LALNUNPUII - 12

LALNUNPUII
Sbk Pachuau

Chapter 12



     "Eng vangin nge ka nunah hian i la rawn inrawlh reng mai le! Nang i duh duh dana i awm ang hian ka awm ve thei lo tihna em ni? Eng vanga min tibuai reng nge i nih?" Ka thinur lutuk chu ka khur dar dar a, ka ṭah chu a chhuak tak zet bawk.

      "Kha pa nen khan inneih in tum a tiraw? Engtin nge i theih zawk tih hi ka hre chak khawp mai! Kan inngaihzawn lai rengin min kawpsan a, pasal atan hîal neih i lo tum chu a nia le!"

     Ngaihnep hmel lutuka min melh chu tuar har ka ti kher mai! Chu ai maha tuar har ka la tih chu chutiang dawt chiang lutuka min puhna chu a ni!

     "Khati khawpa hmeichhe fel leh nungchang ṭha nia ka lo hriatna che phenah khan eng ang fakauva lepchiah nge i lo nih tih hi ka hre duh a ni! Min lo bum vang pawh khan hriat chu ka phû ve-in ka inhria." Eng mah sawi lova ka ngawih reng avang chuan amah bawk chuan a rawn ti leh a.

     A thil sawi avang chuan ka ṭek sawk a, ka thinlung chhûngrilah ka na ngawt ngawt bawk. Engvanga hmeichhe lepchiah lutuk anga min hmu nge a nih?  Engmah hre chiang lova dawta min puh kual vak hi ka hrethiam thei thlawt lo a ni.
   
     "A tawk! Khatia dawta min puh kha duhtawk rawh. I rinthu leh dawta min puhna ngaithla turin ka engmah i ni lo, ka haw dawn a nia," tih leh kal chu ka rual nghal a.

     Room kawngka hawnna ka vuan chiah chu ka bânah rawn manin min phih let dawrh a, a âwmah chuan ka va intauh deuh dawt a. Min kuahbeh nghal tlat avangin ka talchhuak mai thei si lova, ka thinrim lutuk chuan au chhuah chîam mai chu ka duh a. Ka talchhuak thei si lo thinrim mangang lutuk chuan min fawh tuma a rawn kunhniam lâi tak chuan a samah kekin ka theih anga nâ chuan ka pawt pah nghek a.

     A sama ka kehna chu ngai pawimawh lo fahranin ka kut chu a han man a, a sam a sei lutuk bawk si lo nen ka vuan nghet zo si lova, awlsam tê-in min lakthlaksak a, ka tihngaihna hre lo beidawng chuan ka kut a vawn lohna lam zawk chuan a bîangah tak chuan ka han bêng ta pawp a.

     Ka benna chu a dawm vang vang a, rapthlak tih hmel zetin min melh ngur mai a, a mitmeng aṭang chuan a lung a âwi hauh lo a ni tih ka hmu thei a. Ka khabe-ah chuan na fahrana rawn dawmin dim hauh lo hian ka hmuiah chuan a rawn fawp nawk nawk a. Ka tha tawpa lo ṭangin a âwmah chuan ka nam vak a, thinur lutukin, thaw hlawp hlawpin ka en kal a.

     "Engvanga min tibuai reng nge i nih? I eng pawi nge ka sawia heti taka min han hmuhsit mai le! Heti taka min zah lo mai hi eng nge a chhan?" ka ṭawng tawplamah phei chuan ka ṭap aw deuh ṭiau a, ka tumlawk ni hauh lovin ka bîangah chuan ka mittui chu a rawn lûangthla zawih zawih a.

     "Engvanga kei aia kha pa kha thlang zawk nge i nih tih min hrilh rawh!"

     "I thil sawi chu a awmzia ka hre hauh lo!"

     "Kha doctorpa kha kei aia i thlan tak nachhan ka zawt che a nih chu!"

     "Hetiang em em hian i rilru a chhia tih hi ka lo hre miah lova! Bialnu i neih avang khan kei hi min puhlet i tum amaw! I bialnu neih vanga awmze nei lova min kalsan kha i inthiam lo thar leh deuhin dawta min puh i tum ta vel em ni?" ka mittui chu ka hrufai a, amah vanga ka mittui tla hi ka duh hauh lo.

     "Tunge bialnu nei chu?"

     "Miin an hre lovang tih hlau niawm takin mi zîngah pawh in innêk pilh ang tih hlauhawm khawpin in insi chîal reng a ni lawm ni? Nang bak baka bialnu nei an awm pawh ka la hre lo e a!" ka thinur lutuk chu ka alh mai ang tih pawh hlauhawm zawk a ni.

     "A landanah chuan i thik a ang riauva ka hriat tlat chu le! Chuan, i mi sawi chu atu apawh chu lo ni ta se, ka bialnu a ni lo tawp a nih chu. A chhan chu, nangin min bum hnu kha chuan ngaihzâwng ka la nei leh miau lova." A ṭawngkama min elsenna lo lang chuan ka thin a khei zak a.

     "Ka bum che tih ka lo hre hauh lo! Chuan, i bialnu neih kha chu zep duh vak suh, midang pawhin an hre vek ang chu! In pahnih thlalak phei chu hmuh peih leh peih loh athu a ni mai, social media-ah a tam lutuk tlat tih pawh i hriat ve ngei ka ring!"

     "Mipa dang nen min kawp a, ani nen chuan inneih hial in tum a, chuti chung chuan min bum tih i inhre lova maw!" a thusawi danah chuan min dem ngawih ngawih tih a lang reng a.

     "Thil i hrechiang viau a nih loh chuan mi puhchhe ringawt suh! Tu nen mah ka kawp lo che, nangmah zawk khan Kimkimi nen min kawp zawk a nih kha!" mi kawp chîng anga min ngaihna ringawt pawh chuan min tina hle a ni.

     "Ka kawp lo che, tu nen mah ka kawp hauh lo che! Nang pawhin i hrechiang a nih loh chuan engmah sawi suh."

     "I duh duh i sawi  a, ka duh ka sawi ve a ni mai a!" cho êm ëma lo melh ran chung chuan ka ti a.

     "Luhlul viau ṭhin lo teh, thil nihdan dik tak hriat ka duh mai chauh a ni. Min hnial reng lo khan ṭha takin sawidun zawk teh ang," a tih chuan za miah lovin ka lo nui lui hak a.

     "Nang nen hian sawidun tur kan neih  awm rêng rêng ka hre hauh lo mai! Chuvangin, khawngaihin min kaltîr hram teh, haw ka duh!"

     "Ni love, i insawifiah hmasak phawt a ngâi alawm. Kei aia kha pa i thlan takna chhan kha ka hre chak zek zek tawh a nia!"

     "Khawngaihin khatianga min ṭawngkhum kha duhtawk teh! Eng vanga midang chu hnuhluh tum ṭalh nge maw i nih le?" Ka âu lo chauh tawh chu a ni ber a.

     "Tumah ka hnuklut hauh lo, ka hnuhluh ngai lovin nangmah khan i nunah i luhtîr zawk a ni lawm ni?"

     "Teuh lo lutuk! Nangin min bum tih ka hriat aṭang kha chuan tu mipa mah hi ka ring thei tawh lo a ni e," ka lo ti let ve sak a.

     "Ka bum lo che! Bumtu zawk chu nangmah i ni!" A aw-ah chuan thinurna nasa lutuk nei a ang ber a.

     "Kei hian ka bum che maw!? Bumtu chu kei ni lovin nangmah kha i ni! Eng vanga min kalsan nge i nih tih pawh ka hriat hma hauhin i bialnu nen nuam tawlin hun in hmang dun a ni lawm ni? I dik lohna chu pawmin min puhchhiat ṭalh i tum hi duhtawk tawh rawh!" Ka thinur lutuk chu ka ṭawng pawh a khur hlawk hlawk thei hîal a ni!

     "Kha doctorpa nen khan in inngâizâwng lova maw!?" Ka mitah tak en chung chuan min zawt a.

     "Aw, inngâizâwng lo. Tute emaw anga tenawm taka ngaihzâwng kawp chîng ka ni ve lo tlat!" Kal chhuah tum chuan ka inher a, duh aiin ka ṭawng hnem tawh a, tun aia rei ka la awm a nih chuan ka chau zo vek ang tih pawh ka hlau hlel lo a ni. Hnehna ka chang emaw, chang lo emaw he indona mûal aṭang hian tlanchhuah ka duh tak zet tawh a ni.

     Min kuaiher lawpin min kuahbet thlawp a, min kuah ngheh êm avang chuan thawk pawh a harsa hîal a ni!

     "Han sawi nawn leh teh!" a rawn ti thawp sut a.

     A ngaihna hre lovin harsa tak chung chuan a hmêl chu ka han en chho a.

     "Kha pa nen khan in inngâizâwng lo tak zet a nih chuan han sawi nawn leh teh!" a ti leh a.

     "Kan inngâizawng lo, ngaihzâwng ka nei lo. Na taka min kalsan hnu kha chuan ka nei ngam tawh lo a ni." Ka sawi tawp lam chu a ri chang chang chauh a ni ber a, inrinna hman awm hauh lovin ka mittui chu a rawn baw zawih a.

     "Engvanga kha mihringnu thusawi kha lo awih nge maw ka nih le! Engvanga thudik lo zawngchhuak hmasa lo nge ka ni le!" Thawk a la hawk hawk a, min kuah nghet sauhin ka chhipah chuan a fawp vang vang a.

     Tu chungchâng nge a sawi ka hre hauh lo naa zawt tur pawhin ka ṭawngchhuak thei lo hrim hrim a, ka ṭahchhuah lohna turin ka insûm nasa hle a, ka kut chu ka humruh ngat ngat bawk a.

     "Rawn ṭhawn thut che ka tum avangin kha mi nî ka lo chhoh nî khan zîngkârah ka lo chhuak a, kan ina ka intihfai hnu-in nangmah hmu turin ka rawn kal nghal a, i lo awm lova." Thawk chu a la leh halh phawt a. "Saw i nu fel tak sawn doctorpa hmu tura i kal thu leh in inngaihzawn thute, inneih thuai in tum thute min lo hrilh a, in inkâra lo inrawlh buai lo turin min hrilh bawk a nih chu! Ka thu hriat khan min tinâ a, ka zak hle bawk a ni."

     "Min zawt fiah thei reng alawm," dem aw deuh hian ka lo ti ṭiau a.

     "Zawh fiah che tumin ṭumhnih ka lo kal a, mahse, zawt lo che-in ka let leh ve ve. A chhan chu, kha doctor nen khan in awmdun zel vang a ni. In rawn inphur haw a, inhaw lo hmel taka in han inbia te kha ka lo na ṭhin asin!"

     "Ṭhian angin kan inkawm, a bak engmah a awm lo," ka lo ti leh sap a.

     "Kha mihringnu thusawi ka lo ring thei mai kha ka tisual a ni. Chu ai maha ka la tihsual zawk chu nang ang rilru thianghlim lutuk khatianga ka lo ringchhia che kha a ni. Ka tihpalh tak zet, min ngaidam rawh."

     "Ka naupan lai aṭanga min hretu i ni a, engtin nge khatianga awlsam khan min rinna i hloh theih mai le! Ka natzia kha i hrethiam phak ngai lovang." Ka sawi zo hman hram a, ka insut nghal hlap hlap a.

     "Shhh.... khawngaih ṭap teh suh, ka tihnat che avangin keimah hi ka inhua a ni!" Ka mittui chu hru-in a âwmah chuan min kuahbet tlat a, ka lungchhiat zualpui a reh hma chu ngawirengin kan inkuah a.

     Ka zia deuh hnun chuan min kuaidakin ka chalah a fawp zauh a, ka hmuiah fawp leh zauhin min en vang vang a, a mitah chuan hrehawm tihna, inthiamlohna ka hmu theiin ka inhria a. Rawn kunhniam lehin a hma aia uar zawkin min fawp leh a.

     Khatih hun chhûng zawnga ka lo thlakhlelh êm êm kha he thil ngei hi a lo ni! Ka lo chhânglet ve nghal vat a, duhthawh tak chuan kan infawp tawn tawn a. He mihring hi ka la duh a, ka la hmangaih reng bawk a ni tih ka hrechiang lehzual a, amah chauh hi ka tâna mipa awmchhun a ni reng dawn a, a tâna hmeichhe awmchhun ka nih ve ngei pawh ka beisei a ni.

     Ka rilru-ah thil pakhat a rawn lut thut a, Nunsânga chu ka nam lawp a, a lo inrin loh êm avang chuan piah deuhah chuan a pai phei nawk a. Ka chetdan chu a hrethiam lo hle tih a hmêlah chuan a hriat theih a, zawhna zawt mitmengin min melh a.

     "Kimkimi! I bialnu kha ..."

     "Ani chu engvanga rawn sawichhuak nge i nih?"

     "Hetiang hian kan awm thei lo, ani kha i bialnu a ni a, keimah anga a nat ve kha ka duh lo. Midangte natna thlensaktu nih ka duh lo a ni." Ka thinlung chhûngrila ka natna chu ka thup hram hram a.

     Ka lam pana rawn pen hnaiin ka bula a rawn thlen chuan ka dar tawn tawnah chuan min vuan a, chiang êm êmin ka mitah tak chuan a en bawk a.

     "Ka bialnu a ni lo, kan inkârah engmah a awm lo. Amah chuan min la duh tih ka hria, mahse, ka duh thei ngang lo a ni. A kut ka vawnin i kut ka ngaihtuah a, ka fawh dawnin i hmui chauh ka mitthla-ah a awm bawk. Amah pawh chîang takin ka hrilh tlang tawp mai a ni, ngaihzâwng anga ka en theih loh thu chu!"

      A thusawi chu a ti tak zet tih ka hmu thei a, dingdihlipin a hmuiah chuan ka han fawp zeuh a, a nghâwngah chuan uaiin ka han fawp nawn leh a. Chutia ka fawh leh takah chuan duhthawh lutukin min lo fawplet ve ta a, kan tawp thei tawh dawn lo emaw tih tur khawpa rei chu kan infawp a, he mihring hi engtikah mah ka kham thei ngai dawn lo a nih hi!

     Room kawngka rawn inhawngah chuan kan inthlah ta ṭawk a, Mâmi chu rawn lutin thinrim hmel takin min rawn melh dun reng a, nuam lo ka lo ti ru ang reng hle a.

     "Helâia lo tawm vel in duh vang mai mai hian maw hrilh pawh min hrilhlawk eih lova min hawsan daih! Engtin nge in theih zawk le?"

     "Englo...ih..." a thinrim hmel êm avang chuan hrehawm ka ti lutuk a, sawi ber tur pawh ka hre lova, ka tihngaihna hre lo chuan Nunsânga bânah chuan ka vuan ringawt a.

     "Tikhan hlim deuhin awm rawh u. Kei chu ngaihtuah ka ngai lo, keimahin ka awm ve mai ang," tih leh nghat pah chuan chhuah leh mai tum chuan kawngka lam chu a pan a. Nunsânga chu eng emaw tal sawi tur chuan ka han mitmei a, ani lah chuan ngaihpawimawh loh hmel fahran hian lu thing chungin min lo nuih suk duh chauh a.

     "Mam, lo ding teh!" Ka kohna chu hria ang pawhin a awm lova, kawngkhar chu hawngin a ding vang vang a.

     Chutah, za lutuka rawn nuichhuakin a rawn inher a, mak tia ka lo ka deuh ho chu min kawkin a nui vak vak a.

     "I hlauthawng leh hrehawm ti lutuk hmêl kha ka insûm zo lo ṭep alawm! Tunah pawh ka duh aia hma-in ka nui, nangmah vang vek!" A nuihza lutuk chu ṭawng pawh a ṭawng ṭha hleithei lo a, ka lo thaw huai thung.

     "Aw le, tunah chuan in lo inngeih leh ta niin a lang a, min mamawh vak lovin ka  hre tlat! Ka'n mu daih ang e," tiin la nui ar ar chung chuan biak hman miah lohin a chhuak ta daih a.

     Haw ve nghal mai ka duhthu ka sawi chuan min fawp leh phawt a, kan chhuak ta nghal a. Kan in kan thlen chuan ka luh nghal mai chu phal lovin garage bul thim lâiah chuan min dinpui a, min kuah vang vang a.

     "Ka tihdik loh avangin hun kan paih nasa lutuk! Tunah chuan hun khawhral ka tum tawh lo, a hma thei ang bera palâi rawn tirh ka duh."

     Ka chhâng lova, ngâwi reng chuan ka lo kuah nghet ve sauh a. Rei ngial kan infawh leh hnu chuan a tlai tawh êm avang chuan kan inkalsan ta hrâm a.

     Ka khawvel chu a inthlak thawk a, ka chhûngrila hlimna ka neih chu ka thup zo lo a ni ber a. Khawiah pawh kalin eng pawh ti ila engkim hi a nuam vel vek tawh a mai a ni. Mâmi pawh chuan min lawmpui hle a, Nunsânga'n Zâma nena kan chungchâng a lo zawt a ni awm a, ani Mâmi chuan kan inngaihzawn a rin loh thu leh thudik hriat hmasak tum phawt tura a lo nawr avanga min sawipui ta a lo ni a.

     Nikhat kan class bâng chu class picnic kan neih dawn avangin Mâmi'n thawmhnaw a en duh a,  dawrah kan kawi a. Kan thlen chuan Nunsânga a lo ṭhu run a, engmah min hrilh lawk loh avang chuan mak ka ti deuh a, ka pa nen chuan ṭhudunin an titi muk hmel angreng bawk si a. Ṭum dang ang bawkin ka pa ti ti duhzâwng tak a sawi fuhpui leh ta ang a kal leh mai thei lovin ka pa chuan a lo titipui leh chîam tawh a nih ka ring ta ber a.

     Mâmi'n a thawmhnaw lei tur a lakfel hnu chuan Nunsânga chu hawpuiah kan sâwm a, ani chuan la awm rih a tum thu leh zana a lo len tur thu min hrilh hnu chuan kan hawsan ta a.