PEKSANGA 5

 PEKSANGA 5

Sbk Pachuau

    

     Sangpuii te in a thlen chuan a chal tuamna chuan a thi chu dang zo lovin a hmaiah a luang nasa tawh hle a, a țhiannu-in a lo hmuh chuan țe chul chungin a buaipui sawk sawk a. Zam lamah a mut tlem bakah a thinlung rit lutuk nen a chau ngawih ngawih a, Sangpuii khumah chuan a mu zawi ngiai a, a țhiannu chu a thi put buaipuiin a phe nghal char char a, zawhna a zawt pah mawlh mawlh bawk.

     A țhiannu-in a biakna chu hre ang pawhin a awm lo, a pa a ngai a, a chunga thil thleng a ngaihtuahin a lung a chhia a, a rilru a na ngawih ngawih bawk. Sangpuii phone hmang mawlh mawlh ri chu a hre naa hla taka ri ang mai niin tu nge a biaka eng thil nge a sawi pawh a hre mumal lo.

     A hnu lawka kha Ukil-pa lo thlen tàkah khan a lan dan chu zahthlak ti hle mah se a che châng peih ngang si lo, damdawi in lama kalpui a tum erawh chuan inti pachangin a hnial hram a, awmzia erawh a awm lo hle thung. Damdawi man leh an țhuina man zawng zawng te chu a tumsak vek lehnghal a, nuam lo a tiin a zak ru ve kher mai. Mahse, tih theih dang a nei rih miau si lo. 

     In ațanga a chhuah khan a ngaihtuahna kha a mang vek a, pawisa ken chhuahna chang rêng rêng a lo hre pek lo. Tunah a senso zat kha rul dawn pawh ni se pek tur a nei lo hrim hrim a, a theih hun hmasa bera rulh ngei chu a tum ve fan tho.

    A beisei ngam loh, a thinlung pindan luahtu awm chhun ni si hi duh aiin a hmu ngun ta riau a, a duh loh dan ang hlirin a hmu deuh ziah lehnghal. A tleirawl chhuah hlim ațanga a lo ralkhat ngaihzawn ruk veng veng țhin, ngaihsan tak têa a mihring ngaihsan leh duh a ni naa inhmu tam lo se a ti hle lawi si. Ama dinhmun a hre chiang êm a, Ukil-pa te lah an khawsak a țha-in chhungkaw zahawm leh pangngai tak an ni tih a hre ve kar a, chu chuan hnaih lo turin a dang a ni ber.

     A vawikhatna atana a fawh țum khan  sawi thiam chiah si lohin a taksa chu a za uai uai a, a mur chem chem a nih kha. Mipa-in pangngai taka an fawhna hmasa ber a ni a, a dawngsawng thiam lo a, a dawh mawl tawp mai a ni. 

     Damdawi in lamah te a hruaiin damdawi te a leisak a, a buaipui nasat êm avanga zuam a nih hlauhna chu a rilruah a rawn lut thut a, Peksanga âwmah chuan a theih tawpa nâ-in a nam ta vak a, ani pawhin a thlah ve mai bawk a. 

     An in lama a haw a phalsak lo bur a, amaha thu nei ber ni awm taka a awm chu a ngei rualin eng emaw ti zawng tak chuan nuam a ti ru viau lawi a. A hmel pa leh țha tak mai bakah a mitmeng ngaihzawnawm zet mai chu a lo en leh veng veng țhin a, an mit a intawn fuh palh hlekin a la sawn rang thei hle. 

     Sangpuii u te inneih ni atang khan a lo hre daih tawh a, laklawh deuha a nuin haw tura a rawn phone avangin Peksanga erawh chuan a hmu ve ta lo a ni. A vawikhat hmuhna ațanga a mipa vei awmchhun a ni a, ngaizawngtu leh han be țha deuhtu nei ve neuh neuh mah se rilru han pekna tak a la nei lo hrim hrim a, he Ukil-pa erawh hi chu a vei tawp thei ta lo a ni. 

      A vawihnih fawhna erawh a chhang let ve ta kha a ni a, a bialnu a ni tih a sawi chuan chhungrilah a lawm rualin hlauhthawnna erawh a la nei fan thung. A chhungte a ngaihtuah a, ngaihzawng nei thei dinhmunah dingin a inhre lo a, a hnar phal bawk si lo chuan a ngaihtuahna a ti buai viau nghe nghe. 

     

PEKSANGA 

     Ka u-in min lo call a, Azuali a nuțapa(hrawn)-in a hruai haw tih min hrilh chuan ka insangmar nghal țeuh a, ka ngaihven zui vat a ngai dawn a ni. Ka veng ang tih ka tiam tawh a, venghim zo lo nih ka duh lo. 

     Ka pa an zai hun tur a chiang tawh a, harsatna dang a nei lo bawk nen buaipui chiam ngai a ni lem lo bawk a, a zia phian. Ka hna lama ka buai țhin êm avangin Azuali hmu tur pawhin ka kal hman lo a, pawn lama a chhuah an phalsak tawh bawk si lo, inhmuhna hun kan nei ta rih lo. Phone hmang erawh chuan kan inbe ve deuh reng thung. 

     Ka pa an zai ni chuan ka beisei loh zetin a rawn lang ve hlawl mai, a nu-in mi tu emaw hnena thil pe tura a tirh chhuah vanga lo kal thei chauh a lo ni a, rei erawh a awm khawtlai ngam lo thung. A taksa tla kuam mai leh mit khur thuk deuh dâkah chuan a mu tlemin thil a ei țha lo tih a lang reng a, eng han inzawh chianna hun awm hek lo a haw tur chu rilru bet lo zetin ka thlir liam a. 

     Doctor-i'n report an pek danah ka pa chu an zai hlawhtling thawkhat viau a, cancer hmuamhma te an paih fai țhain zung a kaih zau hman lo chu a vannei hle tih an sawi bawk. Ka nu hmela beiseina lo lang chu hmuhnawm ka ti a, rilru pik churha a awm tawh loh hram ka beisei bawk. 

     Pawisa hian thil a ti theiin misualte zalenna a thlen nasa a, roreltute zingah lah suma lei mai theih an kat nawk bawk. Sum a chelek nasa bawka Azuali nu pawh a thubuai neih ațangin a fihlim ta rêng a, an puhna a dik loh êm avanga thiam chang niin a insawi zui zat zat tho mai. Damdawi an zuar lo a nih pawhin eng sumdawnna thianghlim lo ber emaw chu a kalpui ka ring ru hle a, an sum neih dan leh khawsak dan ngaihtuahin in luah man leh Azuali pa pension hlawh ring ringawtin chutiang taka nuamsa leh inren lovin an khawsa thei bik lo tawp ang tih ka hria, eng tin emaw tak chhui chhuah ngei chu ka thil tum a ni. 

******

     "Ințhen mai hi țha-in ka hria! I tan ka thianghlim tawh lo a, kei ang mibawlhhlawh chu i duh lovang tih ka ring bawk. Chuvangin kan inzawmna hi tih tawp ka duh." 

     Ka message dawn chu ka en nawn leh a, thil dik lo a awm tih ka hria. Min țhen ngawt chhan hi a awm ngei ngei ang tih ka chiang a, eng thil nge thleng tih hriat chhuah ngei ka tum bawk. 

     Phone-a biak ka tumin a tlang thei lo a, message thawn lahin a tlang thei hek lo. Eng thil nge a chungah thleng tih ka hriat loh avangin ka ngaihtuah takzet a, committee pawimawh lutuka ka tel avangin ka kal mai thei bawk si lo. Ka tawt up up reng a, chhuanlam siamin pawnah ka chhuak ta ngawt a. 

     Sangpuii biain thil hriat a nei em tih ka zawt a, hriat a lo nei bik hauh lo mai. Azuali biak pawh dan lo ngaihtuah ve tura chahin kan inbiakna chu ka ti tawp a, committee room-ah chuan ka lut leh ta rih a. 

    

     Committee ban veleh Sangpuii sawmin Azuali te veng lamah kan tlan thla nghal a, an in kan thlen chuan a nuhrawn leh a fate pahnih an lo awm a, Azuali hmel erawh hmuh tur a awm ve lo.

     Sangpuii'n Azuali awm leh awm loh a zawh chuan a len chhuah thu an sawi a, a lenna an hriat loh thu an sawi chuan mak ka ti viau mai. Zanah leng chhuakin a kalna tur a sawi lo a, tun ang zan rei tawh lamah pawh a lo la haw lo a ni a, khawiah nge a kal anga eng thil nge a tih ang tih chu ka ngaihtuah a, ka rilru chu a nuam lo zual sauh bawk.

     A nuhrawn fanu chu a nu ang maia hmaihnawih ngaina leh inchei peih zet mai a nih hmel a, a hawiher leh min melh vel danah chuan nula sihhnip tak a nih ka ring mai a, min han biak dante leh a awm dan vel te chu mipa mit lak tum ngawih ngawih a ni tih a lang reng bawk.

     "Tunlai chu zana chhuah hi a ching reuh riau a, khawiah nge a kal tih han zawh lahin a sawi duh ngai bawk si lo. Ka ngaihtuah țhin tehreng nen hian mi hi a ngaipawimawh lo lutuk a, tih ngaihna pawh ka hre tawh lo e," a nu chuan a ti nem duai a, a țawngkam ațang ringawt hi chuan a fel hmel țhin teh e.

     Haw ka rawt chuan anmahni vanga chu lai hmuna kal kan ni emaw tih mai turin haw lo turin min ngen a, la leng țhu ve rih turin min ti deuh tlat bawk. Mahse, Sangpuii chu chhuanlamah hmangin kan chhuahsan thei ta hram a.

     "A fanu khan a ngaizawng che a nih kha, a melh vel danah che khan ka hrethiam mai," pawn kan chhuah rualin Sangpuii'n a ti a, ka lo nui ringawt thung.

     "Hetah hian nghak ang. I ute khan ka bulah i awm tih an hre tho a, an ngaihtuah lutuk lovang che," tiin Azuali te in piah kawiah chuan ka dinpui a, chulai hmun ațang chuan chiang takin an in chu a lang thei a ni.

     Sangpuii ka hruai kher na chhan pawh, Azuali te in hi vawikhat kan pahniha kan kal tih loh kha ka kal ngai loh bakah eng emaw thleng palh awm se Sangpuii tel ve a țulna a awm thei tih thil thu-ah a ni.

     Azuali chu biak tumin a call tlauh tlauh reng a, 'switch off' a inti tlat reng mai si, a beidawnthlak viau mai. Zanlai pelhah pawh a la rawn lan theih tàk lohah chuan haw mai țha-in ka hria a, Sangpuii ka thlah zawh chuan ka haw tlang ta nghal a.

     Zan tir lama a message min lo thawn kha ka chhiar nawn leh a, eng vanga ințhen chu duh nge a niha eng vanga  bawlhhlawh viau nia rawn insawi nge a nih tih chu ka ngaihtuah a. Ka lo rin leh hriat țhin a ze zawi tak phenah khan ze dang a lo thukru reng em ni ang? Zanah chhuakin a taksa a lo va zuar kual ve țhin zawk em ni ang le! Chu thu ka ngaihtuah ringawt pawh chuan ka danglam vek thei hial a, ka lung phû pawh a rang viau a ni.

     Hna thil avangin loh theih lohin Delhi lama ka zin a ngai thut a, ka tum aia rei ka châm ta lehnghal. Aizawl ka thlen leh hnu pawhin Azuali chu ka la be thei chuang lo a, Sangpuii pawh a mangang ta viau mai. An țhenawm te a zawh lahin an hmuh ngai loh thu an lo hrilh mai si a, a ngaih a țha tawh lo takzet a ni. 

     Office lama ka awl deuh ni a ni a, ka pa in-check-up hruaiin ka hmanhmawh lem lo. Check-up an zawh hnu-in ka nu'n a țhiannu dawra pangpar lam kawi lawk a duh thu a sawi a, chu lam pan chuan ka tlanpui a. Dawr bul kan thlen chuan a piah kawng zau deuh laiah motor dahin ka pa nen kan lo awm a, ka nu amahin dawrah chuan a kal thung. 

     Rin aia a rei tàk deuh avangin a kalna dawr lam chu ka va en a, ka tum loh deuh ka hmuh avang chuan inngaihtuah chiang hman miah lova va pan tumin car kawngkhar chu ka hawng a, a bula mipa kal ka hmuh rualin ka tawp chawt a. 

     Azuali chu kha drug addict Ruatpuia nen khan rawn inzuiin an inpawh hmel phian lehnghal. Ruatpuia ka hmuh hmasak ni pawh khan an pahnih bawk hian an kal dun kha a ni a, Azuali hi ka lo hriat dan ang kha ni lovin ama rawn insawi dan anga țawp leh tenawm chu a lo ni ve rêng em ni ang! 

     "He mihring țawng lutuk hi kei aiin i thlang zawk maw! I la inchhir dawn khawp," ti rilru-in ka inhumruh nasa ngang mai. He kan Ruatpuia vanga min hnawl a nih ngat chuan ka lung a awi mai mai dâwn hauh lo. 

     Ka ngaihbel nge Azuali hmelah chuan hlim hmel ka hmu lo a, rilru natna thuk tak nei ang maiin a ngui riai ni mai hian ka hmu a. A chhan hriat chiah si lohin ka chhungrilah chuan eng emaw hian min kam run a, ngaihțhat lohna hlirin ka khat a ni ber mai. 

     An kal liam thleng ka thlir zui a, ka nu lo let leh lai pawh ka hre lo hial a. Ka ngaihtuahna ațanga paihbo daih chu ka duh a, thil sawi chian pawh awm lova khatiang message min rawn thawn leh biak theih miah loha a awm zui hmak maite chu ngaihtuahin a intham lohthlak riauvin ka hre leh hnuhnawh a. Ka ngaihsak duh lo na nâ nâ chu ka ngaihsak lo tawp mai a ni ang chu! 

     Doctor-te beisei ang chiahin ka pa pawh a dam țha hle a, hmun dangah a lo țai darh hman lo niin kan hre bawk nen tunah chuan dam țha pangngai ang var a ni leh tawh a, ka nu hlim hmel pawh kan hmu leh thei tawh a, a lawmawm viau mai.

     "Kei chu u Peksang, chutiang mi chu niin ka hre thei lo. Kha chen kan lo inkawm tawh a, țhianho thil tih khawm nikhuaah pawh khawlo takin a awm ka la hre lo. Hmeichhe dangin beer chauh lo pawh an in duh laiin ani chuan beer takngial pawh a in ngai lo. Eng emaw tak a awm a nih ka ring tlat!" 

     Ka room-ah Sangpuii nen kan awm a, a țhiannu thlavang chu a la hauh ve țang țang a.

    "A nih chuan eng vangin nge biak theih miah loha a awm? Eng vanga kha addict-pa nena inzui fo kha nge an nih?"Ka lo ti hmuk a.

    "Chhan awm lovin khatiang thil kha a tih ka ring miah lo! Eng buaina emaw tak chu a tawk ngei ngei ang. A zui țhin i tih pa chu ka la hmu ve bawk si lo a, a zui chhan tur awm ang pawh ka hre mai lo."

     "I hriat loh lamah a lo tal hiar ve viau pawh a ni thei a, hre chiang emaw inti chungin i lo hre chiang tawk lo ve thei tho bawk," ka tih leh chuan a lu a thing nar nar a.

     "Azuali chu ka hre chiang ve êm alawm. I sawi anga awm țhin ni ta se tlem tal chu hre ve awm tak ka ni a, eng mah ka hre bawk si lo."

     "I țhiannu a nia, i țan laklawh mai mai a nih kha."

     Dik tak chuan ka lung a awi tawh bik chiah lo a, khati khawpa ka buaipui leh a him loh hlauva ka ngaihtuah êm êm laia sawi dun pawh awm hauh lova thutawp a rawn siam ringawt leh biak theih miah loha a awm chu ka haw riau mai a ni.

     Sangpuii lah a țanna ngaiah a țang tlat a, kan sawi kaw dawn chuang lo tih hriain thil dang ka sawipui ka daih a, ani pawh chuan a sawi zui ta bik lo.

     Kar a ral a, Azuali thawm a la reh vawng vawng mai. Kha mi nia ka hmuh bak kha ka la hmu leh ta miah lo a, phone tlang theihin a la awm leh miah lo bawk.

     Zak map lova ka office-a min rawn lenchilhtu Cindy chuan Azuali damdawi hehzia, harhfim lai a neih ngai mang loh thu leh mipat hmeichhiatna kawnga a sihhnipzia a rawn sawi chiam a, ka beng a kham hle. Ka țhutna bulah lo kalin min nawk velte chuan ka luak a ti chhuak a, ka thawhsan daih chung pawhin min la zui ngam nia!

     Min si cheta rawn dingin len chhuahpuiah min sawm a, hna ka ngah thu sawiin ka hnar fithla hmak thung. Hetiang hmeichhe zakthei lo lutuk hi an bula awm chu sawi loh biak ringawt pawh ka tui nek lo e.

     A nuhrawn leh a fate hian Azuali chu anmahni anga awm turin an siam a nih a ring ta hial a, ama mihring mihrinna chuan sual kawng a zawh duh a rinawm loh. Engtin tin emaw be țha kual velin an duh duha an tih kawi theihna turin damdawi hmangin an thlem a nih te ka ring ta hial a, chu thil erawh chu a chunga thleng atan ka la duh lo fan thung.

     Ruah a sur buan buan a, kawl a phê zawr zawr bawk. Ka secretary chu haw tura a insiam lai taka ruah a rawn sûr avangin thinrim zetin a ang hlak hlak a, ka lo nui a hmuh chuan min chhiat khum zauhin ruahin a dang chu a lawm lohzia a sawi leh hram a. La nui reng chung chuan ka room bil lamah ka luhsan ta a. 

     Kum thum chhung kan inhrawn tawh a, ka tan a tangkai a, a felin a zam a țha a, ka duhsak hle bawk. Min sawisel ngam khawpa rei a thawh hnu chuan ka țawng bung lutuk țhin chu min hau leh zauh țhin. A bialpain a rawn lam haw zauh zauh a, an inhmeh dun phian mai. An inzui rei ve tawh a, an innei har tawh vakin a rinawm loh.

     Office kawngkhar rawn chum ri dawt dawt thawmah chuan ka ding chhuak a, Mafeli'n kawngkhar a hawng thawm leh lut tura a sawm ri chu ka hre thei a, ka țhutnaah țhu thla lehin ka lo ngaichang tawp a. Chutiang khaw chhia leh tlai tawh tak kâra lo kal ta chu a pawimawh viau a ni ngei ang le! 

      Ka room kawngkaa lo lut chu ka beisei loh berte zinga mi ti ila ka sawi sual hauh lo ang. Ruatpuia chu huh deuh hnuang chungin inthlahrun hmel zetin a rawn lut a, țhu tura ka hrilh pawhin a huh nasat vang nge a țhu duh mai lo a.

     "I office ka ti huh zo vek dawn a nih hi. Rawn hmuh ngei che ka duh si a, nihliap khumin awmzia a nei lem lo a nih hmel," a thawmhnaw huh hnuang en zauh pahin a ti a.

     "Eng thilah nge min hmuh duh?"

     Azuali'n kei aia a thlan nia ka hriat vang nge ka be tui vak lo a, ka aw pawhin ngaihno a bei vak lo khawp ang.

     A mitmeng fim deuh chuan min en a, keimahah eng emaw tak hmuh tum ni maiin a lang. Kei lah chuan ruih a neih loh lai a ni maw tiin ka lo ngaihtuah hmanhmawh pek!

     "Khawngaih takin ka nau saw chhan chhuak rawh!"

      "Eng a!"

      "Ka nauvin i puihna a mamawh! Khawngaihin pui hram rawh. Ani chuan buainaa hnuh luh che hi a duh lo; mahse, kei hian sawtianga a awm saw ka hmu thei tawh lo. I puih ngei a ngai a ni," a ti mawlh mawlh a, a mangan hmel takzet bawk.

     "I nau chu tu nge ni?" 

     "Azuali, Zorinzuali!"