VANMALSAWMA (DOCS 1)

VANMALSAWMA DOCS



VANMALSAWMA
Sbk Pachuau


CHAPTER 1

        "Ka chhuak ang, ka chhuak khawp ang. Hetiang inchhûngah hian ka awm peih hrep tawh love! Nang leh i fanu luhlul leh tihmawh zet te hi ka kham tawh tak zet, min rawn umzui miah lo ang che u."
         
          Chu nu rapthlak, fate lainatna thinlung nei miah lo âng thawm chuan a fanu, kum 5 mi lek chu hlauvin a khurhtîr a; ka âwmah a hmai phûmin khur zawih zawihin a theih anga nghetin min pawmbet tlat a. Ka thinlung chhungrila amah lainatna kha chen ka lo upbeh tawh chu rawn irhchhuakin dan rual lohin ka mittui chu a rawn dir zawih zawih a, ka huat phak rûal ni lo mah se he hmeichhe rapthlak lutuk hi ka haw tak zet a ni!

          "Awle, i duh dan ang chu ni rawh se, i duh dan angin awm la, kei leh ka fanu hi i tân he khawvelah hian awm ve miah lo anga min ngaih a ṭha ang. Vawikhat pawh inchhirin rawn let tum ngai suh, a chhan chu engtikah mah ka ngaihdam ngai dawn loh che avangin! I chhuak a nih chuan rawn kir leh tawh lo turin chhuak la, kan nun aṭang hian kalbo vang vang ang che, i duh ang anga awm turin i zalen e."

          He khawvel, duhthusam kim lohna hmunah hian ani aia ṭha leh fel dang thlan tur an awm chuang lovang e tih tur khawpa pa ṭha leh fel, hmelchhe bawk si lo, palian leh inkhâithli ṭha thlerh thlawrh, pian nalh mai piah lama inchhûng khur ngaihtuah em em reng, engkim dang aia chhungkua dah pawimawh hmasa ziah ṭhin mi chu a puakkeh ve ta tih hriat takin a thu a tawp chiang kher mai!

          Chuatianga a pa ṭawng thawm a hriat takah chuan Hruaitei chu engkim hrethiam rual ni mah suh se thil ṭha lo tak thleng tur a awm a ni tih hrethiam ve-in a rawn ṭap chhuak ta hlawp hlawp a.

          Lo kuah ngheh sauh pahin ka theih anga nasa-a ka lungchhiatna thup chung chuan ka lo hnem vat a, "Bawihte, ṭap suh le, i ṭah chuan âpa-in hrehawm a ti leh dawn a nia, naupang fel chu an ṭap ngai lo tih i hriat vek kha."

          "Âpa hian min kalsan ve ang em?" la inhnît hlawp hlawp chung chuan min zawt a.

          "Teuh lo mai bawihte, i pa chuan a hmangaih lutuk che a, khawiah mah i tel lovin a kalbo ngai lovang."

          Kawngkapui inkhar bur ri chuan eng emaw chen ṭawng lovin min awmtîr a, thawm dang engmah awm lovin a reh nghal vawng vawng mai a ni.

          "Âpa bulah ka kal duh."

          "Awle, ṭap tawh lo la, kan kal dawn  nia. I ṭaplai hmel kha i pa-in a hmuh i duh loh chuan i mittui kha hrufai phawt rawh le."

          Thu-awih takin a mittui chu ka rawmawl pek hmang chuan a thiam ang tawk chuan a hrufai ve a, hetianga naupang duhawm leh fel tak hian nu ṭha tak, amah ngaihsaka hmangaih em emtu neih hi a phû asin le!

          Inhnuai panna stepa kan chhukthlak lai pawh chuan ka kutah nghet takin a chelh tlat a.  A pa, sofa-a ṭhu chunga lo indawm kun reng bul kan thlen hnu pawh chuan min la vuan ta reng a!

          U Malsawma chu zawi muanga rawn dakchhuakin a fanu en chung chuan a rawn nui lui sak a.

          "Bawihte, i la muhil lo a ni maw? Ka bulah hian lo kal teh," tih pahin a fanu bânah chuan a rawn vuan a, a mal chungah ṭhuttîrin a bân sei ṭha tak chuan hneh takin a lo kuahbet hlu hlu a.

          "Âpa, ânu kha khawnge a kal dawn?"

          "Bawihte, ânu chu kalna tur pawimawh deuh a neih vangin a kal bo dawn a, a lo kir tawh lovang. Chu chu pawi i ti em?"

          "Aih, nangman pawi i tih loh chuan kei chu pawi ka ti miah lo. A sual si, u Mapuii a hau nasa thei si, ka khawngaih! Nangmah leh u Mapuii nen chauha awm hi ka duh daih zawk!"
         
          "Bawihte, khatiangin ânu sual tih loh tur.  A buai thei lutuk a, a hah ve ṭhin a, a duh anga thil ka lo tih loh ṭhin vang alawm min hauh ṭhin. Nang chu i fel a, a hauh ve ngai miah loh che kha," ka lo ti vat a.

          "Aih, a ni lo. Kei pawh min hau ziah, a lipstick ka tihtlak palhsak pawhin min hau vak a, min beng bawk asin!"

          A lungchhe thar leh tih hriat takin a inhnît zui nghal hlap hlap a, a pa chuan engmah sawi lovin a lu-ah a lo chulsak a.

          A sawi dik chiah! Kha nu khan a fanu, a hrin ngei pawh hi duatna leh ngaihsakna reng reng a nei ngai lova, eng emaw hlekah a sawiselin kut a thlak fo bawk. Chuvangin, a nu kal bo tur pawi a ti miah lo pawh hi mak ka ti hauh lo.

          " Shhh..... Bawihte, khatia i ṭah zel chuan i lu a na palh ang. Bang tawh la, eitur va siam ang hmiang, i thil eina a rei tawh si a, i pum a ruak leh tawh ang. Naktuk chawlh a ni tho bawk a, âpa hian a phal chuan thil ei pahin Barbie  movie thar i neih kha kan en dawn nia, i duh em?"

          Zan dâr 11:00 a ri ṭep tawh a, dâr 9:00pm hi a mut hun a ni tlângpui a, zanin pawh a muhil tawh a nu thawmin a tiharh leh a ni.


          Ka thil sawi chuan a tiphur hle a ni tih hriat takin a ṭap chu a bâng nghal a, "Âpa, i phal em?"
         
          Thawk lak halh pahin u Malsawma chuan min rawn en zawk a, a fanu chu en lehin, "Awle, a ṭha alawm. Mahse, âpa biangah hian chuk phawt a ngai a," tih pahin Bawihtei fawh tur chuan a biang chu a dawh nghal a.
 
          Phur takin Bawihtei chuan a pa biangah chuan a lo fawhsak a, ka bulah lo kalin ka kut chu a rawn vuan leh nghal chat a.

          "Room-ah ka lo han chho ang a, i mutchhuah hunah u Mapuii i rawn indahtir mai dawn nia aw!"

          "Awle, âpa...."

          Choka lam panin kan inkai phei a, ka rilru-ah thil pakhat a rawn lut zawk a, u Malsawma lam hawilet pahin, " Pawi i tih loh chuan zanin chu ka bulah riak leh mai sela, kan menchin tur a hriat bawk si lova!" ka va ti leh hnuhnawh a.


          Tun ang hunah chuan mahni chauha awm a duh zawkin ka ring a, a boruak tawn tehhrep avang khan a muthilh phei chu ka ring lem lova.


          A mitko san ak pahin, "Bawihtei'n a duh chuan pawi lo e, zanin chu i kutah awm tlang law law mai teh se," a lo ti sam et a.

          "A tibuai lutuk em lovang che chu maw!" a rawn ti leh boh a.

          "Tibuai love, min tibuai ngai lo hrim hrim" uar fahranin ka lo chhang let nghal a.
         
          Zinglam dar 1:00 a rik meuh chuan  Bawihtei chu ka mal lukhamin a muhil sâk sâk tawh a. He nau hmelṭha leh duhawm lutuk hi hmangaih loh pawh tum ila ka theih ka ring lo bur! Eng emaw châng chuan han luhlul leh tihhar deuha awm ṭum te chu nei ve bawk ṭhin mah se naupang dang anga han nawrh leh huaibak vel a nei ngai lova, a rilru a ṭha reuh bawk si! Rilru puthmanga a nu a chhun lo hi thil lawmawm chu a va ni chiang tak!

          Khuma ka mutpui hnu pawh chuan ka mutchhuak a reh laklawh avangin ka muhil ve thei mai lova, hun kal tawh ka rilru-in ka chhui a, nunhluiah ka lo cheng leh veng veng a.
         
          Lungleia piang leh seilian ka ni a, ka pa leh ka u Mama'n motor accident-a min boralsan hma kha chuan chhungkaw lungrual leh hlim thei tak kan ni ṭhin.

          Ka pa boral chu rilru leh chhungkaw khawsakin nasa takin a tuar a, ka pa unaute hi nupuite thuhnuaia kun kan tih ang chi ve ve an ni a, an nupuite fuih(pawrh)na vangin ka pa damlaia kan chenna nuam leh zau ṭha ve tawk tak chu chhuahsanin inhnuai zim zawk kan luahthla a. Ka nu hi nunnem tak, zawiawi deuh mai, mi pawi sawi hlau mi tak a nih vangin an zuam deuh nge ni a hmaa in chhawngkhat luah man kan lak ve ṭhin pawh titawpin anmahni chuan an insem ta hlauh a.

          Dik tak chuan in chu ka pa sak a ni a, a unaute hian pawisa sen khat pawh an thawh lova, a tha azâwngin vawihnih khat chu an pui ve a ni awm e. Hetia in luah man, ka nu kuta lut ngei tur ni si an chuhpui tlat danah hian kan laka an rilru putdan tur ka nu chuan a hrethiam mai a, chuvang chu a ni ang e engah mah a pur ngai lova, a theih ang angin chhungkua a enkawl a, kei leh ka nau mipa pakhat leh ka nu chu kan chhungkua chu kan ni tawh mai a, kan hautak lutuk ngai lem lo.

          Ka pa a boral khân a hna-ah a aiawh turin ka pate-a, ka pate unau zinga naupang ber a lut a, nupui nei hlim a ni a, hna nghet a lo nei lo bawk nen ani baka han lut awm an awm lem lo bawk a, ka nu pawhin duhsak takin a sawipui nghe nghe a. Tuna hetia kan laka an rilru a han chhe ta viau mai hi kan unau chuan lungawi lo takin kan sawi dun ṭhin a, ka nu erawh chuan min lo khap vat ṭhin.

          Ka pa emaw, ka u Mama emaw, a tu emaw zawk zawk tal kha chu la dam se, hetiang tak hian min zuam bik hauhin ka ring lo. Ka nu hi fel hle lo se chuan kan mualpho viau ang a, chhungkua kan awmkhawm tawh hauh lovang. Ngawih a chuh tlat ṭhin vang chauha hetia colony khata la khawsa ho thei chauh hi kan ni!

          Ka nu thawmhnaw dawr hmangin harsa lo takin kan khawsa ve thei mai a,  college kal ka ngaih tak chinah chuan ka nu-in, " Khaw hawi tihzauhte hi a ṭha ngai, phaiah kan indah thei si lova, Aizawlah boruak zau zawk tawn pahin college tal hi chu va kal ve la a ṭha ang," a tih tlat avangin Aizawl awm tur chuan ka inpuahchah ve ta a.

          Class 12 kha distinction-ah ka passed ve hlauh mai a, admission pawh awlsam takin ka hmuh phah a. Ka u Mama ṭhianpa hi ka college luh tumna-ah chuan a thawk ve a, keimah pawh kal buai ngai lovin engkim min lo tihfelsak vek a, class ṭan dawna kal phei  chiah hmabakin ka awm theih phah a ni.

          Engkim peih fel veka inngaia thlamuang taka kan awm laiin ka hostel awmna tura kan biakfel vek tawh kha buaina awm lehin seat an lo pek thuah niin an sawi a, an chhung hnai tak an nih vangte pawh a ni ang e kei chu a vanduaiah ka ṭang ta zawk a. Private hostel dang kan han zawt kual a, seat a lo awm tawh hlawm mang si lova, kan rilru a buai takzet a ni!

          Thawhṭan zan ka inkhawm bâng inchhûng ka lut chu ka nu leh mipa pakhat khunkhân tawka lo ti ti chu ka hmu a, ka thawm an hriat rualin min rawn endun nghal a. Kan inlêngpa chu hmelṭha tak tia sawi tur ni chiah lo mah se a chhe lo hle a, a palianin a pian a nalh hmel hle bawk.

          " Mambawih, kan manganna Pathian hnena kan thlen kha hei a chhanna a lo thleng e! I u Malsawma hian hostel awmna tur ṭha i hmuh hma chu an ina awm turin a ti che a nih chu."
         
          U Malsawma hi ka u Mama ṭhianpa ṭhin, phaia lehkha zira a awm laia a inluahpui ṭhin a ni a, ka admission min lo tihsaktu pawh kha amah hi a ni. A lo patling ta em a, ka hmuh tirh khan amah a ni tih ka hre mai lova, ka nu-in a hming a sawi takah khan ka hre ta chauh a ni.

           " Nu, mi ina awm ringawtte chu a chi dawn em ni? Mi kan tibuai mai mai ang asin! Hun a la awm tho a, han zawng leh deuh ila, kan hmu mai ang," ka lo ti a. Dik tak chuan mihrang bula han khawsak vel kha ka châk hran lo a ni.

          Ka huphurh tih ka hmelah a lo langchhuak a ni ang chu kan inlêngpa chuan, " Keini tân chuan buaina tur a awm hauh lo mai, i hostel awmna tur kan hmuh veleh i insawn mai dawn alawm. Ka fanu hi a khua a har ve ṭhin riau a, i lo awm ve chuan a khawhar i hnem deuh ang chu ka ti a! Kan hnena i awm hreh ngang a nih chuan kan inbul lawkah chuan hostel chu a awm ngei mai a, mahse, a ṭha viau lova, discipline a chhiat bakah naupang ruihhlo tih chîng an awm nual a, ka duhpui vak lo che a," a lo ti ve a. A aw chu a hmêl ang chiahin a pa nia mawle!

          Kan inlêngpa chu melh zauh pahin, " In tihdan dan a ni mai, mahse, ka tibuai mai mai ang che u tih ka hlau a! In buaina thlentu nih ka duh loh vang a nia.." Duhthlan tur dang nei miau hek lo ile!

          "Min tibuai lutuk lo turah ngai ang,  nula nungchang ṭhalo lutuk ni turah chuan ka ngai lo che a," nuih sak pah chuan a lo ti a.

          Ka nu chuan, " Ka fanu a nih vanga sawiah min lo ngai lo la, nula nungchang ṭha tia sawi chu a ni ve ṭhin alawm! Thil pawimawhah bak a lêng chhuak ngai lova, ka hmuh chinah hi chuan a fel rih viau e," nui hawk hawk chungin a lo ti ve ngial a.

          Ka nu hian min fak khât viau a, min fak ve hi chuan ka lai deuh tlat zel nia!

          Kan inlêng haw hnu chuan eng eng emaw sawiin kan la ti ti reng a, dar 11:00pm ah ka nau drama zir zo a lo haw a, kan mu ta chauh a.
         
          Hostel awmna tur kan hmuh mai loh avangin U Malsawma te ina awm mai tur chuan thu kan titlu ta a,ka châk fahran lo hle a, a chhan ber pawh a nupui hi intivei ve tak mai a ni tih ka lo ralkhat hriat ve vang a ni.

          Aizawl ka phei ni  chuan tluang takin kan thleng phei a, u Malsawma te in awmna lai hi ka hriat chian chiah loh avangin phone mai tumin ka phone chu ka phawrh a, a number ka dial lai chuan ka hminga min ko ni-awm tak ri hi ka hria a. Mahse, helaiah min kotu tur awm an awm lo ema ka hriat avangin ngaihsak lem lo chuan ka phone ringawt chu ka buaipui a, ka call tlang thei miah lo lehnghal! Call nawn leh tuma ka phone ka en lai tak chuan chiang taka min ko ri chu ka hre leh ta a.

          "Mapui..."

          Ka va hawi phei chuan u Malsawma, nui var var chunga ka lam pana lo kal thauh thauh hi ka va hmu ta a!


VANMALSAWMA
Sbk Pachuau

CHAPTER 2

          Ka thaw huai a, mahni-a an in zawn  huphurh ruk em em laia amah ka hmu hlauh chu ka lawm tak zet a ni!

          " Ka rin aiin in lo thleng hma a, i chau em?" ka bul a lo thlen phei rual chuan min be nghal a.

          "Chau love, kan rawn tluang em a, kawngah kan chawl mang lo bawk a, kan lo thleng hma ta phian a nih hi," tiin ka lo chhang ve nghal zat a.

          Ka bungrua khai nawlh pah chuan, "Motor dahna hi a buaithlak ṭhin a, sawlai deuhah sawn ka dah a, tikhan lo ding la, i bag hi ka va dah phawt ang a, vawihnih kalah kan zawh mai dawn kha, bungrua i ngah lo em mai," tiin a kal ta nghal a.

          Suitcase pahnih leh air-bag lian tâwk pakhatah ka inbeng leng hram a, commerce ka lak avangin ka lehkhabu hlui ho ka keng deuh vek a, college-ah pawh a la ṭangkai an tih vangin a pawimawh tura ka rin chu ka keng tawp a, bungrua ka ngah phah ta réng  a ni.

          A hnunglam aṭang chuan ka thlir zui vang vang a, a palianin a inkhaithli ṭha bawk si a, hmuhnawm a tling a ni!

          A lo let leh chuan suitcase chu a pahnihin a khai leh nghal a, khai ve tuma ka lo ban pawh chu engah mah ngai lovin ka hma-ah chuan a kal phei nul nul a. Tihngaihna dang awm ta lo chu ka zui phei ve ta hnak hnak a.

          An in kan thlen chuan ka lo rin lawk ang ai daihin a nuam tih ka hmu nghal a! An in kawta pangpâr mâwi tak tak lo awm chuan min hip nghal zar mai a ni.

          Inchhûng kan luh rual chuan hmeichhe naupang nui har har ri kan hre nghal a, choka aṭang chuan hmeichhe naupang duhawm em em mai leh nu pakhat, kum 35 bawr vel tur hi nui chungin an rawn in-um chhuak a. Ka hmel a hmuh rual chuan hmeichhe naupangtê chu a ding chat a, a bula nu pawnfenah chuan a vuan nghal bawk a.

          "Bawihte, hei hi anih hi i u Mapuii chu, rawn chibai rawh le," u Malsawma chuan a rawn ti a.

          Keimah zawk chuan va pan hnaiin a bianga piaisak zeuh pah chuan, "Bawihtei maw i nih? I hmel a va han ṭha em em ve! I hmingpum min hrilh phal em?" ka han ti a.

          "Lalhruaizeli..." nui sen senin min chhâng a, a duhawm takzet a ni!

          U Malsawma chu lo ṭawngchhuak lehin, " I room turah i bungruate hi dah phawt ila, inbual faia awm hahdamte pawh i duh ang, i room tur ka lo kawhhmuh phawt ang che," a ti a.

          Bawihtei kuta vawn pah chuan ka bula kal ve tur chuan ka sâwm a, a lo kal ve mai bawk a. A nu awmna ka zawt  a, a zin thu-in min chhâng a. A zinna hmunte ka zawt a, ṭha deuhin min chhâng zel a, hmeichhe naupang fel tak chu a ni phawt ang mawle!

          Ka inbual zawh chuan nu pakhat lo awm ve khan thingpui in turin min rawn ko a, nu nelawm pui hi a ni roh a. Min be lumlam peih phian a, a hming Tluangi a nih thu leh 'nu Tluang' ti-a ko mai tura min duhthute a sawi bawk a. Bawihtei pian hma deuh aṭanga inhrawn tawh an lo ni awm e, amah vang chuan ka tlangnel phah ve sawt a, Bawihtei pawh chuan min nêl nghalin ka bulah a tawlh ve hrat hrat reng a.

          Class ṭan ni chuan u Malsawma rualin ka kal a, Lunglei lama kan vênga mi  Judith-i a lo lut ve hlauh a, ani pawhin ṭhian leh hmelhriat dang a lo nei em em bik lo bawk nen kan inkawp nghal chat a, a zia phian!

          Kan ban hma deuh avangin mamawh eng eng emaw lei tura bazar kal kan rawt a, college piah deuha taxi changa kan lo dinlai chuan u Malsawma  a rawn tlan phei a, min hmuh chuan kan bulah a rawn ding a.

          "Mapui, in haw hman tawh em ni?"

          "Hei ka ṭhiannu nen hian mamawh leia bazâr kal kan lo tum deuh a."

          "A nih chuan ka rûalin bazâr thleng chu in lo kal thei alawm, lo lut ula," a motor kawngkhar hawn pah chuan a rawn ti a.

          Motora kan chuan chhûng zawng chu Judith-i ti ti ngaihthlakna atân kan hmang a ni ringawt, a ṭawng duh mai bakah fiamthu a duh ve hmel phian a, thil nuihzatthlak deuha sawi dante a thiam a, u Malsawma pawh a nui ve hawk hawk reng a.

          Kan vêng lamah kha chuan kan inhnaih em em loh bakah amah hi thawveng ve angreng tak a lo ni bawk nen kan inkawm ngai vak lova,  luruh ring deuh, ri ve hawr hawr chi a nih vangte pawh a niang chu 'lerh' ti-a sawi pawh a hlawh viau.

          Zarkawtah kan chhuk a, u Malsawma erawh annu zin a lo haw dâwn avangin a haw tlang nghal thung a.

          Kan duh angte kan lei zawh hnu chuan a la hma deuh bawk a, restaurant-ah inhnawhpuar turin kan chawl a. Kan thil chah nghah paha kan ti ti mawlh mawlh lai chuan tlangval pathum hi an lo lut ve a, an zînga pakhat chuan min rawn melh leh vang vang ṭhin a, ka awm a tinuam chiah lo hle a.

          Rei pawh an la ṭhut ve hma chuan pakhat chu thochhuakin kan ṭhutna lamah a rawn phei a, " Min lo hrethiam ula, vawiina kan class a mite kha in niin ka hria a, commerce student in ni ve tho tiraw?" nui sâng chungin min rawn zawt a.

          Judith-i chuan, "Aw, ni e..... Nangni in ni ve tho em ni? Tumah hriat kan la nei lova, min lo hre hlauh lo la chu kan hre dawn miah lo che a nia," nui var var  chungin a lo chhâng vat a.

          "Nula hmelṭhate chu hriat in har hleinem, in hmel kan hmuh rualin in thlalak kan thinlungah a in-print nghal a, kan hre nghal mai che u alawm," nui hawk hawk chung chuan a ti a, "Ka ṭhiante pawh saw kan class ami an ni ve tho a," a ṭhiante lam hawi zauh pah chuan a tih zawm zat a.

          "I ṭhiante chu ko phei la, kan bulah lo ṭhu ve r'u. Kan inhmu hlauh chu tihzia e, hmelhriat kan la nei ve mang si lova, ka ṭhiannu lah hi a zakzum ang reng bawk si. Class kal leh hunah nangmahni avangin kan mikhual lutuk dawn tawh bik lo a nih chu!" Judith-i chuan a lo ti leh zung zung a.

            A ṭhiante a koh phei hnu chuan hmingte kan inhrilh tawn a,min rawn betu ber kha Kima a ni a, nichina min rawn en rengtu kha Bena, an ṭhianpa chu Marama a ni thung. An felin an hawihhawm hmel a, an bula awm pawh a nawm hmel viau.

          Marama leh Kima chu an ṭawngduh ve hle a, Judithi te nen chuan an ti ti bawrh bawrh a, kei erawh chu engvak sawi lovin an thil sawi nuihzatthlak deuhah ka lo nui ve vel mai mai a. Bena pawh eng emaw changa an thil sawi a lo tuihnih veleh zauh ṭhin tih loh chu a ṭawng tam lem lo.

          Thil kan la ei mawlh mawlh lai chuan Bena chu a tho tharh a, counter lam pan chuan a phei a, reilo te-ah a lo let veleh mai bawk a. Amah ka va melh apianga min lo en leh vung vung ṭhin chuan ka awm a tinuam lo tak zet a ni.

          Judithi chuan nuam a tih hmel hle a, a ṭawng barh barh reng a, a nui har har reng bawk a. Hetianga ṭhiante zinga hlim thei tak, tu pawh kawm ngeih nghal mai thei ang chi hi ka awt ṭhin a, a chhan chu ṭhian hi ka kawm tam lem lova, midang bula tlângnêl taka awm nghal bawrh bawrh hi ka thei ve tlat ṭhin lova, mi zîngah ka inkiltawih phah fo reng a ni.

          Thil eina man pek kan han tum chuan pek vek a nih tawh thu an lo sawi ta mai a, nichina Bena thawh tharh chhan kha hei ngei hi a lo nih hi! Tlem tal ka lo pe ve ang ka tih lah chuan an ngai pawimawh lo nasa mai a.

          " Ho lutuk Mapui, officer fapa tân khatiang lek chu eng tham mah a ni lo," Kima chuan a lo ti sam et a.

          Haw nghal mai ka duh thu ka sawi chuan Bena chuan min rawn melh vat a,  "Kan lo thlah ang che u, in awmna sawi ula," a lo ti vut a.

          "A ngai lo, in tân a buaithlak lutuk ang,  kei Republic vengah ka awm a, ka ṭhiannu hi Mission vêngah daih a awm bawk si a, kan haw kawng a inpersan lutuk!" tiin ka lo hnial vat a.

          Marama chuan, " Chuti a nih chuan tih dan ka hria e, keiin Judithi hi ka thlah ang a, Kima leh Bena te tân Mapuii thlah a rem bawk a, an thlah nghal thung ang a, a ṭha mai lawm ni?" a ṭhiante rawn pah chuan a lo ti a.

          A ṭhiante pawh chuan Marama rawtna chu ṭha an ti a, keini pawh chuan kan hnial duh ta bik lova.
         
           Marama bike chu a tunlai  thawkhat ve hle a, Judithi lah chuan fiamthu-in, "Min thlauh palh ang a, min tlansan daih ang e aw! Ka ṭap vak a ni mai, i bialnu kan hmuh pawhin min tlansan miah suh aw!" a lo ti ve reng a, Marama chuan chhâng lem lovin a lo nuih liampui mai mai thung a.

          Marama te tlanliam hnu chuan keini pawh Bena motorah chuan lutin kan vêng lam pan chuan kan tlan chhuak ve nghal a. Kan awmna kan thlen chuan chhuk pahin lawmthute chu ka han sawi ve luam a.

          "Lêng turin min sâwm dâwn lo em ni? Ṭhenkhat lo len châk deuh an awmin ka hre tlat!" nui ṭhâ chung chuan Kima chuan min zawt a.

          "In lo len duh ka ring lova, ka sâwm ngam lo che u alawm! In duh phawt chuan lo leng rawh u," ka lo ti let vat a.

          Bena chuan, "Lo len i phal chuan nidangah kan lo la lêng dawn nia, tunah chuan kan lo lut hrih lo mai ang," lo ti ve  vatin kan inmangṭha hnu chuan an tlan liam ta nghal a.

          Kawngkâ hawn tuma ka ban lai tak chuan chhûnglam aṭangin a rawn inhawng a, nu Tluangi leh Bawihte-i chu an rawn inkai chhuak a, Bawihte-i chu lungchhiat hmel takin a men pár  a.

          "E he! Tunge Bawihtei hi lo hau a? Ka nau hmelṭhatê hi a fel tehreng nen tunge lo hau mai mai?" tih pahin ka bulah ka pawt hnai a, ka kuah nghal bawk a.

          Nu Tluangi chuan lungawi lo hmel a pu deuhin ka hria a, ka mitmei chuan thil awmzia ka han zawt a.

          "Rosie-i ina a awm tawh hi chuan khua a vâr lo ṭhin a nih hi! Malsawma hi a dawhthei em a, an la innei hram hram a ni ber e, i la hriat tur tho a nih vangin ka hrilh che a nih chu. Bawihtei hi a nu awm aiin a awm lohin a hlim zawk. Hmeichhe rapthlak lutuk mai!" a thinur ngang a niang, nu zaidam tak nia ka lo hriat kha a insehruh nasa mai a.

          Thil awmdan tur awm-ang chu ka manthiamin ka inhria a, Bawihtei chu ka rooma lo kal a duh em tih ka zawt a, a duhthu a sawi hnu chuan inchhûngah chuan ka luhpui nghal a.

          Sitting room sofa-ah chuan Bawihtei nu chu bawp khawkherhin hahdam hmel zetin a lo ṭhu awn diai a, kan thawm hria chuan a lo hawichhuak zawk a, min ngai pawimawh lo tih hriat zetin a phone kenlai chu a bih leh nghal zat a.

          "U Rosie, i lo thleng tawh a ni maw? I chau em?" bengvar chhuahin châk lo tak chung chuan ka'n be hrâm a.

          "Aw.."

          A bak chhanna ka dawng lo!

          Chuti taka min tham lotu chu ka be zui châk bik lem lova , Bawihtei chu kaiin ka room lam pan chuan kan kal nghal a. Inchung aṭanga u Malsawma lo chhukthla thauh thauh chu ka han melh zawk a, be ta lem lo chuan ka roomah chuan kan luhsan mai a.

          Ka inthlak chhûng chuan Bawihtei chuan ka phone-ah a duhzawng a lo en a, naupang tih takah a lungawi lohna pawh a hre zui leh tawh lova, hlim deuhin phone-a zaite chu a thiam ang angin a lo zawm ve rât rât a.

          Ka inthlak zawh hnu pawh chuan kan la awm ta reng a, youtube-ah eng eng emaw ka enkual pui a, kan tlei phian a ni.

          Sitting room lama hmeichhe thinur râwl a rawn rikchhuah rual chuan hlauhthawn hmel zetin Bawihtei chuan min rawn ngheng hnai nghal rawk rawk a, kei pawh chu hlauhthawnna-in min rawn bual ve nghal bawk a.

          "Khati khân au vak kher zel teh suh, Bawihtei hi ngaihtuah ve deuh la, hlauhlawpin i awmtir ziah hi a ṭha lo. I fanu a ni a, tlem talin ngaihtuah ve deuh teh. A thuhrimah ka thil zawhah che khan thinurna tur a awmin ka hre hauh lo, i lo haw hun tura i sawi aia tlaia ilo haw chhan ka zawt mai chauh che a nih kha."

          U Malsawma ṭawngka chhuak chu vin lo mah se a lungawi bik lutuk lo tih a hriat theih mai a, hetianga inhau ri hi ka la hre ngai si lova, chhungrilah ka khur ru zawih zawih a, Bawihtei hriat hlau tak chuan ka inhumruh ngat ngat a!

          "Ka ning lutuk!  Min ringhlel niawm fahrana thil min zawtkual ziah hi ka hne tawh, ka lo haw hma lo a nih chuan chhan neiin ka tlai tihna a ni mai.  Zin haw chauh nen ninawm hlawm lutuk mai!" A auvin a au a ni ber zawk alawm le!

          Hetiang tehhrepa nupa han nih mai chu a va hrehawm dawn ve aw! Pasal neih pawh a châkawm loh rawih rawih mai alawm. A rang thei ang bera insawnchhuah vat ka duh takzet!

          A nute thawm a hriat lohna turin Bawihtei chu earphone vuahtirin a hla duhzawng nia ka hriat chu ka play sak ta ngawt a! Khatiang thawm kha naupang hriat chi a ni mawlh si lova, an sawi ai daihin a lo nasa a nih hmel tlat, Bawihtei chu ka lainat reuh khawp mai.

          Thawm a reh tak deuh hnu pawh chuan ka la chhuahpui duh lawk lova, nu Tluangin min rawn auh hnu-ah kan chhuak ta chauh a.

          Choka-ah chuan thingpui pahin nu Tluangi ti ti ka ngaithla a, ka rilru-ah erawh a lut lo hle thung. Bawihtei erawh chu thil a ei zawh rualin ka phone-ah games khelin a bur lehnghal chat a,a nu lam ngaihtuahna hun nei lova a awm chu a ṭha phian e.

          U Malsawma lo kal lai pawh chuan nu Tluangi chu a la ti ti bawrh bawrh reng a, fridge-a tuivawt chu la-in ngawi rengin an room lamah a chho lehnghal a, ka khawngaih phak ni mah suh se ka khawngaih ngawih ngawih!

          Nu Tluangi ei rawngbawl chu ka theih ang angin ka lo pui a, a zualpui ka tihpui zawh hnu-in Bawihtei home-work ka enpui leh phawt a, chumi hnu-ah ka inbual ta chauh a.

          Ka inbual zo, ka inthlak lai chuan ka room kawngkhar ri rak thawm chu ka hria a, Bawihtei a nih ka ring mai a, ka inthlak laklawh em avang chuan ka lo ngaihsak lem lova.

          "He inah hian engtia rei nge khawsak ve i tum?" rawn titu aw ka hriat rual chuan ka phu zawk a, thla chu nei ila ka thlawk thui khawp ang le!

VANMALSAWMA
Sbk Pachuau

Chapter 3

          Ka hamhaih em avang chuan chhan nachâng pawh ka hre mai lova, ka thinphu nasa lutuk control tum chuan thawk ka la halh a.

          "Ka..ih...aw...ka hre bik chiah lo, hostel awmna tur ka hmuh veleh ka chhuak ang."

          A mitmeng lian kel kawl chuan chiang zetin min melh a, min ngaihnep hmel fê hian min nerkhum sak a.

          "Hostelte chu a tam alawm, hmuh tumin zawng la, awmna tur chu i hmu vat mai ang."

          "Nia, awle.... "

          Sawi tur dang ka hre hlawl lo!

          "Engtin nge  hmelhriat satliah mai mai hetiang ina khawsa tura ti nge maw a nih hrep ni! Awmpui chu ni la thuhran, college ka kal e chu i ti ve khanglang bawk si a," inher nghat pah chuan a ti a, min ngai pawimawh lo fahranin an room lam panin a chho nghalh nghalh a.

          A thusawiin min den natzia chu turû tak a ni! Khati ang em ema inzahlohna leh inhnuaichhiahna kha ka la tawng ngai lova, ka thinlung chhûngril hi a na vawng vawng a, ka bing mup mup ni maiin ka hria.

          Ka zak ru ngawih ngawih a, chenna tur nei zo lo leh mi vakvai ang maia min ngai a ten hmel taka min melh kha ka mitthla-ah a châm zui nghal tlat bawk. Ka nu-in hria se min lainat nasa dawn lutuk a, min chah haw nghal vang vang duhin ka ring.

          Ka inrin hman hma-in ka mit aṭang chuan mittui a rawn luangthla zawih zawih a, khuma bawk chung chuan rilru mumal pu hleithei lêk lovin ka thinlung natna chu ka kawm a ni ber e.

          Ka phone rawn ri pawh chu ngaihsakna châng ka hre lawk lova, a vawihnihna atâna a rawn in-ring leh chuan phur lo zetin ka'n la kang a, ka nu a ni!

          Engtin nge hetiang boruak kârah hian pangngai takin ka biak theih tehlul ang ni! Mahse, ka chhânglet lo a nih chuan ka biak leh hma chu rilru nuam lo deuhin a awm leh dawn tih ka hrechiang bawk si!

          Ka mittui chu hruhulin ka theih ang tawka insûm chung chuan ka va call let a, a lo la rang ngei mai!

          "Hello.... Mambawih, i buai em ni? Phone i va la thei lo ve! Ka rilru hi a chhan sawi tur awm chiah si lovin a nuam lo riau a, i ṭha em tih ka hre duh a.."

          "Ka ṭha alawm nu, min ngaihtuah suh."

          "Mambawih, i aw chu a va lawi ve! I ṭha tak zet maw?"

          "Aw, ṭha lutuk! Bawihtei nen kan infiam kan ṭe nasa deuh a, ka aw a lawi vek anih hi. Ka ṭha lutuk a nia, ngaihtuah ka ngai reng reng lo, nangmah kha lo inenkawl ṭha hle la."

          Ka rin ai takin ka ṭawng a pângngai chho thei a, ka thaw huai mai.

          Kan college chungchâng leh thildang neuh neuh kan sawi hnu chuan kan duhtawk thei ta hram a, kan inbe zo chiah na-a ka ngai lehnghal vawng vawng mai a ni.

          Bawihtei min au thawm ka hriat takah chuan phur fahran lo chuan ka chhuak phei ve ta a, u Rosie-i chu roomah a la awm ni ngei tur a ni a hmel hmuh tur a lo awm lo hlauh a,ka thaw huai thei!

          Hetiang ang tehhrepa awm reng ai chuan ṭha vak lo pawh ni se hostel awm ang anga invawmluh vat chu ṭha berin ka hre ta a.

          Judithi chu min lo ngaihtuah pui turin ka ti a, Bena te ṭhianzaho pawh chuan min ngaihvenpui an lo intiam ve bawk a, hmu vat turah ka inngai.

          Boruak ṭha lo em em dang thleng tawh lo chuan kan awm chho ve bek bek a, u Rosie-i inah a awm tlem ṭhin chu kan tân lawmna a ni ringawt! Ina a awm chuan thaw hi a pik ru hluah hluah ṭhin.

          Bawihte-i chuan min ngaina ve tawh takzet a, kei lahin ka theih ang tawkin ka ngaihsakin ka duat a, class ka kalsan hlante hian ka ngai hman reuh ṭhin nia!

          Bena te ṭhianho chuan hostel chu min lo zawnhmuhsak hlauh mai a, ṭha lutuk ni lo mah se kan college aṭangin a hla lutuk lem lo bawk a, hostel dang ṭha zawk hmuh hma chu a awm theih maiin ka ring a ni.

          Mahse, thlatharah chauh a insawn luh theih dawn a, hmeichhe pakhat chu a thil zir a zawh tawh dawn avangin tunthla bak awm a ngai tawh dawn lova, chumi awmna ruakah chuan kei ka awm thung dawn a ni.

          Nikhat ka class bâng chu u Malsawma rualin ka haw a, hostel awmna tur ka hmuh tawh thu leh thlathara ka insawn tur thu chu ka hrilh a.

          Engmah sawi lova a ngawih reng avang chuan nuam lo ka ti ru hle a,  min chhâng dawn ta lo emaw ka tih hnu-ah a rawn ṭawngchhuak ve ta hram a.

          "Kan bula chen chu a hrehawm viau ang tih chu ka hria alawm! Mahse, i awm loh chuan Bawihtei'n hrehawm a ti viau-in ka ring. Kan bulah awm reng la chu ka duh ber a, mahse, kan inchhûng boruakin a zir miau si lova, ka dang lo mai ang che."

          Han sawi ve mai tur ka haihchham leh ta tlat pek a, kei pawhin Bawihtei chu ka ngai viau dawn a ni tihte ngaihtuahin ka rilru ka kawm zui ta mai mai a.

          In kan thlen chuan a pa motor thawm hria-in Bawihtei chu a lo tlanchhuak vat a, min rawn hmuh chuan a pa pawh ngaihven ta lo chuan ka lam panin a rawn tlan nghal a. He naupangtê vanga he inchhûng ka chhuahsan hrehzia hi ka ngaihtuah ṭha ngam lo hial a ni.

          Zana ka nu nen kan inbiak chuan ka hostel hmuh chungchâng vel chu ka sawipui a, hostel ṭha lutuk  a ni lem lo tih ka hrilh chuan ka hlauhthawn ang ngeiin min rawn hnial ta chat mai reng a!

          Hostel ṭha zawk leh him zawk ka hmuh hma chu nghak turin min ti ta tlat a, ka awmna chhûngkaw chanchin han hrilh dawn ila min ngaihtuah nasa mai dawn bawk si a, ka rilru a buai ru ta hle a.

          Sitting rooma TV ena Bawihtei nen kan lo ṭhutlai chuan u Malsawma chu a lo chhukthla a.

          "I nu-in min lo bia a.." sofa-a ṭhut pah chuan, "I hostel sawiah khan awm lo turin a duh che a nih hmel!" a tihzawm leh nghal zat a.

          Awm lo tura min duhthu ka hnena a sawi hnu-ah ka tumlui ang tih hlauvin u Malsawma a lo sawipui tih a hriat mai a, ka nu kha a ni miau a, ṭha lo nia a hriat thilah chuan a theih ang anga min dan a tum leh ngei dawn niin a lang.
         
          Chhan tuma ka kâ ka an dawn lâi tak chuan u Rosie-i, a nute in lama chaw  eia chhuak chu a lo lut chiah a, ka ngawi leh ta zawk a. Rooma chho tlang lovin kan bulah chuan a rawn ṭhu ve teh mial a!

          Chutia a nu lengchhuak lo haw chu Bawihtei chuan a lo ngaihven eih lova, inlêng lo lut satliah ang lekah a ngai ni mai awm a ni. Nute lêngchhuak haw lo lawm rual lek a la nih laia chutia engah mah ngai lova a han awm mai chu a nu chu a ngai miah lo tih a hriat hliah hliah mai a ni.

          Rei pawh a ṭhut hma chuan, "Naktukah hna thilah zin ka ngai a, ka han insiam teh ang," tiin tûma chhanna pawh nghak lem lo chuan a chho ta daih a. Chhanna nghak pawh ni ta tehreng se a nghak chhuak kherin ka ring lo, a chhan chu an nupa hian kârkhat vel chu an inbe mumal tawh lova, kei lahin min be hmasa a nih loh chuan biak ka tum lo bur bawk si!

          U Malsawma chuan ngaih pawimawh loh hmel zetin Bawihtei chu school lam chanchin a zawt zui mawlh mawlh a, a nupui zin tur chu eng he hu-ah a ngai vak lo a nih hmel khawp mai.

          A tuk zînga ka han harh chuan ka room nî-in a rawn chhun uar tawh avangin a tlai tawh hle tih ka hre nghal a, sana ka'n en chuan dar 8:30 am a lo ni vah mai le! Helai hmuna ka awm hnua thawh ka hai vawikhatna a la ni. Nizan lamah muhil thei lovin eng eng emaw ka ngaihtuah a, ka muthilh meuh kha chuan zinglam dâr 3:00 a pel tawh hialin ka ring!

          Hmanhmawh tawkin ka tho nghal a, choka lam pan chuan ka phei nghal hlawk hlawk a. Ka va thlen chuan a lo ruak huai a, nu Tluangi tak ngial pawh hmuh tur a awm lova. Ni dangah chuan tun ang hunah hi chuan choka hi a chhuahsan ngai miah lova, chet velna hnuhmâ awm lovin a fel thlup bawk si nen mak ka ti rilru hle a.

          Chutia makti taka ka din reng lai chuan kawngkapui lamah thawm a lo awm a, choka aṭang chuan ka chhuak phei nghal a. Bawihtei te pafa rawn inkai lut chu a ngaihna hre lo zetin ka lo melh reng a.

          "Nu Tluangi kha a fapa nupui nau pai a fuh vak lo nge an buai deuh a, haw turin an rawn chah thut a, kan va thlah lawk a ni. I thawhna a rei tawh em?"

          "Aih, rei love. Dik tak chuan ka tho chiah zawk a, thawh ka lo hai a, a zialo tak tak a ni."

          "A pawi hleinem, chawlh a ni tho bawk a, muangchangin eirawng kha lo bawl la, hmanhmawh a ngai miah lo a nia. Ka ril pawh a la ṭâm lo."

          Ka inthlahrung ru ang reng hle a, chawlh pawh ni mah se nula apumpa kha chen chen han mut mai chu a zialo lam deuh chu a ni. Ka nu chuan hria se min zilh leh malh malh tawh ang chu!

          Zingkârah zin tura u Rosie-i a chhuah daih tawh avangin kan pathum ei tur chauh siam a ngai a, rawngbawl pawh a awlsam phian.

          Ka peihfel vek hnu chuan Bawihtei chu a pa ko turin ka tîr a, chaw ei chu ka siam nghal mawlh mawlh a. Pasalte ko tura fate tîr ka inchan deuh a, ka lai ringawt a nih chu! Ka ngaihtuahna aṭanga harhchhuak vatin keimah leh keimah chu ka inhau ru mawlh mawlh a, ka thil ngaihtuah avang chuan ka zak ru chem chem mai a ni.

          Ka eisiam chu u Malsawma chuan tui a tihthu sawiin min fak ve luam a, ka lawm ru hle a, ka lai leh ngawt pek bawk. Kei hi ka ngaihtuahna hi a dik lo ṭan tlat! Ka incontrol vat a ngai tiin ka infuih rilru mawlh mawlh a.
 
          Nu Tluangi a awm tak si lovah chuan inchhûng enkawl chu ka kutah a awm chu a ni ta mai a, engtikah nge a lo let leh theih ang tih lah hriat a ni si lova; ka nu duh ang ngeiin hostelah chuan ka lut thei dawn ta lo a nih hmel ta viau bawk.

          Chhunlama Bawihtei school kal hruaitu tur leh kan awm loh hlana lo awmpuitu tur erawh an awm ngei a ngaih avangin u Malsawma chuan a zawng nghal a. Vanneihthlak deuh maiin kan awmna bul lawka an nula chuan inhlawhna tur a lo duh hlauh mai a, tlai lamah computer class a kal a, chhun hun awla thawh tur a lo zawn mêk lai a lo ni ve bawk a, u Malsawma chuan a va be fel nghal vat a.

          Zankhat chu Bawihtei'n ka bula riah a ngen mauh mai a, kei lahin pawi ka lo ti lo nasa mai si a, a pa chuan a ui deuh viau na-a Bawihtei berin a ngen tlat si a, ka riahpui ta a. Chuta chin chu ka bulah chuan a riak ta zauh zauh reng a, a pa bulah leh ka bulah a inriah chhawk zak zak a ni ber mai.

          Class kan la ṭha viau a, zan lamah Bawihtei muthilh hnu-ah ka zir ṭhin bawk a, zirlaiah harsatna ka nei rih lem lova, class kal pawh a nuam ṭhin khawp mai.

          Benate ṭhian thum nen chuan kan la inkawm tlâng zel a, Judithi leh Marama chu an inngaizâwng ta bawk nen ṭhian dang kawm lovin kan hlim tawk ve ṭhin hle a ni.

          Kâr hnih zet a zinbo hnu-ah u Rosie-i pawh chu a lo haw veleh tawh a, tun ṭum a zin haw chu a mood a rawn fuh haw viau a; ka lo huphurh ang aiin kan boruak pawh a ṭha phian a! U Malsawma nen erawh ṭul tawpah lo chuan an la inbe meuh lo thung.

          Inrinni vawikhat chu Bawihtei nen Lalat Park-ah kan leng a, u Malsawma'n min dah a, haw lam chu mjn rawn hruai hman dawn loh avangin taxi la mai turin min chah a, min letsan leh nghal a.

          Nilengin kan awm a, midang pawh kal ve an awm nual a; a ṭhen picnic te, a ṭhen keimahni anga leng khawthawng mai maite an ni nawk hlawm a. Bawihtei pawh naupang dang nen an infiam a, nilengin hun hlimawm tak kan hmang a, nuam kan ti ve hle a ni.

          Tlai dâr 3:00 velah chuan haw kan tum a, u Malsawma khan kan taxi hman tur driver number kha min pe a, call tum chuan ka han zawng a, ka hmu zo ta miah lo mai a! Ka save ve ngei chuan ka hre sia, ka zawn leh ngial pawh chuan ka hmu zo ta chuang lova, tihngaihna dang awm hek lo le hreh deuh tak chung chuan u Malsawma number chu ka dial a.

          "Hello.."

          "Aw, ih... englo a nia, taxi driver number min pek kha ka save emaw ka tia, ka hmu zo miah lova, khawngaihin min lo hrilh leh mai teh."

          "Tikhân lo awm ula, ka rawn hruai ang che u," tiin phone chu a dah nghal daih a! Min rawn hruai hman dawn loh thu kha a sawi si a, zawhfiah hman loha a dah daih chu le ka ti rilru neuh neuh a.

          Kan lo nghah chhung chuan chhuna kan thil ei bang la awm chu kan lo ei mai mai a, rin ai takin a lo thleng har phian lehnghal!

          A lo thlen meuh chuan khua a tlai ruih tawh a, traffic jama a tan thu a sawi luam a, muangchâng tawh lovin kan haw ta nghal a, in kan thlen chuan khua pawh a thim titih der tawh a.

          Inchhûng kan luh ruala ka thu hriat chuan min ṭhâwng chiang kher mai!

          "Tikhân nupa anga awmin, naupang chhuanlama hmangin pâwnlamah nuam in lo va tawl vel a ni maw!"
         
         

VANMALSAWMA
Sbk Pachuau

Chapter 4



          Ka thu hriatin min ṭhawn em avang chuan han hnial mai tur pawhin ka ṭawngchhuak thei tlat lo! Bawihtei kut chu nghet taka hmer chungin ka ding khur dar dar a, kalsawn tur lahin chakna ka nei hek lo.

          "Engtin nge khatiang ngaihdan tenawm lutuk kha i neih theih zawk? I ngaihtuahna thianghlim lo tak kha midang tihnatna atân chuan hmang lo hram teh!"

          U Malsawma rawn ṭawngchhuak chu a chang ṭha beng bawng hle a, ka lo ip chawih a, boruak ṭha lo tak lo thleng tur chu a inmûng mêk a ni si a, ka hlauthawng a, ka ṭah a chhuak em em bawk.

          "Ka ringhlel e te min han tikual vel a, nangmah i lo rinawm loh vang lek a nih kha min lo rinhlelh. Tenawm lutuk!  " min rawn en pah chuan, "Nang pawh nupui nei lai ni lo an tam tehreng nen nupui nei lai kher han ngaihzawnte chu zah pawh i zak lawm ni?" a tih zawm zat a.

          "Ka....ih...englo...i ngaihdan ang kha a ni miah lo a nia!" ka ṭawng chu a bah nawk a, thil dang han sawibelh leh turin chakna ka nei lova, sawibelh tur ka hre hek lo, ṭawngchhuah ka harsat hluah hluah a ni ber.

          "Pha kual vel lo mai teh, sawi tur bar pawh i hriat loh tawp kha. A tir aṭang khan ka ringhlel tawh hrim hrim che, i melh no kual vel leh amah hip tuma i inlak fel dante pawh kha ka hre vek! I mitmengah khan i duh tih a lang reng alawm," rum em ema min melh pahin u Rosie-i chuan min ṭawngkhum sak sak a.

          Min puhna chu hnialin chhâng let ve thei ila ka ti takzet a, mahse, ka lei chu phuar beh ang mai niin ka aw lah chu ka dangah a thâmral vek emaw tih mai turin ri chhuak tur a awm miah lova. Bawihtei kut ka vawn lohna lam zawk chu ka humruh ngawt ngawt a, ka khur hlawk hlawk tawh a ni ber e.

          U Malsawma chuan, "Khawngaihin  khatia dawta mi puh kha duhtawk tawh rawh, i ngaihdan kha a dik lo hulhual a ni tih lo hre bawk la, duh aiin i ṭawng nasa ta mah mah e," a rawn ti charh charh a. "Mapui, Bawihtei nen khan i roomah lo va awm rawh u, i u Rosie-i thusawi kha chu engah mah ngai duh suh, rilru nawm loh phah nante khan i lo hmang ang e." a ti zui zat a.

          Engtin nge engah mah ngai lova ka awm theih tehlul ang ni! A thusawi khan ka thluak a fan a, min hnuaichhiah lutuk leh min hmusit tih hriat taka inzahpahna nei miah lova khatianga min ṭawngkhum kha ka tan chuan a kha-in a na ngawih ngawih mai a ni.

          U Rosie-i chuan kal tauh nghawng nghawng pahin, "A thlavâng ka hauhsak e te in han inti vel a, in inen danah hian in inkarah eng emaw chu a awm chiang alawm! Mi a ka nih loh hi, min bum chuang lovang," a ti lawng lawng a.

          U Malsawma chuan chhan enah pawh a en tawh bik lo a niang lainat hmel deuhin min rawn melh vang vang a, room lama awm hahdam rih tur chuan min hrilh leh sup a.

          Ka rooma kan awm hnu pawh chuan ka pangngai mai thei lova, ka chhûngrilah chuan hrehawm tihna, hlauhthawnna leh rilru natna ten min chamchilh tlat a, ṭahchhuah hawm hawm mai hi ka chãk takzet a, Bawihtei a awm ve avang chuan ka insûm ṭang ṭang thung a.

           Bawihtei pawh chuan min khawngaih tih hriat deuh hian min en kiau a, "Ânu hi tinge a sual em em bik le!  School-a ka ṭhiannu Cindy nu chu a fel lutuk a, Cindy chu a duat thei lutuk! Schoolah pawh a rawn hruai ziah a, ânu chuan min la hruai ve miah lo," a ti sep sep a, ka lainat tak zet a ni.

          Zanriah chu kan ei mumal lo hlawm hle a, ka ei thei thlawt lova, u Malsawma pawhin eng tham mah a ei bik lo. U Rosie-i phei chu chaw ei turin a rawn chhukthla lo hrim hrim a ni.

          Inchhûng boruak chu a hrehawm ngawih ngawih a ni ber mai, Bawihtei chu awm lo se ka chhuak nghal vang vang tawhin ka ring!

          Zanah pawh muthilh harsa ka ti hle a, Bawihtein ka bula riah a ngen leh avangin ka bulah a riak a. A muhil hmel chu ka thlir reng a, a hmel pawisawi lo leh hmelṭha tak mai chu ka en ngawih ngawih a, a nu-in heti taka a ngaihsak lo thei hi mak ka ti a, ka khawngaih reuh hle a.

          U Rosie-i min puhna kha ka ngaihtuah let leh a, ka zak a, a ngaihna ka hrethiam lo hle bawk. U Malsawma hian nula angin min en ngai lova, a farnu ang chiahin min en niin a lang. Khatiang a min puhna tur khân vawikhat pawh nulat tlangvalna lam hawiin kan la inkawm lo bawk a, kan fihlim ve tawk a ni tih ka ngaihtuahna chuan tlemin ka rilru a tinuam deuh a. Eng ang pawhin min puh mah se a mipuhna kha dawt a nih miau avangin engah mah ngai lo turin ka infuih ru mawlh mawlh a, mahse, ka hlawhtling lem hlei lova.

          Ka tân chuan u Malsawma hi ka u ang mai a ni a, a ṭawng tam lem lova, ṭul a tih bak hi chu a sawi ngai meuh lo. Nula mit aṭanga thlir chuan a chhe lova, a pa em em bawk a, a cool deuh ruih avang leh amah palian ve tawk tak a lo nihna hian mi a hîp em em bawk a ni tih ka hai bik lova. Amaherawh chu, nupui nei lai a nih bakah nuṭa ang maia ka en vang hian ngaihzawn enin ka en ngai lova, ka duh bawk hek lo.

          Ka muthilh meuh chuan khua a vâr hnai thuak a, thawh hai leh ka hlauh avangin alarm ka set thlap a, mut erawh ka kham lo hle dawn tih ka chiang ngang mai.

          Ka lo huphurh ang aiin boruak a ṭha chho ta phian a, thil ṭhalo zawk a thlen palh ka hlauh avangin u Malsawma erawh ka theih ang angin ka hel a, class kal dawn leh haw lamah pawh a ruala haw duh lovin Benate ho ka inthlahtir mai ṭhin a, dik lo taka puh nih leh kha ka hlau zek zek tawh mai a ni.

          Nikhat kan class bâng chu ṭhiante chuan lenkual an rawt a, ka hman ve loh thu ka sawi ngial pawhin kan rei loh tur thu sawiin min nawrlui tlat hlawm a, kei pawh chuan han len khawthawn ve chu ka lo châk ve deuh avang chuan haw hma ngei inbeiseiin ka aw ve ta a.

          Judithi chuan Muthi parka kal a rawt a, a panna kawng an siamṭhat tawh avangin a tlan par par theih ang a, kan haw leh hma thei deuh ang tiin kan kal ta a. Marama leh Judithi chu inphurin kei leh Kima chu Bena motorah kan chûang thung a.

          A hmun kan han thlen chhoh chuan mi lêng vel pawh an lo awm nual a, a hmun a thengthaw nuam a, hawi vel pawh a nuam hle a. Ka hawikualna lamah chuan thlang lama kalna tura an siam kawng te deuhah chuan mipa leh hneichhia inkai riala kal hi ka zu hmu a, ka hawisawn leh mai dawn a, mahse, a hmeichhia zawk chu ka hmuh hnu ni tlata ka hriat avangin ka zu ennawn leh ngat a, tlemin an lo kal hnai ta deuh bawk nen u Rosie-i hmel chu chiang takin ka zu hmu ta a!

          Mak ka ti lutuk chu hawisawn leh mai nachâng pawh ka hre lova, nula leh tlangval inngaizawng lengdun ang maiin inkai rialin an kal a, ka thinphu nasa lutuk chu a rawn zuangchhuak mai ang tih a hlauhawm zawk a ni.
         
          Inchhûnga kan hmuh ngai reng reng loh a nui hmêl chu pawnlamah, a pasal ni lo mipa dang bula a awmlaiin ka hmu ta chu a ni a, hmuhnawm ka ti hauh si lo! Engtin nge pasal fel leh ṭha em em nei siin hetiang hian a awm theih zawk chu le! Mak hi ka ti ngawih ngawih a, u Malsawma te pafa ka ngaihtuah a, ka hnuk a ulh ṭeuh mai a ni.

          "Mawh... nang eng nge i ngaihdan?" min rawn nghawk zauh pah chuan Judithi chuan min zawt a, eng chungchâng nge an sawi tih ka hre lo hrim hrim.

          "Engtin maw in tih? Ka lo hawi nasa lutuk a, in thil sawi ka lo hre miah lova," tiin ka lo zawt let a.

          "Khaw chhûngah leng kual ila kan ti a nih chu, i ngaihdan rawn thawh ve la."

          "A chakawm viau a, mahse, haw ka duh tawh tlat! Zanah u Malsawma chhuah a ngaih avangin rawngbawl hma ka ngai a, haw tawh zawk mai ang u. Nidangah, hun thawl deuhah kan la leng leh zawk dawn nia,"

          Ka dinhmun min hriatthiampui tute an ni a, ka rawtna chu pawmin kan haw ta dial a. Ka rilru erawh park-ah khan a la awm ta reng a!

          Eirawng ka bawl laite chuan ka rilru-ah thildang a lut thei hlawl lova, ka lo ngaihtuah leh veng veng ṭhin a. Tunge a kalpuipa kha ni ang a tlangval nge amah anga pawmlai nei ve tho tihte ka ngaihtuah a, ka lo ngaihtuah buai ve hle ringawt mai a ni.

          U Malsawma hi hrilh ta ila, eng angin nge a lo dawnsawn ang tih lah hriat a ni si lova, ka hrilh loh chuan ka rilru a nuam theiin ka ring bawk si lo, ka inkhâp buai hle a. Hrilh ta ila an nupa inṭhenna hial a thlen vaih chuan ka inthiam thei ngai tawh dawn lo a ni tihte ka ngaihtuah chuan hrilh rih loh mai chu ka titlu ta a.

          Rawng ka bawl zawh chuan a la tlai chhe lem lo bawk a, Bawihtei home-work ka tihpui a, u Malsawma chu sitting roomah lehkha chhiarin a ṭhu bawk a. Chutih lai chuan u Rosie-i chhuak chu lo haw-in office lama an buai thu leh hna laklawh a awm avanga lo haw har a nih thu a rawn sawi a nih chu! A hmêlah inthiam lohna a lang lova, thil sual ti hmel a pu hek lo. An sawi ai daihin a lo nasa a nih ka ring ta hial mai.

          Chaw eikham hnu chuan u Malsawma chu a chhuak nghal a, Bawihtei nen sitting roomah TV enin kan awm  a, u Rosie-i erawh chu room lamah a awm thung a.


          U Malsawma chhuah hnu lawk chuan u Rosie-i chu nalh deuha inchei chungin a rawn chhukthla a, a nute inah
 kal lawk a ngaihthu sawiin a chhuak nghal a. A nu a kalchhuak fel chiah tih chuan Bawihtei chuan min rawn en ang hê hâw a, " U Mapui, nangmah hi ânu ni zawk la ka ti ê," a rawn tichhuak phawng a!
   
          Ka hamhaih atalâng chuan ka chhâng mai thei lova, ka bulah chuan ka pawthnai a, ka kuah ta ringawt a.

          "Bawihte, i nu nilo mah ila i bulah ka awm reng dawn alawm, nu ṭha deuh i nei a, khatiang thu kha midang hriatah phei chuan sawi reng reng loh tur aw," tih pah chuan nghet deuhin ka kuah vawng vawng a. Mahni nute ngei pawh thlahlel miah lova a awm hi ka lainat ngawih ngawih a, ka ṭahpui lo chauh chu a ni e.

          Rin ai takin u Malsawma chu a rawn haw hma a, a inthlak zawh hnu chuan a rawn chhuk leh a, kan bulah lehkha chhiarin a lo ṭhu ve a. Bawihtei chu a mut a chhuah tawh avang chuan mutpui ka tum a, a pa chuan an bula riak tura a tih avangin an roomah ka chhohpui ta zawk a.

          Bawihtei chu ka muttir a, a bula ṭhu chungin thawnthu ka hrilh pah a, reilote-ah a muhil ta mai a.

          Thawm ring takin min tiharh zawk a, khum bawhin ka lo muthlu ve reng a lo nia. Inhnuai lam aṭang chuan hmeichhe thinur âng thawm a rawn chhuak a, a ṭawngkam a chhe bawk si a, Bawihtei chu a harh ang tih ka hlau hle a.

          Ka hlauh ang ngeiin a nu thinur ṭe ri chuan Bawihtei chu a tiharh ta nge nge a, hlauhthawn hmel deuhin min rawn melh a, ka lo kuah vat a.
         
          "Awle, i duh dan ang chu ni rawh se, i duh dan angin awm la, kei leh ka fanu hi i tân he khawvelah hian awm ve miah lo anga min ngaih a ṭha ang. Vawikhat pawh inchhirin rawn let tum ngai suh, a chhan chu engtikah mah ka ngaihdam ngai dawn loh che avangin! I chhuak a nih chuan rawn kir leh tawh lo turin chhuak la, kan nun aṭang hian kalbo vang vang ang che, i duh ang anga awm turin i zalen e."
       
           Zanin zet chu u Malsawma pawh a insûm sêng tawh lo a ni ber e, a thutlûkna chu a siam sual loh ngei ka beisei.

END OF FLASHBACK..
       

          Ka bula Bawihtei mu chu a rawn tal deuh a, min rawn tlawh takah chuan ka ngaihtuahna aṭang chuan ka harhchhuak ta chauh a, ka lo inngaihtuah nasat em avang chuan khaw lo vâr uar tawh pawh chu ka lo hmu lova. Ka lo inngaihtuah tlaivâr ṭhak a nih chu! U Malsawma pawh a muhil hauh bikin ka ring lo

          Muthilh tum tawh lovin ka tho ta zawk a, pawnah chhuakin pangpar tui ka pe nghal a, a la hma tho bawk a tiin muangchângin ka pe a, ka rilru ka kawm pah mawlh mawlh bawk a.

          "I va tho hma ve! I mu tlem awm hle mai."

          Ka lo hmu lawk si lova, chutia min rawn be thut chu ka phu chiang kher mai! Varanda aṭang chuan u Malsawma chuan nuihzat hmel takin min lo en reng a.
         
         
 VANMALSAWMA
Sbk Pachuau
CHAPTER  5




          "Nang pawh i tho hma ve tho a nih kha... i mu ṭha thei vak lo em ni?" ka lai ru deuh ṭut chu a hria ang tih hlauvin zangkhai thei ang berin ka lo zawt let vat a.

          "Mu ṭha thei e, tunhnaiah chuan ka muttui ber ṭum a la ni hial ang. Ka chhohsan hnu che u khan ka inbual a, ka inbual zo chu ka muhil nghal a ni mai. In thawm pawh ka hre zui lo hrim hrim, ka muttui lutuk tlat!" a awkâ pawh a zangkhai vah a, a nupui ṭhen chu a la na vak lo niin a lang. Ka lo lawm ru ve ngawt pek!

          "I mut theih chuan a ṭhat chu. Thingpui pawh ka la lum lova, ka thiltih lai hi ka zo ṭep a, ka lo lum dawn nia, ka rei lovang," tih pah chuan ka pangpâr tui pek chu ka chhunzawm nghal a.

          "Keimah vang chuan hmanhmawh duh lem suh, i hman hun hunah i lum mai dawn alawm," tih pahin varanda-a ṭhutthlengah chuan a ṭhu a, chanchinbu chu a chhiar nghal a.

          Thingpui ka siamlâi chuan inchhûngah a rawn lut ve a, chaw ei dawhkan kilin a rawn ṭhu a, chanchinbu chu a la bih vung vung a.

           A thingpui tur ka va chhawp chuan lo dakchhuakin, "Ka lawm e," a lo ti sup a, ka lo nuih let ringawt a!

          Thingpui in pah chuan nu Tluangi lo la let theih lawk loh tur thu chu a sawi a, a lo let hun tur pawh a la sawi thei lo a ni awm e.

          "I hriat angin kan boruak chu hetiang hi a ni ta si a, hmundang zawng lova kan hnena khawsa zui turin ka duh khawp mai che. I awm loh chuan Bawihtei hian hrehawm a ti dawn tih i hrethiam maiin ka ring e. I duh loh erawh chuan ka tilui lo che a, i thu thu a ni e,"

         "Nia, ka hrethiam alawm. Hmundanga awm chu ka rilru-ah pawh ka lo dah tawh rih lo hrim hrim a, tunah hi chuan Bawihtei vang hian ka chhuahsan theih che u ka ring lo. Nu Tluangi lo let hunah erawh chuan a ṭuldan azirin kan la ngaihtuah ṭha leh ang chu," ka ngaihdan dik tak sawiin ka lo chhang ve a.

          Dik taka sawi chuan chu inchhûng hrehawm ka tihna chhan u Rosie-i ber a awm tak lohah chuan han awmzui pawh chu ka huphurh tehchiam lova, ka   awm rei leh rei loh erawh chu hunin a la rawn hril ang chu!

          Rei vak lo kan sawizui hnu chuan u Malsawma chu a tho chhuak a, "Vawiin chu kal chhuah lawk ka ngai a, ka rei ka ring lova, chhuahna tur pawimawh i neih lem loh chuan chawhnu lamah Bawihtei hi a pi leh pute bulah chanchin hrilh pahin va lenpui ila ka ti deuh a, i peih chuan lo kal ve ta che," min rawn en pah chuan a ti a.

         Chhuahna tur pawimawh ka neih loh thu leh an bula kal ve chu ka hreh loh thu ka lo sawi hnu chuan room lam pan chuan min chhohsan ta a, kei pawh chuan eirawngbawl chu ka ṭan ve ta nghal a.

          Bawihtei pî leh pûte(U Malsawma nu leh pate) in kan thlen chuan tlai lam dâr 3:00 a ri der tawh a, rin ai taka u Malsawma chhuak a rawn haw har tak avangin kan tlai ta deuh a ni.

          An awmna hmun chu a thengthaw nuamin compound pawh an nei zau ṭha hle a. U Malsawma pa a pension hnu hian Aizâwl hmun lunlâia motor khu nena inchiahpiah renga awm chu an nin avangin Aizawl vêng hmawr lamah inhmun leiin an duhthusam angin in an sa a, motor kawngpui pawh vek tho a nih avangin kal velna a buai chuang lova, a nuam em em mai a ni.

          An insak vel lai hian u Malsawma hian nupui a nei a, u Rosie-in nau a pai avangin inneih pawh an ti deuh chûk chûk a ni awm e. In an sak zawh hnu chuan u Malsawmate nupa hian an in hlui chu an luah zawm ta zel a, a nu leh pa bakah hian a farnu neihchhun ten an in thar chu an luah ta a ni.

          U Malsawma farnu hi phâiah doctor zira a awm avangin ka la hmu miah lova, tunah hian a zirna zova a rawn haw tawh avangin a vawikhatna atân ka hmu ve ta chauh a ni. U Malsawma ang chiahin a hleiting ṭha a, Mizo nula-ah chuan a sâng pâwl tak a ni ngei ang. A pian a nalh a,a hmel pawh a ṭha hle a, a ti a nung sarh a, a ngo paw phak bawk a, a chhelo takzet a ni!

          A nu leh pate hi chu Bawihtei tlawha an lo kalin ka hmu tawh a, anni pawh hian an monu chu an ngaina tehchiam lo niin a lang. Amaherawh chu, mi pângngai an ni a, a langah chuan an sawichhe lem lova. U Malsawma pa hi pa ṭawngmawh ve tak a ni a, a nu erawh chu ṭawng duh ve pangngai tak, kawm nuam deuh mai a ni thung a. An milen tehlul nen an chezia leh hawiherah chapona a lang lova, an ti ti pawh a sâng lem lo.

          U Malsawma farnu Rinte-i chuan min lo be nghal bawrh bawrh a, ka rin ai daihin kawm a lo nuam a, a bula awm a hahdam hle a ni. Kei aia upa ni mah se min rualpui kawm hmiah hmiah a, ka lo beisei aiin ka tlângnel phah ta phian a!

          Zanriah ei ve nghal tura min tih avangin haw lam chu kan hmanhmawh ta lo law law a. U Malsawma leh a nu leh pate chu inchung lamah an inkawm a, a nupuiin a chhuahsan chungchâng vel an sawi ang tih ka hrethiam nghal mai a.

          Kan haw meuh chuan zan dâr 10:00 a ri hnai thuak tawh a, Bawihtei phei chu motora kan tlanchhuah rual rualin a muhil nghal daih a, in kan thlen hnua motor aṭanga ka pawmchhuah hnu pawh chuan a la harh ta chuang lova! Hmeichhe naupang mut duh tak hi a ni ve reuh hrim hrim a, khawi hmunah pawh muhil se a mutui em em zel mai a ni.

          Harsatna leh buaina em em tawk lovin hun chu kan hmang chho ve zel a. U Rosie-i koh leh an sawi pawhin u Malsawma chuan a duh lo bur mai si a, anni lam pawhin bungrua an rawn la fel ta bawk nen an inṭhen fel chu a ni ta der a. Bawihtei chu a der pawhin an rawn chuhbuai lova, u Rosie-i nu leh pate erawh chu mi pângngai tak an nih avangin an fanu awmdan avang chuan u Malsawma bulah thupha an chawi nasa hle thung a ni. 

          U Rosie-i han nuthlawi ta chu a inpenparh nasa thei hle a, an inṭhen hnu hian vawihnih vawithum vel chu ka hmu leh tawh a, ka hmuh apiangin Muthi park-a kutsuiha a lenpuipa kha ka hmu tel ziah bawk.

          Nu Tluangi a rawn chhuk theih tak lawk si lovah chuan u Malsawma chuan inchhûng enkawl turin nu pakhat a ruai a, lânga kal tur a ni a, zîngah lo kalin tlaiah a haw leh ṭhin dawn ni awm tak a ni.

          Hmeithâi a ni a, anpa hi mistiri a ni ṭhin a, insaknaah a chetsual avangin a boralsan tawh a, a fa la naupang tê tê pahnih nen harsa takin an khawsa ve ṭawk ṭawk a. Inhlawhna a hmuh apiangah thawk lâwrin a fate school kalna senso leh an ei leh in tur a thawkchhuak ve hram hram a, inhlawhna a hmuh loh chuan nghei mai thei dinhmunah an ding reng a ni. An chanchin hi u Malsawma'n a ṭhiante kâ aṭangin a lo hria a, nu Tluangi awm loh remchângah hmangin a in enkawlsak turin a va sâwm ta vat a, inhlawhna zawnga kual reng a ngaih tawh dawn loh avangin lawm takin a lo pawm nghal var a ni.

          Ka nau-in ka nu damṭhat vak loh thu a rawn sawi chuan ka ngaihtuah hle a, ka nu hi hrisel ve pangngai tak a ni a, a tonsil an zai ṭum tih loh kha chu damlo  han tihtur ang chi hian a la awm ngai lo hrim hrim a, hetia ka ngaihtuah viau mai pawh hi chumi vang chu a ni pakhat a. Haw phei nghal vang vang mai chu ka duhdan a ni.           

          Remchâng lutuk tak maiin kâr thar lo awm tur thawhṭanni chu chawlh a ni hlauh mai a, u Malsawma bulah chuan ka nu damloh avanga haw phei lawk ka duhthu chu ka sawi ta vat a. Ka tumdan chuan Zirtawpnia pheia ka nu a zia deuh chuan thawhṭannia let phei leh mai kha a ni a, chutianga ka tumdana ka awm thei a nih chuan zirtawpni bak class ka ṭhulh dawn lo tihna a ni mai a, thawhṭan chawlh a lo ni hlauh chu ka tân a remchâng dawn ta hlauh a ni.

          Min chhâng nghal mai lo chuan a ngawi deuh vang vang a, eng emaw chen a ngawih hnu chuan, "Tihian ti ila a ṭha zawkin ka ring deuh. Zirtawpni-ah class ban veleha phei thei turin lo insiam lawk ila, tlai dâr 3:00 - 4:00 ah pawh chhuak ila kan thleng tlai vakin ka ring lo. A kârleh thawhṭan tlaiah emaw kan haw phei leh mai ang a, chutianga kan tih chuan class ṭhulh lovin i awm thei dawn a, a ṭha zawkin i ring em?" a rawn ti ta a.
         
          "Ṭha tehreng e, mahse, i tân a buaithlak ..........."

          "Engmah buaina tur a awm lo, Bawihtei zinchhuahpuina remchang a ni mai. I nute chu kan tumdan i lo hrilh mai dawn nia."

          Inthlahrunna hun a ni lo tih hria-in u Malsawma sawi anga awm mai chu ṭha-in ka hria a, Bawihtei kan hruai tel dawn bawk si a, ka phur zual khawp mai. Ka nau Ngaihawma chu bia-in kan tumdante chu phur takin ka va hrilh ta nghal a.

          Bawihtei lah chu kei ai aiin a lo phur a, kal hlan a nghakhlel em em a, a sawi deuh reng mai a ni.

          Zirtawpni tlai dâr 3:00 -ah kan chhuak a, kan tlan tluang thei a nih chuan kan thleng har lo turah kan ngai a, kan hmanhmawh lutuk lem lova. Bawihtei chu a la kal ngai lohna hmuna kal a ni bawk a, zawhna a ngah hle a, Zâmpuimânga thlan aṭanga ṭanin theih ang ang chu kan han inhrilh ve nawk nawk a.

          Âibawk kan pelh phei hnu hretah chuan a muhil ta tlan a, a ṭawngduh ber a muthilh tak daihah chuan a reh ta hle a. U Malsawma zai play chu thawm awmchhun a ni ta deuh mai a, ngawi rengin motor chu a khalh a, kei lahin han sawi tur ka lo hre vak bik lo nen ngawih lamah ka ramṭang ta mai mai a.

          Thingpui ina vawikhat kan chawl tih loh chu Bawihtei zunchhuah vangin vawikhat kan ding leh zuai a, a bak  kan chawlh miah loh avangin Lunglei kan thlen chuan a la tlai chhe lo hle a, rinai takin ka nu pawh a lo nula a, rilru pawh a nuam huai huai mai a ni.

          A tuk inrinni-ah chuan bazar pahin Bawihtei chu Serkawn lamahte kan han lenkualpui a, haw lamah Zohnuaiah u Malsawma ṭhiante kan tlawh kawi leh bawk a. Lunglei district parkah reilote awmpui lehin kan hawpui ta a, nuam a ti lutuk leh a hlim hmel chu ka en kham thei ṭhin lova, ka lo thlir leh veng veng ṭhin.

          Kan phei chhan ber ka nu chu rinai taka a ṭhat chhoh tak phian avangin hlim takin hun kan hmang a, Bawihtei nuamti lutuk lah chuan awm reng a duhthu a lo sawi ve reng bawk a, ka nu leh Ngaihawma chuan an duat dun nasa mai bawk si a, haw phei leh a hreh pawh chu a awm viau a ni.

          Ka lo huphurh ruk ang aiin u Malsawma chu kan khawsakdan ang mil chuan a khawsa thiam a, engkimah a ṭha ber, changkang ber leh tuihnâi ber ber nei reng ṭhin an nih avangin ka lo huphurhpui ru deuh viau kha a nia, ka lo rindan ang a lo ni lo hle a. Kan siam ang ang tui tih hmel takin a ei bawrh bawrh a, mutna lah ni se khum nuam leh changkang kan nei lova, Ngaihawma khumah mu-in a muttui theihzia a sawi ziah bawk.

          Ka nu lah chu a kawm thiam nasa mai a, ka bula a ṭawng tam loh tehreng nen ka nu bulah thung chuan eng eng emaw sawiin a ti ti bawrh bawrh zel a, a mizia hi ka la hre kim thei ngang lo chu a nih hi!
         
          Ka nau Ngaihawma lah chuan a ngaisang khawp a, engkim hria-ah a ngai em maw ni tehreng ni thil chi hrang hrang a zawt reng a, thil inpersan lutuk tak maite a zawt a, ani u Malsawma lah chuan a lungawina tur tawkin a lo chhang thei mai zel bawk si a, thil a lo hriat zauzia ka hre chho ve zel chu a ni a. A nunah hian eng thil dang nge ka la hriatchhuah loh tih pawh ngaihtuah tham fe niin a lang!

          Kan haw phei tur chu ka nu chuan a huphurh khawp mai a,  kan va ri hlut si a, kan pheisan hnu-ah chuan Ngaihawma nen chauh an awmdun leh rak rak dawn a ni a, an khawhar a zual sawt dawn a ni.

          U Malsawma chuan ka nu chu vitaminte leisakin hna thawk rim lutuk lo turin a ti a, a dawr enkawl tur pawhin midang chhawr mai turin a ti bawk a, a ngaihdan chu ka nau nen chuan kan lo pawmpui khawp mai. Tunah hian pakhat chiah chhawr a nei a, aman engkim a la buaipui vek a, pakhat dang chhawr belh se a hahdam ve thei deuh dawn a ni. Aizawl ka phei dawn pawh khan lakbelh turin ka ti a, tunthleng hian lakbelh lovin a lo la awm a nih chu!

          Ka nau hian pâwl sawmpakhat a zir mek a, inchhûng enkawltu ber a ni a, ei rawngbawl pawh ka awm loh hnu hi chuan a tihturah a dah tawp mai a ni. Chutiang chu ni mah se  rinrâwla neih atân chuan a la puitling lo nasa mai si a, ka nu chu ka ngaihtuah zual sauh ṭhin a ni.

          Aizawla kan let leh aṭang chuan kâr a ral tam leh tawh hle a, ka nu lah chuan u Malsawma chu a fapa chei ta riau a, kei ai mahin a rawn be zing zawk mah a, a buai deuh chânga a rawn biak phei hi chuan ka lo inthlahrung ru ngawih ngawih ṭhin a. Mahse, ning ang leh ngaitheilo ang hian a awm ngai miah lova, ṭha deuhin a lo bia a, a lo dawngsawng ṭha em em thei zel mai a ni!

          Bena hian a chetzia leh ṭawngka-in min duhthu hi a tilang fo a, a hmelchhe lova, a fel bawk nen duh ve mai turin ṭhiante ho chuan min nawr ṭhin a. Mahse, ka thinlung takin ka ngaizáwng ve thei tlat lova, chuvang chuan thutlukna siam ka harsat phah a, ṭhian anga la inkawm rih mai ka thlang ta zawk a. Bena erawh chuan ka inpeih hun min nghah theih thu a sawi thung a.

          Zankhat chu u Malsawma nu a chau thut a, damdawiinah an kalpui tih an rawn sawi a, u Malsawma chu a kal ve nghal a. A kal hma chuan a thang chin tur a hriat loh avangin lo mutsan mai turin min ti a, Bawihtei pawh ka bula a riah leh mai a ngai dawn tihna a ni.

          Rilru-a chanchin ngaichang renga ka awm avang chuan Bawihtei muthilh hnu pawh chuan ka la meng ta reng a, TV en pah chuan ka lo nghak rilru deuh bawk a.

          Kut lum thar tharin ka hmai a rawn tawh chuan ka harh nghal zawk a,  ka menchhuah rual chuan hnai set sawtah u Malsawma nen chuan kan inmelh chiang kher mai!

          "Tinge khumah i lo mut mai loh a? Min lo nghak duh suh ka tih kha," a rawn  ti thawp sut a, chetsawn erawh a tum chuang hauh lo!

          "Nia, englo.....ihh.." kan inhnaih lutukna chuan ka lei a titawt a, ka dang a ti-awk a, ka rilru ngaihtuahna a timumal lo vek bawk!




VANMALSAWMA
Sbk Pachuau
Chapter - 6





          A mitmengah chuan nidanga ka la hmuh ngai loh eng emaw tak hmu-in ka inhria a, chu chu eng thil nge  tih erawh ka chiang ngam hauh lo!

          Bawihte-i ṭe thawmah chuan kan hawisawn rual ṭhawt a, hmanhmawh deuha rooma kan va luh chuan khumah chuan ṭhu chungin thlabar hmel takin min lo melh a.

          "Ânu bulah ka kal duh lo...." sawi zawm thei lovin lungchhe em emin a ṭap nghal hlawp hlawp a. A pa chuan a va kuah vat a.

          "Bawihte, i nu bulah chuan i kal dawn hleinem. Tu-in nge i nu bulah i kal dawn ti-a lo sawi le aw! Min han hrilh teh le," tih pahin a samah chuan a chulsak a.

          La inhnît hlawp hlawp chungin Bawihtei chuan, "Ânu-in a sawi alawm! Min hruai a tum a, ka duh lova, min kai lui tlat a, ka hlau lutuk! Âpa, ka kal duh miah lo a nia aw!" a ti a, a pa chu a kuahbet tlat a.

          "I kal dawn lo.  Khawihah mah ka kaltîr dâwn lo che, ka bulah i awm reng dawn alawm. Ka naute duat i ni a, tuman an lakbo che ka phal dawn lo, ka bulah i awm reng dâwn," insehruh ṭeuh chungin u Malsawma chuan a lo hnem a, inhnemna awkâ nêm tak ni lo mah se a pa hi a ring ve tawk a, chuvangin, Bawihtei tân chuan thlamuanpuiawm tak tur chu a ni tho mai.

          A mumangah lehzêl pawh a tithlabâr zui zel chu a ni si a, ka pian ahnu lama ka mihring huat ber a la ni hial awm e! Fate aia mahni tisa nawmsakna thlang hmeichhia hi ka thinlung chhungril ber aṭangin ka haw ngawih ngawih mai a ni.

          Eng ang mihring nge ni ngai le hetianga mahni hrin ngei pawh engah mah ngai lo hi! A duat lova, a ngaihsak lova, a hmangaih hek lo. A rîla rah, ama hrin ngei pawh hmangaih lotu tluka nu rapthlak an awm chuangin ka ring lo.

          Ka ngaihtuahna ka lo kawm tui leh 
hle ni tur a ni ka va hawi phei chuan Bawihteite pafa chu khumah chuan an lo muhil fel der tawh a, u Malsawma chu Bawihtei kuah chungin, chhuata a ke nghatin a muhil sâk sâk a. Kaihthawh tur nge kaihthawh loh tur ni ang tih chu ka ngaihtuah a, pheikhawk phelh lo leh thawmhnaw pawh thlak lova a la awm avang chuan kaihthawh chu ṭha zawkin ka hre ta a.

          "U Malsawm... "

          A che lo hrim hrim! A mu nghet hle a ni ngei ang. A lu-ah tîm deuh chung chuan ka han sawi che det a, a rawn meng sîar sîar a, tlêma a mutdan siam rem deuhin a muhil leh nghal daih a!

          Kaihthawh tum zui tawh lo chuan a dim thei ang berin a pheikhawk chu ka phelhsak a, khumah chuan a ke chu hlan chhohsakin puan ka sintir nghal a, light chu off-in rizai thehlêp deuh pakhat keng chung chuan sitting room lamah ka pheisan ta a.

           Sofa-a ka mutthlak rûal chuan nichina kan awmdan kha ka rilru-ah a rawn lang nghal a, Bawihtei kan buaipui atalângin ka lo mangnghilh der tawh kha a ni a. Chutia ka ngaihtuah chhuah leh rual chuan ka chhûngrilah hian engtin emaw tak, ka sawifiah thiam ni miah bawk si loh chuan ka awm a, engvanga khati em ema laichhia kha nge ka nih pawh ka hre hek lo.!

          Kha leh chen kan lo khawsa ho ve tawh a, khatiang em ema ka lungphu tidanglam nasa tur khan vawikhatmah kan awm ka la hre lova, u Rosie-i awm loh hnu hian a hma aiin kan inbe tam a, college pawh a ruala ka kal leh haw hi a tam mah tawh zawk a ni. Kan inpawhin Bawihtei chungchângah ngat phei chuan ka thu a ngaichang thiam em em a, inchhûngkhur mamawh tur ang chi-ah pawh min rawn ve reng ṭhin.

          Engvanga khatianga awm ta mai nge maw kan nih le? Hrechiang ngam ka inti chiah lo na'ngin a mitmengah khan nidanga ka la hmuh ngai miah loh,  farnu anga min enna mit ang ni lo tlangvâlin nulâ an enna ang mitin min en niin ka hria a. Mahse, a rei loh em avangin ka hmusual pawh a ni thei ve tho bawk.

          Kei hi eng nge ka hriata khatiang mai maia ka lo buai ve vak le! Min kuaha min tawk pawh ni hlei lo ka lo suangtuah ve vak vak hi a ṭul lo hle a ni. Boruak pângngai lo engmah awm si lo kha awmtir ṭalh ka tum ni berin a lang a, ngaihtuah zui tawh lo tur chuan ka infuih ru mawlh mawlh a.

          Bawihtei nui har har ri-ah chuan ka harh hlawl a, a pa phone hmangin ka thlâ a lo la a, min lo nuih chu niin. Ka bula a lo kal hnaih chuan ka lo pawm vat a, a muttui leh tui loh ka zawt nghal a.

          "Mutui lutuk! Âpa pawh ka bulah a lo mu a, i khumah kan mu sia, ṭhutthlengah i riah a ngaih phah tih a sawi a," a ti reuh a.

          "A pawi reng reng lo, ṭhutthlenga mut chu a nuam tho alawm. Tunah pawh ka mutui lutuk a, kei aiin i thawh hma daih hi," tih pah chuan a biangah chuan ka piaisak zeuh a.

          "Âpa damdawiinah a kal a, i la tho si lova, ka kal ve peih lova," Bawihte-in a tih chuan nizan khan chanchin engmah ka zawt  miah lo tih ka hrechhuak nghal zat a!

          Ka intihfai hnu chuan eirawng ka bawl ṭan nghal a, ka phone a rawn rik chuan ka laklawh em avangin Bawihtei ka laktir a, an inbiak danah chuan ka nu a ni tih ka hre nghal mai a.

          An inbiak zawh chuan rei vak lo ka be ve a, dawr nghak tur nula fel deuh a lak thar thu min hrilh chuan ka hlim hle a, hahdam deuh zawkin a awm ve thei tawh dawn a ni. Mahse, ka nu hi nu taima leh thil ti lova awm mai mai thei lo ang chi hi a ni tlat a, a inti hahdam tehchiam chuangin a rinawm loh.

          Kan inbe zo va, phone chu dawhkanah dahin ka thil chhuanlai chu ka va chawk a, ka phone rawn ri leh chu ka nu bak a nih ring lovin en lem lo chuan, "Aw, nu.... " ka'n ti nghal tâwng a. A thil sawi tur ber sawi lova phone dah hi a chîng a, a rawn call nawn ṭum hi a tam zawk a nih avangin amah bak a nih ka ring lo ve tawp a ni.

          "Keimah zawk...!"

          Zahzelah ka nuichhuak hak a, a phone a keng si lova, tu phone nge maw a rawn hmansak ni!

          "Tum aiin ka lo haw har hmel a, Bawihtei kha i kutah a lo awm leh mai loh chuan...."

          "Aw, a pawi lo, in lam chu lo ngaihtuah duh suh. Eng nge i nu chu a an a?" ka zawt lo leh palh ang tih hlauvin ka zawt nghal vat a.

         "Nizan lam ai chuan a zia deuh e, ngaihtuahawm a ni lo. Bawihtei chu thil awmdan lo hrilh mai rawh aw?"

          Kan inbiak zawh hnu chuan engtin nge ka number kha a hriat theih zawk tih ka ngaihtuah zui nauh nauh a, kei ni ta ila ka hre dawn miah lo tih ka chiang!  Ka phone ka ken loh chuan tu number mah ka chhinchhiah ṭhin loh avangin ka buai fo reng a ni. Ka nu number pawh hi ka sawi sual fo a, tun thleng hian ka la bel hlei thei lo.

          Chawhnu lamah a rawn haw ta chauh a, a rualin u Rintei a rawn kal ve hlawl a, Bawihtei a rawn au nghal chul a. Bawihtei lah chu a rin loh deuha a nî a hmuh avang chuan hlim takin a khek raih a, an inpawm nghal chat a.

           Choka-a thingpui ina kan lo ṭhut lai chuan u Malsawma inbual zo chu a lo chhukthla ve a, ka bula chair chu pawtchhuakin a ṭhu nghal a, ka lungphu a rang ringawt nia!

          Ka thingpui pek lak pah chuan u Rintei hnenah chuan, "Mapuii hi eitur siam a thiam asin! A thingpui siamte hi a tui bik a, hmun dangah a siam anga tui hi ka in ka la hre lo," nuih suk pah chuan a ti a.

          Chutia ka rin loh lutuka min fak ta mai chu mak ka ti a, midang aia ka siam tuina em em ka hre bawk si lo nen ka zak angreng zawk hle a.

          "A ti mai mai a nih kha u Rinte, awih miah suh! Midang aia ka siam tuina bik a awm lo," ka lo ti bah nak a. Ka ṭawngkam thiam lo lutuk hi tun ang hunah hian ka inhaw zual ṭhin!

          "Hei i thingpui siam chu ka in mek a, a tuizia chu sawi lo mah se ka hria alawm. Ka u hian i eisiam a fak lutuk a, ka nu-in i bai a ei châk deuh a, i bai siam la turin ka lo kal ve a nih hi!" U Rinte-in a tih chuan ka lo nui chhuak hawk a.

          "Chutianga bai ka siam thiam viau pawh ka lo hre hleinem, damlo ei tlakin ka siam tui zo lovang tih a va hlauhawm ve!" tih pah chuan u Malsawma lam chu ka hawi a, "Bai siam thiam chhuahin min lo va chhuah ringawt a!" chhuahchhal deuh pahin ka tihzawm zat a.

          Lo nuih suk pah chuan, " I bai siam aia tui ka ei pawh ka la hre hleinem," a lo ti sam et a.

          Ka nu pawh khan ka bai siam hi han fak ve zauh chang hi chu a nei ṭhin ngei mai a, a siamtu ka nih vang nge kei phei chuan midang siam aia a tuina bik ka hre lem lo.

          Bai ka siamlai chuan u Rintei chu ka bulah lo awm ve-in a lo ti ti bawrh bawrh a, a training laia bai a ei châk theihziate a sawi a. An chhûngkua hi changkâng hle e ti lo chuan Mizo chawhmeh an ngaina tlâng hle a, bai, tlak leh bawlte pawh an ei nasa ve hle a ni.

          A chetchhiatna a sawi chuan kan nuid dun nasa hle a, Bawihtei, TV ena sitting room lama awm reng pawh a rawn tlan phei rang hle a, kan nuih chhan hre lem lo chuan a rawn nui ve nghal hak hak a. Hmêlah a nî hi a chhun deuh avangin an han inpawm phei hi chuan nufa ni mai awm hi an ni ṭhin.

         U Rintei chuan Bawihtei chu damdawiin lama hruai ve a tum a, Bawihtei lah chuan a lo châk nasa mai si a, a pa ruala lo haw leh nghal a rem dawn tho avangin kal ve tur chuan a nî chuan a siam nghal a.

          Choka ka lo tihfel lai chuan Bawihtei  chu insiam zo fel atin a rawn tlanthla a, a hnungah a nî chuan a rawn zui bawk a.

          " U Mapui, lo kal ve rawh. Nangmah chauhin i lo awm dawn sia, min lo ngai palh ang. Lo kal ve rawh aw?" Bawihtei chuan a rawn tithla lang lang a.

          Kei chuan, "In rei dawn chuang lova, ka lo kal ve lo mai ang e. In kal hlanin rawng ka lo bâwl dawn nia. Ka lo ngai dawn chiang che a, mahse, nasa lo deuha ngaih che ka lo tum ang aw.." tiin ka lo chhâng vat a.

         Inchung aṭanga lo chhukthla mêk a pa chu a han au a, "Âpa, u Mapuii hi a lo kal ve duh lo a nia!" lungawi lo aw zet hian a lo ti a.

          "Lungawi lo deuha Bawihtei awmtir i duh loh chuan i insiam mai chu a ngaih hmel," tlema nui hmel pu deuh chung chuan U Malsawma chuan a rawn ti a, ka tân hnial ngaihna a awm lo!

          Ka rin ai daihin Bawihtei pi chu a lo zia a, a khawsik a reh tawh avangin amah pawh a lo harh ṭha ve hle a. Ka bai siam lah chu ka beisei ai daihin a eitui a, ani damlo lehnghalin kei akâra baisiam ve chu a eitui lovang tih ka hlau hle kha a ni a, a ei tui viau a ni tih ka hmuh chuan ka thaw huai mai a ni.

          Kan awm rei ta phian a, kan haw chuan khua a tlai ruih tawh a, in kan thlen chuan rawng ka bawl nghal sawk sawk a. Exam a hnaih tawh avangin lehkha zirah ṭhahnem ka ngai ru deuh a, chuvang chuan chaw ei vata intihfel vat kha ka duhdan a ni.

           Chaw eikham hnu-ah chuan lehkha zir ka duh avangin Bawihtei chu a pa bulah a awm a, ka bula riah a beisei viau na'ngin min tihbuai a hlauh avangin a pa chuan a ngaih chhuanlamin a bula mu turin a thlemthlu ta hram a.

          Meng rei lutuk lova zing thawh hma ka tum avang chuan zan dâr 11:00 velah chuan ka indah fel a, bathrooma kal tum chuan ka chhuak phei a, ka roomah hian bathroom a awm ve loh avangin choka bul ami chu ka hmang mai ṭhin a ni.

          Choka-ah chuan U Malsawma chu thingpui no dawm chungin a lo ding run a, min lo hmuh veleh chuan ka duh ve em tih min lo zawt nghal a, ka duh loh thu-in ka lo chhang vat a.

         "Rosie-i khan Bawihtei hi kawl min rawn dil a... "

          "Maw...?" Ka au chhuak hi a ni ber!

          Engtin nge khatiang khawpa a ngaihsak loh hnu khan kawlte chu a la rawn dil ngam zawk le! Zaktheilo lutuk mai! A huangtau mah mah a ni.

          "Ka remti lo bur! Bawihtei hi engtik lai mahin a ngaihtuah ngai lova, tun ataka a ngaihtuah vût nachhan tur hi a awm lo. Khatiang hmeichhe rapthlak lutuk bulah khan ka fanu hi ka awmtir ngai lovang," a thin a rim tih hriat takin a ṭawng chu a sehchilh deuh a.

          "Bawihtei pawhin a duh dawn lo. Ka lo sawi ve tur chu a awm miah lo na a ka ngaihdan chuan chhan eng emaw vanga awmpui duh a nih ka ring, chuti ni lo se eng atân mah a tih a rinawm loh. Englo...ihhh...nangmah neih let leh a tumna hmanrua pawh a ni ve thei tho," ka rilrua lo lang ang ang chu ka sawichhuak nghal vek a.

          "Engtikah mah ka nei leh tawh dawn lova, eng anga nasa pawhin min kherh mah se ka nei tawh dawn lo. Bawihtei hmuh phaka a awm pawh ka duh lova, Bawihtei hriata a chanchin sawi pawh ka duh hek lo."

          "Nu hmangaihna dawng lova a awm hi ka lainat ngawih ngawih! A fel a, a nungchang a ṭha bawk a, nu hmangaihna thlahlel rual lek a la ni asin!" u Malsawma ka hrilh pawh ni chiah lo chuan ka ngaihtuahna ka sawichhuak a ni mah zawk.

          "I hnenah hian lawmthu ka la sawi lova, i chungah hian ka lawm asin! A nu lak aṭanga a dawn tur ang kha nang hian i pe a, nang awm lo la chu Bawihtei khawhar dan tur hi ngaihtuah ngam pawh a ni lo hial zawk! Nang i lo awm a,  i ngaihsak em em a, nu-in a fa hnena a pek ang zawng zawng chu pe thei lo mah la i pek hi a tam lutuk!  Ngaihsakna leh hmangaihna hi a mamawh ber a ni a, i hnen aṭanga a dawng hi i chungah ka lawm takzet a ni!"

          U Malsawma lawmthu min hrilhna aw ri chuan ka lung a tichhia a,  Bawihtei ka lainatna a zual sauh bawk a. Hausa-in engkim nei thei pawh ni se nu hmangaihna a dawng tlat lo hi a lainatawm em a ni!

          Mutnaah pawh chuan muhil mai thei lovin ka ngaihtuahna a luah tlat a, engvanga tun ataka awmpui tum nge a nih ang tih chuan ka ngaihtuahna a tibuai a ni. Chhan eng emaw awm lo chuan hetiang thil hi a ti dawn lo tih hi ka hrechiang lutuk tlat a ni.



VANMALSAWMA
Sbk Pachuau
Chapter 7




          Beisei ai takin ka exam chu tiṭha ve-in ka inhria a. Exam zawh ni chuan ka ṭhiante ho chu an lo lêng a, Judithi chu a dan pângngai tê-in a ri leh bawrh bawrh tawh a, Bawihtei pawh hian a ngaina viau a, a lo lenluh ve zauh ṭumte hian an inchhaih nui nasa thei hle a ni.

          Tunah pawh an inchhaih nui leh ar ar tawh a, choka lama thingpui lum tura ka pheisan laite chuan an khek dun nasa mai a, Bawihtei hlim thawm hriat hi nuam ka ti em em a, hlim reng se ka duh em em bawk a ni.

          Thingpui ka lo siam mawlh mawlh lai chuan Bena chu ngawi rengin ka bulah a lo ding a, ka siam zo ka kalsawn tur chu ka kutah lo vuanin a lamah min pawt hnai nghal a.

          "Mapui, engtia rei nge min nghahtir i tum? Kei chuan engtik lai pawhin ka ngaihtuah che a, ka ngai em em bawk che a, tlemte tal pawhin min ngaihtuah ve miah lo em ni?"

          "Ben, khawngaihin min hrethiam la, ngaihzawng neih hi ka la inpeih lo a nih ka ring, ṭhian ang bakin ka en thei tlat lo che. Kei aia fel leh hmelṭha an tam  ang, kei chu min nghak duh tawh suh. I ṭhian ṭha tak erawh ka ni reng ang," tiin ka rilru dik tak ka hrilh leh a.

          Beidawn hmel taka min en chung chuan, "Engtin nge nang hmangaih chung che hian midang ka ngaihzawn theih ang? Ka ngaihtuahnaah hian awmloh lai i nei ngai lova, hmeichhe dang tan hmun a awm lo," a ti leh a, ka khawngaih viau na'ngin ṭhian ang bakin ka en thei ngang si lo.

          "A ṭha e, ṭhian anga en tur che chuan ka rilru ka lo siam dawn nia. Mahse, hun erawh a duh rei viau-in ka ring. Ka thei ang em tih pawh ka chiang ngam lo!" a ti chuai raih a, ka khawngaih em avang chuan ngaihzâwng anga en ve theih ka duh rum rum mai!

          Ka ṭhiante haw hnu chuan kawta pangpâr ho chu ka sawnkual a, leiṭhate ka vur belh bawk a. Tunlai chu nu Mawii hi chawhma lam chauh a lo kal ṭhin a, a fapa a damloh avangin a haw hma ṭhin a. U Malsawma phei chuan a fapa damṭhat loh chhung chu lo kal lo mai turin a ti a, mahse, nu Mawii hi mi inthlahrung deuh mai a ni a, chawhma lamah a theih ang ang a rawn thawk hram ṭhin a ni.

          Eirawngbawl a hautak loh avangin ka hmanhmawh lem lova, ka thiltih lai chu tihzawh law law ka duh a, ka lo inham berh hle lai chuan ka bulah mi lo kal an awm tih hria-in ka han hawichhuak a, ka rin loh lutuk ka hmu avang chuan ka dingchhuak nghal hluai a.

          Eng nge a awm duh tawh lohna inah hian rawn tih a tum? Amahin Bawihtei'n inchhungah movie a en a, u Malsawma a awm lo tih ka ngaihtuah chhuah rualin hlauhthawnna chuan min rawn fan nghal a.

          "Eng.... eng nge i duh?" ka hlauthawng lutuk chuan ṭawngkam mawihnâi pawh ka chhakchhuak thei lo.

          Ka zawhna ngai pawimawh lo zetin u Rosie-i chuan, "Khawnge Lalhruaizeli a awm? Han ko teh!" a ti nghal tâwng a.

          Min ngai pawimawh lo lutuk leh min hmusit lutuk chu ka sa ve ta phat mai a, ka hlauhna chu dahṭha-in Bawihtei vang chauh pawhin pachang tak leh huaisen taka ka hmachhawn a ngai dawn tiin ka infuih ru mawlh mawlh a.

          "Ka koh nachhan tur ka va hre lo ve! I duh leh tikhan nangmah khan ko mai ta che. Eng atan nge i tih reng reng?" ka aw khur thup hram hram chung chuan ka lo ti let khauh a.
         
          Thinrim lutuk tih hriat taka meng alh phat chung chuan min rawn melh a, "I va zakthei lo ve a! Tunge nia i inhriata khatia min han chhan ngam chu le! Nang ang mi ina awma mi pasal ngaihzawn hreh lotu hi ka hlauh che i ring a nih chuan i tisual hle ang, han ko vat mai teh!" a vin ṭha ngang mai!

          "Keimah ang bawkin ṭawngna turin kâ i nei a, i râwl a ring ṭha bawk a, nangmah khan ko ve mai rawh. I chhiahhlawh ka ni lova, i duh duha i tirh tur leh i ankhum tur hi ka ni bik lo,"

          "I lo va inla huai sawt reuh ve maw  le! Aia upa zah nachang pawh i hre lo a nih hi. Ka awm lo chu nuam i lo ti hle mai a ni maw!"

          "Zah tlakin i awm miau si lo alawm le! Chuan, dawta min puh kha bansan tawh ang che. Tu pasal mah ka ngaizâwng lova, ka ngaizâwng ngai hek lovang. Nupui pasal nei reng chunga ngaihzâwng nei hi ka ngaisang lo tih i lo hre dawn nia,"

          Ka nu chuan ka ṭawngkam leh thusawi duh dante hi hria se chuan rapthlak min va ti dawn em! Mahse, he nu bawlhhlawh lutuk vang hian Bawihtei thlabâr takin a awm fo a, ka chhûngrila amah ka huatna nasa lutuk vang hian ka insum thei tawh bik lo a ni. Min hmusit ve khanglang lehnghal a!

          Bawihtei'n kan thawm a hria ang tih chu ka hlau rilru hle a, a nu hi a ngai lo mai pawh ni lovin a hlauhin a hlau a ni ber a, a hmuh chuan a thinlunga hlauhna kha a lo chhuak leh lo thei dawn lova, chumi chu thleng turin ka duh lo a ni.

          Ka hlauh ang ngeiin Bawihtei chuan kawngkapui aṭanga rawn tlanchhuah pah chuan min rawn au a, a nu hmel a hmuh rual chuan a ding chawt a, a nui hmel chu hlau hmelin a rawn thlak riai riai a.

          U Rosie-i chuan lo nuih pahin, "Bawihte, lo kal teh. Ka ngai lutuk che a, rawn hmu tur che-in ka lo kal a nih hi!" a lo ti vat a.

           Ka thil hriat chu ka hresual emaw ka ti hman hial a, a hmaa a thinur hmel kha nui hmelin a lo thlak fel leh vek tawh a. Hetianga ṭawngkam nem leh nui chunga a fanu a biak hi ka la hre lova, ka makti lutuk chu ka ka ho mai a, eng ang lemchanna nge a rawn neih tak mai le!

          Bawihtei chu a dinna ngaiah chuan a la ding reng a, ka bula kal tur chuan ka lo hui zauh a.

          Ka bula rawn kal tum chuan a rawn phei a, a nu chuan lo dangin a lo kai ding a. Min rawn melh zui ṭawk ṭawk ka hmuh chuan an dinna bulah chuan ka pen phei ve vat a.

          A fanu dara dawm chung chuan, "Bawihte, ka bulah lo riak ta che. Barbie leh toys dang i duh ang ang ka leisak dawn che nia," a han ti a.

          Bawihtei chuan chhang lovin min rawn en a, a ṭah a chhuak hle a ni tih hriat takin a mitko vel chu a sen vek a. Ka khawngaih em avang chuan ka va ban a, a nu chuan lo kuaisawnin a ko vuan nghet sauh a.

          "Barbie tam deuh chu i duh lo em ni? Kan bazar dun ang a, ka leisak ṭeuh dawn che alawm," a ti leh a.

          Bawihtei chuan, "Aih, ka duh lo. Barbie chu tam deuh ka nei tawh," ṭap aw ṭeuha tih pah chuan min rawn ban leh a.

          A kut chu ka lo chelhsak vat a, ka bula kaih phei mai tum chuan ka lo pawt a. Chu chu ngaithei lovin u Rosie-i chuan a lo pawt let sawk a, Bawihtei chu a sawi nghal nawk nawk a.

           A insum theihna in a tlin ta lo tih hriat zet hian, "Ṭha te tea engmah sawipui thei loha i awm luih tlat reuh le!  Luhlul lutuk mai! Ka hruai lui tho tho ang che, ka bula i awm hi a pawimawh lutuk!"

          "Chutin a pa thu lovin i hruai lui ngawt thei lovang. Amah pawhin a duh loh kha," tih pah chuan Bawihtei chu ka va ban leh a.

          Ka kut chu lei ka khawihna avang khan a bal hle a, lei ka la kai nual bawk a. Mahse, chutiang mai mai ngaimawh hman ka ni tawh lo. Bawihtei hlau hmel chuan engmah pawisak lohna min pe a.

          Ka kut chu lo vai per lawp pahin rum lutuk hian min rawn melh a, "Engmah lo sawi ve suh. Ka fanu a ni a, ka duh duhin ka ti ang, i lo inrawlhna tur a awm lo," min tihkhum salh salh a.

          "Ka fanu kha thlah nghal rawh. Engtin nge helai hmunah hian i lo la kal ngam zawk a? Vawikhatmah rawn kal tawh lo turin ka hrilh che a ni lawm ni? Ka la insum theih hram hram lai hian heta ṭang hian kal bo rawh!"

          Engtik lai khan nge u Malsawma chu a rawn thlen ka hre hauh lova, ka thla a muang nghal sawng sawng tih erawh ka hre thung.  Bawihtei pawh chuan a pa hmel a hmuh chuan a thlamuan phah ve hle tih a hmel aṭang chuan ka hmu thei a ni.

          Bawihtei chu ka kaisawn ta vat a, u Malsawma a awm tawh avang chuan a nu chuan a lo thlah ve mai a, inchhungah ka hruai lut nghal daih a.

          A bula Bawihtei awm kha pawimawh viau ni awm khan a sawi a, eng nge chuti taka a pawimawhna chu ni ang le! Ka rindan kha a lo dik chiah a ni, chhan nei lo chuan awmpui a tum dawn lo chiang a, a chhan erawh ka la hre thei si lo!
 
          Rei vak lo hnu-ah chuan u Malsawma chu a rawn lut ve a, a hun takah lo haw hman ta lo se engtin nge kan lo awm ang tih ngaihtuah chuan ka hlauthawng thar leh a, ka tirilah ka khur dar dar a.

          "Nidangah ka awm loh laia a lo kal leh a nih chuan min rawn phone nghal vat tawh la a ṭha ang, Bawihtei pawh mahni chauhin pawnah chhuah lo tur a nia," a rawn ti nghal tâwng a.

          Ka hmel a rawn en chuan ka hlauhthawnna chu a lo la langchhuak a niang chu min ngaihtuah hmel zeta min rawn pan hnaih nghal ruak pah chuan, "Engtin nge a lo ṭawngkhum che? Kut a thlak che em? Engmah zep lovin sawi teh," a rawn ti a, ka bânah chuan a rawn vuan nghal a.

          Ka lu lo thin pah chuan, "Engtin vak min ti lo. Ka insum zo lovin ka lo chhâng ve deuh a, kha khan a tithinur mai mai alawm," la khur ru dar dar chung chuan ka lo ti vat a.

          "Ni lo, chutiang ringawt a ni lovang, i hmelah khan a hriat vek! I hlauthawng hmel kha ka hmuh hmaih hauh lo a nia,"

           Tunah tak hi chuan pawnlam boruak ai mah khan ka bâna a vawnna chuan min tibuai tawh zawk a, ka ngaihtuahna a tichawmawlh vek a, ka sawifiah thiam si loh eng emaw takin min fan chiai chiai ni berin ka hria a ni.

          "I ṭha tak zet maw, Mapui?"

          "Aaaa.....aw....ka ṭha lutuk! Ka ṭha lutuk a nia...." ka ti bah nawk a.

          Min thlek leh vang vang phawt a, chutah, ka bana a vawnna chu laksawn pahin, "A nih chuan va intifai la," a ti ta a.

          "Pangpâr saw ka  .......... "

          "Naktukah nu Mawii'n chhunzawm mai rawh se, tunah chuan va intifai phawt rawh."

          Ka inbual lai chuan ka inngaihtuah nasa hle a. Khatianga huaisar taka kan awmlai pawha ina a lo kal ngam a nih chuan chhunlamah kan awm loh hlanin a lo kal ang a, a lo hruai chhuak daih ang tih pawh a hlauhawm hle dawnin ka hria a. Thisena inzawmna nei lo mah ila kan thinlung a inzawm tlat avangin ka ngaihtuah lo thei lova, ka tan chuan fanu ang a ni a, ani pawhin min ngai a, a nu ang maiin min en a, ka bula awm a thlahlel ve em em a ni si a. Ka theihtawpin a himna atân ka bei dawn a ni.

          U Malsawma ka ngaihtuah rual chuan ka danglam leh nghal vek a, ka awmdan hi ka inhrethiam hlawl lo a ni ber e! Tunhma ang khan nel taka biak harsa ka ti a, a mita en chunga biak phei chu ka ngam lo hrim hrim. Min tawh hleka ka awmdan danglam nghal zelte hi mak ka ti a, nuṭa angin ka en ṭhin kha a ni a, tunah hian nuṭa angin ka la en chiah em tih hi ka inzawt ru bawk a ni.
         
          Rawng ka bawl lai chuan ka bulah Bawihtei nen an lo awm ve reng a, eng eng emaw sawiin ani leh ni lo angin a ti ti ve luam a.
           
          "U Mapui...?"

          "Eng nge Bawihte?"

          "Âpa'n a bia che a, i chhâng miah lova!"

          Kei hi ka rilru ka lo kawm leh veng veng pek a nih chu!

          "Aw.....nia, ka lo inngaihtuah nasa deuh a."

          U Malsawma chuan, "A pawi love. Englo a nia... Naktuk kha ka nute'n chaw ei turin min beisei a, i thei ang tiraw?" nuihzat hmel deuha min en chung chuan a lo ti vat a.

          "Theih loh nachhan tur a awm pawh ka hre hleinem. Mahse, naktuk kha Bawihtei te schoola kal a ngaih kha aw!"

          "A ni tak! Sawi lo la chu ka lo mangnghilh der tawh asin! In aṭangin kan chhuak hma deuh ang a, kan kal kawi nghal mai dawn nia."

          Hmanni deuh aṭang khan U Malsawma hian min en leh vung vung ṭhin a, ka ngaihbel nge a mitmengah chuan min thlakhlelhna niawm tak hi hmu-in ka inhre ṭhin a, mahse, a rei lo ṭhin em a, ka chiang ngam chiah lo thung.

          A tuka Bawihtei te schoola kan va kal chuan nu leh pa dang pawh an lo awm nual a. Bawihtei te class result lamna turah chuan kan lut ve nghal a, an zirtirtute chuan min lo chiau-au vat a.

          Bawihtei chu kan rinloh tak maiin pakhatna a lo ni a, a result kan han hre chiah chu u Malsawma chuan ka kuta rawn vuan chungin, "Ka lawm e aw!" a rawn ti sup a. Ka hamhaih atalângin chhanna chang ka hre leh pek lo!

          Room aṭanga kan chhuak chiah chu pa pakhat hian u Malsawma chu a lo ko a, kan bula lo kal hnaih pahin chu pa chuan Bawihtei result te chu a rawn zawt luam a. U Malsawma nen chuan an inbe mawlh mawlh a, an sirah Bawihtei nen chuan kan lo ding ve ran a.

          "Hei hi em ni in nu chu?" tih pah chuan min chibai tumin a kut a rawn pharchhuak nghal a.

          "Ni lo ...... " ka sawi zo hman lo.

          "La ni lo deuh, nih hunte pawh a la awm ang chu!"

          Phawk lutukin u Malsawma chu ka en a, mit min siai zauh pah chuan a lo nui suk a.

          Motora kan chuan leh hnu pawh chuan a thil sawi khan min ṭhawn em avangin ṭawng zai pawh ka rel lova, a fiamthu nge a ti tak tak ni ang tih chu ka ngaihtuah a.

          "I va inngaihtuah nasa leh tawh ve!"

          Ka harhchhuak zawk a, ka va hawi phei chuan a motor khalh chauh chu ngaihtuah ni awm takin hmalam a lo en run a.

          "Nia, nasa a ni mai" ka chhâng tawi tek tawk viau.

           "Ka thil sawi kha i lawm meuh na nge?" a rawn tichhuak leh bauh a.



VANMALSAWMA
Sbk Pachuau
Chapter 8




          "Lawm loh pawh ka hre lo. Dik tak chuan zahthlak ka ti ve deuh a!"

          Zahzelah Bawihtei ka pawmdan chu ka'n siam rem ringawt a!

          "Chutiangin a zahthlakna lai awm reng ka lo hre ve hauh lova!" min rawn melh zawk pah chuan a ti sup a.

          Bawihtei a lo ṭawng takah chuan u Malsawma chu ka chhang ta lova, a result chungchângte sawiin kan ri zui ta chul a. Pakhatna a ni si a, pass lawm a duh em tih ka zawh chuan a pass lawmna tur ai Pi Mawii fapa damlo tâna pek a duhthu a sawi reuh a!

           A pa nen chuan phawk zetin kan inmelh a, ani ang rual lekin chutianga midang ṭanpui duhna a lo nei chu mak ka ti ngawih ngawih a, ka fanu ni se tiin ka ngaihtuah ngawt pek a!

          A pute in kan thlen chuan a pi leh pute chu varanda-ah an lo ṭhu a, a pi hi damdawiin aṭanga a chhuahna a la rei lutuk lova, amah pawh a tla ve dâk a. Nu hmelchhe lo tak leh vun nung siah mai a ni a, upat lamah pawh la hmelṭha deuh mai hi a ni a, a damlohna chuan a lo hrek ve hle a, a vun nung sarh kha hmuh tur pawh a awm mang lo a, tlemin  a lang tar deuh bawk.

          U Rintei chu inah a lo awm lova, a clinic hawn thar tur buaipuiin a chhuak ni awm tak a ni. Tlaia a lo haw chu a rawn hlim haw hle a, a duhthusam anga thil an tihfel thuak tawh avang chuan a michhawrte fakawm a tih thu a rawn sawi nghal bawrh bawrh a. Bawihtei'n a result a han hrilh chuan a khek raih a, Bawihtei chu pawmin a'n lamkualpui vel a, eng thil nge a pass lawmna atân leisak a duh tihte an inzawt nghal chul bawk a.

          A mizia hlim thei tak hi a awhawm ka ti hle a, tu pawh a kawm bawrh bawrh thei a, mi chhiatna a sawi ngai lova, a rilru a ṭha-in midang hriatthiamna a ngah em em bawk a. Hei hi Bawihtei pawhin a chhunna niin ka hria a, hmelah pawh an inchhun nî-vah hle a ni.

          U Malsawma'n a hma tlaia thilthleng a sawi chuan a nu chu a sa deuh phat a, mahse, inbengdai leh vatin eng rilru pua rawn ngaihven thar ta viau nge ni ang tih leh chhan awm lova a tih a rin loh thu chu a rawn sawi a.

          Kei chuan, "Ka lo ngaihdan ve mai mai chuan u Malsawma a neih let leh theihna a nih vanga hetianga ti hi a nih ka lo ring ve tawp a!" ka lo ti a.

          "Ka nei tawh dawn lo, chu chu amah pawh ka hrilh chiang tawk viau. Kan inṭhen hma daih aṭang khan nupa angin kan awm lo daih tawh a, nupui anga ka en lohna hi a rei tawh lutuk! Ka thinlungah hian a thi tawh." A aw chu a chang ṭha beng bawng hle a.

          A pa chuan a aw a han thian kharh a, "Eng pawh ni se, Bawihtei hi amaha thlahfal loh a pawimawh. Khatiang hmeichhia kha chuan a duh tihpuitlinna  turin engmah pawisak a nei dawn lova, chuvangin, Bawihtei hruaitu pawh kha chiang deuhin thil awmdan hrilha fimkhur tura tih a ngai a ni," a lo ti ve a.

          Chaw eikham hnu chuan nu Mawiite tlawhkual kan duh avangin rei awm lovin kan kal nghal deuh mai a, a fapa damloh tirh lamah khan Bawihtei te pafa hian vawikhat chu an lo va tlawh tawh a ni.

          Nu Mawiite in kan va thlen chuan a fapa khawsik chu a lo buaipui mek a, a lu-ah puan huhin a lo dahsak a, an bul lawkah chuan a fanu chu a zirlaibu nena inchhawpin a lo awm ve ran bawk a.

          U Malsawma'n inentîrna tur pawisa a pek hmangin an inentîr a, nihnih khat vel chu a han zia chho viau a, a damdawi chu a ngeih hle nia an hriat laiin nimin lam aṭang khan a lo nuamlo zual leh a ni awm e.

          A khawsik chu a sâng ang reng viau mai a. U Malsawma chuan u Rintei chu a va phone vat a, ani chuan damdawiin lama kalpui mai ṭhaa a rinthu-in a lo chhâng a. U Rintei hi private hospital pakhatah a thawk tawh a, a thawhna hmuna kal tur leh amah pawhin lo kal a tum thu chu a rawn sawi a.

          Damdawiin kan va thlen phei chuan u Malsawma chu an lo hre hlawm hle a, min lo buaipui nghal sawk sawk a. Nachhawkna hmangin an chiu a, a thisen chu test turin an la nghal bawk a. Kan thlen hnu rei lutuk lovah chuan u Rintei pawh chu a rawn thleng ve nghal mai a.

          Kan han nghak ren rawn a, u Rintei chuan admit mai ṭhaa a hriat thu a rawn sawi a.

          Kan in-admit fel meuh chuan zan a lo rei  tawh hle a, Bawihtei mut a chhuah tawh em avang chuan ṭhu khawmuang tawh lo chuan kan hawsan ta nghal a. Nu Mawii fanu chu a nau damdawiin awm chhung kan bula lo awm rih turin kan hruai haw ve nghal bawk a.

          An damdawiin awm chhung zawng chu u Malsawma chuan a buaipui a, an chhuah dawnah pawh bill a peksak vek a, a inenkawl zuina tur a pe bawk a. Nu Mawii lawm lutuk chu lawmthu pawh sawi hleithei lo khawpin a hnuk a ulh a, kei lah chuan ka lo ṭahpui ṭep bawk a!

          Kum tawp dawnah chuan Arts students tan excursion Delhi-ah a awm a, heta kal tur hian lecturer pathum an ruat a. U Malsawma chu kal ve tura ruat zinga a tel avang chuan a awmloh chhung chu a nute in lama lo va awmphei mai turin min ti a.

          An kal dawn ni chuan a nute inah chuan min va dah a, a kal dawn chuan ṭha taka lo inenkawl tur leh fimkhur reng turin uluk takin min chah a. Thil eng emaw thleng a awm hlauh a nih chuan amah chu a rang thei ang bera hriattir vat turin min ti bawk a. A tlan liam hnu chuan ruak ta huaiin ka inhria a!

          A pite ina kan awm chhung chu a pu chuan a school kal a hruai theih dawn avangin amah hruaitu kha a chawl rih mai a. Driver an neih avangin a pu in a hruai hman loh pawhin an driver chuan a hruai thei tho dawn a ni.

          Ni khat chu, class ban hnu-in Judithi chuan kalna tur pawimawh a neih avangin chuta kalpui tur chuan min sawm a. Benate ṭhianho chu an inkhelh dawn avangin kan pahnih chauh chuan kan kal ta a.

          Millenium Centre kawta sumo counterah a nute thil rawn thawn chu kan va lam a, kan let leh tur chiah chuan MC aṭanga U Rosie-i leh mipakhat rawn chhuak hi ka va hmu a. A hmaa a kawppui kha a nih loh avangin ka va ennawn leh ngat a, chutia ka va en lai tak chuan min rawn hmu ve-in a ner sawk a, a kalpuipa chu bia-in min elsen ni awm fahranin a nui vel a.

          Ka tan engmah a ni lova, a nunah awhawm engmah ka hmu lo bawk. A khawsak danah ka duh loh ang a tam avangin ka ngaisang lo ve tawp a, a mi elsennate chu eng he hu-ah ka ngai lem lo.

           U Malsawma nute awmna hi a hlat tham deuh avangin taxi-in ka haw mai zel a, vawihnih vel chu Benate ṭhian hovin min thlah tawh bawk.

          Taxi ka chan rei deuh avang chuan in ka thlen chuan a hma tawh vak lova, ban hnu-ah kan kalkawi leh bawk nen a tlai tawh ang reng viau a ni.

          Inchhûng ka luh rual rual.chuan Bawihtei chu ka lam panin a rawn tlan a, min rawn pawm chawt a. Lo kuahlet pah chuan thil thleng a awm leh awm loh chu ka zawt nghal a.

          "Vawiinah ânu kan schoolah a rawn kal a..."

          "Engtin.... i nu chu in schoolah a lo kal a maw!?"

          A lu chu a lo bu nghauh a, hlauhthawnna nasa lutuk chuan ka chhungril a fan nghal a.

          "Eng nge a rawn tih? A bia che em?" Ka aw khur pawh chu ka thup thei lo, ka hlauthawng em a ni!

          A pu chuan min lo chhang vat a. "Traffic jamah kan tan rei deuh avangin an ban hma-in school kan thleng hman lova, kan va thlen chuan an nufa-a an lo  ding dun chu kan va hmu a, Rosie-i chuan a banah a lo vuan a. Min hmuh veleh Bawihtei chuan min rawn au nghal vak a, ka va tlan phei nghal bawk a. A nu chuan thlahin a kalsan a, piah deuha mi pakhat lo ding ve reng nen chuan an inphur chhuak nghal daih a, biak hman pawhin a awm lo."

          "Bawihte, i nu chuan eng nge a sawi?" a lu-a chul pah chuan ka zawt leh a.

           "A bula kal turin min sâwm leh a, ka duh loh avangin ka bânah a hmet vak a," mittui tling piau chung chuan a ti a.

          Tumah kan awm si lova, a thlaphandan tur ka ngaihtuah chuan ka hnuk a ulh ṭeuh a, ka ṭawngchhuak thei lo hrim hrim. Ka pawmbet tawp a, ka mittui tla tur chu ka dangkir hram a.

          Tlema ka ziaawm deuh hnu chuan, "I bân chu a la nâ em?" tih pah chuan a bân chu ka ensak a.

          " Tunah chuan a na tawh lo. Schoolah kha chuan a na lutuk a, ka ṭap ṭep a. Mahse, ka ṭah chuan min bêng leh hrep ang tih ka hlau a, ka ṭap duh lova."

          "Engtin nge ama hrin ngei chungah hetiang hian a khawsak theih le! A va han rapthlak tak em aw!" a pi chuan a lo ti vang vang a.

          Zana u Malsawma'n min rawn biak chuan Bawihtei chu a lo muhil tawh a. A pi leh pute'n thil awmdan an lo hrilh tawh a ni ngei ang thildang engmah sawi lovin thil thleng chungchâng chu a rawn sawi nghal tâwng a.

          A lungawi loh em avang chuan pangngai tak pawn kan inbe hlei thei lova, a rawn in-âng thâwl a ni ber e. Aizawla a awmlai chu ni se an inah va kalin a va sawisa duh hialin ka ring a ni.
Kei ngei pawh ka bang chuang lo, tunah hian hmu chiah ila chuan eng anga nasa in nge ka ṭawngkhum ang tih pawh ka ngaihtuah thiam pha lo zawk!

          Kan inbiak tawp lamah chuan pangngai takin kan inbe thei ta a. Kan awmna chu hrehawm ka tih leh tih lohte min rawn zawt a, college chungchângte min zawt bawk a. Keiin an zinna chanchinte ka lo zawt ve bawk a.

          "Bawihtei chu ka ngai tawh khawp mai," a rawn ti sup a.

          "Ani pawhin a ngai tawh ngawt ang che," ka lo ti vat a.

          "Chuan, ngaih deuh dang  ka la nei a.... "

          "I nu leh ......... "

          "Tuna ka biak mêk hi!" a rawn ti thawp sut a!

          Ka lung chu a phu rang mah mah a ni! A thil sawi chuan ka marphu a tidanglam vek a, thildang engmah ka rilru-ah a lut lova, amah chauh chu a ni ka ngaihtuahnaa awm chu!

          "Tlem tal pawhin min ngai ve lo em ni?" a rawn tih leh sup pawh chuan ka la ṭawngchhuak zo chuang lo.
 
          Ka ngai em em a, ka ngai lutuk mah mah zawk! Zankhat tê mah amah ngaihtuah lova ka muthilh a la awm lova, ka thinlungah hian a ngawl ka vei a ni ber. Amah ngaia ka khawhar rukna hi engtin nge ka hrilh ngam tehlul ang ni!

          "Aw le, a ṭha alawm. Mahse, ka lo haw hunah sawidun tur kan nei niin a lang. Bawihtei kha min lo fawhsak dawn nia."

          Kan inbiak zawh hnu fê-ah pawh ka awmdan ngai chuan ka la awm ta reng a! Ka hresual chu a ni si lova, ka ngaihtuahna mai mai lah a ni hek lo. A mitmenga min ngaihsakna ni awm tak ka hmuh ṭhin kha ka duhthusam mai ni lovin a lo ni tak tak reng em ni ang le!

           Bawihtei rum ri chuan ka ngaihtuahna ram aṭang chuan min kai harh a, intifaiin ka mu ve ta nghal a.

          Ka mut hnu pawh chuan Bawihtei chu a rawn rum leh ṭhin a, amah chu zan dang aiin lum riau-in ka hre bawk a. A chal ka va khawih chu a lo sa vur mai a, damdawi engmah kan kawl si lova, ka mangang rilru hle a. Midang ho chu an muhil vek tawhin ka ring a, han tihharh leh chu ka hreh bawk si nen ka rilru a insual a. Mahse, damdawi tel lo chuan a khawsik chu a reh mai mai dawn lo tih ka hriat avang chuan u Rintei chu ka phone ta tawp a.

          Rei lo te-ah u Rintei chu kan mutna roomah chuan a rawn tlanlut nghal a, a nu leh pate chu a hrilh ve ni ngei tur a ni a hnungah chuan an rawn lang ve zui zat bawk a.

          A khawsik a san reuh em avang chuan a nî chuan a chiu a, a rawn ṭawngvai leh niah niah ṭhin a, a thil sawi erawh engmah a hriat theih loh a.

          Ka mangang hmel a hmuh chuan u Rintei chuan, "Tihian nachhawkna in a chhawk hunah a rawn zia chho mai ang, hlauthawng lutuk duh suh," a rawn ti a. mahse, ka hlauhthawnna chu a reh phah lo kher mai!

           "Âpa, ka kal ka kal duh lo! U Mapui, min kuah tlat rawh!"

          Hlau leh mangang aw tih hriat taka a rawn auchhuah chuan ka phu zawk a, ka kuahbet nghal rawk rawk a, a pi leh pute pawh chu an rawn kal hnai ve nghal vat bawk a.

          "Bawihte, ka kuah tlat che a nia aw! Engmah hlauh tur a awm lo, i bulah ka awm reng a nia. Âpi leh âpu nen, ânî nen i bulah kan awm vek alawm,"

          Ka thusawi tawp lam chu ka sawi zo lui hram a ni ber a, ka hnuk a ulh a, ka hlauthawng a, u Malsawma ka ngai zual ngawih ngawih bawk!

          Minute sawmpanga hnu-ah chuan a pang sa pawh chu a rawn dai ta a, amah pawh rawn harhin pangngai takin a rawn ṭawng ve leh ta a, ka thaw huai a, ka hlauhthawnna pawh a reh ve deuh a. Mahse, khatiang khan a awm leh ang tih ka la hlau ru zek zek mai a ni.

          Vanneihthlak takin harsatna dang tawk lovin kan zankhua ta hlauh a, u Rintei chu duty a neih avangin a chhuak hma hle a. Bawihtei khua a sik leh a nih chuan hrilh nghal vat turin min chah a.

          Class kal lovin Bawihtei chu ka awmpui a, kal pawh ni ila ka rilru-ah zirlai a lut dawn lo tih ka hre chiang a, Bawihtei'n min lo thlahlel ve bawk nen kal loh law law kha ṭha maiin ka hria a ni.

          Chawhma lam chu a zia viau a, dâr 1:00pm vel aṭang chuan a pang chu a rawn sa leh ṭan a. A pi chuan u Rintei chu a phone nghal a, a rawn haw mek tih a lo sawi chuan ka thaw a veng deuh huai a.

          In a rawn thlen veleh a rawn buaipui nghal a, khawsik ennaa  a han en chuan 105°F a lo ni leh vah tawh a! A chiu leh nghal a, a pite hnena phei lovin inah khan lo awm ta ila eng ang chiaha nasa-in nge ka buai ang a ka mangan ang tih pawh ka ngaihtuah thiam pha lo zawk!

           A thisen test turin zîngah khan a nî-in a keng a, result ṭha lo engmah an hmu lova, a khawsik a la reh loh fo chuan damdawiina hruaia test dang neih leh chu a pu chuan a rawt a.

          Nachhawkna-in a chhawk hnu pawh chuan a la mu zawi ngiai a, a bulah chuan ṭhu-in naupang thawnthu ka chhiarsak a, reilote-ah chuan a muhil ta siai siai a.

          Zanriah eikhama sitting rooma kan ṭhutkhawm lai chuan Bawihtei hmel chu dik lo riau-in ka hria a, ka han sawi chuan a nî chuan a rawn enchiang vat a.

          "A sentût dawn a nih hi! Hei vang hi a nih hi a khawsik a lo san theih em em. Thildang vang a nih ringin ka lo hlauthawng ru deuh a, tunah chuan a ngaihṭhatthlak ta huai e," a rawn tichhuak ta hliai a.

          "Hetia a rawn lanchhuah tawh chuan a khawsik pawh a zia chho mai ang," a rawn tihzawm leh zat a.

          Chutia a doctor berin ngaihṭhatthlak a tih takah chuan ka ngaih ka lo tiṭha ve chawpchilh nghal ngawt a!

           U Malsawma'n a rawn phone chuan Bawihtei pawh a lo la mu bik lova, an pafa chuan an inbia a, barbie leh teddy bear an inchah leh ri ka hriat chuan ka lo nui tawp a. An inbiak apiangin an inchah ziah a, teddy bear phei chu lian deuh a duh a, amah aia lian hawn turin a chah a ni.

          An inbiak zawh chuan phone chu min pe a, zam ru deuh tak chungin, "Hello..." zawi sapin ka han ti a.

          "Mapui, ka ngai che!" eng dang mah sawi lo chuan a rawn ti thawp sat a.


VANMALSAWMA 
Sbk Pachuau
Chapter 9




          Sawi mai tur ka hre ve leh tlat pek lo! Amah lah chu a ngawi zui daih a, a thaw ham ham ri chu ka hre thei thung.

          "Engtikah nge in lo haw dawn?" A tawp atawpah chuan ka tichhuak ve thei ta hram a.

          "Naktukah Delhi aṭangin kan lo chhuak ang."

          "Tluang deuhin lo haw ru aw!"

          "Barbie ka lo hawn ve dawn che em?" A nui ri hak chu ka hre zawm zat a.

          "Teddy bear zawk le!" ka lo ti vat a. A rawn nuichhuak leh hawk a, ka fiamthu emaw a ti a ni ngei ang. Ka fiamthu tawp si lova, teddy bear hi chu ka la duh reng a ni.
       
          "Vawiinah class i kal lova maw?"

          "Aw... "

          "A pi leh pu an awm reng a, a nî a awm bawk a, kalsan mai tur che a nia. Class kal ṭhahnem i ngaih tehreng nen."

          "U Rintei duty turin a chhuak daih alawm! Chubakah, kal mah ila ka rilru-ah a lut dawn chuang lova, kal loh law law kha a ṭha mai ka tia."

          "Tunah khan a bawl chhuak nasa tawh em?"

          "La nasa lutuk love. Damdawi a ei nghal a, a dam vat mai ang. Lo ngaihtuah lutuk lo la."

          "I bulah a awm a, ka ngaihtuah lo."

          "A lawmawm lamah ka ngai e... "

          "Mapui.... "

          "Ummm..."

          "Ka ngaihtuah hle che a ni tih hi i hrethiam tiraw?"

          "Ngaihtuah ka ngai hleinem, mahni inenkawl thei rual ka nih ve tawh hi!"

          "Ni lo, chutiang lam ni lovin.... " a thaw hawk a, "Engtin nge thil awmdan hi i hriatthiam miah loh theih le!" a ti vang vang a.

          "Ka hre lo, ka hre bik lo! Eng nge hriatthiam tur pawh chu ka hre lo."

          "Ka lo haw hunah i hrethiam vat ang tih ka tiam a che. Ka lo haw châk tawhzia hi i ngaihtuah thiam pha hauh lovang!"

          "Bawihtei a damṭha bawk si lova, lo haw thuai thuai chu i châk ngawt ang, " ka lo ti vat a.

          "Ni lo, chutiang a ni lo! Engtin nge ka hrilhfiah ang che le?" A ngawih vang vang hnu chuan, "Aw le, tunah chuan mu phawt ang. Nizan lamah i mu tlem si a, tui deuhin lo muhil phawt la, naktukah ka rawn be leh ang che," a rawn ti leh sup a.

          U Rintei sawi ang tak tak chuan Bawihtei chu a zia chho hle a, a khawsik pawh a awm tawh lova, school erawh chu kan la chawlhtir rih a ni.

          U Malsawma rawn thlen dawn zan chuan ka helhhawlh deuh nge ni ka muhil thei lawk lova, ka ngaihtuahnaah a khatliam a, midang hriatpui hauh lohin chhungrilah ka buai ru em em a ni. A lo thlen hunah engtin nge ka lo dawnsawn ang tih ringawt pawhin ka rilru a tibuai a, ka nghahhlelh rualin ka huphurh ru viau lawi si a ni ber mai.

          Sana ka'n en chuan zinglam dâr 3:00 a lo ni leh vah tawh a, tlem tal ka muthilh loh chuan tiin a bul aṭangin muthilh ngei tum chuan ka'n bei ṭha leh a.

          Ka bianga chultu an awm avang chuan ka harh hlawl a, a tirah chuan Bawihtei emaw tiin ka meng nghal mai lova, ka hmui a rawn tawh takah chuan naupang kut ang lo riau-a ka hriat tak avang chuan ka mengchhuak hlawl a.

          "Good morning, mutduhte..." a nui pah sak a. Inbual zo hlim tih hriat takin a sam chu a la hnâwng chap a.

          "Engtin...i...engtikin nge i lo thlen?"  Ka hamhaih leh zo vek tawh. Kan inhnaih lutuk chu thuhran a kuta min tawhna ringawt pawh chuan ka ngaihtuahna a tifîm lo zo a, ka zam tak zet a, hlauh vang ni hauh si lovin ka khur dar dar bawk!

          Rawn kun hniam pahin, "A la rei lutuk lo, min lo hmuah ka ring a!" a ti sup a.

          "Nia, ih... englo... nizanah ka..... "

          "Min ngaihtuah a, i muhil thei lo. Keimah angin"

           "Engtin.... "

           "He i mitmeng mawi lutuk hian i rilru a puangchhuak ṭhin tih i hre miah lo em ni?" A nui pah sak a.

           Khang hun, ka inthup hle emaw ka tih lai zawng pawh khan a lo hre reng tihna maw! Ka zak leh tihngaihna hre lo lutuk chu rizaiin ka inkhuh ta ringawt a.

           Dimte-in rizai chu a rawn pawt hawng a, ka kut chu la-in a hum vang vang a. Amah chu ka enlet ngam lova, ka zam lutuk chuan ka mit ka chhîng ta ringawt a!

          A hmuiin ka chal a rawn sik takah chuan ka mengchhuak nghal vat a, kan hmai chu a insi lo chauh a ni. Ka mitah tak min en a, kan inhnaih em avang chuan hmun dang melh ngaihna awm hek lo ka melh let ve ta reng a!

          Bawihtei rawn tlan lut thawmah chuan kan inṭhen phawk a. Teddy bear lian ṭha tak mai hi a rawn pawm lut a, phur lutuk tih hriat tak maiin khumah chuan a rawn zuang lawn nghal a.

          "U Mapui, ka teddy bear hi keimah aiin a lian asin! Zanah kan bulah muttir ve ang aw?"

          Ka lo chhan nghal mai loh avang chuan min rawn en hâ a, kei lah han ṭawngchhuak mai turin ka la pangngai lo nasa lutuk tlat mai si. U Malsawma chu ka han en ringawt a! Min hrethiam tih hriat takin a lu a lo bu nghat a, a fanu lam chu hawiin a biangah chuan a va piaisak a.

          "Bawihte, i teddy bear chu a lian si a, u Mapuii khumah in leng dawn em ni?"

          "Ni tak! U Mapuii khum chu a te si a, kan leng dawn lo a nih chu, va'n pawi tak," a ti chuai raih a.

          "U Mapuii bula i mut hunah chuan i barbie kha riahpui mai ula, in leng vek mai dawn alawm," a pa chuan a lo ti vat a.
          Bawihtei chu inngaihtuah muk hmel fe hian a ngawi vang vang a. Chutah, "Tihdan ka hria! Kan khum a zau tho a, u Mapuii hi lo riak ve mai sela, teddy bearte nen kan vaiin kan mu thei dawn asin!" a rawn tichhuak ta phawng a!

          A pa nen chuan kan inen nghal vat a, a thil rawn sawichhuah chuan kan boruak tawn mekah min hruai lut lehin sawi ve tur reng reng ka hre lo!

          "U Mapuii kan bula a mut ve chu i phal tak tak maw?" A pa chuan a zawt a.

          Phur tak maiin Bawihtei chuan, "Phal lutuk! Chuan, inriahchhawk a ngai tawh lovang a, in pahnih bulah ka mu thei dawn alawm!" tiin a lo chhang awlsam then a.

          U Malsawma chuan nuihzat hmel deuha min rawn melh pahin," I u Mapuii hian a duh ve pawh ka ring lo, han zawt chhin la," a lo ti a, ka lo melh let nghek ringawt a!

          Bawihtei chuan hlauhthawn hmel taka min rawn en pahin,"I duh ang tiraw u Mapui? Nangmah leh âpa bulah ka mu duh a, ka teddy bear hi ka mutpui duh bawk si a," khawngaih thla la deuh hian a rawn ti a.

          Ka aw chu ka han thian kharh a,"Bawihte, in bula mut chu ka duh loh vang ni lovin ka mu ve thei lo alawm," ka tichhuak ve ta hram a.

          "Engvangin nge i lo mut ve theih loh?"

          "Bawihte, a chhan chu naupang hriatthiam chi a ni lova, hrethiam rual i nih hunah ka la hrilhfiah dawn che nia aw!" a lungawi dawn hauh lo a ni tih hre reng mah ila hetiang bak hi chuan ka sawi thiam tlat lo.

          A pa chu a zawt ta chat mai reng a, lo inhrilhfiah pafa teh se tiin bathroomah chuan ka luhsan ta daih a.

          Bathroom aṭanga ka chhuah leh chuan Bawihtei chu a lo awm tawh lova, u Malsawma chu tukverh bulah pawnlam hawiin a lo ding run a.

          Dressing table hmaah chuan dingin ka sam ka khuih mawlh mawlh a, ka bulah chuan lo pheiin ka hnunglam aṭang chuan ka kawngah a rawn kuah a, ka lo ip chawih a.

          Ka koki-ah a khabe chu rawn nghatin ka beng bulah chuan a rawn thaw halh a, "Zantin nangmah ngaihtuah chung che-in ka muhil a, ka harh rualin nangmah bawk ka rilru-ah i awm leh nghal a," min kuah ngheh sauh pah chuan, "Tlem talin min lo ngai ve em?" a tihzawm zat a.

          "Aaaa.....aw....ih... englo..." ka dang a awk tak zet!

          A rawn nui chhuak hawk a, "Sawi lo mai rawh, min ngai ve tih ka hria alawm!"

          A nakah chuan ka lo nghawk zauh a, a lam hawia min kuai herin ka khabe-ah chuan a dawm a, amah en thei turin min kuai dak a.

          A mitmengah chuan min ngaihsakna leh min thlakhlelhna ka hmu a, ani pawhin chutiang bawk chu keimahah a hmu ve tho ang tih ka chiang!

          A hmuiin ka hmui a rawn sik rual chuan ka ṭek chhuai ni maiin ka inhria a, ka thisen luanglaite chu an chawl ṭhup ta emaw tih mai turin ka ni deuh muih a. Lo kuah emaw, lo fawhlet emaw pawh tum chuang lo chuan ka lo ding mawl tawp ringawt a!

          Amah si cheta min kuahbeh pah chuan a aia uar zawkin min rawn fawp leh a, ngenngawl takin min fawp a ni ber e. Ka tum lawk ni miah lo chuan ka hmui chu ka chet a, ka inrin hma-in ka lo chhanglet a, a nghawngah chuan uai titihin ka kuah bawk.

          A huhâng chuan ka chhip aṭanga ka ke hmawr thlengin min fan chhuak a, ka ṭek chhuai chhuai a ni ber mai! Hetiang em ema danglamna nasa lutuk min thlentu hi mipa dang an awm ka la hre hek lo.

          Kan inthlah meuh chuan kan thaw  chu a mumal lo dun hle a, a âwmah chuan min kuahbei a, a lungphu ri dup dup chu ka hre thei a!

          Inlakhran tuma ka chet rual chuan  min kuah nghet zual sauh a, zawitê-in ka bengbulah a rawn phun sup a.

          "Ka la kuah duh che!"

          Eng emaw chen chutianga kan awm hnu chuan ka kutah chuan kaiin dressing table hmaa ṭhutthlengah chuan min ṭhuttir a.

          "I inpeih fel veleh lo chhuak la, ka thil lo hawn che ka lo va la ang e."

          Ka chhipah a rawn fawp leh vang vang a, min chhuahsan ta a, ruak ta huaiin ka inhria a!

          Ka sam chu ka khuih ṭha leh a, ka tha khur nasa lutuk avang chuan ka ṭawn fuh thei lawk lo lehnghal! Ka mut thawmhnaw ka thlak hnu-ah pawh chuan ka la pângngai lo lutuk a, inthunun tum takin thawk ka'n la halh a, tlem chuan ka zia deuhin ka hria!

          Room aṭanga ka chhuah chuan sitting roomah an lo ṭhukhawm hlawm a, ka thawh har em avang chuan ka inthlahrung ru hle a. U Malsawma'n a mitmeia a bula ṭhu tura min lo tih chu haiderin Bawihteite pitu lo ṭhutna-ah chuan ka va ṭhu ve a. U Malsawma lo ner sawk chu ka hmu a, ka va nuih sak a.

          Bawihtei pi chuan ka mu ṭha thei em tihte min lo zawt luam a, ka mut ṭhat thu-in ka lo chhang vat a, thawh ka hai avang chuan thupha ka chawi nghal zat bawk a.

          Bawihtei pi chuan, "Bawihtei vangin zan eng emaw zat mut i hmu mumal tawh lova, mut tam i mamawh alawm. Tui taka i mu ve thei ta chu a lawmawm zawk a nih chu," a lo ti hliai a.

          U Malsawma chuan Bawihtei teddy bear aia te deuh hi min lo hawn ve a lo ni a, ka lawm lutuk chu ka khek raih a, min lo en ṭhap avang chuan ka zak leh deuh hle a.

          "Naupang chhe thil lo deuhte kha han inhawn ve tur alawm maw le!" Bawihtei pu chuan a lo ti bauh a.

          U Malsawma chuan, "Naupang chhe thil lo deuh chu ka hawn alawm. Mahse, nidangah ka la pe ang," a lo ti sup a.

          Kei lah chuan ka teddy bear chu ka lo hlimpui tawk em em mai si a, eng thil dang nge min lo hawn chu ni ang tih lam pawhin rilru a luah meuh lo.

          Chaw eikham hnu chuan u Malsawma chu zanlama a tlaivar titih avangin a mu a, Bawihtei nen ka roomah awmin kan thil neih thar chu kan hlimpui dun hle a, kan inkhuallem nileng a ni ber e.

          Chawhnu lam chuan ruah a rawn sur a, khua pawh tlemin a dai ta deuh. Tlai lamah chuan Bawihtei pawh khumah chuan a muhil ta sêk sêk a, puan chu sintirin ka thawhsan ta a.

          Bawihtei piin ka bai siam ei a châk leh tawh tih a sawi avangin bai siam tum chuan choka ka pan nghal a, an nula chu bai siam tum chuan a lo inchhawp mek a. Keiman ka siam dawn tih ka hrilh chuan remchangah la-in thawmhnaw nawh zawh loh a la neih chu a va nawhzawm ta hlauh a.

          Ka bai chhuan ka lo chawh hauh hauh lai chuan ka hnunglam aṭang chuan min rawn kuah a, ka lo hmu lawk si lo nen ka phu deuh zawk a. Nuih hawk pah chuan ka biangah a rawn fawp zauh a, kei chuan midangin min hmu ang tih ka hlauh em avang chuan ka hawikual nghal ruai a, ani lah chuan a ngaihpawimawh hmel loh nasa mai si a!

          Min rawn kuah leh pawh chuan ka lo ṭang deuh ṭun a, "Midangin min rawn hmuh chuan a chi dawn miah lo a nia," tih pahin a kut chu phelh ka lo tum nghal a.

          "Ho lutuk! Min rawn hmu mah se a pawi ka ti hleinem, ka hrilh vek nghal loh," tiin min kuah nghet sauh thung a.

          Kan awmdan vel chu nupate pawh kan ang hle-in ka hria a, duhthusam anga kan awm theite a nih ngai chuan chutiang hun chu a la thleng mahna!

          Zanriah ei kham chuan u Malsawma in lamah kan haw phei ta a, a nute chuan min ui viau na'ngin kan awmloh rei deuh tawh avangin u Malsawma chuan a ngaihtuah ve si a, remchang danga riak leh tura insawiin kan haw ta hram a.

          Bawihtei school kal leh hmasak ber ni chuan class kan kal dawn loh avangin keima hruai kher chu a duh a, kallam chuan a pa nen kan va dah a, a ban hunah erawh chuan a pa a hman tawh dawn loh avangin keimahin ka hruai thung dawn a ni.

          Ban dawna ka va hruai leh tur chu taxi ka hmuh remchan hlauh avangin ka thleng hma hle a, ka nghak rei ta phian a.

          An rawn ban takah chuan ka ṭhutna aṭanga thovin ka va panhnai ve nghal a, naupang hming an rawn lam a, an chhungte chu an lo awm vat zel hlawm a.

          Bawihtei chu an rawn lam har ti rilru tak chung chuan ka nghak ve ran a, an miss-in min rawn hmuh chuan makti hmel hi a pu deuhin ka hria a, eng nge a chhan ni ang tih phei chu ka hre lem lova.

         Naupang tlemte chauh an awm tawh a, Bawihtei ka la hmu lo! Classroomah a la awm a nih ringin ngaihṭhat lohna em em pawh nei lo chuan ka la ding reng a, naupang an awm tawh loh hnu chuan an miss chuan min rawn au ta a.

          "Hruaizeli kha class laklawh laiin a nu-in a rawn hruaichhuak a, a pa damdawiinah a awm a, kalpui a ngai tih a rawn sawi a," a ti ta mai a!

          "Aw Lalpa, a van pawi tak! A rei tawh em a rawn hruaina chu?" Ka mangang lutuk chu ka dangte hi a ro vekin ka hria a.

          An miss chuan dâr 11:30am velah niin a hriat thu chu min hrilh a.

          U Malsawma number ka dial nghal a.

          "Hello..."

          "Bawihtei a nu-in school aṭangin a lo hruaichhuak daih! Engtin nge kan tih ang?" Ka ṭap zui nghal hlawp hlawp a.


VANMALSAWMA
Sbk Pachuau
Chapter 10




          U Malsawma a rawn thlen chuan zirtirtute chuan thil awmdan chu an lo hrilh sawk sawk a.

          Khatia manganga ka ṭah takah khan an Miss khan staff roomah min luhpui a, u Malsawma rawn thlen hma chu min lo ṭhutpui a, zirtirtu dang pawh rawn lutin thil awmdan an han hriat chuan an hamhaih ve hle hlawm a ni.

          A hmasa ber atan u Rosie-ite in va en chu a rawt a. Kawnga kan tlan lai chuan min hnemna atân a ti nge ka kut chu a motor khalh lohna lam chuan a rawn hum leh vang vang ṭhin a.

          Kan va thlen chuan kan manganna belhchhah tur bak hriat kan nei lo! U Rosie-i chu zingkârah zin tura a chhuah daih tawh thu a nu chuan min lo hrilh a, mahse, Bawihtei school aṭanga a hruaichhuah hun nena khaikhinin zingkarah chuan a zinchhuak lo tih a chiang bawk si! U Malsawma chuan thil awmdan chu a han hrilh ve nghal zung zung a, anni pawh chu an mangangin tihngaihna vak an hre bik lo hle a ni.

          U Rosie-i te in aṭanga kan chhuah hnu chuan u Malsawma chuan a ṭhianpa Puia chu bia-in thil thlendan chu tawi kimchang takin a hrilh a, an inbiak zawh chuan kan tlanchhuak leh ta nghal a. U Puia hi police officer niin u Malsawma ṭhianṭha tak a ni a, inah pawh a lo lenglut ve leh zauh ṭhin a, a hmelṭha hle a, a pian pawh a nalhin a palian ve thawkhat hle bawk.

          Khawiah nge a hruai anga engtin nge a tih ang tihte ka ngaihtuah a, Bawihtei thlaphan dan turte ka ngaihtuah chuan ka tawt up up a, ka thaw hi a pik hluah hluah mai a ni.

          Kawngsir hmun fianrial deuha motor a tihdin chuan a ngaihna hre lovin ka va melh a, ka kutah chuan rawn vuanin a lamah min pawthnai a.

          "Lo kal teh," tih pah chuan min kuah vang vang a, kan manganna lungphu chu a inchhawn dup dup a!

          Ani pawh chu a mangang ve hle a ni tih hriat tak maiin sawi tur a haihchham a, han inhnem tur bik kan awm lo a ni ber e. Kei, a thisen zawmpui ni lo pawh heti khawp hian ka mangang a ni a, pa tan phei chuan a manganthlak turzia chu ka hriatthiampui lutuk tlat!

          Eng emaw chen chutia kan inkuah hnu chuan a phone chu pawrhin a nute chu a bia a, an inbe rei ang reng viau. An inbiak zawh chuan in lama haw phawt mai ṭhaa a hriatthu a sawi sup a, inlam pan chuan kan tlan ta nghal a.

          Ina kan awm hnu rei lutuk lovah chuan a nu leh pate an lo thleng a, chet lakdan tur an relzui nghal a. Chutia tihdan tur an ngaihtuah lai chuan u Malsawma phone chu a rawn ri a, a chhang nghal vat a.

          "Aw Puia... " lehlama ṭawng chu a ngaithla vang vang a, "Tunah chuan inah kan awm a, i hman tho chuan lo phei ve la," a ti leh sup a.

          U Puia a rawn thlen hnu chuan hmalakdan tur ṭha nia a hriat chu a sawi zung zung a, a naute ho zinga mi ṭhenkhat chu Bawihtei thlalak hmuhtirin an kalkual velna lamah uluk zawka mit len turin a chah tihte a sawi nghal bawk a. Kei chuan ka lo ngaithla liam mai mai a, kan hmuh hma chuan rilru nuam leh pangngai takin ka awm thei dawn lo niin a lang!

          Eng angin nge ro an rel a eng eng nge an sawi tih pawh ngaihven thei lovin Bawihtei hrehawm tihdan tur ka ngaihtuah a, ka hnuk a ulh ṭeuh reng a, thil ṭha lo lehzual a thleng ang tih hlau reng rengin ka awm a ni ber.

          "Mapui.. " U Malsawma chuan ka darah a kut rawn nghatin, "Puia nen hian kan va chhuak lawk ang a, lo awm hahdam la, chanchin kan inhrilh tawn zel dawn nia. Ka nu pawh hetah a awm rih ang," a rawn ti a.

          "Ka kal ve dawn!"

          "Tihian inah lo awm zawk rawh. Thilte lo ei la, lo intihahdam la, chhuah a ngaih leh hunah i lo kal ve zawk dawn nia."

          "Engtin nge lo awm hahdam se min tih? Hetiang chung hian hahdam deuhin ka awm theih i ring tihna mi?"

          "Khawngaihin Mapui, a kawi zawngin thil la lo hram teh! Ka theih anga hma-in rawn haw ka tum dawn nia."

          An chhuah hnu lawkah chuan Bawihtei pu pawh chu a theih ang anga chanchin ngaihven turin a chhuak ve nghal a, a pi nen chauh chuan kan awm ta a.

          Ka ngaihtuah chiang a, u Malsawma khan a sawi dik chiah! Tunah a kawi zawnga awm a hun lova, chubakah, ka fanu ni lovin a fanu zawk chin hriat lohin a bo a ni a, a buaina belhchhah zawnga lo awm kha a finthlak viau lo tlat a ni.

          U Malsawma nu pawh chuan intipachang hram tura min hrilhin lo phili vakin awmzia a neih loh thute chu a sawi malh malh a. Ani pawh a thlaphang lo a ni bik lova, a ngaihtuah lo a ni hek lo. Mahse, thil an thlir thiam a, an manganna inhnehtir lovin fim takin an hmachhawn mai zawk a ni.

          Ka inbual sawk sawk a, ka inngaihtuah leh ngut ngut ka hlauh avangin rilru lakpenna atan nu Mawii eirawngbawl chu ka pui a, u Malsawma nu pawh kan bulah lo awmin nu Mawii nen chuan an ti ti melh melh a.

          Tukṭhuan bak kha thildang engmah ka la ei leh miah lova, ka ril erawh a ṭam hauh lo thung. Thil ei chakna ka nei lova, mahse, ei luih ngei chu ka tum ve khawp mai.

           Zanriah ei hun dawnah u Malsawma leh a pa chhuak chu an rawn haw a, chanchin ṭha lam engmah an rawn hawn loh avang chuan ka zuai rawih a, mahse, midang hmuha chak lo lutuk anga lan erawh ka duh tawh bik hauh lo thung.

          U Rintei duty zo pawh a rawn thleng zui ve nghal deuh mai a, a mangang hmel ka hmuh chuan ka ṭah a chhuak ru ngawih ngawih mai a ni.

          Chaw eikhamah chuan u Malsawma leh u Rintei nen vawiina hotel an la enkim loh ho en turin kan chhuak a, u Malsawma chuan insehruh ṭeuh chung chuan motor chu a khalh a, atu amah ṭawng lo chuan kan ngawi ṭhap a.

          Hotel pakhat kawtah chuan min dinpui a, amah chu chhukin keini chu motora lo nghak tur chuan min ti thung a. Hotel chhunga a luh hlan chuan u Rintei chuan Aizawl an chhuahsan hman a nih hlauh chuan keini tan zawn hmuh an harsa zual sawta a rinthu a sawi sep sep a, kei chuan hotel chhak stepa mi pahnih dingdun en reng chung chuan a thusawi chu ka lo ngaithla a.

          He hotel hi Aizawl tlaklama awm niin a lar em em hran lova, u Rintei nen phei chuan a awm tih pawh kan hre lo hrim hrim a ni. Pawnlam aṭanga a landan a ṭang ringawt pawh chuan hotel changkang tak a ni lem lo tih a hriat theih mai a, a kawtkai velte chu a thim deuh rup a, a piah hla deuha street light-in a rawn chhun phak chin chu a eng ve deuh riai chauh a ni.

          U Malsawma hotel aṭanga a rawn chhuah chuan a hlawhtling lem lo tih a hmelah chuan ka lo hmu thei a, motora a rawn ṭhut luh rual chuan beidawn hmel zetin a thaw hawk a. U Rintei chuan chanchin a lo zawt vat a, a hlawhchham thu a sawi rual chuan motor chu a tinung nghal a.

          Motor a khalh chhuak ṭan tihah chuan tum em em vang pawh ni lovin step lam chu ka va melh leh a, mi pahnih dingte kha an lo chhukthla tawh a, engin a chhun chin an rawn thlengthla chiah a.

          U Malsawma banah chuan va hmer chawt pahin, "Ding teh!" ka ti tuar(h) a. A din fel rual chiah chuan motor aṭang chuan ka chhukthla nghal rawk rawk a!

          U Malsawma'n, "Eng thil ...... " a tih chu ka hre hman ṭawk a, ka tlan phei nghal a.

          Stepa lo chhukthla mekte'n min rawn hmuh chuan an ding a, eng awmchhun pawh chu a hming chauha eng a nih vang nge min rawn hre lo niin a lang.

          Step tirlam ka rap ṭan chiah tihah chuan ka hnung aṭangin u Malsawma chuan min rawn ko a, chutah chiah chuan u Rosie-i chu a rawn hawi phawk ta hra a, inherin an lo chhuk tawhna lamah chuan a let chho leh nghal a. A lo dinpuipa pawh chuan a zui chho ve nghal zat a.

          Hmanhmawh taka tlanchhoh pah chuan, "Hey.... lo ding teh u!" tiin ka au ṭhawt a. U Malsawma chuan min rawn tlanpel ta thuak a, ka hnungah chuan u Rintei chu phone-a mi be mawlh mawlh chung chuan a rawn tlan chho ve bawk a.

          Step chanve vel ka tlanchho thleng tawh ang tihah chuan u Malsawma'n u Rosie-i a pawt let nawk chu ka han hmu a, ka hah em avang chuan ka ṭhu hnawk a. U Rintei pawh chu ka ṭhutna bul a rawn thlen chuan a rawn ṭhu ve nghal a, kan hah lutuk chu kan thaw dun hlawp hlawp a.

          Tlema ka hah lutuk a ziaawm deuh hnu chuan ka tlan chho leh nghal a, ka han thlen chhoh lai tak chuan u Malsawma chuan u Rosie-i kalpuipa kha a lo hnek pawp a, chu chu remchangah hmangin u Rosie-i chu a tlan ta phut a.

          Ka umzui nghal vat a, ka theihpatawpa chakin ka um a, chhuah ka tum lo bur hi a ni tawp mai. Mahse, hlauh neia tlanchhia tih takah a tlan chak phian a, ka umphak lovang tih a hlauhawm viau mai a.

          Ka tana vanneihthlak lutuk tak maiin a tlu ta thlawrh mai a, a hmanhmawh lutukna lamah a ke a chhepsual palh pawh a ni mahna! A tho a, tlan leh tuma a insiamrem mek lai chuan ka va man chawt a, ka theih tawka na-in ka man bet nghal a. Ani lah chuan tlawm a tum lo nasa mai a, ka vawnbehna kut chu phih sawkin a theih tawka na chuan a tal a, ka hmaiah a rawn nghawk sawk bawk a. Chutia kan inchai buai lai tak chuan u Rintei chu rawn thleng ve-in kan pahnih chuan kan dawmbet ta hram a, kan dawmbet zo lo lek lek chu a ni e.

          U Malsawma leh a insualpuipa pawh chu an rawn inpawt phei nawk nawk a, hmannia MC-a a kalpuipa  ngei kha niin ka hria a, a hmai chu a thi deuh hnuang avang chuan ka chiang ngam chiah lo thung.

          "Khawiah nge Bawihtei?" u Rosie-i mita en kal chung chuan ka zawt a.

          "Ka hre lo!" min hmuhsit hmel fe hian a ner zui sak a.

          Min chhang ṭha duh lovang tih chu ka hre lawk nameuh mai! Mahse, midangin an zawh hun ka nghak zo ngang lo a ni.

          U Rintei chu tu emaw hian a rawn phone a, kan awmna hmun a hrilh lai chuan kan lo ngawi ṭhap a, a hnu reilote-ah u Puia chu a rawn thleng chho ve zui nghal zat a.

          Bawihtei awmna an han zawh leh pawh chuan an ngawi tlat a, ka rilru chu a hmanhmawh et et tawh a, an thiltih sual hi zahna leh inchhirna an nei miah lo em maw ni ka ti rilru nauh nauh a.

          U Malsawma chuan u Rosie-i chu a dinchilh ren rawn a, chang beng bawng tak maiin, "Khawi hmunah nge ka fanu i dah sawi rawh. Ṭha taka ka zawh lai che hian min hrilh mai rawh, a nih loh chuan i inchhir lutuk palh ang e!" a ti bung nghat a.

          "I hmei sawn a hria ang chu! I hriat duh leh zawt ta che, amah saw a ni lawm ni schoolah pawh hruaitu?"

          "Kha i ka bawlhhlawh tak kha chip hmak rawh! Mipa chu ni la i hmel kha hmuh tlak a awm tawh lovang" a kut chu a hum khur ngawt ngawt a, a sawi ang takin hmeichhia a nih vang chauha insum a ni tih a hmuh theih a ni.

          Keimah min mawhpuh let a tum tihna em ang? Engtin nge khatiang dawt chiang lutuk khan min puh theih! A 'hmei' min la ti zui!

          Police constable mipa pahnih leh hmeichhia pakhat an rawn thlen hnu chuan Police Station lamah an hruai chho a, keini pawhin kan zui ve nghal a.

          Station kan thlen phei hnu chuan motor aṭanga chhuk mai lo chuan ka ṭhu vang vang a, Bawihtei an dahna hmun chu sawi duh ta tlat lo se engtin nge kan tih ang tihte ka ngaihtuahnaah a rawn awm a. Tunahte hian hlau leh rilṭamin a awm ang a, chau deuhin hrehawm takin a awm ang tih hlauhna chuan ka tiril a fan a, ka thawpik lutuk chu thawk ka'n la hawk ringawt a!

          Ka ṭhutna bul kawngkhar chu rawn hawngin zawhna zawt mitmeng pu chungin min rawn en a, motor aṭanga min kaichhuakin a taksa khauh ṭang mai ngheng chuan min kuah a, min kuah lohna lam chuan ka kut chu a vuan bawk a.

          "Bawihtei awmna hi sawi duh lo ta se....!" ka sawi zawm thei lo, ka aw chu a richhuak zo tawh lo a ni mah zawk!

          Min kuah ngheh sauh pahin, "Anmahni ber kan hmu tawh a, police hovin an dawp hunah chuan an ṭang rei thei chuang lovang, zaninah kan hmu em em ang," a ti sup a.

          "Kan tel lovin engtia rei nge a awm tawh tih hi han ngaihtuah teh, a thlaphangin hrehawm a ti dawn lutuk! A ril a ṭam ang tihte ka hlau a... " ka mittui chu ka dang zo lo, ka biangah a rawn luangthla ngiai ngiai a.

          "Shhhh....khawngaihin ṭap teh suh. Ka chakna i ni a, nang awm lo la chu heng thil hi engtin nge ka hmachhawn ang tih pawh ka hrethiam lo."

          "Pawi ka ti! Ka lo insum zo lo leh ṭhin, a hrehawmdan tur ka ngaihtuah hian ka intipachang zo ngang ṭhin lo a ni. I rilru a hah dawn tehreng nen hnem che chu sawi loh i rilru hahna turin ka awm zel a, min hrethiam dawn nia," a âwma ka hmai phûm chung chuan ka ti sep sep a.

          "Ka sawi kha.... nang hi ka chakna i ni a, ka bula i awm hian chakna min pe a ni. Chuvangin, min kalsan ngai suh ang che."

          Station chhunga kan va luh ve chuan u Puia roomah kan lut nghal a, chutah chuan u Rintei pawh a lo awm a. U Malsawma chuan hmasawnna a awm tawh em tiin a zawt nghal a.

          U Puia chuan, "Kan dawpthiam neih ṭhat berin tunah hian a dawp mek a, chhanna kan hre thuaiin ka ring! Lo ṭhu ve phawt ula," a lo ti thuai a.

          Darkar khat pawh tling lovah chuan kan hriat duh ang chu kan hre thei ta hlauh a! Hmanhmawh takin an dahna nia an sawi lam pan chuan kan tlan nghal vat a, motor tlan chak deuha chuan hi ka hlauh ṭhin tehreng nen u Malsawma'n a theih anga chaka a khalh chung pawh chuan hlauh chu sawi loh ka duh aiin tlan muang ka la ti cheu!

          An dahna hmun hi u Rosie-i ṭhianpa in luahah a ni a, a kawngkhar kalhna chu constable pakhat chuan tihchhiat tumin a bei nghal a. U Malsawma nen an inchai buainaah khan kha pa khan a chahbi a tibo niawm tak a ni! A hawn chhung pawh chu rei ka ti a, ka duh aiin a che chu a muang mah mahin ka lo hria a, u Malsawma ban chu nghet zetin ka lo hmer ngawt ngawt a.

          Inchhung kan luh chuan a lo reh ṭhiap a, u Malsawma chuan ka kuta kaiin bedroom ni awm tak pakhat lam chu min panpui nghal a, kawngkhar chu nam hawngin a chhunga khum ruak lo awm chu kan va hmu a.

          Chutihlai tak chuan lehlam aṭang chuan, "Hetah hian a awm e!" tiin an rawn au ta a. Rang lutuk tak maiin kan tlan phei nghal a, khuma Bawihtei lo mu zawi ngiai ka hmuh chuan ka thinlung hi a rum vawng vawng a.

          "Bawihte...?"

          Tui em emin a muhil bawrh bawrh a, ka koh nawn leh pawhin a mutdan ngai rengin a la mu a!

          U Malsawma chuan Bawihtei kut ka vawn loh lam zawk chu rawn la-in a kutphah chu a fawhsak vang vang a. Chutah, u Rintei chu kovin Bawihtei chu enchiang turin a ti sup a, ka ṭhutna bul lamah chuan a rawn insawn phei nghal bawk a.

          U Rintei chuan uluk takin a han endik vel a, a marte chu enin a mitte a keu a, a taksa hmun ṭhenkhat a enkual leh thuak thuak hnu chuan a duhtawk ta a.

          "Hetia en mai hi chuan ṭhat lohna em em hmuh tur a awm lova, a mar a ṭha a, a lungphu pawh a pangngai viau-in a lang. Muthilhnaa an chiu-na khan a la hneh deuh dawn hrim hrim a, a la harh har deuh mai thei bawk."

          Ka lo thaw deuh huai a, u Rintei a awm tho avang chuan damdawiin pan kher a ngai lem lo bawk a, in lamah kan haw tlang ta nghal a.

          In kan thlen hnu chuan Bawihtei taksa chu tuilumin ka hruchhuak vek a, a hmai chu uluk taka hruksakin a thawmhnawte chu ka thlaksak vek bawk a. Ka duhtawka ka buaipui zawh hnu chuan inbual ve lawk ka duh avang chuan inhnuaiah ka chhukthlaksan a,  a pite ho chuan an lo awmpui a.

          Ka inthlakna tur chu ka la chhuak mawlh mawlh a, ka towel ka la leh tur chiah chu ka bula mi lo ding ka hmuh thut avang chuan ka phu zawk a!

          "Thawm nei miah lo hian engtin nge i kal theih ṭhin le!"

          A lamah min pawthnaiin amah si chetin min kuahbet nghal a, ka hmai chu chulin ka hmuiah chuan a rawn fawp zauh a.

          "Bawihtei harh hma chu i awm hle hle thei leh dawn si lova, zanin chu ka room lamah i rawn insawn chhoh mai a ngaih hmel!" nuih suk pah chuan a ti sup a.



VANMALSAWMA
Sbk Pachuau
Chapter 11




          Ka inthlakna tur thawmhnaw ka ken chu khumah chuan min vawm pheisak a, ka kut chu la-in a kawngah chuan min kuahtir nghal a. Rawn kunhniamin a hmui chuan ka hmui chu a rawn bawhthuahtir a, duhthawh zetin min fawp zui nghal a, ka lo chhanglet ṭha kher mai!

          "Mapui, khawihah nge u...... !"

          Kan inthlah chiang kher mai! U Rintei chu room kawngkhar vuan chung chuan a ding a, a hmelah chuan hamhaih hmel hi a langin ka hria a.

          Ka zak lutuk chu kalsawn ka tum a, u Malsawma chuan ka kutah vuanin amah si chet chuan min kaibet tlat a. Ka kut chu laksawn tuma ka tihchet chuan a hma aia nghetin a hum bet ta tlat a, u Rintei ka zah bawk si, ka che sawn thei bawk silo chu thinur ru ṭeuhin u Malsawma chu ka nghawk sawk a, engah mah ngai lo tih hriat takin a awmdan a danglam eih lo.

           U Rintei hmelah chuan nuihza hmel a rawn lang a, a aw then kharh pah chuan, "Bawihtei khi a lo harh hunah a taksa a chauh lutuk loh nan drip khai ila ka ti deuh a, Puia nen kan va lei lawk ang e," a ti a.

          U Malsawma chuan, "I tih ang ang kha a ṭha a ni mai," a lo ti vut a.

          A u ena nui sak chung chuan, "Ka zawng che a, ka hmuh mai loh che avangin Mapuii hi i awmna zawh ka lo tum a, i lo awm reng sia!" u Rintei chuan a lo ti leh a, thil awmdan hrethiam inti zetin a nui var var bawk a.

          U Rintei chhuah hnu chuan ka kut a vawn lohna lam zawk chuan ka theih tawka na chuan ka chum pawp a, nuih hawk pah chuan min kuahbet a, min fawh chhunzawm nghal zat bawk a.

          Ka hmui chu ka chip tlat a, inlakhran tum chuan ka tal laih laih a, min thlah ve mai bawk a.

          "U Rintei awmlaite kha chuan min thlah ve mai tur che a nia, thil engkim a hriat phah vek kha," ka ti tan tan a.

          "A hriat chu a pawina a awm hleinem, a la hriat tur tho a nia,"

          "Mahse......."
 
          "Va inbual tawh rawh le, Bawihtei bulah ka lo han awm ang, lo chho vat la," nuihza insum hmel pu hian a ti a, ka tihngaihna hre lo chuan ka lo melh nghek a.

          Ka inbual zawha an rooma ka han chhoh chuan Bawihtei chu drip an lo khaisak mek a, a lo la mutui hle a ni.

          Zanlai pelh hretah chuan a rawn ṭe chhuak tuar(h) a, a  ṭapchhuak zui hlawp hlawp bawk a. Ka lo kuah vat a, a pa chuan a rawn pan hnai ve nghal vat a.

          "Bawihte...?"

          A taksa chu a rawn phu dawrh dawrh a, hlau lutuk tih hriat tak mai hian ka kuahna kut chu vai kian a tum bawk a.

          "Ka duh lo, ka duh lo! Âpa, ka duh lo!"

          U Malsawma chuan a rawn hnaih nghal rûak a, a fanu kutah chuan humsakin a kunhniam a, zawite hian a ko a. Bawihtei chu mangang tih hriat tak mai hian a la tal vel a, a mittui chu a luang zawih zawih bawk a.

          "Bawihte, harh teh! Âpa bulah i awm tawh hi, lo harh tawh rawh le." ka taksa ngheng chuan ka pawm ṭhu a.

          "U Mapui.... " a rawn ti sep a, a tal chu a zia tial tial a, mittui kârah chuan a rawn meng riai riai a.

           "Bawihte, i bulah ka awm. Engmah hlauh tur a awm lo a nia, hlau tawh miah suh aw! I bulah kan awm vek tawh a nia, tuman an tina tawh lovang che," ka mittui chu ka dang zo lo, a rawn baw zawih a ni ber e.

          "Âpa, damdawiinah i awm ami?"

          "Awm love Bawihte, damlo chauh damdawiinah chuan an awm ṭhin a, kei chu ka dam alawm."

          "Tinge ânu khan damdawiinah i awm tih a sawi si? I bulah min hruai dawn emaw ka tia, hmundangah min hruai daih a, i bula kal kha ka duh lutuk a!"

          "Tunah chuan ka bulah i awm tawh a, a ṭha vek tawh e," a pa chuan a lo ti leh sup a, a pite pawh chuan an lo hnem tliar tliar a.

          La kuah reng chung chuan a rilṭam leh ṭam loh ka zawt a.

          "Umm....ṭâm lutuk! I noodles chhum ka ei chak," a lo ti vat a.

          "A nih chuan, tikhan lo awm la, i noodles ei tur chu ka zu siam ang e aw," tih pah chuan ka thawhsan nghal a.

          "I bulah ka lo kal ve duh,"

          "Ni love, tikhan lo awm hahdam la, ka siam zawh veleh ka lo chho leh nghal dawn alawm, ka rei lovang," ka lo ti vat a,  a lungawi loh deuha a tih ṭhindan angin a nur nâng a, ka lo nuih var var thung.

          "Bawihtei duhdanin kan awm ang. U Mapuii noodles siamnaah kan awm ve ang a, kan ei ṭeuh ang," tih pah chuan u Malsawma chuan Bawihtei chu khum aṭang chuan a pawm tho nawlh a.

          "Ka nu, nangni pawh eng emaw tal ei ve rawh u. Lo chhuk ve ula, thingpuite kan in dawn nia," a tihzawm leh nghal zat a.

           "Kei zawng , Bawihtei a lo harh ṭhat tawh chuan mut mai ka duh e, i pa hian thingpui chu a duh leh lo in sela," a nu chuan a lo ti a, a pa chuan mut ve mai a duh zawk thu a lo sawi vat a, an mutna tur lam chu an pan ve ta nghal a.

          Hemi ina an awmlaia an room ṭhin  kha tihdanglam vak lohin an la dah reng a, an riah changin mutna atan an la hmang ta reng a ni.

          Inhnuai kan zu thlenthlak chuan sitting roomah u Rintei leh u Puiate chu an lo ṭhu dun a, kan thawm an hriat chuan an rawn hawidun vat a. Bawihtei hmel an hmuh rual chuan an lo kal phei dun nghal a.

          U Rintei chuan Bawihtei chu pawmin a han en kual vel a, han ngaihṭhat lohna tur engmah a hmu lo bawk a, kan ngaih a ṭha deuh sawt a.

          Thil kan ei zawh chuan u Puia chuan, "Bawihtei a harh tawh bawk a, ka va haw phei ve tawh ang e, naktukah hun ka neih chuan ka lo phei leh dawn nia," tiin a ṭhutna aṭang chuan a thochhuak nghal a.

          U Malsawma pawh chuan thawhchhuah ve nghal pahin, "Ni e, va haw phei rawh, i zarah engkim awlsam takin kan chinfel phah a, a lawmawm tak zet a ni," a lo ti ve vat a.

          "Engmah kan tih a awm loh kha, in sutkuak sa-ah kan rawn inrawlh ve hram zawk a nih kha," u Puia chuan a lo ti sam et a.

           Kan thil eina vel ka tihfel lai chuan u Malsawmate pafa chu dawhkan bulah ṭhu-in eng eng emaw an inzawt dun melh melh a. U Rintei chu u Puia a thlah zo rawn lut lehin min rawn puih a tum a, ka lo tihzawh thuak tawh avangin puih ka ngaih loh thu ka lo sawi vat a, ani pawh chu mu turin a kal ve ta nghal a.

          U Rintei ka khum ka ken avangin sitting rooma mut leh mai chu ka tum a, nu Tluangi room ṭhin pawh kha a awm tho na-a sofaa mut kha a awlsam mai ka ti a ni.

          Bawihtei'n an rooma chho ve leh tura min tih avang chuan kan inzui chho leh ta a, khumah chuan ṭhu-mu chungin a pa laptopah Barbie movie a en a, rei a en hma chuan a muthilhsan leh nghal daih a, muthilhnaa an chiu kha a hnathawh a la reh fel lo ni ngeiin a lang.

           Bawihtei mutdan chu ka siamrem a, inhnuaia chhuk tum chuan khum aṭang chuan ka chhukthla nghal a. U Malsawma chu bathroom aṭangin a rawn chhuak chiah a, ka lo ding min hmuh chuan ka bulah a rawn phei vat a. A kut vawt thlar mai chuan ka banah rawn vuanin a lamah chuan min pawthnai a, thawmhnaw inbel lova towel chauh veng mai a nih vangin a pian nalh tak mai chu ka hmu chiang hle a.

          Min rawn kuah chuan a awma lo nem pahin, "Thawmhnaw inbel phawt rawh, " ka lo ti sap a.

          A nui hak a, "Tinge? Min hlau em ni?"

          "Aih....ih....englo... a nuam lo," ka ṭawng bah nawk a. Ani lah chu a nuih a za tulh tulh emaw tih mai turin a nui hawk hawk a.

          "I insum zawh loh i hlau deuh a ni maw?"

          A sawi zawh rual chuan, "Teuh lo lutuk!" ka lo ti ṭhat a.

          T-shirt leh kekawrbul a inbel hnu chuan nuih suk pahin, "Tihian a ṭha tawh em?" a ti sup a, ka lo nuih let ringawt a!

          Ka khabe-ah chuan rawn dawmin min kuai dak deuh a, ka hmuiah chuan a rawn fawp vang vang a. Min thlah zawk a, min fawh chhunzawm leh nghal a.

          Min fawhdan chu thlakin uar leh duhthawh zetin min rawn fawp a, ka thiam ang tawka lo chhanglet ve-in kan inkeih tawn tawn a ni ber a.

          Kan inthlah meuh chuan kan thaw chu a pangngai lo dun hle a, kan lungphu chu a inthum rawn tlut tlut a. Khum piaha sofa an hunah chuan min ṭhutpuiin min pawm titih a.

          U Rosie-i khan pawisa a duh vanga khatianga che kha niin a insawi a, Bawihtei a kawl chuan a enkawlna tur a pa hnen aṭangin a hmu thei dawn a ni. A tirah khan zaidam takin a rawn thlem ve ngei kha a ni a, mahse, a hlawhtlin tak lohah chuan khatiang khan a che ta mai niin a sawi. An tumdan chuan a ṭhianpa nen khan phaiah an chhukpui ang a, chhuanlam eng emaw siamin u Malsawma hnenah pawisa tam tham taka khul chhuahna tura dil an tum a ni awm e.

          A rapthlak ka ti tak zet a, mahni hrin ngei  sum siamna atana hmang duh mihring hi an tam vakin a rinawm loh. U Malsawma chuan an inṭhen hma daih aṭang tawh khan u Rosie-i hian no. 4 a lo khawih tawh ṭhin tih chu min qq a mipa kawp ṭhinte pawh a lo hre ve vek zel a lo ni a. Mak ka ti lutuk chu sawi tur pawh ka hre lo hial a ni.

          A ruihhlo tih vangin a pawisa hman pawh a na em em a, tuna a mipa kawp hi hna nghet nei a lo ni bawk si lo nen sum lakluhna dang a ngaihtuah reng a. Chuvangin, Bawihtei pawh hmanruaa hman pawh a pawiti lova, a duh a hmuhna a nih phawt chuan eng anga nasa pawhin a che mai zel a ni.

          Ruihhlo a tih hma daih aṭangin an nupa inkâr hi a ṭha tawh lova, nupa anga an awmdun lohna phei chu a rei tawh a ni awm e. U Malsawma hian a duh taka a neih a ni lem lova, u Rosie-i hian nau a pai takah chuan amah neihna hmanrua atan a hmang ta hlauh a, nau pai lo se chuan u Malsawma hian nei a tum miah lo a ni.

          A hmaa an chanchin ka hriat ngai lo thildangte nen min hrilh nual a, a thusawi tawp lam phei chu ka lo muthilsan daih a.

          Zo taka min pawmkan tak nawlhah chuan ka harh deuh riai ruai a, an khumah chuan min muttirin zawi sup hian, "Zanin chu Bawihtei bulah hian mu la, kei chu sofaah sawn ka mu mai ang," ka beng bulah chuan a rawn ti a.

          Ka mut a chhuah em avang chuan hnial enah pawh ka en lova, min muttirnaah chuan thuawih takin ka mu ta hle hle a, ka hmuiah a rawn fawp zauh a, sofa-ah chuan a va mu phei ta nghal a.

          Zinga ka harh chuan ka mutna chu ka buai hman ṭep a, mahse, ka bula Bawihtei mu ka hmuh chuan ka hrechhuak leh nghal thuai a.

          U Malsawma mutna lam chu ka va en a, a lo tho daih tawh a, bathroom lama thawm ka hriat chhunzawm takah chuan a thawhna a la rei bik lovin ka ring ve ngawt a!

         Bathroom aṭanga a rawn chhuah hnu chuan khum bulah rawn kalin inhruk mawlh mawlh pah chuan min rawn nuih sak a, a towel chu dahin Bawihtei mut lohna lam zawkah chuan ka chet hman hma-in a rawn inthawlh nghal a. Lo tawlhsawn ka tum chuan ka kawngah kuahin ka ke chu a kherh nghal chat bawk a.

          "Reilote chauh tihian ka lo mu ve lawk. Sawlai sofa aṭang sawn rawn insawn lo turin ka insum tluan zak tih i hria em? Ka bul lawkah i mu a, ka khawih thei si lo che a, hrehawm ka tihzia hi i hrethiam pha lovang!"

          Dik tak chuan kei pawhin ka thlahlel ngawih ngawih a, a bula awm tluka chak ka nei bik lo. A ban, ka kawnga a rawn kuahna chu lo vuanin a taksa chu ka lo ngheng hnai ve talh talh a. Chutia ka chet takah chuan a rawn thaw hawk a.

          "Khatia i che reng a nih chuan ka insum theihna hi ka hloh mai ang tih hlauhawm tak a ni! Ka taksa-in a mamawhna che hi ka bawhzui palh hlauh ang e," nghet zeta min kuahbeh pah chuan a rawn ti thawp sat a. Che ngam tawh lo chuan ka mutdan ang ang chuan ka awm ta tawp a.

          Bawihtei a rawn chet tak ṭalh ṭalhah chuan ka tawlh deuh hlek a, u Malsawma lah chuan min rawn nek zui zelin min kuahna chu a la sawn duh miah lova!

          A kut chu dahsawnsak tum chuan ka bei a, thir inhlum kawihsawn tum ang vel a ni. A che duh eih si lova, chutianga kan awm lai chu Bawihtei hmuh ka duh bawk si lova, hawi letin zawite hian, "Bawihtei a harh dawn a nia!" ka va ti sap a, a lo nui suk duh chauh a.

          Bawihtei chu rawn mengchhuakin min rawn hmuh chuan a nui nghal ver ver a, lo nuihlet pah chuan a ṭha em tih chu ka lo zawt nghal vat a.

          Ham bai bai chung chuan a ṭhat thu chu min hrilh a, chutah, ka hnunglam en chuan a nui ta var var a!

          U Malsawma chuan a lu chu rawn tikangin ka darah a rawn nghat a, a fanu chu a rawn bia a.

          "Good morning Bawihte, i ṭha tiraw?"

          "Aw, ṭha e. Ápa, tinge ka bula mu lova u Mapuii bula i mut daih a?

          Ka hlauh ang ngeiin a rawn zawt ta khauh mai le! Nichina ka hrilhte khan thawh ve vat mai tur hi a nia, luhlul leh lutuk mai!

          "Bawihte, tihharh che ka hlauh avangin u Mapuii bulah ka mu lawk alawm. U Mapuii bula mut kha i chak ṭhin si a, kei chu sawtah sawn ka riak daih alawm," sofa lam kawh zauh pah chuan a lo ti a.

          "Khawnge ka teddy bear hi a awm daih le?"

          Thildang daih a rawn sawichhuah takah chuan ka thaw huai a, naupang ta na na na chuan ka bula a pa lo mu chu a vei zui lem lo ni awm tak a ni.

          Bawihtei school kaltir rih loh kan tih avang chuan muangchangin rawng ka bawl a, u Malsawma chu a nu leh pate nen sitting room lamah an ti ti a, Bawihtei chu a nî bulah a awm thung a, an nui dun ar ar ri chu ka hre leh zauh ṭhin a.

          Chaw ei lai pawh chuan Bawihtei leh a nî chu an ṭawng reng a, a teddy bear hmingte an lo phuah a, chungte chu an sawi a, midang chuan an ti ti chu lo ngaithla-in a chang leh kan lo nuihpui  thul.

          "U Mapui, zanah kan khumah lo riak leh rawh aw? Âpa pawhin i bula mut a duh ve tho kha!"

         Ka chaw bar a tawp chiang kher mai. U Malsawma nu leh pate pawh chu an hawi phawk hle-in ka hria a, ka bing mup mup ni berin ka inhria.

          U Malsawma chu ka va en chuan engmah hre ve lo ni awm takin a thil ei lai chu a lo ei mial mial a, a chaw bar a ṭhulh phah eih lo a nih chu!



VANMALSAWMA
Sbk Pachuau
Chapter 12





          U Malsawma chhungte chuan engtiang takin nge min ngaih ang le! U Rintei lah khan min phawk chiang ropui mai bawk si a, ka zak leh hrehawm ti chu ka luakte hi a chhuak nghulhin ka hre hial a ni.

          Chaw eina seng felin u Rintei nen chuan chokaah kan awmdun a, hmun ka phiah laite chuan ka ngaihtuahna chu kawmin ka ngawi reng a, u Rintei chuan thleng chu a sil mawlh mawlh a.

          "Mapui, ka u hi inthup thei deuh emaw ka lo ti ṭhin a. Mahse, i bulah hi chuan a inthup thei meuh lo chu a ni e, a mit hi i chungah a fu chat reng mai a!" nui sâng chung hian a rawn tichhuak a.

          "Khawngaihin u Rinte, khatiang lam kha chu sawi lo teh ang, ka zak a nia!"

          "Zahna tur a awm hleinem. Ka ute pafa tana i lo awm hi ka lawm lutuk ringawt!"

          "Ni lo, chutiang ringawt a ni lo. A zahthlakzia kha! I nu leh pate khan eng angin nge min ngaih ang tih pawh ka ngaihtuah ngam lo zawk."

          "Ka pate chuan pawi an tih ka ring miah lo. Bakah mi pangngai an ni a, thil awmdan tur chu an thlir thiam ve lutuk ang."

          "Bawihtei sawidan hmangah khan riakdun ang mai kan ni a, ani naupangtê-in a sawi kha chu a awihawm dawn si a, kan mudun lo a ni tih pawh sawi ila tuman an awih dawn hauh lo a nia!" ka rilru pik lutuk chu thawk ka'n la hawk ringawt a.

          "Kan mutdun miau lohte chuan an awih emaw awih lo emaw a pawina a awm lo, ṭul lovah inngaihtuah hah vak zel lo teh," choka luhna bul bang nghenga ding chung chuan u Malsawma chuan a rawn ti a.

          U Rintei chuan, "Lo mu dun pawh ni ula eng nge pawi vak? Tunlaiah mi tih lohdan pawh a ni hleinem, ka nute pawn an hrethiam lutuk ang," a lo ti vat a.

          "Bawihtei nu tur hian virgina pasal neih a tum tlat alawm. Kei chuan tunlai mi tihdana tih ve mai pawh ka hreh miah lo a nia," choka chhunga rawn luh pah chuan a ti a, ka va en chuan a lo nui var var a, mit min lo siai khum zauh a.

          U Rintei chu a lo nui har har a, "Bawihtei nu tur maw!? He thil hi ka nu leh pate hrilh hlan ka nghakhlel hle mai," a ti a.

           "Aih, khawngaihin engmah sawi suh! Chutiangin sawi tur engmah a la awm lo a nia," ka thinphu chu rang tak a  ni.

          "An hre har tawh lovang. Amah hi han inpeih fel phawt se," nui chunga u Malsawma'n a rawn tih chuan ka lo melh vak a, min ngai naupangchhia ṭhin lutuk hi ka duh vak lo a ni.

         U Malsawma nu leh pate chu an in lamah an haw phei a, u Rintei pawh chawhnu lam duty a nei avangin inthlak turin a nute rual chuan a haw ve nghal bawk a. U Malsawma pawh a paper check tur nimin lama a rawn hawn hman tak loh la turin college-ah a kal a, class kan la kal loh avangin Bawihtei nen kan lo awm thung a.

          Nu Mawii chu inchhung tihfai pahin a zai rât rât a, a fapa pawh a dam chiang tawhin school pawh a kal ve leh tawh a ni. A fate hi lehkha an thiam theih avangin school ṭhaa lut atan u Malsawma chuan a duh a, tunah chuan kum a laklawh em avangin school han sawn vel kha a buaithlak a, session thar aṭangin school ṭha zawka sawn a tum a ni.

           Ruah chu tam lutuk lovin a tla cherh cherh reng a, khua a tivawt ve deuh vur mai. Bawihtei ka bualfai hnu chuan ka khumah ka awmpui a, a teddy bear pawh kan bulah chuan a let ve ngât a. Thawnthu ka chhiarsak lai chuan ka mut chhuak lutuk chu ka muthlu lek lek ṭhin a, nizan lam kan mu tlem lutuk kha mut ka kham lo a ni ber mai. Kan mut khan zinglam dâr thum a pel tawh a, kan tho hma leh bawk si nen ka mitte chu a thip hlur mai a ni.

         Ka bawp mu churh churh chuan min tiharh a, ka mutna chep lutuk chu a ngaihna ka hre lo hle a, Bawihtei teddy bear khan min tichep ta viau a ni hi ka ti rilru a. Meng mang lo chung chuan ka ke chu han thluan mai ka tum a, ka khela min khantu chu Bawihtei ke a ni hauh lo tih ka hriat rual chuan ka mengchhuak nghal kawk a. Min si chetin, ka taksa thlawp zaihin ka bulah chuan u Malsawma chu tui zetin a lo muhil a, ka kawngah a la kuah zui!

          Engtin nge hetiang khum te lutukah ani ang palian tak mai hi a rawn mut len theih zawk le! Tui deuha kan lo muhil thei pawh chu a mak ka ti zawk, han inlehna tur eih hi a awm lo a ni tawp mai a ni.

          An la muttui pafa em avang chuan ka che ngam mai lova. Mahse, ka bawp kham tawhzia chu turu tak a ni. U Malsawma ke chu zawitê-in ka dahsawnsak thei hram a, ka kawnga a kuahna chu laksawn a la ngai cheu!

          A ban chu dimtê hian ka la kang leh a,  Bawihtei mutna lam nek pah deuh chung chuan ka tho thei ta hram a.  A mutui hle ni tur a ni u Malsawma chu a harh lo hlauh mai! Nizan khan kei aiin a muhil tlem tlat a, a mu nghet viau pawh chu a awm reng a ni.

          Choka-ah chuan nu Mawii chu eirawngbawlin a lo awm a, ka hmai ka phih zawh hnu chuan thingpui in pahin nu Mawii bulah chuan ka ṭhu ve a.

          Nu Mawii chuan chawhmeh chan mawlh mawlh pah chuan, "Sawmpuia kha nichin deuh khan a lo haw a, thingpui ka lo siam ve bawk a, a mu ta nge ni a reh nghal vang vang mai a," a han ti a. U Malsawma hi 'Sawmpui' tiin a ko mai ṭhin a ni.

          Bawihtei chanchinte chu min zawt zui mawlh mawlh a, thil awmdan tlangpui ka han hrilh chuan mak tiin a chek tlak tlak a. A fanu chunga a nu ngeiin khatiang thil rapthlak lutuk a ti thei kha mak a ti ve hle a, hmeichhe rapthlak tawpkhawk a nih a rin thu a sawi ve nasa mai a.

             Khua chu a vawh deuh surh avang chuan kawrlum la turin roomah ka lut phei leh a, an lo la mutui pafa hle a, thawm dim takin ka chhuahsan leh ta nghal a.

           Ka hunawlah chuan ka nu chu ka va bia a, ka biak khat deuh hi chuan a vui ve nang nang ṭhin a. Kan inbiak mawlh mawlh lai chuan Bawihtei te pafa chu an rawn inpawm chhuak a, ka bulah chuan ngawi rengin an rawn ṭhu a.

          Ka nu-in Bawihtei chu a biak duh avang chuan phone chu ka pe a, kan inbiak laia Bawihtei ka bula a awm phawt chuan an inbe ngei ngei zel a, an inbe rei thei phian lehnghal.

          U Malsawma ka va en chuan ngawi reng hian min lo melh run a, chutah, lungawi lo aw deuh hian, "Min lo thawhsan daih a!" a ti ta nghut a.

          Ka nuih chu a za ru ang reng viau a, naupangchhia ang maia chutia titau deuh hmelpu-a a awm chuan ka nuih a tiza a, han nuih em chu ni theiin ka hre bawk si lova, ka nuih loh nan ka hmui chu ka pet a fan fan a, nur nûng chungin min lo en vung vung a.

          "A englaiah khan nge nuihzatthlak awm a?"

          Ka nuichhuak ta hawk a, a thin a rim zual sauh emaw tih turin ka banah a rawn man a, ka bulah chuan a rawn tawlh hnai nghal bawk a. Kei lah chu ka nuih a za tulh tulh mai si a!

          "Eng nge nuihzatthlak ka tih chu!"

          "I awmdan kha a nuihzatthlak em alawm! Naupangchhia ang maiin i awm a..."

          "Eng nge naupangchhia anga ka awmna chu?"

          "Ka thawhsan che avang khan i titau a nih kha,"

          "Ka titau kher lo, ka lungawi lo mai chauh a ni. Ka ngai che a, i taksa nghenga mut kha ka thlahlel a, nang chuan min hel tlat thung a,"

          Titau nih chu a duh lo kher mai! Ka nuih chu a la za hle a, a lungawilo hmelte chuan  ka nuih chu a tiza zual sauh a.

          Min rawn man bet thut a, ka hmuiah chuan a rawn fawp zui hmiah bawk a, ka nuihza chu a reh chiang khawp mai.

          Bawihtei kan bulah a awm ve reng avang chuan ka theih tawkin ka lo indang a, ani pawh chuan min tilui ta bik lova.

          A mitmeng de sawr sawra min en chung chuan, "Tikhan i nuih a la za em?" a ti sup a, ka lu ka lo thing nghal vat a.

          "Bawihtei awm laite chuan fimkhur ve ta che, min lo hmu ta se a sawichhuak leh a nih vaih chuan a pawi dawn asin!"

          "A pawi ka ti ve hleinem!"

          "Ka tan a zahthlak alawm. Tukinte kha ka zak asin! Thil awmdan diktak kha i rawn sawi ka lo ring a nia, i chhungte khan eng angin nge min ngaih ang?" ka lo ti hlak hlak a, min lo nuih suk duh chauh a.

          Tunlai hian college kan chawl a, ka lo tumdan chuan vawiin hi Lunglei lama haw ka tum ni a ni a. Mahse, Bawihtei chunga khatianga thil a thlen takah chuan Lunglei lama phei pawh a lang rih lo a ni.

          A tuk aṭang chuan Bawihtei chu school kan kaltir leh ṭan ta a, a pa nen chuan kan va dah a, banah kan pahniha hruai leh tura min tih chuan a pa chuan kan pahniha kan hruai tur thu chu a lo sawi vat a.

          Kan haw lam chu kan bazar kual nghal a, chawhmeh eng eng emaw chu kan lei nual a, sa leh thlaite chu nidang aiin kan lei hnem daih a. Chawhmeh hi kan heh lem loh avang hian sa tih loh hi chu kan lei lawk ngai vak lova, thlai lam hi chu ina an rawn zawrhte hi kan lei mai ṭhin a ni.

          Chawhmeh kan lei hnem em avang chuan chaw eipui tur kan nei a nih ka ring ve mai a, ka han zawh chuan mikhual kan neih dawn thu chu a sawi ta a, khawi aṭanga lo kal tur nge an nih phei chu a sawi tel lova, kei pawhin ka zawt bik lem lo.

          Bawihtei school bang kan hruai haw lam chu restaurant pakhatah u Malsawma chuan min chawlhpui a, thil kan eilai chuan kan college-a thawk ve tho lecturer hmeichhe pahnih hi an rawn chawl ve a, u Malsawma an rawn hmuh chuan an rawn be nghal bawrh bawrh a.

          Miss Maruati zawk chu hmelṭha ver vawr tak mai, pian nalh thlarh, inchei pawh thiam tak mai hi a ni a, Arts stream lam a nih vangin amah hi chu ka hre viau lem lo.

          Miss Rpi erawh chu kan accountancy zirtirtu a ni a, a thiam bawk a, a zirtirna ngaihthlak pawh a nuam ṭhin hle a. Min zirtirdan man a awl a, kan hriatthiamdan tura sawi a thiam em em a ni. Pasal a nei tawh a, fa pawh pahnih a nei tawh nghe nghe.

          Miss Rpi chuan min rawn be ve-in examnaah ka tihṭhat leh ṭhat lohte chu min zawt a. Bawihtei chu a bia-in a biangah chuan a piaisak a, nu fel leh ngaihawm tak a ni a, zirlaite pawhin kan pawh leh biak ber a ni reng a ni.

          Miss Maruati hian u Malsawma hi a beisei reng ṭhin a, mahse, u Malsawma hian a bengkhawn vak lo niin an sawi a,  mi sawi chin bak hriat ka nei lem lo.

          In kan thlen hnu chuan Bawihtei chu ka bualfai nghal a, a inbual zawh hnu chuan home-work ka tihpui leh nghal vek bawk a. Mikhual kan neih dawn avangin nu Mawii eirawng bawlpui ka tum avang chuan theih ang angin ka lo inhmakhawsuih ve a ni.

          Kan mikhual turte lam tura u Malsawma a kal hnu lawk chuan ka phone chu a rawn ri a, Judithi a lo ni a.

          "Mapui, i haw phei ta bik lo em ni?" a rawn ti nghal tâwng a.

          "Aw, haw ta lo mai. Nang kartawp lam chu mi i la tum?" ka lo zawt let a.
 
          "Nia, ka tumdan kha chu a nia. Mahse, ka awmdan tur ka hre tawh bik lo!" a aw chu nidang angin a zangkhai vah lo tlat!

          "Ngati nge? Thil thleng a awm em ni?" ka lo ti vat a.

          "En teh maw Mapui, hmeichhe doctor ṭha deuh pan tur i hria em?" ka zawhna pawh chhang lo chuan a rawn ti daih a.

          "Chutiang lam chu ka va hre lo ve aw! Midang zawh tur an awm mai ang, inentir i duh tihna em ni?"

          "Aw, inentir ngei ngei ka duh. Chuan, min kalpui theih chuan ka lawm ngawt ang!"

          "Aw le, ka lo tum dawn nia. Engtikah nge ni ang?"

          "A hma lamin ni thei se ka duh a, vawiin tlaiah hian i hman chuan kal nghal mai ka duh deuh a," a rawn ti a.

          "Ṭhiannu, vawiin tlai chu ka hman ka ring lo tlat! Mikhual kan nei dawn a, naktuk tlaiah tum ta ila a pawi i ti em?" ka lo ti let ve thung a.

          "Pawi love, naktuk tlaiah pawh a pawi lo. Chanchin ka inhrilh leh dawn nia, ka dah phawt aw!"

          Rawl ring ve thei tak mai leh zangkhai vah ṭhin kha a ṭawng a zawi raih mai a, a nuam lo ve viau a nih ka ring mai a.

          Nu Mawii rawngbawl ka puih hma chuan ka room ka tifel a, ka lehkhabute chu ka remṭha vek a. Bawihtei chu ka khumah a teddy bear leh barbiete nen a lo inchhawp hnawk ve niai thung a, a lo inkhuallem a, amahin a lo ṭawng melh melh a.

          "U Mapui..."

          "Eng nge ni Bawihte?"

          "Tinge kan bulah i lo mut ve theih loh?"

           "A chhan chu maw Bawihte, ka mut ve a rem lo alawm," tiin ka lo chhang vat a, kan bulah midang awm ve an awm lo chu ka lawm tak zet!

          "Âpa pawhin i sawi ang khan a sawi a, kan bula i lo mut ve loh nachhan chu a la rem rih lova, a rem hunah i lo mu ve ang a ti a, ngati nge tunah a rem loh?"

          Naupangtê mah ni se chhan liam mai mai chi a ni si lova, chhandan tur ka haihchham hle a. Ṭawngkam thiam mi nih loh nen engtiangin nge a lungawina zan turin ka hrilhfiah ang tih chu ka ngaihtuah a.

          "Bawihte, ka sawifiah thiam chiah lova, mahse, i hriatthiamdan tur chuan maw, puitling mipa leh hmeichhia chu nupa an nih loh chuan an mudun ngai lova,. Chuvang chuan, i pa nen pawh khum pakhatah kan mudun thei lo alawm," tiin ka thiamdan tawk chuan ka han hrilhfiah ve ngial a.

          "A nih chuan âpa nen chuan nupa chu ni mai ula!"

          Ka tihngaihna hre lo lutuk chuan thawk ka'n la hawk ringawt a. Midang zingah pawh hetiang zawhna hi min zawt leh lovang tih pawh a sawi theih loh, a rilru-ah a khatliam a ni berin ka hria.

          "Bawihte, i pate pawh an lo thleng ṭep tawh ang. Lo kal rawh, lo va hmuak tawh ang hmiang," tiin chhuanlam siamin ka room aṭang chuan ka chhuahpui ta ringawt a.

          Pi Mawii chawhmeh siam tur ka lo enpui lai chuan u Malsawma motor thawm niawm tak chu ka hria a, Bawihtei chu, "Âpate an lo thleng," tih pah chuan a tlanchhuak nghal a. Ka thiltih a laklawh em avang chuan ka umzui nghal mai hman lova.

          Kawngkapui lama thawm a rawn awm chuan ka kut chu silfai sawk sawkin choka aṭang chuan ka chhuak phei nghal a.

          U Malsawma chu zin bag khai chung a rawn lut a, a hnunga rawn kalte hmel ka hmuh chuan ka ṭe ṭhawt a, ka tlan phei nghal a. Ka nu leh ka nau Ngaihawma chuan nui var var chung chuan min lo en a.



VANMALSAWMA
Sbk Pachuau
Chapter 13





          Ka hlim lutuk chu auchhuah chiam mai hi ka duh a, ka tum loh lutuka ka hmuh avang chuan min ṭhawng bawk si nen awm ngaihna tak pawh ka hre lova.

          U Malsawma chu tifuh inti hmel
 takin a nui rah rah a, Bawihtei chu a pi nen an inkuah leh nghal chat a, hlim hmel tak maiin an pitu chuan an inbe mawlh mawlh a.

          Ka haw phei tak si lovah chuan u Malsawma chuan ka nute chu a lo va chah a lo nia. Ka nu, khawiah mah zinchhuak duh ngai lo hi engtin chiah nge a lo va thlemchhuah tih chu ka hre chak hle a ni.

          Ka nute bungrua an mutna tur rooma dah tura a kal chu ka zui ve nghal vat a, a thil ken a dahfel chiah tih chuan a kawngah ka ban pahniha kuahin ka chhoh en ha a. Ka chetdan chuan a ṭhawng hle ni tur a ni a ngaihna hriat loh hmel zetin min rawn en a.

          "Ka lawm e aw, ka lawm tak zet!" ka tih takah chuan thil awmzia chu rawn man nghalin min kuahlet vat a.

          "Lawmthu sawina i nei tihna em ni?" min kuah nghet salh a.

          "Umm....ka nute vang hian lawmthu ka hrilh che a nih chu,"

          "Heti ringawt hian maw!?"

          'Aw, hetiang bak chuan han sawi vak ngaihna ka hre lo alawm. Ka lawm tak zet tih chu i hmu thiam ve thovin ka ring!" ka lo ti halh a.

           "Ṭawngka ni lovin," ka hmuiah chuan a rawn fawp zeuh a, "Hetiang hian," a nui pah suk bawk a.

          "Ka nute khan rei min ti tawh ang, ka kal ...... "

          Ka hmai bul setah chuan rawn kun hniamin, "A harsa viau em ni?" a rawn ti thawp sut a.

          Kan rei lutuk chuan ka nute ngaih kan tiṭha lovang tih ka hlau bawk si chuan a nghawnga lo kuah pah chuan a hmuiah chuan ka han fawp ta zauh a. Ka hmui ka laksawn leh rual chuan nghet lehzuala min kuahin a kut lehlam chuan ka tukkhumah a vuanbet nghal a.

          "Tun ami kha chu lawmthu sawina atan ka pawm lo tlat!"

          Dimte-in ka han fawp leh a, ka duhtawk leh mai hlau ni awm takin ka tukhuma vuan chung chuan duhthawh zetin min lo chhang let vat a.

          Rei tawk fang kan infawh hnu chuan min thlah ta hram a, kan thaw dun ham ham a, ka lungphu ri chu a hre thei hialin ka ring!

          A tuk zing chaw eilai chuan tlai lama Judithi ka chhuahpui tur thu chu ka sawi a, ka nute an awm tho avangin Bawihtei pawh ngaihtuahawm a ni dawn lo a ni.

          "Benate an tel ve dawn em?" a aw chu pangngai ang deuhin lang mah se ka bengah chuan a chang lam hret a ni.

          "Dawn lo, kan pahnih chauhin kan kal dawn." Phawk deuha amah en chung chuan ka lo ti vat a.

          Ka nu chuan, "I ṭhianpa Bena teho pawh chu hmuh ve an chakawm alawm,  kan awm lai hian lengah te sawm la, Judithi pawh chu lo leng ngei ngei rawh se," a lo ti a.

          "Nia, ka lo sawm hlawm dawn nia. Mahse, Bena chu a zin daih a, Marama leh Kima chu an awmin ka hria," ka lo ti ve mai a.

          Chaw eikham chuan ngawi rengin inchung lamah a chho nghal daih a, ka rilru chu a chhan hriat chiah si loh hian a nuam lo ru hle a.

          An room aṭanga a rawn chhuk leh hnu pawh chuan min be lova, min en hek lo. Ka nu leh ka nau erawh chu a be bawrh bawrh thung a, chutianga a awm thut nachhan chu ka hriat miau loh avang chuan mak ka ti hle a.

          Min biak duh miau loh avang chuan Bawihtei ban hun dawnah chuan ngawi rengin ka insiam mawlh mawlh a, ka nu hnenah chuan Bawihtei hruai tura ka kal tur thu chu ka hrilh a, ka chhuak ta nghal a.

          A la hma deuh bawk a, taxi la lovin ke-in ka kal a, thui pawh ka la kal hma hian u Malsawma chuan a bike hian min rawn tlanpel a, a piah deuhah chuan a lo ding a.

          A chhan pawh hriat loha min biak duh loh avang khan ka rilru a nuam lo reng a. Rilru nuam lo deuha min awmtir avang khan ka ngei ve deuh a, hmu lo derin a dinna zawn ka thlen pawh chuan be lovin ka kaltlang daih a.

          Ka bulah chuan rawn tlan phei lehin ka bulah chuan a rawn ding a.

          "Lo chuang rawh,"

          "Ka kal thei alawm. Tihian ka va hruai mai ang,"

          "Luhlul chhuah lo khan lo chuang vat mai rawh, i rawn chuan hma chu ka kal dawn lo a nia,"

          Tihngaihna dang awm hek lo, ka chuang ta nge nge a.

          School kan thlen hnu pawh chuan ngawi rengin kan dingdun a, Bawihtei rawn ban hnu chuan kan ṭawng ta chauh a.

          In kan thlen hnua Bawihtei ka bual lai chuan a lungawi lohna chhan tur awm chu ka ngaihtuah ṭha leh a, engmah lungawi lohna tur awm ka hriat si loh avang chuan ka laka a rilru putdan a thlak ta a niang tiin ngaihdan ka siam ta ringawt a!

          Bawihtei thawmhnaw ka haktir lai chuan ngawi rengin roomah chuan a rawn lut ve a, ka haktir zawh hnu chuan a sam chu ka khuihsak leh nghal a.

          "Bawihte, inhnuaiah i pite bulah lo zu chhuk la, u Mapuii hi ka be lawk duh a, nakinah kan lo chhukthla ve dawn nia aw,"

          Bawihtei chu thu-awih takin a chhukthla nghal a, kei chu ka awmdan ngai rengin ka lo awm thung a.

          "Bena hi i eng nge a nih?" A aw chu a chang ṭha fek fawk hle a.

          A thil min zawhdan chu mak ka ti a, a thinur hmel ka hmuh chuan ka tirilah ka khur hial a.

          "Eng nge min zawhna awmzia chu? Bena chu ka ṭhian a ni tih i hria a ni lawm ni?" Ka aw chu a lawi lek lek a.

          "I ṭhian chu a ni ngei alawm. Mahse, a melhdan che hi ka hai hleinem! A mitmenga nangmah a duhna che hi ka hmuthiam ve asin!"

          "Ṭhian ang bakin ka en lova, chu chu amah pawhin a hria. Min lo duh pawh ni se keiman ka duh ve lohte chuan eng nge pawi a awm em ni?"

          Thil engmah hrechiang lova min thinrim khum ngawt avang chuan ka lawm lo hle a, amah avangin rilru nuam lo deuhin ka awm phah lehnghal!

          Room aṭanga chhuah tum chuan ka inher a, penkhat ka pen hman awrh  tihah chuan ka banah a rawn man a, a taksa nghengin min kuahbet nghal hmak bawk a.

          Ka lung a la awi loh em avang chuan ka lo ṭang ṭeuh a, talchhuah tum chuan ka bei a. Mahse, lung bang sut ang hlauh a ni, min kuah nghet sauh a.

          "Tihpalh, Mapui, ka tihpalh tak zet! Min ngaidam rawh. A duh che tih ka hria a, in inkawm nasa si a, ka thik ṭhin asin! I nu khan a hming a rawn sawichhuak chat bawk si a, in inkarah awm a awm a nih ka lo ring a. Ni lo... ka ring ni lovin ka hlauhthawnna-in a tak ni angin min ngaihtuahtir a ni mah zawk."

          Ka ngawi reng a, ngaihṭhat loh hmel deuhin min rawn en a.

          "Khawngaihin min ngaidam rawh, chan che hi ka hlau em a ni." a rawn ti leh sup a.

          "Khatiang khan vawikhatmah awm tawh miah suh. I thinrim chhan ka hre si lova, ka rilru hahzia kha.... hrehawm ka ti lutuk!" A tawp lam phei chu a ri chang chang a ni, ka mittui a rawn luang nghal zung zung a.

          "Khawngaihin ṭap lo hram teh. Ka tina che a, hrehawm ka ti. Khatiang kha a thleng tawh ngai lovang," ka lu-ah a khabe a rawn nghat a, min la kuahbet tlat bawk a.

          Ka khabe-ah chuan rawn dawm kangin amah en tur chuan min ti a.

          "Keimah vanga rilru na leh hrehawm tia i awm hi ka duh lo. Ka thikthu chhiat vanga khatianga ka lo awm kha pawi ka ti."

          A rawn kun hniam a, dam raihin min rawn fawp a, ka lo chhang let vat a.

          Chawhma chhung lek inbe lova awm pawh khati khawp khan hrehawm ka ti a nia, kha aia ṭha lo zawk kha lo thleng palh ta se engtin nge ka awm ang tih pawh ka ngaihtuah thiam lo zawk hial a ni.

           Judithi'n min rawn biak chuan ka lo inpeih fel chiah a, innghahna hmun tura kan tih lam chu ka pan nghal a. Kan inhmuh hnu chuan Judithi chuan reilote chawlh a rawt a, kawngsira ṭhutna awmah chuan kan ṭhu dun a.

          Nidang angin a ri bawrh bawrh lova, a ṭawng chhunah pawh a zawi viau mai. A nawmsam loh vangah ka ruat mai a, inentir ngai ta hial chu a nuam lo ve a nuam lo hle turah ka ngai a.

           "Mapui, thil hrilh tur che ka nei a," zawite hian a rawn ti chhuak sap a.

          "Eng nge ni leh ta? Marama nen in intithiam lo leh tawh a ni chiang!" nui hawk hawk chung chuan ka lo ti vat a.

          Nuih duh deuh ni ṭhin si kha a nuih chu a za ve ta hlek lova, rilru hahna nei ni awm takin a thaw leh halh ṭhin bawk nen ka fiamthuna chu dahṭha-in thutak zawk chuan sawi duh a neih chu sawi turin ka ti ta a.

          "Nau ka pai niin ka hria a!"

          "Maw....!?" Ka makti lutuk aw chu ka thup hman lo a ni ber e.

          "Thla hmasa kha ka period tawh lova, ka awl satliahah ka ngai a. Mahse, tun thla hi kar hmasa kha ka neih hun a nia, tun thlengin ka la nei lova. Ka awmdan hi a nuam lo nghulh ṭhin bawk si a, ka inringhlel a."

          "Marama'n a hria em?"

          "Aih, hre lo. Ka la hrilh lova, ka hriatchian hunah chauh ka hrilh ang ka lo ti a."

          "Thil awmdan hrechiang vat ila a ṭhat ka ring, kan kalna turah chuan kal phawt teh ang," tiin kal chu ka rawt a.

          Kulikawnah hmeichhe lam doctor ṭha a awm nia an sawi avangin chuta inentir tum chuan kan kal ta a.

        Kan thlen chuan hming kan lo ziahlawk ve loh avang chuan kan hnung hle a, kan haw tlai viau dawn niin a lang. Ṭhutthlengah chuan ṭhu-in zawite te-in kan ti ti dun sep sep a.

        Judithi hming an rawn lam meuh chuan khua a thim titih der tawh a, a luh hlan chuan ka chhungte hnena chinchâng hrilh tumin ka phone chu ka phawrh a. Missed call a lo awm nual a, tu tu nge tih en ka tum lai tak chuan u Malsawma chuan a rawn call a.

          "Phone i va la thei lo ve! Khawnge in awm?" a rawn ti nghal tawng a.

          Kan awmna hmun leh tunah a luh mek thute chu ka hrilh a, min rawn hruai a tum thu a sawi chuan lo hnialin taxi-a ka haw tur thu chu ka lo sawi vat a. Judithi chuan nau a lo pai ngei a nih chuan chumi chungchângte chu kan sawi duh ngei dawn si a, u Malsawma'n min lo hruai a nih chuan sawi kha a rem teh ṭeuh dawn si lo a ni.

          Judithi rawn chhuak chu ka lo en reng a, a hmelah chuan a inrinhlelhna chu a dik a ni tih ka lo hmu thiam nghal mai a. Damdawite kan lei zawh hnu chuan ti ti pah kan duh avang chuan Sikulpuikawn thleng ke-in kan kal a.

          "Marama hi ka hrilh hreh e!" a ti sap a.

          "Engvangin nge i hrilh hreh? A thinrim i hlau em ni?"

          "Hlau pawh a ni chiah lo, ka hreh ve tawp."

          "Zaninah hrilh nghal la, i hrilh har chuan i hreh telh telh ang."

          "Nia, hrilh vat chu ka duh. Amah chuan ka rai a nih chuan min neih a tum thu a sawi a, mahse, ka hlauthawng deuh tlat a!"

          "Chutia amah berin ka nei ang che a tih chuan hlauthawng duh suh, zaninah chuan hrilh ngei ngei la," ka lo ti vat a.

          In ka thlen chuan khua chu a thim chiang hle tawh a, kan inentir chungchang vel chu min lo zawt a, han sawichhuah mai ka hreh avang chuan damdawi an chawh thu leh a zia veleh mai ka rinthu chu ka sawi ringawt a.

          Chaw eikham hnu chuan sitting roomah chuan ṭhu-in kan ti ti hlawm a, u Malsawma pawh a paper check zo chu  rawn chhuk ve-in ka nu chu eng eng emaw sawipuiin a ti ti bawrh bawrh a.

          "Mapuii hi pasal nei tawh mai sela," a rawn tih chuan ka phu zawk a, ka hawi phawk hle bawk. Ka va en vat a, min lo nuih suk a.

          Ka nu chuan, "Pasal nei atan chuan a la naupang lutuk! A hrim hrimin tunge maw nupui atante chuan duh ve reng reng ang ni? Pasal nei tur chuan a la puitling lo lutuk reng reng," a lo ti hluai a.

          Ngaihawma chuan, "Ka u Mami, bialpa i nei a ni maw?" min lo ti ve thung  a.

          Ka nu bawk chuan, "Ngaihzawngte hi a lo buaipui viau a ni lo maw pasal neihte in sawi tak mai! A zirlaite hi a zir zawh hma chu a nei rih lovang. Chu bakah, a la hun lo hrim hrim," a lo ti leh bawrh bawrh a.

          U Malsawma chuan min en reng chung chuan, "Pasal neih in lo phal reng tawh ang chu ka ti mawle, amah hi chuan a duh pawh ka la ring chiah lo," a rawn ti ve leh a, ka lo melh nghek ringawt a, min la rawn nuih var var zui.

          Ka phone a rawn rik takah chuan ka en vat a, Judithi a lo ni a, a rawn ṭah deuh ṭiau avang chuan choka lamah ka phei ta daih a.

          "Mapui .... " engmah pawh sawi zui thei lo chuan a ṭap nghal hlawp hlawp a.


VANMALSAWMA
Sbk Pachuau
Chapter 14




          "Judith, eng thil nge thleng?"

          "Ih ..... Marama kha .... " a lungchhe lutuk chu a ṭawng hlei thei lova.

          "Aw le, tikhan han inṭap thawl phawt la, ka lo nghak ang che. I sawi theih hunah min hrilh dawn nia," ka lo ti a, a ṭap hlap hlap ri chu ka ngaithla kar a.

          A ziaawm deuh hnu chuan a aw chu a han thian kharh a, "Naute chungchang chu ka hrilh ta a .... " a aw chu a lawi rat a.

          "Chuan ...?" ka lo ti vat a.

          "A mawhphurhna chu tlanchhiatsan a tum loh thu a sawi a. Mahse, a chhungte thu ngaihchan phawt a duh thu a sawi a."

          "Chutah chuan eng nge buaina awm ta chu le?"

            "Mahni-a kal tlangpui ngam lova a chhungte ngaihdan anga kal a tum chuan ka thin a tirim a, dawihzep ka ti a, a thin a rim a. Thil hrethiam duh lo leh hriatthiam tum lovah min puh a, kan inhau hrep a." A insut hraih a.

          "I tidik lo anih chu. A chhungte thu ngaihchan phawt chu a tih tur dik tak a ni alawm, a mawhphurhna tlanchhiatsan a tum loh thu a sawi tawh a, a chhungte chuan lo hnial mah se a phatsan che ka ring lo." Ka ngaihdan dik tak chu ka lo sawi a.

          "Tunah hetiang hi kan thleng tawh a, a chhungte thu ngaihchan a ṭulna ka hre lo. Min neih duh loh avangin a chhuanlam kual vel mai mai ni ah ka ngai hmiah," a ti hmarh hmarh a.

          "Marama chuan puitling takin thiltih a tum tih hi hriatthiam tum ta che. Tunah i dinhmun khatiang kha a ni a, inhau lova ṭha te te-a thil sawi hun a ni zawk. I hlauhthawnna khan thil a ni lo lamin a ngaihtuahtir che niin ka hria," ka lo ti leh a.

          "Ni e, i sawi ang pawh chu a ni mai thei a ni. Mapui, kei chu ka rilru hi a hah em mai! Kan in lama haw phei pawh ka hreh ngawih ngawih, hetiangte chuan engtin nge ka haw ngam ang ni!"

          Judithi hi a pa a boral tawh a, a nu-in pasal nei lehin a pasal nen hian fa pahnih an nei leh a, Judithi hian pianpui unau a nei lo a ni. Amah hi hlim ve thei tak a nih avang hian an inchhungkhur lam pawh a hrehawm viau lo turah ka lo ngai mai ṭhin a. Mahse, thisen zawmpui lo ta na na na chu a pa nenaan inkarah neuh neuh a lo awm ve tih vawikhat a sawi zeuh aṭang khan ka lo rindan ang ngawt kha a lo ni lo tih chu ka hrethiam ve nghal mai a.

          Aizawlah hian a nu nau fanute nen in an inluah ṭawm a, uaptu awm lo ta chu an nun a lo zalen ve deuh nen hetiang dinhmun hi a lo thleng ta a ni ber.

          Eng eng emaw kan sawi leh hnu chuan kan duhtawk ta hram a, ka theih ang tawkin ka lo hnem ve kha chu a nia, kan inbiak hma ai chuan a rilru pawh a nuam ve deuh huaiin ka ring!

          "A va pawimawh awm ve!"

          Ka phu zawk a, u Malsawma ka lam pana rawn pen phei chu ka lo en tawp a, chhan nachang pawh ka hre lova.

          "Tlaiah in awmdun char char a, tunah darkar chanve lai inbiak leh ngai chu a pawimawh viau ka lo ring ve tawp a!" nuih deuh suk pah chuan a ti leh a.

           A la hriat leh tho tur a ni a, chu bakah, a hriat ve chu pawi lo turah ka ngai a, thil awmdan chu ka hrilh ve ta vek a.

          Ani pawh chuan ka ngaihdan ang chu a ngaihdan a nih thu a rawn sawi ve chiah a. Marama chuan amaha hma la-in lo inhruai ta se, an chhungte rilru an tihel mai mai zawka a rinthute a sawi a, kei pawhin chu chu ka lo rindan chiah a ni ve tho a.

          Nupa kar chauha hman tur sex chu  naupangtê-in an hmang a, lo insûmin an hunfâl neihte thil ṭhalo tihnan hmang lo se chu hetiang buaina hi an tawk lo tur tia ka sawi chuan a lo nui put put a.

          "Thil nuihzatthlak ka sawi awm reng reng ka hre lo," ka ti hmak a.

          A rawn nui chhuak hawk a, "Dik tak chuan insum hi a har ve bawk em a ni, ka insum zo lo ṭep ṭhin tih pawh i hriat kha,"

          "Insum zo lo la chu min tilui thei reng alawm, i inthunun thei a, min tilui lo ṭhin zawk mai a ni" ka lo ti hliai a.

          "A dik lo, ka insum nasat theihzia hretu i ni. Ka insum chhan chu i duhdan ka zah vang zawk a ni, i duh lo chung tihluih che hi ka tum lova, ka duh bawk hek lo." A thusawi chu a ti tak tak tih hriat takin a nui hmel pawh a reh nghal hmiah a.

            "Tunah pawh hian i taksa hi neih vek ka duh, ka taa siam hi ka chak tawh tak zet!" min si chetin a rawn ding a, a mitmengah chuan min mamawhzia chu chiang takin ka lo hmu thei a ni.

           Duhthawh lutuka min rawn fawh chuan uar zetin ka lo chhanglet ve nghal vat a, sitting room aṭanga ka nu-in min rawn auh chuan kan inthlah ta chauh a.

          Bawihtei chu ṭhutthlengah chuan a lo muhil bâm a, u Malsawma chuan an room lam muttir turin a pawm a, a chapal kenga zuichho tur chuan min mitmei nghal zauh bawk a, an room lamah chuan kan inzui chho ta nghal a.

          Bawihtei a mutfeltir hnu chuan puan ka sintir a, chhuk leh nghal mai tum chuan ka kal nghal a.

          Ka bana rawn manin a taksa ngheng chuan min pawmbet nghal a. "Nichin ami kha ka kham lo," tih pah chuan ka hmui chu a hmui chuan a rawn bawhthuah leh nghal chat a.

          Kan inthlah thei tawh dawn lo emaw tih tur khawpa rei kan infawh hnu chuan kan inla hrang ta hram a. Ka lungphu mumal lo lutuk thunun tum chuan thawk ka la halh halh a, mit zim sun hian min lo en reng a.

          "I nu-in pasal i neih a phal veleh kan innei nghal ang,"

          Ka lo nui hak a.

          "A nuihzatthlak miah lo ania! Hetia tiamchin neia awm hi ka ning thuai dawn, infawh ringawtah hian ka duhkhawp ka hmu zo lo. I taksa pum ka taa siam ka duh laia i hmui chauh ka fawp thei hi rilṭam em em laia chaw vawikhat bar ang lek a ni. Ka nghak rei thei viau lo tawp ang!" A thu tak em avang chuan ka nui duh ta bik lova.

          Ka nute'n rei min tih ka hlauh avang chuan kan chhukthla ta nghal a, kan thlenthlak chuan ka nu chuan mut mai a duh tawh thu a lo sawi a, Ngaihawma erawh chuan TV-ah inkhel a lo la entui hle a.

          U Malsawma chuan Ngaihawma chu motor khalh zir paha Mualpui lama len a duh leh duh loh a zawt a, ani lah chu a lo phur em em mai a. Zingkarah, hma deuh hleka lengchhuak turin an insawifel a, ka nau phur lutuk chu thawhhai a hlauh avang chuan a mu ta nghal a, u Malsawma chuan a nuih zui hak a.

          Ka phone a rawn rik chuan zan a rei tawh deuh avangin tunge ni ang tiin makti deuh takin ka en nghal vat a, Marama a lo ni a.

           "Mapui, hmuh lawk che ka duh a!"

           U Malsawma chu hmui phunin ka hrilh a, a lo bu nghat a.

           "Tunah khan khaw nge i awm?" ka han ti a.

          "In in kawtah ka awm!" a lo ti vat a.

          "A nih chuan inchhungah lo lut nghal mai la."

          "Aw le .... "

          Inchhûnga a rawn luh hnua u Malsawma a hmuh takah chuan a tim leh deuh tih chu ka lo hmuthiam mai a, engmah zahthlak a awm loh thu leh engkim a hriat ve vek thu ka lo sawi vat a.

          "I ṭhiannu hian a ngaihdan a kalpui mah mah a ni. Buaina tur ni miah lovah kan buai phah a, thil hrilhfiah a harsa bawk si a, ka rilru hah a tizual tlat. Eng tia han tih chi nge ni dawn ni?" a rilru chu a hah hmel takzet a, ka khawngaih kher mai.

          Engtik nge an inbiak hnuhnun ber tih ka ṭawh chuan zan tir lam kha a nih thu a sawi a. Chuti a nih chuan kan inbiak hnu khan an la inbe leh lo tihna a nih chu!

          "Zantir lam khan kan inbia a, kan thu a inhmu fuh thei lova, thinrim ṭeuhin kan titawp a. Nichin deuh aṭang khan biak ka tum a, a la thei lo reng reng a, min be duh lo nge pawh ka hre tawh bik lo" a ti leh a.

          "I chhungte i hrilh tawh em?" tiin u Malsawma chuan a lo zawt a.

          "Aih, hrilh lo. Hrilh nghal tum ka ni a, Judithi'n a hrethiam tlat si lova, ka la hrilh lo a nih hi. Kan pahnih atana ṭha zawk tura ka rindanin thiltih ka tum a, amah ka neih duh loh vanga ka chhuanlam siam kualah a ngai tlat bawk si a, tihngaihna pawh ka hre rih lo."

          "I chhungte'n inneih phal lo ta se engtia tih nge i tum reng reng?" u Malsawma bawk chuan a ti leh a.

          "Kan tlandun ve tawh mai a ni ang chu! Kawng dang a awm lo a nih chuan chu chu kan hmabak chu a ni mai."

          "I chhungte chu lo hrilh phawt mai la, Judithi pawh hrilhfiah kan lo tum dawn nia. Buaina i neih chuan rawn sawi hreh lo la."

          "Ka lawm e aw Sir, min hrethiam a, ka lawm lutuk! Judithi pawh chu min lo biaksak ngei ngei ru aw, a raino bawk sia, thil ṭhalo deuhte kha a lo ngaihtuah ang tih ka hlau a," Marama chuan a ti a, a tho nghal uaih a.

          U Malsawma chuan, "Ni e, kan lo be dawn nia. Tunah chuan Mapuiin a hun hmaa nupa nun in lo hman avanga a hauh hrep hma che hian va haw phawt la, i chhungte chu i hrilh nghal dawn nia," nuih suk pah chuan a lo ti a.

          Marama chuan, "Inhauh chi pawh a ni rih lo, min hauh loh pawh hian rilru a hah tawk viau a ni," a ti nuah nuah a, a chhuak ta hnu hnu a.

          A tuk zinga Ngaihawma leh u Malsawma chhuak lo haw chu an rawn ri haw hlut a. Ngaihawma chu a motor khalhdan velte sawiin a rawn hlim haw hle a, a rin aia a harsat loh thute chu intithei takin a sawi bawrh bawrh a, ka nu nen chuan kan lo nui a. U Malsawma chuan a thiam har a rin loh thu a lo sawi ve bawk a, an haw phei hma-in vawikhat tal zirpui leh a tum thute chu a sawi bawk a.

          U Malsawma chuan Bawihtei chu schoolah a va dah leh nghal a, a lo haw leh hnu chuan Judithi ka be tawh em tih chu min zawt a, ka la biak loh thu ka lo sawi chuan be nghal turin min ti a. Judithi chanchin kimchang a hriat hnu hian a ngaihtuah hle a, amah kha a ṭawng duh em avang khan a nuihpui ve nasa ṭhin a, a ngaina ve riau a ni. Hetia nau a han pai takah phei chuan a ngaihtuah lehzual niin ka hria a, sawi lang vut lo mah se a vei ve hle tih ka hre thei a ni.

          Judithi ka va biak chuan a lo pangngai viau a, Marama nen pawh nizan lamah ṭha taka thil an sawidun tawh thu a lo sawi a, ka thaw huai a.

          Bawihtei school bang hruai turin u Malsawma leh ka nu an kal a, Ngaihawma leh nu Mawii nen inah kan lo awm thung a. Marama a rawn lang hlawl a.

          A chhungte hnena a sawi tawh thute chu min hrilh mawlh mawlh a.

         "An rilru chu a na khawp mai. Mahse, naute fahrahtir an phal lova, remchang hmasa berah palai kaltir an tum a. Min hau miah lo na'ngin a nuam duh lo khawp mai, chawmhlawm mai kan la ni bawk si a, inthlahrun a na duh lutuk ringawt!" a ti nuah nuah a.

          "I chhungten inneih an phal chuan a ṭha nasa a nih chu! Judithi hi a dinhmun chu i hriat ve vek kha, duat viau ang che," ka lo ti ve thung a.

          "A dinhmun ka hriat chian avang hian alawm neih ngei ngei ka duh. Mahse, ka tum aiin a hma ta deuh a nih hi," nui vur vur chung chuan a ti a.

          U Malsawma hnena thil awmdan ka hrilh chuan buk nghut pahin, "A ṭhat nasat chu," a ti sup a.

          Chawlhni chawhnu lam chuan a tuk maia an haw phei tawh dawn avangin ka nute chu Bawihtei pute inah kan lenpui a, zanriah ei nghal tura min lo tih avang chuan kan ei ve ta nghal a. Ka nu leh u Malsawma nu chu an inkawm thei phian a, kan awm chhung zawng chu an ti ti dun barh barh reng a.

          In kan thlen hnu chuan a tlai tawh deuh avangin Bawihtei chu ka muttir nghal a, ka nu leh u Malsawma chu thutak deuh hian an ti ti dun a, eng nge an sawi phei chu ka hre lem lova. Ngaihawma chuan inkhel a thlir leh nghal vauh vauh thung a.

          Ka nute haw phei ni chuan ka khua a har hle a, Bawihtei pawhin phei ve a ngen a, a pa-in remchang hmasa bera zinpui a tiam takah chuan a lungawi ta chauh a. Kei pawh ka ṭap lo chauh chu a ni e.

          Kan lo rin ang aiin thil a buai ta tlat mai a. Marama palaite an va kal chuan Judithi nu pasal chu a lo thinrim nasa mai a.

          "Va hur kual mai mai turin kan kaltir hleinem, amah vanga kan insen nasatziate hi a hre lo em ni? Ṭha deuhin a va zir zo ang a, sum tam tak a thawk chhuak ve ang chu tih laia sawn lo va pawm mualpho daihte chu a tenawm lutuk! Tikhan innei nghal se la, rawn haw buangbar duh tawh suh se. Ani pasal neihna tur buaipui turin sum pawh kan nei tawh lo, a zirna atan kan hmang zo vek tawh," a lo ti tun tun a ni awm e, palaite pawh zak takin an lo haw a ni.

          Judithi rilru hah lutuk chu chaw a ei thei lova, a mu thei bawk hek lo. Marama mangang lutuk chuan eitui tui ṭha ṭha keng chungte'n a va kan a, engmah a ei thei bau bawk si lova, raino a lo haw em em bawk si nen a cher rawk rawk mai a ni.

          U Malsawma'n thil awmdan a hriat chuan a ngaihdan a ni lo hle a. Judithi chu inah la phei nghalin a ṭul ang zawng zawng buaipui vek a inhuam tih a sawi a, an inneihnaah pawh chuan pa chan changin palaite pawh ama hnena kaltir turin Marama hnenah chuan a sawi a.

          U Rintei chu phone nghalin ina lo kal tur chuan a ti bawk a. U Rintei rawn thlen hnu chuan Judithi chu a en nghal a, dripte khaisakin naupai tana vitamin ṭha a rawn kensakte chu a pe bawk a. Judithi chuan lawmthu sawi a tum a, u Malsawma chuan a ngaithla duh bau lova, thildang a sawi daih zel a, Judithi pawh chuan sawi ṭalh chu a tum ta bik lova.

          Judithi hi a vanduai lehna em em chu a pa chhungte lam hi khawchhak lama awm an ni a,an intlawhpawh ngai loh avangin tumah hriat a nei lova. A nu lah mi bul ve tak a lo ni a, a nau hmeichhe pakhat hi Lunglei lamah chuan a awm ve a, a pasal hi zu in mi a nih avangin belh tlak a ni bawk si lova, kei ai mahin a dinhmun hi a la chhe zawk a ni.

          Nikhat chu, kan class bang hi Bena leh Marama chu min thlah pahin an lo lenglut a, Marama hi chu Judithi kan hnena a lo awm aṭang hian a lo kal reng a, amah pawh a tlangnel viau tawh a ni.

         
          Thingpui kan lo in lai chuan u Malsawma chu a rawn haw a, Marama chu a rawn be bawrh bawrh a. Thingpui a duh ve nghal em tih ka zawh chuan a duhloh thu sawiin an room lamah a chho ta nghal a.

          Bena chuan Muthi kan kal ni-a thlalak ho kha print a tum a, kan duh thlang tura min tih chuan a bula ṭhut pah chuan a phone chu ka va bih ve nghal a.

          Chutia thlalak ena khawdang hawi lek lova ka awm lai chuan aw thian kharh ri ka hria a, ka hawichhuah chuan u Malsawma mitmeng rum lutuk nen chuan kan inen ta siah a.


VANMALSAWMA
Sbk Pachuau
Chapter 15




          A hmela lungawi lohna lo lang chhuak chuan ka chhungrilah engtin emaw tak hian a nghawng a, a mitmeng rum tak chuan min hmu tlang vek emaw tih mai tur khawpa chiangin min en reng bawk a.


          Kan boruak hre ve hek lo, Marama chuan a lo be bawrh bawrh a. A lungawi lohna chu haider luiin thingpui chu ka va lumsak a, ka siam zawha ka va pek chuan midang awm ve vang nge a lo la ve mai a, min melh chhin eih lo thung!

          Bena haw hnu pawh chuan Marama chu a la awm deuh reng a, u Malsawma chu an room lamah a chho daih a. Marama leh Judithi chu kalsanin choka lamah nu Mawii eirawngbawl chu puih tumin ka phei a.

          Ka rilru kal bing lutuk tur chu duh lovin nu Mawii chu ka be lui siam siam reng a, a fate chanchin ka sawipui a, an dam ṭha zel em tihte chu ka zawt bawk a. Chutianga ka ṭawng reng a nih loh chuan ka inngaihtuah leh ngut ngut ang a, rilru pik deuhin ka awm leh dawn tih ka chiang em a ni!

          Bawihtei a pute'n an in lamah an hruai a, tlai lamah chauh a lo haw dawn avangin ka ngai ru reuh hle a. Ani chu awm se tunah te hian a ri leh chel awm si a, rei lote a awm loh chhung ringawt pawhin inchhung chu a reh ruaiin ka hre ṭhin a ni.

          U Malsawma chu chokaah chuan a rawn lut a, fridge aṭang chuan tui bottle a la chhuak a, a kal leh nghal a.

          "Bawihtei hruai turin lo insiam rawh," kal pah chuan a ti hmuk a.

          "Ka kal ve kher a ngai em ni?" ka lo ti vat a.

           "Aw .."

          Min chhang tawi ṭha tek tawk viau, a aw chu a chang ṭha beng bawng hle bawk!

          Ka inthlak lai chuan ka inngaihtuah nauh nauh a, a ina awm mah ni ila a awmpui pawh ka ni lova, khatianga thu min pe ringawtte kha a tihtur pawh a ni lo tiin ka ngaihtuah a. A nupui pawh ka ni lova, chhan mumal pawh awm lova ka chunga a thinrim ringawtte chu zak lo lutuk mai! Ka chunga hetianga awm tur hian theihna pakhatmah a nei lo tiin inthlak pah chuan ka insawh nasa mai a.

          Ka insiam zawh hnu chuan sitting room lamah ka ṭhu thla ve a, Maramate pahnih chu an lo ṭhu dun ral a. Judithi pawh tunah chuan a zia ta viau a, thilte pawh a ei thei ve ṭan tawh a, a cher chhe lutuk pawh kha a ziaawm chho hle a ni.

          Bawihtei hruai tura kal kan tum thu sawiin Marama chu lo leng reng turin ka chah a.

          Marama chuan min en vung vung a, "Mapui, Sir Malsawma nen hian in inngaizawng chiang mai, in awmdanah leh Sir-in a endan aṭang che hian ka hrethiam vek!" a rawn tichhuak phawng a.

          Han chhan mai dan tur pawh ka hre lova, mood fuh loh lai lo ni bawk nen ani nena kan chungchâng lam chu sawi ka phur tehchiam lo a ni.

          "Ka tih reng kha! Min hnial ngaihna pawh a hriat tawp loh hi," tifuh inti zet hian Judithi melh zauh pah chuan a ti leh a.

          "Chutiang engmah a awm lo, i rindan kha lo thutak chei vak lo mai teh," ka lo ti hlak a.

          "Pha buai lo mai teh, in pahniha in awmdun hian thil awm chu a awm chiang alawm. Ka lo chik ru ṭhin a, Sir-in a melhdan che hi ka hmuthiam ve vek tih hre ta che. Bena i duh theih loh chhan pawh amah hi a ni tih ka hria alawm," hrechiang inti deuh hian a rawn ti leh a.

          "I hresual a nih chu! Thil ṭul lo deuh deuh sawi sawi lo khan innu kha duat viau la a ni mai," ka lo ti ve leh a.

          U Malsawma inhnuaia a rawn chhukthlak chuan Marama chu zanriah ei ve nghal turin a ti a, min en chuang miah lo hian, "Kal ang," a ti hmuk a, a chhuak nghal daih a. A kalchhuak lai chu a hnunglam aṭang chuan rum tawkin ka melh zui a, Marama lah chu thil inti hrethiam lutuk tak mai hian a lo nui vur vur a.

          Kawngah chuan inbe lovin kan ngawi dun ngar a, awmze nei lova a thinrim ringawt chu ka haw tak zet a, a hmaa kan buaina pawh kha thil hrechiang lova a ngaihdan a kalpui lutuk vang kha a ni a, tun ṭum chu ka ngaihdan a pel ve tlat tawh a ni.

          Ngawi rengin motor chu a khalh mawp mawp a, veng lunlai deuh kan pel fel ta tihah chuan kawngsir hmun fal deuh laiah chuan motor chu tidingin a tihdin fel rual chuan a chhuk nghal a.

          Motor kawngkhar chu na mangkhengin a rawn khar a, ka lo phu zawk a, a awmdan chuan ka chhungrilah min khurhtir a, ka hlau tak zet a ni. Mahse, ka luhlul ka chhuah lui ve tlat a, hlau angin ka lang duh bik miah lova. Ka tihsual awm miah lovah chuan ka tlawm mai mai hauh lovang!

          Ka ṭhutna lamahchuan rawn kal kualin, "Rawn chhuk teh," a rawn ti chhum hmuk a.

          Ka awmdan ngai renga awm chung chuan hmalam chu ka en ngar a, a duh duha a tihkual leh thupek kual mai mai tur ka ni bik lo tiin ka infuih rilru a. A awmdan chu hlau viau mah ila ka thiam lohna ka hriat miau si loh avangin hlauh loh hram hram tum chuan inti-paukhauh lui a, ka taksa khur nasa lutuk tireh tur chuan ka kut chu ka hum ruh ngat ngat bawk a.

          Ka ṭhutna bul kawngkhar chu rawn hawngin ka banrekah chuan a rawn hmer a, "Ka sawi kha i hre lo em ni? Rawn chhuk rawh," tih pah chuan ka ban chu a pawt a, ngawi reng chuan ka chhukthla a. Ka chhuk fel chiah tih chuan min dinchilh nghalin hnai lutuk tak maiah chuan a mitmeng rum em em mai chuan min melh nghal run a!




Vanmalsawma POV

          College kal turin Mapuii nen kan inphur thla a, kan thlen chuan gate bulah Bena leh Marama an lo awm a, Mapuii motor aṭanga a chhuk chu rawn hmu-in an rawn pan phei nghal a.

          A hmaa kan buaina kha ka thiam loh a ni a, thil hrechiang lovin thikthu ka lo tichhe mah mah kha a ni a, khatiang thil kha thlentir tawh loh hram ka duh a ni. Mahse, mipa dang bula ka hmuh hian ka thik tlat zel hi a buaithlak a ni.

          Mapuii leh a ṭhiante kal phei chu ka thlir zui vang vang a, Mapuii chu va au lehin banah ka ruala haw tura ka hrilh hnu chuan motor aṭang chuan ka chhuk ve ta nghal a.

          Motor aṭanga ka chhuk chuan piah deuha Miss Maruati'n Mapuiite kal phei a lo thlir zui vang vang chu ka va hmu a,  a dinna bul ka va thlen chuan min rawn enin min lo nuih var var a.

          Staff room lam pana kan kaldun lai chuan a ti ti barh barh a, hmeichhe nalh leh zei tak a ni. Hun eng emaw lai deuh kha chuan min beisei ve ṭhin a, mahse, keimah hian ka lo uksak lem loh avangin a beidawng ta a ni ang e min beisei angin a awmzui leh tawh lem lo.

          "I tleirawl awmpui leh Bena saw an inkawp fuh ve ngawtin ka hria, an inhmeh dun khawp mai," Mapuiite lam kawh zauh pah chuan a rawn ti a.

          "Inngaizawng ni lovin ṭhian chauh alawm an nih," ka lo ti hmuk a, ka duh aiin ka aw chu a chang lehnghal.

            "Awi, an awmdan velah hian satliah chauh an nih chu ka ring lo reng reng! An kawngkalte hi an inkai ve deuh ziah bawk sia, bakah hmannia Kimate ina an len ṭuma an awmdan kha  inngaizawng ang chiah alawm an nih,"

          A thil sawi chuan min ṭhawng kher mai! Hetiang khawpa nasa hian hmeichhe lakah ka thikthu a la chhe ngai lova, ka thinlung tawk danglamtu pawh an la awm hek lo. Mapuii baka ka lungphu tidanglam thei hi tu hmeichhia mah an la awm hek lo!

          "Inṭhian satliah emaw ka lo ti mai asin!" inthup tak chung chuan a  pangngai thei ang berin ka ṭawngchhuak a.

          "I bulah a inthup mai mai a nih chu, students zingah pawh inngaizawng thanin an thang vek alawm. Kimate inchung zawlah hmanni chuan an awmdun a, inngaizawng awmdan chiah chiahin an awm a, ka hmu vek alawm" ka rilru natzia hre hauh lo chuan a ti leh barh barh a.

          Maruati te hi Kimate nen hian veng khatah an awm a, an inhnaih hle nghe nghe a, Kimate kawmchhak lawkah an awm a ni.

          "Chu .. i va hmuchiang awm ve!" ka lo ti leh sup a, hriat hrehawm hle mah se hriatchian law law ka duh a ni.

          "Hmuchiang tehreng mai, ka room aṭangin Kimate inchung chu a langchiang lutuk alawm."

          Ka thinlung hi a so bulh bulhin ka hria a, class ka lak lai pawhin ka rilru-ah a lut thei meuh lova, mualpho em lovin ka la zo thei hram chu a ni ber e.

          Eng pawh nise, Mapuii chu ka zawtfiah hmasa phawt ang a, chuta min chhandan azir chuan thil awmdan chu a chiang mai ang tiin ka rilru ka siam fel a. A hma anga tihsual leh kha ka duh tawh lo a ni.

          Chawhnu lam chu class ka nei mang lova, Mapuii nghah pahin test paper ka check a, ka rilru-ah erawh ka thiltih chu a lut lo kher mai!

          Lecturer pakhat hi hmanhmawh deuhin staff roomah a rawn tlanlut a, student pakhat pum a na thut a, tlawmngaia damdawiina hruai mai tur chuan min rawn ti a, lecturer dang pakhat nen chuan kan kalpui a.

          Rin ai takin damdawiinah chuan kan va awm rei ta phian a, a chhungte rawn thlen hnu chuan kan let leh chauh a. College kan va thlen chuan Mapuii class ban a hun tawh avang chuan ka zawng ru deuh a. Ka hmuh tak lohah chuan a haw tawh a nih ringin ka dawhkan vel ka tifel sawk sawk a, ka haw ve ta nghal a.

          Ka rilru chu a tawt up up a, thudik hriat chakna chuan min tur ut ut bawk a. Ka lo rin ang leh ni-a ka lo hriat ang a nih loh vaih chuan ka chetdan tur ka hre phak lo a ni tawp mai a ni. Ka hmeichhe duh ngawih ngawih, engtik lai pawha ka rilru luahtu-in min bum a ni tih hriat chu ka tan a tlawmthlak dawn lutuk tlat!

          Mahse, Mapuii mizia ka ngaihtuah chianin chutiang mi chu ni theiin ka hre lova, min bum duh tur khawpa tenawm a nih ka ring phal hek lo. Amah ngeiin Bena nena an inkârah inṭhianṭhatna bak engmah a awm lo tih min hrilh a, chu chu ka awih hle bawk kha a ni a. A chhan chu, Mapuii hian dawt a sawi ka la hre ngai lo tlat a ni.

           Tuna ka thu hriat chungchângah pawh hian dikhlel a awm ang tih ka ring ru deuh tlat a, tunah chuan Mapuii hmuh vat vata zawhfiah vat chu ka duh ber a ni mai.

           Min bum tur khawpa tenawm leh sihhnip a ni lo tih ka hrechiang bawk a, chuvangin, ṭha taka thil zawtfiahin a insawifiahna pawh dawhthei takin ka ngaihthlaksak ang tih rilru pu chung chuan inchhung chu ka lut a.

          Sitting roomah chuan an ṭhian hovin an lo ṭhu a, thingpui an lo in mek a. Mapuii'n thingpui ka duh leh duh loh min lo zawh chuan ka duh loh thu-a chhângin inchungah inthlak turin ka chho nghal a.

          Tun dinhmuna ka hmuh chak loh ber Bena ka hmu chu hun lo hle-in ka hria a. Mahse, Mapuii hmelah khan thil danglam engmah ka hmu lova, venthawn nei hmel a pu hek lo. Chuvang chuan, ka ngaih chu ka'n tiṭha lui leh deuh a.

          Mahse, inhnuai ka chhukthlak leh hnua ka thil hmuh chuan rilru putdan a thlak chiang kher mai! Insi renga lo ṭhudunin Bena phone-ah thil an lo endun a, ka kawchhungah hian ṭek sawk a rawn awm a, atthlak taka ka ṭawngchhuah lohna ka insehruh ngat ngat bawk a.

          Ka hmel a rawn hmuh chuan ka ngaihbel nge tlema timna leh tlanchhe mitmeng hmu-in ka inhria a, ṭha takin he thil hi ka chingfel dawn hauh lo a ni tih ka hrechiang nghal em em bawk.

          Bena a haw a, Marama erawh a la awm thung a, inchungah ka chhohsan ta daih a. Ka inchhûngah ngei tihtlawmin ka awm niin ka inhria a, ka thinrim bakah ka zak bawk a ni.

          Mapuii chu thil awmdan dik tak zawh ngei chu ka tum bur a, amah ngeiin min hrilh hunah kan inkâr hi a lehpek awm tawh hauh lo turin ka titawp nghal ang.

          Mahse, inah chuan kan sawi dun thei dawn lo tih chiang takin ka hria a, midang hriata inhauh mualpho ka duh lo bur! Judithi a awm ve reng avang chuan ina inbiak chu a chi ber dawn lo tlat a, chhuanlam siama hruai chhuahdan ngaihtuah a ngai a ni.

           Ka pa chu ka phone nghal a, Bawihtei chu rawn dah lo mai turin leh keimahni'n kan va hruai mai tur thu chu ka hrilh a.

          Bawihtei hruai tura kan kal chu kan inbe lova, ngawi rengin motor chu ka khalh a, ani pawh ngawi rengin a ṭhu a, a hmelah thil tisual emaw inthiam lo hmel reng reng a lang lova, chu chuan ka thin a ti-ur zual sauh a.
 
          Hmunfal deuha kawngsir remchâng laia ka din hnu chuan ka chhuk nghal a, Mapuii chu lo chhuak ve tura ka tih chuan a chechang duh miah lova, ka thinin a tuar ta lova, motor aṭang chuan ka kaichhuak a.

          A rawn chhukthlak rual rual chuan ka dinchilh nghal rawp a, theih ang tawka hnaihin amah si chêtin ka ding a. A hmel chu chiang takin ka en a, heti khawpa ka thin a ti-ur chung pawh hian a hmui chu ka fawp chak tak zet a, fawp mai lo turin ka inthunun fê a ngai hial a nih chu!



Mapuii POV:


          Ka thin chu a phu zawih zawih a, ka tirilah ka khur der der bawk. A awmdan chuan min tihlau ngawih ngawih a, ka thling a fan a, ka ruh chuktuah zawng zawngte chu a na ngut ngutin ka hre hial a!

          "Engvangin nge hetiang thil hi i tih?" a rawn ti sup a.

          A thil min zawh chu a awmzia reng ka hrethiam pha lova, a ngaihna ka hre lo tak zet!

          "Eng nge i sawi awmzia? Eng thil nge ka tih?" Ka aw chu a richhuak chang chang a ni ber e.

          "Engvangin nge Bena hi i bialpa ni lova i ṭhian a ni tia min hrilh?"

          "A chhan chu ka bialpa ni lova ka ṭhian a nih vang a ni."

          Kan buaina ngaiah bawk kan buai leh a ni tih ka hriat chuan ka hlauhna chu thinrimna-in a rawn luahlan a, ka aw pawh a ring ṭha ta hle bawk.

          "I bialpa a nih si loh chuan engvangin nge Kimate inchungah khan a kuah che a a fawh vel che? Inngaizawng si lovin a fawh chu i duh a maw?" ka dara nghet tawka rawn vawn pah chuan a ti leh a.

         Ka thin a rim zual sauh a, dawt chiang lutuka inpuh chu ka duh bik hauh lo. Ka nihna ni miah lova inpuhna-ah chuan ka ṭang huai ve thei hle a ni tih hi ka hriattir khawp ang.

          "Min va ring chhe ve! Engtin nge chutianga awm tur chuan min ngaih theih zawk? Vawikhat pawh Bena nen hian kan la infawp lo." Ka thinrim lutuk chu ka khur dar dar a.

          "In inkuah a, in infawp vel a ni lawm ni? Ni lo sela an sawi ka ring miah lo," a lo ti leh hmuk a.

          "I rin loh leh a tawk a ni mai alawm! Ka thusawi aia midang sawi i awih zawk a nih chuan i thu thu le, a sawitu chu tu pawh chu lo ni ta se thudik a hrilh lo che tih i lo hre dawn nia."

          Ka dara a vawnna chu ka vaithla lawp a, min nekbehna aṭang chuan talchhuak luiin motor hnunglam chu ka pan phei a, khawia kal nge ka tum tih phei chu ka hre hauh lo thung!