MY ONE AND ONLY VALENTINE

MY ONE AND ONLY VALENTINE
Sbk Pachuau



"I hman chuan kal nghal mai ila, min lo nghah rei lutuk chuan a lungni lo leh dawn nasa a nia!" 

Room aṭanga ka chhuak min hmuh rual rualin a ṭhutna aṭang chuan a thochhuak a, ka lam panin a rawn pen nghal a. 

Ka ṭhiannu Kimi bialpa hmu tura kal tum kan ni a, an inkârah hmeichhe dang tlazep an awm avangin tunlâi chu an buai neuh neuh reng a. Hmeichhe dang ngaihzâwng a nei tih chu a fiahna fak awm lo mah se rinhlelh theih tur tingin Kimi chuan a lo man thawi deuh ni awm tak a ni an inkâr thu a fuh hlei thei tlat lova. An inngaihzawn dawn pawhin Michaela mizia ka hriat ve thawkhat avangin ngaizâwng lo turin ka hrilh ve diam kha a ni a; mahse, Michael te ang hmeichhe cheng dek thiam lutuk tak mai tan chuan ngaihzâwng neih lama tawnhriat la nei lo tak ka ṭhiannu bum kual vel chu pakhat hmun sawi ai pawhin a awl zawk tlat mai si a, inhaw lo ta na na na chu an inngaizâwng ta thuai reng a.

Muangchâng lo takin kan tlan chhuak zui ta nghal a, tlai a hlauh vang nge ni a khalh chak ṭha par par hle a. Kimi scooty khalhah hian ka chuang zing ve ta viau a, a thiam ve tawk hle tih hre turin kan inphur chhuak ngun ve tawh hle bawk a, ngaihngam tak hian ka chuang mai zel a. Amah lah chu a inringtawkin traffic jam kârah pawh buai hauh lo hian min chhuahpui leh hlawl zel a, a tir lamah kha chuan ka ṭang ru deuh ṭúng ṭhin kha a ni a, tunhnu-ah erawh hlauhthawnna nei hauh lovin hahdam takin a hnungah ka bet váng ṭhin.


Thil ri bur ka hriat rualin ka ngal chu a rawn thip nghal zawk a, na vawng vawngin a zui nghal bawk. Scooty aṭanga ka tlak thlakdan chu ka hre hauh lo naa ka tla ngei a ni tih erawh ka hre thung! Ka ngaihtuahna a nu bulh a, ka awmdan chu ka hrethiam lova, kan chetsualdan phei chu hre lo tak ka ni.

"Khati taka hmanhmawh turte chu zîngkârah khan lo chhuah daih tawh tur che u alawm! Thiam tak tak mang si lo hian ka khalh chak e in tia, tihian midang tan thil pawi tak in thlen reng hlawm mai!"

Chutia rawn ti bawrh bawrhtu lam chu harsa ti tak chungin ka melh vat a, a hmelṭha takah chuan lungawi hmel hmuh tur a awm reng reng lova, a mitmeng lian kel kawl chuan rum fahranin min rawn melh zawk a, a car hma dinglam râng leh sawi deuh chu a thlek leh nghal daih a. A landanah hmeichhe chapo ve tawk tak, neinung ve tak leh midang hmaizahna nei lutuk lem lo a nih ka lo ring ve ngawt a!

"A ngal thi hi tihtawp vat loh chuan thisen a hlauh hnem dawn tlat! Khalâia taxi driver khan tlawmngaiin kan nula hi damdawiin lamah min va dahsak mai ta che." Pa pakhat, la valâi hmel takin a rawn tih takah chuan ka ke lam chu ka en nghal vat a, ka thil hmuh chuan min tichau nghal nghulh thei nia!

Ka cream rawng kekawr hak chu ka ngal zawnah a lo thler a, a thler kar aṭang chuan ka vun khawk duai mai chu tlem a hmuh theih a, ka kekawrah chuan thi a kai nasa mai bawk a, mi rap kher mai! Ka lu a hai nghal miai miai a, rei en thei lovin ka hawisawn ta vat a.

"Keima'n ka lo hruai ang e," rawn titu aw chu ka hai lo kher mai! Ka lungphu a timumal lo zual a, ka ngaihtuahna nu ṭan mek chu a rawn chawk nu zual a, a hmel hmu tura hawichhuak turin ka ringin min zo lo a ni ber e. Engtik laiin nge Mizoram lamah a lo haw chhoh ka hre lova, a chanchin ka ngaihven loh 'luih' tlat avangin ka tan chuan hriat ngaihna a awm lova, a ṭhiante leh amah hretu tawh phawt chu tun thlathum chhung khan ka hel lui tlat a, a lamhnai deuh ho phei chu ka bihruksan châng pawh a tam reng a nih kha!

Zo deuha min pawm nawlhin min kalpui ta nghal a, a motora min dahluh hnuah traffic police officer pakhat leh Kimi leh nichina hmeichhe âng hlak hlakte din khawm laihna hmuna kala a va be mawlh mawlh chu chiang lo ruaiin ka hmu a, ka ke na chuan zuallam a pan zel a, tunah tak phei chuan a turin min tur ut ut tawh!

Damdawiin kan thlen hnu chuan min buaipui nghal mawlh mawlh hlawm a, ka ngal thler an ṭhui zawh meuh chuan ka chhûngte pawh an lo thleng kim vek tawh a, ka nu hmela hlauhthawnna ka hmuh chuan a hnemna'n ka nuih sak a!

Damdawiin ngainat loh nak alaiin min han admit zui a, ka awm hreh lutuk 
chu ka ner nasa hle a. Chutia ka insiamchhe lai chu Ṭpa chuan chiang takin min lo melh siah a, a hmelah chuan nuihza insûm hmel a lang a.

Ṭpa nen hian kum hnih kalta khan inhre ṭanin kan inhmuh tirh phat aṭangin kan inhip tawn hle a, kan duhzâwng, ngainat zâwng leh nuam tihzâwngte a in-ang a, kan zia pawh a inmil em em bawk. Mizo mipa-ah chuan a lian pawl niin a pian a nalh tawk hle a, ṭawng tam lutuk lo leh mize ngêng ngalh, chapo ni hauh si lova induhtawk ve tak mai a ni. 

Ṭhiante inneihnaa intawng niin hmelhriat inang kan neih azárah kan inbe tlângnêl nghal titih a, a hnu zelah pawh inhmuh nikhua apiangin kan inbe ta ziah a. Kan inhmu 'palh' fuh zing tial tial a, phone number te inpe-in inhaw lo tawn ta na na na chu kan inbe ril tial tial a, thikthu pawh a chhe dun sawt hle a. Kan inhriat aṭanga thlahnih a vei leh meuh chuan ka engkim niin ka ngaihtuahna leh hmangaihna a kawl fel der tawh a ni.

Kan nun chu a kaltluang chho hle a, buaina leh harsatna em em awm lovin kumhnih chu kan inkawp ve ta der a. Min duat thiamin min dah pawimawh thiam em em a, a bula ka awm chuan him hliah hliahin ka inhre ṭhin a, hlimna zawng zawng hi keimahah a awm vek ni maiin ka hre ṭhin.

Nikhat chu, ka ṭhiannu Kimi nen kan bazâr a, dawr pakhatah hian Ṭpa leh hmeichhe hmelṭha leh nalh zaih mai pakhat hi kan hmu a. Chu nula a endan chu duatnaa khat niin ka hria a, ka rilru-ah thikna a rawn lut nghal a, ngaihsak hmel taka nula thil sawi a ngaithla leh hlim hmel taka a nui chuan ka thinlung a chhun na hle a ni.

Kimi chuan ka phone chu min laksakin Ṭpa number chu a dial nghal a, a lo pick-up rual chuan ka beng bulah a rawn chuktuah a, a hmui phunin be turin min ti a.

"Hello.. " a rawn ti thawp sat a. A aw ka hriat ringawt pawhin ka nât belh a nih chu!

"Khawnge i awm? I buai em?" ka theihtawpa ka aw khur thup chungin ka bia a.

"Thil pawimawhah ka chhuak lawk a, nakinah ka hman hunah ka lo bia ang che!"

"A va pawimawh awm ve! Chuti taka pawimawh chu ka hre ve thei ang em?" ka ṭah chhuak lutuk chu ka aw a lawi lek lek a.

"Tunah chuan ka buai rih a, hun ka neih veleh ka lo be dawn che nia.."

A hmeichhe kalpuiin a biak avangin a lam hawi chuan nui chungin a thusawi chu a ngaihthlak sak a, kan inbe mek a ni tih hre awmin a awm hauh lo!

Ka thil hmuh chuan min tinâ a, kan inbiak mawlh mawlh laia chutia keimah lam ngaihtuah lêk lova hmeichhe dang a dah pawimawh em em mai chu rin harsa ka ti a, rin loh ngawt dawnin ka mit ngeiin ka hmu bawk si!

Phone chu ngawi rengin ka la thla riai riai a, kut khur dar dar chungin nghet takin ka hum a, ka en reng lai chuan hmeichhia chu kuahin an nuidun a nih chu! Chutih lai tak chuan setana hi lo kalin ka bânah rawn kai ta se, ihë lovin ka zui nghal ngeiin ka ring, ngaihtuahna fîm nei tlat hek lovi le!

In kan thlen hnu pawhin Kimi chuan a be leh a, a buai thu bawk a lo hrilh leh a, kei chuan va biak sek pawh ngai ka ti lova, kan mit ngeia kan hmuh kha a chiang thawkhat ka ti a, va tihbuai zui emaw a insawifiahna ngaihthlak emaw tumna ka nei hauh lo.

Chumi tlaia min rawn biak a tum chuan chhang lo turin ka insûm hram a, message min rawn thawn pawh pakhat mah ka hawng duh lova. A rawn call tlut tlut a, message a rawn thawn tak zut bawk avang chuan ka phone chu ka off ta ringawt a. Zana kan ina a rawn kal chuan room aṭangin ka chhuak duh lova, tun dinhmunah chuan ka tan hmuh rih loh a ṭha berin ka hria a ni. Hmu chak ngawih ngawih, hmu ngam si lovin ka awm a, hliam na tak nei ang maiin ka chau vek thei hial a ni!

Mu leh mal nei lovin kârkhat chhung chu ka awm a, ka nu chu engkim min hriatpuitu a ni a, kan inngaihzawn tirh aṭanga engkim min hriatpuitu a ni bawk. Chutianga a fanu na taka hliama ka awm chu min lainat hle a ni tih a mitmengah a lang a, a theih tawpin min ngaihsak a, midang lakah min hliahkhuh hneh hle bawk. Ka mualphona turah min vêng a, ka chaw ei ṭha lo leh mu thei lo chu ka tla bawih bawih a, ka pa ngaih chu a ṭha chiah lova, ka nu chuan thiam takin min thupmawi a, ka nawmsam loh vang a nih thu leh karhnih khat vel hnuah chuan ka zia leh mai a rin thua chhangin ka pa rilru chu a hmin vat a, ka unaute pawhin engmah an sawi lo bawk.

Ka hna-ah pawh kal thei lovin ka awm a, keimah leh keimah ka inhua a. A chhan chu, min ngai lo leh min hmangaih miah lotu ngaiin ka ṭap a, ngaihdam dila a rawn let beiseina ka la nei cheu te chu ka inhaw ngawih ngawih a, ka rilru aṭanga dah bo ka tum nasat poh leh ka ngaihtuahna a luah nghet ting mai si a, theihnghilh pawh ka tum buai duh ta lo law law a. 

Ka hna ka zawm leh ni chu kan thawhpui pakhat hmun danga an sawn tur thlahna neih an tum ni tak a lo ni a, tlai banah chuan phur lo takin chaw eina tur hmun panin kan thawhpui pakhat Rinsanga nen kan inphur phei ve a. Kal loh ngawt thu a awm si lova, peih lo zetin rilru bet lo takin inthlahna chaw kan eina tur hotel chhungah chuan ka lut a.

Rinsanga hi tlangval fel tak, tlawmngai thei deuh mai a ni a, ka thawh tirh phat aṭangin min ngaihsak em em a, kawng engkimah min kaihruaitu a ni ber mai. Hna a thiamin ka entawn ber a ni a, puih ka ngaihna apiangah phur takin min pui a, ka hriat loh tamtak min hrilh hretu a ni bawk a, ka tan chuan a hlu tak zet a ni.

Eng emaw chang hian min lo en leh vung vung ṭhin a, a awmdan hi ka hrethiam lo leh thut ṭhin. Thawhpui dangte hian min ngaizawng hle a ni tiin an sawi ṭhin a, kei erawh chuan chutiang ni theiin ka hre silo. Pangngai takin min bia a, inngaihzawnna lam hawiin ṭawngkam vawikhatmah a chheh ka la hre lova. Kawng tinrengah min ngaihsak a, ka tan a awm reng ti ta ila kan sawi sual tam awm love!

An eitur chah chu a tuihnai hlawm hle a, kan kalna hmunin a zir bawk a, engkim mai chu a changkangin a tuihnâi em em vek a, rilru hahdam leh vei nei hauh lova ei bawrh bawrh chakawm tak vek an ni hlawm a, tui ti taka ei ve theih ka duh hle a ni.

Rinsanga chu ka ṭhutna lama rawn awn deuh pahin ka hnungah a ban a rawn dah a, ka hmai bul maia rawn kunin min rawn melh a. "Ei luih tum hram rawh, i taksa kha ngai awhtir leh la, i hmai dâng lutuk kha eitur ṭha tak tak hmang hian han titai leh ték ta che," nui suk pahin a rawn ti a.

A awmdan teh thut avang chuan ka hamhaih deuh a, ka hamhaih hmel a hmuh chuan nui chungin min lo siai suk a. Ṭhian dangte chuan thil hrethiam inti hmel takin min en deuh ṭhap a, a ṭhenin min lo fiam bawk a. Ka lai deuh chuan zahzelah ka hmaa eitur awm chu banin ka hmawm zauh a, ka hawichhuak lehin kan piaha ṭhute ka va melh kher erawh ka tisual chiang hle a ni.

Hmannia a hmeichhe kalpui nen bawk khan an ni! Rum lutukin, thil tisual zawktu ka ni emaw tih mai turin huatnaa khat mitmengin Ṭpa chuan min lo melh ngur a, ka tirilah ka khur nghal dar dar a, ka lak aṭangin a mit chu a lasawn eih lo. Rinsanga'n a la tih ngai miah loh anga min rawn kuah deuh titih pawh chu pawi tihna ka nei ta lova, min rawn thlir rengtu runluih ni awm fahranin ka va nek hnai deuh salh a!

Min ten awm fahrana a hmui a tiner sawk chu ka hmu chiang hle a, lepchiah leh tenawm ber melhin min melh ni maiin ka hria a, a tihdik loh leh a thiam lohna lai en lovin keimah min burbun vek emaw tih mai turin min melh a ni ber mai.

Chulai hmun an chhuahsan hnu pawh chuan ka la insangmar ṭeuh a, ka awm a nuam thei hlawl lova. Chaw eikham hnua in thlenga Rinsanga'n min thlah pawh chuan ṭawngkam ṭhaa lenglut tura sawm pawh ka ngaihtuah lova, mahnia awm ka mamawh ber rih niin ka inhria a ni.

Hun a liam chho ve bek bek a, thla a vei a, zia ve zel tura ka inngaih laiin ka thinlungah a thi thei lova, englai pawhin ka ngaihtuahna a luah a ni ber. Thlakhat dang a vei leh chuan tlemin ka zia ta deuh niin a lang a, ka ngaihtuahnaa a awm reng ṭhin kha theihnghilh zauh châng ka nei ve thei ṭan a, ka rilru na pawh ziaawm chhovin ka ngaihtuahna kawm ngut ngut ka chin ṭhin te chu ka sim chho ve mek zel a. Tunah, ka theihnghilh fel thei tura ka ngaih laia a lo lang leh nawlh mai chuan min timangang a ni ber e.

Cabin awl a awm loh avangin general ward-ah kan awm a, ka ke an ṭhui zawh hnu khan Ṭpa chu eng nge ka an tih min zawtin a rawn lang leh zuai a, a bak chu a reh leh ta hmak a. Ka duhdan ni miah lovin hmuh tumin ka lo zawng rilru leh ṭhin a, ka inhaw ru hle a.

Thisen ka hlauh hnem deuh vang nge ka chau ve deuh a, mutchhuakin min zem chiai chiai a, ka ke an ṭhuina chu kahhiknaa an chiu vangin a la na lem lo bawk nen ka muhil ta daih a.

Ka harh leh chuan ka awmna chu ka bo teuh hle a, ka ke na veng veng ka hriat rualin khawia awm nge ka nih tih chu ka hre leh nghal zat a. Ka ke chu a na ta deuh ngut ngut a, ka harh a ni tih a hmuh chuan ka nu chuan min ngaihsak vat a, ka ke na ka tih thu ka sawi chuan nurse duty ko turin a kal nghal vat a.

Tlai lamah Kimi leh Michael an rawn kal a, Kimi hi na lutuk leh hliam pawh nei lovin a awm a, a vannei phian a. Thil awmdan chu min hrilh nial nual a, ami sut kha MLA fanu niin a dinhmun chapopui deuh chi a lo ni a. Kimi chu a va sutu zawk a nih avangin a thiam lo zawk a ni bawk nen hmabak a ko viau-in a lang a, thupha chawina pawhin awmzia a nei vak lo a nih hmel. Eng eng emaw sawi nual mah se thildang zawng aia ka rilru luahtu chu Ṭpa bialnu tia a sawi kha a ni!

Kha nu hmelṭha anthiami kha a bialnu a nih si chuan a hmaa a bialnu nen khan an inngaizawng tawh lo tihna a ni ngei ang a, an daih rei leh lo lawi si mang e tiin ka ngaihtuah neuh neuh a. Ngaihzawng thlak zung zung duh tur mi nia ka lo hriat loh ṭhin nen zia hi a lo thup theih viau a nih dawn hi ka ti ta ngawt a!

"I va ngaihtuah nasa awm ve!"

Ka hawichhuak vat a, ka khum bula a lo ding run mai ka hmuh chuan ka lungphu chu a rang nghal dawt dawt a. A bula ding ka hmuh leh lek phei chuan ka inthunun zo lo lek lek chu a ni e.

An nalh dun a, an hmelṭha dun hle bawk. An inhmeh takzet! Ka chhûngrila nawm lohna nasa lutuk awm chu lanchhuahtir lo tura ka insum fê a ngai a, ka hah ru hluah hluah mai a ni.

Ka nu inthiar a rawn luh leh takah chuan ka thaw ru huai a, chau hle niawm takin ka mit ka chhîng ta daih a. Rilru pik churhin an ti ti chu ka ngaithla a, a hmeichhe rawn hruai ṭawngdan vel leh thu han sawi duh dan vel chu ka lo haw ngawih ngawih a, ka nu a biakdante chu a hnuaichhiah tih hi a hriat mai a, thinur ru tak chungin ka lo inhumruh ngat ngat a. Rinsanga a lo lan ve tak hnu chuan rei awm lovin an chhuak ta hlauh a, an kal ta chu ka thawveng hawk thei nia!

Cabin ruak a awm veleh kan insawn lut ta nghal a, January thla chawhma lam a ni a, khua a la vawt ṭha angreng viau a, kan awmna cabin chu niin a chhun ṭha hlauh a, vawt lutuk tuar lovin kan awm thei mai a. Ka damdawiin awm ning tawh lutuk chu chhuah luih daih maite ka duh rum rum a, damdawi in hrim hrim hi ka nel thei lova, ina hawa keima khum ngei a mut vang vang chu ka chak kher mai!

Office ban hnu-in ṭhiante'n min rawn kan nak nak ṭhin a, Rinsanga phei chu zinglamah nen a lo kal awl lova, min ngaihsak em avang chuan ka chhungte lakah pawh a tlatlumin an innel tawh hle a, kan chaw eikhawm nia a awmdan ang khan a awm leh tawh miah lova, ṭhian ṭha tak ang maiin a awm leh hle hle lawi a, ṭhian ang bakin min en lo nia ka lo hriat kha a dik niin a lang.

Khami nia a bialnu nena an lo kal hnu khan Ṭpa chu a reh ta vang vang a, ka nun aṭanga kalbo hmiah tura ka duh ang ngeiin a bo hlen turah ka ngai a. A rawn lan leh beiseina ka nei lova, ka ngaihtuahna a luah leh ṭhin chu duh lovin rilru zangkhai leh vei nei lova awm chu ka tum lui tlat a, a hlawhtling ang em tih erawh ngaihtuah tham a tling thung.

<><><><><><><>®️

Chawlhni tlaiah inleng kan ngah deuh avangin ka zo lo deuh a, khawthim hma-in ka muhil ta daih a. Ṭawng ri bul bul thawm ka hriat chuan ka meng nghal mai lova, ka nu nen chuan zawi supin an ti ti a. Eng hunah pawh, khawi hmunah pawh ni se a aw chu ka hai ngai hauh lovang le! Engvanga ka rilru aṭanga paihbo ka tum apianga lo lang ṭhin nge maw a nih le tiin ka ngaihtuah neuh neuh a.

Ka hrawk za avangin ka khuh a chhuak ta tlat a, loh theih lohin ka men a ngaih phah a, ka nu chuan tui min lo pe vat a, ka in nghal khawlh khawlh a. 

Ka nu phone a rawn ri a, kan awmna room chu signal a ṭhat lutuk loh avangin kalsawn deuh a ngai ṭhin a, room pawnlama chhuahpui a ngaih changte a awm bawk a, ka nu pawh chuan lehlam ṭawng a hre ṭha thei lo ni ngei tur a ni pawnlamah a chhuahpui ta daih a.

"I zia zel niin ka lo hria a.." a aw pa tak chuan a rawn ti sup a, ka lamah tlemin a rawn tawlh hnai pah hlek bawk a.

"Nia, ka zia tawh khawp mai. Tunkârah hian kan chhuak thei tawhin ka ring!" ka aw chu a khurh loh hram ka beisei!

"Zanin chu i bialpa a rawn kal lo ve teh mial a ni maw?" A aw-ah chuan nuihzatna a telin ka lo hre pek a!

"Ka bialpa nia i sawi chu tunge a nih ka hre hauh lo naa tumah an lo kal lo chu a nih hi!" ka lo ti deuh hmak a.

"Mahni bialpa te hre lo rual chu i nih tawh bik loh kha le! In chetsualnaah khan i thluak lamte hi i lo sawh khawlo tel zawk chu a ni em lo maw?"

A aw-a min deusawhna lo lang chu ka hai hauh lova, ka chhûngrila lungawi lohna awm chu a rawn irhchhuah mai lohna turin ka insûm hram hram a. Eng anga lungawi lo leh thinur pawh ni ila a hriat ka duh lova, engah mah ngai lo anga awm leh ka tan engmah a ni tawh lo tih lantir chu ka tum nghet bur a!

"I bialnu i rawn hruai lo a ni maw? In inhmeh dun khawp kha mawle!" A thil sawi ngaipawimawh awm lo zet chuan ka ti zang vah a.

Min chhan tum lovin ka mitah chuan min en reng a, nui hmel a pu tawh lova, min deusawh hmel a pu tawh hek lo. Ka zamrukna chu dahṭha-in ka melh let ve ngar a, a mitah chuan tunhmaa ka hmuh ṭhin ngaihsakna leh min thlakhlelhna hmu-in ka inhria a. Mahse, ka duhthusam, a taka thleng tura ka duh a nih vanga hmusual mai chauh ka ni tiin ka rilru ka tikhauh a, amah beisei leh a zuam tura awm lo turin ka theihtawp chhuah ka duh a ni.

Ka nu a rawn luh takah chuan kan inhawisan ta hram a. Engmah thleng lo ang hmakin ka nu chu a ti tipui leh bawrh bawrh a, a zia a thup hneh lutuk chu ka lo haw ru riau thung a.

Chumi kâr chhovah chuan zantin deuhthaw a rawn kal ta ziah lawi a, a bialnu erawh a rawn hruai leh ta miah lo. Midang hriatah pangngai takin kan inbia a, kan pahnih chauha kan awm hlek erawh chuan inhre ngai miah lo ang maia kan awm loh leh ṭawngkam na deuh taka inkhak fek fek chunga inbiak bak hmasawnna kan nei lem lo. 

Kar tawp lamah ka chhuak thei dawn a ni tih ka hriat chuan ka lawm hle a, ka ke an ṭhuina chu vanneihthlak takin a damṭha sawt hle a, engmah han sawisel zui tur a awm lem lova, ka ngala ser awm tur erawhin ka rilru a kap ve deuh thung.

Mahni khum ngeia fai taka han mut chu a nawmdan a dang zar mai a, ni eng emaw zat ka mut theih loh hnuah ka mu leh thei ta chu nuam ka ti hle a. Inleng neuh neuh kan nei naa an haw hun pawh nghak zo lovin ka mu ta daih a. 

Zanriah ei dawnah ka nauvin min kaitho a, ka thil ei pawh a tui chho viau a, a hmaa ka rilru na vanga mu thei lo leh thil ei mumal lova ka awm lai khan ka lo cher hman viau mai a, ka thil ei a tui chhoh leh takah chuan ka taksa pawhin ngai a awh chho leh mek zel a, ka mu tamin thil ka ei ṭha bawk a, ka taksa pawh a inphut mawi tawk chho leh tawh viau a ni.

Zantin Ṭpa a rawn kal ziah a, rei erawh a awm ngai lem lova. A awmdan chu mak ka ti lek lek ṭhin a, eng emaw changa min la thlahlel ni awm taka min melh leh vang vang ṭhin han hmuh phei chuan ka rilru ka lo pe thuk hman leh viau tawh ṭhin a, inngaihtuah harh leh vatin midang ta a ni tawh tiin ka inhneh hram zel zawk a. A hma anga nat nawn leh kha ka hlau a, tun aia thuk zawka ka rilru ka pek leh mai chu ka hlauh ber a la ni fan a ni.

Rinsanga pawh a rawn kal reng reng a, Ṭpa awmlai nen a innanfuh changa a awmdan hi mak ka ti ru deuh ṭhin a. Ka bulah kher ṭhu-in eng emaw remchang hlekah ka kut emaw ka taksa khawilai emaw siin a kut hi a lo dah vat zel a, han duh loh ngawt dawna chetdan uchuak ni hauh si lo hian a awm thiam roh bawk si a, a ngaihna ka hre lo ru ṭhin viau mai.

Check-up tura kal tura min tih ni a lo thlen chuan ka nu nen taxi la-in kan kal a, kan incheck-up zo kan haw leh turin taxi kan chanlâi chuan Ṭpa motor hi kan bulah a rawn ding a, min hruai haw a tum tih a sawi chuan luhlul chhuahin taxi-a haw kan tumthu ka lo hrilh hmak a, ka nu erawh chu lawmthu sawi pahin a ṭhu lut fel then thung a, tihngaihna dang awm ta hek lo le tui lo ru zet chung chuan ka ṭhu lut ve ta nge nge a, hnehtu inti taka nui chunga min rawn en chuan ka lo nerkhum vak a, a nuih a za zual sauh ni ngei tur a ni a ha var rual ṭhat lang chuan a nui ta var var a. Tihngaihna dang hre hek lovi hmu miah lovin pawn lam chu ka thlir ta daih a.

An dan pangngaite-in ka nu nen chuan an ti ti bawrh bawrh a. Mak ka tih leh deuh pakhat chu khatia ka laka a rinawm loh hnu khan Ṭpa hi ka nu hian a lawm vak lo ṭhin kha a ni a, damdawiin ka luh tirh lama damdawiina a lo kal pawh khan a lo be miah lova. Tunah erawh a fapa emaw tih mai turin a be ṭha-in a fanu natna thlentu kha a ni tih theihnghilh fel hmak hmel a pu tawh a ni.

In kan thlen rualin motor aṭangin ka chhuak nghal a, hmanhmawh ru takin inchhûngah ka bai lut saih saih a, ka roomah lut nghalin khumah chuan ka ṭhu vang vang a, muangchânga inthlakin ka indahfel vel a. Ka nu min ko ri niawm tak ka hriat tak avangin room aṭang chuan ka chhuak phei ta nghal a.

Sitting roomah chuan Ṭpa chu hahdam hmel zetin a lo ṭhu a, ka nu chu tray-a thingpui chawiin choka lam aṭangin a rawn phei ve chiah bawk a.

"Tikhan lo inkawm ula, kawmthlangte damlo hi eng nge an an zel tih ka zu ngaihven lawk ang e. Lo leng reng rawh aw Puia, ka lo chho leh har lovang," dawhkana a tray ken dah pahin ka nu chuan a ti mawlh mawlh a, kan chhanna pawh nghak tawh lem lovin a chhuak ta nghal daih a.

Ngawi rengin thingpui chu kan in a, kan inna no ruak chu sengin chokaah chuan ka sil ta nghal a, ka ke avang chuan duh angin ka che zung zung thei lova, ka no silsa ka dahfel zo ka inher chiah chu min si lo chauhin a lo ding chu niin hnai set sawtah kan inhmachhawn ta siah a!

Kalsawn tuma ka chet rual chiah chuan ka kawngah rawn kuahin amah si chétin min hnukhnai a, a chetdan chuan min ṭhawn êm avangin ka hamhaih deuh a. Chutianga awm chu ka tan a ṭha dawn miah lo a ni tih ka ngaihtuah chhuah rual chuan ka tal ta phat a, ani lah chuan min vuan nghet sauh thung a. Hnai set sawtah, ka hmai si lo chauha hnaiah rawn kunhniamin ka mitah tak chuan chiang em emin min en a, tal chhuak thei hek lovi cho âr chungin ka lo melh let ve ngar a.

Zawi mûanga a hmuiin ka hmui a rawn bawhthuah takah chuan he mihringpa-in keimaha huhâng a neih ṭhin chu pakhat mah a la danglam lo a ni tih ka hre thei nghal a, ka mamawhna pawh a lo la ngai reng a nih hi!

Min fawhna chu a duhthawh tial tial a, ka lo chhanlet ve takah phei chuan rilṭam takin kan inkeih tawn huam huam a ni ber a! Ka hmui aṭangin ka biang vel a nul chho zai zai a, a lo tih ṭhin fo dan angin ka nghawng lamah fawp thla-in ka beng lamah a chho leh a, ka beng a seh tak ner nerah chuan ka lo thaw hak a. Ka beng bulah chuan a rawn phun sup a, a aw sexy lutuk pawh a lo la ngai reng e!

"Hetianga awm ka chak theihzia hi i hre hauh lovang! Min kalsan chhan hre reng chungin ka ngai tho che a, ka la thlahlel reng mai che a nih hi!"

A thil sawi chuan ka chen mêkna khawvel aṭang chuan min kaiharh chiang kher mai! A âwmah chuan ka nam dawrh a, a lo inrin lawk lem loh avangin chaw ei dawhkan nghengin a eu phei deuh awrh a, insiamremin a ngaihna hriat loh hmel zetin min en ta reng a.

"Khawngaihin min chhuahsan rawh!"

Min chhang lova, a che sawn eih lo bawk! A mit chuan hmun dang a melh lo hrim hrim a, intihuai luiin ka theih tawka rumin ka lo melh let a. Ka taksa khur nasa lutuk chu thunun tumin ka inlekkhawng lui tlat a, khatiang mai maia sihhnip leh thlem awlsam lutuka ka awm kha ka thin a rim hlur mai a, eng ang chiahin nge min ngaih anga min hnuaichhiah leh ang tih chu ka ngaihtuah a, min hmuhsitna belhchhah tura khatianga ka awm kha ka inhaw kher mai!

"Ka kal ang. Mahse, hei hi lo hre rawh - ka beidawng dawn lo, ka lo kir leh ang. I thinlung nei let leh tur hian ka theihtawp ka chhuah dawn a ni. Ka neih loh eng thil nge kha pa khan a neiha engtiang chiaha lungawina nge a thlen che tih hi ka la hre ngei ang!"

A thusawi awmzia chu ka man lo hle a, engvanga ngaihzawng nei anga min ngai tlat nge a nih tih lah ka hre hek lo. 
Ka inngaihtuah buai chhungin a lo chhuak fel der a, ka room lamah bai pheiin ka khumah chuan ka tluzâl nghal a. Kan pahniha hun hlimawm tak kan hmandun tawhte chhui kirin thil kal tawh ngaihtuahin ka mu ta reng a.

Ka nu min au thawmah ka harh a, khatia ka tluzâl mai mai kha ka lo muhil daih chu lo niin! Khua chu a lo tlai ruih tawh a, ka tho vat a, ka inbual nghal a, ka inbual zawh meuh chuan zanriah ei a hun chu a ni der a.

Zanriah eikham hnu lawkah Rinsanga leh a ṭhianpa an lo kal a, a ṭhianpa chu amah ang bawka ṭawngduh leh kawm nuam tak ve tho a ni a, ka pa chhuah loh zan a ni bawk a, ka pa ho chuan an ti ti tui viau a.

"Naktuk chu Zaii te kan va ṭawiawm ve loh chuan.. inneih inkhawm chhung tal kan va awm ve ang chu tiraw?" Rinsanga'n min en paha a tih chuan ka lu ka lo thinkhum vat a. Dam viau tawh mah ila ka la kal bai nasat avangin khawiah mah chhuah ka peih lova, bai nasa tawh lo mah ila mipui punkhawmna hmuna kal tur chuan ka la insit a, chhuah tam loh ka la duh ber a ni.

Rinsangate haw tur leh Ṭpa rawn lut chu an intawk a, awmze nei deuh taka Rinsanga lam melh zeuh paha min rawn siai khum deuh sak chu ka hmu a, a thiltih awmzia erawh ka hre hauh thung lova. Chhun lama thil thleng kha ka rilru-ah a rawn lang zawk a, kan awmdan ka ngaihtuah chuan ka zak ru ngawih ngawih a, khatianga min awmpui thei ta chu tu mipa pawh ni se len hunbi nei lova lo kal mai pawh awm tak a ni!

Ka chhungte an mu reh ṭhap tawh a, kan pahnih chauh chuan kan ṭhu dun ran a, ka bula a rawn insawn chuan naupang chhia takin ka lo tawlhsawn vat a, engah mah ngai lo lutuk hian min si chetin a rawn tawlh ve nghal a. Chutianga zah lo taka min han ti vel chu ka thiam loh ni tho mah se ka lawm lo hle a, mahni inchhungah ngei a tlawm zawka ṭan chu ka tum ṭhak lo a ni.

"Khawngaihin pangngai taka min kawm thei lo a nih chuan min va hawsan tawh mai ta che! Hetia zah lo taka min tikual mai mai tur hian tunge maw i nih chiah le?" 

Ka ṭhutna aṭang chuan ka tho phat a, ka lungawi lohzia chu ka aw-ah a langchhuak chiang hle bawk.

Muang changa rawn dingchhuak ve-in min si chetin a rawn ding a, ka lo tawlhsawn vat thung. Chutia ka lo tawlhsawn vat vang chu nge ni a nui hul hak a, a kekawr ipte zen chung chuan min en a, thawk a la hak a.

"I rilru kha i thup thei chuang lo, ka hrechiang lutuk tlat che! Chuvangin, i luhlulna kha dah bo la, ṭha takin thil sawi dun ang."

Mahni inrintawkna nei tih hriat taka a ṭawng hi a hma aṭanga amah ka duhna tizualtu a ni ṭhin a, a aw-ka chhuak chuan lairil a fan a, ka thisen kallai a tichawl lo chauh chu a ni e!

"Nang nen hian sawi dun tur kan neih ka hre hauh lo mai! Min hawsan zawk mai rawh."

Ka rilru tipaukhauh luiin aw ki chang deuh hlekin ka tichhuak thei hram a. Nem taka ka chhang a nih chuan min neklui leh duh mai dawn tih ka hria a, luhlul chhuaha ka dan a ngai a, ka dang a nih loh chuan ṭang tur ka awm hauh dawn lo tih pawh ka chiang a ni!

"Luhlul reuh lutuk mai!" tih pahin a lamah min pawt rawk a, amah rinchhan tak meuh meuhin ka ding a ni ta ngawt a! Inlakhran ka tum chuan hneh lutuk tak maiin min kuahbet tlat a, ka tana chet ngaihna awm lo khawpa nghetin min kuahbet a ni.

Min fawh tuma a rawn kunhniam takah chuan ka lo thlesawn vat a, ka tukkhumah dawmin hawisawn thei miah lovin min vuan bet a, min fawh chhunzawm leh nghal zat a.

Ka theihtawpin fawp let lo turin ka inthunun hram hram a, keimaha amah mamawhna awm chu danlet tumin ka bei nasa hle bawk. Min tawh ringawt pawha ka taksa-in a lo dawnsawn ṭhat theihzia ngaihtuahin min fawhna leh lek phei chu hnar theih loh tluk a ni a. Mahse, ka intipaukhauh lui tlat a, ka hmui chu chip lui tlatin min fawhna chu ka tan engmah lo mai a ni tih lantir chu ka tum fan a.

Thawk lak hak pahin a inlahrang a, min thlek vang vang hnu chuan a lu a thing nawk a, a nui ta suk a.

"I luhlulzia hi ka lo theihnghilh leh ṭep ṭhin alawm mawle! I mitmeng en hi chuan min thlahlel ve tih ka hmu thei a, i luhlulna avang lîau lîau-in a takin i tilang duh lo mai chauh zawk a ni e," nuihza insûm tih hriat tak chungin a tichhuak sup a.

"I hresual a nih chu!" ka lo ti hmak a, a thusawi dikzia erawh ka hrechîang hle thung.

"Aw le, a ṭha e. I pawm duh dawn chuang lova, ka hnial lo mai ang che. Ka thlahthlam hauh dawn lo che a ni tih erawh ka sawi leh hrám ang."

<><><><><><><><>®️

MY ONE AND ONLY VALENTINE - II
SBK Pachuau

Ka mutnaah chuan ka chunga thil thleng mek chu ka ngaihtuah zui rauh rauh a, Ṭpa awmdan chu ka hrethiam lo telh telh a, engmah sawi chian leh i a awm lova, a duhdan têa awmin ka duhdan leh ngaihdan engmah a ngaipawimawh lem lo tih a lang reng a. Ama thua kalin a duhdan leh ngaihtuahna milin a khawsa a, eng angin nge ka lo dawnsawn ve dawn tih lam rêng rêng a ngaihtuah ve lo niin a lang.

Ka ke lam pawh a ziaawm chho zêl a, an ṭhuina pawh a dam ṭha vîau mai, ser erawh a awm lo thei dawn ta lo a ni. Hna ka zawm tawh a, buailai a nih lem loh avangin a zia vîau a, hahdam takin hna ṭul a awm a nih pawhin rilru hmanhmawh lo takin kan thawk a, a hahdamthlak phîan mai. 

Tlaikhat ka office bang ka chhuak chu office building kawta Ṭpa, a motor nghenga lo ding ka hmu a, ka tum loh tawpa hmu ka nih avangin ka makti hmel chu ka thup hman lova, chu chu a hmuh chuan a lo nui suk a. Hmuhloh dera han kaltlang mai ka duh tehréng nen kan inhmu chîang mai si a, han hel ngaihna awm hek lo muang chângin a lo dinna lam pan chuan ka kal phei a.

A bul ka thlen chuan eng dang sawi lovin a motor kawngkhar chu a hawng a, "Lut la.." a ti sup a.

"Eng vang... engtin.." ka sawi duh ka sawichhuah theih hma chuan min nemlutin kawngkhar chu a khar fel hman der tawh a. Ani pawh chu rawn ṭhu lut ve nghalin ka lam hawi chuan a rawn nui var var a, rum tawkin ka lo melh let nghek ringawt a.

Chutihlai tak chuan chak fahranin bike hian min tlan pel fua a, Rinsanga bike a ni tih ka hriat chuan ngawi rengin ka thlîr zui a. Ṭpa chuan eng emaw zawhna nei hmel pu hian min rawn melh a, hrethiam lo zetin ka lû ka lo thin khum ringawt a!

"A phurh haw hûal ka lo phurh khalh daih si a, a lawm lutuk lem lo niin a lang, buaina lian tham a thleng em lovang chu maw!" nui deuh chunga a tih chuan ka lo ner sawk a, nui hmêl la pu reng chung chuan motor chu a khalh chhuak ve ta nghal a.

Kan in kawt kan thlen chuan chhuk nghal mai ka tum a, ka kutah chuan vuanin min dang a, engvanga chutianga ti chu nge a nih tih ka mitmeiin ka zawt a.

"Angie, thil sawidunna hun min siamsak hrâm teh. Thil awmdan engkim sawi dun ila, siam ṭhat ngai lâite kan sîamṭha dun ang a, a hma ang khan awm leh ka duh a ni."

"Engmah sawi dun tur kan nei tawh lo ka tih kha... kha i thiltih avang khan kan inkâr chu zawm leh theih miah loh turin a chat fel hmiah tawh, sawi dun tih vel chu ngaihtuah lo zawk mai rawh."

"Eng thil nge kan inkâr tichat tura ka tih? Nangmah zawk hi a ni lawm ni ngawi renga min kalsantu kha?" A aw chu a chang ṭha ta hle a.

"Sawi sawiin awmzia a nei lo, ka kal zawk ang e, min thlah avangin ka lawm e," tih pahin motor aṭang chuan ka chhuak nghal a, min lo dang tura ka beisei rilruk ang erawh chuan min dang hauh lo!

Chumi zan chuan a rawn lang ta miah lova, a lo kalin lo ngaihsak miah lovin lo be ngai lo pawh ni ila a awmdan ngai rengin a awm a, a chetdan a danglam phah lem lo. Kei pawhin ngaihven leh ngaihsak tak anga lan ka duh loh avangin kan inbiak mang loh ṭum pawh a awm fo a, lo kal lo mah se pawi ti lo niawm fahranin ka lo awm ṭhin kha a ni a. Tunah a rawn lan tak lohah chuan ka mit kawngkhar lamah ka len ru zing hle a, pawn lama thawm a awm hlekin ka ngaihven hrâ zel bawk a, ka awmdan chu hahthlak tak a ni. 

Ka mut hnuah pawh muhil mai thei lovin ka ngaihtuahna a luah reng a, eng thil nge sawidun a duh chu ni anga engvanga bulṭan ṭhat leh duh nge a nih ang tih chuan min tibuai a, a bialnu nen intithiam lovin min kawp leh beiseia min hel ni anga ka ngaihtuahin a zia nen a inmil thei bawk si lova, ka ngaihtuahna buai nuai chu ka remkhawm thei lo a ni ber mai.

Ka phone ri-ah chuan ka phu deuh zawk a, zan a rei deuh tawh avangin tu lo call nge tih chu ka en vat a, min rawn calltu ka hmuh chuan ka chhûngrilah ka khur nghal titih a, keimaha huhâng a la nei nasa lutuk hi ka haw tak zet a ni.

"Hello..."

"Pâwnah rawn chhuak teh.." 

A rawn ṭawngdan teh tâwng chu a thlum lem lo hle a, hnial a sawt dawn hauh lo tih hre reng chungin ka hnial hram tho a.

"Ka mu tawh!"

"I rawn chhuak dawn nge ka lo lut dawn?"

A aw chu a chang ṭha beng bawng hle a, eng thil nge maw a hriata chutianga thute min han pek khanglan chu le ti rilru chung reng siin ka tho a, shawl chu batin thawm dim takin ka chhuak ta nghal a.

Varanda engin a chhun phak chin chiahah a lo ding rún a, a bul ka thlen rual chuan ka kutah kaiin a motor hunna lam pan chuan min kalpui nghal a. A motor awmna kan thlen chuan a kawngkhar chu hawngin lut turin min ti a.

"Khawiah mah ka kal duh lo!" ka ti ram hmak a, a duh duha min tikual vel chu ka ngaithei ṭhak lova.

"Khawiah mah kan kal dawn lo, motor chhungah hian ṭhu-in thil kan sawidun lawk mai dawn chauh a ni."

Kan ṭhut hnuah chuan kan ngawi dun vang vang a, ka hmanhmawh rilruk deuh avangin sawi duh pawimawh a neih chuan sawi thuai turin ka mitmei a.

"Engvanga ngawi renga min kalsan nge i nih? Kha pa, i thawhpuipa vang kha a ni em?" 

A thil sawi chuan min tikhawng awt lo chauh a, engtin nge kan inṭhen chhan kha amah vang ni lova keimah vang ni zawk ang maia thu a kalpui mai le!

"Ka kalsan chhan che hre lo khawpin i lo tal bâwraw chu a ni em lo maw? Nge khatih hunlai khan i lo harh chîang lo zawk?" 

Ka aw chu a khur deuh dar dar a, vawt ka tih vang ni lovin ka lungawi loh êm vang zawka khur a ni.

"Ni e, min kalsan chhan kha ka hre lo rêng a ni. A tirah chuan kha pa vang kha emaw ka ti a, mahse, accident i tawh hnuah ka chhui chiang a, i bialpa a ni lo tih ka hre tawh. Chuti si engvanga min kalsan nge i nih tih hi ka hre duh a ni, i mitmengah min duhna leh thlakhlelhna kha a la awm reng bawk si a!"

"I hre sual a nih chu!"

"Hresual love, tunah ngei pawh hian ka sawi dik a ni tih ka lantir thei reng a nia.."

"Han tum chhin la.."

"I inchhir lehna tura chet lak chu ka duh love, thiltihin lantir lo mah la i rilru chhûngrilah khan i pawm tih ka hre vek tho."

"Dawt...."

"Dawt a ni lo tih chu kan pahnih hian kan hria alawm!"

A kut rawn phar chhuakin ka biangah a rawn chûl a, duh lovin ka lo thlesawn vat a, ani pawh chuan min khawih chu a tum zui ta bik lova.

"I bialnu nen in intithiam lo a nih ka ring, chuti ni lo se tunah te hian ka bula awm lovin i bîalnu bulah i awm ngei awm si a!" 

"Tunah hian ka bîalnu bulah ka awm reng alawm! Nangmah lo bialnu ka nei lo."

"Ka awih lo tih hi ka pha lo mai ang e, kha nu...."

"Atu kha nu pawh chu lo sawi la i ngaihdan a dik lo a ni tih chîang takin ka hrilh thei ang che." 

"Ka ngaihdan ni lovin thil nihdan dik tak zawk a ni alawm, i awmdan chu nangmah khan i hrechîang ber ang chu! Dawta phat kha tum buai lo mai rawh."

Ka darah a rawn vuan a, vuan satliah aia na hretin! 

"Tu hnen aṭangin nge tih leh eng ang chiahin nge ka chanchin i hriat tih chu ka hre hauh lova, i thil hriat erawh a dik hauh lo a ni tih ka hre thung."

"Ka mit ngei hian ka hmu che u alawm! Chu bakah nei lo tak tak ni la chuan khati maia awlsam khan min rehsan lovang.."

"Ka thu hriat ang kha hre ve ta la i reh ve tho ang. Ka tân rawn umzui che kha a tlawmthlak lutuk! Mipa dang nena kawp nih hi tu mipa mahin an duh hauh lovang!"

A thil sawi chu mak ka ti a, ka nunah ani bak an awm lova, 'kawp' tih thumal nen chuan ka zia a inhlat lutuk tlat! Ama awmdanin a zir loh avangin ka chunga thiamlohna bûrbun a tum a nih ka ring ta ber a.

"En teh, helaiah hian i dawt sawi ngaithla tura awm reng turin hun ka nei lo. Mut ka duh a, ka lut dawn a nia," tih pahin ka dara a vawnna chu ka phihthlaksak a, chhuah mai tumin car kawngkhar hawn tum chuan ka bei nghal a, ka hawng thei hauh lo mai le!

Ka bânah rawn vuanin a lamah min hnukhnai deuh a, ka kawngah a kuah zui nghal zat bawk. Ka lo ṭanlet vena te chu engah mah ngai lovin hneh zetin min kuah bet a, ka awmdan chu a rem loh em avangin ka duh angin ka ṭang thei bawk si lova, a âwmah chuan min kuahbet ta reng a.

A taksa nghenga awm hi ka lo la thlahlelin nuam ka la ti veng veng a lo ni! Inlahranga a khawih phak lova awm tur ka ni tih ka inhria, ka taksa erawhin a la thlahlel si! Amah ka duhna leh ngaihna a kiam tawh emaw ka tih kha a lo la ngai reng a, a hma ang reng khan min tawh leh kuah vel chu nuam ka lo la ti a, keimaha huhâng a neih natdan pawh a la ngai reng a lo ni!

Ka khabe-ah dawmin zawi mûangin amah en thei turin min kuai dak a, a mitmeng rum lam lek lekah chuan min ngaihsakna ka han hmu a, a ngaihtuahna zawng zawng keimahah a chhunglut vek ni mai awma mâwiin min melhdan chu a rîl a ni!

Muangchânga rawn kunhniamin ka hmuiah chuan dam dapin a rawn fawp a, amah ka duhna leh thlakhlelhna a la ngai reng a, ka taksa-in ami tawhna a dawnsawndan pawh a la ngai reng bawk! Insûm buai miah lovin a nghâwngah zen chhovin a tukkhum sam kârah ka kutzungṭang ka rawlh a, a mi fawhna chu ka lo chhanglet nghal a.

Ka lo chhanletna avang chuan a duhthawh zual sauh a, kan theih tawka uarin kan infawp a ni ber e. 'He mihring' hi ka hmangaih a, chu ka hmangaihna chu engtikah mah a reh tawh ngai dawn lo a ni tih ka hria! Eng anga nasa pawhin haider tum mah ila ka hmangaihna chu a danglam ngai dawn lo a, ka duhna leh thlakhlelhna lah a kiam dawn hek lo! A hnu-a ka inchhir lehna tur pawh ni se ka thlakhlelhna tihlan hi ka duh a, engtiang chiaha rei nge ka khawih phakah a awm dawn ka hre lova, amah khawih phaa ka awm theih chhûng chu hnar ka tum buai ta hauh lo bawk!

Ka khuma ka mut leh meuh chuan ka awmdan avangin ka inchhir leh titih der tawh a, a tuka lenchhuahpui tura min sawmna ka lo pawm maite pawh chu inchhir nasa tak ka ni. Ka chhuak leh thei dawn lo a ni tih va hrilh leh nghal chûk chûk mai ka duh a, ka ngaihtuahna kil khatin ti lo tura min lo dan avang chauhin ka call ta bik em lova!

<><><><><><><><><><><>®️

Office chawlh a ni a, Ṭpa a lo thlen chuan ka lo inpeih fel ve chiah a. Khawiah nge min hruai a tum ka hre lova, ka pâwng zui chhuah ve ngawt mai a ni. Ka nu lah chuan kan chhuak dun tur chu min hnial ahnehin min phurpui hmel phian a, ka nu rilru hi a hneh viau a nih ka ring rilru ngawt a!

An vêng lam panin min tlanpui a, an inah min hruai dawn ni-ah ka ngâi hmiah a, ka zawt lem lova, ani pawhin min hrilh a tum chuang bik hek lo. An inah hian kan inngaihzawn lai khan vawihnih vawithum vel chu ka kal ve tawh a, a nu leh pa bakah a farnu pahnihte nen an khawsa a, a farnu tê ber(an unau zînga naupang ber) erawh phai lamah lehkha zirin a awm bo thung a, chumi tih loh a chhûngte chu ka hmu kim vek tawh a, chhûngkaw pângngai tak an ni. 

An in kawt kan thlen chuan ka zam thar leh deuh a, motor aṭanga ka chhuah rual chuan thawk ka la ru halh a, ka kut a rawn vawn chuan ka lo ṭang deuh ṭung a, zawhna zawt mitmengin min melh a, ka lu ka lo thing vat a. Nui sukin inchhûng lam pan chuan min kai a, min kaihna aṭanga ka kut laksawn tuma ka pawh deuh chuan a lo hum nghet sauh a, engah mah ngai lovin min kalpui zel a.

Inchhûng kan luh chuan tumah hmuh tur an lo awm mai loh avangin ka thaw ru deuh huai a, ka kut chu laksawn tumin ka la bei fan a, ngai pawimawh lo zetin sofa-ah chuan a ṭhu a, min pawt ṭhu ve nghal zat a.

Kan ṭhu fel deuh chauh tih chuan inchung lam aṭangin a nu a rawn chhuk a, min hmuh rual chuan min be nghal bawrh bawrh a. A nu hi nu nelawm tak, ṭawng duh ve tak mai a ni a, kei pawhin ka ngaina-in an ina ka len ve châng pawhin tlangnêl takin ka awm ve theih phah ṭhin a, nu ngainatawm tak mai a ni a, a pa erawh chu amah Ṭpa ang bawka ṭawng tam lutuk lo a ni thung. A farnute pawh an felin an nelawm hle a, an tê ber erawh ka la hmuh loh avangin eng ang mize pû nge a nih ka hre lova, an duat ve hle a ni tih a chanchin an sawidan aṭangin ka hre thung.

A pa leh a farnute pawh inah an awm ve vek a lo ni a, min hmuh chuan mak ti hmel pu lovin ṭha takin min be vek a, ka ṭang ru ṭeuh pawh chu ka inthlahdul ve hret hret a. Tuna ka buaina ber ni ta zawk chu min si chéta Ṭpa ṭhu chu a ni, ka kut a la vuan zui! Ka kut chu a langsar lo thei ang berin ka lasawn a, a vuan lui ta bik em lova.

Ka phone a rawn ri a, Kimi a lo ni a, ka chhan rûal chuan min rawn ṭahkhum nghal titih a. A rang thei ang bera min hmuh a duhthu sawiin inhnît deuh hlap hlap chung chuan a awmna hmun a sawi nghal bawk a, Ṭpa chu thil awmzia hrilhin kal mai ka duh tih ka sawi a.

"Ka hruai ang che," tih pahin a tho a, kei pawh chuan muangchâng lovin ka zui a.

Kawngka bulah chuan hmeichhe pahnih lo lut tur nen kan intáwk a, pakhat zawk hmêl ka hmuh chuan ka penlâi chu ka tawp chawt a, kha mi nî-a Ṭpa'n dawra a kalpui hmeichhia ngei kha a ni, ka phone pawh chhâng ṭha hman lo khawpa a buaipui hmeichhia kha! Anni pawh min hmuh avang chuan an ding ve nghal a.

Ṭpa chuan ka darah a rawn kuah a, kha mi nî-a a hmeichhe kalpui lam chu hawiin, "Mate, hei Angie-i, a thlalak pawh i hmuh tawh kha."

Ka lam rawn hawi lehin min nuih suk a, "Angie, hei hi kan naupang ber Mâwite-i chu a nih hi, i la hmu lovin ka hria a!" 

Mâwite-i chuan nui sânga min en chungin min chibai a, min hmuh a chák ṭhinzia chu a sawi nghal sîam sîam a, ngâwi rengin ka lo chibai let ve tawp! Engmah sawi tur ka hre lo a ni tawp mai a ni!

Kimi awmna lam pana kan tlanlâi pawh chuan ka rilru-ah thildang a lut thei meuh lova, ka thil hmuh kha a landana ngaihdan siam ngawt lovin lo zawtfiah hmasa ta ila khatiang tehhrepa ka tawrh kha a ngai hauh lo tur a nia! Thawk ka la halh a, Ṭpa chuan ka awmdan chu mak tih hmel deuhin min melh leh zauh ṭhin a, a tawpah chuan a rawn ṭawng chhuak ta nge nge a.

"Kimi chungchâng i ngaihtuah nge thil dang vang zawk?"

"Ah..aw...ni deuh tho. Michael hian hmeichhe dang a kawpsan ta tak tak a nih ka lo ring mai mai a!"

"Chumi vang a nih chuan a ṭhat hlauh chu! I hmêl en kha chuan chu aia ril zawk ngaihtuah hmêl i pû alawm.."

A ngaihṭhatna'n ti ni-awm fahranin ka nuih sak a, a bialnu emaw ka lo tih kha a farnu zawk a lo ni reng tih ka hriatna chuan ka chhûngrilah hlimna min siam a, ka tihsual chu a liam tawh a, hun kal tawh chu ka ko kir thei tawh lo. Chuvangin, hun lo la awm leh zél tur atan thil awmdan hrechiang hmasa lova kalsan leh mai mai chu ka tum tawh lo bur mai a ni. Kha MLA fanu chapo deuh pawh kha a bialnu a ni lo tih a sawi tawh a, a tirah khan ka awih lo deuh kha a ni a, tunah erawh ka pawm ta hmak thung.

Kimi awmna kan thlen chuan a lo ṭhu ngui bâr a, ka lo rin rilruk dan ang chiahin Michaela bialnu neih a manchhuak a lo ni a. Ṭap deuh pár chungin thil awmdan chu min hrilh a, han hnem viau ngaihna ka hriat loh avangin a thusawi chu ngâwi rengin ka ngâithla a, Ṭpa chu min rawn zawm ve lovin motorah a lo awm a.

Kimi phone chu a ri reng a, chhan erawh a tum hmel loh hle a, Michaela a nih ka ring mai a, a rik nawn tak sekah chuan a off ta hmak a. 

Michael hian han lerhsan vîau ṭhin mah se Kimi hi a duh ve riau a, a thlah phal tak tak bik lova. Ani Kimi lahin a lo duh hneh ve bawk nen an inthlem lungâwi leh nge nge ṭhin a, tun ṭumah pawh hian an inthlem lungâwi leh thei maiin ka ring a, a sârhú laiin han la vung vïau ṭhin mah se duhberte na na na chu an inpawmrem leh nge nge mai zel a.

Ka phone a rawn rik tákah chuan ka bag chu ka zen vat a, ka phone chu phawrhin ka en nghal a, Michael a lo ni a!

Kimi a biak theih loh avanga a mangan thu a rawn sawi chuan a ṭhat thu leh ka bula a awm mêk thu ka lo hrilh vat a, biak a duh tih a sawi erawh chuan ka lo hnial thung a, a inthiam lo ve deuh nge min nawrlui ngam bik lova, hmuh a duh a ni tih sawi tura min chah erawh hrilh ka intiam thung.

MY ONE AND ONLY - III
SBK Pachuau

Zanah chuan chhuahna tur pawimawh a neih avangin Ṭpa a rawn kal lova, a tuk chu Valentine's day a ni a, zanlamah min lenchhuahpui a tum tih a sawi lawk tawh a, zaninah inhmu lo mah ila a tuk lama kan inhmuh tho dawn avang chuan ka lungâwi lo lem lova. Mut hmunah erawh rei fê kan inbe leh a, kan inmangṭha meuh chuan zanlâi a pel vah tawh a.

Ka ke a la dam chíang lova, ka la kal bai saih saih a, duh angin ka inchei nalh thei lova, pheikhawk hniam bun a ngai bawk nen inchei pawh a phurawm loh ka ti a, han inchei dan tur ka hre mai lova, a tawpah chuan mawlmang leh zahawm tak si chuan ka inchei ta ringawt a. Dârthlalang-a ka landan chu ka duhthu a sam chiah lo naa ka dinhmun enin chu aia nalha han inchei vak ngaihna awm hek lo, keimah leh keimah chu ka inhnem lungawi ta vel mai mai a.

Ṭpa a lo thlen chuan ka lo inpeih fel at tawh a, ṭhu khawmûang lovin min kalpui ta nghal a, a sawi hmangah min hruaina hmun tur chu khawilai Valentine's day program emaw berah a nih hmel a, nalh tak taka inchei kârah ke bai chung lehnghalin ka awm ve dawn chu a ni si a, ka phur lem lo viau a, Ṭpa lah chuan chutiang lam chu a ngaihtuah hmel loh hle a, duat hmel taka min en leh remchâng apîanga ka kut vuan zauh zel chung chuan motor chu a khalh a. Hotel changkáng zet, vawikhat pawh ka la luh miah lohna kawtah chuan motor chu a tiding ta a, ka zam a ni tih tilang mai lo turin ka infuih ru sauh sauh a.

Music a ri rîai rîai a, mawi lutuk tak maiin hmun eng emaw zatah rose pâr sen a inkhâwi thliah a, an cheimâwi tak zet a ni! A tua mai pawh chu an nalh êm êm vek a, ka inthuamna lah a mawlmang nasa mai si a, nuam chu ka ti chiah lo deuh a, Ṭpa'n ka kut a vawnna chuan min tithlamûang hlauh zawk mai pawha! 

"Ka rin âia i lo thlen hma ve tehmial chu! Kei pawh ka thlenna a la rei bik lo, nghah rei i ngâi lo chu a lawmawm e."

Ṭpa bânah chuan a rawn vuan nghal a, kan MLA fanu bawk kha a ni! Boruak chu a rit nghal vek ni maiin ka hria a, nui har har chungin a taksa si chétin a rawn ding a, Ṭpa'n ka kut a vawn chu ka lathla nghal a, min chelh lui hauh lo!

"Eheu! Hei chu ka hmuh hnu niin ka va hre ve! Aw...ka hria e, kan scooty khalh thiami ṭhiannu kha i ni tak tiraw?" Min biakdanah chuan min tham lo hle a ni tih a lang reng a.

"Rebecca, hei hi Angie a ni a, helâi hmunah hian ka rûala rawn kal a ni. Khawngaihin hawihhâwm deuhin i be thei ang em?" 

Ṭpa aw chu a chang ṭha hle a, ka thlavâng hauha ṭawng mah ni se ka tiril a khur a, ka awm chu a nuam lo hluah hluah a. Kalsawn daih mai ka duh a, ka kut Ṭpa'n a rawn vawn leh pawh chuan ka lo ṭang deuh ṭúng a. Mahse, a vawn ngheh tak êm avangin ka ṭang buai duh ta lova.

"Ka ṭhian, i lo thleng thei maw? I rawn thleng har ang tih ka lo hlau lutuk a!" 

Kimi chu mak ti fahranin ka en a, chulâi hmunah chuan a kal ve dawn tih rêng rêng ka lo hre lo! Chu mai bakah ka kal dâwn a ni tih hria ni awm taka a ṭawng chuan min tibangbo zual a. Mahse, a lo awm ve chu ka lawm takzet a, a hmêl ka hmuh rûalin ka awm nuam lo lutuk pawh a zia chawpchilh nghal a, mal lutuka ka inhriatna pawh a bo nghal hmiah bawk!

"Kan scooty khalh thiami pawh a lo kal ve a nih hi! Zanin zet chu kan va chhangchhe ngai ve le!" Rebecca chuan a rawn ti leh lar lar a, Kimi chuan keh nawk nawk duh mai hmel pû-in a melh râm râm a.

"Sawlâiah sâwn lo va ṭhu ula, in tur ka va la ang a, ka rawn ṭhu phei ve nghal ang." Midang kan ṭawng hma chuan Ṭpa chuan a rawn ti vat a, Kimi nen chuan îhe lovin kan phei nghal a. Kan boruak pik lutuk tlansan vat chu ka chák êm a, hnial buai hauh lovin ka kal nghal hmak mai a ni.

Rebecca awmdan leh ṭawng duhdan chu mâwi lo hle-in ka hria a, midang zahpahna nei hauh lova ṭawng nuam a tihdanah rilru ṭha tak a ni lovang tih ka ring mai a. Kimi pawh chuan a huatzia leh chhanlet a chákzia chu a sawizui ve nghal bawrh bawrh bawk a, nalh inti tawk taka a kal nghawlh nghawlh te chu a ngei tawk a lo tling a, keh nawk nawk mai a chák thu a sawi chuan kan nuidun ta hawk hawk a.

"In va hlim awm bik ve a! Ka lo ṭhu ve thei ang em?" ti ri kan hriat chuan kan hawichhuak dun nghal a, Rinsanga chu a kekawr ipte zen ṭat chungin a lo ding a, a nui var var bawk.

Ṭpa chu ka rinâiin a rawn lang har a, Rebecca lah hmuh tur a awm tawh bawk si lova, ka ngaih chu a ṭha lo ru deuh a. Rinsanga chu a ti ti bawrh bawrh a, ngaithla áwm takin ka awm naa a thusawi chu hriat alawi ka nei lo thung.

Tlangvâl pakhat, hmelchhe lo tak leh sâng ṭha zeih zawihin Kimi lampuia a rawn sawm takah chuan Rinsânga nen chauh chuan kan ṭhu dun ta ran a. Kimi a awm tak lohah chuan Rinsanga pawh chu a ri ta bawrh bawrh lo deuh a, ka bulah chuan rawn tawlh hnaiin ka kut chu a rawn vuan a, a chetdan chuan min ṭháwng deuh a, ka kut a chelh pawh chu laklet nachâng ka hre mai lova.

"Angie, ka awmdan aṭang hian i hrethiam vek thovin ka ring a, ka duh che a ni. I hmêl ka hmuh tirh aṭang khan ka duh tawh che a, ka inthup zo tawh ngang lo a ni."

"Hetiang zâwnga infiam hi ka duh miah lo a nia aw, Rinsang!" nui deuh chungin ka ti a.

"Ka fîam lo che, ka duh tak tak che alawm! Hre duh la chuan hriatthiam loh tur a awm lo," thu tak zeta a tih leh takah chuan ka thu tak ve ta khawp mai.

Ka kut a vawn chu laksawn pahin, "Rinsang, kei chuan ṭhian ang bakin ka en ngai lo che a, chutiang chu a ni reng bawk ang. Min hrethiam dawn nia," ka ti tawp a.

"Tunah min chhan nghal harsa i ti a nih pawhin ka nghak thei che a nia, kha chen kha ka lo nghak tawh che a, ka la nghak leh thei êm êm ang che," luhlul takin a ti leh a.

Music a ri reng a, mi ṭawng thawm ri nuai nuai nen kan thusawi chu tuma'n an rawn hre thei dawn lo tih ka hre naa tihtawp vat ka duh a, tlang takin ka ngaihdan chu ka hrilh ta a.

"Ka ṭhian ṭha tak angah ka lo ngâi ṭhin che a, a aia thui chu beisei lo law law rawh. Ṭhian ang bakin ka en thei lo che a ni."

"Khawngaihin inngaihtuah ṭha leh rawh Angie. Kan hlim dun ngei ang tih ka hria alawm!" Ka kutah chuan a rawn vuan leh a, ka lo lasawn vat thung.

Ka darah a rawn vuan leh a, ka thin a rim thut a, ka thochhuak ta hluai a, ka kutah manin a bula in ṭhuttîr leh tumin min pawt a. Ka lungawi lo deuh bawk nen chutia min pawt chu ka lawm lo hle a, ka kut a vawnna chu thinthlak ka tum a, a vawn ngheh êm avang chuan ka thingthla mai thei si lova, midang hmuh hlau ru tak chungin kan inpawt deuh salh salh a.

"Hmeichhe duh lo chung pawtlui duh khawpa mipa smart lo i nih hi ka lo ring hauh lova, ka rin ai daihin i lo nep a nih hi!"

Ṭpa chu ka bulah rawn dingin ka kut chu Rinsanga vawnna aṭang chuan a lasawn a, ka darah a kuah zui nghal zat a.

Rinsanga chu rawn dingchhuakin Ṭpa chu rum zetin a rawn melh a, thinrim hmel tawkin a kalsawn ta nghal a.

Ṭhutthlengah chuan ṭhu thla lehin amah si chétin min kuahbet a, midang awm vete mitmei chu a vêng hauh lo niin a lang! Zia lo deuha ka hriat avangin tawlhsawn ka tum a, phal lovin min kuah nghet sauh thung.

"Kan va lâm ve dawn em ni ang?" Ka beng bulah a rawn phun sup a, ka lû ka lo thing vat a.

"I la hre lo maithei a, Rinsanga nu leh Rebecca pa hi unâu an ni a. Khatia chhan awm lova min hmuh duh tak lohah khan Rebecca hian remchâng a rawn zawng ta vat a, Rinsanga nen ṭangkawpin kan inhlat theihnan hma an la a. Rebecca khan in inngaizâwng niin min hrilh a, Rinsanga nena in thlalak dunte ka hmuh fo takah chuan in inngaizâwng ngei niin ka hre ta a, ka hmu dun ta fo bawk che u a. Chuvangin ka rilru siam felin ka hnaih leh ngai tawh lovang che tiin ka intiam a, mahse, accident i tawh takah khan ka hnaih leh lo thei ta lo che a. Khatia damdawiina i awmlâi khan in inkârah engmah a awm lo a ni tih ka hrechhuak ta a, i nu pawh ka ti tipui nghe nghe a. In inkârah engmah a awm lo a ni tih ka hriat khan ka taa siam leh che tumin hma ka la ta nghal a ni, eng ang pawhin min lo hnial mah la min theihnghilh thei bik lo tih ka hria a, neih let leh che hi ka tum bur mai a ni."

Ṭpa thil sawi chu mak ka ti a, Rinsanga chu ka ṭhian anga enin min puih nasat ṭhin avang khan ka lo ngaina ve hle kha a ni a, kan chunga an thiltih duhdan ka ngaihtuah chuan ka thin a rim ru hle a, han tih vak ngaihna phei chu ka hre hauh thung lova.

Kimi te lam zo an rawn ṭhut ve chuan a lampuipa nena an inendan chu hai theih a ni lova, a chezia leh ṭawngkamah mipa pangngai tak niin fel ve thawkhat tak a nih ka ring a, ka ṭhiannu chu ka lawmpui ru hle a. Michael vang khan a tuar nasa ve êm a, hlim taka midang bula hun a hman hi ka duhsak êm êm a ni.

Rebecca kan lam pana a rawn kal ka hmuh chuan ka sa deuh phat a, Ṭpa'n a ngaizâwng ve ngai hauh lo a ni tih a sawi kha hrechhuak lehin engah vak ka ngai duh ta lova. Kan bul a rawn thlen chuan zam lo fahranin Ṭpa chu a rawn en a.

"I duhdan i sawi ang chuan an tifel thawkhat a, thil pakhat la tihkim loh an nei a, min lo enpui lawk mai la," no tawka melh pahin a ti a.

"Ka va enpui lawk ang a, ka rawn let leh nghal ang," tih pahin ka chhanna pawh nghak lovin Ṭpa chu a tho a,an inzui phei ta nghal a, Rebecca kal turin hnehtu chan chang inti hmel taka min rawn melh ralh chuan ka thin a khei zak a!

Ka awm chu a nuam leh hlei thei tawh lova, ka ṭhutna hmunah chuan ka bet lo ru hle a, Kimi leh a ṭhianpa chu an hlim dun viau a, ka awmdan an hriat ka duh loh avangin ka nui lui deuh reng a, chhûngrilah erawh ka hah ru ngawih ngawih thung.

Ka ipik lutuk chu tlêma a zia deuh tákin tiin pâwnlamah hawi khawthawn pahin chhuah ka rilruk a, Kimi te pahnih hnena ka kalna tur ka sawi hnu chuan ka tho a, muangchângin ka pen ta nghal a. Mi an awm nûal avang leh ka ke avang chuan ka duh angin ka kal chak thei lova, lâm ho ka helna lamah ka thil hmuh duh loh tawp chu ka va hmu a!

Ṭpa leh Rebecca chu taksa insi ríalin an rawn phei dun a, min rawn hmuh rûal chuan Rebecca chuan Ṭpa chu a hrilhru zauh a, hlim hmel zetin an nuidun a.

Ka ṭah chu a chhuak hluah hluah a, an nui hmêl chuan min tichau a, an taksa inhnaih lutuk chuan min tina bawk! Ka âwmah chuan min rawn hnawh up up a, ka mittui chu a tlak mai lohnan ka mit chu rang takin ka khap sawk sawk a.

Kan intawk ṭep tawh tihah chuan Rebecca chuan eng emaw a sawi leh zauh a, Ṭpa chu Rebecca lamah chuan a thle deuh a, chutah tak chuan Rebecca chuan a bîangah a lo fawhsak a, ka ṭe chhuak lo chauh a ni e. Ṭpa rawn dak chhuak chuan min rawn hmu ve ta a, a hmêl landan chu ka hrethiam pha lo hulhûal a, thilsual tilâi manchhuah hmêl pû-in ka hria a, ka ngaihruatna a ni nge a tak tih erawh ka hre hauh lo thung!

Intipâukhauhin sang vaha dakin pawn lam pan chuan ka theih tâwka chakin ka kal a, ka duh anga ka kal chak thei lo chu ka thin a rim hlur a. Chutihlâi tak chuan ka hla duh êm êm Martina Mcbride leh Jim Brickman te sak 'My Valentine' tih hla chu an play rîai rîai a, ka ṭah a tichhuak zual a, ṭap mai lo turin ka insûm nasa hle a ni.

"Angie.." 

Min kohna chu hre lo ang hmiahin ka kalpel a, pen thum vel awrh chauh ka la pen hman ang tihah chuan ka bânah rawn vuanin min pawt ding a. Ka luhlul chhuahin kal ka la tum fan a, ani erawh chuan min kaltîr chu sawi loh min vawn ngheh sauh pahin ka bulah a rawn ding hnai a, ka kawngah a rawn kuah nghal zat bawk.

Ka theih tawka ruma melh pahin min kuahna chu phelh tumin ka bei a, ani erawh chuan ngaipawimawh hauh lovin ka beng bulah a rawn phun sup thung a.

"Shhh..inbengdai rawh duhtak! Helâi hmuna awm ve zawng zawngte hmâah hian ka fawh che i duh a nih koh chuan tal tawh suh!"

Chutah chiah chuan boruak danglam a awm a ni tih ka hre ve ta chiah! Chulâi hmuna awm ve dangte chuan kan lam an rawn hawi deuh vek a ni tih ka hmuh chuan ka ip deuh chawih a, min lo kuah nghet salh thung. Ka hla duh ngei mai chu a la in-play rîai rîai a-

'And Even if the sun refused to shine,
Even if romance ran out of rhyme,
You would still have my heart until 
the end of time;
'Cause all I need is you, my Valentine..
Ohh..ooo..You're all I need
My love, my Valentine........

Ka kawnga a vawnna chu thlahin ka kut chu a vuan a, mak ka tih êm êm turin ka hmáah chuan a ṭhingṭhi ta a!

"Kei chuan ka Valentine atân ka thlang fel tawh che a, nang hian i Valentine atân min thlang ve dawn em?"

A awmdan chu ka beisei phak bak a ni a, ka hamhaihin sawi mai tur ka hre hauh lo! Zungbun rawn lek chhuakin ka mitah tak min en a..

"Kumkhuaa ka Valentine ni turin i inphal em?"

Ka mittui ka dang zo lova, ka kut chu zungbun bun rem turin ka dah a, hlim tih hriat takin min rawn melh a, muangchângin zungbun chu min buntîr ta a, hlim takin kan innuih a, kutbêng riin inchhûng chu a khat a!

Chu hall chhûnga awm te zînga pahnih tih loh chuan min lawmpui vek ni maiin a lang a, Rebecca lawm lo lutuk hmêl leh Rinsanga lungâwi lo hmêl tihloh chu hlim hmêl pu vek kan ni. Kimi chu a phur ber berah a ṭang a, kawppui thar a nei bawk nen a hlim hmêl hmuh a nuam hle a ni.

"Kan inneih hunah chuan tun aia ropui zawk hi tawn lo inbeisei rawh," ka beng bulah a rawn ti sup a.

"Zanin âia ropui zawk hi ka tawn leh ka ring tawh lo, ka hlim tak zet a ni!" Ka hlimzia chu ka hmêlah pawh a lang vek ang chu!

"Ka hmangaih che, Angela!"

"Kei pawhin ka hmangaih che, Lalṭanpui!"