22ND AUGUST Doc
22ND AUGUST...
Sbk Pachuau
Ka ṭhiannu thinrim âng thawm chu ka ngaithla reng a, lo ṭawng ve emaw, lo inrawlh emaw tumna ka nei lem lo; lo ṭawng ve tum pawh ni ila sawi tur ka hre lo hrim hrim bawk! Ka thinlung chhûngrila natna ka neih chu ka kunpui tlawk tlawk a, ka nat mai bakah ka zak bawk; phatsan tawk tawhtute lo nat turzia leh an thil paltlang rapthlak turzia pawh ka ngaihtuah thleng nghal vek!
"A hrim hrimah, neih loh che hlauvin khati khawp khan a hèl nasa che a, keini thleng thlenga min be ṭha-in kan läwm zawng leh duh zawng tih hreh lo khawp khan a inphahhniam thei a, in innei ta cheng a, hetianga a phatsan leh mai thei che hi a nunrawnthlak lutuk! A thiltih man hi chu a la tuar ve khawp ang... "
Mami thinrim lutuk leh min ngaihtuah bawk si chu a insawh nasa mai a, kei lah eng mah sawi lovin ka ngawi ngal mai si. Ka tawt up up a, ngaihtuahna mumal pawh ka nei hlei thei lo a. Kan fapa, kum hnih mi lek a pite(kanpa nu) hnena ka dah hlauh chu ka ti fuh hle a ni tih erawh ka ngaihtuah rauh rauh thung.
"Mam, min hrethiam la, keimaha awm ka duh rih tlat mai!" ka ti sap a.
Min en vang vang a, a mitmengah chuan a der mai ni lovin min ngaihtuah tak tak a ni tih a lang reng a, min ngaihtuah hle tih hre mah ila hawihhawm ka chhuah thei lo a, mawihawih ka zawng thei hek lo, mahnia awm chu ka duh ber rih tlat a ni.
"Aw le, ka kal ang. Mahse, thil ṭha lo eng mah tih i tum lo a ni tih min hrilh phawt rawh!"
"Min ngaihtuah suh, chutiang lam ka rilru-ah a awm lo. Fapa ka nei tih ka theihnghilh bîk hleinem, inngaihtuah fîm ka duh mai chauh a ni," ka tih chuan ngaih ngam lutuk lo tih hriat deuhin min melh leh vang vang a, hreh hmel zetin min chhuahsan ta a.
Khumah chuan ka bawk a, ṭap thei ila, ṭap hawm hawm ila ka thawl hawk zawkin ka ring a, ka ṭap thei der mai si lo. Ka tho a, ka vei kual a, ka mitthla-ah ka pasal leh a hmeichhe kaih kha chiang takin an lo lang reng a, ka fapa avang chauh tak takin ngaihtuahna fîm put hram hram ka tum a. Ka thinlung chu nâ eltîang mah se ka fapa hma khúa ngâi tâk chunga ka chet a ngai dâwn a, ka duh dan ang anga awm thei ka ni lo tih ka hriatna chuan thil ṭha lo ka tihna tur lakah pawh min dang chiang khawp mai.
Ka nute chu bia-in Bawihtea chu lo la dah rih lo turin leh zan lama len paha lam ka tum thu chu ka hrilh a. Ni dangah pawh nilênga an awm bakah zanriah ei kham hnu pawha an rawn dah mai loh châng a awm ṭhin a, amah a fel bawk a, min hmuh loh rei pawhin a tlei loh phah lem lo a, a pite bulah chuan a tlei êm êm mai a ni.
Muangchânga tho chhuakin phur lo zetin eirawng ka bâwl a, ka pasalin tui a tih zâwng leh a hmeh ngainat zâwng chu rilru nâ ru tak chung chuan ka siam a, rawng ka bawl zawh hnu chuan inbual turin bual inah ka lut zui ta nghal a. Ni danga a lo haw hun a la ni chuang lova tiin hmanhmawh miah lovin ka inbual a, ka ngaihtuahna chuan hmun tin kil tin a dap kual a, ka dinhmun ngaihtuahin pasal ṭhen thei ka ni lo a, lo inṭhen ta ni ila ka pate hnen lamah ka kir duh dâwn lo chiang sâ a. Mahse, kalna tur dang ka neih lohzia leh ka belh tlak chhungte ka neih lohzia chu ka hre chiang ngang thung.
Ka ngaihtuahna ka lo kawm rei deuh ni ngei tur a ni ka inbual zawh meuh chuan khua a lo thim titih tawh a, bathroom aṭanga ka chhuah chuan ka pasal chu châw ei dawhkan bulah a lo ding rûn a, ka hmu thut chu ka phû deuh zawk a.
Zanriah ei lâi chuan ka be lui hram hram a, nidang ang bawkin tawite tea chhanna bâk ka dawng lo. A hma kha chuan ṭhian leh hmelhriat ṭhenkhatte kâ aṭangin ka hre zauh zauh a, ka ringhlel naa ka mit ngeia ka hmuh hma kha chuan ka awih duh lo lui a, ka awih phal lo a ni ber zawk ang chu! Tunah erawh a chiang thawkhat ta viau, ka mit hmuhah ngei kut insuihin a kalpui ngam a, kei chu a eng mah ni lo ang maiin min kal pel a nih kha!
Hmangaih leh duh taka ka neih a ni a, ka fapa pa a ni bawk. Inṭhen ka duh loh avangin ka lungawi lohna ti lang ngam lovin a ṭha thei ang bera dawngsawng turin ka rilru ka siam kha a ni a, a taka bawhzui erawh a har fat thung. Ka biakna apiang ngaihven lo tih hriat lutukin min chhâng liam vek a, min chhan tâk miah loh ṭum pawh a awm bawk. Nâ hle mah ila ka theih ang chen chen chelha ka lam a hawi leh theihna tur atan theihtawp chhuah chu ka duh tak zet a, chu chu ka ti thei ang em tih erawh ka chiang bîk hauh lo thung!
Thleng vêl ka seng fel zawh hnu chuan nui hmel pu luiin a ṭhutna lam pan chuan ka phei a, a phone-ah chuan eng emaw a lo type mêk a, a bula ka va din pawh chuan hria anga awm lovin a awm dan a danglam phah eih lo. A phone chu laksawn emaw ka hmuh theih loh tura dah emaw a tum hran lo a, hmù mah ila pawi a ti miah lo tih a lang reng; mahse, ka melh duh lo lui tlat a, ka natna belhchhah tura an induatna thu vêl chhiar chu ka chak hlawl lo a ni.
"Zo, Bawihtea hruai pahin ka nute in lamah va lêng phei ang hmiang?" ka aw chu ka thian zui kharh a.
"Nangmahin va kal rawh!"
"Kan pahnihin kan lêng phei ang tih ka lo sawi tawh si a, tunlâi chu i lang khât ang reng bawk nen ka pa sawn a sawi ve ziah che a, kal ve ngei thei la chu a ṭha ka ti.." inti pâukhauh luiin aw nêm deuh zawkin ka ti a.
A ṭhutna aṭang chuan a tho vut a," Ka hman lo, kalna tur ka nei, " tih pahin kan room lam pan chuan a kal ta daih a.
Eng tik aṭang khan nge a thinlungin min hlat ṭan ka hre hauh lo a, a taksa erawh chuan thlahnih kal ta mai aṭang khan min hlat thung. Ka hriat tirh khan ka na viau a, ṭhiante kâ aṭangin hmeichhe kawp a nei tih ka hre ta zauh zauh bawk nen ka mu ṭha lo a, thil ka ei ṭha hek lo. Ka taksa lo tla ta deuh leh ka hlim lo a ni tih chu a hmù a nih pawhin hria angin a awm hauh lo a, kan fapa erawh a duat ngaiin a la duat reng, kei chuan a lak aṭangin duatna leh ngaihsakna ka dawng ngai ta lo thung.
In a chhuahsana a motor thawm a reh hnu pawh chuan ka dinna ngaiah ka la ding ta reng a, tlawm ka inti vawng vawng kher mai! A duh loh zâwnga ka awm leh a pawi ka sawi ka hre lo a, a chhûngte nen lah kan inti ṭha hle bawk si. Eng vanga kei aia midang bula nawmna zawng ta tlat nge a nih chu ka hrethiam lo a, amah ka enkawl dan leh nupa nun kan hman dan chenin a lungawi ṭhinzia leh ka chunga a läwmzia pawh min hrilh fo ṭhin kha a ni si a, heti taka min hlat thei ta mai hi nâ ka tih piahlamah mak ka ti tawp thei lo a ni.
Bawihtea hmuha hlim lo hmel put ka duh loh avangin a pite hnen aṭanga ka hruai hnu-ah pawh hlim hmel ka pu lui reng a, a muthilh hnu-a khuma ka muttir takah chuan ka lo insanmar nasatzia chu ka hre ta chauh a, thinlung chhûngrila rum chungin rooma ṭhutthleng kan dahah chuan ka ṭhu thla hnawk a.
Engtia rei nge ka ṭhut ka hre lo, sana ka en chuan zanlâi dár 12:00 a lo pel tawh, ka pasal a lo la haw lo! Eng nge a tih anga tu bulah nge a awm ang tih chu ka hre lutuk tlat, chu chuan namên lovin ka thinlung hliam chu a chhun nat belh a, ka nâ a ni! Mahse, eng ang pawhin nâ ila ka chhungkaw keh chhiat lohna tura theihtawp chhuah chu ka tum ber a la ni fan tho.
Ka fapa bulah chuan mu-in a pa lo haw nghakin ka meng reng a, muthilh pawh tum ila ka thei dâwn lo tih ka hria a, ka tum buai peih lo. Zankhua-in a lo haw lo a, khawvar hnu-ah rawn haw-in inthiam lohna nei hmel pu hauh lovin Bawihtea a pawm a, kei chuan ṭawngkam khat leka biak pawh ka hlawh lo. Ka thiam lohna leh tih dik loh awm ka hriat mîau loh avangin ka awm dan ngai rengin ka awm lui tlat a, min ngaihsak lovin engah mah min ngai lo pawh ni se a fapa nu ka nih vang chauh pawhin a in chhûngah chanvo ka nei tih inhrilh hre luiin ka luhlul ka chhuah lui a, amah chachhuah zâwng leh inhnialpui theihna tur lam hawi zawngin ka ṭawng chhuak duh hauh lo. A awm danah min mamawh tawh lo tih leh a ngaihzawng neih chungchângah ka mitmei a vêng miah lo tih pawh ka hria; mahse, ka dinhmun ka hre chiang a, belh tur nei mumal lo, van lâia tla ang mai ka nih ka theihnghilh lo. Chuvangin, a hmaa min lo duhna leh hmangaihna vang chauh pawh khan a ṭul chen ka tuar ang a, ka nghak ang a, ka hnena a lo kir leh hun a awm ngeiin ka la beisei fan a nih chu!
A inbual a, tukṭhuan chu ngâwi rengin a ei mawlh mawlh a, a ei kham hnu chuan roomah lutin a insiam nghal a, a kal tur chu ka au zui hram a.
"Zo, vawiin chu lo haw hma ve deuh tawh la, Bawihtea'n a ngai ṭhin lutuk che a nia! Tunlâi chu in inawm khât bawk si a, amah vang talin lo haw hma rawh aw..."
"Tih tur pawimawh ka nei a, zanriah hmun dangah ka ei nghal ang, min lo nghak duh suh."
Chhanna ka dawn chhun chuan min va ti beidawngin min va ti na vawng vawng tâk! Mahse, ka bei leh hram hram tur a ni, ka fapa vang tal pawhin chhel taka ka awm a ngai a ni.
Min ngaihtuah avangin ka ṭhiante an rawn lêng a, mahnia inngaihtuahna hun min siamsak duh lovin ho mai mai sawiin an titi nilêng a, kei pawhin Bawihtea khawhar taka a awm ai chuan tiin ka ṭhiante chu zanriah ei ve nghal turin ka chelh a, Bawihtea pawh a hlimin nuam a ti ve hle a ni. Zan dár 9 thleng an awm a, an haw hnu chuan kan nufa-in khawhar takin kan awm dun leh ta rak rak a, Bawihtea a muhil zui leh ta mai bawk si nen mal inti ru tak chungin ka ṭhu a. A hma zanah mu miah lo mah ila ka mut a chhuak eih lo a, rilru nuam lo leh pik tâk chung chuan ka pasal lo haw hun nghak chuan ka ṭhu ran a.
Ka beisei aiin a lo haw hma a, boruak ṭha lo awm lo ang maiin ni danga ka tih ṭhin dan pangngaiin ka lo dawngsawng a, zu rim a nam erawh mâk ka ti viau! Zu hi a in ngai lem lo a, ngaihzawng a nei pawh hi rilru fîm tâk pu chunga a duhthlanna ngeia nei a ni tih ka pawm hmak. Kan inneih hnu hian zanin hi zu rim a nam ka hriat vawihnihna a ni; a vawikhatna chu hnaa a kaisan a ṭhiante nena an lawm ṭum kha a ni a, a rawn inthiam lo haw viau nghe nghe a nih kha.
"Dingte.."
Ka hminga min koh lohna rei tawhzia ka ngaihtuah a, eng thu tâk sawi ang maw tiin ka thin chu a su dup dup a.
"Inthen ang!"
"Aih, ka ṭhen dâwn lo che!"
Lo la thleng ngei tura ka ngaih, a thleng ang tih ka hlauh êm êm si chu a lo thleng ta tak tak e! Ka lûte chu hai mûai mûaiin ka hria a, ka mittui tla tur chu ka dang kir hrâm a, ka thinlung na lutuk chuan min ti chau hluah hluah a, ka bîng mup mup ni maiin ka hria a!
"Ngaihzâwng ka nei tih i hria a, ka hmangaih tawh lo che a ni tih i hre bawkin ka ring! Kan fapa vang chauha la awm dun kan ni; mahse, tunah chuan kan inthen ngei a ṭul tawh," bung vuta a ṭawng chuan eng ang taka nâ-in nge min siam tih reng a ngaihtuah lo!
" Ka ṭhen dâwn lo che! Ṭhen leh turin pasal ka nei lo, " luhlul zetin ka ti a.
" Min ṭhen duh lo mah la, ka ṭhen dâwn tho che. Ṭha taka ka sawipui lâi che hian ka thusawi chu awih mai rawh!"
"Bawihtea vang tal pawh hian inngaihtuah ṭha leh....."
"Ka ngaihtuah fel vek tawh! Republic vênga kan in pakhat saw in nufa-in in luah ang a, in mamawh engkim ka ngaihtuah vek ang."
"Zo, inṭhen ka duh lo!"
"Duh lo mah la, kan inṭhen a ngai. Kan nupa nun hlim lohzia hre reng chungin luhlul chhuah suh."
"Bawihtea hi nu leh pa kâra seilian turin ka duh..."
"Kei pawhin ka duh; mahse, a nu leh pa an hlim dun mîau loh chuan a tuar tur ang ang chu a tuar dâwn tho. Kan inṭhen fel vat hi a ṭha ber!" a ti leh hmawk hmawk a.
"Ka thei lo....."
"I theih a ngai tlat! Lalrini a rai, ka fa a pai mêk!"
A tawp tak tak ta! Sawi leh chuan tur ka nei lo, hnawl ka ni tih ka hria a, phatsan ka ni tih nen. Ka pasalin kei aia duh leh hmangaih a neiha nau hial an lo pai takah chuan ka chhuah ngei a ngai tih ka hre bawk. Kha chen thinlung nâ leh inphahhniamin ka awm a, tunah kan inneihna ka hum thei dâwn ta lo tih ka hriat chian takah chuan ka Pachuau lunglian nihna hi ka hmang ngei dâwn!
"Aw le, i duh ang ngei chuan kan inṭhen ang. Mahse, kan inṭhen a nih chuan nang nena inzawmna pakhat mah neih ka duh tawh lo thung. Ka fapa enkawl thei turin Pathian zârah ka hrisel tawk a, kan nufa ei khawp nanana chu ka thawk chhuak ve thei ngei ang. I lak atang hian cheng khat pawh lâk ka duh dâwn lo a, khawngaihin pawisa min pek emaw, i fapa enkawl emaw hi tum buai miah suh ang che. "
Ka aw-a inrintawkna lo lang chu kei ngei pawhin mâk ka ti! Mahse, chu thil chu ka mamawh êm êm a ni lawi si! Engkim rilru fîm taka ngaihtuah ka duh a, mahni inring tawk taka chet lâk ka duh bawk; ka inchhir lehna tura eng thil pawh tih ka duh lo bur mai a ni.
Ka nu(Zova nu) ka phone a, thil awm dan tlângpui hrilhin kan in lama lo phei turin ka ti a, an beisei loh lutuk thil a thlen avang chuan an hamhaih deuh a. Thil awm dan chiang zawka an hriat takah chuan Zova chu ka pa chuan a hau na kher mai; inṭhen an phal loh bakah kei lo chu mo atân an duh loh thu te, nei pawh ni se mo atân an pawm dâwn loh thute an sawi a. Mahse, thu tlukna kan siam fel tawh a, hawilet kan tum lo ve ve bawk.
Thil thleng thei reng a ni tih ka hriat lawkna khan min hnem nge ka rin ai takin ka dawngsawng thiam a, na lo chu ka ni lo; mahse, ka buai phah lo a, mu leh mal nei lo tur khawpin ka tûar hek lo. Min duh lovin kei aia thlan a nei tih ka hriatna chuan min ti na nameuh mai, ka inrintawkna leh keimaha chapona chhete awm ve avang chuan ka tawrhna leh natna chu tih lan ka tum lo mai chauh a ni. Min duh lova min hnawltu hian ka mittui far khat pawh a phû lo a, amah vanga ka natzia hriat phei chu a phû lo lehzual, tun ang reng hian ka inthunun thei ang em tih erawh ka hre bîk hauh lo thung.
Chumi zan chu inah kan nufa-in kan la riak a, Zova erawh a riak chhuak a, a riahna tur a sawi lo naa Lalrini bulah bâk a riah ka ring lem lo. Ka beisei loh takin khawvar dâwn hnaihah ka lo muhil a, ka mu tui phian ni tur a ni ka harh meuh chuan khua a lo eng uar tawh a. Bawihtea chu khum bul chhuatah a toys khalhin a lo ṭhu a, ka tho min hmuh chuan min lo nuih var var a.
22ND AUGUST
Sbk Pachuau
Zan lamah ka pa ka be fel vek tawh a, tukṭhuan ei hma-in min hruai turin a rawn kal a, an hnenah khawsa dâwn lo mah ila ka pa a nihna angin a ina ka luh phawt chu a ngai hrim hrim a; awm hlen erawh ka tum lo bur a, a rang thei ang bera in luah tur zawna hmuh rual ruala invawmluh chu ka tum dan a ni. Min hringtu ka nu hi ka chhang a pianin a boral a, ka pa hian nupui nei lova min enkawlin ka nau nen pasal kan neih ve ve hnu-ah chauh nupui a nei ve a. A hlimna kan duh ber rualin a nupui chu naupangtê a ni a, ka pa neih sum ita nei nia kan ngaih tlat avangin ka nau nen chuan kan mil viau lo a, keini aia a upat bîk mîau loh avangin kan tán 'nu' ti-a koh chu thil theih loh bur ang a ni. Ani a la naupang ve-in min han biak seuh seuh leh tih lungawi tumna lam kha a la awm vak bîk si lo a, eng emaw chang chuan inbe miah lova kan len ṭumtlak chângte a awm hial ṭhin!
Chutiang teh nuai kan nih avang chuan an hnena chen chu ka tum chhin eih lo a, ka pa-in min dan a tum naa ka rilru ka sawhsawn duh lo. Ka luhlulzia hrechiangtu a ni bawk a, min dan tum buai tawh lovin inhnuai ber, kudam angreng deuh atana kan hman ṭhin chu chei ṭha-in chutah chuan kan nufa-in kan khawsa ve ta rak rak a.
Bungrua kan la fel a, Zova pawhin nupui a nei fel chu a ni zui der a. Ka hmangaih leh duh êm êm, ka thinlung leh engkim ka hlan tawh leh ka innghahna neih chhun ni ṭhin kha midang ta a lo nih takah chuan ka ngaihtuahna aṭanga dahbo tumin ka bei nitin a. Min phatsan avanga zahna, natna leh mualphona min thlen avangin huat ka tum a, hmangaihna dik tâk zawng huatnaa inlet mai turin a lo la inpeih tawk lo a ni ang e ka la hlawhchham rih chu a ni a, theihnghilh châng awm zauh mah se ka thinlung hliam leh a hliamtu ka ngaihtuah erawh a bâng thei meuh rih lo chu a ni e.
Private schoolah thawhna tur ka hmu hlauh mai a, ka fapa chu pre-schoolah dahin nitin kan nufaa kan inchawm vena turin school chu ka kal ve ta tlauh tlauh a, ka thawhna hmun hi private schoolah chuan hlawh an pek ṭhat vena deuh ber pâwl a ni hlauh a, in luah man leh bill neuh neuh pek ngai lo bawk nen kan nufaa kan khawsak nawmna tawk chu ka thawk chhuak ve a. Ka pa'n Bawihtea mamawh eng eng emaw a rawn ngaihtuah reng bawk a, tlai lamah naupang eng emaw zat tuition ka pe bawk nen tlem tlemin ka inkhawl chho thei ta zel a, kan khawsak pawh a zia chho ve telh telh a.
Nikhat ka school bângin ka fapa ka lam tur chu ka tlai deuh tawh avangin hmanhmawh zetin ka kal hlawk hlawk a, an school building kawta a pa-in a lo pawm ka hmuh chuan ka ding chawt a, min râwn hmasa lo leh eng mah min hrilh hmasa lova ka fapa a lo va hruai chhuak ringawt chu ka duh lovin ka thin chu a rim phat a, an bul ka thlen phei chuan Bawihtea te Miss pakhat nen chuan an lo inbe mawlh mawlh a.
Kum chanve a liam tawh a, ka sawi lawk leh duh dan ang ngeiin Zova hnen aṭangin eng mah kan dawng lo a, min pek a tum pawhin ka hnial fithla ṭhak a, ka fapa hi a sum tel lova enkawl seilena ka lâk aṭanga lâk hrantir chu ka tum lo bur mai a ni. Kan inṭhen chhanah a thiam lo zawk a nih mîau avangin ka duh dan ka sawi khan eng mah a sawisel ngam lo niin a lang a, hun eng emaw chen buaina leh harsatna tawk lovin kan nufa-in kan lo awm tawh a, tunah hian rawn inrawlh a tum ta a nih vaih chuan ka theih anga nasa-in ka do let ngei ang.
"Bawihte, lo kal rawh le," tih pahin lâk mai ka tum a, a lo duh hauh lo mai a!
Thinur ru ṭûnin an titina bulah chuan ka lo ding ngâwi reng a, Bawihtea te Miss a kal sawn tâk hnu chuan lâk tumin ka ban leh a, a la duh ta chuang lo nia!
Zova chuan nui suk chungin min en a, "Bawihtea hian min ngâi viau a nih dâwn hi! Zanin chu ka lo riahpui ve mai dâwn em ni ang?" a ti a.
"Teuh lo lutuk! Ka fapa hi ka lâk aṭanga lâk hran tumna rilru pu hlek suh ang che. Nang nen hian inzawmna kan nei tawh lo a, kan nufa nunah hian rawn inrawlh tawh lo la ka läwm khawp ang," thinur vanga aw khur dar darin ka ti a, min elsen ni awm fahranin a lo nui hawk a.
Rum zeta melh pahin,"I duh ang anga i palzut theih turah min ngai miah suh aw! Kan nufa khawvel hi min tih chhiatsak vaih chuan kei aia hmeichhe nasa hi an awm leh tawh kher lo ang, buaina siam zawnga khawsak loh tum kha a finthlak khawp ang," ka ti leh hmak hmak a.
A phone a rawn rik takah chuan remchangah la-in Bawihtea chu ka la ta vat a, ani pawh chuan min lo duh ve ta mai bawk a. Kalpui nghal mai ka tum chu ka banah lo manin min kuai ding a, phone-a a biak chu a buai thu hrilhin a phone chu a ák nghal zat a.
"Ka thlah ang che u."
"Thlah kan ngai lo, kan in awmna kawng chu kan hre ve lutuk, keimahni-in kan kal ve mai ang," ka lo ti hmak a.
Kan inneih chhûng zawng leh kan inṭhen lâi vêl khan amah chachhuah zâwng leh ṭawngkam nâ deuhin vawikhat mah ka ṭawng ngai lo a, chutia ka ṭawng bâk hlar mai leh mahni inveng deuh taka ka awm chu mâk a tih hmel deuhin a lang a, nuihza hmel a pu tho roh lawi a.
A phone a rawn ri leh a, a biak dan aṭang chuan a nupui a nih ka lo ring mai a, kal mai tuma ka pen chu min rawn manbet leh a, min manna kut chu ka phih thla sawk a, hmanhmawh zetin Bawihtea pawm chung chuan ka kal nghal hlawk hlawk a. Ka hnunga a rawn pen thawm ka hriat chuan ka hmanhmawh zual sauh a, taxi lo kal chu phar dingin rang tawkin ka lut a, min ko ri ka hre naa ka chhan duh loh bakah hawi pawh ka hawikir chhin eih lo, kan tlan ta nghal a.
In kan thlen hnu pawh chuan ka la dik thei lawk lo a, hlauhthawnna-in min tur ut ut a ni ber a. Ka fapa hi min chuhpui emaw kan nufa nuna rawn inrawlh buai a tum emaw a nih chuan lo do let tura inpeih ap thei turin ka intih pâukhauh a ngai tih ka hria, theihtawp chhuaha lo dan chu ka tum ruh bur mai a ni.
A reh zui ta deuh vang vang a, mak ka tih deuh chu - Lalrini rai vanga innei ta kha niin ka hre si a, eng emaw nikhuaa han hmuh hian rai angin a lang leh der bawk si lo. Kan inṭhen khan nau a pai tawh a nih chuan tunah lan loh a hun tawh lo a, a chhiat ta em ni ang tihte chu ka rilru-ah a lo awm a, Zova ruih thu ṭhiante kâ aṭangin ka hre leh zauh ṭhin bawk!
Ka thawhna school neitute fapa hi phaia awm reng ṭhin, a zirlai a zawh hnu-a lo haw-in hna dilin a la teihawi rih a, kan thawhpui pakhat nau neih chawlh a lâk avangin chumi âi chu class a rawn la ve ṭhin a, min ngaihsakin min be lumlam peih viau mai. Hna a hmuh zui tâk hnu pawhin schoola lo kal leh zauh a nei ṭhin, chungah chuan Thawhpui ṭhenkhat chuan min fiam zauh zauh reng hlawm a, amah a palianin a inkhaithli ṭha a, a hmel pawh a chhe lo hle. Mahse, ngaihzawng neih lam ka rilru-ah a awm loh bakah min ngaizâwng a ni tih a ṭawngkâa a sawi loh vang nge chutiang zawngin ka lo en lem lo a, a felin ka chungah a ṭha a, kawm nuam ka tih zâwng tak a lo ni bawk nen kan inzui nasa phian thung.
Christmas a hnaih deuh tawh avangin boruak pawh a dai tawh viau a, school pawh kan chawl ṭep tawh a, kâr khat kan kal leh chuan kan chawl zui tawh dâwn a, thaw a veng ru ve hle. School kal tawp ber ni chuan kan bâng hma deuh a, ka ṭhiannu Mami nen bazâr kal kan tum avangin hmanhmawh deuhin ban rûal rûal chuan ka kal nghal a, Mapuia'n ka kalna tur min zawt a, ka hrilh chuan bazâr kal ve duhna neia insawiin kan inphur chhuak dun ta a. Mami chu kan innghahna hmun tura kan sawiah chuan a lo awm vang tawh a, Mapuia nen inhmelhriattirnate neiin bazâr chhung lamah chuan kan lut chho ta nghal a. An vawikhat inhmuhna-ah an innel nghalin an inkawm thei phian a, ka beisei loh takin hun hlimawm tak kan hmangho ta a, kan thil lei duh kan lei fel hnu chuan thingpui dawr pakhatah chawlh tumin kan lut ta dial a.
Thil kan ei mawlh mawlh lâi chuan Mami chuan min rawn nghawk zauh a, a enna lam ka va en ve chuan Zova leh Lalrini lo lut mêk chu ka hmu nghal a, ka hawilet leh rang kher mai. Kan ṭhutna bul maia ṭhutna awlah chuan rawn ṭhu ve-in Lalrini pawh chuan min rawn hmu ve tih hriat takin Zova hnenah, "Sawta saw innu hluite an chawl ve a nih saw," a tih sar sar chu ka hre pha a.
Mami chu ei lo tih hriat takin a lo ner nâng a, ka lo nuih hak thung. An awm ve chu engah mah ka ngai lo tih an hriat ka duh tak zet a, ngâi pawimawh lo tawp anga ka lan theih nan a hmaa ṭawng vak lem lo kha ka ṭawng ta bawrh bawrh a, Mapuia pawh chuan ka pasal hlui a ni tih a lo man thiam ve nghal mai ni tur a ni awm dan kan thiam tlâng kher mai! Lo ruahman lawk sa ang maiin ho mai mai sawiin hlim hmel takin kan nui ham ham reng a, Mami chuan nuam a ti ber maiin ka hria.
Kan chhuah dâwn chuan kal pahin ka melh zawk a, Zova chuan chiang zetin min lo melh a, hlim loh hmel riau hian ka hmu pek a! Mahse, ani hlim leh hlim loh lam chu ka ngaihtuah tur a ni lo tiin ka kalsawn a, ka ngaihtuah zui duh lo lui a. Lalrini khan ka hmuh lâi khan min awhfik niawm fahranin Zova kha a va ngheng vêl ar ar kha a ni a, ka pasal hlui a ni a, hmangaih leh duh taka ka neih a ni bawk. Ka nâ miah lo ti ila chuan ka daw deuh ang a; mahse, a hmaa ka nat ṭhin ang êm êm erawh chuan ka na tawh lo thung.
Zanriah chu ka pate inah kan ei chho a, chaw ei kham hnu chuan rei awm lovin kan haw thla thuai a, in chhûng kan lut fel deuh awrh tihah chuan kawngkâ an rawn kik a, Zova hmel a rawn lang zui zat bawk a, Bawihtea thutthlenga ka dah fel chiah chu rang lutukin ka pawm leh nghal a, chu chu a hmuhin za miah lo tih hriat fahranin a nui lui suk a.
"Zanin chu Bawihtea hi ka bula riak turin ka lo hruai teh ang, ka ngai êm mai!"
A ṭawng zâwng chuan a thil in rim chu a rawn nam hak a, a thil sawi vang chuan ka lo khawng awt thung.
"Teuh lo mai! Tum lui miah suh!" Bawihtea chu ka kuah nghet sauh a.
"Ka fapa a ni a, ka duh chuan ka bula cheng tur pawhin ka hruai daih thei, min dan tum hlek suh!" A ṭawng chu a sehchilh deuh nawk a.
"I nuna kan nufa ai awh tur i thlan fel aṭang khan i nupui ka ni tawh lo ang bawkin i fapa a ni tawh lo. Khawngaihin min chhuahsan teh."
A din danah chuan a rui hle tih a lang reng a, tun hmaa ka hriat ṭhin Zova kha a ang tawh lo kher mai! A ding bu deuh lúk lúk a, a mit sen rûm chuan min melh khui a, mi ràp lek lek zawk hial a ni. Ṭhutthlengsei pakhatah chuan a ṭhu thla a, ṭhut pawh ṭhu ngil hlei thei lovin a ṭhu awn deuh bui a, ka rilru pik rapthlakzia chu pui tak a ni.
Ka pa koh thlak mai tuma ka phone ka khawih lâi tâk chuan kawngkâ an rawn kik a, Mapuia a rawn luh takah chuan ka thaw a veng nghal suai suai a. Zova chu thutthlengah chuan a lo muhil fel der tawh a, zawhna zawt mitmenga Mapuia'n min melh chuan thil awm dan chu ka sawi nghal zung zung a, a lu chu bu nghatin ṭhutthleng pakhatah chuan a ṭhu ta nghal a. Bawihtea chu auvin ani lah chuan phur fahranin ka pawmna aṭang chuan tal chhuakin a pan nghal a, an infiam zui ar ar a. Mapuia hi kan inah a rawn chuang kai zing a, Bawihtea han chhaih vêl leh biak sàwm vêl a peih fû a, Bawihtea pawhin a ngaina hle a, a lo len tawh hi chuan an inkhawih ṭe ṭeng tûng reng zel mai a ni.
Zova a la mut tlat avang chuan Mapuia haw chu ka phal lo a, chu mi zan chuan kan thutthlengsei pakhatah mu-in min riahpui a. Zinga ka va thawh chhuah chuan Zova chu a lo awm tawh lo a, Mapuia pawh lo tho tawhin kal mai inpeihin a lo ṭhu a, ani pawh chuan Zova haw lâi a lo hre bîk lo a, buaina siam lova a lo kalbo leh ta chu ka thaw ru huai a.
Chuta ṭang chuan Zova chuan sawi lawk pawh nei lem lova rawn lan thut thut a chîng ta riau a, ka fapa-in a ngai viau mai si a, engtin emaw tak insawm lunglengin an inawmpui daih mai ang tih chu ka hlau ru kher mai! Chimawm leh ṭawngkam mei nei taka min ṭawng khum a chîng ta viau bawk; Mapuia nena inngaizâwng chhuahin min chhuah a, a rawn riah zana Mapuia riak ve kha changchawiin eng emaw hlekah zalenna hmang khawlo leh mipa duh lutuk angin min sawi leh ṭhin a. Ka ngawih theih chhung ngawih ka duh avangin ka chhang duh ngai lo a, harhfîma a awm ngai loh avangin ka en liam mai mai chang lah a ṭam, ka insum theihna erawh a pan sawt hle.
A nuna kan awm ve duh tawh lovin min kaltîr a, tunah hetia Bawihtea chhuanlama hmanga min rawn tlawh pawh leh fo ṭhin hi ka ngaih dan a ni hauh lo. Ka pa hnena ka sawi lah chuan, "A pa a ni a, a duh hun huna hmù thei turin dikna a nei alawm," a lo ti mai bawk si, ka thaw a pik ru viau a ni.
Christmas tuk a ni a, Bawihtea chu inkhawm turin ka siam mawlh mawlh a, kawngka kik thawm a rawn awm takah chuan ka va hawng leh rih a, Zova chu mitmeng sen rûmin a lo ding kawi chhur a.
"Inkhawm tumin kan lo insiam mêk a, inkhawm ban hunah lo kal leh zawk mai ta che," aw ti nêm luiin ka bia a.
"Ka fapa ka lo awmpui ang, va inkhawm rawh," a ti hmuk a, ka sa phat mai.
"Inkhawm turin ka hruai dâwn a, min dang rèng rèng suh ang che. Nanga zu rui pal mai mai hian ka awm tawh dâwn lo, min dan tum buai miah suh ang che," Ka ti ve ta hmak a, lungawi lo hmel zetin min melh ngur a.
Bawihtea'n a pa ṭawng thawm a hriat veleh a lo tlan phei nghal a, in chhungah lut lo se ka lo tih laiin a pa chu kai lutin zan lama a toys dawhthlakho chu phur zetin a entîr nghal a, tih vak ngaihna hre lo chuan an pafa inkawm chu ngawi rengin ka thlir ta ngawt a.
Dár khatna a rawn ri vâl vâl a, Zova chu rawn hawi chhuakin min en vung vung a, Bawihtea chu pawm nawlhin thutthlengah chuan a thutpui nghal a.
"Bawihte, i nu nen va inkhawm ula, inkhawm bân veleh lo haw vat la, kan inkawm leh dâwn nia aw," a ti leh lawi roh a. "Va inkhawm pui la, ti hian ka lo awm ang, muthilh lawk ka duh," min en pahin a tih zawm zat a.
Bawihtea chuan a duh lo dâwn dâwn a, engtin tin emaw kan inthlem chhuak thei ta hram a, naupang nanana chu pawn kan chhuah rualin a lungawi zui nghal mai a.
Inkhawm banah thingpui pawh in khawtlai lovin ka hawpui leh nghal a, in kan thlen chuan Zova chu a lo la mu tui hle. Ti harh duh lovin Bawihtea chu ka thlak a, kei pawh inthlak nghalin ka inthlak zawh chuan Bawihtea pawmin room aṭangin ka chhuak nghal a.
Ka phone a rawn ri a, Mapuia a lo ni. Kan inbe mawlh mawlh a, kawngkhar a rawn ri dawt dawt a, a rawn inhawng zui nghal zat bawk, lungawi loh hmel taka Lalrini rawn lut chu ngawi rengin ka lo melh tawp!
"Dingte, i la awm em?" Mapuia'n a rawn tih chuan ka lo ngawihsan reng tih ka hrechhuak chawpchilh a.
"Aw.. ih... nakinah ka lo be dâwn che nia," tiin hawihhawm pawh chhuah hman lovin phone chu ka off nghal a.
Lalrini chuan no lo fahrana min melh chungin ṭhutthlenga Zova mu chu a va pan a, tih harh tumin a ko nghal zat a. Peih loh hmel zetin a rawn meng a, Lalrini hmel a hmuh chuan ngaih pawimawh hmel loh zeta insiamremin muthilh tumin a mit a chhîng leh nghal daih a.
"Ka pasal hi lo ti buai tawh suh! A duh tawh lo che a, a ṭhen tawh che tih hi theihnghilh miah suh. Eng vangin nge tih lunglen leh tuma naupang chhuanlama hmangin i ina kal tura i lo sawm ve ziah?"
Lalrini thu rawn phuh chhuah chu mak ka tih piah lamah min ti hrilhhai zawk kher mai! Vawikhat pawh Zova hi kan ina kal turin ka la ti ngai lo a, lo kal miah lo se tih rilruk laia chutianga min han ti chu ka nghing lawih thei a, ka lung a awi lo hle bawk.
"I pasal hi i khuahkhirh ṭha lo deuh a nih ka ring, kan sàwm ni miah lovin tunlai chu a rawn kal reng mai. Keimah ang bawk khan a ning ve leh tawh che a ni mai lo maw?" za miah lova nui lui sak chungin ka ti ve hmiah a, ka thil sawi chuan a ti thinur hle tih a hmelah a lang thei.
"I va zak lo ve mawle! Engtin nge khatiang angtea min han ṭawngkhum ngam zawk chu le ?"
"Mi pasal ngaizâwnga an nupuite luahlantu ka ni lo bawk a, zahna chhan tur ka neih ka hre lo tlat!" ka lo ti hmak a.
"Nang aia a thlan, duh taka a neih ka ni tih hre rawh aw! I duh duha tih kawi theih lo inbeisei rêng rêng suh, i ti sual khawp ang," thinur zetin a ti tán tán a.
"Kei pawh kha duh taka a neih ka ni ve tho asin! Duh taka a neih hi a duh hun chhûng a rei lo leh ang tih ka hlauhpui ngawt mai che," ka tih leh chuan min khawih chak hmel pu-in huatna mitmeng nen min melh reng a.
Ka fapa-in min ko ri ka hriat takah chuan ka harh zawk a, a hriata khatiang ṭawngkam hman kha ka duh ngai hauh lo asin le! Aw ngaihna bei lo leh awka vin a hriat ka duh ngai lo a, vawiin zet chu ka lo insum hman loh mai bakah ka fapa awm ve rêng ka lo hre chang pek lo a nih chu! Lalrini thinrim âng buan buan chu Bawihtea chuan a hlau tih hriat takin min kuah chaih chaih a, ka pawm ta vat a.
"Khawngaih takin ka fapa hriatah khatiang khan awm tawh lo teh! A hlau lutuk a nia, i duh leh ka fapa awm loh hunah i duh tawkin min la ankhum leh zawk dâwn nia," theih tawka aw tinêm luiin ka khap a, a ngai pawimawh lo nasa mai a.
"Nanga fapa kha eng atan mah ka ti lo e, a hlauh leh hlauh loh kha ka ngai pawimawh thertê lo! Ka pasal hi ka lâk aṭanga lakpen tum tawh lo la a ni mai," a ti hmarh hmarh a, Bawihtea vangin ka chhang tawh lo.
"Ka fapa kha i ngai pawimawh lo a nih chuan heta ṭang hian i chhuak thei!"
Zova lam chu kan hawi rual ṭhawt a, a lo ṭhu chhuak tawh a, rum zetin Lalrini chu a melh kul a. Rang zetin a pasal bulah chuan a kal phei a, khawih tuma a va ban chu Zova chuan a lo vaiper lawp a.
" Ka fapa chungchâng hi vawikhat pawh khatianga i sawi leh a nih chuan kut ka thlak hreh hauh dâwn lo che a nia, chu chu theihnghilh ngai suh ang che!"
A aw chu a ring lem lo naa a hlauhawm kher mai, Lalrini pawh a kimchi chawihin ka hria a, a hmaa ṭawng pang pang si kha a ngawi chiang ta kher mai!
An haw tur chu Bawihtea'n a pa a ngen a, kan lo inthlem buai lâi takin Mapuia a lo thleng hlauh a, awlsam tê-in an inthlem lungawi a, in chhûng lamah an inpawm lut ta nghal a, Zova chuan mitmeng hriatthiam har zetin a melh zui vang vang a.
A hma khan Mapuia ka bialpa anga a sawi khan ka lungawi lo lek lek ṭhin kha a ni a, tunah erawh chuan inphenna ṭha tak atan a remchang riauvin ka hria a, min dem leh a nih pawhin hnial tumna ka nei tawh lem lo.
Ka ṭhiante kâ aṭangin Zovate nupa hlim lohzia ka hre leh zauh ṭhin a, a la rei lutuk lem loh avangin ka lo awih lo deuh viau kha a ni a, vawiin a an pahniha ka hmuh dun khan an inpawh lo hle tih ka hmù thiam mai a, nupa hlim tak an nih chu ka ring ta bîk lo tawp mai. Eng pawh chu lo ni ta se, anni pahnih hlim leh hlim loh chu ka tán thil ṭangkai a ni lem lo bawk a, ngaihtuah zui duh lovin Bawihtea leh Mapuia lo inkawm melh melh lam chu ka ngaihven ta zawk a.
Mapuia hian a tir lama min duhthu a sawi bâk kha vawikhat mah a sawi ri leh tawh lo a, ka lo hnar naa min ngaihsak erawh a bâng lo a, kan in a rawn chuankai tlem phah bawk hek lo. Ṭhian inkawm ngeih tak angin kan awm a, Bawihtea'n a lo ngaina bawk nen kan nufa tána awm reng ta nanana chu ka tán pawh ngainat loh theih a ni lo a ni; mahse, chumi avang chuan ka ngaizâwng ve ta tihna a ni lem lo thung.
Kumthar ni chuan Mapuia'n lêng turin kan nufa-in min hruai chhuak ve a, ka ṭhiannu Mami leh a bialpa an lo tel ve bawk a, nuam kan ti tlâng kher mai. Inrawt phur chawpin kan inah eirawng bâwlin chaw kan eikhawm nghal a, zanriah ei khamah kawn chei fang turin kan chhuak leh dial a.
Tlangnuam veng kawnchei kan en hnuhnung ber a, a la hma deuh avangin kan hmanhmawh lem lo. Thlâte la-in kan hlim hle a, Mapuia leh Bawihtea an inpawm chawt a, ka leh awl phian mai. Eng emaw chen kan awm hnu chuan mi an lo kal ṭhahnem ta deuh bawk nen haw mai kan rawt a, Mami'n haw hma vawikhat thlà han lâk leh a duh avangin piah deuhah Mapuia leh Bawihtea nen kan lo nghak a.
"A kawptea han len chhuah vêl chu a nuam viau ang chu maw? Bawihtea vang hian in duh angin nuam in tawl thei dâwn si lo a, in tán a hnawksak mai mai; ka lo hruai haw mai ang e."
Ka pasal hlui chu kan bul maiah rawn dingin a meng sen rûm a, zu rim a nam huam huam bawk. Hmana ka pasal, zahawm taka awm ṭhin, nungchang zahpuiawm lo tak leh smart êm êm ṭhin kha amahah chuan hmuh tur pakhat mah a awm tawh hauh lo! Ka hmangaih hmasa ber a ni a, ka chunga a chet dan kha rilru natthlak viau mah se ka la hmangaih reng a, a khawsak phung lo hniam ta lutukte chu ka lainatin a nun dan hrehawm hmel tâk chu ka khawngaih viau a, a hnena kir leh emaw neih leh lam erawh ka tum tawh lo bur thung.
"Ka fapa hi ka bulah a him tawk a, hnawk kan ti ngai miah lo bawk. Nuhrawn hrawna a awm ka phal lo a, nang pawhin i hmangaih tâk tâk a nih chuan Lalrini te ang enkawlna hnuaia a awm chu i duh bîkin ka ring lo!" A nupui zia ka hre chiang bawk a, tîm eih lovin chu thu chu ka sawi a ni.
"Ni e, i sawi dik! Ka fapa ngei pawh enkawl tlak lovin ka awm a, rawn chuhpui ngam tur che ka ni lo. Mahse, pasal i neih duh hunah i tán a hnawk ang tih ka lo hlauh vang a ni e."
A mitmeng sen rûm chuan min en vang vang a, lungawi lo leh thinur tâk emawa min chhan ka rin laia ṭawngkam dam thlupa min chhâng chu mak ka ti letling hle.
"Pasal a neih duh hunah hnawk ti pawh ni se engtin nge in tih ang? Ka awmpui dâwn lo nasa lutuk tih ka sawi lawk e. Ka fa a ni lo a, ka mawhphurhna a awm lo a, enkawl chu ka bat a ni hek lo."
Lalrini a ni! Engtik laiin nge kan bulah a lo awm ve ka hre lo, a mitmeng thip taka min melh khai pahin a pasal bulah chuan a rawn ding a, ani pawh a mitmeng a phî chiai a, ruih nei hmel a pu bawk.
Lalrini akâra a zurui lehnghal chu khin thamah ka ngai lo a, ka chhang lem lo. Mapuia chu enin min kalsawnpui turin ka mitmei a, a lo manthiam nghal mai a.
"Mamite saw an zo tawhin ka hria a, kan va fin tawh dâwn em ni ang?" Bawihtea pawm ṭhat pahin a ti a.
"Aw le," rang zeta lo chhangin kal mai tumin ka pen nghal a.
"Dingte, khawngaihin min ngaidam la, ka hnenah lo kir leh mai teh. Nang leh Bawihtea tel lova nun hman chu ka peih tawh lo!" ka banah rawn manin beidawng aw zetin a ṭawng a. Ka thil hriat tum loh lutuk ka hriat avang chuan ka lo khawng deuh awt a.
"Eng thu nge maw i sawi le? Nupui nei lâi i nih hi i hre lo em ni?" Lalrini'n a lo ti tuar(h) a, ngaihnep hmel zetin Mapuia'n a lo melh thung.
"Ka nupui leh ka fapa nena kan la chenho lâi rengin a ni lo'm ni ka fa pai anga insawia nei tur chea min nawr tlut tlut ni? Lo ngawi hmak mai rawh!" Zova aw chu a chang ṭha kher mai, ka lo ip chawih a.
Mapuia'n, "He lâi zawng mi an tam em mai, mualpho a hlauhawm e, haw phawt ila, in lamah kan sawi ṭha dâwn nia," a lo ti vat a, Zova chuan a en vung vung a, hreh hmel takin a lû chu a bu ta nghat a.
Inah kan haw tlang nghal a, rilru a phawklek laklawh a, awm a nuam zat lo khawp mai. Mapuia ka rin ai daihin a puitling a, a nupui tel lova Zova rawn kal leh chu patling takin a lo dawr a, Mami thinur lo ri deuh hluai pawh khap betin Zova hnenah chuan hun danga sawi ṭha leh turin thurawn a lo pe a.
"Ni dangah, rui lo hai lovin sawipui zawk la, Dingtei tán pawh dawnsawn a nuam zawkin ka ring! Engtin pawho chhâng che se la, a lo hnial ta che a nih pawhin a laka i khawsak tawh dan kha ngaihtuah la, vui thei i ni dâwn hauh lo a nia. Chu bakah, nupui nei lâi i ni a, nangin i duh vang ringawt khan a lo let leh ngawt thei lo tih kha lo hre bawk la, " Mapuia'n a ti a.
"Bawihtea nu nen hian in inngaizawng em?" Zova chuan Mapuia chu a zawt hmiah a, Mami'n min melh vat a, ka dar ka lo san khum zauh ringawt a.
"Keimah hian ka ngaizâwng a, ani thung hi chuan min duh ve lo. Nitin an ina ka kal chung pawh hian a mitmei vawikhat pawh ka la hmu lo a, hetianga hmeichhe ṭha i hnawl ta mai kha i la inchhir dâwn chauh a nih hmel!" Mapuia'n a lo ti nghat a, Zova chuan a chhâng tawh lo.
A tuk tlaiah rui lovin a rawn kal ta ngei a, ṭha takin engkim kan sawi dun a; ka rilru dik tak hrilhin a hnena kur leh ka tum tawh lohzia leh pangngai taka a awm chho zel a nih chuan Bawihtea chu a fapa a nih ang ngeiin a duh hun hunah a rawn hmu thei tih ka hrilh a, let leh ka tum tawh lo a ni tih a hriat chuan ka luhlulzia a hre chiang bawk a, min nawr ngaihna a hre lo. A nupui nen hlim taka awm tura ka hrilh erawh chuan a ter at a, engti kawng zawng pawha ṭhen ngei ngei a tum a ni tih a sawi hmiah. A theih ang anga a nun siam ṭhata hmalam pan a duh tih a sawi a, Lalrini'n nau pai miah si lo a fa pai anga a lo insawi leh kha chen a lo bum avanga a hun khawhral tâk kha nei kir leh dâwn lo mah se insiam ṭhaa nun zahawm zawk nei leh tura a theihtawp chhuah a tum thu a sawi chuan a theih ngei ka rin thu sawiin ka lo fuih ve bawk a.
A sawi lawk ang ngeiin zu a nghei a, Lalrini a ṭhen hmak bawk. A hnaah a inpe lehzual a, Bawihtea hmu turin kâr tawpah a lo kal ziah a, a fapa-in a ngai bawk a, ka sawisel ngai miah lo. Ka lakah beisei nei deuha ka hriat apiangin hnar dan tur ka la hre zel a, hnar zawh loh hun ka neih erawh ka hläu viau.
Mapuia a lo lang khât ta deuh a, a hnaa a buai chu thuhran ni se ka lakah a beidawng thawkhat ta a ni ber a. Bawihtea a ngaihsak erawh a la tawp lo a, a lo kal chhunah a duh zawng leh toys eng emaw tal a rawn kensak ziah a, ti tawh lo tura ka hrilh lahin a thengthawngah a kal lo nasa mai si a, a tawpah phei chuan ka sawi vêl peih ta lo a, ka en liam ta mai mai a.
Ni khat chu Bawihtea pi leh pu, Zova nu leh pate an lo lêng a, ni dangah pawh Bawihtea hmù turin an lo kal fo a, chumi ṭuma an lo lêng chuan Zova hnena let leh turin min rawn thlem a ni ber a, hnial ngaihna vak ka hre lo naa ka rilru erawh a la khauh khawp mai.
22ND AUGUST
Sbk Pachuau
Chumi kâr tawpah chuan Bawihtea hmu turin a rawn kal ta lo a, a buai deuh anga a lo kal thei lo a nih ka ring mai a. A tuk lamah pawh a lo lang ta lo cheu a, a rawn be miah bawk si lo nen ka rilru chu a nuam lo ru riau a. Chawlhni tlaiah pawh a la reh tâk vang vang avangin ka insûm zo ta lo a, Bawihtea'n a lo lam ve reng bawk nen ka va call ta tawp a. Vawithum a inring ral ṭhak a, ka rilru nawm lohzia chu turu tak a ni!
Zanriah ei hun hma deuhin Zova nu-in min rawn bia a, Zova a damlo a ni tih a sawi chuan ka hmangaihna kha tlem tal pawhin a lo la danglam eih lo a ni tih ka hre nghal a, reh hmak khawpa dam ṭha lo a nih chuan a satliah lo hle ang tih ka hrethiam mai a.
Chaw ei lam ngaihtuah lovin ka insiam sawk sawk a, ka insiam zawhah Bawihtea ka siam ve leh a, muang chang lovin in aṭang chuan ka chhuahpui ta nghal a.
Let leh tawh hauh lo tura ka chhuahsan tawh hnu in kawtah chuan zam deuh takin Bawihtea kaiin ka ding ran a, Bawihtea pa ka ngaihtuah êm avanga kawng tluana rilru fîm pu mang lova ka kal avang khan kan nun hlui ka lo hre phak tawh lo a, chutia a hmun kan han thlen takah chuan mitthla-ah nimin lawka thil thleng ang maiin a lo lang zut zut ta mai si a, rilru buai zetin ka ding ta reng a.
In chhûnga lut lova let leh mai tum rilru pu-a ka awm lâi tâk chuan Bawihtea pi a lo chhuak hlauh a, min hmuh rualin min ko nghal chul a, Bawihtea a pi lam panin a tlan ta nghal mai bawk si nen loh theih lohin in chhûng lamah ka zui lut ve ta a.
Hmel dâng beia a lo muhil ka hmuh chuan ka khawngaih ngei mai! Khati khawpa rawng khan ka lakah khawsa tawh mah se ka la hmangaih miau a, eng vangin nge ka khawngaih loh tehlul ang ni! A pang ka deh chuan a lo sa vur a, Bawihtea pi chuan ni thum lâi eng mah ei mumal lova a awm tawh thu a sawi a, damdawi in lama kal a duh bawk si lo a, in lamah an lo inenkawl chawt mai a lo ni a.
Puan huhin a chal leh a kutte ka dehsak a, nachhawkna-in a chhawk har êm avang chuan Bawihtea pi chuan an in hnuai luah nurse chu va kovin nachhawkna chak deuh hlekin a chiutir ta ringawt a, rei vak lovah a mit rawn mengin a rawn harh chho ve ta viau a.
Ei tur ka siam chu a chák vak lo chung ka ei luihtir a, thil a han ei tâkah chuan a harh ṭha ta phian a. A thisen test hrim hrim ṭhaa kan hriat avangin a tuk lama clinic kal kan rawt a, a duh lo viau naa ka nawr luih tlat avangin min hnial zui ta bîk lem lo.
Zanriah ei lova kal kan nih avangin Bawihtea chu a piin chaw a pe a, kei erawh ka ei chak vak lo bawk nen Zova eitur ka siam chu a tam bawk a, châw pangngai ei lovin chu chu ka ei a, ka puarpui tawk viau tho mai. Zan rei hmaa haw kan tum erawh a piin min chelh tlat a, a tuk zinga inentir a ngaih tho avangin riak mai turin min ti a, keiin inthlakna kan ken loh chhuanlama hmangin ka hnial thung. A tawpah a tuk zing hma taka kan kal leh tur thu sawiin kan hawsan ta hram a, kan hawsan dawna Zova mitmeng chu ka theihnghilh leh thei tawhin ka ring lo! Min ngaia min thlahlel ngawih ngawih hmel a pu a, ngenngawl ngamna chi niin min hre bawk si lo beidawng hmel kha ina kan hawa kan mut hnu pawhin ka mitah a la cham reng mai a ni.
A tuka kan inentir zo chu a pa in lama kan kal tlang ve nghal avangin Bawihtea chu a kalna pre-schoolah ka dah ta lo a, keini erawh exam chawlh kan neih lâi a nih avangin a hranpaa chawlh dil a ngai lo hlauh thung.
Chhunah Bawihtea a pi nen an inawm a, Zova a khúa a sik tawh lo naa a taksa a la chauh deuh avangin a mu a, a bula awm tura min tih avangin thu awih takin ka awm ve mai a. Ka lo muhil ve chu niin ka biang a rawn chul chuan ka harh vat a, ka han dak chhuak a, mitmeng hriatthiam har zetin min lo melh reng a.
Tlaiah rawngbawl hun hmaa haw ka duh avangin Bawihtea ka zawng a, a piin a lo chhuahpui daih a, a kalpuina ka hriat loh avangin han zawn ngaihna vak ka hre lem lo. Rilru bet lo zeta ka awm chu Zova chuan min en reng a, ka lak aṭangin a mit a la sawn eih lo a ni ber e.
Bawihtea leh a pi lêng an lo let har tâk viau-ah chuan hawsan phawt mai chu ka tum a, a piin a rawn dah ve tawh mai a ni ang chu!
Ka haw tur ka sawi chuan a ngawi reng a, min chhan loh avanga haw loh ngawt thu awm hek lo Bawihtea inthlakna ka ken chu ka thlep fel a, bag-ah khungin ka inpeih hnu chuan kal mai tumin ka ding a. Eng mah a la sawi loh avang chuan ngawi rengin ka kal a, kawngkhar ka hawng tur chiah chu ka hnunglam aṭangin ka kawngah a rawn kuah a, min kuah nghet kher mai!
"Khawngaihin kal suh! Bawihtea vang tal pawhin lo let leh rawh. I duh angin ka chungah i phuba chu la la, ka khawih theih loh pawhin awm dâwn mah la, lo let leh hram rawh. Ka mamawh che a, Bawihtea hian nu leh pa kara seilen a mamawh bawk."
A thusawi chu a ti tâk zet tih ka hria a, a lo khawsak tawh danah a inchhirzia ka hmu bawk. Kan fapa-in nu leh pa a mamawh tih a sawi chu a dik ka ti a, ka luhlulna dah ṭhaa awm ve nghal mai chu ka chák tak zet a ni. Mahse, ka chapona chuan min dal ve tlat a, a hunlaia ka tawrhna leh rilru natna kha ka ngaihtuah lui tlat a, min kuahna chu lakthlaksakin a lam hawiin ka lû ka thing a, eng mah sawi lovin ka chhuahsan ta a.
In ka thleng a, ka inbual nghal a, ei rawng ka bawl laiin kawngka an rawn kik a, Bawihtea-te pitu an nih ringin ka va hawng vat a, ka rin loh leh beisei loh ber a lo din tâk luahah chuan ka meng phawk hle a.
Eng mah ka sawi hman lo, min rawn kuah nghal a, Inlak hran ka tum chuan min kuah nghet zual sauh a.
"Engtianga nasa pawhin min hnar mah la, i hmangaihna ka neih let leh hma chu hetah hian ka awm ve tawh dâwn. Min be duh lovin min thinrim khum reng dâwn pawh ni la ka awm tho ang, i laka ṭanga kalbo hi ka tum tawh lo."
Min kuah ngheh êm avang chuan ka che sawn thei lo a, ṭawng mai pawh a harsa hial a, ka chhâng mai thei lo. Tlema min kuahna a tih thawl takah chuan ka thaw huai a, a hmel ka han en chhoh chuan chîng fahranin min lo melh reng a.
" Damlo i nih kha... Eng vanga Heng thleng thlenga rawn kal nge i nih?" ka lo ti hlar a.
"Ka bula i awm lohin ka na zawk a, chuvangin, ka damna turin i bulah ka rawn kal a nih hi! I tel lova nun hman ka duh tawh lo, ka fapa leh nang hi ka nuna mi pawimawh awmchhun in ni tawh. Khawngaihin min hnial hlek suh ang che!" a ti sup a.
"I nu leh pate pawh i nunah an pawimawh ve lo tihna em ni? Keini nufa chauh kan nihte chuan i chhungte lakah a va inthlahrunawm duh dâwn ve!" ka lo ti a, ka lo fiam rilru ve deuh a.
"Anni chu ka pian tirh aṭanga ka thih ni thlenga mi pawimawh tur an ni, a hranpaa sawi tel kher an ngai lem lo. Nang leh ka fapa ka hnena in lo let leh hi ka duhthusam a ni tawp mai a ni," rawn kunhniamin a ti a, a hmuiin ka hmui a rawn sik chuan ka lo hawi sawn zauh a, a rum nghut mai.
"Ka chawhmeh chhuan a liam...." ka sawi zo hman lo, ka hmui chu a hmuiin a rawn chhin hmiah, ka tán hawi sawn ngaihna awm miah lovin ka tukkhumah a dawm bet nghal bawk.
Min thlah a, hnai set sawtah min en a, "Laldingnghet, i mitmenga min hmangaihna lo lang chhuak hi ka hmuh loh ring hauh suh! Ka ta i ni lo a nih pawhin tu ta mah i ni thei ngai dâwn lo tih ka hria!" a aw-a mahni inrintawkna rawn ri tel chu ka hai lo.
"Zoliansang, min phatsan leh mai mai tur chuan a der pawhin min neih leh hi tum chhin hauh suh! A nih loh chuan ka nasatzia hi ka lantîr ang a, i duh miah loh thlengin ka hnuk lui mai ang che," ka ti a, a hmelah nui hmel a rawn lang nghal a.
"Nangtê reuh hi i duh chuan i nghal zek ang tih ka hria alawm. Mahse, i ze chhûngril ṭhatna avang hian midang lakah mawi lo leh ṭha lo taka i chet chhuah duh ngai loh avangin kha kha chu ka hlauthawng vak lo."
"I rin aiin ka lo sual tawh zek maithei asin!" ka lo ti leh a.
A lû a thing a, "Ka fapa nu i nih chhung chuan i sual thei lo tih leh i sual ngai dâwn lo a ni tih hriatna keimaha awm hi dawt a ni lo chiang a!"
"Lalrini pasal hlui hi ka duh dâwn em ni aw!?" ka tih chuan hneh lutukin min hrawm bet a.
"Kha ramhuainu hming kha lam ri hlek suh! I hmui thianghlim tak kha kha mihring hnaisai lo hming leh chanchin sawina atan khan ka phal lo," tih pahin min fawp leh zauh a.
Bawihtea leh a pi an lo thleng a, a pa nen kan lo awm min hmuh chuan hlim zetin a pa lam panin a tlan nghal a, a piin zawhna zawt mitmeng deuha min melh chuan ka hmu lo der tawp a.
Zanah Bawihtea muthilh hnu-in thutthlengseiah kan ṭhu dun a, min kuah chuan ka lo ngheng hnai ve nghal a.
"Bawihtea hi zinga a harh hunah kan inah daih a lo awm tawh dâwn si a, mâk a ti ve khawp ang le!" a ti sup a.
"Kei pawhin ka tho à emaw ka inti ngei ngei ang, mi ina riak kan ang dâwn em a!" ka lo ti a, run hmel zetin min melh a, ka lo nuih thung.
"Haw phei vat ila, mu vat ang!"
"Zanin chu phuba lâknan i bula mut ka tum lo, nang pawhin i duhdanin phuba la rawh min tih kha," ka tih chuan mangan hmel zetin min en a, ka hmela nui hmel a hmuh takah chuan thaw huaiin min kuah nghet sauh a.
A mitmenga lungawina leh hlimna lo lang chu hai theih a ni lo a, hmangaih leh duh takin ka en chho a, duatna leh hmangaihna mitmengin min lo chhawn a, chu zan hlimawm takah chuan lungawi taka inenin hlim takin kan nui dun a.
<<<<<<<<<<<<<<<<<>>>>>>>>>>>>>>>>>
(A thupui '22ND AUGUST' tih hi eng he hu-ah lo ngai lem s'u aw😊... A thupui phuah mai tur ka hre lo a, ka ziah ni(Vawiin) hi ka hmang ta mai a ni e.😊😊..)
Sbk Pachuau
Ka ṭhiannu thinrim âng thawm chu ka ngaithla reng a, lo ṭawng ve emaw, lo inrawlh emaw tumna ka nei lem lo; lo ṭawng ve tum pawh ni ila sawi tur ka hre lo hrim hrim bawk! Ka thinlung chhûngrila natna ka neih chu ka kunpui tlawk tlawk a, ka nat mai bakah ka zak bawk; phatsan tawk tawhtute lo nat turzia leh an thil paltlang rapthlak turzia pawh ka ngaihtuah thleng nghal vek!
"A hrim hrimah, neih loh che hlauvin khati khawp khan a hèl nasa che a, keini thleng thlenga min be ṭha-in kan läwm zawng leh duh zawng tih hreh lo khawp khan a inphahhniam thei a, in innei ta cheng a, hetianga a phatsan leh mai thei che hi a nunrawnthlak lutuk! A thiltih man hi chu a la tuar ve khawp ang... "
Mami thinrim lutuk leh min ngaihtuah bawk si chu a insawh nasa mai a, kei lah eng mah sawi lovin ka ngawi ngal mai si. Ka tawt up up a, ngaihtuahna mumal pawh ka nei hlei thei lo a. Kan fapa, kum hnih mi lek a pite(kanpa nu) hnena ka dah hlauh chu ka ti fuh hle a ni tih erawh ka ngaihtuah rauh rauh thung.
"Mam, min hrethiam la, keimaha awm ka duh rih tlat mai!" ka ti sap a.
Min en vang vang a, a mitmengah chuan a der mai ni lovin min ngaihtuah tak tak a ni tih a lang reng a, min ngaihtuah hle tih hre mah ila hawihhawm ka chhuah thei lo a, mawihawih ka zawng thei hek lo, mahnia awm chu ka duh ber rih tlat a ni.
"Aw le, ka kal ang. Mahse, thil ṭha lo eng mah tih i tum lo a ni tih min hrilh phawt rawh!"
"Min ngaihtuah suh, chutiang lam ka rilru-ah a awm lo. Fapa ka nei tih ka theihnghilh bîk hleinem, inngaihtuah fîm ka duh mai chauh a ni," ka tih chuan ngaih ngam lutuk lo tih hriat deuhin min melh leh vang vang a, hreh hmel zetin min chhuahsan ta a.
Khumah chuan ka bawk a, ṭap thei ila, ṭap hawm hawm ila ka thawl hawk zawkin ka ring a, ka ṭap thei der mai si lo. Ka tho a, ka vei kual a, ka mitthla-ah ka pasal leh a hmeichhe kaih kha chiang takin an lo lang reng a, ka fapa avang chauh tak takin ngaihtuahna fîm put hram hram ka tum a. Ka thinlung chu nâ eltîang mah se ka fapa hma khúa ngâi tâk chunga ka chet a ngai dâwn a, ka duh dan ang anga awm thei ka ni lo tih ka hriatna chuan thil ṭha lo ka tihna tur lakah pawh min dang chiang khawp mai.
Ka nute chu bia-in Bawihtea chu lo la dah rih lo turin leh zan lama len paha lam ka tum thu chu ka hrilh a. Ni dangah pawh nilênga an awm bakah zanriah ei kham hnu pawha an rawn dah mai loh châng a awm ṭhin a, amah a fel bawk a, min hmuh loh rei pawhin a tlei loh phah lem lo a, a pite bulah chuan a tlei êm êm mai a ni.
Muangchânga tho chhuakin phur lo zetin eirawng ka bâwl a, ka pasalin tui a tih zâwng leh a hmeh ngainat zâwng chu rilru nâ ru tak chung chuan ka siam a, rawng ka bawl zawh hnu chuan inbual turin bual inah ka lut zui ta nghal a. Ni danga a lo haw hun a la ni chuang lova tiin hmanhmawh miah lovin ka inbual a, ka ngaihtuahna chuan hmun tin kil tin a dap kual a, ka dinhmun ngaihtuahin pasal ṭhen thei ka ni lo a, lo inṭhen ta ni ila ka pate hnen lamah ka kir duh dâwn lo chiang sâ a. Mahse, kalna tur dang ka neih lohzia leh ka belh tlak chhungte ka neih lohzia chu ka hre chiang ngang thung.
Ka ngaihtuahna ka lo kawm rei deuh ni ngei tur a ni ka inbual zawh meuh chuan khua a lo thim titih tawh a, bathroom aṭanga ka chhuah chuan ka pasal chu châw ei dawhkan bulah a lo ding rûn a, ka hmu thut chu ka phû deuh zawk a.
Zanriah ei lâi chuan ka be lui hram hram a, nidang ang bawkin tawite tea chhanna bâk ka dawng lo. A hma kha chuan ṭhian leh hmelhriat ṭhenkhatte kâ aṭangin ka hre zauh zauh a, ka ringhlel naa ka mit ngeia ka hmuh hma kha chuan ka awih duh lo lui a, ka awih phal lo a ni ber zawk ang chu! Tunah erawh a chiang thawkhat ta viau, ka mit hmuhah ngei kut insuihin a kalpui ngam a, kei chu a eng mah ni lo ang maiin min kal pel a nih kha!
Hmangaih leh duh taka ka neih a ni a, ka fapa pa a ni bawk. Inṭhen ka duh loh avangin ka lungawi lohna ti lang ngam lovin a ṭha thei ang bera dawngsawng turin ka rilru ka siam kha a ni a, a taka bawhzui erawh a har fat thung. Ka biakna apiang ngaihven lo tih hriat lutukin min chhâng liam vek a, min chhan tâk miah loh ṭum pawh a awm bawk. Nâ hle mah ila ka theih ang chen chen chelha ka lam a hawi leh theihna tur atan theihtawp chhuah chu ka duh tak zet a, chu chu ka ti thei ang em tih erawh ka chiang bîk hauh lo thung!
Thleng vêl ka seng fel zawh hnu chuan nui hmel pu luiin a ṭhutna lam pan chuan ka phei a, a phone-ah chuan eng emaw a lo type mêk a, a bula ka va din pawh chuan hria anga awm lovin a awm dan a danglam phah eih lo. A phone chu laksawn emaw ka hmuh theih loh tura dah emaw a tum hran lo a, hmù mah ila pawi a ti miah lo tih a lang reng; mahse, ka melh duh lo lui tlat a, ka natna belhchhah tura an induatna thu vêl chhiar chu ka chak hlawl lo a ni.
"Zo, Bawihtea hruai pahin ka nute in lamah va lêng phei ang hmiang?" ka aw chu ka thian zui kharh a.
"Nangmahin va kal rawh!"
"Kan pahnihin kan lêng phei ang tih ka lo sawi tawh si a, tunlâi chu i lang khât ang reng bawk nen ka pa sawn a sawi ve ziah che a, kal ve ngei thei la chu a ṭha ka ti.." inti pâukhauh luiin aw nêm deuh zawkin ka ti a.
A ṭhutna aṭang chuan a tho vut a," Ka hman lo, kalna tur ka nei, " tih pahin kan room lam pan chuan a kal ta daih a.
Eng tik aṭang khan nge a thinlungin min hlat ṭan ka hre hauh lo a, a taksa erawh chuan thlahnih kal ta mai aṭang khan min hlat thung. Ka hriat tirh khan ka na viau a, ṭhiante kâ aṭangin hmeichhe kawp a nei tih ka hre ta zauh zauh bawk nen ka mu ṭha lo a, thil ka ei ṭha hek lo. Ka taksa lo tla ta deuh leh ka hlim lo a ni tih chu a hmù a nih pawhin hria angin a awm hauh lo a, kan fapa erawh a duat ngaiin a la duat reng, kei chuan a lak aṭangin duatna leh ngaihsakna ka dawng ngai ta lo thung.
In a chhuahsana a motor thawm a reh hnu pawh chuan ka dinna ngaiah ka la ding ta reng a, tlawm ka inti vawng vawng kher mai! A duh loh zâwnga ka awm leh a pawi ka sawi ka hre lo a, a chhûngte nen lah kan inti ṭha hle bawk si. Eng vanga kei aia midang bula nawmna zawng ta tlat nge a nih chu ka hrethiam lo a, amah ka enkawl dan leh nupa nun kan hman dan chenin a lungawi ṭhinzia leh ka chunga a läwmzia pawh min hrilh fo ṭhin kha a ni si a, heti taka min hlat thei ta mai hi nâ ka tih piahlamah mak ka ti tawp thei lo a ni.
Bawihtea hmuha hlim lo hmel put ka duh loh avangin a pite hnen aṭanga ka hruai hnu-ah pawh hlim hmel ka pu lui reng a, a muthilh hnu-a khuma ka muttir takah chuan ka lo insanmar nasatzia chu ka hre ta chauh a, thinlung chhûngrila rum chungin rooma ṭhutthleng kan dahah chuan ka ṭhu thla hnawk a.
Engtia rei nge ka ṭhut ka hre lo, sana ka en chuan zanlâi dár 12:00 a lo pel tawh, ka pasal a lo la haw lo! Eng nge a tih anga tu bulah nge a awm ang tih chu ka hre lutuk tlat, chu chuan namên lovin ka thinlung hliam chu a chhun nat belh a, ka nâ a ni! Mahse, eng ang pawhin nâ ila ka chhungkaw keh chhiat lohna tura theihtawp chhuah chu ka tum ber a la ni fan tho.
Ka fapa bulah chuan mu-in a pa lo haw nghakin ka meng reng a, muthilh pawh tum ila ka thei dâwn lo tih ka hria a, ka tum buai peih lo. Zankhua-in a lo haw lo a, khawvar hnu-ah rawn haw-in inthiam lohna nei hmel pu hauh lovin Bawihtea a pawm a, kei chuan ṭawngkam khat leka biak pawh ka hlawh lo. Ka thiam lohna leh tih dik loh awm ka hriat mîau loh avangin ka awm dan ngai rengin ka awm lui tlat a, min ngaihsak lovin engah mah min ngai lo pawh ni se a fapa nu ka nih vang chauh pawhin a in chhûngah chanvo ka nei tih inhrilh hre luiin ka luhlul ka chhuah lui a, amah chachhuah zâwng leh inhnialpui theihna tur lam hawi zawngin ka ṭawng chhuak duh hauh lo. A awm danah min mamawh tawh lo tih leh a ngaihzawng neih chungchângah ka mitmei a vêng miah lo tih pawh ka hria; mahse, ka dinhmun ka hre chiang a, belh tur nei mumal lo, van lâia tla ang mai ka nih ka theihnghilh lo. Chuvangin, a hmaa min lo duhna leh hmangaihna vang chauh pawh khan a ṭul chen ka tuar ang a, ka nghak ang a, ka hnena a lo kir leh hun a awm ngeiin ka la beisei fan a nih chu!
A inbual a, tukṭhuan chu ngâwi rengin a ei mawlh mawlh a, a ei kham hnu chuan roomah lutin a insiam nghal a, a kal tur chu ka au zui hram a.
"Zo, vawiin chu lo haw hma ve deuh tawh la, Bawihtea'n a ngai ṭhin lutuk che a nia! Tunlâi chu in inawm khât bawk si a, amah vang talin lo haw hma rawh aw..."
"Tih tur pawimawh ka nei a, zanriah hmun dangah ka ei nghal ang, min lo nghak duh suh."
Chhanna ka dawn chhun chuan min va ti beidawngin min va ti na vawng vawng tâk! Mahse, ka bei leh hram hram tur a ni, ka fapa vang tal pawhin chhel taka ka awm a ngai a ni.
Min ngaihtuah avangin ka ṭhiante an rawn lêng a, mahnia inngaihtuahna hun min siamsak duh lovin ho mai mai sawiin an titi nilêng a, kei pawhin Bawihtea khawhar taka a awm ai chuan tiin ka ṭhiante chu zanriah ei ve nghal turin ka chelh a, Bawihtea pawh a hlimin nuam a ti ve hle a ni. Zan dár 9 thleng an awm a, an haw hnu chuan kan nufa-in khawhar takin kan awm dun leh ta rak rak a, Bawihtea a muhil zui leh ta mai bawk si nen mal inti ru tak chungin ka ṭhu a. A hma zanah mu miah lo mah ila ka mut a chhuak eih lo a, rilru nuam lo leh pik tâk chung chuan ka pasal lo haw hun nghak chuan ka ṭhu ran a.
Ka beisei aiin a lo haw hma a, boruak ṭha lo awm lo ang maiin ni danga ka tih ṭhin dan pangngaiin ka lo dawngsawng a, zu rim a nam erawh mâk ka ti viau! Zu hi a in ngai lem lo a, ngaihzawng a nei pawh hi rilru fîm tâk pu chunga a duhthlanna ngeia nei a ni tih ka pawm hmak. Kan inneih hnu hian zanin hi zu rim a nam ka hriat vawihnihna a ni; a vawikhatna chu hnaa a kaisan a ṭhiante nena an lawm ṭum kha a ni a, a rawn inthiam lo haw viau nghe nghe a nih kha.
"Dingte.."
Ka hminga min koh lohna rei tawhzia ka ngaihtuah a, eng thu tâk sawi ang maw tiin ka thin chu a su dup dup a.
"Inthen ang!"
"Aih, ka ṭhen dâwn lo che!"
Lo la thleng ngei tura ka ngaih, a thleng ang tih ka hlauh êm êm si chu a lo thleng ta tak tak e! Ka lûte chu hai mûai mûaiin ka hria a, ka mittui tla tur chu ka dang kir hrâm a, ka thinlung na lutuk chuan min ti chau hluah hluah a, ka bîng mup mup ni maiin ka hria a!
"Ngaihzâwng ka nei tih i hria a, ka hmangaih tawh lo che a ni tih i hre bawkin ka ring! Kan fapa vang chauha la awm dun kan ni; mahse, tunah chuan kan inthen ngei a ṭul tawh," bung vuta a ṭawng chuan eng ang taka nâ-in nge min siam tih reng a ngaihtuah lo!
" Ka ṭhen dâwn lo che! Ṭhen leh turin pasal ka nei lo, " luhlul zetin ka ti a.
" Min ṭhen duh lo mah la, ka ṭhen dâwn tho che. Ṭha taka ka sawipui lâi che hian ka thusawi chu awih mai rawh!"
"Bawihtea vang tal pawh hian inngaihtuah ṭha leh....."
"Ka ngaihtuah fel vek tawh! Republic vênga kan in pakhat saw in nufa-in in luah ang a, in mamawh engkim ka ngaihtuah vek ang."
"Zo, inṭhen ka duh lo!"
"Duh lo mah la, kan inṭhen a ngai. Kan nupa nun hlim lohzia hre reng chungin luhlul chhuah suh."
"Bawihtea hi nu leh pa kâra seilian turin ka duh..."
"Kei pawhin ka duh; mahse, a nu leh pa an hlim dun mîau loh chuan a tuar tur ang ang chu a tuar dâwn tho. Kan inṭhen fel vat hi a ṭha ber!" a ti leh hmawk hmawk a.
"Ka thei lo....."
"I theih a ngai tlat! Lalrini a rai, ka fa a pai mêk!"
A tawp tak tak ta! Sawi leh chuan tur ka nei lo, hnawl ka ni tih ka hria a, phatsan ka ni tih nen. Ka pasalin kei aia duh leh hmangaih a neiha nau hial an lo pai takah chuan ka chhuah ngei a ngai tih ka hre bawk. Kha chen thinlung nâ leh inphahhniamin ka awm a, tunah kan inneihna ka hum thei dâwn ta lo tih ka hriat chian takah chuan ka Pachuau lunglian nihna hi ka hmang ngei dâwn!
"Aw le, i duh ang ngei chuan kan inṭhen ang. Mahse, kan inṭhen a nih chuan nang nena inzawmna pakhat mah neih ka duh tawh lo thung. Ka fapa enkawl thei turin Pathian zârah ka hrisel tawk a, kan nufa ei khawp nanana chu ka thawk chhuak ve thei ngei ang. I lak atang hian cheng khat pawh lâk ka duh dâwn lo a, khawngaihin pawisa min pek emaw, i fapa enkawl emaw hi tum buai miah suh ang che. "
Ka aw-a inrintawkna lo lang chu kei ngei pawhin mâk ka ti! Mahse, chu thil chu ka mamawh êm êm a ni lawi si! Engkim rilru fîm taka ngaihtuah ka duh a, mahni inring tawk taka chet lâk ka duh bawk; ka inchhir lehna tura eng thil pawh tih ka duh lo bur mai a ni.
Ka nu(Zova nu) ka phone a, thil awm dan tlângpui hrilhin kan in lama lo phei turin ka ti a, an beisei loh lutuk thil a thlen avang chuan an hamhaih deuh a. Thil awm dan chiang zawka an hriat takah chuan Zova chu ka pa chuan a hau na kher mai; inṭhen an phal loh bakah kei lo chu mo atân an duh loh thu te, nei pawh ni se mo atân an pawm dâwn loh thute an sawi a. Mahse, thu tlukna kan siam fel tawh a, hawilet kan tum lo ve ve bawk.
Thil thleng thei reng a ni tih ka hriat lawkna khan min hnem nge ka rin ai takin ka dawngsawng thiam a, na lo chu ka ni lo; mahse, ka buai phah lo a, mu leh mal nei lo tur khawpin ka tûar hek lo. Min duh lovin kei aia thlan a nei tih ka hriatna chuan min ti na nameuh mai, ka inrintawkna leh keimaha chapona chhete awm ve avang chuan ka tawrhna leh natna chu tih lan ka tum lo mai chauh a ni. Min duh lova min hnawltu hian ka mittui far khat pawh a phû lo a, amah vanga ka natzia hriat phei chu a phû lo lehzual, tun ang reng hian ka inthunun thei ang em tih erawh ka hre bîk hauh lo thung.
Chumi zan chu inah kan nufa-in kan la riak a, Zova erawh a riak chhuak a, a riahna tur a sawi lo naa Lalrini bulah bâk a riah ka ring lem lo. Ka beisei loh takin khawvar dâwn hnaihah ka lo muhil a, ka mu tui phian ni tur a ni ka harh meuh chuan khua a lo eng uar tawh a. Bawihtea chu khum bul chhuatah a toys khalhin a lo ṭhu a, ka tho min hmuh chuan min lo nuih var var a.
22ND AUGUST
Sbk Pachuau
Zan lamah ka pa ka be fel vek tawh a, tukṭhuan ei hma-in min hruai turin a rawn kal a, an hnenah khawsa dâwn lo mah ila ka pa a nihna angin a ina ka luh phawt chu a ngai hrim hrim a; awm hlen erawh ka tum lo bur a, a rang thei ang bera in luah tur zawna hmuh rual ruala invawmluh chu ka tum dan a ni. Min hringtu ka nu hi ka chhang a pianin a boral a, ka pa hian nupui nei lova min enkawlin ka nau nen pasal kan neih ve ve hnu-ah chauh nupui a nei ve a. A hlimna kan duh ber rualin a nupui chu naupangtê a ni a, ka pa neih sum ita nei nia kan ngaih tlat avangin ka nau nen chuan kan mil viau lo a, keini aia a upat bîk mîau loh avangin kan tán 'nu' ti-a koh chu thil theih loh bur ang a ni. Ani a la naupang ve-in min han biak seuh seuh leh tih lungawi tumna lam kha a la awm vak bîk si lo a, eng emaw chang chuan inbe miah lova kan len ṭumtlak chângte a awm hial ṭhin!
Chutiang teh nuai kan nih avang chuan an hnena chen chu ka tum chhin eih lo a, ka pa-in min dan a tum naa ka rilru ka sawhsawn duh lo. Ka luhlulzia hrechiangtu a ni bawk a, min dan tum buai tawh lovin inhnuai ber, kudam angreng deuh atana kan hman ṭhin chu chei ṭha-in chutah chuan kan nufa-in kan khawsa ve ta rak rak a.
Bungrua kan la fel a, Zova pawhin nupui a nei fel chu a ni zui der a. Ka hmangaih leh duh êm êm, ka thinlung leh engkim ka hlan tawh leh ka innghahna neih chhun ni ṭhin kha midang ta a lo nih takah chuan ka ngaihtuahna aṭanga dahbo tumin ka bei nitin a. Min phatsan avanga zahna, natna leh mualphona min thlen avangin huat ka tum a, hmangaihna dik tâk zawng huatnaa inlet mai turin a lo la inpeih tawk lo a ni ang e ka la hlawhchham rih chu a ni a, theihnghilh châng awm zauh mah se ka thinlung hliam leh a hliamtu ka ngaihtuah erawh a bâng thei meuh rih lo chu a ni e.
Private schoolah thawhna tur ka hmu hlauh mai a, ka fapa chu pre-schoolah dahin nitin kan nufaa kan inchawm vena turin school chu ka kal ve ta tlauh tlauh a, ka thawhna hmun hi private schoolah chuan hlawh an pek ṭhat vena deuh ber pâwl a ni hlauh a, in luah man leh bill neuh neuh pek ngai lo bawk nen kan nufaa kan khawsak nawmna tawk chu ka thawk chhuak ve a. Ka pa'n Bawihtea mamawh eng eng emaw a rawn ngaihtuah reng bawk a, tlai lamah naupang eng emaw zat tuition ka pe bawk nen tlem tlemin ka inkhawl chho thei ta zel a, kan khawsak pawh a zia chho ve telh telh a.
Nikhat ka school bângin ka fapa ka lam tur chu ka tlai deuh tawh avangin hmanhmawh zetin ka kal hlawk hlawk a, an school building kawta a pa-in a lo pawm ka hmuh chuan ka ding chawt a, min râwn hmasa lo leh eng mah min hrilh hmasa lova ka fapa a lo va hruai chhuak ringawt chu ka duh lovin ka thin chu a rim phat a, an bul ka thlen phei chuan Bawihtea te Miss pakhat nen chuan an lo inbe mawlh mawlh a.
Kum chanve a liam tawh a, ka sawi lawk leh duh dan ang ngeiin Zova hnen aṭangin eng mah kan dawng lo a, min pek a tum pawhin ka hnial fithla ṭhak a, ka fapa hi a sum tel lova enkawl seilena ka lâk aṭanga lâk hrantir chu ka tum lo bur mai a ni. Kan inṭhen chhanah a thiam lo zawk a nih mîau avangin ka duh dan ka sawi khan eng mah a sawisel ngam lo niin a lang a, hun eng emaw chen buaina leh harsatna tawk lovin kan nufa-in kan lo awm tawh a, tunah hian rawn inrawlh a tum ta a nih vaih chuan ka theih anga nasa-in ka do let ngei ang.
"Bawihte, lo kal rawh le," tih pahin lâk mai ka tum a, a lo duh hauh lo mai a!
Thinur ru ṭûnin an titina bulah chuan ka lo ding ngâwi reng a, Bawihtea te Miss a kal sawn tâk hnu chuan lâk tumin ka ban leh a, a la duh ta chuang lo nia!
Zova chuan nui suk chungin min en a, "Bawihtea hian min ngâi viau a nih dâwn hi! Zanin chu ka lo riahpui ve mai dâwn em ni ang?" a ti a.
"Teuh lo lutuk! Ka fapa hi ka lâk aṭanga lâk hran tumna rilru pu hlek suh ang che. Nang nen hian inzawmna kan nei tawh lo a, kan nufa nunah hian rawn inrawlh tawh lo la ka läwm khawp ang," thinur vanga aw khur dar darin ka ti a, min elsen ni awm fahranin a lo nui hawk a.
Rum zeta melh pahin,"I duh ang anga i palzut theih turah min ngai miah suh aw! Kan nufa khawvel hi min tih chhiatsak vaih chuan kei aia hmeichhe nasa hi an awm leh tawh kher lo ang, buaina siam zawnga khawsak loh tum kha a finthlak khawp ang," ka ti leh hmak hmak a.
A phone a rawn rik takah chuan remchangah la-in Bawihtea chu ka la ta vat a, ani pawh chuan min lo duh ve ta mai bawk a. Kalpui nghal mai ka tum chu ka banah lo manin min kuai ding a, phone-a a biak chu a buai thu hrilhin a phone chu a ák nghal zat a.
"Ka thlah ang che u."
"Thlah kan ngai lo, kan in awmna kawng chu kan hre ve lutuk, keimahni-in kan kal ve mai ang," ka lo ti hmak a.
Kan inneih chhûng zawng leh kan inṭhen lâi vêl khan amah chachhuah zâwng leh ṭawngkam nâ deuhin vawikhat mah ka ṭawng ngai lo a, chutia ka ṭawng bâk hlar mai leh mahni inveng deuh taka ka awm chu mâk a tih hmel deuhin a lang a, nuihza hmel a pu tho roh lawi a.
A phone a rawn ri leh a, a biak dan aṭang chuan a nupui a nih ka lo ring mai a, kal mai tuma ka pen chu min rawn manbet leh a, min manna kut chu ka phih thla sawk a, hmanhmawh zetin Bawihtea pawm chung chuan ka kal nghal hlawk hlawk a. Ka hnunga a rawn pen thawm ka hriat chuan ka hmanhmawh zual sauh a, taxi lo kal chu phar dingin rang tawkin ka lut a, min ko ri ka hre naa ka chhan duh loh bakah hawi pawh ka hawikir chhin eih lo, kan tlan ta nghal a.
In kan thlen hnu pawh chuan ka la dik thei lawk lo a, hlauhthawnna-in min tur ut ut a ni ber a. Ka fapa hi min chuhpui emaw kan nufa nuna rawn inrawlh buai a tum emaw a nih chuan lo do let tura inpeih ap thei turin ka intih pâukhauh a ngai tih ka hria, theihtawp chhuaha lo dan chu ka tum ruh bur mai a ni.
A reh zui ta deuh vang vang a, mak ka tih deuh chu - Lalrini rai vanga innei ta kha niin ka hre si a, eng emaw nikhuaa han hmuh hian rai angin a lang leh der bawk si lo. Kan inṭhen khan nau a pai tawh a nih chuan tunah lan loh a hun tawh lo a, a chhiat ta em ni ang tihte chu ka rilru-ah a lo awm a, Zova ruih thu ṭhiante kâ aṭangin ka hre leh zauh ṭhin bawk!
Ka thawhna school neitute fapa hi phaia awm reng ṭhin, a zirlai a zawh hnu-a lo haw-in hna dilin a la teihawi rih a, kan thawhpui pakhat nau neih chawlh a lâk avangin chumi âi chu class a rawn la ve ṭhin a, min ngaihsakin min be lumlam peih viau mai. Hna a hmuh zui tâk hnu pawhin schoola lo kal leh zauh a nei ṭhin, chungah chuan Thawhpui ṭhenkhat chuan min fiam zauh zauh reng hlawm a, amah a palianin a inkhaithli ṭha a, a hmel pawh a chhe lo hle. Mahse, ngaihzawng neih lam ka rilru-ah a awm loh bakah min ngaizâwng a ni tih a ṭawngkâa a sawi loh vang nge chutiang zawngin ka lo en lem lo a, a felin ka chungah a ṭha a, kawm nuam ka tih zâwng tak a lo ni bawk nen kan inzui nasa phian thung.
Christmas a hnaih deuh tawh avangin boruak pawh a dai tawh viau a, school pawh kan chawl ṭep tawh a, kâr khat kan kal leh chuan kan chawl zui tawh dâwn a, thaw a veng ru ve hle. School kal tawp ber ni chuan kan bâng hma deuh a, ka ṭhiannu Mami nen bazâr kal kan tum avangin hmanhmawh deuhin ban rûal rûal chuan ka kal nghal a, Mapuia'n ka kalna tur min zawt a, ka hrilh chuan bazâr kal ve duhna neia insawiin kan inphur chhuak dun ta a. Mami chu kan innghahna hmun tura kan sawiah chuan a lo awm vang tawh a, Mapuia nen inhmelhriattirnate neiin bazâr chhung lamah chuan kan lut chho ta nghal a. An vawikhat inhmuhna-ah an innel nghalin an inkawm thei phian a, ka beisei loh takin hun hlimawm tak kan hmangho ta a, kan thil lei duh kan lei fel hnu chuan thingpui dawr pakhatah chawlh tumin kan lut ta dial a.
Thil kan ei mawlh mawlh lâi chuan Mami chuan min rawn nghawk zauh a, a enna lam ka va en ve chuan Zova leh Lalrini lo lut mêk chu ka hmu nghal a, ka hawilet leh rang kher mai. Kan ṭhutna bul maia ṭhutna awlah chuan rawn ṭhu ve-in Lalrini pawh chuan min rawn hmu ve tih hriat takin Zova hnenah, "Sawta saw innu hluite an chawl ve a nih saw," a tih sar sar chu ka hre pha a.
Mami chu ei lo tih hriat takin a lo ner nâng a, ka lo nuih hak thung. An awm ve chu engah mah ka ngai lo tih an hriat ka duh tak zet a, ngâi pawimawh lo tawp anga ka lan theih nan a hmaa ṭawng vak lem lo kha ka ṭawng ta bawrh bawrh a, Mapuia pawh chuan ka pasal hlui a ni tih a lo man thiam ve nghal mai ni tur a ni awm dan kan thiam tlâng kher mai! Lo ruahman lawk sa ang maiin ho mai mai sawiin hlim hmel takin kan nui ham ham reng a, Mami chuan nuam a ti ber maiin ka hria.
Kan chhuah dâwn chuan kal pahin ka melh zawk a, Zova chuan chiang zetin min lo melh a, hlim loh hmel riau hian ka hmu pek a! Mahse, ani hlim leh hlim loh lam chu ka ngaihtuah tur a ni lo tiin ka kalsawn a, ka ngaihtuah zui duh lo lui a. Lalrini khan ka hmuh lâi khan min awhfik niawm fahranin Zova kha a va ngheng vêl ar ar kha a ni a, ka pasal hlui a ni a, hmangaih leh duh taka ka neih a ni bawk. Ka nâ miah lo ti ila chuan ka daw deuh ang a; mahse, a hmaa ka nat ṭhin ang êm êm erawh chuan ka na tawh lo thung.
Zanriah chu ka pate inah kan ei chho a, chaw ei kham hnu chuan rei awm lovin kan haw thla thuai a, in chhûng kan lut fel deuh awrh tihah chuan kawngkâ an rawn kik a, Zova hmel a rawn lang zui zat bawk a, Bawihtea thutthlenga ka dah fel chiah chu rang lutukin ka pawm leh nghal a, chu chu a hmuhin za miah lo tih hriat fahranin a nui lui suk a.
"Zanin chu Bawihtea hi ka bula riak turin ka lo hruai teh ang, ka ngai êm mai!"
A ṭawng zâwng chuan a thil in rim chu a rawn nam hak a, a thil sawi vang chuan ka lo khawng awt thung.
"Teuh lo mai! Tum lui miah suh!" Bawihtea chu ka kuah nghet sauh a.
"Ka fapa a ni a, ka duh chuan ka bula cheng tur pawhin ka hruai daih thei, min dan tum hlek suh!" A ṭawng chu a sehchilh deuh nawk a.
"I nuna kan nufa ai awh tur i thlan fel aṭang khan i nupui ka ni tawh lo ang bawkin i fapa a ni tawh lo. Khawngaihin min chhuahsan teh."
A din danah chuan a rui hle tih a lang reng a, tun hmaa ka hriat ṭhin Zova kha a ang tawh lo kher mai! A ding bu deuh lúk lúk a, a mit sen rûm chuan min melh khui a, mi ràp lek lek zawk hial a ni. Ṭhutthlengsei pakhatah chuan a ṭhu thla a, ṭhut pawh ṭhu ngil hlei thei lovin a ṭhu awn deuh bui a, ka rilru pik rapthlakzia chu pui tak a ni.
Ka pa koh thlak mai tuma ka phone ka khawih lâi tâk chuan kawngkâ an rawn kik a, Mapuia a rawn luh takah chuan ka thaw a veng nghal suai suai a. Zova chu thutthlengah chuan a lo muhil fel der tawh a, zawhna zawt mitmenga Mapuia'n min melh chuan thil awm dan chu ka sawi nghal zung zung a, a lu chu bu nghatin ṭhutthleng pakhatah chuan a ṭhu ta nghal a. Bawihtea chu auvin ani lah chuan phur fahranin ka pawmna aṭang chuan tal chhuakin a pan nghal a, an infiam zui ar ar a. Mapuia hi kan inah a rawn chuang kai zing a, Bawihtea han chhaih vêl leh biak sàwm vêl a peih fû a, Bawihtea pawhin a ngaina hle a, a lo len tawh hi chuan an inkhawih ṭe ṭeng tûng reng zel mai a ni.
Zova a la mut tlat avang chuan Mapuia haw chu ka phal lo a, chu mi zan chuan kan thutthlengsei pakhatah mu-in min riahpui a. Zinga ka va thawh chhuah chuan Zova chu a lo awm tawh lo a, Mapuia pawh lo tho tawhin kal mai inpeihin a lo ṭhu a, ani pawh chuan Zova haw lâi a lo hre bîk lo a, buaina siam lova a lo kalbo leh ta chu ka thaw ru huai a.
Chuta ṭang chuan Zova chuan sawi lawk pawh nei lem lova rawn lan thut thut a chîng ta riau a, ka fapa-in a ngai viau mai si a, engtin emaw tak insawm lunglengin an inawmpui daih mai ang tih chu ka hlau ru kher mai! Chimawm leh ṭawngkam mei nei taka min ṭawng khum a chîng ta viau bawk; Mapuia nena inngaizâwng chhuahin min chhuah a, a rawn riah zana Mapuia riak ve kha changchawiin eng emaw hlekah zalenna hmang khawlo leh mipa duh lutuk angin min sawi leh ṭhin a. Ka ngawih theih chhung ngawih ka duh avangin ka chhang duh ngai lo a, harhfîma a awm ngai loh avangin ka en liam mai mai chang lah a ṭam, ka insum theihna erawh a pan sawt hle.
A nuna kan awm ve duh tawh lovin min kaltîr a, tunah hetia Bawihtea chhuanlama hmanga min rawn tlawh pawh leh fo ṭhin hi ka ngaih dan a ni hauh lo. Ka pa hnena ka sawi lah chuan, "A pa a ni a, a duh hun huna hmù thei turin dikna a nei alawm," a lo ti mai bawk si, ka thaw a pik ru viau a ni.
Christmas tuk a ni a, Bawihtea chu inkhawm turin ka siam mawlh mawlh a, kawngka kik thawm a rawn awm takah chuan ka va hawng leh rih a, Zova chu mitmeng sen rûmin a lo ding kawi chhur a.
"Inkhawm tumin kan lo insiam mêk a, inkhawm ban hunah lo kal leh zawk mai ta che," aw ti nêm luiin ka bia a.
"Ka fapa ka lo awmpui ang, va inkhawm rawh," a ti hmuk a, ka sa phat mai.
"Inkhawm turin ka hruai dâwn a, min dang rèng rèng suh ang che. Nanga zu rui pal mai mai hian ka awm tawh dâwn lo, min dan tum buai miah suh ang che," Ka ti ve ta hmak a, lungawi lo hmel zetin min melh ngur a.
Bawihtea'n a pa ṭawng thawm a hriat veleh a lo tlan phei nghal a, in chhungah lut lo se ka lo tih laiin a pa chu kai lutin zan lama a toys dawhthlakho chu phur zetin a entîr nghal a, tih vak ngaihna hre lo chuan an pafa inkawm chu ngawi rengin ka thlir ta ngawt a.
Dár khatna a rawn ri vâl vâl a, Zova chu rawn hawi chhuakin min en vung vung a, Bawihtea chu pawm nawlhin thutthlengah chuan a thutpui nghal a.
"Bawihte, i nu nen va inkhawm ula, inkhawm bân veleh lo haw vat la, kan inkawm leh dâwn nia aw," a ti leh lawi roh a. "Va inkhawm pui la, ti hian ka lo awm ang, muthilh lawk ka duh," min en pahin a tih zawm zat a.
Bawihtea chuan a duh lo dâwn dâwn a, engtin tin emaw kan inthlem chhuak thei ta hram a, naupang nanana chu pawn kan chhuah rualin a lungawi zui nghal mai a.
Inkhawm banah thingpui pawh in khawtlai lovin ka hawpui leh nghal a, in kan thlen chuan Zova chu a lo la mu tui hle. Ti harh duh lovin Bawihtea chu ka thlak a, kei pawh inthlak nghalin ka inthlak zawh chuan Bawihtea pawmin room aṭangin ka chhuak nghal a.
Ka phone a rawn ri a, Mapuia a lo ni. Kan inbe mawlh mawlh a, kawngkhar a rawn ri dawt dawt a, a rawn inhawng zui nghal zat bawk, lungawi loh hmel taka Lalrini rawn lut chu ngawi rengin ka lo melh tawp!
"Dingte, i la awm em?" Mapuia'n a rawn tih chuan ka lo ngawihsan reng tih ka hrechhuak chawpchilh a.
"Aw.. ih... nakinah ka lo be dâwn che nia," tiin hawihhawm pawh chhuah hman lovin phone chu ka off nghal a.
Lalrini chuan no lo fahrana min melh chungin ṭhutthlenga Zova mu chu a va pan a, tih harh tumin a ko nghal zat a. Peih loh hmel zetin a rawn meng a, Lalrini hmel a hmuh chuan ngaih pawimawh hmel loh zeta insiamremin muthilh tumin a mit a chhîng leh nghal daih a.
"Ka pasal hi lo ti buai tawh suh! A duh tawh lo che a, a ṭhen tawh che tih hi theihnghilh miah suh. Eng vangin nge tih lunglen leh tuma naupang chhuanlama hmangin i ina kal tura i lo sawm ve ziah?"
Lalrini thu rawn phuh chhuah chu mak ka tih piah lamah min ti hrilhhai zawk kher mai! Vawikhat pawh Zova hi kan ina kal turin ka la ti ngai lo a, lo kal miah lo se tih rilruk laia chutianga min han ti chu ka nghing lawih thei a, ka lung a awi lo hle bawk.
"I pasal hi i khuahkhirh ṭha lo deuh a nih ka ring, kan sàwm ni miah lovin tunlai chu a rawn kal reng mai. Keimah ang bawk khan a ning ve leh tawh che a ni mai lo maw?" za miah lova nui lui sak chungin ka ti ve hmiah a, ka thil sawi chuan a ti thinur hle tih a hmelah a lang thei.
"I va zak lo ve mawle! Engtin nge khatiang angtea min han ṭawngkhum ngam zawk chu le ?"
"Mi pasal ngaizâwnga an nupuite luahlantu ka ni lo bawk a, zahna chhan tur ka neih ka hre lo tlat!" ka lo ti hmak a.
"Nang aia a thlan, duh taka a neih ka ni tih hre rawh aw! I duh duha tih kawi theih lo inbeisei rêng rêng suh, i ti sual khawp ang," thinur zetin a ti tán tán a.
"Kei pawh kha duh taka a neih ka ni ve tho asin! Duh taka a neih hi a duh hun chhûng a rei lo leh ang tih ka hlauhpui ngawt mai che," ka tih leh chuan min khawih chak hmel pu-in huatna mitmeng nen min melh reng a.
Ka fapa-in min ko ri ka hriat takah chuan ka harh zawk a, a hriata khatiang ṭawngkam hman kha ka duh ngai hauh lo asin le! Aw ngaihna bei lo leh awka vin a hriat ka duh ngai lo a, vawiin zet chu ka lo insum hman loh mai bakah ka fapa awm ve rêng ka lo hre chang pek lo a nih chu! Lalrini thinrim âng buan buan chu Bawihtea chuan a hlau tih hriat takin min kuah chaih chaih a, ka pawm ta vat a.
"Khawngaih takin ka fapa hriatah khatiang khan awm tawh lo teh! A hlau lutuk a nia, i duh leh ka fapa awm loh hunah i duh tawkin min la ankhum leh zawk dâwn nia," theih tawka aw tinêm luiin ka khap a, a ngai pawimawh lo nasa mai a.
"Nanga fapa kha eng atan mah ka ti lo e, a hlauh leh hlauh loh kha ka ngai pawimawh thertê lo! Ka pasal hi ka lâk aṭanga lakpen tum tawh lo la a ni mai," a ti hmarh hmarh a, Bawihtea vangin ka chhang tawh lo.
"Ka fapa kha i ngai pawimawh lo a nih chuan heta ṭang hian i chhuak thei!"
Zova lam chu kan hawi rual ṭhawt a, a lo ṭhu chhuak tawh a, rum zetin Lalrini chu a melh kul a. Rang zetin a pasal bulah chuan a kal phei a, khawih tuma a va ban chu Zova chuan a lo vaiper lawp a.
" Ka fapa chungchâng hi vawikhat pawh khatianga i sawi leh a nih chuan kut ka thlak hreh hauh dâwn lo che a nia, chu chu theihnghilh ngai suh ang che!"
A aw chu a ring lem lo naa a hlauhawm kher mai, Lalrini pawh a kimchi chawihin ka hria a, a hmaa ṭawng pang pang si kha a ngawi chiang ta kher mai!
An haw tur chu Bawihtea'n a pa a ngen a, kan lo inthlem buai lâi takin Mapuia a lo thleng hlauh a, awlsam tê-in an inthlem lungawi a, in chhûng lamah an inpawm lut ta nghal a, Zova chuan mitmeng hriatthiam har zetin a melh zui vang vang a.
A hma khan Mapuia ka bialpa anga a sawi khan ka lungawi lo lek lek ṭhin kha a ni a, tunah erawh chuan inphenna ṭha tak atan a remchang riauvin ka hria a, min dem leh a nih pawhin hnial tumna ka nei tawh lem lo.
Ka ṭhiante kâ aṭangin Zovate nupa hlim lohzia ka hre leh zauh ṭhin a, a la rei lutuk lem loh avangin ka lo awih lo deuh viau kha a ni a, vawiin a an pahniha ka hmuh dun khan an inpawh lo hle tih ka hmù thiam mai a, nupa hlim tak an nih chu ka ring ta bîk lo tawp mai. Eng pawh chu lo ni ta se, anni pahnih hlim leh hlim loh chu ka tán thil ṭangkai a ni lem lo bawk a, ngaihtuah zui duh lovin Bawihtea leh Mapuia lo inkawm melh melh lam chu ka ngaihven ta zawk a.
Mapuia hian a tir lama min duhthu a sawi bâk kha vawikhat mah a sawi ri leh tawh lo a, ka lo hnar naa min ngaihsak erawh a bâng lo a, kan in a rawn chuankai tlem phah bawk hek lo. Ṭhian inkawm ngeih tak angin kan awm a, Bawihtea'n a lo ngaina bawk nen kan nufa tána awm reng ta nanana chu ka tán pawh ngainat loh theih a ni lo a ni; mahse, chumi avang chuan ka ngaizâwng ve ta tihna a ni lem lo thung.
Kumthar ni chuan Mapuia'n lêng turin kan nufa-in min hruai chhuak ve a, ka ṭhiannu Mami leh a bialpa an lo tel ve bawk a, nuam kan ti tlâng kher mai. Inrawt phur chawpin kan inah eirawng bâwlin chaw kan eikhawm nghal a, zanriah ei khamah kawn chei fang turin kan chhuak leh dial a.
Tlangnuam veng kawnchei kan en hnuhnung ber a, a la hma deuh avangin kan hmanhmawh lem lo. Thlâte la-in kan hlim hle a, Mapuia leh Bawihtea an inpawm chawt a, ka leh awl phian mai. Eng emaw chen kan awm hnu chuan mi an lo kal ṭhahnem ta deuh bawk nen haw mai kan rawt a, Mami'n haw hma vawikhat thlà han lâk leh a duh avangin piah deuhah Mapuia leh Bawihtea nen kan lo nghak a.
"A kawptea han len chhuah vêl chu a nuam viau ang chu maw? Bawihtea vang hian in duh angin nuam in tawl thei dâwn si lo a, in tán a hnawksak mai mai; ka lo hruai haw mai ang e."
Ka pasal hlui chu kan bul maiah rawn dingin a meng sen rûm a, zu rim a nam huam huam bawk. Hmana ka pasal, zahawm taka awm ṭhin, nungchang zahpuiawm lo tak leh smart êm êm ṭhin kha amahah chuan hmuh tur pakhat mah a awm tawh hauh lo! Ka hmangaih hmasa ber a ni a, ka chunga a chet dan kha rilru natthlak viau mah se ka la hmangaih reng a, a khawsak phung lo hniam ta lutukte chu ka lainatin a nun dan hrehawm hmel tâk chu ka khawngaih viau a, a hnena kir leh emaw neih leh lam erawh ka tum tawh lo bur thung.
"Ka fapa hi ka bulah a him tawk a, hnawk kan ti ngai miah lo bawk. Nuhrawn hrawna a awm ka phal lo a, nang pawhin i hmangaih tâk tâk a nih chuan Lalrini te ang enkawlna hnuaia a awm chu i duh bîkin ka ring lo!" A nupui zia ka hre chiang bawk a, tîm eih lovin chu thu chu ka sawi a ni.
"Ni e, i sawi dik! Ka fapa ngei pawh enkawl tlak lovin ka awm a, rawn chuhpui ngam tur che ka ni lo. Mahse, pasal i neih duh hunah i tán a hnawk ang tih ka lo hlauh vang a ni e."
A mitmeng sen rûm chuan min en vang vang a, lungawi lo leh thinur tâk emawa min chhan ka rin laia ṭawngkam dam thlupa min chhâng chu mak ka ti letling hle.
"Pasal a neih duh hunah hnawk ti pawh ni se engtin nge in tih ang? Ka awmpui dâwn lo nasa lutuk tih ka sawi lawk e. Ka fa a ni lo a, ka mawhphurhna a awm lo a, enkawl chu ka bat a ni hek lo."
Lalrini a ni! Engtik laiin nge kan bulah a lo awm ve ka hre lo, a mitmeng thip taka min melh khai pahin a pasal bulah chuan a rawn ding a, ani pawh a mitmeng a phî chiai a, ruih nei hmel a pu bawk.
Lalrini akâra a zurui lehnghal chu khin thamah ka ngai lo a, ka chhang lem lo. Mapuia chu enin min kalsawnpui turin ka mitmei a, a lo manthiam nghal mai a.
"Mamite saw an zo tawhin ka hria a, kan va fin tawh dâwn em ni ang?" Bawihtea pawm ṭhat pahin a ti a.
"Aw le," rang zeta lo chhangin kal mai tumin ka pen nghal a.
"Dingte, khawngaihin min ngaidam la, ka hnenah lo kir leh mai teh. Nang leh Bawihtea tel lova nun hman chu ka peih tawh lo!" ka banah rawn manin beidawng aw zetin a ṭawng a. Ka thil hriat tum loh lutuk ka hriat avang chuan ka lo khawng deuh awt a.
"Eng thu nge maw i sawi le? Nupui nei lâi i nih hi i hre lo em ni?" Lalrini'n a lo ti tuar(h) a, ngaihnep hmel zetin Mapuia'n a lo melh thung.
"Ka nupui leh ka fapa nena kan la chenho lâi rengin a ni lo'm ni ka fa pai anga insawia nei tur chea min nawr tlut tlut ni? Lo ngawi hmak mai rawh!" Zova aw chu a chang ṭha kher mai, ka lo ip chawih a.
Mapuia'n, "He lâi zawng mi an tam em mai, mualpho a hlauhawm e, haw phawt ila, in lamah kan sawi ṭha dâwn nia," a lo ti vat a, Zova chuan a en vung vung a, hreh hmel takin a lû chu a bu ta nghat a.
Inah kan haw tlang nghal a, rilru a phawklek laklawh a, awm a nuam zat lo khawp mai. Mapuia ka rin ai daihin a puitling a, a nupui tel lova Zova rawn kal leh chu patling takin a lo dawr a, Mami thinur lo ri deuh hluai pawh khap betin Zova hnenah chuan hun danga sawi ṭha leh turin thurawn a lo pe a.
"Ni dangah, rui lo hai lovin sawipui zawk la, Dingtei tán pawh dawnsawn a nuam zawkin ka ring! Engtin pawho chhâng che se la, a lo hnial ta che a nih pawhin a laka i khawsak tawh dan kha ngaihtuah la, vui thei i ni dâwn hauh lo a nia. Chu bakah, nupui nei lâi i ni a, nangin i duh vang ringawt khan a lo let leh ngawt thei lo tih kha lo hre bawk la, " Mapuia'n a ti a.
"Bawihtea nu nen hian in inngaizawng em?" Zova chuan Mapuia chu a zawt hmiah a, Mami'n min melh vat a, ka dar ka lo san khum zauh ringawt a.
"Keimah hian ka ngaizâwng a, ani thung hi chuan min duh ve lo. Nitin an ina ka kal chung pawh hian a mitmei vawikhat pawh ka la hmu lo a, hetianga hmeichhe ṭha i hnawl ta mai kha i la inchhir dâwn chauh a nih hmel!" Mapuia'n a lo ti nghat a, Zova chuan a chhâng tawh lo.
A tuk tlaiah rui lovin a rawn kal ta ngei a, ṭha takin engkim kan sawi dun a; ka rilru dik tak hrilhin a hnena kur leh ka tum tawh lohzia leh pangngai taka a awm chho zel a nih chuan Bawihtea chu a fapa a nih ang ngeiin a duh hun hunah a rawn hmu thei tih ka hrilh a, let leh ka tum tawh lo a ni tih a hriat chuan ka luhlulzia a hre chiang bawk a, min nawr ngaihna a hre lo. A nupui nen hlim taka awm tura ka hrilh erawh chuan a ter at a, engti kawng zawng pawha ṭhen ngei ngei a tum a ni tih a sawi hmiah. A theih ang anga a nun siam ṭhata hmalam pan a duh tih a sawi a, Lalrini'n nau pai miah si lo a fa pai anga a lo insawi leh kha chen a lo bum avanga a hun khawhral tâk kha nei kir leh dâwn lo mah se insiam ṭhaa nun zahawm zawk nei leh tura a theihtawp chhuah a tum thu a sawi chuan a theih ngei ka rin thu sawiin ka lo fuih ve bawk a.
A sawi lawk ang ngeiin zu a nghei a, Lalrini a ṭhen hmak bawk. A hnaah a inpe lehzual a, Bawihtea hmu turin kâr tawpah a lo kal ziah a, a fapa-in a ngai bawk a, ka sawisel ngai miah lo. Ka lakah beisei nei deuha ka hriat apiangin hnar dan tur ka la hre zel a, hnar zawh loh hun ka neih erawh ka hläu viau.
Mapuia a lo lang khât ta deuh a, a hnaa a buai chu thuhran ni se ka lakah a beidawng thawkhat ta a ni ber a. Bawihtea a ngaihsak erawh a la tawp lo a, a lo kal chhunah a duh zawng leh toys eng emaw tal a rawn kensak ziah a, ti tawh lo tura ka hrilh lahin a thengthawngah a kal lo nasa mai si a, a tawpah phei chuan ka sawi vêl peih ta lo a, ka en liam ta mai mai a.
Ni khat chu Bawihtea pi leh pu, Zova nu leh pate an lo lêng a, ni dangah pawh Bawihtea hmù turin an lo kal fo a, chumi ṭuma an lo lêng chuan Zova hnena let leh turin min rawn thlem a ni ber a, hnial ngaihna vak ka hre lo naa ka rilru erawh a la khauh khawp mai.
22ND AUGUST
Sbk Pachuau
Chumi kâr tawpah chuan Bawihtea hmu turin a rawn kal ta lo a, a buai deuh anga a lo kal thei lo a nih ka ring mai a. A tuk lamah pawh a lo lang ta lo cheu a, a rawn be miah bawk si lo nen ka rilru chu a nuam lo ru riau a. Chawlhni tlaiah pawh a la reh tâk vang vang avangin ka insûm zo ta lo a, Bawihtea'n a lo lam ve reng bawk nen ka va call ta tawp a. Vawithum a inring ral ṭhak a, ka rilru nawm lohzia chu turu tak a ni!
Zanriah ei hun hma deuhin Zova nu-in min rawn bia a, Zova a damlo a ni tih a sawi chuan ka hmangaihna kha tlem tal pawhin a lo la danglam eih lo a ni tih ka hre nghal a, reh hmak khawpa dam ṭha lo a nih chuan a satliah lo hle ang tih ka hrethiam mai a.
Chaw ei lam ngaihtuah lovin ka insiam sawk sawk a, ka insiam zawhah Bawihtea ka siam ve leh a, muang chang lovin in aṭang chuan ka chhuahpui ta nghal a.
Let leh tawh hauh lo tura ka chhuahsan tawh hnu in kawtah chuan zam deuh takin Bawihtea kaiin ka ding ran a, Bawihtea pa ka ngaihtuah êm avanga kawng tluana rilru fîm pu mang lova ka kal avang khan kan nun hlui ka lo hre phak tawh lo a, chutia a hmun kan han thlen takah chuan mitthla-ah nimin lawka thil thleng ang maiin a lo lang zut zut ta mai si a, rilru buai zetin ka ding ta reng a.
In chhûnga lut lova let leh mai tum rilru pu-a ka awm lâi tâk chuan Bawihtea pi a lo chhuak hlauh a, min hmuh rualin min ko nghal chul a, Bawihtea a pi lam panin a tlan ta nghal mai bawk si nen loh theih lohin in chhûng lamah ka zui lut ve ta a.
Hmel dâng beia a lo muhil ka hmuh chuan ka khawngaih ngei mai! Khati khawpa rawng khan ka lakah khawsa tawh mah se ka la hmangaih miau a, eng vangin nge ka khawngaih loh tehlul ang ni! A pang ka deh chuan a lo sa vur a, Bawihtea pi chuan ni thum lâi eng mah ei mumal lova a awm tawh thu a sawi a, damdawi in lama kal a duh bawk si lo a, in lamah an lo inenkawl chawt mai a lo ni a.
Puan huhin a chal leh a kutte ka dehsak a, nachhawkna-in a chhawk har êm avang chuan Bawihtea pi chuan an in hnuai luah nurse chu va kovin nachhawkna chak deuh hlekin a chiutir ta ringawt a, rei vak lovah a mit rawn mengin a rawn harh chho ve ta viau a.
Ei tur ka siam chu a chák vak lo chung ka ei luihtir a, thil a han ei tâkah chuan a harh ṭha ta phian a. A thisen test hrim hrim ṭhaa kan hriat avangin a tuk lama clinic kal kan rawt a, a duh lo viau naa ka nawr luih tlat avangin min hnial zui ta bîk lem lo.
Zanriah ei lova kal kan nih avangin Bawihtea chu a piin chaw a pe a, kei erawh ka ei chak vak lo bawk nen Zova eitur ka siam chu a tam bawk a, châw pangngai ei lovin chu chu ka ei a, ka puarpui tawk viau tho mai. Zan rei hmaa haw kan tum erawh a piin min chelh tlat a, a tuk zinga inentir a ngaih tho avangin riak mai turin min ti a, keiin inthlakna kan ken loh chhuanlama hmangin ka hnial thung. A tawpah a tuk zing hma taka kan kal leh tur thu sawiin kan hawsan ta hram a, kan hawsan dawna Zova mitmeng chu ka theihnghilh leh thei tawhin ka ring lo! Min ngaia min thlahlel ngawih ngawih hmel a pu a, ngenngawl ngamna chi niin min hre bawk si lo beidawng hmel kha ina kan hawa kan mut hnu pawhin ka mitah a la cham reng mai a ni.
A tuka kan inentir zo chu a pa in lama kan kal tlang ve nghal avangin Bawihtea chu a kalna pre-schoolah ka dah ta lo a, keini erawh exam chawlh kan neih lâi a nih avangin a hranpaa chawlh dil a ngai lo hlauh thung.
Chhunah Bawihtea a pi nen an inawm a, Zova a khúa a sik tawh lo naa a taksa a la chauh deuh avangin a mu a, a bula awm tura min tih avangin thu awih takin ka awm ve mai a. Ka lo muhil ve chu niin ka biang a rawn chul chuan ka harh vat a, ka han dak chhuak a, mitmeng hriatthiam har zetin min lo melh reng a.
Tlaiah rawngbawl hun hmaa haw ka duh avangin Bawihtea ka zawng a, a piin a lo chhuahpui daih a, a kalpuina ka hriat loh avangin han zawn ngaihna vak ka hre lem lo. Rilru bet lo zeta ka awm chu Zova chuan min en reng a, ka lak aṭangin a mit a la sawn eih lo a ni ber e.
Bawihtea leh a pi lêng an lo let har tâk viau-ah chuan hawsan phawt mai chu ka tum a, a piin a rawn dah ve tawh mai a ni ang chu!
Ka haw tur ka sawi chuan a ngawi reng a, min chhan loh avanga haw loh ngawt thu awm hek lo Bawihtea inthlakna ka ken chu ka thlep fel a, bag-ah khungin ka inpeih hnu chuan kal mai tumin ka ding a. Eng mah a la sawi loh avang chuan ngawi rengin ka kal a, kawngkhar ka hawng tur chiah chu ka hnunglam aṭangin ka kawngah a rawn kuah a, min kuah nghet kher mai!
"Khawngaihin kal suh! Bawihtea vang tal pawhin lo let leh rawh. I duh angin ka chungah i phuba chu la la, ka khawih theih loh pawhin awm dâwn mah la, lo let leh hram rawh. Ka mamawh che a, Bawihtea hian nu leh pa kara seilen a mamawh bawk."
A thusawi chu a ti tâk zet tih ka hria a, a lo khawsak tawh danah a inchhirzia ka hmu bawk. Kan fapa-in nu leh pa a mamawh tih a sawi chu a dik ka ti a, ka luhlulna dah ṭhaa awm ve nghal mai chu ka chák tak zet a ni. Mahse, ka chapona chuan min dal ve tlat a, a hunlaia ka tawrhna leh rilru natna kha ka ngaihtuah lui tlat a, min kuahna chu lakthlaksakin a lam hawiin ka lû ka thing a, eng mah sawi lovin ka chhuahsan ta a.
In ka thleng a, ka inbual nghal a, ei rawng ka bawl laiin kawngka an rawn kik a, Bawihtea-te pitu an nih ringin ka va hawng vat a, ka rin loh leh beisei loh ber a lo din tâk luahah chuan ka meng phawk hle a.
Eng mah ka sawi hman lo, min rawn kuah nghal a, Inlak hran ka tum chuan min kuah nghet zual sauh a.
"Engtianga nasa pawhin min hnar mah la, i hmangaihna ka neih let leh hma chu hetah hian ka awm ve tawh dâwn. Min be duh lovin min thinrim khum reng dâwn pawh ni la ka awm tho ang, i laka ṭanga kalbo hi ka tum tawh lo."
Min kuah ngheh êm avang chuan ka che sawn thei lo a, ṭawng mai pawh a harsa hial a, ka chhâng mai thei lo. Tlema min kuahna a tih thawl takah chuan ka thaw huai a, a hmel ka han en chhoh chuan chîng fahranin min lo melh reng a.
" Damlo i nih kha... Eng vanga Heng thleng thlenga rawn kal nge i nih?" ka lo ti hlar a.
"Ka bula i awm lohin ka na zawk a, chuvangin, ka damna turin i bulah ka rawn kal a nih hi! I tel lova nun hman ka duh tawh lo, ka fapa leh nang hi ka nuna mi pawimawh awmchhun in ni tawh. Khawngaihin min hnial hlek suh ang che!" a ti sup a.
"I nu leh pate pawh i nunah an pawimawh ve lo tihna em ni? Keini nufa chauh kan nihte chuan i chhungte lakah a va inthlahrunawm duh dâwn ve!" ka lo ti a, ka lo fiam rilru ve deuh a.
"Anni chu ka pian tirh aṭanga ka thih ni thlenga mi pawimawh tur an ni, a hranpaa sawi tel kher an ngai lem lo. Nang leh ka fapa ka hnena in lo let leh hi ka duhthusam a ni tawp mai a ni," rawn kunhniamin a ti a, a hmuiin ka hmui a rawn sik chuan ka lo hawi sawn zauh a, a rum nghut mai.
"Ka chawhmeh chhuan a liam...." ka sawi zo hman lo, ka hmui chu a hmuiin a rawn chhin hmiah, ka tán hawi sawn ngaihna awm miah lovin ka tukkhumah a dawm bet nghal bawk.
Min thlah a, hnai set sawtah min en a, "Laldingnghet, i mitmenga min hmangaihna lo lang chhuak hi ka hmuh loh ring hauh suh! Ka ta i ni lo a nih pawhin tu ta mah i ni thei ngai dâwn lo tih ka hria!" a aw-a mahni inrintawkna rawn ri tel chu ka hai lo.
"Zoliansang, min phatsan leh mai mai tur chuan a der pawhin min neih leh hi tum chhin hauh suh! A nih loh chuan ka nasatzia hi ka lantîr ang a, i duh miah loh thlengin ka hnuk lui mai ang che," ka ti a, a hmelah nui hmel a rawn lang nghal a.
"Nangtê reuh hi i duh chuan i nghal zek ang tih ka hria alawm. Mahse, i ze chhûngril ṭhatna avang hian midang lakah mawi lo leh ṭha lo taka i chet chhuah duh ngai loh avangin kha kha chu ka hlauthawng vak lo."
"I rin aiin ka lo sual tawh zek maithei asin!" ka lo ti leh a.
A lû a thing a, "Ka fapa nu i nih chhung chuan i sual thei lo tih leh i sual ngai dâwn lo a ni tih hriatna keimaha awm hi dawt a ni lo chiang a!"
"Lalrini pasal hlui hi ka duh dâwn em ni aw!?" ka tih chuan hneh lutukin min hrawm bet a.
"Kha ramhuainu hming kha lam ri hlek suh! I hmui thianghlim tak kha kha mihring hnaisai lo hming leh chanchin sawina atan khan ka phal lo," tih pahin min fawp leh zauh a.
Bawihtea leh a pi an lo thleng a, a pa nen kan lo awm min hmuh chuan hlim zetin a pa lam panin a tlan nghal a, a piin zawhna zawt mitmeng deuha min melh chuan ka hmu lo der tawp a.
Zanah Bawihtea muthilh hnu-in thutthlengseiah kan ṭhu dun a, min kuah chuan ka lo ngheng hnai ve nghal a.
"Bawihtea hi zinga a harh hunah kan inah daih a lo awm tawh dâwn si a, mâk a ti ve khawp ang le!" a ti sup a.
"Kei pawhin ka tho à emaw ka inti ngei ngei ang, mi ina riak kan ang dâwn em a!" ka lo ti a, run hmel zetin min melh a, ka lo nuih thung.
"Haw phei vat ila, mu vat ang!"
"Zanin chu phuba lâknan i bula mut ka tum lo, nang pawhin i duhdanin phuba la rawh min tih kha," ka tih chuan mangan hmel zetin min en a, ka hmela nui hmel a hmuh takah chuan thaw huaiin min kuah nghet sauh a.
A mitmenga lungawina leh hlimna lo lang chu hai theih a ni lo a, hmangaih leh duh takin ka en chho a, duatna leh hmangaihna mitmengin min lo chhawn a, chu zan hlimawm takah chuan lungawi taka inenin hlim takin kan nui dun a.
<<<<<<<<<<<<<<<<<>>>>>>>>>>>>>>>>>
(A thupui '22ND AUGUST' tih hi eng he hu-ah lo ngai lem s'u aw😊... A thupui phuah mai tur ka hre lo a, ka ziah ni(Vawiin) hi ka hmang ta mai a ni e.😊😊..)
A ngaihnawm lutuk☺️😽
ReplyDelete