PEKSANGA 6

 PEKSANGA 6

Sbk Pachuau

      Unau an lo ni reng chu mak ka tih rualin Azuali dinhmun a ralmuang lo a ni tih ka hriatna chuan min țhawng lehzual a, Ruatpuia chu țhu tura hrilh lehin dawhkan bawh chuan a lamah ka awn phei deuh, a thusawi ngaithla turin ka inpeih nghal thlap bawk. 

     "Min hriat angin NALSAR-a kan zirlai kha chuan ruih theih thil eng mah ka khawih ngai lo a, sports lamah ka tuiin ka zirlaiah pawh ka ti chhiat ngai lem loh kha. Țha taka pass chhuakin  Gauhati High Court-ah  BAR enrollment ti tura kan zu kal ho pawh kha i la hriat ka ring. Kha mi țuma enrollment kan ti zo, ID leh certificate vel nghaka Gauhati-a kan la cham banlai khan ka nuhrawn fate pahnih an lo chhuk ve a, ka thlenna hotel-ah an rawn thleng ve nghe nghe."

     Thil awm dan a mitthlaa chhui ni awm takin a chhing vang vang a, keiin ngawi rengin ka lo nghak tawp thung. 

     "An lo kal chhan chhuanlam an siam naa thil tum nei sa rana lo kal an ni tih a hnuah ka hre chhuak a, ka hriat chhuah meuh chuan a tlai tawh si!Nidang zawng aia nelawmin ka bulah an awm a, unau piang hmun ang maia ka laka an han pangchang leh min ngaina tak tak ni awm fahrana an țawngkam țha thlenga ui lova an hman avang chuan rinhlelhna nei lovin ka lo duat ve hle bawk. Zanah ka room-ah lo kal in khua a lum êm avangin beer inpuiah min sawm a, ka lo hnial thung. An pahnih chuan an in a, ka in chak vak lo chung Cindy'n cold drinks min pe a. Lo hnial ila ka chesual lo ni mai tur kha a ni a, an rilru hre hek lo ile min duhsaknaah ngaiin ka in ve mai a. Khatah tak khan ka chesual ta a ni."

     A aw thian kharhin a țhut dan a siam rem a, a sawi zawm leh nghal a. 

    "Ka thil in turah chuan damdawi an lo pawlh chu niin, ka in zawh hnu rei loteah ka awm dan chu a rawn danglam a, thathona mak tak leh phur ruk riauna ka nei ta tlat a. Nuam hi ka'n ti êm êm khawp a, ka thawveng halh mai bawk si. Remruata'n beer min pek te chu hnial hauh lovin ka la a, ka in zo nghal vek mai a ni. Engtikah nge ka muta engtiangin nge ka khawsak zui ka hre tawh lo, ka harh leh chuan ruak vekin Cindy nen khumah kan lo mu dun reng a!"

     Ruah sur a han deuh a, Mafeli chu a duh chuan haw mai tura ka hrilh hnuin Ruatpuia thusawi chu ka ngaihthlak chhunzawm leh a. 

    "Cindy chuan ka tih luih vanga mu dun kan nih thu leh a u ka nih avanga min hnial ngam loh thu a sawi tlat mai a, hnial turin zanlam thil eng mah ka hre tawh bawk si lo, ka rilru a buai takzet a. An kut ațang chuan eng thil mah ei leh in tur lam chi reng reng lak ka tum tawh lo bur mai a ni. 

     Mahse, an thil tum chu an lo ti satliah lo tawp mai! Ka fimkhur tawh êm avangin ka awmna room-a tui ka neih sa bak chu ka in duh ta miah lo a, in tur min pek an tum pawhin hawihawm chhuah duh tawh bik lovin ka hnar ta hmak hmak a. Tuiah lehzel chuan pawlh an nei ang tih ring hek lo i ngaihțha tak chuan ka in mai a. 

     Ka awm dan danglam leh ta chu ka hriat  chhuah meuh chuan bottle khat ka lo in zo der tawh. Cindy'n min han kuah velte chu ka haw ta mang hauh lo a, chumi țum chuan ka hriatlai ngeiin ka mutpui a ni. A hma zana ka mutpui nia a sawi erawh kha chu tunhnu hian dawt a ni tih ka hre tawh a, awmzia erawh a awm tawh lem lo, ka mutpui ta tak tak miau a. 

     Khata țang khan ka nun chu a buai chho țan a, Cindy ka mutpui ringawt mai chu ka inthiam lovin pawi ka ti hle a, amah Cindy lahin vawikhat aia tam mah ka mutpui avangin rai a hlauh thu a lo sawi ve chhen bawk nen rilru mumal ka pu hleithei lo a ni ber mai. Remruata lahin ka rilru piklai chuhin min hnem anga lang siin rilru hah chhawkna atan damdawi hmang mai turin min nawr reng a, damdawi hrim hrim hman ka duh loh avangin a zia deuh zawk tiin zu chu ka in ve ta a. Ka hriat loh erawh chu ka zu in turah pawh damdawi an lo pawlh lehzel tih chu a ni. 

     Tichuan, a tawi zawngin sawi ta mai ila, ka hriat loh karin damdawi addict ka lo ni ta reng a, ka zirlai lam ka hlamchhiah hmak a, All India BAR Examination pawh ka hmachhawn ta lo a nih kha. Ka pa thin ka ti ur hle a, chuta kârah ka lo inthup thiam lo deuh bawk nen ka rui țhin tih chu min man ta vat a, a bengah ka damdawi tih țhin thu fahtu an awm tih ka hre chiang hle bawk.

     Kan in chhûngah thil bo awm hlek se kei, ka pa ngaiha kan chhung zinga damdawi ruih hmang awm chhun chu puh mawh ka ni lo thei ta țhin lo a, ka nau kha mangangin ka lo va han siam ngun tak! Ka tih ni miah lovah puh niin in ațanga hnawh chhuah ka tawk ta hial a, ka pa a la awm avangin ka farnu chu ka ngaihtuah lutuk lem lo. Ka pa khan a duatin a ngaihsak êm êm reng a ni tih ka hre miau a, kan mihring hnaisai lote khan engtin mah an tih ngam ka ring lo a ni.

     Ka pa a boral ta chiah a, ka farnu dinhmun a hlauhawm țan tih ka hria. Ka theih ang angin ka mitmei ve reng a, ka rin ai takin a chungah thil țha lo a thleng har ta zawk a. Mahse, thil țha lo a thleng lo emaw ka tih chhung zawng pawh khan ka nau hian ka hriat hlauvin a lo thup țhin zawk a lo nia, a laka an khawsak țhin dan ka hriat nia ka that vek lo kha an vannei asin!

     Kar hmasa kartir lam khan kan in bul maia awm ka kawm țhin nen kan inhmu a, kan ramhuainu kut a tawrh avanga ka nauvin hliam a tawrh thu leh țhui ngai hial khawpa a tih nat thu ka hria a, ka thinur lutuk insum zo lo chu inah va lutin ka nauvin a tawrh leh dan tur ngaihtuah miah lovin ka va che pek a. Inleng an neih avangin ka duh angin ka che thei ta lo zawk kha a ni a, khang inlengte kha awm lo ta se tual ka va that maiin ka ring a ni.

     Khatia kut an thlak tih ka hria leh ka va luh khung avang khan ka nau chu ka hnena zualko angah ngaiin a țhiante ina a awm chu ko haw a, an sawisa a, pawn lama a chhuah an phalsak tawh hek lo. A phone an laksak hmiah bawk a, khawi hmun emawa tirh chhuah an duh châng chauhin pawn lama a chhuah an phal a, chu pawh en zuitu an awm zel niawm tak a ni."

     "A phone an laksak si chuan chung thil chu engtin nge i hriat theih?" a ngawih lai chuhin ka lo zawt khauh a.

     "Ka thlithlai ru zui reng a, eng emaw chângin an tir chhuak zeuh zeuh țhin tih ka hria, remchang zawnga inhmuhpui dan ka ngaihtuah pah reng bawk. Kar hmasa khan Chanmari lamah an tir leh a, chutah chuan an ina lêng lut reng țhin, an tirhkah ka ti mai, tleirawl pakhat nen an kaltir a. Ka țhianpa bike-a umin biak fal theih dan kawng ka zawng a.

     Chu tleirawl chu damdawi ti ve țhin, a vawrh thleng pawha tih ve țhin a ni a, biak pen dan kan ngaihtuah ta a. An scooty dahna piahah lo dingin an kalna ațanga an lo let leh hun chu kan châng ta tawp a. An lo let leh rualin ka țhianpa chuan a va bekbawr vat a, damdawi lei tur a neih leh neih loh a zawt a ni. Kan dinna hmun chu a ualau deuh avangin hmun fianrial lam an pan a, ka nau chuan ka mitmei hmuin a kalpuipa hnenah a rilțam deuh thu leh a piah lawk restaurant-a lo va inhnawh puar a duh thu a sawi a, chupa pawh chuan rinhlelhna nei lem lovin a lo aw ve mai bawk a.

     Chuta kan inhmuh chhung chuan eng mah zep lova thil awm dan zawng zawng min hrilh vek turin ka ti a, a tirah min hnial deuh dawn a, ka nawr luih tàk tlatah chuan engkim chu a sawi ta vek a. Chutah chuan a ni nangma chungchang pawh ka hriat tak ni. A biak pawhna tur ber che a phone an laksak daih si a, a chhan takngial pawh sawi lova a reh daih avangin hrehawm a ti hle nghe nghe.

     Tunah chuan i lakah beiseina a nei ngam tawh lo. A chhan chu, a chanchin a țha lo lam zawngin i dawng tih a hre miau a, Cindy lahin in inkawp thu leh ani chu i chhaih fiam mai mai tih sawiin a uan khum reng mai bawk a, a tan chuan beisei ngam i ni tawh tlat lo. 

     I hnena lo kala chanchin rawn hrilh che ka tumin a phal lo tlat a, ti buai lo tur chein min ngen hial a ni. Mahse, ka rilru a nuam thei ngang lo a, vawiin khan pasal neihtir an tum tih ka hre leh ta a, a țhiannu Sangpuii bulah kalin a laka i rilru put hmang ka va zawt hmasa tê tê a, ka rawn pan ta tawp che a nih hi!"

     A sawi zawh meuh chuan ka lo inhum ruh nasa hle tawh a, eng tianga hma lak nge țha ber ang tih ngaihtuahin ka rilru-in kil tin a dap nghal bawk.

     Khua a lo thim fel tawh a, hreh hle mah se kan in lama chaw ei tura hruai haw-in chuta țang chuan chet lak dan turte kan la sawi țha leh ang chu.

     Ka hlauhthawn chu a u ang hian damdawi hmangin an hrai ang a, ti lo thei lo dinhmunah an dintir ang tih chu a ni. Chu bakah, mipa țawp tak tak lut chhuak an awm reng si a, a hmeichhiatna an khawih chhiatsak ang tih pawh ka hlau tel tho mai.

     Ruatpuia khan a phone an laksak avanga chanchin eng mah min hrilh thei lo ang khan a sawi a, chuti a nih chuan ka message dawn kha ama rawn thawn a ni lo thei mai ang em? A rawn thawn ni ta se eng mah sawi lova reh daih ang khan a insawi hauh lovang. Thil awmdan chu man chho țanin ka inhria a.

     Chaw ei kham hnu chuan ka room lamah chhohpuiin eng tianga chet lak nge țha ang tih ka sawipui a. In kan thlen tirh khan inbual tirin ka thawmhnaw ka haktir bawk a, a inthlahrung tih ka hria; haider luiin tlangnel taka awm turin ka hrilh a, hmun danga chhuah tum rih lo turin ka hrilh hmiah bawk.

     A farnu vangin damdawi a tih țhin pawh thlah a lo tum ve hle a ni awm a, kar hnih lai a nghei tawh a, a nghei tlang ngei pawh ka ring.

     An in lama kala thil awm dan thlithlai paha len chu ka tum a, Cindy teh hawrh khan min beisei bawk a, biak chhiat hlawh viau turah ka inngai lem lo. Ruatpuia chu ka haw hma lo awm tur leh khawiah mah lo chhuak lo turin ka hrilh a, khawsakna mumal nei lova vak kual mai mai țhin a ni tih ka hria a, lo chawlh hahdam paha ka haw hun nghak thleng turin ka ti a ni. 

     Ka lo rin lawk dan ang chiahin min lo lawm lehpek hle a, ka bulah țhu-in min bialpa chei hmiah hmiah mai a ni. Rei pawh ka la țhu hman lo tihah tlangval pangngai hmel tak pahnih an lo lut ve a, an lo biak țhat viau danah mi mai mai an ni lovang tih ka lo ring thiam mai a.

     "Cindy, i nau chu va ko teh. Hei Zuala te an lo kal hi! Koh nawn ngai lo tur khan rawn kal nghal vat se la aw," Pi Siami'n a ti hlawng hlawng a, Zuala a tih chu pasala neihtir an tum chu a nih ngei ka ring.

     Azuali rawn phei chu ka lo en reng a, a hmela lungngaihna zungzam chu hmuh loh der pawh tum ila a har khawp ang. A hmel dawldang tak leh a hawiher zawiawi lutuk mai te chuan ka thinlung a khawih a, a nuhrawnte nufa za ka huatna chu a rawn nasa zual sauh bawk.

     Ka hmel a hmuh chuan a mitmengah phurna ni awm tak a rawn lang zawk a, rei erawh a ni lo. A nu-in Zuala bula țhu tura a tih chuan a hlat thei ang berin a țhu fel at a, min melh nawn leh tawh lo. Cindy lahin min si chial reng a, min nawk peih lutuk chu ka kham takzet a ni.

     Zuala te țhian dun leh Pi Siami chu inneih chungchang sawiin an phul hlut reng a, Azuali erawh an bia a nih loh chuan a ngawi ngar reng a, an biakna pawh a rul tawk chauhin a chhang a. Cindy'n min be reng naa Azuali ngawt ka ngaihtuah a, han biak fal dan kawng a vangin engtia han tih chi nge ni ang tih chu ka ngaihtuah pah reng bawk.

    A nuin thingpui lum tura a tirh chuan zui ve mai ka tum deuh a; mahse, an rinhlelh loh dan tur bera chet lak a ngaih avangin ka țhulh leh chawpchilh nghal. Thingpui a rawn semlai chuan ka thluak a vir zawk a, tray ațanga thingpui ka lak rual chuan ti palh ni awm takin no chu ka keng lek zauh a, ka kekawrah chuan baw thlain Azuali keah tlem a kai bawk. Ka duh dan ang chiah!

     Cindy te nufa an ri nghal chul a, Azuali hrilhhai hmel chu ka hmuin midang hmuh ve loh turin ka siai zauh a, hrethiam tak maw!

     "Hawh, i kekawr kha bathroom-ah va phelh la, ka lo su anga kan ti ro leh nghal dawn nia," a tih chuan ka hnial vat a.

     "Suk kher a ngai lovang, min buak nasa lutuk lo a, tuiin ka va silfai ang a, a tawk mai ang," tih leh thawh ka rual a.

     Cindy lo tho mek chu enin, "Keimahin ka ti thei ang, lo kal ve duh lo mai rawh. Ani hian bathroom awmna min kawh hmuh se a tawk mai. A kea ka tih buak hi a sil pah ve duh bawk ang a," ka ti a, Azuali ka kawk pah zauh bawk.

     Cindy chu lo kal ve tum lui lovin a țhu leh ta hlauh a, ka thaw huai mai. Azuali nen chuan inzuiin choka lam kan pan dun a. Bathroom awmna min kawhhmuhna kut chu laksakin ka hum vang vang a, ani chuan hlauthawng zetin sitting room lam melh chungin a kut chu lak let a tum a, ka lo hum nghet sauh thung.

     "Hun kan nei tam lo a, ngun deuhin lo ngaithla rawh. I room balcony chhuahna kawngkhar kha kalh lohin lo dah ang che. A hma emaw a tlai emaw zaninah nangmah hmu turin ka rawn kal dawn," ka tih chuan meng phawk lek lekin min melh a.

     "Eng tin..."

     "Ka sawi ang chuan lo ti tawp mai rawh. Tunah inhnial buai hun a ni lo," a kut chu fawhsak zauhin bathroom-ah chuan ka lut ta nghal a. Ka rei chuan Azuali an rinhlelh a hlauhawm tlat! Cindy khan kan inngaizawng tih kha a hre miau a, min rinhlelh lohna tura kan awm a ngai tlat a ni.

     In ka thlenin Ruatpuia chu ka room-a țhutthlengah chuan a lo muhil bawrh bawrh a, kaihthawh loh ka tum zet naa ka awm loh laiin lo harh ta se a bangbo lutuk ang tih ka hlauh avangin ka kaitho leh ta zawk a. Thil awm dan tlangpui hrilhin a room banga lawn chhoh ka tum tih ka sawi chuan a chek tlak a, min huphurhpui tih ka hria; engtin tin emaw ka lawn chho thei mai ang tih erawh kan hre dun ran thung.

     Ka inbuala ka inthlak zawh hnuin ka nu hnenah thil awmdan tlangpui ka hrilh a, a dan pangngai tê-in min hlauhthawnpui leh hle, fimkhur turin min chah mawlh mawlh a. Hei chu ka hriat sa a nia, hrilh loh mai ka tum deuh kha a ni a, eng emaw thleng palh a awm tàkin tih thil thuah ka hrilh leh ta zawk a ni.

******

AZUALI

     Khatia Peksanga hnena eng mah pawh sawi thei lova a awm tàk avang khan a mangang hle a, vawikhat tal hmuh leha a laka a chhungte khawsak dan zawng zawng hrilh te chu a duh takzet a, kawng a kaw rih ngang si lo.

     A rilru hah ti zual turin a nu lahin pasal nei turin a nawr sek a, Zuala hnenah palai lo tir mai turin a lo ti thul. Palai pawh an lo kal ngei a, eng mah inrawnna awm eih lovin a nu chuan ama duh angin thu a lo ti tlu hmiah bawk. Cindy hna dil kha Azuali nen an sawi rem a ni ngat chuan a tling dawn chiang sa tiin Zuala te pafa-in țanfungah an hmang miau a, Zuala chu an tan hnar phal chi a ni mawlh lo a ni.

     A nun beidawng lutuk chuan thih daih maite chu a duh rum rum a, a ngaihtuahna kil khatah a u a awm ve tlat bawk si, chu chuan ngaihtuahna fim a pe leh țhin. Chu bakah, a hminga in leh lo a awm chhung chuan a tan chance la awm vein a hria a, a thih daih si chuan a nuhrawn te chu an lawm dawn lutuk a, chu chu thleng turin a duh lo bawk.

     A rilru natna ti zual turin Cindy lahin Peksanga'n a duh tak tak loh thu leh amah nen an inkawp thu chu sawiin beisei ve tawh hauh lo turin a lo ti ve bawk, a rilru hah dan chu pui tak a ni. 

     Thawpik êm êm leh beidawng ngawih ngawiha a awm laiin beisei loh deuhin zanin khan a rawn lang a, a hmuh ruala a lawmna chu Peksanga bula inti tatu taka a u Cindy lo țhu a hmuh rualin a thlawk bo nghal a. Rilru pik churh chungin Zuala bulah chuan bet lo zetin a țhu ve ta ngawt a.

     A thingpui sem a lak ruala Peksanga'n a ti baw lui chu mak a ti deuh a, hria ang erawh chuan a awm duh miah lo thung. Inbiakna remchang a zawng a nih a ring deuh a, a lo ring dik chiah reng bawk.

     An inlêng te haw hnua a room a panlai te chuan a thin phû chu su dup dupin a hria a, a room-a a luh hnu pawh chuan a la pangngai hlei thei lo. Lo kal tur khan a insawi ngei a, a lo kal tak tak ang em tih erawh a hriat loh tluk zetin ngaihtuah pawh a ngaihtuah țha ngam lo. A room balcony-ah chuan chhuakin a rawn lawn chhohna tur niawma a rin laite chu a thlir a, lo kal tak tak ta se a che sual palh mai ang em tih te ngaihtuahin a rilru a buai kher mai.

     Zan a rei a, zanlai a pel ta hial mai. Thawm eng mah a la awm lo. A khumah a mu meng kar a, a bei pawh a dawng țan tawh. A hrim hrimin a u Cindy nen an inkawp reng a, ani angte chu a rawn ngaihtuah lek lovang tih lo hriatthiam ve mai awm ti te'n a ngaihtuah leh rih țhin. Mahse, Peksanga hmelah khan ti tak tak hmel a lang a, a bum kual duh a ring bik lo a ni.

     A room kawngkhar ri rak thawmah a meng chhuak nghal zawk a, Peksanga lo lut a hmuh chuan tho chhuakin a va pan a, a tum lawk pawh ni miah lovin a awmah a va bei thlawp a, duat zetin a lo kuah bet ve zat a.

     Kha chen a lo dan tawh a mittui chu a biangah a rawn luang thla ngiai ngiai a, lungmuang takin a hmangaih âwmah chuan a bei hle hle a, khawvel dang daiha cheng ni maiin a inhre hial a ni.