuiah lungrun zetin a fawp a, a tirah chhan letna dawng lo mah se a tawp lam erawh a lungawithlak viau e.

     Mapuia'n a rawn auh tàkah chuan inhnuai lamah an chhuk thla ve ta a, sitting room-a Sangpuii lo țhu a hmuh chuan midang awm ve theihnghilhin a ngaihzia a sawi chul a, an lo en deuh țhap tih a hmuh chuan tim leh deuhin a ngawi ta reng a. A awm dan naupangchhia lutuk a hmuhin Peksanga pa a nui suk a, a nui hmel chu a nupui bakin an hmu lem lo thung.

     Sangpuii leh Peksanga nu an titi bawrh bawrh a, Azuali erawh an bia a nih loh chuan a țawng leh tawh lo. Amah hnaih lutuka Peksanga țhu chu a duh lo ru hle a, a nu leh pa an awm ve reng laia chutianga țhut dun chu a zakin nuam lo a ti ru viau a ni. A awm dan chu Peksanga'n hrethiamin a runluih emaw tih mai turin a nek hnai sauh sauh a, tawlh hla deuh tura a mitmei chu a haider hmiah bawk.

     Sangpuii'n haw a tum chiah tihin Freddy a lo lut ve nawlh a, chhun lamah Lalhriata ke an țhuina lamah țawiawmin engkim a hre ve tawh a, a tira țanga hrilh a ni ve lo erawh a vui leh hram pek. Azuali nen an vawikhat inhmuhna tih lang lek lovin fiamthu nen a be vel a, a laih nasat poh leh Freddy'n nuam a ti ting mai si, rei tak lo inkawm ho tawh ang maiin Freddy lo thlen chin chu an ri dar dar reng a, boruak a rawn ti nuam phian mai.

     "Mo lawm tuma lo kal ka ni a, mo anga zawngin in lo inkawl leh tawp si lo. In khata in awm dun tawh thote chuan inru ve nghal law law mai ula, mi tih loh dan pawh a ni hleinem," Azuali melh zauh pahin a ti a.

     "Mi tih dan a nih vang maia a țha leh țha lo thliar miah lova kan tih ve zelte chuan khawvel a țawp lutuk ang asin! Nupui pasal kan innei dawn a nih chuan thianghlim taka inneih a hlu ber a, nupa nun pawh a hlawhtling nge nge țhin," Peksanga nu-in a lo ti khauh a. 

     Upa zawk a nih

vang leh thutak deuha a lo chhan avangin Freddy pawh chuan fiamthu lam bansanin dik a tih thu a lo sawi ve luam a.

     Sangpuii chu Freddy rualin a haw a, Azuali a mutna room lam pana a kal chu Peksanga chuan a zui ve zat a.

     "Mama, zui luh ve i tum ngawt elo?" tiin a nu'n a au zui a.

     "Ka mangțha ang chu ka ti!"

     "Khalai ațang khan a inmangțha theih tho alawm."

     "Ka nu..."

     Tunah tak hi chuan Advocate lar, pa leh chhe lo zet, hmeichhe ngaihzawn rawn kha ni lovin, nute bula rawlthar pangchang tak ni mai awm a ni.

     "A fala in awm dun tam loh a la him ber rih. In tum rêng vang ni lovin chetsual palh awm thei a ni a, in inven thiam a pawimawh dawn a ni. Kan ring tawk che a, chuvanga i pa nen pawh Azuali i lo hruai haw hi remti kan ni. Kan rin ang ngei chea i awm ka beisei bawk," a nu'n a tih leh tàkah chuan hnial lovin a bu ta nghat a.

     A rilru tak chuan mangțha-na atan Azuali hmuia fawh leh vang vang a chak a, chumi avanga a room lama zui luh tum pawh a ni rêng a. A nu thu zawm loh a hreh si, phur lo zetin a room lam a pan ta ngawt a.

     A room a luh rualin a phun hluk a, bathroom-ah lutin a insilfai zawh chuan a inthlak nghal a, a tukkhuma kut suihin khumah mu zangthal ar ar a.

     Azuali'n a room pawna Peksanga te nufa inbe thawm kha a ngaithla reng a, a zah rualin a nuih erawh a za ru hle. Peksanga, mahni thu duh leh inla pa ve tak, midang thu hnuaia kun mai mai ngai lovin a nu thu hnial ngam lova a lai vel khan a nuih a ti zain a hlimpui ngei mai.

     Nui var varin bathroom-ah a lut a, a hmaite a phih zawh hnu chuan a mu ta nghal a. A phone, Peksanga'n a hnutchhiah kha a ken chhuah ngam loh avangin a mattress hnuaiah a dah daih a, khawih tur neih loh chu a khawharthlak viau mai. 

     Chawhnu lama a muthilh nual avang khan a mut lah chu a chhuak der si lo, a lungchhe zawng leh rilru na thei tur zawnga inngaihtuah a hlauh avangin a rilru hman vak a duh bawk si lo nen lehkhabu chhiar tur tal awm se tiin a mutna room chhung chu a melh kual a.

     A mutna veilam sir deuha bang kil nghenga almirah chu pan pheiin a hawng a, a beisei ang ngeiin lehkhabu pawh a lo awm ngei e. Mahse, a chhiar duh zawng a lo awm hauh lo a, a'n en kual ngial pawhin a chhiar duh chi a hmu ngang lo a, beidawng zetin almirah kawngkhar chu a khar a. 

     Chhiar tur a hmu lo pawh chu a demawm hran lo, mathematics leh science bu hrang hrang, chhah tak takte chu a tuimi tan lo chuan chhiar peihawm dawn hek lo le!

     Khum lama let leh tuma a inher rual chiahin thil a su dawt a, a au deuh țhat nghe nghe. Rang lutuka rawn kuah bet vatin bengchheng lo tura hrilhin a hmuiah a kutzungchal a dah nghal zat bawk.

     "Eng nge i rawn tih dawn?" a ti sa sa a. 

     Kun hniamin, "Hei hi..." tih leh a hmuia fawh a rual a. 

     "He thil hi ka ti lo a nih chuan ka muhil thei dawn lo a," ti leh supin duhthawh zetin a fawp leh zat a. 

     Azuali pawhin a theih tawka uarin a lo chhang let ve thuai a, inthlahlel tawn taka inkuah chial chungin an infawp a, an hmui an lak hran hnu chuan hnai zeta inmelh chungin an thaw dun hle hle a. 

 

(Mipa emaw min lo ti zawng kha ka hmuh hunah che u ka kung fuat fuat vek dawn che u😂😂)