FELICITY (Docs 2)

FELICITY 11
Sbk Pachuau



     Rei pawh ka la nghak hman lo tihah chuan a rawn thleng nghal deuh mai a, motor a dah fel hnu chuan ka lo nghahna lam chu rawn panin ka bul a rawn thlen rual chuan min kuah a, ka hmuiah a rawn fawp zauh bawk.

     Pâwn light a eng ṭha angreng si a, miin min lo hmu palh ang tih hlauvin ka lo nemsawn vat a, engah mah ngai lo tih hriat zetin min kuahbet leh hmiah a, ka lo ṭang deuh ṭúng thung. In chhûngah kan inkuah lut a, kan lut fel chiah tihah chuan duhthawh lutukin min fawp leh nghal zat a, ka lo chhang let ṭha kher mai! U Ruathlûa room lama aṭanga thawm rawn ri chuan min tawptir chiang hle a, a room aṭanga u Ruathlûa rawn chhuak chu ngawi rengin kan lo en dun tawp a. Chutia lai angreng taka kan lo ding dun min hmuh chuan a rawn nui suk a, eng mah sawi bik lo chuan ngawi rengin choka lam panin a kal ta daih a.

     "Han inthlak la, chawhmeh ka lo va chhûang lum ang," Pekhlûa en chung chuan ka ti a.

     "Min lo inthlakpui la..."

     "Chi loh lutuk!" ka lo ti vat a, a nui hawk thung.

     Chokaa a rawn luh chuan chawhmeh chu ka lo chhuanglum zo ve chiah a, chaw ei chu siamsakin ka siam zawh chuan a ei nghal mawlh mawlh a,  a chaw ei lai chuan a bula ṭhu tur chuan min ti leh tlat pek a!

     Chaw a ei kham hnu chuan sitting roomah ṭhu dunin kan ti ti dun melh melh a, a khât tawkin kan infawp leh ngawih ngawih ṭhin bawk. Nu Mapuiite chhuak an lo haw chuan kan bulah rawn ṭhu ve-in thingpuite kan inho leh a, ka awm zel dan tur chu kan sawiho zui nghal a.

     Pa Malsawma chuan chhûngte dang ka neih mîau loh avangin min duh lova min hnawtchhuak tawhtute mah ni se ka Nutei te hnena palâi tirh phawta chuta an lo chhan dan azira chet lak chhunzawm mai chu ṭhaa a hriat thu a sawi a, Pekhlûa chuan a hnial dawn zet a, ka chunga thuneihna la nei niawm taka an hnena phalna va dil vel chu a ngaihdan a ni lo hle a. Mahse, thil thui zawk thlirin nakinah keima tâna ṭha tur vek zawk a ni a, an phalna va dil ai maha ka pasal neih tur hriattîrna ang zawk a nih dawn thu an sawi takah chuan a pawm thei ta hram a. Pa Malsawma sawi hmangin, ka pasal neih chungchângah pawh a mualpho thei ang berin min sawi thei tlat a, an hriatpuina lova pasal nei anga min sawi lohna turin leh pangngai taka palâi an kal a nih chuan an duh duha min sawichhiatna tur lakah min veng thei dawn niin a ring a, thiam kan channa turin tihmakmawhah a ngai tlat a ni.

     Kei chuan ngaih dan han sawi ve tur pawh ka nei lem lova, an rorelna ang ang chu ṭha turah ka ngai mai a, ka tana ṭha lo turin eng ro mah an rel ka rin loh êm vang pawh a ni ang chu anmahni-ah chuan ka innghat tawp mai a ni.

     Inneih hun tur sawi chiah la awm lem lo mah se a hmâ thei anga inneihna buatsaih chu an duh dan a ni a, palâi pawh Pekhlûa putea zin a rawn haw tawh bawk a, a tuk zana kaltîr nghal mai an rêl a, palâi atân Pekhlûa putea bakah a nî pasal an ruat a. Pa Malsawma'n a duh taka a tirh turte an ni a, an rintlak turah ka ngai ve hmiah a.

     Palâi kal vel chhûng chu an inah chuan ka la awm rih ang a, inneih hun tur sawifel hunah, inneih dawn hnaihah erawh ka insawnchhuak thung ang. Pekhlûa'n ka nutei te hnena ka let leh a phal loh bur takah chuan pa Malsawma chuan pa Marama(ka ṭhiannu Âtei pa) te hnen aṭanga lâwi mai tur chuan min ti ta ngawt a.

     Palâi an tirh chuan kan lo rin lawk dan ang lo takin ka nutei te chuan an lo dawngsawng ṭha phian a, tlema awmthei ve deuh an nih vanga lo be ṭha an ni ang tih ka ring thiam nghal mai a. Chutia pasal neih ka tum takah chuan in lama let leh turin min lo ti a, ka duh loh chu thuhran ni se Pekhlûa leh nu Mapuii'n ka let leh chu an phal lo tlat a, a hmaa an rel dan anga awm zui zel chu kan tithlu ta a.

     Inneih hun tura an ruat chuan min tibuai ve vak lem lo a, eng mah han inpuahchah leh inbuatsaih vak ngaihna ka hriat loh mai bakah ka tân chuan eng han tih vak theih a ni tlat lo a, mi pasal nei tur anga bazâr thei dinhmunah ding ve hek lo i a hun lo thlen hun ka nghak tawp mai a ni.

     Pekhlûa te erawh an inpuahchah nasa hle a, hun a tepter tawh avangin an theih ang tawk tawkin an inbuatsaih a, kawtlâiah a lawmna siam an rawt avangin hlawhfa ruaiin an chei ṭha a, in chhûng lam pawh an hlamchhiah chuang lo.

     Inneih hma nithum la awmah Âtei te inah chuan ka insawn phei ta a, Âtei chu ṭhianah hman ka tum a, Pekhlüa chuan doctor a zirpui ṭhin, tuna a thawhna damdawiina thawk ve mêk Rka chu hman a tum a, Rka hi Gynaecologist(hmeichhe lam doctor) a ni thung.

      Inneih hma nihnih la awmah chuan tlai lamah ka man eitute chaw eipui tur a nih avangin Âtei leh a u tlangvâl nen kan bazâr a, ka man eitu turte pawh hi kan pawtchawp tak meuh meuh a, kan ṭhenawma mite pahnih ka man ei tura ka duh ka sawite bak chu pa Maramate nupa chuan min ngaihtuahpui vek a. Ka nutei pawh a lo kal duh emaw duh lo emaw man eitu tur zingah dan angin an telh ve a, an vaiin mi sawmhnih vel bak an ni lo a, ka pawiti lem lo khawp mai.

     Man eitute pawisa dawn tur chu ka pawisa lo khawl vete khan a daih thei mai a, pa Marama hnena pek ka tum chuan a la duh dawn lo zet a, nu Judithi'n ka inthlahrun lohna tur zawk nia ngaiin la turin a lo ti a, a la ta hram a, man eitute chaw eipuina tur erawh an sum sêngin an buaipui vek thung. Chu mai bakah ka mamawh tur nia an rinho min leisak nual bawk a, ṭul lo tur nia ka ngaih thlengin min leisak a, ka tân an insêng nasa si a, ka lawm rualin ka inthlahrung tak zet a ni.

      Sa leh thlai vel kan lei bakah thei lamte kan lei tel bawk a, kan bâwr hle a, motor dahna lam pan chuan kan inpawm bâwr hlawm a. Kan thil leite kan dahfel hnu chuan Âtei nu-in thil min rawn chah leh lei turin kan let leh a, a û chuan lo kal ve tawh lovin motorah min lo nghak thung.

     Kan thil lei tur kan lei zawh chuan let leh nghalin motor awmna lam chu kan pan a, kan piah deuh aṭanga pa Rama lo kal ka hmuh chuan ka thinphu chu a rang nghal dawt dawt a, Âtei chu vuanin ka kal dawr dawr a, kan lam pana a lo kal ka hmuh leh lek phei chuan huatna leh hlauhna nen ka taksa chu a khur der der a.

      "Kimte," tia min koh takah chuan ka ding ta a.

     Ka chhâng lo a, ngâwi rengin ka melh tawp a.

     "I nutei a tlu sual a, a insawh na deuh a, a mu reng mai. Zanin tlai pawh rawn kal ve a duh tehreng nen a rawn kal thei dawn ta si lo a, hrehawm a ti khawp mai a, i hman chuan rawn tlawh ve lawk ta che, i pasal neih hmaa hmuh che a duh thu a sawi reng bawk si a," a tih chuan min ṭhâwng ve hle a.

     Khati khawpa min tiduhdahtu leh ka chunga ṭhat chhuah duh miah lo pawh kha ni se ka laina neih chhun a ni miau a, ka chhûngte tia ka sawi theih awmchhun a ni tlat a, ka tân chuan nutei a la ni reng a. Vanduaina a tawk tih ka hriat rûal chuan ka haw hle emaw ka tih kha a lo ni hauh lo, ka lo la ngaihtuah hle tih ka inhrechhuak a. Chuti khawpa ka pasal nei tur ngaipawimawh anga a awm leh min hmu duh ngawih ngawiha a awm chuan ka thinlung a khawih hle a, hmuh ngei chu ka tum ta a.

       Âtei te unau bula ka sawi chuan motora min thlahkual chu an tum a, anni erawh chu zanriaha siam tur lo va haw hmapui a ngaih avangin an lo kawi ve lo thung ang. Pekhlûa lo kal a tum tho bawk a, ka bia ang a, min lo sâwm haw nghal mai turin ka hrilh ang a, a rualin ka haw thei mai turah ka ngai a ni.

     Pa Rama chu motorah chuan lo chûang ve-in kan rual chuan a kal ve a, ka chunga a chetdan avang khan ka be tui lo a, ka ten ngawih ngawih a ni ber e.

     Pekhlûa chu ka call a, min chhãng thei lo. Ka call nawn leh pawha min chhan tak lohah chuan a buai a nih ringin message ka thawn ta ringawt a. Ka nutei te ina ka kal thu leh a hman huna min lo sâwm haw mai turin ka chah a. Kan in awmna pêng kan thlen chuan pa Rama nen kan chhuk a, Âtei te unâu chu an in lam panin an tlan leh nghal a.

     In chhûng kan luh chuan a lo reh angreng hle a, ka nutei fapa chu a room aṭanga lo chhuakin lêng chhuak tur tih hriat takin a inchei hle a, a pa chu pawisa dilin a chhuak nghal a. Ka nutei chu an roomah a mû a nih ringin an room lam chu ka pan a, room chhûng ka luha khum ruak ka hmuh takah chuan ka thil tihsual ka hre ta chiah mai le!

     Hmanhmawh lutukin room aṭang chuan tlanchhuah tumin ka inher nghal a, pen tam ka pen hma-in pa Rama lo lut nen chuan kan inhmachhawn ta siah a.

     "Tun ṭum chu i chhuak tawh hauh lovang le! I nutei lah lo haw mai a tum der si lo a, a lenna hmun aṭangin i man eina turah rawn tlang a tum lehnghal, kan pahnih chauhin hun thâwl tak kan nei tihna a nih chu," tiin a mitmeng hurherh zet chuan ka taksa hmun hrang hrang chu a melh kual vel a, engtin nge hetiang mihring rapthlak lutuk thusawi  hi ka lo awih theih mai le!

     "I va zakthei lo em em ve! Engtin nge khatiang dawt chiang lutuk kha i sawi theih zawk?"

     "Duhzâwng hmuhna turte chuan dawt pawh kan sawi mai aniang chu! Ka itna che hi a reh thei si lo a, inah i awm tawh bawk si lo, ka suangtuahna tipuitling tura ka bum luh mai che a ngai ta a nih hi!"

     Min rawn pan hnai a, ka lo tawlh hla zel thung, thui erawh ka tawlh hauh lovang le, room chhung chu zau miau hek lo! Min hnaih tawh hle a, tawlh leh ka tum lai tak chuan rawn zuang thutin ka inrin hman hma chuan min kuahbet a, ka ṭe thawt a, theih tawpa lo ṭangin min vawnna aṭang chuan talchhuah tumin ka lo bei let nghal a.

     Min phih dawrh a, khumah chuan min theh thlu a, ka thawh hman hma-in min rawn bawhbet zui nghal zat a. Ka theih tawkin ka ṭang a, ka ṭe nghal tuar tuar bawk. Ka hrawkah rawn rekin a ke-in min kherhbet tlat a, ka hrawka a rehna vang chuan ka duh angin ka ṭang thei tawh lo. Ka rilru tifîm lui hram hramin ka kut chuan theih ang angin min rehna chu laksawn tumin ka bei a, awmzia erawh a awm thui lo hle.

     Min rek na telh telh a, ka zawi tial tial a, ka khaw hmuh pawh a phê rûai tawh. Min khawihna lo dang tur pawhin tha alawi ka nei tawh lova, mu leh mal ka nei lo sawt hle bawk. Chutia ka zawi ta riai riai chu inthlahdulin min rehna pawh a duhtawk a, a kut chuan ka kekawr kawng phelh tumin hma a la zui zat a.

     Ka hrawk a rehna a phelh takah chuan ka zia chho hret hret a, ka duh anga ka pangngai hma chuan ka che duh miah lo a, duh aia hmaa ka chet chuan thaah ka hneh dawn si lova, chet buai leh ka hlau a ni.

     Ka kekawr kawng a phelh laite chuan ka insûm hram hram a, ka rilru chuan chet lak dan tur ka ngaihtuah kual a, fing taka ka che a nih loh chuan ka chan a chhe hle dawn tih ka hriat avang chuan ka taksa-in ngai a awm leh hun chu ka nghak hram hram a, ka che duh lo lui tlat a.

     Ka kekawr chu pawtthla mai lovin ka kawr chu ka hnute lang thei turin a rawn hlim leh tê tê a, ka bra hak chu a hlim chho táwk a, ka hnute chu a ṭham nghal chat a.

     Ka insum theih bak a pel ta a, au tuarh pahin ka theih tawpa na-in ka khupin a nakah ka do pawp a, a na tuar tlema a thawhkan deuh lai chuan ka tlawh zui pawp a, khum mawng lamah chuan a hlawm thla tawp a. Chutia a awm lai chu remchângah la-in khum sîra an dawhkan hun chunga paper weight awm chu ka va ban vat a, khum aṭang chuan chhuk sawk sawkin tlanchhuah tum chuan hmanhmawh takin ka tlan nghal a.

     Room kawngka ka hawn rual chiah chuan min pawtlet lawp a, khumah bawk chuan min bawhthlu leh nghalin ka kekawr phelh tum chuan a bei nghal a, ka mangang lutuk chuan ka paper weight ken lâi chuan a lû-ah tak chuan ka chhu ta pawp a.

     A au vak a, ka chhutna lai chu a dawm nghal a, a kut la thla leha a en chuan a lo thi a, thinrim lutukin ka thil kenlai chu min laksak lawp a, chhuatah paih thla-in ka banah chuan a rawn chelh a. Ka lo tal reng avang chuan min vuan nghet ṭha thei lova, min bawhbeh a tum leh ka lo ṭang ve zel bawk si a, a duh angin a che thei mai bik lo a.

     Ka kekawr chhûnga a kut zen luh a tum chuan ka lo tal chiam a, a duh anga a chet theih tak lohah chuan thimrim zual sauhin min hrawm bet a, ka bekah chuan a rawn hnek ta siah a. Ka lu chu a hai nghal mûai mûai a, a natzia chu turû tak a ni. Chuti chung chuan ka tha thlah ka la tum chuang lo a, ka lo la ṭan reng avang chuan min hnek leh ta a, ka zawi ta hnawk a.

     Ka ngaihtuahna la fîm tho siin ka che thei der lova, Pekhlûa ka ngâi ngawih ngawih a, ka au thawm hre pha turin awm ta se ka aw chhuah theih loh tawp thlengin ka au ngei ang le!

     Ka thawmhnaw a phelhlaite chu ka hre vek a, ka chunga thaw huam huam chunga a rawn bawh leh takah chuan ka khawvel a tawp taah ka ngai hmiah. Ka hmeichhiatnaa a rawn luh chiah chuan ka taksa mai ni lo ka rilru thlengin a kehchhe ta vek a.

     Thawklehkhatah ka chung aṭang chuan a kang dawrh a, ri chawrh chawrhin a zui nghal a, Pekhlûa ni awm takin a hnek sawk sawk chu ka va hmu phê ruai a. Ka chhe vek tawh a, ka tan chuan eng mah thlakhlelh tur a awm tawh lo chuang lo a, Pekhlûa ka hmu chu ka lawm em tih pawh ka hre lo!

      Ka mittui tla tur a awm lo a, ka thinlung natna erawh a aia thuk leh thei tur chuang a awm hauh lovang le! Ka bei a dawng a, dam chakna pakhat mah ka nei tawh hek lo, ka nunin awmzia a nei tawh dawn chuang tlat lo a ni.

     "Kimte, i ṭha em?" Ka thawmhnaw min haktir hnu chuan duat zetin min bia a, ka chhang lo.

     "Bawihte, i na viau em? Ka lo tlai lutuk tiraw? Tunah chuan i bulah ka awm tawh a nia, eng mah hlauh tur a awm tawh lo."

     Ka la chhâng chuang lo, duat zetin min kuah a, min kuah nghet mah mah a ni. A ṭhianpa-in a rawn biak chuan min thlah chuang miah lovin a lo chhâng a, an inbiak zawh chuan min pawm kang nawlh a, pawn lamah min pawm chhuakin a motorah min dah a, min tlanpui ta nghal a.

     Damdawiin kan thlen hnua thil thleng zawng zawngte chu vai rûaiin ka hria a, khuma min muttîr leh Rka ni awm takin min en vel chu ka hre leh a, a hnu-ah Pekhlûa ka bulah lo kalin ka kut a rawn vuan a, ka awm ngai rengin ka lo awm thung.

FELICITY 12
Sbk Pachuau



LALPEKHLÛ-A

     Naupang tlâng hrilêng tam lai a nih avangin damdawiin lam pawh kan buai hle a, tlai lama Kimtei hmu tura kal kan tum avangin clinic pawh kan khar a ni a, kan tum anga hma chuan kan kal thei ta chuang lo. Inneihnaa min dinpuitu tur, ka ṭhianpa Rka nen kal tum kan ni a, naupang damlo emergency-a en ngai an rawn kalpui leh ṭhin avangin ka buai nilêng a ni ber a, doctor dangin min rawn thlak takah Kimtei hmu tur chuan kan kal ta nghal a.

      Ka motorin kei ka kal a, Rka chuan bike-in ka hnungah min rawn zui thung. Tlan pah chuan Kimtei biak tumin ka phone ka phawrh a, missed call a lo awm bakah message a lo awm nual a, Kimtei message chu hawngin ka chhiar nghal a. A message ka chhiar chiah chu hlauhthawnna nasa lutuk ka chhûngrilah a rawn awm nghal a, ka thin a rim ru viau bawk. Saw inah sawn vawikhat mah let leh tawh lo tur khan ka hrilh chiang vîau si a, a nutei chu lo damlo eng ang mah se amah tiduhdaha hnawtchhuaktu a ni a, a va ngaihsak leh chu ṭul tihna pakhat mah ka nei lo. An rilru vertherna leh ngaihtuahna tenawm lutuk chu Kimtei rilru ṭhatna chuan hmuh kánin a rilru thianghlimna chu amah awlsam taka an bumna hmanrûa a ni tih a hre dawn der si lo, min rawn call lai khan phone lo chhâng hman ni ila kal lo turin ka khapbet chiang khawp ang le!

     Traffic jam vangin duh angin a tlan chak theih si loh a, ka hmanhmawh lutuk tawh chuan motor aṭanga chhuaha ke-a kal mai chu ka nap a. Ka ṭhianpa erawh bike-a kal a nih vangin a tlang zung zung thei a, inkhalh thleng puiah sawm dawn pawh ni ila ka hmu phak mai tawh bawk si lo, rilru hmanhmawh zet chuan steering chu ka kutin ka tlir zaih zaih a, tih theih dang nei hek lo i le thimrim ṭûnin ka ṭhu tawp mai a ni.

     Rka chu phone-in Kimtei lam kawi a ngaih thu leh an in awmna lai vel chu ka hrilh a, traffic jam a zia deuh hnu chuan Kimtei te in pan theihna pêng hmasa ber lo awmah chuan ka pêng ta hmiah a, hmanhmawh fahranin motor dang awm loh lai chuan ka khalh chak hle a, an in bul ka thlen hma deuh chuan Rka'n min rawn bia a. Kimtei te in awmna lai a hriat chian loh vangin a bo deuh a lo ni a, chiang deuh zawkin kan inhrilh leh zung zung a.

     An in kawtah ka motor chu tidingin hmanhmawh zetin ka tlanchhuak nghal a, kawngka chhüng lama a lo inkalh takah chuan ka rinhlelhna chu a dik tih ka ring nghal hmiah a, kawngkhar chu ka'n sáwi chhin vel a, a nghet ṭha kher mai. Pawn lam aṭanga han hawn mai theih niin a lang lo a, luhna tur remchâng dang ka melh kual nghal a.

     An in hi a hlui ve deuh tawh avangin tukverh aṭanga luh theih mai inringin tukverh tihchhiat awl deuh tur chu ka en kual a, an choka zawn niawm taka tukverh pakhat chu a frame pawh hlui tawh tak, mawih hmel tak niin a lang a, chulai aṭanga luh theih inring chuan ka lawn ta nghal a. Ka lawn ṭan deuh chauh tihin Rka a rawn thleng ve chiah a, chutia min in banga ka lâwn min hmuh chuan a ngaihna hriat loh hmel zetin min en a, eng mah han inhrilh khawmuanna hun ni hek lo zaizirin in chhûnga luh ka ngaih thu ka lo hrilh a.

     Awlsam tê-in tukverh chu ka hawng a, in chhûngah chuan ka lut nghal vat a. Thawm lo chhuahna lamah chuan hmanhmawh lutukin ka phei nghal a, an awmna room kawngkhar chu hawngin ka lut ta nghal a.

     Ka thil hmuh chu khawvela ka thil hmuhte zînga ka duh lo ber a ni! Ka thinur lutuk chu ka sa pup pup a, Kimtei che miah lova mu zawi hniang chunga a nutei pasal suahsual rawngbawl lai chu ka phih tho lawp a, ka theihtawpa na-in a hmaiah chuan ka hnek a, vawikhat mai duhtawk lovin a rem lai laiah chuan ka hnek mawlh mawlh a.

     Kimtei thawm ka hriat chuan ka hneklai chu chawlin ka hawi phei a, thei leh thei lova a saruakna khuh tuma puan a lo sin chu ka hmu a, ka pan vat a, puan chu sin ṭhattirin ka kuah nghal a. A ṭap lo a, a che chhunzawm eih lo bawk, ka awm ve a ni tih hre awmin a awm hek lo!

      Kan mihurpa room pawn lama chhuah tuma a kal ka hmuh chuan rang fahranin ka va hnuk let nghal a, Kimtei awm dan ka hmuh khan ka lainat lutukin ka thinrimna a belhchhah bawk nen chintawk awm lo lêkin ka khawih zui leh nghal mawlh mawlh a. Rka rawn lutin min rawn dang lo phei se chuan ka khawih hlum lovang tih pawh a sawi theih loh, lo sawisa hlum ta pawh ni ila pawi ka tih ka ring hek lo.

     Rka'n phone hmanga police a koh lai chuan Kimtei bulah chuan ṭhu-in ka kuah a, engtin mah a awm dan a ti danglam hlek lo. A awm ngaiin a awm a,  a melh ngai a melh reng a, ka biak pawhin min chhang eih lo. A kekawr chhuata tla chu chharin ka haktîr a, ka khawih dan ang ang chuan a awm tawp mai a ni.

     "Kimte, i ṭha em?" Ka theih ang tawka ka thinrimna aw thupin ka bia a, min chhâng lo.

       "Bawihte, i na viau em? Ka lo tlai lutuk a ni tiraw? Tunah chuan i bulah ka awm tawh a nia, eng mah hlauh tur a awm tawh lo," ka ti leh a, chhanna ka la dawng chuang lo.

     Duat takin ka kuah a, ka thinrimna leh pawi tihna chuan ka kaw chhûngah min hnawh up up a, Kimtei awm dan chuan ka mang a ti-ang ru viau bawk.

     Rka'n police an lo thlen tawh thu a sawi chuan pindan kila misualpa thusawp nuai chu ka va melh zawk a, Rka chu police lamin an lak fel hnuah damdawiin lama min rawn zui tura hrilhin Kimtei chu ka pawm nawlh a, ka motorah chuan dahlutin kei pawh ka ṭhu lut ve vat a, chulai hmun aṭang chuan ka inkhalhchhuak ta nghal a.

     A hma ang bawkin jamah kan tâng leh ren rawn a, damdawiin kan thlen meuh chuan Rka zawk chuan min lo nghak váng tawh a, room pakhatah min pawm luhtirin khum lo awmah chuan ka muttîr ta nghal a. Rka chuan a en vel chhûng chu pawnlama lo nghak turin min ti a, Kimtei ka en leh vang vang hnu chuan ka chhuahsan ta a.

     Ka nu ka bia a, thil thlen dan tlângpui hrilhin u Maramate nupa lo hrilh ve nghal turin ka ti a, a hranpa-in ka pa ka va be bawk. Rka room aṭanga a rawn chhuah chuan ngawi rengin ka lo melh reng ringawt a, ani chuan min lainat hmel zetin ka darah a rawn vuan a, nghet zetin min hmer a.

     "Ṭhianpa, a pawi ka ti lutuk,  a hlawhtling tlat mai!"

     Ka ṭhianpa kâ aṭanga ka thil hriat tawha ngaihthlak la nuam lo ber mai ka hre ta chu a ni a, ka taksa chu ka thunun theih hlek lohin a khur a, ka thinlung a tawt up up bawk. A hmaa room chhûnga an awm dan ka hmuh khan ka hre tawh tho naa doctorin a finfiahna thu a sawi takah chuan ami den dan a na kher mai! Awm ngaihna ka hre lo a, ka sa pup pup a, kha mihring tlaktlâilopa kha sawisak leh ka chak ngawih ngawih mai a ni.

     Kimtei mutna roomah chuan kan ṭhian dun chuan kan inzui lut a, khumah chuan a lo la mu ngâwi reng a. A kutah chuan vuanin a mutna bulah chuan ngâwi rengin ka ding a, a bulah ka awm a ni tih hria angin a awm lo a, a taksa mai bakah a rilru chhûngrilah hliam nasa tak a tûar a ni tih ka hmu thei a, engtik lai maha kan thlahthlam loh a ngai dawn a ni.

     Ka nu leh pa, ka nîte nupa leh u Maramate nupa an lo thleng dawt zut a, ka nu chuan duat taka kuahin zawitê tê-in a be melh melh a, ka nu hmêl a hmuh takah chuan Kimtei chuan lo kuah letin chhuak êm êmin a ṭap ta hlawp hlawp a. Ka nu chuan hnemna awkâ chhakchhuah a duh tih a lang reng a, a thei bik lo, an pahnih chuan inkuah chungin an ṭap dun a, hmeichhe dang awm em ve pahnihte pawh chuan an mittui an dang zo meuh lo chu a ni e.

     Ka pa chuan ka nî pasal hnenah chuan a mualpho zau lo thei tur ang bera case siam ni thei se tiin a sawipui a, ka ni pasal pa Puia hi Police officer a ni a, a pension ṭep tawh a, kumin hi a service tawp kum a ni nghe nghe.

     Ina kan haw hnu chuan ka nu-in a bual a, an inbual zawh hnu chuan zanriah ei a hun tawh avangin chaw ei an siam nghal a. Ka ṭhianpa Rka bakah ka ûte nupa leh ka nîte nupa in an ei ve nghal bawk a, u Maramate nupa erawh an in lamah an haw thung. Kan awm danin a zir tak loh avangin man eitu turte chaw eipui an tum chu ṭhulh mai tur nge tiin an buai deuh a, ka pa chuan midangin eng mah an hre lo turah ngaiin an tum dan chu lo kal tlangpui phawt se, Kimtei awm loh chhan erawh mawihnai deuhin lo pha ta mai se tia a rawt avangin an haw phei ta a ni.

     Kimtei chuan eng tham mah a ei lo a, a awm dan chuan ka mang a ti-ang ru hle a, a ṭawng lo a, a hmêlah eng ngaihtuahna nge a neih ang tih chhiar harsa khawpin a buai a. A biang chu a duk deuh ruih a, ka nu chuan  chung a biang dukte chu a buaipui a, a mutna room lamah an inzui lut ta a.

    Ka pa chuan ṭawngkâ-in eng mah sawi lo mah se min hrethiam tak zet a ni tih a awm danah ka hre mai a, ka kutah chuan vuanin min hmer vang vang a, ka  ka darah min kuah lehin eng emaw chen min kuah vang vang a, ka awm dan phung pangngai pha lo mah ila ka thlamuan phah hle a ni tih ka hria, hetianga min hnemtu hi ka mamawh rêng a ni.

     Kimtei mutna rooma kan va luh ve chuan khumah a lo mu hlan a, a bulah ka nu ṭhu-in eng emaw sawiin a lo phun sep sep a, Kimtei chuan ngawi rengin a lo ngaithla a, a mit a chhîng naa a muhil lo a ni tih a hriat theih a ni.

     Amaha kalsan chi nia ka hriat loh avangin a rooma riah ve mai ka tum thu ka sawi a, ka nu-in min lo hnialin ama'n riahpui a tum tih a sawi a, ka pa pawh chuan ka nu-in awmpui rih se a ṭhat zawk a rinthu a lo sawi ve bawk a.

     Chumi zan chu ka muhil tlem kher mai! Ka hun tawn mek chu ka ngaihtuah a, mumang, han harhchhuaha tawp leh nghal mai ṭhin ang kha ni se ka ti tak zet! Inneih hun a hnai tawh nasa mai si a, Kimtei awm dan enin pangngai takin kan hmang thei ang em tih chu mgaihtuah tham tak a ni.

     Zing ka tho chu ka rit bûr a, room aṭanga ka chhukthlak chuan ka nu chu chokâah a lo awm a, Kimtei chanchin zawh ka tum lai tak chuan choka bathroom aṭangin a lo chhuak chiah a, ka hmu chu ka phu deuh zawk a.

     "I ṭha em, Kimte?" ka tih chuan muang chângin ka lam a lo hawi a, harsa ti zeta nui lui tih hriat zetin a ṭhen sak a, a lû chu a bu nghat a.

     A hmai duk chu zan lam aiin a lo duk zual tawh zawk a, a sam chu thlahin hliah a tum ve hle tih ka hmu a, a awm dan leh hawiherah chuan tunhma anga ngampa taka han chet vel kha a awm lo a, a khawr ru riauvin ka hria a. Inkiltawih leh inthlahrung taka che a ang berin ka hria a, a chunga thil thleng khan amahah nghawng eng anga nasa-in nei zel ang maw!

     Damdawiin lamah kan buai deuh avangin inneih ni leh a tuk nihnih bak chawlh ka la lo a, vawiin pawh ka kal ngei a ngai dawn a, ka chhuahsan huphurh ang reng hle a.

     Ka insiam zawh chuan a roomah ka lut a, a khumah chuan fel atin a lo ṭhu a. A bulah chuan ṭhu ve-in ka kuah a, chutia ka kuah veleh chuan a khawng deuh lah a, ka kuah hnai lui deuh a, min hlat deuh dû a.

     "Kimte, hrehawm chu kan tuar tawk tawh viau a ni lo'm ni? Keimahni hi chu intihrehawm tawn tawh lo hram teh ang, ka ngai lutuk che a nia!" tiin ka kuah bet a, ka âwm ngheng chuan ka pawm a.

     Eng mah sawi lovin ngâwi rengin ka kuah ang ang chuan a awm a, a khabea dawm kanga a hmel ka en chuan a mita mittui tling piau chu ka hmu a.

     "Kimte, i tan hlauh tur eng mah a awm tawh lo a nia, a ṭha lo zawngin lo inngaihtuah miah suh aw!" ka tih chuan a mittui chu a rawn luang chhuak ngîai ngîai a.

     "U Pekhlu, innei lovang! Ṭhulh leh mai ang, i tan neih tlak ka ni tawh lo, ka tenawm tawh!" lungchhe zetin a inhnît zui nghal hlawp hlawp a.

     "Bawihte, chutiang thu chu sawi hlek suh! Ka nupui atan ka thlang fel tawh che a, nang lo chu neih ka tum lo. I khawloh vang leh i duh rêng vanga hetiang thil hi thleng a ni lo tih ka hria, ka iai phah lo che. Khawngaihin khatiang zãwng kha chuan lo inngaihtuah tawh lo hram rawh aw, ka duh ngawih ngawih che tih hi lo hre reng la, hlim deuhin naktuk kan inneih huna kan awm dan turte lo ngaihtuah daih zawk rawh."

     A mittui chu hruksakin a hmai duk tluk chu zawitê-in ka chulsak a, kun hniamin a hmuiah chuan ka fawhsak a, a inlahrang rang kher mai. Fawh nawn leh ka tum chuan a thlesawn vat a, a kutin a lo indang bawk.

     "Khawngaihin duhtawk teh! Tunah chuan mahni chauha awm ka duh, min kalsan rih phawt mai teh," aw khur dar dar chungin a ti a.

     Thawk lak halh pahin, "Aw le, ka kal ang e, tlaiah chuan hlim taka min lo lawm tawh ka beisei a nia. Lo inenkawl ṭha la, ka lo biak hunah che ṭha taka min lo chhâng turin ka duh che a ni, i bulah i phone lo dah reng rawh aw," ka ti a, a biangah fawhsak leh zauhin ka tho a, ka kal ta nghal a.

     Nilêngin in lamah ringawt ka rilru a awm a, ka phone apiangin tawi të tê-in min chhâng a, ngai pawimawh lo luiin ṭha takin ka be zel a. Ka nu ka be bawk a, Kimtei awm dan lo thlithlai reng turin ka chah a, ani pawh chuan a kalsan mang loh thu leh eng eng emaw an sawi dun nual tih min rawn hrilh a, ka thaw deuh huai .

     Zan lamah rehearsal neih kan tum avangin Rka leh Âtei chu chaw ei turin ka nu-in a sâwm a, Rka nen chuan kan haw rûal a. In kan thlen chuan Âtei pawh a lo awm tawh a, Kimtei ka hmuh mai loh avangin ka mitmeiin ka nu chu a awmna ka zawt a, a room lam a melh zeuh chuan ka hrethiam nghal mai a, ka lut phei nghal vat a.

     A rooma ka luh chuan ka hmuh mai loh avangin ka hlauthawng hman hle a, bathroom lama thawm ka hriat takah chuan ka thaw huai a. Rei pawh ka la awm hma chuan bathroom kawngkhar chu rawn hawng ri rakin a lo chhuak ta nghal a, ka lo ding reng min hmuh chuan a nui sak a, a nui hmel ka hmuh chuan ka lawm hle a.

     Ka bulah rawn dingin min chhoh en ran a, a sam chu la huh hniangin a darah an inchapdarh niai a, a hmel pawisawi lo tak chu duat takin ka lo chûl a, a hmai duk lai chu dim lehzualin ka tawk a.

     "A na em?" ka ti sup a.

     "Aih, na tawh lo e," tih pahin a hmai ka khawihna kut chu a rawn dawm a, a hmai si chuan a dawmbet vang vang a.

     Kunhniamin a chal chu ka chal nen ka siktîr a, "Min lo ngâi em?" tiin ka zawt a.

     "Umm.... Ngâi lutuk!" a lo ti sap a. Pangngai taka kan inbe leh thei ta chu ka lawm hle a.

     A hmuiah chuan fawpin ka beisei aia ṭha-in min lo chhânglet a, ka tukkhum samah ṭhamin a duhthawh kher mai! A chet dan chuan min tiphur tak zet a, duhthawh lutukin kan infawp tawn tawn a. A taksa chûl kualin a hnuteah ka tawp chat a, ka ṭham takah chuan a thaw halh a.

     Min ngheng hnai zual sauh a, a awm dan chu mak ka ti deuh naa min tiphur laklawh tlat a, tawpsan mai chu ka phal bik lo. Khumah chuan bawhthlu-in kan infawp chhunzawm leh nghal zat a, a awm danah chuan chákna sosâng lutuk, insûm ngaihna hre tawh lo a ang mah zawk a, a kawr hak chu hlimin a hnute lo lang phîr ṭhaih mai chu ka fawp a, a hnute hmur ka liah takah chuan a rawn ngik chhuak feih feih a.

     A hmuiah bawk han fawp lehin a bawp chu ka chûl kual a, a thaw halh halh a, a mawngbâwr ka chul kual takah chuan a awm dan danglam ta chu ka hre thei a. Ka fawhna chu duhtawkin ka inbengkang deuh a, a hmêl hmuh tumin ka en a, sîr lam a hawi vat a, a bânin a mit a hliah nghal bawk.

     A bân chu zawitê-in ka lasawn a, a hmêl chu chiang taka ka hmuh theih turin ka kuaiher nghal bawk. A mit chu mittuiin a lo luan huh vek tawh a, a meng lo nachungin a mittui chu a rawn luangchhuak ngiah ngiah a.

     "Bawihte, tihpalh aw! Ka duh lutuk che hi insum har ka ti ṭhin em atin ni! Min ngaidam rawh," a mittui hruksak pah chuan ka ti a.

     "Nilo, i thiam loh eng mah a awm lo, keima thiam loh zawk a nih kha," ṭah aw ṭiau-a  a tih chuan a chalah ka lo fawhsak zauh a.

     Ka tho a, ka kaitho ve nghal a, khumah chuan ṭhu-in ka kuah a, eng emaw chen chutia kan ṭhut hnu chuan ka tho a, kan ṭhiante an lo thlen tawh thu leh a insiam peih huna lo chhuak tura hrilhin ka chhuahsan ta a.
 
   
FELICITY 13
Sbk Pachuau



     Rehearsal kan neih zawha kan let leh chuan a lo tlai tawh angreng hle a, chaw te kan ei zawh fel hnu chuan ka nu leh pate'n min koh avangin Kimtei nen chuan an roomah kan lut a, kan ṭhiante chu inlêng lo chhawn turin ka pa chuan a chah a, a tuk inneih a nih tawh avangin inlêng kan nei indawt ve zut reng a.

     Kimtei nen sofa-ah kan ṭhudun a, ka nu khumah ṭhu-in ka pa erawh chairah a ṭhu thung. Kimtei chu zâm hmel pu deuha ka hriat avangin a kutah ka vawnsak a, a khur deuh dar dar a, nghet zawkin ka vawnsak a.

     Ka pa chuan Kimtei chu a melh vang vang a, eng tak sawi ang maw tia ka lo ngaihtuah lai tak chuan muangchângin a rawn ṭawngchhuak ta a, a thil rawn sawi lah chu ka beisei loh lam daih a la ni zui.

     "Kimte, eng thil nge i sawi duh chu han sawi ta che!"

     Kimtei chu ka en vat a, mak ka ti ru viau mai! Ka nu leh pate chuan thu pawimawh eng emaw min hrilh dawn niah ka lo ngai kha a ni a, Kimtei'n sawi tur a neih vang zawka min ko an lo ni! Ka rilru chhûngrilah nuam lo a rawn awm nghal a, a awm dan ka enin thil lawmawm lam a sawi ka ring lo nghal hmiah bawk.
 
      "Ih..englo... han sawi ṭan dan tur pawh ka hre chuang lo a, mahse....." sawi zawm lo chuan a ngâwi vang vang a.

     "I thiam dan ang ang khan sawi tawp mai rawh Kimte, i rilru-a thil awm chu han sawichhuak teh le," ka nu chuan a lo ti dam dap a.

     'Ka chunga thil thleng chu in hre vek a, ka dinhmun pawh chiang taka hretute in ni. In mo ni tlakah ka inngâi lo a, u Pekhlûa tân pawh hian ka tling tawh lo a ni. Kei aia ṭha......"

     "Chutiang thu ngaithla tur chuan helai hmunah hian ka kal tih ka hre hauh lo, hre sa ni ila ka kal duh lo ngei ang. Nangmah insit lo tur leh a lungngaihthlak zawnga thil ngaihtuah lo turin ka hrilh tawh che kha i hre tawh lo em ni? I dinhmun kan hria, i nihna zawng zawng nen, chuti chung chuan ka duh che, nang aia duh ka nei lo. Kha thil kha helai hmuna kan kal chhan hi a nih chuan a zo e, lo kal la, kan ṭhiante bulah zu chhuk ang le," tiin  ka tho a, Kimtei kutah chuan kaiin ka pawttho ve nghal a.

     Kalpui mai ka tum chu a ṭang ve tlat a, a kut ka vawn chu lathla-in zawi muangin sofa-ah chuan a ṭhu thla leh a, rawn hawi chhovin a mitmeng dul tak chuan ka mitah min en a, ngawi rengin ka lo melh let run ringawt a.

     "Khawngaihin min ngaihthlak zawh sak phawt la, chumi hnu-ah i ngaih dan chu i lo sawi ve chauh thei ang em? Ka thiltih hi ka chak vanga ti ka nih i ring bik miah lo tiraw? Pawi ka ti lutuk! Mahse, ka tih ngei hi a ṭul tak zet a ni," zawi sap, fiah tak siin a ti a.

     Ka ṭhutna-ah chuan let lehin ngawi rengin ka ṭhu a, Kimtei ṭawng leh hun nghak chuan ka awm tawp a, ka nu leh pate pawh an ṭawng bik lo a, Kimtei chu kan ngaicháng tlâng vek a.

     "Min enkawlna leh ka thlaváng jn hauhnaah ka lawm a, ka chunga in ṭhatna hi engtikah mah ka rul sëng dawn lo tih ka hria, lawmthu sawi bak tih theih ka nei rih si lo, ka lawm tak zet  a ni tih kha min lo hriatsak ula ka duh," thawk la halhin a chawl deuh dat a.

      "Kimte, chutiang sawi a ngai hleinem, chhungkua kan ni alawm..." ka nu-in a lo tih chuan a lo pawtchat vat a.

     "Ni lo, khawngaihin min sawi zawhtir  phawt teh u. Vawiinah uluk deuhin ka ngaihtuah a, ka tan hian pasal nei lova awm a ṭha zawkin ka ring a, u Pekhlûa tan ka tling tawh lo a nih rau rau chuan midang neih tumna ka nei tawh lo a ni. Nangni ang chhungkaw zahawma rawn lãwilut tlak ka ni lo a, in mo ni tlak ka ni lo a, nupui ni tlak ka ni tawh lo bawk. In chhungkaw mualphona thlentu leh in hming tichhetu nih hi ka duh lo a ni."

    "Ka ngaih dan ka lo sawi ve ang e aw Kimte, i nu Mapuii nen chuan iaina che kan nei hauh lo, chu chu i chunga thil thlen dan kan hrechiang hle chung pawha inneihna kan la kalpui zel danah i hrethiam ve maiin ka ring! Kan duh danah chuan hlim takin innei ula, hun kal tawh theihnghilhin chhûngkaw hlim tak din ula tih hi a ni. Mama'n i insitna tur zawnga a ṭawng khum che ka ring lem lo a, nangma thlir dan aṭanga heng hi rawn sawi mai i ni ang tih ka hre thei mai e," ka pa chuan a lo ti a, kei erawh ka la ngâwi reng thung.

     "Ka tenawm tawh alawm! U Pekhlûa tãn ka tling tawh lo, tunah min pawm mah se..."

     "Tu-in nge i tenawm tih sawi? Tu nge ka tân i tling tawh lo tih  sawi? I chunga thil thleng kha i duh rêng vang ni lovin i vanduai vang lïau lîau a ni tih kan hre vek, eng vanga min helna ringawt zawng nge maw i nih le?" ka ṭhutna aṭang chuan thovin ka kekawr ipte zen chuan ka ding a, Kimtei ṭhu kun lap chu ka chhuk en run a.

     "Kimtei hi dem ngawt theih a ni hauh lo  a nia, hmeichhia tupawh, mi pângngai chin chuan khatiang ngaih dan kha an nei vekin ka ring! Ka chunga thleng ni ta se kei pawhin Kimtei tih ang chiah hian ka ti ve ngei ang. Mahse, Kimte, kan lakah hian inthlahrung lo la kan duh, keini lam chuan kan hnualsuat phah lo che a, nangmahah tui loh phahna atan kan hmang miah lo tih hi lo hria la, inthlahrung hauh lovin he in chhûngah hian lo lâwi lut la tih hi kan duhthusam a ni," ka nu chuan a lo ti ve leh a.

     "Mahse, ka dinhmun ngaihtuahin hetiang ina lo lawi luh chu tihchi-ah ka ngâi thei lo a ni. Miin an hriat tam hunah pâwngsual tawk hnu nupuia nei tia a hnunglama an kawk zui tur leh an sawi zui tur hi ka duh lo a ni, ka thianghlim tawh mîau si lo a.."

     A thusawi tawp lamah chuan a aw a lâwi deuh a, a taksa insawi dar dar ka hmuh takah chuan a bulah ka ṭhu thla vat a, ka kuah nghal a. A tirah a lo ṭang deuh naa a ṭang rei lo hle a, ka âwm ngheng chuan a inhnît hlap hlap a.

     Ka pa-in ka nu mitmeia chhuak tura a sâwm leh an chhuak lai chu ngâwi rengin ka en zui a, nghet taka Kimtei chu kuahin a ṭah chhûng zawng chu eng mah sawi lovin ka nghak tawp a, ṭawngkam thiam tak ka nih loh chu thuhran ni se kan boruak tehhrep avang chuan han sawi mai tur ka hre rih tlat lo a ni. A duhtawka a ṭah zawh hnu chuan ka kuahna aṭanga inla hrangin a mittui chu a hru mawlh mawlh a, ka bul aṭanga tawlh hlat a tum chuan a kawngah ka lo kuahbet hmiah thung.

     "U Pekhlu, i hrethiam tiraw? I tân nupui tlak ka ni tawh ...... "

      A ṭawng lai hmuiah chuan ka fawp hmiah a, a ṭang deuh naa ka kuah hneh êm avang chuan a talchhuak thei lo a, ka fawhna chu min chhâng let duh lovin a dawh tawp a.

     "Kha thu kha i sawi leh a nih chuan a pawi khawp ang. I nutei leh a fapa pawh saw ka khawih hreh miah lo a nia,  saw mite chhüngkaw chunga ka thinrimna hi a la reh hauh lo. I ṭanna ngaia i ṭang reng a nih chuan ka va kal ang a, ka va sawisa hrep ang. Midang ngaihah ka chunga thil an tihsual miau loh avangin hremna ka tawk ngei ang a, jail tan hial pawh a ni thei. Chung chu thleng lo tura i duh chuan kha i ngaihdan atthlak tak kha sawichhuak tawh miah suh, ka sawi mai mai lo a, ka ti ngei dawn a ni tih ka sawi lawk bawk," ka tih chuan phawk zetin min en a.

     "Chutiang chuan i ti miah lovang! I ti dawn lo tiraw? I chungah keimah vanga thil ṭhalo a thlen ka duh lo a nia.."

     "Ka chungah thil ṭhalo thleng tura i duh lo tak zet a nih chuan ka thu hi awih la, hlim takin kan hmalam hun ngaihtuah chungin hun hmang tawh ang che. Ka duh che a, ka nei ngei bawk ang che, ka thlahthlam ngai lo bawk ang che," tih pahin ka kuahbet nghal a.

     "Mahse.... "

     "Ka sawi tawh kha, min hnial tawh lo teh. I duh leh ka nupui i nih hunah min la hnial zawk dawn nia," a sawi thui hma chuan ka lo pawtchat vat a.

     Kunhniamin a hmuiah ka fawp leh a, min chhâng nghal mai lo naa ngenngawl taka ka fawh takah chuan ka nghâwngah rawn zen chhovin min kuah a, min fawp let ve ta a.

       Zanin hian u Marama'n an in lama riak phei turin a beisei deuh a, thil tih awm tak pawh a ni réng a. Mahse, a thil tawn ngaihtuahin hmun danga riah chhuahtîr chu ka pate chuan an ngaingam lo a, kan hmuh phak loha a awm chuan eng thil ṭha lo emaw tak a tih hlauhthawn thil thu-ah riak chhuak lo mai se, zingah u Marama te in lamah chuan va dah phei mai ila tiin kan rêl a. Kimtei chuan kan rel ang ang chu hnial lovin a lo aw e liam mai mai a, midang hmuhah chuan hlim hmêl pû-in a awm a, a thinlunga delhtu rit tak awm chu midang hriat loh turin a thup thiam hle.

     A tirah khan khatia a pa Rama bum mai theiha a awm kha ka dem vîau a, a chunga an khawsak duh dante pawh a hrechiangtu ber a ni si a, eng vanga ringhlel hauh lova zui mai nge a nih tih kha ka ngaihtuah a, ngaihtuah thui lo ka tiin ka dem hle kha a ni a. Mahse, Kimtei zia ka hre chiang a, a rilru thianghlim tak leh ngaihtuahna tluangtlam tak chuan damlohna hmang êm chuan an bum duhin a ring dawn hauh lo a, a nun ngil tak chuan an sual tih hrereng mah se damlohna thil a nih tlat avangin rinhlelhna châng hre hauh lovin a chhûng leh khat neih chhun an nih mîau avangin a pan nghal hmiah mai a ni tih ka hrethiam mai a. Mi rilru kawi leh ngaihtuahna ṭha lo pu mi ni ta se a pâwng atakin a zui nghal bik hauh lovang tih ka chiang a, thil ṭhalo thleng thei ngaihtuah nachâng hre lo khawpin a ngaihtuahna a thianghlim tih ka hria a, ka dem leh ta hauh lo mai.

     Rka khan Kimtei a check khan a hamda chu a thler ngei a, a duh ang erawhin kan misualpa kha a che hman lo tih a sawi a. A chhan chu a sulhnu aṭangin chet a la nasa hman lo tih a hriat theih a, Kimtei vanduaina tur tingin a hamda erawh a tihchhe hman hlauh a ni tih min hrilh a. Ka thlen khan a lo che ṭan chiah emaw  anih hmel a, a duhtawk hmu hman lo mah se a tihchhiat hman mîau avangin Kimtei thinlungah ser lian tak a hnutchhiahsak a, chutiang chiah chuan ka thinlungah amah huatna, engtikah mah reh tawh ngai lo tur a intuh nghet nghal hmiah a ni.

     Eng anga pâwngsual tawk hnu pawh ni mah se ka duhna a kiam chuang lo a, ka laka inthlahrung taka a awm leh a inkiltawihna avanga min kiansan a tum tlatna te chuan ka lung a tihawi loh rûalin ka duhna a tizual a, hmeichhe ṭhenkhat anga min ti huam lo leh ka rilru hneh tuma eng thil mah a ti ngai lo chuan amahah ka thinlung min pek thuktîr sauh zawk niin ka hria a, a laka ka awm dan ang hian tu hmeichhe chungah mah ka la awm ngai hauh lo a,y ka thinlung taka ka duh awm chhun a la ni. A hawiher leh ṭawngkam engkim chuan ka mit a lain ka lung a dum a, ka hmuh ngun poh leh ka duhna  a zual ni maiin ka hria a, amah ngaihtuaha ka mut theih loh leh ka hnaa ka rilru ka pek loh ṭum a awm zauh zauh bawk. Ka rilru a luah reng a, ka ngaihtuahna aṭanga dahbo ka tumin ka hlawhchham chiang thei hle bawk, ka duhna leh amaha ka luanliamna nasa lutuk chu ka dang zo lo a, ka ngaihtuahna chuti khawpa tibuaitu chu ka hmangaih pawh a ni mahna!

      Inlêng an ṭin a, kan ṭhiante an haw hnu chuan a mutna roomah kan awm dun a, khumah chuan a ṭhu a, a malchungah ka lû nghatin ka mu thung. A hmai vûng leh duk chu a lang chiang ta hle a, a tuk mai inneih a nih avangin hrehawm a tih phah ka hlau hle a, make-up hmangin hliahkhuh theih chin awm mah se a khuhbo zo vek thei dawn lo tih a lang reng a. Chu thil chu hmeichhe dang ni se an buaipui hle-in ka ring a, Kimtei erawh chuan ngaipawimawh angin a awm lem lo a, a hmai duk chungchâng eng mah a la sawi chhuak lo hrim hrim a, ka hlauhthawn angin a buaipui lo hle a ni.

     A hmelah chuan lungngaihna thuk tak a pai a ni tih ka hmu thei a, hlim ang taka lan tum mah se a mitmengah ka hmu thei a, a hmuiah nui hmel lang mah se a mit erawh hlimna-in a kap eih si lo. Zanah hian muhil thei lovin a awm ang a, thil ṭhalo tih duhna rilru a nei mai ang tih chu ka hlauthawng thut a.

     Ka ṭhu chhuak a, ka taksa si chétin ka kuahbet a, ka darah a lû nghatin min rawn ngheng ve chîal a.

     "Eng thil ṭha lo mah tih tum hauh suh ang che aw, ka nupui i nih hun nghakhlel takin ka thlïr tih hria la, i tel lo chuan ka nun a chhe vek a ni mai. Khawngaihin thil ṭha lo lam i ngaihtuah miah lovang tih min han tiam teh le!" ka ti sup a.

     "I nupui atân hian min duh tak zet maw?" a ti sep a, ka kut chu a chûl pah rîai rîai a.

     "Min ring lo nge ka duhna che hi ka la tilang tawk lo le aw! Ka nupui atan hian duh lo che ni ila inneih kan tum hi ṭhulh turin chhuanlam dang siam a ngai lo tih i hria alawm. Mahse, ka duh che a, ka nupui atan nang hi ka thlang fel tawh che, ka bula i hun pum hmang turin ka duh che a, ka fate nu ni turin ka duh bawk che. Chuti chuan a chiang em?"

     Rawn dak chhovin a kut pakhat chuan ka tukkhumah a dawm a, ka lû chu kuaikunin ka hmuiah chuan a fawp a, a chet dan chuan min barakhaih êm avangin ka hamhaih deuh a. Mahse, ka hamhaih chhûng chu rei a ni lo, duhthawh lutukin ka fawp let a, ani pawhin uar lehzualin min fawp a, kan duhthawh dun tak zet. He hmeichhia hi ka duh a ni, nula thianghlim ni tawh lo mah se ka tân a la thianghlim a, a tel lova awm thei lo tur ka ni tih pawh ka chiang khawp mai!

     Amaha kalsan chu ka hreh hle a, a rooma riah ve mai chu ka rilruk a. Eng mah sawi chuang lo chuan muhil turin ka ti a, ka room lama kal phawt tura min tih chuan a muthilh hunah ka chho mai ang tiin ka muttir a, min hnial lo chuan a mu ve mai bawk a.

     A muhil mai thei lo a, mu lova ti ti dun mai mai a rawt chuan ka lo hnial vat a.

     "Naktukah kan chau lutuk palh ang e, tikhan mu chung khan i duh duh sawi la, ka lo ngaithla ang. Chuan, i mut a chhuah hun hunah i muhil daih dawn nia," ka ti a.

     "Nangman sawi zawk rawh, i training lai chanchin te min hrilh la, ka lo ngaithla ang," a tih takah chuan ka awm dan chu siam rem deuhin ka training lai chanchin chu ka sawi ta a. Ngaihnawm tih hmel takin a ngaithla a, a rei deuh takah chuan a mutchhuak chu a ham ta bai bai a. Muhil tura ka hrilh chuan thuawih takin a mit chu a chhîng a, a muhil zui nghal deuh mai a. Ṭhutthlengseia mut tum ka ni naa ka taksa a nghen tlat avangin ka tihharh ka hlau a, a bulah chuan ka mu ve ta zawk a.

     Ka harh leh chuan khua a lo vâr uar tawh a, keimah chauhin ka mu tih ka hriat chuan ka ṭhuchhuak vat a, ka rilru-ah hlauhthawnna a rawn awm nghal a. Ka tho chhuak a, pawn lama kal ka tum lai tak chuan room kawngkâ chu rawn inhawngin Kimtei chu a rawn lut a, min hmuh chuan a nui var var a. Ka lo nuih let vat a, ka thaw a veng hawk bawk.

FELICITY 14
Sbk Pachuau



     Room chhunga a rawn luh chuan ka lo kuah vat a, a hmuiah ka fawhsak zauh a.

     "I thawhna a rei tawh em?"

     "Umm..rei ve deuh tawh, ka pasal neih nî tur  a ni si a, ka muhil thei tawh lo a, ka tho daih alawm," nui var var chungin a ti a, ka va han duh reuh tak!

     Thil hriatchhuah thut nei niawm takin a nui hmêl chu a reh riai riai a, a bîang duk lâi chu dawmin lungngaih hmel deuhin min en a.

     "Mo hmelchhe deuh ka ni dawn a nih hi! Ka lang nalh dawn lo lutuk a ni tiraw?" a ti sep a, a meng hnuai raih bawk.

     "Pawi ti suh, ka mitah chuan mo hmelṭha ber i ni dawn tho, khangte chu a reh leh mai dawn alawm," tiin ka lo hnem vat a, "A la nâ em?" tiin a hmai duk lai chu dimtê-in ka khawihsak a.

     "Na lutuk tawh lo e, darthlalanga ka hmuh loh lai phei chuan ka lo theihnghilh leh daih ṭhin," a hmui tizum deuh pât chuan a ti a, ka lo nui hawk a, duh lutukin ka kuah a.

     "Va intifai la, ka lo nghak ang che. Kan phei har lutuk chuan a fel lovang, pa Marama paw'n min lo call tawh a nia," tiin ka kuahna aṭang chuan a inlahrang nghal a.

     "Aw le," tiin a darah ka vuan a, "Khawngaihin eng thil ṭha lo mah i ti lovang tih min han tiam teh! Vawiin hian ka nupui ni turin Biak in chhûngah thu i tiam ngei ang tih leh he in chhûngah hian ka nupui niin i lo lâwi lut ngei ang tih min han hrilh teh le," ka tih chuan min chhâng mai lovin min en vang vang phawt a.

      "Ka tiam a che, vawiin hian i nupui niin he in chhûngah hian ka lo lâwi lut ngei ang!"

     A hmui no zet mai ka fawhsak leh hnu chuan ka chhuahsan ta nghal a. Ka nu-in min hmuh chuan min lo ko vat a, a bul ka va thlen chuan ṭawng mai lovin ka kut chu a lo vuan a, a mitmenga hmangaihna langchhuak chuan min en a, hetiang taka nu ṭha leg fel ka nei hi mi vannei tak ka ni!

     Thawk a la halh a, "Nizanah Kimtei bulah i riak tiraw?" ka mitah tak enin min zawt a, ka lû ka lo bu nghat a.

     "Mama, vawiin hian kohhran dan thianghlimin biak inah thutiam i neihpui dawn tih i hriat ka ring a, dan thianghlim phak lo chunga kan Pathian hmaa in ding a nih chuan in inneihna hi malsawmin a awm ngai dawn lo a ni! Kan mihringpuite'n hre lo mah se Pathianin engkim a hria tih i hriat kha," a tih chuan a thil sawi awmzia chu ka manthiam lo hle a.

     "Kan duhtakte bulah chuan insum a har tih ka hria a, ka rinloh vang che u ni hauh lovin thil thleng thei a ni tlat a, tlin lo chunga kohhran leh mipui buma dan thinghlima in intiam palh hlauh a nih chuan a pawi dawn em asin!" a tih leh takah chuan a sawi awmzia chu ka hrethiam ta chiah a.

      "Ka nu, i hlauhthawn ang chu eng mah a thleng lo. I thil sawi awmzia kha ka lo man lawk lo a, tunah ka hrethiam chiah e. Kimtei hi i hre chiang a, kei min hre chiang bawk a, i hlauhthawn ang chu a thleng lovang tih i hrethiam mai turah ka ngai. Mihring lakah inthup thei mah ila Pathian lakah kan inthup thei chuang lo, Amah zah vang tal pawhin mite hmuha lanmawi duh vang mai maiin kan tilui duh dawn lo tih i hriat ka ring e," ka tih chuan thawveng huai hmel a pu a, ka kut chu hlim hmel takin a hmer vang vang a.

     "Ka fapa i ni hi ka inchhûang a ni! Mi ṭhenkhat chu tuna i dinhmun angah hian ding ta se, inneihna hi an ṭhulh ngeiin ka ring. I mawhphurhna i keng tlang tur hi ka chhûang tak zet che a ni, nupa hlim tak ni mawlh ang che u," tiin a nui var var a, a hlim a nih tih ka hmuh chuan hlimna min pe ve leh chhawng a.

      Kan inpeih chuan kan chhuak ta nghal a, chawhnu lam daih inneih hun tur ni mah se hmeichheho hian neuh neuh an ngah ṭhin a, mo han chei chhûngte a lo rei a, an lo duh uluk ve ṭhin bawk si a, hun an mamawh hnem viau-in ka ring a, han khawmuanpui vak chi nia ka hriat loh avangin tawi khawmûang lovin ka thlenpui ta vat a.

     Rei awm lovin ka hawsan leh ta nghal a, ka haw hma-in Âtei chu be fãlin a ṭhiannu chu thlahthlam miah lo turin leh a hmuh phak loha awmtir miah lo turin ka chah hmasa thlap a. Thil thleng palh thei laka lo inven tluk a awmin ka hre lo a, a langah hlim hmel pu mah se Kimtei mitah lungngaihna thuk tak ka la hmu thei tlat a, a thinlung pik lutuk hian thil ṭha leh ṭha lo pawh thliar hrang lovin chet a la palh mai ang tih ka hlauh rukna chuan ka awm a tinuam thei chiah lo a ni.

     Biak in dâr ri vâl vâl chu ka pûal lîau lîaua ri a nih vang nge ngaihnawm ti takin ka ngaithla a, ka bula hmeichhe duhawm tak, thianghlim ser mai ding chu ka en a, kan hun tawn hrehawm tak kha ngaihtuah duh hauh lovin rilru hlim tak ka pu lui tlat a, Kimtei zam hmel ka hmuh chuan ka nuih sak a. Min lo en ve-in zam hmel tak chung chuan a nui lui ve a, ka mitmei chuan zam lo turin ka hrilh a, din hnaih deuhin ka kut veilam chuan a kut dinglam chu ka humsak vang vang a. A zamna tihreh tum ni-awm takin thawk a la halh a, ka kut chu a lo humlet ve bawk a.

     Inneih thutiam kan chhamlai chuan a la pangngai zan lo tih ka hre thei a, a aw chu a khur deuh dar dar a, a sawi tur ang ang erawh felfai takin a chhamchhuak vek thung. Zungbun ka buntir lai pawh chuan a kut a la khur nasa hle a, kuaha han thlamuan ka duh hle naa thil tihchi a ni der si lo.

     Inneih inkhawm kan zawh hnua thlalakna kan neihlai chuan kunhniamin a beng bulah chuan a hmelṭhatzia ka zu hrilh ru sup a, a lai hmel chu hmuhnawm tak a ni. A hmai duklâi chu make-up hmangin thiam takin an hliahkhuh a, a kawrfual hak ṭhui mawlmang tak, thianghlim tak si chu a inhmeh kher mai! Ka sawi lawk ang chiah khan mo ka hmuh tawhah ani aia hmelṭha an la awm lo tak tak a, ka mitah chuan a mawi a, a nalhin a duhawm tawk ëm êm mai a ni.

     In lam pana motora kan chuan lai chuan min ngheng chialin a ṭhu a, ka lo kuah a, a awm danah chuan chau ngawih ngawih hmel a pû a, chaw a ei ṭha em tih ka zawh chuan a lo bu nghat a.

     "Ei loh âi a ei angah ka ngai, eng tham mah a ei lo," Átei'n a lo ti vat a.

     "I nuamsam lo em ni, Kimte? I hmel pawh a dik miah lo a nia!" ngaihtuah zetin ka ti a.

     "Ka ṭha, mipui hu ka zo lo deuh a nih ka ring! Ka ṭha lutuk a nia, min ngaihtuah suh," a ti sep sep a.

     A nungchang hi hriatthiam har ka ti ta zauh zauh mai! A hlim hle emaw ka tih laiin a lo hlim hauh lo a, a dam ṭha nia ka ngaihlaiin a chhûngril erawh a dam lo a, amah a insitna hi a dahbo thei lo ni berin ka hria a. Ka tana a tlin tawkzia leh a chunga thil thlengin a laka ka rilru put hmang a tihdanglam lohzia chu engtiang takin nge ka tihlan ang tih chu ka hrethiam lo a, ṭawngkâa ka sawi lah a tawk zo bawk si lo, ka rilru a buai ru viau a.

     Zanriah ei lai chuan ka melh ru deuh reng a, lem har a tih hmel hle tih ka hmu thei a. Chuti chung chuan ei lui hram turin ka fuih a, a ei lui a nih loh chuan kei pawhin ka ei lovang tia ka sawi takah chuan a theih anga tam chu a ei lui ve hram hram a. Midang hmuhah hlim hmel pu mah se a thinlung chhûngrila hliam awm chuan amahah bu a la khuar nghet rih em a, a rilru takin hlimna a la pawh pha lo a ni tih ka hriatthiam sak a. Ka ṭhian te, min lawmpui tura lo kalho pawh a mawi tawka ka lo biak bak chu ka ngaihven hlawm lo a, Kimtei chu ka hmuh phak loha a awm ka remti lo bur mai a ni.

     Mu tura ka rooma kan luh chuan inthlahrun hmel zetin a ding zum zai a, a kutah kaiin khumah chuan ka ṭhutpui a, min hlat ru tlata hriatna ka nei a, a awm dan chu ka duh lo tak zet a ni.

      "Kimte, khati khan awm suh. Ka nupui i ni tawh a, he in hi i in a ni tawh bawk, mikhual ang maia inthlahrunga awm turin ka duh lo che," ka tih chuan muang chângin min en a, a mita mittui tling piau chu ka hmu nghal a.

     "U Pekhlu, min nei hi engtik ni-ah emaw i la inchhir ang a, min zahpui hun a la thleng ang tih ka hlau! Ka chunga hetiang thil a thlen tawh hnu hi chuan min nei lo mah la ka dem dawn hauh si lo che a, engvanga min nei ṭalh nge i nih?" Ka ngaihthlak duh loh zawng bawk a sawi leh ta!

     "Khatiang lam kha sawi tawh lo turin ka hrilh tawh che-in ka hre si a, sawi nawn reng kha a nuam viau em ni?" A kawnga kuahin ka lamah ka hnuk hnai salh a.

     "Mahse, ka .... "

     "Mahse tih a ngai tawh lo, a tawk tawh e, i pasal neih zan hi hlim takin hmang la ka duh a ni. Thil hlimawm lam a nih loh chuan eng mah sawi tawh loh awih loh, kan hlimna tichhe thei lam chu ngaihthlak pawh ka duh lo a nia," tiin a biangah chuan ka fawhsak a.

     Room kawngkhar kik ri-ah chuan inlakhran a tum nghal a, keiin ka kuah nghet sauh thung. Ka nu leh pate an lo lut a, an hnungah ka nau Ruathlûa'n a rawn zui bawk a. Kan naupang ber Hriatzela hi a zirna lam a laklawh vangin a lo haw thei lo a, exam hmachhawn tur a nih vangin ka pate'n lo haw lo mai se an ti a, hmanhmawh taka thil ti kan nih avangin a exam zawh nghak thei kan ni bawk si lo a, a lo tel thei ve ta lo a ni.

      Ka pa chuan a aw a thian kharh a,"Kan chhûngkua-ah kan pung a, thil lawmawm tak a ni. Kimte, kan chhûngkua-ah kan lo lawm che a, he in hi i in a ni tawh a, inthlahrung leh inkiltawiha awm lo turin kan duh che a ni. A neitu chu a thil neih chungah a inthlahrung ngai lo a nia, engkim hi i ta an nih ve tawh avangin i ta angin en la, lungawi lohna i nei a nih pawhin i chhûng te hi eng mah min hrilh hreh lo ang che. He in chhûnga i dinhmun chu 'mo' a ni, keini erawh chuan 'fanu' angin kan lo lawm che a, fanu dinhmun i chelh reng ang. Chhûngkua kan nih angin engkimah inpawh tlâng takin kan awm ang a, kan lawmna leh lungngaihnate kan inṭawm ṭhin tur a ni.  He in chhûnga cheng tu emaw ber lakah i lung a lo âwi lo palh a nih pawhin hmun danga sawi lovin he i chhûngkua-ah ngei hian i sawi ang a, chu chu i ṭhiante hnen emawa i sawi ai chuan a ṭha zawk ang, a chhan chu i lungawi lohna kha he in chhûng aṭanga lo inṭan a nih vangin i ṭhiante khan an rawn chinfelpui thei dawn lo che. Mama te unâu pawhin in hriat tura ka duh chu hmeichhiate hi âwmnêmtê an ni a, in dawm thiam an ngai tak zet tih hi hria ula ka duh a. Ruathlûa pawh nang aiin Kimtei hi naupang zawk mah se i û nupui a nih angin i zah hle tur a ni."
 
     Rei lote a chawlh dat hnu chuan a sawi zawm leh nghal a.

     "Nupa inhnial palh thu-ah pawh a puitling zawk leh dawhthei zawka ṭan hram tum zel hi a ṭha ṭhin a nia, engtik lai pawhin inngeih takin a awm reng theih bik loh a, thu inbah fuh loh palh châng te pawh awm thei a ni. Chung hunah chuan a tu zawk zawk pawhin ngawih chuh hmasak zel a ṭha, thiam zawk nia kan inhria a nih pawhin kan lung a awi tawn hunah ṭha takin sawi dun leh mai tur a ni. Pakhat a thinrim tawh chuan pakhat zawkin ngawih chuh hram a ṭha, chuti a nih loh chuan inhnial buaina a thleng a, nupa nuna thleng miah lo tura kan duh ang thil te a thleng palh thei tih hriat reng a ṭha. Kimtei pawh i hriat tura ka duh chu i pasal hi zah la, i pasal i zahthiam poh leh nangmah kha i zahawm a ni mai. I thiam ang tawkin duat ṭhin ang che, mipate hian han intipá viau ṭhin mah ila duat hi nuam kan ti viau  a nia!" Ka nu nen an in-en a, an nui dun var var a.

      Ka pa ṭawng chhûng zawng khan Kimtei chuan ka kut chu nghet takin a hmer a, ngun lutukin ka pa thusawi chu a ngaithla a, ngainat hmel taka ka nu leh pa a enna mitmeng ka hmuh chuan nupuia ka nei hi ka inchhir ngai dawn lo a ni tih ka inhre nghal a.

     Ka nu-in ṭawngṭaina hun a hman zawh hnu chuan inmangṭha-in min chhuahsan ta hlawm a, Kimtei chu inbual hmasa turin ka hrilh a, inbual rual ka rawt chuan ka rin lawk ang chiahin a duh lo nasa ngei mai, bathrooma hmanhmawh taka a lut chu ka nuih zui hawk a.

     Ka inbual zawh chuan rizai sinin a lo mu thán tawh a, a mit chu a chhîng naa a muhil lo tih ka hre thei a. A bulah chuan mu ve-in a kawngah ka kuah a, a lo ip chaih a. A thil tawn ka ngaihtuah a, a la rei lovin amahah hrehawmna nasa tak a la awm ang tih ka ring a, nupa nun hman kawngah pawh nawrluih ka tum hauh lo.

     Ka taksa si chêtin ka kuah bet a, ka kuahna kut chu a lo dawm ve chat a, a sam rimtui tak chu ka híp vang vang a. A rilru tur ka ngaihtuahin hahdam takin muhil phawt se ka ti a, amah a inpeihfel hunah chauh nupa nun pawh ka hmanpui ang tiin ka intiam ru a.

     "Vawiinah i chau awm si a, tui deuhin han muhil teh le," ka tih chuan phawk fê-in rem leh rwm lovin min melh ta hâ a.

     "I che dawn lo em ni?" mak tih hmel zetin a ti sep a.

     "Umm...thil thleng kha a la rei lo êm a, hlauhlawpa siam che ka duh lo a ni. I inpeih hun ka nghak thei alawm, i taksa mai bakah i rilru thlenga i inpeih hunah  chetzia-in ka nupui i nihna chu ka nemnghet chauh ang," tiin a hmuiah chuan ka fawhsak zauh a.

     Ka lam hawiin a rawn inlet sat sat a, ka lû-ah chuan dawmin min kuaikun deuh a, ka hmuiah chuan a rawn fawp a, fawh satliahin min fawp lo a, phutlet neiin a ni min fawh ni! A chet dan chu ka lo beisei loh lutuk a nih vangin mak ka ti kher mai, chhanletna châng pawh ka hre lawk lo réng a ni.

     Uar lehzuala min fawh takah chuan duhthawh lutukin ka chhânglet ve ta a, kan duhthawh dun tak zet a ni. A taksa chuan min ngheng hnai tálh tálh a, ka taksa thlâwp zaihin ka lo pawmbet a, a taksa pêng hrang hrang chu ka chûl kual nghal a.

     "Bawihte, i thil tih hi i chiang chiah em?" a mitah tak enin ka zawt a.

     "Aw, chiang e! Kha thil rapthlak tak kha ka hriatrengna aṭanga paihbo turin nangmah ngei hi che la ka duh a ni," a lo ti sap a.

     Min rawn fawp leh nghal zat a, kei pawh chuan timna nei hauh lovin ka lo fawplet a, a mutkawr hak chu hnawk tiin ka hlihsak a, a taksa mâm nal han maiin a lawnga min sik takah chuan ka inthunun zo lo ta lek lek a. Duhthawh lutuka fawp chungin a chungah chuan ka pakâi a, ani pawh a awmdanah a mumal tawh bik lo tih a hriat a, a thaw lak pawh a mumal tawh lo tak zet a ni.

     A kekawrte ka hlihsak rûala a taksa han khawng ta deuh lah chu ka hre thei a, ama duhthlanna ngeia ti tur kan ni bawka tiin ngai pawimawh duh lovin chet lak chu ka tum zui a, chutia a tak ram thleng tura chet lak ka tum takah chuan a taksa chu rawn khur dawt dawtin a ṭapchhuak ta hawk a.

     Rang lutukin a chung aṭang chuan ka letthla nghal tawp a, a taksa khur hlawk hlawk chu kuahin a lû-ah chuan ka fawhsak a.

     "Bawihte, pawi ka ti lutuk! I inpeih ve tawh turah ka lo ngai a, nangmah ngaihchanna châng che ka lo hre lo a, tihpalh aw," tiin a hnungzângah chuan ka chulsak a.

     "Ka thei turah ka ngai a, ka tum ve nasa asin! I bulah chuan theihnghilh theih mai ka lo inring a, ka thei thlawt lo, a rápthlak êm mai!"

     Ka âwmah chuan a hmai chu phûmin a ṭap hlawp hlawp a, duat takin ka lo kuah a.

     "I paltlang theih hun a la awm êm êm ang. Kan dam anga hun a la tam alawm,  i inpeih tak tak hunah chauh kan ti dawn nia," ka ti a.


FELICITY 15
Sbk Pachuau



     Damdawiin lamah kan la buai viau zel a, naupang damlo an tamin naupang ward lam pawh a lún hle a, khum áwl a awm hman meuh lo a ni ber. Clinic lam pawh kan lún viau mai, zan rei deuh han thlen ṭumte pawh a awm ta nawk a, in lam thlahlel ru tak, haw hun nghakhlel takin ka awm nilêng nîtin ta mai a. In lam thlakhlelh vanga min mamawhtute han tlansan lah chu thil theih niin ka hre bawk si lo, nupui nei hlim e tilo chuan inah ka awm hman meuh lo a, zingkâr leh zan lama ka haw hnua kan inhmu hi kan awmdun theih hun chu a ni mai a.

     Kimtei chu a zia chho ṭan vîau a, a nungchang pawh a hma ang kha a ni leh chho ṭan tawh a, nupa nun kan la hmang lo tih lohah chuan kan inpawh tawn tawh hle a. Nitinin amahah ṭhatna awm chu ka hmuh belh zel a, ka hmuh loh chhûngin ka ngai ngawih ngawih a, a zúnah ka uai a ni ber e. Ka nu leh pa a tilawm thiam a, ka nau Ruathlûa pawh a ṭawng tam loh tehreng nen Kimtei bulah chuan a titi ve bawrh bawrh ta fo mai! Kan naupang ber Hriatzela nen lah an inkawmngeih nasa mai bawk si, ka tan chuan sawiselna tur a awm lo a, ka duh telh telh a, ka ngai veng veng reng mai a ni.

     Nikhat ka ward fang zo duty rooma ka let leh chuan ka nu leh Kimtei te chu an lo ṭhu dun a, an lo kal tur ka hre lawk lo a, ka rilrua ka ngaihtuah lai taka chutia ka hmu thut chu ka lawm kher mai!

     "Kimtei nen hian kan kawmthlangpa damlo kha kan rawn kan a, a remcháng ema tiin kan lo nghak che  a nih hi," min hmuh veleh ka nu chuan a lo ti a.

     "Min lo nghahna a rei tawh em?" tiin ka zawt a.

     "Rei lutuk lo e, kan ṭhu fel deuh chauh a ni," Kimtei'n min lo chhâng a.

     Ka awl ve theih lai a nih vangin kal mai an tum chu phal lovin ka la chelh a, kan kawmthlangpa chanchinte chu ka zawt a. Ka thawhna damdawiina awm mah ni se mahni tawkah kan buai ve em avangin kanna hun ka nei ṭhin lo a, chubakah a awmna ward leh naupang ward hi a inhlat deuh avangin remchang takah lo chuan han kal mai hi a lo buaithlak ve a, an rawn luh tirha ka han kal bak kha ka la kal leh ta miah lo a ni.

     An haw tur chu motor dahna thleng thlah tumin ka zui a, kawta kan lo din lai tak chuan Ruthi leh a ṭhiannu hi kan dinna lam panin an rawn kal a, kei phei chuan ka lo hmu lawk lo a, min rawn koh takah chuan ka hmu ta chauh a.

     "I awllai em ni? Nimina ka rawn sawi kha min kalpui la ka tia," a ṭawng pah chuan ka bulah rawn dingin ka bânah a rawn dawm a.

     A thil sawi chu ka bo deuh dawn a, nimin lama a message min rawn thawn kha ka hrechhuak leh a. A u fanu lung ṭhalo naupang wardah a awm ve a, chumi chungchang chu min rawn hrilh ve tak alawm, ka lo hre leh tawh lo a lo ni a.

     "Tikhan min lo nghak lawk rawh u, kannu te hi ka'n thlah lawk ang e," Kimtei banah chuan vuanin motor dahna lam pan chuan ka kalpui ta nghal a.

     Motor dahna kan thlen chuan driver kan hmuh mai loh avangin ka nu chuan a phone a, ka nu phone hman lai chuan  Kimtei chu inngaihtuah muk hmel takin a ding a.

     "Zanin chu rawn haw hma deuh ka lo tum ang," va nghen deuh pah chuan ka ti a.

     "A ṭha alawm," a lo ti tawi ták a.

     "Lo haw hma ka tumna chhante min zawt dawn lo em ni?"

     "Nula-in an nghah che kha, chho tawh rawh!" ka zawhna chhâng lovin a lo ti hmak a.

     "Lungawi lo deuh kan awm a va ang ve!" chhaih deuh pahin ka ti a, a hmui chip hmakin hmun dang a melh daih a.

     "Han chho vat rawh, an lo nghakhlel tawh ang che!"

     "Bawihte, khati khan awm suh. A nih loh chuan helai mi tamna zingah hian ka fawp mai ang che, ka fawp hreh dawn miah lo che  a nia, chu chu tih ka chak tak zet bawk!" ka tih chuan phawk hrâ-in min en a.

     "Chutiang i ti thei lo ......"

     "Kan en chhin dawn em ni ang?" kun hniam paha ka tih chuan a hawisawn rang kher mai!

     Driver a lo thlen takah chuan motor chhûngah chuan a ṭhulut vat a, a lungawi lutuk lo hmel chu ka en vang vang a, a biangah chuan ka zu piaisak zauh a, min en duh lovin hmalam a melh ngar a.

     An tlanliam thleng chuan ka thlîr reng a, a lungawi lohna chu eng pawh lo ni ta se ka tihlungawi leh theih mai inbeisei chung siin rilru khingbâi ru tak chung chuan muang chângin ka chho a.

     Ruthi te naupang warda ka kalpui zawh hnu chuan tihtur pawimawh nei anga insawiin ka kalsan ta vat a. Nupui nei tawh ka ni chung hian inhmuh nikhua velah min kuah leh nawk vel hi a ṭhulh chuang miah lo a, ka inlakhran pawhin a ngaipawimawh lo nge a ngaite bawkin a ti leh ṭhin. Kan inngaihzawnlâi khan ka tan a inphal hle a, khum pawh kan kaidun zing malh malh viau! Mahse, amah han duh huam huamna ka neih loh vang nge ka hne châng a awm ṭhin, hmeichhe dangte ka han kawpsan lawp lawp ṭhin chung pawhin min zui a ṭhulh phah eih si lo a, kan inkawp rei phah ta phian kha a ni a. Kimtei ka tawn hnu-ah erawh ka rilru ka pe thei tawh ngang lo a ni tih leh midang duh ka nei tih ka hrilh tak rawtah khan min rehsan ta chauh a, rei erawh a reh lo thung.

     Ka mitmei ka hmuh hauh lo chungin min zui ru emaw tih mai turin kan inhmu thei phian a, zak map lovin remchâng a hmuh phawt chuan min la bialpa chei ziah bawk. Ka nupuiin lungawi loh phahna'na a hmang pawh kha a awm viau, a awm ve reng lâiin ka bânah min kuah ngam a nia, eng ang chiahin nge Kimtei thinlungah thu a sawi ang tih chu ka hrethiam pha hauh lo naa a lungawithlak loh hle ang tih chu ka hriatpui thung.

     Inentir an tam loh ṭum a ni bawk a, ka haw hma ve thei hlauh a, phur takin ka inkhalh haw a, dawra Kimtei duhzawng ka leikawi lawk tih loh chu khawiah mah pêng lovin ka haw tlang nghal a.

     In ka thlen chuan Kimtei ka hmu mai lo a, ka nu leh pate chu sitting roomah ṭhu-in ka nu chuan TV a lo en a, a bulah ka pa chu lehkha chhiarin a ṭhu bawk. Kan roomah a awm a nih ringin ka chho ta nghal a, ka rin ang ngeiin a thawmhnaw dahna bâwm bulah chuan dingin zawn nei niawm takin a thawmhnaw bâwm chu a lo hai a.

     Ka thawm chu a hre lo tak tak nge a hre lo der zawk ni ka awm tih hre lo ang hmiahin a thiltih lai ngawt chu a buaipui a, a bul hnaiha ka va din pawh chuan min lo ngaihsak hauh lo! A hnunga dingin a kawnga ka kuah takah chuan a ding khawng nghal lah a, a sam karah chuan ka hmai chu phûmin ka hîp vang vang a.

      "Min lo ngai em?"

     Chhanna a awm lo!

     "Bawihte, ka ngai che a nia, min ngai ve lo em ni?" ka ti leh a, min la chhâng chuang lo.

     Nghet zawkin ka kuah a, a chhipah ka khabe chu nghatin thawk ka la halh a.

     "Kimte, i lungawi lohna chungchâng hi kan sawi dun dawn em ni ang?"

     "Aih..."

     "Sawi dun i duh si loh chuan engtin nge kan inthlem lungawi tak ang! Heti zâwng hian kan ti mai dawn em ni ang?" tih pahin ka kuaiher a, a inven hman hma-in a hmuiah tak ka fawp ta nghal a.
   
     Ka beisei loh lutukin ka nghâwngah rawn kuahin min fawplet nghal a, kei aia uar mah chuan min fawp tawn tawn a, ka sam kârah a kut chu rawlh lutin min ngheng hnai sauh bawk. Ka beisei phak miah loh chhanna ka dawn takah chuan phurna nasa lutuk min pe a, a lehpek awm leh thei tawh lo tur khawpa duhthawhin ka fawp a.

     Ka kamis hak lai chu a kilhna a phelh malh malh a, a kut chu a khur deuh dar dar bawk. A thaw sêk sêk a,  mipa mamawh lutuk ang maiin min chûl kûal rûai a, a awm dan chu mak ka ti ta deuh a.

     A kut che kual vel chu vawn behsakin a hmêl chu ka hmuh theih turin ka kuaidak bawk a, a mitmenga natna awm chu hmu theiin ka inhria a.

     Min fawh tuma min rawn hnaih leh chuan ka lo dang vat a, ka kuahbet a, a mitah tak ka melh bawk.

     "Bawihte, i ṭha em?" ka ti a.

     "Nupa nun ka hmanpui theih loh vang che em ni kha nu kha i la kawp? I duh ang ka pek ve theih loh vang che a ni tiraw in la inzui reng ṭhin?"

     A thil sawi chuan min ṭhâwng tak zet! Ka ngaihtuah loh lam daih a ni tlat!

     "Engtin nge chutiang ngaih dan chu i neih theih zawk? Bawihte, i thil ngaihtuah dan hi a ṭha miah lo a nia!" a mita mittui tling kiau en reng chung chuan ka ti a.

     "A dik a ni lo'm ni? I nupui ni mah ila i mamawh ka pe thei miau si lo che a, a pe theitu che pan mai chu thil tih awm tak a ni alawm. Mahse, ka pasal i nih angin midangin ka thil neih min ṭawmpui hi ka duh lo, i duh angin min khawih la, i mamawh phuhrukna atan chuan min han hmang ta che," a ti a, a mittui chu a biangah a luangthla ngîai ngîai a.

     Ka kuahbet a, ṭawng leh a tum chuan a hmuiah ka kutzungchal dahin ka lo khap vat a.

     "I ngaih dan ang kha a dik lo, nupui nei reng chunga hmeichhe dang kawp duh tur ang hmuhin min lo hmu rêng em ni? Ka nupui i ni a, nupa nun hman loh chungchângah pawh kan pahnihin thutlukna kan siam dun a ni lo'm ni? Khawgaihin a ni lo zâwngin thil thlir lo hram teh aw!"

     "Engtin nge i nupui ka awm ve reng laiin khatiang khan a rawn khawih ngam zawk che? Kei hi a hming maia i nupui niin ani kha khumlaizâwl i thlenpui zawk ṭhin vang a ni ang tih ka ring e!" a aw chu a khur dar dar a, a lawi lek lek bawk.

     "Ka nuna i lo luh hnu hian vawikhat mah hmeichhe dang ka tawk leh tawh lo, nangmah chiah ka duh che a, ka nunah hmeichhe dangin hmun an chang tawh lo. Chu chu ka awm danah pawh hian i hrethiam ve mai lo em ni?" ka tih chuan a lo thaw hak a.

     "A nih chuan eng vanga huai taka in mutdun thu min hrilh nge a nih tak ang le? He in chhûngah ngei hian, hmaichhanah in mu dun ṭhin tih min hrilh asin! Ka tân a nat turzia leh zahthlak turzia hi han ngaihtuah ve teh!" a hnuk ulh vang chuan a ṭawng ṭha hlei thei lo a, a thil sawi pawh ka hre kim lo lek lek a.

     "Hetah Ruthi a lo kal maw? Eng vanga chung a thu sawite  chu min hrilh lo nge i nih? Engtik khan nge a lo kal?" ka zawt mawlh mawlh a.

     "Ka rin em vang che-in dawt a sawi ni-ah ka lo ngai a, ka rilru chu a nuam chiah lo naa ka lakah i ṭhat em avangin ka ring chhe phal lo che a, i fihlim ni-ah ngaiin ka sawichhuak duh ta lo a ni. Mahse, vawiinah khan ka awm lai reng pawhin i banah a kuah ngam che a nia, a sawi kha a dik a nih ka ring hmiah mai a ni," zawitê tê-in a phun sep sep a.

     "Bawihte, thil kal tawh a nih chu. Tunhma chuan kan mu dun ṭhin ngei alawm, ka zep lo. Mahse, ka thinlunga hmun i chan hnu aṭang kha chuan vawikhat mah ka mutpuiin ka khawih leh tawh lo, khawngaihin hriatthiam tum hram teh!"

     Eng vanga kan mihringnu phiangsen chuan chutiang thil ṭul lo lutuk chu he ka nupui rilru no tak bula lo sawi nge maw a nih reng reng le! Thil ṭul lo táwp a ni, kha thil a hrilh khan a tan hlawkna a awm dawn pawh a ni si lo a, engvanga ka nupui rilru natna tura hrilh kher nge a nih tehrep ni!

     "Min ring em, Bawihte? Min ring tiraw?" a khabe-ah kuaidakin a mita en chungin ka zawt a.

     "Ka ring che alawm. Mahse, khatiang thu hriat hnu-ah i bula a awm dan kha rinhlelh loh a har em a ni. Nupui ka nihna anga i mamawh ka pe thei si lo che a, in mu dun ṭhin tih a sawi  kha awih loh duh viau mah ila ka thei si lo a ni," a ti niah niah a.

     "Keima thiam loh a ni! A tirah engkim chiang taka lo hrilh tur che ka ni a, hetiang thil hi a thleng ang tih ka lo hre lawk bik lo atin ni! Ka mamawh chu nangmahah hian a awm kim vek a, nupa nun kan hmang emaw hmang lo emaw ka buai lo. Ka nupui i nih angin ka engkim i ni tih  lo hria la, tisa taka ka nupui i nih hun hi ka nghak thei a ni tih lo hre nawn leh bawk la," tiin a hmuiah chuan ka fawhsak a.
 
     "Inbual tawh la, i eitur ka lo zu chhuanglum ang e," tih pah chuan kalsawn mai a tum a, ka dang vat a.

     "Zanin chu min lo bual teh, ka chau riau mai!" ka tih chuan a mengphawk vak a, ka lo kuahnghet salh a.

     "Va inbual vat teh, zan a rei mai dawn. Nidangah ka la bual zawk dawn che nia, tun ṭum chu nangmahin lo va inbual leh phawt teh," ka rin loh deuh chuan felfai deuhin min chhâng leh reuh lawi a.

     A hmui fawh nuam zeta ka fawh leh vawng vawng hnu chuan inbual turin ka insiam a, ani pawh chu inhnuai lamah a chhukthla ta nghal a. Ka inbual zawha ka chhukthlak ve chuan eitur chu a lo chhawp fek diam tawh a, cha w thleng pahnih a chhawp ka hmuh chuan a dan pangngaite-in chaw ei lovin min lo la nghak a ni tih ka hre thei mai a. Ka haw hma emaw ka haw tlai emaw chaw hi min eisan ngai lo a, eng anga ka haw tlai ṭum pawhin min lo nghak ngat ngat zel a ni.

     Ka nute bulah rei vak lo ka ṭhu khawmuang a, mut an lo tum hnaih tawh avangin keini pawh chu kan room lamah kan chho a, kan mu ta nghal a.

     Ka taksa ngheng chîalin a mu a, a muhil hmel chu ka thlir reng a. A hmai fai sar mai leh a hmui senno, a bîang tai deuh hlekte chu ka thlir ning thei lo a. A hmaifang ṭhat mai bakah a vun nung sar maite chuan a tilang duhawm zual hle a, a muhil lai hmuiah chuan fawhsak zauhin muthilh tumin ka mit chu ka chhing ve ta nghal a.

     Kimtei ṭe ṭhawt ri chuan min tiharh a,  thaw hlawp hlawpin khumah chuan a lo ṭhu a, ka tho vat a, ka kuah a, min lo ngheng nghal a.

     "I mumangah thil ṭha lo i hmu em ni?"

     "Aw, min lo khawih leh......." sawizawm thei lovin a inhup a, a inhnit nghal hlap hlap a.

      "Shhhh...Bawihte, hlau duh miah suh, i bulah ka awm alawm! Tihian ka kuah tlat che ang a, muthilh tum leh rawh aw," ka ti a, kuah chung chuan ka mutpui a, a la inhnît hlap hlap a.

     "Ka duh miah lo chung ka rilru-a a lo awm ṭhin pawh nin tawh nak alaiin mumangah lehzel ka hmu a, a va'n hrehawm tak!" la insût feih feih chung chuan a ti a.

     "A rei ang a, a zia chho mai ang. I rilru-a a lo lan leh hunah chuan ngaihtuah zui duh miah lo la, thil dang ngaihtuah lui tlat la, i rilru-ah hmun chantir duh miah lo bawk la, i rilru-ah a awm lo vat mai ang. Thil hlimawm lam ngaihtuah tam la, nangmahin awm fâl tam lo bawk la, ka nu a awm loh pawhin nu Mawii emaw pawh titi pui reng la, inngaihtuah hman miah lo turin  awm tum la, i zia mai ang," ka lo ti a.

     "I nupui ka ni hi ka vannei ngawt mai, kawng engkimah min hrethiam a, min nawrlui duh bawk si lo. Min ngaihtuahin min duat bawk si, ka pangchang zo vek tawhin ka hria," a ti niah niah a.

     "Ka lakah hian pangchang deuhin awm la ka duh, ka duh aiin i pangchang lo ṭhin!" ka tih chuan a nui nghawr dat a, a mittui la chambâng chu hruhulin ka lam hawiin a rawn inlet sat sat a.
   

FELICITY 16
Sbk Pachuau


   
KIMTEI

     Pasal ṭha tak, kawng engkima min hrethiam em emtu ka nei chu ka vannei tak zet! Min duatin min dawh thei hle a, ka hlim loh a hlau hluah hluah a ni ber e. Chhûngkaw zahawm takah ka lâwi lut a, nu leh pa ṭha tak neiin min duat hle bawk, an sawi lawk ang chiahin an fanu ang takin min en a, engkimah min ngaihtuah a ni ber. Mo dinhmunah chu tluka ṭha a awm chuangin ka ring lo a, he chhûngkaw fanu pawh hi ni ila tun aia min duat leh ngaihna a awm lo tawp ang le!

      A hma aṭang tawha nu leh pa ena ka ente kha an ni a, nu leh pa nei lo ka nih avangin ka thinlungin ka nu leh pate ai ka awhtir thlap kha an ni a, u Pekhlûa nena kan inneih takah phei chuan ka nu leh pa tak angin ka en nghal hmiah a, anni pawhin min en hrang lo tih ka hriat avangin an lakah pawh ka pangchang ru viau nghe nghe a ni.

     Ka chunga thil thleng rapthlak lutuk tak mai kha theihnghilh tumin eng anga nasa pawhin bei mah ila ka theihnghilh thei lo a, ka thinlunga hliam min hnutchhiah hi a ser a la tharlâmin a lian mah mah a, haider mai chi rûal a la ni tlat lo a ni. Ka nun chu chhûngrilah a rum a, pawnlamah hlim tak angin lang mah ila ka thinlung erawh a rum vawng vawng reng a, eng anga nasaa hlim tum pawh ni ila ka thinlunga uaitu hi a la rit rih êm a, hlimna tak tak ka la pawh oha meuh lo a ni.

     Pâwngsual tawk rau rau-ah ka vanneihna chu hretu an tam lo hi a ni. Pâwngsual tawktu ṭhenkhat chu an vanduaina belhchhah turin mitinin an hria a, social media-ah a mualpho thei ang berin an thehdarh a, midangin an hre ve lo palh ang tih hlau ni-awm fahranin midang thawndarh hmasatu nih inchuhin kan phusa luai luai zel a. A tuartu tawrhna a chhawk eih si lo, chhawk ahnehin rilru pik lehzualna thlentu a ni zawk a. Ṭawngkâ-in lainatna thu kan chhakchhuak a, a tak ramah erawh a hnung lamah kawkin, "Saw nu saw an pawngsual hnu kha a nih saw," tiin kan thlir zui ṭhin!

     Pâwngsual tawk hnu nula thianghlim an awm ngai lo a, chu vang tak chuan mipa tan an ngaihzawnawm tawh lo hle, ngaizâwngtu an hmuh ve te pawh mipat-hmeichhiatna vang chauha duh dertute an ni cháwk. A vannei zual tlemte chauh tak takin pasal ṭha tak, anmahni hrethiamtu an nei fuh a, chungte chu mi nihlawh tak an ni. Pâwngsual tawk tam zawk chu pasal han nei ve bawk mah se an pasalte an fel loh chuan an vanduaina lai tak kha anhla-ah neih khumin eng emaw hlekah mahni insit ngawih ngawihna rilru pu khawpin an sawichhuaksak fo ṭhin, kum eng emaw zat pawh ral mah se an vanduaina chuan a um zel a, tu leh fa an neih thleng pawhin an chunga thil thleng kha an theihnghilh thei tawh ngai lo a ni.

     An ṭhian kawmte ngei ngei pawhin pâwngsual an nih kha khuhmawi ahnekin midang hriatah an puanzar sak hreh hauh lo ṭhinte hian pâwngsual tawktu te nun a tichep a, midangin an hriat miah loh pawha an nat tawk tehlul nen a lo hretute zingah ṭawngkam duhtui lo tak taka lo ṭawngkhum an awm leh ṭhin bawk. Chu chuan nasa takin a chhe zâwngin anmahni-ah nghawng a nei a, pâwngsual tawk te zînga a tam zawk hi chuan 'depression' an neih phah hial ṭhin réng a ni.

     Ka pa leh pa Puiate zârah mualpho zâu lovin kan awm thei hlauh a, lo hre ru pahnih khat te chu lo awm mah se midang kâ aṭanga a rikchhuah kan la hre lem lo a, chanchinthar leh social media lamah eng thawm mah a awm lo bawk a, a zia hlauh zawk a. Ka thinlung hliam erawhin min rehsan a tum lo a, ka chhûngrilah min tichau ru ngawih ngawih mai a ni.

     Ka chunga thil thleng rapthlak tak avang khan pasal neih tumna ka nei ta miah lo a, Pekhlûa tân ka tenawm tawh a, a nupui ni tlakah ka inngai lo a ni. Tihchhiat ka nih zan khan ka muhil miah lo tluk a ni a, ka thinlung tawt lutuk kha au chhuah piap piap maite ka duh rum rum a, ka nu kha ka bulah riak ta lo se ka tlanbo ta a nih loh pawhin ka nunna ka la ngeiin ka ring!

     Ka nun kha beidawnna-in a khat a, ka hmalam hun chu thim vekin ka hmu bawk. A tuka Pekhlûa hna kal turin min rawn hmuh chuan inneih chu ṭhulh mai ka lo rawt a, min hnial fithla ṭhak a. Nilênga ka inngaihtuah hnu chuan thutlukna ka siam ta a, Pekhlûa chauh ni lovin a nu leh pate nen engkim sawiho ila, nupui leh mo ni tlak ka nih lohzia leh mitenawm mai ka ni tawh tih sawia an rilru hmin mai chu ka tum ta a. A tirah chuan ngawi renga inthiar fihlimsan ka tum deuh kha a ni a, chutianga ka ti a nih vaih chuan an chhungkaw mualphona a nih dawn si avangin ka ṭhulh leh ta zawk a.

     Tlaia ka inbual zo bathroom aṭanga ka chhuak chiah chuan room chhunga Pekhlua lo ding run chu ka hmu nghal a.
Ka ngai em tih min zawh chuan pehhel map lovin ka ngaihzia thu chu ka hrilh nghal hmiah a.

     Min fawhna chu uar takin ka chhanglet a, ka rilruah tum nei saa awm ka nih avangin a tawp thlen mai inpeih atin ka awm a, eng mah a sawi lem lo naa ka chetdan chu mak a ti deuh tih ka hria. A vawikhatna leh a tawpna atan hmangaihna chenpuia kalbosan vang vang chu ka tum dan a ni a, kha mihring tenawm tak sulhnu kha Pekhlûa chu thlaktir ka duh a, a tan inhlan tawp mai chu ka rilruk a ni.

      Mahse, a takram thleng turin ka thei ta lo! Ka tum ngial a, ka paltlang thei ngang lo a ni. Pekhlua'n phurna nasa tak min pek pawh chu kha mihring tenawm lutukin ka taksa chunga a thiltih ka hriatchhuah rual chiah chuan a reh leh nghal vek a, ka thei ngang lo tih a hriat khan Pekhlûa chuan min hrethiam takin ngaihdam min dil ta hial zawk a nih kha!

     A nu leh pate nena kan sawihona pawh awmze awm lo a ni leh ta bawk, ka duh ang ka sawi chu a phal a, ka rawtna anga awm erawh a tum lo bur thung. Mahni insit ru tak chunga an rawtna pawm mai loh chu tih theih dang ka nei ta lo, han tlanbo ngawt dawn ila an chhungkaw mualpho tur ka ngaingam bawk si lo a, pasal nei tur e tilo chuan rilru pik ru ṭeuhin ka awm a.

     Kha misualpa sulhnu keimaha awm kha reh vat se ka tih avangin nupa nun min hmanpui turin ka nawrlui hial a, bul ṭantu ka ni naa ka thei leh ta chuang lo! Hrehawm ka ti a, ka pasal chu ka zah ru em em bawk. Tu mipa-in nge nupui neih zana hmangaihna chen duh lo ang ni? Mahse, min hrethiam em em a, ka inthlahrun a hlau hle tih ka hria, ka inpeih thlap hun a nghak thei a ni tih a sawi chuan ka hnuk a ti-ulh leh pek!

     Nitinin ka duhna a pung zel a, a hnaah a buai em avangin ina a awm hun chhûng a rei lo ṭhin hle a, ka ngaiin ka thlahlel ngawih ngawih ṭhin. Min ngaihsakin min duat em em a, nupa nun hmanpui thei turin ka rilru ka siam ve hret hret a, a taka han ti tur erawhin ka la inpeih chiah lo deuh niin ka inhria a. Inpawh lehzuala kan awm theihna turin nupa nun chu hmang thei ila ka duh a, la inpeih zan lo nia ka inhriatna chuan min tiawm nuam lo fo a ni.

     Nikhat chu ka nu leh pate an chhuak a, u Ruathlûa a dawr lamah a kal bawk a, nu Mawii nen chauh inah kan awm a. Doorbell a rawn rik chuan kawngka hawng turin ka kal a, kawng kanhawn ruala Ruthi lo ding zan ka hmuh chuan ka rilru chhungrilah nuam lo a rawn awm nghal a.!

     A hnathawhna kaihhnawih thila a chhuah thu leh a remchan em avanga rawn kawi mai mai a nih thu sawiin tui in tur min dil a, sitting room-a sofa-ah chuan tlangnël zetin a ṭhu nghal a.

     Tui in tur nen ka let leh chuan kan inneih thlalak, banga kan tar chu a lo thlek vang vang a, ka tui pek chu la-in a in nghal a.

     "Nang ai chuan i pasal hi ka hrechiang zawkin ka ring a, in inhriat hma kum eng emaw zat ka lo hre tawh a, a duhzawng leh ngainat zawng pawh kei aia hria an awm ka ring lo!" tui a in zawh chuan a ti a, min enin a nui sak a.

     "A nih chu maw le, in inkawm nasa hle a nih dawn chu!" ka ngaihtuahna tilang lo thei ang ber turin ka ṭawng a.

     "Inkawm satliah mai kan ni nang, in khatah kan cheng dun lo chauh a ni. Kan inzui ve nasa lutuk! Hetianga awlsam taka nupui a nei mai hi mak ka ti riau!" a ti leh a.

     Min zah derna nei hauh lova a awm chu pawi ka ti lem lo a, ka pasal nena hun kal tawha an chanchin min sawikhum erawh ṭul ka ti lo hle thung. A ṭawng chu a rul tawk lekin ka chhang zel a, kan titi dun ni lovin ka pasal laka a lo theih tawhna min insawitheih khum a ni ringawt zawk a, kei chu ka ṭawng ve mang lo a ni.

     "Heti thuta nupui a nei hi mak ka la ti tawp thei lo! Eng emaw vanga innei in ni hial lo maw? A nupui nih hi i inhmeh ka ti chiah lo deuh a, min lo hrethiam dawn nia," a ti leh zat zat a.

     "Nupa zawng zawng an inhmeh kher hleinem, a inhmeh lo zingah kan tel ve a nih dawn chu," ka lo ti tawi ták a.

     "inngaizawng pawh ni lova in innei hrim hrim pawh hi a mak ka ti! Ka bulah eng mah a sawi bawk si lo."

     "Inngâizawng leh induhtawn taka innei chu kan ni alawm," ka lo ti salh a, a ṭawng dan phû tawka chhan let chu ka thiam ve khawp mai.

     A nui hawk a, awih loh hmel zetin a ner deuh nâng a.

     "I hrechiang lo hle mai! Pekhlûa hi nangni ang duh tur khawpa nun hniam a ni hleinem. Nupuia a neih vang ngawt che hian a duh che tihna a ni hauh lo a nia, nakin lawkah ka hnenah a rawn let leh dawn alawm," min tham lo zetin a ti zat zat a.

     Rapthlak ka ti kher mai! Hetiang mihring hi thawnthu-ah bak an awm ka lo ring ngai lo a, tunah ka bulah ngei a duh duh min sawi khumin a awm chu a ni si a, mak ka ti tak zet a ni.

     "Nang ai hian i pasal hi ka mutpui hmasa zawk a, tihlawm dan pawh ka thiam zawk ngei ang tih ka hre chiang a ni!" a tih leh takah chuan ka thin a khei ve ta zak a, zakthei lo lutuk mai!

     "Eng vanga chung thil chu ka bula rawn sawi chiam nge i nih le? Ka pasal i lo mutpui tawh avang khan chawimawina pârṭhî ka lo awrhtîr che i beisei a ni em lovang chu tiraw?" ka ti ve ta hmak a.

     Meng phar deuh awk chungin, "I va zakthei lo reuh e! Ka rin ai daihin i chaltlâi mai ka ti! Pekhlûa pawh hi i lo zembuai a nih ka ring ta, neih ngei tumin i kherh a nih ka ring ta chiah e," a ti hmarh hmarh a.

     "A zakthei lo zawk chu a hriat mai alawm! Kan in chhûngah ka pasal nena in mutdun tawh thu te min sawi khum ngam a nia, kei a nupui zawk pawhin eng mah ka sawi loh laiin a bialnu hlui khan i rawn sawi ham ham mai a, a zakthei lo zawk chu i inhre ve am ang chu maw!" ka ti ve sak sak a.

     Min khawih duh mai hmel pû-in min en a, thinur tih hriat takin a thaw sâk sâk bawk. Ṭawng leh tuma a kâ a an lai tak chuan ka lo ṭawng khalh vat a.

     "Khawngaihin min chhuahsan tawh mai ta che, thil tih laklawh ka nei a, ka va khawih zawm leh tawh ang e. I sawi tur ṭul zual chu i sawi zo hman tawh thovin ka ring e," hawihawm chhuah  duh bik hauh lovin ka ti ta hmak a.

     Thinrim tawkin dawhkana a bag dah chu la-in rum fahranin min melh a, a chhuak tau ta nghawng nghawng a. A chhuah fel hnu chuan sofa-ah ṭhu thla-in ka inthlahdul riai riai a, ka chau nghulh thei nia!

     Pekhlûa nuna ka la luh ve hma thil a nih vangin ka na lutuk lem lo a, tham lo leh mi zahna nei miah lova min ṭawng khum ngam erawh chuan ka fahrahna min hriat thartîr chiang kher mai! Mi zahawm chhungkua aṭanga seilian emaw fahrah emaw ni lo ila khatiang khan min ṭawngkhum ngam bik ngawtin ka ring lo a ni.

      Pekhlûa pawh eng mah ka hrilh duh ta lo, a chhan chu a thil sawi ho kha kan nupa inkâr tibuai thei khawp a awm miau lo a, kan intawn hma thil ka lo huat ngawtna chhan tur a awmin ka hre lo, fa an lo nei dun a a lo zepte a nih ngawt loh chuan! Tunah keimahah chauh a rilru a pe  nia ka hriatna chuan ngaihdamna a keng telte pawh a ni mahna!

     Hriatzela lo haw hun ka nghakhlel hle a, ka nu ina a awm loh chângin a khawharthlak ṭhin lutuk a, nu Mawii nen chauha kan awm chang phei chuan ka pasal ka ngai bawk nen ka khua a har ru hle ṭhin. Hriatzela a awm chuan khawhar a hnem leh hle dawn tih ka hre nghal mai a, a u nupui mah ni ila ṭhian kawma min kawm a ṭhulh phah dawn hauh lo tih ka hre lawk kar a.

     Ka nu-in kan kawmthlangpa damdawiin awm kanpuia min sawm chuan phur zetin ka insiam a, Pekhlûa thawhna damdawi ina awm a nih avangin hmuh ngei inbeisei ru takin ka kal a, ka nu-in ka ngaihtuahna hria niawm taka duty rooma Pekhlûa hmu tura min hruai chuan ka lawm ru hle a.

     Kan kal dawn tih a hriat lawk bik loh avangin min hmu thut chu mak a tih hmel hle a, a mitmengah chuan min ngaiin min thlahlel ve tak zet niin ka hria a, la awm rih tura min chelh avangin kan ṭhu khawmûang a. Kan haw dawn chuan min thlah a, damdawiin kawta kan awm lai chuan Ruthi te ṭhian dun an rawn kal a, tlangnel fahranin ka pasal banah a rawn vuan nghal a, awmze nei zetin min melh pah ralh bawk.

     Keimaha thikna rawn awm chu Ruthi hmuhtir ka tum lo bur a, ka thinlung chhungrila na rawn awm chu ka hmela tilang chhuak lo turin ka insûm nasa kher mai. Pekhlûa nena kan kalfal hnu erawh chuan ka inthup sêng ta lo a, ka lung a awi lo hle tih chu a hrethiam nghal vat ta réng a.

      Ka ngaihtuahnaah chuan nupa nun ka hmanpui theih loh vangin Ruthi lakah a chákna a lo phuhru ṭhin niin ka ngai a, ka laka a dawn theih loh Ruthi laka a dawn avangin ka bulah pawh insûm thei takin a awm phah ni-ah ka ngai hmiah mai a ni. Ka awm lai ngei pawha ka pasal laka a ngampat danah khan chu chu a chiang hlein ka hria a, ka pasal ka neih let leh theih dan kawng awmchhun chu nupa nun hmanpui a ni tiin ka rilru ka siam ta a.

     A lo haw a min han khawih vel chuan ka theihtawp chhuaha tihlawm tumin ka bei a, ka tilui pawh ni hran lovin ami tawh velna ringawt pawhin phurna nasa tak min pe hrim hrim a. A kamis kilhna ka phelhlai chuan ka kutah manbetin zawhna zawt mitmengin min melh a.

          "Bawihte, i ṭha em?" min zawt sup a.

     "Nupa nun ka hmanpui theih loh vang che em ni kha nu kha i la kawp? I duh ang ka pek ve theih loh vang che a ni tiraw in la inzui reng ṭhin?"

     Ka thil sawi chuan a ṭhâwng hle a ni tih ka hmu thei a, a ngaihtuah loh lam daih a nih vangte pawh a ni ang chu.

     "Engtin nge chutiang ngaih dan chu i neih theih zawk? Bawihte, i thil ngaihtuah dan hi a ṭha miah lo a nia!" mak tih hmel zetin a ṭawng a.

     "A dik a ni lo'm ni? I nupui ni mah ila i mamawh ka pe thei miau si lo che a, a pe theitu che pan mai chu thil tih awm tak a ni alawm. Mahse, ka pasal i nih angin midangin ka thil neih min ṭawmpui hi ka duh lo, i duh angin min khawih la, i mamawh phuhrukna atan chuan min han hmang ta che," ka ti a, ka mittui chu ka biangah a rawn luangthla a.

     Min kuahbet a, ṭawng leh ka tum chuan ka hmuiah ka kutzungchal dahin min khap vat a.

     "I ngaih dan ang kha a dik lo, nupui nei reng chunga hmeichhe dang kawp duh tur ang hmuhin min lo hmu rêng em ni? Ka nupui i ni a, nupa nun hman loh chungchângah pawh kan pahnihin thutlukna kan siam dun a ni lo'm ni? Khawgaihin a ni lo zâwngin thil thlir lo hram teh aw!"

       Ka ring leh der tawh! A thu sawi apiang hi ho te pawh ni se ka ring nghal mai zel a, keimah pawh mak ka inti hial a ni. Ka lungawi hma lutuk te hi ka inhau ru a, luhlul chhuah ve deuh ka tum pawhin awlsam te-in min thlem lungawi leh mai ṭhin.

     Ka mumangah ka nutei pasalin min lo khawih leh a, hlau lutukin ka lo indang ṭawk ṭawk a, chhuatah min thehthlu ṭhuai a, ka chungah a rawn bawk ve nghal zat a, ka lo ṭe tuarh a, ka harh zawk a, ka ṭhuchhuak nghal a.

     Pekhlûa chu rawn tho ve vatin min kuah a, ka lo ngheng nghal a, ka rilru no chu chhuakin ka ṭap hlap hlap a, min hnem mawlh mawlh a.

     Ka lungchhia a reh deuh hnu chuan a nupui ka ni chu vannei ka intih thu te ka hrilh a, min duat em avanga pangchang ta riaua ka inhriat dante chu ka sawi a.

      "Ka lakah hian pangchang deuhin awm la ka duh, ka duh aiin i pangchang lo ṭhin!" a tih chuan ka nui hak a, ka mittui chu hruhulin a lam hawiin ka inlet nghal a.

        A hmui chu ka khawihsak niap niap a, ka kut chu lo vuanin a fawp zauh a, ka tukkhumah dawmin min pawt hnai a, ka hmui chu dimte-in a fawp a. Min fawp rei tial tial a, a duhthawh tulh tulh a, ka lo fawhlet ve takah phei chuan min keih tawn tawn a ni ber a.

     A taksa thlawp zaihin min kuahbet a, duhthawh taka min fawh bak chet lak a tum lem lo. Mipa hrisel ṭha pangngai a ni a, a awm danah leh a taksa khau ṭangah chuan min mamawh hle tih ka hre thei a, chuti chung chuan min nawr luih a tum hauh lo.

     Ka mutkawr hak chu ka hlim chho a, a kut chu la-in ka taksa lawngah chuan ka khawihtîr a. Mitmeng hriatthiam har zeta min en vang vang hnu chuan min fawp lehin ka taksa chu a chul kual a, ka hnute a thlen chiah chuan ka lo thaw halh a.
   
     Kan taksa lawng insi chuan phurna min pek belhchhah a, kan thaw a mumal lo dun sawt hle. Amah ka mamawhna nasa lutuk chuan a hmaa hlauhna ka neih ṭhin kha a tibo a, ka bawp chuan kherhin a hnungzâng te chu ka chulkûal rûai a. Ka mutkawr chu min hlihsak a, ka taksa pêng tin chu a fawp kual dan dan a, a chet dan zei tak chuan phurna nasa zawk keimahah awmtirin ka tum hauh lovin ka lo ṭham leh ngawr ngawr ṭhin.

     Mitmeng phî deuh châka min melhin a thaw halh halh a, "Bawihte, ka insûm zo dawn lo tlat, kan duhtawk mai dawn em ni ang?" a aw chu a thawp sut a, a khur lek lek bawk.

     "Aih, insûm suh, i nupui takah min siam rawh," nek hnaih sauh pahin ka lo ti a, a mitmeng chu a buai deuh nak a, rei erawh a ni lo thung.

     "I inchhir lehna tura chet ka duh lo a nia aw," a tih chuan ka lo kuah hnai sauh a.

     "Khawngaihin i ta-ah min siam rawh, i nupui ka nihna hi han nemnghet ta che," ka lo ti sap a.

     Min rawn fawp a, a lehpek awm thei tawh lo tur khawpa uarin kan infawp a, kan inpeihtawn hnu chuan ka chungah a lawnkai a.

     "Bawihte, ka ta ni rawh," tiin chet a la zui  ta nghal a.
   

FELICITY 17
Sbk Pachuau



      Tunah chuan nupui dik tak ka ni ta! Ka lawmna tizualtu chu kha chen min tibuaitu, nupa nun pawh hmang thei lova min siamtu ka paltlang thei ta chu a ni. Ka pasal, lungawi taka ka bula muhil sâk sâk chu ka en a, amahah lungawina ka hmu a, engkimah min dah pawimawhin min duat em em a.  Nupa nun hman kawngah pawh ka zâi ngâi tak chungin a che a, ka duhna hi nitin a zual zel a, ka hmangaih tih chiang takin ka inhre bawk.
   
     Ka hma hun chu hlimna hlirin a hmuak ni maiin a lang a, ka chunga thil thleng rapthlak tak pawh ka theihnghilh chang a tam ta tial tial mai. Ka pasal hian ṭawngkamin min hmangaih thu sawi lo mah se a chetze kawng engkimah min hmangaih a ni tih rinna ka nei a, ka thlâ a mûang ru hle a ni.

     Kan inneih aṭanga thla thumna-ah nâu ka pai ve ta a, kan chhûngkua kan hlim tlâng kher mai! Hriatzela pawh a chawlh lai a ni a, 'patea' a ni mai tur chu a phur hle a, ka lo rin lawk dan ang chiahin kan awm dun tawh chuan û leh nâu tih vel kha a lang lo hrim hrim a, kan ri dun leh chul mai ṭhin a. A awm chhung zawng chu len pawh a lengchhuak tam lo a, a bialnu a lo haw ve loh avangin len a phur lo pawh a ni mahna inah a tawm deuh chawt reng a, keiin ina a awm chu nuam ka lo ti bawk nen a chhuk leh tur pawh ka nu leh pate ai mahin ka huphurh zawk hial a.

     Chutia nau ka pai ve ta chu ka pasal chuan min duat zual sauh a, in chhûng chet vel pawh eng mah ti lova awm hahdam turin min ti a, ka pa nen chuan nu Mawii pui turin nula dang lak mai an rawt a, ka nu nen kan lo hnial thung. Pathian zârah nau pai haw mi ka lo ni lo hlauh a, eng emaw chânga thil rimna deuh vanga ka luak leh zauh ṭhin tih lih chu insawiselna ka nei lem lo a, ka chet a buai phah lem lo a ni.

     "Nau pai ka haw lem lo bawk a, ka chet a buai chuang hleinem. Engkim ka la ti thei vek a, chutianga midang lak kher a ngai hleinem," ka tih chuan ka nu chuan min lo thlâwp hle a.

     "Nau pai lai hian induat tur chu a ni a, a lutuka induat erawh a ṭul lem lo. Kimtei hi raino thil huat a nei lo hlauh a, a dul a la pûar lo bawk nen in chhûng enkawl chu a kutah a la awm thei alawm. Keiin ka lo pui thei bawk a, midang kan mamawh belh rih lo e," a lo ti ve vat a.

     "Intihnat palh a hlauhawm, chetna tur a tam si, a chetsual palh hlauh chuan a pawi dawn. Mama, ina rawn awmchilh thei tur lo ngaihtuah ang che. I nu pawh hi chet reng a tum mai, awl thawng deuhin awm ve tawh rawh se!" ka pa chuan a ti bur mai si a, ka nu-in a lo hnial pawhin a rilru sawhsawn a tum chuang lo a, a hnial lui duh ta lo a.

      Pekhlûa chuan min ngaihtuah lutuk mah mah a, hun awl a neih hlek chuan min rawn be hman ziah a, damdawiin lama a duty a zawh veleh a rawn haw a, ka bulah reilote a rawn awm a, a clinic-a ṭhu turin a kal leh ṭhin a. A tan a buaithlak avang chuan lo haw kher tawh lo turin ka hrilh a, a zawm lo chiang kher mai! Inentîr hun a chhinchhiah thlap a, a buai hle lai pawhin ka inentir chhung tal chu min awmpui ngei ngei a. A ṭhianpa Rka hnena inentir ṭhin kan ni a, eng emaw hlekah a phone nghal vat zel a, Rka pawhin a khap ṭhin a, awmzia erawh a awm lo hle thung.

      Ka nau pai a hrâm ta deuh a, chet pawh ka harsat chho viau! Phir kan pai tih kan han hria a, kan lawm a zual hle. Ka pa leh Pekhlûa bawk an buaithlak leh a, min veng hi a ni ber mai, tlema insawiselna ka neih hlek tawh chuan an buai phîlî dun rûai zel a, a buaithlak lek lek zawk ṭhin. Ka nu chu nu fing tih takah han khap daih dan a thiam hlauh zawk ṭhin a, chuti ni lo se pum nuam lo satliah leh kawpuar mai maiah pawh damdawiin kan pan dawr dawr lovang tih pawh a sawi theih hauh loh.

     Ka neih hun a hnai tial tial a, kan phurna leh kan huphurhna a inchen reng awm e. Phir nei tur kan ni a, Pathian zara dam ṭha taka an rawn piangchhuak a nih chuan chhungkaw member thar pahnih kan nei dawn tihna a ni a, eng ang taka hlimna nasa min rawn pe ang maw!

     "Kimte, vawiin kha i pa nen lungphunnaa kal kan ngai si a, lo indim rawh aw! Nei thei mai dinhmunah i ding tawh si a, eng mah ti lovin lo awm ang che. I nawm loh deuh chuan min lo phone vat la, lo intihah lo hram ang che," ka nu chuan tukṭhuan ei lâiin a ti a.

     "Vawiin chu i nu kal ve ngei a ṭul tlat a, chuti ni lo se a lo awmpui mai tur che  a ni a, eng em i lo ti lo ang chu maw!" Ka pa chuan a lo ti boh a, "Dini, Kimtei hi lo ngaihven deuh la aw, engtin emaw a lo awm palh a nih chuan min lo be vat dawn nia," kan nula hnenah chuan a tih zawm zat a.

     Ka neih hun tur nia an sawi chu nihnihin ka pel tawh a, nei mai thei dinhmunah ka ding reng naa Rka chuan  kârkhat hnu lam a ring mah zawk a, nau lû a la hla deuh ni áwm tak a ni. Kei pawhin neih mai ka la inring bik chiah lo a, keimahah han nawm lohna emaw nau nei mai tur anga min ṭhamtu awm a awm loh avang chuan chuti maia ka neih ka inring bik rih lo a.

     Mahse, ka inbeisei loh dan deuhin ka awm dawn ta a nih hmel ta riau mai! Ka nute an kalliam hnu reivak lovah chuan ka pum chu a rawn nuam lo ṭan ta rîai rîai a, a tirah chuan pum nuam lo satliah maiah ngaiin ka ngai pawimawh lutuk lem lo. Ka nawm loh tak tulh tulh avang chuan ka nei dawn hnai ta tak tak a nih ka ring ta a, ka nute tihbuai ai chuan tiin ka ni Rintei ka be ta zawk a. Ani hi ka pa farnu neihchhun niin doctor a ni a, a senior tawh a, a thawhnaah pawh a áwl viau a, a hman berin ka ring a, ka be ta tawp mai a ni.

     Ka nuam lo zual zel a, ka pum nâ pawh a nat dan a a chiang chho ta vîau mai. Ka theih laiin tiin ka inbual a, ka inbual lai pawh chuan ka indawm kun leh ngáih ngáih ṭhin a, inbual chhûng pawh a rei duh viau mai. Ka inbual zo ka chhuak ṭep tawh tihah chuan bathroom kawngkhar chu an rawn kik a, ka nî emaw Dini emaw an nih ka ring a, ka rin loh deuhin ka pasal aw ka hre zui a.

     "Bawihte, i ṭha em?" Min ngaihtuah hle a ni tih a aw-ah ka hre thei a.

      "Aw, ka ṭha, ka lo chhuak ṭep.."

     Ka chhuak chiah chu min lo vuan nghal a, dimtê-in khum lamah min kai phei a, khumah chuan min ṭhuttîr a. Engkim a hma aṭanga ka lo inrem lawk vek tawh avangin a hranpa taka insiam a ngai lem lo a, ken tur pawimawhho chu a dahkhawm zung zung a.

     Kan rooma ka nî a rawn luh lâi chuan ka na ti chu ka lo kun tlawk tlawk a, Pekhlûa mangang tihngaihna hre si lo chuan ka nî chu a lo tur nghal vat a. Ka kawngah leh hnungzângah te chuan a lo chûl vei thul, keiin ka lo ngaithei mang si lo a, a buai philî khawp mai a.  Ka nâ a zia lâi tak chuan kan kal ta vat a, damdawiin kan thlen chuan Rka a lo awm bawk a, min lo buaipui nghal vat vat hlawm a.

     Pathian zârah ka vei rei lo hlauh a, ka ka nâ tawrh leh chau deuh pawh chu ka fapa têreuh tê tê pahnihte hmel ka hmuh chuan a dam nghal sawng sawng a. Ka pasal hmêla lungawina lo langchhuak chuan min tihlim zual a, ka va hmangaih pafa tak em!

     "Fapa ṭha deuh pahnih min hrinsak a, ka lawm e aw! Ka hmangaih che, Bawihte," tiin ka chalah a rawn fawp zauh a, a fate lak aṭang chuan a mit a lasawn thei meuh lo chu a ni e.

     Tun ṭum hi ṭawngkâa min hmangaih thu a sawi ka hriat vawikhatna a ni! Sawi lo mah se min hmangaih tih chu a chetze engkimah a lang a, min ngaihsak leh min duat danah te min hmangaih a ni tih ka ringhlel ngai lo. Mahse, chutia a ṭawngkâ ngeia a sawichhuah takah chuan ka lairil a fan a, ka chhûngrilah engtin emaw min khawih tlat a, ka hnuk a ulh deuh titih a.

     A kut chu la-in ka fawhsak a, a fate lak aṭanga a mit lasawnin a mitmenga hmangaihna lang chhuak chungin min melh a, ka hmai bulah a rawn thle phei pah deuh a.

      "I tana tling lo chung pawha nupuia min nei hi ka lawm a, ka vanneihzia hi nitin a tharin ka hre nawn leh ṭhin. Ka vanduainaa min enhniam mai lova hmangaih taka min enkawl avang leh dawhthei taka min dawm ṭhin avangin ka lawm a, ka fate pa i nih avangin ka lawm bawk. Ka hmangaih che, u Pekhlu," ka lamah pawthnaiin a hmuiah chuan ka fawhsak a.
   
     "Min ring tiraw?"

     Ka lû ka lo bu nghat a.

     "Kan inkârah midang an tlakzeh ka phal miah lo a nia, Ruthi a ni emaw Jerry pawh ni se.."

     Ka lo nui hak a, "I ti tak tak lo tiraw?" ka ti a.

     "A eng ber kha?"

     "Jerry hi i thik tak tak lo tiraw?"

     "Aih, ka thik!"

     Ka nui leh hawk a, ka nuih a za tak tak! A chhan chu Jerry hi ṭhian ang bakin ka en ngai lo a, ani pawhin ṭhian ang baka min en ka ring bik lo a ni.

     "Nui suh, a mitmengah a duh che tih ka hria alawm!"

     "Chutiang ka hre ve miah lo!" ka lo ti hâ a.

     "Keiin ka hria alawm, i bulah sawi lo mah se a duh che  a ni tih ka hre thei a ni. Kan inhmuh hmasak ber ṭum kha i la hria em? Ka zirna aṭanga ka rawn haw ni khan Átei nen inah hian an lo leng a nih kha, khata ṭang daih tawh khan a duh che tih ka hre tawh. A tirah chuan i bialpa a ni emaw ka ti a, a ni lo tih ka hriata ka lawmzia kha i hre hauh lovang!" a tih chuan ka mak ka lo ti kher mai!

     A chhan chu Jerry hian min duh tih hi ka bulah a la sawi tlat lo a, min ngaihsak hle tih erawh ka hria a, ṭhiante chunga a tih tur a ti ni-ah ka ngaih sak mai a. Chutianga min duh nia ngaih theih tura a awm ka hre ngai lo a, ka lo hmu thiam lo a nih erawh chuan thuhran a ṭawngkam aṭang pawhin ka hriatthiam theih tura a sawi ka la hre tlat lo a ni.

     "A nih chuan u Ruthi hi ka tan chuan a va thikawm ta ve! Min ngaizawng tih pawh ka hriat miah loh khawpa a laka ka rilru ka pek loh Jerry-a i thik chuan duh em emtu che leh nangmah pawhin i lo duh ve tawh, i lo mutpui hial tawh chu thik loh a harzia i hrethiam maiin ka ring e!"

     "Ani chu ka hun kal tawh ami a ni a, ka tân eng mah a ni tawh lo. Tunah chuan nang leh ka fate hi ka nuna mi pawimawh ber berte in ni, midang ka ngaihtuah hman lova, ka thinlungah hmun an chang hek lo. Ka duh ber che a, ka thlang fel tawh che. Nang leh ka chhungte hi ka tan in tawk, tu mah dang ka mamawh tawh hleinem," a aw chu a nghet ṭha cherh chawrh hle.

     Ruathlûa hi ka ring tawk hle a, Ruthi kan ina a rawn kal ṭuma min ṭawngkhum dante kha na ti viau mah ila ka hrilh duh lem lo a. Khatia damdawiina ka hmuh ni khan ka rilru a nat ve êm avangin ka hrilh ta chauh a, an lo awm dun tawh dan chu a pha hauh lo. Mahse, a tan eng mah a nih tawh lohzia leh keimah chuan a thinlung luahtu ka ni tih a sawi chuan ka pawm leh nghal thlap a, rinhlelhna ka nei miah lo kha kei pawhin mak ka inti hial a ni. Tunah pawh a sawi chu ka thinlungin a pawm leh hmiah tawh a, ka ringhlel phal hauh lo bawk.

     Ka nu leh pate tan chuan kan fate chu an tu hmuh hmasak berte an ni bawk a, an atchilh hi a ni ngawt a, u Ruathlûa pawh a báng chuang lo. An zun huh thlak leh an ekcheh thlengin an tifai chak zawk emaw tih mai turin an inchuh titih deuh fo a, an la sen deuh laia bual chu ka nu kutah an dah ve mai a, an rawn hrâm deuh a, an chuh ve ta fo bawk. Ka pasal duty rawn haw pawh a fate a hmuh tawh chuan inthlak leh inbualfai lam ngaihtuah hmasa lo hian a buaipuiin a chhaih hmasa ta chiam ṭhin a, damdawiin lama an buai viau pawh hian hah angin a lang ngai lova, a fate chhaih leh han duat vel chu a ṭhulh phah ngai chuang der lo.

     Pathian zârah kan fate chu tihmawh leh ṭahbelh tak an ni lo hlauh a, an tlei dun em em a, phir an ni naa han buaipui ngai lutukin an awm ngai lo a, an hriselna pawh a ṭha dun viau. Ka pa-in a piang hmasa zawk chu a hmingah Malsawmhlûa tiin a phuah a, a chhuak hnuhnung zawk chu Malsawmsânga a ti thung.

     U Ruathlûa pawh Bawihate unau bula a awm tawh chuan a ri ve chul zel a, a len loh pawha a rooma inkhung ngut ngut ṭhin kha kan fate vang chuan in chhûngah a tam ve ta hle a, thawmhnaw leh toys ni se a chhuak thar leh changkang ber ber chi a rawn hawn awl lo a, a hranpaa kan ngaihtuah buai ngai hauh lovin a leisak reng mai a. Hriatzela pawh a bàng chuang lo, a awmna hmun aṭangin eng eng emaw a rawn thawn reng a, an thawmhnaw bâwm pawh a muk ṭha dun âm âm khawp mai.

     Eng emaw lâi deuh aṭang khan ka pa chu zan mut theih loh a nei ṭhin a, a chaw eite a tui lovin amah pawh a tla deuh ruam a, ka nu ngaihṭha lo chuan inentîr turin a ti ṭhin a, a duh lo tlat zel a. Ka nu mangang chuan ka pa chu inentir tura nawr ve chhin turin min ti a, ka nu sawi pawh a awih duh loh chuan ka sawi chu a zawm ka ring chiah lo naa ka nu hnial ka duh loh avang chuan ka sawipui tur thu chu ka hrilh a.

      Tlai khat chu kan zanriah ei laiin ka pa chu ka sawipui chhin a, ka lo rin lawk dan ang chiahin min hnial a.

     "Ka pa, hetianga i awm reng chuan natna enkawl ngai ve deuh hlek lo ni palh ta se kan tlai ang tih a hlauhawm ka ti! Chutiang chu a ni ngei ang ka tihna ni lovin inentir vat a ṭha ka ti, hetianga i awm reng chuan ka nu pawh hi nangmah a ngaihtuahna che vangin a damlo ve mai ang tih ka hlau riau a nia. Chubakah hetianga i awm reng te chuan Bawihate unau i awm peih lo vat mai dawn asin!"  ka ti deuh duah a.

     Chutia ka nu leh Bawihate unau ka sawi kai takah chuan min hnial ta miah lo a, Pekhlûa leh ka nîte pawhin a hmel dik lo leh a nun nguai lutuk chu inentir turin an ti fo a, a duh ngai lo a. Chutia ka turna ngai pawimawha min hnial zui ta lo chu ka lawm hle a, ka nu chu kei ai mahin a lawm zawk hmel a.


 (Zanin hian Inrinni zan ka chawlh avang khan chapter hnih post tum ka ni a, ruah a sur a, kawl a phe zawr zawr bawk si a, phone ka khawih ṭha ngam rih tlat lo..min lo hrethiam hram mai teh u aw.. khua a zia chhoh chuan rawn dah tho chu ka la tum fan a nia...)


FELICITY 18
Sbk Pachuau



     Ka ni leh ka pasal lo rin ruk deuh ang chiahin ka pa chu zunthlum a nei ve a lo ni a, ka pi(Pekhlüa pî) kha zunthlum nei, zunthlum vanga boral a ni a, a fate-ah neih ve theihna chance a awm ve tlat a. Khatia ka pa awm a han nawm loh chhoh takah khan an ringhlel deuh a, amah ka pa berin eng test mah tih a duh loh avangin an test thei ta lo kha a ni a, tunah an lo rin dan chu a dik a ni tih kan hre ta chauh a.

     Vanneihthlak takin a inṭan tirtê a ni bawk a, kan hlauhthawn ang aiin a lo la nasa lo a, inenkawl uluk chuan dam ṭha pangngai ang mai a ni leh thei a. Ka nu chuan ka pa ei leh in tur chu hna berah neihin a enkawl ta char char a, a taksa tana ṭha tur leh a natna tizual thei lo tur lam ei tur ṭha a ngaihtuahsak reng a, ka pa pawh a zia chho leh ta viau a.

     Chutia ka pa a ṭha chho leh ta chu kan lawm hle a. Min hringtu nu leh pate ni lo mah se ka tan chuan anni lo nu leh pa tia sawi tur ka nei lo a, ka tân chuan min hringtute ang maiin an hlû a. Khatia ka pa a'n nuam lo chho viau mai kha ka rilru a nuam lo hle a, natna khirh tak, enkawl harsa tak a nei ang tih ka hlau em em a. Tuna a natna kan hriatchhuah tak pawh hi dam mai thei ni lo mah se mahni inenkawl ṭhat dan azirin dam pangngai ang hlauhin an awm leh thei tho a, ka pa phei chu insum thei tak a ni a, a taksa tana ṭhalo tur thil chu a eiin a in ka ring lo a, min dampui reng turin ka beisei tlat a ni.

     Kan fate an changkang tial tial a, mi lawm an hlawh chho telh telh bawk. Tupawh mai chuan an pawm thei mai zel a, duh loh an nei ngai lem lo, keini an chhungte ni lo pawhin han lawmin han pawm se han duh loh vel an nei ngai lo a, midang tan an lawmawm zual sauh emaw tih mai tur hian tlei takin an pawm hle hle thei zel mai a ni.

     Ka malsawm dawnte ka chhut neuh neuh ṭhin a, ka hun kal tawhte nena tehkhin chuan ka nun chu a inletling thawk tih loh rûal a ni lo. Tunhmaa inkhawm leh ṭawngṭai pawh ngaihsak lem lova ka nun ka lo hmang mai mai ṭhin te kha ka hun hmanral tak kha ka ui a, tuna a malsawmna min vur zozâite hi ka phû hlawl lo a ni tih ka ngaihtuah châng phei chuan Pathian lakah ka inthlahrung ngawih ngawih ṭhin. Tunah chuan ka theih tawka tam lawmthu hril ṭawngṭaina ka nei ve ta ziah a, ka dam a nih phawt chuan inkhawm pawh ka ṭhulh ngai ta lo. Ka chhungte leh ka pasalin min thlawp ṭha em em a, ka nu leh pate nen kan inzui rawt a, hunawl a neih phawt chuan ka pasal pawhin min inkhawmpui ngei ngei ṭhin.

     "Bawihi, vawiin tlai kha ka rawn hma theih loh palh takin ka rawn thlen ruala kal nghal mai thei turin lo insiam peih vek la, kan tlai lutuk chuan Rka a lungawi lo dawn a nia! Kei pawh theih anga hmaa haw ka rawn tum ang," Bawihate thawmhnaw ka thliar mawlh mawlh lai chuan ka hnungah lo dingin min kuah hlu hlu a.

     Naktuk khian Rka'n nupui a nei dawn a, vawiin tlaiah a ṭhiante ho chaw eiah min sâwm hlawm a, keini nupa pawh kan fate tellovin kal kan tum a. Bawihate hi ka pa hian chhuahvahnaa kan hruai hi a remti vak ṭhin lo a, an tel lo chuan a khawharthlak ṭhin a tih tlat avangin anmahni ngei hruai an ngaihna thilah lo chuan kan hruaichhuak zen zen lo a ni.

     Bawihate mut hlanin ka nu pangpârho te chu ka siksawisak a, ka zawh fel meuh chuan insiam a lo hun thuak tawh a. Ka inbûal sawk sawk a, u Pekhlûa lo thlen hmaa inpeih hman tumin ka insiam ta nghal a. Ka insiam ṭan vel mek tihah Pekhlûa pawh a rawn thleng ve a, ani pawh inbual nghal sawk sawkin a inbual zawh chuan a thawmhnaw hak tur khuma ka dah chu a ha nghal mawlh mawlh a.

     "Kal nghal mai ila.." ka tih chuan ngawi rengin min en vang vang phawt a, muangchângin ka lam panin a rawn phei a, ka bulah min si chétin a ding a.

     "I nalh lutuk!" A hmui chuan ka nghâwngah a rawn nûl thuak a, ka kawngah nghet lutukin min kuah bawk.

     A nghâwngah ka lo kuah let ve a, kan insanhleih bawk a, ka chhoh en hâ a. A mitmeng sexy tak chu tizîm deuh sanin min chhuk en a, min tawh vel apianga ka awm dan ang chiahin ka lo mur leh chîai chîai tawh a, ka lungphû pawh a rang leh tawh kher mai. Hei hi chu thil thar a ni hauh lo, ka inthunun thei lo lutuk ṭhin pawh hi thil thar a ni hek lo. Kan pahniha inmamawh tawnna leh inthlakhlelhna nasa lutuk avang hian kan inkham thei ngai lo a, kan intawh hleka keimahnia danglamna awm ziah pawh kan inhmangaihna piah lamah kan inngaihzawnna a la reh loh vang a ni tih ka pawm hmak. Kan inkâra hmangaihna chuan inthlakhlelhna leh init tawnna englai pawhin keimahni-ah a chhêm nung reng ti ila ka sawi sual hauhin ka ring lo.

     "Kan tlai ang e, kal tawh ila!" ka ti sep a, a hmuiah ka han si zauh a.

     Ka hmui ka laksawn rualin ka tukkhumah a rawn dawm a, lungrun lutukin min rawn fawp a, ka thlakhlelh ang chiahin min thlahlel ve tih hi ka ringhlel chhin ngai hauh lo.

     "Rka kher ni lo se kan ṭhulh chiang khawp ang! Chhuanlam eng emaw siamin kan kal tlai mai dawn em ni ang?" a ti sup a, ka lo nuih a.

     "Zanah duh tawkin i che zawk dawn nia aw, Duat!" Ka melh no lui vel a.

     "Lalpa leh! Khatiang khan min chhaih miah suh aw! I awm mai mai pawh ka nep zo lo ṭhin che tih i hriat kha, ka mamawh ngawih ngawih che a ni tih nen!" a aw chu a mumal lo lek lek a.

     "Ka pasalin min mamawh a ni tih hriat hi nuam ka ti viau pawh a ni mahna!" Chimawm chhuahin ka la ti hram a, ka kawngah a hmer salh a.

     Min fawh leh vawng vawng hnu chuan min thlah a, a inher vut a, "Kal ang," a ti bul hmuk a.

     "I hmanhmawh leh thut tihna em ni, Duhtak?" Nuihza insûm chungin ka zawt a.

     Ka kutah a rawn kai a, "Ka la inthunun theih lai hian kan kal vat a nih loh chuan thil thleng tur chu i hria alawm," tiin min kalpui mai a tum a.

     "Kan kal hma-in ka hmui hi tlem azawng ka hnawih leh loh chuan i ei zo daih sia.." chhaih pahin ka lo ti a, a thaw hawk a.

     "Khawngaihin chimawm chhuah tawh lo hram teh, min tihhrehawm man hi zanlamah hremna ka pe na khawp ang che," aw lawi deuh rutin a ti a, ka nuih chu za hle mah se ka insûm ta zawk a.

     In hnuai kan chhukthlak chuan Bawihate chu a pu hovin an lo awm hnawk rum a, an toys an lo thehdarh nuai a. An duh ang angin ka nu leh pate hian an taltîr tawp zel a, an chetsual leh intinat palh theihna lakah an veng uluk hle thung. Ngaihngam takin kan chhuahsan thei a, anmahni an tlei bawk a, buaipuiawmin an awm ngai lo a ni.

     Kan lo rin lawk dan ang ngeiin Rka chuan thleng har min lo ti khawp a, kan pha fel thei hram a. Pekhlûa ṭhianah hman a tum hle kha a ni a, damdawiin lamah an indaih loh em avangin an pahniha han chawlh rual kha a rem lohna chen a awm avangin midang a hmang ta zawk a.

     Rka'n kanpa chu eng emaw enpui tur a neih thu sawiin a room lama kal a rawt a, ka pheikhawk bun a fuh chiah loh avangin kal ve peih lovin thlanglam balcony-ah chuan ka lo ṭhu a. Rei pawh ka la ṭhut hma chuan ka bulah Ruthi leh a ṭhiannu an lo ṭhu ve a, a hmaa kan boruak lo neih tawh kha hre lo ang hmakin min rawn bia a, a rul tawk tê tê-in ṭha deuh thovin ka lo chhang a. Thil dang dang a sawi hnu-ah kan nupa chungchângah bawk a lut leh a.

     "Inpa hi chu a zeiin a tlin bawk a, fa pawh in phir ṭhawt mai alawm," nui har har chungin a ti a.

     "Ni e, kan vannei khawp mai. Pathian malsawmna kan dawng a, kan lawm khawp asin!" A sawi tum hrereng chungin ka lo chhang awlsam then a.

     "Pekhlûa zeizia chu i hriat kha, kan inkawp ṭhin lai pawh khan nang pawn i atchilh ve ṭep chu a nih kha tiraw?" A ṭhiannu en chungin a ti zat zat a, a nui pah har har bawk a.

     "I inla bialpa nei ṭha thei lutuk kha ka ngei ṭhin che alawm, tunah lah i chang ta mang si lo a," a ṭhiannu chuan a lo ti a, a chanchin an sawi mek hi ka pasal a ni tih an hre lo emaw tih mai turin an zak lo dun kher mai!

     "Lo lungngai lo phawt la, ka la nei let leh lovang tih a sawi theih miah loh a nia!"

     Zak lo ka ti kher mai! Eng tiang pawhin min ṭawngkhum mah se ka pasal lakah ka rinna ka nghat tlat a, kan nupa inkâr tiderthawng tura hmeichhe dang a kawp ka ring lo bur bawk. Eng ang pawhin Ruthi hian kherh mah se min phatsan ka ring hauh lo a, kan inhmangaih tawnna hi a chak ṭha tawk a, inuiresan tur khawpa derthawng a ni lo tih ka hria a ni.

     "Mi nupui nei laite engtin nge maw i neihlet ngawt ang le?" A ṭhiannu chuan a lo ti a, inrawlh duh miah lovin akn ṭawng chu ka ngaithla tawp a.

     "Mipa tihlawm dan te chu ka hre hneh lutuk! A nupui a kalsan vang vangna tur khawpa zeiin ka che ang a, ka bulah a lo let leh loh chuan a mak khawp ang," a ti leh salh a, a ṭawng duh dan chuan min tham loh em avangin ka thin a ti-ur ta riau a.

     "Min lo hrethiam ula, ka pasal hi mirinawm lo leh lêlo lutukah lo ngai lo ula in tifuhin ka ring! Ka ring tawk a, eng tikah mah min phatsanin nang hi a pan che ka ring lo, hrechiang i inti viau naa nang aiin ka hrechiang zawk a nih hmel," ka ti ve ta salh a.

     A la nui sâwng naa a mitah chuan a lungawi lohzia ka hmu thei a, mitmeng tur deuhin min melh khai a, zam map lovin ka lo melh let ve kal a.

     "I dinhmun hrechiang lo hian i ṭawng ve pawp pawp zel a, i nihna dik tak hre tur hian ka la entîr dawn khawp che alawm! I pasal hi ka duh duha ka kawihher theih hunah chuan ka lam hawi hian i mit i len ngam tawh hauh lovang maw le!" Nui hmel pu tho si, aw ngaihno bei lo fahranin a ti a.

     "Ka dinhmun hi ka hrechiang khawp asin! Ka mi hmangaih em em pasala neitu ka ni a, ka pasal hian min hmangaih bawk. Kan hlim dun hle a, kan inkârah midang kan tlakzehtîr ngai lovang tih pawh ka hria e!" Ka ti ve ta hmak a.
   
     "I va zaktheilo reuh tak! Khatianga chaltlâi deuha min chhâng tur khan tu nge i nih a? Nang pâwngsual tawk...."

     "Ngawi hmak rawh! Khatianga ka nupui ṭawng khum tur khan tu chiah nge i nih? Ka lo rin ai daihin i lo nasa, zaktheilo tak i ni tih hi chu ka hre daih tawh a, hetiang em ema rilru chhia leh zahna châng hre lo lutuk hi i ni tih ka lo la hrechiang tawk zo lo a lo nih hi!"

     Tun ṭum ang renga ka pasal thinrim hmel hi ka la hmu ngai lo, ka nutei pasalin min khawihchhiat ṭum khan a thin a ur hle tih ka hre naa eng mah kha chiang taka hriat ka neih loh avangin tun hi a thinrim hmel ka hmuh vawikhatna a ni.

     "I nupui hian âia upa zahna châng a hre lo lutuk a, ka lo zirtîr hlek chauh alawm!" nui sânga ka pasal en chungin a ti a, ka lo ráp zawk hîal mai! Engtin nge chuti taka ranga a mood a thlak theih bik ni!

     "Ka nupui hi i zirtîr ngai miah lova nungchang ṭha leh fel a ni tih ka hrechiang e! Khatianga ka nupui i lo ṭawngkhum leh a nih ngat chuan tu nge ka nih chiah hi ka la hriattîr khawp ang che," ka pasal chuan a ti ram hmak a.

      Ka pasalin ka thlaváng a hauhna chu ka lawm rûalin ka rilru chhûngrilah nuam lo a awm a, pâwngsual ka ni tih kha engtin nge Ruthi khan a hriat? Eng vanga ani ber kherin lo hria nge a nih tih chuan ka rilru a kap reng a.

     Ruthi leh a ṭhiannu an kalsawn takah chuan Pekhlûa chu ka bulah a rawn ṭhu thla a, ka kutah min vawnsak a, min hnemna'n ti niawm takin nghet takin min hmer vang vang a.

     "A thusawi kha engah mah ngai suh aw! Ka hmangaih che tih i hriat kha.."

     "Engtin nge pâwngsual tawk tawh ka ni tih kha a hriat le? Mi hian an hre miah lo emaw ka ti a, a rukin ka hnunglamah min lo nuihzat hle dawn a lo ni maw!" Ka ti zuai raih a.

     "Chutiangin tuma'n an sawi zui hauh lovang che. Tihpalh thil thu-in khami nî khan Ruthi kha kan hospitala thawk ve tho a ṭhiannu hmu tura a lo kal ni tak a lo nia, engtin tak nge a lo hriat pawh ka hre hauh lo. Min zawt a, a hriat tawh miau avangin zep kha awmzia a awm lo a, min zeppui tur erawh chuan chiang takin ka hrilh thung," ka darah a kuah a, a taksa ngheng turin min pawthnai a.

     "Min lo va nuihzat ru dawn ve le! Hei vang hi a nih chiah hi tham lo taka min ṭawngkhum reng mai ni, a tân chuan ka lo zuamawm ve em bawk a nih chu!" ka ti sap a.

     "Khawngaihin khatiang zawng khan thu la teh suh! I tana mi pawimawh tak takte hi i lam ṭang vek kan ni a, i chhungkua i lama kan ṭan chhûng chu i mal lo tih hria la, kan tân chuan pâwngsual hnu i ni emaw ni lo emaw danglamna a awm lo. Kan hmangaih che a, mualpho-a i awm hi kan phal ngai dawn lo a ni tih ring tlat la ka duh a ni," ka lû-ah a khabe nghatin min thlamuan tum takin a ti sup a.

     Rka'n chaw ei tura min rawn koh takah chuan in chhûng lamah kan lut ve ta a, ka rilru chu la nuam zat lo mah se ka pasal min thlawpna leh min ngaihsakna chuan min tichak a, mahni inrintawkna ka nei leh thei a, mi zingah mualpho-in ka awm ta êm lo a.

     Rka nupui tur hi doctor ve tho a ni a, specialist a ni lem lo thung. Ruthi thawhna hospitala thawk a ni a, hmeichhe fel leh lu zo veh vawh tak a ni. Ka lakah pawh a nelawm hle a, ṭawng duh ve tak mai a nih avangin kei pawhin ka nêl ve hle a, a mizia a ngainatawmin a chapo lo a, chu tak chu ka kawm ngeihna chhan pakhat a ni.

     Bawihate unau kan chhuahsan rei deuh tawh avangin zanriah eikham hnh chuan rei lutuk awm lovin kan haw ta nghal a, in kan thlen chuan ka pate room lamah an lo awm a. An lo la tlei em avang chuan inthlak turin kan room lamah kan chhohsan leh rih a.

     Room kan luh rual rual chuan a lamah min pawt hnaiin min fawp nghal a, rilṭâm lutukin eitur an hmu a an ei bawrh bawrh ang mai hian min ei ni maiin ka hria a, min thlahlel lutuk a ni tih hriat takin min kuah nghet viau bawk.

     Duhthawh takin kan infawp tawn tawn a, khum lamah min nawr pheiin khumah chuan min namthlu a, ka chungah a rawn bawk nghal zat bawk.

     Ka taksa chuan a lo dawngsawng ṭha kher mai! Ka theih tawka uarin ka chhânglet a, ka thawmhnaw a phelh takah chuan ka lo pui vat a, a awlsam zawkna turin ka taksa ka lo kan ak ak a.

     "Inbual phawt ila.." ka aw chu a pangngai lo tak zet!

     Ka saruak chu min pawm kang nawlh a, bual in lam pan chuan min kalpui ta nghal a.


FELICITY 19
Sbk Pachuau


     Pekhlûa piancham a ni a, a eitur ngainat zâwng siamin ka buai chawhmâ a, damdawiinah kalin va ṭhawn thut chu ka tum dan a ni. Ka nu chuan min phurpui phian a, Bawihate unau nena va kal chu a rawt a, ka pa lah chuan ho a tih hmel nasa mai a. Ka nu chu a thil lawm zâwng a naupangchhia lutuk tiin a nuih a, ka nu lah chu a lo dîau duh bik si lo, eng tin tin emaw an inthlem an inthlem a, Bawihate unau nena kan insiam zo kan chhukthlak chuan chhuah inpeih apin a lo inthlak fel der tawh a. Ka nu chu ka mitmeiin engtin nge a tih ka zawt a, ani chuan nui chungin a lû min lo thinkhum ringawt a.

     Damdawiin kan thlen chuan ward-ah naute damlo serious deuh a lo en lai tak a ni a, duty roomah chuan kan lo nghak ṭhap a. Eng emaw chen kan nghah hnu chuan a rawn let ta hram a, a tum loh tawpa kan hmêl a hmu chu a lawm tih a hriat mai a, a fapate pahnih chu a la dun lawk a, a mal lehlam lehlamah ṭhuttirin an pafa thum chuan an ri nghal chul a.

     Ka eitur siam sak tui ti hmel taka a ei chu lungawi zetin ka thlir reng a, ka chunga a lawmzia thu zawi sup leh tawi fel taka a sawi chu lawmthu sawina dang ka phut lo chiang kher mai, a lawm tak tak a ni tih ka ring mai ni lovin ka hria a ni. A eitur a ei zawh chuan a fate bawk chu a buaipui leh a, a duty hun chhûng a la zawh loh avangin rei awm lovin u Ruathlûa dawr lamah kan chhuksan ta dial a.

      Ka nu nen chuan Pekhlûa piancham thilpek tur chu kan buaipui a, an patea dawrah Bawihate unau chu a pû hovin kan hnutchhiah a. Kan pek duh ang kan hmuh mai loh avangin kan zawng kual zâu deuh a, kan duh ang kan hmuh hnu chuan kan pack tir a, u Ruathlûa dawr lamah kan let leh ta nghal a. Zion street chho-a kan kal lâi chuan min ko ri ni-awm tak hi hria-in ka inhria a, ka lehhawi vat a. Min kotu awm ka hmuh leh tak si lohah chuan ka kal leh ta mai a, penhnih pawh ka la pen hman lovang tihah chuan ka hminga min ko ri chu ka hre leh a, ka nu pawhin hre ve-in a lo lehhawi ve nghe nghe a. Ka zu hawilet a,  chutihlai tak chuan sikul naupang rual khat hian min rawn chim huk a, midang veivak an awm nual bawk nen thlanglam chu ka hmu thui thei lo a. Min kotu awm ka hmuh theih tak mai si lohah chuan kan hmanhmawh ru ve deuh tawh bawk nen kan chho leh ta nghal daih a.

     Dawr kan thlen chuan u Ruathlûa chuan nula pahnih inlêng a lo nei a, pakhat zawk chuan Sawmsânga zawk chu pawmin an lo inchhaih nui ar ar a, Sawmhlûa chu a pu nen an lo inpawm thung. Nula pakhat zawk chu u Ruathlûa nen chuan an ti ti mawlh mawlh a, Sawmsânga pawmtu zawk chu a hmelchhe lovin a ngainatawm reuh hle a, a nulian vak bik lo naa te chhe lutuk erawh a ni lo thung.

     Nichina min kotu aw kha ka rilru-ah a châm reng a, ka nutei aw ang ka ti riau a. Ka pasal neih hnu hian a chanchin  hi ka hre zui ta miah lo a, kan inhmu ngai bawk si lo a, an khawsak zel dan pawh ka hre zui tawh lo hrim hrim a ni. Pa Rama kha kum sarih tâng tura an tih bakah kut min thlak avang leh mipat hmeichhiatna lam hawi zawnga min chhaih buai ṭhin avang khan kum hnih an pek belh leh bawk a, a tan hun chhung tur  atan kum kua leh pawisa eng emaw zah chawi tura a chungthu relsak a ni tih kha ka hriat zawng chu a ni mai.

     Zan khat chu ruah a sûr nasa hle a, thlî a tleh nasa-in kâwl a phe zawr zawr bawk, Pekhlûa a lo la haw loh avangin ka ngaihtuah hle a. Awmna ngaiah pawh awm thei lovin ka vei sek a, ka phone dawn leh a tlang thei bawk si lo a, ka mangang ru tak zet a. Ka pa chuan ngaihtuahawm a nih a rin loh thu leh chutiang khaw hnuaiah chuan a rawn haw mai bik a rin loh thu sawiin min hnem a, ka chhûngrilah chuan ka nuam thei chuang lo a.

     Ruah lah chu a tam telh telh mai si a, awm ngaihna ka hre tawh lo a ni ber mai. Kan kawngkapui a rawn rik tak dawt dawtah chuan rang fahranin ka tlan a, ka hawng nghal rawk rawk a. Kawngkâ-ah chuan ka lo beisei ruk ka pasal ni lovin kan inhnuaipa zawk a lo ni a, ka hnual leh nghal rawih a, nui luiin in chhûnga lut turin ka sâwm a.

     "Ka nu khu tlai aṭang khan a chau zual riau a, damdawiin lama kal ka sawiin min hnial zel bawk si a, nichin deuh aṭang khan a mumal lovin biak pawh pangngai takin min chhâng thei ta lo a, ka mangang ka rawn chho tawp mai a ni," a tih chuan ka nu leh pate chuan an lo dawngsawng vat a.

     Tun hnai deuh aṭang khan nu Mawii chu a chaklo zual hle a, kan in lam a rawn thlen chhoh peih lohna pawh thla hîal a ni tawh nghe nghe a. A vandûai a, mo a nei fuh lo lutuk a, a retheih phah hle a ni. Ka nu leh pate hian an theih tawka nasa-in an dawm hrâm hrâm a, a inenkawlna senso pawh an tum vek zel a, an ngaihtuahin a nat hlek chuan an buaipui nghal vat zel a ni.

     A taksa bawrhsâwm bakah a rilru hahna chuan a ti tar báwih báwih a, a khawngaihthlak tak zet a ni. A mo hian a hmingin hna chhete a thawk ve a, a chapovin a pasal nu chu a zah lo hle a, a hlawh pawh cheng khat mah a pe lut ngai lo a, damloh nikhuaa damdawi leina tur atan takngial pawh a pawisa chu a phawrh phal ngai lo a. A pasal chuan han hau ve bawk ṭhin mah se a ṭawng thei nasa mai si a, a tawpah a thiamlo zawk emaw tih mai tur hian a hau let hrep zel a, sawisel enah pawh a en duh ta lo a. A nu hi a ko ngai lo hrim hrim a, a mawl biak tawp mai a, a thawmhnaw suk turte hi nu Mawii kutah zu dah ṭhin a!

     A pasalin a ṭhen ṭum pawhin koh ngai miah lovin a duh hunah zah hre map lovin a rawn lut leh tawp a, chuti khawpa hmeichhe nasa leh zakthei lo mo atan a nei fuh hlauh mai chu a vanduai tak zet a, a hun tawp lam rilru hah leh rethei takin a hman phah ta a ni ber.

     Ka nu leh pate chu hmanhmawh takin ruahsûr hnuaiah chuan inhnuai lamah an tlanthla ta nghal a, rilru nawm loh sa nak alaia chutiang boruak ṭhalo a lo awm lehzel chu thaw a ti pik zual a. Chutia lo awm ringawt pawh chu a nuam chuang si lo a, Bawihate unau an muhil tawh bawk a, Dini kuta dahin inhnuaia chhuk ve tum chuan nihliap ka la a.

     Ka phone a rawn rik takah chuan ka nihliap kenlai chu dahthla-in ka phone chu ka en nghal a, Rka call a lo ni a.

     "Hello.."

     "Bawihi, ruahin min dang a, clinic-ah ka la awm e aw!" Ka pasal aw chuan a rawn ti a.

     Pekhlûa aw ka hriat chuan ka thaw huai a, ka ngaihtuah em em laia chutia a aw ka hre ta chu ka awm a nuam nghal suai suai a.

     "Ka lo ngaihtuah lutuk che a, ka be tlang thei si lo che a.." ka ti a.

     "Ka phone hi a diklo a niang, kei pawhin tu mah ka call thei miah lo. Rka a awm ve hlauh a, a hman loh kârin ka lo hmansak lawk a nih hi," a rawn ti leh a.

     "Ka lo ngaihtuah lutuk che a, thlî leh ruah karah khan i rawn inkhalh haw lui ang tih ka hlau lutuk a!" ka ngaihtuah tak zet a ni tih chu a hrethiam ve ngeiin ka ring.

      "Bawihi, min ngaihtuah suh. Thlî hi han zia deuh se ka rawn haw vat ang," a rawn ti sup a.

     "Nu Mawii a chau zual deuh a, ka nu leh pate an chhuk a, kei pawh chhuk ka lo tum ve mêk a. Ka lo ngaihtuah lutuk che a, i aw ka hria a, ka zia ta huai e," ka lo ti a.

     Ka nu a rawn chho a, nu Mawii chu a rang thei ang bera damdawiin lama tlanpui a ngaih thu a sawi a, a insiam nghal mawlh mawlh a. Ruah chu a han ta deuh a, rei vak lo hnu-ah Pekhlûa pawh chu a lo thleng ve ta hlawl a, nu Mawii te inah kan tlanthla zui ve nghal a. Nu Mawii chu a en thuak thuak a, ani pawh chuan a rang thei ang bera damdawiin lama kalpui chu ṭha a ti a, a dinhmun a ṭha vîau lo a ni tih a sawi tel bawk.

     Inthlak lo leh chaw pawh ei lo chuan Pekhlûa chuan nu Mawii chu damdawiin lamah chuan a phur chhuak leh ta nghal a, ka nu leh nu Mawii fapa an kal ve bawk a, ka pa erawh Pekhlûa a kal ve tak avang chuan a kal ta lo thung. Ka pasal chu eng mah ei hman lova a kal leh tak daih si avang chuan ka  ngaihtuah ru hle a, damlo an tam ṭum phei chuan a chau ve thei hle a, chaw ei lovin a chhuak leh ta daih bawk nen ka ngaihtuah zual deuh a.

     Ka lo muhil sek a, ka phone ri-in min tiharh a, Pekhlûa a lo ni a.

      "Bawihi, rei vak lo chanchin ngaichangin kan han awm leh lawk ang a, a chanchin azirin a hma thei ang bera lo haw kan tum ang. Thil lo ei rawh aw, kei pawhin eng emaw ka ei dawn a nia, lo ei ngei ngei ang che," a rawn ti a.

     "Ka ril a ṭâm lo......."

     "Rilṭâm lo mah la eng emaw tal lo ei rawh, thil ei lova i awm rei lutuk chuan i pumin a tûar ang, lo ei rawh aw, Bawihte!" Ka ṭawnglai pawt chatin a lo ti leh a.

     Zanriah ei tura ka nghah ṭhin avangin zanin pawh ka la ei lo a, a rawn haw har bakah a chhuak leh ta daih nen khan chaw ei pawh ngaihsak bik ta lo chuan Bawihate mutna bulah ka tluzâl a, ka lo muhil ve ta daih a lo ni a. Eng emaw tal ka ei a nih loh chuan ka pum chu ka ngaihtuah ve tho si a, Pekhlûa'n thil ei ngei turin min lo ti bawk nen chák vak lo chung chuan thil ei tur chuan in hnuai lamah ka chhukthla ta a.

     Ka thil eina tifela chokâa ka la awm lai chuan ka pa a lo kal ve a, thingpui in a duh em tih ka lo zawt vat a, a duh tih a sawi chuan thingpui tur chu ka chhuang ta nghal a. Ka siam zawh chuan sitting room lamah châwithla-in Tv en pahin kan in dun a, Bawihate unau mu hi an ngheh ṭhin em avangin ngaihtuah zui an ngâi ngai lem lo a, hmanhmawh lem lo chuan ka ṭhu ve ta reng a.

      "Kimte, han mu tawh la, anni pawh an lo haw har tawh lovang chu maw! Hei, zanlâi a pel der tawh a nia, lo han mu hahdam rawh khai," ka pa'n a tih chuan ka lo hnial lem lo a, no ka va sil zawh chuan mu turin ka chho ta nghal a.

     Ka muthilh mai pawh ka rin loh nen ka mut aṭanga rei vak lovah ka muhil leh ta der a, ka pasal ka bula a rawn muta min rawn biak pawh chuan chiang lo rûaiin ka lo chhawn a, ka kawngah a rawn kuah a, ka lo ngheng hnai tálh tálh a. Ka rilru-ah eng emaw a rawn awm thut a, ka ṭhuchhuak hluai a.

     "Thil i ei tawh em? I ei tur ka zu siam ang aw?" ka ti hliai a.

     "Ka ei tawh. Lo mu leh teh, ka ngai che a nia!" tiin min kuah mu leh nghal a, ka hmuiah a fawp zauh a, min si chétin a rawn tawlh hnai zui zat bawk.

     "I chau em?"
 
     "Chau lo e, ka ngai che a ni mai," a ti sup a.

     "Nu Mawii chanchin eng nge?" tiin ka zawt a.

     "A ṭha lo! A daih rei ka ring lo!"

     "Ka khawngaih e! A mo khu fel deuh se a zia tur a nia, nu Mawii chu duat a phû asin!" Ka ti sap a.

     "Nang anga mo fel hi nei se ṭha tur a nia, a vandûai em a nih khu," Min kuah nghet sauh a. "Muhil ang aw," a tih zawm zat a.

     Zînga ka harh leh chuan keimah chauhin ka lo mu a, Bawihate unau leh Pekhlûa chu hmuh tur an lo awm lova, ka tho vat a, hmai phih turin bathroom-ah ka lut ta nghal a.

     Bathroom aṭanga ka chhuah leh chuan Pekhlûa chu roomah chuan a lo ding vung a, ka chhuak min hmuh chuan min pan vat a.

     "Inlêng kan nei a..." Thil ngaihtuah muk deuh nei ang hian a awm a.

     "Thawh ka lo hai alawm le! Ti nge min kaihthawh loh a?" Ka lo ti thung.

     "Nizanah i mu tlem si a, ka kaitho duh lo che a nih kha."

     "Tu nge lo lêng a?" ka sam zial tawm pah chuan ka zawt a.

     Min kuah a, ka mitah tak min en a, a hmel lan dan chu ka hrethiam chiah lo a.

     "Bawihi, i nutei a nia!"

     Ka thinphû chu a rang sawt a, Pekhlûa rinchhan chuan ka ding a. Inhnuaiah min kai thla a, sitting roomah chuan ka nutei chu ka nu leh pate nen an lo thu a. Ka nutei hmel chu a ṭi dai mai a, a hmel ka hmuh rual chuan ka thil tawn rapthlak tak kha ka mitthlaah a rawn lang zut zut a. Ka tha chu a khur dar dar a, ka pasal kut chu thlah lovin ka vuan tlat a, ani pawh chuan nghet takin min lo vuan let a, ṭhutthlengah chuan min ṭhutpui a.

     Ka chungah khati khawp khan sualin vanduaina min thlentu mah ni se a inthlahrung hmel ka hmuh chuan ka khawngaih tlat pek a. Mahse, min ankhumna zawng zawng leh dawta min puhna te ka rilru-ah a rawn lang zut zut a, chhantu leh thlavang hauhtu pawh nei lo, mahni thiamthu tak ngial pawh sawi thei lova min siam thintu kha a la ni miau a. Ka laka a awmdanin a zir miau loh avangin ka khawngaihna lam ngaihtuah duh lo luiin ka inti ngêng lui a, eng vanga lo kal nge a nih ka hriat hma chuan nelawmin ka lang duh miah lo a.

     Mitmeng pha deuh dai hian min en a, thil sawi duh nei, sawi hreh lutuk si hmel a pû a. A aw chu a thian kharh a, a ṭhutdan chu a siamrem pah bawk.

     "Kimte, i hmaa lo lang ngam tur pawh hi ka ni miah lo tih ka inhria. Mahse, lo kala i hnena ka ṭawngkâ ngeia ka inchhir thu ka sawi a nih loh chuan ka eng tih mah a tui thei si lo. Hlau, zak leh khur chungin zah pawh dâwn zo lovin ka lo kal tawp mai a nih hi," a ti niah niah a, a hmel chu khawngaihthlak khawpin a inthlahrung dêk a.

     "Dawta i puh ṭhinna zawng zawngah khan thiamthu sawi thei lovin in siam a, ama in ngei aṭanga hnawhchhuah a ni bawk a, Kimtei kher hi ni ta lo se in mualpho nasat dan tur hi i chhut ngai em? I duh duha i ankhum leh dawta i puh hnu, mihur ang hiala i chhuah hnu hian i chungchâng hi a chhe zawngin vawikhat pawh a la sawi lo tih pawh i hriat ka ring hauh lo!"

      Ka pasal chu a ṭawng na sak sak kher mai, ka rin loh leh beisei loh lutuka ka thlaváng a hauh leh chutia ka nutei a lo chhang ta mai chu mak ka tih rualin a lo haw viau a ni maw tiin ka ngaihtuah a. Ka nutei chuan nuam lo tih hmel zetin a ṭhut dan chu a siamṭha sek a, a hmêla inthiamlohna nasa lutuk lo lang chhuak chu hmuh hmaih theih pawh a ni lo.

     "Engkimah khan ka thiam loh vek a ni tih chu ka pawm alawm, ka inchhirzia leh hrehawm ka tihzia hi ka sawichhuak thiam lo zawk a nih hi. Zana ka mu thei lova, nilengin ka rilru-ah a awm reng bawk, khati taka rapthlak leh nunrawnga a chunga ka lo awm kha eng dang vang mah ni lovin ka sual vang tih ka pawm thlap a, ka dam chhûng hian ka inthiam thei tawh ngai lovang," ka nutei chuan a ti leh a, ṭap chhuak thut mai tur hmel a pu a.

     "Eng pawh ni se, thil kal tawh chu kal tawh ni se, amah Kimtei pawh kan hnenah a hlimin a him tawk tih kan hre bawk a, a ngaidam duh che a nih chuan i vannei a ni mai a, a ngaidam thei ta lo che a nih pawhin kei chuan demna ka nei hauh lovang," ka pa chuan a lo ti ve charh charh a.

      "Ni e, min ngaidam thei a nih chuan ka lawm hle ang a, min ngaidam thei ta lo a nih pawhin vui thei ka ni lo tih ka hria e. Ka phû tawk hmu-ah ka inngai mai ang, a laka ka khawsak duh dan ngaihtuahin ngaihdam dila lo kal ngam tur pawh ka ni lo tih pawh ka hria alawm," aw lawi tak chungin ka nutei chuan a ti leh a.

     "Inchhirna tak tak rilru i pû a nih chuan a lawmawmah ngai ila, ka ngaihdamna ai chuan Pathian ngaihdamna i chan kha a pawimawh zawkin ka hria. Kei chuan huat viau che pawh tum mah ila ka chhûngkaw neihchhun i nih ṭhin miau avang khan ka haw tak tak thei lo che a, ka tan chuan 'nutei' i la ni reng tho. I rilru puthmang i siamṭha  a nih chuan chu tluka lawmawm a awm thei chuang lo, ka huat miau loh che avangin ka thinlungah ngaihdamna a awm tawh sa reng a ni," ka ti ve ta a.

      Ka nutei mittui tla chu hnukulh ṭeuhin ka thlir a, a mitmeng lo tla ta dák leh a taksa lo cher ta kuam mai chuan rilru hahna tak a nei ngei tih a tilang a, a khuh khek khek reng mai bawk si a, eng natna emaw tak veite pawh a ang a.

   
FELICITY 20(Last Chapter)
Sbk Pachuau



      "Ânu, ka spiderman kawr ang hi Sawmzuala'n a duh ve a, âpate Ruata ka phone ang a, ka chahsak ve mai dawn aw?"

     Sawmhlûa chu roomah rawn tlan lutin khum bulah chuan a rawn ding chat a, ka lo mû a ni tih a hmuh chuan eng emaw ngaihtuah ni awm takin chal chuar deuh nângin min en a, ka lo nuih var var a. Chutia ka hlim hmêl a hmuh takah chuan ngaihṭha ta huai ni awm takin nui hmêl a rawn pu ve ta nghal a, ka bulah rawn tawlh hnaiin ka lu bulah a rawn kun hniam a.

     "Ânu, i dam lo lo tiraw? Chhunah i mu si a, i damlo emaw ka ti a. Mahse, i nui a, i dam tihna tiraw?" Ka hmui rawn khawih pahin a ti a.

     "Ni chiang e, ka dam alawm, Bawihte. Nangmahni naute tur hian mu rawh min tih vangin ka mu mai mai a nih hi," ka lo ti  vat a.

     Tunah hian an chhang tur ka pai leh mêk a, thla rukna a ni tawh nghe nghe. Tun ṭum ka naupai chu a hma ang lo takin ka chauhpui ang reng hle a, ka lo paifual vei râwl nen tunah pawh hian doctor-in bed-rest min chawh avanga mû ka ni a, ka la mu rei lo hle naa ka ning ṭan der tawh nia!

     "Ânu, âpate Ruata chu ka be dawn aw?" Ka dam a ni tih ka sawi takah chuan thawveng huai hmêl hi a pu ve reuh a, a thu rawn kenluh ngai bawk chu a sawi chhuak leh ta nghal zat a.

      "Bia la, Bawihte. Mahse, a buai deuh maithei a, biak rei loh hram tur a nia aw,"  ka phone chu ka pe a, phur zetin a patea number chu a hmet chhuak nghal a.

     Bawihate unau hian hmeichhe naupang hi an duh êm êm mai a, nau ka pai tirh khan an hrethiam vak lo a. Ka pum a lo ṭhang lian ve deuh a, chutia ka pum lo puar ta chu mak an ti viau bawk.  Ka pum chhûngah chuan naute a awm a ni tih an hriatthiam dan tura kan hrilhfiah tak hnu chuan an phur hle a, hmeichhe naupang nei turin min han ti ngawt a, ka pate nuih an tiza viau a ni.

     Mut reng mai chu ka nin êm avangin inhnuai lamah chhukthla-in kan nula ei rawng bawl chu ka zu enpui fo a, Pekhlûa ei duh zâwng phei chu keimah ngeiin siam ka duh ṭhin avangin ka patr hriat loh lai chuhin ka siam ru fo mai! Ka vei vel leh chokaa ka chetla vel ka pa-in min hmuh fuh palh hlauh chuan room lamah min tir chho vat zel a, mu hahdam turin min tur reng zel mai a ni.

     Bawihate unau-in kum thum an tling tawh a, chhang nei pawh ni se kan buai phah a rinawm lem loh. Ka pa pawh ka nu enkawlna hnuaiah a inenkawl ulukin a insûm thei bawk a, a ṭha chho ve zel a, a hmêl aṭang ringawt chuan natna nei awm pawhin a lang lo a, a sár vuah mai a ni.

     Ka nutei kha kan ina a lo kal ṭum khan a khuh berh berh reng kha a ni a, TB a lo ni a. Ka laka a lo khawsak tawh danah a inchhir tak tak a ni tih ka hria a, ka khawngaih viau mai. Pekhlûa chuan ka hriat hauh lohin a lo buaipui ṭhin a lo ni a, an fapa lah kha rui reng, eng atan maha laktlak loh a ni si a, a pasal lah jailah a tâng daih mai bawk si nen buaipuitu pawh a nei mumal lo a,a lainatawm letling hle.

     "Ka fanu hian lo chhuah a chak tawh a nih hi, a pa kutah a rawn tlawh nasa ṭhin em mai!" Ka dul puar luah chul hauh hauh pahin ka pasal chuan a ti a.

     "I fapate nen hian hmeichhia a nih in ring lutuk a, mipa a lo ni palh thei tho tih kha hre ve ula aw," ka lo ti a.

     A nui suk a, rawn kunhnaiin ka hmuiah a rawn fawp zauh a. Ka bulah chuan rawn mu ve-in min kuah a, ka dulah a kut dahin dimtê-in a chul heuh heuh a.

     "Lalpa'n kan ṭawngṭaina a chhâng ang a, fanu min pe ang tih hi ka ring tlat alawm. Ka lo ring dik ta lo a niha fapa min pe leh a nih pawhin a lawmawm dawn lutuk tho, himdamin, kut ke kimin lo piang se. Mipa a ni emaw, hmeichhia a ni emaw kan chhûngkuaah hian kan lo lawm êm êm dawn a ni," ka beng bulah zawi supin a ti a. "Ka mut a chhuak lutuk! Muhil lawk ang aw," a tih zawm nghal zat a.

     Ruah a sûr cherh cherh a, Bawihate unâu ka pate bulah an awm a, keini kan roomah kan awm thung. Damdawiin lamah doctor an indaih deuh tawh avangin Pekhlûa pawh a awl ve ta deuh a, vawiin hi a duty off ni a ni a, ka bulah chuan muhilin a mut tui hmel hle a.

     Ka pum na rîai rîai chuan min tiharh a, ka lo muhil ve daih chu niin ka harh chuan ruah pawh a lo sû tawh lo a. Ka pum chu a zia leh mai turah ngaiin muthilh leh tum chuan ka mit ka chhîng leh nghal a, a dam tak mai loh avang chuan ka muhil thei ta lo a. A nat dan chu nau vei nâ ang deuha ka hriat takah chuan ka ṭhuchhuak ta vat a, ka neih hun tura an chhut aia a la hma avangin ka hresual zawk em ni ang tiin ka ngaihtuah nauh nauh a.

     Rka khan naktuk hi ka neih hun tur anga a chhut kha a ni a, a aia hmaa ka neih chu ka inring chiah lo deuh a, ka pum lah chu a na tawlh tawlh mai bawk si. Ka mangang ru ta deuh a, Pekhlûa chu ka kaitho ta tawp a.

      "Bawihi, naktuk a ni si a!"

  .  Ani pawh chuan mak a ti ve tho tih ka hre mai a, a na mîau bawk si. Rka a be nghal vat a, damdawiin lamah a rang thei ang bera kal turin a lo hrilh a.

     Ka pate a hrilh zawh hnu chuan ken tur buaipuiin a che nghal sawk sawk a, ka nute kan rooma an lo chhoh chuan ken turho chu a lo dahkhawm fel zo chiah a, kan kal ta nghal a. Ka nu nen a hnungah ṭhu-in a nat zual changin ka nu chu ka hmer leh ngat ngat ṭhin a, ka pa chu lo kal ve lovin inah Bawihate a lo awmpui thung.

     Damdawiin kan thlen chuan ka tuibâwm a keh chu a ni nghal mai a, Labour roomah min nawrlut vat a, Pekhlûa'n Rka hnena fimkhur tak leh dimdawi thei ang bera min khawih tura a chah chu ka hre viai viai a. Rka a raen lut a, min en chuan san ka pe thei tih a sawi a, san ka pe ṭan chiah tihah Pekhlûa chu lo lut ve-in ka kutah chuan a rawn vuan a, ka lo hmersak nghal ngawt ngawt a.

     Vei rei lovin ka nei leh ta hlauh a, kan duhthusam ang ngeiin hmeichhia kan nei ta hlauh a, ka pasal lawm hmel leh hlim lutuk chu Rka leh nurse te chuan an nuih a, kan hlim tlâng ngei mai.

     Bawihate unau-in farnu thar an han nei ta chu an lawm kher mai! Pawm an tum reng mai chu buaina a tling ta nghal pang a, pakhatin a pawm tawh chuan pakhat khan a pawm ve hma chu pawm ve ngei tumin a hel reng a, kan inkhap sêng lo lek lek chu a ni e. A hlimawm rualin a buaithlak bawk si, kan fanu thar lo piang chuan kan in chhûng boruak a rawn tihnawm belhchhah leh hle a ni.

     Lalrinzuali ti-a a pî-in duh taka a phuah, a koh duatna atâna Zualte-i kan tih chu a ûte ang chiahin nau fel tak a ni leh reuh a. Fanu nei ve ta lo chu ka nîte pawhin an rawn buaipui khawp mai a, amah a fel reuh ëm avangin an in lamah te an hruai daih châng lah a tam. Ka nîte hian fapa pahnih leh fanu pakhat an nei a, an fanu leh fapa pakhatin nupui pasal an nei tawh a, chu mite chuan fapa hlir an neih avangin hmeichhia kan han neih takah chuan an lo awt ve bawk nen an rawn len chilh loh leh an in lamah an la phei deuh reng mai a ni.
   
     Kolasib district-a khaw pakhat  Serkhanah Pekhlûa te free clinic nei turin an kal a, an kal hma chiah zanah Zualtei chu a pum a nuam lo ve deuh nge ni a tlei ṭha lo riau a, a khua a sik bawk si lo a, a pa chuan a en vel a, a pum nâ a nih a ring ta ber a. Zingkârah Serkhan lam pana an chhuah avangin a a ngaihtuah hle a, a khât tawkin a fanu chu eng nge a an tih hre turin a rawn phone reng a. Chawhma lam zawng chu a tlei lo hle a, chawhnu lamah erawh a fel chho ta viau thung. A tlei deuh tawh tih chu ka zu hrilh vat a, an buai laklawh lai a nih avangin rei inbe lovin kan ti tawp ta thuai a.

      Chawhnu lama lo let leh nghal mai tur an ni a, an rawn chhuah dawna min rawn bia tih loh chu kan inbe lo ta vang vang a. An rawn thlen hun awma an rawn thlen tak mai loh avang chuan phone ka tum a, ka be tlang thei ta miah lo a, a phone chu switch off a inti tlat a. Rka biak ka tum a, a in-ring ral ṭhak zel bawk si a, ka ngaih a ṭha lo ru ta riau a.

     "Ka pa, u Pekhlûa te hi an lo thlen a hun daih tawh si a, darkâr hnih dâwnin a pel tawh a nia! A phone lah switch off a inti tlat bawk si, ka rilru a nuam tawh lo riau a ni," ka pa bulah chuan ka ti a.

     Ka pa chuan biak tumin a call ve ta nghal a, a be tlang thei bik chuang lo. Eng emaw thil ṭha lo tak thleng tur ang mai hian ka rilru chu a nuam lo tak zet a, ka awm a nuam thei tawh lo a, ka pik churh ni maiin ka hria a.

      Ka pa phone a lo ri a, Rka a ni tih a sawi chuan ka lo thaw deuh huai a.

     "Hello... Rk.."

     A ngawi vang vang a, lehlam ṭawng a ngaithla a, a hmêl landan inthlak zut vang chuang eng thu nge a rawn sawi ang tih rin ngaihna ka hre lo.

     "Khawi hmunah nge?"

     Ka pa aw-ah chuan manganna a ri tel tlat! Ka lungphû chu rang dawt dawt tak a ni.

     "Aw le, kan lo kal ang e," ka pa chuan a ti zuai raih a, lainat hmel takin min melh vang vang a. Kei lahin eng thu nge a rawn sawi tih hriat chakin ka lo en uluk hle a.
 
     Choka lama aw ka nu chu a ko a, ka nu a lo thlen chuan muang chângin a ṭhu a, thawk  a la halh a.

     "Mamate chuanna motor a chesual a, tunah hian hliam tuar ho Aizawl lam panin an rawn phur chho mêk a, han insîam ula, damdawiin lamah kan lo va hmuak dawn nia."

     Ka ngaihṭhat lohna chu a takin a lo thleng ta chiah a, chet maina châng ka hre lo a, ka nu pawh a báng chuang lo.

     Ka pa chuan phone-ah mi a be mawlh mawlh a, tu te nge a biak tih ka ngaihsak hauh lo. Ka insiam zawh fela inhnuaia ka chhukthlak chuan ka nî fanu a lo awm a, kan chhuah hlana naupang lo kilkawi turin ka pa'n a va chah a lo ni a. Dini kutah pawh awm se an ngaihtuahawm vak dawn lo a, kan thang chin tur hriat a nih si loh avangin ka pa chuan a ngaihtuah deuh a, a lo va phone ni awm tak a ni.

     Damdawiin kan thlen aṭanga rei vak lovah Pekhlûa phurtu chu a rawn thleng ve ta nghal a, motor aṭanga an rawn zawnchhuah chuan ka pan hnai vat a. Eng mah hre lova a  mu zawi reng mai ka hmuh chuan ka ṭahchhuah mai lohna'n ka insûm nasa kher mai! Ka khur zawih zawih a, ka hmangaih leh duh êm êm, eng tik lâi pawha ka thlakhlelh êm êm chu nikhaw hre lovin a let reng mai chu a ni si a, ka chhûngrilah ka rum vawng vawng mai a ni.

     An khawih chhûng chuan pâwnah kan lo nghak a, a rei duh kher mai! Rka ka bulah a lo kal a, ani pawh a ṭhianpa ngawih ngawih chutianga hliam tuara eng mah hre lova let reng a hmuh chuan a thinlung a khawih ve hle a ni ngei ang, eng mah sawi lovin ka bulah chuan a ṭhu ngâwi reng a. Ka nu chu ka pa chuan a hnem mawlh mawlh a, kut invawnsakin an ṭhu dun a, damdawiin kan thlen hnu-in an la inkalsan lo reng reng a ni.

     An rawn nawr chhuak a, a hmaia thisen kâi leh bal vel an tifai vek a, nikhua erawh a la hre ta chuang lo. ICU-ah an dah lut leh nghal a, ka nu mita lungngaihna mittui tling ka hmuh chuan insûm zo lovin ka biangah  mittui a rawn baw zawih a.

     Min hmangaiha min duat em emtu ka pasal chuan min kalsan thei lovang! A tel lo chuan a nupui leh a fate hi kan hlim ngai lovang a, a tel lova kal dan pawh kan thiam hek lovang. Tuna a dinhmun en chuan damchhuah lehna chance a chhe lutuk tlat! Min kalsan ta a nih vaih chuan nung reng chunga thi ang mai ka ni ang a, ka fate vanga pachan viau ngai pawh ni se ka tluksawp hun a awm fo dawn tih ka hria. Min kalsan turin ka duh lo a, ka phal lo a, a tel lova khawvel hmachhawn ka zuam lo a ni.

     Nithum leh zan lî ICU-ah chuan a awm tawh a, hmasawnna hmuh leh hriat tur a la awm lo. Ka nu chu a ṭap nasa a, thil a ei thei bawk si lo nen a tla dâwk a. Kei pawh ka nu ang chiahin ka eng ei mah a tui lo a, ka mu ṭha bawk si lo nen ka pawr fapin ka ring.

     Thil ka ei ṭhat loh bakah mutmû ka tuah ṭhat miau loh avangin ka hnute tui chu Zualtei chuan a kham ta lo a, kum hnih a tlin ve dawn tawh avangin ka nu chuan hnute ngheitîrna remchângah hmang turin min hrilh a, awlsam takin kan inngheitir thei ta mai a. Cabinah kan awm avangin Zualtei chu ka bulah a awm ve zel a, a ûte erawh school an luh ve tawh avangin in lamah an awm thung. Ka nîte nupa kan in lamah an awm phei a, an kutah inchhûng enkawl hna pawh kan dah tawp mai a nj.

      Ka pasal hmai chu puan huhin ka hruksak hauh hauh a, ICU chhûngah hian duh anga rei awm theih a nih loh avangin a bula ka awm theih hun chhûng chu am takin ka hmang a. A taksa chu ka tawk reng zel a, a hre lo tih hre reng chungin ka bia a, kan fate chanchin ka hrilh ziah a, kan ngaih tawhzia te, lo haw tawh se kan tih thu te ka hrilh mawlh mawlh ṭhin.

      Ka awm theih hun chhûng a tawp leh tak avangin hreh tak chungin chhuahsan tum chuan ka insiam a, ka kalsan dawna a hmêl ka en chuan a hmui chu che tlatin ka hria a, ka hmu sual a nih ringin ka en nawn leh ngat a. A che chîang a ni!

     "Nurse, lo kal vat teh! Ka pasal hi rawn en ve teh, a hmui hi tihchet a tumin ka hria!" Nurse chu ka au chul a.

 .   Nurse chu a rawn kal vat a, ka pasal hmui rawn chet deuh det det chu kan thlir dun a, a kut lam chu a en leh a, a kutzungṭang chu tlemin a lo tiche ve bawk a. Nurse chuan a bp leh pulse vel te chu a check zung zung a, beiseina sang tak neiin a che vel chu ka lo thlir reng a.

     Doctor a lo kal chuan Pekhlûa ṭhian tho a nih avangin chhuak mai duh bik lovin a en chhung zawng ka awm ve ta reng a, a duh tawka a en kual hnu chuan a stethoscope chu a la thla-in a keng a, ka lam chu rawn hawiin min nuih suk a.

     "I pasal hi a tuar a fei khawp mai! Hetiang taka tuar chhel hi ni lo se a kal daih tawh ang a, a chhelna hian chelh lo se  tun dinhmun hi a thleng hauh lovang. Tuna a lan danah hi chuan a tuar chhuak dawn niin a lang, amah hian kal lo turin a chhûngrilah a inchelh ve emaw tih mai tur a nih hi!" mak ti aw lek lekin a ti  a.

     Ka hnuk a ulh ṭûn avangin ṭawngkaa chhang lovin ka lo bu nghat a, ka rilru chhûngrilah erawh Pathian hnathawh tih ka chiang khawp mai! Kan dilna min ngaihthlaksakin ka pasal duh tak kan hnen aṭanga hruai rih lo tura kan ngenna min tihhlawhtlinsak a ni tih ka pawm thlap a, ka rilru-in lawmthu ka sawi mawlh mawlh a.



<><><><><><>®

     "Bawihi, ka thawmhnaw hak tur i dah chhuak tawh turah ka ngai a, a awm hauh lo mai a! I pasal hi i hlamchhiah ta deuh chu a ni em lo maw?" Bathroom kawngkhar bula dingin ka pasal chuan min au lung lung a.

     Ka chhuak a, a tan lîau lîau-a ka order suit dak nalh zet mai, wordrobe-a ka lo khai ṭhatsak chu la chhuakin khumah chuan ka dah a, ka pasal bulah chuan kal hnaiin a kutah ka kai a, khum lamah ka kai phei a. A thawmhnaw hak tur ka dahchhuah chu mak ti leh lawm hmel takin a en a, chutah nui var varin min kuah a, min fawp vang vang a.

     "Ka lawm e aw, Bawihi," a ti sup a.

     "Happy anniversary, duhtak!" ka lo ti let sap a, a nghawngah kuahin ka dingdihlip a, ka pasal duh tak hmuiah chuan ka fawhsak a.

     Kan inneih cham vawi sawmna a ni a, kan fate tel lova intihlim paha chaw ei chhuak turin ka nu leh pate'n min nawr a, a tirah kan han hnial viau naa min nawr luih tlat takah chuan kan tum ve ta a. A hun a lo thlen takah phei chuan kan phur dun ta phian a, anniversary thilpek atan suit ka order sak a, ani'n kawr leh pheikhawk min pe thung.

     A palianin a pian a nalh bawk a, a suit hak chu a inhmeh kher mai! Darthlalangah chuan  inen vang vang a, ka lo en reng a, chal chuar deuh nûngin ka lam a rawn hawi a.

      "Ka chal ser hian ka hmêl lan dan a tichhia-in i hre ve em?" A thil sawi dan chu naupang lungawi lo ang mai a ni.

     "Teuh lo, i hmel kha a tiṭha zawk daih! I inhmeh ka lo ti asin!"

     Kal hnaiin a chal ser chu ka khawihsak a, ka sawi ang tak tak chuan inhmeh ka ti hle. Ka kawngah lo kuahin ka hmuiah a fawp a, a duhthawh phian mai!

     "Kan kal vat a ngaiin ka hria! Chuti anih loh chuan kal tur ka awm lo mai ang tih ka hlau riau," inlakhran pahin a ti sup a.

     Ka kutah a kai a, min kalpui ta nghal a. Motor chhûnga kan ṭhut hnu chuan ka kutah a hmer lah vang vang a, ka mitah chuan a hmangaihna mitmeng mawi tak chuan min en reng a.

     "Ka hmangaih che, Rosangkim. Ka engkim i ni a, ka hmangaih reng fovang che. Nang leh ka fate hi ka khawvel in ni a, in nat ka phal ngai lovang, Pathianin kan inhmangaihna tipung zel se tih hi ka ṭawngṭaina a ni," tiin ka kut chu a hmui bulah la kangin a fawp zauh a.

      Ka pasalin hnehsawh taka motor a khalh lai chuan ka en reng a, amahah chuan ka luangliam a, ka hmangaihna hi a sâng lutuk a, eng nen maha tehkhin chi ni pawhin ka hre lo hial a. Nitin zantin ka thlakhlelhna a pung zel emaw tih mai turin ka ngai ngawih ngawih reng mai a ni.

     Chutia ka en reng lai chuan min rawn en ve a, thinlunga hmangaihna-in a thlun zawm, a lehpek awm thei tawh lo hial tura hmangaihnaa liluh pahnihte chu mitmenga hlimna leh lungawina lang chhuak chungin kan in-en a, induh tawn takin kan innuih dun sak a.


<><><><><><>®<><><><><><>

   

   (Felicity chu a lo tawp leh ta a, min chhiarsaka comment min petu te chungah lawmthu nasa takin ka sawi a, ka story ziah chhung zawnga dawhthei taka min lo nghak ṭhintu leh min phurpui em emtu ka pasal chungah ka lawm êm êm bawk a ni.

   
Ka edit hman tawh ṭhin si lo a, mitvâr leh fing tak nei, Muani Fanai vt chungah ka lawmthu hi nasa takin a inchhûang hluah bawk a..

In zavaia chungah ka lawm em em a ni tih ka sawi nawn leh e..)