PEKSANGA 4

 PEKSANGA 4

Sbk Pachuau

PEKSANGA 4

Sbk Pachuau 

     In ka thlenin ka nu chuan veranda-a țhu-in phone-ah mi a lo be mawlh mawlh a, tih buai ka hlauh avangin be lova inchhunga luh tlang nghal mai ka tum a, min koh let tàkah chuan a bulah ka țhu thla ve ta nghal a.

     "Tunlai chu i u i ngai zual deuh nge an in lamah i kal zing riauvin ka hria. Tuna i lo thlen tlaina chhan hi pawh hi a ni tiraw?" nui deuh chunga a tih chuan eng emaw hriat a nei tih ka hre mai a.

     Ka u nen inbia-in an sawi dun a nih ka ring nghal mai a, Sangpuii room-a a lo luh ve lai khan Azuali kha ka lo kuah kher bawk nen ka nu hnena sawi vat vat a châk dawn tih a lang reng mai.

     Eng danga chhang lovin ka pa chanchin ka zawt let ta hlauh zawk a. Vawiin lamah doctor an va hmu leh a, inzai hun turte an sawi a. Ka pa a in-fit țhata harsatna dang a awm loh chuan karleh lamah zai hman an tum tih te chu min hrilh a. Doctor berin beiseina a nei sang êm a, ka nu hlauthawng lutuk pawh a zia phah viau mai.

*****

     Kar tluanin ka buai a, case harsa deuh tak han khawih hi chuan hunawl neih a har a, ngaihtuahna pawh a chawl hman meuh țhin lo. Azuali hmu tur pawhin ka kal hman meuh lo a, mut hmun ațanga phone-a biak a ni deuh mai.

     Ka ute inah a la awm ta reng a, haw a duh thu a sawi leh zauh țhin naa ka ute'n an chelh tlat a, keiin ka remti lo bawk nen a tum lui bik lo a. A chak kak chhan min hrilh hnu phei kha chuan a tan an in a him lo tih ka hria a, hawtir tawh lova kan in lama hruai maite ka duh rum rum mai a ni.

ZORINZUALI 

     A nuhrawnin fa bik, mipa leh hmeichhia a nei a, lak tlak loh dun zet an ni awm e. Azuali pa boral ațangin inchhungah lal an hrawt a ni ber a, an nu-in a duat dun nasa mai si, an dil apiang a pe a, thil sual tihna atana an hmang te chu pawi ti awmin a awm ngai lem lo. 

     A mipa zawkin damdawi a addict a, ruih loh lai a nei ngai lo ni awm tak a ni. A hmeichhia zawk lah inpenparh nuam ti mi, incheina ringawt buaipui chi a ni a, inchhungah a țangkai lo hle thung. Eng emaw hlekah Azuali an khak fo a, nu berin a zir lo bawk nen an michuang en a ni ber. An sum hrawm a na-in inren lek lovin an khawsa a, an pawisa nei thei lutuk chu Azuali chuan mak a ti fo. An hman nasat tehlul nen phawrh tur hi an nei reng mai a, in luah man bak sum lak luhna an neih a hre bawk si lo, mak tih loh chi pawh a ni lo. 

     Azuali hi a pa khan a ngaihtuah êm êm țhin a, a hminga account hawnsakin pawisa pawh țhahnem tham tak a dah luhsak a. Car leh scooty pawh Azuali pualin a lei a, a  pa boral hnu chuan scooty chauh a chang ta thung a, car erawh chu a nuhrawn fapain a ta neih hmiah mai a ni.

     Azuali hian pianpui unau mipa pakhat a nei a, ruihhlo a khawih avangin in ațangin a pa khan a hnawt chhuak a, a nupui leh a fate pahnih tan thawk huaina tham a tling awm e.

     Azuali hi hnawk ti hle mah se an duh ang ngawtin an theh thang thei bik lo; a chhan chu, an in leh lo hi Azuali te unau hmingin a la awm tlat a ni. A pa boral hma khan a nupuiin a thurochhiah thlaktir a tum ruh hle a, a sawi apiangin a pasalin a lo hnial zel si. A rilru a hminsak hman țep tawh tihah stroke vangin a boral ta thut a, a thlaktir hman ta lo chu pawi a ti kher mai.

     Azuali chu a u leh a pa awm loh hnu chuan eng emaw hlekah a nuhrawn fapa chuan kut thlak leh zauh a ching a, inleng a neih leh a sawisel a, a class kal tur te dan a ching viau bawk. Lehkha zir zawm tawh lo turin an vau reng a, Azuali'n BA tal zawh a duh avangin luhlul a chhuah ve tlat thung. A pa pawisa dahsak kha a tam tham a, ama intunnunna tur khawpa tam a dahsak miau a, a zirna senso a intum thei vek bawk nen admission a ti lui ve ngat a, a nuța kut thlak erawh a tawrh phah chiang hle.

     Hetiang teh nuai a nih avang hian class pawh a kal thei lo zeuh zeuh a, a hlauh ang ngeiin attendance-ah a tla a, exam thei lo tur zingah a tel ta hlauh mai.  A rilru hrehawm lutuk, exam ve ngei duh bawk si chuan zah pawh dawn lovin an lecturer pakhat, an venga mi hnenah chuan thil awmdan a sawi ta tawp a. A vanneih asiamin chu lecturer chuan an chhungkaw khawsak dan chu a lo hre ngang mai a lo nia, a exam theih ngeina turin puih a lo tiam a.

     A exam ve thei dawn tih a hriat chuan a hlim kher mai! Lehkha zir pawh a phurin a hunawl neih hlek chu lehkha zirna atan a hmang zel a, chu chuan a unaute mit a ti kham lehpek hle.

     "Rinzual, khawiah nge ka kekawr lei thar ka suktir che kha i dah?" a nuhrawn fanu Cindy chuan a lehkha zir tuilai chu din chilhin a ti kha kha a.

     "I khumah ka dah kha."

     "A awm si lo a..."

     "Ka dah ngei alawm," Azuali'n a ti leh.

     "I dah lo a niang chu... Khawiah mah hmuh tur a awm hleinem," Cindy'n a ti tlat a.

     "A va'n mak! Ka dah chiang alawm."

     "Dah ni la a awm êm êm ang. I thukru te hi a ni lo maw?"

     Azuali thin a sa zak a, "Eng atan nge ka thuhruk ngawt ang? Ka hak duh zawng pawh a ni hleinem," a ti let ve ngat a.

     "I hak duh zawng pawh ni se i inhmeh dawn lo lutuk a, khatiang chi kha chu awt lo law law rawh."

     Azuali chuan chhan enah a en tawh lo, a zirlaibu chu a bihsan ta daih a.

     "Rinzual, min va ngai pawimawh lo ve! Lehkha ka zirsan e te i han tih ngam vel chu le! Ka kekawr i hmuh hma chu lehkha hi i zir tawh dawn lo," tih leh Azuali zirlaibu laksak chu a rual a.

     "Ka su fai a, i room-ah ka dah thlap tawh bawk. A bak chu a ngaihna ka hre tawh bik hleinem," Azuali'n a lehkhabu ban pah chuan a ti nghat a, Cindy'n a kut a lo nam persak lâwp a.

     "I va zak lo reuh e! Ka sawi kha i hre lo em ni? I hmuh hma chu lehkhabu hi ka pe dawn lo che ka tih kha," pawr zeta Cindy'n a tih chuan a lo thaw hak a.

     Exam a hnai tawhin zirna hun a nei tam țhin si lo a, a hun awlah tal hi chuan ti buai lo se a ti ngawih ngawih mai a ni.  Hmanhmawh rilru zetin Cindy room chu a va hai thuak thuak a, khawiah mah hmu tur a awm si lo. Rilru pik zet chungin hmun dangah a zawng kual a, hmuh tur a awm chuang lo.

     "Nangmah hian i thukru a ni ngei ngei ang. I petrol man tur nei lo hian i lo hralh daih te hi a ni lo maw?"

     "Ka thukru lo a, ka hralh bawk hek lo," Azuali'n a ti tawi tàk a.

     "Dawt i sawi a niang! I khawih hnuhnung ber a, i hmu hnuhnung ber bawk. Nang lo tumah han la duh tur an awm lo," Cindy'n a ti leh hmarh hmarh a.

     "En teh, i kekawr kha i khuma ka dah chin bak ka la hmu leh miah lo. Rukruk  leh thil chheprelh duh khawpa rilru hniam pu ka ni lo a, ka mamawh ang leina khawp chu ka nei ve bawk."

     "Khawi ațangin nge i mamawh leina tur chu i neih? Ka nu pawisa i dil ngai si lo, engtin emaw tak sum lak luh dan țha deuh te hi i lo hria a ni lo maw! Nge i lo inzuar țhin zawk?"

     Chutiang êm êma hmuhsitna chu lutuk a ti ta deuh nge Azuali chuan Cindy kut ațanga a zirlaibu phih thlak pahin,"Ka zawng hman tawh lo. I duh leh nangmahin lo zawng ve tawh mai rawh," a ti ve ta ngat a, a room lam a pan zui hmiah bawk.

     A hnung lam ațangin a samah a rawn kuai dâk lâwp a, thinur râwl nen chhuatah a phih tlu a, a bawh zui nghal zat bawk. A nu lian angreng si a, a taksa rihna hmangin a delh bet tlat a, Azuali tan chet lak ve ngaihna a awm lo. Cindy chuan a samah te kehsakin a remna lai laiah a chumin a hnek a, a hmui hmai velah te a khawih nasa a, a hmai chu a pum nat ni maiin a hre hial a ni.

     A tuk zing a thawha darthlalanga a inen chuan a lung a awi lo ngang mai. A hmui a vun lûk bakah a biang dinglam chu a duk tluk bawk. Class an kal dawn lo a, nilenga lehkha zir a tum rilruk ve te pawh chu a thil tawn vang chuan a phur lo zo vek a, thathona rêng a nei rih lo. A exam ve dawn a nih chuan a zir ngei a ngai si a, peih lo zet chung chuan a zir ta hram a.

     Zan lama Cindy nen an inchaina lamah khan a lehkhabu a thler nual a, a țhiante'n an zir ve duh dawn avangin tu ta mah hawh theih a nih hmel rih si loh a, lei mai tumin Bazar lam panin a inkhalh chhuak a. A hmel hmu apiangin  mak ti hmel taka an en zui zel a hmuh chuan a rilru tthlakin thlanmual lamah a tlan ta daih a. A pa thlan a thlen chuan insum lek lovin a țap chhuak ta hawk hawk a.

     Eng emaw chen a pa thlana a awm hnu chuan khua a lo tlai lam tawh bawk nen haw turin a intintuah a, an ina haw chu a huphurh kher mai. Haw-na tur dang nei ta lo chu a haw ngei a ngai bawk si, huphurh zet chungin a inkhalh haw leh ta a. A haw hreh lutuk chu an in piah kawiah chuan dingin a chawl leh vang vang phawt a, a dinhmun ngaihtuahin mahni inkhawngaihna nen a rilru no a chhuak leh a, a mittui chu a dang zo leh ta lo.

     A bulah mi rawn ding an awm tih a hre naa hawi chhuah erawh a tum lem lo. A hminga a rawn koh chuan a phu deuh zawk a, a la hawi chhuak duh chuang lo a. 

      Koh nawn leh paha a dara a rawn vawn tàkah chuan muang changin a hawi chhuak ta hram a, a mipa lo vei ruk êm êm kha a ni tih a hmuh chuan mak a ti deuh a. Chutah a hmel landan tur ngaihtuah chhuak zawkin a kun leh ta nghal daih a, a hmai duk tluk leh a hmui vungte chu midang hmuhtir a duh vak lo a, a chhan an hriat leh lek phei chu a duh lo lehzual. 

     A hmel hmuh tlak loh lutuk laia a rawn hmu chu pawi a ti kher mai. Ngaihtuah hmel zeta a biakna te chuan a lung a ti chhe deuh a, chhan pawh  chhang mumal lovin a tlan hawsan ta daih nghe nghe a. 

    A tuk zana Sangpuii ruala an ina a kal ve chu mak a ti hle a, a laka a rilru put dante hi a lo hre ru reng anga chhaih kual vel a tum a nih te a ring rum rum a. Mahse, a awmdan leh țawngkam ațangin chutiang lam tum awm hmel puin a hre bawk si lo. An haw dawna a thusawi phei kha chu a beisei piah lam daih a ni. Ven a tum tih a sawi chuan a chhungrilah a lawm hle a, a ngaihtuahna peng pakhatah erawh innghahna tlak a nih leh nih loh a buk nasa viau thung.

     Exam an țan a, a chhan tawh chinah ti țha ve thawkhat viau chuan a inhria. Subject hnih chauh exam tur a nei tawh a, a huphurh loh subject ve ve an ni. Pakhat zawk an tih dawn zanah chuan lehkha zirin a room-ah a inkhung leh a, a chhiar mawlh mawlh lai chuan a room pawn ațang chuan a nuhrawnin țeng zetin a rawn au a.

     "Rinzual, inlêng te hi thingpui va lumsak teh. Mi pawimawh deuh lo len zan hi chuan tirh chawp ngai lovin a nachangte hriat ve țhin tur. Hmanhmawh la, va lum vat teh," tiin a tur nghal sek a.

     A nu inlêng pawimawh te chu an pawimawh hmel tak tak a. Pa zahawm tak pahnih leh tlangval pakhat an ni a, han en mai pawhin mi naran chung an ni tih a hriat theih mai nghe nghe.

     A thingpui lum a va pek chuan pa pahnih zinga a upat hmel zawk chuan nelawm taka lo nuihin a lo be pah bawk a.

     "I lo nula tawhin i hmel pawh a lo țha tawh hle mai! I pa kha pa țha tak mai a ni a, a zia i chhun phei chuan hmeichhe țha tak i ni ngei ang," tiin a lo fak luam a.

     "A fel ve khawp mai hei; tunlai phei a exam a, a zirlai pawh a bei ngawrh khawp mai. In chhûngah pawh kan rinrawl ber a nia, a tel lo chuan kan awm hleithei lo," fel hmel zetin a nuhrawn chuan a lo ti hluak hluak a.

     "Chutiang a nih chuan mo atan ka hauh e. Zuala hi nula-in an hel reng chung hian nupui neihna châng pawh a hre lo, tu hmel hmu lovin kan liam mai ang tih pawh ka hlau hlel lo e," pa pakhat zawk chuan a piaha tlangval țhu kawh zauh pahin a lo ti ve a.

    "In duh phawt te chuan keini te chu in tan chuan bel chhunga sa ang kan nia lawm. Kan fanu hi a lerh loh bakah mipa hi a ngaihsak lo khawp a, ngaihzawng a neih awm pawh ka hre lo. Nangni ang chhungkaw zahawma lo lawi luh chu a inhmeh khawp ang," pi Rami chuan a lo ti leh duai duai a, Azuali a lo kimki deuh chawih thung.

     No vel a sil mawlh mawlh lai chuan a pa-in Zuala tia a sawi kha chokaah chuan a lut phei ve a, tui in tur a duh thu a sawi chuan Azuali'n a kawh hmuh a, ngaihsak zui lovin no chu a rem fel zui mawlh mawlh a.

     "Khawngaihin i number min pe thei ang em?" Zuala'n a ti a.

     "Eng atan?" A zawhna chu a mawi lo hle tih hre mah se inhre ngai hlei lo a number a dil tawp chu zakthei lo a ti ru deuh a, hawihawm a chhuah peih bik lo a ni.

     "Ka hre chiang duh che a," nui vur vur pahin a lo ti sam et a.

     "Hriat chian tlak ka awm lo."

    "Chu chu kan la hre dawn alawm."

     Chhang zui tawh lovin a ngawi ta daih a, Zuala chuan chair pawt chhuakin țhut hmun a la rem tak sauh sauh a. Lehkha zir țhahnem a ngaih tehlul nen a ngei rilru kher mai! Han kalsan daih lah chu ni theiin a hre bik bawk si lo, bet lo zetin a ding a.

     "Min hmuh vawikhatna a ni maithei a, kei chuan vawi eng emaw zah ka lo hmu tawh che alawm. In college-ah kan nau pakhat a lut ve a, ka rawn thlah zauh zauh țhin a."

     "A nih chu maw le!" sawi belh tur dang a hre tawh ngang lo.

     Zuala chu a hmelchhe lem lo a, an khawsa thei thawkhat ang tih chu a hmel leh hawiher mai bakah a inthuamna atang chuan a hriat theih mai a. Țhian anga kawm atan chuan fel leh nelawm tak a nih hmel a, ngaihzawng atan erawh a duhzawng hmel a pu lem lo.

     Zuala titi ngaithlain a ding ngawi reng a, a rilru hmanhmawh tawh lutuk chuan kalsawn vat vat se tih chu a duhthusam a ni. A pate'n haw tura an rawn auh tàkah chuan thaw huaiin rang zetin a room lam a pan nghal a.

     "Rinzual, fimkhur deuhin chet la la, Zuala kha chhuah hlek suh ang che," rei pawh a la țhu hman lo tihah a nu chuan a lehkha zirna dawhkan bula ding run chungin a ti a. 

     "I u Cindy hna dilna department-ah a pa kha Deputy director a ni a, hna hi a hmuh ngei a ngai. Zuala kha be țha la, ti lawm la, Cindy hi a hna dila a tlin theihna turin eng thil pawh ti rawh, a tling ngei ngei tur a ni tawp." 

     Rapthlak ti zetin a nu chu a melh a, a fanu hna hmuhna atan tawktarhah hman a tum a, han timna leh inthlahrunna eih a nei lo tih chu a hawiherah a lang reng mai. A ngei lutuk chuan hrawk let hrep mai a châk takzet a, a châk anga a  awm a nih erawh chuan a chungah thil țha a thleng dawn lo tih a hre chiang hle thung. 

     "I phone number ka pe a, a rawn biak hunah che țha takin lo chhang ang che," tiin a room atang chuan a chhuahsan zui a.

     A thinrim lutuk chu lehkha zir lam rêng a lang tawh lo. A nu a huatna chu a nasa êm êm a, tun hma-in hetiang rêng rênga nasa hian a la haw ngai lo.

     Zan lama a mut tlem êm avangin a zing tho chu a rit bûr a, exam tur a nih avangin peih lo chungin rawng a bawl sawk sawk a, a zirlai a ennawn leh thuak thuak hnu chuan chaw ei turin choka lam a pan a. Thleng a laklai tak chuan a hnunglam ațangin vin tawkin a nuhrawn chuan a rawn hrawk a, a phu nasa lutukin a thleng ken a thlauh keh chhuai a, a nu thinrimna chu a thuah hnih khawp ang le! 

     "He mihring han chet zei loh dan êm êm hi chu aw! Ka thleng i tih keh hi eng zat man nge i hria em? A man a to asin! Mi na zawng neih phak loh a nih hi. Engtin nge i tih keh ngam zawk?" tiin a hrawk tun tun a. A tih keh chhan a hmu ve vek a, thiam thu sawi a tum lo, awmzia a awm dawn tlat lo. 

    " Khawiah nge i phone i dah? Eng vangin nge ka țhu i awih loh vel a? Zuala kha be țha rawh ka ti a ni lo'm ni? A phone call pawh i la duh lo a maw! Ngawi tak rawh, ka thu i awih lo hi i la inchhir khawp ang!" tih pahin a samah a kek bu lâwp a.

     "Ka phone silent-ah ka dah a, a ri ka hre lo hrim hrim. Ka chhang duh lo a ni lo."

     "A rawn be dawn che tih i hre reng a, eng vangin nge silent-ah te i dah? I lehkha zir vang vek a nih kha. Lehkha hi zir tawh suh, college pawh vawiin ațangin kal tawh lovang che," a ti leh hmuar hmuar a. 

     "Ka kal rei tawh dawn lo. Subject hnih chiah exam tur ka la nei a, chu bak kal a ngai tawh lo ang," a nu thinurna belhchhah sak hlau tak chungin Azuali chuan a ti a, lo țawng chhuak ta lo zawk se a tan a țha zawk maithei a ni. 

     "Min chhang zawt zawt ngam ka ti! Min va han zah lo lulai ve le! I kal tawh lovang ka tih chuan i kal tawh dawn lo. Ka thuhnuaia awm, ka chawm i nih hi. Min han hnial ngam khanglan chu le," tih pahin an dinna bul belbawmah a lu a va tauhtir sawk a. 

     A lu chu hai nghal muai muaiin a hria a, thi a rawn luang thla nghal zawih zawih bawk. A chak chu nâ a ti hle a, a thi nasa bawk nen a mangang rilru kher mai. A nu lah chuan ngaihsak lo zetin a chhuahsan hmak a, hetiang ringawta a awm chuan thisen a hloh hnem dawn tih a hria a, a rei hmaa tih dan a ngaihtuah vat a ngai a ni. 

     A room-ah tlan lutin a  țhiannu Sangpuii a bia a, inah a lo awm hlauh mai. A theih ang anga a chal kak chu tuamin Sangpuii te in lam panin a inkhalh chhuak ta ngawt a.