LALNUNPUII

LALNUNPUII
Sbk Pachuau

Chapter 1




       "Puii, Puii, Lalnunpui," tia ring taka min ko vak vak chungin ka room kawngkhar chu a rawn chum dawt dawt a. Nizan lamah ka muhil thei lawk lova, khawvar dawnah ka muhil thei chauh a, thawh ka lo hai palh a ni ngei ang.

      Hmanhmawh taka ka rizai chu thehhlim lawpin khum atang chuan ka zuang tho vat a, ka room kawngka ka va hawn chuan ka lo rin lawk ang ngeiin mitmeng rum lutuk ka hmachhawn nghal a. Ka nu(hrawn) chu thinrim tih hriat taka meng rum ul chung chuan inhnuai lamah a chhukthla nghawng nghawng a, ngawi rengin ka zuithla a, choka-a ka lut chiah chu ka thaw hawk ringawt! Choka chhûng chu duhthusamin a hnawk ti ila ka sawifiah ber awm e. Chaw ei dawhkanah chuan chawhmeh thenna hnawk leh plate te, no te leh thil eng eng emaw a lo awm hnawk nuaih bawk a. Nizana ka room pana ka kal hma khan ka tifel thlap si a, tihhnawk luih kher loh chuan chuti em ema hnawkna hman a la awm lo tih ka hre ve kar a.

      "Khatia ding zum reng lo khan tifel ta zung zung che, nilênga mut em ni i tum? Kaihthawh kher ngaiin awm tawh suh ang che. Kal chhuah ka ngâi a, ka hmanhmawh tehreng nen min tikhawtlai zo vek tawh, i nâute pawh an tlai mai ang asin!"

      Awmdan mâwi leh tha nia ka hriat ang zawng zawnga awm nia ka inhre chung pawha ka tihlawm theih miah loh ka nu chu a âng tun tun a, kei chuan ngawi rengin a lo chet velna hnawk chu ka tifel zung zung a. A in-âng thâwl ta deuh aniang an room lamah a lut ta daih a, ka thaw huai mai.

      Vawiinah ka pa zin a lo haw dawn a, a lo thlen hlan ka nghakhlel lutuk ringawt! Tun ṭum a zin chu a bungraw lákah buaina a tawh deuh avangin a cham rei phah a, ka nu min ankhumna pawh break awm miah lovin ka tuar ti ila a dik ber ang chu!

     Ka nu chetna hnu ka tihfel zawh chuan ka naute tiffin tur chu ka siam leh zung zung a, ka siam zawh chuan anmahni ko turin an room lamah ka kal ta nghal a, anni pawh school kal turin an lo inthlak fel ve chiah a. Ka nâute hi ka nu ang lo takin ka lakah rilru kawi an pu ve lova, min ngaina ve hle a, kei pawhin ka ngaina-in ka hmangaih dun tak zet a, ka pianpui dik tak angin ka en a, duat pawh ka duat hle reng a ni.

     Ka pa leh tuna ka nu hian fa pahnih neiin mipa leh hmeichhia an ni a, a û zawk mipa niin tunah kum sawm a ni a, class V a zir mêk a. A náu hmeichhia chu kum riat niin class III a ni thung a, tlemin an harh ve deuh e tih mai loh chu naupang duhawm tak an ni.

     An eitur ka siamsak chu eiin an school lama an thiltawnte chu min hrilh dun seuh seuh a. Puipuii hi hmeichhia tih takah a ṭawng duh siam siam reuh a, sawi tur hi a hre thei phian a. Vâltea zawk erawh chu a ṭawng tam viau lova, mihrang bulah phei chuan a ṭawng ngai meuh lova, ka bula a awm ve tawh thung chuan ama tawkah a ṭawng ve nasa hle ṭhin a ni.
   
    An school kal tur hi kan taxi tlan nî a nih loh chángin ka thlah zeuh zeuh a, ka pa awm loh erawh chuan kan motor tlan loh nî apîangin ka thlah ngei ngei thung. Vawiin pawh hian ka thlah leh ngei an ngai dawn niin a lang a, ka hmanhmawh ruk deuh avang chuan ka nâute chu tur hmanhmawhin an school lam pan chuan ka kalpui hlawk hlawk a.

     Ka nâute ka thlah zo, ina ka haw leh hnu chuan chaw ka ei nghal sawk sawk a, class kal turin ka insiam zui nghal a. Ka insiam zawh chuan hmanhmawh deuhin ka room aṭang chuan ka chhuak a, inhnuai panna stepa ka chhuklâi chuan ka nu min ko ri chu ka hria a..

     Inhnuai ka zu thlenthlak chuan ka nu leh nu pakhat, hmelṭha zet mai hi an lo awmdun a, a la valai hmelin a vun a nalh hle a. Nui sângin min lo en a, a hmel leh mitmeng aṭang chuan hmeichhe sual tak a ni lovang tih a rin theih mai a ni.

     "Puite, thingpui han lum lawk ta che. Tui deuh khan han lum la, ka lo in ve ang e. Hei ka ṭhiannu hi a hmanhmawh deuh si a, han lum vat teh aw!" zaidam hmel fahranin ka nu chuan a lo ti nêm dîai a.

     Hmanhmawh rilru tak chung chuan thingpui chu ka lum a, traffic jam a nasat theih êm avangin class ka tlai fova, tukin phei chu nidang zawng aiin ka tlai lehnghal a, tlai hlau ru tak leh hmanhmawh avanga ipik ru ṭeuh chuang chuan ka thingpui chhuan a so veleh ka siam nghal sawk sawk a.

     Thingpui ka pek zawh chuan kal nghal mai tumin ka bag chu ka la a, penhnih thum bak ka la pen hman lovang tihah chuan ka nu chuan min ko ding leh a.

     "Vawiin chu kal lo mai ta che, tihtur pawimawh ka nei tlat! Dawnga tlan nî a ni bawk si lova, i nâute hruai tur an awm lo, nangin i lo hruai leh mai loh chuan!"

     Chawhnu dâr hnih vela bâng ṭhin an ni a, chumi nghah avanga nilênga class ṭhulh tura min ti chu ka lung a âwi lo kher mai! Ka pa awm loh apîangin class kal mumal thei lovin min siam ziah a, tunlâi phei chu exam a hnaih tawh avangin class kal ṭhahnem ka ngaihzual lâi tak a ni lehnghal a. Inlamah lah ka pa awm loh chhûng chuan zan reiah bak lehkha zirna hun ka nei thei ṭhin bawk si lova, a sawhkhâwk tur chu eng pawh lo ni ta se kal ngei chu ka tum ve tlat a.

     "Class ka chawl hnem tawh si a, vawiin chu kal ngei ngei ka ngai tlat! An ban huna hruai hman turin ka haw zawk mai ang."

     Ka aw-a inrintawkna awm chu kei ngei pawhin mak ka ti hial a! A chhan chu ka nu hian eng ang pawhin min hâuvin min ánkhum ṭhin mah se ka thiamna ngei ngeiah pawh vawikhat tê mah ka chhâng ngâi lova, ti tura min tih apîang hnial lova ka tih ziah ṭhin vang a ni ber. Hnial enah ka en ngai lova, kum kha leh chen ka lo tûar tawh a, ngaiah ka lo neih hmante pawh a niang chu! Tunah erawh chuan nula puitling ka ni ve tawh a, ka diknaah chuan ngawih mai mai ka tum tawh bik lo a ni.

     A mitmengah chuan min hauh hrep a chák tih a lang reng a, inlêng nei lo phei ila chuan engtiang chiaha nasâ leh rapthlákin nge min ankhum leh ang tih chu ka ngaihtuah buai peih lo law law zawk.
   
     College ka thlen chuan ka tlai tawh hle a, ka ṭhiannu Mâmi nena kan innghah ziahna hmun chu ka pan nghal a, ka va thlen chuan phone-ah tu emaw hi a lo be mawlh mawlh a, a bulah chuan ngâwi rengin ka ṭhu a.

     "Ka nu inentîr hreh thei lutuk hi chu a buaithlak ngawt mai. Tunah pawh kârkhat chuang a nuam tawh lova, chaw a ei mumal lohna a rei tawh bawk a, chuti chung chuan inentîr a la hreh êm êm a, nawrluih fê a la ngái a nih chu!" a phone ah ṭhat pah chuan a ti nang nang a.

     "Inentîr hi a peihawm loh ve bawk êm a ni, kei pawh ka peih lo thei lutuk ringawt!" ka lo ti ve thung a, "A nuam lo viau em ni? Tunlâi chu ka rawn lêng hmanlo lutuk a, a zia chho deuh turah ka lo ngâi ringawt a, nang lahin engmah i sawi bawk si lova!" ka ti zui zat a. A nu hi a pumpui a cancer a, nu tuarchhel tak a ni a, a na hle a nih loh chuan a mu mai mai ngai lo a ni.

     Ka ṭhiannu Mâmi hi fanu mal niin nuṭa pathum a nei a, chhungkaw duat rawn a niin duat sual theih loh an tih ang chi hi a ni ve a. A felin kawm a nuam a,  ka tân phei chuan ṭhianṭha a tling takzet a ni. KG aṭanga college thleng hian hmun khata kan kaldun zel avangin ṭhian dang kawm êm êm lovin kan pahnihin kan inkawm char char a, ka lungawi lohna leh ka rilru hahna zawng zawng engmah zep lova ka hrilh ngam awmchhun a ni a, ani pawhin a thuruk engkim min hrilh ve bawk ṭhin a ni.

     Ka nâute hruai an ngaih avang chuan class awm full lovin ka haw a, an school ka thlen chuan rei pawh ka nghah hmain an lo bâng a, inah ka hawpui ta nghal a. In kan thlen chuan ka pa a lo thleng tawh a, ṭumdanga a zin haw apîanga ka awmdan ang bawkin ka thlâ a mûang nghal sûai sûai a.

     Kan dawr hi bazâr lunlâia awm a nih bakah ka nu damlâi aṭang tawha siam a nih avangin hretu an ṭhahnem ve tawh a, ka pa hian thawmhnaw lak a thiam riau bawk nen dawrtu kan hmu thei hle a,  nikhata kan hralh chhuah ringawt pawh a ṭhahnem ve thei hle a ni.

     Tuna ka nu hian dawr hi a ngaihsak lem lova, sum lo lutah erawh thu a nei phian thung. Ka pa dawra a awm hman loh ṭum chuan keimah min awmtir mai zel a, ka nu-in a nghah peih miau loh avangin ka pa zin hlanin ka nghak ziah bawk a, class pawh ka kal chhiat phah hle reng a ni.
   
     Ka pa a awm leh ta bawk a, ka nu hmel pawh hmuh a nuam leh ta viau a. Zîng lama min hauh châkna mitmeng ang pawh kha hmuh tur a awm ta rih lova, ka pa awm loh remchângah a anhla atân a la hmang leh ngei dawn tih erawh ka hre kar thung.

     Zanah chuan ka pa a awm ta bawk a, zantir aṭangin lehkha ka zir ve leh thei ta a. BA ka zir chhûng zawnga ka exam hnuhnûng ber tur a nih tawh dawn avangin ka ṭang ve hle a, result ṭha tak neih ngei ka duh avangin ka zir theih hun chhûng chuan rilru pe taka zir hrâm ka tum tlat a.

     Ka phone a rawn rik chuan mut ka lo tum hnai tawh a, zînglam dâr 1 a rik ṭep tawh avangin thil pawimawh tak a nih ringin ka phone chu ka en vat a, Mami a lo ni a.

     "I mutui lâi ka rawn tiharh che em?" zawi sap hian a rawn ti a, a aw-ah chuan thil diklo a awm tih ka lo hrethiam nghal mai a.

     "Tiharh love, ka la mu lo hrim hrim a. Eng nge ni ta?" ka lo ti thuai a.

     "Ka nu kha a zual leh deuh a, damdawiinah kan indahlut a."

     "Tunah eng nge a an?"

     "A chau angreng khawp mai, ka pa pawh a thlaphang deuhin ka hria. Zep lovah chuan kei pawh ka thlaphang ru riau, tun ṭum a nâ chu a thokang ṭha peih lo tlat!"

    "A va zialo ve aw! Lo kal nghal chu ka duh viau a, mahse, ka pa a mu tawh bawk sia, lo kal ngaihna a awm lo tlat. Naktukah rawn kal ka tum dawn nia," ka lo ti a.

     "Rawn kal kher a ngai lo, ka mangang deuhin ka rawn hrilh che a nih kha. Ka u Nunsânga pawh a lo thleng ṭep tawh ang, a rawn zan haw nghal a."

     Nunsânga hi Mâmi te unâu zînga upa ber a ni a, JE niin Kolasib-ah PHE department-ah a thawk a, kan naupan lai aṭanga min duat êm êm ṭhintu a ni a. Midang lakah min chhan thei hle a, min chhanna lamah mi pakhat pawh a sawisa hrep tawh a, Mâmi nuṭa te zîngah pawh ka ngainat ber a ni réng a ni.

     A tukah chuan ka pa bulah Mâmi nu chanchin chu ka sawi mawlh mawlh a, damdawiin lama kal ve ngei ka duhthu te chu ka sawi bawk a.

     "Tlaiah i class ban hunah i kal nghal mai dawn em ni ang? I nu inah a awm dawn tho a, rawngbawl vel pawh a lo ti vek mai ang, i duh chen chen i awm dawn nia," ka pa chuan a ti boh boh a.

     Ka nu mitmeng aṭang chuan ka pa thusawi chu a lawm lo tih ka hmu thei a, mahse, ka ngai pawimawh duh bik lo. A chhan chu, kha leh chen kha a thuhnuaiah awmin ka pa awm loh apiangin hrehawm reng rengin min siam ziah a, tunah chuan khang hun kha liamtirin a duh duha a tihkawi theih ka ni tawh bik lo tih chu lantîr ve ka tum tlat a ni.

     Exam hmaa kan class kal tawpna ber tur a nih avangin kal ngei ka duh si a, Mâmi chu phone in class kal zawha damdawiina ka kal tur thu chu ka hrilh a, ani pawh chuan zirlai pawimawhte chhinchhiaha ka kal huna hrilh ve ngei turin min lo chah ve bawk a.

     Class ban veleh chuan damdawiin lam chu ka pan nghal a, ka thlen chuan cabinah an lo awm tawh avangin harsa lo takin ka zawng hmu nghal mai a. Ka hmuh lohna thlakhat vel bak a la ni lo chungin a lo cher chhe hman hle a, ka rin ai daihin a lo chau bawk a.

     An chhungte ho an lo awm nual bawk nen inchhûnga awm rei lovin varanda lamah chuan Mâmi nen chuan kan ṭhu chhuak ta daih a. Chhun lama class-a ka thil chhinchhiah, pawimawh tur nia ka rin ho chu a thlâ la-in ka thawn nghal mawlh mawlh a, chutia kan lo inpek buai vîau lâi chuan Ramnunsânga chu lo kalin kan bulah chuan ngâwi rengin a rawn ṭhu a.

     "I dam maw?"  kan inpek fel hnu chuan Nunsânga lam hawiin ka ti a, a lu chu bu nghutin ngâwi rengin min melh a, a mitmengah chuan ka hriatthiam chiah loh thil a inphûmin ka hria a.

     Eng emaw lâi aṭang khan a awmdan hi mak ka lo ti ru deuh ṭhin a, nidanga inbiaa infîam bawrh bawrh ṭhin kha amah hi pawh theih lohin a awm tlatin ka hria a, ka biak pawhin a rul tawk leka min chhan châng a tam ta zawk a. A huatthu leh a duhloh dana ka awm ka hriat bawk si loh avangin a ngaihna ka hre lo hle a, min ngaina tawh lovin min be ṭha peih tawh lo hrim hrim niah ka ngâi ngawt a. Mahse, eng emaw châng chuan min ngaihsakin min la duat reng tho lawi si a, a awmdan chu ka hrethiam thei chiah lo a ni ber e.

     Engineer a training lâia a zirpui ṭhin nula chhelo zet nen an inngâizâwng reng ṭhin a, an la inkawp nghet viau emaw kan tihlâiin an inṭhen ta thut a, khata ṭang khan a mizia chu a dang ta niin ka hria a. Khatia an inṭhen ta thut kha a tuarin a awmdan pawh a thlak phah vek ni maiah ka lo ngâi ta ngawt a!

     Mâmi nena kan ti ti kârah chuan a lo ṭawng ve leh zauh ṭhin a, chumi tih loh chu kan ti tina bulah a lo ṭhu ngâwi ve reng a ni ber a, keini ṭhiandun lah kan awmdun tawh phawt chuan sawi tur kan hre thei nasa mai si a, kan chhûngte pawhin, "Eng êm êm hi nge in sawi zozâi bik ni!" min ti hial réng a ni.

     Khua a tlai deuh takah chuan haw mai chu ka tum a, nu Sawmi pawh chu chhun lam aiin a zia deuh tawh an tih avang chuan zan thlenga han awm khawmuan pawh chu ngaiin ka hre lem lova, Mâmi bulah chuan haw mai ka duhthu chu ka hrilh a.

     "Ka thlah haw ang che, kei pawh inah haw lawk ka duh a," Nunsânga chuan a lo ti a.

     "A remchâng hlauh a nih chu, inthlahtîr la, in i thleng hma deuh a ni mai. I thlen har chuan i nu zaidam tak sawn a zaidam tih a theihnghilh leh palh ang tih a hlauhawm tlat!" Mâmi chuan a lo ti vat a. Ka nu hi a mil thlawt lova, kan ina rawn len pawh a hreh phahin a lo lêng khât vîau réng a ni.

     A bike dahna pana kan kallâi chuan eng emaw hi a sawi sup a, a thil sawi ka hriat loh avang chuan amah chu ka va en hâ a.

     "James nen khan in la inngâizâwng em tih ka zawt che a nih chu!" min rawn melh zawk pah chuan a ti a.

     "Teuh lo mai!" ka duh aiin ka ṭawng ring a, ani chu a lo nui suk thung a.

     Bike-a ka chûang chu ka khawr deuh ṭutin ka hria a, nidanga min phurh chângin hetianga ka awm ngai pawh ka hre si lova, tun ṭum chu eng ka ti nge pawh ka hre bik lo ka khawrin ka zam deuh tlat a. Nidanga inthlahrung miah lova vuan ṭhin kha ka inthlahrung thar nge ni vawn chu ka hreh tlat a, ka mulchungah ka kut chu ka dah ta ngawt a.

     A brake tak thutah chuan ka inrin hman hmâ-in ka va vuan a, chu chu remchângah hmangin ka thlah duh ta lova, ka hmu chiang thei chiah lo na'ngin a nui tlatin ka hria a!

     Kan inkawt kan thlen chuan a din veleh ka chhuak nghal vat a, thingpui in tura ka sawmna chu a hnar avangin kal nghal mai chu ka tum a.

     "Engvangin nge ka message i chhan ṭhat duh ngai miah loh?"

      A thil sawi ka hriat chuan ka ding chat a.


LALNUNPUII
Sbk Pachuau

Chapter 2



     A message ka dawn apîangin ka phur thei êm êm a, midang message awm ve ṭhin tho mah se Nunsânga message a awm phawt chuan ka hawng hmasa ber ziah a, ka chhâng ve ziah bawk. Chutia min ti ta mai chu mak ka ti ru vîau a, a message chhan loh ka neih ka hre miah lo!

     "I message chhan loh ka neih ka hre lo, midang nen min hriat pawlh chu a ni em lo maw?" ka lo let a.

    "Lalnunpui, i naupan tet aṭangin ka hre tawh che a, nang hi midang nen engtik lâi mahin ka hriatpawlh ngai lo che. Khatiang ngaihdan kha khawi aṭanga i neih nge tih ka hre chák hle mai."

     Ka lo nui hak a, "Ka fiamthu a nih kha. Nang chu ka û duhtak kha i nia, min hrechîang tih ka hria alawm." Tun hmaa kan boruak ṭhinah khan ka let leh a ni deuh der a, ka nui zui har har a.

     "Ni e, ka nau duhtak kha i ni a. Chuvangin, ka thu lovin bialpa nei tawh miah suh,"  nui var var chung chuan a ti a, naupang thuawih tak niawm fahranin ka lû ka lo bu nghauh nghauh a, chu chu a hmuh chuan a nuichhuak hawk a.

     A nui hmel hi ṭha ka ti ṭhin a, tunah phei chuan ṭha ka ti tak zet a ni! A hmêl pa leh ṭha tak mai chu khawi hmunah mah a zahpuiawm lova, a palianin a pian a nalh bawk a, mî zîngah te hian ka lo chhûang ru ve ngawih ngawih ṭhin a ni.

     A kal dawn chuan, "Ka nau fel tak kha nih i la duh chuan ka hnen aṭanga message i dawn reng rengin ṭha deuhin lo chhâng tawh la aw!" a ti a, a tlan ta nghal daih a.

     En zui vang vang pah chuan, "Ka chhâng chhe ngai tawp si lova, ṭha deuhin chhâng tawh rawh te han intih chu!" ka ti nauh nauh a, inchhûng lam chu ka pan ve ta nghal a.

     Inchhûng ka luh chuan ka nâute pahnih chu sitting roomah an lo infîam a, home-work an ti tawh em tih chu ka zawt nghal a.

     "Aih, kan la ti lo. Ânu-in nangma lo haw huna ti turin min ti a," Puipuii chuan a lo ti vat a.

     "A nih chuan, ka roomah in home-work kengin lo chho ula, ka lo tihpui dawn che u nia," ka tih chuan phur zetin an lehkhabu la tur chuan an tlan ta nghal a.

     Home-work ka tihpui zawha inhnuaia kan chhuk leh chuan ka pa pawh a lo haw tawh a, nu Sawmi chanchin chu min lo zawt vat a.

     Nu Sawmi dinhmun vel ka hrilh mawlh mawlh lâi chuan ka nu chu an room aṭanga lo chhuakin ka pa bulah chuan a rawn ṭhu ve a.

     "Pa, exam zawh hma chu dawrah pawh ka lo pui thei dawn lo che a nia aw, a tam thei ang ber lehkha zir ka duh dawn a, inlamah pawh ka che hman vak lovang," nu Sawmi chanchin ka sawi zawh rual chuan ka tihzawm zat a, ka nu hmel awmdan chu ka haider hmak bawk.

     "I exam chhûng chuan i zirlâiah chauh insâwrbing rawh. Dawr lam chu ngaihtuah a ngâi lo, inlam pawh i nu kutah engkim dah la, ṭha deuhin i zir dawn nia," ka pa chuan a lo ti charh charh a.

     "Hmannia ka ṭhiannu khan hmeichhe pakhat awmna tur mamawh a hre tak asin! Puitei exam zawh hunah pawh dawrah a lo pui tam thei tawh zawk dawn che a, kan awmpui ve mai dawn em ni ang, Paa?"

     Ka nu chuan a dan ngai tê-in, aw dam diai-in ka pa chu a dawr leh heuh heuh a, nidang ang bawkin ka pa chuan ka nu rawtna chu a lo pawm leh thlap dawn tih ka chiang! Rin tur ka awm dawn tak si lovah chuan ama kuta inchhûng chetvel leh naupang enkawl a awm tur chu ngâingam lovin awmpui tur a dap nghal rûai a ni tih ka hai hauh lo bawk.

     Zanriah kan ei lâi chuan ka pa phone chu a rawn ri a, Puipuii thil sawi ringawt ka lo ngaihtuah avang chuan tu nge rawn bia tih pawh ka lo ngaihven lem lova.

     "Puite, chaw ei sawk sawk la, damdawiin lamah kan tlan phei nghal a ngâi a nia, i nu Sawmi a zual an rawn ti tlat mai! I phone i chhâng thei si lova, hei ka phone-ah an rawn call a a nih hi."

     Ka pa thusawi avang chuan ka chaw ei tuina a reh nghal vek a, ei zui tawh lovin ka kham nghal a, ka insiam nghal sawk sawk a.

     Nu Sawmi hi nu anga ka en a ni a, ani pawhin fanu ang maia min enin ka nu awm loh hnu phei chuan min ngaihsak êm êm reng a. A fanu Mâmi nen hian min enhrang lova, a fanu ang chiaha min enin tlêma kan la naupan deuh lâite phei chuan Mâmi thil tur an leisak reng rengin min leikep ziah ṭhin a, thawmhnaw inang pawh kan ngah ṭhin hle reng a ni.

     Damdawiin kan thlen chuan ICU-ah an lo dahlut tawh a, anmahni hi chhungkaw hlun leh rual tak an ni bawk a, awm an lo ṭhahnem hle a. Mâmi chuan min hmuh veleh min lo ko  vat a, a bulah chuan ka ṭhu ve ta nghal a, a ṭap nasa tih hriat takin a mit chu a sen rûm a, a khát tawkin a insût leh hraih ṭhin bawk a.

     Zînglam dâr 4:15 ah nu Sawmi chu a chatthla ta nge nge a, in lama an inlak fel hnu chuan intifai turin kan pafa chuan kan haw ta a. Ka ṭah nasat avangin ka lû chu a rit bûr a, tlaivâr kan nih bawk avangin ka mitte chu a thip hle a. Ka pa chuan reilote tal mu hahdam turin min ti a, ka inbûal zo ka mû chu ka muhil nghal der a.

     Chaw ei turin ka pa chuan min rawn kaitho leh a, chaw eikham chuan Mâmi te in lamah kan phei leh ta nghal a. Vuina hunserh a zawh hnu chuan ka pa chuan dawra kal a ngaih avangin min hawsan a, kei erawh Mâmi'n zanlam thleng awm tlang nghal tura min chelh avangin ka haw ve ta lova.

     Zanah chuan nulâ leh tlangvâl chu thiam tak maiin an zâi a, Mâmi chu a chauh deuh avangin ṭhuchhuak ve lovin a roomah ka awmpui a, kan awmna aṭang chuan zâi ri chu kan ngaithla reng a, an thiam poh leh mittui an kaichhuak hnem emaw tih mai turin Mâmi chu a ṭap leh ṭhin a, kei pawh chu eng rûai ka ni bik lova, hnemtu tur zawk chu hnem ngâiin ka awm ve a ni ber a.

     Ṭhalâi an ṭin hnu chuan nu leh pa ṭhenkhat chu an la awm thung a, Mâmi pa khawhar chu an la ṭhutpui hlawm a. Haw ka tum hnaih tawh avangin ka pa chu min lo hruai tura phone ka tum a, ka phone tlang thei miah lova, mahni chauha han haw em chu ka hreh bawk si a, biak tum chuan ka han bei leh ngat ngat a, awmzia a awm chuang der lova.

     Mâmi chuan, "Thlahtu tur che an awm ang, ka ute ka'n ko ang e," tiin a phone chu a lekchhuak nghal a.

     Room kawngka chu a rawn inhawng a, Nunsânga a rawn lut a. Mâmi chuan thlah ka ngaihthu a lo sawi vat a.
   
     "Taxi a awm mai ang, a awm loh pawhin U Dawnga a koh theih tho ang, thlah ka ngai lovang," ka lo ti vat a.

     "Lo kal la," Nunsânga chuan a ti sup a, ani pawh a meng sen ve râm mai a.

     "Ngai lo, ka pa biak ka tum leh chhin ang a, a la theih loh chuan u Dawnga ka be mai ang."

     "Ka thlah che i duh lo a nih loh chuan lo kal rawh," tih leh room aṭanga chhuah chu a rual a. Tihngaihna dang awm hek lo ka zuichhuak ta nge nge a.

     Ngâwi rengin kan inphur a, kan in kan thlen chuan thingpui in tura lo luh a duh em tih ka zawt a, ka rin loh takin a bike chu hûng ṭha-in min zui lut ve mial a.

     Ka chhûngte chu an lo mu reh ṭhap tawh a, kan thawmah ka pa chu lo thochhuakin ka biak tlang theih loh thu chu ka lo hrilh vat a.

     "Ka be thei si lo che a, u Nunsânga hian min lo thlah ringawt alawm. Thingpui tui tâwkin ka'n lumsak ang e" ka ti a.

     "Kha, i rawn thlah hlauh chu a tihzia e. Zan lam chu ka rawn lang peih ta ngang lo a nih kha. Tikhan thingpui chu lo in ula, ka va mutsan leh mai teh ang che u," tiin an room lamah chuan a lut leh ta nghal daih a.

     Thingpui ka lum chhûng zawng chuan a ṭhu ngâwi reng a, kei chu ka ti ti barh barh thung a. A awmdan chu ka hrethiam êm êm a, nute sûn hrehawmzia ka hrechiang bawk a, a ngâwi reng pawh chu mak ka ti hauh lo.

     Thingpui a in zawh chuan rei ṭhu lovin kal leh nghal mai chu a tum a, varanda thleng ka thlah a. A kal dawn chuan ka kut a rawn hum vang vang a, kei pawhin a lungngaihna hnem tum takin ka lo hum let ve a.

     "I ṭhiannu saw thlahthlam lo la, exam ngei turin lo nawr ve la ka duh. Ka nu a zual deuh aṭang khan exam loh ringawt a sawi a, exam ngei se ka duh," a ti sup a.

     "Aw le, ka lo sawipui dawn nia. Lehkha zir erawh a tân chuan a la harsa viau ang."

     "Exam ngei se ka duh. A lehkha zirah a rilru tlem tal a pek loh chuan ka nu ngâiin a indawm kun reng mai dawn a, a exam chuan a ngaihtuah lo thei dawn lova, a rilru la pêngtu atân pawh a ṭha hrim hrim."

     A sawi dik chiah a ni! A exam chuan zir miah loh thu a awm dawn lova, lehkha a zur chuan a nu ngâia khawhar taka a awm tur a tizia ve dawn a ni.

     A tlanliam thleng ka thlir a, ka hmuh theih tak lovah chuan inchhûngah ka lut ve ta nghal a. Lehkha zir ka tum deuh a nia, ka peih leh ta ngang lova, ka mu ve ta nghal daih a.

     Nihnih nithum vel chu lehkha ka zir mumal bik lo hle a, Mâmi te in lamah ka phei deuh reng a, kan inah pawh ka awm tlem hle a ni.
     
     Mâmi chu exam tur chuan ka thlem ngat ngat a, a tirah chuan a duh lo fithla hmak a. Mahse, ka sawipui lui char char a, a tawpah chuan exam tur chuan a rilru a siam ve ta hram a. An in lamah inlêng neuh neuh an la awm a, an chhûngte ho nen an la ri luih luih reng bawk nen kan in lama zir turin ka hruai phei ta daih a.

     Ka beisei âi takin kan zir ṭha thei a, ka nu nula sawi kha a lo awm ta bawk a, inchhûng sekrek leh thil dang pawh a kutah a awm nghal vek a ni mai a. Ani lo awm lo se chu eng ang pawhin lehkha zir ngai mah ila ka chet a ngai leh ngei dawn tih ka hrechiang a, chuvangin, Hruaii lo awm ta pawh chu ka tân a ṭangkâi ta ber zawk a ni.

     Tlûang takin exam chu kan zo ta hram a, Mâmi pawh ka rin âi takin a pachang a, exam zawh nî chuan a nu thlana kalpuiah min sawm avangin ka kalpui a. Thlan kan thlen chuan ngâwi rengin kan ṭhu dun vang vang a, a châng chângin a mittui a hru leh zauh ṭhin a, ṭah erawh zawng a ṭapchhuak bik ta em lova.

     Tukkhat chu Mâmi ṭawng ri niawm tak hi ka rooma ka la awm lâi chuan ka hria a, chutia ani meuh zîngkâra lo kal ta chu a pawimawh viau a nih ringin ka chhukthla nghal a.

     Ka pa nen chuan an lo ti ti mawlh mawlh a, an ṭawng tui êm avang chuan an bulah ngâwi remgin ka lo ṭhu a.

     "Puite, i ṭhiannu hian zinpuiah a rawn sâwm che a nih hi. Zu zin khawthawng dun ta che u, in zinchhuak khât êm mai," ka pa chuan a rawn ti a, ka lo hawi phawk hle thung a.

     "U Nunsânga'n a awmnaa zinthla turin min rawn ti a, mahnia chhuk âi chuan kan pahnihin zu kaldun ila a nuam zawkin ka ring a. Chu bakah, ka u khan nangmah hi hruai ve turin min rawn ti a,"  Mâmi chuan a lo ti ve bawk a. Nunsânga hi hna ṭul avangin a nu boral kâr bak kha a châm thei lova, a chhuk hnu hian chawlhni vawikhat hmanga a rawn chho bak chu a la awm ta vang vang a ni.

     Kolasib hi a hranpa takin ka la kal lova, thingpui ina chawlh zawk bak chu kan tlanpel leh hi a ni mai a, a hmun hi a nawm hmel ka tih avangin a hranpaa han kal ve chu ka chak angreng viau a, ka pa berin a phal bawk a, kal ve chu ka tum ta a.

     Chawhnu lam dâr 3:00 chhuak sumo-ah kan chhuk a, dâr 6:30 velah Nunsânga in luah chu kan thleng a. Quatera awm a ni a, amah chauha awm a ni bawk a, zau lem lo mah se a luah nuam tawk hle a. Kan inbual zawh chuan Nunsânga eirawngbawl sa chu kan ei a, ka rin âi daihin eisiam a lo thiam a!

     Aizâwl aiin Kolasib chu a lo lum deuh zawk a, fan hnuaiah kan ṭhu deuh reng mai a. Mâmi chuan auto-rickshaw-a chuan a chák tlat avang chuan Nunsânga ho chuan kan chhuak a, auto lo tlan chu lo phar dingin Venglâi lamah kan tlan phei a. Mâmi chuan hla deuha kal a rawt avangin Khuangpuilam thleng kan han tlan a, kan let leh lam chuan Romantic road lamah kan tlankûal a, ke-a len velna atan ka it hle a. Thla en zanah ke-in han lêng kûal vel ila a nuam viau-in ka ring a ni.

     In kan thlen chuan lum kan tih êm avang chuan kan inbûal leh a, khuma mut pawh a peihawm loh zawk hîal a, tholen zar buaithlak lo se chu chhuata mut mai chu kan duh zawk a. Mahse, Nunsânga'n a remtih tak lovah chuan kan tilui ta bik lova.

     A tukah chuan Nunsânga office kal hlanin Diakkawn bazârah kan kal a, chawhmeh leh thei vel kan lei a, kan hawlam chu kan rit lutuk lo bawk a tiin ke-a kal kan rawt a. Romantic road lam kha chhun khaw enga hmuh chian kan chak avangin chulamah chuan kan kal a, kan rinâi daihin kal thui a lo ngâi ta si a, khua a lum bawk nen kan chau hle a.

     Kan zuam ang ngawt a lo ni si lova, auto phar mai tur awm se tiin kan hawi kan hawi dun a, thawm hlekah kan hawi let vat zel a, auto pakhat chu a rawn tlan ta hram a. Chutia auto phardin tuma hnunglam kan hawi chu Mâmi chuan kawngpui a lo han hnaih mah mah ni tur a ni kan piah kawi aṭanga bike rawn tlan chuan a rawn su thawi thuak a, petek nawkin piah deuhah chuan a ṭhusawp ta hnawk a. Bike pawh chu brake tuar(h)in kan piahah chuan a ding a, a khalhtu leh a miphurh chu kan awmna lam pan chuan an rawn tlan vat a.

     Mâmi chuan a ke chu na a ti hle a, a rap ṭha ngam lo tlat a, a ulh a nih kan ring ta ber a. A rawn su thâwitupa lah chu a inthlahrung êm ëm a, damdawiin lama hruai mai a rawt a.

     Damdawiin awmna leh chinchâng engmah kan hriat loh avang chuan keimahni thiamloh zawk mah ni se kan inhruaitîr ta ringawt a. Auto-in keini kan kal a, a ṭhianpa zawk chu kan bulah kalin bike khalhtu erawh chuan kan hnungah min rawn zui thung a.

     Kan lo rindan ang chiahin a ke chu a ulh a lo ni a. Khatia bike-in a rawn sut thawi takah khan hlauvin a lo persawn a, a persawnna lamah lung lian vak lo awm chu rap lekin kha a lung rah vanga ulh kha a nih kan ring ta ber a.

     Damdawi lei ngâi leh senso dang chu bike khalhtu zawk, Remruata chuan kan remti lo chung a tum vek a, in thleng min thlah bawk a. A inthiamlo lutuk chuan thuphâ a châwi deuh reng a, keini chuan a thiam loh a nih lohzia leh kan fimkhur tawk loh vanga thil thleng a nih thu kan lo sawi ve bawk a. An haw dawn chuan phone number te inpe-in chanchin ngaichanga min rawn biak turthu te chu an sawi luam a.

     Nunsânga office bângin thil awmdan a hriat chuan a tel lova khawiah mah chhuak tawh lo turin min ti nghal a, hauh erawh chu min hau ta bik em lova.

   
LALNUNPUII
Sbk Pachuau

Chapter 3



     A tukah chuan inah kan awmdun ta rak rak a, TV te enin khua a lum bawk nen kan awm duhdan dun viau a. Nunsânga chuan thawmhnaw suk tur tlem washing machine-ah a lo dah a, chu chu ka hmuh chuan Mâmi nena kan thawmhnaw suk ngâi ho chu lakhawmin ka insu ta a. Tui han khawih reng takah chuan tlem chuan min vawng dai ta deuh a, awm mai mai ai chuan chutia han chet takah chuan zawi ngawih ngawih pawh kha a zia phah ta daih a, a tihchi phian a ni.

     Bathroomah chuan ka tui ta phian a, ka phone chu keng lutin zâi ka ngaithla pah a, insu mawlh mawlh chung chuan ka lo zawm ve rât rât a.

     Inchhûng lamah chuan mipa ṭawng niawm takte hria-in ka inhria a, ka zâi ngaihthlak nen k hrechiang thei chiah lova, Mâmi TV en thawm a nih ka ring ta ngawt a!

     Ka insu zo ka chhuak chu Remruata leh a ṭhianpa lo ṭhu chu ka hmu nghal a, Mâmi TV en thawm emaw ka tih kha anni ṭhiandun ṭawng hi a ni tih ka hre chawpchilh nghal a.

     "In lo lêng a ni maw? In va fel ve!" ka ti hliai a.

     "Nia, tunlâi kan hnaah kan awllâi tak a nia, kan rawn tlanbo a nih hi. Office-a ṭhut nilen ai chuan nula hmêlṭha bula ṭhut a nuam zawk ang tiin kan lo kal vang vang a nih hi," nui chungin Remruata ṭhianpa chuan a lo ti a.

     "Chuti a nih chuan tikhan nula hmelṭha bulah khan lo ṭhû ula, ka thawmhnaw suk hi pâwnah ka va zâr lawk ang e," tiin ka chhuahsan ta nghal a.

     Thawmhnaw ka zar zawh chuan ka lut leh nghal a, khua a lum êm avang chuan thingpui sîam lovin theitui chu ka sîam a. Remruata ṭhianpa chu a ṭawng duhin fiamthu a thiam phian a, kan nui dar dar reng a. A nupui neihnia a chetchhiatna te chu sawiin a zir pah deuh zel bawk nen Mâmi phei chu mittui tla phungin a nui a, a nu boral hnua a hlim ber ṭum a ni hialin ka hria a, an lo lêng hlauh chu tihzia ka ti rilru hle a ni.

     An haw hnu pawh chuan Remruata ṭhianpa thil sawite chu kan sawizui a, kan la nuihpui báwk báwk a. Nunsânga rawn haw hnu chuan Mâmi chuan Remruata te lo len thu leh kan nuih nasatzia te chu a lo hrilh vat a, ani pawh chu a khi ve suk suk a.

     Zanah chuan sitting roomah kan pathumin kan ṭhu a, TV kan en a. Nunsânga chuan cartoon network-a Tom and Jerry chu hmetchhuakin min rawn melh zauh a.

     "Cartoon hi kan la ngainâ em aw!" nui hmêl pu chungin a rawn ti chhuak a.

     "Nuih kher a ngâi em ni? Hmâna Puitei kha ka la ni reng a, hmuhnawm ka la ti reng bawk," ka lo ti hlak hlak a, ani chu a nuih a za zual sauh ni ngei tur a ni a rawn nuichhuak ta hawk a.

     Chutia a rawn nuichhuak ta chu ka run hle a, ka bula throw pillow chuan ka va vawm a, ani chuan awlsam tê-in a lo man a, la nui reng chung chuan min rawn en a.

     "Hmâna ka nau luhlul leh ṭahbelh deuh kha i ni tih ka theihnghilh thut alawm le! Tuna i hmêl en kha chuan cartoon lawm rûal chu i ni tawh chiah lo  alawm."

     "Ka ṭahbelh kher lo aw! Kei aiin Mâmi hi a ṭahbelh fê zawk, kan thlem nasat theih êm kha," ka lo ti hlar a, Mâmi chu ka va en a. Ani lah chuan kan thusawi ngaihsak lêk lovin a phone ringawt a lo buaipui a, hlim hmel zetin a phone chu a lo bih a.

     Nunsânga pawh chuan a nâu chu a va en a, ka lam lo hawi lehin a mitmei chuan hriat ka neih ringin min rawn zawt a, kei lah chuan ka lu ka lo thing ringawt a, engmah chiang taka hriat nei bik hek lovi!

     Mâmi hian ngaihzâwng pakhat chu a nei ve tawh a, a fuh lem lo hle thung. A bîalpa chuan ngaihzâwng dang a lo neihsan a, chu chu Mâmi'n a hriatchhuah chuan a ṭhen ta vat a. Ani lah chuan Mâmi chu ṭhen phal lovin a rawn tibuai zui zel a, ngaihdamte dilin phone ah nen a be buai reng bawk a. Mâmi lah keimah ang chiaha rilru lian leh luhlul a lo ni ve bawk si a, let leh tumna a nei lova, a block ta vek bawk a. Ṭumkhat chu hmaichhanah chiang fek fawkin a duh tawh loh thu chu a hrilh a, chu pa chu a reh zui ve ta hram a ni.

     Chumi hnu chuan ngaihzâwng lam hi a ngaihsak ta miah lova, han duhtu leh ngâizâwngtu te chu awm ve bawk ṭhin mah se amah berin a uksak miau si lova, beidawngin an kiang leh nge nge ṭhin a. A ngaihsak lohzia hrechiangtute kan ni a, chutia phone aṭang pawha a hlimpui êm êm chu rinhlelh ruk ka nei naa ka chiang ngam bik chiah lova.

     Zan mutnaah chuan ka rinhlelh ruk chu ka zawt ta a, ka lo rin ang ngei chuan zanin pawh khan whatsapp-ah rawn bia-in an inhaw lo tawn tih a lo lang vek a. An inbiakna min chhiartir chuan ka nuih a za ang reng hle a, tleirawl, a ruka inngâizâwng, la sawilang ngam chiah si lo hi ka tehkhin ber a.

     Chhuna Remruata nen an inbiak lâia a lai deuh tlat kha ka lo hmu ru reng a, Remruata pawh khan a melhdanah leh a biak veldanah chuan a duh ru ve tho nia hriatna ka lo nei a. Chuvangin, Mâmi awmdan han danglam ta deuh pawh kha ka chiang ngam chiah lo naa Remruata vang a nih kha ka lo ring deuh a, ka rin chu a lo dik ngei reng a.

     A tuk chhunah pawh Remruata chu a lo lêng leh a, a ṭhianpa fiamthu thiam deuh kha rawn hruau
i lovin midang a rawn kalpui ta thung a. Kan lo ti ti laih laih lai chuan Nunsânga chu a rawn haw teh hlawl a, chhun eitur thil eng eng emaw a rawn khâi haw nûal a.

     Chutia a û rawn haw ta thut chu Mâmi chu a zah hmel hle a, Remruata pawh chu lai hmel deuhin a lo awm bawk a, ka nuih an tiza duh hle a. Nunsânga bulah chuan Remruata chu Mâmi su thâwitu a nih thu chu sawiin ka inhmêlhriattir ta nghal a.

     "A zia lo tak tak a ni. Keimah vangin helaia an awm chhûnga an hun hman tur a buai phah ta vek sia, len pawh lêngchhuak thei lovin an awm phah a," inthiam lo takin Remruata chuan Nunsânga hnenah chuan a ti a.

     "An sawi hmangah ka nâute thiam loh zawk hi a nih hmel a,chuti chung chuan i rawn ngaihven zui zel a, i tilawmawm lutuk! I thiam lohna a awm lova, inthiam lo duh lem suh." Nunsânga chuan a lo ti vat a.

     Thil ei zawhah Nunsânga chu a kal leh nghal mai a, Remruata te pawh chu office lama let leh an la ngaih avangin rei vak lo an ṭhut leh hnu chuan an kal zui ve nghal deuh mai a. An kal hnu chuan Remruata chu kan ṭhiandun chuan kan sawi zui a.

     "I rilru dik tak min hrilh la, eng nge i ngaihdan? Ka tân a ṭha-in i ring em?" Mâmi chuan min en chung chuan min zawt sep a.

     "A sual ka ring lem lo. Kei âi chuan u Nunsânga'n a hre zawkin ka ring! Mipate hian an mipat puiten hmeichhe chunga an rilru putdan an hre thei zawk an tih kha," ka lo ti a.

     "Mahse, vawikhat chauh a la hmuh kha, chu pawh reilote."

     "A lo lêng leh dawn a ni lawm ni? Zaninah pawh lo len a tum kha."

     "Ka zawt hreh deuh! Ngaihzâwng tur chungchânga mahni ûte han ráwn chu a zahthlak dawn e!"

     "I hreh viau leh ka lo zawhsak mai dawn che nia. Kei chuan miṭha tak niin ka hria a, mahse, mi hi an pawnlam landana teh ngawt theih an ni hlawm si lova, ngaihdan siam thiam a har!"

     Zanriah eikham hnu reilotê-ah chuan Remruata leh chhun lama a rawn kalpuipa kha an lo lut a, Remruata chu Mâmi bulah chuan ṭhu-in a ṭhianpa chu ka bulah a rawn ṭhu ve bawk a. Nunsânga chu a room aṭanga lo chhuakin Remruata chu a rawn bia a.

     "In lo lêng a ni maw? In va fel ve!"

     "Nia, hei keimah vangin a chhuak ve thei mang si lova, a chhuak thei zawkin kan pan mai loh chuan kan tia kan rawn kal tluk tluk mai a nih hi." Remruata chuan nui chungin a lo chhâng thuai a.

     Nunsânga chuan min rawn en vung vung a, hmêl nûr nûngin a room lamah bawk a lut leh ta daih a, a awmdan chu mak ka ti ru deuh a. A chhan chu, a mitmengah khan lungawi lohna nei ang riau-a ka hriat vang a ni.

     Room aṭang chuan a rawn chhuak leh thuai a, a bike chahbi chu la-in min rawn en a.

     "Puite, min lo chhuahpui lawk ta che. Inthlak pawh a ngai lo, tikhan lo kal tawp rawh." Remruata lam chu hawi lehin, "Tikhan lo lêng r'u aw, kan rei lovang," a tih zawm zat a.

     "Romantic road-ah khan i la kal chak em?" Kan tlanchhuah hnu chuan a rawn ti sup a.

     "Chák e, chutah chuan em ni kan kal dawn?" ka lo ti vat a. "Bike-a kal lovin ke-in kan kal mai lo a nih chu."

     "St. John's school bulah bike kan dah ang a, chuta ṭang chuan ke-in kan kal dawn nia," a ti a.

     A sawi ang ngei chuan St. John's school bulah chuan a bike chu dahin ke-in Romantic Roadah chuan kan phei a. Thla chu tlemin a eng deuh a, kawngpui chu a fai nuamin a thengthaw nuam êm êm a. St. Maria school zawn kan thlen chuan ding chungin kan thlir thla a, zan thla eng hnuaiah chuan a landan a nawm hmel tak zet a, kawngpui aṭang chuan tlem chhuk thla-in phul chung chuan kan zu ding a.

     Ka hawi kual rûai a, a chhak maia Minor Seminary te chu a chhûnga han luh vel ka chak hle a, han luh chi ni chiahin ka hre êm si lova. Chutia ka hawikual lai chuan Nunsânga chuan ngâwi rengin min lo en reng tih ka hmuh chuan ka tawp chawt a.

    Ka kut chu la-in nghet takin a chelh a, min si deuh thaw-in a rawm ding hnai nghal bawk a. A awmdan chu ka lo beisei hauh loh thil a nih avangin ka hamhaih a, chet nachâng hre lovin ka lo ding mawl tawp a.

     "Kha pa kha a rawn kal ve ziah em?"

     A thil min zawh chu a ngaihna ka hre lawk lova, a tirah chuan Remruata chungchâng a sawina emaw ka ti deuh a.

     "I bula ṭhu kha a rawn lêng zing em ka tih chu!" a aw chu a hma ai chuan chang ṭha béng báwng tak a ni.

     "Eng .. aw... aih, teuh lo. A vawihnih rawn kalna a nih kha." Ka aw teh hrep chu ka thunun theih miah loh chu le! Ka ṭawng bah nawk a, ka thil sual ti min man chhuak niawm takin ka aw chu a khur dar dar bawk a.

     "Chuan...?"

     "Eng nge chuan i tih chu  a awmzia? Eng atân nge min zawh?"

     "I tân kha pa kha eng nge a nih?"

     "Ka tân engmah a ni lo. Remruata ṭhian a ni a, ka hriat ngai mi a ni hek lo. Chu chu engvanga min zawt nge i nih ka tih chu!"

     "Ka thik!"

    "Maw .... !?"

     A thusawi chu ka hre lo a ni lo, ka hre chiang lutuk tlat! Mak ka tih em avanga zawt let ka ni zawk a.

     Ka kuta a vawnna chu thlahin min rawn kuah a, ka bengbulah chuan a rawn kun hnai a.

     "Ka thik ka ti! Tikhan i hrechiang tawh em?" a rawn ti sup a.

     "Nang hi engtin .... " engmah ka sawi zawm thei lo. Ka thin chu a su dup dup a, min kuahna chu nuam ti ru tho siin min tikhawr a, chet ngaihna ka hre lova, engmah ka sawi thei hek lo.

     Ka tleirawl chhuah hlim aṭanga amah ka lo duh rukna kha chen ka lo thup tawh kha hrechhuakin min chhaihkual em ni ang! Keimah pawhin ka duh tih kha ka haider lui tlat a, ka duh a ni tih kha keima lakah ngei pawh ka zep a nih ber chu! Ngaihzâwng a nei tih ka hriat khan a rukin ka lo na hle a, unau leh chhûngkhat anga kan inen tlat avangin inngaihzawn kha thil theih loh burah ka lo ngâi a. Khang kum liamta chhûng zawng khan amah thlahlel tak chung siin hlatdan ka ngaihtuah a, ka duh a ni tih hi a hriat ka hlau a, ka theihtawpin ka inthup ṭhin kha a ni a. Tuna hetiang ṭawngkam ka bula a hmang ta mai hi a laka ka rilru putdan kha a hria ni turah ngaiin ka thin chu a phu hlawp hlawp a.

     Ka khabe-ah vuanin amah en thei turin min kuai dak a, thla eng hnuaiah chuan a mitmeng de sar chu ka han hmu thei a.

     "Puite, ka duh che tih hi i hrethiam miah lo em ni? Eng chen nge haider i la tum?"

     "Chutiang engmah ka hre lo."

     "Engtin nge i hriat loh theih? Ka message rawn thawn ṭhin che aṭang pawh khan duh ni la chu hriatthiam loh tur a awmin ka hre lo."

     "Ka hrethiam miau si lo alawm!"

     "Tunah chuan ka duh che a ni tih lo hre tawh rawh. Ka duh che, Lalnunpui."

     "Ka ... "

     Ka hmui chu a hmui chuan a rawn chhin hmiah a, min rawn fawh chiah chuan ka sawifiah thiam si loh eng emaw hian min fan chîai chîai a. Mipa dang ka lo fawp ve tawh ngei a, mahse, tuna ka awmdan ang hian ka la awm miah lo tih ka chiang a ni.

     A hmui chu lasawnin hnai set sawtah chuan min en vang vang a, muang chânga rawn kun hnai lehin min rawn fawp leh nghal a. Tun ṭuma min fawhdan chu a dang ta! Chhanlet phut tih hriat takin ngenngawl zetin min fawp a, ka hmui tlema ka lo tikâu chu remchângah la-in a aia uar zawk chuan min fawp a. Ka inring hman lo a ni ber e, a nghawngah kuahin ka lo fawp let ve a. Chutia ka lo fawhlet takah chuan duhthawh lutukin min fawh chhunzawm a, kei pawhin uar zetin ka lo fawplet ve ngawng ngawng a. Hetiang êm êm hian infawh hi a lo nuam a ni tih ka lo hre ngai miah lo!

     Motor rawn tlan thawmah chuan kan inthlah ta hram a, kan thaw dun halh halh a. Ka kutah chuan kaiin thlang lamah chuan tlem kal thla-in phul chungah chuan min ṭhutpui a, ka darah a rawn kuah nghal bawk a.

     "Kha pa bula i lo ṭhu ka hmuh khan ka thik a, ka thin a rim bawk. Mipa dang bula ka hmuh apiang che hian ka thik ziah a, tunah phei chuan a hma ai zawngin ka thikthu a chhe dawn a nia. Tuman ka thil neih min ṭawmpui ka duh ngai lohzia chu i hriat kha."

     "Mahse ... "

     "Mahse a awm tur a ni lo. Chuan, engvanga min duh tih hi lo thup tlat ṭhin nge i nih han sawi teh le."

     "Chutiang engmah a awm lo," ka lo ti vat a.

     "Hmeichhe dang bula ka awm apîangin kha i mitmeng pawisawi lo takah khan thikna ka hmu ziah a. Mahse, ka chiang ngam chiah lova, ka duhthusam mai maiah ka ngai leh deuh a. Zanina i awmdan aṭang hian ka rin chu a lo dik tih ka hre ta chiah a nih hi!"

     "Engtia ka awmdan maw?" ka lo ti hâ a.

     "Ka fawh chiah che khan ka lo rinhlelh ruk kha a dik tih ka hria a ni. Min duh lo ni la chuan i hmui ka sik rûal khan min nemsawn nghal ang, duhzâwng nilo infawhtîr duh chi i ni lo tlat!"

     Ka zak ru veng veng a, ka kun ta daih a.

     "Tleirawl tê pawh i ni tawh lova, khatia naupangchhia deuha laih kual vel kha sim tawh teh." A nuih chu a zat hmel hle a.

     "Kan chhûngten an hriat hunah engtin nge an ngaih ang?"

      "A tirah chuan mak chu an ti ve deuh mai thei a, mahse, hlauhthawn tur a awm miah lo a nia, engkim a ṭha vek ang tih ka chiang a ni. Ka chhûngte aṭang chuan dodalna engmah a awm ka ring lo."

     Mâmi ka ngaihtuah a, a û chunga ka rilru putdan a laka ka zep chu a thinrim ngeiin ka ring a, a thinrim rei loh hram erawh ka beisei!

     Haw ka rawt chuan a tho a,min kaitho ve nghal a. Kal ta mai lo chuan min kuah vang vang a, duhthawh lutukin min fawp leh a, ka lo chhânglet vat a. Rei ngial kan infawh hnu chuan kan inthlah ta hrâm a, inkai rîalin kan kal dun ral ral a.

     A bike dahna kan thlen chuan a tinung nghal a, ka chuan hma chuan min rawn en a.

     "Min hlat dû khan chuang tawh suh: min rawn kuah ang che," a rawn ti sup a, ka lo nui ringawt a.

LALNUNPUII
Sbk Pachuau

Chapter 4



     In kan thlen chuan Remruata a lo la awm a, a ṭhianpa erawh chu a lo awm tawh lova. Thingpui an lo la in bik loh avangin ka lum nghal a, thingpui in pahin Nunsânga chuan Remruata chu a ti ti pui lûam a

     Remruata haw hnu chuan Mâmi chuan kan lenna min zawt a, ka lo huphurh ruk reuh reuh kha a ni a, a enga mah hma chuan ka lo lai ru deuh der a.

     "Fan ngai loh ram kan fang dun a," Nunsânga'n a lo tih chuan ka va melh vat a, min lo nuih suk a.

     "Nangni pahnih hi in phakar tlat! Ka kal ve theih loh láiin in lêng kûal bik a, min thlim vel a, ka lensan ve khawp ang che u mawle," Mâmi chuan a ti barh barh a, a tûm deuh bâr a.

     "Kan bula lo kal ai chuan ina lo awm kha nuam i ti daih zawkin ka hria! I hmêlah pawh a lang vek alawm kha," Nunsânga'n a lo tih tak khauhah chuan Mâmi chu zah hmel deuhin lai tawkin a lo awm a, keiin ka lo nuih thung a.

     "Kan lêngchhuak chu kan tifuh zawk niin ka hria, i hlim hmel em mai!" Nunsânga'n a tih leh chuan Mâmi zak leh lai lutuk chuan a û chu lei a chhuahkhum ta ringawt a.

     Mutnaah chuan muhil mai thei lovin ka inngaihtuah neuh neuh a. Ka chunga thil thleng chu a ni teh thut lutuk a, a rang mah mah ka ti a. Hun rei tak aṭanga ka lo vei leh duh ruk tawh mah ni se zankhat thilthu leka a laka ka intulut nghal mai kha min ngaihnep phah ka hlau a. Khati taka awlsama ka rilru ka tilang kha min lo nuihzat ru viau-in min lo fiam ru reng pawh a ni zawk mai thei a ni tih hlauhthawnna chuan ka khat a.

     Lehlam zâwnga ka ngaihtuah thung erawh chuan hun eng emaw lâi aṭang tawh khan a message min rawn thawn hi rinhlelh tur ting chuan a danglam a, hriatthiam har tak si hian min duh em ni chu aw tih tur hian rawn thawn leh zauh kha a chîng a, keiin a pangngai thei ang berin, a thil sawi helin ka lo chhâng ṭhin a. Chuvangin, ani pawh khan a message chhâng ṭha duh lo angah min ngaih phah ta kha a ni reng a, a ngaihdan chu dikna chen pawh a awm ve thovin ka hria a, a lo vui viau pawh kha awm ka ti leh hnuhnawh hle a ni.

     A tuk zîng chaw eikhama a rooma insîam tura a lut chu a luh hnu rei vak lovah min rawn au a, chaw eilâi khan thawmhnaw suk tur a neih leh neih loh ka zawh avangin suk tur min pe dawn a nih ringin ka lut phei ve vat a.

    A khum bulah chuan dingin a kawr chu a lo kilh mawlh mawlh a, a thawmhnaw suk tur awm reng ka hmuh tak lovah chuan amah chu ka va en a.

     "Khawnge i thawmhnaw suk tur chu?"

     Min chhâng lo chuan min rawn pan hnai a, ka bul a lo thlen chuan a taksa si chétin min pawtbet a, a rawn kun hniam zui zat a.

     Mâmi mitmei ka ven avang chuan rei infawhtîr lovin ka nemsawn ta vat a, a âwmah chuan min pawmbet leh vang vang a, min thlah ve ta hram a.

     "Vawiinah inlêng an lo awm leh a nih pawhin mipa bulah lo ṭhu tawh lovang che," a ti hmuk a, ka lo nui hak thung a.

     "Fiamthu ka thawh em ni?"

     Ka nuih a za zual sauh a. Ani ang tlangval senior tawh si chu a thikthu a chhe mah mahin ka hria a, a inawm lo riaua ka hriat avang chuan ka nuih a tiza viau a ni.

     Ka bâna nghet zeta rawn hmerin a lamah chuan min hnukhnai rawk a, ka kawngah chuan kuahbet nghalin hnai set sawtah chuan min rawn en a.

     "Ka fiamthu hauh lo, ka ti tak tak a nia!"

     Ka nuih chu la za hle mah se ka nui ngam tawh bik si lova, theihtawpin ka insûm a, min rawn fawh leh takah chuan ka nuih a za ta bik lo!

     Chhunah chuan Remruata chu amahin a lo lêng a, a tuk maia kan haw tawh dâwn avangin hun thâwl deuh zawk an neih theihnan ka insuk zawh chuan room lamah ka awmsan ta daih a, mu chungin ka phone-a games chu ka khel mai mai a.

     Ka hmui chu eng emaw hian a rawn tawk a, ka menchhuah hma chuan hmuiin a rawn bawhthuah a, thawh phan awm hauh lovin ka mengchhuak nghal kawk a. Ka games khel kha ka lo muhil daih chu lo niin Nunsânga rawn haw-in min rawn tiharh a lo ni a.

     A âwmah chuan nemin thawh chu ka tum nghal a, a taksa-in min delh tlat avang chuan ka chesawn thei der lova, ka nam deuh ṭang ṭang pawhin a chesawn duh eih mai si lova, ka tihngaihna hre lo chuan thawk chu ka la hak a.

    "Tho teh, Mâmi a rawn lut ang a, min rawn hmu palh ang," zawi sapin ka ti a, a lo nui suk duh chauh a.

     Rawn kun hniam lehin min rawn fawh a tum leh takah chuan ka lo thlesawn vat a, ka dar leh ka lu inkârah a lu chu phûmin a thaw hawk a. Ka chung aṭanga inlet thla thawkin ka  bulah chuan a mu a, ka kawngah chuan a rawn kuah nghal zat a.

     Thawh ka tum chuan min kuah nghet sauh a, a lamah min hnukhnai salh bawk a, kei pawh chuan thawh chu ka tum lui ta bik lova.

     "I bula awm chákin ka lo haw a, i lo muhil daih a!" ka beng bulah chuan a rawn ti sup a. Kei pawhin ka ngâi lutuk, mahse, ka sawi lang ngam lo thung.

     Sitting rooma kan va chhuah phei chuan ka ngaihbel nge Mâmi chuan min rinhlelh hmel riauvin ka hria a, Nunsânga lah chuan a ngaihsak lo nasa mai si a, nuam lo ka ti ru ang reng viau a ni.

     Juice ka siam a, Nunsânga eitur rawn hawn nen chuan kan ei-in a, Nunsânga chu chawhnu lamah meeting pawimawh a neih avangin a chhuak leh nghal a, Remruata erawh office lama let a ngaih tawh loh avangin a la awm khawmûang a.

     "Ka ṭhianpa khan min lo biak rawh a ti che a," Remruata'n a rawn tih chuan ka lo nui mai a.

     "A ti tak tak a nia, nui ringawt suh," a rawn ti leh a.

     "Fiamthu i duh em mai, chutiang infiamna chi pawh a nih loh chu!" ka lo ti thung a.

     "Ka fiamthu lo ka tih chu! A sawi reng che a, engtin nge ka lo tih dawn?"

     "Nimin aṭang chauhin kan inhria a, min la sawi nasat lutuk hman dawn loh chu," nui chungin ka lo ti leh a.

     "Han sawi ṭha teh. Engtin nge ka lo chhan dawn?"

     "Ka phû loh tehreng nen pawi ka ti khawp mai, ngaihzâwng ka nei tlat!"

     Remruata âi mahin Mâmi chu a lo hawi phawk a, eng emaw tak ngaihtuah nei niawm takin min melh vang vang a, chuti taka awlsama ka sawichhuak chu ka inchhir nghal a.

     "I ṭhiannu hian ngaihzâwng nei lo angin a sawi che sia, chuvang a nia khatia huai taka ka rawn sawichhuah ngam na chhan. Ngaihzawng i nei lo nia ka hriat vanga sawi ka nia, min lo hrethiam dawn nia," Remruata'n a rawn tih chuan nuam lo ka lo ti ru deuh a.

     "Ho lutuk! Ka ti mai mai a nih kha. Keini ang te chu tuman min duh ve tak tak hleinem, ka fiamthu a nih kha," ka ti ta ngawt a.

     Remruata haw hnu chuan Mâmi nen chuan rawng kan bâwl dun a, ṭhu chungin chawhmeh siam tur a lo chan a, ṭawng lovin ngawi rengin a chan mawlh mawlh a.

     "I lung a lêng lawk a ni chiang mai! Ṭawng pawh i ṭawng peih tawh lo nghal der chu a nih kha," ka ti fiam hlut a, ani chu a lo la ngâwi ngal reng a.

     "I cham chilh nghal mai dawn em ni ang? Khati êm êma haw hreh chu awm hlen ve nghal mai la," nui har har chung chuan ka ti a.

     "Ka û nen hian in inkârah eng nge awm?" thutak lutuk maia a rawn tih takah chuan ka nuihzatna chu a reh chiang kher mai!

     "Eng.... eng nge i sawi awmzia?" Ka dang a awk nghal vek!

     "Ka u Nunsânga nen hian in inkârah awm a awm tih ka hria, nizana in chhuak dun in rawn haw leh aṭang khan i awmdan a danglam vek a. Vawiin chhunah pawh khan roomah in awmdun vang vang a, in lo chhuah khan i hmel kha ka sawithiam chiah lo naa a danglam lutuk!"

     Sawi tur ka hre lova, dawta han phatmar ka tum hek lo. Ka chunga a lungawi loh ka rin rukna chu a takah a lo thleng ta chiah niah ka ngai nghal hmiah mai a ni.

     "In inngâizâwng hi ka thin a rim miah lo. Ka thinrim chhan zawk chu ka laka i zep hi a ni. Ka thuruk zawng zawng leh ka engkim ka hrilh che a, nang erawh chuan ka lakah zep i lo nei reng a, ka lawm lo khawp mai."

     "Pawi ka ti! Midang hriat ka hlau a, a ruk tak meuh meuhin ka veiin ka duh ṭhin a, aman min lo duh ve tih ka hre miah lo bawk. Nizan aṭang chauh tak tak khan bul kan ṭan a, hrilh che chu ka tum a, hun a la awm ngang lo a ni." Nuam lo ka ti lutuk chu ka ṭawng pawh a zawi ta sap sap hle a.

     "Hey, khatin hrehawm tih hmel deuhin awm suh, min hrilh loh avang khan ka lawm lo ringawt alawm. Khatia i awmte chuan ka titau rei thei nang, han thinrim khum che ka tum asin le!"

     Min rawn kuah takah chuan ka lo kuah let vat a.

     "Tunhma zawng khan ka laizâwn angin ka en ṭhin che a, tunah chuan ka laizâwn mai ni lovin ka û leh nu angin ka en tawh dawn che a nia," nui har har chung chuan a ti a, a thinrim rei loh hlauh avang chuan ka lo thaw huai thung a.
   
     Zana Remruata a rawn kal leh chuan sitting roomah kan ṭhu a, kan ti ti laih laih a. Nunsânga chu a tho thurh a, a room lamah a lut ta daih a. Engti tura lut ta daih nge maw a nih tih ka lo ngaihtuah lâi tak chuan min rawn au a. Ka va luh rual rual chuan min lo kuahin a khumah chuan min ṭhutpui nghal a.

     "Naktuk in chho tawh dawn si a, zanin chu a tam thei ang ber i bula awm ka duh," a ti sup a.

     "Eng tikah nge i rawn haw chhoh theih dawn?" Ka lo ti sap a.

     "Ka lo tumdan chuan in ruala chhoh ve kha a ni a, mahse, tun inrinni hian office kal a ngai leh dawn tlat a, ka tumdanin ka awm thei dawn ta lo a ni."

     "Mâmi'n a hria a."

     "Eng maw a hriat?"

     "Kan pahnih chungchâng hi."

     "A ṭhat chu! Midang pawhin an hre har lo turah ngai ang," a lo ti awlsam then a.

     Min kuai dak a, ka hmuiah chuan a rawn fawp a, ka lo chhânglet nghal vat a. Ramnunsanga hi ka ngai a, ka thlahlel hle a ni tih hi haider chi rûal a ni lo. Min tawh hlek ringawt pawha danglamna min thlen thei hi a mak ka ti a, ka tâna mipa dik tak awmchhun a nih ka ringhlel hauh lo bawk.

     "Hetia awmbo reng chu a mawi lovang a! Va ṭhuchhuak leh tawh ila," ka tih chuan a lo nui ringawt a.

     "Saw mite pahnih saw an inngaizâwng em?" Thutak deuh zawk hian a rawn ti sup a.

     "Umm.. eng nge i ngaihdan? Remruata saw Mâmi tân hian a ṭhat i ring em?" ka lo ti a.

     "A sual chu ka ring lem lo. Mahse, tunlâi angah chuan inhriatchian hmasak phawt hi a ṭha asin!"

     "A tisual tawh lo turah ka ngâi, Remruata hi mi pângngai tak a nih ka ring a," ka lo ti leh a.

     A tukah chuan chawhnu lam chhuaka haw chhoh kan tum avangin kan hmanhmawh lem lova, khua a lum em avangin dâr 4:00 chhuakah kal kan tum a, tlemin khua a lo dai deuh tawha kan rin vang a ni.

     Nunsânga chu min thlah hman turin a rawn bâng hmâ a, Remruata a rawn kal bawk a. Diakkawnah daih counter a awm avangin Diakkawn lam pan chuan kan inphur thla a. Nunsânga nen kan inphur a, Remruata'n Mâmi a phur bawk a. Counter kan thlen chuan kal ve tur dang pawh an lo kim tawh a, rei awm khawtlai lovin kan tlanchhuak ta nghal a.

     In ka thlen chuan ka inbual nghal a, chaw ei ka chak lo hle naa ka pa hian chaw ei loh mai mai a phal ṭhin loh avangin tlêm chu ka ei lui hram a. Hruaii a awm bawk a, thleng seng vel pawh ka ring tawp a, ka chauh deuh avang chuan ka mu nghal a.

     Ka muhil ṭan sîar sîar tihah ka phone chu a rawn ri a, Nunsânga a lo ni a.

     "I chau em?"

     "Umm .... chau ve deuh, tlêmin," ka lo ti sap a.

     "Min ngâi em?"

     "Umm.."

     "Umm ringawt maw?"

     "Aih ka ti dawn mi?"

     "Ka ngâi che ti rawh."

     "Naupang chhia viau ṭhin lo teh," ka nui hak a.

     "Nangmah kha alawm naupang chhia chu," a rawn ti sup a. "Min ngai em?" a tih zawm leh zat a.

     "Umm.... Ngai," ka lo ti a.

     "I luhlul kha sim vat la a ṭha ang."

     "Ka luhlul viau pawh ka lo hre hleinem," ka lo tih chuan a thaw hak a.

     "Ka ngâi che, Lalnunpui."

     "Kei pawhin ka ngâi che."

     "Ti kha chuan a zia ta e. Min lo ngâi reng ang che."

     A kum ngaihtuahin a che naupang chhia mah mah ṭhinin ka hria a, ka nuih a tiza ang reng viau a, amah lah chuan keimah zawk hi naupang chhia lutuk min ti reng lehnghal a. An unâu-ah upa ber niin a chhang chiah chu u Peka niin Mâmi'n a dawt a, an naupang ber chu Tête-a a ni thung a. An fel hlawmin an puitling deuh ṭhuau tawh a, Tête-a hian college a la kal mêk a, u Peka erawh chu High school-ah zirtirtu a ni thung a ni.

     Kan inmangṭha hnu chuan ka muhil leh mai thei si lova, ka muthilh mai theih tak si lovah chuan ka tho leh a, inhnuaiah eitur la turin ka chhukthla a. Chaw ka ei tlem êm avang khan ka pum a ruakin a nuam lo ang reng a, thil eng emaw tal ei ila a zia mai ka ring a ni.

     Kan haw chhoh aṭangin kârkhat vel a liam chiah tihah chuan Mâmi chuan phur lutuk tak maiin Remruata'n rawn zin chhoh a tum thu min rawn hrilh a. A ngaihzia ka hrechiang bawk a, ka lo phurpui ve hle a, ka lo sawipui hlut a.

      Remruata a lo chhoh ni chuan zînglama lo chho a nih bakah bike-a rawn chho a ni bawk a, a lo thleng chho hma hle a. A chhûngte in lama a indahfel hnu chuan min rawn bia a,Mâmi te in lama lenpuiah min rawn sâwm a. Kan awmna lâite chu ka han hrilh chawp nawk nawk a, phone-a inbe reng chung chuan a rawn zawng hmu ve mai bawk a.

     Kan inah chuan rei awm lovin Mâmi te in lamah chuan kan inphur phei ta lawp lawp a, kan va thlen chuan Mâmi leh an nula chauh an lo awm a, chawhnu lama dawr nghah ka ngaih avangin ka hawsan leh ta thuai a.

     In ka thlen chuan tlangval lian ṭha ang reng tak mai hi a lo awm a, ka nu nen chuan an lo ti ti mawlh mawlh a. Nidanga inlêng tumah min hmelhriattîr ngai hlei lo kha min lo ko chûl a.

     "Puite, lo kal la, Zâma hi rawn chibai teh," a lo ti chúl a.

     Zâma chu a ṭhutna aṭanga rawn dingchhuakin min rawn chibai a, ka kut chu a hum nghet ṭha hle a, ka mitah tak enin a nui sak a.

     "I nu hian fanu nula a neih thu min hrilh ṭhin a, i hmelṭhat thu erawh chu min lo hrilh tel lo a nih hi!" nui sâng chung chuan a ti a.

     "Ka nu chuan, "Puite, Zâma hi tlangvâl fel deuh a nia, doctor a nih kha. Tikhan lo inkawm ula, ka thil tih laklawh lâi kha ka va chhunzawm lawk ang e," tih leh rooma luh chu a rual a.

     A awmdan teh thut chu mak ka ti rilru hle a, nidangah hetiang hian a la awm ngai miah lo tih ka chiang a, mak ka ti hle a ni ringawt mai a ni.

     Zâra chu ka nu sawi ang chuan tlangvâl fel tak a nih hmel a, a ṭawng duh ve hle a, a ti ti pawh a ngaihnawm viau. Mi vengva leh changkang chin a ni bawk a, a ti ti pawh a changkang hle a ni.

     Dawra kal ka duh tawh avang chuan ka hmanhmawh ru hle a, ka nu lah chu a pil vang vang mai si a, ka va au hreh deuh bawk si a, rilru khingbâi deuhin ka awm reng a.

     Chutia hmanhmawh ru deuha ka awmlâi chuan Zâma chuan chawhnu lama duty a neih thu leh haw nghal mai a duh thu chu a sawi ta hlauh a, ka lo thaw ru huai a.

     Zâma chhuah hnu chuan ka nu chu an room aṭang chuan a rawn chhuak a, min rawn nuih var var a, chu pawh thil thar bawk!

     "Zâma kha chhuah miah lovang che, an chhûngkua an hausa a, amah pawh kha a hmelchhe bawk si lo. A endanah che khan a duh che tih ka hre thei a, chuvangin, ṭha deuhin bia la, i neih theih hlauh chuan a ṭha dawn lutuk!"

     A thusawi chuan ka thin a ṭhâwngin rapthlak ti zetin amah chu ka melh tlawk tlawk a.


LALNUNPUII
Sbk Pachuau

Chapter 5




     Dawra ka awm hnu pawh chuan ka nu thusawi kha ka rilruah a rawn awm leh ṭhin a, eng anga mipa fel leh hmelṭha pawh ni se ka be ṭha hiam thiam lo tih hria se a lawm vakin ka ring lova, ka thinlung hi Ramnunsânga'n a nei tawh tih hre ngat phei se chu a lawm lo lehzual ngei ang le!

     Kan buai deuh avangin kan inkhar har deuh a, in kan thlen chuan khua a thim fel vek tawh a. Ka inbual zawha ka thawmhnaw ka hak mawlh mawlh lâi chuan ka phone chu a rawn ri a, Nunsânga a lo ni a.

     Kan inbe rei hle a, hna lamah a buai em tih ka zawh chuan an buaizia leh an tui pump-na pipe a puah avanga harsatna an tawh te chu a sawi nual a. Chawlhkâr tawpa lo haw  a tum pawh a theih a rin loh thu a sawi chuan min tihnual nghal rawih a.

     Dik tak chuan khang hun liam ta, tleirawl tê kan nih lâi pawh khan ka ngâi êm êm ṭhin a, a hmêl ka hmuh hi chuan ka awm hi a lo nuam ru veng veng ṭhin a. Ka 'unaupa' a nih lâi khan ka ngai veng veng a, ka 'bialpa' anih tak hnu hian ka ngâi ngawih ngawih a, ka ngaihzia hi ka sawichhuak thiam lo hial zawk a ni.

     Puipuii'n chaw ei tura min rawn koh chuan kan inbiakna chu kan titawp ta hram a. Inhnuaia ka chhukthlak chuan ka chhûngte chuan dawhkan an lo kil ṭhap tawh a. Ka nu damlâi kha chuan chhûng inkhawm pângngai hi tlai tin, zanriah ei hma-in kan nei ziah ṭhin a, tunah erawh chuan dawhkan kil tawh hnu-ah ka pa-in ṭawngṭaina a nei a, chu chu kan ring tawh mai ṭhin a ni.

     Chaw ei lâi chuan ka nu chu nidang ang lo takin a ri bawrh bawrh a, a mize dang ta thut chu mak ka lo ti rilru hle a.

     "Puitei pawh hi pasal nei rûal a ni ve tawh a, ngaihzâwng lamte hi ngaihtuah ve tawh se, BA a zir zo ve ta bawk a, nulat rei lutuk pawh hi a ṭha ber lo."

     Ka nu thil rawn sawichhuah avang chuan ka chaw ei chu ka hak ṭhelh a, ka pa chu ka va en vat a, ani chuan ka nu thusawi chu ngaihsak loh hmel deuhin chaw chu a lo ei mawlh mawlh a.

     "Pa-a, ka thil sawi chu eng nge i ngaihdan ni ve rêng rêng? Hmeichhe tân chuan pasal neih tur ṭha tak hmuh lâia neih vat hi a fuh ber i ti ve lo maw?" ka nu bawk chuan a rawn ti leh a.

     "Amah Puitei thu thu a ni mai alawm, neih tur ṭha a hriat te chuan a duh phawt te chuan a rem lohna a awm hleinem," ka pa chuan a rawn ti ve ta a.

     Ka chaw ei tuina chu a reh nghal vek a, ka nu lah chu hlim hmel fahranin a ti ti chhunzawm bawrh bawrh a. Nidanga chaw eilâia naupang ṭawng hlek pawh ngaithei lo ṭhin kha a ni si a, a nungchang inthlak lutuk chuan ka ngaihte pawh a tiṭha lo lek lek zawk a ni.

     Chaw eikhama Hruaii thleng vel ka sengpui mawlh mawlh lâi chuan ka phone chu a rawn ri a, Nunsânga a nih ringin phur fahranin ka la a, kantum loh deuh aw ka hriat takah chuan ka phone chu ka en ṭha leh ngat a, number hlang a lo ni a.

     "Puite, zaninah inah i awm dawn em?"

     A aw aṭang chuan tunge a nih ka hre mai thei lova, ka ngawih deuh reng avang chuan amah bawk chu a rawn ṭawng leh a.

     "Zâma ka nia, i nu-in i number hi min pe a, ka rawn be ve tawp che a nih hi. I pawi ka sawi em lovang chu tiraw!"

     "Aw, a nih tak chu! Ka lo hre mai lo che a, min hrethiam dawn nia," ka lo ti let sep a.

     Ka thinrimna chu ka chhûngrilah a inpáng-aw-inzial tup tup hi a ni ber a, ka hriat loh leh ka phalna la miah lohvin ka la hriatchian hauh loh tlangval hnenah ka number a lo pe ringawt chu ka lawm lo hle a. Ni lo, ka lawm lo satliah nilovin nasa takin ka lawm lo a ni zawk! Ka insûm viau a nih loh chuan a laka ka thinrimna chu ka tilang ngei ang tih pawh ka chiang a ni.

     "Rawn len chu i phal em?"

     "Phal e, i duh chuan lo leng rawh." Mí lo lêng duh lo hnar ngawt thu awm hek lo le!

     Ṭawngkam mawihnâi pawh ka chhakchhuak peih vel lova, hawihhâwm lo min lo ti ru deuh a nih pawhin hria angin a awm bik lem lova, a sual ka ring lem lo naa ka ngainat viau chi erawh a niin ka hre lo thung. Chubakah, ka thinlung hi Ramnunsânga tân ka hlan fel vek tawh a, midang an leng lo hrim hrim bawk.

     Zâma a rawn thlen chuan ka nu chu a lo phur hle a, ka lo kawm vak ngâi lovin a lo be bawrh bawrh a, a tihzia phian ka lo ti mai a. Rei pawh a ṭhut hma chuan emergency a awm avangin an rawn phone ta hlauh a, ka lo thaw huai thung.

    A tukah chuan dawr lamah ka nilêng leh a, tlai lamah chuan Remruata leh Mâmi lêngchhuak chu an rawn lut kawi a, Remruata chuan min chhaih leh zuk zuk ṭhin a.

     "Rawn zinthla leh tawh mai la, khulamah ringawt i rilru a awm tho kha,"  nui var var chung chuan a ti a, ka pa chu kan bul hnaia a awm lâi a nih avang chuan a hriat chu ka lo hlau ru hle a. Chutia ka hlauthawng hmel chu an pahnih chuan min lo nuih a, kei lah chu tlêma lo zah deuh sa nen ka che lai angreng hle a.

     "A lo haw chho thei dawn emaw kan tia,  a thei leh dawn ta si lova, kan ṭap deuh pur lo maw?" Mâmi chuan a rawn ti leh a, ka tihngaihna hre lo chuan ka lo melh nghek ringawt a.

     An kal hnu chuan zan lamah KṬP hlazir a awm avangin kei pawh chu ka haw ve ta nghal a, in ka thlen chuan ka naute pahnih chuan lehkha an lo zir malh malh a. Min hmuh veleh an home-work tih thiam loh thu chu min lo hrilh nghal a, inbual hmasa lo chuan ka tihpui phawt a, ka inbûal ta chauh a.

     Ka pa a la rawn haw bawk si lo nen ka hmanhmawh chuan chaw ka lo eisan a, ka eizawh veleh ka roomah insiam turin ka chho nghal a. Ka tlai tawh deuh avang chuan hmanhmawh takin ka inthlak zung zung a, inhnuaia ka chhuk leh chuan ka lawm vang ni hauh lova ka thinphu tirang thei thil ka zu hmu a.

     Sitting roomah chuan ka nu leh Zâma chu an lo ṭhu a, min lo hmuh chuan an lo nui dun sâwng a.

     "Puite, Zâma hi rawn len a tum a, i chhuah a lo ngai bawk si a, va inthlahtîr hlauh teh," ka nu chuan a lo ti a.

     "Thlah ka ngâi hleinem. Tikhan lo lêng rawh, ka awm loh pawhin in lo inkawm thei tho alawm," ka lo ti vat a.

     "Nangmah vanga lo lêng a nia, keite chu min kawm peih tawp nang mawle! Zâma, va thlah rawh. Puitei hi chu a nungchangte hi a ṭha melh melh lutuk a, inngaihzâwnna lam kawngah phei chuan a la thianghlim khawp a nia. Daihriat engmah a la nei lova, nangman i kaihhruai deuh a ngâi ang," ka nu chuan a lo ti leh zat zat a.

     Engvanga min hmehbel tum tlat nge maw a nih le? Ka thinrim lutuk chu ka khur ru hlawk hlawk a, ka hlauh vang ni hauh lovin thil ṭha lo leh mawi lo a thlen ka hlauh vang zawkin chhâng let lo turin ka insûm hrâm hrâm a.

     "Thil harsa a ni hleinem, ka lo thlah ang che," Zâma chuan a rawn ti ve boh a.

     Chutihlâi tak chuan ka pa pawh a rawn haw a, inchhûng a rawn luh rûal rûal chuan ka nu chuan a lo lawm nghal hiam a, a duhnaah chuan a zei hle a ni tih ka hrechiang ve tawk hle tawh a ni.

     "Pa-a, hei Puitei hlazir tur hi Zâma hian a thlah thei dawn hlauh a, a tihzia tak tak a ni. Tunlâiah hmeichhia mahni chauha chhuah chu a him tawh lo ropui mai si a, thlahtu a nei tur chu ka rilru a hahdam huai mai, nilo se chuan ka ngaihtuah leh nasa mai dawn si a," ka nu in a tih chuan ka thinphû chu rang tak a ni.

     Engtik lâi aṭang khan nge chuti taka min ngaihtuaha ka him leh him lohte a lo lungkham tak ni le! Min ngaihtuah ber niawm fahrana a awm chu ka run hle a, engtiang fakauvin nge min ngaihtuah tih chu ka hre ve chiang khawp mai.

      "Chutia a thlah theih dawnte chuan a ṭha a ni mai alawm! Zâma, helamah i awm tawh dawn em ni?" ka pa-in a lo tih chuan ani pawhin kan doctora chu a lo hre ve tih ka hre mai a.

     Tui lo zetin Zâma chu ka zuichhuak ta a, motora kan chuan hnu pawh chuan ka ṭawng chak loh êm avang chuan ka ngâwi ngal reng a.

     "Ka thlah che chu i lawm vak na nge?" a rawn tih takah chuan nuam lo ka ti ve deuh a.

     "Lawm loh pawh a awm lo. Ka kalna tur a hnai tho a, han inthlah buaitîr che kha ka hreh mai mai mawle," ka lo ti a, ka lungawi lohna ani chunga han tihlan vak pawh chu ni berin ka hre lo a ni.

     Kan hla zirna tur chu a hnai bawk a, kan thleng hma hle a, ka hawihhawmna zawng zawng sâwmkhawmin Zâma chu ṭha takin ka thlah a, ka luhsan ta nghal a. Mâmi chu zawngin ka hawikual a, amah zawk chuan min lo ko vat a, a bulah chuan ka ṭhu ve ta nghal a.

     Hla zir bana pâwna kan chhuah chuan Remruata chu piah deuhah chuan a lo awm váng tawh a, Mâmi chuan mahnia kal tura min kalsan chu duh lovin ke-in kan kal dun . Ka hnial ngial chung pawhin a tum chu a ṭhulh phah chuang eih si lova, ke chuan kan kal dun ta a, Remruata chu amahin a bike chuan a lo va tlan hmasa thung a, Mâmite in kawtah chuan min lo nghak a.

     Kan va thlen chuan kan pathumin Mâmi te inchhûngah chuan kan lut ho ta a, Mâmi pa chuan inlêng a lo nei nûal a, an lo ti ti laih laih hlawm a. Kan va luh ve chuan paho chuan min lo fîam nak nak a, tlangvâl kan luhpui bawk nen min fiam chu nuam an ti hle a, Mâmi nen chuan fiam letin kan nui dar dar a. Remruata ber chu a zak lek lekin ka hria a, choka lamah kan pheipui ta thuai a.

     Mâmi thingpui lum kan inlâi chuan ka phone a rawn ri a, Nunsânga a lo ni a, ka ṭhutna aṭang chuan thovin tukverh bulah kal pheiin ka chhâng a. Kan inbiak mawlh mawlh lâi chuan Mâmi chuan min lo au a.

     "Ka û kha ka pa'n a be ve duh a nia aw," a rawn ti lâng lâng a, ka va ṭhen khum ringawt a.

     "Khawnge i awm a?" Nunsânga chuan a rawn ti a.

     "In inah," ka lo ti sap a.

     "Haw tawh lovin tikhan lo awm tlang tawh mai la," a rawn tih chuan ka lo nui a, ani pawh chu a rawn nui ve hak a.

     Peka lêngchhuak rawn haw chu ka lo ko vat a, min thlah turin ka lo sãwm a.

     "U Pek, min va thlah teh. Chuan, tu emaw tê tê kha ka sawipui dawn che nia," ka tih chuan a khi suk a.

     Kan dawra thawk nula pakhat hi ṭha a ti tlat mai a, amahin hma a la ngam si lova, ka lo biak ang che ka tih lahin a duh bawk si lo, a vei ve tlur mai si a, amah berin sawi a phal leh bawk si lo nen tihdan tur a vâng phian a ni.

      Kawngah chuan ka'n sawipui ngial a, a hmeichhe mi lo nasa mai si a, ka theih ang anga hma lo lakpui ka tum lahin a duh bawk si lova, kan han innuih leh rih ṭhin a.

     Kan in kawtah chuan ka chhuk a, a tuka dawr ka nghah leh dawn avang chuan a school banah lo pêng kawi turin ka ti a, ani pawh chuan lo remti ve-in kan inmangṭha ta nghal a.

     Kan dawr chu kan cheiṭhat avangin kan hnawk rum mai a, rawngte hnawih ṭha-in thawmhnaw khaina tur chhuarte chu kan siamṭha bawk a, kârkhat chhûng chu kan hnawk neih nuaih mai a. Kan mistiri chhawr a fuh hlauh a, nalh leh ṭha takin kârkhat chhûngin min zawhfelsak thei a, kan han zawhfel takah chuan thawmhnaw rem ṭhatna atân nihnih nilêng chu kan hmang leh bawk a. Kan inremfel zawh meuh chuan dawr pawh a lang tharlam a, thawmhnaw pawh a lang nalh hlawm zualin a hriat a.

     Zâma chu a hun neih remchan apîangin a rawn lêng a, min kawm duha rawn lêng ta chu lo biak loh ngawt thu a awm si lova, tui lo ru ṭeuh chung chuan ṭha takin ka lo kawm ve zel a. A lo len tawh hi chuan ka nu hi a phur thei êm êm a, a kâ pawh zen ila min seh lovang tihtur hian a awm reng mai zel a, a châng chuan a lo ti teh huam lutuk ziah chu ka lo zak ru deuh ṭhin a ni.

     Nunsânga chu an hna lama an buai chhoh tak zel avang chuan a duh hunah a rawn haw mai thei ta lova, ka ngaiin a bula awma ami duatnate han dawn leh ka chák a. A bula thlamûang taka awma a âwm nghenga bei lehte ka chák a, a hmui fawh nuam tak maia min fawhte kha ka thlahlel êm êm reng mai a ni.

     Kan result chhuah pawh a hnai ve tial tial a, ka huphurh tulh tulh thung a. Nu Sawmi  boral khan ka rilru a la pêng nasa a, lehkha zirna hunṭha angah khan a boral kha a ni a, kan zir tlem hle reng a ni. Chuvang chuan result ṭha chu ka beisei lutuk lem lo a, ka fail erawh ka ring hran lo a ni.

     U Peka pawh kan dawrah a rawn kal ve ta zauh zauh a, tlêm chuan hma a sawn ve hret hret zel a. Nuni pawhin a lo duh ve tho avang chuan thil chu a fuh chho ṭan hle a, phone number te inpe-in an inbe ve ta deuh reng a, u Peka pawh a hlim ta var var hle a ni.

     Kan result a chhuah nî chuan Mâmi nen marksheet la turin kan kal a, kan rinâi takin kan pass ṭha a. Mâmi chu second-ah pass-in kei chu ka beisei ngam chiah loh First-ah ka pass thung a, ka lawm haw dun hle a. Mâmi pawh exam lâia a boruak tawn ngaihtuah chuan a tiṭha vîau a, amah pawh a hlim hle a ni.

     Zanah chuan ṭul ka ti lo chung Zâma chuan pass lawmna tiin eng eng emaw a rawn lei ṭeuh mai a, Puipuii leh Vâltea lawmah a tla a, an thiar nghauh nghauh mai a. Ka nu pawh a phur berah ṭang lehin Zâma chu a fak pah reng bawk a, Zâma eitur rawn kente chu chhawpin ka pass chu lawm ta ber ang ziazângin a che zung zung bawk a. Ka laka a mize dik tak hre lo tân chuan a landan maiah chuan nuhrawn fel lutuk ani ringawt mai ani.

     Nunsânga chu office lamah an buai deuh avangin ka result ka zu hrilh tih loh chu kan la inbe mumal leh ta miah lova, zantir lamah khan a message pahnih khat chu ka dawng leh a, chubak chu a la reh ta vang vang a. A hnaah a buai bawk si a, a chau deuh anga a muhil ta a nih ka ring ta deuh a.

     Ka nâute mut hnu chuan intizei fahranin ka nu chuan ka pa chu mutpuiah a sâwm a, an mu ve nghal daih a, Zâma nen chauh chuan kan ṭhu ta ran a.

     Ka bula a rawn insawn chuan lo thawhsan daih mai hi ka duh a, mahse, ni bik emin ka hre si lo, bet lo tak chuan ka ṭhu ve ta reng a.

     "Puite, ka awmdan aṭang hian ka duhzia che chu i hre vekin ka ring a, i rilru min hrilh ve la ka ti ngawt mai," ka kuta rawn vawn pah chuan a ti a.

     "U Zám, nangni angte chuan kei aia ṭha i hmu ṭeuh ang chu! Kei chu ngaihzawng neih pawh ka thiam lo, tihian ṭhian anga inkawm hi a nuam alawm," ka kut a vawn chu laksawn pahin ka lo ti a.

     "Ṭhian ang chauhin maw min lo en? Kei chuan ka duh che a, nupuia neih atân hîal asin ka lo duh che!"

     "A pawi ka ti khawp mai. Mahse, ṭhian ang bak chuan ka en thei tlat lo che a ni, min hrethiam mai rawh."

     "Ka nawr lutuk che a nih chuan ka nghak thei reng che a nia!"

     "Aih, ni lo, chutiang a ni lo. Nghahchhuah tur ka awmin ka ring lova, chuvangin, kei aia ṭha midang zawng zawk rawh," ka ti ta khawl a.

     Pehhel deuha thil sawia beiseina siamsak âi chuan tlang taka thil sawi mai chu ṭha ka ti a, hawihhâwm lo min ti a nih pawhin pawi ka ti hauh lo. A chhan chu, ka rilru dik tak ka hriattîr kha a ngâi mîau si a ni.

     A haw hnu chuan mu turin ka insîam nghal vat a, ka ṭawngṭai lâi chuan ka phone chu a lo ri a, ka ṭawngṭai zawh hma-in a tawp leh hman a. Ka ṭawngṭai zawh chuan tunge rawn calltu chu ka en a, Nunsânga a ni tih ka hriat chuan call let tumin ka hmet dawn a, a rawn call nawn leh chiah a.

     "Hello..."

     "I mu tawh em ni?"

     "Ka mu dâwn chiah a."

     "Min ngâi em?" a rawn ti sup a.

     "Ummm.... ngâi lutuk!" uar zetin ka lo ti a.

     "Ka bula awm i chák em?"

     "Lutuk tlat!"

     "A nih chuan in inkawtah lo chhuak la," a rawn tih chuan ka ṭhu ngil zawt a.

     "Eng nge i sawi awmzia?" ka ti hliai a.

     "Ka bula i awm chák chuan pawnah lo chhuak rawh ka ti a nih chu!" a rawn ti thawp sut a, khum aṭang chuan ka chhukthla nghal a.

     Inhnuaiah chuan thawm dim tawkin ka chhuk a, kawngkâ chu dimtê-in ka hawng a, pâwnah chuan ka chhuak ta a.  Amah ka hmuh mai loh avang chuan ka hawi kûal a, ka la hmuh mai loh avang chuan min tihder a nih ka ring hman hîal a.

     Let leh mai tuma ka inher chiah chuan kan garage piah aṭanga a rawn penchhuak chu ka va hmu a, ka pan nghal vat a. A bul ka thlen rual chuan ka bânah pawtin min kuahbet nghal thlawp a.



(Ka tlai deuh avangin ka dah thui deuh a nia aw...tlai vanga bonus a nih chu..hahaa)


LALNUNPUII
Sbk Pachuau

Chapter 6



     A âwmah chuan beiin a lungphu ri dat dat chu ka ngâithla a, ka tum loh leh beisei loh lutuka ka hmu thut chu ka mumang a nih maite pawh ka hlau ru hîal a. Ka ngaih êm êm láia ka hmu chu lawm avangin ka lung a chhe hîal zawk a, ka hnuk chu a ulh ru ṭeuh mai a ni.

     Dimtê-in ka khabe-ah chuan a rawn dawm kang a, a mitmeng de sar sara min en vang vang hnu chuan muang dam raihin min rawn fawp ta a, ka lo chhânglet thuai a.

     "Engtikah nge i rawn chhoh a?" tiin ka zawt a.

     "Zaninah, thim hnu-in ka rawn chho."

     "I lo chho thei dawn lo emaw ka lo tia!"

     "Kuah leh che ka chak a, he i hmui fawh nuam lutuk hi ka ngai a, ka fawp leh chak bawk a ni. Tlaiah haw lovin ka hna khawihlâi ka chhunzawm a, ka zawhfel veleh inah ka haw a, ka insiam sawk sawk a, ka lo chho nghal a nih hi."

     Min rawn fawp leh a, tun ṭum chu a duhthawh tak zet! Uar leh duhthawh zetin kan infawp tawn tawn a, kan ka chhûngah chuan kan lei a insual bat bat a, a lehpek awm leh thei tawh chuang lo tur khawpa nasa leh uarin a ni kan infawh ni!

     Kan thawlak a mumal lo dun sawt hle a, Nunsânga awmdanah chuan insumtheihna a hloh telh telh tih a hriat a, ka kawr chhana ka hnute a rawn ṭham takah chuan ka rumchhuak hak a, garage bangah chuan min nawrbetin duhthawh zeta min fawp pah reng chung chuan ka hnute chu a ṭham tawn tawn a.

     Ka kawr chhana min khawih chu duhkhawp lovin ka kawr chhûngah chuan a kut chu a rawn zen lut a, kan taksa lawng a insik takah chuan keimahah danglamna nasa lutuk, tunhmaa ka la hriat ngai rêng rêng loh chu a rawn awm a, ka ṭek chhuai chhuai ni berin ka hria a. Chutia ka taksaa danglamna rawn thleng chuan ngaihtuahna fîm min neihtîr thei lova, duhbelhna leh hriatbelh zel chákna min neihtîr a ni.

     Ka kawr hlima ka hnute fawh tuma a kunhniam chiah chuan ka harhchhuak zawk a. Tunah hian ka dang lo a nih chuan a hnu leha thil thleng tur chu ka dang zo hauh lovang tih ka ngaihtuahna-ah a rawn lut nghal a, ka kawr a hlim chhoh chu pawtthla-in a bek tawn tawnah chuan ka vuan ta ringawt a.

     A mitmeng de sar sara min rawn enin a dingchhuak nghal a, inthunun tumin  vawithum vel thawk a han la hawk hawk a, ka chalah chuan rawn fawp zeuhin a âwm nghengin min pawmbet a, nghet takin min kuah zui nghal a. Kan thaw chu a la pângngai lo dun hle a, kan lungphû chu a inrawn tluk tluk bawk a.

     Tlema kan pângngai deuh thleng chuan kan inkuah a, atu ve ve mah chuan ṭawng kan tum lem lova, ngâwi reng chuan kan inkuah dun a.

     "Naktukah eng nge i tih ang?" Rei fê ngâwi renga kan awm hnu chuan a rawn tichhuak sup a.

     "Dawr lamah ka awm leh ang."

     "Chawhnu lamah hunthâwl i lo insiam thei ang em? Lenchhuahpui che ka duh dâwn a."

     "Aw le, ka lo tum dâwn nia."

     Ka hmuiah chuan a rawn fawp leh vang vang a, muangchânga min kuahna chu phelhin chiang zetin ka mitah chuan min en a.

     "Lut tawh rawh, i chhûngte an lo harh palh ang e! Chuan, min lo ngâi la, min lo ngaihtuah reng ang che,"  a ti sup a, aw-kaa chhâng lovin ka lû chu ka lo bu nghat a.th

     "Muttui," a ti leh sap a.

     "Muttui le," tiin ka lo chháng a, inchhûng lam pan chuan ka pen ta nghal a.

     Pen tam pawh ka la pen hman lo tihah chuan ka bânah rawn manbetin ka kawngah chuan a rawn kuah zui zat a, ka hmuiah chuan a rawn fawp nghal bawk a.

     Min thlah leh hnu chuan ka beng bulah a rawn phun sup a, "Kal vat rawh le, a nih loh chuan ..... " sawi zawm lovin a ngâwi daih a.

     Inchhûng ka luh dâwn chuan ka hawilet a, a dinna ngaia la ding reng chung chuan min lo la thlir reng a, ka bân chu vai zauhin ka luhsan ta a. Khuma ka mut fel hnu chuan a bike chu a tinung ta chauh a, a tlan liam ri chu ka ngaithla vang vang a.

     A tukah chuan chawhnu lama chhuah kan tum thu chu ka pa ka hrilh a, Nunsânga nena chhuahdun kan tumthu pawh chu ka hrilh tlang vek a. Ani chuan ka nuṭa ang maia a ngaih avangin ngaihngam takin a remti mai a, nuṭa angin ka lenpui dawn lo tih hria se engtin nge a ngaih ang tih erawh ka ngaihtuah thiam pha hauh lo thung.

     Chhunah chuan ka nu leh Zâma an rawn inzui lut a, ka chhuah tur thu ka sawi chuan ka nu chu a lo inrawlh leh vat pek a.

     "Zâma a hman tho a, i chhuahna turah chuan inhruaitîr mai la, in lêng kual pah thei dawn alawm. I tawm leh lutuk a, han lenchhuah ve deuh te hi a ṭha a nia. Khawnge in kal dawn rêng rêng a?" ka nu chuan a rawn ti a.

     "U Nunsânga'n min lo hrûai dâwn a, khawiah nge kan kal dâwn tih pawh ka la hre bik lo," ka lo ti vat a.

     Nunsânga a rawn thlen chuan ka pa nen an inbe lûam a, Zâma te an la awm avang chuan ka ṭawng chak vak lo nen ka lo ṭhu ngâwi reng thung a.

     Kan chhuak tur chu ka nu chuan min au zui a, "Puite, rawn haw hma deuh i tum dâwn nia aw. I nâute hian an zirlâi hi nangma enpui kher an duh ṭhin bawk sia, rawn tlai lutuk lo la a ṭha ang," a rawn ti a.

     A hma lawkin duh tawka lêngkûal turin min hrilh a, tunah lem haw hma turin min ti leh lawi a. Ka laka a ṭha ta thut kha a pianthar leh inhmuhchhuah vang a ni hauh lo tih ka chiang lehzual a, tunah hian Zâma nena inzuichhuak zawk ni ila chuan haw hma tura min chah ka ring hauh lo bawk.

     Kan kal ta chu kan ṭawng tam lo dun kher mai! Ngâwi rengin kan inphur a, Kulikawn lamah tlanin Sâikhamakawn lamah a tlan zêl a, kan kalna tur hmun a sawi lova, ka zawt bik bawk hek lo. Ngâwi rengin a hnungah chuan ka ṭhu tawp a. Mêl 5 kan thlen chuan Hlimen lamah a pêng ta a, Hlimenah tlan lutin Lalsavunga Park-ah min kalpui a lo ni a. A hmun chu a nuamin a thengthaw ṭha vîau a, han len khawthawnna atâna hmun nuam tak a lo ni a.

     A indahfel hnu chuan ngâwi rengin a kal nghal daih a, a awmdan makti ru deuh chung chuan a hnungah chuan ka zui ve ta ngawt a. Piah deuha thingkung lo ding buk laih hnuaiah chuan dingin a kekawr ipte zen chung chuan hla tak thlir niawm takin ral lehlam daih chu a melh a, ngâwi rengin a bulah chuan ka va ding ve a.

     "Kha pa kha tunge?" A ṭawng chu a bung ṭha hle a.

     "Tu kha pa maw?" ka lo ti hâ a.

     "Dawra lo awm ve kha..."

     "Zâma a nih kha, ka nu ṭhianpa a nia."

     "I nu ṭhianpa a ni satliah nge thil dang zawk? A mitmenga nangmah a duhna che kha a thup thei lo chu a nih kha!" Ka lam rawn hawi pah chuan a ti leh hmuk a, a mit chu a thinur vang nge ni a de sar sar a, a meng rum hle bawk a.

     "Thildang engmah a awm lo. Min lo duh a nih pawhin keiin ka duh ve loh phawtte chuan eng nge pawi?" ka lo ti let khauh a.

     Ka dara rawn vawn pah chuan a rawn kun hniam a, "Ka sawi kha i la hrerengin ka ring, ka thil neih midangin min ṭawmpui ka duh hauh lo a nia!" A aw chu a ring lo naa a thil sawi chu a fiah ṭha hle thung.

     A awmdan chuan min ti chi-ai a, ka hlau deuh bawk nen engmah pawh ka sawi thei lova. Chhûngrilah chuan ka khur ru deuh dar dar a, ka ṭahte chu a chhuak ut ut a, ka mittui rawn tla tur chu duh lovin khap sawk pah chuan hmundang chu ka hawi ta daih a.

     Ka khabe-ah chuan rawn vuanin amah en thei turin a lam hawiin min kuai dak a, ka mittui a hmuh ka duh loh avangin ka mit chu ka chhîng tlat a. Min en reng tih pawh ka hria a, ka la meng duh chuang lova.

     "Min en teh," a rawn tih sup pawh chuan ka la meng duh chuang lova, ka mita mittui tling pam chung chuan a mithmuhah ka meng thei lo a ni.

     Ka men duh tak loh avang nge ni a thaw hawk chu ka hria a, ka hmuiah rawn fawpin ka biangah a rawn fawp leh a, chutah ka mitah chuan a rawn fawp leh zauh a. Chutianga duat hmel taka min han fawpkual vel chuan ka rilru no kaichhuakin dan zawh loha tam ka mittui chu a rawn baw ta zawih a, ka mittui tla a hmu chiah chu nghet lutukin a âwmah chuan min kuahbet thlawp a.

     "Ka tihpalh, Bawihte! Ka thin a rim tak tak lo a nia, chán che ka hlauh êm avangin kha pa melhdan che ka hmuh khan ka hlauthawng êm a ni. Khawngaihin ṭap tawh suh!"

     Zaidam taka min biakna chuan ka lung a tichhe zual sauh a, ka ṭahchhuah loh nan ka hmui chu ka pet fan fan a, ka mittui chuan a t-shirt âwm vel chu a luanhuh hluam tawh a.

     A bandana ah chu phawrhin ka mittui la châmbâng chu min hruksak a, a hruk zawh chuan ka kut chu lakangin a fawp vang vang a.

     "Khatiang khan thinrim deuhin awm tawh suh! I thinrima ka hlauh theihzia che chu i hriat vek kha," pangchang deuh chuan ka ti sep a.

     A thin hi a rim khat vîau a, a thinrim tawh vék vék erawh chuan thlem mai mai theih a ni ngai lo tih kan naupan lai aṭang khan ka hrechiang lutuk tlat a. High school kan luh ṭantirh lâi khan kan class ami pakhat hian min tibuai reng ṭhin a, mídang bulah inngâizawng ang tein min lo sawi a. Ka hlauvin ka ngei thei êm êm a, engtin mah kan ti ngam ngai si lova, kan bulahte hian a lo kal a, min kuah thuak thuak zel a. Ṭumkhat phei chu ka ning lutuk tihngaihna hre si lo chu ka ṭap tawp nghe nghe a, a hlau lo zawk Mâmi chuan a han hau ve ngial naa awmzia a awm lo hle thung a.

     Chung thil vel chu Mâmi chuan Nunsânga chu a lo hrilh a, chuta Nunsânga thinrim chu keimah min chhan vang a ni tih hre reng chungin ka hlau êm êm a, min tibuaitupa a sawisak lâite chuan ka hlau lutuk chu ka lo khur hlawk hlawk a, a tawpah phei chuan ka ṭap ta ringawt a. Chu thil chu kan nulat hnu thlengin Nunsânga chuan min chhaihnan a hmang ṭhin a, keimah min chhan vanga khatia awm na na na ka lo hlau tlat mai kha a nuih a za hle a ni.

     "A pawi ka ti! Ka inthunun thei lo atin ni. Ka sawi tawh kha, mipa dangin an ngaihmelh che leh mipa dang bula i ṭhu hi ka hmu thei lo tak zet a ni."

     Kei pawhin hmeichhe dang bula a awm chu hmuh nuam ka ti vak bik dawn lo tih chu ka hrechiang a, Kimkimi nena an inzui lâi pawh khan ka thik ṭhin hle a, a rukin ka lo na ve ngawt ngawt zel kha a ni a. Tunah pawh hian ka la thik rengin ka hria a, khatih hun laia ka natna kha a la reh fel lovin ka hre hîal a ni.

     Ka kawngah chuan rawn kuahin amah ngheng tur chuan min pawt hnai a, a darah chuan ka lû chu nghatin ral lehlam chu kan thlir dun vang vang a.

     "Zir zawm zel i tum em?" kan ngawih vang vang hnu chuan a rawn tichhuak sup a.

     "Ummm... ka duhdan chu a nia. Ka pa pawhin zirzawm zel tur chuan min duh a," ka lo ti sap a.

     "Ka nupui ni chungin zir zawm mai la," a rawn tih leh chuan ka thinphû chu a rawn rang hle a, chhan mai dan tur pawh ka hre lova.

     "Min nei tawh mai la," a ti leh sup a, min kuah nghet sauh bawk a.

     "A la hma mah mah lo maw? Thlakhat vel chiah kan la inngâizâwng a, a la hun lo ka ti deuh," ka lo ti niah niah a.

     "Kei chuan i tleirawl chhuah tirh aṭang khan ka ngâizâwng daih tawh che, ka nghak rei tawh mah mah che-in ka hria, rei tak chu ka nghak thei tawh dawn hauh lo a nia."

     "Kei min ngâizâwng chungin bialnu i nei tihna maw! Kimkimi nen in inngaihzawn reng kha," ka lo ti vat a.

     "Ngaihzâwng i neih avangin ka rilru lakpen nan ka nei ve a nih kha! Ka bîalnu hûal berin ngaihzâwng min neihsan takah kha chuan awmdan tur ṭha ber nia ka hriat angin ka awm ve mai chauh a ni." A aw-ah chuan lungawi lohna a ri tel a.

     "Ih .... englo .... Engmah i sawi ngai si lova, i awmdanah hriatthiam tur a awm ngai bawk si lova!" ka lo ti niah niah a.

     "Hriatthiam tur chuan kanawm a, i hrethiam lo thung alawm. Ngaihzâwng i nei tih ka hriattirh khan engkim hrilh chea ka taa siam che kha ka tum a. Mahse, rilru fîm zawka ka ngaihtuah hnu-in i duh taka i ngaihzawn nena in inkâra rawn tlakzeh chu ka duh ta lova, i duh taka i ngaihzawn lak aṭanga lo lakpen che chu ka tum buai duh ta lo a ni."

     "Farnu en bakin min en lo niin ka hria a, Kimkimi nen in inzui reng bawk si a, i laka ka rilru putdan a danglam theih nana ngaizâwng mai chauh ka ni."

     "Kan inngâizâwng emaw in tihlâi khan kan la inngâizâwng lo, kha pa nena in inzui takah khan ka rilru lakpenna atân ka kawp ve ta chauh zawk a ni. Kha mihringpa ka lo chetkhalh lo ka inchhirzia kha i hrethiam pha lovang!"

     James kha ka duh êm êm vanga kawp ka ni lova, Nunsânga kha ka vei ngawih ngawih mai si a, ani lah khan farnu ang chauhin min en ni khan ka hre bawk a. James-a khan min hel nasa hle a,amah a lo felin a hmelte a chhe lem lo bawk a, Nunsânga ka vei lutuk a ziaawm beiseia chhâng ve ta ngawt kha ka ni a. Ka duh êm êm loh bakah ka rilru ka pek theih tak ngang si lovah chuan thla thum hnu lekah kan inṭhen leh ta mai reng a ni.

     Ka hmuia a rawn fawh takah chuan ka ngaihtuahna aṭanga kirin a nghawnga kuahin ka lo chhânglet ve a, min fawh hian nuam ka ti a, engtikah mah ka kham theih ka ring lo a ni.

     Kan let leh chuan khua chu a lo tlai tawh angreng hle a, reilote emaw kan tih chhûng khan hun kha a lo kal duak ni maiin ka hria a. Kan inkawtah chuan reilote kan dingdun leh a, zana lo len a tum thu a sawi hnu chuan inchhûnga rawn lut ve lovin a tlan haw ta nghal a.

     Inchhûnga ka luh chuan ka roomah tlang chho nghalin ka inbual nghal a,ka inthlak zawh chuan Hruaii rawngbawl ka enpui leh phawt a, ka naute chu kovin home-work an ti tawh em tih ka zawt a, an lo la tih loh avang chuan ka tihpui ta nghal a.

     Chutia ka nâute home-work ka lo tihpui mawlh mawlh lâi chuan ka nu chuan an rooma kal lawk tur chuan min rawn au a, ka va luh chuan thawmhnaw a lo remṭha mawlh mawlh a.

     "Zâma hian a duh che a, ṭha deuhin lo kawm la, nangma tân pawh a ṭha ber ang," min hmuh veleh chuan a lo ti nghal tâwng a.

     "Pawi ka ti, mahse, ka ngaihzawn chi a ni lo tlat! Amah chu a fel ang tih pawh ka hria a, a hmel pawh a chhe lova, kei aia ṭha a hmu ṭeuh ang chu!" Ka lo ti hmak a.

     "I tâna ṭha tur ka ngaihtuah vang zawk a nih chu! Lo inngaihtuah ṭha leh la, i pa pawh ka sawipui vek tawh a, ani pawhin ṭha a tih khawp kha," a ti leh zat zat a.

      Ka lawm lo hle a, ka duhzâwng thlang turin zalenna ka nei ve a, chu lehzel pawh min dan a tum a nih chuan a tisual khawp ang! Kei aia upa zawk a nih vang chauhin ngawih ka chuh zel a, ka duh lo chung min nawrluih a tum a nih chuan kei aia upa a ni tih ka theihnghilh hun a la thleng ngei ang.

LALNUNPUII
Sbk Pachuau


Chapter 7




     Zana Nunsânga a rawn thlen chuan chaw kan eikham fel deuh chiah a, ka pa nen hian an ti ti a rual ṭhin bawk a, a lo thlen rual rual chuan ka pa chuan a lo chiau-au vat a. Ka nu nen erawh hi chuan an in-chu-e-kha viau lova, ka naupan deuh lâi zawnga ka chunga a awmdan avangte khan Nunsânga te unau hian an ngai thei vak lova, kan ina an rawn kal châng pawh hian an be vak ngai lo a ni.

     Ka nâute lehkha zir ka enpui chhûng chuan ka pa nen an lo ti ti a, ka nu erawh room lamah a awm thung a. Nunsânga a rawn len avang chuan ka nâute chu zandang aiin ka duhtawk hmapui a, an lawmah a tla a, an indahfel sawk sawk a, mu turin an kal ta nghal a. Thingpui chu lumin ka châwi phei a, dawhkanah chuan dahin ka pa bulah chuan ka ṭhu ve a, an la ti ti tui êm avang chuan ngâwi rengin thingpui in pah chuan an thil sawi chu ka lo ngaithla a.

     Ka pa mu tura a kal hnu chuan Nunsânga chu ka bulah a rawn insawn phei nghal vut a, insi riala ṭhudunin kan kut chu kan invawnsak a.

     "Inneih vat chu ka duh! Ka hrechiang che a, min hrechiang bawk a, a tawk viau! Inzui rei leh rei loh a pawimawh ber lo," ka kut hmer deuh salh pah chuan a ti a. "Kumin chu ka nu boral kum a nih avangin a la rem rih lovang a, kumthar veleha innei turin i pa pawh biak ka duh a ni," a tih zawm leh nghal zat a.

     "Englo ... ih ... Zirzawm leh chu ka duh deuh a."

     "Kha kha chu buaina a tling lo. Kan inneih hnuah pawh i zirzawm thei ang ka tih kha."

     Duhthawh takin min rawn fawp zui a, hetiang khawpa mi tiphur thei mipa hi an la awm lova, an awm leh thei tawh pawhin ka ring hek lo. Engtik lâi pawhin ka lo dawngsawng ṭha êm êm zel a, kham tik lah ka nei hek lo. Infawh mai piahlam thlen chák viau ṭhin mah ila kan la insûm thei zel a, invêng rana kan awm a nih loh chuan kan inhiptawnna nasa lutuk avang hian insum theih loh hun kan la nei mai ang tih pawh hlauhawm tak a ni.

     A haw dawn chuan pâwnah kan ding dun leh ren rawn a, min fawp leh vang vang phawt a, ka beng bulah chuan a rawn phun sup a.

     "Ka kham thei lo che!"

     "Kei pawhin," ka lo ti rilru vat a, sawichhuak lovin ka lo nui sak thung a.

     A tlanliam hnu pawh chuan lut mai lovin ka la ding vang vang a, ka ngai nghal veng veng a. Ni lo, ka ngai reng zawk a ni, engtik lâi pawhin.

     A chhuk thlak leh hma chu theih anga tam kan awmdun a, chhunah pawh kan dawrah a rawn awm ve mai a, nihnih lek châm tur a nih avang chuan kan hun neih chu kan am dun hle a ni. A chhuk hma chawlhnî chuan inkhawm banah an inah min hruai a, nidanga tlangnêl taka ka lut ṭhin ang kha a ni ta lova, ka inkiltawih ru riau a. Mâmi lah chuan chutia ka han zak thar deuh chu min nuih min nuih a, Peka pawh chuan a hrethiam deuh nge ni min nuih leh tut tut ṭhin a.

     Nunsânga roomah chuan Mâmi te nen kan awm a, rei pawh kan la awm hmain Mâmi chuan eitur siam chhuanlamin min chhuahsan ta daih a, kan pahnih chauh chuan kan awmdun ta ran a. Chutia kan pahnih chauha kan awm takah chuan hun a khawhral lo chiang hle a, ka bulah ṭhu-in min kuah a, min fawp nghal bawk a. A rooma kan awm chhûng zawng chu kan hmui a insi deuh reng a ni ber a, duh aia thui thlen hlauhna avanga kan chawl leh det ṭhin tih loh chu kan infawp deuh reng a ni mai a.

     Tlaia min thlah chuan reilote tal lut ve tura ka sawm avangin kan pahnih chuan kan lut dun a, inchhûnga lo awmte ka hmuh chuan ka hlimna neih mêk chu a chanve a bo nghalin ka hria a ni.

     "Puite, i va rei ve! Nidangah hetiang êm êmin i rei ngai si lova, ka lo ngaihtuah hman lutuk che alawm!" ka nu chuan a lo ti hluai a, Nunsânga thaw hawk ri ka hre zui zat bawk a, kei pawhin min ngaihtuah tak tak vanga chu thil chu sawi a ni lo tih chu za-ah za-in ka chiang a ni.

     Nunsânga chu chhuah leh nghal mai tuma lo lut kha a ni a, chhuak leh ta mai lo chuan a ṭhu ve ta reng a, kei pawh chuan ka mitmeiin haw lo tur chuan ka lo hrilh a, chumi a hriatthiam avanga haw leh mai tum ta lovah chuan ka ngai mai a.

     Ka nu chu a ṭawng duh barh barh hle naa Nunsânga chu vawikhatmah a be lova, Zâma hlir chu a bia a, ka run êm avang chuan Nunsânga ngawt chu ka be ve hmak a. Min biaka ka chhâng zauh tih loh chu Zâma chu a hranpa takin ka be miah lova, ka nu runluih ka chák êm avang chuan ka ngâipawimawh lo lui ve tlat a ni.

     Ka pa lo haw chuan kan boruak a rawn tidanglam ta hlauh a, kohhran committee-ah a tel ve a, biak in sak ṭhatdan tur vel an rêl a, chawhnu inkhawm bana an ṭhukhawm chu an rawn bang chiah a lo ni a. Kan boruak hre ve ta lem lo chu a rawn ṭawng hlut a, boruak ṭang ru ṭeuh pawh chu a tizia ta phian a ni.

     Ka pa a rawn haw takah chuan Zâma chuan haw mai chu a tum ta a, ka nu chuan la haw lo turin a ti ngial naa a haw ta tho a, a chhuah dawn chuan a mâwiah tak meuh meuh kawngka bul aṭangin ka va 'chaw eitui' ve hram a.

     Zâma haw tak hnu chuan Nunsânga pawh chuan haw a tum ve ta nghal a, ka pa-in chaw ei ve mai tura a sawm chuan lo hnialin zan lama lo len leh a tumthu chu a sawi nghal a.

     Zan inkhawm ban hnu chuan an in lama pêng kawi lovin kan in lamah kan tlang nghal a, kan luh hnu lawkah ka pa pawh chu a rawn lut ve nghal a. Ka nu erawh chu chawlhni chawhmaa a inkhawm hi a duhtawk hle a, zan lam phei chu vawikhat mah a inkhawm ka la hre lo a ni.

     A tuk maia a chhukthlak tawh dawn avangin zan hun chu kan am dun hle a, ka chhûngte an mutreh hnu chuan ka rooma chhoh a tih tlat avangin kawngkapui chu chhûnglamah kalhin kan chho ta a. Ka room kan lut chiah chu kawngka kalhin ka khumah chuan min kuahthlu nghal a, ka lo invêng deuh ṭung leh hlauthawng hmel a hmuh chuan a thaw hak a.

     "Hlauthawng suh, i duh chin bak ka pel lovang tih ka tiam a che. I duh lo chung nawrluih che ka tum lo, a ṭul chinah chuan ka insûm thei tih i hriat kha. Min ring la, inthlahdul rawh le," ka mitah tak en chung chuan a ti a.

     Ani chu ka ring lutuk tlat! Keimah zawk hi ka inring zo lova, ka insûm zo lovin nakina ka la inchhirna tur thil ka ti ang tih chu ka hlau ber zawk a ni.

     Ka khumah chuan inkuah rialin kan mudun a, zawitê tê-in kan ṭawng sep sep a, a khât tawkin duhthawh takin kan infawp leh ngawih ngawih ṭhin a. A tiam ang chiahin tawp hun a hria a, kan thawk a mumal loh deuh chuan amah a inlahrang hmasa zel a, a aia thui thlen chu chak dun vîau mah ila thilṭha a ni lo tih kan hrechiang dun a, kan insûm mai chauh zawk a ni.

      Zanlâi pelh hretah chuan kan inthlah thei ta hram a, zingkâra inkhalhchhuak tur a ni a, office hun nang hman tura chhuk tur a nih avang chuan han chawlh khawmuan hman a ni dawn si lova, kawnga a mut a chhuah lutuk loh nan darkâr li tal mu se ka tih vangin ka haw luihtir a ni ber a. Ani chuan haw lova riah nghal a tum a, kan awmdun chuan kan muhil dawn lo ve ve tih ka hriatchian avang chuan a riah chu ka remti lo bur a. Darkâr reilote tal a muthilh loh chuan kawngah tawhsual a tawk palh thei a, chu chu ngaingam lovin tlem tal muhil tur chuan kan intîr haw ta hram a ni.

      A tuk nilêng chuan dawr lamah ka buai a, thawmhnaw lo thleng thar kan neih avangin remfel leh tarchhuah tur nen ka buaipui nilëng a, ka lunglêng lutuk tur pawh a tiziaawm phian a, zanah erawh ka ngai lutuk chu kan inbiaklâi chuan ka lo ṭahkhum lo chauh chu a ni e.

     Mâmi leh Remruata pawh chu an lung a lêng ve thei hle a, Remruata lunglêng chuan min rawn be ve fova, hnem thiam lem lo mah ila a awmdan tur awm chu ka hrethiam êm êm a, ka awmdan ve tho a nih avangin kan ti ti a rûal a, kan inpawh phah sawt bawk a ni.

      M.A zir leh tur chuan Mizoram University-ah Mâmi nen chuan admission kan zuk tifel ta a, class ṭan hma chuan dawr lamah ka la kal nitin a. Chutih mêk lâiin  Zâma chu a rawn lêng zing tial tial emaw tih mai tur a ni a, a hunawl neihdan azirin dawrah nen a rawn lang reng a, zanlama a duty loh zan apiangin a rawn lêng bawk a. Amah hi a sual lem lova, a ṭawng duhin kawm a nuam angreng viau roh a. Ka chungah mawi lo taka han chet emaw ṭawngkam han thlahdah êm êm a neih lem loh avangin kei pawhin ṭha ka kawm ve bawrh bawrh a, ṭhian ang baka ka en theih loh thu pawh chiang takin ka hrilh tlang vek a, ani pawhin min nawrluih a tum bik lem lo.

     Class kan kal ṭha tluang zel a, ka pa-in B.A ka pass khân scooty min leisak a, chu chu class kal nan ka hmang ṭangkâi hle a,  Mâmi nen chuan kan inzuithla ve bauh bauh ṭhin a. Ani chu a neihna a rei deuh tawh a,B.A kan zirlâi pawh khan kallam hawlamin min phur mai ṭhin a ni.

     Nunsânga pawh kârtawpah buainate an neih lem loh chuan a rawn haw chho thei ziah a, a thikthu a chhe mah mah tih lohah chuan kan hlim ṭhin hle a. Remruata nen eng emaw châng zeuhin an rawn chho rual ṭhin bawk a, chung an rawn chhoh rual ṭum chuan kan paliin kan inzuiin hun kan hmang ho mai zel a, kan hlim viau rualin an chhuk leh hnu hian kan khua a har rawih zel a,  an chhuk tuk hi chuan kan ngui dun ṭhin hle a ni.

     Christmas a hnaih tawh avangin thawmhnaw la turin ka pa chu a zin leh a, keini chu class kan la kal thung. Class banah dawrah tlangin tlaiah inah ka thleng chauh ṭhin a, ka nu pawh tunhma ang êm êmin min ankhum ta lo deuh a, ka hlau bik lo tih ka lantir tak zeuh zeuh vang pawh a ni mahna!

     Zankhat ka hla zir zo ka haw chu Záma nen an lo awm a, ka nâute erawh an mu tawh thung. Ka inthlak fel hnua ka ṭhut veleh chuan ka nu chuan mutchhuak chhuanlamin a lo tihfo tawh angin an roomah min luhsan leh nghal daih a.

     "Ka lo lêng ve ziah si a, min lo ning ru vîau lo maw?" Zâma chuan a rawn tichhuak phawng a.

     "Ning love, nin nachhan tur che ka nei hleinem," ka lo ti thuai a.

     "I mitmei hmu miah lovin ka lo lêng ziah a, ka fel ve ngawt chuan ka inhria," nui ruh ruh chung chuan a ti a.

     Ka nuih chu a za angreng a, amah pawh chu a rawn nui ve vur vur a.

     "A dik i ti viau lo maw? Ka ngaihzawn tluk zet che-in nang chuan min ngâizâwng lo thung si a, chuti chung chuan, min duh lo tih hrereng chung chuan ka lo lêng ve ṭang ṭang zel a, fel deuh asin ka nih," a tih leh chuan ka nuih chu a za zual sauh a.

     "Ni e, a dik chiah alawm, i fel lutuk! Naupang fel tak i nia lawm," ka lo tih chuan naupang tih chu duh lo niawm takin a lû chu a thing nar nar a, a ner deuh suk bawk a.

     "Ka naupan tawh lohzia hi ka han entîr chhin dawn che em maw ni le!" a tih chuan rang zetin ka lo hnial a.

     "Aih, a ngai lo. Ka tlâwm e," ka lo ti a,kan nui dun hawk hawk a.

     A sawi kha a dik chiah a ni. Ka biak ṭhat peih loh lâi zawng pawh khan a lo len a ṭhulh chuang lova, kan inkawm ṭantirha ka thil sawi min zahsak êm ëm bawk a. Ṭhian anga inkawm ka duhthu ka sawi khan ṭhian anga kawm min tiam a, khati khawpa min duh si kha ka tâna nuam lo turin a awm ngai lova, ka tân chuan ṭhianṭha tak a ni ringawt. Ka lunglen zual chângte hian a bulah Nunsânga chanchin ka sawi ṭhin a, a rilru lo nat turzia ngaihtuah lêk lovin kan awmdante chu ka hrilh bawrh bawrh zel a. Khang hunahte khan dawhthei taka min ngaithla-in min ti ti pui ṭhin a, a fel tak zet a ni!

     A haw hnua mu tura ka chhoh chuan ka phone chu ka en a, missed call leh message a lo awm nual a, a tam zawk chu Nunsânga hnen aṭangin a lo ni a. Ka call let ta nghal a, a lo la rang kher mai!

     "Phone i va la thei lo ve! Eng nge i tih a?" A aw-ah chuan a lungawi lo hle tih ka hre thei nghal a.

     "Tihpalh lutuk! Roomah ka phone ka lo dah daih a."

     "Inlêng i nei leh tawh em ni?" a rawn ti bung nghut a.

      Dik taka chhângin Zâma nena kan inkawmna te chu nui hawk hawk chungin ka sawi a, ani pawh chu a lungawi zui ta a niang chu a rawn nui ve hak a. Dan pângngai tea zanlâi pelh rawk thleng kan inbiak leh hnu chuan kan inmangṭha a, ka muhil ta nghal siai siai a.

     Ka pa zin a rawn haw tawh a, keini pawh nihnih chiah class kalna hun kan nei tawh a. Zâma chu a reh hle a, nidangah chuan a duty loh kârah a lo lang reng a,  dawr leh inlamah min umzui reng ṭhin kha nithum lâi a rawn lang ta lova, a hna lamah a buai takzet a nih loh pawhin ngaihzâwng a nei ve ta a nih ka lo ring ve ngawt a!

     Class kan kal tawh loh hnu chuan dawr lamah ka buai lehpek hle a, nilêngin kan khat luih luih reng mai a ni. Christmas a hnaih tawh em avangin bazâr pawh a tawt map map hle a, online-a bazâr awm nûal tawh mah se bazâr tawt chu a zia phah vîau lem lo niin a lang.

     Kâr thar lamah chuan Nunsânga pawh a rawn chho ve tawh dawn a, class kan kal loh rûalin Mãmi chu Kolasib lamah a chhukthla nghal a, a û rualin a rawn haw chho leh dawn a ni.

     Zâma pawh a la reh vang vang a, vawikhat dawra a rawn kal leh zauh tih loh chu a reh zui vang vang mai a, kei lahin a reh tak daih nachhan chu zawh nachâng pawh ka hre lem lova, ngaihzâwng tur a chhar taah ka ngaih sak ta ringawt mai a ni.

     Christmas a hnai tawlh tawlh a, kan buai telh telh a, ṭhalâi lamin hlazir kan ngâi bawk nen hunawl ka nei tlem hle a, Zâma rawn lang ta lo pawh chu ka lo ngaihven zui lem lova.

     Chawlhni zîng chaw eilãiin ka nu chuan Zâma chanchin chu a rawn sawichhuak ta a.

     "Zâma û chu a chau angreng an tia, chawhnu lam chu kan va kan ve dawn em maw ni le?" ka pa chu râwn pahin a ti a.

     Ka pa chuan, "Chawhnu inkhawm banah kan kal dawn nia, an hre har nge ni a va rang ve mawle!" a lo ti a.

     "An lo hre fuh har deuh niawm tak a ni, a zialo ngawt mai. Puitei pawh hun i neih chuan kal ve la a ṭha ang, Zâma nen in inkawm ve nasat em kha," ka nu chuan a lo ti zui zat a.

     A reh ka lo tih kha a û damloh vang a lo ni a nih dawn chu! An unâu chauhin an awm a, a nu leh pate hi mipa naupang a la nih lâiin an boral tawh a, a û hian enkawl chhovin doctor a zir chhûng zawng theihtawp chhuahin a zirna senso turte thawkchhuakin mipuitlingah a chherchhuak a, Zâma pawhin a û chu a zahin a ngaipawimawh êm êm ṭhin reng a ni.


LALNUNPUII
Sbk Pachuau

Chapter 8



     Nunsânga leh Mâmi rawn chhoh nî chuan haw hma ve deuha lo inpeihfel hma tum deuhin ka awm reng a, kan buai êm avang chuan ka haw hma thei chuang lova. Hla zir a ngaih loh zan a ni hlauh zawk a, chuti ni lo se chuan chaw ei lova ka kal leh ngei a ngâi dawn a ni.

     Nunsânga'n min rawn biak chuan dawr khar kan lo tum mêk lâi tak a ni a, min rawn hruai a tum thu a sawi avang chuan ka pa rûala haw lovin ka lo nghak ta ran a. Khua chu a thim chiang tawh hle nachungin bazâr chu a la lun hle a, zanlama inphote an awm bawk nen a la ri nuai nuai mai a ni.

     Nunsânga a lo thlen chuan tawi khawmûang lovin kan kal nghal a, in kan thlen veleh inbûal nghalin chawte chu ka ei nghal a, chutih chhûng zawng chuan ka nâute chu chhaihin a lo kawm a. Ka nâute hian Nunsânga hi an ngaina ve êm êm a, Vâltea phei chuan a ngâisâng hle a, a thil hriatloh eng eng emaw hi a zawt a zawt zel a, ani Nunsânga lah hian a lungawina tawk tur chhanna a lo pe thei ve zel mai bawk a.

     Ka pa chu thil pawimawhah a chhuak a, ka nu chu a dan ngaitê-in room lamah a awm leh tawh a. Ka nâute mut hnu chuan insi riala ṭhu dunin duat takin min kuah a, kan infawp ngawih ngawih a.

     Kan infawp chu kan duhthawh tulh tulh a, tawp mai thei lovin uar takin kan infawp a, atu amah chuan tawp zâi kan rêl thei lova, kawngkapui inhawng thawmah chuan kan inthlah ta ṭawk a.

     Ka pa chhuak lo haw chu a rawn ṭhu ve deuh reng a, Nunsânga chu avrawn be nghal bawrh bawrh a, kei chu thingpui lum turin chokaah ka phei a, thingpui nena ka va let leh pawh chuan ka pa chu a lo la ti ti tui hle a.

     Thingpui in zawh hnu reilote-ah chuan mut mai a duh thu chu sawiin a tho ta nghal a, kal ta mai lo chuan Nunsânga lam chu hawiin a en vang vang a.

     "Ramnun, nupui neih i hun tawh lutuk a nia, nupui nei tawh rawh. Hetia farnu te rim rim lo hian nei vat teh, i nupui man tur ka lo tum ang," a tih chuan phawk zetin Nunsânga ka va melh nghal a, ani lah chu thutak fê hian a lo awm run a.

     "I pa saw tu neihtîr vat ula, a khawhar pawh a hnem ve deuh dawn asin. Upa ber i nia, Peka lah hian nupui neih lam hi a ngaihsak hmel mang si lova, i neih vat a ngai a ni," ka pa bawk chuan a ti leh a.

     "Puitei hi min neihtîr mai la." A aw chu a thutak kher mai! Ka thin a lo phu rang leh zaih zaih tawh hle a.

     Ka pa lah chuan a lo la thutak lo nasa mai a, "Uang uang lo khan nupui chu nei vat la a ni mai," tiin mu tur chuan a kal ta nghal daih a.

     "Ka fiamthu-ah a ngai em maw ni le! Palâi ka rawn kaltîr hunah ka fiamthu lo tih a hre dawn khawp alawm," Nunsânga chuan a ti bal bal a, ka lo nui thung a.

     Ka nui chu a ngaihdan nilo niawm takin amah si chet chuan min pawt phei a, nghet tawka min kuah pah chuan hnai set sawtah chiang tawkin min melh a, ka nuihza chu a reh chiang khawp mai.

     "Ka taa siam tur che hian hun khawhral vak ka tum hauh lo a nia, insm theihna ka la neih lai hian hma lak vat a ngai. Chuvangin, nang pawhin kan pahnih chungchâng dik tak hi i pa kha lo hrilh ang che, a rang lamin."

     A sawi zo chiah chu ka hmuiah a rawn fu leh nghal chat a, ṭawng vena hun min pe hauh lovin a duh chu a ti leh hmiah mai a ni.

     A haw dawn chuan varanda-ah kan dingdun leh vang vang phawt a, khua a vawh êm avang chuan ka inkuangkuah than a, Nunsânga chuan min rawn kuahin a taksa lumna-in min rawn ur takah chuan ka vawtti lutuk pawh chu a zia huai a.

     Te chhe lutuk chu ni lo mah ila a san ṭhat êm avangin a lakah chuan ka tê hle a, ka chhoh en a ngai a, ani pawh a rawn kun a ngai ṭhin a ni.

      A âwmah chuan beiin a lungphu ri dat dat chu ka ngaithla a, a kawngah chuan ka kuahbet thlap bawk a. Ka khabe chu rawn dawmin min kuai dak a, min fawp leh vawng vawng a.

     "Lut tawh rawh, i hritlâng palh ang!" a ti sup a.

     "Kal hmasa la," ka lo ti thung a.

     "Heta i awm chhûng chuan ka kalsan thei lovang che. Chuvangin, lut hmasa rawh."

     "Kal hmasa zawk la, ka lo thlir liam ang che."

     "Ka hmuh phaka i awm reng chungin ka kalsan thei lo che. Lut la, ka kal ang."

     "Ka thlirliam duh che alawm!"

     "Tihian inhnialin kan ding zankhua dawn nge i lut dawn?"

     "A nih chuan ka lut ang e."

     Luh tuma ka inher tawh chu min kuai let leh a, min fawp leh phawt a, min luhtîr ta hram a.

     Christmas chu ka hmang nuam ve hle a, ka naupan chhiat tawh loh tehlul nen ngaihzâwngte nena christmas ka hman vawikhatna a ni a, ka nuih pawh a za ru viau. Duhtakte nena han hman ho chu a lo nuam hle a, urlawkni-in Remruata a lo chho bawk a, kan pali chuan nuam takin kan hmang ho thei a, kan hlim ve viau a ni.

     Christmas leh kumthar inkârah chuan office an kal dawn avangin Nunsânga leh Remruata chu an chhukthla leh tawh a, kei pawh dawr lamah ka kal nitin a. Christmas hma nen chuan a inang lo hle a, khati khawpa nilênga buai kha tunah chuan kan ṭhu mai mai nilêng a ni mai a, kan hahdam hle a ni.

     Zâma û a zual an tih avangin ka pate rûal chuan ka kal ve ta a, a hma khan ka nu khan kal ve tur khan min phut vîau naa Nunsânga a rawn chho leh ta bawk nen khan ka lo mangnghilh leh deuh a, ka kal ta lo kha a ni a. Chutia a zual leh an tih takah chuan kal ve ngei ka duh avangin an kal dawn  chuan min sawm pawh ni chuang lovin keima thuin ka zui ve ta tawp a ni.

     An awmna cabin chu a nuam hle a, Zâma thawhna a lo ni bawk nen ngaihsak pawh an hlawh hle ang tih a hriat mai a. A û hmêl chu ka hmuh tawh hnu ang riauvin ka hria a, ka hmuhna awm erawh ka ngaihtuah chhuak zo mai lova.

     A chauh zaul deuh avang chuan chanchin ngâichangin kan awm ve ta deuh reng a, in lam chu Hruaii kutah kan dah tawp mai a ni. Hruaii hi a fel riau a, a rintlak bawk a, inchhûng enkawl pawh a kutah a awm vek a, a hna chu tlin takin a thawk mai a, kei phei chuan  sawisel ngâia a awm ka la hre lo a ni.

     "I va fel ve, i lo kal ve a!"

     Ka rilru ka lo kawm tui deuh nge ka bula a lo kallâi ka lo hre hauh lova, a hmêl chu a tla ve dâk a, a hah hle a nih ka lo ringthiam nghal mai a. A chhûngkaw neihchhun a ni a, chuvangin, a tân chuan a û hi a hlû a, enkawlna ṭha thei ang ber pek a duh ang tih pawh ka chiang a ni.

     Ka bula ṭhutna áwlah chuan rawn ṭhu ve nghalin kawngpuia mi veivel chu kan thlir dun a. Cabin chhûnga awm vak kha a chi ber loh avangin varanda lamah kan ṭhuchhuak a, ka pate chu midang awm vete nen chuan an ti ti a, kei erawh chu piah deuha kawngpui thlir phakna hmuna an ṭhutthleng dawhah ka ṭhu phei daih a, chuta ka ṭhu chu Zâma chuan min hmu-in min rawn pan a lo ni a.

     "Lo kal daih tawh tur zawk ka ni a, ka inthiam lo khawp mai. Ka buai deuh bawk nen ka rawn kal ta miah lova," inthiam lo tak chung chuan ka lo ti thung a.

     "I buaizia ka hria a, ka phut hauh lo che a nia. Tunah hei i lo kal a, ka lawmzia hi i hre phak lo hial ang."

     "A dinhmun chiah hi eng nge ni rêng rêng le?"

     "Pathian thu thu a ni tawh. Mihring lama kan tihtheih zawng chu kan tikim tawh a, tunah chuan Pathian kutah chiah ka innghat tawh."

     Ka khawngaih hle a, a û a ngaihzia ka hrechiang ve a, a lo boral palh ta hlauh a nih chuan a tuar natdan tur pawh ka hrethiam pha vek a ni. Ka chanah ka dah chhin ringawt pawhin ka hnuk a ulh thei hial a, a boral ta lo hlauh a nih chuan a tam thei ang ber ka kan ve tawh ang tiin ka rilru ka siam ta hial a ni.

     A dinhmun chu a ngai deuh reng a nih tak avang chuan ka pa chuan haw mai a rawt ta a, kan haw dawn chuan Zâma chuan motor dahna thleng min thlah a, remchâng hmasa bera kal leh ngei ka tumthu hrilhin kan inmangṭha zui a.

     Ka lo tum rilruk ang ngei chuan damdawiin lamah chuan ka kal ta deuh reng a, sawi luam lo mah se a hmel aṭangin Zâma chu a lawm hle tih ka hria a, kei pawh ka lo hnem ve thei chu ka lawm a, theih phawt chuan a tam thei ang ber va buaipui chu ka tum rilru ve ta ran a.

     Tlema a rawn harh chhoh leh hret hret takah chuan Zâma hmêl pawh hmuh a nuam leh ta hle a, a damlo berin a duh tlat si avang chuan in lamah an haw ta a. Mahse, nurse pahnih an rawih bakah a ṭula hman theih mai turin oxygen an inchhawp reng bawk a, Zâma'n a enkawl thei tho bawk nen damdawiina awm nen a inan lohna a tam vak lem lo a ni.

     Zâma te ina ka kal hmasak ber nî chuan banga an unâu thlalak intâr ka hmu a, chutah chiah chuan a û chu ka hmuh hnu a ang ka tih nachhan kha ka hrechhuak ta chiah a ni. Kum tir lama kan ina lo kal hmeichhe hmelṭha tak kha a ni tih ka hre ta nghal a, khata a hmêl ṭha tak kha tunah chuan hmuh tur a awm tawh lova, a cher chhia-in tinung sarh kha a nei tawh bawk lova. Ka hmuhlâia a hmêl nen chuan inanna a awm tawh rêng rêng lova, hun reilote chhûnga cancer natnain mihringte a eichhiat chakzia chu mak ka ti a, ka hmuh tirha ka lo hre mai lo pawh kha a awm hle a lo ni.

     Nunsânga rawn chhoh nî chuan chawhma lamin Zâma te inah ka kal a, Zâma chu ka hrilhlawk avangin a damdawiin kal haw-in min rawn lam kual a. Nunsânga chu chawhnu lamah chauh a lo thlen ka rin avangin a lo thlen hun awmah chauh kal tumin ka inring a, a hmain a lo chhoh hunah an ina lo nghak tura min hrilhlawk tawh avangin an ina kal ka tum a ni. A tirah chuan ka hnial a, min tihluih tak tlat avanga kal tum ka ni chauh nghe nghe a.

     A rawn thlen chin tur ka hriat theih nan tiin biak ka tum ṭhin a, kanbe tlang thei rêng rêng lova, a tlai tawh bawk si nen ka biak tlang theih tak miah loh avangin ka beidawng chuan Mâmi ka be ta ringawt a. Ani chuan a lo thlen daih tawh thu a lo sawi ta mai si a, hmanhmawh takin Zâma te in aṭang chuan ka chhuak ta nghal a.

     Nunsânga te in ka thlen chuan Mâmi leh an nula chauh chu an lo awm a, Nunsânga chu ka hmuh ve loh avang chuan Mâmi chuan min tihder a nih ringin ka zawt a, ani chuan a lo thlen tawh thu leh min tihder loh thu chu min hrilh a.

     "A roomah a awm a, han chho ve mai la," Mâmi'n a tih chuan ka lû ka lo thing nasa mai a.

      "A lo chhuah hun ka nghak mai ang," ka lo ti vat a.

      "Lo kal rawh, ka han kalpui ang che," ka bânah chuan pawtin min kalpui nghal dawr dawr a.

     Nunsânga room kan thlen chuan a û chu kovin room kawngkhar chu a hawng ta nghal a, khumah chuan lo mû-in min rawn melh zawk a, lehlam a hawi leh nghal daih a. Mâmi lah chuan min chhuahsan leh nghal daih si a, min lo biak miah loh avang chuan nuam lo chu ka ti ru angreng hle a. A lo thlen lâia ka lo awm hman loh avangin a thinrim a nih ka ring ta ber a, han biak ṭan mai dan tur ka hre lo hle a, amah lah chu a ngâwi tlat mai si a.

     "I lo thlenna a rei tawh em?" ka tih chuan a ngâwi reng a, chutianga a awm tlat chu nuam lo ka ti hle a.

     "Ka tihpalh lutuk! Ka be tlang thei si lo che a, i rawn tlan laklawh a nih ringin ka lo hmanhmawh lem lova. I lo thlen lâia ka lo awm lo chu pawi ka ti!"

     Ka thil sawi chu hria ang pawhin a awm duh lova, a che eih lo hrim hrim a. Ka kal hnai a, ka hûaisenna zawng zawng sâwmkhawmin khumah chuan ṭhu-in a darah chuan ka va tawk a, a la chet duh loh avang chuan a darah chuan chûlin a tukkhumah ka zenchho a, a lû chu ka chulsak a.

     Rawn che thutin ka kut chu a rawn man a, amah bawh rawkin min pawt mû a, ka biang tawn tawnah vuanin ka hmui chu a fawp nghal tawn tawn a, kei pawh chuan ka lo chhânglet ve nghal a.

     Chutia kan infawh tawn tawnlâi chuan tawp thutin min namsawn dawrh a, sir lamah chuan inlet phei thawkin thawk a la hawk a. A ngaihna hre lo zeta ka lo en chu rum êm êmin min rawn melh a, a mitmengah chuan huatna, thinrimna leh ngaihnepna ka  hmu-in ka inhria a.

     "Chhuak rawh."

     Ka nghing lawih a, a aw-a thinrimna lo lang ai mahin a thusawi chuan min ṭhâwng a, ka na a, ka zak bawk.

      "Engvanga hetianga awm hi nge i nih?" ka aw chu a ri chang chang a ni ber a.

     "Chhuak rawh ka tih kha i hre lo em ni? Nang nen hian sawidun tur kan nei tawh lo! Chhuak la, kawngka kha khawngaihin min lo kharphui sak dawn nia, mut ka duh a."

     A ṭawngkam tin chuan min deng sawk sawk a ni ber a, a lo thlen lâia ka lo awm loh vang chauha thinrim a nih ka ring ta hauh lova, min thlauhthlak a tumnaah ka ngai nghet hmiah bawk.

     Ngâwi rengin ka chhuak a, kam khat pawh chhakchhuak leh tawh lovin ka kalsan a ni. Mâmi chu hmuh tur a lo awm lo hlauh a, chhuak tlang nghalin theih anga chakin in lam panin ka kal a, ka ṭah lohnan ka insûm nasa hle a, hmelhriat hmuh ka hlau hle bawk a ni.

     In ka thlen chuan ka roomah lut nghalin ka inkalh khum hmak a, ka khumah chuan bawkin ka mittui sûr zung zung chu dan tumna ka nei lova, ka natzia chu eng ṭawngkam mahin a sawichhuak zovin ka ring lo. Ka na a, ka zak a, a ngaihna ka hre lo bawk. Engvanga khatianga awm kha nge a nih tih chu hriat ka phû ve-in ka inhria a, min biak a duh tak miau si lovah chuan zawh luih erawh ka tum bik hauh lo thung.

     Ka lo beisei lawk loh leh a thleng thei ang tih ring ngaihna pawh ka lo hriat loh kha tunah hian ka chungah a thleng mêk chu a ni si a, ka thinlung ka hlan tawh a, ka ngaihtuahna engkim a luah a, ka theihnghilh leh thei dawn tawh lo tih pawh ka hrechiang hle a. Ka ngâi ngawih ngawih reng a, ka duh êm êm bawk. Ka duh satliah mai a ni lova, ka hmangaih a ni. Ni e, ka hmangaih tih ka inhria a ni. Mahse, chu hmangaihna chu  chhanlet a ni ngai dawn ta lo a ni.

     Zanriah ei tur pawhin ka chhuak peih lova, ka lû nâ chu chhuanlamah hmangin ka mu reng a. Ka nu lah chuan min ngaihtuah ber niawm fahranin ka awmdan min rawn zawt sek a, nachhawkna ka ei a, min chhawk hunah ka zia mai tur thu-in ka lo chhâng a, kawngkâ ka hawn duh miau loh avangin a kalsawn ta hram a.

     Ka lo ṭap muhil daih chu lo niin ka phone ri chuan min tiharh a, Nunsânga a nih ringin phur takin ka la vat a, screena hming lo lang ka hmuh chuan ka phurna chu reh nghal vekin chhâng lovin ka phone chu ka dahthla lehnghal a. Khati khawpa ṭawngkam na min hman khum hnuah engvanga min rawn biak leh beisei rêng rêng nge maw ka nih le! Duhthusam hlawhtling ngai lo tur beiseia duhthu sam rûal pawh ka ni tawh lo asin le!


LALNUNPUII
Sbk Pachuau

Chapter 9



     Kumthar hmuak tura mitin phur taka an chet suau suau lâiin kei erawh chu ka chechâng peih lova, eng tih mah ka phur hek lo. Ka chunga thil thleng chu a rang mah mah lutuk a, lo inrinna hun ka nei lova, tuardan ka thiam lo a ni. Eng atân maha min ngâi lotu ngâia kûr reng tur ka ni lo tih inhre reng chung chuan ka ngaihtuahna ka thunun zo ngang si lo a ni.

     Kan buai lem lo bawk a, dawrah pawh kal lovin inah ka tawm tlat a. Ka chhûngte bulah chuan ka damṭhat vak lohthu sawiin dawt hmangin ka inthup hram a, thil ka ei ṭhat loh êm avangin ka damṭha lo tak takah ngâiin ka pa phei chuan min ngaihtuah hle a. Inentîr turin min ti hial a, ka nuam lo satliah mai chauh a ni tiin a rilru chu ka hneh ta hram zawk a.

     Dawt hmangin ka inthup ka ti tak na'ngin thudik a nihna lâi pawh a awm ve tho a. A chhan chu, ka thinlung hi a damlo a, ka rilru hi a na ngawih ngawih a ni. Chhan mumal awm lova han inthlauhthlak ringawt mai chu a tlawmthlakin a na ngáih ngáih hle a, ka dawngsawng thiam hlawl lo a ni ber e.

     Kumthar lawmnaah pawh tel lovin inah ka awm tlat a, ka phone ka off hmak bawk. Ka roomah ka tawm tlat a, tupawh min hmu tura lo kal chu ka nawmsam loh thu leh ka mutthu lo hrilh zel turin Hruaii chu ka chah a, mahni chauha awma ngaihtuahna kawm veng veng chu ka duh ber rih a ni.

     Kumthar nî chuan ka inngaihtuah harh a, engah mah min ngâi lotu leh min ngaihsak hauh lotu vanga indawmkun reng tur ka ni lo tiin ka rilru ka tipâukhauh a, ka phone chu on-in ṭhianho groupah lutin ṭhiante ti ti nuihzatthlak tak takte chu ka chhîar a, private message erawh ka hawng duh lo thung. Mâmi message pawh a awm nûal a, Nunsânga nena inzawm thil rêng rêng chu hnaih rih loh ka duh avangin ka hawng duh chuang lova.

     Facebook-ah lutin notice lo awmte chu ka check a, ka check zawh chuan chhuak leh nghal mai lovin ka enkual leh a, chutia ka enkualna lamah chuan ka thawk tidanglam vek thei thil ka hmu ta a. Ka bîng chük chûk a, ka ṭah a chhuak a, ka ṭap thei der mai si lo. Ka thil hmuhin min dennatzia chu Nunsânga ṭawngkam hnuhnungin min tihnat ai mah khan a na zawk emaw tih mai tur a ni.

     Nunsânga bialnu hlui Kimkimi'n Nunsânga a tagna thlalak rawn phochhuah chu ka tân chuan thlir hrehawm a ni a, chung thlalakte chuan min rawn melhin min rawn nuihsawh nite hian ka hria a. Ka hmuh rual ruala lo hmehtawp daih tur kha a nih nen ka mit chuan a kalsan thei tlat bawk si lo a ni.

     Kumhlui thlahzan an hmanna vel a rawn dah a, thlalak pakhatah chuan ṭhian dangte nen pângngai takin an lang a, pakhat dang lehah thung chuan inkuah rialin hlim hmêl pu taka nui sângin Kimkimi chuan duh hmel takin Nunsânga chu a en a, Nunsânga pawh chuan Kimkimi chu a en ve bawk a, a landanah chuan induhtawn tak an ang ber a. Midang hlim hmêl hian chutiang tak chuan ka thinlung a hliam na thei ang tih rin ngaihna ka hre phak ngai lova, tunah erawh ka chungah a thleng mêk a ni si a.

     Tunah chuan a chiang ta e! Chhan awm lovin min thlauhthla emaw ka lo tih kha chhan chu a lo awm ngei a, a bialnu hlui Kimkimi nena an lo inkawp leh tawh avangin kei chu duh loh paihin min paih a, engah mah ngâi zui lovin min kalsan nal nal a, ka dam nge dam lo tih pawh a ngaihtuah pha tawh hauh lo ang le!

     Engvangin nge unâu ang khan kan lo awm mai mai loh le! Ka duhnate kha dahṭha-in min duh nia a insawi lâite khan lo hnar ta ila chuan tuna ka natna hi ka nei lêk lo tur a nia, tuna ka chunga thleng mêkte hi a thleng hauh lo tur hi a nia le! Tunah chuan hnawl hnu, duhloh hnu leh hriatzui hlawh lo ka lo ni ta si a.

     Min tinatu leh min kalsantu vanga indawmkun tur ka ni lo tiin ka rilru ka sîam ta hmiah a. Nun tharin bul ka ṭan ang a, ka natna te chuan tunah min kiansan rih lo mah se ka hriatreng loh hun a la awm dawn tih ka hria a. Chuvangin, hmalam pana kal turin ke ka pen ṭan a ngâi tawh a, anni nuam chen lâia na tuara lo kun tlawk tlawk tur chuan ka chapona hian a phal hauh lova, huaisen taka dingchhuaka ka hmaa thil awm rêng rêng chu eng pawh ni se ka sut a ngâi a ni tiin ka infuih ru sauh sauh a.

     Ka inbual zawh chuan thil ei turin choka lamah ka chhukthla a, thil ka ei mumal loh deuh avangin ka lûte chu a hai deuh chhû a. Thil ei chakna nei lo mah ila tlem tal ka ei loh chuan ka chau dawn tih ka hria a, châk lo chung chung chuan ka ei lui ngawng ngawng mai a ni.

     Chutia thil ka ei mawlh mawlh lâi chuan doorbell chu a lo ri a, Hruaii'n a va hawn hnu lawk chuan Mâmi hi chokaah chuan a rawn lut a, a hmêlah chuan a lungâwi lo hle tih a hriat mai a.

     "Engvanga hetianga awm hi nge i nih? Engvangin nge min hmuh duh loha  engvanga i phone off tlat nge i nih?" A lungawi lo takzet tih chu a sawi kher ngai lovin a lang reng a.

     "Ka nuamsam lo deuh a, ka mu deuh reng a, chuvangin ka phone pawh ka off daih alawm," a lo ti dam raih a.

     "I damlo chu kan theih lohin eng nge awm kher a ṭulna? Min tihmanganzia hi i hre lo a nih kha! Ka û lah biak ṭawng zawh lohin a ngâwi ngul reng a, eng thil chiah nge in inkârah hian thleng?"

    "Kan tawp tawh! I û awmdan chu ka hriatpui hauh lo mai."

    "Eng nge thil awmdan chiah hi min ham hrilh teh. Pakhat kan be ṭawng zo bawk si lo, nang talin thil awmdan min lo hrilh teh."

     "Sawi tur vak pawh a awm lova, sawi vak pawh ka duh lo. Hemi chungchâng hi chu khawngaihin min zawt tawh lo hram rawh." Ka thinlung hliam tihnat belh leh tura a chungchâng thu lo sawi vak kha ka duh lova, tunah rih chuan ka nun aṭanga paihbo hmak ka duh a ni tawp mai a ni.

    Mâmi haw hnu chuan muangchângin ka insiam a, Zâma te in lam pan chuan ka kal ta a. Ka pik churh ni mai hian ka hria a, tunah tak hi chuan ka tân nun hian awmzia a nei tam lo hle a ni. Ka theihtawp chhuahin ka rilru aṭanga paihbo chu ka tum ve ngat ngat a, kha leh chen ka thinlung leh ngaihtuahna luahtu chu chuti maia awlsama paihbo theih a lo ni hauh lova!

     Zâma te in ka va thlen chuan an nula leh nurse pakhat an lo awm a, Zâma erawh damdawiin lamah duty a neih avangin a awm lo thung a. A û chu tlêmin a lo zia veleh tawh a, khumah chuan an lo ṭhut-muttîr a, ka va lut min lo hmuh chuan min lo nuih sak a.

     Zâma û hi a hming tak ka hre lova, 'Mâ-i' tia an koh mai ṭhin avangin kei pawhin 'u Mâ' tiin ka ko ve mai a. A ṭawng tam peih ṭhin lo naa a bula awm nuam tihna riau ka nei a, kan ina a lo kal ṭum pawh khan a hmêlah khan ngainatawm rukna riau ka hmu a nih kha!

     U Mâ-i bulah chuan awmin eng eng emaw ka sawipui a, ka sawipui ti ila a ṭawng ṭhat ve peih vak lem loh avangin ka ti ti ka ngaihthlaktîr a ni mah zawk a. Ka rilru hahnate dahṭha-in a dinhmun chu ka ngaihtuah a, a natna ngawr ngawr chu thuhran ni se a nâu a ngaihtuah vang ringawt pawha a rilru hrehawm turzia te chu ka hriatthiampui hle a ni.

     Tlai lamah chuan u Thlamuana a lo kal a, ani hi u Mâ-i hmangaih êm êmtu a ni a, tun ang dinhmuna a ding chung pawha nupui atâna neih hreh hauh lotu a ni. U Mâ-i pawhin a duhin a hmangaih hle a ni tih a mitmengah leh a chezia-ah a hriat mai a, tunah hian u Mâ-i hi kum sawmli vel a niin ka ring a, engvanga tun aia an la naupan deuh lâia innei mai lo nge an nih tih hi ka ngaihtuah ve neuh neuh ṭhin a. A chhan chu, Zâma sawi hmangah tleirawl chhuah hlim aṭanga lo inngâizâwng daih tawh an nih vang a ni.

     Haw tura ka lo intintuah lai mêkin Zâma duty zo chu a rawn thleng ve chiah a, haw ka tum tih a hriat chuan lo la nghak tur chuan min ti a.

     "Ka intifai lawk ang a, ka va thlah dawn che nia," tih pah chuan a kamis kilhna chu a phelh mawlh mawlh a, room lamah chuan a lut ta nghal a. Kei pawh chuan mahnia kea haw ai chuan tiin ka lo nghak ve mai bawk a.

     A inpeihfel chuan kan kal zui mai a, kan in kan thlen chuan lênglut turin ka sâwm a, an in lamah u Thlamuana a awm tho bawk a, a û chu ngaihtuah lutuk lovin a lensan ve theih hun a nih avangin a lo lut ve a.

     Ka chhûngte chu an lo awm kim ṭhap tawh a, ka pa chuan min ngaihtuah hmel takin ka zia deuh tawh em tih chu min lo zawt vat a. Nihnih vel chu engmah ei ṭha peih lo leh pawn chhuak peih lovin ka awm a, vawiin chhun an inkhawm hlana lo chhuak bo ta daih kha ka ni bawk nen min lo ngaihtuah hle a lo ni a, ka phone lah chu inah ka hnutchhiah daih bawk si a, ka kalna tur Hruaii bulah ka lo sawi lo bawk nen ka pa chu a lo mangang ru hman viau a lo ni a. Chutia Zâma nen kan inzui lut min han hmuh a ka ṭha tih ka hrilh hnu chuan a thaw huai a.

     Zanriah ei a hun mai dawn avangin Zâma chu rei awm lovin a haw ve leh ta vat a, a haw tur chu kawngkhar thleng ka thlah a, ka lut leh tur chuan kan in piah kawngkawia bike tlanliam tur chu ka va hmu a. Nunsânga a an êm avang chuan ka va en ṭha leh ngat a, a lo tlanliam hman tawh si a, amah ang deuh ka hmuh ringawt pawhin ka thinphû chu a la tirang thei chu a ni sia le!

     A tukah chuan ruaiṭheh ka tum lem loh avangin rilru lakpenna atân tiin ka zirlâibu chu ka khuma bawk zâl pah chuan ka kêu mai mai a, rilruah erawh a lut mawh hle a ni.

     Mâmi'n ka chhuak peih em tih min rawn zawh chuan ka peih lohthu-in ka lo chhâng a, a lung a âwi vak lo tih ka hre naa a bula ka awm chuan a û chanchin a sawi loh pawhin kan buaina chungchâng min sawipui a tum ngei dawn tih ka hriat avangin ka pawiti lem lova.

     Kumthar vuakvet a zova, class pawh kan kal ṭan leh tawh a, ka nun erawh chuan a hma a phak thei tawh lova. Mâmi chuan min zawt chik ṭhin viau naa engmah ka sawipui duh loh ngai lova, a hnuah phei chuan min zawt peih ta bik lo a ni ang chu engmah a sawi ngai ta bik lova.

     Nunsânga chu chawlhkâr tawpah a rawn haw chho deuh ziah tih ka hria a, hmuh erawh ka hmu ngai lem lova. An inah pawh ka kal khat hle a, ṭhalãi inkhawm zan hian a awm lo tih ka hriatchian chauhin ka pêng ṭhin a, chumi tih loh chu a hranpa takin ka kal ngai ta lo a ni.

     Nikhat kan class kal hawlam chu Mâmi'n bazárah kalpui tura min sawm avangin ka kalpui a, hemi nî hian a scooty a chhiat avangin a keng lova. Bazâr aṭanga kan haw chuan an inah ka thlah kawi ta nghal a, inchhûnga lut tura min sawm chuan haw tlang mai ka duh thu ka hrilh a, nidanga âia kan haw tlai deuh tawh avangin a hmanhmawh ru deuh tawh a ni.

     Chutia kan inbiak mawlh mawlh lâi chuan min en rengtu awma ka hriat avang chuan ka hawichhuak a, Nunsânga'n a room tukverh aṭanga min lo thlir reng chu ka han hmu a, ka thinphû chu a rang nghal dat dat kher mai. Chutah, a bula awm tura ka duh loh ber ka han hmu zui zat a, ka na lo ka tih chuan ka daw chiang hle a ni mai. Kimkimi chu Nunsânga ngheng renga dingin a rawn hawithla ve nghal a.

     Ka lungphû chu a rang satliah a ni lo, a mumal lo a ni mah zawk. Ka theih tawpa inthununin thawk ka la halh a, Mâmi chu mangṭha-in ka tlan ta nghal a,  ka khur nasa lutuk a, chesual hauh lova kan in ka inkhalh thleng thei chu a mak zawk hîal a ni.

     Ka ziaawm tawha ka lo inngâi kha ka tisual hle a ni tih ka hre nghal a, ka thinlung hian a lo la ṭhen fel lova, hmeichhe dang bula a awm kha ka la natpui cheu chuan min tina zual a. Ka thinlung neitu mah ni se ka chunga a chet duhdan ngaihtuahin ka thinlung luah rengtu nih chu a phû tawh miah lo asin le!

     Ka khumah chuan bawkin ka inngaihtuah nauh nauh a, tunah chuan awlsam takin ka theihnghilh thei dâwn lo a ni tih ka hre tawh a. Chuvangin, theihnghilh tum buai lova engkim hmachhawn thei tura rilru lo siam mai chu ka tâna kawng awmchhun a ni tawhin ka hria a. Ka hmangaih avangin tum eng ang mah ila ka theihnghilh thei ngai dâwn lo a ni tih ka chiang tawh a ni.

      Mahni lo maha rilru hah nak alâiin ka nu lah chuan Zâma ngâizâwng tur chuan min lo nawr ve sek a, ka tum loh êm avangin hnial enah pawh ka en lova, a sawichhuah châng pawhin ngâwi rengin ka ngâithla a, ṭhian ang bakin ka en thei lo tih pawh ka sawi buangbâr peih lo a ni.

     U Mâ-i a ziaawm chhoh leh tak deuh avangin Zâma pawh a lo lêng ve leh ta zauh zauh a, a hma ang êm êm erawh chuan a lo lêng zing thei tawh bik lova. Damdawiin lamah leh in lamah a buai ve tawh avangin a lo len chhunah pawh reilote bak a ṭhu hman ṭhin lo a ni.

     Inrinni vawikhat chu u Mâ-i chuan min rawn bia-in chhun lamah tihtur pawimawh ka neih loh chuan lêng turin min rawn sâwm a, tihtur ka nei lem lo bawk a, ka lêng ta a. U Thlamuana hna thilah a zin a, a khawharin min rawn sâwm a lo ni a. Zâma chu duty a neih avangin damdawiin lamah a kal a, an nurse rawihte an chawlhlâi a ni bawk a, an nulâ nen chauh chuan an lo awm a.

     Kan ti ti dun nilêng a ni mai a, tlêma a lo dam ve deuh tawh avangin pangngai takin a ti ti pui theih tawh a. A chanchinte chu sawiin u Thlamuana nena an inngaihzawn dante, inneih tum êm êm chunga an inneih theih tak loh nachhante chu min hrilh a.

     Tleirawl chhuah hlim aṭanga inngâizâwng niin an induhin an inhmangaih tawn êm êm a, u Thlamuana'n hna a neih veleha inneih chu an tumdan a ni a. Mahse, u Thlamuana nu hi milian ngaisâng chi a ni a, nu chapo tak mai a ni bawk a, u Mâ-i chu a mo atân a pawm thei ta tlat lova. 'Fahrah mai mai mo atân ka duh lo' tih ṭawngkam hîal a neih takah chuan u Thlamuana'n inneih theihdan kawng dap hram a rawt pawhin u Mâ-i chu a khawk ta tlat a. Chuti taka duh lotu inah chuan lawi luh luih chu a duh bik loh vangin inṭhen mai chu a rawt a, mahse, u Thlamuana hian a thlah theih bik si loh avangin tihian innei lovin an la inzui ta reng a lo ni a. U Thlamuana nu-in midang nupuia neihtîr hîal a tum pawhin a neitu tur berin a duh mîau si lova, u Mâ-i lo chu neih a tum miau si lovah chuan an tilui thei ta bik lo a ni.

     Tlaiah Zâma rawn haw hnu chuan haw ka tum ve ta chauh a, u Mâ-i ti ti ka ngaithla tui deuh a, ka rin âi daihin khua a lo tlai tawh a. Zâma chuan a dan pângngai tê-in min thlah chu a tum leh a, hnial mah ila awmzia a awm dawn chuang lo tih ka hriat avangin ka hnial buai duh ta lova.

     Kan in kan thlen chuan rawn lut lovin a tlan haw leh nghal a, lut tura ka pen ṭan chiah tih chuan min ko ri niawm tak ka hriat avangin ka ding dat a, ka hawikual nghal a.

     Kan garage bang nghenga Nunsânga lo ding chu ka va hmu a, a mit chu tizim deuh sanin min lo melh reng a!

LALNUNPUII
Sbk Pachuau

Chapter 10



     A lam pan chuan ka kal nghal a. Mahse, a bul ka thlen phei hma chuan ka ke pen chu ka tawp leh nghal chawt a.

     Eng vanga va pan nge ka nih! A duh duha koh kal mai mai theih tur ka ni hauh lo tih ka ngaihtuah a, a duhloh leh hnawl hnu ka ni a, pan hmasatu nih chu ka tum hauh lo a ni. Ngâwi rengin ka inher a, in lam pan chuan ka kal ta nghal a.

     Ka bâna a rawn vawn takah chuan ka ke penlâi chu ka tawp chawt a, min vawnna kut chu enin amah chu ka melh chho leh nghal a.

     "Min khawih suh!" Zawi sapin ka ti a, ka thinur lutuk chu ka khur dar dar a, ṭawngka vin ka hman loh avanga min zûam a nih chuan a tisual khawp ang le!

     A hma âia nghetin min hmer lui salh a, ka hmaah tak chuan min si deuh thaw-in a ding a. A thaw rim rawn nam hakah chuan makti zetin ka melh kawk a, zu rim a nam a nih chu!

     Kum kha lehchen amah lo hre tawhtu tân chuan zu rim a nam chu mak tih loh rüal a ni lo, a chhan chu, vawikhatmah a zu in hi ka la hre tlat lo a ni! Ruichhia chu ni lo mah se a hmêl leh mitmeng aṭang chuan a rui tih a hriat a, mak ti takin ka en tlawk tlawk ringawt mai a ni.

     Chutia kan inmelh dun ran lâi chuan rawn kun hniamin a hmui chuan ka hmui chu a rawn si a, ka lo thlesawn nghal vat a. Thaw hawk chungin min kuahbet a, a kut pakhatin ka tukkhumah a dawm a, min fawp ta nawk nawk a. Ka lo indang ve ṭang ṭang chung pawhin min vawn ngheh êm avang chuan ka talchhuak thei lova, chutiang taka min tham lo mai chu ka thin a rim bawk nen ka tha neih zawng zawng leh ka thinurna tha nen chuan ka tal ta vak a.

     Chutia ka pâwng tal tak chîamah chuan min dawmbet zo ta bik lova, min thlah ta hram a. Min thlah takah chuan ka pai deuh nawk a, amah hlat deuh tak chuan ka ding ta a.

     "Engtikah nge inneih in tum?" A aw-a hmuhsitna tel chuan min tinâ a, a zawhna awmzia chu ka man chiah lo naa ka zawt let duh bik ṭhak lova.

     "Ka hre bik lo le!"

     Eng nge ka hriat pawh ka hre lo, ka rilrua a landan angin ka chhâng ve hmiah a. A mitah chuan natna niawm tak ka hmu a, mahse, a rei loh êm avang chuan ka hmusual a nih ka ring leh ta zawk a.

     "Rial rei lo hle mai maw!" A aw-a min ngaihnepna lo lang chu tuar har ka ti kher mai! Mahse, engah mah ka ngâi bik lo a ni tih lantîr ka duh avang chuan ka chhâng duh ta lova.

     "I hmêl lah chu a ṭha tulh tulh mai si a, i pasal tur chu a vannei dawn bik hle mai." A ṭawngkam tinah chuan elsenna a tel vek ni maiin ka hria a

     "Sawi tur pawimawh i neih loh chuan ka lut dawn a nia, ka chhûngte'n min lo ngaihtuah tawh ang," ka tih chuan a lo nui hak a.

     "Ni e, va lut rawh. Kha i nu duhtak khan a lo ngaihtuah leh tawh ang che!"

     Engvanga chuti tak maia min diriam chu nuamti nge maw a nih le! A pawi ka sawi ka hre hauh si lova, keimah zawk hian deusawh taka ṭawngkhum tur ka nih lâiin a thiam lo zawk ang maiin min deusawhna thu ka ngaithla ta reng mai chu a nia!

     Inchhûng ka luh dâwna ka va hawilet leh chuan a dinna ngaia dingin a kekawr ipte zen chung chuan min lo la en reng a, ka luhsan ta nghal a.

     Ka inbual lâi chuan ka la khur dar dar a, ka thinrimna avang chauha khur ka nilo tih ka inhria a, min tawhna khan keimahah nghawng a la nei reng a ni! Engvanga rawn kal nge a nih rêng rêng ni! Min diriam tur ringawta rawn kal a nih chu ka ring bik chiah lova, mahse, a awmdanah khan thildang vanga lo kal a nih a rinawm chiah bawk si loh a. Zu rim a la nam zui lehnghal a, tunhmaa ka hriat ṭhin Ramnunsânga kha a ni ta lo em ni chu tih mai awl tak a ni.

     Chumi ṭuma ka hmuh bak chu a reh leh ta vang vang a, Mâmi bulah a chanchin ka zawt ngai lova, sawi a tum deuh pawhin thildang ka sawipui thuai zel a. Chuvangin, a chanchin pawh ka hre tlem hle reng a ni. A chanchin ka hriat tlem poh leh ka tân a ṭha a ni tih ka hriat avangin hriat loh dan ngawt ka zawng a, ka thinlung chhûngril erawh chuan a ngaihven ru hle tih ka hria a, chu chuan ka awm pawh a tinuam lo hle reng a ni.

     Zâma te in lamah pawh ka kal khât ta vîau a, u Mâ-i a lo ziaawm deuh tawh bakah class kallâi chuan hunawl a lo awm lo bawk nen ka kal hman ta meuh lo a ni ber e.

     A nu boral chamah chuan Mãmi chuan an ina chaw ei turin min sâwm a,  chhûngkhat hnaivai leh ṭhianṭhate nen zanriah kilho an tum a lo ni a. Ka kal a nih chuan Nunsânga ka hmu ngei dawn a, hreh hle mah ila ka hel kumkhua thei dawn chuang lo tih ka hriat avangin huaisen taka hmachhawn tawp mai chu ka tum ta a ni.

     An in ka va thlen chuan an chhûngte ho chu an lo awm nûal tawh a, catering an tih dawn avangin rawngbawl buai a ngâi lem lova, a zia phian a. Thingpui leh theitui vel han buaipui bak chu tihtur êm êm a awm lo bawk a, Mâmi room lamah kan awm ta daih a.

     Hunserh neih dawnah kan chhukthla ta chauh a, sitting room lamah an lo ṭhu khat deuh ṭhap tawh a, choka lamah ṭhutna awla ṭhut mai tumin kan phei tlang nghal a. Chokaa lo awmte ka hmuh chuan ka inthunun hman lo ṭep chu a ni e!

     Kil khatah chuan Nunsânga leh Kimkimi chu an lo ṭhu dun ral a, a landanah chuan Kimkimi chuan a nêk mah mah chu a ni e! Nunsânga'n min lo melh reng avang chuan ka hawisawn ta vat a, Mâmi bulah chuan ka ṭhu ve ta nghal a. Ka thin phu dup dup zawn chu ka kut chuan ka han dawm vang vang a, a zia phah chuang lem hlei lova. Chhûngkaw thiltih khawmnaah hîal an inhruai tawh chuan an inkawp nghet hle tawh a ni tih a hriat mai a, chu thil ka ngaihtuah avanga ka nâ chu duh lovin ka thaw halh a. Thildang ngaihtuah hram ka tum a, ka hlawhtling chiang hle thung.

     Zanriah eikham veleha haw chu ka duh ngawih ngawih a, Mâmi lah chuan la awm turin min chelh tlat mai bawk si a, han haw luihsan chu thiltih chi-ah ka ngâi êm si lova, rilru bet lo deuh chuan ka awm ta reng a.

     Ka tum hauh lovin Nunsânga te pahnih lam chu ka lo melh leh ṭhin a, ka va en apîangin min lo melh ve kur zel a, ka mit chu ka lasawn rang thei hle a ni. A hnua an kalbo tak daihah chuan thawveng huai awm zawk ka nih nen ka  thawpik zawk emaw tih mai turin ka awm a, ka awmdan chu a nuam lo tak zet a ni.

     Mâmi roomah chuan awmin tukverh bula ṭhutthlengah chuan ka ṭhu a, ka ngaihtuahna chu Nunsânga-ah a awm tlat a, chu chu ka duh loh êm avang chuan ka lû chu ka thing nawk a. Room kawngkhar inkhar ri khap ka hriat chuan Mâmi rawn let thawm a nih ringin hawi pawh ka hawilet lova, ka ṭhutdan ngai reng chuan ka ṭhû a.

     Ka bula a rawn din hnu pawh chuan ka la en chuang lova, pawnlam chu ka thlir mai mai a. A ṭawng tak miah lovah chuan ka hawilet a, Nunsânga nen chuan kan inmelh ta siah a.

     Ka tho thut a, room aṭanga chhuah tum chuan ka kal ta nghal a. Kalpelh a ngaih avangin amah hlat thei ang berin ka kal a, room kawngkâ ka hawng tur chiah chu a ṭawngkam chuan min titawp chiang kher mai!

     "I bîalpa i rawn hruai nange?"

     "Nang angin ngaihzâwng hruai tur ka nei ve lo tlat!" ka lo ti let fak a.

     "Inneih hîal in tum a ni lawm ni? Tun ataka ka nei lo han tihṭhat leh vel chu a rinawm loh thlak mah mah lo maw?"

     Ka thinur lutuk chu ka sa phat phat a, engvanga min tham lo lutuka ṭawng ziah ngam nge maw a nih le! Amah zawk hi a ni lawm ni ngaihzâwng neih vanga awmze awm miah lova min ṭhentu kha? A duh duha min puhkual tur hian dikna pakhatmah a nei hauh lo.

     "Rinawm loh chungchâng kan sawi dawn a nih chuan kei ni lovin nangmah zawk kha lo inenchiang rawh, kei chu ka fihlim e."

     Ka chhuak nghal a, na tawka kawngka chu kharkhumin inhnuai lamah chuan Mâmi zawng turin ka chhukthla a. Thil ti lawk tura insawiin a rooma kan awmlâi khan min chhuahsan a, rinaiin a rei ta phian si a, Nunsânga khan engtin nge khatah khan ka awm tih a hriat pawh ka hre nek love.

    Mâmi ka hmuh chuan haw tawh mai ka duhthu chu ka hrilh a, a phal lo deuh viau naa ka lu natthu ka sawi takah chuan min dang ta bik lova.

     Ka scooty ka lakchhuah lâi chuan piah deuh aṭang chuan Nunsânga chuan min lo thlîr reng a, engah mah ngai lo niawm takin ka chetdan tibuai eih lo chuan scooty chu tinungin ka tlanchhuak ta nghal a.

     Thui pawh ka la tlan hman lo tihah chuan ka hnunga bike rawn tlan chuan min zui tih ka hre nghal a, ka tlan chakin a rawn chak deuh a, muangtea ka tlan leh a tlan muang ve zel bawk a. A tirah chuan ka hlau deuh a, khua a thim tawh avangin ka hmu chiang thei bawk si lova. Scooty side glass aṭanga uluk lehzuala ka en chuan Nunsânga a ang ka ti deuh a. engvanga min rawn zui nge maw a nih teh kher ni!

     Ngaihsak duh lo luiin ka tlandan ngai rengin ka tlan a, kan garage ka thlen chuan tlan lutin ka indah fel hnu chuan ka chhuak leh ta nghal a. Garage kawtah chuan a bike nghenga lo dingin ka chhuaklai chu min lo en reng a, reilote ka ding dat a, engvanga min zui tlat nge a nih ang tih chu ka ngaihtuah a. Ani hian min deusawh tur bakin min zui lovang tiin ka ngaihtuah a, chuvangin, ka biak kher a ṭulna ka hre lova, inchhûnga luh tum chuan ka kal ta nghal a.

     "Helai thleng ka rawn zui hnu-ah che ngâwi renga min luhsan i tum em ni? A fair lo chu i ti ve deuh lo maw?" a rawn tih chuan dingin rum lutukin ka va melh a. Pâwn light chuan kan awmna lâi chu a rawn en phak avangin a hmêl chu chîang takin ka hmu thei a, min lo melh reng a.

     "Ka sawm pawh ni lova min zui ringawttu chu biak ka ba love!" ka lo ti hmak a, a mitko a san ak chu ka hmu thei a.

     Ngâwi rengin ka dinna lam pan chuan a rawn kal phei a, ka bul a rawn thlen chuan ka lo tawlhsawn thuai a, a nui hawk a, ka bânah chuan pawtin garage lamah chuan min kai let a. Garage bang nghenga min dintîrin min nêk bet zui a, inrinna hman awm miah lovin min rawn fawp nghal siah bawk a, a chetran êm avang chuan ka lo invêng hman lo a ni ber e.

     A nghet thei ang bera min nekbeh tlat avangin talchhuah ngaihna a awm lova, ka chesawn thei hek lo. min fawhna chu duhthawh tulh tulhin uar lehzualin min rawn fawp a. Ni lo, min rawn fawp ni lovin kan infawp a ni zawk! Engtik lâiin nge ka lo fawhlet ka hre lova, ka ngaihtuah hek lo, uar lutukin kan infawp tawn tawn a ni ber e.

     Ka hnute a rawn ṭham chiah chuan ka harhchhuak zawk a, min kuahna aṭanga talchhuakin ka inlahrang ta nghal a, ka thinphu hlawp hlawp thunun tum chuan thawk ka la halh a.

     Engtin nge ami fawhna kha ka lo chhanlet mai le! Keimaha a huhâng neih chu a la ngai reng a, min tawh hleka ka taksa awmdan pawh a la danglam hek lo. Mahse, chu vang ringawt chuan a duh duha min khawih turin ka awm thei tihna a ni lo. Heti khawpa min hmusittu leh min tham lotu lakah hian engtin nge ka insumtheihna ka hloh theih ni le!

     Ka inhua a ni! Min thlauhthlaa min kalsantu, a duh hun huna min diriamtu kha engvanga lo fawplet nge maw ka nih le! Tunah chuan min hmusit nasa zual sauh tawh ngei ang chu! Nichin lawkah a bialnu a thlah zo chauh a ni a, lungrun takin, kei min fawp ang chiah khan a fawp ang tih a hriat reng a. Tunah kei khati khawpa duhthawh leh uar khan min fawp leh nghal a, a hmeichhe dang fawhna hmui pawh a la ro fel hman dawn em ni tih turah min fawp leh chu a nia le!

     "Puite, Zâma'n a nghak che a nia, lo lut tawh la."

     Ka nu rawn ṭawng ri-ah chuan ka phu zawk a, varandah aṭang chuan min lo en reng a. Engtia rei nge chulai hmunah chuan a din tawh ang tih chu amah chauhin a hria ang chu! Kan dinna lâi chu a eng pha vek a, kan infawp lai pawh kha a hnu ngeiin ka ring a, nuam lo ka tihdan  chu nasa tak a ni.

     Engmah sawi lo chuan ka kal phei nghal a, Nunsânga thaw la ham ham ri chu ka hre thei a. Chutah, eng emaw sawiin a phun sup a, eng nge a sawi erawh ka hre pha tawh lova, hawilet tawh hauh lovin inchhüngah chuanka lut ta nghal a.

     Ka nu khan Zâma kha lo lêng ni khan a sawi si a, inchhûng ka luh chuan ka hmu ta mai si lova, ka hnunga ka nu lo lut chu zawhna zawt mitmengin ka lo melh a.

     "Nunsânga lak aṭanga chhan nan che dawt ka rawn sawi a nih kha! I hmêlah khan chhan i ngaih hmel riauvin ka hria a," a lo ti zat zat a.

      Dik tak chuan ka lawm chiah lova, a chhan chu, Nunsânga khan Zâma nena inngâizâwng angin min ngâi tlatin ka hria a, a ṭawng tinuam tura hmeichhe lepchiah ang maia ngaihzâwng nei zung zung anga lan kha ka duh lo a ni. A hrim hrimah nutling puiin khatianga awlsam deuha dawt chiang lutuk a sawi kha mak ka ti a, engmah phei chu ka sawi lem lova, ka room lamah ka chho ta nghal daih a.

     Kâr eng emaw zat a liam leh tawh a, Nunsânga pawh kha thil thlen hnu khan  ka la hmu leh miah lova, a rawn haw chho khât hle a ni tih erawh Mâmi sawi ka hre thung.

     Nikhat chu, ka nu chuan a nawmsam loh thu leh incheck-up a duhthu a sawi a, ka pa chuan a duh phawt chuan kal turin a lo ti a.

    "Puitei hian min kalpui se a ṭha ang, mahnia kal chu ka zûam lo. Ka lûte hi a hai deuh a, mî zîngah ka va tlu mûalpho ang tihte pawh ka hlau deuh," ka nu chuan a ti a.

     Class kan kal loh lâi a ni bawk a, ka lo hnial lwm lova. Scooty-a a chuan hreh avangin U Dawnga chu kovin damdawiinah chuan kan indahtîr a, Zâma thawhna hmun niin amah pawh chu a lo awm a. Ka nu doctor rawn tum bulah chuan luhpuiin rinâi takin kan zo hma a, kan haw tur chu Zâma chuan kan motor awmna thleng chu min thlah a.
   
     U Dawnga chuan motor chu a lo hrufai hauh hauh a, a lo hruk laklawh êm  avang chuan motor bulah chuan dingin Zâma nen chuan kan inbe mawlh mawlh a, ka nu erawh chu motorah chuan a ṭhu lut nghal thung a.

     "U Mâ-i a ṭha zel maw?" tiin u Mâ-i chanchin chu ka zawt a.

     "Aw, a zia ve zel e. I lo lêng khât lutuk a, a sawi reng zel che a, i hman remchanah rawn tlawh leh tawh la a ṭha ang," a lo tih chuan ka inthiam lo ru angreng hle a.

     Ka len lohna chin pawh a rei ta vîau reng a, hun remchâng hmasa bera kal ka tumthu lo hrilh tur chuan ka ti ta ngawt a.

     U Dawnga'n motor a hruk zawh chuan a ṭhulut ta nghal a, kei pawh luh tumin motor kawngkhar chu ka hawng a, Zâma lam chu ka hawi leh rih a.

     "A nih leh phawt aw, u Mâ-i chu ka hman veleh ka lo kal tur thu chu i lo hrilh dawn nia aw," tiin hawi let leh mai ka tum a, kan awmna piaha ka thil hmuh avang chuan ka tawp chawt a, motor kawngkhar chu nghet lutukin ka hmer ta ngawt ngawt a.

     Nunsânga chuan a kekawr inpte zen chungin khawdang hawi miah lovin min lo melh reng a, a bulah chuan Kimkimi a ding bawk a, Nunsânga bânah chuan a kut no tak chuan a vuan ran a.


BEISEINA...!!
Sbk Pachuau

Chapter 11



     Palâi turin ka pa chuan ka nu nau, ka putea leh ama lama an makpa pakhat chu a tîr a, ka lo rin lawkdan ang chiahin Dinsângi chhûngte chuan pasal nei thei dinhmuna ding an nih lohzia leh mi chhûngkua tibuai tur ringawta an fanu han kaltîr chu an hreh a ni tih an lo sawi a. Mahse, a tir aṭangin an rilru kan hriat chian em avangin hnialdan tur chenin ka pa chuan a hrilh lawk thlap a, an rilru an va hminsak thei hram a, vawikhat kal leh hmabakin an lo haw a.

     An vawihnih kalnaah chuan inneih nî leh thla an ruatfel nghal a, Dinsângi chhûngte chuan a hautak lo leh holam thei ang bera tih an rawt a, ka nu leh pate erawh chuan a ropui thei ang bera tih an duh thung a. Lehlamin holam taka tih an duh nachhan pawh an fanu dinhmun enin ropui taka han tih chi niah an ngai lova, rei pawh innei lova inboralsan vat tura min ngaih vang ni berin ka hria a.

     An fanu pasal neihna an ngaihlu lo tihna ni lovin rei innei lo tur anga lang ta chu an inthlahrun vang a ni pakhatin ka hria a, chu chu ka pa ka hrilh chuan ka nu nen Dinsângi nu leh pa ti ti pui turin an leng ta nghal a, rilru inhmu takin an inthlah thei ta a, kan rilru pawh a dam ta huai a.

     Inneih nî atân kan inbuatsaih chho ta nghal a, kârthum vel a la awm tihah chuan Dinsângi chu a chau leh ta rîau a, a rang lama in check-up ṭhaa ka hriat avangin Roberta ka phone ta vat a. Ani pawh nupui nei hlim a ni a, chawlh a laklâi a ni tih ka hre tho naa ka ṭhian a nihna avang pawhin ka inthlahrung lo lui a, kan mamawhnain a zir bawk nen in lama lo kal mai turin ka ti ta ringawt a.

     An inneih nî khan inneih inkhawm chhûng  ka awm ve hman hram a, ka pa lama kan chhûngte thingtlâng aṭanga damdawiin rawn pante haw tur ka pa-in thlah tura min tih avangin thlah ka ngaih tak si-ah chuan a lawmna hunah pawh ka awm thei ta lo kha a ni a, ka inthlahrung viau naa Roberta chu ka buaizia hrechiangtu ber a ni bawk a, min hrethiam hle a. Ka tân a ṭangkai tehlul nen nilênga han ṭawiawm ve chu ka duh a, a ngaihna a awm ta ngang si lova, inthlahrun a na duh hle a ni.

     Ka phone hnu rei lutuk lovah chuan an nupa-in an rawn thleng a, a han en vel chuan damdawiin lama indahluh mai ṭhaa a hriat thu chu a sawi ta a.

     "I la chawl si a, engtin nge ni ang?" ka lo ti vat a.

     "Nihnih hnuah ka zawm leh tawh dawn alawm. Tunah pawh in lut dawn a nih chuan keiman amah hrim hrim hi chu ka han enkawl thei tho a, damdawiin lam pawh ka lo hrilh dawn nia," a tih chuan ka thaw huai a.

    Kârkhat hnuah pawh ziaawm lam kan la pan theih meuh loh avang chuan thlá a phang ru duh hle a, inneihni pawh sawn leh mai tur em ni ang tiin kan ngaihtuahna a buai hle a. Dinsângi nu leh pate chuan sawn an han rawt deuh a, keini lamin la ngaihchan deuh kan tih avangin kan ngaichang ta rih a..

     Pathian kan au nasa a, a nu phei chu chawngheia ṭawngṭai chângte pawh a nei hial a. Pathianin kan dilnate chhângin ziaawm lam a pan ve ta hret hret a, inneih hma nithum la awmah chuan kan inlachhuak thei ve leh ta hlauh a, theih ang angin kan inbuatsaih chhunzawm leh nghal map map a.

     Dinsângi chuan ṭhianah Lawmi a hmang dawn a, kei chu Roberta'n min dinpui dawn bawk a, eng emaw tawh palh hlauhthawn thu-ah Roberta chu ka nu leh pate thu min rawn angin ṭhian atan ka hmang dawn a ni. Inneih nî thlen hma chiah chuan Dinsângi  roomah kan palî-in kan awm a, a thawmhnaw ṭhenkhat chu Lawmi chuan a remsak hlawm a, keini pahnih chu a khumah kan ṭhu a. Roberta chu damdawiin lamah emergency a awm avangin an rawn ko a, tlaiah rehearsal neih tur a nih avangin chumi nang hmana rawn let tum chuan a kal ta nghal a.

     "I buaina chauh ni tura min neih i tum hi pawi ka ti!" a khuma bawhzal pah chuan a ti sep a.

     "Khatiang thu kha sawi tawh loh ka tiin ka hria a!" a bula mut pahin a kawngah ka kuah nghal a. Lawmi eitur la turin a kal a, kan pahnih chauhin kan awmdun a.

     "Ka sawi lo thei lo a ni. Ka dinhmun hrechiang chunga min neih i tum hi ka lawm a, chutih rualin nakinah nangma natna thlentu mai ka la ni dawn a ni tih ka hriatna hian pawi min tihtîr êm a ni,"  a ti leh sep sep a.

     A lu chu ka lamah ka kuai her a, a tukkhumah dawmin ka hmai bul chetah ka pawthnai a, a hmuiah chuan ka fawhsak zauh a.

     "Ka duhthua neih tum che ka ni a, ka lo nâ a nih pawhin ka tuar mai tur a ni. Ka hmangaih che a, ka nupui i nih hun hi nghakhlel takin ka thlir reng a ni tih chiah hi lo ngaihtuah tawh rawh. A bak thildang chu ngaihtuah buai tawh lo la, hlim taka hmalam hun thlir tum hram tawh rawh."

     A ṭawng ve leh hma chuan ka fawp nghal a, a taksa la chak lo deuh nen kham lo tak chungin ka duhtawk vat a, kawngka lama thawm a rawn awm takah chuan thovin ka ṭhu a, Lawmi chu thingpui leh a hmeh châwiin a rawn lut a.

     Roberta chu rinâiin a rei ta phian a, ka call lahin a la thei bawk si lova, min inneihtîrtu tur pastorte in lam chu pan phawt mai ṭhaa kan hriat avangin kan pansan ta a. Kan tlan lâi chuan min rawn call a, a hman chiah tih a rawn sawi chuan pastor in lam chu rawn pan ve mai turin ka hrilh a. Vêng thuhmun kan ni lo bawk nen pastor quarter awmna te chu kan inhrilh chawp ang nial nual a, kan thlen hnu reilotêah a rawn thleng ve ta mai bawk a.

     Rehearsal kan neih zawh chuan Roberta chu damdawiin lamah bawk a tlanlet leh nghal a, keini pawh Lawmi kan thlah zawh chuan  Dinsângi te in lam panin kan tlan haw ta nghal a, a tlai tawh bawk nen rei awm lovin ka haw ta vat a.

      Zanah chuan kan helhhawlh dun nge kan muhil har dun hle a, rei ang reng tak kan inbiak hnu chuan a tuk lamah a chauh ka hlauh avangin kan inbiakna chu ka titawp ta a. Ka dah hnu pawh chuan ka muhil thei lawk lova, ka nupui  a ni rei hman lovang tih chu ka hlau hle a. Roberta ṭawngkamah min hrilh fak lo mah se hun a nei tam lutuk tawh lo niin a lang a, tunah dam angin lang rih mah se nakin lawkah chau takin a awm leh ang a, kan inenkawl ṭha zo lovang tih chu ka hlauh ber a ni.

     Ka harha room aṭanga ka chhuah chuan an lo ri laih laih tawh a, chawhnu lamah daih inneih inkhawm ni mah sela kan kawtzâwl chu a lawmna atân kan hman dâwn avangin an cheimâwi hle a. Ka farnu neihchhun, ka nau Mimii leh a ṭhiante chuan pangpâr khawi tur an lo buaipui laih laih a.

     Chhûngrilah hlauhthawnnain min kam reng lo se chuan hlim leh phur takin ka che ve sauh sauh ngeiin ka ring a, hlim taka hmalam hun thlir luih ka tum ngial pawhin ka hlawhchham titih der chu a ni e. Dinsângi hriatah erawh beidawng leh hrehawm ti angin ka lang duh lova, hlim hmêl takin kan inneih hnua kan awmdan turte ka sawipui ṭhin a, hmalam hun rei tak la nei ni awm takin engkim ka sawipui ṭhin thung a ni.

     Inneih inkhawm dâr a ri a, nidanga dâr ri ka ngaithla liam mai mai ang kha a ni thei ta hauh lova. Ka hmangaih leh duh êm êm Ramdinsângi nena kan inneih dâr a nih miau avangin a rite chu mawi ta bik riauvin ka hria a, a rik chhûng zawng chu ngaihnawm ti takin ka ngaithla reng a.

     Pastor lo dingin, "Tunah hian mo a lo lut dawn a, mipuite kha khawngaihin kan ṭhutna aṭangin lo dingchhuak ila," a rawn tih chuan pawn lam hawi lo turin ka insum a ngai hîal a ni.

     Ramdinsângi chu mo thuam inbelin a nuṭa Ramdinpuia chuan a rawn kailut a, ka bula a rawn dintîr chuan a kut chu lo vawnsak nghal mai ka nap a. A kawr hak chu a mawlmang hle naa a thianghlim sar a, a lu cheimawi nan samlem leh diar mawi tak a khim bawk a. Tunhmaa a tisa mawina kha nei tawh lo mah se ka mitah chuan mo dang aia a nalh lohna bik ka hre lova, ka tân chuan a mawi tawk êm êm mai a ni.

     Inneih thutiam kan chham lâi chuan kan uluk dun hle a, ka chham zo a, a chham ve chuan ka mitah enin thinlung takin a chhamchhuak tih ka hmu thei a, a mittui tling pam pawh chu ka hmuh hmaih hauh lo a ni.

     Zungbun kan inbuntîr dawna a kut ka vawn chuan a khur dar dar a ni tih ka hria a, a zam vangah ngaiin ngaihṭhat lohna pawh ka nei lem lova. Zungbun min buntîr ve tur chu a thuchham a buai ta riau a, a tirah fiahfel takin a ṭan naa a tawplam chu a riat titih ta tlat a. A mitmeng ka en vat a, a meng phê riai ka hmuh chuan a dik lo a ni tih ka hmu nghal a. Roberta chu ka nghawk zauh a, ani chuan hrethiam nghalin a dinna aṭang penchhuak deuhin a rawn en a, chutihlâi tak chuan amaha ding zo lovin min rawn ngheng ta a.

     A taksa chu a zawi ngiai a, a khur dar dar bawk a. Pastor chu engkim hre sa a nih avangin thil awmdan a lo man vat a,  ṭhutpui rih turin min hrilh a, ka ṭhutpui ta nghal a. Roberta chuan a marphû a rawn en vat a, kan chhûngte ve ve chuan min rawn pan nghal bawk a.

     "Ka duat..?" Zawitê-in ka ko a.

     "Umm...."

     "I ṭha em?"

     "Umm..."

     "I chau satliah chauh a ni tiraw?" ka manganna chu ka thup hram hram a.

     "Umm..."

     Zungbun chu min la buntîr ve hman loh avangin a hum tlat a, Roberta chuan a zia leh mai a rinthu sawiin hun hman erawh tlema hmanhmawh theih ni se a ti a. Dinsângi'n a zia deuh tih a sawi chuan pastorin ṭhu chunga chhunzawm mai a rawt a, a duh leh ta tlat lova. Ding chung ngeia tihzawh a duhthu a sawi tak tlatah chuan ka taksa rinchhana dingin zawi sapin, a theih ang tawka fiah siin thu chu a chham ṭha leh a,zungbun chu min buntîr ve ta a.

     A bak chu ṭhu chungin kan tluan ta a, hming sign pawh register bu chu kan awmnaah pastorin rawn kengthla-in kan ṭhutnaah chuan min rawn pe a, kan sign chhûng chuan a ṭhutna lamah a lo han chho leh a. Hming chu kan ṭhuthmunah kan sign ta diat diat a, kan sign zawh vek hnuah Roberta chuan a han dahchho ve ta thung a.

      Inkhawm banah chuan thla pawh la mumal lovin kan inphur haw ta nghal a, Roberta'n eng emaw hmanga a jection hnu chuan a zia chho ta viau a. Inneih lawmnaah erawh rei awmpui duh lovin hunserh zawh veleh room lamah ka hruai chho a, a dun vak lo chung ka mut hahdamtir ta a.

     A muhil hmel chu ka en ngawih ngawih a, mite chu an pasal neih niin hlim leh nuam ti takin hun an hmang ṭhin a, ani erawh chuan inneih thuchham chhûng tak ngial pawh pangngaiin a hmang thei ta si lova, tumruhin luhlul hle lo se chuan inkhawm ban kha a nghak thleng peihin ka ring hauh lo a ni.

     Ka beisei phak bakin miin min hlutsak a, han tawmbo reng chi a nih loh avangin ka nau Mimii chu lo awmpui rih tura tiin ka chhuahsan ta a. Roberta leh Lawmi te lo ṭhutna bulah chuan ka ṭhu ve ta nghal a, chanchin min zawh chuan a muthilh thu chu ka hrilh a.

     "A tihzia hlauh a nih chu! A taksa han hahdam se a zia leh mai ang," a lo ti thuai a.

     Roberta chuan, "Mipui hu a zo lo deuh chu thuhran ni se hmanni lawkah damdawiin aṭangin a chhuak chauh a ni a, a taksa a la fit ṭha lutuk lova, khatia a chau mai pawh kha a mak love, a chhel ka ti zawk ngawt mai!" a lo ti ve bawk a.

     Zanlamah chuan kan boruakin a zir bawk nen chaw eikham hnu lawk chuan room lamah kan chho ta vat a, chaw a ei ve nual avangin amah phei chu a harh ṭha viau a. Roberta'n mi zik huai huainaa awm tam lo tura a duh avangin kan inthiarfihlimpui a ni ber a.

     Kan ṭhiante haw hnu chuan inbual hmasa turin ka hrilh a, a inbual zawh chuan ka inbual ve ta nghal a. Ka inbual zo ka chhuak chiah chu ka phone a rawn ri ve chiah a, Ramesh a lo ni a.

     "Hey, buddy.."

     "Hey, ka lawmpui lutuk che u a nia. Chuan, naktukah ka lawmpuina thilpek a lo thleng ang aw," a rawn ti lauh lauh a.

     Kan inneih hun hmang tura Mizorama rawn zin a tum hle a, a pa nu, a pi a zual tak thut avangin a rawn kal leh thei ta si lova. Damlohna avanga lo kal thei lo a nih avangin ka hrethiam hle a, chuti ni lo se chuan engtikah mah ka ngaidam ngaiin ka ring lo a, a chhan chu 'ṭhian' tia ka sawi ngam tlemte zing ami kha a ni tlat a, ka hlimni min ṭawmpui tura ka duh berte zing ami a nih vang a ni.

     Kan inbiak zawha khum lam ka en chuan Dinsângi chu a lo mu fel diam tawh a, a mit a chhîng chial a, a chhîng satliah nge a muhil tih chu ka hmu phak lova. Mu tura ka inpeihfel hnu chuan a bulah chuan ka inthawlh ve ta a, dimtê-in a kawngah chuan ka kuah a.

     Rawn inletin min kuahlet a, a mit chu rawn meng dîar dîarin ka hmuiah chuan a rawn fawp zauh a, a inlahrang tur chu kuahbetin duhthawh takin ka fawh chhunzawm nghal hmiah a. Ani pawh chuan uar taka min chhângletin inthlahlel lutukin kan infawp a, a taksa lawngah chuan chul kualin ka duhthawh telh telh a, a hnuteah ṭhamin ka fawp uar tulh tulh bawk a, a rawn thawk rik tak hrawihah chuan ka thlah ta hram a.

     Kan thaw dun hlawp hlawp a, tlema ka thawk a pangngai leh deuh hnu chuan ka lamah hnukhnaiin duat takin ka kuah a.

     "Tihpalh aw, keimah lam chauh ka lo inngaihtuah a, i ṭha em?" zawi supin ka ti a.

     "Umm....." a thaw hle hle a.

     "Muhil ang aw?" A sama chulsakin ka ti a.

     "Pasal neih zanah virginin ka mu anga maw! I nupui hi i it miah nang e?" Nui seiha min en chungin a ti a, ka mitah a tluka duhawm an awm mawlh lo a ni.

     "Ka duat, i chau si a, hun kan la ngah alawm. Mu hahdam phawt la, i taksa a fit deuh hunah ka hmangaihna che hi a takin ka lantîr dawn alawm. Chuan, he khawvela hmeichhia zawng zawng zîngah ka nupui hi ka it ber!" A hmuiah chuan ka fawhsak zauh a.

     Dik tak chuan insum har ka ti a, chetziaa ka taa siam chu ka nghakhlel tak zet a. Mahse, mahni hma sial taka ani damṭha mang lo laka ka chákna tihpuitlin chu ka tum hauh lova, a taksa-in a la zo lovang tih ka hlauh avangin ka theihtawp tak meuhin ka insum rih a ni.

     Ka lamah chuan min si chetin a rawn tawlh hnai a, a kut chuan ka taksa chu a chûlkual riak riak a, ka hmuiah chuan a rawn fawp a. A duhtawk leh mai dawn emaw ka tih laiin uar zawkin min rawn fawp ta a, a chetdan chuan min ṭhawn deuh avangin lo fawhlet mai nachâng pawh ka hre lova. Ka taksa a chul kualna ringawt pawh chuan zauthauna nasa lutuk min pe a, min fawhdan lah chu a ril tawlh tawlh mai si a. Ka insûm theih phak bak a thleng takngial dawna ka hriat avang chuan tlema inlahrang deuhin a biang tawn tawnah chuan ka vuan a, a mitah tak chuan ka en a, a lo meng phî chîai a.

     "I thiltih hi i hria em?" Ka ti sup a.

     "Aw..."

     "Khatianga i awm leh a nih vaih chuan ka insum thei dawn miah lo a nia, chu chu i hria tiraw?"

     A lu chu bu nghatin a bawp pakhat chuan min rawn kherh a, ka awmah chuan a chûl kual zai zai a.

     "Khawngaihin duhtawk teh!"

     "Insum lo turin ka duh che!" ka bemg bulah chuan a rawn ti sa sa a, ka kut chu la-in a kawngah min kuahtîr nghal a.

     "Ka duat...?"

     "Umm.."

     "I chiang chiah maw?"

     Ṭawngkaa min chhâng lovin a chetziain a lantîr a, ka hmuiah chuan a rawn fawp leh a, insûm thei tawh bik lovin duhthawh lutukin ka lo fawp let a. Ka tinâ ang tih hlau takin, dim hleithei si lovin ka che a, tunah chuan Ramdinsângi chu ka nupui dik tak a ni ta.

BEISEINA...!!
Sbk Pachuau

Chapter 12


     Ka nupui Ramdinsângi muhil lâi hmel chu ka thlir vang vang a, hahdam hmel takin a thaw sêk sêk a. A hmel chu ka ngaihbel vang nge ni tisenin a kap angin ka hmu a, ka hmusual a nih ringin chiang lehzualin ka en a, ka lo hmusual hauh lo a.

     A hmelṭha tak kha hmuh tur awm tawh lo mah se ka mitah chuan a la ṭha reng a, chu tisen tlemtê-in a lo kap ringawt pawh chu ka hmuh hmelṭhat zual phah a, ka hawisan phal meuh lo chu a ni ber a. Ka en reng lai chuan a kutin a hmai chu tlemin a rawn hliah a, a hmêl ka la en duh avangin a kut chu dintein ka la sawn a. Ka awmdan chu siam remin amah si chetin ka tawlh hnai a, a hmuiah chuan ka fawhsak zauh a. Rum deuh ṭiah ṭiahin a zimar ar ar a, a mit chu rawn mengin min rawn nuih var var a, ka lo nuih let ve suk a.

     "Good morning, ka pasal duhtak!"

     "Ka nupui duhtak, i chau em?"

     "Chau love, ka muttui kher mai!" A ham zui bái bái a.

     "I mut a la chhuah chuan i muhil leh thei reng a nia," ka tih chuan ngaihtuah chhuah nei niawm takin phawk zetin min en a, ka bán chu lakangin ka sana bun chu a en nghal a.

      "Lalpa leh..... engtin nge hei chen chen hi ka mut theih zawk le! Inneih tuk aṭanga thawh han hai nghal ringawt mai chu a va zia lo tak!"

     Hmanhmawh takin rizai chu a hlim a, thawh tumin a inbeng kang nghal a.

     "Mu mai mai teh, thawh hma a ngai kher hleinem. Tuman tho hma turin an phut lovang che, mu nilêng mah la engah mah an ngai lovang," kuah mut leh pah chuan ka ti a.

     "Ka nu chuan hria se min hau dawn a nih hi, mo thar tuka thawh han hai nghal ringawt mai chu! Min lo kaitho la ṭha tur a nia," inthiam loh hmel takin a ti leh niah niah a.

     "Tho pawh ni la tihtur a awm chuang hleinem, rawngbawl turin nula an awm a, in chhûng tifel tur an awm bawk a, i lo ngaihtuah buai a ngai lo. Tunah chuan keimah chiah hi min ngaihtuah la, i pasal hi min tilawm hle la a tawk a ni mai."

     "Mahse, chutiang ringawt......"

     Sawi zawhtir lovin a hmuiah chuan ka fawhsak a, min nemsawn a tum chuan a tukkhuma vuanbetin ka fawp uar sauh a. A kawr chhûngah zenlutin a taksa lawngah ka chul takah chuan a thaw hak a, min fawp let ve ta a.

     A chung aṭanga ka lehthlak chuan kan la thaw dun hlawp hlawp a, duat taka kuahin a âwm ruak kâng chu ka chúl rîak ríak a. Amah si renga ka awm chuan insum har ka ti a, a hriselna ngaihtuah lêk lovin chin tawk nei lova chet lak ka hlau a, inthunun har ka ti êm êm bawk si! A taksa dawrâwm tak chunga kei ang palian ve tawk tak duhtawka han chet chu a dawl zo lovang tih ka hlau a, chuti chung chuan ka insûm thei lawi si lo chu a ni ber e.

     Inhnuaia kan chhukthlak chuan Lawmi pawh a lo thleng phei ve chiah a, Hlua pawh a lo awm tawh bawk a. Robert erawh damdawiin lama kal hmasak a ngaih avangin a hman hun hunah rawn kal a tum tih min rawn hrilh a, kan in lama chaw ei nghal tura ka tih chuan hnial lem lovin annu a rawn hruai tur thu a sawi nghal a.

     Nimin lamah thla kan lak mumal loh avangin thla la turin chhuah kan tum a, Dinsângi awmdan azir nise tiin kan rêl a. Rin âi taka a ṭhat zui tak reuh phian avangin kan ṭhiante ho chu ka hrilh kual a, ka rinai takin an lo thleng hma a ni.

     Lawmi chuan Dinsângi thawmhnaw a rem felpui a, kan room lamah an awm a, inneih lawmna atana kan thil cheina leh bungruate an lo senghawina lamah Hlua nen chuan kan vir buai ve zak zak thung a. Roberta te nupa an lo thlen chuan intifaiin chaw kan ei ta nghal a, kan chhuah meuh chuan chawhnu a hnai thuak tawh a ni.

     Kan thlalakna hmun chu Aizáwl aṭanga hla lutuk lo a ni a, Roberta nupui Muani pate huan niin thlâm nuam tak an sa a, tui chenna tur pawh a awm vek a, picnic spot tenau a ni ber e. Kan duhtawka thla kan lak hnu chuan ṭhian dangte chuan tui an cheng hlawm a, keini pahnih chu thlâm chhûngah awmin Dinsângi chu ṭhutthlengah ka mal lukhamin a mu diai a, a khat tawkin ka zu fawp leh zauh ṭhin a.

     "Hriat, nau ka pai theiin  i ring em?"

     A thil min zawh chuan min tiphu zawk a, a chhan chu he thil hi a hma pawha ka ngaihtuahna tibuaitu a lo ni tawh tlat a ni.

     "Pai theih loh nachhan tur a awm hleinem. Mahse, hmanhmawh lo ila tiraw?"

     "Kei chu fa neih vat ka duh a..."

     "Eng vanga neih vat duh nge i nih, ka duat?"

     "Ka lo kalsan palh hlauh che pawhin i khawhar hnemtu tur a awm...."

     A hmuiah ka kutzungchal ka zu dah a, ṭawng zawm tawh lo turin ka mitmei nghal a.

     "I tel lova awm ka duh hleinem! Min kalsan hi ka phal ngai dawn lo, kan pahnihin kan beilet ang a, i natna hi chu kan hneh êm êm ang. Pathianin min pui ang a, kan inhmangaihna hi pár vultîr zel turin mal min sawm dawn alawm," ka ti a, ka thinlung zawng zawngin ka thil sawi chu thleng dik se ka ti bawk.

     "Hriat..?"

     "Umm...."

     "Ka lawm e aw!"

     "Eng thil nge ka tih leh tak le?" nui chungin ka lo ti a.

     "Nupuia min neih avangin ka lawm a,  min hmangaih avangin ka lawm a, engkima min hriatthiam zel avang hian ka lawm bawk."

     "Lawmthu kan inhrilh zel dawn a nih chuan thil dang sawina hun kan nei tlem hle dawn a nih chu! Kei pawhin lawmthu hrilh ve reng che ka duh dawn si a," nui var var chunga ka lo tih chuan tlema zak hmel pu deuhin, no fahran si hian min melh ralh a, ka lo tuar zo leh pek lova.

     Kun hniamin a hmuiah chuan lungchim takin ka fawp a, min lo chhâng nghal vat a. Kan infawp rei tawlh tawlh a, kan duhthawh dun tulh tulh bawk a, kan awmna hmun theihnghilha hmangaihna chenpui mai lo tura ka insum a ngai ta hîal a.

     Kan ṭhiante tui cheng zo an rawn luh chuan kan lo pangngai chho leh hman hlauh a, chuti ni lo se ka ṭhiante pahnih chuan ka mitmengah ringawt pawh min man chiang hle dawn tih a lang reng a, Dinsângi zahna tur tawk lek lekin min chhaih leh reng dawn a, chu chu ka duh hauh lo a ni.

     Muang chângin haw turin kan insiam a, haw kawngah pawh hmanhmawh lem lovin kan inzui a, mipa hovin a hran ṭheuha motor kan ken avangin kan pathum chuan kan inzui thliai thliai a. Kan hnena zanriah ei leh vek tura ka sawm avangin kan in kan pan ding nghal a.

     In kan thlen chuan ka nu leh pate chu  kan thawmah an lo tlanchhuak vat a, kan haw min lo lawm chu ni bawk mah se Dinsângi ṭhat leh ṭhat loh an rawn ngaihven a ni mah zawk a. Ka nu nena inkai rial chunga inchhung lam an pan chu an hnunglam aṭangin hmuhnawm ti takin ka thlir zui vang vang a.

     Zanriah eikham chuan Roberta te nupa an haw nghal a, Hlua leh Lawmi an la awm thung a. Eng eng emaw sawia kan ti ti lai chuan Dinsângi chu ngawi renga thovin a kal a, eng emaw ti lawk tura kal sawn a nih ka rin vangin ka lo ngaihsak tehchiam lem lova, Hlua ti ti chu ka ngaithla chhunzawm leh mai a.

      Ṭe ṭhawt ri leh min au thawm ni awm tak ka hriat rualin kan awmna sitting room aṭang chuan rang lutukin ka tlanchhuak nghal a, kan room panna stepa Dinsângi lo tlu zawi reng chu ka hmu nghal a, a bulah chuan Mimii leh kan nula chuan mangan hmel takin kaihthawh tumin an lo buaipui mek a.

     An bul ka thlen phei chuan ka pawm kang a, kan room lamah ka pawm chho a, kan khumah chuan ka muttir nghal a. Ka hnungah chuan Hlua leh Lawmi leh Mimii an lo lut bawk a, Hlua chu Roberta phone nghal tura ka hrilh zawh chuan Dinsângi chu ka ngaihven san leh nghal a.

     "Ka duat..?"

     "Umm..." a aw chu a ri  chhuak mang lova.

     "Na i nei em?"

     Min chhan loh avang chuan tlemin ka sawi che dat a, a mit chu a rawn meng dîar dîar a.

     "Na i nei lo em ni?"

     "Umm...."

     Hlauhthawnna nasa lutuk ka thinlung chhûngrilah a rawn awm a, Roberta te nupa an rawn thlen chuan tlemin ka thaw a veng deuh a, chuti chung pawh chuan la pik tak ka ni. Roberta te chu Muani nute in lama an pen kawi avangin an in pawh an lo la thleng lova, a pizawnte in aṭangin an lo let leh a lo ni a.

     Mimii chu ka nu leh pate hrilh turin ka ti a, kan kohhran upa pakhat nupui damdawiin awm chhuak kanin an kal a,   anni pawh chu an rawn thleng rang hle a, ka nau-in a hrilh veleh an lo tlan haw nghal a nih ka ring mai a.

     "A taksa a rim deuh a, inneih boruakah mipui chim luih luihin in awm rei deuh bawk nen vawiin lamah kan chhuak thawlêng leh bawk si a, a zo lo a nih hi. Tihian han mu hahdam se, naktuk lamah a la zia loh chuan kan en ṭha leh dawn nia. Duhthusamah chuan damdawiin lama incheck-up a ṭha ka ti a, lo kalpui ula chu a tih chi zawkin ka ring!" Roberta chuan a ti a.

     "Ṭha i tih ang chuan a ṭul ta a nih leh kan lo kalpui ang. I lo awm hlauh a, thlâ i timûang e," ka pa chuan a lo ti a.

     "Tikhan a mu ṭha thei ang maw?" ka nu chuan ngaihtuah hmel takin a lo ti ve a.

     "Aw, muhil thei ang. Ka chiu ang a, buaina a awm lo turah ka ngai," tiin damdawi hming a ziak a, Hlua chuan lo la vatin Lawmi nen chuan an inzui chhuak nghal a.

     Hlua te pahnih an lo let leh chuan Roberta chuan a chiu nghal a, tui taka muhil hi ang berin ka hria a, ka koh apiangin zawitê-in min la chhâng thei zel bawk a, eng em kan ti lo turah chuan ka ngai ve deuh a.

     Chumi zan ka mu chu ka nghet lo hle a, muthilh loh ngawt chu nia ka hriat si loh avangin ka chhîng zeuh zeuh ang chauh a ni a, ka muthilsan rei ngam lo a ni ber e.

     Zîng lamah chuan tlemin a zia deuh naa incheck-up hrim hrim chu ṭhaa kan hriat avangin chaw ei kham lama damdawiin pan chu kan rêl a. Ka nu chuan Dinsângi nu leh pate chu phone-in thil awmdan tlangpui chu a hrilh a, ngaihtuahawm lutuk a ni lo tiin an rilru ṭhâwng lo thei ang berin chanchin a hrilh a.

     Tukṭhuan ei kham chuan kan insiam nghal a, Roberta ka biak lawk tawh avangin hmanhmawh lutuk lovin kan inphur chhuak ta a. Damdawiin kan thlen chuan an lo buaipui nghal sawk sawk a, Roberta chuan en nghalin a thisen te chu en turin an la leh bawk a. A ṭul anga an en zawh hnu chuan tlemin amah pawh a lo harh ve deuh ta bawk a, kan hawpui leh ta a, a thisen test result vel chu Roberta chuan a lo ngaihven zui mai tur thu a sawi a.

     In kan thlen hnu chuan ka nu-in eitur a siamsak a, a ei tam lo naa a harh phah hle a. A nu leh pa an lo kal ta bawk nen a zia chho hle a, zan lama ka mut mumal loh avangin a mutna sîra ka tluzâl chu ka lo muhil daih a, ka mu tui ta phian a.

     Kut vawt thlerin ka taksa a rawn tawh chuan chiang lo ruaiin ka harh a, ka hmuia a rawn fawh zauh chuan kuahbetin ka fawp zui nghal a. Hah hmel taka a thaw ri ka hriat rual chuan ka mengchhuak zawk a, zawitea nem sawnin a hmel chu chiang takin ka en a.

     "I ṭha em? I zia deuh em?"

     Ngaihtuah chiang hauh lova ka lo fawp kha ka inthiam lova, ani dam ṭha lo chau tak mai ka lo kuahbet zui bawk nen a chauh zual phah hlauhthawnna ka nei chawpchilh a.

      "Ka ṭha alawm, i mu rei lutuk a, ka ngai tawh che a, ka lo kaitho ringawt che a nih kha," nui var var chunga a lo tih chuan ka thaw huai a.

     "Ka tinâ ta che emaw tiin ka hlauthawng hman alawm!" kuah pahin ka ti a.

     "Nang hian min tina ngai lovang. A ni lawm ni?" min melh ralh a.

     "Ka tina ngai lovang che, ka ti na phal bawk hek lo che."

    "Ka hria alawm! Kei pawhin min tihnat hi ka phal ngai lovang."

     "A nih, tihian ka tinâ che em?" A bîangah chuan ka fawhsak zauh a, a lu a lo thing vat a.

     A hmuiah fawp leh zauhin, "A nih, tihian...?" ka ti leh a.

     Ka nghawngah rawn kuahin ka hmuiah chuan a rawn fawp de de a, chutah uar lehzualin a rawn fawp leh a, ka lo chhânglet ṭha kher mai!

     "Tikhan i fawhna-in min tihnat lohzia chu i hrethiam mai em?" a hmui la hnawm chap chu ka lo en reng a.

      "A tina lo tak zet a nih chuan fawh reng che ka duh dawn a nia, i ning lovang maw?"

     "Ka ning ngai lovang che!"

     Ka fawp a, ka fawp nawn leh a, ka fawp kham thei lo a ni ber e.

     "Ka nu-in ka nu leh pate chaw ei turin a sâwm a, zu chhukthla ve tawh ila?"

     "A tihzia hlauh chu! Ka lo muthilhsan daih si a, an haw ta daih emaw ka ti zawk a, an la awm hlauh chu a ṭha e. Ka inbual lawk ang a, kan chhuk dawn nia," tiin ka tho chhuak a, inbual turin bathroomah chuan ka lut ta nghal a.

     Inhnuaia kan chhukthlak chuan ka pa chuan side table chunga parcel awm chu min lo kawhhmuh a, ka va en chuan Ramesha min rawn thawn a ni tih ka hre nghal a. Ka hawn chuan ka rin loh lutukin Victoria Memorial lem nalh lutuk tak mai hi a lo awm a, a tak nen a inan lohna chu a lian ve lova, a chhûngah a luh ve theih loh tih chauh chu a ni mai a.

      Ramesh hi construction lamah a tui hle a, thil han siam neuh neuhte hi nuam a ti a, project kan neih reng reng pawhin a thil siam thiam zâr ka zo ve ṭhin a. Lemziah a thiam a, thil siam a thiam êm ëm bawk a, point ṭha tak kan hmuh phah ṭhin a ni.

     Parcelah chuan Victoria Memorial lem chauh chu a awm lova, Dinsângi nena kan lem a ziah, frame sa thlap chu la chhuakin ka en vang vang a, kan nupa thlalak min dil kha  entawnin a ziak a ni tih ka hre nghal mai a. Dinsângi chu a nihna âiin a ziak thau hret a ni tih ka hmuthiam nghal a, kan lang ṭha dun hle a, a ziak thiam bawk nen thlalak nen danglamna a tam lo hle a ni.

     Ka phone chu phawrhin Ramesh number chu ka dial nghal a, hlim hmel takin min rawn chhâng a. Kan inbiak lâi chuan kan lem a ziah lungawi hmel taka ka nupuiin a thlir chu ka en reng a.

     "In lem ka ziah kha ka hmanhmawh deuh avangin ka duhthu a sam lova, Bhabi bulah khan thupha min lo chawisak mai teh aw!" a rawn ti lauh lauh a.

     "A ṭha lutuk tlat! I bhabi pawh a lungawi a niang tunah pawh i lemziah kha a thlir reng mai," ka tih chuan hlim takin a rawn nui hawk a. A thiltih ngaihhlutsak  nuam a ti tih ka lo theihnghilh deuh tawh kha ka hrechhuak leh nghal a.

     "Hriat, i ṭhianpa hian min ziak thau deuh a, ka lang ṭha ve deuh a nih hi tiraw?" Dinsângi'n a tih chuan lemziah chu ka en ve vat a.

      "Ni love, a ziah thau vang che ni lovin i hmelṭhat vang hrim hrimin i langṭha zawk alawm!" ka tih chuan ner nângin min lo en a, ka lo nuih sak thung a.

LALNUNPUII
Sbk Pachuau

Chapter 13



    Zanriah kan killâi chuan ka pa chuan min en leh vung vung ṭhin a, ka hmuiah thil ka tikâi a nih ringin ka'n tuai ringawt a!

     Chaw eikham chuan ka roomah awmin ka thawmhnaw ka chingfel a, Nunsânga rawn kal hmaa hun khawhralnan ka rem ṭha vel a. Ka pa a rawn luh pawh chuan ka lo la insam buai hle a, ka khumah chuan ṭhû-in a aw chu a thian kharh a.

     "Bawihi, ngaihzâwng lam hi i ngaihtuah lo rîau e ka lo ti a, tunah pasal neih i lo rilruk der tawh zawk a!"

     Ka pa chu ka en vat a, thutak fê hian min lo en a.

     "Vawiin tlaiah Ramnuna khan in pahnih chungchâng hi min hrilh a, unâu anga kan lo enlâi che u-in unâu angin in lo inen ve hauh lo a lo nia. A nupui man tur ka tum ang ka lo tih rauh rauh lâiin ka dawng zawk dâwn a nih hmel riau mai!" A thusawi tawp lamah chuan nuihza hmêl a pu deuh a, kei lah chuan lai fahranin ka kawr thlehlâi chu ka thlep ṭha chhen a.

     Ka ngawih reng avang chuan ka pa bawk chuan, "Pasal neih chu i duh tawh rêng rêng em ni?" a ti leh a.

     "I phal leh phal loh athu a ni mai," zawitê-in ka lo ti sep a.

     "I nu khan Zâma nena inzui ang khan a sawi bawk che sia! Eng nge thil awmzia chiah hi ni le?"

     "Zâma nen chuan ṭhian angin kan inkawm, a bak engmah a awm lo." Ka nu thu lo vaivir veldan chu hrilh ka'n tum deuh zuau a, mahse, Nunsânga nena kan inkâr a ṭha leh tawh tho bawk a tiin ka hrilh leh duh ta lova.

     "A ṭha e. Pasal neih hun lo zawk zawk i ni tawh bik lova, i duhtak i neih ngei chu ka duhsak ber che alawm."

     Puipuii'n min rawn koh takah chuan kan chhukthla dun ta nghal a, sitting roomah chuan Nunsânga chu a lo ṭhu reng tawh a, ka pa chu reilotê a ṭhut ve hnu chuan an room lamah ka naute chu a luhpui ta daih a, Hruaii lah a roomah a awm daih bawk si nen kan pahnih chauh chuan kan ṭhu ta ran a.

     Ka bulah chuan rawn insawn pheiin insi rialin kan ṭhudun a, min kuahin kei chu a darah chuan ka lo bei ve thung a.

     "Dawrah khan i pa ka biak duh avangin in rualin ka haw ta lo a nih kha aw!"

     "Ka pa-in min hrilh a."

     "Engtin nge a tih?"

     "Ka thutlukna ang ang chu a pawm vek dawn tih a sawi a."

     "A nih chuan kâr tharah khian palâi rawn kal se a ṭhat dawn chu," a ti sup a, ṭawngkaa chhâng lem lovin ka lû ka lo bu ringawt a.

     A sawi ang ngei chuan palâi chu an rawn kal ta a, ka nu hmêlah chuan lawmna hmuh tur a awm meuh lo a ni ber a. Mahse, engah mah ka ngai lo lui ve tlat a, ka pa ber ka lamah a ṭang tlat a, ka pa hi a hlau tih ka hre ve tlat bawk si nen ani lo lungawi lo ve ringawt chu ka théngtháwngah a kal lem lo a ni.

     Zâma pawhin min lawmpui thiam hle a, khatia Nunsânga nena kan intihthiam loh chhûng zawng pawh khan a bulah ka inbunruak ṭhin a. Ṭhian ang bakin ka en thei lo tih a hrechiang bawk a, Nunsânga nena kan inṭhen pawh kha remchânga lak a tum hauh lova, kha vangte pawh kha a ni mahna ka ngaina zual êm êm a, kan boruak a ṭhat leh hnua ka hrilh pawhin a lawm ve hle a ni.

     U Mâ-i pawh a ziaawm chho ve zel a, ṭawngṭai mi leh Pathian ṭihmi a nih vanga ṭha chho leh ta-ah ka ngai hmiah a. A chhan chu, a nunah hlemhletna, sualna leh mahni hmasialna engmah hmuh tur a awm lova, a taksa a chauh deuh lâi pawh khan Pathian kutah a innghat tawp a. Eng anga enkawlna ṭha pawh dawng se Pathian remruat sa chu mihringin an dang thei chuang lova, hun a tih hunah chuan a nunna chu a la dawn tho tih a hrechiang a, doctorte remti lo chung in lama inlachhuak ta kha an ni reng a.

     Zâma hian nupui ṭha tak nei se a ti ṭhin a, kei kha min beiseiin ka nu bulah pawh a lo sawi zauh zauh ṭhin a lo ni a. Khatia Zâma nena kan han inkawm chhoh takah khan a lo lawm êm êm a, ṭhian ang chauhin ka en tih a hriat khan pawi a ti viau a. Mahse, rilru chhe tak pu mi a nih loh avangin tihluihna leh kawng danga inkawptîr erawh min tum lem lo a ni. Tuna Zâma bialnu hi a fel reuh viau a, Záma hi a duh hle a, u Mâ-i pawh a kan ve zauh zauh ṭhin a, ani u Mâ-i pawhin mo atân pawh a iai lem lo niin a lang.

     Nikhat chu, Remruata Aizawla a rawn chhoha a khawsak ve na ber a nute-i chu damdawiinah a awm avangin Mâmi chuan kanpuiah min rawn sâwm a, tihtur êm êm ka lo nei lem lo bawk a, ka kalpui ta a.

     Inkan hun tawp thleng kan awm a, kan haw dawn chuan Mâmi chu a ril a ṭam avangin damdawiin canteena chawlh a rawt a, kan chawl ta a. Rei pawh kan la ṭhut hma hian Kimkimi leh a ṭhiannu hi an rawn lut ve a, kan ṭhutna piah lawkah chuan an ṭhu a, keini ṭhiandun lo ṭhu chu min hmu ve lo niin a lang.

     Midang mitmei vêng vak lo chuan an ṭawng lar lar reng a, kan ṭhutna a inhnaih avangin an thusawi pawh kan hrechiang viau a ni.

     "Mak ka la ti reng mai, Ramnunsânga nena in inṭhen chhan hi!" a ṭhiannu chuan a ti a, ka thin chu a lo su dup dup thung.

     "Sawi tawh teh suh, ka thin a rim teh mai a nia! Khatiang hmeichhe class lo lutuk laka ka chân hi ka lung a âwi thei lo rêng rêng. A rilru ka hneh ve dawn chiah a, kha mihringnu bawk khan min rawn tibuai leh a, ka va han haw tak aw!" Kimkimi chuan a  ti bawrh bawrh a.

     "A hrim hrimin, nang pawh midang hmu lo i ni bik lova, amah aia ṭha mipa dang pawh an tam a, engvanga atchilh viau nge maw i nih le?" A ṭhiannu chuan a ti leh a.

     "Mipa dang ang ni hek lo! Mipa dang chuan min duh huam huam zel a, ka ning tlat zel alawm. Ani te chu keiman ka tih heuh heuh a ngai zawk a, a pa bawk si. Aaaa.... ka duh ngawih ngawih a ni tawp mai a ni."

     "Chu i hmeichhe sawi chu chhuhsak ve leh hmiah la a ni mai alawm," a ṭhiannu chuan a lo ti leh zat zat a.

     "Lo ngâi reng rawh, ka la let leh dawn khawp. Khatiang hmeichhe naran mai maiin min laksak kha ka tuardam dawn lo rêng rêng. Bumna leh dawt hmang pawhin ka la let leh dawn hrim hrim!" A ṭawng tawplam chu mi hriat hlau ni awm takin zawi tê-in a sawi a, keini chuan kan lo ngaihthlak uluk ëm avang leh kan inhnaih êm avang chuan kan hre thei a ni chauh a.
   
      A thilsawi chuan min tikhur dar dar thei hîal a, Mâmi lah chu a thin a rim êm êm a, khap lo phei ila chuan an bula va kal mai chu a duh a ni.

     "Engti kawng zâwng pawhin neih ka tum bur mai a ni. Ka hlawhtling ta lo a nih pawhin hlim tak chuan an awm bik hauh lovang!" a ti leh barh barh a.

     Ka kut chu ka humruh ngat ngat a, Mâmi chuan kal a rawt ta vat a, ka khur nasa lutuk chu pen pawh harsa ka ti hial a ni.

     Pawn kan thlen chuan thawk ka la hawk hawk a, ka lungphû ri chuan 'dup dup dup' a ti ni mai hian ka hria a, ka âwm chu dawmin ka ding vang vang a.

     "Khatiang khawpa hmeichhe rapthlak kha engtin nge an awm theih zawk le! U Nunsânga'n a lo duh thei miah lo pawh kha ka hrethiam ta uar e. Rapthlak lutuk mai!" Mâmi chuan a ti hlak hlak a.

     Scooty ka keng ve lo hlauh chu tihzia ka ti hle a, tun dinhmunah chuan khalh thei chi hi ka ni lo hrim hrim a. Mâmi scooty dahna kan thlen chuan kan tlanchhuak ta nghal a.
   
     Zana Nunsânga'n min lo biak chuan Kimkimi te ṭhiandun chungchâng chu hrilh ka tum zuau a, ṭul ber nia ka hriat leh tak lem loh avangin ka hrilh duh leh ta lova.

     Palâi rawn kal vawihnihnaah chuan inneih nî tur an ruatfel nghal a, tunah chuan thlakhat erh awrh bak nulatna hun ka nei ta lo a ni ta mai chu a nia, ka duhber ka nei dawn bawk nen ka mumangte pawh a ang rum rumin ka hria a ni.

     Inneih nî atân chuan kan inbuatsaih ṭan nghal map map reng a, inneih hma kâr khat la awmah Nunsânga pawh chawlin a rawn chho a. Mâmi chu a phur berah ṭangin kan in leh an in chu a kár tawn sek a, ka nu erawh ka pa a zah vang chauhin a che ve vel a ni ber e.

     Zâma pawhin a ṭul ang angah min rawn pui a, ani pawh a bialnu nen an inzui nghet ve hle tawh a, hmeichhe fel tak a lo ni bawk nen ka lawmpui tak zet a ni.

    Nunsânga te ṭhiandun leh Mâmi te nen bazâr kan kal a. Nunsânga ṭhianpa hi a thawhpui, Kolasib lam mi a ni a. A felin a bula awm a nuam hle a, Nunsânga ang lo takin a ṭawng duhin fiamthu a duh hle a, min tihlim hle a ni.

     An suit hak tur an ṭhuitîr chu an hak chhin vel chhûngin Mâmi chu a pheikhawk lakin a duhthu a sam chiah loh avangin pheikhawk en turin kan lo va kalsan a, kan kalna tur dawr hming hrilhin an hman huna chuta rawn kal ve mai tur chuan kan hrilh a. Kan luhna dawrah ber kher chuan kan hmuh chak vak loh chu kan va hmu a, Mâmi chuan kal leh nghal mai a tum a, ka lo dang vat thung a. A thiam lo zawk ang maia tlanchhiat vel kha ka ngaihdan a ni ve tlat lo a ni.

     Mâmi'n pheikhawk a bun chhin mawlh mawlh lâi chuan Kimkimi chu kan bulah lo kalin Mâmi chu a rawn bia a, pângngai taka a biak avangin ṭha deuhin a lo chhâng ve mai a.

     "In monu tur chuan in chhûngkaw khawsak phung a rawn man thiam ve êm ang chu tiraw? In khawsak a insanhleih ve angreng si a, a lo mo tirhah chuan a buai ve deuh chu ka ring a ni," Kimkimi'n a tih chuan ka lo sa phat phat a.

     "Engvangin nge a man thiam loh ngawt ang? Kan inte chu a duh duha a luh-chhuahna a ni a, engkim a hre ve vek alawm," lungawi lo tih hriat zet hian Mâmi chuan a lo chhâng hmak a.

     "A ni tak e a, i û neih loh hlauvin a rawn kal sek ṭhin tak e tiraw?" a tih leh chuan ka insûm theihna chu ka hloh teuh hle a. Dawra awm ve dang, a ṭawng  hre phak hovin keimahni lam an lo melh hrek hrek hlawm avang chuan mualpho hlauvin ka insûm hrâm hrâm a.

     "I lo hriat ve mai mai atân ka ṭhiannu hi nang anga zakthei lo a ni ve lo tlat! Ka û zawk saw a ni neih loh hlauva umzui rengtu zawk chu. Chuan, i hrechiang a nih loh chuan mi chanchin sawi mai mai tawh suh ang che," Mâmi chuan a ti leh fak fak a.

     "Awi, a lo nih tak chu! Ka lo hriatdan nen a lo inang lo êm a nih chu mawle!" ti-el tih hriat lutuka nui chung chuan a ti a, min ngei hmel zet hian min rawn melh pah bawk a.

     Mâmi'n chhan leh a tum tih ka hmuh chuan ka lo khap vat a.

     "Hetiang mi pângngai lo thusawite chu thutaka laksak vak chi a ni hleinem, chhâng duh tawh suh. Tihian amahin a in-âng lungawi ve mai ang, ngawihsan mai mai rawh," ka lo ti ve sak a.

     Kimkimi hmêl chu hmuh theih khawpin a inthlak danglam nghal a, thinur lutukin min rawn en a, min sawisak hrep hi a chak hmel ngawih ngawih a, kan awmna hmun chuan zir sela chu min rawn khawih nghal duh maiin ka ring a ni.

     "Zâwngi, khatianga min sawi theihna kha i nei lo, i vak zak lo ve!" tiin thinrim khur hlawk hlawkin min rawn kawk a.

     "Nang pawhin ka chanchin i duh duh danin i sawi a, ka sawi ve a ni mai a, ka zak lo viau tih pawh ka lo hre hleinem," ngai pawimawh awm lo fê hian ka lo ti sam et a.

     "Khatianga min sawi tur khan tunge i nih reng reng? I pasal tur hi ka duh duha ka tihkual hnu a ni tih i hria em?" a thinrim êm avang chuan a ṭawng ring tawh nasa mai si a, dawr chhûnga awm zawng zawng chuan min en ṭhap tawh a.

     "Tu maw i duh duha i tihkual hrep tawh chu?"

     Nunsânga lam chu ka hawi nghal vat a, engtik lâia lo thleng nge tih ka hre lo naa a lo thleng ta chu ka thaw huai a.

     Kimkimi hmêl chu a buai ta nak a, sawi mai tur a hre lo ni ngei tur a ni a bag chu la-in a ṭhiannu chu a kai lawk a, a chhuahpui ta daih a.

     Midangin min en ṭhup avang chuan nuam lo ka ti angreng viau a, Mâmi lah chuan engah mah a ngâi ve der lo thung a.

     "A thiam lo zawk kan ni hleinem, kan zah nachhan tur a awm lo," a ti ve tlat mai a ni.

     A pheikhawk duhzâwng a thlanfel hnu chuan a mante pe-in kan chhuak ta nghal a, kan boruak vel vang chuan ka la pângngai chiah lova. Ka awmdan chu hrethiamin Nunsânga chuan ka kut chu a la a, min hnem tum deuhin nghet takin min vuan a, thlah mai lovin a vuan zui ta zel a.

     Zana Nunsânga rawn kallâi chuan ka room lamah ka lo inchingfel mêk a, ka nauten min rawn koh chuan ka room lama lo chhohtîr mai tur chuan ka hrilh a. A ṭhianpa nen an lo ni a, ka lo inchinghnawk angreng si a, ṭhian a rawn nei bawk nen ka inthlahrung leh hnuhnawh viau a. A ṭhianpa Davida lah chuan engah mah ngai lo tih hriat tak maiin fiamthu nen a ri nghal chul a.

     Chhun lama kan bazarnaa thil thleng velte chu sawichhuakin Nunsânga sawisaknan chuan a hmang zui a, ani Nunsânga lah chu a lo khi suk suk duh chauh a.

      "A ṭawng huai riau mai a, engtin emaw tak chuan in lo induat deuh tawh chu a ang riau a ni," Davida chuan a ti vel a.

     "Dik chiah, ka hriatah pawh khati khawpa chiang khan a sawi ngam a nia, awm chu a awm chiang alawm," tiin ka lo tuihnih ve vat a.

     Chutia ka lo ti chiah chu Nunsânga chuan ka kut chu la-in a hmer vak a, ngâwi rengin min melh a, ka nui hmel pawh chu a teh riai riai-in ka ring.

     Davida chuan dinchhuah hluai pahin, "Inhnuai lamah ka lo zu chhuk ang a, in hman hunah lo chhuk ve mai r'u aw," tiin chhan hman lêk lohin room aṭang chuan a chhuak ta nghal daih a.

     Davida chhuah rual rual chuan min pawmbetin min fawp nghal tawn tawn a, a duhthawhin rei tak inhmuh loh vang vang hnua inhmu leh ang maiin min sawngbawl ni berin ka hria a.

     "Hetianga awm hi vawiin nilêng khan ka chák tih i hria em? Hetia kuah chea he i hmui fawh nuam lutuk tak maia fawh hi ka chák nilêng asin!" ka hmui bulah chuan a phun sup sup a.

     A tukkhuma lo vawn ve pah chuan a hmui chu ka han si de de a, ka hmui ka la sawn leh tur chu phal lovin ka hmuiah bawk chuan a rawn fawp leh a, kan inthlah meuh chuan kan thaw dun hlawp hlawp a.

     "Ka ta i nih hun hi ka nghak rei tawh mah mahin ka hria, vawiinte kha kan inneih nî ni zawk se ṭha tur!" a tih chuan ka lo nui hak a.

     "Nui ringawt suh. Insûm ngâi renga awm hi ka tâna hrehawmzia i hrethiam pha ve lo a nih kha! Kan inneih zan chuan mu hman lêk lovin ka siam che ang a, engtiang chiaha nasâ-in nge ka lo insum ṭhin tih chu i hrethiam ve mai ang," thutak hmel zet hian a ti leh hmuk a, ka nuih chu a la za viau naa ka nui duh ta bik lova.

     Inhnuaia kan chhukthlak chuan Zâma pawh a lo awm a, Nunsânga nen pawh a hma-in an lo inhmu zauh zauh tawh a, an inkawm thei vîau a, ka lawm hle a. Nunsânga hian a hma khan a thik êm avangin ka duh ang pawhin ka kawm ṭha ngam lo deuh kha a ni a, amah nen ber an inkawm theih tak viau-ah chuan kei pawhin inthlahrung lo takin ka kawm zui ve leh ta bawrh bawrh a.

     Ṭhian dang ka kawm lutuk lemloh avangin Mâmi chu ṭhiana hman mai chu ka tum a. Ka nu chuan pasal turte nau ṭhiana hman chu thil tihchi a ni lo tiin min sawiselsak deuh a. Mahse, ka pa-in ka thuruk ka hrilh ngam tur leh ka lungngaih nî pawha ka ṭhianṭha ni thei tur ngei hman tluk a awm lo a tih avangin Mâmi chu hman ka tum ta tho a ni.

   
LALNUNPUII
Sbk Pachuau

Chapter 14



     Inneih hma zanah chuan a lo kal ve a rem loh avangin Nunsânga chuan phone-in min lo be deuh reng a, message min rawn thawn deuh reng bawk a. Ka nuih chu a za angreng viau a, nidangah pawh kârtluanin kan inhmu lo fova, hetiang taka a awm hi ka la hre ngai lova, a kum mil lo deuha a awm hian ka nuih a tiza tlat zel a ni.

     Mutnaah chuan ka helhhawlh vang nge ni ka muhil mai thei lova, Nunsânga nena kan bulṭan dante leh kan naupan deuh lâite chu ka chhuikir neuh neuh a. Kan han tleirawl chho a, naupan lâia ngaihsanna kha ngaihzawnna-in a rawn thlak a, duat taka ka bianga a piaite khan nuam ka lo ti ru veng veng ṭhin a nih kha!

     Ka phone rawn ri-ah chuan ka ngaihtuahna khawvel aṭanga harhin ka la kang ta nghal a, screen ka en chuan amah a lo ni a!

     "Ka rawn tiharh che em?"

    "Tiharh love, ka la muhil lova," ka lo ti thuai a.
qa
     "Min ngaih vanga muhil lo nge i nih thildang vang zawk?" a rawn tih chuan ka lo nui hak a.

     "Thil dang vang ti ta ila?"

     "Ka nupui i nih hunah ka hrem ang che mawle!"

     "I muhil thei lo leh pek a ni maw!" ka tih chuan a lo thaw hak ri chu ka hre thei a.

     "Aw, ka ngai che a, ka muhil thei lo. Ka hmuh a, ka fawh leh phawt loh che chuan ka muthilh theih ka ring lo," a lo ti sup a.

     "Tunah chuan chu chu thil theih a ni lo tih kan hre ve ve. Chuvangin, muthilh tum ila a ṭhat ka ring, inneihnaa mut kham lo hmêl deuha lan ka duh dawn miah lo a nia!"

     "A rei lovang."

     "Eng chu maw rei lovang?"

     "Lo chhuak lawk la!"

     "Eng a! Nang hi i lo kal tihna em ni?" ka au chhuak deuh hliai a.

     "Aw, lo chhuak la."

     Garage bulah chuan lo dingin a bul ka thlen veleh pawn light-in a chhun phak loh lamah chuan min kailut nghal a, thim chin kan thlen rûal rûal chuan min fawp nghal tawn tawn a, kei pawh chuan duhthawh lutukin ka lo chhânglet ve nghal a.

     "Hetianga ka tih loh hi chuan ka tlaivâr thei mai ang tih ka hlau a, nupui neih zana mutchhuah lutuk vanga engmah ti thei lova muthilh ka duh dawn si lova. Chuvangin, he i hmui fawh nuam tak fawp tur hian ka lo kal ta vang vang mai a ni."

     A âwmah chuan beiin a ṭawng zâwng chuan min nghawr dat dat a, ka pasal a ni mai tur hi ka ngaihtuah chian poh leh vannei ka inti a. Hmêl leh pianhmangah  vantlâng chunglam a nih chu thuhran ni se min hmangaihtu leh kei pawhin ka hmangaih êm êm a ni a, ka vannei tak zet a ni.

     "Kal tawh rawh, tlem tal kan muthilh loh chuan a tihchi vak loh ang. Kal la, ka lo thlir ang che," ka tih chuan a lû a lo thing a.

     "Nangmah kha kal zawk rawh, ka lo en ang che," ka hmuia rawn fawp leh zauhin a ti a.

     Hnial mah ila a sawt dawn lo tih ka hrechîang bawk a, hnial buai lovin lut hmasa-ah chuan ka ṭang ta zawk a.

     Zîngah chuan Mâmi ṭawng ri láng lángin min tiharh a, ka khum bulah dingin min lo nuih var var a.

     "Hetianga thawh i hai fo dawn a nih chuan mo ṭha i ni dawn lo tawp mai, mo atân ka iai leh ta riau mai che," nui har har chung chuan a ti a, kei lah chu phak chuapin ka lo nûr nâng thung a.

     Nunsânga te lam an hung ṭha bawk a,  ka beisei phak bakin inneih inkhawmnaah mi an ṭhahnem a, biak ina leng lo pawh an awm nûal a ni awm e! Thutiam chu kan chham urhsun dun hle a, kan thinlung chhungril aṭanga rawn chhuak ang maiin kan chham a ni.

     Kohhran zaipâwl an zailâi chuan ka hnuk a ulh deuh tlat a, ka mit chu ka chhîng ta ringawt a. Ka nu kha ka ngâi hle a, ka nu khan zaipâwl zai ngaihthlak hi nuam a ti hle ṭhin a, tunah thiam tak maiin kei a fanu tân lîau lîaua zâi an ni a, awm ve se chu ropui a tiin a hnuk hîal a ulh leh ngei dawn tih ka hria a ni. Kum tam liam tawh mah se zaipâwlin thiam tak maia Pathian fakna hla an sa a ngaihthlak apîanga a hnuk ulh ziah ṭhin kha ka la theihnghilh thei lo a ni.

     Inneih inkhawm bana thlalak lâi chuan ka beng bulah a rawn phun sup a.

     "Mo ka hmuh tawhah chuan i la nalh ber!"

     A hmêl ka han en chuan a lo nui deuh sak a, a va han hmelṭha tak em! Midang chuan ṭha ber chu a tu ve lo mai thei a, ka mitah chuan tumah tluk tur an awm lo a ni.

     Remruata pawh inneih hmang turin a rawn chho ve bawk a, Mâmi nen an la inkawp char char a, Remruata ṭawngkam aṭangin anni pawh an innei har vak tawhin a rinawm loh a ni.

     Zanlam inlêng tam zawk an ṭin hnu chuan room lamah kan chho a, kan mutna tur khum pawh an lo siamfel sa thlap tawh a. A hma-in Nunsânga chuan hotel vela riahchhuak ka duh leh duh loh min zawt a, kei chuan kan zan hmasa ber chu a seilenna inchhûngah ngei hman ka duhthu ka hrilh a, ani pawhin chu chu a duhdan zawk a lo ve bawk a, a pindanah ngei kan zan hmasa ber chu kan hmang dawn ta  a ni.

     Ka taksa chu a rawn sawi che dat dat a, "Intiharh la, va inbual hmasa ta che," a rawn ti sup a, ka biangah chuan a rawn chûl zauh bawk a.

     Khuma ka bawkzâl kha ka lo muhil zui daih a lo ni a, ka thawh chuan kan ṭhiante pawh kha an lo awm tawh lova. Ka mamawh zualpui tur ka dah bikna bag chu la-in a chhûng aṭang chuan ka inthlakna tur ka lachhuak a, towel la-in bathroomah lam pan chuan ka kal ta nghal a.

     "Inbûal rûal ila!"

     Ka ding chat a, hawileta a hmel ka va en chuan a lo nui var var a.

     "Chi loh lutuk!" ka tih chuan a rawn nuichhuak hawk a, hmanhmawh tawkin bathroomah chuan ka lut ta nghal a.

     Ka inbual zawh chuan ka harh deuh hawk a, Nunsânga inbual hlan chuan khuma lo mut hman loh hlauvin ka che sawk sawk a. Lotion vel ka inchulh zawh chuan mutnaa hak tura ka tih chu ha-in ka sam chu ka khuih leh nial nual a, ka mu ta than a.

     Bathroom aṭanga a lo chhuah chuan ka mit ka chhîng tlat a, a che vel thawm chu ka ngaithla reng a. Ka bula a rawn muta a taksa vawt thlarin min rawn tawh takah chuan ka lo ip chaih a.

     A kut chuan ka hmai chu a nûl kûal zai zai a, ka hmuiah chuan tawpin a kutzungṭang chuan a khawih nep nep a.  A kut a laksawn rûal chuan a hmuiin a rawn bawhthuah nghal zat a, lungchim tak maia min rawn fawh chuan ka lo dawh mai mai bik lo chiang kher mai!

     Min fawh pah chuan ka taksa chu chûl kûalin ka mutkawr hak chhûngah chuan a zenlut a, ka hnute a rawn hum takah chuan ka lo thaw halh a. Min fawp uar sauhin a che duhthawh sawt hle a, engtik laiin nge kan thawmhnaw kan inbel tak loh tihte chuan ka ngaihtuahna a tibuai pha tawh lova, fan ngai loh ram min fanpui takah chuan khawvel leh a chhûnga thil awm dang rêng rêng hian ka rilru an luah chhin eih lo chu a ni e.

     Chau tak chung chuan ka chung aṭangin a letthla tap a, ka chalah chuan rawn fawp leh zauhin, "Ka lawm e aw!" a ti sup a.

     "I la thîanghlim ang tih chu ka ring a, mahse, a tak ngeia han hriat chu ka tân a hlutzia ka sawifiah thiam lo zawk a ni. Ka hmeichhe hmangaih ber ka nei che a, i tâna mipa hmasa ber ka ni hi ka lawm tak zet a ni!"  a bân seipuia min kuah pah chuan a ti leh a.

     Mipa tân hian hmeichhe thianghlim hi eng ang taka hlu nge an nih ang aw tiin ka ngaihtuah neuh neuh a. Thianghlim taka inngâizâwnga inneih zana pasalte hnen ngeia thianghlimna han hlan chu mipa tam tak duhthusam a ni a, chutih rûalin, mipa ṭhenkhat an nula kawp apïangte nawmchenna atâna hman tum an awm a, chung mite chuan nupui atân hmeichhe thîanghlim bawk an duh ve leh tho si a. Hei hian hmeichhe tâna thîanghlimna humhim pawimawhzia a tilang chiang hle a, pasalte hnen ngeia thîanghlimna hlan hmeichhe tân chuan 'a bul ṭan ṭhat chu a zahve zo ang a ni' tih ang khan a pasal nena an hun lo la awm turah a ṭha lam kawng thui tak a sial lawk ve a tih theih a ni.

     Kan inneih aṭanga kârhnih hnu-ah Kolasib lamah kan chhukthla ta a, a hmaa mahni chauha khawhar taka lo awm rak rak ṭhin kha a ni bawk a, ka awm ve ta chu nuam a ti hle a, hnaa an buai viaute a nih loh chuan chhunah thingpui in turin a rawn haw ngei ngei ṭhin a ni.

     A tira ka lo tumdan kha chuan zuithlak loha class kal chhunzawm kha a ni a. Mahse, Nunsânga chuan a phal lo bur a, class kal lova exam dan kan ngaihtuah dawn nia a tih tlat avangin kan inzuithla ta kha a ni a, class kal lova lehkha zir erawh chu a sak ṭalh thung.

     Mâmi pawh chawlh a neih deuh chuan a rawn chhukthla ve reng a, Remruata lawmah a tla a, Mâmi awm chhûng hi chuan kan in hi an in âi mahin a awm tam zawk ṭhin a, mut hun leh chaw ei chhûng chauh tak tak a awm a ni ber e.

     Kan inneih aṭanga thla ngana-ah nau ka pai ve ta a, Nunsânga chu a hlim hle a, min duat sa tawh tehreng nen min han duat belhchhah leh sauh mai chu nuam lo ka ti letling zawk a. Ka remti vak lo chung nula awmpui tur a la bawk a, ka chet a phal lo bur a ni ber a. Min duat khawlo zo dawn tia ka hrilh pawhin engah mah a ngai duh lova, a awmdan ngaiin a awm hmiah hmiah mai a ni.

     Pathian zárah naupai chu ka haw lo hlauh a, ka thil ei a tui êm êm a, keimah pawh ka thauvin ka vunte chu a nung sar mai a, Nunsânga chuan ka nulat lâi aia ka itawm zawk thu a sawi ṭhin a. Kan chhûngte ho lah chuan  rái chu ka ngeihin ka hmêl pawh tunhma zawng âia a ṭhat zawk thu an lo sawi ve hlawm bawk a, keimah ka hlim bawk nen ka hmêl hmuh nuam an ti hlawm hle a ni.

     Chawlhkâr tawpa Aizâwl lama haw chho ṭhin kha Nunsânga'nmotor chuan a phal tak vak loh avangin kan haw ta ngai meuh lova, Ka pa(Nunsânga pa) a lo chhuk zeuh zeuh a, Mâmi a rawn kal deuh reng bawk a, khawhar lutukin kan awm hman bik lem lova.

     Nikhat office aṭanga Nunsânga rawn haw chu a hmêl dik lo riauvin ka hria a, bedroomah lutin min au nghal a, ka va luh ve chuan tukverh bulah kekawr ipte zen chungin a lo ding a.

     "Thil dik lo a awm em ni?" ka ti nghal táwng a, a bulah chuan ka va ding ve a.

      "Aizâwl chho turin lo insiam ta che, Bawihte," Ka kutah chuan a vuan a.

     "Ngati teh thut nge? Thil pawimawh a awm em ni?" amah nghenga nek deuh pah chuan ka ti a.a

     "Vawiin chhunah i pa kha dawrah a tlu a, thisen sâng a nei ve a lo nia. A tlukna lamah a lû a sawh palh a, tunah damdawiinah a awm mêk a. Mahse, chuti lutuka ngaihtuahawm chu a ni lo a nia aw!" Min hnem tum tak chuan nghet deuhin min kuah a.

     Ka thu hriat chuan min deng na hle a, ka pa hi kha leh chen kha ka engkim a ni ṭhin a, ka nu boral hnu-ah phei kha chuan ka neihchhun a ni tak meuh  meuh a. Nupui a neih leh dawn pawhin min râwn thlap a, ka lo phurpui hle a. An inneih tirh lam chuan ka nu chuan min duat hle a, hlim pawh ka hlim hle a. Mahse, thlahnih vel a liam meuh chuan a zia chhuahin ka retheih hun kha a inṭan a ni ber a. Ka la naupan ve deuh avang khan min zuam deuh bawk nen min ankhum nasa thei hle a, mutnaah pawh ka ṭah muthilh ṭum kha a tam zawk mah a. Ka pa hnena sawi ka ngam chiah bawk si lo nen Mâmi bulah khan ka inbunruak nasa thei hle a, kha vanga ka nu pawh haw ta viau kha a ni reng a ni.

     Nunsânga chuan khumah chuan min ṭhutpuiin min kuah tlat a, ka ziaawm deuh hnu chuan insiam tum chuan ka tho a. Ka pasal chuan dimtea min pawtṭhu lehin amah chuan kan mamawh tura a rin ho chu pack-in a siam zung zung a, a peihfel hnu chuan intifai thuak thuakin kan inthlak a, kan nula chu kan awm loh chhûng an in lama lo awm rih turin kan ti bawk a. Kan intihfel hnu chuan kan tlanchhuak ta nghal a.

     Muangchângin a khalh a, ka rilru hmanhmawh chuan tlema tlanchak deuh turin ka tur leh ṭhin a, ani erawh chuan ka tân a ṭhat loh thu sawiin a speed ngai reng chuan a tlan thung a. Kei ka awm ve tak chinah khan bike chu kawl tho mah se motor car chu a la thla tel a, nau ka pai hnu phei chuan bike-a chuan a phal lo bur mai bawk nen chhuahvah nîkhua-ah pawh car hlirin kan kal a ni.

     Kan tlan chak lem lo bawk a, Aizâwl thlen nan darkâr nga lâi kan hmang a. Tlan pahin ka pa chanchin kan zawt pawh reng a, a zia deuh an rawn tih avang chuan rilru pik zualpui a reh a, hmanhmawh lutuk thei kan lo ni lo bawk nen kan tlan chak lo hle a ni.

     In lama tlang lovin damdawiin lam chu kan pan nghal a, ka pa lû chu an lo tuam vár lûk a, a hmêl ka hmuh chuan ka hnuk a ulh a, ka ṭah mai lohnan ka insehruh nasa hle a. Nunsânga chuan ka ka darah kuahin a kut lehlam chuan ka kut chu a chelh tlat a, min hnem tum takin min chelh nghet hle a.

     Ka nu pawh chu a lo ṭhu ngui ve hle a, ka pa hi a duhin a hmangaih ve tak zet tih ka hria a, chuvangin, ka khawngaih hle a. Nunsânga chunga thleng ni ta se ka mangan dan turzia ka ngaihtuah phei chuan ka lainat lehzual a,a bulah chuan ṭhu thla-in a kutah chuan ka vawnsak a. Chutia ka ti chu a beisei lo hle tih makti hmêlah chuan a hriat mai a, mittui tling pamin min en a.

     Chutia kan lo ṭhut lai chuan Zâma leh nurse pakhat hi an rawn lut a, Nunsânga chuan a lo be vat a.

     "Eng nge kan dinhmun dik tak hi ni le?"

     "CT Scan-a a landanah chuan thil ṭha lo engmah a awm lova, a ṭha turah kan ngai. Amah pawh a lo harh har tawh lovang chu maw!" Zâma chuan a lo ti a, ka pa chu a enkual pah zung zung a.

     Thil ei chákna ka nei hauh lo naa chu Nunsânga chuan naute vang tal pawha ei lui tura min nawr tlat avangin Mâmite chaw rawn dah chu kan nupa chuan kan ei a, ka nu erawh kan eiluihtîr thei ta ngang lova.

     Chaw kan eikham hnu lawk chuan ka pa chu a rawn harh ve ta a, kan lawm hle a. Doctor lo kalin a han en vêl a, ṭhat lohna dang a neih lem loh avang chuan kan thaw huai a, a bp sáng erawh control a la ngai deuh dawn a nih hmel.

     Ka pa a lo harh leh takah chuan kei chu min avangin in lama mu hahdam turin min ti hlawm a, Nunsânga pawh chuan a ṭul ta a nih leh kan kal leh mai theih tur thu sawiin min hawpui ta a.

     Ka nâute pahnih chu Hruaii hovin inah an awm a, ka ngaihtuah a rin vang nge ni Nunsânga chuan ka pate in lama riah a rawt ta hlauh a, ka lawm hle a. Ka pa bula kan han sawi chuan ani pawh chuan lo hrethiamin riak tur chuan kan phei ta nghal a.

     An tum loh leh beisei loh deuha kan hmel an han hmu thut chu ka naute chu an lawm hle a, an ṭê chul a. An hlim hmel hmuh chuan min tihahdam sawng sawngin ka hria a, min ngai tih hriat taka min nawk reng maite chu ka lainat zawk hle a. Ka awm loh hnu khan Hruaii kutah an awm a ni ber a, ka nu-in a ngaihsak êm êm si lova, ka pa lah a hnaah a buai ve tawk hle bawk si a, an khawhar ri ve ṭhin hle dawn a ni tih ka hmuthiam mai a ni.

     Ka nulatlâia ka khum chu kan mutna turin kan siam a, feet li lâi chu a ni ve na a Nunsânga a han mut meuh chuan a lang te rawih mai a ni.


LALNUNPUII
Sbk Pachuau

Chapter 15(Last chapter)



     Ka pa chu rin âi takin a ṭha chak a, a lû a sawhna pawhin harsatna dang engmah a thlen lem lova, a bp sâng pawhin ziaawm lam a pan ve hret hret a. Nunsânga chu hna lamah an buai deuh avangin a chawl thei lova, zankhat a riah ve hnu-in a chhukthla leh nghal a, kei erawh chu la awm rih turin min ti a, indim hle turin min chah uluk hle bawk.

     Kârtawpa a lo chhoh leh hnu chuan ka pa pawh a lo ziaawm chho ta bawk a, in lama riah phei tawh ka duhthu ka lo hrilh a. Ka nâute pahnih chu Nunsânga chuan kan in lama an lo phei ve duh chuan hruai phei ve mai a rawt a, ka lawm hle a. Dik tak chuan ka nâute ka ngaihtuah loh vanga in lama haw rawt ka ni lova, Aizâwl haw chhoh chhuna hmundanga awm vang vang mai chu ka pa pawh a zahawm ka ti a. Engmah sawisel lo mah se inthlahrunawm ka ti a, midang ngaihah pawh a mawia ka rin loh vanga rawt ka ni zawk a.

     Ka pasal chhûngte hi an felin hrawn an nuam êm êm vek a, tettê aṭanga ka tlângnel tawhna kha a ni bawk nen keima in ang chiahin ka en nghal thlap thei a. Nuam pawh ka ti a, hmundanga han lenchhuah vel chakna pawh ka nei ngai lem lova. Ka pate in lamah pawh Nunsânga'n kal a rawt a nih lem loh chuan ka kal ngai lova, ka ṭhianṭha ber Mâmi a awm bawk a, tumah dang ka ngâi lo a ni ber e.

     Ka nâute pawh chuan nuam an ti hle a, an school kalna a hlat deuh avangin Nunsânga te naupang ber Tête-a chuan a thlah ṭhin a, an haw lam erawh a hman remchângin an va hruai mai ṭhin a, an hruai hman loh ṭum chuan taxi-in an rawn haw ve mai ṭhin a. Kârkhat vel kan bula an awm hnu chuan ka pa pawh damdawi in aṭangin a chhuak ve ta a, in lama haw phei an hreh chu Puipuii phei chu a ṭap deuh pár a. Ka pa leh Mâmi chuan la awm ve mai se an ti a, kei erawh chuan thil tihchi nia ka hriat loh avangin kan dahphei ta tho a.

     Kolasib kan chhuk leh hnu chuan kan nupa leh kan nula, Pârtei nen kan pathum chuan kan awm leh ta rak rak a, Aizâwl lamah kan ri deuh laih laih ṭhin si a, khua a har ve duh angreng hle a. Nunsânga an hna lama an buai deuh phei chuan inah a awm tam thei lova, site lam a tlawh ṭum phei chuan a rawn haw har ṭhin hle a, Pârtei nen chuan kan lo awmdun mai zel a, a khawharthlak duh viau a ni.

     Ka nâu pai pawhin thla sarih hmêl a hmu ve ta reng mai a, engmah insawiselna leh buaina ka la nei lem lova, ka thil ei a la tui reng bawk. Doctor-in check-up hun a sawi chu kei ai mahin Nunsânga chuan a hre thei a, kalpui ka ngai lo ka tih pawhin engah mah a ngai duh ṭhak lova, a tel ve loh chuan a ngaih a ngam thei lo a ni ber e.

     Nikhat chu, rooma ka awmlâiin Pârtei chuan min au a, ka va chhuah chuan tui a lo haw mek a, kawta kan sintex dah chu a khawilai tak nge keh hriat si loh hian tui a lo far zung zung mai a. A mawnglam aṭanga rawn putchhuak niin a lang a, Pârtei chuan a putna lâi a lo hmu zo lova, a beidawngin min au a lo ni a.

      Sintex hunna hi tlêmin kan tikáng sâng deuh a, step palî vel kalchhoh a ngai ve a. Pârtei chuan a han en kual leh ngial naa a hmuh theih tak ngang loh avangin en  tum chuan stepah chuan ka chho ve ta a. Tuizêm dang kan neih loh avangin a put reng chuan tui hman tur nei lova awm mai a hlauhthawnawm ve tlat a, chuvangin, a putna lâi hmuh ngei tum chuan a mawng lam chu ka bih kual a, châr-tîn bunga kam kan mai a nih vangin a hmuh chian theih bawk si lova. Nunsânga hrilh mai ṭha-in ka hria a, amah a rawn haw hman loh pawhin tu emaw tirh tur a hriat mai ka ring a.

      Pârtei chu be mawlh mawlh pahin stepah chuan ka chhuk a, step pakhatna ka penthla tawh a, a pahnihna ka rap leh chu rappialin ka tla thla ta a, ka dul chu step sîr kilah tak chuan zu tauh fuhin a na lutuk chu ka hriat hnuhnun ber a ni a.

     Ka mit men ka tum chuan ka meng thei mai lova, ṭawng ri ka hriat chuan hla tak aṭanga rawn ri ni mai hian ka hria a,  men tum chuan ka bei leh ngial a, ka la meng pawp zo ta chuang lova.

     "A va harh har tawh ve! Engtin emaw tihdan a awm lo em ni?" Ka pasalin mangan hmel taka a ti ri chu chiang takin ka hre thei a.

     "A harh har tawhin ka ring lo. A taksa hmundang leh a lu lam a him vek a, thildangah hlauhthawn tur a awm lo a nia," pa pakhat hian a lo ti a.

     Ka kut a rawn hum chuan ka lo humlet vat a, thaw hawk ri ka hre zui nghal a.

     "Bawihte, i harh tiraw? Ka ṭawng hi hi hre thei em?" a rawn tih chuan ka theih anga na-in a kut chu ka hmer leh a.

     Men tuma ka beih leh chuan fiah lo ruaiin ka mengchhuak ta a, ka thil hmuh a phê vek a, ka lû a hai hle bawk.

     "Bawihte, nâ i nei em? Engtin nge i awm?" ka pasalin a rawn tih leh chuan zawitein ka luhai thu chu ka lo hrilh sep a.

     Doctor-in min enlâi pawh chuan ka kut chu a thlah duh chuang lova, nghet takin min vuan tlat a.

     Ka lo muhil leh ni ngei tur a ni ka harh leh chuan ka meng nghal vat a, ka thil hmuh pawh a fiah ta hle a, ka luhai pawh a awm ta lo bawk. Ka awmna hmun chu ka hre mai thei lova, damdawiin a nih ngei chu ka ring ve ngawt a!

     Ka tui a hal êm avang chuan tui chu ka lam a, tui bunchhuak thawm ka hriat rual chuan pawn lama Pârtei hmanhmawh taka kalchhuak chu ka hmu vuai a. Ka harhchhuah tirh khan tumah ka hmuh loh avangin keimahin ka awm emaw ka ti hman hial a, awm chu an lo awm ve ngei chu a nih hi.

     Mâmi chuan nui var var chungin tui chu min pe a, na ka neih leh neih loh min zawt nghal bawk a.

     Engmah na ka neih chu ka hre lo naa keimahah eng emaw dik lo awm tlata hriatna ka nei a, kimlo awm tlata inhriatna a ni mah zawk ang chu!

     Kawngka lamah chuan thawm a lo awm a, hmanhmawh takin Nunsânga chu a rawn lut a, a hnungah Pârtei'n a rawn zui bawk a. Ka bul a rawn thlen chuan rawn kunhniamin ka chalah chuan a rawn fawp zauh a, ka kut chu la-in a hum nghal vang vang a.

     Ka mutna bulah chuan ṭhu-in ka kut a  vawnna chu a la thlah chuang lova, engtiang chiaha rei nge nikhaw hre lova ka awm tih ka zawh chuan min chhang nghal mai lovin ka kut chu lakangin a fawp vang vang phawt a.

     "Rei lutuk chu a ni lo. Mahse, ka tân chuan chatuan tluka rei a ni thung!" A ti sup a. "Ka hlauhthawnzia kha i hrethiam pha lo zawk ang, ka chân dawn ta che emaw ka ti hman hîal asin!"

     Thil ka hrechhuak zawk a, ka pum chu ka dawm nghal a. Engtin nge  a hma zawngte khan ka lo hriat loh theih le! Hlauthawng lutukin ka pasal chu ka en a.

     "Naute ..?"

     Ka pasal hmêlah chuan lungngaihna leh hrehawm tihna ka hmu kawpin ka inhria a, rilru nat hmêl taka min enin a lû a thing a.

     Ni lo, ka fa chu ka chân thei lo! Ka neih hun a hla lutuk tawh lova, a hrâm ve tawh lutuk a nih kha! Khatianga tlak satliahah ringawtte chuan engtin mah a awm lovang.

     "Bawihte, inti pachang hrâm hrâm rawh aw! Pathianin a dang min pe leh êm êm ang."

     A chîang a ni! Ka fa chu ka chân ngei a ni. Ka pasal thusawi chuan engkim a tichiang vek a, a pian hun nghakhlel taka kan lo thlir kha piang tur a awm tawh lo a ni!

     Ka ṭapchhuak phawng a, Nunsânga chuan min kuah vat a.

     "Bawihte, insûm hram teh! I taksa kha tihchet vak an la phal lo a nia, an zaina che kha a khawlo palh hlauh ang e!" ka bengbulah chuan a ti a, nghet takin ka lo kuah let a, insum har ka ti kher mai.

     Khatia ka tlakthlaka step kil sîra ka pum ka tauh khan naute chu tauhfuhin thi a chhuak nghal a, Pârtei chuan a pu phone nghalin thil awmdan a hrilh a, Nunsânga chu theih anga rangin a lo tlan haw nghal a. Damdawiinah min kalpui vat a, a rang thei ang bera min zai nghalin naute chu thi sa-in an lachhuak a lo ni a.

     Kan chhûngte ho chu an lo chhukthla deuh vek a lo ni a, ka pate pahnih an lo chhuk a, Têtea leh Mâmi an lo chhuk bawk a, Peka erawh in nghak turin an rawn hnutchhiah thung a.

     Kârkhat zenzawn damdawiina ka awm hnu chuan ka chhuak ta a, min zaina pawh a damṭha viau-in a lang a. Thil ka ei ṭhat loh avangin doctor chuan chhuah a la remti chiah lova, Nunsânga bulah ina haw ka chák tawh thu sawia ka ngen tlat avangin doctor hnenah chuan sawiin kan chhuak ta a.

     Ka chunga thil thleng chuan keimahah nghawng ṭhalo tak a nei a, engmah ka ei chak lova, ka eitui bawk hek lo. Ka muhil ṭha thei lova, mahnia ngaihtuahna kawm ngut ngut ka chîng bawk a, ka bula mite min biakna pawh hre miah lova ka ngaihtuahnaa ka chen veng veng châng lah a tam. Nunsânga chuan min ngaihtuah êm êm a, nikhatah  vawihnih vawithumte a rawn haw ṭhin a, Mâmi'n min awmpui chawt bawk.

     Ka ṭawng ngai mang lova, thil ka ei ṭha lovin ka mu tlêm bawk a, ka cher tawlh tawlh a, ka tla dâwk mai a ni. Nunsânga chuan fa dang kan la nei leh mai ang tiin min han hnem ṭhin mah se hlimna hian min hlat telh telh ni maiin ka hria a. Ka fa kha ka pai lai khan eng ang hmel pu nge a nih ang tihte, kei nge a pa zawk  a rawn chhun ang tihte kha ka ngaihtuah nasa thei hle a, keimaha rawn awm a nih avang khan ka chhûngrilah hian min la chenchilh tlat a ni.

     Lo tauhfuh kher lo ila chuan thla sarihah te chuan nau an dam ṭhin tho si a, ani pawh kha a dam ve ngei ang a, tunahte hian duat takin ka pawm ve ngei awm si a tiin ka ngaihtuah a. Vandûai ka inti êm êm a, stepa ka lo han lawn ve ta kher kherte kha ka inchhir ngawih ngawih a, awmzia a awm tawh der si lo!

     Nikhat chu, Mâmi leh Pârtei ti tina bulah chuan ngâwi rengin ka ṭhu a, ka ngaihtuahna chu ka kawm leh veng veng a. Mâmi te chuan IMEM channelah  zaipâwl zai an ngaithla pah a, zaipâwl zai zawh chuan pa pakhat sermon an rawn tichhuak a. An ti ti tui em avang chuan an thil en pawh chu an ngaihsak zui tawh lem lova, ama rik rik chuan a lo ri bengchheng ve hle a.

     Ka tui a hal deuh avangin tui in turin ka kal a, ka let leh lama thusawitupa thil sawi chuan ka beng a verh ta zar mai a. Joba chungchâng a sawi a, Joba'n a thil neih a chân a, a ṭhiante'n Pathian sawichhe tur an tih pawhin, "Lalpa'n a pe a, Lalpa'n a la leh ta. Lalpa hming chu fakin awm rawh se!" a la tithei zelte kha nun entawntlak a nih thu a lo sawi mek a. Chu a thil sawi chuan keimahah mak tak maiin ka sawifiah thiam si lohin min tiharh ka ti mai, ka awmdan chu ka inenlet a, ka inzahpui ta hle a.

      Kan roomah chuan lutin Joba chungchâng chu ka ngaihtuah nauh nauh a, a thil neih zawng zawng a chán hnu-ah pawh Pathian a la fak thei zel a. Chu mai ni lovin pânchhia-in a bawmkhah vek chung pawha vui lova Pathian a la fak thei cheute chuan ka dinhmun min thlirtir a.

     Fa pakhat ka chân a, chuti chung chuan min hmangaih êm êmtu pasal ka la nei a, ani mai bakah midang pawhin min hmangaihin min ngaihtuah êm êm vek bawk a. Duh duh eia in theiin ka awm a, awh zâwng apîang lei theiin ka awm bawk a, chuti khawpa malsawmna ka dawng nasa chung chuan Pathian lakah vuiin midang zawng âia vanduai taah ka lo inngâi chu a ni si a. Ka ngaihtuah chian poh leh ka zak a, ka inthiam lohna chu nasa tak a ni.

     Nunsânga office ban hun hma chuan inbualfaiin ka lo inchei deuh a, Mâmi leh Pârtei chuan chutia ka intuaihnum leh ka ṭawng ve ta bawrh bawrh an hmuh chuan mak an ti hle tih an awmdanah chuan ka hre thei mai a. Thil awmdan sawi lem lo chuan ka ti ti mawlh mawlh a, Mâmi makti hmel chu hlim hmêlin a thlak ta thuai a.

     Nunsânga lo haw chu bedroom lamah chuan ka zuilut nghal a, a chau em tih leh a hnaah a buai em tihte ka lo zawt a, min chhâng ta mai lo chuan mak ti hmêl fahranin min melh vang vang a, ka bulah rawn kalhnaiin ka darah chuan a vuan a. Chutia min en vang vang lâi chuan a nghawnga kuahin dingdihlipin a hmuiah chuan ka fawhsak a.

     Ka awmdan chuan a ṭhâwng hle tih pawh ka hria a, engmah sawi lovin a aia uar zawkin ka fawp leh a. Chutah zet chuan min rawn kuahin duhthawh lutuk tak mai chuan min fawhlet ta a, kan fa kan chán tak hnua fawh tak taka kan infawh lehna hmasa ber a ni a, kan inthlah mai phal lo a ni ber e.

     "Bawihte, i ṭha maw?" ka awmdan la rinhlelh hmel tak chuan min zawt a.

     A thiamawm tak zet a ni. A chhan chu, khatih chhûng zawng khan mumalin ka be ngai lova, min biakin ka chhâng ṭawk a ni mai a, keima thuin ka be hmasa ngai tlat lo a ni. Min fawh pawhin ka dawh mawl tawp a, nupa nun min hmanpui pawh phurawm loh khawpin ka dawngsawng ṭha ngai tlat lova, min hmangaih hle lo se chuan min pêtchhuak daih tawh hîal mai thei a ni. Nupui awmdan turin ka awm lova, pasalte mamawh phuhru tur takngial pawhin ka laktlak loh hle a ni tawp mai a ni.

     Khatianga mu leh mal nei lova ka awm chhûng zawng khan min dawh char char a, ka awmdan avanga lungawi lo angin a awm ngai hek lo. Ka tâna a hlutzia pawh ka hmuchhuak chiang hle a, kawng engkimah ka pasal hi ka tân a ṭha lutuk tak zet a ni tih pawh ka hriatchian phah hle a ni.

     Chutianga ka ze ngai ka pu leh ta chu kan chhûngte ho pawh an lawm hle a, ka pa(Nunsânga pa) phei chu a rawn chhukthla hïal a. Khatia biak tlak mang loha ka awm takah khan ka chhûngte mangang chuan ka tlaknaah khan ka hriatna lamte ka sawh khawlo a nihte an lo hlauthawng ru deuh a, ka han pângngai leh takah chuan an lawm viau pawh chu a awm hle reng a ni.

     Hlim takin kan nun chu kan hmang chho leh ta a, Remruata pawhin palâi a rawn tîr ta bawk a, hlimna hlirin min hmuak a ni ber a.

     Tukkhat ka zîng tho chu ka ni deuh nghulhin ka inhria a, ka tho nuamlo satliahah ngâiin ka intifai a, Pârtei rawngbawl enpui turin ka chhuak phei ta nghal a. Chokaa ka lo la awm lâi chuan Nunsânga walk pawh a lo haw ve chiah a, lo chiau-au vatin thingpui chu ka lo pe a.

     A bula ṭhu tura min tih avang chuan ka ṭhu ve mai a, dawhkana biscuit chu banin ka ei nghal a. Ka lem rûal chiah chuan ka luakchhuak lutuk chu bathroom lam pan chuan ka tlan ta nghal a, ka luak zawh chuan ka chauh hnawk thei hîal a. Nunsânga chuan min ngaihtuah tih hriat zetin ka hnung chûl chung chuan ka bulah a lo ṭhu thla ve a, ka chau lutuk chuan ka lo ngheng nghal a.

     Khuma ka mut hnu chuan ka thlatin bi neih hun chu ka chhut vang vang a, ni nga lâiin ka lo pel tawh a. A lo ni kher lo mai thei tih hlauthawng ru tak chung chuan ka test ta a, pahnih inrîn ka hmuh chuan ka auchhuak ṭhat a, bathroom kawngka chu a rawn ri zui zat a.

     "Bawihte, i ṭha maw?"

     "Aw, ka ṭha e. Ka lo chhuak dawn."

     Ka test kit ken ka entîr chuan a en vang vang a, chutah, min pawm thutin min virpui ta chîam a. Hrechhuak thutin khumah chuan min ṭhutpui a, duat takin min kuah a, ka chhipah chuan a rawn fawp zauh bawk a.

     Ka nâu pai chu a hma ang bawk khan keimahah harsatna awm lovin ka pai leh a, chetsual palh leh hlauvin ka fimkhur hle a, kei âi mahin Nunsânga chu a fîmkhur zawk emaw tih mai tur a ni a. Ka chet a phal lova, ka inbual pawhin fimkhur taka inbual turin min chah reng a, a châng leh ka inbualnaah te min zuilut thul, keima fimkhur chu thuhran Nunsânga vang pawh chuan ka fimkhur zual phah sauh a ni.

     Harsatna tawk lovin tluang takin nau neih hun chu kan thleng ta a, kan nghahhlelh rûalin kan hlauthawng ru ve ve tih ka hria a, atu amah chuan kan sawichhuak lem lo mai pawha.

.    Ka fapa ṭap ri ka hriat chuan ka chauhnate chu a reh huaiin ka hria a, fapa hmelṭha tak, a pa chhun tak mai ka nei chu ka hlim veng veng a, ka rilru-in Pathian hnenah lawmthu ka sawi mawlh mawlh a.

     Ka pasal duhtak chuan kan fapa chu pawmin duh lutuk tih hriat ngawih ngawihin hmangaihna mitin a en a. Chutah ka lam rawn hawiin ka hmuiah chuan a rawn fawp zauh a.

     "Bawihte, ka lawm e aw, fapa ṭha tak min hrinsak avangin. Ka hmangaih che, Lalnunpui," hmangaihnaa khat mita min en chung chuan a ti a.

     "Ramnunsang, kei pawhin ka hmangaih che." thinlung chhûngril aṭanga hmangaihna lûangchhuak chu ka lo hlan let ve a.


$$$$$$$$$$###########$$$$$$$$$$


In zavaia chungah ka lawm em em ee....
Sbk Pachuau