BEISEINA - 3
BEISEINA...!!
Sbk Pachuau
Chapter 3
Hostel gate sîrah chuan kekawr ipte zenin gate ban nghengin a lo ding a, min hmuh rual chuan min nuih suk a, a bul ka thlen chuan a lo ding ngîl a, a sanzia ka hrechhuak thar leh chawpchilh a!
"Ka ṭhianpa in luah lamah kalpui ta che ila pawi i ti ang em?" Ka mitah tak en chung chuan min zawt a.
"Pawi ti love, i ṭhianpa chu misual a nih lem loh chuan.." nui var var chungin ka lo ti a, ani pawh chu a nui ve hak a.
A bike hawhah chuan kan inphur a, kan tlan ta nghal a. Kan awmna aṭangin a ṭhianpa awmna chu a lo hla lem lova, kan thleng thuai a. A ṭhianpa chu nula pakhat nen an lo awmdun a, an awmdanah chuan inngáizâwng an nih ka ring nghal mai a. Min inhmêlhriattîr hnu chuan a ṭhianpa Thantea chuan min be zui bawrh bawrh a, a bialnu chu a chhaih pah leh zauh ṭhin bawk a. A bialnu chu la tleirawltê a ni a, a zak chu a lo sen ap ap zel a, ka nuih an tiza dun kher mai.
"I ril a ṭâm tawh em?" Hriatzuala chuan a rawn ti sup a, ka lû ka lo thing vat a.
"In duh hun hunah a ei theih a nia aw, kannu hian rawng a bâwl zo vek tawh a, a siam tui teh mai a nia." A bialnu kuah pahin Thantea chuan a lo ti a, a bialnu lah chu a zah hmel hle a, Thantea lah chuan a ngaihpawimawh loh hmel nasa mai si a, a biangah te chuan a piaisak a. An hmêl a chhelo a, an inhmeh dun hle-in ka hria a.
Thantea chuan Hriatzuala lam chu melh zauhin, "Victoria Memorial chu em ni in thlurbing tak deuh?" tiin a zawt a.
"Aw, kan han en deuh chu a nia, St. Paul's Cathedral kan en bawk a. Victoria Memorial aiin a upat zawk bakah an sakdan kalhmang vel zirchian tur a tam ang reng a, Victoria Memorialah âi mahin hun kan hmang rei zawk a ni. 1839-a ṭanin 1847-a an sak zawh kha a ni a, an sak hunlâi ngaihtuahin a pui khawp mai. Victoria Memorial pawh zir tham fê chu a awm, 1906-a an sak ṭan kha a ni a, marble hmanga an han sak veldante saw an thiamna a lo ril hle-in ka hria." A tuina ber a ni bawk a, a sawi deuh duah a.
Tunhma-in chutiang zâwngin ka lo en ngai lem lova, a landan ropuina leh mawinain min hîp satliah ringawt kha a ni a, an sak hun awm ang phei chu ka la ngaihtuah chhin lo hrim hrim a ni.
Thantea chu a lo phur khawp mai a, building hlui dang chanchinte chu a zawt zui ta zel a, Hriatzuala lah chuan ngaihnawm taka sawi tur a lo hre zel bawk si a, Thantea ṭhiannu nen chuan ngaihnawm ti deuhin kan lo ngaithla ve reng a.
Chaw ei kham hnu chuan haw nghal mai lovin kan la ṭhu khawmûang a, Thantea'n a ṭhiannu a thlah hlan chuan kan pahnihin kan lo awmdun a.
"Chuan, i bialpa chu i ṭhen hlen ta em ni?" a rawn tih chuan ka en vat a, a lo nui suk a.
"Ummm, ṭhen fel a ni mai. Min la be reng a, ngaihdam min dîl reng bawk a, a beidawng duh lo lutuk sawn min timangang letling tawh zawk," ka ti deuh duah a.
Ṭawng duh ve tak mai ka nih avangin kan inngaihzawn lâi leh kan inṭhen hnua ka awmdante chu ka hrilh sîam sîam a, a hnena ka sawi tawh hnute pawh chu sawi nawn lehin engkim mai chu ka hrilh a ni ber a. Eng emaw châng zeuha zawhna min zawt tih loh chu keimah hlir ka ṭawng a, kan la inhmuh tlem tehreng nen phone-a kan inkawm nasat vang nge ni ka nel phîan a.
Ka ṭawnglâi chu min lo en reng a, a khi leh suk ṭhin bawk a, a bialnu chanchin ka zawh chuan sawi tur a neih loh thuin min chhâng mai a, ka zawtlui duh bik lem lova. Thantea a lo let leh hnu deuhah chuan keini pawh chu kan chhuak ve ta nghal a.
Hostel kan thlen chuan lut nghal mai lovin gate bulah chuan kan ding dun leh ren rawn a, ṭha deuha lehkha zir turin min chah leh bawk a.
"Exam zawh veleh maw haw chhoh i tum?" tiin min zawt a.
"Aw, ka tumdan chu a nia."
"Aizâwla i awm hunah pawh min la be tho rawh aw," nui chunga a tih chuan ka lo nui ve hak a.
"Ka hre lo le, ka induh deuh mai thei a ni," nui har har chung chuan ka ti a, ani pawh chu a lo nui ve a.
"Lut tawh rawh le, ka lo be dawn che nia. Ṭha deuhin lo zir la aw."
"Aw le, bye.."
"Bye..."
Hostel ka luh dawn chuan kawngka bul aṭangin ka hawilet leh a, bike nghenga dingin min lo la thlir reng a. Ka bân ka vai zauh a, min rawn vailet vat a, ka lut ta nghal a.
Zana kan inbiak chuan nidang ang bawkin hotê tê ka lo sawipui leh chîam a, kan inbiak lâi chuan Ṭza message a lo thleng a, a ngaitê-in ngaihdam dilna leh ka tel lova a hlim lohthute a rawn sawi leh a. Chhânglet lovin Hriatzuala chu ka be chhunzawm zel a.
"Nang hi i fair lo riau mai!" ka va ti thawng a.
"Engvangin?"
"Ka chanchin ka hrilh vek che a, min hrilh ve duh lova. I bialnu chanchinte pawh ka hre chak a, ka zawh che pawhin min hrilh ve duh tlat lova."
"Hrilh tur che ka nei lo ka tih kha..."
"Nih tak chu..."
"Ni e..."
"Ṭza'n min lo bia a, ka'n chhâng lawk ang e."
"Ok.."
Ṭza message chu chhângin ka ngaihdam tawh thu leh ṭhian ang baka ka en theih tawh loh thu chu ka hrilh a, min rawn nawr viau mah se min phatsan vang ngawr ngawr pawh ni tawh lovin daltu eng emaw a awm tlat avangin ṭhian anga en mai chu ka thlang zawk a ni.
Kan inbiak zawh chuan Hriatzuala chu ka be leh nghal a.
"Ka hman e.."
A chhiar hnu pawh chuan min chhâng lovin a rial vang vang a, a buai a nih ringin ka nghak deuh a, a online reng tho si avangin a dang ka thawn leh a
"Min chhâng si lova, i buai a nih ka ring e. Bye phawt aw..."
"Bye..."
A tuka an haw dawnah pawh message engmah a hnutchhiah lova, an chhuah dawna min hrilh tur khan ka chah ve thlap si a, engvanga min hrilh lo nge ni ang tih chu ka ngaihtuah a. A buai deuh ang a, mahni thu-a awmte an ni si lova, min be hman lo a nih ka ring ta ngawt a.
Mumbai an thlen hun awm velah leh a hnu lam thleng chuan a reh ta vang vang a, ka ngaih chu a ṭha lo deuh a, message ka thawn ta ringawt a.
"In thleng tawh em?"
Chhanna a awm lova, a deliver tho avangin a dang ka thawn leh nghal a.
"I ṭha maw? Min rawn be si lova, ka ngaih a ṭha lo a nia!"
Chu pawh chhanna a awm thei chuang lova, ka beidawng chuan biak luih ṭalh chu ka tum duh ta bik lova.
Nithum zet chu a reh ta a, ka message pawh a hmu reng a,chhanna a awm theih chuan loh avangin min be duh tawh lovah ka ngai ta hmiah a. A taka han inkawm chian takah chuan a ngainat záwng ka ni lovanga min be zui duh tawh lo a nih ka ring ta ber a, min be duh lo na na na chu biak luih ṭalh ka tum bik lem lo a ni.
Exam tur pahnih ka la neih zïnga pakhat zawk ka exam zawh zanah chuan ka ṭhiante nen groupah kan nawi mai mai a, ka mit a thip deuh takah chuan dah mai tum chuan group aṭang chuan ka out a. Private message lo thleng pakhat chuan ka mit a la nalh a, ka hawng nghal vat a.
"Ka ṭha.."
A tawi ṭha viau naa ka lung a awi tho mai, ka lo ngái hman hle tih ka inhre nghal bawk.
"Tinge i reh daih a? I buai em ni?" tiin ka chhânglet nghal vat a.
"Buai love.."
"Buai lohte chuan tinge min biak ngai loh a?"
"Ka tihbuai che ka hlau deuh a.."
"Engvangin nge min tihbuai chu i hlauh thar tak thut a?"
"A hma khan hlauh nachâng ka lo hre lo zawk a ni mahna!"
"Ka mit a thip lutuk! Lo call la."
"Ka tibuai lovang che maw?"
"Min be peih lo a nih loh chuan lo call vat mai teh!"
A rawn call ve mai bawk a, ka lo lak rual rual chuan ka chhuahchhal nghal mawlh mawlh a.
"Chhan engmah sawi lova inrehsan ringawt kha a fair lo lutuk a nia aw! A chin tam chi loh ang," ka lo ti nghal hmak hmak a.
"I bialpa nen in inbe duh ang tih ka ngaihtuah a, ka lo biak buai ve chhen che chuan in inkâr a buai phah ka hlau a."
"Eng thil maw tuna i sawi kha? Engvanga chutiang ngaihdan chu nei nge i nih rêng rêng le?" A awm-ang lo lutuk chu ka nuih a za zawk a.
"I bialpa biakna hun i neih loh ka hlau mawle," a rawn tih leh chuan ka lo nui hak a.
"Ka chanchin ka hrilh kim hle che emaw ka tia, i lo ngaithla miah lo zawk nge ni!" Ngaihzâwng nei anga min ngâi chu ka nuih a zat vîau rualin ka thusawi a lo ngaithla ṭha lo nia ka hriatna chuan ka thin a tirim deuh bawk a.
"I rin aia tam i chanchin chu ka hria e," a rawn ti sup a.
"Mak awm ve!"
"I bialpa nen in inbe zo tawh em ni?"
"Bialpa ka nei lo tih i hre si a, tinge min zawh reng le!"
"Hmanzan pawh khan kan inbiak lai titawp meuhin i bia a ni lawm ni?" a ti nghut a.
Ka ngaihtuah let a, khami zana Ṭza message ka chhan tur thu ka hrilh kha kan inbiak laklawh lai a nih vangin a lo lawm lo ru hle a nih ka ring ta a, kha mi aṭang chiah khan a reh ta chiah reng a nih kha!
"Ka hrilh vek tawh che kha, kan inkârah engmah a awm tawh lo."
"A la rawn be ṭhin che em?"
"Be ve zauh zauh e."
"A la beisei reng che a ni maw?"
"Umm... chutiang deuh chu. Mahse, ka duh tawh lo tih ka hrilh tlang hmiah mai!"
"I duh tawh lo tak zet em?"
"Aw, duh ila chuan kan ni leh daih tawh ang chu!" Uar fahranin ka lo ti a.
"Ṭhat chu!"
"Nia.."
"Lo duh tawh miah suh, mipa dang rêng rêng pawh lo duh suh!"
"Engvang ngawt chuan maw?"
"Min lo nghak rawh!" a rawn ti sup a, a thil sawi chuan min tihphu zawk lo chauh a ni.
"Maw!?"
"Ka bialnu ni rawh!" A aw-ah chuan a tifîam nge a thutak tih pawh ka hre thei lova.
"Fiamthu thawhna chi a nih loh chu!"
"Ka fîamthu hauh lo!" A thil sawi chu mak ka ti satliah lova, mak ka ti mah mah zawk a ni.
"Engtin ... eng....ih... i thil sawi awmzia ka hre lo!" Ka hrethiam nge hrethiam lo tih ka inhre lo a ni mah zawk.
"Inngâizâwng ang, ka duh che!" a rawn ti leh sup a, a aw chuan ka tukhum a tiza ar ar thei nia!
"Chutiang tehthut te chu a mak awm ê! Sawi mai tur pawh ka hre lo," ka ti sap a.
Dik tak chuan ani ang tluka ngaihzâwng atâna thlanawm chu an awm kherin a rinawm loh a, ka duh chi a ni lo ti ila chuan ka daw chiang hle awm e! A hma khan ngaihzâwng angin ka en ngaiin ka hre lova, kan inbiak loh chhûng rei lotê-ah pawh ka ngâi hman êm êm a ni tih erawh ka inhrechiang hle thung.
"Ka nghak ang che, i inpeih thlap hma chu ka nawrlui lovang che."
"Hunin a la hril ang chu!"
"Hun rei tak erawh ni lo hram se!" A aw pa lutuk tak mai chuan a ti sup a.
Chumi zan chu ka muhil tlem kher mai! A thusawite kha ka ngaihtuah neuh neuh a, min duh tak tak a nih chuan ka hnar phal hauh lova. Mahse, a rintlak ang em tih chu ka rilru tibuaitu a ni a, a hmaa mi anga min bum leh mai mai tur chi a nih chuan a tir aṭanga intahluh loh law law chu ka duh zawk a. A chanchin hre viau tawh mah ila a ze ṭhenkhat hriat kim loh ka la nei nûal ang tih chu thil chîang sa a ni a, hmeichhe laka a awmdan chu ka hriat lohte zîng ami a ni ngeiin ka ring bawk a ni.
Lehkha ka zir ṭhat lih a hlauh vangin min rawn biak chhunah kan inbe rei ngai vak lova, ka exam zawh zanah erawh kan tlaivâr thawthâng a ni e. Min duh a ni tih min hrilh hnu kha chuan amah ka ngaihdan a dang chho ve ta hret hret a, ka hriat loh lâiin ka rilru luahtu ber a lo ni ta reng a. Hmingi ka hrilh chuan a lo phur hle a, a thlalak ka entîr hnu-ah phei chuan chhâng ngei ngei turin min ti nghal chul a.
Ka lo tumlawkdan angin exam zawh tukah chuan ka haw chho ta nghal a, nidanga ka haw apîanga a tihdan ngaitê-in ka nu chuan ka lu chunga kut nghatin Pathian hnenah lawmthu sawina a nei leh a, an hnena ka awm loh chhûng zawnga min vennaah leh him leh dam taka min hruai haw leh avangin lawmthu a sawi a ni.
Ka nu anga ringtu ṭha leh Pathian thu-awih hi an tam vakin ka ring lova, ka nu a nih vang ni lovin a rin Pathian a hriatchian êm avang leh a zah êm avangin ka chhuang ru hle ṭhin a. 'Amah chu ring la, aman a ti vek ang' tih hi a thupui a ni a, engkimah Pathian a rinzia a lanchhuahtîr a, a ṭawngka leh nungchangah pawh a hmuh theih hîal a ni. Nu taima tak mai a ni a, thil tih nei lova awm thiam miah lo an tih ang chi hi a ni a, a chetfel leh taimak zârah kan in pawh vêngkhat in fai bera thlan a lo ni hîal tawh ṭhin a ni.
Hriatzuala nen pawh kan la inbe reng a, ṭawngkâ-in chhâng chiah lo mah ila ka haw bik lo a ni tih chu a hrethiam ve maiin a rinawm a. Kan inbe rei telh telh a, ka thikthu pawh ka pe chhe sawt hle a ni.
Zankhat chu ka nawmsam meuh loh avangin ka mu hma a, ka lo muhil sek chu ka phone rawn ri chuan min tiharh a, Hriatzuala a lo ni a.
"Hello.."
"I mû elaw!?" mak tih hmel takin a rawn ti a.
"Umm...."
"I damṭha lo em ni?"
"Ka khua hi a sik deuh a, nasa chu a ni lo," ka ti sep a.
Nihnih khat kalta aṭang khan ka sawithiam chiah si loh hian ka awm hi a nuam lo deuh reng a, ka chau deuh nghulh a, ka khua hi sik hluah ni si lo hian a rawn sik leh ser ser ṭhin a. Pâwn chhuah pawh ka peih loh phah a, inah ka tawm ngawt ngawt reng mai a ni.
"Damdawi i ei em?" A aw-ah chuan min ngaihtuahzia a lang a.
"Umm.... ei e."
"I hritlâng chu a ni si lo tiraw?"
"Aw, hritlan pawh ka hre lo.."
"Tikhan lo mu hahdam phawt la, nakinah kan inbe leh dawn nia aw," a rawn tih chuan ka awmdan a nawm loh êm avang chuan ka lo hnial duh lova, kan dah ta a, muthilh leh tum chuan ka chhîng ta nghal a.
Ka tuihâlin min tihharh chuan zan a rei tawh hmel hle a, ka awmdan chu ka muthilh hma aiin a nuam lo daih a. Ka taksa chu a sa vur a, vawt ka ti êm êm lawi si a, ka khawsik chu a sâng hle a nih ka ring ve ngawt a!
Ka tui chhawpna bottle chu a lo ruak hiau a, ka mut hma khan a ruak tih ka hre tawh a, ka muthilh tlang ka rin loh avangin ka thawh leh huna thun mai rilruk chungin ka mu ta kha a ni a. Chutia tui in tur ka neih tak si lovah chuan peih lo tak chunga thawh chu ka tum a, ka rizai ka hlim chiah chu vawt tiin ka khur lo chauh a, ka lû lo hai deuh bawk nen ka muṭha leh ta ringawt a.
Ka tui a hal nasat tak êm avang chuan ka u Marini chu ka phone ta ringawt a, a muhil tui deuh tawh nge ni min chhâng har hle a, a la thei dawn ta lo emaw ka tih hnuah a rawn la ta hram a. Mutchhuak hmel taka min rawn chhâng chu ka aw leh thil sawi a hriat chuan a rawn ṭawng fiah ta hle a.
Minute hnih pawh a liam lovang tihah chuan ka room kawngkhar chu a rawn ri rak a, ka nu leh ka u Mârini chu an rawn inzui lut a, a hnu deuhah ka pa a rawn lut ve leh bawk a.
Ka nu-in khawsik ennaa ka khawsik a en chuan ka lo rindan ang deuh chiahin a lo sâng hle a, ka kâ leh hnârte chu a sa huam huam a, ka thaw pawh a rang hle a ni. Nachhawkna min pe nghal a, vawt ka tih êm avang chuan blanket dang la-in min sin thuahtîr a, ka pa chuan zîngkârah inentîr tura kal ngei ngei tur a ti bur a, ka nu leh ka u Marini chuan an lo thlâwp hle a.
Ka khawsik a zia deuh hnu chuan ka û leh ka pa chu mu turin an room lamah an kal a, ka nu erawh chuan min mutpui thung a. A mut hma chuan ka lu chunga kut nghatin min ṭawngṭaisak leh tê tê a, a ṭawngṭai zawh chuan kan mu ta nghal a, ka khawsik reh mah se ka taksa chu a nuam lo ru riau a, muhil ve mai thei lo chuan ka mit chu ka chhîng reng a, khawvar dawn hnaiah erawh reilotê ka lo muhil ve sek a.
Sbk Pachuau
Chapter 3
Hostel gate sîrah chuan kekawr ipte zenin gate ban nghengin a lo ding a, min hmuh rual chuan min nuih suk a, a bul ka thlen chuan a lo ding ngîl a, a sanzia ka hrechhuak thar leh chawpchilh a!
"Ka ṭhianpa in luah lamah kalpui ta che ila pawi i ti ang em?" Ka mitah tak en chung chuan min zawt a.
"Pawi ti love, i ṭhianpa chu misual a nih lem loh chuan.." nui var var chungin ka lo ti a, ani pawh chu a nui ve hak a.
A bike hawhah chuan kan inphur a, kan tlan ta nghal a. Kan awmna aṭangin a ṭhianpa awmna chu a lo hla lem lova, kan thleng thuai a. A ṭhianpa chu nula pakhat nen an lo awmdun a, an awmdanah chuan inngáizâwng an nih ka ring nghal mai a. Min inhmêlhriattîr hnu chuan a ṭhianpa Thantea chuan min be zui bawrh bawrh a, a bialnu chu a chhaih pah leh zauh ṭhin bawk a. A bialnu chu la tleirawltê a ni a, a zak chu a lo sen ap ap zel a, ka nuih an tiza dun kher mai.
"I ril a ṭâm tawh em?" Hriatzuala chuan a rawn ti sup a, ka lû ka lo thing vat a.
"In duh hun hunah a ei theih a nia aw, kannu hian rawng a bâwl zo vek tawh a, a siam tui teh mai a nia." A bialnu kuah pahin Thantea chuan a lo ti a, a bialnu lah chu a zah hmel hle a, Thantea lah chuan a ngaihpawimawh loh hmel nasa mai si a, a biangah te chuan a piaisak a. An hmêl a chhelo a, an inhmeh dun hle-in ka hria a.
Thantea chuan Hriatzuala lam chu melh zauhin, "Victoria Memorial chu em ni in thlurbing tak deuh?" tiin a zawt a.
"Aw, kan han en deuh chu a nia, St. Paul's Cathedral kan en bawk a. Victoria Memorial aiin a upat zawk bakah an sakdan kalhmang vel zirchian tur a tam ang reng a, Victoria Memorialah âi mahin hun kan hmang rei zawk a ni. 1839-a ṭanin 1847-a an sak zawh kha a ni a, an sak hunlâi ngaihtuahin a pui khawp mai. Victoria Memorial pawh zir tham fê chu a awm, 1906-a an sak ṭan kha a ni a, marble hmanga an han sak veldante saw an thiamna a lo ril hle-in ka hria." A tuina ber a ni bawk a, a sawi deuh duah a.
Tunhma-in chutiang zâwngin ka lo en ngai lem lova, a landan ropuina leh mawinain min hîp satliah ringawt kha a ni a, an sak hun awm ang phei chu ka la ngaihtuah chhin lo hrim hrim a ni.
Thantea chu a lo phur khawp mai a, building hlui dang chanchinte chu a zawt zui ta zel a, Hriatzuala lah chuan ngaihnawm taka sawi tur a lo hre zel bawk si a, Thantea ṭhiannu nen chuan ngaihnawm ti deuhin kan lo ngaithla ve reng a.
Chaw ei kham hnu chuan haw nghal mai lovin kan la ṭhu khawmûang a, Thantea'n a ṭhiannu a thlah hlan chuan kan pahnihin kan lo awmdun a.
"Chuan, i bialpa chu i ṭhen hlen ta em ni?" a rawn tih chuan ka en vat a, a lo nui suk a.
"Ummm, ṭhen fel a ni mai. Min la be reng a, ngaihdam min dîl reng bawk a, a beidawng duh lo lutuk sawn min timangang letling tawh zawk," ka ti deuh duah a.
Ṭawng duh ve tak mai ka nih avangin kan inngaihzawn lâi leh kan inṭhen hnua ka awmdante chu ka hrilh sîam sîam a, a hnena ka sawi tawh hnute pawh chu sawi nawn lehin engkim mai chu ka hrilh a ni ber a. Eng emaw châng zeuha zawhna min zawt tih loh chu keimah hlir ka ṭawng a, kan la inhmuh tlem tehreng nen phone-a kan inkawm nasat vang nge ni ka nel phîan a.
Ka ṭawnglâi chu min lo en reng a, a khi leh suk ṭhin bawk a, a bialnu chanchin ka zawh chuan sawi tur a neih loh thuin min chhâng mai a, ka zawtlui duh bik lem lova. Thantea a lo let leh hnu deuhah chuan keini pawh chu kan chhuak ve ta nghal a.
Hostel kan thlen chuan lut nghal mai lovin gate bulah chuan kan ding dun leh ren rawn a, ṭha deuha lehkha zir turin min chah leh bawk a.
"Exam zawh veleh maw haw chhoh i tum?" tiin min zawt a.
"Aw, ka tumdan chu a nia."
"Aizâwla i awm hunah pawh min la be tho rawh aw," nui chunga a tih chuan ka lo nui ve hak a.
"Ka hre lo le, ka induh deuh mai thei a ni," nui har har chung chuan ka ti a, ani pawh chu a lo nui ve a.
"Lut tawh rawh le, ka lo be dawn che nia. Ṭha deuhin lo zir la aw."
"Aw le, bye.."
"Bye..."
Hostel ka luh dawn chuan kawngka bul aṭangin ka hawilet leh a, bike nghenga dingin min lo la thlir reng a. Ka bân ka vai zauh a, min rawn vailet vat a, ka lut ta nghal a.
Zana kan inbiak chuan nidang ang bawkin hotê tê ka lo sawipui leh chîam a, kan inbiak lâi chuan Ṭza message a lo thleng a, a ngaitê-in ngaihdam dilna leh ka tel lova a hlim lohthute a rawn sawi leh a. Chhânglet lovin Hriatzuala chu ka be chhunzawm zel a.
"Nang hi i fair lo riau mai!" ka va ti thawng a.
"Engvangin?"
"Ka chanchin ka hrilh vek che a, min hrilh ve duh lova. I bialnu chanchinte pawh ka hre chak a, ka zawh che pawhin min hrilh ve duh tlat lova."
"Hrilh tur che ka nei lo ka tih kha..."
"Nih tak chu..."
"Ni e..."
"Ṭza'n min lo bia a, ka'n chhâng lawk ang e."
"Ok.."
Ṭza message chu chhângin ka ngaihdam tawh thu leh ṭhian ang baka ka en theih tawh loh thu chu ka hrilh a, min rawn nawr viau mah se min phatsan vang ngawr ngawr pawh ni tawh lovin daltu eng emaw a awm tlat avangin ṭhian anga en mai chu ka thlang zawk a ni.
Kan inbiak zawh chuan Hriatzuala chu ka be leh nghal a.
"Ka hman e.."
A chhiar hnu pawh chuan min chhâng lovin a rial vang vang a, a buai a nih ringin ka nghak deuh a, a online reng tho si avangin a dang ka thawn leh a
"Min chhâng si lova, i buai a nih ka ring e. Bye phawt aw..."
"Bye..."
A tuka an haw dawnah pawh message engmah a hnutchhiah lova, an chhuah dawna min hrilh tur khan ka chah ve thlap si a, engvanga min hrilh lo nge ni ang tih chu ka ngaihtuah a. A buai deuh ang a, mahni thu-a awmte an ni si lova, min be hman lo a nih ka ring ta ngawt a.
Mumbai an thlen hun awm velah leh a hnu lam thleng chuan a reh ta vang vang a, ka ngaih chu a ṭha lo deuh a, message ka thawn ta ringawt a.
"In thleng tawh em?"
Chhanna a awm lova, a deliver tho avangin a dang ka thawn leh nghal a.
"I ṭha maw? Min rawn be si lova, ka ngaih a ṭha lo a nia!"
Chu pawh chhanna a awm thei chuang lova, ka beidawng chuan biak luih ṭalh chu ka tum duh ta bik lova.
Nithum zet chu a reh ta a, ka message pawh a hmu reng a,chhanna a awm theih chuan loh avangin min be duh tawh lovah ka ngai ta hmiah a. A taka han inkawm chian takah chuan a ngainat záwng ka ni lovanga min be zui duh tawh lo a nih ka ring ta ber a, min be duh lo na na na chu biak luih ṭalh ka tum bik lem lo a ni.
Exam tur pahnih ka la neih zïnga pakhat zawk ka exam zawh zanah chuan ka ṭhiante nen groupah kan nawi mai mai a, ka mit a thip deuh takah chuan dah mai tum chuan group aṭang chuan ka out a. Private message lo thleng pakhat chuan ka mit a la nalh a, ka hawng nghal vat a.
"Ka ṭha.."
A tawi ṭha viau naa ka lung a awi tho mai, ka lo ngái hman hle tih ka inhre nghal bawk.
"Tinge i reh daih a? I buai em ni?" tiin ka chhânglet nghal vat a.
"Buai love.."
"Buai lohte chuan tinge min biak ngai loh a?"
"Ka tihbuai che ka hlau deuh a.."
"Engvangin nge min tihbuai chu i hlauh thar tak thut a?"
"A hma khan hlauh nachâng ka lo hre lo zawk a ni mahna!"
"Ka mit a thip lutuk! Lo call la."
"Ka tibuai lovang che maw?"
"Min be peih lo a nih loh chuan lo call vat mai teh!"
A rawn call ve mai bawk a, ka lo lak rual rual chuan ka chhuahchhal nghal mawlh mawlh a.
"Chhan engmah sawi lova inrehsan ringawt kha a fair lo lutuk a nia aw! A chin tam chi loh ang," ka lo ti nghal hmak hmak a.
"I bialpa nen in inbe duh ang tih ka ngaihtuah a, ka lo biak buai ve chhen che chuan in inkâr a buai phah ka hlau a."
"Eng thil maw tuna i sawi kha? Engvanga chutiang ngaihdan chu nei nge i nih rêng rêng le?" A awm-ang lo lutuk chu ka nuih a za zawk a.
"I bialpa biakna hun i neih loh ka hlau mawle," a rawn tih leh chuan ka lo nui hak a.
"Ka chanchin ka hrilh kim hle che emaw ka tia, i lo ngaithla miah lo zawk nge ni!" Ngaihzâwng nei anga min ngâi chu ka nuih a zat vîau rualin ka thusawi a lo ngaithla ṭha lo nia ka hriatna chuan ka thin a tirim deuh bawk a.
"I rin aia tam i chanchin chu ka hria e," a rawn ti sup a.
"Mak awm ve!"
"I bialpa nen in inbe zo tawh em ni?"
"Bialpa ka nei lo tih i hre si a, tinge min zawh reng le!"
"Hmanzan pawh khan kan inbiak lai titawp meuhin i bia a ni lawm ni?" a ti nghut a.
Ka ngaihtuah let a, khami zana Ṭza message ka chhan tur thu ka hrilh kha kan inbiak laklawh lai a nih vangin a lo lawm lo ru hle a nih ka ring ta a, kha mi aṭang chiah khan a reh ta chiah reng a nih kha!
"Ka hrilh vek tawh che kha, kan inkârah engmah a awm tawh lo."
"A la rawn be ṭhin che em?"
"Be ve zauh zauh e."
"A la beisei reng che a ni maw?"
"Umm... chutiang deuh chu. Mahse, ka duh tawh lo tih ka hrilh tlang hmiah mai!"
"I duh tawh lo tak zet em?"
"Aw, duh ila chuan kan ni leh daih tawh ang chu!" Uar fahranin ka lo ti a.
"Ṭhat chu!"
"Nia.."
"Lo duh tawh miah suh, mipa dang rêng rêng pawh lo duh suh!"
"Engvang ngawt chuan maw?"
"Min lo nghak rawh!" a rawn ti sup a, a thil sawi chuan min tihphu zawk lo chauh a ni.
"Maw!?"
"Ka bialnu ni rawh!" A aw-ah chuan a tifîam nge a thutak tih pawh ka hre thei lova.
"Fiamthu thawhna chi a nih loh chu!"
"Ka fîamthu hauh lo!" A thil sawi chu mak ka ti satliah lova, mak ka ti mah mah zawk a ni.
"Engtin ... eng....ih... i thil sawi awmzia ka hre lo!" Ka hrethiam nge hrethiam lo tih ka inhre lo a ni mah zawk.
"Inngâizâwng ang, ka duh che!" a rawn ti leh sup a, a aw chuan ka tukhum a tiza ar ar thei nia!
"Chutiang tehthut te chu a mak awm ê! Sawi mai tur pawh ka hre lo," ka ti sap a.
Dik tak chuan ani ang tluka ngaihzâwng atâna thlanawm chu an awm kherin a rinawm loh a, ka duh chi a ni lo ti ila chuan ka daw chiang hle awm e! A hma khan ngaihzâwng angin ka en ngaiin ka hre lova, kan inbiak loh chhûng rei lotê-ah pawh ka ngâi hman êm êm a ni tih erawh ka inhrechiang hle thung.
"Ka nghak ang che, i inpeih thlap hma chu ka nawrlui lovang che."
"Hunin a la hril ang chu!"
"Hun rei tak erawh ni lo hram se!" A aw pa lutuk tak mai chuan a ti sup a.
Chumi zan chu ka muhil tlem kher mai! A thusawite kha ka ngaihtuah neuh neuh a, min duh tak tak a nih chuan ka hnar phal hauh lova. Mahse, a rintlak ang em tih chu ka rilru tibuaitu a ni a, a hmaa mi anga min bum leh mai mai tur chi a nih chuan a tir aṭanga intahluh loh law law chu ka duh zawk a. A chanchin hre viau tawh mah ila a ze ṭhenkhat hriat kim loh ka la nei nûal ang tih chu thil chîang sa a ni a, hmeichhe laka a awmdan chu ka hriat lohte zîng ami a ni ngeiin ka ring bawk a ni.
Lehkha ka zir ṭhat lih a hlauh vangin min rawn biak chhunah kan inbe rei ngai vak lova, ka exam zawh zanah erawh kan tlaivâr thawthâng a ni e. Min duh a ni tih min hrilh hnu kha chuan amah ka ngaihdan a dang chho ve ta hret hret a, ka hriat loh lâiin ka rilru luahtu ber a lo ni ta reng a. Hmingi ka hrilh chuan a lo phur hle a, a thlalak ka entîr hnu-ah phei chuan chhâng ngei ngei turin min ti nghal chul a.
Ka lo tumlawkdan angin exam zawh tukah chuan ka haw chho ta nghal a, nidanga ka haw apîanga a tihdan ngaitê-in ka nu chuan ka lu chunga kut nghatin Pathian hnenah lawmthu sawina a nei leh a, an hnena ka awm loh chhûng zawnga min vennaah leh him leh dam taka min hruai haw leh avangin lawmthu a sawi a ni.
Ka nu anga ringtu ṭha leh Pathian thu-awih hi an tam vakin ka ring lova, ka nu a nih vang ni lovin a rin Pathian a hriatchian êm avang leh a zah êm avangin ka chhuang ru hle ṭhin a. 'Amah chu ring la, aman a ti vek ang' tih hi a thupui a ni a, engkimah Pathian a rinzia a lanchhuahtîr a, a ṭawngka leh nungchangah pawh a hmuh theih hîal a ni. Nu taima tak mai a ni a, thil tih nei lova awm thiam miah lo an tih ang chi hi a ni a, a chetfel leh taimak zârah kan in pawh vêngkhat in fai bera thlan a lo ni hîal tawh ṭhin a ni.
Hriatzuala nen pawh kan la inbe reng a, ṭawngkâ-in chhâng chiah lo mah ila ka haw bik lo a ni tih chu a hrethiam ve maiin a rinawm a. Kan inbe rei telh telh a, ka thikthu pawh ka pe chhe sawt hle a ni.
Zankhat chu ka nawmsam meuh loh avangin ka mu hma a, ka lo muhil sek chu ka phone rawn ri chuan min tiharh a, Hriatzuala a lo ni a.
"Hello.."
"I mû elaw!?" mak tih hmel takin a rawn ti a.
"Umm...."
"I damṭha lo em ni?"
"Ka khua hi a sik deuh a, nasa chu a ni lo," ka ti sep a.
Nihnih khat kalta aṭang khan ka sawithiam chiah si loh hian ka awm hi a nuam lo deuh reng a, ka chau deuh nghulh a, ka khua hi sik hluah ni si lo hian a rawn sik leh ser ser ṭhin a. Pâwn chhuah pawh ka peih loh phah a, inah ka tawm ngawt ngawt reng mai a ni.
"Damdawi i ei em?" A aw-ah chuan min ngaihtuahzia a lang a.
"Umm.... ei e."
"I hritlâng chu a ni si lo tiraw?"
"Aw, hritlan pawh ka hre lo.."
"Tikhan lo mu hahdam phawt la, nakinah kan inbe leh dawn nia aw," a rawn tih chuan ka awmdan a nawm loh êm avang chuan ka lo hnial duh lova, kan dah ta a, muthilh leh tum chuan ka chhîng ta nghal a.
Ka tuihâlin min tihharh chuan zan a rei tawh hmel hle a, ka awmdan chu ka muthilh hma aiin a nuam lo daih a. Ka taksa chu a sa vur a, vawt ka ti êm êm lawi si a, ka khawsik chu a sâng hle a nih ka ring ve ngawt a!
Ka tui chhawpna bottle chu a lo ruak hiau a, ka mut hma khan a ruak tih ka hre tawh a, ka muthilh tlang ka rin loh avangin ka thawh leh huna thun mai rilruk chungin ka mu ta kha a ni a. Chutia tui in tur ka neih tak si lovah chuan peih lo tak chunga thawh chu ka tum a, ka rizai ka hlim chiah chu vawt tiin ka khur lo chauh a, ka lû lo hai deuh bawk nen ka muṭha leh ta ringawt a.
Ka tui a hal nasat tak êm avang chuan ka u Marini chu ka phone ta ringawt a, a muhil tui deuh tawh nge ni min chhâng har hle a, a la thei dawn ta lo emaw ka tih hnuah a rawn la ta hram a. Mutchhuak hmel taka min rawn chhâng chu ka aw leh thil sawi a hriat chuan a rawn ṭawng fiah ta hle a.
Minute hnih pawh a liam lovang tihah chuan ka room kawngkhar chu a rawn ri rak a, ka nu leh ka u Mârini chu an rawn inzui lut a, a hnu deuhah ka pa a rawn lut ve leh bawk a.
Ka nu-in khawsik ennaa ka khawsik a en chuan ka lo rindan ang deuh chiahin a lo sâng hle a, ka kâ leh hnârte chu a sa huam huam a, ka thaw pawh a rang hle a ni. Nachhawkna min pe nghal a, vawt ka tih êm avang chuan blanket dang la-in min sin thuahtîr a, ka pa chuan zîngkârah inentîr tura kal ngei ngei tur a ti bur a, ka nu leh ka u Marini chuan an lo thlâwp hle a.
Ka khawsik a zia deuh hnu chuan ka û leh ka pa chu mu turin an room lamah an kal a, ka nu erawh chuan min mutpui thung a. A mut hma chuan ka lu chunga kut nghatin min ṭawngṭaisak leh tê tê a, a ṭawngṭai zawh chuan kan mu ta nghal a, ka khawsik reh mah se ka taksa chu a nuam lo ru riau a, muhil ve mai thei lo chuan ka mit chu ka chhîng reng a, khawvar dawn hnaiah erawh reilotê ka lo muhil ve sek a.
Comments
Post a Comment