PEKSANGA 7

 PEKSANGA 7

Sbk Pachuau

     A mittui luang chu hruksakin a khabe-ah a dawm kang a, duat zeta a hmuia fawhsak zauhin khumah chuan a țhutpui a, a kuahna a thlah chuang lo. Azuali thlâ chu a muang ngawih ngawih a, a u Cindy'n Peksanga nena inkawp anga a lo insawi pawh kha dawt a ni tih a pawm nghet hmiah mai a ni.

     "Kut an thlak leh nasa che em?"

     "Nasa tawh lo e. Pasal min neihtir an tum avangin ka lakah țhat an chhuah ve rih a nih hmel."

     "Pasal min neihsan dawn tihna em ni?"

     Nûr nângin a en chho a, tak runa a lo melh let avang chuan a tim leh deuh a.

     "Nei ila min ti êm?" a zawt let khauh a.

     "Aw..." a lo ti hmiah.

     Mak ti zetin a en a, a rilru a na takzet! A u Cindy khan a lo sawi dik chiah a nih hi! Chhaih kual mai mai atan bak a duh lo a, nuihzat zui atan a lo kawp vel mai mai niin a hria a, a rilru na lutuk chu a bîng mup mup thei hial a ni.

     A kuahna ațanga tal chhuakin a tawlh hlatsan a, piah deuhah chuan a va țhu khawng at a.

     "Chhuak rawh! Heta țang hian chhuak la, vawikhat mah ka hmaah lo lang leh tawh ngai suh!" a ti chang fal a, a aw khur deuh erawh a thup thei ngang lo thung.

     Peksanga nui hawk ri a hria a, a en duh lo lui ve tlat. A rawn țhut hnaih chuan a lo tawlh sawn a, a man beh tàkah chuan a tal ta phat a.

    "Pasal nei turin ka ti che a, i pasal tur ber min tirh bo i tum leh daih bawk si, a buaithlak duh dawn hle mai," nui deuh chunga a tih chuan a tal chu a chawl dat a; mahse, a lungawi lo laklawh tawh a, lungawi leh mai chu a tum bik țhak lo.

     A hnung ațanga rawn kuahin a darah a khabe a nghat a, a tal chhuah hlau ni awm fahranin nghet zetin a kuah a.

    "In inneih hun tur an la rêl fel lo a, hun kan la ngah deuh tihna a ni mai. He mite nufa hi he in ațanga an chhuah theihna turin hma kan lak ve a ngai dawn a, chumi chhung chu i lo tuar leh hram hram a ngai dawn a ni."

     "Chuan, ka pasal neih tur min țhulhtir anga, nangin u Cindy i nei ve thung anga tiraw?" a lo ti el ve sak a.

     Kuah ngheh zual sauh pahin, "Nangmah hi ka nei dawn che. Midangin i taksa an khawih vel tur hi ka duh lo. Ka ta chauh ni turin ka nei dawn che. Harsa deuh mah se hun țha kan nghah a la ngai a, an rinhlelh lohna tur chein i lo awm hram dawn nia," a beng bulah a ti sup sup a, a lo mur uai uai thung.

    A ngawih reng avangin Peksanga bawk chuan,"I tuar peih tawh lo a nih pawhin tunah hian ka hruai haw thei reng che a nia," a ti leh a.

     "Ni lo e, he in hi chhuahsan thei ka la ni lo. Ka tih tur ka tih zawh fel hma chu ka chawl dawn lo. Tunah hian an thuhnuaia kun leh anmahni hlau lutuk angin min ngai a ni maithei, ka thinlung erawh min hnehsak ngai lo ang. He in hi ka u nena kan in a ni a, anni ang mi pamham leh nunrawng lutuk kutah hian eng tikah mah ka dah ngai lo ang," a ti chang fak a.

     Peksanga chuan a rin loh lam daiha chhanna a dawn avang chuan mak a ti viau mai. Hmeichhe chak lo tak anga a lo ngaih kha a lo ni hauh lo! Nek beh leh dan chep ni ang taka lang si khan thil tum fel tak a lo nei ve thlap mai a lo ni a,  ngaihtuahawm êm êm a lo ni rêng rêng lo.

     Mi hnena thil pe tura an tirh chhuah hian eng emaw lai ațang tawh khan rinhlelh rukna a lo nei tawh a, an thil va pek rêng rêng hi a man an dawng ngai lo a, a nu account-ah an transfer mai țhin. Țum khat erawh technical problem vangin transfer an ti thei lo a, a man dawng hmasa lova bungraw pek chu a nuin a duh ngai loh avangin chumi țum chuan a sum faiin an dawng ta a. Chutah chiah chuan thil dik lo a awm ni ngeiin a hria a, khatiang sum tam tham lutuk kha an bungraw va pek nen a han buk tawn țhin a, ni thei ngangin a hre lo a ni.

      Bawm lian lutuk lo, kuta ken leuh leuh tham lekah an pack a, thil hlu leh khawl thil lam ni tur chuan a rit lutuk lem si lo. Chu bakah an bungraw va pekna te rêng rêng hi an fimkhurin mi hmuh loh turin an dah țha vat țhin tih a lo hmu fo bawk nen a rilru chuan thil a chhui ve țan ta a, a nute hriat lohah a mit leh beng a len chho ta viau a lo ni.

     Khumah mu dunin thil awm dan an sawi dun sep sep a, Azuali rilru paukhauhna leh huaisenzia a hriatin Peksanga rilru pawh a dam ta deuh. A hmeichhe duh leh vei êm êm hi a lo dawihzep hauh lo a, ama tawka huaisen tak leh mahni inveng thei tur khawpa fing a ni miau a, thep suai suaina awm tak pawh a ni e.

  

     Kha chen inngai leh inhmuh chakin, inhmu thei si lovin an awm a, chutia a ruka inhmua taksa insi renga awm ta chu an inthlakhlelhna a lo sang bawk nen a khat tawkin an infawp reng a, Azuali pawhin chu hun hlu tak chu a am ru ve hle. 

     Peksanga kut a hlei chho viau; a fawh dan pawh a ril sawtin tum aia thui thlen mai hlauhawm khawpin a che chho țan a, insum pawh a har țan hle. A taksa nel leh mam han mai chu tu mipa tan pawh tawh nuam tak tur a ni miau a, a khawihna apiang a lo dawngsawng țha lutuk chu a ni a buaina! Dang tur a ni tih a inhre naa a rilru leh taksa-in a lo dawnsawn dan a inpersan hle thung.

     A taksaah thawmhnaw mumal a awm tawh lo a, zei taka a sawngbawlna chu nuam ti takin a thiam ang tawkin a lo chhang let ve zel a, an inmamawh tawnna sang tawh lutuk chu tu zawk zawk tan pawh tawpsan mai harsa tak tur a ni tawh. Ngaihtuahna fim an pu thei tawh lo a, an pahniha khawvel siam chawpah thuk taka cheng dunin an pil lo chauh tawh a ni.

     A tak ram thleng tura Peksanga a inbuatsaih lai chuan Azuali ngaihtuahna nu lutuk chu rawn fim deuhin a chunga a rawn bawh tàkah phei chuan a chenna mang ram ațang chuan a let leh ta riai riai a. A taksa han insang mar ta țeuh chu lo hre thuaiin Peksanga chuan inbeng kangin a chhuk en a, an thaw lak a la mumal lo dun ngang mai.

     "Ih... Ka theih ka ring lo," aw khur dar darin a ti sep a, a ri chhuak chang chang a ni ber e.

     "A pawi lo," a chung ațanga leh thlak pahin a lo ti thuai a.

     "I thin a rim..."

     Alamah pawt hnaiin a awmah a kuah bet a,"Thinrim lo e. A hun takah min dang lo la chuan ka insum thei dawn si lo a, a hnua i inchhir lehna tur siamsak lo tur chea min dang kha a țha zawk," tiin a hnem a.

     "Tlem tal i muthilh loh chuan i chau lutuk ang, muthilh tum tawh rawh," Peksanga'n a tih chuan thu awih takin a mut chu a chhung ve mai a.

     Zinga a harh chuan Peksanga a lo awm tawh lo a, a khum bul dressing table-ah chuan lehkha them leh phone a lo hnutchhiah a, lehkha zawk chu la kangin a chhiar nghal a.

    'Sim card ka thun sa vek, i mamawh hunah hmang la, fimkhur ang che' tih chiah a lo inziak.

     Phone chu a han en vel a, a number mamawh ang tur chu a lo save sa vek a. A chah ang ngeia fimkhur taka a hman a ngai dawn a ni. Phone a kawl tih an hriat chuan a chhungte'n an laksak leh ngei dawn a, chu thil chu a thlen nawntir duh tawh lo a ni.

     Peksanga message dawn kha a thawn a ni lo a, a u Cindy thil tih ngei a nih an ring mai a. Cindy lakah pawh fimkhur lehzual a ngai dawn tih an hria a, a duhnaah zah a hre si lo, Peksanga pawh fimkhur hle turin a chah ve nasa hle a ni kha. An man chhuak emaw, an thil tum an hria a nih hlauh chuan Azuali tan a pawi thei tlat a ni.

****'

PEKSANGA

     "Ka chunga an thil tih ang kha ka nau chunga a thlen ve hi ka hlauh ber a ni. Inveng viau mah se eng emaw ber hmangin an hrai thei tho a, a inveng seng lovang tih ka hlau a ni," Ruatpuia'n a tih chuan ka bu nghat a, chu thil chu kei pawhin ka hlauhthawn ber a ni ve tlat atin ni.

    "Ei leh in lam buatsaihtu ber a ni saw a himna pakhat a la ni rih a; thil dang, ama siam ni lo chu an kut ațanga ei in miah lo turin ka hrilh a, eng emaw chen chu a la inveng thei turah ka ngai," ka tih chuan hahdam ta deuh ni awm takin a thaw huai a.

     Palai an kal nawn lehnaah a hun tur an ruat fel der tih Azuali'n min hrilh chuan chet lak vat a ngai tih ka hria a, engtianga hma lak tur nge tih chu kan buaina a ni. A theih ang anga inneih hun sawn hlattir dan lo ngaihtuah turin ka hrilh a, chutih chhung chuan ani pawh muang lova a tih tur hmabak hlen vat tura chet a lak a ngai dawn a ni.

     Kha zan, banga lawna a room-a ka luh hnu khan vawi eng emaw zat a bulah ka riak leh tawh a, mipat-hmeichhiatna lama han kal thui vak erawh kan nei ta lo. A hmaa thil thleng avang khan kan inveng tawn a ni ber mai.

     A u-in ruihhlo a nghei thei chu a lawm êm êm a, a ti nawn leh mai ang tih erawh a la hlauthawng ngang mai. Ruatpuia chu ka hre chiang ve thawkhat a, a nghei tlang thei ang tih ka ring hmiah thung. Mi rilru nghet, luhlul tak leh tih tawh vêk vêk chu ti tlut mai chi a ni a, a tal chhuak tawh a nih chuan ruihhlo bawiha a intuk luh leh duh ka ring lo a ni.

     Hna lama indaih lohna a sang chho tial tial a, hunawl ka nei thei ta meuh lo. Ruatpuia chuan theih ang angin a nuhrawnte chet dan a chhui zui reng a, chhunglam ațangin Azuali a țangkai viau bawk. Anni lah kan thil tih an hria emaw tih mai turin an fimkhur tawlh tawlh a, amah maia an tirh chhuah duh loh avangin chet lak mai a har takzet a ni.

     An bungraw sem țhin chu ruihhlo ngei a ni tih kan hre chiang tawh a, mak pawh kan ti lem lo. Lo ni lo ta se mak kan ti viau zawk ngei ang.

     Hektu an awm avangin pi Siami chu ruihhlo zawrh thubuaiah man a ni leh ta a, a hmain man a lo tawk tawh bawk nen thiam chang tawh pawh ni mah se ruihhlo chungchangah bawk man a nih leh avangin tun țum chu a tan insawi fihlim a har ve tawh hle ang. A hektu lahin a hriat chian hmel viau mai si a, an sem kual dan chena a sawi tel vek theih avangin a chungthu ngaihtuah hunah chuan a chan a chhe viau thei dawn tlat a ni.

     Ka office-ah Cindy lo kalin a nu tana ding turin min rawn ngen a, ka lo hnial fithla hmak thung. Khawngaih thla la thei tur ang bera min ngenin a țap pur a, a mittui luang vang chuan ka khawngaih erawh a hlawh phah lo chiang hle. Tu nge a hektu tih a la hriat loh thu leh a hriat hun huna phuba a lak dan turte chu sawiin thiam lohna nei miah lo ang maiin an puhna laka a nu fihlimzia chu a sawi uar hle bawk.

     Lungawi lo tak chunga ka office ațanga a chhuah fel hnu chuan ka phone chu la-in message ka type mawlh mawlh a, ka thawn fel hnu chuan court lama kal turin ka inbuatsaih zui zat a.

 *****

     "Mama, i nu thu min hrilh hi a dik em?" Ka pa chuan chiang zeta min en chungin min zawt a.

     "A dik ka ring!"

     "Hetiang thilah hian i hna kaihhnawih a nih loh chuan  inhnamhnawih lo la ka duh asin! I nu sawi hmangin an nun a rawn hmel si a, an hre chhuak a nih chuan i chhiatna turin eng thil pawh tih hreh an nei hauh lo ang. Mi chhungkaw buainaa lo inrawlh ve hi țul ka ti lo," ka pa chuan a ti leh nghut nghut a.

    "Ka pa, thil awm dan a chin chhuaka i hriat loh vanga min sawisel i nih ka ring a, a kima i hriat hunah chuan min dang bikin ka ring lo."

     "Ni e, a tlangpui chauh tak tak ka hrilh a, kei ai chuan thil nih dan i sawi chiang thei zawk dawn a, i sawi fiah atan ka lo dah tawp a nih kha," Ka nu chuan a lo ti ve vat a.

     Thil nih phung dik tak ka sawi hnu chuan ka pa chu a hmin ve ta viau a, a rilru erawh a la nuam kim zan lo thung. Eng emaw thil țha lo ka chungah a thleng ang tih a hlau a, min ngaihtuah vang a ni tih ka hria a, a rilru put hmang tur ka hriat thiampui khawp mai. Azuali a la hmu ve lo bawk nen eng ang hmeichhia nge tih a la hre ve lo a, a hlauthawng viau pawh chu a demawm lem loh.

     Ka pa hi ka zahin ka ngaisang êm êm a, pa nih a tlinin min enkawl danah demna tur a awm ngai lo. Ka nu kha uire a ni naa a mualpho lo thei ang berin a țhen a, uire a ni tih kha tu vak mahin an hre lo. Kei phei chuan ka tlangval chhuah hnuah ka hre ve chauh a, tuna ka nu nen hian a chhe zawngin a chanchin an sawi ngai lo hrim hrim a ni. Ka u khan hun eng emaw chen chu ka nu(tak) kha a be duh lo a, tuna ka nu hian mahni hringtunu do chu thil țha lo a nih thu leh amah hringtu a nihna anga atana a hlutzia te hrilhin a rilru a hnehsak a, chumi hnu ațang chuan a be leh duh chauh ta kha a ni a. Kan chhungkuaah a rawn inrawlh buai tawh ngai lo bawk nen ngai êm êm lo mah ila kan nu a nihna angin kan ngaihsak zui viau tho a ni.

     Ka nu bulah ka pa hnena thil awmdan lo sawi tura ka tih kha a lo sawi ve ngei a, sawi fiah lutuk lovin ka sawi atan a lo khek zawk a. Ka pa pawhin a hre kimchang lo deuh bawk nen rilru hahna'n a lo hmang ve deuh a lo ni.

     Khunkhan zawkin ka pa nen a study room lamah kan sawi dun leh a, kan han sawi thui zel tàkah chuan Azuali ber chu a ngaihtuah ta riau a. Va hruai chhuaha ral ațanga chet lak mai te chu a rawt titih hial a, thil țha lo tak a chungah a thleng ang tih mawlh chu a hlau a ni ber. Hmeichhe chak tak leh mahni inveng thei tur chi a ni tih ka sawi pawh chuan a chenpui te mizia kan sawi ațang khan a hlauhthawnpui tawp thei lo a ni. 

     A tuk chawhnu lam chu ka awl ve deuh avangin ka nu-in bazarpuia min sawmna chu ka lo 'aw' vat a, naktuk hi ka pa piancham a ni a, ka nu chuan lawmsak ngei a duh si, ka pa hriat loha inbuatsaih a duh avangin keimah kher min sawm a. Ka u pawh a phur berah țangin bazarnaah pawh a lo kal ve a, lei tur lah chu a hre hnem phian mai.

     Kan bazar vel chhung a rei bakah ka u kan thlah kual bawk nen, in kan thlen meuh chuan khua a thim hnai tawh viau mai. Zanriah ei kham veleh kalna tur ka neih thu sawiin ka chhuak leh a, hmanhmawh ru takin ka mi hmuh turin min lo nghahna lam pan chuan ka tlan ta nghal a.

     "Ka rin aiin i lo thleng har a!" Ka din fel rualin a lo ti a.

     "Zanin chu kan tlai deuh alawm le! A zia lo khawp mai. Min lo nghak rei tawh em?" Ka ti ve nghal zat a.

     "Rei lutuk lo e. Kei pawh kan hun tiamah khan ka thleng hman bik lo a," a ti sam et a.

     "Ka sawi ang khan i lo ti ta em?" pehhel kual lovin ka zawt a.

     "Ti e. Thil harsa lutuk a nih ka ring lo. Mahse, an boruakin a vaw chau ve deuh nge a parh harh lo tlat!"

     "A țhat nasat chu. Kha police  Inspector kha i lo mitmei pah reng ang tiraw?" ka tih chuan a lo bu nghauh a.

     Ka nui sak a, palh a awm te a nih loh chuan kan hlawhtlin ngei ka ring a. Ka hma lakna dal thei tur an la awm loh bakah ka inrawlh ve tih an hriat hma chu ka tan chet a awlsam rih dawn a ni.

     Kan ințhen hnu chuan in lama haw lovin Azuali te veng lamah ka tlan thla a, fimkhur taka ka thlithlai hnuah ka lawn fo tawhnaah chuan ka lawn chho leh a, ka ti țhang deuh tawh bawk a, ka hnehsawh hle tawh a ni.

     "Hetiang taka chianga hretu leh hek duhtu tur hi nang lo chu tumah an awm lo! Eng vanga he thil hi ti nge i nih?" vin zeta Cindy țawng ri chu ka hre chiang kher mai.

     "Eng vangin nge ka tih ngawt anga?"

     "Chu chu ka zawt rêng che alawm. Eng vangin nge ka nu chu i report? Sawi vat mai teh!" a au hi a ni ber a.

     "Ka report ngei a ni tih fiahna i nei a nih loh chuan khatin min puh ngawt suh. Hek turin phone ka nei lo tih i hria a, ka chhuak ngai lo tih i hre bawk. Kei lo pawh chiang taka hretu an lo awm ve pawh a ni thei," Azuali'n a ti let ve sak a, a aw-ah zam ri a tel lo.

    "I tih a ni tih ka hriat chhuah hun hun chu i lo piang ve hi i inchhir khawp ang. Ka thlir reng dawn che a nia, i him rei dawn lo," ti leh nghat nghatin room ațang chuan a chhuak a, na zeta kawng khar riin a zui zat bawk.