PEKSANGA 2

 PEKSANGA 2

Sbk Pachuau

PEKSANGA 2

Sbk Pachuau 

     Zam lo fahrana Baby-i lo pen lut chu lungawi lo ru zetin ka en a, ka hnathawhna hmuna lo kal fo lo tura ka hrilh hnuah pawh zak hauh lovin min la pan zut a, ka khak deuh pawhin awmzia a awm lo hle. Tlangnel zeta țhu-in a bawp chu a khawkherh nghal zat a.

     "A la hma deuh naa i office bul maiah hian thil pawimawh ka ti a, haw buai leh ai chuan hetia lo nghah mai che hi țha zawkin ka hria a, ka lo tlang a nih hi. I hman hunah kan kal nghal thei ang a," a tih chuan ka bo deuh a.

     "Present tur pawh ka la lei lo a, kal pahin lei mai ang aw," a tih leh tàkah chuan a țhiannute inneihnaa kalpui tura min sawmna kha ka hre chhuak leh ta chiah a.

     Kha hmeichhia ka hmuh hnu khan hmeichhe dang ka ngaihven ta miah lo a, Baby ngei pawh hi ka tisa châkna hrithlakna atan pawh ka mamawh ta lo. Amah hian min hnaih lui zel a, ka awm danah ka hnar a ni tih lantir viau țhin mah ila a haider hmiah a, eng mah thleng lo ang maiin min nawk a țhulh phah chuang der lo. Vawiina inneihnaa kalpuia min sawm pawh khan 'aw' ka pawh hauh lo a, tunah chuan ka remti thlap ni awm takin zam hauh lovin ka office chhûngah ngei min nghak leh ta chu a nih hi!

     Kohhran dan thianghlima innei an ni lem lo a, a inneite nu leh pate berin 'ropui taka lawm hi inneih reina a ni lo, a inneite hi in pawimawh ber' an tih vang nge lawmpuitu pawh an tam lem lo. Inti tatu taka Baby-i'n min nâwk reng chu ka nin deuh avangin chhuanlam siamin ka kal hrang a, midang awm lohna lamah ka inthiar fihlim ta daih a.

     Ka mood fuh lutuk lo chu a hrethiam ta nge haw ka rawt chuan min hnial lovin a remti ve mai a, haw kawngah erawh kal kawina tur a la hre ta tho mai. Dinthar lamah kalna tur pawimawh neia a insawi avangin Azuali te veng a lo ni bawk nen hnial lem lovin chu lamah chuan ka tlan thla a, ka mit chuan zawn a nei kawng tluan bawk. 

     Ka beisei aia rei lo kan awm hnuin kan let leh ta nghal a, Azuali te in pêng kan thlen chuan ka ding dat a, zawhna nei hmel pua Baby-i min rawn en chu buk khum zauhin kan dinna piah kawng lam chu ka kawk ringawt a. 

     Motor chu hung țha deuhin ka chhuk a, a piah kawnga scooty-a lo țhu kun deuh ngàih chu panin amah ngei a ni tih ka hriat chian hnu chuan ka pen chak sauh a. 

     A bula ka din hnu pawh chuan rawn hawi chhuak lovin a phone bihin a la kun reng a, a bulah ding an awm tih a hre lo nge a ngai pawimawh lem lo zawk ni a awm dan ngai reng chuan a awm a. 

     "Azual..." 

     Ka kohna avang chuan a che chang lo mai ni lovin hria angin a awm lo hrim hrim a, ko nawn leh ngatin a darah ka kut ka nghat zawm zat bawk. 

     Muang chânga lo hawi chhuakin mit sen deuh râmin mi melh a, a beisei loh deuh min hmu tih hriat takin a meng phar deuh ak a, eng emaw sawi tum ni awm taka a kâ âng zuauvin eng sawi ta lo chuan a kun leh ta daih lawi a. 

     A rawn hawi chhuah chhung rei lote-ah khan a biang duk raih leh a hmui vûng deuh lâk chu hmuh hmaih chi a ni lo. Ka thin chu a sa deuh phat a, tu emaw kut thlakna hnuhma a ni tih a hriat theih a, a mit sen deuh râm pawh chu a țahna vang a ni tih a lang reng mai. 

     "I țha êm?" tia ka zawh chuan min chhang lo. 

     "I chungah eng nge thleng tih ka hre lo, a țha lo hle  tih erawh ka hre thung. Ka rualin lo kal la, Sangpuii bulah ka hruai dawn che nia," ka tih leh tàkah chuan min en ta nge nge a. 

     "Min ngaihtuah a, ka lawm e. Mahse khawngaihin min kalsan zawk rawh. Ina haw ka lo tum mek a, ka nute'n min lo nghakhlel tawh ang," tih leh a scooty tih nun chu a rual a. 

      A ze mak angreng tak, pawh har riau mai leh a hmel ngainatawm êm êm bawk si ngaihtuah chungin Azuali tlan ta chu ka thlir zui vang vang a, eng vanga khatianga hmui-hmai vûng chûr khawpa sawisak tawk nge a nih anga tu nge a sawisatu chu ni ang tih te chu ka ngaihtuah kai zel a.

     "Tu nge kha nu kha? I hmelhriat a ni em ni?" Baby-i'n a rawn tih chuan ka bul maiah a lo ding reng tawh tih ka hre chiah.

     "Kan nau a nih kha," tih leh kal ka rual a, ani pawh chuan eng mah dang sawi zui lovin min zui ve mai bawk a.

     Zanriah ei kham veleh ka ute in lama ka len tur thu sawiin ka inkhalh chhuak a, an in ka thlen rualin naute pawh ngaihsak hmasa lovin Sangpuii hming ka lam nghal a, ka u-in mak ti hmel zeta min en chu haiderin Sangpuii min biakna chu ka ngaihven lui tlat a. In ațanga ka chhuah hmain amah be tura kal ka tum thu leh eng chungchangah nge biak ka duh tih ka hrilh tlang nghal avangin a room lamah min hruai ta daih a.

     "Engtin chiah maw Azuali chu i hmuh a?" a room-a kan luh rualin Sangpuii'n min zawt nghal zat a.

     A țhiannu awm dan leh rilru natna nei ang taka a awm thu sawiin eng ang chhungkua nge an nih tih chu ka zawt a.

     "Azuali chu ka khawngaih mang e! A nuhrawn hi a fel lo ve sia, sum a duh bawk si. A hlawkna turah chuan midangin tuar dawn mah se eng thil pawh ti duh tur chi a nia, Azuali hi a fel êm a, a nu chanchin hi a chhe zawngin a sawi duh ngai miah lo a, a mualpho lo mai mai a nih saw. A pa boral hma lutuk hi a pawi tak tak a ni! "

    "Nuhrawn a hrawn amaw! A nuhrawn chuan kut a thlak țhin rêng em?"

     "A fel viau lo tih ka hre naa kut a thlak hi chu ka la hre ngai miah lo. Amah Azuali hian a sawi chhuak duh lova a zep te a nih ngawt loh chuan a nu kut a tawrh hi ka la hre miah lo."

     "I țhiannu tana awm nawm lohna tur thil a ti fo em?" Ka tih chuan dilchhut tih hmel zetin min en a, kei pawhin dilchhut ka inti!

     "Ka sawi tawh ang kha a ni mai. Amah ber hian hetiang lam hi a sawi ngai vak lo a, a pik zual chânga ka bula a insawi thawl vena hi ka hriat chhun chu a ni mai. Han zawt thui deuh dawn ila eng mah a sawi țha leh duh ngai chuang miah lo."

     "Hmuh ka duh a, a fala ka hmuh theih dan tur lo ruahman rawh aw," ka tih chuan phawk zetin min en a.

     "Awiii... A rilru tih nat belh mai mai tur chuan chhaih buai lo law law rawh. Azuali te ang mi rilru ngil lutuk leh ngaihzawng lama tawnhriat la nei vak lo tan chuan i û mah mah!"

     "Chutiang zawngin ngai tlat lo la, ka ngaizawng ngei dawn tih pawh ka sawi loh chu! Hmuh ka duh ka ti mai alawm. Rem chu lo ruat vat la a ni mai," nui deuh chunga ka tih chuan a lo țhen țhaw a.

     "Aaaa... I ngaizawng ang. I ngaihzawn ka ring," a la ti fan a. 

*****

     "Rinzual, i țhiante an lo kal. Room-a tawm reng lo khan lo chhuak la, i țhiante hi rawn kawm ta che," titunu chu ka tan mi thar a ni hauh lo. 

     "Ina a awm tawh hi chuan a room lamah hian a inkhung chawt reng a, ka'n sawisel țhin tak naa a sawt lem hlei lo a. Tunlai miho tih dan tiin ka en liam ta mai mai a nih hi. In chhûngah tih tur a awm êm êm lo bawk nen nuam a tih dan leh a duh dan anga a awm chuan a lawmawm zawk ka ti mai a," a hmui ling hlar hmanga a tih leh zuah zuah lai chuan office-a a lo kal țuma ka lo hnial ta kha ka ti sual miah lo a ni tih ka lo ngaihtuah a. 

     A sualna hmu chiah lo mah ila ka rin zawng a ni hauh lo. Ruihhlo zuara an puhna kha a insawi dan ang khan lo fihlim ta tehreng pawh ni se mihring rilru țha a ni lo tih ka hmu thiam nghal mai a, a tana ding tura min ngen pawh khan ka hnial ta rêng a nih kha.

     A room ațanga Azuali lo chhuak hmel a hmuhin Sangpuii chu a thaw hak a, a țhutna ațangin a tho deuh titihin a țhiannu chu a thlir vawng vawng a.

     "Hmanniah a scooty-in a che sual palh hlauh a, hmel hmuh tlak alawi pawh a neih loh kha! Lirthei khalha an chhuak hi ka ngaihtuah țhin a, ngaihtuah ang ngei ngeiin a rawn chesual a, ka hlauthawng teh mai asin! A na êm êm lo hlauh zawk a, kha ai khan na phei se chuan ka tel lova a chhuah vah ka phal tawh mai lovang maw le!" ngaihtuah hmel taka a ti velte chu lem ka lo ti ru ngawih ngawih a.

     Han en rêng rêngin lirtheia chetsualna hnuhma a ang lo rêng rêng a, chu chu Azuali mitmeng chuan a nemnghet chiah bawk.

     A nu chhuah veleh Sangpuii'n thil awm dan a zawt nghal a, a nu sawi ang khan scooty-a a tlukna tiin zu chhang a!

     Nimina a scooty ka hmuh khan tlukpuina hnu awm eng mah a lang lo a, rãng leh han hmelhem deuh lai lah ka hmu hek lo. Eng vanga dawt chu sawi ve kher nge a nih ang le!

     Inhmuhna hun min siamsak tura Sangpuii ka ngen hnu khan a tan a buaithlak ve tho tih ka ngaihtuah a, ka rilru thlak lehin a tuk zanah an ina lenpuiah ka sawm ta zawk a. Kal kawngah Azuali thlavang hauhin min sermon khum lehchiam pek kha! 

     "Azual, 'tinge eng mah hi min hrilh duh miah loh a? I rilru hahna leh i thil tawnte min hrilh lohna hi a rei tawh teh mai a nia! Ka lakah eng mah zep nei tawh suh," Sangpuii'n a ti sep sep a. 

     "Zep ka neih pawh ka hre hleinem. Nangmah chauh hi ka rilru hahna ka hrilh țhin awm chhun i ni a, i lakah zep neih ka duh hauh lo," Azuali'n a tih chuan a mitah tak ka en a, a pha deuh dai chu ka hmuh hmaih lo chiang hle. 

     "En teh maw Azual, i nu hi thup tum viau mah la a zia hre tur khawpin nang nen hian kan inkawm rei ve tawk tawh. I chunga a khawsak duh dan pawh in thenawmte kâ ațangin ka hre nual bawk. Tunah pawh hian i lakah eng thil emaw tak a ti tih ka hre mai; mahse, i sawi duh lo chung chu ka zawt lui dawn miah lo che a nia. I mangan hunah țhian i nei tih erawh i hre reng dawn nia," Sangpuii'n a ti leh keuh keuh a. 

    "Sangpui, ka..." 

     Sawi zawm thei lovin a kun ta daih a, a mittui rawn far thla kauh ka hmuh chuan a tan tu nge ka niha ka tan tu nge a nih lam ka ngaihtuah hman lo. A kutah chelhsakin nghet takin ka hmer zui a, ani pawhin min lo dan a tum bik chuang lo. 

     Kan haw dawn chuan an tual Zawl thleng min thlah a, min mangțha hnua let leh a tum chu a banah vuanin ka chelh bet a. 

     "Scooty-a i tlukna a ni lo tih ka hria, thudik sawi duh lo mah la ka zawng chhuak dâwn tho. I tana țha lo tur thil ka tih erawh lo ring lo la, a thlawna mi kut tuara i awm tawh lohna turin ka veng tawh dawn che," tia ka sawi lai chuan a mitmeng fiah zetin chiang zetin min melh kal a.

     Ngawi renga eng emaw chen kan inmelh vang vang hnu chuan amah ka vawnna kut chu dah thlain a inla hrang nghal a. 

    "Ka lawm e. Mahse, ven ngai ka ni lo a, tum buai duh suh," tiin a inher a, inring tawk hmel zetin an in lam pan chuan a kal zui a. 

     Ka rilruah Zorinzuali bak a awm thei lo a, hnathawh lai pawhin ka paihbo thei chuang lo. A induh tawk em avang khan ngaihsak zui loh tawp mai ka tum kha a ni a, ngaihtuah loh tuma ka beih nasat poh leh ka thinlungah a bei nghet ting mai si. Ka ngaihsakna dawng duh lo hmeichhia ka tawn vawikhatna a nih vang te pawh a ni mahna ka theihnghilh mai thei tlat lo.

****

     "U Peksang, tunah kan inah i lo kal nghal thei ang em?" Sangpuii'n a rawn tih chuan ka lung phû a rang ngang mai. 

     Hna laklawh ka nei lem lo bawk a, Sangpuii te in lam pan chuan ka tlan chhuak ta nghal a, hna laklawh pawh nei mah ila ka kalsan hmak ka ring tho mai.

     Sangpuii room-a ka thil hmuh chuan ka thisen a ti lum chiang hle. Azuali chu Sangpuii khumah a lo mu zawi ngiai a, a mit ko kak ațanga thi chhuak tih tawp tumin Sangpuii a lo buai viau a, ka hmel a hmuh chuan thawveng huai niin a lang.

     "U Peksang, a thi hi ka ti tawp hleithei lo a, eng tia tih chi nge ni ang?" Mangan hmel zetin min zawt nghal ruai a.

     Ka'n en chian chuan a kak a thuk reuh riau a, țhui ngei a ngai dawn tih ka hmuh chuan damdawi in lama kal ka rawt a, Azuali chuan min hnial leh tlat pek a.

    "Kan țhuitir loh chuan a kak hi a thuk si a, a dam mai mai thei dawn lo. Natna hrik a luh palh te pawh a hlauhawm a, kan kal ngei a ngai," tiin a țawng leh tur ngaichang duh hauh lovin khum atang chuan ka pawm tho a, a țang ve deuh naa tha a neih tlem vang nge a țang na viau lem lo.

     An țhui zawh hnua damdawi lei ngai te kan lei hnu chuan Sangpuii te in lamah bawk kan let leh a, ka ute nupa an naute hruaiin inneihnaah an kal a, naute pi leh pute lah Shillong lama an zinthlak lai a nih avangin ina awm ve dang an awm lem lo bawk a, tu mitmei mah ven a ngai lo hlauh.

     Thingpui lum tura Sangpuii'n min chhuahsan chuan kan pahnihin room chhûngah chuan kan awm dun a, a chal an țhuina lai chu han khawihin a ner sak a.

     "A la na viau em?" tia ka zawh chuan a lu a lo thing mai a.

     "I duh chuan mu zâl leh rawh. I thisen a chhuak nual si a, i chau lutuk palh ang e," khum kawh zauh pahin ka ti a.

     "Chau lo e. Keimah vangin i buai ta hrep si a, nangmah zawk kha i chau ngawt ang."

     "Scooty-in i accident leh tawh em ni?" nui deuh sak chunga ka tih chuan a hmui hnuai lam a lo ti pawrh tarh a, a lan duhawmzia chu a hre leh tawp pek nang.

     "Ka dinhmun enin min nuihzat pawh ni la a awm tho e," a ti sep a, a kun nghal daih bawk.

     "Ka nuihzat che pawh a ni lo. Zawt che mah ila a chhan dik tak min hrilh leh duh dawn chuang lo a, ka'n fiamthu mai mai a nih kha."

     "Ka ti buai lutuk che u a, a zahthlak khawp mai. Nakinah min buaipuina man leh senso vel chu ka la rul leh vek dawn che nia."

      "Rulh leh ka phut lo a, a ngai bawk hek lo. Kha lam chu ngaihtuah buai duh suh."

     "A thlawn ringawta mi sum eisak ka duh hleinem. Ka rul leh ngei ang che," luhlul zetin a la ti fan reuh a.

     "Heti zawng hian min rul ta la..." tiin a hmai si lek lekin a lamah ka kun phei a, a tukkhumah ka dawm bet nghal zat bawk.

     "Hey... Min thlah..."

     A țawng laklawh lai chu ka hmuiin ka kharsak hmiah a, a tal lova, min chhang let hek lo. A dawh mawl tawp a ni ber.

     Rei pawh ka la fawh hma chuan min nam sawn lâwp a, thinur zeta min melh kal chungin thawk a la hawk a. 

    "Min țanpui avanga ka laka huangtau i nih chuan vawikhat mah i țanpuina ka mamawh tawh lo. Ka dinhmun avanga min zuam a nih pawhin nang tih lawm che hi ka bat a ni lo a, i duh zawng tih puitlinna hmanruaa țan ka tum miah lo bawk. Tunah hian i kal lo a nih chuan keimah zawk hi ka kal ang, " thinur lutuk avanga thaw deuh hlawp hlawp chungin a ti khur dar dar a. 

     A thil sawi dan teh daih chu ka lo beisei lawk loh êm avang chuan hnial ngaihna pawh ka hre mai lo. Ka ngawih reng avangin amah bawk chuan,"Keimah hi ka kal zawk ang e," tih leh thawh a rual a. 

     "Khawiah mah i kal dawn lo. Tihian lo awm la, keimah zawk hi ka kal tawh ang e. Ka thil tihah khan ka inchhir lem loh avangin ngaihdam dil ka tum lem lo. Mahse, i duh loh zawng a nih hmel si a, thupha erawh ka chawi e," a țhutnaa nem țhut leh pahin ka ti a, ka pen sawn nghal zat bawk. 

   "Hetah ka awm reng thei chuang hleinem. Kan in lama ka haw a hun tawh rêng rêng a, kei pawh ka chhuak nghal ang. Mahse, i rual kher lovin." 

     Ka nui chhuak hawk a, a nun dan tlang lutuk leh ngaih dan thup țit țet lova a sawi chhuak leh pawp țhin chu ka lawm ru riau mai. 

    "Ka rual chuan lo kal la, ka thlah pah thei tho che alawm," ka tih chuan, "Teuh lo lutuk!" a lo ti hmak a, han chhaih kawlh belh ka châk viau naa ka phone a rawn rik tàkah chuan ka phone chu ka chhang ta zawk a. 

     Ka secretary a lo ni a, inleng ka neih thu min hrilhin ka let leh dawn tawh em tih min zawt pah bawk. Ka let leh dawn chiah tih hrilhin phone chu ka off a. Kal ta mai lo chuan Azuali chu ka thlek leh vang vang phawt a, ani lah chuan a laka rilru tuihnai lo deuh pu anga min ngai ni mai awmin min lo ner khum nâng a.