KA THLANG TAWH CHE

KA THLANG TAWH CHE - 2
Sbk Pachuau



    Theih ang angin an han inenkawl chho ve ta mawp mawp a, an pawisa neih ang angte chu an hmangin a nu dam theihna turin Maremi chu a theih tawp tak meuh meuhin a ṭang a. La naupang hle mah se a kova engkim a tlak takah chuan a puitling phian reuh a, a hunawl neih chhunah thawmhnaw a la zuar zel a, college pawh a ṭhulh ta fo mai. Mahse, an lecturer-te chuan a dinhmun an hre chiang a, a attendance-in phak lo mah se exam thei turin an lo ti hlauh a, 2nd semester chu a zo ve thei ta mai a. Tunah 3rd semester a ni mêk a, a nu dinhmun a ṭhat loh bakah a nau enkawl lo ngai bawk nen  class a kal aiin a kal loh a tam zawk mah a.

     A nu a ṭhat loh tak viau-ah chuan Maremi pawh sumdawnna lam ngaihtuah hmanin a awm ta lo a, a nu leh a nau chu a kutah an awm tlat mai si, an chhungkhat hnaivai deuhte chu awm ve thliah mah se an inpui reng thei bik si lo a, mawng pawh hûng hman lova a buai nilen ṭum pawh a awm ta zauh zauh a. Vanneihthlak takin a putea fapa, tlangvâl tlawngawl a lo awm hlauh a, chu chuan a awmpui tàk hnu chuan tlêmin a zia ta deuh a.

     Damdawi in lamah an hun tam zawk hman a lo ngai a, a nau chu a putea fapa kutah chuan loh theih lohin an dah tawp a. Tlangval fel tak mai a lo ni hlauh a, ngaihngam takin Maremi pawh chuan a kalsan theih phah a, ani awm lo se a buai dan tur a ngaihtuah a, Dinga lo awm ve hlauh chu tihzia a ti kher mai.

     Radiation ti turin doctor-in phâiah a refer a; Tata Memorial Hospital, Kolkata-ah an zu awm ve ta ran a, in lam ngaihtuah nen a rilru hah lutuk chu a mu tlêm a, a thil ei a tui lo nen Maremi chu a tla ve dâwk a. Amah hi sa pan chi a ni lo hlauh a, a hre sa tân lo chuan cher tia sawi tur erawh a ni hauh lo thung.

     Aizâwla an lo let leh hnu chuan a nu chu a nulâ chho ve viau a, thil pângngaia ei thei ta lo chu a hawi harh chhûng erawh a rei lo hle thung. A ngaitê-in damdawi in lamah an lut leh ta zut mai a, an pawisa neih ve ang chhunte lah an hmang zo a ni thawthâng tawh a, Maremi rilru chu a hah hle a, han thawk chhuak thei an awm mawlh mai si lo a, a nu hmuh loha a mittui hruk hul zat chu sawi sen pawh a ni lo hial ang!

     A nu chu chemotherapy la turin an ti leh ta a, vawi li lak phawt a chumi hnu-a CT Scan-a en leh turin an doctor chuan a ti a. Vawihnih an khai a, an pawisa neih ang ang chu an hmang zo titih der a, vawihnih dang khai leh ngei a la ngai si a, chhûngkhat hnaivái leh ṭhenrûal ṭhate hnen aṭangin loh theih lohin chêng eng emaw zah a puk ta ràwih a. A rulh lehna lam engtin nge a tih ang tih ngaihtuah chu a thawpikthlak hluah hluah a, midang pawisa a púk mai loh chuan an nei tawh miau bawk si lo a, a nu damna tur atana hman tur a nih avangin chu chuan a inhnem hram hram a.

     An pawisa puk hmang chuan cycle li-na thleng chu an khai zo thei ve mai a, CT Scan-te an han ti leh a. Doctor-in a CT Scan result a'n hmuh chuan a ṭhat thu leh chemo dang lak a ngaih a rin tawh loh thu a sawi a, an lawm hle a, dam chho zel tura inngaiin rilru zangkhai zawkin damdawi in chu an chhuahsan ta a.

     Chaw pângngai a ei theih loh avangin a hnârah pipe thunin chuta ṭang chuan thil tuirìl lam an pe mai ṭhin a, tlêmin a rawn kàng chho ve zel a, zia ve zel tura an inngaih laiin chanchin ṭha lo an hre leh ta a. Ṭha deuh anga a lan lai chuan han chauh deuh leh thawh harh peih loh ni a nei chho leh ta zeuh zeuh a, a awm dan han danglam chho leh ta-ah chuan ngaihṭhat lohna neiin doctor an pan leh  vat a. CT Scan an han tih chuan a hmaa chemo a lakna kha thawk ṭha viau leh a ṭai darh zel tur pawh veng thei tura ngaih a nih laiin a lo ṭai darh ṭan tih an hmu a, chemo vawi thum tal khai leh a ngaih tur thu doctor chuan a sawi leh ta mauh mai a. An pawisa neih lohzia hrechiangtu Maremi'n chu thu a han hre leh zet chu a bîng mup mup a, a rilru manganzia chu turû tak a ni.

     Pawisa an nei tawh lo a, ngaihtuah ngaihna a hre tawh hek lo. Han ti lo ngawt dâwn se a nu chuan a kalsan mai ang tih a hlauhthawnawm bawk si, a rilru hah lutuk chu à mai dawnin a inhria a, a pute-a fapa Dinga lahin han ngaihtuahpui vak ngaihna a hre der mai bawk si lo a, a mangang tak zet a ni.

     Bei nge sei rûn dung tiin pawisa puk tur chu a han zawng kual leh lauh lauh a, a hmuh chhun chu a bêitham kher mai. Chemo vawikhat khaina tur chu a daih ve thei mai ang a, a daih bak chu engtin nge ni ta anga khawia pawisa nge a hmuh belh tak ang le! In luah man lah an ba nual tawh mai si a, a beidawng leh rilru pik lutuk chuan a hmelhriat pakhat, tun hma lama a lo kawm ve zauh zauh tawh chu bia-in inhmuhpuiah a sawm ta chawt a.

     Chu a ṭhiannu chu tu dang ni lovin call girl Baby-i hi a ni a, tun hma deuh pawh khan a awm anga awm ve turin Maremi hi a lo sâwm fo tawh ṭhin a, an chhungkaw khawsak a nawm phah turzia leh pawisa lakluhna awlsam a nihziate hrilhin a lo sawipui ve fo tawh a. Mahse, Maremi ngaih danah chuan thil tih chi loh hulhûal leh a tih duh ngai hauh loh tur thil a nih tlat avangin a uksak lem lo a, Baby-i pawh chu bansan turin a lo sâwm let hlauh zawk a, an insâwm hlawhtling lo ve ve kha a ni a, an inkawm zui ta vak lo nghe nghe.

     Maremi ngaih danah chuan mahni taksa han zawrh ringawt mai chu thil tlawmthlak leh ràpthlak tak a ni a, eng ang pawhin hlawk mah se tih ve tumna rilru a la pu chhin ngai miah lo a ni. Tunah an dinhmun hetiang a lo nih tak si-ah chuan an pawisa mamawhna nasa lutukin a ngaihtuahna chu kil tin a daptîr a, kawng dang a hriat tawh ngang loh avangin a hmêlma tih atan pawha a duh hauh loh thil chu amah ngei chuan tih ve tumin a ṭhiannu chu a ko ta tawp mai a ni.

     "I tum ve tak tak em ni?"

     A vawithumna atan Baby-i chuan Maremi chu a zawt nawn leh ngat a, khati khawpa duh lo si khan tunah ama thu-in tih a duh thu a sawi ta mai si a, a duh lohzia hre chiangtu Baby-i tan chuan mak ti-a zawh nawn sek chu thil àwm lo a ni hauh lo!

     "Kan dinhmun hetiang ni lo se ka duh lohzia chu i hriat vek kha! Ka hrehin ka huphurh ngawih ngawih a, tihngaihna dang ka hre tawh miau si lo a, ka duh loh ber thil ka tih chu a ṭul ta si a nih hi!"

     "Marem, dik taka sawi chuan lo sâwm fo tawh che mah ila kei pawhin he ka hna ang hi chu i inhnamhnawihna atan ka duhsak lo khawp mai che. Mahni taksa chungah pawh thu nei thei lovin kan awm a, sum leh pâiah buai lo mah ila rilru erawh a buai châng a tam a, hausakna hian hlimna tluantling min thlen lo tih hi ka pawm hmak tawh."

     An han ngawi dun ran ran a, Baby-i bawk chuan a sawi zawm leh ta a.

     "Pawisa lak luhna dang i hriat tawh miau si loh chuan ka pui thei tho che a; mahse, ṭhiante tih atan chuan ka duhsak lo khawp mai che. In mamawhna a san êm avangin ti lo thei lovin i awm a, ka hnial lo mai che ang a, a kawhhmuhtu nih pawh ka inthiam lo rum rum zawk dawn a nih hi!"

     "Keima duhthlanna ngeia ti tur ka ni a, i thiam lohna pakhat mah a awm dawn hlei nem. Pawisa chu kan mamawh tawh si a, a hmâ thei ang bera tih ka duh dawn bawk a,  inngaihtuahna hun awm hman vak lo nghe nghe se ka duh a ni," Maremi chuan a ti zuai raih a.

     A pite-i'n a nu chu a awm loh chhung a lo awmpui thei hlauh dawn a, inah haw-in a intifai sawk sawk a, Baby nen an innghahna tur lam pan chuan a chhuak leh ta nghal a. Huphurhin duh lo eng ang mah se a tih ngei a ngai tlat si a, hmabak hlenchhuah vata pawisa neih thuai chu a duh ber a ni rih a, a aia ṭha beisei tur nei tawh miau hek lo le!

     A huphurh lutuk chu damlo mai dawnin a inhria a, an pawisa mamawhna a san êm avang chuan ṭhulh erawh a tum hauh lo thung. A ngaihtuah nasat poh leh a thaw a pik zual zel mai si a, ngaihtuah duh lo luiin thil dangah a rilru pek a han tum viau tak naa awmzia erawh a awm lo kher mai.



-------------------------/////-------------------------



     Maremi mittui hru mawlh mawlh lai chu ngâwi rengin ka en a, a chanchin ka hriat chian takah chuan amah ka ngaih dan chu a danglam chiang kher mai! A hma pawh khan ka ngainep hran lo a; mahse, a taksa meuh zûar ta chu nungchang ṭha leh pângngai tak a nih loh ka ring ru deuh kha a ni a, ka lo rin dan dik lohzia ka hriat rûal chuan ka rilru chuan thuphâ ka châwi nghal a, a hriatah erawh ka sawi chhuak lem lo thung.

     "A lo tlai tawh hle mai, ka pitei kha haw leh tur a la ni si a, min lo nghakhlel tawh ngawt ang, ka kal tawh mai ang e,"  tiin a ding chhuak a, a sam chu a chûl mâm thuak thuak a.

     "Ka lo thlah ang che," tih pahin ka ding chhuak ve vat a, min melh zawk a, dawhkana a bag dah chu la turin a kalsawn ta nghal a.

     Pawisa ka peklaia a inthlahrung leh lawm hmêl inpawlh kha ka theihnghilh theih ka ring tawh lo! Zah leh lawm avanga hmai sen ṭal chungin lawmthu min hrilh a, a mitah mittui a tling piau bawk. Theih ni se a pawisa phut zat aia tam chu pek ka duh a, ka nei tawh bik bawk si lo. Dik tak chuan ka neih zawng zawng tak meuh meuh ka pe a, mahni motora haw tur ka nih avangin motor chuan manah ka buai lo hlauh zawk a, kawng laka thingpui inna tur tak tak chauh a ni ka neih tawh ni!

    "I chunga ka lawmzia hi ka sawi chhuak thiam lo hîal a ni! Eng tikah emaw ka theih ang angin ka la rul leh ang che, a thlawna laksak ngawt che chu ka duh bik miah lo a nia," ka kutah chuan a rawn hmer khur dar dar a, a ṭawng zâwnga a hmui che vel chu hmuhnawm ti zetin ka lo thlîr reng a, fawh ka chák hle tih pawh ka inhria.

     "Thil pakhat ti la, i lawmthu sawina chu ka pawmsak dawn che nia," ka tih chuan zawhna zawt mitmengin min melh a.

     Ka hmui chu ka khawih zauh a, ka nui pah deuh bawk. Ani chuan a ngaihna hre lo hmel deuhin min en a, a kawngah chuan kuahin ka lamah ka pawt hnai a, a beng bulah chuan ka kun hniam zui zat a.

     "I lawm tak tak a nih chuan ka hmuiah hian fawp rawh!"

     Inla hrang deuhin min en a, mak tiin a âng deuh phîau bawk. A hmêl pawisawi lo leh ngaihtuahna thianghlim lutuk chu hmu theiin ka inhria a, ka insûm hman lo, a hmuiah tak chuan ka fawp ta siah a.

     Min chhâng let nghal mai lo, duhthawh lehzuala ka fawh takah chuan zawi zawiin a hmui chu a rawn chet ve ṭan a, ka nghâwngah rawn kuahin uar zetin min fawp let ve ta a, kan inhiptawnna nasatzia chu mak ka ti zawk hial a, kan duhthawh dun kher mai.

     Inla hrang hmasa-in ka âwmah chuan na lo tê-in min nem a, a thaw rang lutuk thunun tum chuan boruak chu hîp vang vangin muang chângin a thaw chhuak leh a, chutianga vawithum a tih hnu chuan min en a, a nui sak a.

     "Kal tawh ang hmiang, ka nu-in min lo ngaihtuah tawh lutuk palh ang tih ka hlau!"

     La fawp kham lo teh mah ila a rilru tur ka hriat thiampui a, a kutah chuan kaiin ka chhuahpui ta nghal a. Damdawi in kan thlen chuan zan a rei tawh hle a, damlo na zual an awm lem lo niin a lang, an lo reh ṭhap tawh a. Maremi nu chu a lo muhil a, khum bawhin a Pitei pawh chu a lo muhil bawrh bawrh a.

    Maremi chuan a Pitei chu kai thovin haw turin a ti a, zan a rei tawh deuh avangin mahnia hmeichhia zan reha han kal chu a huphurh deuh tih ka hria a, ka thlah pah thei tih ka sawi chuan a lawm hmel hle a.

     Ka naute in luah ka thlen chuan ka nau chu lehkha zirin a lo la meng a, ka haw har chhan min zawh chuan damdawi inah damlo kana ka kal thu ka lo sawi awlsam thén a.

     Aizâwlah hian ka chhang chiah hi lehkha zirin a awm a, ka nî fanu thil zir a awm bawk a, an pahnih chuan Chanmari-ah in an luah ve a, Aizâwl kal apîangin thlenna atan kan hmang mai zel a, a remchâng phian mai.

     A tuka kan haw chho chu kawng tluanin Maremi ka rilru-ah a awm reng a, Zuala chu a motor a chiang kuan loh avangin a ûte bulah an lo siamtîr turin a hnutchhiah a, ka motor-ah chûang ve-in a titi kawng tluan a.  Zan lama a chet dante sawiin nuam ti fahranin a titi bawrh bawrh a. Ka rilru-ah Maremi ngawt ka ngaihtuah avangin a titi chu zawm pawh tum lovin ka lo ngaithla liam mai mai a, kan awm dan min zawh pawh chuan chhâng lovin ka lo nui liam mai a, min zawt dîlchhut ta lo hlauh a, ka thaw ru huai a.

     Kan tlan tlûang bawk a, Serchhip kan thlen chuan a la hma hle a. Motor ka dah fel a, in chhûnga ka luh chuan ka û nupui leh a fa sêntê chauh an lo awm a. Ka pa chu a dan pângngaitê-in an room lamah a computer hmâ-ah ṭhu-in thil a lo type leh mawlh mawlh tawh a, dawhkanah chuan lehkhabu eng emaw zah hi a lo inchapdarh nuai bawk.

     Min hmuh chuan a nui suk a, "I lo thleng tawh maw?" tiin a computer lam chu a hawi leh thuai a, a chhut zawm nghal mawlh mawlh a.

     Ka pa hi thu leh hla lamah a tui êm êm mai a, sorkâr hna thawka a awmlâi khan lehkhabu pahnih a ti chhuak a, a pension hnu-in pathum lâi a ti chhuak bawk a. Tunah hian a thar tih chhuah tumin a bei leh mêk a, khawiah mah lêng chhuak lovin an roomah a inkhung chawt a, a lehkha ziahah a  rilru leh hun a hmang zo rih a ni ber mai.

   
     Ka inbual zawh hnu chuan ka khumah ka bawk zâl mai mai a, Maremi bawk chu ka ngaihtuah leh ta veng veng a. Thil ka hre chhuak thut a, a phone number ka lo dîl miah lo mai le! Engtin nge a number dilna châng hre miah lova ka lo awm theih zawk chu le! Á ka va inti tehlul em!

     Ka phone chu la kangin Zuala number chu ka hmet chhuak a, ka call ta nghal a. Nizana a awmpui Baby-i number kha a neih ka ring tlat a, ani hnen aṭang khan Maremi number chu neih theih mai ka inring a ni.

     Zuala'n Baby-i number min pek chu ka dial nghal a, a tirah tu nge ka nih ka sawi mai loh avangin min biak danah amah dawr tuma va bia ang deuhin min ngâi niin ka hria a, ka insawi ta vat a. A ṭhiannu number ka dil chuan a phal ta tlat lo a, ka dil ngial pawh chuan amah Maremi remtihna tel lo chuan min pe ngawt ngam bik lo tih ṭanin a ṭang tlat a. Ka lungawi lohna chu dah bovin ka be duh a ni tih min lo hrilhsak turin ka chah ta ringawt a, thinur ru ṭeuhin ka phone chu ka off a, khumah chuan ka theh thla deuh hmak a.