VANMALSAWMA (DOCS 2)

VANMALSAWMA (DOCS 2)



VANMALSAWMA

Chapter 16




          Pen sawm vel bak ka la pen hman lovang tihah chuan ka banah chuan a rawn chelh a, engah mah ngai lova pen leh ka tum chu ka hlawhchham chiang kher mai! A bân sei thluam mai leh thahrui ngah zet chuan min kuahbet a, ka tal chiam pawhin awmzia a awm lo chuang lo, min kuah nghet ting a ni mai.

          "Mapui ... "

          Ka ṭahchhuah mai loh nan ka insûm nasa hle a, ka hmui chu ka pet fan fan a. He mihring, min rinna pakhatmah nei lotu vang hian ka mittui hi fartir ka tum tawh hauh lo.

          A nupui kha hmeichhe tenawm tak a ni tih hrereng chung si khan khati tak khan a dawhthei si a, eng vangin nge ka chungah heti tak maia a thikthu a chhiat bik mai le!

          Min kuahdan ang ang chuan ngawi rengin ka awm a, ka ngawih reng avang hian ka tlawmah a ngai a nih chuan a tisual viau ang!

          Min kuahna chu tlema thlahdul deuhin ka khabe-ah a rawn dawm a, min fawh tuma a rawn kun chuan ka lo hawisawn vat a.

          "Kal tawh ang. Helai kawngpuia hetia awm reng hi a ṭha lo, mi pawh an lo kal thut thei. Chu bakah, Bawihtei'n min lo nghakhlel tawh ang," tih pah chuan min vawnbehna aṭang chuan ka talchhuak a, motor awmna lamah chuan ka phei nghal a.

          Kan dinna hmun hi tlema kawng lun lo lai deuh a ni a, kan din chhung zawng khan motor pahnih khat chu a rawn tlan ve a, chung motor rawn tlan tih loh chu ke-a veivak an awm bawk si lova, a reh ṭha ang reng phian a.

          Motora ka luh hnu chuan a rawn ṭhu lut ve nghal mai a, min rawn en vang vang tih ka hria a. Mahse, engah mah ka ngai lo lui tlat a, ka awmdan ngai rengin ka awm ngar a.

          "Mapui, ka .... "

          "Khawngaihin tunah chuan engmah ka ngaithla peih lo, kal vat ila, haw leh vat ka duh," ka lo ti hmak a, ka en duh miah lo bawk.

          Min la en reng a, pka haider lui hmiah thung. Thawk a la halh a, motor chu tinungin muangchângin a tlan ta nghal a.

          Heti reng renga awm chu a ṭha dawn hauh lo tih chu ka ngaihtuahnaah a lo lut a, hostel ṭha kan hmu mai lo a niht pawhin ṭhiante inluah ṭawmpui tur an awtm mai ka ring a. Ka nu chuan a phal dawn lo chiang sa a, engtin emaw tak thiam taka a rilru ka hneh a ngai dawn a ni mai.

          A pate in kan thlen chuan rei awm lovin kan let leh nghal vat a, rilru tihthawlnan Bawihtei chu ka be char char a, a pa erawh chu a ngawi ngul reng a, a hranpaa biak ka tum bik hauh lo.

          Inchhûng kan luh veleh Bawihtei chu Judithi leh Maramate lo awmna lamah chuan a tlan phei nghal vat a, kei chu ka inbual duh chhuanlamin ka room lamah ka lut phei nghal a.

          Khumah chuan ṭhu-in ka hun tawn mek chu ka ngaihtuah a. U Malsawma hi ka rilru zawng zawnga ka duh leh ngaihzawn hmasak ber a ni a, ka hriat loh hlanin ka thinlung ka lo hlan fel der tawh a, ka duh a ni tih ka hriat hma daih khan ka lo duh reng tawh bawk.

          Higher kan kallai khan a hmingin ngaihzawng chu ka nei ve ngei a, ka la thutak lo hle thung. Ṭhiante min nawrna avanga nei ve chauh kha ka ni a, kan inṭhen hnu pawhin ka vei zui em em lem lo.

          Hmundanga awmna tur zawn chu ka huphurh hran lova, ka huphurh ber zawk chu ka nu bula sawi a ni. Min lo hnial ngei dawn tih ka hrechiang a, a rilru hneh thei dan bera sawidan tur ka ngaihtuah ngei a ngai dawn a ni.

          Boruak ṭha lo zawk a thlen hma-in chhuahsan ngei ka duh a, amah hmu renga ka awm chuan ka duhna a zual zel ang a, ka thlakhlelhna ka thup zo lovang tih ka hlau a ni. Kan inkar boruak chhe mah se amah ka hmuh leh tawh hleka ka danglam ziah ṭhin hi a bo chuang si lova, ka thlahlel a, ka bula a awm reng lai pawhin ka ngai ngawih ngawih tho a ni.

          A laka ka lungawi lohna hi eng anga nasa pawh ni se amah ka duhna a bo chuang lova, ka thlakhlelhna a kiam chuang hek lo. Tunah ngei pawh hian a bân seipui khan min kuah leh se, duhthawh takin min fawp leh se tih chu ka duhthusam a la ni cheu a ni.

          Heti tak maia alaka ka luangliam hi mak ka inti a, ka la naupang a, ngaihzawng neih ka la thiam loh vang a nih ka ring ringawt a! Khawsak phungah kan in-ang lova, kum thu-ah phei chuan inthlau tak kan ni. Ka u Mama kha kei aiin kum 10 laiin a upa a, a chhang tur hi ka nu-in a pai laiin a chhiat a. Nau a pai leh thei tawh dawn lo emaw an tih hnu-ah kei hi min pai leh ta hlauh a, ka nau phei chu kum ka tling fel awrh chauh a, a pai leh nghal mai a ni.

          Ka u Mama ai khan u Malsawma hi  kum hnihin a upa a,  a awmzia chu kan kum inthlauhna chu kum 12 zet a nih chu! Kei aia a upatna tam eng ang mah se pawi ka ti lova, amah hi ka duh a ni tawp mai a ni. Tunah intithiam lo mah ila ka duhna a kiam chuang lova, ka thlakhlelhna a bo chuang hek lo.

          Ka inbual zawh chuan nu Mawii rawngbawl ka enpui zuai a, zanah Marama palaite an lo kal dawn avangin ei hma kan ngai a, lo intihfel hma a ngai dawn a ni.

          Palai lo kal laia lo awm ve kha a mawi lem loh avangin Marama chu zanriah eikham veleh a haw nghal a, kei pawhin ka nu biak ka duh avangin chaw eina vel chu ka tifel sawk sawk a, Judithi chuan a theih ang angin min lo pui bawk a. Nu Mawii hi rawngbawl zawh veleh a haw ṭhin avangin chaw ei thleng vel sengfel leh zanlama chet ngaihna ang chi hi chu ka kutah a awm vek a ni.

          Rooma phone ka hman mawlh mawlh lai chuan Bawihtei'n min rawn ko a, a pa-in min kohtîr a ni tih a sawi chuan ka nu ka biakna chu titawpin  sitting room lamah chuan ka phei nghal a. Patling pahnih leh u Malsawma hi an lo ṭhu a, Marama palaite an nih ka ring nghal mai a.

          "Lo ṭhu ve la," a bula ṭhu ve tura min mitmei chung chuan a lo ti sup a, han hnial chi a ni si lova, amah hlat deuhah chuan ka ṭhu ve ta ringawt a, Bawihtei chu ka malchungah chuan ka pawm nghal a.

          Kan inlêng pakhat, a cher zawk leh upat hmel deuh zawk chuan, "Hei hi innu em ni?" min rawn en chung chuan u Malsawma chu a zawt a.

          "Ni love, ka nau a nih hi." A nau ka ni a nih chu!

          Bawihtei chu Judithi'n a rawn kova, a kal ta daih a. Ka zahzel ve ber a a awm tak lovah chuan lai ru deuh tak chung chuan ka ṭhu ve ta reng a. Dik tak chuan ka awm ve a ngaihna reng reng ka hre lova, palai lo dawngsawng tur chuan ka la puitling tawk lo mah mah a ni.

          Inneihdan tur vel an sawi chuan ngawi rengin ka lo ngaithla liam ve vel mai mai a, nau an lo pai lawk tawh avangin a awlsam leh hautak lo thei ang bera insuih mai ni se tih chu palaite duhdan a ni a.

         U Malsawma chuan, "In rawtna chu a ṭha tho a, an inneih kha kan duh ber chu a ni mai a. In hriat angin Judithi hi chhung leh khat a vai ve hle a, chuvanga ka mawhphurhnaa la pawh ka ni reng a. Mahse, hetia baihvai tak leh a chhungte duh loh hi ni mah se ka thlazar hnuaia ka lakluh tawh avangin a tawp thlengin ka mawhphurhnaah ka ngai tawh dawn a, a chungah thil ṭha lo emaw, a dinhmun avanga hmuhsitna emaw a tawk a nih chuan a hmaah ka ding zel dawn a ni tih hi min lo hriatsak ula ka duh a ni. Chu chu a lawina tur Maramate chhungkua pawhin hria se ka duh a, a pa duh loh ni mah se nuṭa min la nei a ni tih hi hria se ka duh a ni," a ti deuh duah a.

          He mihring ka duhna tizual em emtu chu a rilru puthmang hi a ni. Midang chhiatna a sawi ngai lova, mirethei leh chanhaite khawngaihna a ngah lutukte hi amah ngaisang lo thei lova min siamtu a ni a, chapo thei dinhmuna ding si hi amahah chapona hmuh tur a awm ngai lova. Judithi pawh a tân chuan mihrang daih a ni a, chuti chunga a thlavang a hauhsak dante kha ka lo chhuang ru ngawih ngawih mai a ni.

          Inneih hun tur ruat fel tura vawikhat rawn len leh hmabakin an haw ta a. An haw hnu chuan Judithi chuan min rawn au a, ka va kal chuan a khumah Bawihtei chu a lo muhil bâm a. Ka bula mut a tum tho avangin ka khumah ka sawn phei ta nghal a.

          Bawihtei ka mut fel hnu chuan Judithi roomah ka phei leh a, ka lo rinlawk dan ang chiahin u Malsawma nena kan inkâr thu chu min zawt ta chat a. Insawithawl ve hrim hrim ka duh avang chuan kan awmdan engkim chu ka hrilh ve ta vek a.

          Tuna kan buaina chungchâng vel ka hrilh chuan a lo nui a, kei lah chuan thinrim tawkin, "Nuihna tur a awm em ni?" ka lo ti hlak a.

          "A nuihzatthlak em alawm! Tleirawl inngaizawngte pawh in ang ka ti. U Malsawma pawh patling pui si a thikthu a chhe lutuk a, buai lohna turah in buai phah a nih chu. Bena nen in inngaihzawn lohzia chu keiman ka lo hrilh dawn nia," la nui har har chung chuan a ti a.

          "Teuh lo mai, hrilh a ngai reng reng lo. Ka sawi tawh a, min ring lo a nih chuan a tawk. Engmah ka sawi tawh dawn lo, nang pawn engmah lo sawi suh," ka lo ti hmak thung a.

          Eng eng emaw sawia kan ti ti luam hnu chuan ka room lamah ka pheisan ta a. Ka rooma ka lut chiah chu ka phu zawk a!

          Ka khum bulah chuan a lo ding run a, a tirah chuan Bawihtei a bula mu turin a sawnchho dawn a niang tiin ka thlir reng a, a chet tak mai loh avang chuan ka lut phei a, drawer-a ka mutkawr dah chu ka va lachhuak a.

          A awmlaia inthlak chu ka duh loh avang chuan ka mutkawr keng chung chuan ka ding ta reng a, amah ka en miah lo na'ngin min rawn en reng a ni tih chu ka hre thei a, hre lo ang hmiahin ka awm thung.

          Ka lam pana a rawn pen chuan ka lo tawlhsawn a, min rawn panhnai zel a, ka tawlh ve zel bawk a, bang ka nghen takah chuan min rawn nangchingin hnaih lutuk tak maiah chuan min rawn dinchilh nghal hmiah a.

          Ka tâna chet harsa tur khawpin min nekbet a, ka khabe-ah vuanin min kuai dak a, min rawn fawp nghal a. Min nekbeh hneh em avang chuan ka taksa chu a ṭang hlei thei lova, ka kut pakhat chu ka taksaa a nekbeh tel avangin ka kut lehlam chauh chu che thei awmchhun chu a ni mai a.

          Ka hmui chu ka chip lui tlat a, ka kut che thei lam chuan a âwmah ka nem pah bawk  a, awmzia erawh a awm  viau lem lo. Ka kut chu rawn manbetin  a kawngah min kuahtir a, a aia uar leh ngenngawl zawkin min rawn fawp leh a, ka insum theih piahlam a ni ta!

          Ka hmui chu zawi zawia tiche-in ka lo chhanglet a, a hma aia duhthawha min rawn fawh leh takah phei chuan uar lutuk tak mai hian ka lo chhanglet a. He thil hi a ni lawm ni ka lo thlakhlelh em em kha ni! A mi tawh leh kuah velte, min fawhte hi ka lo thlahlel ru reng a ni lawm ni?

          Kan duhthawh dun telh telh a, kan thaw pawh a pangngai lo dun sawt hle a ni. Insum theihna kan tlachham dun tawlh tawlh a, ani pawh a che fet tulh tulh a, dang tur ka ni tih ka inhria a, ka taksa-in a mamawh thung si a ni.

          Ka hnute a rawn ṭham takah chuan ka harhchhuak zawk a, a kut chu manbetin thaw hlawp hlawp chung chuan a mitah tak chuan ka en kal a. A mitmeng, tisa châkna avanga de sawr sawr chu ka hmuh hmaih loh chiang kher mai. Kei hian ka titawp lo a nih chuan kan thlen chin tur chu a chiang em em a, Pathian ramri kham chin pelin Setana ram chinah kan lut mai dawn a ni.

          Inthunun tum taka thawk a lak ham ham lai chuan ka lo en reng a, he mihring hi ka 'hmangaih' a ni tih ka inhrechiang ta hle mai. Min nawrlui ta se ṭang zo tur ka awm dawn miah lo tih pawh ka hre chiang a, ka zahawmna hi keimah chauh ni lovin amah pawhin min humpui tih pawh ka hre bawk.

          Duhin tum lui ta tlat se ka inveng zo dawn lo tih pawh a hrechiang lutuk tlat! Ka duhthlanna min zahsak avangin min nawrlui ngai lova, inthunun zo dawn lo nia a inhriat chuan amah a inla hrang mai ṭhin a ni. Mahse, hetianga ka laka a awm avang hian min hmangaih ve tihna a ni kher lo.

          Ka chal si chuan a rawn kunhniam a, ka hmuiah rawn fawp leh zauhin a âwmah chuan min kuahbet ta hle hle a.

          "Engvangin nge kan inkâr tibuaitu-ah hian ka ṭan bik ziah mai le! Ka duh lutuk che avang hian ka thikthu hi a chhe mah mah a ni, khatiang thil kha thleng tawh lo se ka duh tak zet a ni!" a aw chu a khur ve dar dar a.

          "Min ring miah lo a nih kha!" vui aw deuhin ka lo ti sap a.

          "Ka ring lo che pawh a ni lo. Ka hrethiam bik lo ka awmdan kha, ka thu hriatin a lo zir bawk nen Bena nena insi renga in lo ṭhudun ka hmuh khan ka na em a ni! Khatiang khan tunhma-in ka la awm ngai miah lo, ka ti tak tak!" a ṭawng zawng chuan min nghawr dat dat a.

         "Rilru na deuhin min siam ziah a!" ka lo ti leh ṭiau a.

          "Ka hria, kei pawhin hrehawm ka ti. Mahse, ka inthunun zo ngang lo a ni. Pawi ka ti lutuk! Tihnat che hi ka tum a ni lo asin!" a ti tak zet tih ka hria a ni.

          Min kuahna ṭang chuan inlahrang deuhin amah chu ka chhoh en a, dingdihlipin a hmuiah chuan ka han fawp zauh a, a mitmengah chuan mak tihna ka hmu a. A hma aia rei hret la han fawp leh a, a hamhaih nge min fawh let pawh tum lo chuan a ding mawl tawp a. A awm ve tho, a chhan chu vawikhatmah keima thu-in ka la fawp hmasa ngailo tlat a ni!

          Uar lehzualin ka han fawp leh salh a, chutah zet chuan min rawn chhanglet ṭha ngang mai. Duhthawh lutuk tak mai hian min fawp tawn tawn a, inei zawh tawn vek tum ni-awm fahranin kan duhthawh dun a, kan inthlah meuh chuan kan thaw pawh a rang dun halh halh hle reng a ni.

          "I hria em? He thil hi vawiin nileng khan tih ka lo chak tawh asin!" min rawn fawh leh zauh pah chuan a ti sup a.


VANMALSAWMA

Chapter 17





          Judithi leh Maramate inneih ni thlen hma kâr khat la awmah chuan inneih ni-a hak tur leh Judithi mamawh tur thil vel lei turin kan bazar a, Marama, Kima leh Benate nen chuan kan inzuikual nileng a. Judithi mamawh leh thil ṭul zawng zawng chu u Malsawma'n a tum vek a, inthlahrung hle mah se inthlahrung thei dinhmuna a din miau loh avangin u Malsawma tih ang ang chuan a awm tawp mai a ni.

          Judithi chu a inthlahrun em avang chuan a mamawh leh ṭul zualpui tak meuh meuh chauh kan lei a, kan kal kual nasa bawk a, in kan thlen meuh chuan kan chau hle a, kan thil hawnte pawh tifel nghal peih lovin Judithi mutna roomah chuan kan dah tawp mai a ni.

          Zanriah ei khama u Malsawma hnena kan pawisa hmanna leh kan thil lei velte ka hrilh lai chuan Maramate ṭhianho chu an lo lut a, Bena a tel ve avang chuan u Malsawma hmel chu ka en vat a, min lo nuih suk ka hmuh chuan ka thawveng huai a. A thik turin awm lo mah ila Bena lakah hian a thikthu hi a la chhe ru hle tih ka hre tlat a ni.

          Sitting roomah chuan kan inkawm a, Kima phawk a chhuak a, kan nui ho leh dar dar ṭhin a, u Malsawma pawh a nui ve hawk hawk a, Bawihtei a muthilh takah chuan an room lamah a pawm chho ta a.

          A lo chhuk leh chu ka bulah a rawn ṭhu ta chat a, a awmdan chu min vêngte pawh a ang riauvin ka hria a, ka nuih chu a za ru ang reng viau a ni.

          Bena leh Kima an haw hnu chuan Marama chu a la ṭhufual a, u Malsawma chu an room lamah a chho a, Judithi nen chuan chhunlama kan thil lei ho chu kan dahfel a, kan indah fel zawh chuan mu turin ka kalsan ve ta nghal a.

          Ka room pana ka kal lai chuan u Malsawma chu an room aṭanga lo chhuakin a rawn chhukthla a, lo nghak lem lovin ka roomah chuan ka lut nghal a. Ka lut fel hman awrh chauh ang tihah chuan a rawn lut ve nghal zat a.

           Ka kawngah chuan rawn vuanin min pawmbet nghal a, engmah pawh sawi lo chuan min fawp nghal a, ka lo chhanglet ve nghal zat bawk a.

          Kan inthlah hnu chuan zawi sup hian, "Insum ngai ziah hi ka ning!" a ti hluk a, ka lo nui hak thung a.

           Ka khumah chuan inngheng rialin kan ṭhudun a, hetia a ban sei thluam maia min kuaha amah nghenga ka awm hian ka thla hi a muang hluah hluah a, him ta riauva inhriatna ka nei ṭhin a ni.

         "Helai hmuna ka awm ve reng hi a rem lovin ka hria a, hostel lamah insawn lut tawh ila ka ti deuh a."

          Ka ṭawnglaia a taksa lo insangmar ta ṭeuh chu ka hre thei a.

          "Ka hriat lohin insawnchhuah i lo tum tihna maw!" A aw-ah chuan lungawi lohna ri a tel a.

          "I hria alawm, hetia awm reng hi a ṭha ber lo tlat a ni, midangin engtin nge min ngaih ang tih pawh hriat loh!" ka lo ti vat a.

          "Midang ngaihdan ai chuan keimahni ngaihdan leh duhdan hi a pawimawh ber," a lo ti leh hmuk a.

          "I tel lovin engtin nge awm se min tih? Bawihtei hi i ngaihtuah ve viau emaw ka lo ti a!" min dem hmel deuh hian a tihzawm leh a.

           Thawk lak hak pah chuan, "Ngaihtuah e. Mahse, ka ngaihtuah tih vanga heta ka awm ve reng kha a rem hleinem. Kan inkarah hian hetiang boruak hi awm lo sela chu thuhran a nia," ka lo ti ve thung a.

           "Tunah chuan kum a tawp ṭep tawh a, hetah i awm rih ang. Hmun dangah i awm dawn a nih pawhin kumtharah kan ngaihtuah ṭha dawn nia." A aw chu a nghet ṭha charh charh hle a, hnial mah ila awmzia a awm dawn lo tih ka hriat avang chuan ka hnial buai duh ta lova.

          A tho a, min pawttho ve nghal a, min rawn fawp leh vang vang phawt, min kuah pah chuan, "Zantin hian i bula mut thlahlel lutukin ka awm tih i hria em? Ka hnaihah i awm tih hrereng sia nangmah khawih ṭha thei lo che a ka awm hi hrehawm ka tihzia hi i hrethiam pha lovang!" a rawn ti sup a, min kuah nghet sauh bawk a.

          Ka hmuia rawn fawp leh zauhin min kuahna aṭang chuan a inlahrang ta hram a, kan inmangṭha hnu chuan min chhuahsan ta a, ruak ta huaiin ka inhre nghal ringawt a!

          Inneihna atana inbuatsaihin kan buai chho ve hle a. Chutia pasal nei tura insawifel ta meuh chu Judithi nu pawhin a fanu chu thlahthlam thei niin a inhre ngang lo a ni ang e a pasal remti lo chung chu inneih ni hma chiahin a lo phei ve hlawl a, a sawi hmangin a rawn phei dawna a pasalin a ṭawngkhumdan aṭangin haw phei leh pawh a phur viau lo ni awm tak a ni.

          Inneih dawn zanah chuan u Rintei leh u Malsawma ṭhianpa Puia kha an lo kal a, u Rintei chuan Judithi chu underwear leh hmeichhe mamawh tur chi eng eng emaw a rawn kensak nual a,  ka ṭhiannu lawm lutuk chu a hnuk a ulh ṭeuh a, mittui tla zawih zawihin lawmthu chu a sawi a. Ka hnuk chu a lo ulh ve ṭeuh a, ka lo ṭahpui ve lo chauh zawng a ni e.
       
          Inneih ni chuan Judithi chu ka dinpui a, Kima'n Marama a dinpui bawk a, rin ai takin mo neitu lam chuan mi an lo sawm zau a, a awlsam leh zangkhai thei ang bera tih tum nia insawi si kha an lawm pui phian a, lawmpuitu pawh an tam narawh e.

          Mo neitu lamin thla an lakpui zawh chuan mo lam chuan an lakpui ve leh a. U Malsawmate chhungkua, a nu leh pa, u Rintei bakah Judithi nu chu a hmeichhe lam ang chu an ni deuh mai a, u Puia a rawn tel thei bawk a, ka ṭhiani chu an timawi tawk ve viau a ni.

          "Ka nupui i nih ve hunah chuan mo nalh ber i ni dawn," midang kalsawn tawh hnu chuan a rawn ti sup a. Judithi chuan a lo hre ve si a, a lo nui hak a, kei lah chu ka lo lai chhe em em thung a.

         U Malsawmate chhungkua chuan an thuam mawi hle a, thil pawh an chhawmtîr ṭha hlawm hle a, zahawm takin a pasalte inchhûngah an lawiluhtir a, an tiṭha tak zet a ni!

           Miss Maruati pawh a rawn nalh leh pek hle a, Maramate nen hian an lo inchhûng hnai ve viau a lo ni awm a. U Malsawma bulah a awm deuh reng a, ka mit a lo kham hmanhmawh a!

          Ka lu a nat deuh avangin ṭul dang a awm tawh lem lo bawk a, haw mai chu ka duh tawh a. U Malsawma chu ka zawng rilru deuh a, ka hmuh mai loh avangin u Rintei leh u Puia lo ṭhutna lamah chuan ka va ṭhu phei ve a.

          Ka ṭhu fel hman awrh tihah chuan u Malsawma leh Miss Maruati chu an rawn inzui lut a, ka mit chuan u Malsawma bâna Miss Maruati kut va inbat chu ka hmuh hmaih lo chiang kher mai! Ka thinphu chu a rawn rang nghal a, thikna nasa lutuk hi keimahah a rawn awm nghal bawk.

         Ka theih tawka inthununin ka hmelah engmah lantir loh tum chuan ka inhumruh ngat ngat a, ka chau nghulh a, ka bîng chûk chûk ni maiin ka inhria a,  kan bula an rawn ṭhut ve thleng chuan a bân chu a la thla lova, insi chêtin an ṭhudun zui a.

          U Rintei chuan, "Mapuii hian haw  a duh tawh a, a lo zawng che a," a lo ti nghal a.

           "A la hma alawm, nang phei chu a tawp thleng i awm a ngai a nia," u Malsawma va nghen deuh salh pah chuan a lo ti vat a.

          "A pawi lo, la awm rawh se. Kei chu  u Puiate rual hian ka haw thei alawm, an ruala haw hi ka lo tum tawh hrim hrim a," u Rintei va melh pah chuan ka lo ti ve a, ka rin ai takin ka ṭawng chu a pangngai a.

          U Rintei chuan ka awmdan chu lo hrethiamin min khawngaih hmel deuh hian min rawn en a, "Nia, kan rualin lo haw mai rawh se," tih pah chuan miss Maruati chu a va melh deuh kawk a.

          "In ruala haw a ngai hleinem, ka hruai haw thei alawm. Puia tan a buaithlak lutuk ang," u Malsawma'n a lo tih chuan rang lutuk hian ka lo hnial vat a.

          "Buaithlakna a awm lo, inah rawn kal kawi an tum hrim hrim alawm," u Puia chu min hrethiam lovang tih hlau ngawih ngawihin ka va mitmei pah bawk a.

          Kan boruak chu a man thiam ve ni ngei tur a ni, u Puia chuan, "Ni e, buaithlakna a awm lo, i in lama pen phei kan lo tum tho a, kan rualin haw mai rawh se," a lo ti ve boh a, ka thaw huai mai a ni.
         
          "Bawihtei chu kan hruai haw nghal mai ang, a tibuai palh ang che," ka sawi zawh rual chuan ka ding nghal a, Bawihtei hruai tum chuan ka kal nghal a.

          Judithi chu naupai taksa chak lo tih takah chhun lam boruak chu a zo meuh lova, room lamah a mu hahdam rih a, Bawihtei pawh a bulah chuan a awm ve bawk a.

          Bawihtei ka hruai phei lai chuan a pa chuan min lo en reng tih ka hria a, ka haider lui hmiah thung. U Puia chu a lo awm tawh lova, u Rintei chuan kal mai inpeihin min lo nghak a, Maramate kan va hrilh hnu chuan kan chhuak ta nghal a.

          "I ngaih tiṭha lo duh suh, engmah a ni lovang. Kha nu kha ka hrechiang a, ka u hian a duh lo tih pawh ka hre bawk," min hnem tum deuh hian u Rintei chuan motora kan luh hma chuan a rawn ti sep a, ka lu ka lo bu nghauh ringawt a.

          In kan thlen hnu chuan u Rintei chuan thingpui in a rawt a, amah chuan a lum nghal a. Haw kawngah khan motorah Bawihtei chu a muthilh daih avangin ka khumah chuan ka muttir nghal a, a thawmhnaw chu ka thlaksak a, ka chhuahsan leh thuai a.

          Thingpui in zawh hnu lawk chuan an haw ta nghal a, ka lu chu a nat tak tluk tlukah chuan damdawi ka ei ta ringawt a. Ka inbual lai chuan ka insum hman hma-in ka mittui chu a rawn baw zawih a, tui chu herh haw-in ka ṭap ta hlawp hlawp a.

          Engtin nge khatianga inhnaih leh inthlahlel hmel lutuk khan ka mithmuhah an awm theih zawk le! Bena a thik em em a, a bula ka ṭhut ringawt pawhin a thinrimna a tilang nasa thei hle si a, ani khan eng thil nge ti nia a inhriat reng reng? Ka na ngawih ngawih a, ka zak bawk. Pawnlamah khan eng tiangin nge an va khawsak ang a khawi hmunah nge an va interek ang tih lah hriat a ni lova , tunah pawh hian engtin nge an awm ang tih pawh hriat a ni hek lo.

          Ka lungchhe lutuk chu ka ka chu hupin ka ṭap hlawp hlawp a, insum ka tum buai peih lova, ṭah thawl hawk ka duh zawk a ni.

          Bathroom kawngkhar rawn kik ri dawt dawt thawmah chuan ṭap chu bângin ka intleuhfai nghal sawk sawk a. Min rawn koh pawh chuan chhâng duh lovin ngawi reng chuan towel chuan ka intuam a, ka mittui chu a hul hlei thei lova, a rawn luangthla leh ngiai ngiai a.

          "Mapui, i ṭha em?" rawn sawi dawt dawt pah chuan a rawn au a. Ka ngawih reng avang chuan a ngaih a ṭha lo zual sauh ni ngei tur a ni a rawn chum ri ta bur bur a.

          Inthlakna ka keng lut si lova, towel nen chauha chhuah chu ka hreh hle a, mahse, a rawn chum nasat tak em avang chuan ka hawng ta a.

          "Eng thil nge ti nia i inhriat?" A awrâwl chu a vin ṭha kher mai.

          Ka thinur lutuk vang nge hlauh enah ka en lo hlauh a, a mitah tak chiang zeta melh let pah chuan, "Eng thil nge ti vak se min tih? Ka inbual tih i hmuthiam ve mai lo em ni?" ka lo tilet fak a.

          "Inbual ringawt maw? I va rei si ve!"

          "Ka hmanhmawh lo tihna a ni mai alawm"

          "Khawngaihin Mapui, engvanga hetianga awm hi nge i nih?" ka bâna rawn vawn pah chuan a ti hrawk a.

          "Kha i kut bawlhhlawh khan min khawih hlek suh," a kut thinthlak dawrh pah chuan ka lo ti ṭhawt a.

          A mitmengah chuan rilru natna leh beidawnna hi ka hmu zawk a, mahse, a rei lo khawp mai. Min rawn vawnbeh leh pah chuan mitmeng tur deuh khuihin min melh a, min vuan nghet mah mah a ni.

          "Tenawm tia sawi turin he kut hian eng thil bawlhhlawh mah a ti lo, engvanga hetianga awm hi nge i nih min hrilh rawh,"

          Min vawn ngheh mai bakah ka towel ven chu a tlak ka hlauh avangin ka kut chuan ka âwm zawnah ka vuanbet tlat a, chuvang chuan ka duh angin ka che thei lova, ka ding mawl tawp ringawt mai a ni.

          "A chhan chu nang hian i hrechiang khawp mai! Tunah pawh duhtawka in induat vel hnu-ah i rawn haw chauh a ni lawm ni?" ka ti let ve salh a.

          Ka sawi zo hman meuh lo, a lamah min pawt phei rawk a, nghet lutuk tak mai hian min pawmbet nghal hmiah bawk a, hnai fahranah min rawn chhuk en run a.

          "Khati khan i rinthu-in thil sawi ringawt suh. Thil awmdan dik tak i hria a nih loh chuan engmah sawi tawh suh"

          "Thil awmdan chu a chiang reng a ni lawm ni? Midang hmuhah pawh insûm thei lovin in innâwk vel a ni lawm ni? Ka mit hi a del bik hleinem!" Ka thinrim leh rilru na lutuk chu auchhuah vak mai hi ka duh a.

          "I ngaihdan ang kha eng thil mah a thleng lo, i rindan kha kal thuipui lutuk suh,"

          "Ka rindan a ni lo, ka hre ....."

          Ka hmui chu a hmui chuan a rawn khar hmak a, ka lo tal phat thung.

           Min kuah beh hneh em avang chuan ka talchhuak thei si lova, min fawp uar sauh a, ka thinur lutuk tihngaihna hre lo chuan a hmui chu ka sehsak ta ringawt a!

          Min thlah chiang kher mai! Thinur lutukin ka lo melh râm râm a, a hmui thi chu a kutin a han tuai zauh a, a kut chu enin a nui suk a.

          Min rawn pan hnai lehin ka tukkhumah chuan a rawn dawm a, a lama min pawhhnaih pahin a kut lehlam chuan amah si chetin ka kawngah a kuah nghal hmiah bawk a.

          Min fawh tuma a rawn kunhniam leh lai chuan ka lo thle sawn deuh a, ka hmuiah ni lovin ka biangah chuan a rawn fawp a, ka tukkhuma a dawm tlat avang chuan duh angin ka thlesawn thei lo a ni.

          "Kawlh reuh lutuk mai!" nuih suk paha tiin ka tukkhuma a dawmna chu a tinghet sauh a, ka hmui a rawn sik rual chuan ka lo chip hmak thung a.

          Beidawng duh miah lo chuan min fawp a, ngenngawl taka min fawh takah chuan ka inrin hma-in ka hmui chu ka lo kau deuh a, rang lutuka a lei chu rawn hâwllut nghalin duhthawh lutuk tak mai chuan min fawh chhunzawm nghal a.

          Min tawh hleka ka awmdan danglam zel te, ka hnar thei ngai miah lote hi keimah ka inhua a, lo indang tur ka nih laiin amah ka mamawhna hian min tur a, ka thlahlel a, keimahah danglamna nasa tak min thlen a ni.

          A nghâwnga kuahin uar zetin ka lo fawplet a, ka taksa chuan amah hnaih lehzual turin ka nek talh talh a, ka dar ruak kâng maia a rawn chul lai chuan ka mur ar ar a, min tawhna apiang chuan min fan a, amah ka mamawhna chu a sosang tak zet a ni.

         Thaw halh halh chung chuan kan inen a, a mitmeng chu tisa châkna avangin a phê rïai a, ka mitmeng pawh eng rûai a ni bik hauh lovang le!

          Ka towel ven chu kan inkuahna lamah khan a lo inphelh a niang chu a taksa ka sik loh rual chuan a tla thla ta hnawk a, ka vuan hman si lova, underpant leh brazier nen chauh chuan ka ding ta teu mai a.

          Ka tihngaihna hre lo leh hamhaih lutuk chuan u Malsawma chu ka va nek rawk a, ka kuahbet nghal chawih a.

VANMALSAWMA

Chapter 18






          Min lo kuah let vat a, chutah, min nemsawn deuhin ka towel tla chu a chhar a, min rawn tuam nghal a.

          "Ka insum theihna ka hloh hma hian i thawmhnaw va ha rawh le. Chuti a nih loh chuan .... " sawi zo lo chuan a ngawi a, min thlek vang vang a.

          Ka taksa khur nasa lutuk chu thunun tumin thawk ka la vang vang a, ka inthlak laite chuan ka la khur dar dar a, ka inthlak chhûng pawh a rei viau reng a ni.

          U Malsawma ka rooma a lo luh chuan ka lo inthlak zo fel chiah a, ka khuma Bawihtei mu chu a thlek vang vang a, a biangah chuan a zu fawhsak zauh a.

          "I coffee siam in a chakawm hle mai!" a rawn ti sup a. "Ka inbual zawha in turin khawngaihin min lo siam ta che."

          U Malsawma inbual zo a lo chhuk chuan coffee chu ka lo siam zo chiah a, ka lo pe nghal vat a, kei pawh chuan ka no chu kengin chair-ah chuan ka ṭhu nghal a.

          "Chuan, Maruati kha i lo thik tihna a nia, a dik em?" nuihzat hmel deuh hian a rawn tichhuak sup a. A nuihzatthlakna ka hriat ve miau loh vang chuan ka lo sa deuh phat thung a.

          "I bânah a vuan reng a, nangmah si chétin a ṭhu bawk a, in lo luh hma khan khawi lamah nge in va awmbo pawh kan hre hleinem. A englaiah khan nge nuihzat tur awm ka hre ve miah lo!" ka lo ti hmak thung a.

          "Pawnah khan Judithi nu nen kan inbia a, kan inbiak laiin Maruati kha a lo kal ve a. Kan thilsawi lai kha midang hriata sawizui chi a nih loh avangin Judithi nu chu a kalsawn a, keini pahnih  chu kan lo lut nghal a nih kha. Inchhûng kan rawn luh dawn khan a inchhuih palh a, ka bân kha rinchhanah a hmang ringawt alawm,"

          "Rinchhana hmang ringawt chu a nih hmel loh kha! Inchhûng thlenga rawn invawn kha a ngai em ni? In han ṭhute lah kha in insi pilh ang tih ka lo hlau zawk," ka lo ti leh hlak hlak a.

          A rawn nuichhuak hawk a, kei chu ka lo tum hmak thung a.

          "I thik a ni tih hriat chu a nuam hle mai, nuam ka ti tak zet!" a rawn ti leh a, ka lamah a rawn awn pah hlek bawk a.

           "I ngaihdan ang khan engtin mah kan awm lo. Ka tâna hmeichhe awmchhun chu nangmah chauh i ni, ka thinlungah hmeichhe dang an leng lo," thutak zawk chuan a rawn ti leh sup a.

           "Sawi hi chu a awl viau zel," ka lo ti hmak a, ngampa lutuk tak maia khatianga midang awmlaia a nek vel ngam kha ka huat tawk a tling a, ka ngaihtuah leh pawhin ka lung a awi thei ngang lo a ni ber e.

           "Ka sawi hi awih mai rawh. Nang anga ka rilru luahtu hi tumah an la awm lo, Maruati hi ka tân engmah a ni lova, i awih duh lo ṭalh a nih chuan i thu thu a ni e." a thutak kher mai!

            "A va ngampa sarh sarh si ve! Engtin nge khatiang khan a awm ngam zawk?" ka lo ti leh a.

            "Ka hre tawh bik lo le. Amah kha kan va zawt mai dawn em ni ang?" A nui pah hak bawk a.

            "Nui suh."

            "A za alawm!"

            "Za mah se."

            "I va han naupangchhia reuh tak e aw!" A nuih chu a za tawlh tawlh emaw tih mai tur a ni a, a no chu dawhkanah dahin a thochhuak nghal a.

          Ka bula a lo phei lai chuan rum tawkin ka lo melh a, engah mah a ngai lo tih hriat tak mai chuan nui hmel chu a la pu reng a. Ka bul a rawn thlen chuan ka dara a kut nghatin a rawn kunhniam nghal a.

           "Ka nupui i nih hun hi nghakhlel takin ka thlir reng tih lo hrereng ang che," ka hmuiah chuan a rawn fawp zauh a, "Muttui aw," a ti leh sup a, ka chhanlet hma chuan a kal ta daih a.
         
          Ka la naupan chu thuhran ni se, pasal atana ka duhthusam mipa ka la tawn loh vang nge pasal nei tur hian ka la indah chhin ngai lo hrim hrim a, tunah erawh chuan ka duhthusam mipa ka tawng a, ka hmangaih em em bawk a, pasal atan pawh ka duh tih ka inpawm thlap a ni.

          Class chu kan la kal tluang ve zel a, Judithi pawh a naupai a la lan lem loh avangin class a la rawn kal ve reng tho a. U Malsawma'n B.com tal hi zo se a ti a, a ṭul a nih chuan a zirna senso pawh tum vek a inhuam a. Mahse, Marama nu leh pate hi mi pangngai tak mai an lo ni a, anmahni ngeiin a zirna chu an tum tur a nihthu leh an mawhphurhna a nih tawh thu sawiin u Malsawma chu an lo hnial a. A duh chen chen lehkha zir turin an ti a, nau a neih hunah pawh lehkha a zir duh a nih phawt chuan nau buaipui pawh an inhuam hle a, ka ṭhiannu hi a vannei tak zet a ni!

          Advance Christmas kan hman ni chuan kan ṭhianho pawh chuan nuam kan ti ve hle a, Marama hian annu hi a duat thiam em em a, indim turin a hrilh reng bawk a. College beat group an zai a, students ṭhenkhat phur zual chu an lam nasa mai a. Kan ṭhutna piaha mipa ṭhenkhat chu rawn awmhmunah an lo su ve nghawng nghawng hlawm a, pakhat chu stage hmaa lamho bula va lam ve tum chuan a rawn chhuak phei a, Judithi chu a rawn su her sawk a.

          Marama chu a thin a rim hle a, chupa chu va umzuiin a kawrnghawngah chuan a va ṭham nghal nawk a, buaina a chhuah ka hlauh avang chuan Bena leh Kima chu va ṭhelh tur chuan ka hrilh vat a. Judithi lah chu hlauthawng lutuk hian a ding a, Marama chu a va ko tuar a, thawm a ring ṭha nasa mai si a, tuman a au ri chu an hriat pawh a rinawm loh.

          Benate chuan Marama chu an rawn hruai phei a, annu chu a ṭhat leh ṭhat loh a rawn zawt nghal a, ani chuan a ṭhat thua lo chhangin kha pa a va um avang khan a lo sawisel hlak a. Marama lah chu a la lungawi lo nasa mai a, kha ai khan su na ta se, naute tan pawh a pawi thei tiin a phun zui hluk a.

          Banah chuan Volleyball court sirah chuan Bena motor la chu kan lo nghak ṭhap a. Judithi'n nau a pai avangin Marama chuan bike-a chuan a phal tawh lova, Bena motorin an haw ve mai ṭhin a ni.

          "Nang kha, min cho ve tak tak a nih chuan lo innuai teh ang. Nichin khan ka khawih ve hma che khan i tlanchhe ta mai sia," rawn titu lam chu kan hawi phei ṭhap a, nichina halla Judithi rawn sutu kha a ṭhiante nen kan lam pan chuan an lo phei mek a.

          He mite ṭhian ho hi an nungchang a mawi lo hle a,  hmeichhe chhaih nawmnah leh an ngam zawngte laka han inlakpa vel hi an ching a, an chapo bawk si nen anmahni hawtu an awm nual a ni.

          Kan dinna bul an rawn thlen phei chuan Marama chu hnai fea dinchilh pah chuan rum tak mai hian a rawn melh a, Judithi hlauthawng lutuk chuan ka ban chu a rawn hmer vak a.

          "Nichin khan i inla pa viau a ni lawm ni? I va dawih ta zê zû ve!" Chupa bawk chuan a ti leh a, Marama âwmah chuan a nam pah nawk a.

          Judithi chu a lo ṭe ṭhat a, Marama chuan chupa kut chu vaikiang lawpin a kut chu a humruh nghal a.

          "Ka ngawih reng avang hian ka hlau che emaw i ti em ni? Nang ang mi chapo lutuk hi ka hlau reng reng hleinem che." Marama aw chu a chang ṭha fal fal khawp mai.

          Kima chu ka mitmei vat a, ka hlau lutuk chu ka khur ru dar dar a. Mahse, Judithi vang chuan hlau anga awm loh  ka tum hram hram a.

          Kima chuan Marama chu va pawt sawnin chu pa hnenah chuan kut thawh lova ṭha deuha thil sawi tlan a ṭhat zawk thu chu a sawi a, chutia Kima'n Marama a pawtsawn chu chu pa chuan pawtletin a kawr âwmah chuan a ṭham nghal a.

          Marama thinin a tuar ta lo ni ngei tur a ni chu pa khabe-ah tak chuan a hneksak ta sawk a, an insual chu a ni zui ta mai a. Kan hlau lutuk chu Judithi nen chuan kan inchelh a, kan inhum nghet dun hle a ni.

          Bena pawh lo thleng phei tawhin Kima nen chuan ṭhelh vat turin ka lo au chul a, Kima'n ṭhelh tuma an inkâra va tlakzeh a tum chuan chu pa ṭhiante zînga cher sang deuh chuan a rawn tlawh pawp mai a, Kima chu a tlu thlawrh a.

          Bena chu a che ve ta phat a, Kima lo tlawhtu pa chu a bekah tak a va hnek ve ta siah a, an insual buai ta tulh tulh mai si a, ka mangang lutuk chuan theih tawpa ringin, "Duhtawk rawh u!" tiin ka au tuar(h) a.

          Mi an rawn pungkhawm chak hle a, hriat loh kârin tam tham fe chuan min lo dinhual ṭhup tawh a. Han ṭhelh tum tumah an awm loh avang chuan ka mangang lutuk chu u Malsawma koh tum chuan Judithi kut chu ka thlah a, ani lah chuan min la vuan nghet tulh tulh a.

         "Tawp nghal rawh u!" A aw chu a chang ṭha beng bawng hle a, insuallai pawh chu an tawp chiang khawp mai.

          Ka thaw huai a, Judithi pawh chu thawveng ta huai ni awm takin thawk a la siai siai a.

          U Malsawma chuan Marama chu thil awmdan a zawt a, Marama'n thil thlendan a sawi lai chuan a insualpuipa chuan a thiamthu a lo sawi zut zut a.

          "Nang kha lo ngawi rawh," u Malsawma chuan a lo ti ram hmak a, "Nakinah i thiamthu chu i sawi dawn nia."

          Lecturer pahnih dang an lo thlen leh chuan u Malsawma chuan thil awmdan chu a lo la zawtfiah mek a, lecturer lo kal pahnih zinga pakhat zawk chuan thil awmdan tlangpui a han hriat chuan Marama insualpuipa chu a va pan phei a.

          "Nang hi college i rawn rap ve dêk dêk a, i rawn hawi pir nghal em em ringawt a, in seniorte pawh zah lovin hmanni lawkah pawh i lo ṭawngkhum vel a, an lungawi lo teh mai a nia. I pa in a ni lo tih hria la, in hausakna kha helaiah hian rawn chapopui viau tawh suh ang che. I laka complain ka dawng leh a nih chuan a hranpaa warning pek i ni tawh lovang, chu chu hrereng ang che," thinrim hmel tak hian a va ti bawrh bawrh a.

          Midang an kal darh vek hnu chuan Maramate leh an insualpuite ho chu an la zilh malh malh a, a piah deuha ṭhutna awmah chuan Judithi nen chuan kan va ṭhu a, rei pawh kan ṭhut hma chuan Maramate pathum leh u Malsawmate chu an rawn inzuiphei ve a.

          Kan ṭhutna bul an rawn thlen chuan  haw nghal mai kan lo rawt a, min hnial bik lem lo chuan an lo remti ve mai a. Maram mit ko chu a thi deuh a, Bena hmui a vûng bawk a, Kima erawh chu a hmaiah an khawih fuh ve lo ni awm tak a ni a him pial thung a.

          U Malsawma chuan ka kuta rawn tawh zauh pah chuan a ruala haw ve turin min rawn hrilh zauh a, aw tihnan ka lu chu ka lo bu nghal vat a.

          U Malsawma ruala ka haw tur thu ka hrilh hnu chuan Bena motor chuan min hawsan ta hlawm a, keini pawh chu u Malsawma motor dahna lam pan chuan kan phei ve nghal a.

          A motora ka ṭhu lut ve chiah chu ka kutah a rawn hum vang vang a, ka lama rawn awn deuhin, "I ziaawm deuh tawh em?" a rawn ti sup a.

          "Zia-awm deuh tawh e. Mahse, ka tirilah hian ka la khur der der mai," ka lo ti vat a.

          "Nichina ka lo thlenlai kha chuan i hlau lutuk kha i dâng vek thei alawm, i ṭhiannu lah kha a ṭah a chhuah hmel bawk si!" a rawn ti leh sup a. Ka kut chu la kangin a hmui chu a siktir vang vang a.

          "Ka hlauhthawnzia mai chu a! Rawn koh che ka tum mek laiin i lo kal hlauh a," o

          "Min rawn koh i tum maw?"

          "Aw, tum e, khatihlaia ka ngaihzia che kha chu ka sawithiam lo zawk," ka lo ti leh sap a.

          "Kei chuan engtiklai pawhin ka ngai che a, nang chuan hlauh i neih chauhin min ngai tihna a ni maw!" a nui pah sak a.

          Ka kut chu thlahin motor chu a tinung nghal a, "Kan tlanchhuah vat loha i kut ka vawn reng chuan helai hmunah hian midang mitmei veng lo lêkin ka che ang tih a hlauhawm tlat!" min rawn melh pah zauh a, ka lo lai lehpek hle thung a.

          In kan thlen chuan u Rintei a lo awm teh mial a, Bawihtei nen chuan an lo awmdun a, an lo nuidun leh har har tawh a.

          Kan thlen hnu lawkah chuan u Puia a rawn lut ve leh a, u Rintei nen hian an inzui nasa riau a, an inngaizawng a nih ka lo ring rilru ve ngawt a!

          Christmas hmang turin haw phei ka tum tih Bawihtein a hriat chuan a lungawi lo hle a, dik tak chuan kei pawhin hawsan chu ka hreh ve lutuk a, mahse, haw loh ngawt chu a ni thei bik bawk si lo a ni.

          Ka haw hma kâr khat la awmah chuan u Malsawma chhûngte chu chaw ei turin an rawn chho a, kan ri nak nak hlawm a.

          U Rintei chu a chawhma lam duty neiin tlailamah a clinic-ah a ṭhu nghal a, thim hnu-ah a rawn thleng chauh a. A rawn thleng chu a chauh hmel hle a, ṭhuthlengah chuan a ṭhu nghal dar dar a.

          Chaw eikhamah chuan sitting roomah ṭhu-in kan ti ti laih laih a, Bawihtei pawh a teddy bear nen a lo inchhawp ve bawk a, a pi nen chuan an han inkhuallem leh lawk ṭhin bawk a.

          Thingpui hâng lum turin choka lamah ka phei a, u Rintei chuan min rawn zui vat a.

          Ka thingpui chhuan lai chuan ka bulah chuan lo dingin tlai lama a clinica damlo rawn inentir che chhe deuh chanchin chu sawiin a nui har har a, ka lo nuihpui ve hawk hawk a.

          "Kârlehah maw i phei dawn?" thutak deuh zawk chuan min zawt a.

          "Aw, ka tumdan chu a nia lawm."

          "Bawihtei te pafa an khua a va har dawn ve aw!"

          "Kei pawn ka ngai ngawt ang!"

          "Phei lo mai la ti dawn ila i nute'n an ngai ve dawn bawk che sia, helamah Christmas hmang ho mai ila ṭha tur a nia."

          "Ni e tiraw? Kei pawn ka chak lutuk! Mahse, haw phei ngei ka ngai bawk sia."

          "Ka u lunglêng lutuk hian a rawn zui ve leh mai thei che a ni," nui har har chung chuan a ti a.

           "Teuh lo mai, chutianga lunglêng tur chi a nih loh hi," ka lo ti hliai a. "A hrim hrimin min ngai ve teuh lo mai, Bawihtei nen an inkawm hlim thei a, an duh hun hunah in bulah an rawn kal thei dawn bawk a, min ngai teuh lo mai," ka tihzawm leh duah a.

          "Chu zawng, i hre sual a nih chu!" Aw lo chhuahna lam chu kan hawirual dun ṭhawt a.


VANMALSAWMA 

Chapter 19




          Ka bulah rawn kal pheiin ka mitah tak chuan min en a, a hawisawn eih lo. Ka mit chu lasawn hmasa-in thingpui chu ka siam a.

          Ka thingpui siam chu no-ah ka thli chhuak mawlh mawlh a, tray-ah dahin ka châwikang nghal a.

          Ka tray chawi chu min laksak pahin u Rintei chuan, "Keiman ka lo keng ang e," tih leh kal nghal chu a rual a.

          Zui ve mai tuma ka pen tur chiah chu u Malsawma chuan ka bânah a rawn vuan a, ka hnungah keimah min si chet chuan a rawn ding nghal zat bawk a.

          "Ka ngaih loh che i lo ring a maw!" Ka bengbulah chuan a rawn ti thawp sat a.

          Chhâng lovin ka kawnga a rawn kuahna kut chu ka lo hum vang vang a, engtik lai mai pawha a bula awm reng ka chakzia chu sawichhuah mai ka hlau a ni.

          "Ka thu chu ni se i haw phei hauh lovang. Chuan, ka ngai hle dawn che tih hi i hre bawk dawn nia." Ka biangah a rawn fawp zauh a, ka kutah vuanin sitting room lamah min chhukpui ta nghal a.
 
          Ka kut a vawnna chu thlah tura ka tih chuan a lo nui ringawt a, a nu leh pate hmuha chutianga inkaih vel chu ka duh teuh mai si lo. Ka han pawt leh a, a vuan nghet sauh a, ka va melh vak a, min lo nuih suk a.

          Sitting room kan thlenthlak rual chuan min thlah ta hram a, ka thaw huai a, a lo nui var var thung a. Chimawm lutuk mai!

          A pate haw tur chu pawnah kan va  thlah a, an tlanliam hnu chuan inchhûnga lut mai lo chuan kawta pangpâr kan phun ho chu thlir pahin varanda-a ṭhutthlengah chuan kan ṭhudun a. Pangpâr ṭhenkhat chu an par vanglâi tak a nih vangin a lang mawi hle a, tlema enkawlna an dawn deuh tak hnu phei hi chuan an duah ṭha-in an parmawi hlawm em em a, thlir a manhla hle a ni.

          Pâwn boruak chu a lo vawt reuh hle a, kawr bântlawn satliah mai ka hak avang chuan ka vawt ti chu ka inkuah chaih chaih a. A bân chu rawn phar chhuakin min rawn kuah ta hlu hlu a, a taksa lumṭha tak chuan min ur ham ham a, a darah chuan ka lu chu ka va nghat ve bawk a.

          Chutiang chuan ngawi rengin eng emaw chen chu kan awm vang vang a, ka ngaihtuahnaah chuan hetianga thlamuang taka amah ngheng renga awm nuam ka tihzia leh ka thlakhlelhzia te, amah ka hmu reng chung leh ka bula a awm reng chung pawha ka ngaihzia te chu a lo lang zut zut a.

          Ka hmangaih tih ka inhre tawh a, min hmangaih ve em tih chu ka hre hauh lo naa a awmdanah hi chuan min duh ve tak zet niin ka hre ṭhin a, a mitmenga min ngaihsakna leh min duatna lo lang ṭhinte chuan a tider bik lo a ni tih min hrilh a ni.

          Ka lû-a min rawn sawi dat datah chuan ka harh riai riai a, "Inchhûngah lut ang le, i hritlâng palh ang. Khumah i mu lum vat dawn nia," a rawn ti sup a.

          Ka lo muhil sek hman a lo ni a, ka ham bai bai chu min lo en reng a. Ka kutah chuan la-in min kaitho a, inchhûngah chuan min kailut nghal a.

          Ka room kawngka bulah chuan dingin amah si chetin min kuahbet a, ka hmui chu a hmui chuan a rawn bawhthuah nghal zat bawk a, ka lk chhanglet rang kher mai. Amah ka thlakhlelhna hian kiam lam aiin zual lam a pan zel a, ka kham thei lo a ni ber e.

          College kan kal tawp ber ni chuan kan ban hma avang chuan  Mârama te inah kan lêng kual a, a nu chu inah lo awmin min lo be bawrh bawrh a, nu fel tak a niin ka hria a, a nelawmin a bula awm pawh a nuam hle a ni.

          Bena chu a nu zin haw hmuah a ngaih avangin Kima nen an haw hmasa a, kei chu Judithi chuan ka haw ve a la phal loh avang chuan ka la awm khawmûang thung a.

          College kal tira ka chhuah hma khan nu Mawii chu a nawmsam meuh loh avangin tlai lamah eirawngbâwl lova haw hma turin ka hrilh a, min han hnial ve deuh naa ka tihluih avang chuan haw hma tur chuan a insawi ve ta hram a. A tlawmngaiin a taima em em a, a che hi a fel thlarh mai bawk a, u Malsawma pawh hian hlawh hi a pe ṭha thawkhat viau-in ka hria a ni.

           Tlailam ei rawngbawl ka ngaih avang chuan haw ka duhthu ka sawi a, Mârama chuan min thlah tumin a insiam a, chutia haw tuma ka lo ding uaih tawh chu Mârama nu chuan min rawn hmu-in kan bulah chuan a rawn phei vat a.

          "Haw i tum ringawt elaw? Tlai chaw ei ve nghal ta che," a rawn ti a.

         "Rawngbawl ka ngai a, ka va haw phawt ang e, remchâng dangah ka la rawn ei zawk dawn nia," ka lo ti vat a.

          "Ni love, i ṭhiannu rawn awm hnu-ah i la rawn ei lova, i ei ngei ngei tur a ni. Malsawma ka'n bia ang e," tih pah chuan a phone chu a hmet nghal mawlh mawlh a.

          Lo hnial ka tum lai tak chuan pawnlamah a chhuak ta daih a, a ṭawng nghal bawrh bawrh bawk a. Eng emaw chen pâwna a va biak hnu chuan a rawn lut veleh mai bawk a.

          "Hetah chaw ei tur a nih chu aw Mapui, Malsawma te pafa pawh an lo kal dawn e. Tikhan lo ti ti ula, khilai kawnah khian ka han chhuak chho lawk ang e," tiin a chhuak leh nghal vut a.

          Bawihtei te pafa an lo thlen lai chuan Judithi te roomah kan lo awm a, an lo thlen lai tak pawh ka hre lova, Bawihtei'n min ko lang lang ri ka hriat chuan ka va chhuak vat a.

          U Malsawma leh Mârama nu te chu sitting roomah ṭhu-in an lo ti ti mawlh mawlh a, Bawihtei chu ka bulah a lo tlan vat a, ka hnunga Judithi lo chhuak a hmuh chuan a va pan nghal a chat a.

          Mârama bike sil zo rawn lutin u Malsawma a rawn hmuh chuan a be nghal chul a, an insual chungchângte kha an sawichhuak a, Mârama nu chuan vawikhatmah insual buainaa tel tawh lo turin a fapa chu a lo hrilh ve mawlh mawlh bawk a.

          Tlaia Mârama pa office bâng a rawn haw chuan naupang lawmzâwng a rawn khai haw ṭeuh mai a, Mârama nu-in kan chaw ei tur thu a lo va hrilh nj ngei tur a ni Bawihtei duhzâwng ni a a rin ho a rawn leisak a lo ni a. Naupang nei lo, hulhâr tawh an ni a, naupang an lo lawm phian a, Bawihtei pawh a tlangnêl viau a, nuam pawh a ti hle a ni.

          Mârama hian u tlangval pahnih a nei a, an pahnih hian hna an nei ve ve tawh a, Mârama chhang chiah hi hmeichhia a ni ve thung a, pâwl sawmpakhat a zir ve mek a ni.

          An zavai mai chuan an fel em em vek a, atu amah chu han hrawn hrehawm hmel an awm lova, Judithi pawh an duat hmel khawp mai.

            Zanriah eikham hnu chuan sitting roomah kan ti ti hlawm a, eng emaw chen kan ṭhut hnu chuan u Malsawma chuan haw a rawt ta a.

           Kan haw tur chu pâwnah min rawn thlah hlawm a, Bawihtei'n Mârama pa thil lo hawnsak kha Judithi te roomah a theihnghilh avangin an va let leh a, kan lo nghak ṭhap hlawm a.

            "Sawma, i fanu hi nu mamawh rual lek a ni si a, nupui neih leh lamte hi i ngaihtuah tawh em? Bawihtei nu tur hi zawn vat a ngai a nih hi," Mârama nu chuan a rawn tichhuak hlawl a.

          "Ka hmu tawh alawm!" a lo ti awlsam vut a, min rawn melh pah sak a, ka lo lai chhe leh titih der a.

          "A nih chuan mo lawm a hnai tihna a nih chu!" Mârama nu bawk chuan phur hmel tak hian a lo ti leh a.

          "Chu zawng a la hla deuh ang. A hmeichhe inpeih hun ka la nghak chu a nih hi." A nuichhuak hak a.

          Midang pawh chu lo nui ve-in an fiam zui bawrh bawrh hlawm a, Bawihtei te an rawn chhuak ta bawk a, motorah chuan lutin kan kal ta nghal a.

          In kan thlen hnu chuan ka inbual nghal a, ka inbual zawh meuh chuan Bawihtei pawh sofa-ah chuan a lo muhil sêk sêk tawh a, ka phei hun a hnaih tawh avangin ka awm chhûng chu ka bula riak turin ka ti a, a pa chuan ka khumah chuan a rawn suan ta nghal a.

          Coffee in pahin sitting roomah chuan TV enin kan ṭhudun a, inngheng rialin kan ṭhu a, kan pahnih chauha kan awm hi chuan insi lovin kan awm ngai lo ti ila a dik ber ang chu!

          "Naktuk bazâr kal hun chu Bawihtei hi hruai ve ila a ṭha ang, lei tur ka ngah lem lo bawk a," ka ti sep sep a. School an chawlh ve tawh avangin amah awm ṭhintu kha a lo kal tawh lova, college kan kal hlanin nu Mawii bulah a lo awm mai ṭhin a ni.

          "Chawhma lamah em ni chhuah i tum?" a lo ti sup a.

          "Umm ..... Ni mai, chhuak hma ila, haw leh hma zawk ila ka ti deuh a,"

          "Ka thiltih tur kha ka rei ka ring lova, min lo nghak ula, ka rawn hruai dawn che u nia."

          "Ticket chu ka la lovang maw?" ka lo ti leh sap a.

          "Ka hruai i duh lo a nih loh chuan lak a ngai hleinem, ka va dah dawn che ka tih kha," tlemin a aw-ah chuan lungawilohna a ri tel a.

          "Aw.... nia, ka hria a lawm. Min hruai chu ka duh  a, mahse, min haw pheisan hunah ka ngai dawn lutuk che a," ka lo ti niah niah a.

          Min rawn kuah ngheh salh pah chuan thawk a la halh a, ka khabe-ah chuan dawmkangin ka mitah tak chuan min en a.

          "Min ngaih tur thu kha han sawi nawn leh teh," a ti sup a. "Sawi nawn leh rawh!"

          "Ka ngai dawn lutuk che!"

          Duhthawh zet hian min rawn fawp nghal ngawng ngawng a, ka thiam ang tawka uar chuan ka lo chhânglet a, kan duhthawh dun hle a. Hetiang taka nasâ hian mipa leh hmeichhia hi a lo inhip tawn theih tih ka hre ngai lo! Ka kham thei lova, nitinin ka duhzual zel a ni ber e.

          "Nîtin i aw hriat ka duh dawn a nia, vawikhat mai ni lovin vawihnih vawithum, ni lo, engtik lai pawhin a remchan hun apîangah i aw hriat ka duh ang."

          A aw chu a ring lo na'ngin a thil sawi chu ka hrechiang khawp mai. Kei pawhin chu chu ka duhdan chiah a ni ve ngeiin ka ring.

          A tukah chuan u Malsawma a hman hma avang chuan rin âi takin kan chhuak hma thei a, ka mamawh vel kan lei zawh hnu chuan Bawihtei Christmas thawmhnaw tur chu kan enkual ta nghal a.

          Dawr pakhata kan awm lâi chuan miss Maruati leh a ṭhiante an lo lut ve a, min rawn hmuh chuan ka ngaihbel nge a ner deuh sakin ka hria a. U Malsawma chu nui sâng chunga enin a va be nghal a, ka lo ngaithei lo ru leh hle pek a!

          "Vawiin khân i ruala ka haw tur thu kha ka hrilh che sia, min lo nghak lova!" Vui aw deuh hian a ti nghar nghar a.

          U Malsawma chuan min rawn melh zauh pah chuan, "Bazâr kal kan tum avangin ka hmanhmawh deuh a, ka lo theihnghilh bawk nen ka haw nghal daih a," a lo ti a. "A nih phawt aw, kal kan lo tum chiah a," a tihzawm zat a.

          Dawr aṭanga kan chhuak  chu ka lo insangmar ṭeuh tih ka hre chiah a, thawk chu ka la halh a, u Malsawma chuan min rawn en vat a, ka awmdan chu hriatthiam hmel zetin min nuih suk a.

        Bawihtei thawmhnaw kan lei zawh chuan kan haw ta nghal a, Bawihtei chu a kal chau ve deuh a niang haw kawngah chuan a muhil ta daih a.

          A tuka ka haw phei tawh dawn avangin zanah chuan  ka insiam a, tulṭhuan eikhamah muangmara chhuah kan tum avangin hmanhmawhthlak a ni dâwn lem lova. Mahse, Bawihtei a pute ina dahkual a ngaih dâwn avangin lo insiamfel hma tluk chu awmin ka hre lova, ka kentur ho chu ka pack fel nghal thlap a.

          A tirah chuan Bawihtei chu a pa-in hruai ve a tum kha a ni a, mahse, motora a muthilh ṭhin avangin haw lamah a buaithlak dawn si a, hruai loh mai chu a tum ta zawk a ni.

          A tuk zïnglamah nu Mawii a lo kal hma hlauh a, chaw eikham veleh kan insiam a, kan inpeih fel hnu chuan kan chhuak ta nghal a. Bawihtei pûte in lam pan chuan kan tlan nghal vang vang a.

          A pûte in kan thlen chuan rei vak lo ṭhu-in kal leh nghal mai chu kan tum a. Kan kal dâwn chuan Bawihtei chu a ṭap fap fap a, ka khawngaih lutuk chu ka hnuk a ulh ṭeuh a, ṭawng pawh ka ṭawng ngam lova. A pa chuan a'n thlem leh rih a.

          Chutia an inthlem lâi tak chuan a nî clinic kal a rawn haw hlauh a, a nî a hmuh tákah chuan Bawihtei chu a zia ta deuh a, rilru nuam lo ṭeuhin kan kalsan ta a.

          Kan tlan tluang bawk a, Lunglei kan thlen phei chuan a la hma viau a. Ka nu chu dawra a awm avangin dawrah chuan kan lut hmasa a, a naute kutah dawr chu dahin kan pathum chuan kan haw thla nghal a.

          Zanah chuan ka ṭhiante ho chuan min rawn tlawh laih laih hlawm a, ṭhian hi ka kawm tam lutuk lova, tih tak zeta ka kawm hi chu pahnih khat bak an ni lo. Rawn lêng zîngah pawh chuan ka kawm lutuk lem loh, eng emaw châng zeuh zeuha ka kawmte an tel nual a ni.

          Inlêng haw hnu chuan ka nu leh u Malsawma te lo inkawmna bulah chuan  ka va ṭhu ve a, a tuk zînga haw phei leh nghal a tum avangin mut a duh tawh em  tih chu ka zawt a.

          "La mu duh love, i thingpui lum ka in khât tawh dâwn si a, kan in leh phawt lohte chuan," a lo ti a.

          Ka nu chuan, "Kei chu ka mu mai teh ang, ka kawng a kham riau mai! Tikhân in pahnihin lo in ula, Ngaihawma lêng pawh a rawn haw har tawh lovang," tiin u Malsawma nen chuan min mangṭha a, mu tur chuan a kal ta nghal a.

          Thingpui kan in lâi chuan Ngaihawma lêng chu a rawn haw ve mai bawk a, reilote a ṭhut ve hnu chuan ani pawh chu mu turin a kal veleh nghal mai a.

          Thingpui inna no ka sil zawha ka va let leh chuan a bula ṭhu turin min lo ti a, ka va ṭhut rual chuan min kuah nghal a, a kut lehlam chuan ka kut chu a hum vang vang bawk a.

          Tum anga ka awm a nih chuan kumtharah chuan an hnenah ka awm tawh dawn lova, ka phei hunah pawh hostela ka luh nghal dawn avangin tun hi kan hun neihdun hnuhnung ber ni mai hian ka hria a, ka lung a lêng lawk a, ka bula a la awm lâi reng pawh hian ka ngâi nghal vawng vawng a ni ber e.

          Zawi tê tê-in kan phun dun sep sep a, a khât tawkin min fawp leh ṭhin bawk a. Zan a rei tak deuhah chuan a mutna thleng thlah tura tiin min kai phei nghal a.

          A mutna tur khum bulah chuan min dinpuiin lungrun tawkin min fawp leh vawng vawng a, kan inkham thei lo a ni ber e. Kan duhthawh dun tawlh tawlh a, kan thaw pawh a pângngai lo dun tawh hle a. Khumah chuan min tlukpuiin ka chungah a rawn bawk nghal zat bawk a.

          Tihtawp a hun tih chu ka thinlungin min hrilh a, ka taksa erawh chuan kal zel turin min nawr thung.

          Ka hnute a rawn ṭham chuan ka lo thaw halh a, ka taksa chûl thla zai zaiin ka mal a rawn tawh tákah chuan ka harh zawk a, ka awmdan danglam chu hrethiamin ani pawh chuan a thiltih lai chu tawpin ka chung aṭang chuan letthla nghalin ka sîrah chuan a mu nghal a. Inthunun tum takin thawk chu a la kawk kawk a, tlema a ziaawm deuh hnu chuan min rawn kuah thawk a, kei chu ka la pângngai hlei thei lova, ka taksa khur dar dar chu kuahbetin ka kut chu a hum nghal a.

          "I duh chuan min tilui thei reng si a!" zawi tê chuan ka ti sap a, ka aw chu a la mumal lo hle a.

          "Tihluih che ka duh hleinem. I phalna thlapa ka tih theih hun ka nghak mek a nih hi," a sawi tawp lamah chuan nuihza hmel a pu deuh a.

          A hmai chu ka kut zungṭang chuan ka nul zai zai a, a hmui ka tawh chiah chuan ka kut chu a rawn man chat a.

          "Khatianga min tawh reng chuan ka insûm thei lo mai ang, tunah pawh ka inthunun theih piah lam a thleng ṭep chu a nih kha," tiin a tho nghal a.

          Khum bula dawhkanah chuan a bag a awm a, a chhûng aṭang chuan bawm te hi a rawn phawrh chhuak a. Ka mu lai chu min pawt thovin bawmte chu min pe a.

          "Christmas present!" a ti sup a.


VANMALSAWMA

Chapter 20


          (In comment-na zawng zawng a mal malin ka chhâng hman lo che u a, pawi ka ti! Hetah hian a 'whole-sale' in lawmthu ka rawn sawi e. Min lo chhiarsaktu te zawng zawng chungah ka lawm em em bawk a ni.
          Sawisel ngai leh duhthu sam tawk lohna lai a awm chuan in thurawn dawng turin ka inpeih reng e.)




          Bâwm chu ka hawng a, a chhûngah chuan sana nalh zet mai hi a lo awm a. A bâwm aṭanga la chhuakin ka enchiang a, a nalh tak zet a, a man pawh a to thawkhat viau ang tih a hriat mai a. Chutia ka kenlâi chuan min rawn laksak a, min buntîr ta nghal a.

          "Ka lawm e aw!" Amah en reng chung chuan ka ti sap a.

          Christmas thilpek lam rêng rêng ka lo ngaihtuah ve miah lova, ka inthiam lo ang reng zawk hle a. Ani'n thil hlu leh manto tak min pe a, engmah pek tur ka nei ve si lo chu a nuam duh lo hle a ni.

          "Engmah pek tur che pawh ka nei ve si lova!" inthlahrung ru tak chuan ka ti leh a.

          "I thinlung kha min pe rawh, a dang duh ka nei lo." Ka kawngah chuan a rawn kuah nghal a.
         
          Ka thinlung ka pekna hi a rei lutuk tawh, amah hian a hre lo mai pawh a! Ka ta ni lovin ama ta a ni tawh a, amah nen kan inhriat aṭanga rei lutuk pawh ni lovah khan ka thinlung hi a lo nei fel der tawh a ni.

          "Naktukah thawh hma i ngai dawn si a, mu tawh la," ka ti sap a.

          "Ka haw chak lo," a ti sup a.

          "A ṭul tlat sia!"

           "Min lo ngai ang em?"

           "Lutuk tlat!"

          Ka hmuiah a rawn fawp zauh a, kan inmangṭha hnu chuan ka chhuahsan ta nghal a.

          A tuk zîngah chuan thawh ka lo hai deuh a, ka nu-in min rawn kaihthawh chuan rang lutukin ka tho nghal vat a, room aṭanga ka chhuah chuan inpeih sa at-in, thingpui no dawm chungin chaw ei dawhkan bulah chuan u Malsawma chu a lo ding run a, min lo hmuh veleh chuan a lo nui suk a.

          Ka inphih faia ha te ka nawh zawh hnu chuan ani pawh chu kal mai tur chuan a lo inpeih tawh a, ka nu chuan Bawihtei thil lawm vel tur a pack chu u Malsawma bag-ah chuan a khung mawlh mawlh a.

           "Mapui, khumah khan ka wallet ka theihnghilh tlat mai, khawngaihin min va laksak lawk ta che," u Malsawma chuan a rawn ti a, ka kal nghal vat a.

          A khumah ni lovin a khum bula dawhkan tê-ah chuan a wallet chu a lo awm a, ka la a, ka inher chiah chu u Malsawma nen chuan kan inhmachhawn ta ran a.

          Inrinna hman pawh awm hauh lo chuan min rawn fawp a, hun a tepter tawh avangin ṭhahnem kan ngai dun hle a, kan inthlah hnu chuan ka kutah chuan la-in min kalpui nghal a, toom aṭanga kan chhuah dawn chiah chuan min dinpuiin min rawn fawp leh zauh a.

          "Min lo ngai reng ang che. Ka lo be dawn che nia," a ti sup a, ka kut a vawnna chu thlahin a kal ta nghal a.

          A motora a ṭhut luh hnu chuan min rawn en zawk a, motor chu tinungin a tlan ta nghal a, a lan theih chhûng zawng chu ka thlir a, a liam rual chuan ka thinlung a liampui ve nghal a ni.

          Bungrua a rawn thlen dawn avangin ka nu chuan dawra kal ve tur chuan min beisei a, buai deuh leh rilru kawm hman lutuk lovin awm ila lunglen pawh a ziaawm ringin ka lo remti vat a.

          Kan buai nilêng ta vîau a, ka ngaihtuahna erawh chu Aizawl lamah a phei reng thung a. Hetiang taka mipa vanga lunglen ka la neih ngai loh avang hian awmdan thiam har ka ti ang reng vîau a, chhûngrilah hian eng emaw hian min ṭham er er ni mai hian ka hria a ni.

          Aizâwl a thlen fel hnu chuan min rawn bia a, min ngaih thu a rawn sawi sup chuan ka lo thaw hak a, kei pawh hian ka ngai tak zet a ni.
         
          Zanah chuan mitthi kan neih avangin ka ṭhiante nen kan kal ve a, ka kal dawn chuan u Malsawma chu message-in ka va hrilh a.

          Ka ṭhiante chuan tlaivâr lova haw mai an rawt avang chuan zînglam dár hnihah chuan kan haw ta a. In ka thlena ka mut hnu chuan ka phone chu ka en ta nghal a, u Malsawma message ka hmuh chuan rang lutukin ka hawng nghal a.

          "Ka ngai che!" tih chauh chu a lo ni a, a tawi ṭha viau na'ngin keimahah chuan thu sei tak a sawi thung.
         
          "Kei pawhin ka ngai che," tiin ka va thawnlet nghal a, a muthilh tawh ka rin avangin chhanna pawh nghak lo chuan muthilh tumin phone chu ka dah a.

          Muthilh tuma ka mit ka chhin rûal chiah chuan ka phone chu a rawn ri a, ka la nghal vat a, ka lo beisei ruk ang chiahin amah a lo ni a.

          "In haw tawh em ni?" a rawn ti nghal tâwng a.

          "Ummm.... haw a, ka mu chiah."

          "Min ngai em?"

          "Lutuk!"

          "Min hrilh rawh."

          "Ka ngai che!"

          "Sawi nawn leh rawh."

          "Ka ngai lutuk che!"

          A thaw hawk ri chu ka hria a, thawk chu ka lo la ve halh ringawt a.

          "Mapui, ka ..... " sawi zo lo chuan a ngawi leh daih a!

          "Sawi la," ka lo ti a.

          "I nu thil thawn kha Bawihtei a lawm lutuk tih min lo hrilhsak dawn nia," thil dang daih a rawn sawi a.

        "Aw le."

        A thil sawi sawi zawh tak loh kha eng nge tih ka hre chak a, zawh erawh ka zawt nawn duh ta bik lova.

          Nitin kan inbia a, zanah kan inbe ziah bawk a, kan inbe reng chuang pawhin ka ngai em em reng tho a ni.

         ṬKP-in Advance Christmas kan hman zan chuan kal hma-in hrilh tumin ka va phone a, phone a lak theih loh avang chuan a buai a nih ringin remchânga phone-a hrilh leh mai rilruk chung chuan message pawh ka thawn duh ta lova.

          Kan vêngah hian high school kan kallai aṭang tawha min ngaizawngtu, Lalhminga hi a awm a, amah chu hmelchhe lo tak mai a ni a, an hausak bawk avangin ngaizâwngtu pawh a hmu thei hle nghe nghe a.

          A mizia hi chapo lam anih avangin ka mil lo riau a, a hmelṭhatna leh an hausakna chu a chapopui hle a, chu tak chu keiin ka ngaithei bau mai si lova, kan inmil lo a ni ber e. Pate eiruk zâra lo inlak len leh chapo lutuk kha chu ka ngaihsan loh mai bakah ṭhian atan pawh ka kawm chak lem lova, ngaihzâwng atân leh lek phei chuan ka duh lo hul hûal a ni.

          Advance Christmas kan hmannaah chuan Lalhminga te ṭhianho pawh an tel ve a, kan ṭhutna bulah chuan rawn ṭhu-in min rawn bia a, kei pawhin chutia panngngai taka min rawn bia chu ka lo chhang ve zel a, kan bulah chuan an ṭhu ve ta reng a.

          Kan ṭhiannu pakhat chuan zun a rawt a, kan chhuah dawn chuan kan bag leh phone velte chu kan ṭhutnaah chuan dahin kan ṭhiannu pakhat chhuak ve peih lo chu lo vêng turin kan chah a, kan chhuahsan ta a.

          Kan zung zo kan lut leh chu kan ṭhiani kha a chanvo neih vena an tih tawh dawn avangin a lo ṭhu tawh lova, ka ṭhutnaa ka ṭhu leh chuan ka phone eng lo thim chiah chu ka hmu a, ka check vat a. Call leh message engmah a awm lova, ngaihṭhat lohna pawh nei lem lo chuan u Malsawma message tur chu type-in ka thawn nghal a.

          Ka message a hmuh hnu chuan min chhâng ta mai si lova, kan ban a la ring lo a niang tiin ka phone chu ka dah leh mai a. Mahse, kan ban hnua ka va hrilh leh pawh chuan hmu reng siin min la rawn chhâng ta chuang lova.

          Khuma ka mut hnu chuan a online tih ka hmuh avangin ka va thawn leh a.

          "I buai em ni?" ka va ti a.

          "Buai lo."

          Min rawn chhâng ve ta hram a, mahse, min chhâng bung ṭha hle a ni.

          "Min chhâng mai si lova, i buai a nih ka ring a!"

          "Nih chu!"

          "Min be chak lo niin ka hria, muttui le," ka va ti leh a.

          "Muttui."

          Zan danga rei tak inbe ṭhin chutia awlsam te-a kan titawp ta mai chu mak ka ti a, ka rilru chu a na hle a, ka ṭah a chhuak bawk.

          Engvanga khatianga awm kha nge ni ang le! Kei aia duh zawk a va tawng ta em  ni ang? Min be chak lo nia ka hriat thu ka sawi pawh khan a pha eih lova, min lo ning hle niawm taka min mangṭha let nghal hmiah te kha ka zak a, ka na em em bawk.

          Ka phone chu a rawn rik mai beiseina ka la nei cheu a, online reng siin min rawn biak tak miah lohah chuan beisei tur awm tawh lo ka lo beisei avanga mahni inhau ru chung chuan ka phone chu ka off ta hmiah a.

          Engvanga min hlat taka awm ta thut nge a nih a eng vanga min rawn be miah lo nge a nih tih chu ka ngaihtuah a. A chhan dang awm ka hriat miau loh avangin min duh tawh lovin hmeichhe dang a nunah an lut a nih ka ring ta ber a.

         Ka rilru na lutuk chu ka kawchhûng hi a ni deuh nghulh a, phatsan nia ka inhriatna chuan min tizak a, min tina ngawih ngawih a ni. Ka mittui chu ka inrin hma-in a rawn baw zawih a, lukhama ka hmai phûmin ka inhnît zui nghal hlawp hlawp a.

          Chhin khat pawh chhîng lovin ka tlaivâr chiang hle a, ka ṭahna avangin ka mit a bui lûk a, ka lu chu a na ngut ngut bawk a.

          Ka lu na chu chhuanlama hmangin ka mu leh nghal daih a. Ka nu chuan min ngaihtuah hle a, nachhawkna nen ka roomah chuan rawn kalin ka awmdante chu min rawn zawt chik hle a. Tlâng hrilêng leh natna hrim hrim lakah hian ka him thei hle a, han damloh vak hi ka neih ngai loh avangin ka nu-in min ngaihtuah viau pawh chu a awm vîau a ni.

          Ka phone chu ka la on duh chuang lova, chawhma lam chu ka mu char char a, chawhnu lamah erawh chuan inbualte ka duh avangin ka tho ta hram a. Chutia ka thawh harh takah chuan ka nu chu dawr lamah a chho ve ta a.

          Ka inbual zawh chuan chak vak lo chungin thil ka ei lui a, min ngai lotu leh min duh lotu vanga indawmkun reng chu ka tum hauh lova, eng anga na pawh ni ila ka intihpachan hram a ngai tiin ka rilru ka siam a. Ka rilru natna chu nasa hle mah se ka beihlet chuan ka tuarchhuak thei ang tiin ka rilru chuan ka infuih sauh sauh a.

          Mahse, ka thinlung zawng zawng ka hlan tawh a, ka ngaihtuahna luahkhattu a ni a, chuti maia awlsam chuan ka theihnghilh dawn lo tih ka hria. Amah vanga ka natna erawh bawksawp phah nana hman ka tum lo bur thung.

          Tlaia ka nu rawn haw chuan min rawn au lawng lawng a.

          "I phone a ṭha lo nge i on lo zawk? Khawnge i phone i dah a?" min zawt nghal a.

          "Ka hre bik lo, khumah a niang. Min lo phone i tum em ni?" ka lo ti a.

          "I u Malsawma'n a phone tlang thei lo che a, keimah min rawn bia a, dawrah ka lo awm daih bawk si a. Sawi tur pawimawh deuh nei a ang ka tia!"

          Chutia ka nu-in a hming a sawi ringawt pawh chuan ka lungphû a tirang nghal a, keimaha nghawng a neihdan hi a nasa mah mah chu a ni e.

          Ka roomah chuan lutin ka phone chu ka va on a, message a lo lut zut zut a, missed call pawh a awm nual.

          U Malsawma message chu ka en nghal a, ka lungawina khawp erawh ka hmu chuang lo.

          "Engvangin nge min rawn biak loh?"

          Amah zawk a ni reng sia min be duh lotu kha!

          "Biak tlang theih lohin awm suh!"

          A duh hun huna thu min pe kual vel tur a ni lo, ka duhdana awm turin zalenna ka nei ve.

          Khumah ka phone chu ka thehthla a, room aṭanga chhuah tum chuan ka kal a, ka room kawngka ka thleng chiah tihah chuan ka phone chu a rawn ri a, ka va let leha ka han en chuan u Malsawma a lo ni a.

          Tun dinhmunah hi chuan ka be chak hlawl lova, ka la ang nge la lovang tiah chuan ka inkhâp buai a.

          Chutia ka inkhâp buai lâi chuan a in-ring ral ta a, a rawn tihnawn leh ka rin loh avang chuan kal leh mai chu ka tum a.

          A rawn rik leh takah chuan hreh angreng tak chung chuan ka la ta a.

          "Eng vangin nge biak theih miah loha i awm?" A aw chu a chang ṭha beng bawng hle a.

          "Min be ṭha peih si lova, min biak duh ka ring lo alawm!" ka lo ti ve ngat a.

          "Nizan ami nen kha chuan in inbe tho ang chu tiraw?" a rawn ti leh nghut a.
 
          "I sawi awmzia ka hrethiam hauh lo!" ka lo ti halh a, ka hrethiam lo tak zet bawk.

          "I hre duh lo a nih ngawt loh chuan hriat lohna hman chu a la awm lovin ka hria," a rawn tih leh chuan ka bo tulh tulh a.

          "Khawngaihin khatianga sawi kual lo khan min hrilh mai rawh. Engmah ka hrethiam lo," ka lo ti hrawk a, a duhdan dana min tikual hi ka lawm lo tak zet a ni.

          "Nizana i mipa kalpuite kha i hre tawh lo maw? I phone i kawltîr hial a nih kha!" A thin a ur ve tak tak a nih hmel a ṭawng pawh a no lo khawp mai.

          "Nizanah mipa pakhat chu kan kalpui ngei a, chu pawh kan ṭhiannu bialpa a ni e. A bak tu mipa mah kan kalpui lo,"

          "A nih leh i phone lo chhângtu kha in kalpui a ni lo tihna em ni? Kal ho si lovin i phone a kawl tihna maw?"

           "Tumah ka phone ka kawltîr lo ... "

          "I kawltîr a nih si loh chuan engtin nge a kutah a awm theih si?"

           "Ka hre bik lo, ka ti tak tak!"

           "Thil mak tak a nih chu! I phone midangin an lo chhâng a, ka rawn phone leh phone loh che pawh i hre miah lo a nia!" a rawn ti leh nghut a.
   
          "I rawn phone-na ka hmu lo hrim hrim. Call log pawh ka check vek a, i rawn callna hmuh tur a awm lo," ka lo ti leh a.

          "Nizana ka rawn call laia lo latu, i bialpa inti khan a hrilh lo che em ni?"

          "Chutiang engmah ka hre lo. Ka phone midangin an khawih ka hre bawk lova."

          "I bialpa kha lo zawt chiang leh mai rawh," a rawn tih leh chuan ka sa ve ta phat a.

          "En teh, i duh duhin min puhkual a, ka insawifiahna i pawm dawn loh chuan inbiak ka duh tawh lo. Min ring lo em emtu hnena insawifiah reng hi ka ba lova, i duhdan danin ngâi la pawi ka ti hek lo," ka thinrim lutuk chu ka sa pup pup theiin ka hria.

          "Insawifiah ngaihna pawh i hriat loh kha... engmah ka hre lo i ti a ni lawm ni? Kha kha insawifiahna a tling réng em?" A ṭawng chu a chang ṭha fak fak hle a ni.

          "I thil rawn sawi khi engmah ka hre lo tlat alawm! Ka hriat loh thilah engtin nge insawifiah se min tih?"

           "Lo zawt ang che, eng tiang chiahin nge kan inbiak tih pawh lo zawt vek ang che," a rawn ti leh a.

          "Tu chu nge ka zawh ang? I rawn sawi chu tunge a nih ka hre tlat hleinem!" ka lo ti hlar a.

          "I bialpa kha a ni mai alawm," ti-el deuhin a rawn ti leh a.

          "I lo hriat ve mai mai atân tunah hian ngaihzâwng pakhatmah ka nei lo," ka thinur lutuk chu ka awkâ chu a nêm tawh bik lo khawp mai.

          "A nih leh kei hi i tân khan tunge ka nih? I eng nge ka lo nih ve rêg rêng?" a aw-ah chuan na tûar aw a lang a.

     

  VANMALSAWMA

Chapter 21





          Ka tân tunge a nih tih min zawt a nih chu! Ani chu ka thinlung neitu, ka ngaihtuahna luahkhattu leh ka hmangaih em em a ni asin! Mahse, engtin nge chu thil chu min rinna pakhatmah nei lotu hnenah hian ka hrilh theih ang ni!

          Rilru-a vei leh hliam nei chungin Christmas chu ka hmang a, ka châk vang ni hauh lovin inngaihtuah ngut nguta ka natna hriatreng ai chuan tiin ka ṭhiante zuiin ka lêngchhuak a, ruaite pawh ka ṭheh ve ngei a. Amaherawh chu rilru-a hlimna tel lo chuan khawi hmun mah a lo nuam chuang lova, ka rilru pik lutuk erawh tlem chuan a zia ve e tih chauh a ni.

          Kha mi zan aṭang khan a reh hmiah a, kei pawhin ngai em em mah ila va biak ka tum bik hauh lo. Ka ngaihtuahna aṭanga dahbo tumin ka bei a, ka la hlawhchham rih chu a nia. He thil hian engtia rei nge min tihhrehawm ang tih pawh ka hre phak lo a ni.

          Ka ṭhiannu ve ber Zovi bulah chuan ka thawpik zual chângin ka inbunruak a, tlêm chuan ka zia phahin ka hre ṭhin. Ani lahin min han hnem vak ngaihna a hre bik si lova, ngaihzâwng dang nei mai turin min han ti leh ngawt ṭhin a.

          Bawihtei nen kan inbe zauh zauh a, min ngaihzia leh haw vat tura min duhthu a rawn sawi châng hian sawi tur a vâng ṭhinin ka lung hi a chhe ngawih ngawih zel a. Ka phei leh hunah an hnenah ka awm tawh dâwn lo tih ka sawi ngam lova, a pa-in a lo hrilhfiah ve tawh mai a niang chu.

          An hnenah ka awm tawh dawn lo chang ni lovin an thinlung aṭang pawhin ka reh tial tial ang a, nakinah phei chuan min hre tawh miah dawn lo a ni tih ka ngaihtuah châng phei chuan ka mittui a tla hial ṭhin a, tunah ngei pawh hian a pa chuan min hre tawh hauh lo zawk pawh a ni mai thei a ni!

          Kumthar hma nihnih a la awm tihah chuan Zovi chu a rawn lêng a, eng eng emaw kan sawi hnu chuan u Malsawma chanchinah bawk kan lut leh a.

          "Mapui, duhtu hmu lo pawh i ni lova, duh thlang thei khawpin i hmelṭha bawk a, ani pathlawi mai mai zûna uai atân chuan i uiawm ka ti hrim hrim. Theihnghilh tum la, bialpa dang nei hmiah rawh," a ti barh barh a.

          "Pathlawi a nih vangin iaina ka nei lo, tlangval tam tak aia ka thlan a ni.
Mahse, min ring lo lutuk hi na ka ti em a ni. Theihnghilh tum chuan ka bei ve nasa tih chu i hriat kha!"

          Heti khawpa ka rilru a tina chung pawh hian 'pathlawi mai mai' tih chu ka lo duh lo hle a, a thlavang ka lo la hauh hram a nih chu!

          "Lalhminga khan a chanchin mkn zawt tak asin!" a rawn tih chuan ka lo phawk hle a.

          "Lalhminga'n maw? Engtin nge a hriat a?" mak ka ti lutuk ringawt!

          "Ka hre bik lo. A sawidan kha chuan phone-ah an inbia ni awm tak a ni!"

          Ka ngawih deuh vang vang lai chuan a rawn ṭawng leh hliai a.

          "E he! I u Malsawma'n i bialpa a tih chu Lalhminga kha a ni chiang mai! I phone-ah an inbia ang a, Lalhminga'n i bialpa angin a lo insawi khum a ni chiang lutuk!"

          Ka ngaihtuah chiang a, a ni thei dawn riau-in ka hre ta a. Khami zana kan zun zawha kan va let leh khân ka phone eng ka va hmuh kha ka hrechhuak a, u Malsawma'n min lo call ang a,  Lalhminga khan a lo chhâng a ni tih a chiang ta kuar mai a ni.

          Zovi chuan u Malsawma chu phone-a thil awmdan sawifiah nghal tur chuan min tur nghal tet tet a, kei erawh chuan chu chu tih ka tum lo bur thung!

          "Phone nghal la, ka lo sawi ve dawn alawm. Ka lo hrilhfiah ve ang a, in inkâr a fel leh mai dawn alawm," a tih leh chuan ka lu ka lo thinsan mai a.

          "I ngai em em a, in inbiak loh aṭang khan rilru na reng rengin i awm bawk a. Va insawifiah la, in ṭha leh mai dawn alawm,"tiin min nawr leh a.

          "Min rinna a nei miah lova, ka tân pawh a tlawmthlak lutuk! Va insawifiah a ṭulna ka hre lo, ka thiam loh pawh a ni hleinem," ka lo ti hmak thung a.

          A dik tak chuan chutia ka sawi lâi ngei pawh chuan ka ngâi ngawih ngawih a, biak ka chak a, a aw hriat leh ka chak a, a aw pa tak maia min ngaihzia a sawi sup ri te kha ngaihthlak leh ka chak lutuk tlat! Mahse, va insawifiah bûangbar vel kha ka tum lo bur thung.

          Zanah chuan ṬKP-in kumthar ni-a kan hla rem tur kan zir a, banah chuan Zovi leh a bialpa chu kan ina rawn lenkawi an tum a, kan in lam pana kan kal lâi chuan Lalhminga te ṭhianho chu kan bulah rawn kal ve-in kan ina lo len an tumthu chu an sawi a.

          Mi lo len tum lo hnar ngawt thu a awm si lova, tui vak lo chung chuan kan inzui haw ta hlawm a.

          Lalhminga chuan min be reng a, kei chuan a rul tawk chauhin ka lo chhang a. Zovi leh a bialpa haw tum chu ka phal lo tlat a, Lalhminga te haw hma chu awm turin ka duh si a, anni pawh chuan hrethiamin haw chu an tumlui ta bik lova.

          Ka phone a rawn rik chuan ka la nghal a, Bawihtei lo niin ka haw har atih tawhthu chu a rawn sawi lâng láng a. A pite inah riak turin an kal tihte a rawn sawi a, inlêng an awm avang chuan rei be lovin ka mangṭha ta thuai a.

          "I bialpa inla pa deuh kha em ni lo bia che?" nui sâwng chunga a rawn tih chuan ka en vat a.

          "Bialpa ka nei hleinem," ka lo ti hmak a.

          "I bialpa niin a insawi ve ngei kha," a lo ti leh a.

          "Tu chu maw ka bialpa nia insawi? Khawiah nge chutiang chuan in lo inbiak a?" ka lo tih chuan a mitmeng buai ta nak chu ka hmuhhmaih lo chiang kher mai.

          "Aaa... chutiang engmah a awm lo, ka fiamthu a nih kha!" a ti bah nawk a.

          Zovi chuan, "I rawn sawidanah khân hriat nei i ang ka ti! Han sawi chiang deuh la, engtikah nge in lo inbiak rêng rêng a?" a lo ti ve bawk a.

          "Tumah ka be lo, ka fiamthu ka tih chu. Engmah hriat ka nei hleinem."

          A awmdanah chuan kan rinhlelhna kha a dik ngei tih a hriat mai a, Zovi ka va en chuan a hrethiam a ni tih lantîrna atân a lû chu a lo bu nghauh a.

         Rei pawh awm lo chuan Lalhminga leh a ṭhiante chu an haw ta thuai a, an kal hnu chuan Zovi chuan a sawi zui nghal bawrh bawrh a.

          "Tikha chuan kan rinhlelhna kha a dik tih a chiang ta khawp mai. A zak lo ve hrim hrim ka ti! Mi phone a lo chhâng a, chutah a bialpa angin a lo la insawizui vel a, a rawn callna a la delete zui!"

          "A ho lutuk! Thil kal tawh a nih kha, sawizui tawh lovang u. Thil thleng tawh chu a siamṭhat theih tawh chuang loh," ka lo tih chuan Zovi chuan a lo pawm lo nasa mai a.

          "A siam ṭhat theih reng a,nangmah khan i duh lo a nih kha! I luhlul leh rilru lian lutuk vang khan rilru na deuhin tunah pawh i la awm reng kha! Vawikhat tal va biak leh tur che a nia," min ti bawrh bawrh a.

          Rei vak lo an ṭhut leh hnu chuan anni pawh chu an haw ta a, ka intihfai lai chuan ka nu mu tawh chu rawn tho lehin sawi duh nei hmel pu deuhin ka bulah chuan a rawn kal a.

          "Malsawma nena in inkârah hian eng nge awm? In awmdan dik tak min han hrilh teh," a rawn tih chuan ka phu deuh zawk a.

          "Nu .... "

          "Hmanni deuh aṭang khan in inbe ngai tawh lova, i mizia a dang nghal vek a, i en ngai enin i ngaihtuahna i kawm a, biakin min chhan nachâng i hre hek lo. Malsawma lahin nitin i chanchin ngaihvenin min rawn bia a, nangmah a biak theih reng lai che a kei min rawn be zawk ziah hian chhan a neiin ka ring tlat! I nu ka ni a, ka lakah engmah zep a ngai hleinem," a rawn tih leh chuan ka hnuk a ulh a, ka ṭah chhuah lohnan ka insum fê a ngai hîal a!

          Thil awmdan chu a hriatthiam theihdan tur berin ka sawi a, tuna kan inbiak loh nachhan ka sawi chuan a nui a. Kei chuan a nuihzatthlakna lai ka hriat ve loh avangin a chutia a lo nui chu mak ka ti a, ka lawm lo deuh bawk a.

          "Engati nge i nuih? Nuihna tur a awm em ni?" lungawi lo deuh chuan ka lo ti a, a nui nasa zual sauh a.

          "Patling pui tawh si a va che naupang chhia ve aw! Chuti em em a thikthu han tihchhiat mai chuh!" a nuih chu a za ngang mai a, kei lah chuan nuihzat tur hlawl ka hre lo thung.

          "A rawn bia che a nih chuan ṭha takin lo dawngsawng la a ṭha ang. I luhlulna kha dah bovin nangmah khan va be hmasa nghe nghe la, i chanchin nitina report reng hi ka ning viau a nia,"   la nui reng chung chuan a ti leh a, engmah pawh ka sawi ve hman hma chuan mu turin a kal ta nghal daih a.

         Mutnaah chuan ka inngaihtuah nasa hle a, ka nu leh Zovi khan an sawi dik hle a ni. Ka luhlulin ka rilru hi a lian em em a, chuti ni lo sela chuan ka induhtawkna dahṭha-in thil awmdan va sawi ila, kan boruakte pawh a ṭha leh tawh zawk mai thei a ni.

          Mahse, min rin lohzia kha ka ngaihtuah a, ngaihzáwng dang nei tur khawpa min ringchhia kha ka ngaihdan a ni lo viau a, ka thin chu rawn rim thar lehin va biak hmasak emaw va insawifiah emaw chu ka tum lo bur mai a ni.

          Ka phone a rawn rik chuan ka en vat a, u Malsawma number a nih avangin Bawihte'n min rawn be leh dawn a nih ringin ka lo chhâng nghal a.

          "Aw, Bawihte ... "

          "Keimah zawk,"

          A aw ka hre chiah chu ka thinphû a rang nghal a, engtia lo dawnsawn tur nge tih ka hrethiam lova, lo biakdan tur pawh ka hre viau lo a ni.

          "Aw, a nih chu." Chu bak sawi tur ka hre lo.

          "I ṭha em?" a rawn ti leh sup a.

          "Ka ṭha e."

          "Ka rawn tibuai che em?"

          "Tibuai love." Min biakdan chuan kan inkâr hlatzia min hriattir a, ka na vawng vawng mai a ni.

          "I bialpa nen khân inbiakte in duh takin ka ti mawle!" a rawn tih chuan ka sa zak a.

          "Bialpa ka nei lo tih thu kha ka hrilh tawh che-in ka hria a," ka lo ti hmak a.

          "Ka lo theihnghilh tawh pawh a ni mahna!" A ṭawngdanah chuan min deusawh ni tlata hriatna ka nei a.

          "Lo theihnghilh tawh lo la a ṭha ang," ka lo ti ve hmak a. Kan boruak chu a hma aia zia-na a la awm miah lo tih a lang reng a ni.

          "Ni e, ka lo hrereng dawn nia. I hlim hle ang chu ka lo ti ve ringawt a!" a rawn ti leh a.

          "Hlim lohna chhan tur a awm hleinem," ka lo tih chuan a thaw hawk ri chu ka hre thei a.

         "Mapui, kha pa kha i bialpa a ni lo tak tak a nih chuan min ngai a ni tih han sawi teh," a aw chu a hniam thawp sat a.

          "A pawi khawp mai, ka ngai si lo che a, ka sawi lo mai ang e,"

          "Khawngaihin Mapui, khatiang khan awm tawh lo teh!"

          "Engtin nge ka awm a?"

          "Hrethiam lo der suh, ka sawi awmzia i hria tih ka hria a nia."

          "Ka hriat zawng chu nang hian min rinna pakhatmah i nei lova, min tihnat i hreh miah lo tih hi a ni mai," ka lo ti hmiah a.

          "A dik lo, i sawi ang kha a ni lo."

          "A dik alawm. Ka sawi engah mah i ngai lova, min ring ni la chuan kan buai miah lo tur a nia, min rinloh vangin heng thil hi a thleng a ni zawk."

          "Aw le, a ṭha e. I ngaihdan ang chu lo kal tlangpui phawt mai teh. Tuna kan inbiak hian awmzia a nei lo hle a nih hi!" a aw-ah chuan beidawng ri a telin ka hria a.

          Ka muhil tlem hle a, zînglamah tlêm ka chhîng sek tih loh chu ka tlaivâr a ni deuh mai a. Ka mut tlem êm avang chuan ka ni nghulh a, ka nguai bûr mai a ni.

          Kumhlui thlah nî a nih avangin ka nu chuan bazârah mamawh eng eng emaw lam turin min ti a, zanah leh a tuk kumthar nî-a eitur cake leh thildang neuh neuh lei tur list a ziah chu min pe a, dawra kal turin min chhuahsan nghal a.

          Ka hmanhmawh lem loh avangin chawhnu lam chuan ka inbual phawt a, ka inbual zawh chuan muangchânga insiamin bazâr tur chuan ka chhuak ta a. Ka nau-in tlailam eirawngbawl a hauh tlat avangin ka hmanhmawh lem lo a. Nidanga rawngbawl peih lova hel hel ṭhin si kha eng nge maw a hriat tehreng ni vawiin chu tirh ngai miah lovin a hauh ve teh tlat a! Zanlama a ṭhiante nen âr kan an tum ve avang chuan a phur thut thiltih a nih ka ring ve ngawt a!

           Zovi pawhin bazâr kal a lo duh ve tho a, kan kaldun a. kan haw lam chu kan inkeng bâwr hle a, ka nu list-ah chuan nidanga kan ei ngai loh thil dang ṭhahnem ang reng tak a tel avangin mak ka ti deuh a. Kumthar nî hian a ṭhiante hi an lo lêng ṭhin a, chumi atân chuan a ti a ni ang e ka ti rilru ta deuh a.

           Kan inken bawr êm avang chuan ka nu dawra chawlh haw kan rawt a, dawr kan va thlen chuan ka nu chu a lo awm lova, dawr nghaktu kan han zawh chuan a haw tawh thu chu a lo sawi a, nidanga haw hma ngai si lo vawiin ataka a haw hma viau mai chu mak ka ti rilru a, a nuamsam lo a nihte ka hlauthawng ru deuh a.

          Dawrah chuan awm rei lovin muang chângin kan haw thla a, zan lamah kan ina âr kan kan tum ve avang chuan juice leh ei rep rep turte chu kan han lei kawi leh bawk a, bâwr tak hi kan ni tawh a, kan bâwr lutuk chu kan han innuih leh rih thul. Ka rilru pik lutuk pawh a ziaawm hawkin ka hria a, a hunin a zir bawk a, ka lung erawh a lêng hle a ni.

          Kan in kawt ka thlen chuan inchhûng lama naupang nui ar ar ri chu ka hria a, Bawihtei nui ri ang ka ti viau na'ngin a nih ka rin loh em avangin tu nau nge ni ang tiin ka ngaihtuah a.

          Inchhûnga ka lut chiah chu mak tiin ka meng phawk nasa hle a, Bawihtei'n min hmuh veleh chuan min rawn pan nghal vat a, ka thil hawn ho chu dahthla-in ka lo kuah nghal a.

          U Malsawma chu inbual zo hlim tih hriat takin a sam a la hnâwng deuh a, ngawi rengin ka mitah chuan a lo en char char a. Ka tum loh tawpa ka hmuh avang chuan ka hamhaih a, sawi mai tur ka hriat loh bakah kan boruak a la fuh loh em avang khan biak dan tur pawh ka hre lo a.

          Ka zahzêlah chuan Bawihtei chu ka be nghal mawlh mawlh a, engin nge an lo phei tihte chu ka zawt a. A chhan chu pâwnah khân a pa motor ka hmu tlat lo a ni.

          A pa motora lo phei an nih thu a sawi chuan mak ka ti deuh a. Chutia kan inbiak vel lâi chuan Ngaihawma hi pâwn aṭang chuan a rawn lut a, motor chahbi hi u Malsawma chu a rawn pe a. Ngaihawma'n a lo khalhchhuah vangin hmuh ngaihna a lo awm lo bawk a ni.

          Ka thil lei ho ka dahṭhat lai chuan Bawihtei chu ka bulah awmin a lo ti ti sîam sîam a, a nî-in lo kal ve a châkzia te chu a sawi a, a pa-in Lungleiah an kal dawn tih a hrilh a a lawmzia te chu a thiam ang angin min hrilh ve barh barh a.

          Ka nu-in u Malsawma mutna tur puanphah thlak tura min tih chuan bedsheet thar lachhuakin ka thlak nghal mawlh mawlh a. Ka thlak zawh chuan a hmaa kan phah zawk chu suk tura dah turin ka keng a, chhuah tum chuan ka inher a, room kawngkaa u Malsawma lo ding run nen chuan kan inhmachhawn ta siah a.


VANMALSAWMA

Chapter 22




          Room chhûangah chuan rawn pen lutin muangchângin ka lam pan chuan a rawn pen a, chetsawn nachâng hre lovin ka lo ding mawl tawp a. Ka mitah tak enin ka lam pana a rawn kal chhûng zawng chuan a mit chu a lasawn eih lo.

          Ka bul a rawn thlen chuan ka lo insangmar ṭeuh a, ka bân tawn tawnah vuanin a taksa siin min pawthnai salh a,   ka puan ken chu min laksakin chhuatah a theh thla a, ka khabe-ah rawn vuanin min kuai dak a.

          Lo dang tur ka ni tih chu ka inhria a, dang turin chakna ka nei si lo a ni. A mi tawhdan ang ang chuan ka awm a, dam thlupa min rawn fawh chuan chhânglet lovin ka lo dawh mawl tawp mai a ni.

          Uar zawka min rawn fawh takah chuan engtik laiin nge ka fawhlet tih ka hre hman lo, ka lo fawplet tawn tawn a. Ka taksa chu a ṭek chhuai chhuai ni berin ka hria a, amah ka lo ngaihzia leh thlakhlelhzia ka hrechhuak chiang hle bawk.

          Chutia ka lo fawhlet takah chuan a hma aia duhthawh zawk chuan min rawn fawp a, kan inthlah meuh chuan kan thaw a rang dun hle a, kan lungphû chu a inrawn tluk tluk bawk a.
 
          Chiang taka ka hriatchhuah leh tak chu he mihringpa ka hmangaihna hi engtikah mah a reh dawn lova, a tel lovin ka awm thei dawn lo tawp tih hi a ni.

          Nghet takin min kuah a, a kawngah chuan ka lo kuah ve a, a âwmah beiin a lungphu ri dat dat chu ka ngâithla a.

           "Mapui, ka ngâi lutuk che! Engvangin nge khati chena rei kha min hrem?" A aw-ah chuan na tak tuar ang mai niin a lang a.

          "Kei pawhin ka ngâi che. Mahse, nangmah khan min be duh lo a nih kha," ka lung a chhia a, ka mittui chu a rawn lûangthla a.

          "Pawi ka ti! Mahse, i phone lo chhângtu khan i bialpa a nih thu leh in inkawp nghehzia a rawn sawi a, ka beisei miah loh thil a nih avangin min ṭhâwng a, ka thin a rim bawk. Ka be châk che a, ka chapona avangin be lo tur che-in ka inkhapdai hram ṭhin."

          "Min ring duh lova, ka insawifiahna i pawm duh lo bawk a," ṭap aw ṭiau-in ka lo ti a.

           "Zantin nangmah biak chákin ka awm a, ka chapona-in min dál ve tlat si a. Ka ngái che a, kuaha fawh che ka chák a, i taksa kuahbeha duat taka chûl leh che ka châk êm êm bawk,"

          "I message a awm leh awm loh hi ka check reng a, hmuh tur a awm ngai si lova, min theihnghilh tawh emaw, hmeichhe dang i tawng emaw a nih ka lo ring a." ka hnuk chu a la ulh ṭeuh a.

          Ṭawngkaa min chhâng mai lovin nghet lehzualin min kuah bet a, ka samah chuan a rawn chûl a. Ka khabe-ah chuan rawn dawmin amah en tur chuan min kuai dak a.

          "Nang hi ka theihnghilh theih che ring hlek suh." A sawi zawh rual chuan ka hmuiah a rawn fawp zauh a.

          Zan inkhawm a ngaih avangin zanriah chu kan ei hma deuh a, u Malsawma te pawh inkhawm tur chuan an insîam ve a.

          Biak inah chuan u Malsawma chu mipa ṭhutna lama ṭhu turin ka ti a, a duh lova.  Ngaihawma bula ṭhu tura ka tih ngial pawh chuan a duh tlat si lova, kan ṭhu ho ta ringawt a. Bawihtei chu kan inkârah ka ṭhuttîr a, rei pawh a la ṭhut hma chuan a pawm ta daih a, min si chêtin a rawn tawlh phei nghal hmak a.

          Ka rilru chu thuhriltu thusawi lamah chuan a lut thei hlawl lova, ka bula ṭhû chuan ka ngaihtuahna a luahkhat vek a, a hmingin ka inkhawm ve mai mai a ni ber e.

          Inkhawm bana biak in kawta kan dinlâi chuan Zovi chu ka bulah a rawn kal a, u Malsawma chu tunge a nih tih chu a mitmeiin min rawn zawt a, ka lo bu nghat a hmuh chuan hrethiam takin min rawn siai sak a.

          Inhmêlhriatttîrna te neiin an inchibai a, Zovi chuan Bawihtei chu a bîanga piaisak zauhin a be nghal chúl a, Bawihtei pawh chuan fel takin a lo chhâng ve zêl a.

          Zovi leh a bîalpa, Teruata chu ina haw phawta inthlak fel vek hnua lo kal an tum avangin kan hawsan ta a. Ka nu zaikhawmnaah a kal bawk a, in kan thlen chuan Ngaihawma chhuak leh tur kan va hmu hman hram a. Hmeichhe tleirawl tê tête nen âr kan an tum ve a, phur takin a tlan liam thuai a.

          Inchhûng kan luh rual chuan heater chu ka on nghal a, ka inthlak zawh chuan Bawihtei chu thlak ve lehin ka thuamlum nghal a. A vawh êm avang chuan coffee siam tur chuan ka kal a, chokâ-ah chuan u Malsawma chu a lo awm a, thil zawn nei niawm tak hian a lo enkual vel a.

          "Eng nge i zawn a?" ka va tih chuan min rawn melh zawk a, a mit chuan hmundang chu a melh kual leh nghal a.

          "A vawt si a, coffee i in duh ka ring a, siamsak che ka tum a," a tih chuan ka lo nui hak a.

          "Keiman ka lo sîam ang, Bawihtei lo va awmpui rawh," sitting room lam chu melh zauh pahin ka ti a.

          "Hmanraw awmna min hrilh la, keiman ka siam mai ang. Ka coffee siam i la in loh kha," a lo tih leh tákah chuan hmanrua vêl chu ka kawhhmuh a, Bawihtei bulah ka pheisan ta a.

          Coffee no châwia a rawn luh chuan ka nuih chu a za ru ang reng vîau a, an ina ka awm chhûng khân vawikhatmah coffee emaw, thingpui emaw pawh a siam ka hre lova, ka rilru tak chuan a siam thiam vakin ka lo ring lo ve tawp a.

          Mahse, ka lo ring sual hle a ni tih chu coffee ka han in chiah chuan ka hre nghal a, ka rin phak bakin a siam tui a, a tui tak zet a ni! Min lo en reng avang chuan ka va nuih sak a.

          "Ka siam tui loh i ring niin ka hria!" nui suk chung chuan a rawn ti a.

          "Aw.....nia, dik tak chuan i siam thiam ka ring miah lo. Mahse, a tui tak zet a ni!" ka lo ti hliai a.

          Nui var var chunga min rawn en chuan ka hmangaihzia ka lo ngaihtuah a. Khati khawpa rilru nâ leh thinrim khan min sîam a, amah ka hmuh rüala ka lo pawm leh nghal hmiah thei te kha ka hmangaih êm vang a ni tih ka hre chiang hle a ni.

          No ruak ka han sil zo ka chhuk leh chuan ka ṭhutnaah a lo ṭhu a, a bula ṭhu tur chuan min lo mitmei nghal zat a.

         Heater ai paha TV en chung chuan insi rialin kan ṭhu a, Bawihtei chuan a pîte chu phonea bia-in a inkhawm ve thute chu a hrilh a, an inbiak chhûng zawng chu ngawi rengin kan lo ngaithla a.

          An inbiak zawh chuan a pa phone-ah chuan games a khel zui nghal a. U Malsawma chuan ka kawngah rawn kuahin ka kawr chhûngah a kut chu a zen lut a, ka kawng vel chu a kut lawng chuan a rawn tawk a.

          Ka taksa lawng a rawn tawhna chuan keimahah danglamna a thlen nghal a, ka thisen zâm fanin ka thlîng thleng chuan a fanin ka hria a. A kut chu mansakin dahchhuahsak ka tum a, awmzia a awm lo hle. Ka kut chu a kut lehlam chuan rawn manbetin ka malchungah chuan a humbet nghal hmiah a, Bawihtei a awm reng avang chuan ka duh angin ka tal ngam bawk si lova. Ka hmui phun chuan duhtawk turin ka hrilh a, chu pawh awmzia a awm chuang lo.

          Ka bîanga a rawh fawh zauh chuan ka lo hawisawn vat a, a lo nui hak a. Bawihtei'n min hmuh ka hlau tak zet a, sawina hun leh hmunte a thliar thiam leh dawn si lova, a rilrua a lan hun hunah a sawi leh pawp mai dawn si a, chuvang chuan min hmuh chu ka hlau ngawih ngawih mai a ni.

          Chutia kan lo innawr ruk lâi tak chuan Zovi leh Teruata chu an lo thleng ta hlauh a, ka thaw huai a. Mahse, min kuahna chu a la lasawn duh chuang lova, ka kawr chhünga a kut zenluh erawh ka lakchhuahsak thei ta hrâm a.

          "E he! Nangni chhungkua teh ṭhap chu!" Zovi chuan nui ar ar chungin a rawn ti a, kan awmdanin a lo zir lo bawk nen ka zak ru hle a.

          "Bawihte, lo kal teh. I pate khan an mamawh vak lo che a nih kha, inkawm daih ang," a rawn tih zawm leh zat a, ka lo melh rum hle thung.

           Teruata chu ngawi rengin a lo nui ve vur vur a. Ani hi ṭawng tam lem lo tak, mize zawi deuh mai a ni a. A felin kohhranah pawh a ṭangkâi hle a, ṬKP-ah phei chuan kut ke bera an neih zîng ami a ni ve a. Zovi nen hian an inzui rei ve tawh viau a, inngaizâwng pawh ang lo khawpin an inkawm ngeih a, ṭhian inkawm ang mai hian an inkawm bawrh bawrh zel a, an bula awm pawh a nuam thei hle a ni.

          Zovi hi kei aiin a upa a, amah berin 'u' a duh miau loh avangin ka rualpui koh ve ta ngawt a, a felin kawm a nuam a, a zia a puitling a, kawng tam takah kei aia a upatna chu a lang ṭhin a ni.

          Kan âr kan tur chu kan buaipui ve laih laih a, u Malsawma leh Teruata chu an inkawm thei phian a, purun eng ila vel chu chan pahin an lo ti ti dun ve mawlh mawlh a.

          "A zûna i uai viau kha a lo mak lo tawp mai!" Zovi chuan a rawn ti sa sa a, a hriat hlau lutukin ka va en nghal vat a,  Teruata ṭawng chu ngaithla ngun hle ni awm taka a awm avang chuan a hre lo turah ngaiin ka thaw huai a.

          Bawihtei chu ka nu zâikhawm bâng rawn haw chuan a mutpui ta daih a, chhun lamah khân motorah a rawn muthilh nasat êm avangin a mengrei ve ta phian kha a ni a, a mut meuh chuan zanlâi a hnai thuak tawh mai a ni.

          Kan tam lem lo naa kan hlim ve hle a, kan ti ti a rûal a, an vawikhat inhmuhna mah ni se u Malsawma chu an nêl ve phîan a. Ani lah a mize pângngai pelin a nelawm ve vîau a, an inkawm thei hle a ni.

          Kan thil siam kan ei zawh hnu reilote-ah chuan Zovi te chu an haw nghal deuh mai a, kan pahnih chauha kan awm tâkah min rawn hnaih nghal rûak a.

          "He thil hi tih ka châkna a rei tawh lutuk!" tih sup pah chuan min rawn fawp nghal a.Min tawh hlek apîanga danglamna keimaha a thlen hi eng tikah tak reh ang maw!

          Min kai a, ka roomah min luhpui a,  a chhuak leh mai dawn nia ka ngaih laiin khumah chuan min pawt ṭhu a, min fawp zui leh nghal a.

         Min fawp uar tawlh tawlh a, khumah chuan min nam mû-in min rawn bawh nghal a,  ka taksa a chûl kual reng bawk nen ngaihtuahna fîm pawh ka pu hlei thei lova.

          Ka kawr chhûngah zen lutin ka taksa láwng chu a chûl kûal a, ka ngaihtuahna a vai rûai a, amah ka mamawhna nasa lutuk chuan ngaihtuahna fîm min puttîr thei lova. Thil dang rêng rêng ka rilru-ah a lut thei lova, tuna kan thil tih lâi mêkah chauh chuan ka rilru a awm a ni.

          Ka hnute a rawn ṭham takah chuan ka lo thaw halh a, ani pawh a awmdanah chuan a dang bik chuang lo tih ka hria a ni. Kan thaw a pângngai lo dun hle a, kan chetdanah chuan ramri kham chin pelh mai pawh kan pawisa lo dun hle tawh tih a lang reng a ni.

          A nghawnga kuahin ka thiam ang tawka uar chuan ka lo fawp let ve a, min hipna nasa lutuk avang chuan mu leh mal pawh ka nei tawh meuh lo a ni ber.

          Thawk leh khatah min fawhna chu titawpin ka chung aṭang chuan a letthla nghal bawk a, ka vawt nghal rawih rawihin ka hria a. Engvanga tawp ta daih nge a nih ka hre si lova, mak ti taka ka va en chuan chung lam enin inthunun tum tih hriat tak hian thawk a lo la ham ham a.

          Chutia ka lo en reng lai chuan ka lam chu rawn hawi pheiin min rawn kuah a, ka lû-ah chuan chûlin ka chhipah chuan a fawp vang vang a.

          "Nakina i inchhir lehna turin ka awmpui thei lo che a ni. Tunah kan duhdan ang kha kal tlangpui ta ila i rilru fîm hunah hrehawm tiin i inchhir ang a, awmzia a awm tawh dawn si lova, i natna thlentu nih fo hi ka duh lo a ni." A ṭawng zâwng chuan min nghawr dat dat a.

          A sawi dik chiah a ni! Ka tisa duhdân ringawt ngaihtuahin ka awm a, a hnua min dendan tur ka lo ngaihtuah pha leh si lova, u Malsawma'n rilru fîm pu ta lo se ka chan chhiatdan tur chu ka ngaihtuah ngam lo hial a ni.

          "Ka lawm e aw!" Amah en chung chuan ka phun sep a, ka mittui chu a rawn lûang chhuak ngîai ngîai a.

          Ka mittui chu min hruksakin eng emaw chen min kuah leh hnu chuan a tho a, kei pawh chu min kaitho ve nghal bawk a.

          Min mangṭha nan min fawh leh vang vang hnu chuan room aṭang chuan a chhuak ta a, ka ngai zui vawng vawng a, mal ta riaua inhriatna ka nei chawpchilh bawk.

          A tuk zînga ka harh chuan khua a lo eng uar tawh a, ka va thawh chhuah chuan ka nu chuan eirawng pawh a lo bâwl peih diam tawh a.

          Hla rem tur kan nih avangin chaw chu kan ei nghal deuh mai a, inkhawm ṭan hmaa vawikhat tal ennawn an tih avangin ka insiam sawk sawk a, ka kal nghal a. Midang chu muangchângin an lo kal dawn a ni.
         
          Inkhawm ban hnu chuan pâwnah Bawihtei te pafa chuan min lo nghak a, Zovi te ina kal kawi kan tum avangin kan lo nghak deuh a. Rei pawh kan nghah hma chuan Teruata nen chuan an rawn thleng ve mai a, kan kal ta nghal a.

          Zovi te inah chuan thingpui te inin kan awm deuh reng a, Zovi'n lenkual a rawt takah chuan midang pawhin kan lo thlâwp hle hlawm a. Zaikhawmnaa kan kal loh tak rau rauah chuan han len khawthawn vel chu a boruakin a zir bawk nen a chakawm ve riau a ni.

          U Malsawma motor chuan kan lêngkual ta a, Serkawn lamah tlan chhovin Kâwmzâwl lamah kan tlan phei zel a, kan va thlen chuan midang lêng pawh an lo awm nual a.

         Bawihtei nuam ti chu a khek râih râih reng a, phûl chungah te chuan a let kual tap tap a, chutia hlim taka a awm vel chu hmuhnawm ti takin ka lo thlir reng a.

          Hmun pakhatah chuan ṭhuthmun remin nulâ leh tlangvâl kal vel leh infîamte chu kan en a, Zovi chu a ti ti barh barh a, a khât tawkin u Malsawma leh Teruata chuan an lo zawm ve zauh bawk a.

          Bawihtei tlankual vel chu a tlu ta niai a, ka va tlan phei nghal vat a, a kiu chu a lo sawh pilh deuh a. Amah lah chuan engah mah ngai lovin infiam zui zêl chu a tum a, indim deuh tur leh fimkhur tura ka chah hnu chuan midang ṭhutna lam pan chuan ka phei leh nghal a.

          Piah deuh aṭang chuan Lalhminga te ṭhianho hi an rawn phei ṭhâm ṭhâm a,  ka biak chak lem loh avang chuan ka kal chak deuh a. Mahse, awmzia a awm viau lova, ka awmna bul an rawn thlen chuan min rawn be nghal a.

          Zu rim an nam avang chuan ka be chak lo zual a, a rul tawk lekin min biakna pawh chu ka lo chhâng a. Kal mai tuma ka pen leh chiah chu Lahminga chuan ka bâna rawn vuanin a lamah min pawt phei nghal nawk a, ka ṭe ṭhawt a.

          "Min induh khum rei tawh riau mai, vawiin chu lengkûal dun ve rëng rêng teh ang. Hmelṭha bula kal ve te pawh kan châk a," min manbeh pah chuan a ti lûng lüng a.

          "Min thlah rawh! Chuti lo chu...."

         "Chuti lo chu eng nge? I bîalpa kha i ko dâwn em ni? Nge phone aṭang khân kan be leh zawk dâwn?" Ngeiawm lutuka nuih sâwng pah chuan a lo ti leh a.

          "Phone ngai lovin hetah hian ka awm e!"

          U Malsawma aw ka hria chu ka thawven huai rualin hlauhthâwnna keimahah a rawn awm nghal a.


VANMALSAWMA

Chapter 23




           Lalhminga'n ka bânréka a vawnna chu thinthlak tum chuan ka bei a, min vawn ngheh êm avang chuan ka thingthla thei si lova, ka bánrék chu a thip hlur tawh a.

          Zovi leh Teruata pawh an rawn thleng phei ve nghal a, u Malsawma chu rawn tawlh hnai lehin ka bânah chuan a rawn vuan a.

          "A kut hi thlah rawh!' Rum lutuka Lalhminga melh pah chuan chang béng báwng tak mai chuan a rawn ti a.

          "Nangmah hi em ni a bîalpa inti kha? I fanu a ni zawk lo maw, ka pu?" ti-el tih hriat lutukin Lalhminga chuan a lo ti a, a ruih phût avang chuan a páwr êm êm a, a cho hi tunge a nih a hrechiang lo a ni!

         Ka bân a hmerna chu u Malsawma chuan a phihthlaksak sawk a, "Kut ka thlak hmâ che hian inthiarfihlim rang rawh," a ti chhum hmak a.

          "Tunge ka nih hi i hre lo a ni maw! Khatiang tea min han tih ngam chu le!" tih pah chuan Lalhminga chuan u Malsawma chu a bawh phei a, hnek tum chuan a kut chu a vai fua a.

          Ka lo ṭe tuarh a, mahse, ka hlauh angin thil a thleng ta lo! U Malsawma chuan hneh lutukin Lalhminga kut chu lo mansakin a khabe-ah tak chuan a hneksak ta sawk  a, a pai nghal chawn chawn a, a rui deuh bawk nen piah deuhah chuan a va tlu ta hnawk a.

         A kawr nghawngah chuan va ṭham lehin a phih tho nawk a, "Tunge i nih ka hre lova, eng ang mi nge i nih erawh ka hre chiang e! Kal la, hmeichhe duh lo chung tihbuai hi ching nawn tawh hlek suh," aw ki hniam, fiah tak si chuan a ti fak fak a.

          Lalhminga hmélah chuan a hmaa a  chapo hmêl kha hmuh tur a awm tawh lova, hlau leh tlâwm hmél a pu dâk tawh zawk a, a rui a reh tawh niawm tak a ni a mitmeng pawh harhfîm mitmeng ang mai a ni tawh a ni.

          Engmah sawi tawh lo chuan ngâwi rengin a kalsawn ta hnú hnú a, a hnungah chuan a ṭhiante chuan an zui dam dam a, milian fa te a ni bawk a, ṭhuihruai pawh a ngah viau a ni.

          Ka tha chu a la khur dar dar a, ka bula u Malsawma a rawn din a min rawn kuah pawh chuan ka la khurh nasat em avang chuan min kuah ang ang chuan ka lo ding mawl tawp a, Zovi chuan Lalhminga chu phone-a lo chhângtu kha a nih thu a lo hrilh ve mawlh mawlh thung a.

          "I ṭha em?" min ngaihtuah tih hriat taka min en pah chuan a rawn ti sup a, ka lu chu ka lo bu nghat a.

          Ka bânrék, Lalhminga hmerna kha ka tuai vat vat reng a, chu chu a rawn hmuhin ka kut chu la-in ka tuaina lâi chu dim takin min tuaisak a, dam huai huaiin ka hria a!

          Reilotê kan awm leh hnu chuan kan boruak tawnin a zir lo deuh bawk nen haw chu kan rawt ta thuai a, Bawihtei chu chulâi hmuna lêng ve naupang dangte nen an lo infîam a, a pa-in a koh chuan a rawn tlan phei nghal vat a. Zovi'n thla lak a rawt avang chuan kan han la nial nual a, kan lak zawh chuan kan haw ta nghal vang vang a.

          Zanah chuan inkhawm lovin inah kan awm a, khua a vawh zual deuh avangin inthuam lumin heater aiin kan ṭhu ṭhap a, ka nu pawh inkhawm peih bik lovin kan bulah chuan puanlum sin chungin a ṭhu ve reng a, u Malsawma nen chuan eng eng emaw sawiin an ti ti a, Bawihtei nen chuan movie kan lo en thung a.

          Zovi leh Teruata inkhawm bâng chu an  lo lêng kawi a, khua a vawh êm avang chuan an rawn khur lut deuh titih a, thlasik a nat êm avangin pâwn boruak phei chu a hit var mai a ni.

          Ka nu chu rei ṭhu peih lovin mu turin a kal ta vat a. Ka nu mut hnu chuan chhun lama kan lénnaa thil thleng kha Zovi chuan a rawn sawichhuak a. A rawn sawi chhuah nachhan pawh a inkhawm kal tur Lalhminga nen an inhmu a, a inthiam loh thu hrilhin  ngaihdam lo dilsak turin a  chah a lo ni a.

          "Mapuii nen hian pafa ni awmin kan lang rêng rêng em ni?" nuihzat hmel deuh hian u Malsawma chuan a rawn tichhuak a, Lalhminga thil sawi kha a ngaihtuah chhuak ni ngei tur a ni.

          Midang ho pawh chu kan lo nui hak hlawm a, Zovi chuan fiamthu-in a káp zui a, ani pawh chu a lo nui ve suk suk a.

          "Pathlawi zúna uai chu a nâ ngang a niang, tute emaw chuan nuihdan an theihnghilh hman ṭep alawm," nui chunga Zovi'n a tih chuan ka lo zak ang reng hle a.

          "A luhlul reuh êm alawm!" min nghen hnaih pah chuan a ti a, Zovi chuan a lo pawmpui hle a.

          "Dik chiah! Khati khawpa hrehawm ti si kha thil awmzia sawifiah tura ka tih pawhin zu duh ṭhak lova maw le! A luhlul mah mah a ni," a lo ti ve zat a.

          Teruata chu a lo ṭhen ṭhâ a, a nuih a zat hmel hle a, engmah sawi ve lem lo chuan a lo nui leh suk suk ṭhin a.

          Ngaihawma lêngchhuak rawn haw chu a rawn ṭhu ve a, Zovi te haw hnu chuan mu turin a kal ve zui mai a. Bawihtei chu a muthilh tawh avangin a pa chuan a pawm a, ka room lamah a kalpui ta nghal a, an awm chhûng chu ka bula mut a tum tlat a, a pa pawhin a ui ngam lo a ni.

          Khumah chuan a muttîr a, puan vel ka sin ṭhattîr zawh chuan a hmel pawisawi lo tak chu ka thlek zui vang vang a, chutia ka lo thlek lai chuan u Malsawma chuan min rawn kuah a, a âwm ngheng chuan min kuahbet a, ka lû-ah chuan a khabe chu a rawn nghat a.

          "Zantina mu tura inṭhenhran ngái ziah hi ka ning hle a ni," a rawn ti sup a, kei pawh hian ka thlahlel a, engtik lâi pawha a bula awm reng ka chak êm êm a ni.

          A tukah chuan an chhûngte ina mon lenpui a tumthu chu a sawi a, Lunglei an lo pheia an thlenna ṭhinte an ni a. Tun ṭum an rawn phei hi an hnena an innghah tak loh avangin an lo vui hle a lo ni a, chuvangin, tlawh ngei a duh a ni.

          Kumthar ruaiṭhehnaah chuan a kal ve duh ka rin loh avangin ruai ṭheh tumna pawh ka lo nei lem lova. Mahse, ka nu-in a han sawi chuan rin loh takin a lo phur phian a.

          Chutia ruai ṭheh kan tum leh tak si-ah chuan hma deuh hlekah lêng tur chuan kan chhuak a, kan va thlen chuan an lo awm deuh ṭhap a, ka zak deuh viau na'ngin chhuanlam tur Bawihtei a awm avang chuan ka che lai lutuk ta lo hlauh a.

          Ka huphurh lawk ang aiin kan lenna te chu an lo fel phian a, Bawihtei chu an lo lawm hlawm hle a, an lo be tlângnêl thuai a.  Anpa ber chuan ka pa kha a lo hre hle mai a, department khatah an lo thawk ho ṭhin a lo ni a, ka rilru chuan ka tlângnel phah ta phian a.

          Ruai la ṭheh tur kan nih avang chuan rei lutuk awm lovin kan haw leh ta thuai a, in kan thlen chuan ka nu chu a ṭhiante ho nen an lo awm laih laih a. Kumthar vuakveta hetia lo lénkhawm hi ka pa boral aṭang khan an la ṭhulh lo rêng rêng a, hunpui lâia ka nu khawhar tur hi an rawn awmpui ṭhin a, ka nu khawhar pawh an hnem hle ṭhin réng a ni.

          Ka nu leh a ṭhiante chu zaikhawmnaa tel turin an kal ta dial a, Bawihtei chu a hruai ve nghal daih a, ani lahin a lo chák phian a, Ngaihawma a awm bawk si lo nen u Malsawma nen chauh chuan kan awm ta ran a.

          Ka inbual zawh chuan a inbualna tur chu ka siamsak ve nghal a, towel chauh venga a ding chu ka en ṭha ngam vak lova. A pian nalh tak mai chu a lang chiang hle a, a palianin a inkhâithli nalh  si a, Mizo mipa-ah ani anga piannalh chu an vâng ve vîau-in ka ring!

          Ka bula a rawn din chuan ka lo zam ru hle a, nidangah hetiang taka chiang hian a taksa hi ka la hmu ngai tlat lo a ni. Ka bân aṭanga chûl chhovin ka darah chuan a kutzungṭang sei leh lianṭha tak chuan a chûl kal rîak rîak a, ka taksa chu a za chuai chuai a, a mi tawhna chuan keimahah danglamna nasa lutuk a thlen mêk a ni.

          Ka khabe-ah dawmin min kuai dak a, rilṭâm lutukin chaw eitur a hmu a a ei ang maiin duhthawh lutukin min rawn fawp a, ka lo chhânglet ṭha kher mai. Amah ka mamawhna chuan chintawk min neihtîr thei lova, ka thlakhlelhna chuan ngaihtuahna fîm min puttîr thei hek lo.

          "Zanin chu i bulah a tam thei ang ber awm ka duh dâwn a nia," ka beng bulah chuan a rawn ti thawp sut a, ka lo bu nghat ringawt a, ṭawngkâa chhâng tur chuan ka la mumal lo mah mah a ni.

          A ngawih leh vang vang hnu chuan, "Kan rûalin lo phei ve mai teh," a rawn ti leh sup a.

          Ka aw chu ka thian kharh a, "I hria alawm, ka chawlh chhûng zawng awm a ngâi tih chu. Ka nu hian min thlahlel ve si a," ka aw chu a la pângngai chiah lova.

          "Kei pawhin ka thlahlel lo bik che em ni?" thawk a la zui ham ham a.

          "Inbûal tawh la," aw lai râtin ka lo ti thung a.

          "Min bual dawn lo em ni?"

          Phawk lutuka ka lo meng a hmuh chuan a rawn nui chhuak hawk a, hreh hmel zeta min kuahna chu la thla-in bathroomah chuan a lut ta a.

           Ka lo insiam mawlh mawlh lái chuan Zovi pawh a rawn thleng phei a, Teruata a fatu avangin amahin a rawn kal a, u Malsawma inbúal zo pawh chu a insíam zui ve nghal mawlh mawlh a.

          Ruai ṭhehna hmun kan thlen chuan an lo ei mawlh mawlh hlawm tawh a, keini pawh chu intlar ve nghalin kan dawh zawh chuan kan ei ve nghal mai a.

         Mipa-in min lo biak apîang chuan a  chaw bar ṭhulh ṭhakin min lo en reng zel a, chu chu a hmuhin Zovi nuih chu a za hle a, thikthu chhia tia a sawi chuan u Malsawma chu a lo nui suk duh chauh a.

          Zanah chuan midang mut vek hnuah kan pahnih chauhin kan meng fâl a, insi riala ṭhudunin a tuk an haw phei hun a nih tawh avangin kan hun neih ang ang chu ám takin kan hmang dun a.

          Engkimah a insûm thei zawk a ni zel a, chuti ni lo se chuan ka thianghlimna ka vawnghim tawh hauh lovang le! A awmdan leh min ngaihsak danah hi chuan min hmangaih ve niin ka hre ṭhin a, mahse, amah ngeiin a sawi si lova, ka ring ngam leh meuh ṭhin lo a ni.

           A tuka haw phei tur an nih avang chuan men rei lutuk chu a ṭha ber lovin ka hria a, mut a kham loh chuan a mit a thip ang a, motor khalh chhawktu a nei dawn si lova, an chetsual phah ang tih ka hlau a ni.

          Mut ka rawt takah chuan hreh hmel zet chuan a aw ve ta hram a, min fawp leh vang vang phawt a,mu tur chuan kan inmangṭha ta nghal a.

           Ka muhil chu ka kawnga rawn kuahtu an awm avang chuan ka harh a, harh chiang mang lo chuan Bawihtei emaw tiin a kut chu ka vuan a, Bawihtei kut a ni lo tih ka hriat rûal rûal chuan ka harh chiang nghal kawk a.

           Ka tal deuh chu min rawn kuah nghet sauh a, a bawp chuan min rawn khan nghal hmiah bawk a.

          "Shhh..... rei lotê i bulah ka mu duh, ka ngai che!" ka tal leh chiah chu a rawn ti thawp sat a.

          Che lo chuan ka mu ve ta reng a, ka beng bulah chuan a rawn thaw ham ham a, ka mutchhuahna a bo nghal vek bawk.

          Bawihtei a harh ka hlauh avang chuan ka che ngam tawh lo hrim hrim a, u Malsawma chuan ka kawngah rawn zenlutin ka hnute lamah a chûl chho zel a, ka lo dang vat a. Ani pawh chuan a tumlui ta bik lova, a aia thui kalpui ka hlau hluah hluah tawh a ni.

          Ka pang a kham avang chuan tlemin ka mutdan chu ka siamrem hret a, a hmel hmu theiin ka mu ta a. Min lo en reng ka hmuh chuan ka lai angreng hle a, lehlam chu ka hawisan leh ta nghal daih a.

          A nui nghawr dat chu ka hria a, "Naupang chhia lutuk!" a ti zui hluk a.

          A taksa chuan min rawn ur lum ham ham a, khaw vawt hnuaia han mutpui atan chuan duhthusam tak zet a ni. A taksa chu ka va ngheng hnai talh talh a, a lumna chu ka âi a ni ber e.

          A lumna chuan min timuhil leh a niang chu ka harh leh chuan khua a lo eng uar tawh a, a mutna chu a lo ruak huai a, a thawhlâi rêng rêng ka hre lo.

          Ka va thawh ve chuan ka nu rawngbawlna bula awmin a phone chu a lo khawih a, min rawn melh zawk a, a phone bawk chu a bih leh nghal a.

          Ka intihfai hnu chuan ka nu rawngbâwl chu ka pui ve nghal a, u Malsawma chu a phone a rawn rik takah chuan chhângin a kalsawn ta nghal a.

           Bawihtei a rawn thawh ve takah chuan ka nu chuan a lo be chûl a, bawnghnute thlitsakin biscuit nen chuan a chhawpsak nghal bawk a.

          U Malsawma phone hmang zo rawn let leh chu a hmel a dik lo riauvin ka hria a, ka lo en reng a.

          "Kan hmanhmawh deuh a ngaih hmel, tukinah ka nu a ṭha lo leh deuh a, damdawiinah an tlanpui nghal a ni awm e," a rawn tih chuan ka lo hawi phawk hrâ a.

           Ka nu chuan, "A va zialo ṭhin em aw! Amah chu engtin nge a awm rêng rêng?" a lo ti vat a.

          "Tunah tak chuan a la chau ang reng viau a ni awm e. A bp sâng leh a zunthlum kha a lo nasa leh deuh a,chu chuan a tichau a ni ber."

          Ka nu chuan chaw ei sawk sawka chaw ei kham veleha chhuak mai turin a ti a, a theih veleh chaw chu kan ei ta nghal a.

         Chaw eikham hnu chuan rei vak lo an ṭhut hnu chuan an chhuak ta nghal a,  Bawihtei chuan an ruala phei ve tur chuan min ti a, ka khawngaih reuh hle a, an pafaa an phei tur chu ka ngaihtuah hle a ni.

          Chumi ni nilêng chuan an pafa ringawt chu ka rilru-ah an awm a. Biak inah ṬKP-in hnatlâng kan nei a, miin min biakna te chu ka chhang liam mai mai hlawm a, Zovi chuan min hrethiam takin midang awm lohna lai deuhah chuan min awmpui a, no leh thleng vel chu kan remdun mawlh mawlh a.

          Hnatlan zawh hnu chuan Teruata nen min thlah kual a, kan in pêngah chuan rei vak lo dingin eng eng u Malsawma chungchângte chu kan sawi dun a, Teruata chuan min lo chhaih ve zuk zuk a.

          "I lunglêng lutuk tur hnem tur chuan Lalhminga te pawh an awm tho kha, lungngâi mah ta che," a lo tih chuan chhan vak ngaihna hre hek lo i ka va chhiatkhum ringawt a, amah lah chu a lo nui hawk hawk zui a.

          In ka thlen chuan ka inbual nghal a, ka inbual zo ka thawmhnaw ka haklâi chuan ka phone chu a rawn ri a. U Malsawma a ni tih ka hriat chuan rang fahranin ka chhâng nghal a.

          "In thleng tluang maw?"

          "Aw, tluang e. Hei damdawiinah kan tlang nghal a."

          "Eng nge tunah a an tawh? Zing lam ai khan a zia deuh tawh em?" ka lo ti vat a.

          "A zia deuh e. Tunah tak chuan a muhil a."

          "Bawihtei a chau em?"

          "Chau ve deuh a niang, a muhil leh nghal daih a."

          "Nangmah kha i chau em? Nizan i mu tlem bawk si a, ka ngaihtuah deuh che a," ka lo ti leh a.

          "Chau love, ka ngaihtuahna i chhuahsan duh miah lo hian min tibuai tih mai chauh hi a ni e."

          Ka lo nui hak a.

         
VANMALSAWMA

Chapter 24





          Aizâwl ka phei dâwn zan chuan ṭhiante ho an lo leng sap sap a, midang haw vek hnu-ah Zovi leh Teruata te chu an la awm thung a.

          Anni pahnih hi an inzui rei ve tawh viau a, Teruata a hnaah a nghet ta bawk nen inneih lam an sawi ve ta zauh zauh a, kumin chhûng ngeia inneih chu an duhdan a ni a. Mahse, Zovi nâu hi phâiah thil zirin a awm a, a zir chhuah hun la nghak rih tura an tih avangin palâi tirh pawh an ṭhulh leh ta kha a ni a, a rawn chhuah hunah chuan an rial rei vakin a rinawm tawh lo a ni.

          "Nang chu kei aiin pasal nei har mah la fanu i nei lian tawh bik e!" Zovi'n a rawn tih chuan Teruata nen chuan kan lo nui dun a.

          "Inneih tirh phat aṭangin chhûngpuinu i ni nghal ringawt dawn a nia, a nuam ngawt ang," la nui reng chung chuan a rawn ti leh a.

          "Kan innei kher lo mai thei asin! Engmah hi lo sawi lawk theih pawh a ni lo," ka lo ti vat a.

          "I bula a awmlaia a endan che ngaihtuah chuan a chhuah hauh che-in ka ring lo! A rilru i luahkhat hneh hle tih a hriat vek alawm," Teruata chuan a lo ti ve khauh a.

           "Engtin vak nge min en a? Chutiangin a rilrua awm a tilang teuh lo mai," ka lo ti hliai a.
      Nm         
          "Mipa-in a hmeichhe hmangaih a melhdan dik tak angin a melh che. Hmeichhia chuan in hrethiam lo mai thei a, mipa bawk hian kan mipatpuite hmeichhe endan hi kan hrethiam ṭhin a," a lo ti leh a.

           Ka rilru chuan Teruata sawi ang chu ni se ka lo ti a, ka hmangaih ang hian min hmangaih ve se, a kîanga damchhûng hun hman tluka thlakhlelh ka nei lo a ni.

          An haw hnu chuan ka thawmhnaw ka tihfel loh tlêm la awm chu ka tifel leh phawt a, ka tih zawh chuan ka mu ta nghal a.

          Harsatna êm êm tawk lovin Aizâwl chu ka thleng phei leh ta a. U Malsawma inah ka innghat leh phawt ang a, chuta ṭang chuan ka hostel awmna turah chuan ka lut chauh dawn a, chu chu ka nu duhdan a ni.
 
          Inchhüng ka luh chuan Bawihtei leh nu Mawii bakah nula pakhat hi an lo awm a, Bawihtei'n min hmu chu a ṭê chul a, min rawn kuah nghal chat a. U Malsawma chu thil pawimawhah a chhuah avangin a awm ve lo a, nu Mawii chuan ka chauh leh chauh lohte chu min lo zawt ve chul a.

          Nula lo awm ve chu u Malsawma te chhûng, thingtlâng lam mi a lo ni a, kei ka awm tawh dawn loh avangin Bawihtei buiapui tur leh a ṭul ang apiang ti turin a lo awm a ni.

          Ka hostel awmna tur chu ka tihfel sa vek tawh avangin a tukah chuan ka lut nghal a, u Malsawma chuan engkim a buaipui vek ti ila a sual awm love. An bula awm turin min duh vîau na'ngin thil awmdan chiang zawka ngaihtuahin kan pahnih atân a ṭha zawkin a hre ve ta a, min hnial ta lo a ni.

          Class chu kan kal leh nghal mawlh mawlh a, Judithi nau neih a hnaih tawh avngin a chawl tawh a, ṭhian dang han kawm ka nei lem lova, Bena te ho nen chuan kan inkawm mai zel a. U Malsawma nen chuan college-a kan inhmuh bak chu kan inhmu khat ang reng viau a, eng emaw chânga an ina chaw ei tura min rawn hruai hian kan awmdun thei a ni deuh mai a, chu chu keima tân pawh a ṭha zawk ka ti a ni.

          Judithi'n nâu a neih chuan a neih zanah ka riahpui ve a, fapa duhawm deuh mai a nei a, a inhlîam lem lo bawk a, a tukah chuan an chhuak nghal mai a.

         Mârama chu a hlim hle a, a fapa muhil lâi chu a bih sek a, a chhûngte chuan an han khap ve bawk a, a sawt lem hlei lova. U Malsawma pawh Judithi tân chuan a la ṭangkâi zel a, naute mamawh tur eng eng emaw a leisak nûal a, u Rintei pawhin naute thawmhnaw a rawn leisak bawk a.

          Pâwl sawmpahnih result a chhuah chuan ka nau Ngaihawma chu first division-ah a pass ve hlauh mai a, ka lawm hle a. Lehkha zir ṭha peih vak lo, thiam thei deuh si hi a ni a, mite angin zir ve phei se chuan tun aia a tihṭhat ngei hi a rinawm a ni.

          Ka nu-in Aizâwl lamah college kal ve se a tih avang chuan in luah tur chu kan zawng chawp deuh chûk chûk a, chhûngkaw member tam kan ni lem lo bawk a, kan unau luah tawk tur  te fel renrawn chu kan hmu thuai a, ka nau lo phei hun hma chuan ka lo intifel hman vek a.

          Ka nu chuan amaha awm chu a huphurh lo na'ngin keinin kan remti si lova, dawra a nula chhawr pakhat zawk chu awmpui turin kan be fel a. Nu leh pa nei tawh lo, chhûngte bela awm a ni a, a awmna a patea nupui hi a fel vak lo niawm tak a ni, hrawn hrehawm a lo ti ru ve hle a lo ni a, ka nu-in a bula awm tura a han sawm takah chuan lawm takin a lo remti nghal hmiah mai a ni.

          Kan unau chuan kan awm ve ta rak rak a, ka nu pawisa min thawn rin ringawt ai chuan tiin ka nau chu class kal loh niin inhlawhna remchâng a hmuh apîangah a inhlawh ve ṭhin a. Kei pawhin online-a thil chahin ka zuar ve ṭhin bawk a, in luahman chu kan intum ve thei mai a, ka nu erawh chuan ṭul a ti lem lova, kan zirlái chauh ngaihtuah turin min chah reng a ni.

          Nikhat ka class bâng chu u Malsawma chuan min lo nghak a, kan ina lo len a tum thu a sawi chuan ka ṭhiante chu kalsanin a motor chuan kan kal ta nghal a.

          Ngaihawma a ṭhiante ina a lenkawi avangin mitmei ven tur awm lo ta chu inngheng rialin kan ṭhudun a, kan unau chauha kan awm hi chuan kan inluah hi te lutukin ka hre bik lova, u Malsawma a rawn len erawh hi chuan zím ta ríau-in ka hre ṭhin ani.

          "Bena hi i la thik em? Kan inkawm nasa sia," ka tih chuan a lo nui hawk a.

          Engmah sawi lo chuan ka khabea min kuaidakin min fawp a, kan awmdun lohna a rei deuh tawh bawk a, a duhthawh hle a, kei pawh chuan uar takin ka lo chhânglet a. Kan hmui a insik tawh loh hnu pawh chuan nghet deuhin min kuahbet reng a.

          "Ka bula awm reng atân ka duh che! Min hrem rei mah mah i ti ve lo maw?" a rawn ti sup a.

          "Ka nu duhdan ka zawm ngei a ngai tih i hriat ve tho kha."

           "I nu chu ka sawipui ang a, ka hmin thei maiin ka ring!"

           "Ni love, kei pawhin zirchhuah phawt ka duh," ka lo tih chuan a thaw hak a.

          "Aw le, a ṭha alawm. Mahse, min nghah thlawntîr lo ang che," a ti nghut a, a lung a âwi zan lo tih ka hria a, ka lo nuih sak a.

          Ngaihawma a rawn haw hnu chuan ani pawh chu a haw ve ta nghal a. Kei pawh chuan ei rawngbawl pahin ka zirlâibu chu ka keu mai mai a, ka rilru-ah erawh a lut lo khawp mai. Ka ngaihtuahna zawng zawng hi a luahkhat a ni ber a, engtik lâi mai pawh hian ka ngâi veng veng reng mai a ni.

          Hriat loh kârin hun chu a liam ve zel a, Judithi fapa pawh kum a lo tling ve dâwn ta reng a. A piancham chu a pûte chuan lawm ropui an tum khawp mai a, an tupa hi an duat a, an ngaihtuah êm êm bawk a, Judithi chuan a hnute pek chhûng tihloh chu a chang hman ve meuh ṭhin lo a ni.

          Judithi'n min phut tlat avangin zing aṭangin ka phei a, ei leh in an siam hnem êm avang chuan kan buai nilêng a, chawhnu lamah phei chuan ka tai hlur tawh mai a ni.

          U Malsawma leh Bawihtei an rawn thlen lâi chuan chokâ-ah chawṭani-a telh tur ka lo zai mawlh mawlh a. U Malsawma'n min hmuh chuan a rawn nui suk a, ka bulah chuan a rawn ṭhu ve nghal a.

          Ngâwi rengin ka thil ti lai chu min lo en reng a, ka lai lek lek a ni.

          "I bîang tai têkah khan ka fawp chak lutuk!" a rawn ti sup a.

          Midang awm an awm ve reng avang chuan an hriat hlau takin ka hawikual nghal a, chu chu a hmuh chuan a lo nui hak a.

           U Rintei leh u Puia pawh chu an rawn nalh duh hle a, an inhmeh tak zet a ni. Miss Maruati pawh nidang ang bawkin a nalh leh hle a, ka ngaihbel nge chu ka hre lova eng emaw châng hian min lawm lo riau-a hriatna ka nei ṭhin.

          Bawihtei thu min hrilh chuan ka awm a tinuam lo deuh a, ka lo che hah ve deuh bawk nen ka chau nghulhin ka hria a ni.

          "U Mapui, vawiinah ânu ka hmu a," a rawn tih chuan ka phu deuh zawk a.

          "Khawiah nge i hmuh, Bawihte?" ka lo ti vat a.

          "School bana ina kan haw-in kan in bulah khân a lo awm a."

          "A bia che em?"

          "Aw, bia e. Âpa inah a awm leh awm loh min zawt a."

          "Âpa hnenah i sawi em?"

          "Aw, sawi e. Âpa chuan engtin mah min ti tawh dawn lo tih a sawi a."

          "I pa chuan a sawi dik chiah a nih chu! Engtin mah a ti tawh dawn lo che."

          Jailah tâng rei lovin bailin a chhuak vat a, Mizoramah awm lovin Mumbaiah a chhuk ta daih a, a la awm reng nia ka ngaih laiin a lo haw reng tawh a lo nih chu!

          In kan thlen chuan ka chau hle a, u Malsawma'n min thlah a, a awmlai pawh sawi lovin ka inbual nghal a.

          Thatchhe deuhin ṭhutthlengah chuan amah ngheng dar darin ka ṭhû a, Bawihtei thil min hrilh chungchâng vel kha ka sawichhuak a.

          "Hlauthawng suh, engmah a ti ngam tawh lovang," a lo ti awlsam then a, ka rilru erawh a nawm phah tehchiam pawhin ka hre lo thung.

          Ka chau tih hrethiamin rei awm lovin a haw ta vat a, kei pawh mu turin ka insiam zui nghal a, ka chau bawk a, ka muhil rang khawp mai.

          Online-a ka thil zawrh chu ka vanneihpui viau a, dawrtu ka hmu thei hle a. Kan unâu chuan rorêl dunin ka nâu chu inhlawh tawh lovin mi thilchah pe kualtu-ah ṭang sela, amah pawh a hahdam deuh zawk ang a tiin scooty lei ve chu kan rêl a, lirthei lam chinchâng kan hre lem lo bawk nen u Malsawma min enpui tura sawm chu ka rilruk a.

          Zana a lo kal chuan ka lo sawi ta ngei a, min kalpui tura ka duhthu te chu ka hrilh a. Holiday a nih avangin a hman turah ka ngai ve ngawt a!

          "Naktuk chu ka hman ka va ring lo ve! Tihtur pawimawh ka nei a, inrinni lo awm turah khian kan kal mai dawn em ni ang?"

           "A pawi lo, i hman hun hun kha a ṭha a ni mai," ka lo ti thuai a.

           Thesis buaipui lai a neih avangin chu lamah chuan insâwrbing a duh a nih ka ring mai a, a rawn len khat phah rêng bawk a ni.

          A tukah chuan Judithi chuan a fapa thawmhnaw en paha bazârpuiah min rawn sâwm a, tihtur ém ém ka neih loh avang leh kei pawhin thil en duh ka neih avang chuan ka lo hnial lo hle a.

          Kan bazâr kal chu kan nui nasa leh pek hle a, Judithi bula ka awm hi chuan ka ho zo vekin ka hre hial ṭhin a ni.

          Kan lei tur ang chu kan lei zo fel thawkhat tawh a, a fapa pheikhawk tur lei leh hram a duh avang chuan naupang pheikhawk dawrah chuan kan lut a, Judithi'n a en vel chhûng chuan ka ke a kham deuh tawh avangin  ṭhutthleng lo awmah chuan pâwnlam thlir pahin ka lo ṭhu a.

          Judithi'n a pheikhawk thlanchhuah en tura min koh chuan en tumin ka hawi phei a, mahse, ka hawi let leh rang kher mai. Judithi min biakna pawh mumalin ka hre lova, ka nghilh dup hian ka hria a.

         U Malsawma leh u Rosie-i te chu an rawn inzui phei a, hlim hmel taka u Rosie-i nui hmel ka hmuh chuan chhûngrilah hian ka na zawkin ka hria a. Ka lo en reng lai chuan u Malsawma bânah vuanin amah hnaih deuha awnin eng emaw hi a sawi sep sep a, u Malsawma'n ngaihsak hmel taka a lo ngaihthlaksak lai ka hmuh chuan chhûngrilah ka kehchhe vek ni maiin ka inhria a ni.

          Judithi'n a thil lei man a pek fel hnu chuan kan haw ta nghal a, ka hmel dik lo leh ka ngawichawi ta riau chu a chhan min zawt a, ka lu nat thu chhuanlama hmangin ka insawifel hram a.

          In ka thlen veleh chuan khumah bawkin ka rilru na leh pik lutuk chu thawk ka la halh a, ka ṭahchhuak lutuk chu ka insûm hrâm hrâm a, ka mittui hi anni pahnih vang khan fartîr ka tum rêng rêng lo a ni.

          A hman lohna chhan chu kha ngei kha a lo nih dawn kha! Ka tân hun a neih loh lâiin kha nu tân erawh kha chuan a lo nei thung a, kei chu ngaihsak hlawh lovin ka awm a, anni erawh chu hlim takin an lêngdun chu a ni si a. Engtik aṭang khân nge an lo inkawp leh ang tihah cuuan ngaihdan siam ngaihna pawh ka hre lova, a thesis chhuanlama a lo len loh châng pawh khan an lo inhmu reng ṭhin pawh a lo ni mahna!

          Ka mittui rawn lûang chu duh lovin ka kut hnunglam chuan ka han hru táwk a, inbual faiin ka rilru aṭang chuan dahbo hrâm hrâm ka tum a, a harsa êm êm thung si a ni!

          Zanah pawh a rawn len hman loh tur thu a sawi lawk avangin ka beisei lo hrim hrim a, ka zirlâi chu enin rilru pek ka tum hle a, ka tum lui viau na'ngin ka hlawhchham chiang hle thung. Ka ngaihtuah duh loh luih ngial pawhin ka rilruah a rawn awm leh zel a, a tawpah chuan beidawngin ka lehkhabu chu ka khup thawk a, ka mu ta daih a.

          Ka muhil thei chûang si lova, ka phone chu la-in Zovi message min rawn thawn chu ka va chhâng a, Teruata a len a vang chuan rei inbe lovin kan inmangṭha thuai a. Ka phone dah ka tum lai tak chuan u Malsawma message a lo thleng a, hawn loh ka tum zet na'ngin ka rilru thlakin ka hawng leh ta zawk a.

          "Ka ngâi che."

          Ka chhan loh avang chuan a.ngai bawk chu a rawn thawn nawn leh a, chhan ka tum lo bur a ni mai.

          "Min chhâng ve la."

          Ka la chhan loh avang chuan a rawn call a, ka la duh lova, a rawn call nawn leh chuan ka phone chu ka switch off ta hmiah a. Beisei tur awm lovah beiseina ka insiam leh mai ang tih ka hlau a, buma awm ka zûam tawh ngang lo a ni ber e.

          Ka mutna room kawngkharah chuan Ngaihawma chu lo dakin a phone chu a rawn lek vâ vâ a.

          "U Malsawma'n a be duh che a, i phone i off em ni?"

          "A mu tawh lo ti mai rawh."

          Min en vung vung a, a lu chu thingin a kalsawn leh ta a. Muthilh tum chuan ka mit chu ka chhîng vang vang a.

          Zan rei hnu pawh chuan ka la muhil thei chuang lova, ka harh telh telh emaw tih mai tur hi a ni a. Ka tui chhawp a lo zawh tawh avang chuan tui la turin ka va tho chhuak a, filter tui chu ka dawh a.

          Kawngka kik ri ka hriat chuan zan a rei deuh tawh avang chuan ka hlau ang reng hle a, a nau a mu tawh bawk si a, ngawi rengin ka dinna ngaiah chuan ka ding reng a. A rawn kik nawn leh chuan ka huaisenna zawng zawng sâwmkhawmin, "Tunge aw?" ka ti ta hrâm a.

          "Keimah...." u Malsawma aw ka hriat chuan ka hlauhna a kian rualin thinrimna-in a rawn luahkhat leh nghal a.

          "Eng nge i duh?" Ka aw chu a chang ṭha ve hle a.

          "Lo hawng teh!"

          "Zan a rei tawh, kan mu dawn. Haw rawh."

          "Kawngkâ i rawn hawn hma chu ka kal dawn lo."

          A luhlulzia ka hria a, a sawi ang chuan a ti ngei ang tih pawh ka chiang ani.

         Kawngkâ kalhna ka hawn rûal rûal chuan a rawn nêk hawng rawp a, rawn lut nghalin ka kalsawn tur chu min kai let dawrh a.

          "Engvanga hetianga awm hi nge i nih sawi rawh. Engvangin nge min biak duh loh?"

VANMALSAWMA

Chapter 25




          "Eng vanga hetia awm hi nge ka nih min zawt a maw? A chhânna chu nang hian i hrechîang khawp ang ka ring!"  a mitah tak melh let sak pah chuan ka lo ti vin hlar a.

          "Hria ila ka zawt hauh lovang che. Ka hriat loh vanga zawt che ka ni e."

          Engtin nge engmah tisual miah lo anga a awm theih le! A hmelah chuan inthiam lohna rêng rêng a lang lova, tuna a hmêl landanah chuan a thiam lo zawk chu keimah hi ka ni!

          A taksa nghenga min pawmbeh a tum chu ka lo tal phat a, a kut chu phihthlaksak dawrhin ka tawlh hnung nghal vat a. Chutia a rin loh dan deuha ka chet avang chuan min tihluih chu tum bik lo chuan ngawi rengin min melh ta reng a.

          "I tihdik loh chu ka hrilh che ngai lovin i hria alawm. Chuvangin, nang nen hian sawidun tur kan nei tawh lo. A pawi ka ti khawp mai, khawngaihin min chhuahsan tawh ta che, mut ka duh tawh a."

         
          A mitmengah chuan a ngaihna hriat lohna, beidawnna leh natna ka hmu-in ka hria a, mahse, a rei loh em avang chuan ka hmu sual a nih ka ring ta zawk a.

          "Aw le, i duh ang chuan ni rawh se."

          Thil dang engmah sawi leh tawh lovin a inher a, a chhuak ta nghal nal nal a. Kan in a chhuahsan rual chuan kei pawh min chhuahsan nghal a, ka ruak vek ni maiin ka inhria a ni.

          Chhin khat pawh chhîng lovin ka ṭap tlaivâr a ni ber a, ka ta chauh emaw ka lo tih ṭhin kha midang nen kan lo inṭawm reng a ni tih ka ngaihtuah chhuah apîang chuan ka na ngawih ngawih a, ka thinlung hi a puakkeh dawn ni mai hian ka hre hial a ni.

          Zîngah chuan tho peih lovin ka mu zawi reng a, ka nau chuan kan boruak engkim kha a hai bikin ka ring lova. Chuvang chu a ni mahna min kaihthawh pawh tum lovin amahin a che rak rak a.

          Chaw ei tura min rawn koh chuan tihlunghnur ka duh loh avangin peih lo tak chung chuan ka tho a, mahse, ka ei luih theih tak ngang lovah chuan ka tumlui duh ta bik lova.

          Ka ṭah nasat avangin ka bui lûk a, ka lû chu a na ngut ngut bawk a. A hmêl hmuh ka duh rih loh avangin class kal ka tum lova, chu bakah ka awmdan bër bûr avang chuan han kal chi ziazâng ka ni lo hrim hrim bawk a ni.

          Engmah ti peih lovin ka mu nilêng a, ka ngaihtuahna chuan mu leh mal a nei lova, keimaha natna nasa lutuk min thlen chung pawh chuan ka la ngâi fan a, a bula awma a âwm nghenga han bei leh te ka châk a. Mahse, ka ngaihtuah chiang a, ka thinrimna chuan hnehtîr hrâm ka tum tlat a, chuti a nih loh chuan ka chak tawk lo ang a, a hnenah ka kir leh mai ka hlau a ni.

          Ka hmangaih êm avangin ka theihnghilh thei miah lovang tih chu ka hria a. Mahse, chu chu chak lohnaa hman ka tum bik hauh lova, min bum avanga ka natna chu tlukpui ka tum hek lo. Ka zirlâiah chauh rilru pek tum ila, mahnia inngaihtuah hman lêk lovin lehkha zir bakah ka sumdawnna lamah hma zau zawkin la ila tiin ka rilru chu ka siam lui tlat a. A tirah harsa mah se ka tum chuan ka paltlang thei ang tiin ka intiam rilru a, hmeichhe luhlul leh tihmawh tak ka nihna a lo lang a ni ber e.

          Ka rilru ka tipâukhauh hle nachungin ka taksa-in a tuar hle a, thil ei leh zan muthilh ka harsat êm êm a, chu chuan ka taksaah nasa takin nghawng a nei a. Mahse, chau tak chung pawhin hma lam ka thlîr lui tlat a, engtik nî-ah emaw chuan ka la hlim ve leh mawlh ang tiin ka ngaihtuah lui hrâm hrâm ṭhin a ni.

          Kima'n bîalnu a nei urhsun ve deuh a, kan inkáwm khât ta viau a. A bîalnu hi tlêma inti eng emaw ve deuh a ni a, Kima ṭhiante ho hi min kawm ngeih vak loh avangin kan bulah a awm ṭha peih lova, Kima hi a tilungâwi thiam bawk nen kan lak aṭangin a hla ta tial tial a, kan inbe leh zeuh ṭhin tih mai lovah chuan kaninkawm ngai tawh mang lo a ni.

          Bena leh Mârama te nen kan la inzui zel a, Bena pawh min beisei angin a awm tawh lem lo bawk a, ṭhianṭha tak niin kan inkawm zui zel a. Kan class ami hmeichhe pakhat hian a ngaizâwng nasa hle a, a hmelchhe lovin a fel reuh bawk si a, Bena chu duh ve mai turin kan nawr reng a, a bengkhawn duh tlat si lo a, chu nu chu ka khawngaih ang reng hle a ni.

          U Malsawma nen pawh kan inhmu ngai meuh lova, college vela tihpalh thilthua kan inhmuh hi a ni mai a, kan inbe ngai lova, inhria angin kan awm lo a ni ber zawk.

          Bawihtei ka ngai thei hle a, ka ngaihzual chângin nu Mâwii phone aṭangin ka va be leh zauh ṭhin a, hmuh chak viau mah ila hmuh loh a ṭha zawka ka hriat avangin hmuh chu ka tum ngai lem lo.

          Kum tawpah chuan christmas leh kumthar hmang turin kan haw phei a, Zovi bak chu ṭhian ka kawm ngai lova, kumthar lamah anni pawh inneih an tintuah a, palâi pawh vawikhat chu an kal tawh a ni awm e.

          Kumthar vuakvetah chuan ka lung a lêng zual hle a, kum hmasaa kan awmdante ngaihtuah letin ka ngai ngawih ngawih a. Mahse, ani chuan a ngaihtuahna aṭangin min paihbo hmiah tawh ang a, tunah pawh hlim takin hun a hmang mekin ka ring a. Ka tân a awm tawh lo tih hrereng chungin amah ka ngaihna hi a reh thei si lova, ka ngaihtuahna aṭangin paihbo tum eng ang mah ila awmzia a awm si lova, ka tum buai duh ta bik lo a ni.

          Kumhlui thlah zan chuan Zovi te inah eiturte kan siam ve a, zanlâi thleng ka awm a, ka mut a chhuah deuh avangin thil kan ei zawh hnu lawk chuan haw mai ka duhthu chu ka sawi a. Anni pawh chuan min hrethiamin min chelh lui lo chuan Teruata nen chuan min thlah haw nghal a.

          Muthilh chhuah vanga haw ni si kha muhil thei lovin ka mu meng kar reng a, ka ngai êm êm reng a, amah ngaihtuah lo hian nikhat pawh ka la awm lova. Mahse, chung avang mai mai chuan va biak leh emaw va intahluh leh emaw chu ka tum bau lo thung a ni.

          Ka whatsapp tone ri reng chu check tumin ka phone chu ka la kang a, message lo thleng ho chu ka en zung zung a. Chutia ka enkual lai chuan ka lungphu tidanglam daih thei thil chu ka hmu ta a. Amah a ni! Amah ngei a ni message min rawn thawntu chu!

          Khur dar dar chung chuan ka hawng a, a chhûnga thu awm ka hmuh hnu phei chuan ka lungphu chu a rang zual sauh a!

          "Kumthar chibai."

          "Ka ngai che, Mapui!"

          A message hmasa zawk chu inchibaina satliah ang lek a ni a, a hnuhnung zawk erawh chu ngaihtuahna tibuai tham a ni tlat thung!

          Kei pawhin ka ngai a, tunah pawh amah ka ngaihtuah mêk a ni tih hi hre ta se engtin nge min ngaih ang le! Min ngai ve tak tak nge ni ang a min rawn fiam mai mai zawk ni ang? Kha chen kan inbiak loh hnuah a vawikhatna atân a message ka dawng a ni a, a ṭawngkam pahnih khat lek pawhin keimahah danglamna nasa tak a thlen chu a ni si a, amah ang hian mipa dangin keimahah hetiang taka nasa hian nghawng an nei thei tawhin ka ring lo a ni.

          Beiseina diklo ka insiam ang tih ka hlauh avangin ka chhâng let duh lova, chhânglet dawn pawh ni ila engtianga chhan tur nge tih pawh ka hre chuang lo a ni.

          Engtin tin emaw kumthar lawmna te chu ka hmang zo ve ta hram a. Kan inluah chu ka nu-in hmuh ve a duh avang chuan class ṭan hma deuha phei chu kan rêl a.

          Aizâwl kan phei ni chuan ka motor chuang chu ka fuh lo hle a, ka luak nasa hle mai a. Kan inluah kan thlen meuh chuan ka chau hle a, ka mu zawi nghal der a.

          Tlema ka zia deuh hnu chuan ka inbual a, ka inbual zawh chuan ka la chuah deuh avang chuan ka mu leh a, ka lo muhil zui daih a.

          U Malsawma aw niawm tak hi ka mang hriat ruai ruai a, ka ngaihtuahna a luahkhah êm avangin ka ngaihruatna mai mai a nih ringin muthilh leh tum chuan ka inlet tap a.

          "Bawihtei hian a ngâi em a, in lo phei veleh lo lenpui ka lo tiam tawh bawk si nen, zana rawn kalpui tum ka ni a, kan nghak thleng zo ta ngang lo a ni."

          Ka harhchiang kher mai! Khawi hmunah mah a aw chu ka hai ngai lovang! Ka tho chhuak nghal a.

           Mahse, ka ngaihtuah chiang a, ka chhuak phei a nih chuan u Malsawma chu ngei ngeiin ka biak a ngai emaw a niang a, biak htim hrim chu ka huphurh  pawh a ni lova. Kan inchhûng zim tea inhnaih taka awm chu ka ngam lo a ni ber zawk.

          Mut leh ka tum lâi tak chuan ka nu chu lo kalin min rawn kova, thawh loh theih ni ta hek lo hreh ru tak chung chuan ka va phei ta a.

          Ka va phei chu mitkhap lêk lo hian min lo en reng a, a mitmeng chu hraitthiam a harin eng nge a rilru-ah awm ang tih pawh a hriat loh a. Ka zam ru lutuk chu a hria ang tih hlauvin zam awm lo tak chuan tlêma dak deuh hian ka kal a.
 
          Bawihtei chu pawmin eng eng emaw chu zawtin ka be chúl a, u Malsawma chuan min en reng tih ka hre reng naa melh pawh ka melh duh eih lo thung.

          Ka nu-in chaw ei ve tura a sawm chuan ṭullo ka lo ti ru viau a, a hnial ta hlauh zawk a! Amah ka hnaih apîanga ka awmdan danglam ziah chu a la reh lova, min hipna nasatzia pawh a la ngai reng a, chuvangin, amah hlat thei ang bera awm chu ka duh ber a ni rih a ni.

          Bawihtei haw tur chuan hreh hmel deuh hian min en a, ka khawngaih viau na'ngin amah vanga a pa nen inhmuh zel a ngaih dawn avangin kan bula riak tur pawhin ka sawm duh ta lova, hnuk ulh ru ṭeuh chung chuan ka vai liam a.

          Ka nu chu ni thum a cham hnu-in a haw phei leh ta a, kan unau chuan kan awmdun leh ta rak rak a. Class kan ṭan leh tawh avangin nitin college lamah kan liam leh ta a, a ngai tê-in Bena leh Mârama te nen chuan kan inzui leh ta dal dal a.

          Bena leh amah ngaizâwngtu Tête-i chu christmas lai vel aṭang khan an lo inkawp ve a lo ni a, kan ṭhianho zîngah chuan a tel ve mai zel a, Kima bialnu nen chuan an inang lo hle a ni.

          Judithi te inah chuan ka lêng zauh zauh a, a fapa pawh a lian ve tawh hle a, a hmelṭha-in a chum buang mai a, a duhawm tak zet a ni.

          Zovi  chuan an inneih nî tur an ruatfel tawh thu leh ṭhiana min hman a tum thu chu min rawn hrilh a, ka hreh viau na'ngin a hmâ aṭanga a lo sawi lawk tawh a nih avangin ka lo hnial duh ta bik lova. Class ṭhulh tlem thei ang bera haw phei dan ka ngaihtuah a ngai dawn a ni.

          An inneih dâwn nî-ah ka phei ta chauh a, inneih nî chiah chama a tuka phei leh nghal mai chu ka tumdan a ni a. Exam a hnaih tawh bakah attendance ka ngaih pawimawh êm avang chuan class kal ṭhahnem ka ngâi hle a, châm rei thei niin ka inhre lo a ni.

          Inneih nî chuan mi an ṭhahnem hle a, Teruata te hi an milen bakah amah tlangvâl fel leh kohhrana inhmang tak a lo ni bawk nen miin an hlutsak a, Zovi lah nula fel leh ṭhenrûal kawm thiam a lo ni bawk nen lawmpuitu pawh an ṭhahnem hle reng a ni.

          Teruata chu a thawhpui Vâla chuan a dinpui a, vawihnih khat chu tunhma-in kan inah te pawh a rawn lêng ve tawh a, Aizâwl lama ka awm tak daih avangin ka hmu ngai ta lova. Christmas lâi khan vawikhat chu Teruata hian Zovi te inah a rawn hruai a, chu chu tunhnaia ka hmuh leh chu a ni deuh mai a.

          Inneih tukah chuan ka lo tum lawk angin Aizâwl lamah ka phei leh ta nghal a. Exam tura inpuahchah ka duh avang chuan online-a ka thil chah pawh ka titawp rih a, final exam a nih tawh dawn avangin ka theihtawp chhuaha result ṭha deuh nei ngei tura zir ka tum a ni.

          Rin âi takin ka exam chu tiṭha ka inti a, result chhuah hmâ chu Aizâwla awm riha ka sumdâwnna kha kalpui rih ka tum a, ka nau awmpui a ngai tho bawk nen Lunglei lama phei chu ka la hmanhmawh lem lo a ni.

          Nikhat chu, ka bazâr kal haw chu ka bawr deuh avang chuan laklawh deuhin taxi ka lo cháng a, chutia taxi chánga ka din reng lâi chuan ka bulah car nalh zet hi a rawn ding a, a chhûng aṭang chuan Vâla hi a rawn dakchhuak a, ka han hmu thut chu ka lo ri deuh hlut a. Engtika Aizâwla rawn phei nge a nih tih leh eng ti tura rawn kal nge anih tihte chu ka lo zawt nghal chûl a.

          "Rawn ṭhu lut phawt la, ka hrilh dâwn che nia," passenger seat lam kawngkhar hawn pah chuan a ti a, kei pawh chu ka ṭhu lut ve nghal mai a.

           Kan in awmna lam ka hrilh hnu chuan a tlan ta nghal a. Nimin lama rawn phei a nih thu leh training tura awm a nih thute chu a sawi luam a.

          Aizâwla ka phei hnu hian vawithum vel chu min rawn be ve tawh a, ṭhian angin ka lo be ve mai zel a. Teruata kâ aṭang chuan ṭhian ang mai chuan min en lo tih ka lo hre tawh tho na'ngin ka tihsual leh ka hlauh avangin ṭhian angin ka be lui hram ṭhin a.

          Tihsual leh ka hlauh vang chu thuhran ni se midang lakah ka rilru ka la pek theih loh vang a ni mah zawk a, midang pawm leh tur chuan ka la inpeih lo a ni ber zawk a nih chu.

          Kan in kan thlen hnu chuan ka thil leite chu min dah luhpui a, eng emaw chen a ṭhut hnu chuan a lo len leh tur thu sawiin a haw ta a. A haw dawn chuan min thlah haw avanga ka lawmzia te chu ka han hrilh leh hnuhnawh a.

          A rawn lêng zing tial tial a, min duhzia pawh a sawi ta zauh zauh a. Kei erawh chu ka la inpeih loh avangin han sawipui vak ngaihna ka hre lova, eng emaw châng chuan han inenchhin ve te pawh ka duh rum rum a. Mahse, thutlukna siam ka harsat leh tlat zel a, chu chuan min tibuai a, laklawh takin min awmtir a ni ber mai.

          Ni khat chu, a ṭhianpa nupui neihnaa kalpuiah min sâwm a. Nidangah min sâwmna hi ka lo hnawl zin tawh avangin ka inthlahrung ve tawh si a, kalpui tur chuan ka lo intiam ve ta ngawt a.

          Inneihnaa kan va thleng chu mi an lo ṭhahnem hle a, ka zak ang reng hle a. Mahse, zak anga lan chu ka tum bik lova. Inneih inkhawm banah chuan thlalak lâi chuan a sîr aṭangin kan lo thlir ve reng a.

           Ka pheikhawk bun a sân deuh avang chuan ka ke kham lutuk chu a piaha ṭhutna awmah chuan ṭhut tumjn ka pan phei a, Vâla chuan ka hnungah min rawn zui vat a.

           Kan piaha rawn kal pheite chuan ka mit an la zar mai. A hmeichhe kalpui chu a nalhin a hmelṭha hle a, u Malsawma bânah a vuan a, an nalh dunin an inhmeh tak zet a, mahse, chu chuan keimahah na a siam tlat si a ni.

          Ka thil hmuhin min ṭhawn êm avang chuan ka pheikhawk bunin a lo zir lo bawk nen ka ke chu chhep sualin ka pai nawk a, ka tlu mai dawn emaw ka tihlai chuan Vâla chuan min rawn dawm vat a. Chuta ka singchhuak lehin u Malsawma hmel ka va en leh kher chu ka en rual rualin ka inchhir nghal vawng vawng a.

          A mitmengah chuan min nuihzatna, min thamlohna ka hmu a, hmeichhe leplerh melhin min melh a ni ber zawk!


VANMALSAWMA

Chapter  26




          Ka hmêlah chuan ka dik lo tih hria-in Vâla chuan haw a rawt ta vat a, a ṭhiante hnena kan haw tur thu a hrilh hnu chuan kan kal ta nghal a.

          Motora ka luh hnu chuan min en rengtu awm tlata ka hriat avangin ka hawichhuak a, biak in stepah chuan a kekawr ipte zen chunga dingin u Malsawma chuan min lo en reng a. Ka ngaihtuahna thlenga hmu tlang thei hial ni awma mawiin min en chiang hle a, kan tlanliam hma chuan a ner sawk chu ka hmu thei a.

          Eng emaw chen ngawi renga kan tlan hnu chuan Vála chu a rawn ṭawngchhuak ta sup a.

          "Kha kha a ni em?"

          "Maw....?"

          "Kha kha em ni min hnar zelna chhan? Amah kha a ni tiraw i theihnghilh theih miah loh chu?"

          A thil min zawh chuan min ṭhawn em avang chuan chhan mai nachâng pawh ka hre lova, ngâwi rengin ka lo melh let ringawt a.

          "A pawi lo, sawi kher a ngâi lo. I mitmengah leh i awmdanah khân ka hrethiam vek alawm. Chuan, ka thinrim miah lo a nia aw, mahse, ka thik!" nui hawk hawk chung chuan a rawn ti leh a.

          "Ka tân engmah a ni tawh lo," ka lo ti zawi sap a.

          "I mitmeng khan i thusawi chu a thlâwp ve lem lo a ang khawp mai! Amah i hmuh chiah khân i danglam nghal vek a, kha kha he ka mit thil man chak ve ang reng tak hian a lo hmu hman khanglâng alawm le!"

          Ka lo chhan zui loh avang chuan sawi zui ka duh lo tih hrethiamin thildang sawiin a ti ti zui bawrh bawrh a. Min ngaihsakin a bula awm pawh a nuam a, rilru ṭha leh tlûang tak a nih bakah mi hriatthiamna a ngah êm êm bawk a. Ngaizâwng ila chuan min tina tur chi a ni lo tih ka hria a, mahse, ngaihzâwng tur angin ka rilru ka pe thei  ngang si lo a ni.

          Kan inluah kan thlen chuan ka inthlak nghal a, ka inthlak zawh chuan thingpui lumin kan indun a. Thil ho deuh deuh leh nuihzatthlak deuh deuh sawiin a ti ti luam a, ka nui nasa hle a, inneihnaa ka thil tawn pawh ka theihnghilh titih hial a!

          A haw hnu chuan a haw dâwna a thil sawi chuan ka rilru a luah reng a.

          "Ani pawh khan a theihnghilh bik lo che, a mitmengah khân thikna ka hmu thei a ni," thutak deuhin a ti a nih kha.

           Zovi leh Teruata te nupa chuan hmalam pana kal tura min turin Vâla chu duh mai turin min nawr reng ṭhin a, kei pawhin beisei loh tur beisei niawm taka hetia mal taka awm reng hi titawpa  hmalam pana ke pen ve chu ka duh êm êm rûalin chhûngrilah min dáltu a awm leh tlat ṭhin a ni.

          Vawiina min rawn melhdan kha ka mitthla nawn leh pawhin min ngaihnepna bak ka hmuh loh avangin Vâla chuan a rindan a sawi ve satliah maiah ka ngai ta ringawt a.

          Zanah chuan Ngaihawma chu mi thil chah semin a chhuak a, tihtur pawimawh a neih avangin Vâla a lo kal lo bawk a, keimahin ka awm a. Kawngka kik ri ka hriat chuan kan inchung tlangvâl hi a lo lenluh ve zeuh ṭhin avangin amah a nih ringin lut tura ka hrilh hnu chuan ngaihven zui lem lovin ka phone chu ka bih leh nghal a.

          "Vawiina i kalpui kha em ni i biak?"

          Ka phu zawk a, ka hawichhuak nghal vat a. A hmêl pa leh rum tak mai chu ka hmu chawpchilh nghal a, ka piahah chuan a lo ding run a, ka tum loh leh beisei loh lutuka ka hmuh thut avang chuan ka hamhaih a, ka lungphu ri dup dup chu a dinna hmun aṭang chuan a hre pha hialin ka ring a ni!

          "Eng .... eng nge i duh?" ka ti bah nawk a.

          "Inlêngte lawmna ṭawngkam atân chuan a va mak ve!"

          "Ṭhu la," min biakdan rul tawk chuan ka ṭawng ve hmak a.

           Sawi tur ka hre lova, a ṭawng hun nghak chuan ka ngawi reng a, a ṭawng hmâ chu engmah sawi ka tum bik hauh lo a ni.

           "Vawiina mi kha em ni min biak duh loh phahna chu?" A rawn tichhuak sup a, a sawi ring hauh lo na'ngin a thil sawi chu ka hrechiang khawp mai.

          "En teh, i rinthu mai mai sawi tura lo kal i nih chuan pawi ka ti khawp mai, sawi ve tur ka nei lo," ka lo ti hmak a.

          "Ka rinthu ni lovin ka mit ngeiin ka hmu kha chu a nia," za miah lova nui lui hak pah chuan a ti leh a.

          "Kan thil hmuh zawng zawng hi a landan ang hi a ni vek lo."

          "I sawi dik chiah! Kan thil hmuh hi a landan ang hi a ni vek lo reng a ni."

          A ṭawngdanah chuan eng emaw a sawina a nih duh hmel hle a, eng thil nge a sawi chhan tih erawh ka bangbo hle thung a ni.

          "Eng nge i sawi awmzia chu?" ka tih chuan a lo ner nawk a.

          "I thil hmuh zawng zawng hi i hmuhdana i ngaihdan siam ngawt lovin a nihdan dik tak hriatchhuah tum la, chu chu a finthlak hle a ni tih ka sawi a nih chu!" a aw chu a chang ṭha bêng bâwng hle a, min rawn dem hle ni mai awmin a ṭawng bawk a.

          "Chutianga ka thil hmuh ringawta ngaihdan ka siam fel tak pawh ka lo hre hleinem," ka lo ti awlsam then a.

          "I hre lo tak zet nge i hre duh lo zawk?"

          "Hre duh lo ni lovin ka hre lo tak tak a ni e."

          "A nih leh engvangin nge min biak duh loh thut nachhan kha min hrilh rawh. Thil awmzia sawifiah pawh tum miah lova min kalsan chhan kha hriat ka phû ve chuan ka inhria!"

          "I phû nia i lo inhria chu a va mak zawk ve! Ka chunga i thiltih ngaihtuah kha chuan min zawt ngam tur pawh i niin ka hre lo zawk hial asin!" ka aw chu a ring sawt hle a.

          Ka inrin hma-in ka bânah rawn dawmin hnai set sawtah min en a, "Ka zawt ngam che a, ka zawt che a nih chu. A chhan chu khami nia i thil hmuh kha i rindan ang kha a ni lo tih ka hrechiang a ni!"

          "Eng nge kha mi nî-a ka thil hmuh chu?" ka lo ti hlar a.

          "Bazârah Rosie-i nena kan kaldun min hmuh vang a ni lawm ni khatiang khan i awm? A ngaihna hre lova min siam kha i tisual tak zet a ni!" a sawi lâi chuan a hmel chu na tak tuar ang mai ni hian a lang a.

          "Keimah chauh min dem thei bik lovang. A chhan chu eng nge thil awmzia tih hre tur khan i rawn kal lova,  engvanga khatia awm kha nge ka nih hre turin min rawn be hek lo!" a hunlâia mu leh mal nei lo khawpa ka natna kha hrechhuak lehin ka lung chu a chhe thar hle a.

          "Khatih lâi khan ka biak theihin i awm lova, i phone i off tlat a. I nau phone aṭanga biak che ka tumin min be duh lova, ka message pakhatmah i chhâng duh hek lo. Ka tân khan a tlawmthlak tak zet asin!"

         "Insawifiahna tur i neih ka hre hauh lo! Min chhuahpui hman si lo khan midang chu i chhuahpui hman reng a, ka ngaihdan kha a dik ngei tih ka hriatna chu kha mi nî chang lo pawh khan ka hmudun leh che u a ni. Ka tân chuan lo inthiar fihlim mai kha a ṭha ber tlat a ni."

          "I ngaihdan ringawt kha kal tlangpui lo la chu tun hi kan thleng lo tur a nia! Engkim i tikhawlo zo vek a ni."

          Keima dik loha a puh fai vek avang chuan ka sa phat a, anina duh duh a lenkualpui vel kha ka lo thlirliam mai mai tura a ngai a nih chuan a tisual hle a ni.

          "Ka thil hmuh leh hriatin ngaihdan min pek angin ka awm mai a ni. Chuan, i duh i sawi zawh tawh chuan khawngaihin min chhuahsan tawh ta che, ka chau deuh a, mut ka duh tlat!" ka ṭawngdan chu a ngeiawm tih pawh ka hria, mahse, min zuam lutuk leh ka thiamloha a puh fai vek vang chuan ka thin a rim tlat a ni.

          "A ṭha e, ka kal ang. I bialpa kha a lo kal dawn a nih ka ring e, chhuak vat tura min duhdanah hian. Mahse, ka lo kal leh fo dawn tih ka hrilhlawk ang che."

          A tho vut a, rawn hawilet tawh eih lo chuan a chhuak ta nghal a, ka âwm chu dawmin thaw chu ka la halh a, ka tha khur nasa lutuk chu ka inhumruh ngat ngat bawk a.

          Amah ka hnaih apîanga ka na thar leh ṭhin hi ka duh lo hle a, chu ái maha ka huat chu keimaha huhâng a neih a la danglam miah lo hi a ni.

          A sawi ang tak taka a rawn kal fo a nih chuan keimah hi ka inthunun thei lovang tih ka hlau a, amah ka ngaihna leh min tawh hleka keimaha danglamna a thlen ṭhin chu a la ngai reng si a!

          Kan result chhuah hma kârkhat la awmah chuan Vâla nen kan chhuak dun a, mamawh eng eng emaw ka lamkhawm chu min khaipuiin kan bâwr dun hle a, ka nu lo phei a tum avangin ka inbazâr duhthawh ve deuh a ni.

          Vâla motor hunna kan pan lâi chuan kan piaha ṭawng ri ka hriat chuan ka lungphû chu a rang nghal a, u Malsawma hmeichhe kalpui nui ri ka hriat phei chuan keimaha thikna nasa tak awm ṭhin ngei kha rawn chhuak lehin ka thaw chu a sa phat phatin ka hria a.

          Ka thakhur nasa lutuk chu ka tlu mai dawnin ka hria a, Vâla bânah chuan ka thil khai lohna lam chuan ka vuan ta ringawt a. Chutia ka vuan ta mai chu Vâla chuan mak tih hmel zetin min rawn en a, ka melhna lam chu en vatin thil awmdan chu hrethiam takin ka vawndan ang ang chuan a awm ve ta a.

          Motora ka lut turin ka va melh leh lai tak chuan u Malsawma rawn hawiphei nen chuan kan mit a intawng ta siah a! A mitmengah chuan eng nge a rilru-ah awm ang tih chu hriat theih pawh a ni lova, ka mitmengah eng nge a hmuh ve ang tih phei chu ka hre lo lehzual a ni.

          Vâla chu ka zah hle a, min hrethiamin engkimah min ṭawiawm ṭha a,  u Malsawma nena kan inkâra thil thleng zawng zawng pawh min hriatpuiin min hnemtu ber a ni a, a bula ka inbunruah apiangin dawhthei takin min ngaithla ṭhin a ni.

          Ka rilru-a amah ka ngaihdan chiang taka ka hrilh hnu chuan ṭhian angin min kawm zui bawrh bawrh tho a, engmah vui leh vaiah la lovin ka tan a ṭangkâi em em reng a, a lakah bat ka ngah tak zet a ni.

          Tlaia eirawng ka bâwl lâi chuan ka phone chu a rawn ri a, ka nu lo thlen a hun tawh avangin amah anih ringin en lem lo chuan ka lo chhâng vat a, lehlama mi aw ka hre chiah chu ka khawng awt a.

           "Khawlâiah pawh zak miahlovin i bialpa chu i kâi ngam ta chu a nia, in inpawh ṭha tawh awm hle mai!" Min deusawhna aw ri chu ka hai lo chîang kher mai!

          "Khawngaihin engmah hrechîang si lova sawi mai mai hi sim teh!"

          "Ka mit ngeia ka hmuh kha chu a chîang khawp asin!" A aw chu a thawp sat a.

          "Nangmah ngei pawhin i sawi kha, kan hmuh ang hi a landan ang ngawta ngaihdan siam loh tur a ni lawm ni kha(h)?" ka lo ti let ve sak a.

          "Ka hriat sual ka ring chiah lo. A chhan chu, in in kawtah a motor a inhûng ngun êm mai!"

          "Min deusawh mai mai tura lo call hi bansan la ka ti khawp mai."

          "Ka deusawh che ka hre hauh lo mai!"

         Kawngkhar chu a rawn ri rak a, ka hawiphei chuan ka nu lo lut chu ka va hmu a, u Malsawma chu ka buai tih hrilhin phone chu ka off ta nghal a.

          Zanah chuan ka nu chu a chauh deuh avangin chaw eikham hnu chuan a mu nghal deuh mai a, ka nau chu a hna ngai thawkin a chhuak leh bawk a, Vâla leh a ṭhianpa an lo lêng a, kan ti ti tui phian a.

          Ka phone a rawn rika ka en chuan u Malsawma a lo ni a, min rawn deusawh leh mai mai dawna ka hriat avangin ka la duh lova, a rawn tihnawn leh hnu pawh chuan ka la duh chuang lova. Vâla'n a mitmeia chhãng tura min tih pawh chuan ka haider hmak a.

          A rawn rik leh chuan u Rintei a lo ni thung a, zanin chu eng nge maw an hriat ni ti rilru chung chuan ka chhâng ta a.

          "Hello .... "

          "Mapui, khawngaihin damdawiinah i lo kal thei ang em? Bawihtei hi ...."

          "Bawihtei chu engtin?" Ka au a ni ber a, hlauhthawnna nasa lutuk chuan min rawn fan nghal bawk a.

          "Zantir lamah khân a u Tlani nen an infîam a, inchung aṭanga a tlanthla tur stepah a lum palh a!"

          "A na viau em? Tunah engtin nge a awm?"

         "A la harh chiang lo deuh a, i hming a lam reng si a, inthlahrung tak chungin ka rawn phone ringawt che a nih hi."

          "Ka lo kal nghal ang."

          Thil awmdan ka han sawi chuan Vâla chuan min hruai a tum a, a ṭhianpa pawh chuan min rawn zui ve chu a tum bawk a. Ka nu chu kaithovin thil awmdan chu ka hrilh mawlh mawlh a, ka insiam sawk sawk a, kan kal ta nghal a.

         A awmna damdawiin kan thlen chuan u Rintei chu bia-in an awmna ka zawt a, an awmna cabin number min hrilh hnu chuan kan zawng nghal a, kan hmu thuai a.

          Khumah chuan a lo mu bâm a, a lû chu an tuam lûk a, a taksa erawh chu puan an sintîr avangin a hmuh theih lova. Ka thinphu chu a su dup dup a, ka lainat lutuk chu ka mittui ka dang zo ngang lova, a bulah chuan ṭhû-in a bîangah chuan dimtê-in ka chûl a.

          U Malsawma chu a mutna khum bulah ṭhu-in a mitah chuan manganna ka hmu theiin ka inhria a, a awmdan tur chu ka hriatthiampui a, kan inkár boruak chu dahṭha-in ka khawngaih hle a.

          U Rintei chuan a dinhmun chu sawiin a lû chu a sawhnat deuh thu leh a bân veilam ruh a sawh pelh tih chu min hrilh a, a taksa dang chu a hliam na lem lova, a lû chu a ngaihtuahawm lâi ber a ni a.

          A rawn tal deuh a, a hmui chu rawn phun sepin a pa chu a rawn ko a, a pa chuan lo chhawn vatin a lo ko let vat a, mumala chhâng lovin thil a sawi niah niah a. A pa-in a biakna chu hre awm pawhin a awm lova, ka hlauthawngin ka rilru chu a rum tak meuh meuh a ni.

          Ka hming a rawn lam chuan rang lutukin amah hnaih thei ang ber chuan ka ṭhu awn nghal a, a hminga kovin ka be mawlh mawlh a.

          Ka aw chu hria niawm takin ka ṭawng chhûng chuan engmah sawi lovin a ngawi vang vang a, a mit chu men tum ang deuhin a rawn tiche bawk a, beisei taka ka lo thlir reng lái chuan muhil angin a awm leh ta daih a.

          U Rintei chu ka en vat a, ani chuan a hma aia hma a sawn tawh thu leh a harh har tawh lova a rin thu a lo sawi vat a. A hmêl dâng bel mai chu ka thlîr vawng vawng a, ṭahchhuah mai hi ka nâp a.

          A dinhmun enin ka hawsan thei dawn lo tih ka hrechiang a, chuvangin, Vâla te ṭhiandun chu min lo va hawsan mai turin ka ti a, an haw tur ka thlah zo room chhûnga ka luh leh chuan Bawihtei bulah bawk ka ṭhu leh nghal chat a.

          U Rintei bakah a pa a awm bawk a, a nu erawh chu a hriselna a ṭhat vak loh avangin rei vak lo  a awm hnu-ah an tir haw leh daih a lo ni a, an driver erawh chu ṭul thut a awm takin tih thu-ah a rawn let leh a, pawnlamah a awm thung a.

          Bawihtei biang chu ka chûl ka chûl a, zawitê tê-in ka be sep sep reng a, muhil angin awm mah se hriat hun anei ngeiin ka ring tlat a, ka be lui char char a. Ka mittui lo tla chu hru leh zauhin khum tlângah chuan ka kut lehlam chu ka nghat a.

          U Malsawma chuan khuma ka kut dah chu rawn humin, "Ka lawm e aw!" a rawn ti sup a.


VANMALSAWMA

Chapter 27




          Zanlâi pelh hretah Bawihtei chu a rawn harh deuh a, tui a rawn lam a, tlem a in a, a muhil leh ta nghal char char a. U Rintei chuan a zia tawh thu leh zînglamah chuan nikhua pawh pângngai taka a rawn hriat a rin tawh thu a sawi a, ka lo thaw huai a.

          U Rintei leh a pa chu an mu a, kei pawh chu mu ve turin min ti a. Mahse, ka muthilh theih ka rin loh avangin ka hnial a, u Malsawma nen chuan Bawihtei chu kan ṭhutpui ran a. An driver pawh cabin pâwna ṭhutthlengah a mu hnâr bawrh bawrh tawh a, ka mut a chhuah loh bakah kan muthilh hlana Bawihtei lo harh palh ka hlauh avang chuan ka mutsan duh lo a ni.

          A tuk zîngah chuan u Rintei sawi ang chuan a rawn harh ṭha-in a mitmeng pawh zan lam ai chuan a fiahṭha hle tawh a, biak pawhin mûmal takin min chhâng thei tawh a, kan lawm tlâng hle a ni.

          Chhun lamah chuan a zia chhoh tak zel avangin intihfai paha inthlak turin ina haw ka tum a, Bawihtei'n ka awmpui a duh tlat avangin zan lama riahpui turin ka kal leh dawn a ni.

           U Malsawma pawh ina haw lawk a tum avang chuan min thlah kawi a tum a, a remchan bakah tun hi inhnialna hun a ni lo tih hria-in a rual chuan ka haw ve mai a.

            Kan inluah kan thlen chuan lênglut turin ka sâwm lo na'ngin min zui lut a, ka nu chu Bawihtei tlawh tura kal tumin a lo insiam mêk a, a insiam zawh chuan ka nau nen chuan an chhuakdun ta nghal a.

          U Malsawma chu thingpui ka lumsak a, a inlâi chuan ka inbualsan ta daih a. Ka inbual zawha bathroom aṭanga ka chhuah leh chuan ṭhutthlengah a lo muhil bawrh bawrh a, nizan khan chhin khat pawh chhîng lovin kan meng tlang dun kha a ni a, a chau ve hle-in ka ring a, ka kaitho duh ta bik lova.

          Ka bîanga chûltu kut chu vuanin ka hmai si chuan ka vuanbet vang vang a, he kutin min tawh apîanga ka taksa pêng tinin a lo dawnsawndan chu a la ngai reng a, ka thlakhlelhna a la kiam hauh lo a ni. A kut chu tiche lehin ka vawn reng chung chuan ka bîangah chûl thla-in ka hmuiah a tawp chat a, a kutzungṭanga ka hmui a nul zai zai hnu chuan a hmui chuan ka hmui chu a rawn bawhthuah a.

          Ka lo chhânglet nghal a, he hmui hi engtikah mah ka kham thei ngai dáwn lo a nih hi! A nghâwngah chuan kuahin ka kutzungṭang chu a sam kárah chuan ka zenlut a, a aia uar zawkin ka lo fawp let a.

          Chutia uar tak maia ka lo fawhlet takah chuan rum hawkin ani pawh chuan duhthawh lutukin min rawn fawh chhunzawm nghal a, a rum ri ka hriat rual chuan ka tawp chawt thung a, ka mengchhuak nghal kawk a.

          Ka awmdanah chuan ani pawhin a thiltihlâi chu titawpin a lû chu a tikang deuh a, hnai set sawtah chuan kan inmelh ta reng a.

           Inngaihtuah harh thutin a âwmah chuan ka nem a, a inbengkan rual chuan ka tho ve nghal vat a. Engvanga khatianga awm thei nge maw ka nih le! A duh hun huna a kawihher theih ang maiin alawm ka lo dawnsawn le! Keimah leh keimah chu ka inhaw hlur mai a ni.

           Engtik lâiin nge ka lo muthilh ka hre lova, ṭhutthlenga ka bawkzâl kha ka lo muhil ve daih a lo ni a. Khatianga ka awm ta mai pawh kha ka harhchian loh vangah puhin ka'n inthiam chawp leh rih a.

           "Ka tihpalh! Khatianga awm tur kha ka ni miah lo asin!" A aw-a inchhirna ni-awm tak ri chuan min tilawm chuang miah si lo!
           
           "Tihpalh a nih ang ngeiin a thlen nawn leh tawh loh ka beisei." Ka lo ti hmak a.

          "I bialpa khan a lo hre palh ang tih ka hlau deuh a, a hria a nih hlauh chuan a thin a rim dawn si a," a hmaa inthiamlo hmel deuha a ṭawng nen chuan a inpersan ta hle a, min deusawh hluah hluah ni maiin ka lo hria a.

           "A pawi khawp mai, chutianga hlauthawng turin bialpa ka nei lo tlat!" ka aw chu a nêm fahran lo khawp mai.

            "Engtik lâi pawhin in inzui a ni lawm ni? Nizanah pawh damdawiin thleng thlengin a rawn zui che kha!" a insehruh ṭeuh chu ka hmu thei a.

           "Khatiang khan a nilo zâwngin puh rêng rêng suh! Tlawmngâiin min rawn kalpui a nih kha," ka thinrim lutuk chu ka khur dar dar hial a.

           "I bialpa a nih si loh chuan engvanga inzui reng nge in nih? Engvangin nge in inah a lo len renga engtiklâi mai pawha i bul hnaiah hian hmuh tur a awm reng ni?"

          "Chu chu i bulah hian ka sawifiah kher a ngaiin ka hre hauh lo mai! I awmdanah leh i hmeichhe kawp chungchângah hian zawhna ka zawh awm rêng rêng che ka la hre lo tlat!"

          "Min zawt lo kha i tisual rêng alawm! Engvangin nge engmah min zawtfiah hmasa lova khatianga min be duh lo ngawt nge i nih? Mipa dang i duhte a nih ngawt loh chuan chhan dang a awm ka hre lo a ni."

          "Ka bulah tihtur pawimawh nei angin i insawi a, min chhuahpui hman loh lâiin ani kha chu i chhuahpui hman a, a landanah kha chuan thil pawimawh ti in nih a rinawm viau loh bawk," ka lo ti let sak sak a.

          "Ka sawifiah thei reng asin! Mahse, ka insawifiahna pawh ngaihthlak i tum miah lova!" A mitmengah chuan min dem takzet tih a lang reng a.

          "Khawngaihin, thil kal tawh chu sawi lo teh ang, engmah awmzia a awm tawh chuang lo."

          "Ni lo, i tidik lo a ni. Kha mi nîa ka thiltih kha hria la ka chungah hian i thinrim hauh lovang. Bawihtei ..... "

          A phone a rawn rik takah chuan a thusawi lai chu sawi zo lovin a phone chu a la chhuak a, a be nghal mawlh mawlh a.

          An inbiak zawh chuan min rawn en vang vang a, "Bawihtei'n min lam reng tawh a, ka kal nghal a ngai tlat! Ka thil sawi lâi kha ka la sawi zo lo tih i hriat kha," tih pah chuan a kal ta nghal a.

           Rawng chu ka bâwl sawk sawk a, ka nu leh Ngaihawma an lo haw chuan ka lo inbâwl peih chiah a, an intihfai zawh chuan kan ei ta nghal a. Chaw eikham chuan insiam nghalin ka inpeih hnu chuan ka nau nen chuan kan inphurchhuak ta a.

           Damdawiin kan va thlen chuan ka rin ai daihin Bawihtei chu a lo harh ṭha tawh a, min hmuh veleh chuan min lo au nghal a, a bulah chuan ka ṭhu vat a. Ka nau chu rei awm lovin a let leh nghal thung a.

          U Malsawma ka hmuh loh avang chuan inah a haw a nih ka lo ring ve ngawt a, Bawihtei nena kan ti ti melh melh lâi chuan bathroom kawngkhar chu a rawn ri rak a, u Malsawma chu towel vengin a rawn chhuak a. A taksa lian leh nalh tak chu a langchiang hle a, ka mit chu ka lasawn rang khawp mai.

        A inthlak zawh chuan ka ṭhutna bulah chuan min si chétin a rawn ṭhu a, ka lo tawlhsawn deuh chu a nuih a zat hmel hle a, chu chu ka run tawk a lo tling veleh ngawt pek a!

          U Rintei duty zo chu a rawn lut a, Bawihtei a zia tak deuh tawh avang chuan u Malsawma nen chauh kan riahpui dawn a, u Rintei leh a pa chu chuan haw an tum a, in lamah a nu a lo nuamlo ve reng bawk nen an ngaihtuah deuh a, chanchin inhrilh zel tura inchahin zan dâr 9:00 vel chuan min hawsan ta a.

          Bawihtei hnung chu tuilumin ka hruksak a, a thawmhnawte ka thlak felsak hnu chuan a muhil ta siai siai a. Bawihtei muthilh hnu chuan u Malsawma chu mu ve turin ka ti a, a lo nui mai a.

          "Tlaia ka thil sawi zawh loh kha tunah hian sawi zawm leh ka duh a ni," a rawn tichhuak sup a.

           "Sawi la," ka lo ti sap a, dik tak chuan a awmdanah leh a thil sawidan hmangah chuan a insawifiahna chu tlai aṭang khan ngaihthlak duhna rilru ka lo nei daih tawh a. Mahse, aman a sawichhuak hmasa a nih loh chuan sawi hmasa tua ṭan kha ka tum lo bur a, aman a rawn sawichhuak ta hlauh chu ka lo thaw huai a.

          "Ka bulah hian rawn tawlh hnai phawt la."

          "Heta ṭang pawh hian i ṭawng kha ka hre phak vek tho alawm," ka lo ti ve thung a.

          "Ka bula i rawn ṭhut hma chu engmah ka sawi lovang!"

          "Sawi turin ka tilui hleinem che. Nangmah zawkin insawifiah i duh avangin i rawn sawi a nih kha! Kei chuan sawi lo mah la pawi ka ti lo." A sawi lo tak tak ang tih hlau ru deuh chung chuan ka lo ti a.

          Ka inrin hman hma chuan ka bânah pawtin amah si rawk khawpin min pawtphei a, "Engtikah nge i luhlul lutuk hi a reh dawn? Tun ṭum chu ka enliam mai mai tawh dawn lo che," a tih chuan ka lo thaw halh a.

          "Ka luhlul viau pawh ka hre hleinem," ka lo ti ve thung a, thlahlel êm êm chung siin min kuahbehna chu phelh ka tum fan a.

          "Kha mi nî khan Puia nen kanp chhuak dun a, a hma aṭanga lo tumlawk tawh kan nih avangin nangma min sawmna pawh ka pha ta rêng a nih kha. Ka thesis ziah mêk atâna ka mamawh leh kal duhna hmunah te kan kal kual a,  khatihlâi khân thesis ka buaipui mêk tih i la hriain ka ring a!"  a tih chuan ka lû chu ka lo bu nghauh a. A thesis ziah chu ka chhîar ve lem lo na'ngin social media lamah te an fak nasa a, doctorate degree pawh pek niin a hlawhtlinpui hle a ni.

          "Puia khan bazârah a nû dawr ami thil lamkawi tur a neih avangin kan kal kawi a, Rosie-i bazár nen kan inhmu a, kan rualin reilote a kal ve a, khami reilote kan kalho chhûng kha min lo hmu a, kan hnung lawka Puia rawn kal ve kha i hmu tel lo thung."

          "Inhmu chawpa kalho in ang lo. I bânah a vuan a, in hlimdun hmel hle bawk!" Kha mi ṭuma ka rilru natzia kha hrechhuak lehin ka ṭah chu a chhuak ru hle a.

          "I ngaihdan kaltlangpui ringawt lo khan min zawtfiah hmasa la chu khati hrep khan kan awm lo tur a nia!"

          "Mahse, i ...... "

         "Mahse a awm lo, a chhan chu nang chiah hi ka thinlung luahtu i ni. Khang hun chhûng zawng khan nikhat pawh nangmah ngaihtuah lo che-in ka awm ngai lo. Biak theihin i awm duh bawk si lova, min hrem nasa lutuk!"

          Ka kutah chuan a rawn hum vang vang a, sawi ve tur ka hre lo ti ila ka nei lo a ni mah zawk. Khang hun hrehawm tak kha keima siam a ni a, ka luhlulna avangin kei ngei pawhin ka tuar nasa êm êm a nih kha. Engkimah khan ka thiam lo tih chu ka pawm thlap a, ka inthiamlohna chuan sawi tur min tihaihchham a ni ber e.

          Ka khabe-ah dawmin min kuai dak a, min rawn fawp nghal tawn tawn a, ka lo chhânglet ve chiah tih chuan a tawp ta daih a, a ngaihna hre lo leh zak deuh tak chuan ka en hâ a.

          "Kha pa, Vâla i tih nen khan in inngaizâwng lo tak zet maw?"

          Ka nuichhuak hawk a, ka lû chu ka thing mât mât a.

          "Dawt min hrilh lovang tih ka ring e. Ka thikzia kha hria se chu min nuihzat dawn lutuk!" za lo tih hriat zet hian a khi suk a.

          Ka lû-ah chuan rawn dawmin min fawp leh nghal zat a, ka lo chhânglet ṭha khawp mai. Kha hun kalta chhûng zawng khan ka ngaiin ka thlahlel êm êm reng kha a ni a, a takah ka tawng leh ang tih pawh ka rinphak tawh loh kha a nih avangin kan awmdan chu ka mumang a nihte ka hlau rum rum a ni.

          Kawngka kik ri-ah chuan kan inṭhen phawk a, kan in-en ren rawn a, kan nuidun sak a.

          Nurse-in Bawihtei a chiu zawh chuan a chhuak leh nghal mai a, a chhuah rûal rûal chuan min rawn kuah leh nghal a.

          "I tel lova ka hun hman tawh zawng zawng kha i rulh a ngâi ang, tun aṭang chuan a tam thei ang ber ka bula i awm a ngâi tawh ang."

          "Min ning leh si ang e!" ka lo ti a.

          "Engtik lâi mahin ka ning ngai lovang che. Ka hmangaih che alawm! Chu chu i hre lo em ni?" ka thinphu chu a rang sauh a, ka hresual lo turah ka ngai hmiah bawk.

          "Min hrilh si lova, hriat ngaihna a awm hleinem," ka tih chuan chuan min kuai dakin chiang tawkin ka mitah chuan min en a.

          "Ka hmangaih che, Mapui. He thu hi tu hmeichhia mah ka la hrilh lo, a chham chu nang chiah hi ka hmeichhe hmangaih awm chhun i la ni." A thusawi chu a titak kher mai!

          "U Rosie-i pawh kha i hmangaih lo a maw? I nupui a ni sia!" ka lo ti a.

          "Bawihtei a pai vang chauha nupui atâna nei ka ni a, ka nupui a nih tak avang khan ka hmangaih thei ngawt chuang hleinem."

          "A tân khan a hrehawm ve ṭhin ngawt ang!" ka lo ti sep a.

          "Ka tân pawh a nuam chuang lo. Ka theihtâwp kha chu ka chhuah ve ngei alawm. Mahse, a ngaihna a awm ta ngang lo a nih kha."

          "Hmangaih miah loh chu pasal atân ka duh teuh lo mai."

          "Ka nupui ni turin ka duh che a, min hmangaih loh chuan min nei duh dawn lo tihna a ni maw!" hlauthawng hmel hi a pu deuh a.

         "Ka hmangaih che alawm!" ka lo tih chuan ka khabe-ah a vuan a, chiang tawkin ka mitah chuan a en vang vang a.

          "Khawngaihin han sawi nawn leh teh!" a ti thawp sat a.

          "Ka hmangaih che!"

          Ka sawi zawh rual chuan duhthawh lutukin min rawn fawp nghal a, a lehpek a awm leh thei tawh lovang tihtur khawpa uarin kan infawp táwn táwn a, kan inthlah meuh chuan kan thaw dun hlawp hlawp a.

          Inngheng riala ṭhudunin kan ti ti sep sep a, ka ngaih ṭhinzia leh a tel lova ka nun a kim lohzia ka sawi lai chuan ka hnuk a ulh ṭeuh a. Ani pawh chuan khawiah pawh awmin eng pawh ti se min theihnghilh ngai loh thu chu min hrilh ve bawk a, kan inbunruak tawn a ni ber e.

          Bawihtei chu muthilh pângngaia mu a ni ta bawk a, kan mutsan ve ta a. Bawihtei mutna ni lo khum dang pakhat a awm a, thingrem lian pakhat a awm bawk a. Khumah chuan mutdun mai a rawt a, mahse, keimah zawk ka inrintawk loh avangin a hnial tlat a. Kei khumah mû-in ani chu thingrem sei chungah chuan a mu thung a.

          Kan rinâi takin Bawihtei chu a ṭha chak a, a lû an scan result pawh a ṭha a, amah pawh kan hlauhthawn ang ai daihin a harh váng a, damdawiina kâr khat leh a chanve a awm chuan a chhuak thei ta mai rêng a ni.

           Zankhat u Malsawma rawn lêng chu a zia a dang riauvin ka hria a, a ngawichawi zualin ka hria a, thil thleng a awm em tih ka zawhin engmah chutiang a awm loh thu-in min chhâng bawk si a, ka ngaih chu a ṭha lo ru hle a.

          Nghet tawka min kuahbetin ka kut chu a hum vang vang a. Ngaihawma chhuak a la rawn haw lova, ka nu Lunglei lamah a phei leh tawh bawk si  nen tûma mitmei ven tur awm lo ta chu kan inngheng rial reng a.

          "Kârlehah in result a chhuak tawh dawn a, pasal i nei thei tawh tihna," a rawn tichhuak sup a, ka lo nui ringawt a.

          "Kârleh kâr tirah palâi kal se ka duh a, a hma thei ang bera inneih fel vak ka duh," thutak zeta a rawn tih leh chuan ka lo nui ta bik lova.

          "Zir zo chiaha pasal han neih daih chu ka nu ngaihdan a ni lovang! Reilote tal ka awmpui ve phawt lohte chuan," ka lo ti thung a.

          "I nu nen kan sawidun vek tawh. Nangman i duhlo a nih loh chuan a rang lama inneih ka duh," a ti leh hmuk a.

       
  VANMALSAWMA

Chapter 28





          Kan result chhuah nî tur chu kâr hnih vela an sawn hlat tak dawrh avangin hunawl ka nei rei ta phian a, online-a ka sumdawnna pawh a hma zawng aia ka buaipui hman tak avangin ka hlawk phah hle a ni.

           Kan result chhuah nî tak chuan kan in luah neitute'n chhiat an tawk hlauh mai a, an fapa tlangvâl chu bike accident-ah a boral a ni. Kan tum loh lama kan phar buai tak viau avang chuan result lam pawh ka ngaihtuah hman lo a ni ber a.
         
          Vui zawh veleh inah ka chhukthla nghal a, ka inbual zo thawmhnaw ka haklâi chuan kawngkâ an rawn kik dat dat a, ka va hawn chuan Mârama, Bena leh Tête-i te an lo ni a.

          Rawn luh pah chuan min chibai a, ka result ka la hre si lova, chutia min chibai ta chu ka pass a nih ka lo ring ve ngawt a!

          "I tiṭha bik hle mai!" Mârama chuan a ti hlut a.

          "Han sawi chiang vat teh u!" ka lo ti chúl  a.

         "First-ah i pass a, keini ho hi second-ah kan pass thung a, i tiṭha bik khawp mai!" Tête-i chuan ka marksheet min pek pah chuan a lo ti var a.

          U Malsawma leh ka nu ka hrechhuak nghal a, kei aiin ka result chhuah hun an nghakhlel zawk a, ka nu phei chu a hlim ngawtin ka ring!

          Ka theihtawp chhuaha zir mah ni ila ka rinâi tak chuan tiṭha ka inti a. A chhan chu, theihtawp chhuah mah ni ila ka rilrua a luh theih miah loh ṭum kha a tam zawk a ni a. U Malsawma ka ngiahtuahna khan min chenchilh tlat a, ka ngaihtuahna aṭanga paihbo ka tum nasa a, ka theih tak ngang loh avang khan ka tum buai ta lo law law kha a nia, awmzia kha awm mawlh hek lo le!

          Thingpui kan in lâi chuan u Malsawma pawh a rawn thleng ve a, chawhmeh a rawn khai lut nûal a, makti hmel deuha ka en chuan a lo nui sak a.

          "Hetah zanriah ei vek tur aw! Mâram, Judithi te nufa va hrûai la, kan in lamah rawn kûal ula, Bawihtei in rawn hruai nghal dawn nia. Ka motor keng mai rawh," a motor chahbi pek pah chuan a ti zung zung a.

          Ka nu chu bia-in ka result chu ka va hrilh nghal a, ka rin ang ngeiin a lo lawm hle a, kan chaw eikhawm tur thute chu hrilhin kan inbiakna chu kan titawp ta a.

          Judithite nufa leh Bawihtei te rawn thlen hnu chuan kan ri ta chêl chûl a, inchung lawkah lusûn an awm bawk nen kan han inkhap leh rih ṭhin a.

          Kan in luah hi a neitute awmna buildingah ni lovin an awmna thlang chiahah a hrana an sak leh a ni a, chhawng lî niin kan luahlâi tih loh chu a  zâu ṭha hlawm hle a. Kan luah hi a hnuai ber a ni a, kawngpui án niin zau lutuk ni lo mah se a felfai a, a nuam ve tawk hle a ni.

          Zanriah eikham chuan Bena leh Tête-i chu tihtur pawimawh an neih avangin an haw thuai a, Judithite chu an la awm ve reng thung a. An fapa tê chu a ṭawng a fiah lo na'ngin a biak tlak viau tawh a, fiah lo taka a ṭawng chu kan nuih leh ṭhin a. Bawihtei lah chuan inti nâu nei takin a duat hle a, an inum kual reng bawk a.

          Ngaihawma chu khawhar inah a kal a, a rawn haw chuan riak turin a insiam leh nghal mawlh mawlh a, a insiam zawh chuan chho nghal mai lovin kan bulah chuan a ṭhu khawmûang ve a.

          Mârama te maute chu a mut a hun tawh avangin an hawpui ta a, Ngaihawma pawh khawhar in lama riak turin a chho ve nghal bawk a. Bawihtei chu ka bula riak tura ka sawm chuan a phur hle a, a pa a dil chuan a lo phal ve mai bawk a.

          Bawihtei muthilh hnu chuan inkuah chîalin kan ṭhudun a, inneih chungchângah bawk chuan a lut leh nghal a.

          "Ka nau hi awmpui a la ngai dawn si a, ka awm loh chuan a buaithlak vîau ang!" ka ti a.

          "Buaina tur a awm lo, ka ngaihtuah fel vek tawh," a lo ti hmuk a, lungawi vak lo hmel hi a pû a. "Min neih hi i hreh niin ka hria!" a rawn ti leh sup a.

          "Hreh love. Mahse, ka chhûngte hi ka ngaihtuah deuh a."

          "Kan inneih hunah pawh i chhûngte an la ni reng dawn a, hla taka kalsan mai tur niawm taka i ṭawng ziah hi a ṭul miah lo a nia."

          "Ka dinhmunah i......"

          "I dinhmun hi ka hre chiang a, chuvangin, i nu leh i nau pawh ka ngaihtuah loh ring hauh suh. I nu-in min rin ang hian min ring ve mai thei lo em ni?"

          "I hria alawm, ka ring che tih chu."

          "Min rin chuan engkim ka kutah nghat tawp rawh."

          U Malsawma chu ka ring lo ni lovin ka nu leh ka nau chauh an nih avangin pasal han neihsan daih chu ka zuam lo a ni ber zawk a, amah chu thlahlel viau mah ila ka nu  a khawhar rei ve tawh avangin eng emaw chen a kianga awmte pawh ka duh ve a ni.
         
          A haw dáwn chuan ka bula mut a chák tawh thu chu nui suk chungin a sawi a, min fawp pah zauh bawk a.

          "Ngaihawma a awm bawk si lova, ka lo riak ve mai ang chu?" a tih chuan ka lû chu ka lo thing mát mát a.

         "A nih chuan a rang thei ang berin inneih a ngâi a nih chu! Min hrem rei tawh mah mah. I nû hnenah a hmâ lamin palâi ka tîr vat ang a, ka taa siam vat tur che-in ka theihtawp ka chhuah dawn a ni."

          Eng emaw chânga naupang chhia deuha a khawsa ṭhin hian ka nuih a tiza deuh tlat zel a, tunah pawh hian a awmdan hi tleirawl nupui neih tum nen ka tehkhin ber a, ka nuih a tiza ru viau a ni.

          Ka nâuvin kârkhat chawlh a neih hlauh avangin kan pahnihin Lunglei lamah kan phei dun a, kan thlen zan chuan u Malsawma palâite an lo kal ve chiah a, thu inhmu sa an nih avangin an sawifel nghal titih der a, a nî leh thla erawh ruat nghal lovin vawikhat kal leh hmabakin palâite chu an haw ta a.

          Min ngaihsak êm êm lo mah se ka pa unâute chu ka nu chuan a hming tala rawn ve ṭha a ti a, kokhawmin ka inlêng neih chungchâng vel chu a sawipui hlawm a. Kan lo rinâi takin an dawngsawng ṭha-in an phur khawp mai a, a ṭul apîangah an tih theih a awm a nih phawt chuan an theih tâwp chhuah an inhuam thu an sawi a, ka nu tân pawh a thlamuanthlak hle a ni.

          U Malsawma ber a hmanhmawh miau mai si a, inneih hun tura an ruat pawh a hnai vat vat khawp mai. Theih ang angin kan inpuahchah nghal mawp mawp a, ka patea teho an rawn ṭang deuh bawk nen buai lutuk lovin kan inpeihfel hman ve ta hlauh a.

          Aizâwla innei tur kan nih avangin Lunglei lamah inthlahna hun kan nei phawt a, Zovi chu a nâu pai a la lan lem loh avangin ṭhianah ka hmang a, u Malsawma'n u Puia a hmang thung a.

          Aizâwl kan phei nî chuan ruah a sûr cherh cherh reng a. Sateek pelh, Âibawk khaw tawntirh kan thlen phei hma deuhin motor hi a lo ding ṭhup a, mi an lo awm nuai nuai bawk nen eng thil nge thleng tiin motor aṭang chuan an chhuak sap sap hlawm a.

         Motor accident a awm a lo ni a. Sateek kawng aṭangin Tlawng lam panna kawngah scorpio a tlanliam a lo ni a, a tlakna a san loh hlauh avangin a chûangte chu an hliam na lutuk lo hlauh niawm tak a ni.

          U Malsawma'n min koh avangin peih lo zetin motor aṭang chuan ka chhuk a, a bula ka va thlen phei chuan thlang deuha mi lo din bawr laihna lam chu min kawhmuh a. A hawina lam ka va en ve chuan ka thil hmuh chuan min barakhaih chiang hle a!

          U Rosie-i chu hmel pawr phangin hmai thi deuh nuauvin a lo ṭhu ngui bâr a, a bul lawkah chuan tlangvâl pakhat hi bân awrhin a lo awm ve bawk a, ani pawh chu a hmai a pilh nin nen a.

         Ka kuta u Malsawma'n a rawn vawn takah chuan nghet zetin ka lo humlet a, u Rosie-i te lo ṭhutna lamah chuan ka kalpui ta nghal a. An awmna bul kan thlen phei chuan ani pawh chuan min lo hmu ve nghalin mak tih hmel zet hian min lo en hau a.
   
          "I ṭha em? I taksa hmun dangah hliam i nei em?" tiin ka zawt nghal a.

          "Aa... aw... ka ṭha e. Ka ṭha lutuk!" a lo bah nak a.

          "In hawlam nge in kallam?"

          "Kan haw lam a nia," a aw-ah chuan hmana chapo deuh kha a ni ta lo emaw tih mai tur a ni a, a tlâwm aw dai mai a ni.

          "Kan rûalin in lo haw ve mai dawn em ni ang? In motor a khalh tlak tawh awm si lova!" ka tih chuan a ṭhianpa chu râwn pahin a va melh a, a ṭhianpa chu a lo bu nghut a.

          U Malsawma chu ka bulah inkuangkuah thanin a lo ding ngâwi reng a, kan ruala lo kal ve tura ka tihlâi khan a lo thaw hak a, min lo hnial ka hlauh avang chuan a kut chu ka hmersak salh a, engmah sawi ta êm lo chuan a ngawi zui ve leh mai a.

          Bawihtei chu a ni Rintei te bulah a chuang a, a nu hmel a han hmu thut chu a hmêlah hlauhthawnna a lo lang nghal a, midangin kan lo hnem vat a, a tân a hlauhawm tawh lo a ni tih kan hrilhfiah hnu chuan a pângngai leh ta chauh a.

          U Malsawma chuan a motora phurh chu a chák vak hmel loh hle a, ka haider lui hmak thung. Ka nu leh Zovi chu u Puia motorah insawnin u Rosie-i te pahnih chu kan bulah kan chuantîr ta thung a.

          Falkawn kan thlen chuan damdawiinah luhpuiin u Rosie-i te chu an lo buaipui nghal mawlh mawlh a, U Rintei te pawh rawn thleng ve nghalin a ṭhiannu a lo duty hlauh a, min lo ngaihsak zual sauh a.

           An hliam an enkawla an tuamsak zawh chuan kan tlan leh ta nghal a, thim rûalin Aizâwl chu kan lut phei a, u Rosie-i te ṭhiandun kan thlahkual zawh hnu chuan kan in luah lam panin kan tlan ta nghal a.

          Kan in luah a zau lutuk lo bawk nen kan han lutkhawm chu kan khat nghal der a. U Malsawma chuan ka patea te chu a pate in lama thleng turin a lo tifel hlauh zawk a, a ṭhen Mârama te in lamah nen kan insem sawm a, kan insiamrem thei ta hrâm a.

          Kan inneihna turah hian ka duhdan ang ngeiin a pate chenna hmunah ka lâwi lut dawn a, inneih inkhawm erawh chu u Malsawma lawina kohhranah a ni thung ang. Lawmna hmun atân pawh u Malsawma pate kawtzâwl chu an chei a, a zâu ṭha bawk a, a hmun chu duhthusam a ni mai e.

          An milianin hmelhriat an ngah bawk a, inneih inkhawmah pawh mi an ṭhahnem hle a. Ka lo beisei lawk âiin a ropui a, ka nu phei chu a hnuk a ulh hîal a, a mittui chu a hru zauh zauh reng a.

          Inneih thutiam kan chham lâi chuan kan titak dun hle a, kan thinlung chhûngril aṭangin, kan rilru zawng zawngin kan chham dun niin a lang.

           Thlalakna kan neih zawh chuan lawi nghal tur a nih avangin u Malsawma pate in lamah kan tlang nghal a, a lawmna hmun tura kawtzâwl an chei pawh a nalh narawh e!

           Inlam hunserh a zawh chuan Zovi nrn inthlak turin room lamah kan chho a, kan lo inthlak mawlh mawlh lâi chuan u Malsawma chu a rawn lut ve a, min en vung vung a.

           "Eng nge maw dik lo a awm em ni?" ka lo ti hâ a.

           "Zan ka nghakhlel a, ka ta tak tak i nih hun tur ka nghakhlel," thutak zet hian a rawn ti a, Zovi a awm ve reng avang chuan ka lo ip deuh a.

           "Awi.... zan chu a ni ṭep tawh alawm! Lo insûm hrâm hrâm rih teh, midangin an hre hlauh ang e!" nui awr awr chungin Zovi chuan a lo ti a, ka zak chu ka lo sen ṭâwn ṭâwn thung a.

          Min rawn kuahin ka bîangah chuan a fawp zauh a, Zovi awm ve chu engah mah zu ngai lova!

           A chhuah dawn chuan Zovi hnenah chuan, "I ṭhiannu kha zan lamah chuan zakzum lutuk lo turin ka duh a nia, lo hrilh ang che," nui suk chungin a ti a, a chhuak ta nghal daih a, Zovi chuan a nuih zui ṭiah ṭiah a.

          A lawmna program neihlaï chuan mi an ṭhahnem deuh bawk a, ka zo lo deuh nge ni ka lû chu a na bûr a, ka hmêlah a lo langchhuak ni tur a ni u Malsawma chuan thil diklo a awm leh awm loh min zawt vat a, ka lu nat deuh thu ka sawi chuan damdawi a laktîr nghal a, an rawn lak veleh chuan min eitîr nghalin a hnu deuhah chuan a ziaawm chho ve zui mai bawk a.

           Bawihtei chu a hlim hle a, a hlim hmêl hmuh chu nuam ka ti hle a. A pa nen kan innei dawn tih a hriat aṭang tawh khân a phur êm êm reuh a, kei pawhin ka nghahhlelh phah sawt a nih kha. A pa ka hmangaih tluk zeta ka hmangaih he hmeichhe naupang hi nu neihnawmzia temtîr chu ka tum ruh hle a, a hmaa nu hnen aṭanga a dawn ngai loh thil ṭha leh a lawmzâwngte, a tâna thuṭha leh zilhhâuna thlengin pek theih ngei ka tum nghet bur a ni.

          Zan lamah chuan u Malsawma inah riak turin kan phei a, kan ṭhiante chuan min thlah a, rei awm lovin min letsan vat a.

          Zovi chuan, "Kan kal vat loh chuan u Malsawma hian min pêtchhuak duh mai ang, tlai aṭang tawh  khan a vawikhat neihna ni awm fahranin a phîli rûai tawh a, awm reina chi a ni lo tlat," nui ar ar chungin a ti a.

          "Mapuii ka neih vawikhatna a ni tlat alawm," a lo ti hmuk a, Zovi nuih chu a za zual sauh emaw tih mai tur a ni a, u Puia pawh chu a lo khi ve suk suk a.

          An chhuah hnu chuan kan pahnih chauh chuan kan awmdun ta ran a, ka zam lutuk chu lum ka ti zo vekin ka hre hîal a ni.

          An room chu an lo tidanglam vek a, a hmaa u Rosie-i nen an inneihlâia an room hmêl chu a lang tawh lo rêng rêng a ni. Rawng an hnawih thar vek a, parda thar nen, khum awmna chenin an thlak danglam vek a, a hma ami nen kha chuan innawmhleih tak a ni.

          "Inbual rual ila!" a rawn tih chuan ka lo mengphawk nasa mai a, chu chu a hmuh chuan a nui hawk hawk a.

          "Ka fiamthu a nih kha, va inbual hmasa rawh," a rawn tih leh tak vatah chuan ka lo thaw huai a. Inbûal tur chuan ka insiam nghal sawk sawk a, min lo en reng tih ka hriatna chuan min chet khawrtîr hle a, ka duh ang pawhin ka che chak thei lova, amah lah chuan chu chu a hria nge ni min lo nuih var var reng a.

          Ka inbual zawh chuan ani pawh chu inbûal turin a lut ve zui nghal mai a, lo intihul sawk sawkin a lo chhuah hmaa inpeih hman tum chuan ka mutkawr chu ka ha nghal mawlh mawlh a.

          Bathroom kawngkâ a rawn rik rual chuan ka mufel hman chiah a, ka lo mu fel than min hmuh chuan a nui suk a, ka lai deuh si chuan ka lo chhiatkhum ringawt a, chu chuan a nuih a tiza zual ni ngei tur a ni a nuichhuak hawk hawk a.

          "Naupang chhia lutuk mai!" A phunsup ri chu ka hre thei a, rizai chuan ka inlukhup ta daih a.

            Ka bula a rawn mut ve chuan ka kawngah kuahin a kut vawt thlar chuan ka hmai chu a chûl rîak rîak a, ka hmuia a rawn fawh chiah chuan lo nemsawnin ka ṭhuchhuak nghal a.

             Ka awmdan chuan a tihamhaih hle a ni tih hriat takin a ngaihna hriat loh hmel zetin min melh a, ka lo nui sak a, amah chu ka pawttho ve nghal a.

           "Nun tharin bul kan ṭan dawn a ni a, Pathian hnena lawmthu sawiin kan hun lo awm leh zêl turah min kaihruaitu  atân sawm phawt ang. Nupa nun kan hman hma-in nupa hlim tak kan nih theih nan a malsawmna dilin ṭawngṭai hmasa phawt ang," ka lo tih tákah chuan a thaw huai a, ṭawngṭai tur chuan a insiamrem ve nghal a.


VANMALSAWMA

Chapter 29




           Kan ṭawngṭai zawh chuan hlim takin kan zan hun hmasa ber chu kan hmangdun ta a. Min hrethiam takin, ka zâi ngâi chung zelin a che a, tawnhriat engmah la nei hek lo i amah lo tihphur letdan tur pawh ka hre lova, chuti chung chuan phur takin a che a. Ka thiam ang tawka lo dawnsawn kha ka theihtawk a ni mai a, amah ka mamawhna nasa lutuk chuan zei leh thiam taka lo dawngsawng turin min tur a, ka theihtawp ka chhuah chung chuan ka tilawm zo lovang tih hlauvin ka insit hle bawk a ni.

          Nupa nun kan hman zawh chuan duat takin min kuah a, a kut lehlama ka sam chul pah chuan min hmangaih thu leh ka tâna mipa hmasa ber a ni chu a lawmthu a sawi sup a, kei pawhin ka hmangaih thu ka lo hrilh let ve sap a.

          Hmangaihnaah chuan inrintawnna a awm angin amah chu kapp ring nghet bur a, min hmangaihin ka tân a ṭha ber a duh zel fovang tih a mitmeng aṭang ringawt pawhin ka chhiar thei a ni. A sawi ang ngeiin ka tán a rintlak a, hmeichhe dang lakah min pelhesan mai mai lovang tih chu ka ring tlat bawk a ni.

          A tuk zîngah chuan thawh veleh kan inbûal sawk sawk a, inpui lamah kan phei leh ta nghal a. Kan thlen lâi chuan nimin lama kan thiltihna vêl singsa-in an lo buai laih laih hlawm a, u Malsawma chuan a pui ve nghal mawlh mawlh a, kei erawh chu u Rintei'n min lo koh avangin inchhûng lamah ka lut ta thung a.

          A hmaa kan lo rel lawk tawh angin kârhnih khat vel inpuiah hian kan awm ang a, chumi hnu-ah u Malsawma in lamah kan insawn phei leh dawn a ni. A hna kalna leh Bawihtei school kalna hla viau lo se chuan kei chuan awm reng mai ka duh zawk a, u Rintei nen kan inkawmngeih a, ka nu leh pate an fel bawk si nen khawhar deuha va awm ai chuan an bula awm ve  ka chák daih zawk a ni.

          Zovi leh ka nu haw phei tur chu u Malsawma'n va thlah a rawt avangin an haw phei dâwn tuk chuan kan inluah ti ila tunah chuan ka nau inluah a ni tawh ang chu,  chaw kan ei phei a, zankhat chauh riah kan tum avangin  Bawihtei pawh kan hruai lova, an exam a hnai tawh bawk nen a pî leh pûte'n school chawlh an lo remtih loh deuh bawk avangin kan hruai ta lo a ni.

          Tukṭhuan ei kham hnu chuan muang chângin, hmanhmawh lem lovin kan chhuak a, kawngah kan mûang deuh bawk nen Lunglei kan thlen meuh chuan khua a thim chiang tawh hle a ni. Teruata te'n an ina chaw ei tura min lo sawm lawk tawh avangin chu lamah chuan kan innghat hmasa a.

           Zovi nâu pai tir pum no deuh chu motor a chûang fuh lo deuh a, an in kan thleng chiah chu a luak barh barh a, a mu ta nghal a. Teruata chuan ngaihtuah hmel zetin a buaipui vat vat a, kan rûal chuan chaw pawh a ei ve ta lo a ni.

          Chaw eikham hnu-a reivak lo kan ṭhut leh hnu chuan haw kan tintuah ta a, kan haw dâwn chuan Zovi pawh chu intiharh luiin min rawn mangṭha ve hram a.

          In kan thlen chuan ka nu awmpuitu nula chuan min lo buaipui nghal sawk sawk a, ka patea te ho an lo lengkhawm bawk a, kan ri ve laih laih a.    Kan inneih tukin anni ho chu an haw phei nghal kha a ni a, ka nu leh Zovi erawh chu nithum vel an châm thung a ni.

          Tunhma lam kha chu eng pawh lo ni ta se kan mamawh hun leh ṭawiawm kan ngaih lâi taka min ngaihsak leh min thlawp hi ka patea te chungah chuan ka lawm êm êm a, ka nu pawh ka ngaihtuah loh phah sawt a ni.

          Ka khum chu feet 4 a ni a, keimaha ka mut kha chuan zau ṭha ve tawk tak kha a ni ṭhinin ka hria a, u Malsawma nena kan han mut meuh chuan a te rawih rawih ni maiin a lang a ni.

          Ka kawngah rawn kuahin a bawp chuan ka mal a rawn khan nghal bawk a, a hmuiin ka hmai chu a rawn nûl kûal rîak rîak a, ka lo thaw halh a.

          "Kumthar kan rawn hman ṭuma he i khum ngeia i bula mut ve ka chákzia kha i la hria em? Ka insûm zo lo ṭep a nih kha!" ka beng bulah chuan a ti thawp sut a.

          "Keimah zawk a nih kha insûm thei lo zawk chu! Ka chhia leh ṭha hriatna bo ṭhak khawpin nangmah ka mamawhna che khan min nawr a, a tawp thlen mai kha ka duh a nih kha! Nangmah kha iinthunun thei ta hlauh zawk a, chuti ni lo sela thil thleng tur chu i hria alawm," ka lo ti thung a.

          "A nih, tunah hian a tawp thlen duh hîal khawpin min la mamawh em?"

          A kut chu ka taksaah chuan a kalkualtîr a, amah mamawh ngawih ngawih tura min siam chu a tân thil harsa a ni hauh lo, min tawh hlek pawhin ka danglam nghal zel a ni a, a duhtawka min khawih kual phei chuan mu leh mal nei lo khawp hîalin amah mamawhna chuan min nawr na tawh ṭhin a ni.

          Ka hmuia a rawn fawh chuan duhthawh lutuk tak maiin ka lo fawp let tawn tawn a, ka pasal a ni tawh a, ka vawikhatna a ni tawh bawk lo nen ka theihtawka amah tihlungawi tum chuan zak hauh lovin ka che a, ka pasal lungawina zán tura chet chu ka tum bur mai a ni.

          A tuk zïngah chuan zan lamah kan che am deuh bawk nen thawh kan hai a, u Malsawma chhûngte inah chaw kan ei dâwn avangin kan thawh veleh kan insîam nghal sawk sawk a, kan inpeih chuan kan kal zui nghal mai a.

         A hmaa ka lo kal tawh avang khan ka tlângnêl rilru ve nghal deuh mai a, anmahni an lo fel bawk nen kan va thleng chu min lo be nghal chûl a, ka tân pawh mihrang ang ni lova chhûngkhat biaka va biak kha a har loh phah a, awlsam takin u Malsawma'n a kohdan ang ang chuan ka ko ve nghal thei mai a ni.

           Kan haw lam chuan Zovi te inah kan lut kawi zuai a, ani pawh a lo zia tawh viau a, anpa erawh a hnaa a kal avangin a lo awm lova, Aizâwl lama la haw tur kan nih avang chuan rei awm lovin kan haw ta thuai a.

          Chawhnu lamah chhuakin tluang takin zan dâr 8:00 velah in kan thleng a, Bawihtei chu a piin thil a thawn ṭeuh a, kan pek chuan hlim deuhin a khek ráih a. Kawnglaka kan chawhmeh lei vêl ka phawrhlâi chuan ka nu chuan phur deuhin ka bai siam a ei châk tawh thu sawiin kan thil hawn chu an nula a dah feltîr sawk sawk a.

          Kan inbuala chawte kan ei kham hnu chuan sitting room lamah ṭhu-in kan ti ti hlawm a, chutia kan lo ṭhutlâi chuan u Rintei, emergency a awm avanga damdawiin lama kal pawh a lo haw ve chiah a, a hnungah u Puia'n a rawn zui ve bawk a. Anni pahnih pawh hi an naupang chhe tawh lem lova, an sawi hmangin an inzui rei ve tawh bawk nen an innei har vakin ka lo ring lo ve ngawt a!

            U Malsawma in lama kan insawn pheina pawh thla thum a tling leh der tawh a, ka pate'n kan phei remti chiah lo mah se u Malsawma leh Bawihtei te tân a buaithlak zawk avangin kan phei ta tho a. Kâr tawp leh chawlh eng emaw a awm apîangin kan riak phei reng thung a, eng emaw chângin anmahni lam pawh an rawn riak ve leh zauh ṭhin bawk a.

           Tukkhat ka zîng tho chu ka nuam lo angreng hle a, ka pumte chu a ni deuh nghulh a, ka khuate chu a sik er erin ka hria a. UMalsawma chu hritlâng satliah mai maiah pawh min ngaihtuah theih êm avangin ka hrilh duh lem lova, ngâwi rengin nachhawkna chu ka ei ringawt a, ka nuam lo lutuk pawh chu a zia chho ve mai bawk a.

           Chaw pawh ka rinâi takin ka ei thei a, u Malsawma a hnaa kal tura a chhuah hnu chuan kan room lamah chhovin Bawihtei thawmhnaw bâwma a thawmhnawte chu ka rem felsak a. Chutia ka rem mawlh mawlh lâi chuan zînglama ka awm nuam lo bawk khan min rawn ṭham leh a.

          Ka tihfel zawh chuan suk tur ho chu lakhawmin Tlani chu lo su mai turin ka hrilh a, kan room lamah let lehin u Malsawma study table chu ka remfel leh nghal a. Lehkhabu ka rem mawlh mawlh lâi chuan nasa lutuk tak maiin chhûnglam aṭangin luak chhuakin min rawn nawr a, bathroom ka thleng hman ṭawk tihah chuan ka luak ta nghek a, ka luak zo chu ka chau nghal rawih thei hial a ni.

          Bathroom aṭanga ka chhuah hnu chuan khumah chuan ka let nghal tawp a, tunhmâ-in chutiang chuan ka la awm ngai si lova, a ngaihna ka hre lo hle a ni.

          Ka thil ngaihtuah chhuah avang chuan ka tho thut a, calendar ka en nghal a. Kei hi engmah ngaihtuah lovin ka lo awm rei mah mah tawh a lo ni, ka thi neih hun chu ni sawm lâiin a lo pel tawh a, engtin nge chutiang pawh hre lo khawpa ka lo awm theih ni!

          U Rintei'n chawhma duty a neih nî a ni tih ka hria a, ka phone ta nghal vat a, ka inrinhlelh dante chu hrilhin min tlawh haw tur chuan ka va ti a. Ka thil sawi a hriat chuan phur tih hriat tak maiin a au deuh hliai a, rai leh rai loh testna a rawn hawn tur thu chu sawiin a duty a zawh chiah thu leh a rawn thlen har loh tur thu chu a sawi nghal zat a.

          U Rintei a lo thlen a ka intest chuan ka lo rindan ang chiahin nâu ka lo pai ngei a, ka hlim lutuk chu au vak mai hi ka duh a. Ka nu hrilh nghal ka châk êm êm rualin u Malsawma'n hre hmasa ber se ka tih avang chuan ka insûm leh ta zawk a.

           U Rintei pawh chu a hlim hle a, ka pate hrilh a tum chuan ka lo khap vat a, u Malsawma hrilh hmasak ber ka duhthu ka sawi chuan min hrethiam takin a phone chu a dah leh ta nghal a.

          U Malsawma chu hmanhmawh hmel deuhin roomah chuan a rawn lut a, a hlauhthawn hmel hle bawk a, min rawn pan nghalin ka bul a rawn thlen rual chuan ka kutah la-in a hum nghal vang vang a.

         "Engtin chiah nge i awm? I zia deuh tawh em?" min ngaihtuah tih hriat zetin min zawt a.
 
          "Engtin nge i ....... "

          "I nawmsam loh thu ka va hrilh a nih kha," u Rintei chuan nui var var chungin a lo ti vat a, room aṭang chuan a chhuak nghal daih a.

          "I zia deuh tawh em ka tih chu! Khawngaihin min chhâng vat teh," min kuah pah chuan a lo ti leh a.

          "Umm...... min hmuh ang hian ka zia tawh lutuk e! I va rawn haw hma ve!" ka lo ti a.

           "Ka nupui a dam ṭha si lova, min ngaih ka ring a, ka lo tlan haw nghal alawm!" Min kuah hlu hlu a.

            Lo kuah let ve-in a âwmah chuan ka bei thlap a, a lungphu dat dat chu ka ngaithla a, ka thu hrilh tur hi a hriat hunah phei chuan tun âi hian a phu rang ngei ang le!

          Min kuahna aṭang chuan inlahrangin rai leh rai loh testna ka lo dahṭhat chu ka va la a, a kut chu lakangin test kit chu ka dah a. Ka chetdan chu a ngaihna hriat loh hmel deuhin min lo en vang vang a, ka mitmei chuan ka thil kentîr chu en turin ka hrilh a, a en zo rawn hawichhuak leh hmêl hlim lutuk chu ka theihnghilh leh thei tawhin ka ring lo!

          Min pawm kang lawp a, min virpui a. Chutah, hrechhuak thutin a tawp chawt a, sofaah chuan min ṭhutpui nghal a.

          "Ka lawm e aw, Mapui! Nang hian hlimna nasa tak min pe a ni, hlimna min pek zawng zawng hi ka theih tawka rulhlet che ka tum a ni."

          "Kei hian ka rulhlet che a ngâi zawk lo maw! Ka tâna i thiltih zawng zawng, min duatna leh min enkawlna zawng zawngah hian lawmthu ka sawi sêng lo zawk!" ka lo ti sap a.

         "Ka hmangaih che, Mapui. Ka hmangaih lutuk che!"

         A lamah min kuah hnaiin min fawp vawng vawng a, kei pawhin ka pasal hi ka thinlung zawng zawngin ka hmangaih a ni.

          Tlai lamah chuan ka pate leh Ngaihawma chaw ei turin a sâwm a, a hlim lutuk chuan min kalsan phal meuh lo a ni ber a. Min vil run reng a, engmah ka tih a phal bawk si lova, ka thawh hlek leh a tho ve nghal uaih zel bawk a. Ka nu chuan a sawisel deuh a, engah mah a ngai chuang der lo, a awmdan ngai rengin a awm miah miah a, ka nu tihngaihna hre lo pawh chu a nui ta ringawt a.

          Pathian zârah nâupai chu ka haw lem lova, ka thil ei a tui êm êm bawk a, ka thau mah mah ang tih hlauhawm khawpin ka ei nasa a. U Malsawma lah chuan nâupai tâna ṭha an tih zawng zawng min lakkhawm sak a, ka pate leh u Rintei thleng chuan min ngaihsak êm êm vek a, min duat rawn a ni ber e.

          Bawihtei chu a phur êm êm a, nau a neih huna a tihdan turte chu a sawi siam siam reng a, a lo pian hunah a pawm hmasa bertu nih loh a hlau hle bawk a ni.

          Harsatna leh buaina êm êm tawk lovin ka neih hun dâwn hnaih thleng chuan ka pai a, neih dâwn hnaihah erawh chuan tlema a rih ve deuh avangin chet zung zung ka harsat ve deuh a, chumi tih lohah chuan insawiselna ka nei hran lo a ni.

         Tukkhat ka tho chu tlêma ka nawm loh deuh avangin ka mu leh a, u Malsawma'n Bawihtei a va thlah hlan chuan ka lo muhil leh a. Ka harh leh chuan ka tai bâwr leh kawng vel chu a na riau a, nau ka vei ṭan dawn a nih ringin u Rintei ka phone nghal vat a.

          U Malsawma rooma a lo luh chuan tlemin ka lo zia leh tawh a, ka awmdan ka lo hrilh chuan ani pawh chuan ka vei ṭan a nih a rinthu leh damdawiin lam pan nghal vat ṭhaa a hriat thu chu a sawi a. Keiin u Rintei ka biak thu leh lo thleng phawt se ka tih thu ka lo sawi thung a.

         U Rintei a lo thlen chuan min en nghal vat a, ani pawh chuan ka neih har tawh loh a rin thu leh damdawiin lam pan vat a ṭhat thu chu a sawi a, kal tur chuan kan insiam ta nghal chûk chûk a.

   
   VANMALSAWMA

Chapter  30 (Last chapter)




            Rin âi takin ka nei har leh ta phian lawi a, chawhnu lamah chuan a nâ a zing ta deuh a, nâ ka tihzual châng chuan u Malsawma kut chu ka hmer leh ngat ngat ṭhin a. Ani lah chu ka na tûar min khawngaih nen han tih vak ngaihna a hre si lo chuan u Rintei chu engtin emaw ti mai turin a'n tur thul, a châng leh ka kawng chu a zia deuh ringin a chul leh ṭhin bawk a, keiin ka lo ngaithei si lo chu min hnem a duh ve bawk si nen a buai a ni ber e.

          Chawhnu lam dâr 3:00 ah ka tuibâwm a keh a, nau neihna roomah min nawrlut nghal a, ka nu ka chhun nge ni ka vei rei hle a. Neih mai inbeiseia lut kha darkâr thum hnu-ah pawh chuan ka la nei thei ta lova. Ka vei rei tawhin a nâ lah chu a zing tial tial a, a na êm êm tawh mai bawk si nen ka chau tawh hle a, ka bei a dawng lek lek tawh a ni.

           A tawp atawpah chuan Pathian zârah, doctor leh nurse te puihna-in zan dâr 8:15-ah chuan fapa duhawm êm ëm mai chu ka hring chhuak ve ta a, a ṭap riin ka thinlung a nghawrdan chu thua sawifiah phak rûal a ni lo a ni.

          Nau neihna hmun aṭanga min nawrchhuah rûal rûal chuan u Malsawma chuan min rawn pan nghal vat a, khuma min muttir hnu chuan ka chalah rawn fawpin min nuih sak a.

          "Ka lawm e aw!" zawitê-in a ti sup a, ka lo nuih sak a.

          Kan fapa chu a ṭhan a ṭha-in a pa a chhun bawk a, a dáwng ngoh mai a. Nuih a duhin a ṭap ngai mang lova, mi lawm a hlawh hle a, ka pate pawh kan in lamah an lo phei phah áwl lova, kan vai mai chuan kan hlimpui tak zet a ni. A pianhlim khan a pû-in, "Lalpa'n thil hlu tak min pe a ni," tiin a hmingah 'LALPEKHLÛ-A' a sa a, kan tân chuan thilpek hlu tak a ni ngei reng bawk a ni.

          Nikhat chu, kan nufa thumin kan inawm a, chhuatah toys nen kan inbun hnawk rum mai a. Bawihtei school chawlh lâi a ni a, a pa erawh a hnaah a kal thung a. Choka lamah pi Mawii leh Tlani chu thil tihfel pahin ti ti dun mawlh mawlh bawk a.

          Doorbell a rawn rik chuan Bawihtei chu kawngka hawng turin a tlan nghal vat a, a hnu lawkah chuan min rawn ko ta chúl a.

          "Ânu, lo kal vat teh!"

          Pekhlûa chu pawmin ka kal nghal vat a, kawngkaah chuan Bawihtei leh a nu chu an lo ding dun ran a.

          "Hei, Bawihtei hian inchhûnga ka luh a phal lo deuh nge ni lut tur pawhin min sâwm miah lova!" nui chungin u Rosie-i chuan a lo ti a.

           "Eng nge ni ta? Lo lut rawh, lo lut rawh," ka lo ti vat a,

           "Thil sawipui lawk che ka duh a," kan ṭhut fel hnu chuan u Rosie-i chuan a ti sap a.

            "Aw, eng nge ni ta?  Han sawi la," ka lo ti vat a.

            "I hnenah hian thuphâ chawi ka duh a!" A ngâwi vang vang a, kei lahin sawi tur ka lo hre mai bik si lova.

            "Heta kan awmho lâi khan i tân a hrehawm thei ngawtin ka ring! A hnu lehzêla ka awmdan pawh kha a mâwi lovin i laka ka awmdan kha a nunrawnthlak tih ka hria, tun hnua ka ngaihtuah hian hrehawm ka tiin ka zak hle a ni."

           "Thil kal tawh chu liamtîr mai ila, a tharin tihian ṭhianṭha tak angin kan awm thei alawm," ka lo ti vat a.

           "Ni lo, ngaihdam ka dîl phawt loh che chuan ka awm a nuam thei tlat si lo a ni. Bawihtei chunga ka khawsak danah pawh khan ka inchhir tak zet! Ngaihdam ka dîlna hi i pawm ngei ka beisei." A hmêlah chuan a inchhîr tak zet a ni tih a hriat theih a.

           "Khawngaihin khalam kha chu duhtawk teh! Kei pawh ka dik vek chuang lova, ngaihdam ka ngaihna lâi a awm ve tho, ka ngaihdam i ngaihna a awm rêng rêng lo," ka lo tih leh chuan min en vang vang a.

           "Hman deuha kan accident ṭuma ka laka i chetdan khan ka rilru a hneh lutuk a, kei ni ila khatiang khân ka ti theiin ka ring lo. Ka ṭawngkhum ṭhindan che ka ngaihtuah let hian engtin nge ka chungah khan ṭhat i chhuah theih tiin tun thleng hian mak ka la ti reng a ni."

           Kei aia upa zawk a ni a, a hnen aṭanga thupha chawina ngaihthlak chu nuam ka ti mang lova, a inchhir tih ka hriat chuan tawk ka ti viau a ni.

            Thil dang eng eng emaw ka sawipui ta daih a, kan han inkawm chian takah chuan kawm a lo nuam hle a, kan ti ti dun thei ta phian a.

          Bawihtei pawh chu a nu bulah tlângnêl takin a ṭhu ve thei a, chu ringawt pawh chu lawmawm tak a ni. Kei hi a nu ni mah ila a hming chauha a nu ka ni a, a hringtunu ngei chu a tân a hlutdan a dang bik a, thisena inzawm an nih avangin inmamawh tawn hun an la nei lovang tih pawh a sawi theih loh a ni.

          Tlani chuan thingpui min rawn pe a, u Rosie-i chuan tunge a nih min zawt a, ka lo hrilh chuan a nui hak a.

          "He in hi 'ka in' tia ka lo sawi ve ṭhin kha a nih ka ring ta lo rum rum mai, ka mikhual ta riau-a hriatna ka nei tlat!"

          "Bawihtei vang pawhin i mikhual hauh lo tih i hriat reng a ngai dawn a nih chu," ka lo ti vat a, a lo nui hawk hawk a. A lungawi lo hmel ai chuan a hlim hmel chu a lo ṭha tak zet a ni.

           "Pasal neih ka tum a," thutak deuh zawk hian a rawn tichhuak a, keiin phawk deuhin ka lo en thung a

           "Chutia law? Engtikah nge ni dawn?" ka lo ti hliai a.

           "Thlathar thla tir lamah hian kan tum ve chu a nia. In lo kal ve ngei ka beisei tlat dawn a nia, ka chhûngte angin."

            "Tehrêng mai! Rokhawlhna a awm a nih loh chuan kan lo kal dawn nia, hlim deuhin hun kan hmang ang chu le!" ka lo ti ve vat a.

           A haw dawn chuan ka kutah a chelh a, "Bawihtei i enkawlnaah hian ka lawm lutuk a nia aw! Ka mitmei i vêng ang tih ka hlau a, engmah keimahah chuan ventháwn tur a awm lo. Kei chu amah hringtu chauh ka ni a, nang erawh chu a nu i ni thung. Kei chuan nu nihna dinhmun ka chelh zo ta si lo a nih kha, i enkawlna hnuaiah ṭha tak leh puitling takin a seilian ang tih ka hre chiang a ni," a ti a, a mittui chu a tling pam bawk a.

          Zanah chuan u Malsawma chu u Rosie-i rawn len thu leh kan thil sawi vel chu ka hrilh a, a ngawi ngul a, min chhâng tawh dawn lo emaw ka tih hnu chuan min rawn kuahin a rawn ṭawngchhuak ta hram a.

           "Nang hi ka nei lovang che tih ka hlau! Mi hriatthiamna i ngah a, hmangaihna i ngah bawk si. Khawvelah hian kei anga mipa vannei hi an awm ve a nih pawhin an tam vakin ka ring lo."

          "Khatiang khân min fak vak zel suh, nangmah zawk kha ka nei lovang che tih ka hlau fê zawk! Kan inneih tirh aṭanga tun thleng hian sawiselna tur che ka la hre lo, kei hian ka phû lo lutuk che a ni ber e."

          Ka hmuiah a kutzungchal a rawn dah a, ka ṭawng leh tur chu min lo dang a.

          "Ka hmangaih che a, nangin min hmangaih bawk a, a tawk! Thildang sawi a ngai lo."

           Ka hmuiah a rawn fawp nghal a, duhthawh taka kan infawh lâi chuan khuma Pekhlû-a mu lâi chu a rawn ṭe ṭhat a, kan inthlah nghal vat a.

           Ka pasal neih hnua ka nundan hi ka chhut ngun poh leh vannei ka intihna hi a nasa a ni mai a. Min hmangaih êm êmtu pasalah ka nei a, ka nu leh pa lah ni se mo anga min en lovin min fanu chei a, u Rintei lahin a laizâwn ang maiin min en bawk a, Bawihtei lah naupang tê mah ni se a felin thu a awih êm êm a, ka vannei tak zet a ni.

          Nupa kârah chuan eng emaw tia han inkhak deuhte a awm châng a lo awm ṭhin a, keini nupa kârah erawh a awm lo ti ila ka sawi sual tampui hauh lovang. A chhan chu, thu han inhmuh fuh loh ṭumah pawh pakhat zawkin ngawih kan chuh vat a, chutianga inhauhpui tur ber an ngawih tlat si chuan thin a rim rei thei tlat lo a, kan lung a awi ve ve hnuah ṭha takin thil awmdan ka sawidun leh mai zawk ṭhin a ni.

          Bawihtei chu Pathian zârah a zirlâi a thiam thei hle a, enpui ngai lutukin a awm ngai lova, ama zir zira zirin an class-ah a tiṭha ber pâwl a ni pha zel a, rilru chakah a pa a chhun hlauh a, a tihzia hle a ni.

          Ka nau chu amahin kan inluahah khan a la awm rak rak a, u Malsawma'n kan hnena awm ve mai tura a sawm pawhin a duh tlat lova, ka nu pawhin makpa te fina awm ringawt chu ṭhaa a hriat loh avangin kei pawhin ka nawrlui  duh ta bik lo a ni.

          Thla thar aṭangin Zovi te naupang ber, college kal ṭan ve turin a rawn fin ve dâwn a, a khawhar lutuk pawh a zia deuh ang chu!

           Tlai khat chu u Rintei'n inlêng a neih dawn avangin ka pate in lamah chaw kan ei phei a, zanah chuan u Puia palâite an rawn lêng a, engmah lo sawi ve vak tur ka nei dawn lo êma tiin u Rintei roomah Bawihtei te unau nen kan awm daih thung a.

            U Rintei chuan u Puia nena an chanchin chu min hrilh sep sep a, doctor zir tura a kal hma daih aṭanga lo inngáizâwng tawh an lo ni a, eng emaw chen thil hriatfuh tawk loh avangin an han inṭhen leh ren rawn phawt a, u Rintei training zo rawn chhuah leh hnu hian an inkawp ṭha leh chauh a lo ni.

           Inlëng haw hnu chuan u Malsawma chu kan awmnaah chuan a rawn chho ve a, an inbiakdan vel chu ka lo zawt vat a. Pekhlua, a nî-in a lo pawm mêk lâi chu laksakin a pawm nawlh a, ka bulah chuan a rawn ṭhu a, ka zawhna chu hmanhmawh lo zetin a chhâng a, kei âi mahin u Rintei chuan a lo nghakhlel zawkin ka ring!

           Kan riah nghal dâwn avangin hmanhmawh lem lovin sitting room lamah chuan ka pate nen chuan kan inkawmho a, Bawihtei te unau inchhaih chu thlirin kan lo hlimpui ve hle a, u Rintei inlêng neih chungchâng chu kan sawi pah reng bawk a.

          A tuka kan haw phei chu inrinnî te a ni bawk a kan bazâr haw nghal a, naupang nen kan nih avangin kawngsîra mahni thlai thar zuar ho ta chu kan lei zawr zawr a, kan haw ta nghal a.

          In kan thlen hnu chuan naupang ka bual nghal a, ka bual zawha inhnuaia ka chhukthlak chuan ka rin loh lutukin ka nu ka hmu thut a, insûm hman lovin ka ṭe ṭhat a, u Malsawma chuan min lo nuih var var a.

          Kan hnena thleng tura ka duh viau rualin ka nau, kei aia khawhar zawkin a bula awm turin a lo thlahlel ve hle dawn a ni tih ka hriat avang chuan ka sâwm duh ta lova. Ni danga a rawn kal châng pawhin zankhat a rawn riak zauh tih loh chu ka nau bulah a khawsa chawt a, chaw an rawn ei leh zauh ṭhin tih loh chu ka chang tlem ṭhin hle a ni. Pekhlua pian hnu erawh chuan a rawn lang zing ve ta deuh a, a tupa hi a ngaiin la biak tham hauh si loh hi ṭawng thei biakin a be reng zel a, chutia a be ṭhin chu Bawihtei nuih hi a lo za thei hle a, a lo nuih nasa thei hle ṭhin a ni.

          Kan inhnuai chu kan chei ṭha a, thil eng eng emaw vawm khawmna atâna kan hman ṭhin kha a ni a, u Malsawma'n nu Mawii te nufa awmna atâna a tih avanga chei ṭha kan ni.

         Kan peihfel veleh nu Mâwii te nufa thum chu an rawn insuan lut nghal a, bungrua an ngah lem lo bawk nen an luah tawk ve hle a, a hmaa an awmna aiin a lo nuam zawk bawk nen a fate chu an hlim hle a. Nu Mãwii tân pawh awlsam takin, hla deuh kal ngâi lovin, hmun leh hmunah a hna a thawk thei tawh dawn a, amah pawh a hahdam phah ngeiin a rinawm a ni.

          Hriat loh kârin u Rintei te inneih nî pawh a lo thleng ve ṭep tawh a, keini pawh inpui lamah kan phei ve reng a, theih ang angin kan inpuahchah ve map map a, kan buai zualpui a reh meuh chuan kan thaw huai hlawm a.

          Inneih nî a lo thlen chuan kan fate chu ka chei mawlh mawlh a, ka pasal chu ka bulah dingin ngâwi rengin min lo thlîr a. Naupang ka siam zawh chuan Tlani chu kovin inhnuai lama lo zu awmpui turin ka hrilh a, an chhuah fel hnu chuan ka pasal lam chu hawiin a kawngah chuan ka va kuah a.

           "Aw le, eng nge sawi duh kan neih chu lo ngâithla ila," ka va ti sar sar a, no thei ang bera ka hriat chuan ka melh bawk a.

          "Kan fate avang hian ngaihsak ka hlawh lo tial tial niin ka lo hria a, chu chu a dik em?" a lo ti hmuk a, ka lo nui hak thung a.

          "Dik lo tlat mai! Ka pasal hi chu amaha a inenkawl theih avangin ka thinlung chhûnga khung reng chungin naupang, mahnia la inenkawl thei lo ka ngaihtuah hmasa phawt a, chumi hnu-ah ka thinlung lalpa, ka thinlung neitu chu tihian tuma tihbuai phak lovin ka ngaihsak ta ṭhin a ni. Chu chu i lo hre ve miah na nge?"

          Nghet lutuk tak maia min kuah pahin ka hmai bulah a rawn kun hniam a, ka hmuiah chuan a rawn si zeuh a.

          "Nang tê reuh hi han thinrim der ve deuh dawn pawh hian mi khap daih dan hi i hre lutuk mai!" tiin a aia uar zawkin min rawn fawp leh a.

          "Inneih inkhawma tlai chu a chi hauh lovang, i thawmhnaw hak tur ka dahchhuah saw lo ha la, kei pawh ka'n insiam ve zung zung ang e," nemsawn pah chuan ka ti a, a thaw hawk ri chu ka hre na'ngin ka haider hmiah thung a.

          Kan insiam zawh chuan dârthlalang hmaah chuan ding dunin kan inen vang vang a, ka kawngah chuan duat taka rawn kuahin ka chalah chuan a rawn fawp zauh a.

          "Ka nupui duhtak, ka hmangaih che!" a ti sup a.

          "Ka pasal duhtak, kei pawhin ka hmangaih che!" ka lo ti let vat a.

           Inkai rîal chungin kan fate fin tur chuan room chu kan chhuahsan ta a.

         *************************


(Ka story ziah hmasak ber chu Pathian zârah a hmawr ka lo bâwk ve ta reng mai a, min lo chhiarsaktu te zawng zawng chungah khan nasa takin ka lawmthu ka sawi ni se.

A ngaihna ka hriat miah loh lâia kawng tinrênga min puitu, a ngaihna min hriattîrtu Becky Rafa Renthlei, Mami Lalhmangaihzuali Chawngthu leh Mami chhakchhuak(vt) te chungah lawmthu sawi sen loh ka bâ a, ka lawm tak zet zet a ni tih hi min lo hriatsak ula.

Story ka type theih nana hun thawl min petu ka pasal duhtak chungah ka lawm em em bawk a.

Chhiartu zawng zawng, a bikin comment min petu zawng zawngte kha a mal te tein chhang lo che u mah ila ka chhianchhiah vek che u tih lo hria ula, min fuihna leh fak phurna avanga tun hi thleng ka ni tih ka hria a, in zavaia chungah khan ka lawm êm êm a ni tih kha min lo hriatsak vek dawn nia....

Ka sawi hmaih phal loh VT member zawng zawng chungah pawh khan
KA LAWM E........)