PEKSANGA 8

 PEKSANGA 8

Sbk Pachuau

     Ka kal a beisei miah lo tih min hmuh tirha a hmel awm dan ațang chuan ka hre mai a, a room chhunga ka pen luh rualin min pan hnai nghal vat bawk.

     "Ka chau a ni. Ka tuar theih loh chin a thleng mai dawnin ka hria! Țawngkam chhe tak tak leh na thei ang bera min țawng khum hi chuan ka puak keh lo chauh zel a, ka insum zo lo mai ang tih ka hlau țhin," ka âwma bei tlan chungin a ti sep sep a.

     A dinhmun chu ka hriat thiampui hle. Ani ang hmelchhe la naupang ve tak tan chuan tawrh zawh a har țhin dawn lutuk! A chhelin a tum a ruh êm a, chu chuan dawh theihna a la pe mai chauh zawk a ni.

    "I tawrhna hi a tawp țep tawh. A thlawnin i tuar dawn lo tih kha theihnghilh lo la, chu chuan i rilru lo ti chak hram hram ang che."

     "Ka ute pahnih khan min ringhlel tlat a, na tak taka min țawng khum mai bakah min vau reng bawk. Ka chak tawk lohna a lo lang leh lek lek țhin. Ka hlauthawng a, ka inthup seng lovang tih hlauhnain ka khat leh thut țhin."

     Nghet zetin ka kuah bet a, eng lai pawha ka bula awmtira venhim ka chakzia chu ka sawi fiah thiam lo hial zawk ang. Mihring zahngaihna nei lo lutuk, rilru țha pu hauh lo bula awmtir reng chu ka phal lo a, ka ngaihtuah takzet a ni. Ka ngaihtuah avanga han lak chhuah ngawt erawh thil tih chi a la ni rih si lo, thla a muang lo ru reng mai a ni.

     "Kha police kha a lo kal leh a, khapa vang khan min ringhlel zual vek niin ka hria. A fin hmel si, a phakar hmel bawk si, suma lei theih mai mai khawpa a hnaa rinawm lo a la ni zui. Ka ten lutuk ringawt!" Ka kut khal nep nep pahin a ti leh a.

     "Hlau miah lo la, a hmuhah zam deuh angin awm miah loh bawk tur. I theih anga tam an thusawi hriat lo tum zel la, an rinhlelh theih dan tur chea awm loh hram i tum dawn nia."

     A lu bu nghauhin min en a, a mitmeng pawi sawi lo lutuk leh a hmel ngaihno bei zet chu ka mitthlaah a châm leh reng dawn tih ka chiang a ni! Kun hniamin a hmuiah tak ka fawp a, chhanna pawh ka dawng țha viau e.

     A tuk tlai lama ka pa piancham lawmna chu ka nu duhthusam ang takin a hlimawm hle. Ka pa pawh hetianga piancham lawm lam hi a ngaihsan loh tehreng nen, a beisei hauh lova ka nu thil tih chuan a ti hlim takzet a ni tih hriat takin a nui ve huah huah reng a, kan vaiin hun hlimawm tak kan hmang a ni.

     Doctor-te sawi ang khan hmun danga a lo țai darh hman loh avangin ka pa chu a dam țha leh ta hle a, amah pawh a la in-fit țhain kha a natna khan a taksaah harsatna lian êm êm a thlen lo bawk nen a viak pawh a la țha viau mai.  Kan lo thlaphangin a natna hming hrim hrim kha a ngainatawm lo êm a, chutia cancer laka fihlim nia kan inhriat takah chuan rilru chhungril a thawl huai thei a ni.

     Shillong lama a nu leh pate zin hruai tura anpa a zin daih avangin ka ute nufa leh Sangpuii chu ka thlah a, zan a la rei lutuk lo naa hna tlem khawih tur ka neih avangin leng tura min sawmna chu ka hnial a, ka let leh ta nghal a.

     In ka thlen leh chuan ka niteho leh ka nu unauteho lo la awmin an lo la titi tui hlawm viau mai. An bula reilote ka țhut khawmuan hnu chuan tih tur ka neih thu sawiin ka room lamah ka chhohsan ta hlawm a.

     Vawiin lama ka case neih thar kha rilru sen a ngai ve dawn riau a nih hmel a, theih ang anga zir chian ka duh avangin ka laptop chu ka țhutchilh ran a. Ka thil tihah rilru ka pek êm avang chuan ka phone rawn ri pawh chu hun lo tiin ka phun hluk nghe nghe.

     "Hnaah kan buai viau a nih pawhin țhiante hi chu thlauh thlak kher loh tur a nia," ka lak rualin Freddy'n a rawn ti nghal lawng lawng a.

     "Ka thlauhthlak pawh ka lo hre hleinem."

     "Kan tel lova i tlei lutuk te, min biak pawh tum miah lova hei leh chen i awm thei hi keini chuan inthlauh thlaknaah kan ngai," a rawn ti leh nghat nghat a, a thinrim tak tak lo tih erawh ka hre chiang viau. 

     "Aw le, ka thiam loh a ni e. Chuan, a reh ve vang vang hnua min rawn betu hian eng thil pawimawh nge sawi tur a neih chu lo ngaithla ila," ka tih chuan a rawn nui chhuak ta hawk hawk a.

     "Kan Lalhriata hian nupui min neih khalh a tum a nia! Nizanah an inhruai haw a, naktuk zan chu kan va lawmpui ve dawn em ni ang?"

     "Rin aiin an va ti hma leh si ve!"

     "Nia, Sangtei kha a rai alawm maw le!"

     Ka lo chek hluk ringawt.

     "Naktuk zan chu i hman ang em?" a rawn tih zawm leh zat a.

     "Ka hre lo le. Tunlai chu ka buai riau a."

     "Buai loh lai tak tak i nei lo. Kal tur chuan lo inring la a nih chu!" a rawn ti leh hluai a. 

     A hmel awm dan tur mitthla-in ka nui sak a, ka hnial duh ta lo. Hnial mah ila awmzia a awm dawn lo tih hre chiang berte zinga mi ka ni ve tlat.

     Kan inbiak zawh chuan phone chu dah leh nghal mai ka tum a, message lo lut chu ka en leh ta zawk a.

     'Zanin dar 11:30-ah bungrua kan deliver dawn, u Remruata nen.' tih hi Azuali hnen ațangin a lo thleng a, a tawi naa a chiang viau thung.

     Dar zat ka en vat a, zan dar 10:35 chiah a ni. A awmzia chu darkar khat vel hun ka nei tihna!

     Ruatpuia ka call a, thil awmdan tlangpui leh chet lak dan tur ka hrilh thuak thuak hnuah mipakhat dang ka call leh zat a, ani pawh rei be lovin ka dah a, ka insiam ta nghal a.

     Ka chhungte hriat loh turin ka chhuak a, an hria a nih ngat chuan min ngaihtuah lutuk dawn a, ka nu phei chuan kal lo turin min duh leh hial maithei a ni. Ruatpuia lam kualin an in awmna lam panin kan tlan thla zui a.

     Azuali an kalna tur veng ka zawh chu a la rawn chhang lo a, ka message pawh a la hmu lo hrim hrim bawk. Rawn sawi lo mah se kan zui ru dawn tho a, kan duh ang ngeia chet lak theih chu ka inring hle.

     Kan beisei loh thil a thleng ta tlat mai! Azuali leh Remruata chu a hran ve ve-in an rawn tlan chhuak a, rawn inphur chhuak mai tura kan ngaih laia chutia a hran khera an rawn kal chu ka ngaih a țha ta hlek lo. Eng ruahmanna emaw tak an siam ngei tih ang tih ka ring a, fimkhur thei tawpa kan chet a ngai dawn a ni.

     An hnung deuhah zuiin min rinhlelh lohna turin ka hnaih duh vak lo. Remruata hnungah Azuali a tlan ve zel a, a hnung zawka Azuali tlan chu kan țan chance a țhat phah a, a zia viau. Kawng peng awmna apiangah a lo tlan muang deuh zel a, kan hnaih lutuk ngam loh avangin inhloh palh theih a ni tlat a, chu chu min rawn venpui a ni ber.

     Ramhlun kan thleng a, Azuali nena kan inkarah bike pakhat a rawn tla zep ta a. Tu nge a nih ka hriat avangin kan kara a rawn tlan chu pawi ka ti lem lo. Azuali'n a hre ve si lo a, a lo buai phah mai ang tih erawh ka vengthawng tel tho mai.

     Bawngkawn kan thlenin thil awmdan a danglam ta tlat mai! Remruata chuan Azuali chu a hmaah a tlantir ta daih a, duh anga hnaih ngam a ni ta lo. Khatia Azuali Remruata'n a hmaa a tlantir vel lai khan han din khawmuan ve mai a rem si lo a, kan hmaa bike tlan chuan a tlan pel ta ringawt kha a ni a, ka hmu phak tawh lo naa ka ngaihtuah lem lo. Remruatna fel tak nei tur khawpa thluak nei țha kha a ni miau a, chet lak dan tur a rawn hre leh mai turah ka ngai.

     Țhuampuiah tlan pheiin Zuangtui lamah an peng ta a, ka rin aiin kan tlan thui ta phian mai. A tawpah chuan DOEACC building piah kawngpui zau laiah chuan an lo ding ta hram a, an dinna bul hnaia din ve chu thil tih chi a nih loh avangin a piah kawngkawi lang lo chinah dingin ke-in kan let phei leh ta zawk a.

     Engin a chhun phak loh chinah dingin an che vel chu kan thlir a, Remruata'n eng emaw sawi mawlh mawlh chungin bawm pakhat a pe a. A pekna hmun tur inkawhhmuh tih hriat takin thlang lam chu a kawk a, Azuali chuan a hmu thiam tih a lu buk nghauh danah a hriat a, thlang lam building kara step-ah chuan a chhuk ta nghal a.

     Ka duh dan leh beisei anga thil a kal ta tlat lo chu rilru a buai ta map mai. Remruata zawk chu 'thil' petu zawk tura kan lo rin a ni a, țum dangah pawh a tel ve chuan amah hlirin a pek țhin avangin chutiang chu ni leh turah kan lo ngai kha a ni a. A pekna te nen an inhlan lai vel nangching thei chiah turin rem pawh kan ruat nghe nghe a ni.

     Tunah kan tum loh dan deuhin chu thil ti tur chuan Azuali zawk a kaltir ta tlat a, kan lo tum ruk dan a tlawlh ta rih phawt chu a nia. Chumi piah lamah ka țhianpa kha a rawn thleng ve mai turah ka ngai a, a la reh vang vang mai si. Ani tel lo kha chuan keini pahnih ringawt tan lo man ve ngawt chu thil tih chi a ni dawn si lo, engtia chet lak tur nge tih pawh hriat thiam a har ta.

     Azuali a liam thla chiah a, Remruata'n a phone phawrhin tu emaw a be nghal zat a.

     "A lo kal chiah e."

     Lehlama mi thusawi a ngaihthlak leh vang vang hnu chuan, "Aw le," tiin a phone chu a dah a, zawi muangin Azuali kal thlakna lamah chuan a chhuk ve ta a.

     Ruatpuia nen chuan ngawi rengin kan zui ve nghal a, rilru a nuam tawh lo takzet a ni. Thil țha lo tak a thleng nge dawn niin ka hria a, ngaih a țha thei tawh ngang lo.

     Ka kekawr iptea ka phone rawn vibrate chu phawrhin ka en vat a, ka țhianpa kha a ni tih ka hmuh rualin ka chhang nghal thuai a. 

     "Hmanhmawh lutukin tlan thla la, Azuali kha zu dang rawh!"

      A sawi zawh rualin ka dawk thla nghal zawk a, Ruatpuia mak ti 'eh' thawm ka hre hman țawk a ni. Ka hmaa muang chânga kal thla Remruata chu ka tlan pel thla rawk rawk a, eng awm lohna lai niin a thim deuh a, tu nge ka nih a hriat ka ring lo.

     Step tawpah kawng peng pahnih a lo awm a, khawi zawka kal tur nge hre lovin ka inkhap buai hle. Remruata kha rawn chhuk tawh lovin ka dinna veilam piah deuh chu a thlir vung vung a, a phone chu lek kangin a hmui bulah a la chho a.

     "A thleng tawh e," tiin a  phone chu a la thla leh nghal a, a hawina lam a la sawn eih lo thung.

     Ka ngaihtuahna chu harh zawkin Remruata hawina lam pan chuan ka tlan phei nghal a, step tawitê lo awm leh chu zawh thlain a piah lawka in țha lo angreng tak kawta mi panga vel lo ding ka hmuh rualin ka pen tawp chawt a.

     Azuali hrilhhai lutuk hmel ka hmuh chuan an awmna lam pan chuan ka pen leh nghal a, pen hnih pawh ka pen hman hmain ka bul thim deuh ațang chuan min rawn pawt lâwp a, ka tum loh lam daiha min lo pawh pen takah chuan kat nawkin min pawttu chu ka bawhthlu țhelh lehnghal.

     "Inlan loh a țha zawk ang," Lalhriata'n a ti sup a, kal luih ka tum ta bik lo.

     Mahse, Azuali kuta kutkawl an buntir ka hmuh chuan ka sa zak a, che leh phatin ka țhianpa min dawmna chu ka vai thla a.

     "I va inlan a nih chuan Azuali tan sawn a pawi viau dawn a ni."

     Lalhriata thil sawi ka hriat rualin ka pen tawp chawt a, ka kut hum ruh ngawt ngawtin ka ding ngawi ta reng a. Ka ding fel deuh chauh tihah Ruatsanga'n hmanhmawh zetin kan dinna chu a rawn tlan pel a. 

    "Eng vanga ka farnu kha man ngawt nge in nih?" a thinur aw chu hlauhthawnna nen a inpawlh a. 

     "Ruihhlo hralh chungchangah kan rinhlelhna a rei tawh. Tunah kan châng fuh hlauh a, kan man thei hi Sir remhriatna vang liau liau hi a ni," constable pakhatin a lo ti vat a, a piah maia Police Inspector ding chu a melh pah zauh bawk. 

     Chu Inspector hmel chapo lutuk tak mai chu hnek chawrh mai ka chak takzet a, theih phei chu ni se thah hial a ni ka duh ni! Eng ang ruahmanna tenawm pawh neiin hlawhtling sawmsarih rawh se, a let leh chu an tuar na dawn lutuk tlat! Zanin hian chiang takin min tlan khalh a, kan ruahmanna chu awmze nei lovah chantirin an ruahmanna tenawm tak hmangin Azuali an man ta chu a ni a, an chan erawh a țha rei hauh lo ang. Ka theih tawpin an tawrh ve ngeina turin hma ka la ang a, himin an chhuak tur a ni lo. 

     "In awmna ngaiah khan awm ula, an hmuh lohna tur che uin fimkhur rawh u," Lalhriata'n a phone-ah tu emaw a bia a, keiin thinlung pik lutuk chungin Azuali an hruai chho lai chu ka lo thlir reng thung. 

     Thawh lawka a mantute chu han beih mai ka duh ut ut a, thil thui zawk thlirin chutia chet chu a țha ber lo tih ka hriatna chuan min khap dai a ni ber. Kan chhukna lam lovah khan kawng a lo awm chho tho a, chutah chuan an hruai chho ta zel a. Chu lai hmun ațanga a lo kal vang chuan Lalhriata pawh kha ka lo hmu lo a lo ni.

    Ruatpuia'n zui chhoh ve zel a tum chu Lalhriata chuan a ko peng ta zawk a, kan bul a lo thlen chuan a rilru a pik ve hle a ni tih hriat takin a thaw halh halh a, hnemna'n a darah nghet takin ka lo vuan vat a.

     Kawngpui lam pana chhoh kan han tum tàkah chuan Lalhriata kal bai saih saih chu ka hmu ta a, eng awmna zawn kan thlena a ke ka'n en chian chuan a thi nasa mai a. Ka bandana ah chu phawrh vatin ka thiam ang tawkin a thi chhuak ti reh thei turin ka tuam a, hmanhmawh viau mah ila tih ngaihna dang awm hek lo, muang changin kan inchhawm chho ta bek bek a.

     Țhianpa Lalhriata hi Police Inspector niin district dangah a awm reng țhin a, thla hmasa lawk ațang khan Aizawlah transfer niin phaiah a nu inentir hruaia a kal leh daih avangin joining report a pek hnu lawkah chawlh a la nghal a ni.

     Zanina Azuali mantu Inspector pawh kha Aizawl mi tho a ni naa district danga awm ve reng țhin a ni a, Lalhriata te an transfer rual khan ani pawh transfer order chhuakin Aizawlah a rawn awm ve ta chauh a ni.

     Pi Siami an man hnu lawk ațang khan he Inspector Chhuanga hi Cindy te unau nen an inhnim hnai viau mai a, pi Siami bail-a chhuah phal loh a nih pawh khan bail-a a chhuah theihna turin a buai viau tih kan hre bawk. Amah hi a awmna hlui velah pawh hmingțha lutuk lo, thamna pawh la hreh lo mi, nupui fanau nei reng chunga hmeichhe dang kawp ching mi a ni tih kan hre zui bawk nen kan chik ru hle a. 

     Lalhriata a lo haw chho tih ka hriat rualin ka be vat a, thil awmdan engkim hrilhin min pui turin ka sawm ta tawp a. Cindy ngaizawng derin an in chhûngah a lêng lut ta zeuh zeuh a, Inspector Chhuanga chu a mitmei pah reng bawk. Fimkhur thei ang bera chet lak kan duh avangin Lalhriata tel ve thu hi tumah ka hrilh lo a, Azuali leh Ruatpuia pawh ka hrilh lo. Ruatpuia chuan tu nge a nih a hria a, chu pawh ka țhian a nih ang chauha hria niin tel vena a nei tih erawh a hre lo thung. 

     Khatia Bawngkawn ațanga Remruata te a tlan pelh hnu khan Țhuampui a va thleng a, lo din riha min lo nghah a tum lai takin Inspector Chhuanga te motor a hmu ta a. Zankhat thil thua pan lam inanga an tlan chu mak a ti r'u viau mai. Zuangtui lama an pen tàkah phei chuan ngaihțhat lohna neiin a um zui ve ta vat a. 

     Remruata te dinna thlen hma daihah, kawng sir thim laiah motor ti thim vekin  an ding a, an dinna kan tlan pelh lai khan hmun dang en lova kan hma lam ngawt kan ngaihtuah avangin an motor leh an hnung lawka Lalhriata bike chu kan lo hmu hauh lo a lo ni. Chu lai hmunah chuan an awm renrawn a, Remruata te an thlen phei ve rualin motor ațanga chhukin thlang lam an pan thla ta nghal a. 

     Lalhriata pawh chuan zui ve vatin fimkhur zetin an hnu a chhui thla zel a, vanduaithlak zeta step rualrem lo lai a rah fuh tàkah chuan a petek nawk a. A

thawm hriaa Chhuanga hote zinga pakhat a rawn hawi chuan step sir hnim zingah a tlu hman hlauh a, chuti ni lo se a rawn hmu chiang khawp ang. 

     An liam thlak hma chu che sawn ngam tawh lovin a mu deuh vang vang a, an thawm a reh deuh hnua a tho chhuak tur chu lung nge thing bung tih pawh hriat loh hi a rap buk palh a, a thlang lamah tlem a lum thla leh ta a. A lumna lamah tu emaw fimkhur lo deuh thirchhe paih hriam laiah a ke chu a tai palh leh ta zel a, chuvanga a ke pawh kha hliam a ni. 

     Min chet khalh dan chu ka ngaihtuah chian poh leh ka thin a rim a, ka pik mup mup a, ngaihtuahna fim ka hmang hleithei hauh lo bawk. Lalhriata naute pathum an lo thlen chuan a bike chabi pek pahin an zinga pakhat chu a bike rawn khalh haw mai turin a hrilh a, chumi zana thil thleng chu khawiah mah sawi chhuak lo turin thu a pe nghal zat bawk. 

     "Eng vanga khatiang thil kha ti nge an nih? Eng vangin nge pawisawi lo kha hremna pek an tum?" insum thei lovin car steering wheel chu ka chum nghek a. 

     "An nu ber kha ruihhlo vawrh darh thubuai ațanga a fihlimna turin," Lalhriata'n a lo ti bung nghut a. 

     "Tuna ka tihtur hmasa ber chu Azuali an hruaina station-a kala lak chhuah vat vat a ni," insehruh țeuh chunga tiin motor chu ka ti nung nghal a. 

     "Thil awlsam a ni lo maithei!" Lalhriata'n a lo tih leh chuan ka en vat a, nghenchhan nghengin a lo chhing diar diar a. 

     "Ka la chhuak lo a nih chuan ka hming Peksangzuala

a ni lo ang," ti chang fakin ka tlan chhuak ta nghal a.