FELICITY (Docs 1)

FELICITY
Sbk Pachuau

Chapter 1


      "Kimte, kha lâia petunia pot kha rawn châwi phei la, leiṭha vur belh hlek ila, kan duhtawk tawh dawn nia. I u Hruaii te bazâr kal pawh an rawn haw ṭep tawh ang, an lo haw hmaa inpeihfel hman tum ang aw!"

     Petunia khawina pot chu Nu Mapuii awmna lamah chuan ka chawi phei a, leiṭha leh lei kan chawhpawlh sa chu chhun belhin kan tifel ta thuai a, kan chetna hnawk vel chu tifai leh zung zungin in chhûngah kan inzuilut a. Ka  intifai thuak thuak a, nu Mapuii'n pancake tur a lo chawh kawi sa chu ka kang ta nghal a.

    Nu Mapuii inbual zo chu chokâ-ah rawn lut ve-in fridge chu a hawng a, anṭam têl chu lachhuakin chaw ei dawhkanah chuan a dah a, ṭhu-in a thian zui nghal mawlh mawlh a.

     "Kimte, vawiin chu i hah viau lo maw? Kan ṭul zual lai takin Nu Mawii inentîr a lo hun ve leh hlauh mai bawk si a, i buai phah ta deuh a nih hi," nu Mapuii chuan a rawn ti hliai a.

     "Hah lo e, engmah hahna tham kan thawk hleinem. Nu Mapui, Pa Malsawma hi nang aiin a upa daih ang tiraw?" tiin ka lo zawt let hlauh a.

      Nu Mapuii leh pa Malsawma te hi nupa inhmeh leh inngeih tak an ni a, an felin an bula awm a nuam êm êm a. Pa Malsawma hi kum eng emaw zatin nu Mapuii ai hian a upa zawk tih a hriat theih a, an kum inthlauhna chu eng zat pawh lo ni ta se chu chuan an inkârah buaina a thlen lem lo a, nupa hlim tak an ni reng mai a ni.

     Pa Malsawma hian a nupui hmasa lakah fanu pakhat a nei a, a chhûngkhat laina hnaite chuan 'Bawihte' tiin an ko mai ṭhin a, Lalhruaizeli niin a ṭhiante leh mihrang deuh chuan 'Hruaite' tiin an ko tlângpui thung. A nu tak aiin a pa nupui hnuhnung zawk, Nu Mapuii hi a ngâi zawk a, Nu Mapuii pawh hian a fanu ang tak taka enin a duat hle a, ama fahrinte nen a hmangaihdan a thuhmun reng tih a hriat theih mai a. An chhûngkaw nun chu awhawm hle-in ka hre ṭhin a, keini ang nu leh pa nei tawh lo tân phei chuan an chhûngkaw zînga tel ve chu a chakawm hluah hluah mai a ni.

     Nu Mapuii te hian fapa hlir pathum an nei a, an fapa upa ber Lalpekhlûa chu doctor niin naupang specialist a zirchhuak chiah a, naktip maiah hian a lo chhuak chho tawh dawn a. A chhang chiah Lalruathlûa chu sumdawnna lama a tui avangin B.com a zawh hnu-in dawr a sîam a, TV, fridge, washing machine leh inchhûng mamawh dang dangte zuarin a dawr pawh a muk hle a, mi hriat lar leh pan hlawh tak a ni ve a, amah a hmêlchhe lovin a lo fel bawk nen dawrtu a hmu ṭha thei hle a ni.

     An naupang ber Lalhriatzela erawh dan lam zirna, National Law School of India University(NLSIU)-ah lutin Bangalore-ah a awm thung a, Hriatzela hi an unau-ah chuan ka nel ve ber a ni a, a u Ruathlû-a hi a ṭawng tam lem loh avangin ka nêl lutuk lo a, ka chungah erawh an fel em em vek a, an upa ber Pekhlû-a hi chu a thlalakah bak ka la hmu lo thung.

     U Hruaite-i'n pasal a neih dawn avangin Hriatzela pawh inneih hmang turin nihnih khat lek châmin a rawn haw dawn a, chawlh lâi a nih loh avangin a awm rei thei dawn lo thung a ni. Nu Mapuii hi fate ngaihtuah tak mai, kawng dik lo an zawh ang tih hlau tak chunga a theihtawka ṭhaa enkawlna pe ṭhin a ni a, a fapa te pahnih an lo haw dawn avang hian a phur hle a, an lo thlen hun a nghakhlel êm êm pawh chu awm ka tihpui vîau a ni.

     U Hruaitei te bazâr kal an rawn thlen chuan kan lo inpeihfel hman chiah a, a pasal neih huna a ken tur eng eng emaw leiin an rawn bâwr lut vîau a, nu Mapuii chuan phur takin a lo dawngsawng a, an duh ang an lei kim thei em tihte a lo zawt chúl a. U Hruaitei chuan mamawh zual pahnih khat bak chu an lei kim thawkhat tih sawiin chung an la lei lohho pawh chu bazâr kal paha lei mai theih a nih thu-in a nu chu a chhâng thuai a, an nufa inkârah hrin hrang a nih lanna pakhat mah a awm ngai lo a, an inngeihzia hretu tân chuan hmuh an nuam lehzual ṭhin hle a ni.

     Rawng ka bawl mawlh mawlh lâi chuan u Hruaitei chu ka bulah lo kalin ti ti mawlh mawlh chungin min rawn pui a, puih ka ngai lo tih sawiin awmzia a awm lo tih ka hrechîang tawh mîau a hnial enah ka en tawh lo tawp mai a ni.

     "Kimte, i nute-i fapa chu a zia zel em? In lamah in buai dawn tehlûl nen helamah kan lo mamawh ve bawk si che a, i chhûngte lakah pawh a inthlahrunawm duh ngawt mai. Kan buai zual lâi nen a lo innang kher kher a, chuti ni lo se i chawl thei mai tur hi a ni a, a zialo tak tak a ni," u Hruaite-i chuan a ti a.

     "Pathian zârah a ṭha chho ve hret hret e, a ke saw dam var tur chuan hun erawh a duh rei deuh ang a, inchhûngah chuan tiang nen a vei ve thei tawh a, indim a la ngai deuh thung," ka lo ti vat a.

     "An sawi hmangah khan a tlan chak vîau a ni awm a, an insu lâi hmutu ṭhenkhat phei chuan a thih hîal an lo ring a, a zialo tak zet a ni!" a ti leh a.

     "Ni e, a tlan chak ṭhin lutuk hi alawm a nu leh pa pawhin an sawiselna ber. A phû tawk a hmu-ah ka ngâi hmiah mai, a sim phah ve mahna!" ka lo ti nghat a.

     Ka ngaihdan dik tak pawh a ni réng a, ka chungah a fel lem lo bawk nen ka khawngaihna âiin chawh ka tihna a sâng hret zawkin ka hria! Kei aia naupang a ni naa min zahna pakhat mah a nei lo a, min khak fek fek a chin bakah min hmuhsitna a tilang nasa ṭhin a, ka tân chuan ngainat a har a, huatna thinlung keimahah a lian zawk rêng a ni.

     Nu Mawii inentîr a haw har deuh avangin zanriah eikhamah ka haw ta chauh a, Pa Malsawma'n min thlah a, pa ṭawng tam lutuk a ni lo naa a bula awm erawh a hahdam hle thung. A rilru a ṭha a, a chapo lo bawk a, ka nel zâwng tak a nih avangin ka be bawrh bawrh mai zel a, ani pawh ka bula a awm chuan a ṭawng ve bawrh bawrh ṭum hi a tam zawk a ni. An hnena ka thawh hi kum chanve vel awrh chauh a la ni a, chuti chung chuan an bula awm nuam ka tiin ka ngaina hlawm vek a ni mai a, u Ruathlû-a hi ri bawrh bawrh chi leh  mize nelawm tak pû a nih lem loh avangin ka nêl lutuk lem lo a, ka chungah erawh a fel ve viau tho a.

     Kan in chhûng ka lut chu ka nute-i fapa, hmanni lawka  accident tawk chiah chu a lo awm a, midang awmna ka zawh chuan a hriat bik loh thu sawiin bul hmukin min chhâng a. Be chhunzawm duh tawh lovin ka room te reuhtê-ah chuan ka luhsan ta nghal a, inbual tumin inthlakna tur ka phawrh nghal mawlh mawlh a.

     "Khawi lamah nge i hurbo leh tak â? Ei rawngbâwltu ber i ni a, ngâwi reng hian i bo nilêng ringawt zel mai! Nangmah vangin chawhmeh mumal pawh nei lovin chaw kan ei phah, engmah sawi lova khawthim thlenga lenbo hi sim vat ang che!"

     Ka nute-i aw fiak ṭhak mai ka hriat rûal chuan ka ding khawng nghal awt a, ka awm khawtlai dawn a ni tih ka pa Rama(ka nute-i pasal) kha ka hrilh ngei si a, engmah hre lo ang maia min ṭawngkhum chu mak ka ti hle a. Nu Mapuii'n chaw ei ve nghala chaw ei khama haw chauh tura min tih khan ka nute-i chu ka va call nghal a, pa Rama'n min lo chhâng a, ka haw hma thei dawn lo tih leh zanriah pawh ka ei nghal tur thu chîang takin ka hrilh ngei kha a ni a, a rilru verther chhuahin engmah a lo sawi leh pek lo a ni tih ka hrethiam leh ta mai a.

     Ka nu leh pa motor chesuala an boral hian kum 12 mi chauh ka la ni a, kan chhûngte lungphunnaa kalin an rawn haw lam an vandûai palh ta a ni. Ka pa khan unau pianpui pakhat chauh neiin a thi zîngah a tel ve a, nu leh pa tel lova unau chauha awm an nih tawh mai avangin ka pa lama ka chhûngkua chu an mang a ni der a. Ka nu lamah lah ka pi, tar upa tawh tak bak min dampuitu an awm tawh lo a, tuna ka nute-i ka tih hi ka pi unau fa a ni a, chutia ka nu leh pa an awm tak lohah chuan min enkawl turin ka pi hian a hruai lut ta a, a pasal fanaute nen an rawn awm ta a ni.

     Ka nutei te hi mahnia in leh lo nei lo, mi in luaha khawsa ṭhin an ni a, chutia kan ina an han awm ta chu an tan chuan vanram a ni ngawt a. In luahman châwi ṭhin khan chawi a ngâi tawh lo a, ka pa thawhna department-in ka pa âiah ka nutei pasal chu an dah bawk a, ka pi-in pâwl sawmpahnih ka zir kuma min boralsan hnu phei kha chuan kan inhnuai miin an luahna man an dawngZ zui ta bawk nen pheichham man ang mai an ni.

     Ka pi boral hnu kum hnih khat chhûng chu min la ngaihsak vîau a, a hnu lam erawh hremhmun tenâu ang mai a ni thung. Inchhûngah ngaihsak ka hlawh lo tial tial a, ṭawngkam ṭhaa biak ka hlawh ngai ta mang lo bawk. Ka nutei pasal min endan a dang tawlh tawlh a, remchang vak lo chung pawha min kuah thuak thuak leh khawih a chîng ta vîau. Ka tân chuan inchhûng aiin pawnlam a nuam ta zawk a, ka class kal pawh haw mai lova han tei khawtlai ka duh châng a tam ta bawk. BA 6th semester ka zir ṭan lâi velin ka ṭhiannu nu-in nu Mapuiite'n an in enkawltu ber a dam ṭhat loh avangin part time-a thawk tur nula an mamawh tih min hrilhin amah ngeiin min va hrûai a, class kal paha thawh tur ka zawn lâi a lo ni bawk nen an ina class ban hnu-a inchhûng chet ṭul ang ang ti tur chuan kan inbefel ta a.

     Ban veleh hmanhmawh takin nu Mapuiite in lam panin ka kal nghal sawk sawk a, tihtur awm ang ang ka tihzawh hnu-in hmanhmawh tak bawkin in lam panin ka tlan haw leh nghal a, thawmhnaw pawh thlak hman lovin eirawng ka bâwl nghal sawk sawk ṭhin a. Zan lamah lehkha zir duh vïau ṭhin mah ila ka chauh ve ṭhin êm avangin ka lo muthlu leh lawp lawp ṭhin a, ka zirlâiah pawh ka tlakhniam phah ve deuh hman a. Mahse, thlahnih khat a vei hnu chuan ngaiah ka lo neih ve ta deuh bawk a, zan lama lehkha zira menrei pawh ka thei ta vîau.

     Kan in chhüng boruak chu a rit tulh tulh a, pa Rama laka inven ngai bawk ka nutei mit tlun loh hlau bawkin ka awm a, an fate lah ruihtheihthil tih chîng an lo ni chho bawk nen ka rilru chhûngril hi a pik hluah hluah ṭhin a ni.

     Zankhat ka lehkha zir chu exam lai a ni bawk nen ka induhthawh hle a, zanlâi pelh thleng rawkin ka inen a. A hma-in ka lo meng rim deuh tawh nen ka hriat loh kârin ka lo muthlu leh pek a, ka harh leh meuh chuan ka nutei pasal mitmeng hurherh zet mai nen chuan kan inhmachhawn ta reng a. Thawh tuma chet ka lak rûal chiah chuan min rawn kuahbet ta mai a!

     Ka theih tawpin ka ṭang a, ka thinrim leh hlauthawng lutuk chu ka khur hlawk hlawk a, zu rim a nam huam huam mai bawk nen ka mang a ang tak zet a ni. Remchâng hmasa berah ka kiu-in a nakah ka do ta tlat a, ani zurui tha chu ka lo zuam ve deuh bawk nen ka theih tawpa na-in ka do a, a duh angin min ti thei mai bik lo a. Bang lamah chuan ka nekbet lui ve tlat a, a duh anga chet a lak theih tak lohah chuan thinur tak chungin a thapui hmangin min khawih ta sawk sawk a, ka kiu-a ka dona pawh phetin khum lama min hnuh phei tum chuan min pawt ta chîam a.

     Ka tâna vanneihthlak lutuk tak maiin ka nutei aw kan hre ta hlauh a, ka room lam pana a ke pen ri kan hriat rûal chuan min thlah vatin ka piahah chuan a va ding fel than a. Ka sam leh thawmhnaw pawr vel ka siamṭhat sawk sawk lâi chuan ka nutei chu ka roomah chuan a rawn dak a, a pasal lo ding run a hmuh chuan a mengphawk ve deuhin ka hria a.

     "Tun ang zan rei tawhah hengah te eng nge i va tih a? Engtik lai khan nge thawh pawh i lo va thawh phei rêng rêng ni!" Ka lo beisei lawkdan ang chiahin a ṭawngkam chuan ngaihno a bei lo hle.

     "Ka muhil thei lo a, ka va zung let leh lamin Sangkimi room lo eng iarh hi ka hmu a, a la mu lo nge tiin ka va en a, a lehkha zir a lo muthlu pek a, ka va kaitho a nih hi!"

     Ka ten lutuk chu engmah pawh sawi lovin ka ding ngâwi reng a, a insawithiam hmel chu melh pawh ka melh peih lo a, ka huatna thinlung chu a so bawrh bawrh mai a ni. Ka nutei hnena thil awmzia hrilha zualko chu ka tum hlek lo a, a lakah hian a pasal aia keiin thiam ka chan zawk hi ka ring lo hulhual a ni.

     Ka mut hnu pawh chuan muhil mai thei lovin ka let ka let a, ka mal lutuk leh han zualkona tur takngial pawh nei lova ka awm chu mahni inkhawngaihna-in ka khat a, ka mittui chu a rawn luang zawih zawih reng a, ka hmabak thim lutukah chuan eng chhete pawh hmuh tur a awm lovin ka hria a, ka thaw a pik a, ka tawt up up mai a ni.

     Chu thil thlen hnu aṭang phei chuan ka nun hi a râlmûang lo zual a, ka nutei lakah ṭawngkam ṭha ka dawng ngai tawh lo a, a pasal lahin min beisei a bansan bawk hek lo. Invêng rana awm a ngai reng a, exam zawha nu Mapuii'n chhun lama pui tura min sawmna pawh lawm takin ka pawm nghal hmiah mai a ni.

     Ka nutei duhdan chuan khawiah mah kal lova inchhûng enkawl turin min duh a, an tih peih loh âi zawng zawng tia engkim ka tihfel vek hman tho ṭhin avangin ka hna chu bansan ka tum eih lo thung. Hnaa ka kal zawhah insuk, rawngbawl, chhuatnawh engkim ka ti leh vek tho a, ka pawisa hmuh ve theihna awmchhun tihtawp chu ka tum lo bur mai a ni.

     An fapa upa berin accident a han tawk a, an buai tak êm avangin damdawiina riakah min hmang leh ta char char a, ka mu tlemin ka hah ve deuh bawk a, ka tla ve dâwkin ka hria a. Nu Mapuiite chhûngkua ka chungah an ṭha a, eitur tuihnâi leh ka taksa mamawh ang tur vitamin te min pek takah chuan ngai ka awh chho ve leh mek a ni chauh zawk a. Chuti ni lo se keimah ka lo lian lutuk bik lo bawk nen hmuh ka nuam vîau-in ka ring lo a ni.

     Kan in chhûnga thil thleng engmah hi nu Mapuiite hnenah hian ka sawi ngai lo a, ṭhenawm khawvêngte kâ aṭanga an hriat ni ngei tur a ni vawikhat chu min zawt tawh a. Mahse, sawi nuam ka ti lo tih leh sawi ka duh vak lo tih an hrethiam a, min zawt nawn leh tawh ngai lo a, ka chunga an ṭhatdan erawh a ngai reng thung.

     An fapa Pekhlû-a rawn thlen dawn nï  chuan Airportah hmuak turin an kal hlawm a, kei leh nu Mâwii chauh in nghakah min dah a. Ka ṭhian kawm ve ber Âte-i'n min rawn call a, lo len an tum thu a sawi chuan phur taka lo chhângin lêng tur chuan ka sâwm chul a. Kan inbiak zawh hnu rei vak lovah kan college kalpui tho Jerry-a nen bike-a rawn inphurin an rawn thleng thuai a. Nidangah pawh ka ṭhiannu chu nu Mapuiite inah hian a lo len fo tawh avangin a tlangnêl ve tawh vîau a, nu Mawii nen pawh an inkawmngeih ve hle tawh a ni.


FELICITY 2
Sbk Pachuau


     A dan pangngai tê-in Áte-i chu a ri leh bawrh bawrh tawh a, nu Mawii chu eng eng emaw sawipuiin an nui dun leh hawk hawk ṭhin a, Thingpui hmeh tur chhang ka la siam laklawh avangin keima buai buaiin ka buai a, Jerry chu chaw ei dawhkan bulah ṭhu-in a phone-ah games a khel mawlh mawlh thung.

     Ka thilsiam ka zawhfel hnu chuan Jerry bulah chuan va ṭhuhnaiin a games khelh chu ka enpui a, chutia ka va ṭhut ve takah chuan a phone chu dahin kan ti ti ta zawk a, Âte-i leh nu Mâwii paw'n min rawn zawm ve vat a.

     "Kim, class pangngai kal thei tawh lo mah la IGNOU-ah tal zir zawm leh la ka ti e! Hna pawh zawng dawn la BA ai chuan MA-in a pui zawk ang che, hna naran lo deuh pawh i dil thei zawk ang a, class regulara kal a ngai bawk si lo a, ti ve ngei la i inchhir ka ring miah lo," Âte-i'n a tih chuan Jerry pawhin a lo thlâwp hle a.

     Kei pawh ka rilru takah chuan ka lo tum ruk ve rauh rauh a ni a, ka chhûngte'n class kal tawh lo turin min khap mah se IGNOU-ah chuan an hriat hauh lohin ka zirchhuak theiin ka ring a, nu Mapuii bulah ka sawi tawh nghe nghe a, min lo phurpui hle a, ti ngei turin min fuih ve sauh sauh a.

     Kan result a chhuah khãn vanneihthlak takin ka pass ve hlauh mai a, zirna hun ṭha ka neih mumal loh avang khan ka pass zo lovang tih ka lo hlau ru deuh kha a ni a, ka fail a nih vaih chuan a bul aṭanga han ṭan ṭha leh turin ka dinhmunin a zir loh bakah ka chhûngte lam aṭangin phalsak ka ni dawn lo tih ka hre ve khiau a, ka pass ve hlauh chu ka lawm tak zet a ni.

     Ka pass lawmna atân nu Mapuii'n phone thar mai leisak a, ka phone hman lâi a chhiat daih avangin phone thar ka mamawh hle a, chu chu hria-in ka mamawh tak min pe a, ka inthlahrung vîau naa eng ang pawhin ṭang mah ila min pe dawn tho a ni tih ka hriat avangin lawm takin ka la a, ka pawisaa ka lei tur ni ta se ka lei phak loh tur khawpa ṭha leh changkáng a ni tih ka hmuh phei chuan ka hnuk a ulh hîal a ni!

     Ka tân chuan nu Mapuiite nupa hi nu leh pa ang an ni, min ngaihtuah êm êm a, an ina hnathawka kal ve mai mah ni ila an záwlpui biakin min bia a, ṭawngkam mãwi lo leh chaldelh deuhin min ṭawngkhum ngai lo, an fate an biakdan nen thuhmun rengin min bia a, ka tân chuan ngainat loh theih an ni lo a ni.

     "Ni e, kei pawhin tih chu ka duh alawm. Admission hawn a nih veleh va in-admit ve ka lo rilruk deuh a, a hun min lo ngaihvenpui deuh la a ṭha ang," ka ti nghal zat a.

     "Lutuk tlat! An ti har tawhin ka ring lo, ka lo ngaihven dawn nia," phur hmel zetin Âte-i chuan a lo ti vat a.

     Chutia kan ti ti nak nak lâi chuan pawn lamah motor horn ri kan hre ta a, nu Mawii nen kan tlanchhuak ta nghal vat a. Nu Mapuiite chhûngkua chu motor aṭangin an lo chhuak mêk a, u Ruathlû-a pawh a nau hmuahnaah a lo va kal ve ni ngei tur a ni a bullet chuan a rawn tlan thleng ve chiah a.

     "Kimte, kan chawhmeh rawn hawnho saw lo va dah lut ta che, a hnungah khân ka dah aw," nu Mapuii'n a tih chuan motor lam pan chuan ka pen phei ta nghal a.

     Motor aṭanga lo chhuak mipa hmêl ka hmu chiah chu ka ṭek sawkin ka hria a, thlalaka a landan âi daihin a takah chuan a ṭha zawk fê a ni tih ka hmu thei nghal mai a, Mizo mipa-ah ani tluka ṭha ka hmuh awm réng ka la hre lo! A mitmeng zâu lutuk lo, zîm ni hauh si lo, sexy zet mai leh a hmuihmul ṭo sîar sîar hnuaia a hmui nalh tak  maite chu ka hmu kim nghal vek a. A hnâr ngul nalh zet mai chu lemziak thiamin duhtawka a ziah nalh luih ni mai awma mâwi a ni a, a tihmelṭha zual tur ni awm fahrana a mit veilam zawn thlaa khûaváng awm thleng chuan ka hmuh hmaih lo chîang kher asin!

     U Hruaitei ṭawng thawmah chuan ka harh zawk a, chutia mipa ka vawikhat hmuhnaa ka lo melh reng mai chu ka inthiam lovin ka zak hle a, ani lah chuan ka awmdan chu a hrethiam nge ni min la nuih suk zui, ka zak lutuk chu ka beng leh bîang velte chu a sa pup pup a, hawisawn vatin chawhmeh la tur chuan motor hnunglam chu ka pan ta nghal a.

     In chhûng ka luh leh hnu pawh chuan ka la pangngai hlei thei lo a, nu Mapuii chuan ka ṭhiante chu a lo be bawrh bawrh a, Âte-i phei chu a ṭhiannu fanu, a hriatsa a nih avangin innêl takin an inkawm ve mai zel a. Jerry erawh a vawikhat lo kalna a nih avangin a la hre lo thung, ka ṭhiannu chuan a lo hmêlhriattîr tawh ka rin avangin a hranpa-in ka sawi ve ta lem lo.

     Jerry-a te haw dawn chuan an bike dahna thleng ka thlah a, ka lut leh tur lam chuan Pekhlû-a, a room tukverh aṭanga rawn hawithla chu ka han hmu thut a, ka lai ang reng hle a, in chhûng lam panin ka kal ta sawk sawk a.

Ei rawngbawl a hun chuan nu Mâwii chu ka pui a, nu Mapuii'n chaw ei ve nghal tura min sawm chuan ka hnial thung. Ka haw tlai deuha thil thleng ṭhin ang kha a theih hram chuan pumpelh ka duh a, buaina laka fihlim hi ka tân a ṭha ber a, ka tihsual ni miah lovah pawh buaina ka tawk ṭhin a ni si a, pumpelh thei dinhmuna ka din chhûng chu pumpelh zel mai ka duh a ni.

     Ka haw hmâ-in nu Mapuiite chhûngkua sitting rooma ṭhute chu thingpui ka pe leh tê tê a, u Ruathlû-a pawh dawr lama let leh mai lovin a lo la awm ta reng a, Pekhlû-a erawh a room lamah a awm nge sitting roomah chuan a awm ve lo thung. No ka va seng leh rûal chuan nu Mapuii hnenah tih tur dang a awm tawh lem loh chuan haw mai ka duh thu ka hrilh a.

     "Tih tur dang awm tawh lem lo e, va haw tawh rawh. Chawhmeh kha i hawn tur ka siamsa vek kha aw, i hawn theihnghilh ang e," tih pahin nu Mapuii chuan choka lamah min zui phei nghal a.
     
     Hawn a ngai lo ka ti chungin an chawhmeh rawn hawn chu min pe ṭhen ve hrám a, "I tâna ka rawn hawn ve alawm, inthlahrung lutuk ṭhin teh suh. Mâma, Kimte-i hi va thlah lawk ta che," Pekhlû-a in chung aṭanga rawn chhukthla hlim hlawl hnenah chuan a ti zawm zat a.

     "Thlah ka ngai lo, keimahin ka haw thei alawm..."

     "Thlahtu tur che an awm lâi hi chuan i tán pawh a awlsam dawn asin, va inthlahtîr mai mai teh," nu Mapuii bawkin a lo ti leh a.

     "Dawra kal pahin ka va thlah mai ang, ka tân thlah nghal a remchâng alawm," u Ruathlû-a'n  a rawn ti hlauh a, ka thaw huai a.

     Pekhlû-a thlah nih chu ka hlau a ni ber mai, a hmelṭha lutuk leh awmdan cool lutuk vang chuan a bula awm ka hreh nge pawh ka inhrethiam tawh bik lo, keimahah danglamna a thlen tlat vangte pawh a ni mahna! U Ruathlû-a, nidang pawha ka biak lumlam lutuk ngai lem loh chu ka be ta sawt sawt a, ani pawh chu chutia nêl taka ka biak takah chuan a ri ve hlut a.

     Kan in thlen hma deuhah chuan dintîrin kalkawi duhna ka nei tia chhuanlam siamin ka chhuk ta daih a, ka chhûngte tu emaw berin min hmu a nih hlauh chuan min ṭawngkhum nuam an ti leh dawn lutuk a, chu chu thlentîr ka duh hauh lo a ni.

     Ka nundan ka chhut neuh neuh châng hi chuan ka lung hi a âwi thei ṭhin lo a, ka pian leh seilenna in chhûngah ngei hnuaichhiah leh tihduhdahin ka awm a, do let turin keimah mai ka nih avangin eng ti thei ka ni bawk si lo, ka chhûngrilah hian ka na ru ngawih ngawih ṭhin. Nuamsa taka khawsa ṭhin leh chhûngkaw duat rawn ni ṭhin kha an kamchhe tleuhna ni awm fahranin min sáwngbawl kûal vel a, a tirah phei chuan ka tuar thiam lo vîau a, a rei deuh ták hnu-ah erawh ngaiah ka nei thei ta zawk a.

     U Hruaitei pasal neih a hnaih tawh avangin nilênga awm a ngaih châng a awm a, zan lam erawh kan chhûngkaw khawsak dan min hriatpui ve avangin min chelh ngai lo thung. Inneih hma ni hnih vel la awmah phei chuan nilêng tak meuh meuhin kan buai a, pangpâr khawi lama ka tuizia leh nuam ka tihzia nu Mapuii chuan a hre bawk a, pangpâr khawi dan tur chu ka kutah a dah tawp mai bawk si a, inneih hma zanah ka chhûngte hnena dîlin min rawn hruai tawp a, biak in leh hall cheiin kan buai nghal char char a, in lama haw lova an hnena ka riah nghal dawn avangin ka hmanhmawh lem lo a, ka haw huna thil thleng thei erawh rilru-in a hre kar thung.

     Zan a rei tak deuh avangin a tuka cheizawm mai turin hawsan phawt kan rêl a, kan haw tur motora kan chuang chu ka hawichhuah rûalin ka ṭhutna fuh lohzia ka hre nghal a. Pekhlû-a chuan motor khalhin hmalama dârthlalang(Rear-view mirror) aṭang chuan chîang takin min hmu thei a, a mitmeng tizim deuh sana min melh ka hmuh chuan ka ip chawih a, hmalam hawi ngam tawh lovin pawn lam chu hmu hauh lovin ka thlir ta reng a.

     Ka sawi thiam chiah si loh hian a chhûngte ka pawh angin ka pawh ve mai thei tlat lo a, inbiakna remchâng a awm pawhin biak loh dan ngawt ka zawng a, ka theih ang angin ka hel a ni ber mai. Keimahah huhâng a nei nasa lutuk chu ka hlau ni berin ka hria, a awm dan, chezia leh thil sawi dan thlengin ka mitmei ru reng thung lawi si! Keimah leh keimah pawh chu ka inhrethiam lo a, ka rilru puthmang pawh ka sawifiah thiam hek lo.

     In kan thleng a, in chhûng kan luh hnu lawkah Hriatzela in chung aṭanga lo chhukthla chu ka hmu thut a, hlim lutukin ka ṭe ṭhawt a, a lam pana tlanin ka va kuah deuh titih a, ani pawh chuan hlim hmel takin min lo chhawn a. A bânah vuanin ṭhutna lamah ka kalpui a,    eng eng emaw zawtin ka phûl hluai a, kan piah lawka kut kuangkuah chunga min lo thlir rengtu ka hmuh rual chuan ka ṭawng tawp chat a. Chutia amah ka hmuh vanga ka ṭawng ka tawp tak thutah chuan nuihza hmel hi a pu deuhin ka hria a, ka ngaih dan mai mai a ni em tih erawh ka chîang ngam bik hauh lo!

     Pekhlû-a a kalsawn tak hnu chuan ka ri zui leh nghal bawrh bawrh a, Hriatzela nena kan inkawm ngeihzia an hre chiang bawk a, nu Mapuii te nupa chuan min nuih chungin mu turin min kalsan ta daih a. Zan a rei tawh deuh avangin keini pawh chu rei meng lovin kan mu ve ta thuai a.

     Mikhual roomah ka mu a, kan che hah deuh bawk nen ka muhil nghal mai a, ka mutui hle ni ngei tur a ni ka harh leh meuh chuan khua a lo vâr uar tawh a. Ka tho nghal vat a, ka mutna ka thlehfel hnu chuan muangchâng lovin room aṭang chuan ka chhuak ta nghal a. Chokâ-ah chuan nu Mapuii leh nu Mâwii an lo awm a, thingpui an lo in dun a.

     "I mu ṭha thei em Kimte? Riahna sawn hian mut a har duh ṭhin si a, i  mu ṭha thei lovang tih ka lo hlau deuh a!" Nu Mapuii chuan min hmuh rûalin a lo ti sawk sawk a.

     "Mu ṭha thei tehreng mai, hei thawh pawh ka hai hîal hi!" tiin ka lo chhâng vat a. Nu Mawii thingpui min pek chu la-in an bulah chuan ka ṭhu ve nghal a.

    Nu Mapuii nen chuan pangpâr khawi dan kan sawi zui nghal mawlh mawlh a, kan duh dan a inmil theih êm avangin kan thu pawh a inhmu hle a, a khâwi thiam dang pakhat a rawih nen kan pathumin kan buaipui a, kan khawi nalh hlawm hle a, midang pawhin nalh an tih ve hlawm ngei ka beisei.

     Hall chei kan la zawh loh deuh avangin zingkârah chei chhunzawm a ngai dawn a, thingpui in zawhah chuan kal nghal mai ka rawt a, nu Mapuii pawh chuan min lo pawmpui hle a.

     "Kimte, thingpui min lo pe ve teh aw!"

     Ka phu deuh zawk a, chet mai nachâng hre lovin chokâa a rawn pen lut chu ka lo melh tawp a, a zîng tho hlim hmel pawh ṭha tak a la ni tho mai.

     Thingpui chu thlitsakin ka pe a, ka kut khur chu a hmuh loh hram ka beisei! Amah lah chuan ka lak aṭangin a mit a lasawn ṭha duh hauh lo lehnghal a, ka awmdan engkim mai chu a en uluk hle mai bawk nen ka che a lai zo vek a, ka thawte chu a sak zo ta vekin ka hre hîal a ni.

      "Mâma, Kimtei hi hallah va hruai la, hall chei tura kan tih midangho pawh kha theih ang ang in sâwm kûal dawn nia," nu Mapuii'n a tih chuan ka huphurh lutuk chu ka lo thaw dép dép a, eng mah pawh ka sawi thei tawh lo, Hriatzela zawk ni se ka tih zia chu nasa tak a ni!

     Motora kan chuan hnu pawh chuan ngâwi rengin ka ṭhû a, Pekhlû-a pawh chuan ngâwi rengin a khalh mawp mawp a, ngâwi renga awm chu nuam ti lo vîau mah ila han sawi tur hlawl ka hriat si loh avang chuan ka ngâwi zui ta mai mai a.
   
     "Ka hlauhawm vîau em ni?"

     Ka hawi phawk hle a, a zawhna awmzia ka man lo tih ka hmêlah a hmuh a nui hawk a.

     "Min hmuh hian thil hlauhawm deuh hmu ang maiin i awm ṭhin a, ka biak che hlau ni awm fahranin i bul hnaia ka awmin i tlanchhe zel bawk si a, min hlauhna chhan tur awm ang ka hriat mîau loh avangin ka hmêl hi i hlauh zâwng a ni thei mai em tih ka ngaihtuah a," nuihzat hmel deuha a tih chuan ka lo ip ru cháwih cháwih a.

     He mihring hian ka tlanchhiatsan zel a ni tih a lo hrethiam ve nameuh mai le! A hmêl ka hlau emaw a ti chu ka nuih a za hîal zawk a, a hmêl ṭha tak mai chu tu nula mahin an hlauh a rinawm loh a ni.

     A hmêlṭha bawk a, bialnu pawh a nei hmelṭha hle a, doctor ve tho niin milian fa tih hriat tak mai, hawiher changkang larh mai a ni a. A incheina leh a thil sawi dan kalhmangah a changkângin an neinung ve tawk tih a lang reng a, Pekhlû-a chu a duh ngawih ngawih niin ka lo hmu a, chu chu midang ngaihdan pawh a nih ka ring! Pekhlû-a rawn haw-na la rei loh tehreng nen vawihnih vawithum lâi an inah chuan a rawn lenchilh tawh bakah a bul chétah ṭhû-in a ngheng deuh chîal reng a, an bula awm pawh a hahthlak lam hret a ni. 

     Ka hmuh ve dan mai maiah chuan nu Mapuii pawhin mo atân a it vîau lovin ka hria a. Mahse, mi á a ni lo a, an ina a lo len ṭum chuan ṭha takin a lo be ve seuh seuh tho a, Pekhlû-a erawh fîmkhur tura a chahlâi ka hre ru zauh thung.

     Ngaihzâwng nei a ni tih hre mah ila a hmêlṭhatna leh a mize pá tak mai chuan min hîp hle tih ka pha thei hauh lo, ka rilru aṭanga paihbo daih ka duh lâiin ka hnathawhnate an nih mîau avangin kan inhmu reng lo thei lo a, a hmêl ka hmuh zin poh leh min hipna chu a na telh telh mai si a, ka mangangin biak tam loh leh amah hnaih lohah ka tlak ta ngawt réng a ni.
   

FELICITY 3
Sbk Pachuau



     "Min la chhâng miah lo a nia.."

     Zahzelah ka aw ka thian kharh a, kut kuangkuah thanin hmalam chu ka en ding ngar a.

     "Ka nâu bulah kha chuan i ri chúl a, ka bulah lah kâ nei lo ang hmiahin i ngawi leh kar reuh lawi si a, i kawm chák zawng ni lo mah ila ka biak che chuan min chhâng ve tal la tiraw?" a rawn tih leh tákah chuan ka ṭawngchhuak ve ta hrám a.

     "Chutianga kawm chák leh chák loh lam a ni lo! Ih..englo..ka nel zâwngte bulah lo chuan sawi tur ka hre lo thei lutuk a.."

     A nui ri hak ka hriat chuan ka melh vat a, a nui hmêl chuan a tihmêlṭha zual sauh emaw tih mai tur a ni lehpek!

     Ka ngaihtuahna chu duh lovin ka hawisawn nghal vat a, an chhûngte nula pahnih leh tlangvâl pakhat(tlangvâl han tih lémah a ṭawng leh inthuam danah nula a ang zawk mah!) an rawn tel ve ták hnu chuan ka thaw huai a, ka thinphû pawh a pãngngai ve ta deuh.

     Zanlamah khan kan lo chei nûal tawh avangin kan chei zo ta thuai a, kan pangpâr khawi nena inmil thei tur ang berin kan chei a, kan uluk bawk a kan chei zawh meuh chuan keini a cheitute ngei pawh kan lung a âwi tlâng hle a, kan duh ang taka mâwi leh nalha kan chei thei chu nuam kan ti hlawm vîau a ni.

      Chawhnu lam dâr hniha innei tur an ni a, chaw kan eikhama kan buai nek nek chhûngin insiam a lo hun chho leh nghal der a. Nu Mapuii kawr leh pheikhawk min leisak chu inbelin puanchei, ka nu ta hlui ka rochun chu ka bih bawk a, dârthlalanga ka thlâ lo lang chu ka thlek vang vang a, ka lung a âwi ve hle mai.

     Make-up ka hmang nasa lutuk ngai lo bawk nen ka hmai chei chhûng chu a rei lo hle a, ka inpeih hnu chuan room aṭanga chhuakin u Hruaitei an cheina room lamah ka lut phei ve nghal a, ani pawh chu an lo chei zo ve chiah a. A hmêl a chhe lo bawk a, a lang ṭha kher mai! A lang tuihnâi ṭha ser sawr hle a, a mo thuam inbel pawh inhmeh tak a ni.

     Nu Mapuiite nupa pawh an nalh dun hle a, an hmêlṭha dunin hmuh an nuam nupa tak zet a, an inhmangaihna leh induh tawnna an hmêla langchhuak chuan hmuh a tinuam zual a. Pasal ka neih hunah pawh anni nupa anga inhmangaih leh induh tawn taka ka awmpui theih tur ngei neih chu ka duhthusam ruk ve rauh rauh a ni a, min hmangaihtu leh kei pawhin ka hmangaih êm êm ni thei se tiin duhthu ka sám fo ṭhin.

     Ka nu leh pate kha nupa inngeih tak an ni a, an inhmangaih tawnin an hlim dun hle ṭhin a. Ka nu-in ka chhang tur a pai khan a chhiat a, chumi hnu-ah a chi kawngah a pai leh hlauh mai a, a chhul paih a ngaih tak avangin keimah chauh fa min nei a, duat rawn pawh ka hlawh hle réng a ni. Ka pi khan ka nu kha a fak thei khawp a, nupui leh mo ṭha tak a nih thu leh pasala nu leh pa zahthiam tak a nih thu a sawi uar hle ṭhin. Ka nu anga hmeichhe nunnêm leh rilru ṭha, âia upate zahthiam mi ni turin min fuih nasa ṭhin a, ka phak ang tawkin ka pi thu chu ka zawm ve a, ka thiamna ngeiah pawh ka nutei te nupa ka chhan ngai lohna chhan pawh ka piin âia upa zah thiam tura min hrilh kha ka hriatchhuah ṭhin vang a ni pakhat a.

     Nu Mapuii chuan an bula kal tura min tih avangin an rûal chuan ka kal a, ka thawven huaina turin motor chu Hriatzela'n a khalh hlauh mai a, Pekhlû-a te nena motor pakhata chuan kha ka hlau tawh tak zet a, Hriatzela hmel ka hmuh rûala ka thawveng ta nghal suai suai kha tuma'n min hriatpui lo mah se ka lawm ru veng veng a ni tawp mai.

      Biak in chhûngah pawh nu Mapuii chuan an bula ṭhu turin min ti tlat a, kei lah an chhûngkaw zínga mi pawh ni lo, an ina hnathawk ve mai ka nih vangin ka inkiltawih si, hmun danga ṭhut ka tum pawha a phal tak tlat si loh avang chuan rilru bet lo zet chuan ka ṭhu ve ta ran a.

     Mo rawn luh dawn chuan mipui kan lo ding a, u Hruaitei chu a nau Pekhlû-a chuan a rawn kai lut a, an va hmelṭha dun tak em! Mo ai mahin a rawn kai luttu chuan ka mit a lo la leh pek a, amah a palianin a pian a nalh bawk a, a suit hak chu a inhmeh tak zet! A hmêlṭha tak mai chu a langsar hle bawk a, hmeichhe dang mit pawh a chungah a fu ṭhup ang tih chu ka ringhlel hauh lo. A û a ṭhutna tura a thlenfel hnu chuan kan ṭhutna tlarah, a pa bulah a rawn ṭhu ve a, min rawn melh zauh nia ka hriat chu ka duhthusam mai a ni em tih ka chiang bik hauh lo!

     U Hruaitei pasal tur hi zirtîrtu a ni a, milian chhûngkua ni lem lo mah se an khawsak a harsa lutuk bik lem lo a, nuamsa taka khawsa erawh an ni bik lo a, amah hi tlangvâl fel leh kawm nuam tak a ni nghe nghe. A tirah chuan an khawsak a innawm hleih êm avangin u Hruaitei lakah a inthlahrung a, nuamsa taka a khawsak theihna turin midang nei mai turin a hrilh a ni awm e. Chu chu u Hruaitei chuan a hnial fithla ṭhak a, chutiang vang mai maia a hmangaihna phatsan mi a ni lo tih a hrilh bawk a, a neih tur chu sum leh pâi nawmsakna ni lovin amah chu a ni a, a neih tam leh tlemah a buai lo a ni tiin a rilru a hnehsak thei hrám a, tun hi an lo thleng ta a ni.

     Inneih inkhawm kan bâng a, thlalaknaa tel ka tum lem loh avangin piah deuhah nu Mawii nen kan ding dun a. Pekhlû-a te chhûngkua-in an lakpui lai chuan dan pángngaitê-in hmun dang ka hawisawn leh thei pek lo a, kei chauh ni lovin chulâi hmuna hmeichhe awm ve dangte pawh chuan an mit an lasawn hlei thei bik lo tih chu ka hmu thei a. Nalh leh changkáng taka incheiin an hmêl pawh a ṭha hlawm a, anni lakah chuan kei chu te chem chemin ka inhria a ni.

     Ka ngaihtuahna ka lo kawm melh melh lâi chuan nu Mapuii chuan min auvin min hui lauh lauh a, nu Mawii nen chuan kan kal phei dun a. An bul kan va thlen chuan thlalaknaa tel ve turin min ti a lo ni a, kan inrem a, ka ding fel deuh chiah tihin ka bulah min si chétin Pekhlû-a a rawn ding a, ka darah a la rawn kuah zui! Ka lungphu ran dan chu nasa tak a ni, ka thaw lak a buai leh zo nghal vek nia!

     An lak zawh rûal chuan kalsawn nghal mai ka tum a, ka dara a kuah chu a thlah duh lo a, min vuan nghet sauh a.

     U Ruathlû-a leh Hriatzela chu kovin, "Kan unauho hian lakpui leh ang u," a ti a, an unâu zînga tel ve ka nih mîau loh avangin kalsawn tum chuan ka pen leh a.

     Ka bâna rawn vuanin, "Kal suh, tel ve rawh!" a rawn ti sup a!

     Ṭan vak a rem si lo a, lai ang reg tak chuan ka ding a, Hriatzela'n a bula ding tura min auh chuan u Hruaitei bulah min dintîrin ani chu ka bulah a ding nghal hmiah a, Hriatzela leh u Ruathlû-a chu mo neitu dinna lamah an ding thung.
   
     Thlalak zawh veleh ka kalsawn ta nghal vat a, min rawn zui tih ka hre naa ka ngaihsak duh lo lui tlat a. Nu Mapuiite dinna hmun ka thlen chuan an bulah ka ding ve a, ka sîrah tak min si pha rengin a rawn ding ve nghal zat a. Rei pawh kan la din hma chuan a bialnu   Ruthi chu kan dinna lam panin a rawn phei a, a nalhin a chhelo tak zet a ni! A hmêlṭha takah chuan a mamawh aia tam make-up a bel niin ka lo hre hmanhmawh a, make-up hmang mang lo pawha a hmêlṭhat dâwn tehreng nen chuti tak maia a inhnawih nasâ chu ka lo ui ve hle ringawt a.

     Ka dinna hmun a rawn thlen phei rûal chuan Pekhlû-a bânah a vuan nghal zat a, a nu awm ve reng lâia chutia a rawn che ngam chu ka lo ip ru deuh a, kei ni ila ka bialpa chhûngte bulah inkaih chu sawi loh insik ringawt pawh ka ngam awm tawp si lo a tihte chu ka lo ngaihtuah vel mai mai a, amah lah chu zam map lovin a ṭawng nghal barh barh a.

     Rei pawh kan din hma chuan nu Mapuii nen Pa Malsawma bulah kan kal ta daih a, min en zui nia ka hriat chu a dik ngei ka ring a, a chhan chu ka tukkhum a za mer mer tlat a ni!

     Khua a lum deuh bakah mi zi nuai nuai kâra awm chu ka zawh meuh loh avangin ka chau angreng vîau a, ka luakte chu a chhuak deuh nghulh a, inlêng zualpui an ṭin hnu chuan inthlahrung tak chungin nu Mapuii hnenah chuan ka mutna room lama awm thawven lawk ka duh thu chu ka hrilh ta tawp a. Ani chuan min hrethiam takin ka duh chen chen chawl hahdam turin min lo ti sawk sawk a, ka nawm loh êm avang chuan mawi lo pawh sawi thei lovin ka bibo ta thuai a.

     Ka han mu ren ráwn a, ka luak a rawn chhuah zual takah chuan bathroomah ka tlanlut vat a, ka thleng fel hman ṭawk tihah chuan ka luak ta nghek a, bathroom aṭanga ka chhuah leh meuh chuan ka zawi ngawih ngawih tawh mai a ni.

     Ka mutna khum bula lo ding rún ka hmuh chuan ka phu deuh zawk a, mitmeng zim sanin min lo melh reng a, zawi táwkin ka pen phei chhet chhet a, ka lam pana a lo kal ka hmuh chuan ka ding ta ngawt a. Ka bul a thlen rûal chuan ka chal a rawn tawk a, ka lo thle sawn vat thung.

     "I khua a sik a nih hi! Bathroomah khan i luak tiraw?" a ti sup a.

     "Aw.."

     "Damdawi ei la, mu ang che. I hmêl lan dan pawh a dik lo hrim hrim, tikhan engmah dang ngaihtuah lovin mu vang vang phawt rawh."

     A chhuah hnu chuan chau zetin khumah chuan ka ṭhu thla hnawk a, ka khawsik chu a nasa ta deuh nge vawt ka ti ta riau a, rizai sin chuan ka mu ta thuai a. Damdawi ei tura thawh pawh ka peih lo, ka zia leh mai ringin ka mit chu ka chhîng vang vang a. Eng vanga ka khua chu sik ngawt nge ni ang tih chu ka ngaihtuah neuh neuh a, ka mut tlem vang leh rim lutuk vangah ka puh ta ngawt a.

      Kan in chhûng boruak a ṭhat loh êm avangin ka rilru a hah ṭhin hle a, tunlâi tak phei chu ka nutei pasal ka lakah a hûangtâu sawtin min khawih theihna remchâng a dap reng bawk nen pik mup mupin ka inhre ṭhin. Tlan chhuahsan daih maite ka duh ṭhin a, tlanbo ta ila tumah belh tur ka hre leh chuang dawn si lo, ka rilru hah leh pik lutuk hi mu leh mal nei lova ka awm phah mai ka hlau hîal ṭhin. Nu Mapuiite bula ka awm hian kan in chhûnga thil thlengte chu theihnghilh hram tumin ka ngaihtuah lo lui tlat ṭhin a, ka thisen zawmpui ni mah suh se ka chhûngkhat laina hnai neihchhun angah ka pawm hmiah a, an bula ka awm chuan ka thlâ pawh a mûangin hlim takin ka nui leh thei mai zel a ni.

     Nu Mawii min ko ri ka hriat takah chuan ka meng chhuak a, damdawi leh tui kengin khum bulah chuan a lo ding ran a. Damdawi ka ei zawha ka mut leh lai tak chuan nu Mapuii pawh roomah chuan a rawn lut ve chiah a, min ngaihtuah hmel zetin khumah chuan rawn ṭhu-in ka chal chu a rawn dek nghal a.

     "I rimtawng lutuk a nih hi, a pawi em mai! Kan lo chhawr hah lutuk che a, in in lamah i awm hahdam thei bawk si lo, keima thiam loh vek a ni!" Nu Mapuii'n a tih chuan ka lo hnial vat a.

     "Teuh lo mai, chutiang vang a ni lo! Engmah hahna tur a awm lo, keima chawrche lutuk vang mai mai a nih hi, engmah thiam lohna i nei lo."

     "Ni lo e, i hah lutuk ang tih kha lo ngaihtuah thiam ve tur a nia..."

     "Nu Mapui, khawngaihin khatiang zâwng khân sawi tawh lo hram teh. Ka tan hian a nuam miah lo a nia, ka sawi ang kha a ni tak tak alawm, eng mah hahna tur khawpa thawh tur a awm lo hrim hrim," ka lo ti sawk sawk a.

     Nu Mapuii leh nu Mawii chhuah hnu chuan ka lo muhil sek a, nachhawkna ka ei khan ka thlan a tichhuak a, a lum lutuk chuan min tiharh a. Ka tho chhuak  a, inbual tumin inthlakna tur ka la chhuak a, bathroom ka lut dawn chiah tihah Hriatzela chu roomah a lo lut a, inbual tuma ka thawmhnaw leh towel pawm ṭûn chunga ka lo ding min hmuh chuan mak tih hmel zetin phawk deuhin min en a.

     "I damlo an ti si a, rawn kan tur che-in ka lo kal a," a dan pangngai tê-in a ṭawng leh lúng lúng a.

     "Ka ṭha tawh e, inbual ka lo tum mêk a. Inlêng an la awm em?"

     "Tlem azâwng chu la awm e, i ṭha tawh tak tak maw?" min zawt ṭha leh a.

     "Ṭha tawh tak tak e, ka inbual rei lovang, tikhan min lo nghak lawk rawh," tiin bathroomah chuan ka luhsan ta nghal a.

     Ka inbual zawh chuan kan pahnihin kan chhuak phei dun ta nghal a, inlêng tlêm bakah pa Malsawma naû te chhûngkua an lo awm a, nu Mapuii ṭhiannu Judithite an lo awm bawk a. U Ruathlû-a chu a bialnu thlah tumin an lo chhuak dawn chiah a, Pekhlû-a leh a bialnu erawh hmuh tur an awm lo thung. Thawveng ru huai e ti lo chuan ka rilru chhüngrilah nuamlo tlemtê a awm lawi a!

     Nu Mapuii'n min hmuh chuan ka zia deuh tawh em tih chu min lo zawt thuai a, ka ṭha tawh tih ka hrilh chuan a bula ṭhu turin min ti a, ka ṭhu ve nghal mai bawk a, Hriatzela pawh ka bulah a rawn ṭhu thla ve nghal zat a.

     Eng eng emaw sawiin kan nuiho leh dar dar ṭhin a, Hruaizela nî Rintei chuan nu Mapuii leh pa Malsawmate inngaihzawn lai chanchinte sawiin naupangchhe inngáizâwng ang maia an intihtauhsan ṭhin dante chu sawiin kan nui nasa hle a. Pa Malsawma pawh chu a lo nui ve suk suk ṭhin a, Hriatzela phur lutuk chuan a nî chu zawhna a lo zawt ve chul bawk a, a nî lah chuan phur zetin a zawh apîang chu a lo hrilh zel mai si a, nu Mapuii'n tawp tawh tura a hrilh hnu pawh chuan an la sawi phur nasa mai si a, kan nuihpui nasa hle a ni.

     Zan a rei takah chuan an haw ta hlawm a, nu Mapuii remti lo chung inchhûng hnawk zualpui ka tifel a, nu Mapuii chuan min tifelpui vek a. Hmun ka phiah lai chuan Pekhlû-a chhuak pawh a lo haw ve chiah a.

     "I dam tawh em ni?" Ka hmun phiahna bula rawn dingin min zawt a.

     "Aw, dam tawh e..."

     "Indim rawh, i damlo leh palh hlauh ang e!"

     A sawi zawh rûal chuan a inher vut a, a kal ta nghal daih a, ngâwi rengin ka en zui ta ngawt a.

     Ka mut meuh chuan zanlâi a pel thuak tawh a, zan tir lama ka lo muthilh sek tawh vang khan ka mut a chhuak lo hle a, ka ngaihtuahna-ah kan ina ka haw huna ka hmachhawn tur huphurhna a len em avang chuan chu lam ngawt chu ka lo ngaihtuah leh ṭhin.

     Zanhnih ngawt ka riakbo ta a, ka riahna hre reng chungin khawi khawiah emaw hurbo ang maiin min ankhum leh chîam chîam dawn a ni tih ka hre lawk vek a, pakhat lahin min khawih theihna hun remchâng a melh leh reng ang a, invêng rana awm a ngai leh bawk ang a, ka huphurh tak zet a ni.

     Ka tui a hal avangin ka tho leh a, tui in pahin inchhawp tur la nghal ila tiin choka-ah ka kal a, fridge chu hawngin tui bottle pakhat chu ka lachhuak a, ka in nghal khawlh khawlh a. Ka mutna room lama let leh tuma ka inher chiah chu ka ṭe deuh ṭhawt a, hnai fahranah Pekhlû-a nen chuan kan inhmachhawn ran a.

     A thawm ka hriat miah loh avangin ka hmu thut kha ka ṭe ṭhawt kha a ni a, a nui suk duh chauh a. Min tihhlauh tehreng nen a nui duh lek mai chu ka ngei tawk a tling a, rum deuha melh chungin kal ka tum a.

     Min dang betin ka darah a rawn vuan a, ka tawlh hnung vat a, fridge-in min lo dal avangin tawlh ngaihna a awm tawh lo a, ani lahin min rawn hnaih zel bawk si a, fridge nghengin ka ding ta tawp a. Ka taksa si chêta rawn dingin min chhuk en ran a, a thaw-ah chuan zu rim a nam a!

     "Min hlau leh ka laka invêng lutuk anga awm hi bansan teh! I ngaih anga hlauhawm ka ni bik lo a nia."

     Ka beng bula rawn kunhniamin a ti sup a, ka lo ip chawih thung.

   
FELICITY 4
Sbk Pachuau



     Ka thaw chu chham mai dawnin ka hria a, hetiang lutuka inhnaiha kan awm reng a nih phei chuan ka thawk loh mai te ka ring hîal a!

     Ka hmai si lo chauhin a rawn kun hniam a, a zu rim leh perfume inkah rim inpawlh chu ka nutei pasal zu rim nam ṭhin nen chuan inrimtui hleih tak a ni. A hmêlṭhat mai bakah a mize dam raih, pa zet mai leh chapo ni hauh si lova a hawiher sâng deuh vah maite chu  min hip zualtu a ni a, a hriat hauh loha a alaka ka lo luanliam vena leh ka rilru aṭanga ka paihbo theih loh chhan te pawh a ni bawk.

     Inngaihtuah harh thutin a âwmah chuan nemsawnin ka theih anga chakin ka mutna lam panin ka kal nghal hlawk hlawk a, ka hnunglama a nui ri hak chu ka hre naa hawikir lovin ka mutna room chhûngah chuan ka lut a, room kawngkâ ka khar rûal chuan kawngkhar ngheng chuan ka ding vang vang a. Ka tha khur dar dar leh ka thinphu rang dup dup tihreh tum chuan thawk ka la halh a, ka tui bottle ken chu nghet zetin ka hum ngawt ngawt bawk a.

     Eng vanga khatianga ka laka khawsa kha nge a nih ang? Ka mitmeng aṭang hian ka rilru puthmang chhiar thiamin min zûam phah ta vîau nge ni anga a ruih vang ni zawk ang le! Mipa lélo tak a nih ka ring lo a, hmeichhe kawp lâwr duah chi a nih ka ring lo bawk. Bialnu hmêlṭha zet neiin a bialnu lahin a duh ngawih ngawih a ni si a, eng vanga khatia awm kha nge a nih ang tih chuan ka thluak a tibuai hle.

     Zan lamah ka muhil tlêm bawk a, ka zîng tho chu ka ni deuh bûr a, ka khawsik vang kha nge ni ka taksa lah chu a rawl ṭhûm mai bawk si, ka harhváng lo chiang kher mai. Tumah an lo la tho lo hlauh a, tui te ka lum a, chaw chhum tur ka sîam zawhin tûal phiat turin pâwnah ka chhuak a, nu Mawii lo lut tur nen kawngka bulah kan intawk a.

     Nu Mawii hi nu Mapuiite inhnuaiah awmin fanu leh fapa a nei a, a fanu-in Champhâiah pasal a nei a, a fapa pawhin nupui a nei tawhin a fapate nupa nen chuan an khawsa ho a. A fapa nupui hi a fel vîau lo ni ngei tur a ni nu Mawii rilru hah hi ka bulah a vui ve niah niah ṭhin a, upa lamte a lo ni bawk nen ka khawngaih thei hle a. A hrisel lo chho ta vîau mai bawk si a, amah pawh a tar bawih bawihin a hriat a. Pa Malsawmate nupa hian an ngaihtuahin an duat ve hle a, damdawi ṭul angte leisakin a inenkawlna an tumsak vek bawk a, hna hahthlak thawh an phalsak lo bur bawk. A rilru nawmna tur leh a inthlahrun lohna turin inchhûng chet velah erawh an khap duh lo a, a nawmsam loh deuh phei chuan engmah tih an phal lo a, a duh lo chung an hawtîr ṭhin a ni.

     Tûal ka phiah zawha in chhûng ka luh leh chuan nu Mapuii pawh a lo tho tawh a, ka tho nuam em tih min zawh chuan ka ṭhat thu-in ka chhâng thuai a. Ka kut ka sil zawh chuan fridge chu hawngin chawhmeh siam tur ka la chhuak nghal mawlh mawlh a, dawhkanah dahin bai turin ka chan nghal a.

     Hriatzela phak chûala chokâa a rawn luh chuan rawngbawl chu kan zo titih tawh a, thingpui pek pahin a bialnu chanchin ka lo zawt zauh a, a nu-in a hria ang tih hlau takin a hmuiah a kut dahin min khap vat a, ka lo nuih thung. A ngaihzâwng neih hi a nute hriat a hlau hle a, unâu zînga naupang ber a lo nj bawk nen in chhûngah an lo duat rawn ve a, naupang chhe ena an la en hlawm avang hi a chhûngte hriattîr a la zak tlat a, nu Mapuiite nupa erawh chuan an hre ru thung.

     Ṭum khat nu Mapuii nen pangpâr kan siksawi a, Hriatzela bialnu chungchâng min zawt a. Keiin an hre sa emaw tiin ka lo hrilh ve mai a, a hnua Hriatzela hnena a nu leh pate'n a bialnu neih chungchâng an hriat leh hriat loh ka zawhin an hriat a rin loh thu leh an hriat a hlauh thu sawi ta mai si a, a nu-in a ngaihzâwng chanchin min zawh thu pawh chu ka hrilh duh ta lo law law a.

     "Mawipuii chu a dam maw, mate?" Nu Mapuii'n a rawn tih takah chuan phawk zeta min rawn enin ka hrilh a nih a ring tih hriat zetin a kuttum min hmuh zauh a, rum fahranin min melh zui bawk a. Keiin lu thin pahin ka lo nuih vawr vawr a, min ringhlel lutuk hmêl chuan ka nuih a tiza kher mai. Ka lo nuih vang chuan min ringhlel sauh emaw tih turin a nu nen an inbiak lai pawh chuan min melh ngur reng a, kei lahin chimawm chhuahin ka lo nuih vel  a, ka hrilh a nih miau loh avangin ka hlau lem lo bawk a, chhaih kual vel chu ka chák tlat pek a!

     "Ngaihzâwng neih chuan nu leh pate duhpui theih tur ang thlan thiam hram a ṭha, hmêlṭha leh zei nazawng hi kan tân an ṭha vek lo tih hriata fimkhür taka thlan a ṭha ber! in thlan thiam chuan in vannei ang a, in thlan thiam loh leh in vanduai thung dawn a ni mai a, nangmahni in pawimawh ber," nu Mapuii chuan a ti a, Hriatzela chuan ngâwi rengin a lo ngaithla kar a.

     "Eng tikah emaw, remchângah lêngah la sâwm la a ṭha ang, fapate bialnu chu kan hmu ve chak alawm," nu Mapuii'n a ti leh a.

     "Ni e, lo hruai ngei ngei rawh. Kan hmu ve chak a nia!" ka lo ti ve vat a.

     "Lo hruai pawh ni ila i awm loh laiin ka hruai ang, i hmuh ve ka phal lo," Hriatzela'n a lo ti thung a.

     "A hmêlchhe lutuk a, i zahpui a ni chiang!" ka tih chuan rum tawkin min melh a, kei lah chuan ka lo nuih har har a.

     "I hmuh tawh reng kha aw! Hmêlṭha i tih hle kha, i tluk lo lutuk e aw!" A ṭang nasa lutuk chuan ka nuih a tiza zual sauh a, a nu pawh chu a lo nui ve hak hak a.

     "Tunlâiah tumah thlalakah an lang chhe duh tawh hleinem! Camera a ṭha tawh lutuk a, a taka chhe beh ve tê tête pawh thlalakah chuan an lang ṭha-in an lang paw pheu vek tawh a, a taka hmuh phawt loh chuan ngaihdan siam ngawt theih a ni lo alawm," ka tih chuan nu Mapuii leh nu Mawii chuan an pawm dun hle a.

     Chhunah u Hruaitei te nupa an rawn lêng a, a thil pawimawh a ken tel loh an rawn lam a. Inlëng tlem azâwng an awm a, Hriatzela a tuka a zirna lama chhuk leh mai tur a nih avangin a ṭhiante tlawhin a lêngchhuak a, u Ruathlû-a dawr lamah a kal bawk. Pekhlû-a a hnathawhna turah joining report pek a ngaih avangin a chhuak a, nu Mawii a nawmsam meuh loh avangin inah a haw thla a, chetna tur neuh neuh a la tamin inlêng thingpui pek vel a lo ngâi bawk nen ka nawm loh rukna pawh tilang duh lovin ka buai nilêng a, a ruka nachhawkna ka eiin min chhawk tak hnu chuan ka zia ta viau.

      U Hruaitei te nupa haw tur thlaha kawta kan dinlâi chuan Pekhlû-a leh Ruthi an lo thleng ve chiah a, a dan pângngai tê-in Ruthi chu a rawn nalh leh khawp mai. Pekhlû-a'n mitmeng tizim sana min en reng chu hre lo ang hmiahin ka awm a, a hma aia nasa lehzuala ka inven a ngai dawn a ni tih chu tûma hrilh ngai lovin ka hre ve tlat!

     Tlailam chu rawngbawl a hautak lem loh bakah nu Mapuii'n haw hma tura min tih avangin hnial duh lovin haw turin ka insîam a, ka inpeihfel hnu chuan nu Mapuii chu hrilhin ka kal ta nghal a. A room aṭanga Pekhlû-a leh Ruthi rawn chhuk leh ka chhuak tur chu kan intawk a.

      "I haw dawn em ni?" Pekhlû-a'n min zawt a, Ruthi chuan inti tatu zetin a bânah a kuah ran a.

     "Aw, ka haw mai dawn. Tih tur ṭul zual ka tifel tawh a, ka hmanhmawh deuh bawk si a, ka kal mai ang," tih leh kal chu ka rual nghal a.

     "Min lo nghak rawh, keini pawh kan chhuak dawn a, kan thlah kual nghal dawn che nia."

     "Aih, a ngai lo mai. Kal kawina tur ka nei a," tiin hmanhmawh zetin ka kal chhuak nghal hlawk hlawk a.

     Min rawn hmuh hman hlauvin theih anga chakin ka kal sawk sawk a, kan in panna pêng ka thlen chuan ka kal mûang ta deuh chauh a. In thlen hlan ka nghahhlelh loh rûalin thlen thuai erawh a ṭul lawi si! Kan in kawt ka thlena in chhûng aṭanga thawm lo ri chhuak ka hriat rûal chuan ka hlauhthawn ang ngeiin boruak ṭha lovin min hmuak a ni tih ka hre nghal mai a, huphurh zetin muangchângin kawngka chu ka hawng a, ka lut ta nghal a.

     Ka hmêl a hmuh rûala ka nutei min melh dan chu sawifiah thiam chi pawh a ni lo. Huatnaa khat mitmengin min en a,  thil tenawm lutuk hmu ang maiin a hmui a tiner a, inmelh rum vangin tluk theih ta se vawi thum lâi ka tluk nawn ka ring hial nia!

     "Kan mihurnu pawh a lo haw leh ta alawm, tihian in chhûngah nungchang ṭha ber ang maiin a awm a, pawn lamah a chhuak vak dâw dâw reng a, zanah a riak bo thul. Khawilam mipa nge a va khawsakpui ang tih pawh hriat va ni suh!" A aw a ring ṭha si a, ṭhenawm khawvêngte hriat hlau chuan ka lo ip cháwih cháwih a.

     "Zanhnih lâi i riak chhuak a, i rawn hlawk haw ngawt lo maw! Riak tura i insawina hmunah khan i riah ka ring ta lo tawp mai, khawi khawiah nge i va inzawrh kual vel han sawi teh!"

     Ka thin chu a sa zak mai a, min hau satliah a nih chuan ka tûar thei mai a, kha chen kha ka tûar réng bawk. Mahse,  mihur anga sawi tur êm chuan ka awm lo chiang bawk a, ka thin a khei ve ta zak mai le!

     "Ka nute, i duh duhin min ankhum a, ka chhâng ngai lo che. Mahse, tun ṭum chu ka hnial dawn che, a chhan chu mihur ka ni lo a, ka inzûar bawk hek lo!" Ka thinrim êm avang chuan hlauhna nei miah lovin ka chhâng let ve ta sak a.

     "Insawithiam chu tum duh lo mai rawh, i pa Rama i ngaihmelh dante hi ka hre lo emaw i ti a ni ang e, ka hai hauh lo a nia. Hman zana i rooma in tawmdun ṭumte khan nangmah koh luh hi a ni tih ka hria alawm, inzep duh lo mai rawh. Kan buaipui nasat tehreng che nen heti mai mai hian a ni maw min thungrulh dawn? I lo va rapthlak reuh ve maw le, mite chu ka chhâng e i la ti ta lâia, i nu rüal ka nih hi, min zah ve ta che!"

      Ka ngaihdan chu ni lo vîau mah se tlawm a tum dawn lo tih ka hriat avangin ka hnial duh ta lo a, a pasal chungchânga min puhna pawh sawifiah ka tum buai peih vel lo, sawi mah ila ka thusawi chu a pawm dawn chuang lo tih ka hre chiang a, ngawih leh phawt mai chu ka thlang ta zawk a ni.
   
      Hrehawm a ni emaw, a aia hrehawm lehchhawng a ni emaw chu in chhûng hrehawm takah chuan ka awm ve zel a la ngâi rih mîau mai si a, kalna tur dang nei lo ta chu thawpik tak chungin hun ka chhiar chho ve leh ta bek bek a. Chhunlama nu Mapuiite bula ka awm hian tlêmin ka thaw a veng ve deuh a, Pekhlû-a hmu lovin awm reng thei phei ila chuan an in chhüng chu ka zalenna hmun a ni mai tur hi a ni a!

     Thla a vei leh meuh chuan Pekhlû-a'n amahin clinic a hawng ta bawk a, chhun lamah sorkar damdawiinah a thawk bawk nen kan inhmu khât ta hle a, kâr khatah vawikhat mah kan inhmuh loh ṭumte pawh a awm ta hîal mai! Kan inhmuh ve zeuh ṭum pawhin a taksa pêng pakhat ang maia amaha bet tlat reng a bialnu Ruthi chu a tel ve ziah bawk a, ka chungah sual lem lo mah se ka thinlung chhûngrilah hian biak chak lohna lian tak zu awm tlat a!

     Nikhat chu tlai lampangah nu Mapuiite nupa chuan chaw ei chhuahna tur an nei a, Pekhlû-a leh Ruathlû-a ei tur siam a ngaih tho avangin nu Mapuii chuan rawngbawl phawta hawsan mai turin min hrilh a, in lam boruak ka thlahlel lem lo bawk a hmanhmawh lo zetin an unau ei tur chu ka siam a.

     U Ruathlû-a nidang ãiin a lo haw hma ve tehmial a, zanah tih tur pawimawh a neih vang a lo ni a. A inbuâl a,hmanhmawh deuhin chaw a ei sawk sawk a, a chhuak leh ta nghal a. A eina vel ka seng fel hnu chuan haw tumin ka insîam a, Pekhlû-a lo haw huna a ei mai theih turin eitur ṭhenkhat chu dawhkanah ka chhawp leh phawt a, ka bag chu la-in kawngka lam panin ka kal ta nghal a.

     Kawngkapui awmna ka thlen hmâ-in rawn inhawngin Pekhlû-a a lo lut a, nidanga thim hnu-ah hlir lohaa ṭhin chutia a rawn hma ta vîau chu mak ka ti ang reng hle a, ka ke pen chu tawpin ding chungin ka lo nghak tawp ringawt a.

     "La haw suh! Min lo nghak lawk la, ka thlah dawn che nia," ka bul a rawn thlen rûal chuan a ti sup a.

     "Thlah ka ngai hleinem, keimahin ka kal thei alawm, intibuai duh suh," ka lo hnial thung.

     "Min hnial ziah teh suh! Ka thlah i duh lo hrim hrim a nih loh chuan zanin chu thlah ngei che ka tum," a ti leh nghat a."Tikhan lo awm la, ka han inthlak lawk ang a, kan kal nghal dawn nia."

     Hnial duh ta bik lovin ṭhutthleng lo awm hmasa berah chuan ka ṭhu ta at a, ani pawh a room lamah inthlak tur chuan a chho ta nghal bawk.

     A rawn chhuk leh chuan kal nghal mai inpeih atin ka lo ding vat a, kal mai ka tum chu thil hriatchhuah ka neih avangin ka tawp leh chawt a.

     "Chaw i ei phawt dawn lo em ni?" amah en pah chuan ka ti a.

     "Dawn lo, ka va thlah phawt ang che."

     "I duh chuan ei phawt la, ka va siamsak ang che aw? Ka hmanhmawh miah lo a nia.."

     Ka haw hma emaw hma lo emaw ka tawrh tur a thuhmun reng tho a, ka haw hmâ a nih pawhin ánkhum ka pumpelh chuang lo a, ka hmanhmawh duh lui ve deuh hrim hrim a, eng anga nasa pawhin min  hau dawn mah se tuar turin ka inpeih ve tlat! Ka tân thil thar a ni lo a, ka hriat ngai loh thil a ni hek lo, han hlauh thar vak a ngaihna ka hre lem lo.

     "I hmanhmawh loh chuan thingpui lum la, in dun phawt ang hming," a ti sup a, lu buk nghat pahin choka lam pan chuan ka kal ta nghal a.

     Thingpui tur ka chhuan vel laii chuan chokâah rawn lut ve-in min hlat deuhah chuan kekawr ipate zenin a lo ding vung a, min en reng tih ka hre naa hre lo ang hmiahin ka awm thung.

     Ka thil chhuan a so a, no-a ka thlit chhuah lâi chuan ka hnungah rawn dingin ka kâwngah a rawn kuah a, ka thiltih lâi chu ka tawp chiang kher mai! Ka khawng nghal lah a, ka thinphu rang lutuk chu a rawn pawk chhuak nawlh ang tih hlauhawm khawpin a nasa nia!

     Ka thil ken lâi chu min dahsakin ka kawngah a kuah zui leh nghal zat a, ka thaw mumal lo lutuk inthunun chu ka theih ang angin ka inthunun a. Ka nghâwng a rawn thawk khum lum ham ham a, ka zamna a nasa tawlh tawlh thung.

     "Eng vanga min hlat lui tlat mai nge maw i nih le? Eng vangin nge ka lak aṭang hian pawh theih miah loha i inlakhran tlat?"

     Engtia chhan tur nge ka hre lo a, chhan dan tur hria pawh ni ila ka ṭawngchhuak thei kherin ka ring lo.

     A lam hawiin min kuai her a, ka khabe-ah dawmin amah en turin min kuai dak a, a hmêlṭha ser sawr tak mai chu ka hmu chiang kher mai. Rawn kunhniamin ka hmuiah a rawn fawp chat a, a hmuiin ka hmui a sik rûal chiah chuan ka mur chhuak chuai a, ka awmdan chu ka sawifiah phak bak a ni.

     Mipa-in min fawh vawikhatna a ni a, chhanlet dan ka thiam lo. Ka dawh mawl tawp a, uar lehzuala min fawh takah chuan ka hmui chu tiche-in ka thiam ang tawkin ka fawp let ve a.

     Thil hriatchhuah zawk ka neih rualin ka inlahrang nghal a, zawhna zawt mitmenga min en ka hmuh chuan ka aw ka thian kharh a.

     "I bialnu Ruth...."

     Ka sawi zo hman lo, min kuahbet thlawp a, ka hmuiah a kut zungchal a dah hmiah bawk.

     "Ka bialnu ni rawh!"

   
FELICITY 5
Sbk Pachuau



     "Engtin nge chutiang te i sawi theih zawk? Bialnu i nei reng si a!" Ka aw chu a khur deuh a.

     "Ka nei reng em ni?"

     "Aw... u Ruthi nen in inngaihzawn reng kha.."

     "Reng lo e, i hresual a nih chu! Tunah hian ka bialnu i ni duh lo a nih chuan bialnu nei lovin ka awm dawn tihna a ni mai a."

     "Dawt sawi suh aw.... hmanni lawkah pawh i roomah in awmdun reng kha!"

     "Thikna aw tel tlata ka hriat chu le!" Ka lak aṭanga a mit la sawn eih lo chuan min si ṭepin a rawn kun hniam a, tlêmin nui hmêl a pu bawk.

     Ka lo eu ve bawk a, awmzia a awm lo hle, amah si chetin min kuahbet leh hmiah a. Min fawh leh tum niawm taka a rawn kun hniam lehzual takah chuan lo dan tumin ka ṭawngchhuak vat a.

     "Englo.... ih....min lo ngaithla lawk..."

     Ka ṭawng laklawh lâi chu ngai pawimawh lo zetin a hmuiin a rawn khar hmiah a, Min kuahbet hnehin kan inlen hleih si a, talchhuah tuma ka beih vena te chu awmze awm miah lo ang a ni.

     Dik tak chuan ami fawhna chu nuam ka ti lutuk! Mahse, ka dinhmun ngaihtuahin inngaihzawnna tûallâiah ani ang chhungkaw khawsa thei lutuk leh doctor ni hîal nena lengdun tur chuan ka inhûam lo a ni. Ngaihzáwng ka la nei ngai lo a, hmangaihna khurah lo tla lut palh ta ila, anin min lo hmangaih ve lovin ngaihzâwng satliah ang lekin min lo en ta se ka na mai mai dawn a, chu chu a thlen ka duh lo a ni.

     Zei taka min fawhna chuan keimahah danglamna, insum theih lohna a siam nasa tial tial a, min kuahbeh hneh êm avangin ka inlahrang thei ngang bawk si lo, ka mang chu a ang ru tak zet a!

     Ka hlauh ang ngeiin zei lutuka min fawhna chuan ka insum theihna chu ṭhiatin engtik lâiin nge ka fawhlet pawh hriat lohin uar fahranin ka lo fawp let ve a, a nghâwngah zen chhovin a tukkhum sam kârah ka kut ka rawlh lut a, ani pawh chuan chutia ka lo fawhlet ve takah chuan a duhthawh sauh a.

     Rei tawk kan infawh hnu chuan kan inthlah ta hram a, a chala ka chal rawn siin thawk a la halh a, kei pawh ka thaw a  mumal bik chuang hauh lo.

     "Thingpui chu ka'n siam tawh ang e, chhuan sat leh phawt a ngai ang, a dai vek tawhin ka ring!" Ka ṭawng chhuah theih veleh ka ti a, ka aw erawh a la mumal lo hle.

     "Thingpui ai chuan i hmui kha tui ka ti zawk daih! Ka la kham lo.." sexy lutuka min melh paha a tih chuan ka zak leh sawi tur hre si lo chuan lei ka lo chhuah khum ringawt a, a nui hawk a.

     "Duhawm reuh lutuk mai! Thingpui chu siam la, chuti a nih loh chuan ka fawp leh duh mai ang che," nui suk pahin a ti a, ka che ta vat a, a nui hak ri ka hre naa ka ngaihsak zui duh lo lui a.

     Thingpui in zawh veleh kan kal ta nghal a, kan in kawt kan thlen chuan chhuk nghal mai tumin motor kawngkhar chu ka hawng a, ka bana a rawn vawn takah chuan ka hawi let a.

     "Ka bialnu i ni tawh tih kha i lo theihnghilh ang e aw! Bialpa dang i neih ka phal dawn miah lo, mipa dang kawm pawh ka phal vak lo a nia!"

     "Ka..englo..thil sawi dun phawt....."

     "Engmah sawi dun a ngai rih lo, tunah chuan inngaizâwng kan ni tawh a, chu chu lo hre reng la a tawk rih," a ti leh sup a.

     "Ka ngaih dan....."

     Ka mit sîrin kan in kawngkâa ka nutei lo ding reng ka hmuh takah chuan sawi zawm lovin ka tawp ta daih a, min dan leh hma-in motor aṭang chuan chhuakin kawngkhar ka khar rual chuan ka mangṭha sawk sawk a, mjn chhanna pawh nghak lovin in chhûng lam ka pansan ta nghal daih a.

     "I tlangvalpa chu kan kawtkai thleng thlengin i rawn inthlahtîr ngam ta a ni maw? I va huaisár sáwt ve le! Nilêngin in lam ngaihtuah lêk lovin i vak kual a, tihian inthlahrunna nei miah lovin tjim hnu-ah i rawn haw ta fo mai, isim vat dawn a nih loh chuan kan hnena awm reng hi inbeisei hauh suh ang che."

     Inthlakna tur ka lakchhuah lâi chuan ka nutei chu roomah lo lutin min ankhum nghal bawrh bawrh a, lo hnial emaw lo insawifiah emaw awmzia a awm lo tih ka hriat avangin chhan enah ka en lo a, ngâwi rengin ka ngaithla tawp mai a ni.

     Zan mutnaah chuan ka chunga thil thleng chu ka ngaihtuah neih neuh a, ka mipa duh hmasa ber leh fawh hmasak ber a ni a, ka thinlung chhûngril aṭanga mipa ka vei awmchhun a ni bawk. Hlim taka awm tur ka nih laiin ka dinhmun ka thlirin hlim har ka ti a, kan khawsak a inan loh chu thuhran ni se ani ang tlangval hmelṭha leh hna ṭha tawk tak thawk tan chuan ka té chem chemin ka hria a. Ka duhna dahṭhaa ka dinhmun avang tal pawha hlat ka ngai a, ka hnaih rei poh leh a tawpa ka natna a nasa dawn a ni mai a, tuna kan la kal thui hmaa ka thlah thei a nih chuan ka tan bawk a ṭha dawn niin ka hria a ni. Kan in chhûng inrelbawl dan hre ngat phei se chuan ka iaiawmzia a hre nghal vek ang a, an khawsak milpui nula nalh tak tak an tam laia kei ang chhungte mumal pawh nei lo hi nupui atan min duhin ka ring mawlh lo a ni.

     Nu Mawii a dam ṭhat loh êm avangin a chawl rih a, tlai lam eirawng ka bawl zawhah engkim ka tihfel vek hnu-in ka haw chauh ṭhin a, in lama ṭawngkam chhe tak taka min ankhumna ngaihthlak reng ai chuan thlamûang deuha nu Mapuii te bula ka hun tam zawk hman chu nuam ka ti bawk a, hmanhmawh hauh lovin ka haw ṭhin.

     Pekhlû-a chu tlaiah a clinic lamah hun a hmang tam bawk nen ka duh ang ngeiin kan inhmu khat viau mai. Kan inhmuh loh rei leh hmuh ka chak ru zek zek lawi si a, ka ngaihtuahna lélo lutuk chu ka inhau ru leh mawlh mawlh ṭhin.

     Tlai khat chu rawng ka bawl zawh tawh lamah a rawn haw hlawl mai a, u Mapuii nen chauh kan lo awmdun a. Chutia ka beisei loh tak maia a rawn haw tak hlawlah chuan ka lo lai ngawt pek a, ka lo ngaih rukzia ka hrechhuak chawpchilh nghal zat bawk.

     "Ka roomah thingpui min lo pe mai teh aw Kimte," tiin a room lam panin a chho nghal vut a.

     "A eng chu a hria ni maw, a rooma thingpui in hi a ti ngai miah lo asin le! Kimte, han tlawmngâi lawk mai ta che," nu Mapuii'n a tih chuan thingpui chu siamin huphurh ru tak chung chuan a room lam panin ka châwi chho ta nghal a.

     A room chhûng ka luh chuan a khum bulah dingin a kawr a lo hlip mek a, side  table chu kawk zauhin thingpui chu dah turin min mitmei a. Ka dah hnu chuan kal leh mai tumin ka inher a, ka pen ṭan chiah tihin banah rawn manin a lamah min hnuk hnai a, ka kawngah min kuahbet nghal hmak bawk.

     "Ka lo haw hma chhan hi min zawt dawn lo em ni?" Ka beng bulah a rawn phun sup a.

     "Aw...ka..... Eng nge i lo haw hma chhan chu?" ka ṭawng bah nawk chu ka inhaw ru viau mai.

     "Ka ngâi che a!"

     Teh tawp chuan! Min rawn fawh takah chuan ka lo chhâng let rang kher mai, duhthawh fahranin kan infawp dun tawn tawn a, kan inthlah meuh chuan kan thaw a rang dun hle. Ka lungphu ri chu a hre phak hîalin ka ring a, ani pawh a mumal lo ve thovin ka lungphu ri nen chuan a inrawn tluk tlukin ka hria a.

     Nu Mapuii'n rei min tih ka hlauh avangin chhuk ka duh tih ka sawi a, ngai pawimawh lo fahranin a khum bula ṭhutthlengah chuan min ṭhutpui a, min kuah a, amah si chétin min ṭhuttïr a.

     "Clinic-ah ka let leh a ngâi, i lo haw hman ka hlau si a, ka lo haw lawk a nih hi! Thingpui ka in zo ang a, kan chhukthla dun dawn nia."

     "Ka rei lutuk chuan nu Mapuii'n a hrethiam ang e aw!" hlauthawng taka ka tih chuan a lo nui mai a.

     "Hrethiam se a pawi em ni? A la hriat tur tho a nia...."

     "Ka duh teuh lo! Midang hriat ka duh miah lo  a nia aw, ka duh lo tak tak!" Uar fahranin ka ti a.

    "Duh lo mah la an hriat hun a la awm dawn tho si a!"

     "Tunah chuan tûma hriat ka la duh rih lo, a bak chu ka hre tawh bik lo le!"

     Min fawp leh zauh a, thingpui chu tlak pawpin min kaitho a, khuma a T-shirt awm chu la-in room aṭang chuan min chhuahpui ta nghal a. Inhnuai panna stepah chuan ka kut a kaih chu laksawn ka tum a, a hum nghet sauh a. Ka kut lehlama tray ka chawi avangin ka ṭang na thei bawk si lo, midangin min hmu ang tih hlauvin laksawn tum chuan ka pawt leh a, min la thlah duh chuang lo!

     "I nute'n min hmu ang e aw, ka duh lo ka tih tawh kha," zawi sapin ka ti a.

     "Eng vanga midang hriat hlau vîau nge i nih ka hre lo naa ka zawt rih lovang che, remchâng hmasaah min hrilh ngei erawh ka beisei dawn a nia!" tiin ka kut a vawn chu a thlah ta nghal a.

     Chokâah chuan nu Mapuii a lo awm tawh lo a, ka thaw huai mai!

      Min thlah nghal a tum avangin nu Mapuii ka zawng a, pangpâr tui a lo pe mêk a, Pekhlû-a rûala haw a rem em tih ka zawh chuan a lo phal hle a, ka inpeih fel hnu chuan kan chhuak ta nghal a.

     Kan in kawtah indahtîr tawh lovin kan in pëngah ka dintîr a, a tlai deuh tawh avangin ani pawh chuan min hnial lovin a ding ve mai a. Kal hmasa tura min tih chuan amah zawk chu kal phawt turin ka hrilh a, a hmanhmawh ve deuh tawh vang nge ni a tlan ve mai bawk a, a tlan liam hnu chuan muangchângin in lam panin ka kal ve ta nghal a.

      Ka nun chu a ngaiin a kal chho bek bek a, Pekhlû-a lakah ka duh aiin rilru ka pe thuk tulh tulh thung. IGNOU-ah ka in-admit fel tawh a, an phal dawn chuang lo tih ka hriat avangin ka chhûngte ka hrilh buai lo law law a, an hrechhuak palh ta hlauh a niha ka tawrh tur pawh ka hrechiang viau bawk.

     Zankhat ka mû chu thawm eng emaw-in min tiharh a, a reh leh tak daih avangin muthilh leh mai tumin ka mit ka chhîng a. Ka muhil leh ṭep tihin ka roomah chuan awm ve dang an awm ni tlata hriatna ka nei a, ka mengchhuak nghal vat a.

     Ka khum bula ka nutei pasal lo ding run ka hmuh chuan ka phu chiang kher mai! Ka tho nghal vat a, ka puan sina intuam ṭha pahin inralring takin ka khum sîr lehlamah chuan ka ding ran a.

     Ka khumah chuan lawnin min rawn bawh phei rawp a, ka lo tawlhsawn ve vat naa min rawn man fuh hman tlat mai! Ka hlau lutuk chu mu leh mal nei lovin ka tal chîam a, a ṭanhmun a la siamrem hman bik loh avangin min vawn behna chu a nghet lutuk lo hlauh a, talchhuakin theih anga rangin room pâwnah ka tlanchhuak ta nghal a.

     Min umzui vat a, choka lamah tlan pheiin bathroomah ka tlanlut vat a, ka inkalh khum ta hmiah a. A peih chen chen min nghak se pawi ka ti lo, bathroom chhûnga riah mai inring ranin ka awm a, bengchheng a siam ngam dawn lo tih ka hrechiang bawk a, ka chhuah loh chuan min tibuai thei dawn chuang lo a, ngaihṭha takin ka awm thei tal a, a zia hle a ni.

     Eng emaw chen ka awm hnu chuan ka nutei ṭawng ri ka hre ta hlauh a, a aw ka hriat vanga ka lawm ber ṭum a la ni hïal ang chu! Ka chhuak vat a, pa Rama an rooma a lut tur chiah chu ka va hmu hman a, ka nutei erawh mitmeng nelawm fahran lova min melh hnu-ah muangchângin a kalsawn ve ta chauh a. Tun ṭum chu min ankhum hrep mah se ngaihthlak ka inhuam tehlul nen engmah sawi lovin a kal ve teh mial a, thil mak a tling hialin ka hria a.

     Ka room kawngkhar chu uluk zetin ka kalh a, hruiin ka phuar ṭuk bawk. Mahni inah, mahni khumah ngei pawh ralmûang lo zetin ka awm chu a ni si a, ka innngaihtuah lungchhe thut a, ka puan sina ka hmai hupin ka ṭap ta hlawp hlawp a, Pekhlû-a ka ngâi tak zet a ni.

     Chuti khawpa buai leh hlauthawng reng renga hun ka hman vang chu nge ni ka thil ei a tui lovin ka muhil tlem ṭhin hle a, ka landan pawh a duhawm lo viau-in ka ring!

     Nu Mapuii'n nu Mawii damdawiina a kalpui dawn ṭumin kal ve tura min sawm avangin ka kal ve a, Pekhlû-a thawhna hmun a nih avangin hmuh inring ru takin ka awm a, ka hmuh tak chiah erawh chuan hmu lo law law zawk ila ka ti hnuhnawh kher mai!

     Ruthi nen chuan insi rîalin an rawn kal dun a, a dan pangngaitê-in a bânah a kuah leh chiah bawk! Min hmuh rûal chuan a mitmengah danglam zawk awmin ka hria a, a rei loh êm avangin ka hmu sual a nih ka ring ta zawk a.
 
     Ka thil hmuh avang chuan ka tawt up up a, mualpho mai ka hlauh avangin zunchhuak chhuanlamin ka kalsawn ta daih a, ka ṭah chhuak lutuk chu insûm harsa ka ti kher mai. Engtin nge khatiang lutuka awlsam khan ka lo inbumtîr theih le! Ruthi te ang nula nalh leh chhelo lutuk an awm reng lâiin kei an ina chhiahhlawh ve mai hi min duh tak tak lovang tih te chu lo hre ve awm tak ka ni asin le! Ka mittui tla tur chu duh lovin ka khap sawk a, ka thil tihsual rah chu mittui tel lova hmachhawn theih ngei ka duh a ni.

     Zun in aṭanga ka chhuak chiah chu ka phu nasa kher mai! Kawngkhar si lo chauhin Pekhlû-a chu a lo ding run a, ka kalna tur dala a din tlat avangin ka chhuak thei mai lo a.

     "Khawngaihin lo awm sawn deuh la, ka lo kal lawk ang chu!" Ka theih anga nasaa ka aw thunun chung chuan ka ṭawng a.

     A chetsawn rûal chuan ka chhuak vat a, a inrin hma-in chak tawkin ka kal ta daih a, ka hnungah a rawn kal ve tih ka hre naa hawilet miah lovin ka kal hmawk hmawk a.

     Nu Mapuii te awmna ka thlen leh chuan doctor hmu turin an lo lut dawn chiah a, Pekhlû-a chu a rawn thlen ve chawpchilh nghal mai avangin luh ve mai chu ka duh rum rum a, thil tihchi a ni meuhin ka hre bawk si lo. Nu Mapuii'n doctor hmuhpui tura a sawm tak hlauhah chuan ka lo thaw huai a.

     Keimahin ka lo nghak ta ran a, an rei phian lehnghal. An lo chhuah chuan kal mai inpeihin ka lo ding vat a.

     "Nu, Kimtei hian damdawi chu ka roomah rawn la lawk mai rawh se, ka lo hawn theihnghilh palh takin a buaithlak ang," Pekhlû-a'n a tih chuan ka lo hawisawn hmak a. Eng damdawi pawh chu lo ni ta se ani rooma lo va lak kha ka duh lo hrim hrim.

     "Kimte, nu Mawii ei tura a chawh pakhat hi Mama hian physician's sample a kawl a, va  la lawk mai ta che, motor awmnaah muang chângin kan lo va kal ang e," a tih takah chuan hnial theih ni ta hek lo chák lo tak chungin Pekhlû-a hnungah chuan ka zui a.

     A room kan luh rûal chuan ka lam hawiin min melh run run a, min khawih tuma a bân rawn phar chhuak chu ka lo vai kiang lawp a.

     "Min khawih hlek suh!" thinur rilru tawt ṭûn chungin ka vin ṭhawt a, mak tih hmel zetin min melh a.


FELICITY 6
Sbk Pachuau



     Min pan hnai a, kei ka lo tawlh hnung thung. Tawlhsawnna tur a awm tak lohah chuan ka ding a, hnai fahranah ka taksa si chétin min dinchilh a, ka lo ṭang ru ṭeuh a.

     "Eng vanga hetia awm hi nge i nih?" a ti sup a.

     "Eng vanga hetia awm hi nge ka nih?" Ngeiawm zetin ka lo tilet salh a.

     "Sawi rawh...."

     "Ka sawi kher a ngaih ka hre lo e!"

     "I sawi lohin ka hre ve hleinem."

     "I hre lo maw?" Ka aw-ah chuan ka awih miah lo a ni tih a hrethiam ngeiin ka ring!

     "Aw, hre lo, ka hre miah lo! I lungawi lo tih chiah ka hria, a chhan erawh ka hre lo a nih hi!" A mitmeng chu a hma aiin a rum ta deuh.

     "Kei hi i eng nge ka nih chiah?"

     "Nang hi maw!?" Mak ti hmêl pû-in min en a.

     "Aw, keimah hi.."

     "Ka bialnu maw le!"

     Za miah si lovin ka nuichhuak hawk a, thil tihsual nei miah lo ang maia chutia mahni inring tawk tak maia a la ṭawng thei chu mak ka ti tak zet a ni.

     "Ni lo e, kei chu i bialnu ka ni hauh lo! I bialnu chu nichina taksa insi renga i rawn kalpui Ruthi kha a ni. Kei chu in ina a ṭul ṭul thawk tura in chhawr mai mai chauh ka ni e!" Pangngai thei ang bera ṭawng ka tum viau nachungin ka aw chu a khur nasa hle.

    "A tawk! Khawi aṭangin nge khatiang ngaihdan kha i rawn chharchhuah le? Bialnu pakhat chauh ka nei a, chu chu nangmah hi i ni."

     "I bialnu ni miah lo nen khati khawpa inhnaiha awm kha engtin nge i theih zawk? A kuah che a, nangin pawi ti miah lovin a tih dan ang ang che khan i lo dawh tawp zel tihna em ni?" Ka mittui tla tur chu duh lovin ka khap sak sak a.

     "Kimte, pawi ka ti lutuk! Ka thiam loh a ni e, ka tân eng mah a nih tawh loh avangin ka lo la thutak vak lo atin ni! Tun hnu-ah a thleng nawn tawh lovang," tih pahin min kuah a, ka lu-ah a khabe nghatin thawk a la ham ham a.

     "Ka dinhmun i hrechiang a, ka tân a hrehawm turzia erawh i hre pha thung si lo, kan dinhmun inthlauhzia hi i rin aiin a nasâ ang! A tirah pawh khan sawi ka duh tawh a, sawina hun a awm thei si lo a, i bialnu ni tlak ka ni lo. In khawsak milpui ngaizâwng la, i hlim zawk ang," ka ti sap a, ṭap mai lo turin ka insûm nasa hle.

     "Dinhmun lam ka en lo, ka bialnu i ni hi ka lungâwi tawk. Mahni insit leh a ni lo zâwnga thil ngaihtuah kha bansan la, hlim takin awm ang." A ṭawng chu a ring lo naa a chiang khawp mai.

     "I ngaih dan ang ngawt kha a ni thei lo....."

     "Ni lo, min hnial lo teh, a tawk rih e! Tun atân chuan ka duh che a ni tih hi pawm tawp la, rilru hah lo khan lo awm phawt rawh."

     "Ka thei...."

     Ka khabe-ah dawmin min kuai dak a, rawn kunhniamin a hmui chuan ka hmui a rawn bawhthuah hmak a. A lak aṭanga inlakhran ka tumna kha minute nga pawh a la ral hman lovang tihah chuan thlahlel êm êmin ka fawp let leh der nia!

     Nu Mawii damdawi(Vitamin) tur chu la-in kan pahnih bawk chuan nu Mapuiite min lo nghahna lam pan chuan kan kal dun a, rei min lo tih tawh ka rin avangin ka kal deuh hlawk hlawk a, nuihza hmel pu chungin min zui ve zel mai bawk a. Motor dahna kan thlen chuan ka lo rin dan ang chiahin nu Mapuii chuan a rin aia kan rei thu a lo sawi a, Pekhlû-a chuan chhuanlam eng emaw siamin a sawifel then a, ka lo thaw huai mai.

     Nu Mapuii te chuan IGNOU-ah ka in-admit tih an hre vek a, inrinni class kal nî chuan min hrethiamin an inah chuan class banah chauh kal turin min hrilh a, ka lawm kher mai! Kan in lamah chuan ka zirlaibu an hmuh ka hlauh avangin ka steel almirah-ah ka thukru vek a, mu tura ka luha ka room kawngkhar ka kalh fel vek hnu-ah ka la chhuak ngam chauh ṭhin. Ka zir zawh hnu-in ka dah lut leh vek a, ka kalh hnan leh thlap zel a, an hmuh lohna turin ka fîmkhur hle a ni.

     Nikhat ka class bâng chu kawngpuia Pekhlû-a, a motor nghenga lo ding chu ka hmu a, mak ti taka ka en reng lai chuan ka lam chu rawn hawiin a nui suk a, min hui zauh a. A bul ka thlen chuan a car kawngkhar chu hawngin lut turin min ti a, zawhna zawt mitmenga ka va en chuan a lu bu nghatin lut mai turin min hrilh a, thu awih tak chuan ka lut ve mai a, a haw dawn avanga min phur haw ve nghalah ka ngai hmiah.

     Kan ti ti mawlh mawlh a, eng emaw chen kan tlan hnu-ah an in lam panin a tlan lo a ni tih ka hre ta chiah a!

     "Khawnge kan kal dawn? Khawihah nge min hruai i tum?" Ka ti hliai a.

     "Lêng lawk ang," tih pahin a phone-ah chuan mi a call nghal a.

     "Ka lêng hman ve hleinem, tihtur ka..."

     "Shhh..."

     Ka sawi zawh hma-in min lo khap a, a phone tumin a lo chhâng ni ngei turin a ni a biak chhunzawm zat a.

     "Vawiin tlai kha inentîr tur lo ziak tlem deuh mai rawh aw, kalna tur pawimawh ka nei a, ka en tam hman lovang. Ka ṭhut hun pangngai aia tlaiah ka ṭhu dawn tih kha lo aawi zel bawk la."

     A biak zawh chuan midang a call leh nghal zat a.

     "Nu, Kimtei ka hmu remchâng a, ka  rawn thlah haw dawn a. Mahse, kalna tur pawimawh ka nei a, ka hruai lawk ang a, ka rawn hawpui ang, a lo thleng tlai deuh dawn a nih chu aw.." a ti zung zung a.

     Aizawl hmar lamah tlan zelin hmun fianrial leh thengthaw nuam zet kan thlen chuan a ding ta a, a din fel hnu chuan ka chhuk vat a, hmalama ṭhutna tur an siam lam pan chuan ka kal nghal a. Thingkung nghengin ṭhutna tur chu an siam a, thlifîm a thaw heuh heuh a, a boruak chu a dai nuamin thawm bengchheng hriat tur a awm bawk si lo, a nuam tak zet a ni!

     Ṭhutthlenga ṭhu ta mai lo chuan ka hawikual rûai a, khawthlirna atan a remchâng lehzel chuan a tinuam zual a, kan in aṭanga hmun hnai tak chu ni se ka kal fo ngei ang le!

     Ka taksa thlâwp zaiha rawn dingin hnunglam aṭang chuan min rawn kuah a, min kuahna kut chu ka lo vuan ve nghal vat a. A rim pa leh tui zet mai chu ka hîp vang vang a, nghet lehzuala min kuahin kunhniamin ka bîangah chuan a  rawn fawp zauh a.

     "Inhmuhna hun kan nei lo lutuk a, hunawl insiam chawpin tihian i phalna pawh la hmasa lovin ka hruai tawp che a nih hi!"

     A ṭawng zâwng chuan a âwm chu a che dat dat a, ṭawngkâa chhâng lovin ka lû chu ka bu nghat a, ka lo ngheng hnai sauh bawk. Eng emaw chen chutia kan din hnu chuan min kuahna thlahin a lam hawi turin min kuai her a, a lam ka hawi fel hman chiah tihin ka khabe-ah dawm kangin min fawp a, kei pawhin ka lo chhânglet ve nghal thuai a.

     Duhthawh zetin kan infawp a, ka taksa chûl kûala ka âwm lama a kut a rawn vah kualtïr takah chuan tawp a hun tih hria-in a kut manbetin ka inlahrang ta vat a. Ani pawh chuan min tilui bik lovin ṭhutna lamah chuan min kai phei a, insi rialin kan ṭhu dun a.

     Thil eng eng emaw sawiin ka ti ti melh melh a, a khât tawkin kan infawp leh ṭhin bawk, kan inkham thei lo tawn a ni ber e.

     "Ka dinhmun ka ngaihtuah hian ka insit zual ṭhin, i nihna leh kei ang bialnu neih hi a inhmeh lo ka ti!" Zawi sapa ka tih chuan ka kut a vawnna chu a hmer na sauh a.

     "Mahni inhmuhniam zawngin engmah ngaihtuah tawh lo turin ka tih che kha! I nihna ang hian ka duh che a, mipa-in hmeichhia a duh theihna sâng ber angin ka duh bawk che. I thil ngaihtuah dan kha ka duh lo, bansan hmak rawh!"A aw chu a chang lam hret a ni.

     "I thlir dan leh ka thlir dan a inang lo..."

     "Sawi tawh lovang. A ṭul ta viau a nih chuan kan sawi leh zawk dawn nia, tunah chuan tihian hlim takin awm rih ang. Inhnial buai leh a lungchhiatthlak zâwnga thil ngaihtuah turin helâi hmunah hian ka hruai lo che a, kan hun neih chhun hi am taka hman ka duh," a ti leh sup sup a.

     Inthlahlel tawn taka infawpin kan inthlah hlei thei lo a ni ber a, ka duhna zual zel hi ka thunun phak bak a ni a, ka ngaihtuahna a luahkhat reng mai pawh hi ka tân chuan manganthlak tham a ni.

     A duhthawh sawtin a thaw pawh a pangngai lo ta hle a, kei pawh eng rüai ka ni bik lo. Ka hnute a rawn ṭham takah chuan a kut chu vuanin dan ka tum a, zei lutuk tak maia min fawhna leh a huhâng chuan ka chakna zawng zawng a la bo ta vek ni mai awm hian a kut chu ka dang zo lo, min tawhna avang chuan ka danglam hneh kher mai! Nidanga ka insum theih ṭhinna khan min kalsan ta nge ni ka inthunun hlei thei lo chu a ni e.

     Ani pawh a awmdanah a pangngai tawh bik lo tih a hriat mai a, ka khabe-ah fawpin ka ir lamah a fawp thla zel a, ka âwma a fawhkual vel lâi chuan ka tum lawk ni hauh lovin ka rumchhuak hawk a.

     Ka chhia leh ṭha hriatna tlem la awmin kan awmdan chu tihtawp a hun tih min hriattir takah chuan inngaihtuah harhin tlêmin Pekhlû-a chu ka nemsawn deuh a, duhtawk a hun tih chu zawi sapin ka sawi a, mitmeng sî sapa min melh vang vang hnu chuan a awmdan siam remin a ṭhu ṭha ta nghal a, min kuahbet leh hmiah bawk.

     Rin aiin khua a tlai chak a, la kham lo tak chung chuan kan haw ta a, an in kan thlen chuan a tlai tawh vïau mai a, nu Mapuii te lakah ka inthlahrung ru hle a. Mahse, a hma ang bawkin Pekhlü-a chuan a sawifel leh hmiah a, ka awm chu tlêmin a nawm phah leh ta deuh.

     Nu Mapuii'n eirawng a lo bâwl zo thuak tawh a, nu Mawii pawh tlêma a zia chhoh takah chuan a lo kal ve leh tawh bawk a, tar deuh tawh mah se a damṭhat chuan a la ṭangkâi hle a ni.

     Pekhlû-a a clinic-ah a let leh nghal a, kei pawh tih tur ṭul zual ka tih zawh hnu chuan ka haw ve ta thuai a. An fapa nen kan inngâizâwng tih hre ta se nu Mapuiite nupa hian eng angin nge an ngaih ang tih chu ka ngaihtuah neuh neuh a, an fapa tan chuan min íai hle-in ka ring.

     Assignment kan ngah ṭhin avangin ka meng rei ṭhin hle a, pa Rama hi tunlâi tak chu min beisei nep ta deuhin ka hria a, zan reia ka rooma a rawn luh hlau tho mah ila a awmdan a thlak ve deuh avang chuan ka hlauthawng lutuk lem lo thung.

     Âtei leh Jerry chu lo len leh zauh an chïng a, kan in lamah inlêng ka neih duh vak loh avangin chhun lama ka hnathawhna hmuna an lo lêng chu pawi ka ti lem lo a. Nu Mapuii lakah inthlahrunna tur a awm lem lo bawk a, an lo len ṭum chuan hlim takin kan nui bawk bawk zel a.

     Âtei u fanu birthday lawmnaa min sawm avangin ka kal ve a. Nu Mapuii leh Âtei nu hi ṭhian inkawmngeih tak an nih avangin anni chu an chhüng kal a, Pekhlua pawh a clinic aṭangin chaw ei hmana rawn kal a tum a ni awm e! Ṭhian inkawm satliah an ni lo a, Âte-i nu-in a pa a neih dawn hian a pahrawnin engmah a buaipui duh lo a, nu Mapuiite in aṭang hian pasal chu neiin pa Malsawma'n engkim a buaipui vek ni awm tak a ni.

     Naute birthday lawmnaah chuan mi an sâwm ṭhahnem viau a, Jerry pawh lo kal ve-in kan inzui chawt a. Âte-i a buai deuh avangin chaw eikham hnu chuan varanda thlang lamah Jerry nen chuan kan ṭhu dun a, kan ti ti mai mai a.

     Min en rengtu awm tlata ka hriat avangin ka hawikûal a, varanda kawngkharah chuan dingin Pekhlûa chuan min lo en reng a, ka hmuh veleh thovin ka va pan nghal a.

     "I lo thlenna a rei tawh em? Chaw i la ei lovang tiraw?" Ka zawt nghal a.

     "Ei lo, i ṭhianpa  bulah sawn va ṭhu leh rawh, nuam in la tih hmel em mai!" A ṭawng danah chuan lungawi lohna nei a ang hle.

     "Kan lo ti ti satliah mai mai alawm, nuam han tih viauna chhan tur a awm hleinem. Chaw chu i ei nghal duh em?"

     "Duh e, min lo siamsak ta che," a ti hmuk a.

     Jerry bulah chuan ka kalsan tur thu chu va hrilhin Pekhlû-a chu ka zui ta nghal a. Chaw ei dang an awm tawh loh avangin choka lamah eitur pawh an la lut vek tawh a, choka lamah kan kal tura ka ngaih lâiin pawn lam panin a kal ta nul nul si a, a ngaihna hre lo zetin ka um chhuak ve nghal a.

     Khua a thim tawh avangin kawtlai engin a chhun phak bak chu a thim hle a, a motor dahna pawh engin a chhun pha lo a, a dahna hre sa tan lo chuan hmuh mai theih pawh a ni lo.

     A motor bulah chuan dingin a kuangkuah than a, a bulah chuan va ding ve-in engvanga chulai hmuna min kalpui chu nge a nih ka zawt a.

     Min chhâng mai lo a, ṭawng leh ka tum lai tak chuan ka darah a kut khing hnihin a rawn vuan thut a, a motor ngheng chuan min nawr nawk a. A rawn chet thut avang chuan ka phu zawk a, ka lo inveng hman lo hrim hrim a, min tawh dan ang ang chuan ka awm tawp mai a ni. A chet dan chuan min ṭhawn em avangin ka thin chu a phu hlawp hlawp a, ka hamhaih vek bawk.

     "Kha pa kha tu nge? I tan eng nge a nih?" A thinrim hle ni tur a ni a thaw a rang hle a.

     "Kan ṭhianpa a nih kha..... Ti nge tihian i awm a?" Ka tha chu a khur dar dar a.

     "Ṭhianpa nge bialpa?" A ti ram hmak a.

     "Kan ṭhianpa a ni ka tih chu! Ka bialpa a ni lo..."

     "I bialpa ni lo si eng vanga insi riala lo ṭhu dun nge in nih?" A aw-ah chuan a lungawi lozia a la lang chiang hle.

     "Kan insi rial kher lo! Lo insi ta pawh ni ila eng nge pawi? Ka ṭhian a nia, ka si lo tawp tur tihna em ni?" Ka lungawi tawh bik loh avang chuan ka chhang ve fak a.

     "Aw, si lo tawp ang. Mipa dang i sik hi ka phal lo! A tirah pawh ka sawi vek kha, mipa ṭhian neih pawh ka duh lo."

     "Eng vanga lo duh lo ve ngawt nge i nih? Ṭhian neih chu a pawina a awm em ni?"

     "Mipa ṭhian i neih ka duh lo. A chhan chu maw............ ka thik!"

     Ka nui chhuak hawk a, mipa dang ka ngaihzawn lohzia ma inhrechiang bawk a, a thik chuan ka nuih a tiza tlat pek a. Chutia ka nuih takah chuan a kut pahniha ka biang khuapin ka hmuiah na tawkin a rawn fawp a, chhanlet ngaihna awm lo khawpa na-in a ni min fawh ni!

     Nemsawn ka tum a, min nek bet tlat mai bawk si a, tha-ah ka hneh bawk si lo, ka beidawng chuan a tukkhum samah ṭhamin hnung lamah ka kuai dak lawp a, chumi rual chiah chuan ka hmui a thip zawk a, ka ka chhûng a rawn al nghal pap bawk.

     "I va kawlh reuh ve maw le!"

     "Eng vanga khatia min ti kha nge i nih?" Ka thinrim lutuk chu ka khur dar dar a.

     "Midang nena ka thil neih inṭawm hi ka duh ngai lo. Ka bialnu hi mipa dangin min ṭawm ka duh lo, ka phal bawk hek lo. Khatiang taka mipa dang hnaiha i ṭhu leh a nih chuan engtin nge ka chet ang tih ka sawi lawk thei lo."

      "Ka bialpa a ni lo tih ka sawi tawh chuan duhtawk ve mai la, khatia na taka min siam kher kha a ngai em ni?" Ka lung a la awi lo kher mai.

     Rawn kun hnaiin min fawh a tum a, ka lo thle sawn vat a, ka khabe-ah vuanin hnai set sawtah min en a.

     "A nih leh a na lo chiin aw..." tih pah chuan dam zetin min fawp a, min fawp rei tulh tulh a, a duhthawh telh telh a. Chhanlet phut taka min fawh takah chuan insûm thei lovin ka fawplet ve leh ta nge nge a.


 FELICITY 7
Sbk Pachuau



     Min tawh leh sik hleka ka danglam zel leh a laka ka tuiral sam lutuk chu inthunun ka tum ngial pawhin ka thei ngang si lo a, keimah leh keimah chu ka inhaw lek lek zawk a ni. Tunah pawh khati khawpa thinrim khan min sîam zo chauh a, dam ril raiha min fawhna chuan awlsam tê-in min tituiral leh ta chu a nih hi!

     "Awmze nei lova mipa ka biak hlek pawh i thik zêl dawn a nih chuan mipa hrim hrim ka be ngam tawh dawn em ni? Hmeichhia i biak apîang ka thik ve chuan kan buai vîau dawn a nia!" Ka tih chuan a rum dut a.

     "Inbe satliah leh insi renga ṭhut kha a inang lo, a dang daih! Khatiang êm êma inhnaiha ṭhut kha ka phal lo, tun hnu zêlah pawh...." a ti nghut a.

     "I bialnu hlui nen insi rîala in awmdun ka hmuha ka rilru tur chu tikhan i hrethiam ve tawhin ka ring e! Ka bialpa pawh ni miah lo nen kan ṭhu dun i hmu a, ti khawp khan i thin a rim a nia!"

     Rawn kunhniamin ka hmuiah a rawn fawp zauh a, sawi zawm a duh tawh lo ni ngei tur a ni, "Lut tawh ila," a ti sup a. Ka kutah kaiin in chhûng lam panin min kalpui ta nghal a.

     In chhûng luh dawnah chuan min kaihna chu laksawn ka tum a, a phal ṭhak lo, min vuan nghet sauh zawk a. Tal pít ka tum ngial a, ka hlawhchham chiang hle, engah mah ngai lo ni awm fahranin in chhüngah chuan min kai lut hmiah a.

     Ka hlauh ang ngeiin nu Mapuii'n min rawn hmu ta ngei a, min lo auh takah chuan a nu awmna lamah min kai phei ta nghal a, ka kut a vawnna chu a la thlah duh chuang ṭhak lo nia!

     "Mama, chaw i ei tawh em?" Kan thlen rûal chuan a lo zawt nghal a.
   
     "La ei lo, ka lo thlenna a la rei lo a."

     "I pa nen haw kan lo tum mêk a, tikhan chaw chu va ei la, i ei khamah Kimtei hi i rawn thlah haw mai dawn nia aw!" A fapa-in ka kut a vawn reng chu rawn melh zawkin min nuih sak a, ka zak lutuk chu lai zetin ka lo khi suk a, ka mawl hmel ngawtin ka ring!

     A chaw eilâi pawh chuan ka kalsawn phal lovin a bulah min ṭhuttîr a, keiin a nu bulah pawh ka kut a vawn tlat avang khan ka hau char char thung. Ani lah chuan a ngai pawimawh lo nasâ-in sawi zawm enah pawh a en lo a, a nui liam mai mai a, kei lah ka zah em avangin ka lung a la âwi lo ṭün mai si.
   
     Kan ṭhutna bulah Âtei rawn ṭhu ve-in a rawn ṭawng tak bawrh bawrhah chuan ka lungawi lohna pawh chu ka theihnghilh ve leh ta mai a, Jerrya'n min zawn thu leh min hmuh mai tak si loh vanga a haw tak thu a sawi chuan Pekhlû-a chu ka va melh vat a, rum fahrana min lo melh ka hmuh chuan lei ka chhuah khum zauh a, ka nui zui var var a.

     "Jerry chuan min lo call mai lo a nih chu maw le, a haw-na a rei tawh em?" Pekhlûa en reng chung chuan ka ti salh a.

     "Rei lutuk lo e, ka thlah fel a, hetah hian ka lo kal nghal a ni deuh mai," kan inkâr boruak hre hauh lo chuan a ti sam leh et a.

     Pekhlû-a chaw ei lâi chu a tho thurh a, a kut chu silin a hru hul nghal mawlh mawlh a. Ngâwi rengin a chezia chu ka en reng a, a lungawi lo hle tih ka hmu thei mai a, a lungawi loh chhan ka hriat chian êm avangin ka nuih chu a za ru kher mai.

     Âtei lah chu engmah hre hek lo a ti ti barh barh reng a, Pekhlûa ka ṭhutna lama lo kal pheia ka kuta a rawn vawn takah chuan a ṭawng chu tawpin mak tih hmel zetin kan lam chu a rawn hawi ta reng a.

     "Kal ang!" Bul hmaka Pekhlûa'n a tih chuan ka lo tho sam et a.

     "Pute, Kimtei nen hian in inngaizawng chîang! In inngaizâwng tiraw?" Mak tih hmel fahranin Âtei chuan a zawt a.

     Âtei te unâu hian Pekhlûa te unâu hi an 'pû' vek a, Âtei nu hian pa Malsawma hnen aṭanga pasal a neih miau avangin Pekhlûa te unâu pawhin an û enin farnu angah an pawm ve hmiah mai a ni.

     Ka kut a vawn chu lakthlak pahin, "Teuh lo mai! Kan inkawm ve satliah ringawt alawm.." ka lo ti sawk sawk a.

      "Kan inkawm satliah ringawt a maw!?" Pekhlûa aw chu a chang ṭha hle.

      "A ni lo em ni?" Dak deuh hâa en chungin ka lo ti thung.

     "Aih, ni lo. Inkawm satliah ni lovin kan inngâizâwng!" Min hnaih thei ang berin a rawn kunhniam zui a.

     Âtei lam hawiin ka thlesawn vat a, ka ṭhiannu hmêla makti lutuk hmêl ka hmuh chuan keimahah hlauhthawnna a rawn awm zui a.

     "In va zep thei ve a! Engtin nge kei i ṭhiannu ber pawh min hrilh lova i awm thei zawk le!" A aw-ah chuan mak tihna leh lungawi lohna ri a lang kawp a.

     "Engtin nge i theih zawk? Tumah hriattîr ka la duh lo ka ti a ni lo'm ni?" Thinrim zeta Pekhlûa en chungin ka ti thung a.

      Ka dinhmun enin midang hriata inngaihzawn chu ka duh lo bur a, miin eng angin nge kan inkâr thu an sawi ang tih hriat pawh a ni lova, kan khawsak a inan loh bakah ka nutei te beng a thleng palh hlauh a nih chuan kan in chhûnga ka hrehawm tawrh a belhchhah lovang tih a sawi theih miah loh a ni.

     "I duh dan anga kan kal chuan miin bialpa nei lo emaw an ti che ang a, an lo ngâizâwng ve palh ang che tih ka hlau alawm!" A thil sawi chu ka awih lo hîal zawk, naupang chhia lutuk chuan!

     "Ka inpeih hun min nghak...."

     "Tun hi sawi hun a ni chiah zawk alawm. Âte, i ṭhiannu hi ka bialnu a ni tih i hre tawh a, lo vêng ṭha hle ang che. Jerry-a te ang bulah khan awm tam vak ka phal lo a ni!"  a ti leh hmuk a.

     Za lutuka rawn nui chhuakin Âtei chuan, "Nang hi Jerrya kha i thik chiang lutuk! I va han ho roh tak aw! Jerry te chu kan ṭhian alawm, ṭhian tak tak alawm a nih," a ti a, a nui zui har har a.

     "Ṭhian pawh ni se inhnaih deuha aqmdun kher a ngai lo. Nidangah pawh fïmkhur tawh ang che u," a ti bul hmuk a.

     A awm dan naupangchhia lutuk vang chuan ka thin pawh a rim thei tawh bik lo a, ṭhu chungin Âtei nen chuan za lutukin kan nui dun hawk hawk a, chutia kan ṭhian duna za lutuka kan nuih dun takah chuan ani pawh chu khi ve sukin ka bulah a rawn ṭhu thla ve nghal a.

     Eng emaw chen kan ṭhut khawmuan hnu chuan haw ka duh thu ka sawi a, chokâ aṭanga kan chhuah chuan sitting room lamah inlêng leh naupang nen an lo la ri nak nak hlawm a. Kan haw tur thu Pekhlûa'n Âtei nu leh pate a hrilh zawh chuan kan pathumin kan chhuak ta nghal a. Motor awmna thleng Âtei chuan min thlah a, a awmdanah min chhaih a chak tih ka hria a, remchâng ka siamsak duh miah lo thung.

     Kalkawngah min fawp tura vawikhat a ding tih loh chu kan tlan char char a, kan in kawta a motor luhtîr ka duh loh avangin kan in piah deuhah kan ding a. Rei ngial kan infawh leh hnu chuan kan inthlah ta hram a. Motor aṭanga ka chhuah hnu chuan min ko ri ka hriat avangin ka dak lut leh a.

     "I chhungte laka sawiselna i tawk a nih chuan engmah min hrilh hreh lo la ka duh, engkim min hrilh turin ka beisei dawn che a nia," a ti sup a.

     "Chutiang engmah a awm lo, a awm ta a nih leh ka hrilh dawn che nia," ka lo ti vat a.

     "A ṭha alawm. Mahse, eng emaw thil thleng a awm palh a nih hlauh chuan min hrilh ngei ka phut a nia," ngaihngam zan lo hmel pu chungin a ti a.

     "Aw le," tiin ka kut ka vai zauh a, eng emaw thil dang a sawi leh  hma-in ka kalsan ta a.

****************®

LALPEKHLÛA


     Kimtei an ina a lut lãi chu ka thlîr reng a, a luh fel hnu chuan motor aṭanga chhuakin an in lam pan chuan muangchângin ka kal ta nghal a, pawn lightin a chhun phak lohna lam, sîr lamah chuan an in hnaih thei ang berin ka ding a.

     "Eng angah nge maw i inngaiha heti tak maia i luhlul mai chu le! Inah tih tur a tam êm êm lâiin pawn lamah nuam i tawl a, tihian zan reiah i rawn haw a, pawi sawi lo ang hmiahin inthlahrunna pakhat mah nei lovin in chhûng i rawn lut ngam a nia, min zah lo lutuk hi engtia han tih chi nge maw i nih le! I duh duha i awm khum tur hian kan enkawl lo che asin, i hurkual mai mai chhûng khan in lamah buai takin kan lo awm tih i hre miah lo em ni?"

     Chu hmeichhe rapthlak tak maiin duhtawka Kimtei a ankhum thawm ka hriat chuan ka sa phat a, in chhûnga va tlan luha a thlaváng va hauhsak chu ka chák zek zek a. Mahse, Kimtei tan thil ṭha ber a ni lovang tih ka hlauh avangin ka insûm hram hram a.

     "Ka nute, ka kalna tur chu chiang deuhin ka hrilh che kha, zînga ka ....." Kimtei thil sawi chuan ngaih pawimawh a hlawh lo tih hriat zetin an thiami aw bawk chuan a rawn chhilh leh nghal zat a.

     "Chhuanlam chu i siam nîtin alawm, i sawi ang tak takin i awm ngei em tih pawh kan hre sêng hleinem! Inah i awm hman bawk si lo, i awm chhunah lah i ṭangkaina aiin i ṭangkai lohna a tam zawk bawk si, hetiang renga i awm dawn a nih chuan kan khawsa ho rei thei hauh lovang!"

     Kimtei chuan ngâwi rengin a dawh tih hriat zetin a thawm hriat tur a awm zui ta lo a, chu nu anthiami pawh chu a duhtawkin a inâng thâwl tawh nge ni thu ngaihthlak nuam lo tak tak a sawi leh ṭeuh hnu chuan a reh zui ve ta a. Ka thin chu a so hian a so bulh bulh ni berin ka hria a, a nutei ka huatzia chu turu tak a ni. Thil thui zawk dâwn lo ila chuan in chhûngah chuan lutin Kimtei thlavang ka hauhna lamah kut ka thlak duh hîal ang chu! Inthunun tumin ka kut chu ka hum ngawt ngawt a, Kimtei dinhmun chu uluk lehzuala thlithlai a ṭul tak zet a ni tih chu ka ngaihtuah a, haw veleh ka nu ti ti pui ṭha-in ka hria a, eng emaw chen thawm ngaithlaa ka din leh vang vang hnu-ah pawha reh tak diak avangin haw turin ka motor lam chu ka pan ta a.

      In ka thlen chuan ka nu leh pate chu an lo la meng hlauh a, an roomah chuan lutin biak ka duh thu ka sawi chuan ka pa zawk chuan mak ti hmel a pu deuh a, ka nu erawh a awmdan danglam phah lem lo a, ka thusawi ngaithla turin a inpeih tih erawh chetzia-in a lantir thung.

     Sofaah chuan ka ṭhu a, ka nu pawh ka bulah a rawn ṭhu ve nghal vat a, ka pa erawh chairah a ṭhu thung. Ka aw chu ka thian kharh a, nu leh pate bula ngaihzâwng lam ka la sawi ngai loh vang nge tlêmin ka zam deuh bawk.

     Bul han ṭan mai dan tur ka hriat loh avangin ka ngâwi vang vang a, ka nu chuan ka awm dan chu hrethiamin a lo ṭawngchhuak ta hlauh a.

     "Kimtei chungchâng em ni, Mama?"

     "Aw, ni e!" Mak tiin ka nu ka melh zawk a, a lo nui mai a.

     "Kimtei chu engtin?" ka pa chuan a lo ti sup a.

     "Ka duh a, ani pawhin min duh tho a. Mahse, a dinhmun vangin a inthlahrung tlat a!" Ka ngawi leh vang vang phawt a.

     "Chuan..?" Ka pa chuan a lo ti bauh a.
   
     "Ka nu sawi hi ka lo hriat tawh avangin an in chhûnga dinhmun hriat chian ka duh a, amah ka zawhin engmah a sawi duh si lo. Zanin khan thil mawi lo mah ni se pâwn aṭangin an thawm ka ngaithla a, ka lo hlauhthawn ruk ang chiah chu thil awm dan a lo ni a!" Ka ngâwi leh rih a.

     "Han sawi chiang vat teh, Mama!" Ka nu chuan a lo ti thuai a.

     "Kan lo rin dan aiin a nasa zawk mah a, khati anga nasa khan mihring hi an rilru a lo chhe thei ang tih ka ngaihtuah phak ngai lo," tiin Kimtei a nutei'n a ankhumna ka hriat chin zawng chu ka sawi ta a.

     "A va rapthlák ve! Kimtei chu ka khawngaih êm mai! Engtia tih chi nge ni ang, Paa?" Ka nu chuan a ti a, a aw-ah chuan a khawngaih tak zet tih a hriat theih bawk.

     "Mama, Kimtei chu nupui atân i duh em?" Ka pa'n a tih chuan ka phu deuh zawk a!

     Nupui neih lam ka lo la ngaihtuah ngai miah lo, Kimtei pawh ka duh êm êm chungin nupui tur ang zâwngin ka la ngaihtuah chhin hauh lo! Mahse, nupui nei dawn pawh ni ila Kimtei aia duh leh thlan ka neih ka ring chuang lo a, hmeichhe dang ang lo takin min duhna a tilang huam ngai lo a, ka hmeichhe kawp tawhte ngaihtuahin ka thinlungah hmun a chang thuk bik hle a ni. Ani chu ka umzui a ngai zawk a, min kalsan mai inpeih rengin a awm emaw tih mai tur a ni. Hmeichhe dangte erawh min tihlungawi tum leh inla zei vel reng rengin an hmanhlel a, ka nin ruk châng lah a tam.

     Ruthi kha ka kawp rei ve deuh ber a ni naa ani pawh ka duh em em hran lo a, ka vei zui tak viau pawh ka hre lem lo. Ruthi nen kan inkawp laia Kimtei laka ka rilru pe ta daih kha ka ni a, ka duh tawh lo a ni tih ka chetziaa ka lantîr hnuah pawh hre lo ang hmaka awmin min la bialpa chei zui zel a, Kimtei ka vei tak ngut ngutah khan tlang takin ka duh tawh loh thu hrilhin ka kiansan thei ta hram kha a ni a, chuti chung chuan hun remchang a hmuh phawt chuan ka bulah a awm a, min kuah leh min silova awm hi a la sim hleithei lo chu a ni e.

      "Nupui neih lam chu ka lo la ngaihtuah miah lo a. Mahse, rem in ti a nih chuan neih ka pawiti hauh lo," ka ti a, ka nu thaw huai ri chu ka hre thei a.
   
     "An in chhûng aṭanga lakchhuah dan awlsam ber nia lang chu nupui atâna neih a ni mai! I duh tak tak a nih chuan palâi a rang lamin kan tîr ang a, in sawi anga an sual vîau a nih phei chuan rokhawlhna an lo siam lovang tih a sawi theih hauh loh thung," ka pa chuan a ti leh bauh bauh a.

     Ka nu chuan, "Eng pawh ni se, amah Kimtei nen pawh lo sawi dun ula. I pa rawtna ang chuan a hma lamin palâi kal se, an remtih leh tih loh chu thuhran ni se, a lo rem ta lo a nih pawhin bawhzui dan kan ngaihtuah a ngai dawn tho a. Inneih an phal lo a nih pawhin sawtiang hmuna Kimtei awmtîr reng saw a dik thei lo ang, kan lakchhuah tho tho a ngai ang," a lo ti ve bawk a.

     Mut hmunah chuan Kimtei dinhmun chu ka chhutsak neuh neuh a, khatiang in chhûngah khan zantin a khawsa ṭhin chu a ni tak si a, ka khawngaihna leh a nutei ka huatna chu a inzat reng awm e!  Kan ina a awm chhûngin a hmêlah in lam boruak chambâng hmuh tur a awm ngai lo a, hlim hmêl pu reng chungin midang zîngah a awm a. A hmêlṭha takah chuan chik taka en lotu tan chuan lungngaihna a inphûm tel a ni tih a hriat hauh lo! A bula awm a hahdamthlak a, a awka dam diai leh ṭawngkam felfai tak te chu ngaihthlak a nuam a, midang chhiatna a sawi ka hre ngai lo a, midang a fak erawh ka hre fo thung.

     Ka hmu ngun tial tial a, a hmelṭhatna bakah a mizia chuan min hip telh telh a, ka hriat loh hlanin ka lo thlir leh veng veng ṭhin. Ka thinlungah pawh hmun a chang nasa tial tial a, ka inthup theih loh chin a thlen takah khan chiang takin ka bialnu atana ka duh thu ka hrilh ta kha a ni a. Khatianga ka tih mai loh kha chuan ka mitmei leh awmdanah ka rilru a chhiar fuh thei dawn lo tih ka hrethiam mai a, min phû lo lutuk nia inhria-in ngaihzâwng angin min en ngam dawn lo a ni tih pawh a zia aṭangin ka man thiam vek bawk. A mitmeng chiang taka ka enin min duh ve nia hriatna ka nei a, ka chiang ngam chiah lo a, ka fawh hmasak ber ṭum khan ka rin chu a lo dik a ni tih ka hre chiang chiah thung.

     Palâi tir ta ila, lo phal lo ta se engtia tih nge ṭha ber ang tih chu ka ngaihtuah a. Pasal neih pawh an phal loh chuan hmun danga awm tura hruai chhuah chu a theihin ka ring lo a, a ṭul ta a nih chuan ruk chhuah tawp mai chi niin ka hre ta ber a, ka nu leh pa ngaih dan erawh a nih ka ring chiah lo a. Kawng dang  a awm ta lo  a nih vaih chuan ruk hmiaha kan inneih hma zawng hawtir loh tawp mai chu ka tum ruk dan a ni ta ber a.
   
 
FELICITY 8
Sbk Pachuau



     A tukah chuan Kimtei hmuh ka duh avangin ka lo nghak ru deuh a, muangchânga insiamin zan lama ka nu leh pate nena kan inbiakna kha ka ngaihtuah lét nauh nauh a. A chhan tak sawi tur hriat miah si lohin ka rilru chhûngril a nuam thei lo a, eng emaw thil ṭha lo tak lo thleng tur awm ang maia hriatna ka nei tlat a, a chhan awm ang lah chu ka hre der mai bawk si lo. Kan tum dan angin thil a kal tluang lo ang a, kan palâi tirhte an hlawhchham tak tak dawn a ni ang e tih hlauhthawn ruk vangah ka puh ta ngawt a.

     A hmêl pawr deuh phang ka hmuh chuan zan lamah mut  a hmu ṭha lo hle a ni ang tih ka chîang mai a, a mit tlêma bui deuh chuan a ṭap a ni tih a tilang bawk. Amah kan hriat chinah hetiang hmêl pûa ka vawikhat hmuhna a ni a, ka hriat bak thil dang thleng a awm a ni tih ka ring nghal thlap! Ka room lamah ka kaichho a, a tirah a ṭang deuh naa rei ṭang lovin min zui ta mai a, room kan  luh rûal chuan ka lamah pawthnaiin ka kuah nghal vang vang a, nghet tawkin min kuahlet ve nghal a.

     A taksa chu khur deuhin ka hria a, a hmêl en ka duh vangin ka kuahna tithâwlin a hmël hmuh tumin ka thlek a, ani chuan nghet lehzualin min kuah bet a, a khabe-ah dawma chawi dâk ka tum chuan a ṭang ta tlat a!

     "Kimte, thil thleng a awm em ni?" Ka kut pakhatin a lû-ah ka chûl a.

     "Aih, awm lo e...." A aw chu a láwi deuh a.

     "I hmêl a dik miah lo a nia, nizanah i muhil ṭha lo tih ka hre bawk," ka ti leh a.

     A ngâwi reng a, min kuah nghet sauh bawk. A inhnît ta faih a, insum tum taka thawk a la ri chu ka hre chiang khawp mai!

     "Kimte, i nutei'n a hau leh che em ni?"

     Ka sawi zo hman awrh tihah chuan chhuak êm êmin a rawn inhnît ta hlawp hlawp a, a insûm zo ta ngang lo ni ngei tur a ni a ṭap zui ta hlap hlap a.

     Tun hi ka bula hmeichhia an ṭah vawikhatna a ni lo, ka hnawl tak vanga inlak khawngaihthlak tum taka ṭap ta te pawh an awm, chungho chuan ka rilru an khawih em em hran ngai lo. Kimtei ṭap erawh chuan ka thinlung chhûngril a fan a, a mizia ka hriat chinah midang bula inphawrh ruak mai mai chi a ni lo, ṭah leh lek phei chu a duh hauh lovang tih ka chîang a ni. A dinhmun hrehawm leh thawpikthlak lutuk vangin ka bulah a duh vang ni hauh lovin a kehchhe ta niah ka ngai hmaih a, ka lainat tak zet bawk.

     Ṭawngkâa han hnem dan vak ka hre lo bawk a ngâwi rengin ka kuah tawp a, duhtawkin ṭap se, inṭapthâwl hawk se ka duh a ni. A lungchhe zualpui a reh chuan ka rawmawl pek chuan a inhru mawlh mawlh a, hmai phih a duh tih a sawi chuan bathroomah ka hruai lut a, ka awm ve chu ngaimawh anga a awm lem loh avangin chhuak duh lovin ka nghak a.

     Ka towel pek chu la-in, "Ka lawm e," a ti sap a, a mitah chuan lungngaihna thuk tak inphûm hmu theiin ka inhria a ni. A inhruk zawh chuan ṭhutthlengah ṭhutpuiin ka kuah leh nghal a, ani pawh chuan hnial hauh lovin min lo ngheng nghal hmak a.

      "Sawi rawh le.." a bianga fawhsak zauhin ka ti a.

     "Sawi tur vak a awm lo, ka lo zuau lutuk palh a ni e. I bula ka pangchan venaah min ngaih sak mai rawh," a ti sep sep a.

     Engkim hria anga ka awm a nih loh chuan he nutê reuh hian engmah a sawi ṭha duh dawn hauh lo mai! Tlêma nawr deuh a ngâi dawn tih ka hrethiam mai a,  chuti a nih loh chuan ka inzawt chhuak thei kherin a rinawm loh tlat!

     "Kimte, i sawi hreh chung chu sawi luihtîr che ka tum lo. Mahse, i tawrh reng ka phal tawh lo, i chunga i nutei duh duha a inlek kual vel saw ka remti tawh lo a ni. Saw in chhûng aṭang sawn ka lachhuak dawn che, ka lachhuak ngei ngei ang che!" Ka lungawi lohzia chu ka aw-ah leh ka thusawi dan kalhmangah a hrethiam ngeiin ka ring!

     "Engtin nge min lakchhuah ang?" Min melh hâ a, a bangbo hmel hle bawk.

     "Nupuiah ka nei ang che maw le!"

     "Maw!?"

     Mak a ti tih hriat zetin min en hau mai a, min thlek vang vang hnu chuan a lu a thing ta mát mát a.

     "I a ta em ni? Kei hi i nupuiah min nei ang a maw! Thil theih a ni lo tih chu i hre ve tho-in ka ring e," a ti hliai a.

     "Eng nge a theih lohna chhan? Ka duh che a, min duh ve bawk a, a tawk viau lo em ni?" ka lo ti vat a.

     "Tawk lo, a tawk hauh lo mai. I nupui ni tlak ka ni lo, kan khawsak phung a inan loh bakah fahrah ka nih hi! Chhûngte tih tur mumal pawh nei lo ka nih hi i hre ve tho a ni lo'm ni?" uar fahranin a ti a.

     "I chhûngte ka nei dawn hleinem, nangmah alawm ka neih dawn che. Nu leh pa la neiin unâute pawh nei duah mah la nangmah tho hi a nia ka neih tur che, i chhûngkaw neih danah ka buai lo," ka lo ti ve hmak thung.

     Ka tlai tawh deuh avangin a ṭawng leh tur chu dangin ka tho a, ka kaitho ve nghal bawk a. Kan dinchhuah rual chuan kuahin a hmuiah ka fawhsak a, a hmui fawh nuam zet chu ka fawp kham thei lo a, engtik lâi pawhin ka thlahlel reng mai a ni.

     "Remchâng hmasa berah, a hma thei ang berin palâi ka rawn tîr dawn a, lo inring ang che aw!"

     "Dik tak chuan ka chhûngte'n an rem tih ka ring chiah lo a, an lo remti ta hlauh a nih chuan a lawmawm hle dawn a ni mai. I nupui atana min duh tak tak a nih chuan ka dinhmun engkim  chiang taka i hriat a ṭul dawn a, palâi i rawn tirh hma-in hrilh che ka duh a...." a ti niah niah a.

     "Naktuk tlaiah haw lovin min lo nghak la, theih anga hmain lo haw ka tum ang a, kan sawidun dawn nia," tiin room aṭang chuan ka chhuahpui a, inhnuai lamah kan chhukthla ta nghal a.

     Ka nu-in min lo hmuh chuan a mitmeiin Kimtei chu inneih chungchâng ka sawipui tawh em tih min lo zawt a, ka lu ka buk khum zauh a hmuh chuan min nuih sak a, Kimtei lam chu hawiin a be zui nghal zat a.

     Nilêngin ka rilru-ah ka hun tawn mêk chu a awm a, ka neih chhan tur chu eng pawh lo ni ta se Kimtei ka nupui tur anga ka ngaihtuah chuan ka hlim ru veng veng a, hmabak erawh a ko hle-in ka hre thung.

 **************®

KIMTEI


     Ka nuna thil thleng mêk chu ka ngaihtuah chian poh leh mak ka ti a, ka mumang a nih te ka ring hial zawk a! Pekhlû-a'n nupui atana min neih duh thu a sawi khan mak ka ti hle a, mak tihzia pawh ka thup thei lo hial a nih kha!

     A hma zanin khati khawp khan ka nutei ankhum ka tawk a, mut hnu-ah min kaitho lehin IGNOU-a admission ka tih kha engtin nge an hriat tehreng ni ṭawngkam chhe tinrengin min ankhum leh bawk a. Nu Mapuiite hnen aṭanga ka hlawh lak chhun min laksak ṭhin bakah an tih duh loh leh tih peih lo engkim ka ti vek a. Zîng leh zanah inchhung tihfai, insuk leh eng eng emaw tiin ka buai a, ka hlawh min laksak bawk a, ka lakah lungawina an hmu chuang lo. Ka hlawh min laksak ṭhin avangin khawia pawisa-in nge admission ka tih min zawt a, ka hlawh lak aṭangin tlem tlemin ka inkhawl ve a ni tih chu hriattir kher ka duh loh avangin chhang lovin ka ngâwi reng a.

     Chutia ka pawisa neihna ka hrilh duh loh vang chuan ka nutei chu a thinrim zuah sauh a, ṭawngkam chhe tawk tawka min ankhumin kut hîal min thlak a, ka rilru na hle mah se a hmuh laia mittui tihtlak chu ka tum hauh lo. An nupaa ka room an chhuahsan hnu pawh chuan ka la ṭap mai lo, rei fê ka ṭhut ngaia ka ṭhut hnu-ah ka khumah chuan bawkin ka ṭap ta hlawp hlawp a.

     Chu mi zan chu ka muhil lo chiang kher mai! Ka pi kha la dam se hetiang em ema tihduhdah hi ka tawk bik hauhin ka ring lo a, ka pi chu ka ngâi zual hle a, ka ṭap zankhua a ni ber mai.

     Zîngah chuan rawngbawl zawhah zan lama ka suk hman tak loh an thawmhnaw bal vawmkhawm chu ka su leh vek a, ka zar zawh chuan ka insiam nghal a, chaw pawh ei lovin ngâwi rengin nu Mapuiite in lam panin ka chhuak ta daih a.

     Pekhlûa a hnaa kal lova ina lo la awm ka hmuh chuan mak ka ti hle a, ka intûaihnûm lem si lova, zanah muhil lovin ka tlaivâr ṭhak bawk si a, ka lang pawr vîau-in ka ring a. Mahse, ka landan ngâipawimawh lovin a room lamah min hruai chho a, duat taka min kuah chuan ka rilru no a chhuak a, insum ka tum viau naa insûm zo lovin ka ṭapchhuak ta nge nge a. Dawhthei takin ka ṭah chhûng zawng min nghak a, ka pangngai hnu-ah ka rin loh lutukin nupui atâna min duhthu a la sawi zui!

     A thil sawi chu ka hre sual emaw ka ti hial a, a ranglama palâi rawn tirh a sawi takah phei chuan ka mang a ang hial zawk a, a chhan chu ka chhüngte'n an phal ka rin loh vang a ni. Chubakah kei fahrah ve mai hi ani ang neih tlak niin ka inhre lo a, phû lo ka intiin ka insitna a lian hle a ni.

     A insawi anga min neih a tum tak tak a nih chuan engkim hrilh hmasak ṭhain ma hria a, palâi lo kal hmaa sawidun ka duh thu ka hrilh chuan a tuk zana lo nghak turin min ti a, chutah chuan engkim, ka nutei pasal ka laka a chet dan zawng zawng nen hrilh vek ka tum a ni.

     Ina ka haw chuan in chhûng ka luh rûalin zing lama an chaw ei tur siamsak lova ngâwi renga ka kal chhuah daih avang khan hauh ka tuar leh hrep phawt a, engah mah ngai lo luiin ngâwi rengin ka ngaithla a, ka rilru-ah thil dang ka dah lui tlat a, hauh ringawt chu tuar a lo zia deuh bawk nen ka tlingtla ve leh mai a.

     A hma zan lamah ka mut loh avangin ka rilru tizangkhai luiin muthilh luih tumin ka bei a, vanneihthlak tak maiin ka muhil thei ta hlauh a, a tuk zîngah ka harh ta chauh a, ka mu hnem bawk a zang huaiin ka inhria a.

     Ka chhûngte chaw eina ka sengfel hnu chuan ka insiam a, muangchângin nu Mapuiite in lam pan chuan ka kal ta a. Tihtur em em a awm ṭhin loh avangin hmanhmawh lo tak chuan ka kal a, chaw ka ei mang loh avangin ei tur eng emaw lei tumin kawng sîra dawrah chuan ka lut a. Ka chhuak leh lam chuan kaawngpuia Pekhlûa motor rawn tlan phei chu ka hmu a, amah ka hmuh avanga ka nui hmêl chu a bula chûang ve ka hmuh rûal chuan a reh hmak thung.

     Hlim hmêl taka Ruthi nui lai chu ka hmu chiang hle a, Pekhlûa pawh a nui ve bawk! An hlim dun hmel hle a, keimaha thikna nasa lutuk rawn awm chu duh lovin ka inthing nawk a, rei enzui duh lovin ka kal ta nghal daih a. Ka thik mai piah lamah ka rilru a na a, khati khawpa hlim khan a bialnu hlui bulah a la awm thei a nih chuan eng vanga a nupui atana min sâwm nge a nih?  A bialnu hlui ka ti tak naa a bialnu mêk pawh a lo ni zawk maithei asin!

     Ka ngaihtuahna chuan min tina hle a, keimah leh keimah chu ka inhâu a. Ka hmuh dun vang ringawt khan inngaizâwng an ni tihna a ni lo a, an kal dun remchâng ve pawh a ni thei a tiin a dam zawngin ka ngaihtuah lui a. Pekhlûa chu mi bum duh tur khawpa rinawm lo a nih ka ring lo a, min phatsan mai ka ring bawk hek lo. Chutiang zawnga ka ngaihtuahna ka her danglam takah chuan ka rilru na pawh a zia chawpchilh ve mai a.

     Nu Mapuii nen kan inkawm nilêng a ni ber a, eng ka tih mah a phal lo a, ti ti dun a rawt tlat avangin sitting roomah chuan ṭhu dunin ka ti ti a. Kan chhungkaw chanchin min zawt a, nidanga min zawh dan ṭhin ang aia ngenngawla min zawh avangin thil awm dan tlângpui chu ka hrilh ve ta a. Ka tum aia tam daih ka sawi naa pawi ka ti lem lo a, tum anga kan awma Pekhlûa nen kan innei ta a nih phei chuan a hriat vek tur zawk niin ka hria a, tunah erawh a kilhkelha hrilh ka tum lem lo thung.

     Rin ai takin Pekhlûa a rawn haw har a, khaw thim fel hnu pawh chuan a la rawn lang thei lo. Ka rilru a hmanhmawh ru hle a, nidanga engmah sawi ngai miah si lo kha vawiin ber kherah ka nutei khan haw hma turin min chah a, chuvanga hmanhmawh ru deuh chu ka ni a.

     A lo haw hmaa lo hawsan ngawt chu ni theiin ka hre lo a, rilru bet lo zet chuan ka nghak leh ren rawn a. A tlai zel a, lo haw tih a awm thei bawk si lo. Nu Mapuii chuan phone mai turin min ti a, a lo buai viau takin ka ti a ka phone duh lawk lo a, a rawn haw har tak em avang chuan a number chu hmetchhuakin ka call ta nghal a.

     "Hello..."

     Hmeichhia-in min lo chhâng a, Ruthi a lo ni a! Ka rilru chhûngrila ka rinhlelhna thi hnu kha a rawn tho leh chiang kher mai.

       "U Pekhlûa biak lawk ka duh a..." a pangngai thei ang bera biak tumin ka aw ka ti zangkhai lui a.

      "A laklawh lutuk a, nakinah lo be leh mai ta che," Ruthi aw no nalh takin a rawn tih chuan sa pup pupin ka inhria a.

     Rinhlelhna meipui chuan min tuam hlup hlup a, zing lamah an inphur chhuak a, khawthim hnuah pawh an lo awmdun leh a nih chuan nilêngin hun an hmang dun lovang tih pawh a hriat loh a ni. Nghah chi nia ka hriat tak loh avangin haw mai chu ka tum ta a, nu Mapuii bulah chuan a hna a laklawh vanga a lo la haw theih loh thu leh nghak lova haw mai ka  tum thu chu ka hrilh a.

     Zan khaw thim hnuaia mahnia ka haw chu a remtih loh avangin u Ruathlûa, a rooma awm chu kovin min thlah turin a ti a, hnialin awmzia a awm dawn chuang lo tih ka hriat avangin ka hnial duh lo law law a.

     In ka thlen chuan a lo reh ṭhiap a, ka roomah lutin ka thil tawn vel avanga ka chauh deuh vang chuan khumah chuan ka bawk zâl a, bum tlak miah lo ni mah ila bumin ka awm ta niin a lang a, ka thinlung chhûngril chu a na ngawih ngawih a. Engtin nge nupuia min neih duh thu a sawi khan ka lo awih mai theih zawk le! Nula hmelṭha leh fel tak tak, anmahni anpui, khawsa thei deuh deuh an kat nuk laia kei, fahrah leh chhungte mumal pawh nei lo hi engtin nge nupui atan min duh tehlul ang ni!

      Inngaihtuah harh thutin bumtu vang mai maia indawmkun tur ka ni lo a, ka natpui tur a ni hek lo tiin ka tho a, inbual turin bathroomah ka lut ta daih a. Ka inbual zawha ka chhuah leh chuan ka room kawngkhar bula ka nutei pasal lo ding run chu ka hmu a, ka phu chiang kher mai!

     Ka inthlakna tur ka kenluh loh avangin towel chauh chu ka intuamna a ni mai a, chumi hnuaiah chuan bra leh underpant ka ha leh tawp a, ka lam pana a rawn pen phei chuan towel chuan theih ang angin ka intuam phui a.

     Hel hman inbeiseiin chak tawkin ka tlan phut a, a lo inring lawk ve deuh nge ni a che ve vat a, han tlan kual chiamna turin in chhûng chu a zau loh mai bakah  ṭhutthlengin min lo dal a, min rawn nangching hman ta hram a.

     Ka theih tawka inveng ni mah ila thawmhnaw pangngai inbel lova towel chauh bih ka nih avangin duh angin ka ṭang na hleithei lo a, ka towel bih chu a tlak mai loh nan ka kut pakhatin ka vuanbet tlat a. Ka kut lehlamin ka theih tawkin ka indang ve bawk a. Ṭhatthlengsei pakhatah chuan min nemthlu-in min bawh zui nghal a, zu rim a namin a thaw huam huam mai bawk si a, ka ten lutuk chu ka luak lo chauh a.

      Ka towel pawhthlak tuma a buai lai tak chu remchângah hmangin a lû-ah ka han tauh sawk a, a ṭe ṭhawt a, kei pawh ka lû a hai nghal chhalh thei a. A insiamrem leh hma chu chuhin a darah chuan ka theih tawpa na-in ka sehsak leh nghal zat a, a na ti lutuk chuan ka khabe-ah a kut pakhat chuan na tawkin a rawn hmet a, ka sehna ka thlah thleng chuan a hmet vak a, na ka ti kher mai!

     Ka sehna ka thlah rual chuan a tho thurh a, min pawt tho ve nghal lawp a, thinrim meng sen khûi chung chuan ka towel bih lai pawhthlak tum chuan a bei leh nghal a. Ka theih ang angin ka indang a, tlansawn ka tum leh ka towelah chuan a manbet tlat bawk si a, kan inbengberek buai hle a. A kut pakhatin ka kut chu rawn manin a theih tawpa nain a hum nghal a, ka ṭe ṭhawt a, chutia ka tha ka thlahlai leh ka kut lehlam ka hman theih loh lai tak chuan ka towel chu a phih thla ta thut a, saruak titihin ka ding ta a.

     Ka towel chu chuh zui nghalin ka theih ang angin ka sual let a, kan inchuhna lamah kan innek thlu a, ṭhutthlengah chuan a thu thla a, keiin a chungah ka zu bawh ve chawrh bawk a.

      "Rosangkim, i va tenawm ve a! Engtin nge khatiang khan i patea chungah i tih theih zawk? I lo va rapthlak êm êm ve maw le!"

   
FELICITY 9
Sbk Pachuau



     Ka nutei râwl fiak ṭhak ka hriat rûal chuan thiam lohna zawng zawng keimahah bûrbun a ni leh vek dawn tih ka hre nghal a, saruak deuh thaw-in ka awm a, a hmeichhia zawkin ka bawh ûr mai bawk si, a lan dan aṭang ringawt chuan ka thiam loh ni mîau hek le!

     Ka tho a, ka towel chhuata tla chu chharin ka intuam ṭha sawk sawk a, pa Rama pawh chu tho ṭuih ṭuihin an room lamah a lut ta daih a. Ka nutei mitmeng rum lutuk chuan min kiansan lo rêng rêng a, ka rooma ka luh pawhin min zui lut zel a, a duhtawka a inanthawl hma loh chuan zawm zatin a ṭawng leh char char dawn a ni tih ka hriat avangin ngaipawimawh duh lovin ka thawmhnaw ka inbel sawk sawk a.

     Ka tha chu a khur nasa hle a, ka thlaváng hauhtu chu sawi loh han zualkona tur takngial pawh nei lova ka awm chu ngaihtuahin ka lung a chhe ru hle a, ka nutei hmuhah erawh ka mittui farkhat pawh fartîr ka tum hauh lo thung.

     "Engtin nge kan in chhûngah ngei ka pasal i lo beisei ngam zawk le! I rilru tenawmzia hi ka ring thei lo zawk a ni. I pa Rama'n i beisei ru ṭhin a ni tih a sawi khan ka lo awihsak duh lo a, nungchang ṭha deuh anga langin i ngawi chut chut a, i lo nasa reuh zek si! Mipa i mamawh a nih pawhin nupui nei lâi ni lo zawng ta che!" a ti hlawih hlawih a.

     "Ka nute, i ngaih dan ang khan engmah a awm lo a nia, ka pa Rama khan......"

     Ka sawi zo hman lo, ka hmai a ri thlawp a, ka bîang a thip nghal vang vang bawk. Ka din ngaiin ka ding reng a, ka mittui tla tur dan tumin ka mit chu ka khap sak sak a, ka biang chu dawm chák hle mah ila engah mah ngai lo niawm takin ka bân chu ka thlakthla zar a, ka che sawn duh eih lo.

     "Khatia luhlul deuha ding reng lo khan i thawmhnaw siam la, chhuak nghal ang che. He inah hian i tân hmun a awm tawh lo tih hria la, lo let leh tum ngai hlek suh ang che," a ti leh bawrh bawrh a.

     Ka thawmhnaw chu bagah ka khung a, ka ngah lem loh avangin thil harsa a ni lem lo. Ka zirlâibu leh ka nu leh ka pi hnen aṭanga ka thil chhawmte erawh steel almirah-ah ka rem vek a, ka bagah an len loh avangin ka mamawh zual tur chauh chu lak mai ṭha-in ka hria a.

     Ka room kawngkhar chu rawn inhawngin ka nutei pasal chu rawn lutin fel ber ni awm fahrana kut kuangkuah than chungin a nupui bulah chuan a rawn ding a, ngawi rengin min en a.

       "Hetiang mihur awmpui reng hi ka peih tawh ngang lo a ni e, inkhung fel thuai la, ka la insum theih lai hian chhuak vat la, lo kir leh tawh ngai suh ang che!"

     Ka nutei thinrim âng thawm chuan min tihlau lo a, min tina hek lo, ka nihna ni miah lova puh ka ni leh thiamthu pawh sawi thei lova khapbeh ka nihna chuan min tina zawk a. Ka nute-i pasal, a mitmenga vertherna leh lepchiahna lang reng chunga min melh rengtu chu ten lutuka melh zauhin ngâwi rengin ka thawmhnaw ken tur ang ang chu bag-ah ka khung zui mawlh mawlh a, ka lak bang ho zawng chu remchang a awm huna la lak leh theih takin tiin steel almirah-ah chuan ka kalh khum hmak a. Ka inpeih fel hnu chuan ṭawngkam khat pawh chhakchhuak lovin chu anchhedawng in chu ka chhuahsan ta nghal a.
   
     Khawi lamah nge ka kal anga tunge ka pan ang tih pawh ngaihtuah miah lovin kawngpuiah chuan ka kal tawp a, ngaihtuah pawh ni tehreng ila pan tur ka neih lohzia chu kei aia hrechiang an awm hauh lovang. Nimin lawkah Pekhlûa-ah innghahna tur ka hmu a, ka lo hlim ru ve hman viau kha a ni a, kha ka hlimna kha nikhat thil thu-ah a tawp leh nghal thut a. Innghahna tlak ni miah lohah innghah ka lo tum a, a tlai lutuk hmaa ka hrechhuak vat chu ka tana ṭha tur zawk a ni tih pawm thian turin ka rilru ka siam mai a ngai ta a, ka thinlung ka lo pe thuk hman lutuk erawh ka nat phah ta deuh dawn a ni.

     Zan a rei deuh tawh avangin kawngpui chu a reh hle a, eng emaw changa motor rawn tlan leh zauh ṭhin tih loh chu mihring kal vel pawh hmuh tur an awm mai lo. Hmanhmawh hauh lovin ka pen chhet chhet a, ka hmalama ṭawng ri ka hriat pawh chuan ngaihsak lem lovin ka kal dan ngai rengin ka kal a. Kan inhnaih tak deuhah chuan mipa pahnih min tawk zâwnga rawn kal te chu an chezia leh ṭawng danah ruih an nei tih ka hre ta a, hlauhna châng pawh hre lem lovin ka phone chu phawrhin Âtei biak ka tum a, ka phone ka hmet eng chiah chu a battery a lo low vek chu niin, a thi nghal hmak a.

     Ka hmaa mi pahnih rawn kalte chu an ṭawng duh danah min tibuai lova an awm ka ring ta hauh lo a, kan intawh hma aṭang chu min auvin ṭawngkam bawlhhlawh tak takin min be vel a, a hmaa hlauhna châng hre lo kha chutia min han chhaih takah chuan ka hlau hnuhnawh ta kher mai. Kawngpui chu a rehin min chhan theitu tur tumah an awm hnaivai bawk si lo nen ka mangang ru ta hle a, ka kal tawhna lamah chuan tlan let leh mai ka duh ut ut a. Anni pahnih lah chu an rawn kal chak sauh mai si a, tlanchhe ta pawh ni ila min umpha leh vat ang tih ka hlau bawk si, engtia awm tur ber nge tih hre mai lo chuan ka inkhâp a.

     Vanneihthlak lutuk tak maiin thlang lamah chuan step te reuhtê hi a lo pêng thla hlauh mai a, khawilai hmun nge a pawh tih pawh hre lo chuan chung mi pahnih min rawn nanchin hma chuan ka pêng thla ta vat a. Hawi let tawh eih lovin hmanhmawh tawk chuan ka pen thla hlawk hlawk a, min umzui em tih pawh hre lo chuan ka theih anga chakin ka tlan thla nawk nawk a. Kawmkâr deuhah lut thla-in kawng pêng a lo awm a, ka kal zel a, step tawitê lo awm lehin kawngpui ka pawh ta hlawl a, ka thaw deuh huai a.

     Hah hle mah ila ka chawl khawmûang ngam si lo,  ka theih anga chak chuan ka kal nghal a, min rawn umzui lo nge an thawm ka hriat tak lohah chuan tlemin ka kal muang ta deuh a, hah lutuk lo chuan ka kal ve thei ta a.

     Chutia lungmûang deuh zawka ka kal takah chuan ka hah lutuk pawh chu a zia chho ve ta deuh a, hmanhmawh vak lo chuan ka kal bek bek a. Chutia tum mumal bik nei lova kal ringawt chu ṭhaa ka hriat loh avangin Âte-i te in lam pan mai chu ka tum rilru ta a, hreh viau mah ila râlṭi taka khawlâia vah kual ai chuan ka inthlahrun loh mai a ngâi dawn a ni.

     Ka hnung lama ṭawng thawm ka hriat tak thutah chuan ka phu zawk a, hmanhmawh fahranin ka hma lam pan chuan tlan titihin ka pen ta hlawk hlawk a. Min rawn umzui zel nia ka hriat takah phei chuan mangang lutukin a tlanin ka tlan ta a, thui fê ka tlan hnu chuan ka hah lutuk chu tlan zui thei tawh lovin ka ding tawp a, ka thaw hlawp hlawp a. Hnung lam ka en a, tumah ka hmuh loh avangin ka hah zualpui a reh hma chu ka chawl ta a.

     Tlêma ka hah zualpui a reh hnu chuan ka kal leh ta nghal a, min rawn umzui ang tih hlau reng reng chuan hnunglam hawi deuh reng chungin hmanhmawh ru tak chuan ka kal deuh sawk sawk a. Ka hmalama hmeichhe ṭawng ri ka hriat takah chuan ka thlâ chu a mûang ru suai suai a, hnunglam la hawi zeuh zeuh chung chuan ka kal zel a, hmeichhe ṭawngna pawh ka hnaih tawhin anmahni pawh ka hmu thei hial tawh a, mipa pakhat nen an inbe mawlh mawlh a, pawn light dim deuh tak an chhit avangin an hmel erawh ka hmu thei lo thung.

     Ka hnung lamah thawm a rawn awm deuh avang chuan ralṭi taka lo awm sa nih bawk nen ka tlan leh phat a, hnunglam hawi let paha ka tlan chu hmalam ka en leh rualin mi pakhat hi ka su thawi thuak a, thupha chawi tuma ka hawilet tur chu chu pa lo ṭawng ri chuan min tawptir chiang kher mai!

      "He kawng hi a zau thawkhat ve hle chuan ka hria a, min su chak ve hrim hrim nge i meng mang lo zawk le!"

     Chu aw ka hriat rûal chuan ka nghing deuh lawih a, ka hmêl a hmuh hlau takin ka sam chu hmalamah ka uaithlaktîr deuh a, engmah sawi lovin ka kal ta nghal sawk sawk a.

     "Lo ding teh!"

     Hre lo ang hmiahin ka ke pen chu a ngai reng a, ka bâna a rawn vawn takah chuan haider theih ni ta hek lo le, hawi letin hmun leh hmunah hnai set sawtin kan inmelh ta reng a!

     "Tun ang zan rei tawhah khawiah nge kal i tum? Nangmah chauh lehnghalin!"

     Ka chhâng lo a, ngâwi rengin ka melh kal thung.

     "Khawngaihin, ka nu vang tal pawhin eng vanga helâi hmuna awm hi nge i nih tih min han hrilh hram teh!"

    Min chhuk melh run a, a aw-ah chuan min ngaihtuah ve tak zet ni maiin a hriat a, ka chiang chiah lem lo thung. Eng vanga chulai hmuna awm chu nge ka nih tih chu hrilh tumna ka nei hauh lo, hrilhna chhan tur lah ka nei hek lo.

     "A ṭul ta a nih leh i nu chu keiman ka la hrilh ve mai ang, i lo buai a ngai lovang,"

     Ka aw chu a ring lo naa a chang ṭha ve viau! Ka chunga a khawsak dan vanga ka natzia chu ngaihtuahin kalsan vat chu ka duh ber a, min vawnna chu thinthlak tumin ka bei a.

     "Eng vanga hetia awm hi nge i nih? Engati nge ka call i chhan duh loh? Eng vangin nge ka message pawh i en duh miah loh?"

     Hnai set sawta min enin min zawt mawlh mawlh a, zaktheilo ka ti ngei mai! Nilêngin hmeichhe dang bulah hun a hmang a, ka lo nghak reng a ni tih pawh ngaihtuah miah lovin kha hmeichhia nen khan a clinic-ah engtia rei nge an awm ang tih pawh hriat loh, ka ten zawk e a!

     "Mama, i hmelhriat a ni elaw?" Hmeichhia khan a rawn ti a, a lo bu nghut a.


     "Ka putea naktuka a lo haw chuan ka lo kal leh ang, rawtna hran kan siam zawk pawh a ṭul maithei a, thil awmdan tlangpui chu i lo hrilh mai dawn nia. Hei hi Kimtei chu a nih hi, kan kal phawt ang e," a ti vut a.

     "Aw..a ni maw? Ni e, va haw phawt teh u, i putea chu ka lo hrilh dawn nia, muttui phawt ule," tiin in chhûngah min luhsan ta daih a.

     Awm ve dang an awm tak lohah chuan talchhuah tumin ka che ta phat a, ani lah chuan ngaipawimawh lo zetin hneh zetin min pawm kang a, car kawngkhar chu hawngin min dahlut hmiah a, chet ka lak ve theih hma chuan min khar khum hmak bawk. Kawngkhar hawn tum chuan ka bei a, ka hlawhchham chiang hle, ka thinur lutuk chu ka ṭahte a chhuak hlur mai a ni.

     A rawn ṭhut luh ve hnu chuan ngawi rengin min en vang vang a, thil sawipui sawt dawna min hriat loh vang nge engmah sawi lo chuan motor chu tinungin a tlan ta nghal a. A chungah chuti khawp chuan thinrim mah ila a bula ka awm chuan ka thlâ a mûang êm êm thung si a ni tih chu pawm duh lo hle mah ila thu dik a ni tlat si! Min phatsan tih hre mah ila duat takin min kuah se, a âwma bei chungin ka buaina leh manganna te hrilh ila tih chu ka duhthusam a la ni fan a, ka thil tawn takteah khan ani tluka min hnem thei tur an awm chuang lo a ni.

     An in kan thlen chuan ka lut hreh ang reng hle a, chu chu hrethiamin ka kutah vuanin min kai lut a, ngâwi reng chuan ka kal ve mai a. Ka thil tawn zozâite avang chuan ngaihtuahna mumal ka nei hleithei lo a, ka thluak chu a chawl vung vung ni berin a lang.

     Ṭhutthlengah chuan min ṭhuttîr a, a nute room lamah a lut ta daih a, a lo chhuah leh chuan a nu leh pate chuan a hnungah an rawn zuichhuak ve nghal a. Nu Mapuii'n min ngaihtuah hmel taka ka bula ṭhu chunga min kuah takah chuan insûm hman miah lovin ka ṭapchhuak ta hlawp hlawp a, ka ṭah chhûng zawng chuan mipa pahnihte chu an lo ngâwi reng a, nu Mapuii chuan insûm miah lova duhtawka ṭap turin min hrilh mawlh mawlh a, ka ṭah chhûng zawng chu min kuah tlat bawk.

     Ka lungchhe zualpui a reh hnu pawh chuan ka la inhnît faih faih a, nu Mapuii'n thil awmdan min zawh chuan in aṭanga min hnawhchhuah thu chiah chu ka sawi a, pa Rama chungchâng erawh ka sawi lang lo a, ka sawi tel ve loh chhan erawh ka hre bik hauh lo thung.

     "Engvanga chhuahtîr che nge an nih? Boruak eng emaw a awm em ni?" Pa Malsawma'n min zawt a.

     "Khawngaihin tunah chuan engmah min zawt rih lo hram rawh u, ka pangngai deuh hunah ka la sawi zawk ang e," ka ti sap a.

     Ka thil tawn kha a rapthlakin a tenawm a, ka zakin ka na ngawih ngawih bawk a, ka hmelma chunga thleng atan pawha ka duh loh thil a ni tlat! Kha thil thleng kha ka theihnghilh leh theih ka ring tawh lo a, keimahah ser nung ang maiin a awm reng tawh dawn a ni.

     "Naktuk zanah palâi rawn kaltîr kan tum si a, ṭhulh leh mai a va ngai awm ve! Engtia tih chi nge ni ta ang le?" Nu Mapuii'n a rawn tih chuan ka lu ka lo thing vat a.

     "Palâi chu hmun danga in tirh zawk a ngai tihna a nih chu!" Ka lo ti hmak a.

     "Chutianga tirhna tur awm i chhûngte an awm hnaivai a nih chuan a ṭha ngawt ang chu," nu Mapuii bawkin a lo ti leh a, ka sawi awmzia a man hauh lo a ni tih ka hre nghal mai.

     "Ka chhûngte hnenah ni lovin midang chhûngkuaah zawk a nia ka tih, keimah ni lovin midang zawk tihna a nih chu!"

     "Kimte, eng nge i sawi awmzia chu ni a?" Pa Malsawma'n a lo ti a.

     Pekhlûa en pahin, "Ka sawi awmzia chu amah hian a hre chiang ber ang," ka ti salh a, thil tisual miah lo ang maiin a ngaihna hrelo hmêl takin min lo en a.

     "Kimtei hian ka lakah lungawi lohna a nei niin a lang. Mahse, chu chu eng nge a nih ka la hre bik chiah lo a, ka zawhna engmah a chhâng duh bawk si lo a, tunah pawh tihluihna hmangin ka lo hruai haw thei hram a nih hi," Pekhlûa'n a tih chuan rum fahranin ka lo melh a.

     "Chu zawng, in pahnih kâr a nih angin in pahnihin sawifel dun rawh u. Mapui, Kimtei mutna tur vel han kawhhmuh la, keini chu va mu teh ang," Pa Malsawma chuan tiin an room lam pan chuan a kal ta nul nul a.

     Nu Mapuii pawh chuan, "Kimte, i mutna ṭhin pangngaiah khan mu leh mai rawh aw. Bedsheet thlakna tur pawh a awmna i hriat vek kha, i lo thlak ve mai dawn nia aw," tiin an room lam chu min pansan ve ta nghal a.

     Ka bula a rawn ṭhut chuan ka lo tawlhsawn vat a, min pawtbetin a taksa si chet chuan min kuahbet ta tlat a, talchhuah ka tum ve ngial naa ka hneh ngang si lo a, ami kuah ang ang chuan ka awm ta tawp a.

     "Ka laka i lungawi lohna chhan chu min hrilh tawh rawh le," zaidam deuhin ka beng bulah chuan a phun sup a.

     "Eng vangin nge min bum? Engati nge i nupui atân chuan amah kha i biak mai loh? In induhtawn em em tho si a!" Ka hnuk ulh ru ṭeuh chu ka haw kher mai.

     "I sawi awmzia ka hre miah lo a nia, chiang deuhin han sawifiah teh."

     "Hriat loh tur a awm em ni? I hre duh lo lui tlat te a nih loh chuan hriat loh tur a awm lo. Vawiinah pawh nilêngin in awmdun a ni lo'm ni?"

     "Tu chu maw nilënga ka awmpui chu?" Mak tih hmel zeta a tih chuan thinrim takin ka tal a, min thlah duh der mai si lo.

     "Zing aṭangin in inphurchhuak dun a, tlaiah min lo nghak rawh i tih avangin rei tak ka nghak che a,  i rawn haw tlai chhan sawi tur pawhin min rawn be hek lo. Ka rawn call che a, kha nu khan i phone a lo chhâng a, in awmdun nileng tih a chiang nghal vek mai alawm," ka ṭah mai chu ka hlau ru zek zek a.

     "Rawn haw ka tum laiin emergency a awm hlauh a, ka buaipui rei ta deuh a, engmah ka rawn hrilh hman ta lo che a nih kha. Chuan, Ruthi kha chu damlo hruaiin a rawn kal ve a, chu zawng chu a ni mai. Ka phone a lo khawih em tih hre tur pawhin ka buai lutuk!" a tih chuan ka awih em ka hre chiah lo.

     "I hna kal tur ruala i phurh pawh khan damlo hruaiin a lo kal tho tihna em ni?" ka lo ti salh a.

     A nui hawk a, "Ni lo e, inah lo kalin a hna kal tur ka rualin a lo kal ve a nih kha, a motor a chiangkuang lo niin a sawi a," a ti a, ka lo ner sawk thung.

FELICITY 10

Sbk Pachuau

     "Eng mah sawi lovin i reh daih a, i buai a nih ringin ka nghak che a, i nu-in be mai tur chea min tih pawhin ka tihbuai palh che hlauvin ka lo phone duh lawk lo che a. I rei tak êm avang khan hreh tak chungin ka lo call che a, u Ruthi khan a lo la ta si a, zing lamah in inphur ka hmu tawh bawk che u nen khan ka tan chuan in la inkawp reng anga ngaih kha thil awm tak a ni ve tho asin!"

     "Pawi ka ti! Keimah vangin rilru hrehawm deuhin i lo awm a, in in chhûngah buaina i tawk lehzel bawk si a, a hrehawm duh ngawt ang!"

     "Dik tak chuan bum niin ka inhria a, ka rilru a nat mai bakah bum theiha ka awm kha ka inhaw bawk. I lo haw hma dawn tih i sawi vangin ka lo nghak che a, i reh ta hmak mai bawk si a, rilru nawm tawh loh lama i bialnu hlui, zinglama i phur ka hmuh ngei mai aw han hriat leh kha chu ka nâ asin! I hrethiam pha lo zawk ang," ka ti sep sep a.

     "Shhh..... kha lam kha chu duhtawk tawh ang aw, kan inneih dan tur sawi dun daih zawk ang," tiin ka khabe-ah a rawn dawm a, min kuai dakin lungchim zetin min fawp ta nghal a.

     A insawifiahna chu rinhlelhna nei hauh lovin ka pawm hmiah a, dawt sawi turin ka ring phal lo a, an chhûngkaw zia ka hriat chinah rinawmna ka hmu a, dawt sawi leh thil ṭha lo lam reng reng an tih ka la hre lo a ni. Fel famkim bik mah suh se ze chapo lo leh leh nun ngîl tak an neih avangin mihring mihrinnaah anni chhüngkua aia fak phû dang an awm ka hre chuang hauh lo.

 

     Rei ngial kan infawh hnu chuan kan inthlah ta hram a, hnai set sawtah inen-in thawk kan la dun ham ham a. A kuta ka hmai chu nûl kûal zai zaiin a mitin a chhui zui zel a, ka bîang dinglam a chul lai chu a tawp chawt a, a hmêl chu hmuh theihin a danglam nghal bawk. A hmel hahdam tak kha thinur hmelin a rawn thlak a, a insehruh ṭeuh a, a ngaihna hre lovin ka lo en tawp thung.

     "Kut an thlak che em ni?" a ti bung nghut a.

     Ka bîang chu ka han dawm vat a, ka dawmna kut chu lasawnin dimtê-in ka bîang chu a chûl a, a mitmeng erawh a chet dan letling hlauh a ni, a rum kher mai!

     "Saw inah sâwn sawng ramhuaiho awm chhûng chu i let tawh lovang! Vawikhat pawh an ankhum tura i awm leh ka phal tawh lo, an duh duha an tih tur che i ni lo tih hi ka la hriattîr dawn alawm!"

     Ka thlaváng a hauhna aw-kâ ri ka hriat chu ka thlamuanpui rûalin ka rilru no a kaichhuak a, chhantu leh thlaváng hauhtu nei lovin kha chen ka lo awm tawh a, ka ṭhiante bulah takngial pawh ka thil tawrh ṭhin kha ka sawi ngai lo. Hria an lo awm a nih pawhin tumah min hnemtu leh ka thlaváng hauhtu an la awm miah lo, keimahin ka mal tuar tawp mai a ni. Tunah ka innghahna turin ka bulah a awm a, min phatsan ka ring miah lo bawk, ka tãna Pathian ruatah ka pawm hmiah mai a ni.

     "An khawih nâ che em?" a ti leh sup a, ka bîang chu zawitê-in a chûl pah rîai rîai a.

     "Aih, khawih na lo e, min bêng ringawt alawm," ka ṭah rawn chhuak up up chu ka dang hram hram a.

     "In buaina eng mah i sawi duh si lo a, i thiam lohna a awm chu ka ring miah lo naa i sawi duh lo hi mak ka ti deuh!" a ti leh a.

     "Ka sawi duh ......"

     "I duh lo chung nawrluih che ka duh lo a nia, i sawi duh a nih erawh chuan ngaithla turin ka inpeih reng!" a lo ti leh sup a.

     Chuti khawp chuan min ngaihtuahin ka thlaváng hauh a tinâ a ni si a, hrilh vek law law chu ṭha-in ka hre ta a, sawi ṭan dan tur erawh ka hre lo hle thung.

     "Ka pi boral hnu khan ka nutei hi a nungchang a inthlak daih a, hnawk min ti ni berin ka hre ṭhin. Hrehawm ti vîau ṭhin mah ila chhûngte dang ka neih mîau loh avangin chhuahsan lam chu ka ngaihtuah ngai lo, min hauhna leh dawta min puhna te chu ngaiah ka neih chho a ni ber mai."

     Kan ṭhut dan chu siam remin ka nghen theih turin a ṭhu a, min kuah a, sawi zel turin min ti zui zat a.

     In chhûnga ka dinhmun chu ka thiam ang tawkin ka hrilh a, BA ka pass hnua zir zawm an phal tawh loh vanga a ruka IGNOU-a admission ka tih tak thu vel ka sawi lai chuan a lo rum deuh nghut a, eng mah phei chu a sawi lem lo. 

     Ka sawi zel a, pa Rama'n min beisei a ni tih leh min khawih a tum tih ka sawi thlen chuan a ṭhu ngil zawt a, ka dar tawn tawnah vuanin chiang zetin min en a, a hmêla thinrimna leh hlauhthawnna lo lang chu ka hmu chiang kher mai!

     "Chu chu, chu chiah chu a ni tiraw zanina i chhuahna chhan? Khawih leh che a tum vanga chhuak i ni em?" A aw chu a chang ṭha beng bawng hle a

     "Aw, ni tho a, thil thleng kha a ṭha lo a ni tawp mai a ni," tiin pa Rama min khawih dan chu ka sawi a. Ka hlauhzia leh khatih laia chhantu ka ngaihzia kha ngaihtuah chhuak lehin ka hnuk a ulh a,  sawi ṭha hlei thei lovin ka inhnît faih faih a.

     "Shhhh... Sawi tawh rih suh, duhtawk rih rawh. Nakinah i sawi leh zawk dawn nia, thil awmzia chu hrethiam tawhin ka inhria!" min kuah pahin a ti a.

     "Aih, ni lo.... ih.. ka towel bih kha a pawtthla a, ka chuh letna lamah ṭhutthlengseiah chuan kan tlu ta a, pa Rama chu a zangthal zâwnga tlu-in a chungah tak chuan ka zu bawh a. Thawh ka tum lai tak chuan ka Nutei chhuak a lo haw chiah a, kan awm dan a hmuh chiah khan ngaihdan a siam fel nghal vek tih hriat takin ka insawifiah vena chu ngaihthlak a tum lo a, engkimah ka thiam loh vek niin  a ngai hmiah mai a ni." 

     Ka inhnît leh hlap hlap a, duat taka min lo kuahletna chuan pangchanna rilru min neihtirin chhuak lehzualin ka ṭap a, ka ṭah chhûng zawng chuan nghet taka min kuahin ka samah te chuan a lo chûl a, ṭawngkâ ni lovin chezia-in min hnem a ni ber e.

     "Chuan, ih... mihur lutuk angin min puh a, a pasal chu keima nawrluih angah a ngai lui tlat bawk. Thil awm dan dik tak sawi ka tum chuan min bêng a....." 

     Sawi zo thei lovin lungchhe lutuk chuan ka ṭap leh hlawp hlawp a, nghet theihtawpin Pekhlûa chu ka kuahbet tlat a, ka ṭap nasa lutuk chu ka chau zo vek tawhin ka hria a.

     "Khatiang thil kha i chunga a thlen leh ka phal tawh lo, eng vangin nge a hma khan min lo hrilh loh le? Lo hre tawh ni ila chuan tuna i chunga thil thleng hi a thleng lo mai tur!" a ti vang vang a.

     "Ka ngaihzia che kha i hrethiam pha lo zawk ang, ka ngai ṭha ngam tawh bawk si lo che a. Midang i duh zawk nia ka hriat avang khan ka ngaihtuah ṭha ngam tawh lo che a, tumah pan tur ka hre bawk si lo, nang tal kha ka tan i awm a ni tih hria ni ila chuan ka na lutuk kha a zia ngei ang. Khatih lai khan ka bulah awm la, min kuah la ka ti a, ka mamawh ngawih ngawih che a, ka ngai lutuk che asin!"

     "Tihpalh aw Bawihte, keima thiam loh vek a ni. Min mamawh ber hunlaia i pan theiha ka awm lo hi ka inhaw lutuk! Ka lo call che a, min chhâng thei lo a, ka message lo thawn che i hmu thei bawk si lo. Rawn kala rawn hmuh mai che ka tum a, ka pa'n ka putea palâia tân be tura min tih avangin ka kal leh ta daih si a, kan inhmuhna lai kha ka putea te awmna chu a nia. Ka rilru-ah i awm reng a, ka biak theih loh che avang khan hrehawm ka ti ve lutuk tho a nia," a tih chuan ngheng hnaiin ka kuah nghet sauh a.

     Kunhniama min rawn fawh leh takah  chuan ka lo chhanglet vat a, inthlahlel tawn takin kan infawp a, a hma zawng khan ka thlahlel lo tihna ni lovin ka boruak tawn takte avang chuan ka thlahlel zual a, a bulah chuan ka thlâ a mûang ngawih ngawih mai a ni.

     "I chau awm si a, mu tawh ila a ṭha ang. Eng mah ngaihtuah hah lo la, a lungchhe zâwng leh rilru na zâwngin lo ngaihtuah tawh miah lo la, i tân ka awm reng tih lo theihnghilh miah lo bawk ang che," a ti a, mu tur chuan kan kal ta nghal a.

     Sana chuan zînglam dâr 3:00 a lo kawk vah tawh a, ka mutna tur roomah min thlahin min fawh leh vang vang hnu chuan a room lamah min chhohsan ta a. A kal hnu chuan inbual sawk sawkin ka mu ta nghal a, ka chau deuh bawk a, ka muhil nghal deuh mai a, ka mutui phian lehnghal.

     Min kotu awm nia ka hriat chuan ja meng peih mai lo a, ka bîanga a rawn fawh zauh takah chuan mengin Pekhlûa, inbûal zo hlim tih hriat taka sam la hnawm chap chunga lo ding chu ka hmu a, min lo nuih sak a.

     "Ka kal tawh dawn a, i lo la tho si lo a, ka lo tiharh ta mai che a nih hi. Hmu lo leh be lo chea ka kal chuan ka ngai lutuk dawn che si a," nuih sak paha a tih chuan a hmelṭha tak chu ka lo en reng a.

     Ka tho tur chu ka kutah vuanin min lo pui vat a, ka hmuia fawp zauhin khum aṭang chuan min pawmthla a, ka lo nui hak a.

     "Ka nupui i nih hunah chuan ka duat viau ang che, tiang hian ka pawm tho ziah ṭhin che ang a, ka duat ang chiah che-in min duat ve ka duh dawn bawk a nia," a ti sup a.

     "Ka duat thiam ve lovang che tih ka hlau e, nangman min duat chuan a tawk mai dawn lo'm ni?" ka lo tih chuan a thaw hak a, amah si chetin min kuahbet nghal a.

     "Induattîr dan tur che ka hria alawm, a hun lo thleng phawt se," tiin min fawp leh zauh a, "Ka tlai dawn, ka kal phawt ang a, i phone lo ngaichâng reng ang che. Ka hman hunah ka lo be dawn che nia," a tihzawm leh zat a.

     Room kawngka bul thleng ka thlah a, a kal hnu chuan inphihfaiin ka inthlakfel a, ka intihfel hnu chuan choka lamah ka chhuak phei ta nghal a.

      Chokâah chuan tumah an lo awm lo a, chhuah leh mai ka tum lai tak chuan nu Mapuii chu sitting room aṭangin a rawn phei chiah a. Min hmuh veleh chuan min nuih var var a, ka mu ṭha thei em tih chu min zawt nghal a, ka mu ṭha tih chu ka lo sawi thuai a.

     "Mama khan in mut har thu kha a sawi si a, i lo thawh mai pawh ka la ring lo a, chaw eiah pawh kan lo nghak ta lo che a nih kha," a ti bawrh bawrh a. 

     "Ka lo mu rei lutuk a, a zahthlak zawk alawm le! Ka harh lo rêng rêng, ka mu tui khawp mai," ka ti a, ka tho tlai satliah a ni lo a, chaw eisan ngai khawpin ka mu rei a, ka zak ru tak tak a.

    

     "I ril a ṭam tawh ang, chaw ei phawt la, chaw eikham lamah kan inkawm dawn nia aw. Tikhan lo ei la, i pa Malsawma thawmhnaw suk tur ho ka han la lawk ang e," tiin in chung lamah min chhohsan ta nghal a.

     Pa Malsawma thil pawimawhah a chhuak a, u Ruathlûa a dawr lamah a kal bawk a.  Nu Mapuii leh nu Mawii nen kan awm a, nu Mawii chu chhun thingpui in zawhah nu Mapuii'n a hawthlaktîr a, kan pahnih chauha kan awm takah chuan zan lama thil thleng chu uluk zawkin min sawipui leh ta a.

     Eng mah zep nei lovin thil thlendan chu ka hrilh ve ta vek a, thil awmdan dik tak a han hriat takah chuan rapthlak ti zetin a chek tlak tlak a. 

     "Ka rin phak bakin an lo sual daih a nih chu! Engtin nge engmah sawi lova kha chen i lo awm theih le? I lo va tûar nasa em em ve le aw!" a ti vawng vawng mai a, min khawngaih tak zet a ni tih a mitmengah chuan ka hmu thei a, lainat hmel zetin min en vang vang a.

     "Tun aṭang chuan khatiang hrehawm kha  i tuar tawh lo turah ngai ang, engkim a fel chho turah ngai ila, Mama nen a rang lama in inneih a ngai lehzual ta a nih hi!" 

     "Ka awmna tur hi...."

     "Hetah i awm mai dawn alawm. Khawiah mah kal ka phal dawn reng reng lo, Mama paw'n a phal hauh lovang. " a lo ti sawk sawk a.

     "Helaia lo awm ve ringawt chu a dik lo alawm! Inneihna a awm dawn phei chuan ka tan lo awm ve reng kha a mawi chiah lo deuhin ka ring a," ka ti thung a.

     "Ngawi teh, chu lam chu i pa Malsawma ka lo sawipui ang a, ani'n tih dan tur a hre mai ang," a lo ti ve leh a, a phone a rawn rik takah chuan tlailam chawhmeh siam tur en fel turin choka lam ka pansan ta a. 

     "Kimte, Mama'n a be duh che a nih chu, i phone-ah a be tlang thei lo che a niang," nu Mapuii chuan a phone min pek pahin a ti a, ka phone lam rêng ka lo ngaihtuah pek lo a ni tih ka hrechhuak chiah a.

     "Hello..."

     "Kimte, ka lo be dawn che tih kha ka sawi si a, i phone i off daih a!" a rawn ti thawp sut a.

     "I nu nen kan lo inkawm tui deuh a, ka phone lam ka lo ngaihtuah miah lo a, tihpalh lutuk aw! Nizan khan battery a low vangin a thi daih a, ka la charge miah lo lehnghal, ka lo theihnghilh daih alawm!" ka tih chuan a thaw ham ham ri chu ka hre thei a.

     "Min lo ngai em?"

     "Umm.."

     "Umm ringawt maw?"

     "Engtin nge ka sawi vak chuan ang a?"

     "Kimte...."

  

     "Umm..."

     "Ka ngai che!" a rawn ti sup a.

     "Kei paw'n ka ngai che!" zawitê-in ka lo ti sep a.

     "Aw..khatiang khan alawm sawi tur! 'Umm' ti ringawta inchhan kha ka duh tawh dawn miah lo a nia," a rawn tih chuan ka lo nui hak a.

     Kan inbiak zawh chuan ka phone chu ka bag aṭangin ka va phawrh chhuak a, ka charge ta nghal a. Ka on a, ka han check chuan Pekhlûa sawi ang tak chuan a message leh a missed call a lo awm nual a, a message chu hawngin ka chhiar nghal a. A lo haw tlai chhan te lo sawiin a lo haw hma theih loh vanga thupha a chawina te, a lo haw hnua min callna ka lak theih loh vanga min ngaihtuahzia a rawn sawinate a ni hlawm a.

     Tlai eirawngbawl a lo hun chuan rawng chu ka bawl nghal mawlh mawlh a, ka remti lo chung nu Mapuii chuan min lo pui leh bawk. Kan ti ti tuidun leh hle a, a kianga ka awm hi chuan mahni nute bula awm ang mai niin ka inhre ṭhin a, chu chu tunah pawh a la ni reng a nih hi!

     Zanriah ei kham hnua thleng vel ka seng fel hnu chuan ka roomah ka awm a, nu Mapuii te nupa chhuahna tur pawimawh an neih avangin an chhuak a, u Ruathlüa a roomah games khelin a awm daih bawk. Ka khua a har ru hle a, Pekhlûa lo haw tawh se ka ti kher mai.

      Ka phone a rawn rik chuan ka ngaihtuahna ka lo kawm tui leh tawh viau ni ngei tur a ni ka phu deuh zawk a, ka en chuan Pekhlûa a lo ni a, ka chhang nghal vat a.

     "Ka lo haw ṭep, kawtah khan min lo hmuak ang che!" a rawn ti a, a dah leh nghal daih a!

(In commentna te a mal malin ka chhang thei lo che u a, pawi ka ti! Mahse, uluk deuhin ka chhiar vek zel a, ka lawm em em a ni tih ka sawi duh. Ka lawm lehzualna em em chu tuma'n ṭawngkam dengkhawng leh mawi lo taka comment in pe lo hi a ni...ka thuziak min chhiarsaktute hi ka chakna in ni tih min lo hriatsak r'u aw...)