BEISEINA - 10
BEISEINA...!!
Sbk Pachuau
Chapter 10
Mumbai lama ka chhukthlakna pawh thla a chuang leh tawh a, Dinsângi chu zuallam pan lem lovin ṭha lutuk tia sawi tur ni bawk si lovin a awm a, thlahnih a vei leh meuh chuan min biak peih loh ṭum a nei leh ta zauh zauh a. Damdawiinah an lut leh ta zut a, Mumbai lama check-up tura rawn kal leh an tum pawh a dinhmunin a zir tak ngang lovah chuan a hun takah an rawn chhuk thei ta lova, thlathum teh meuh a liam leh hnuah an rawn kal thei ta hram a.
Mumbai-a thlahnih vel an inenkawl hnu chuan a zia leh ta viau a, thlathum an awm pum lo deuh tihah chuan a ziaawm chhoh tak zel avangin an haw chho leh thei ta a. Tunhma zawng aia damṭhaa ka hriat avangin a damṭha chho ve zel turah ngaiin ka beisei ru hle bawk a ni.
Exam a hnai tawh hle a, final exam tur ka nih avangin ka theihtawp chu ka chhuah ve a, rilru-in vei dang a neih miau avangin ṭum dang angin ka rilru-ah lehkha zir a lut mawh hle a. Ka chhûngte pawh chuan ka tihchhiat phah hlauvin min fuih ve reng a, tuna ka zir ṭhat leh ṭhat loh hian ka hun lo la kal lehzel tura ka awmdan tur a hril lawk dawn tih hria-in thildang ngaihtuah hauh lova insawrbing chu ka tum ta a.
Dinsângi nena kan inbiak leh hmasak ber ṭum chuan ka tumdan chu hrilhin ka be khât deuh rih dawn a ni tih chu ka sawi a, ani pawh chuan huphurh hle mah se ka tâna ṭha ber tur a ni tih hriain min lo hrethiam hle a. Exam lâi phei chuan ka han biak pawhin chhuanlam eng emaw siamin min lo be duh ṭhin lova, a u Marini hlirin a phone pawh chu a lo chhâng ṭhin a. Kan inbiak chuan ka zirṭhat loh phah a hlau niin a sawi mai a, ngaihṭhat lohna pawh ka nei lem lova.
Ka exam zawh nî chuan ka thaw huai a, ka tiṭha thawkhatin ka hria a, result chhe lutuk lo ka neih ka ring ve hle a ni. Ramdinsângi ka call nghal a, ka exam zawh hun tur pawh a hre vek a, amah ngeiin min lo chhan tawh ngei ringin ka phur hle a, ka vawikhat callna chu a inring quit ta ṭhak a. A buai emaw, a bulhnaiah a phone a dah lo emaw anih ringin a hman huna min be mai turin message ka hnutchhiah ta ringawt a.
Ka inbual zo, bathroom aṭanga ka chhuah chuan ka phone ri chu a tawplam ka hre hman hram a, ka en vat a, ka duati ngei a lo ni a, phur takin ka call let nghal a.
"Hello.."
Ramdinsângi aw a ni hauh lo, a u Marini zawk a lo la ni cheu!
"Khawnge...."
"Hriatzual, i exam vangin kan hrilh duh lo che a, Mâmtei chu kârhnih kal ta khan damdawiinah kan dah lut leh a!" A insût hraih ri chu ka hre pha a.
"Eng a?" ka tum ni miah lovin ka aw ki chu a ring ṭha kher mai!
"Damdawiinah kan lut leh a, amah hi a chau angreng viau bawk."
Ka thu hriat chuan min ṭhâwng tak zet a, hlim taka biak ka tumlâia chutiang thu ka hre ta mai chuan min barakhaih hle a, ka thisen kallâite chu chawl ta ṭhuap ni maiin ka hre hîal a ni.
"Tun thlatir lam aṭang khan a chau leh deuh a, a la ṭawng peih deuh lâi pawh khan a aw aṭangin i hrethiam ang tih hlauvin keimah hlir kha be tur che-in min ti a. I exam i tihchhiat phah ang tih kha a hlau a, a chauh zual tak hnu pawh khan i exam zawh hnua hrilh mai che kha ṭha-in kan hria a, kan rawn hrilh ta lo che a ni," a rawn tihzawm leh a.
Ka bîng deuh mup mup a, ka chhûngril aṭangin hlauhthawnna nasa lutuk a rawn irhchhuak a, ka ke chuan min zo lo ni awm fahranin sofaah chuan ka ṭhuthla hnawk a. Ka phone a rawn rik chuan lak tumna pawh ka nei lova, a rawn rik leh takah chuan ka la ta hram a, Ramesh a lo ni a.
Ka aw aṭangin thil dik lo a awm a ni tih a rawn manthiam nghal mai a, min zawt ta chat mai reng a, thil awmdan ka hrilh hnu chuan a lo kal tur thu chu sawiin a dah ta nghal a.
A damṭha nia ka hriat avangin exam zawh tuka haw nghal lovin a thil tur eng emaw leia bazar phawta a tuk leha haw chhoh chu ka lo rilruk dan a ni a. Ka in luah chu ka luahzawm tawh dawn loh avangin tihfel vek a ngai bawk a, exam zawh tuka haw rum rum thei ka ni lo hrim hrim a ni.
Ramesh a lo thlen chuan a tuka haw chhohna tur flight ticket min ngaihtuahsak turin ka ti a, milian chhûngkuaa seilian tih takah hmelhriat leh ṭhian a ngah a, awlsam takin a tuka haw chhohna tur chu min hmuhsak ta mai reng a. Ka in luah pawh chu a kutah ka dah tawp a, luahman ka pe fel vek tawh a, bungrua ka hawn bak chu a duh duha a lo tihral turin ka ti a, a kutah ka nghat tawp mai a ni.
Ka nu-in min rawn phone chuan ka nat hlau takin Dinsângi dinhmun chu a dam thei ang berin min hrilh a, haw chhoh ka tumdante min zawt a. Ka tumdan leh Ramesh kuta engkim ka dah thu chu ka hrilh a, kan inbiak zawh chuan ka theih ang angin ka in pack ta nghal a.
Airport thleng Ramesha'n min thlah a, buaina tawk lovin Mizoram kan thleng a, Lengpui Airportah ka nau leh driverin min lo nghak a. In lama haw nghal lova damdawiin lama tlang ka duh avang chuan damdawiin lam panin kan tlan nghal a, traffic jama kan tan chhungte chuan ka hmanhmawh tawh lutuk chuan kea kal maite chu ka duh rum rum a, a tawp a tawpah chuan damdawiin chu kan thleng ta hram a.
Ka nau-in a awmna room a hriat avangin kan pan ding ta nghal a, driver erawh motorah a lo awm thung a. Room chhûnga kan luh chuan awm an lo awm deuh nual a, min hmuh veleh Marini chuan min lo chiau-au vat a, a nu pawh chuan mittui tling piau chungin min lo chibai vat a.
Ramdinsângi chu khumah chuan a lo mu dâng bei a, oxygen an pe a, drip an lo khai bawk a, a landanah chuan tui taka muhil ni mai awm a ni. A kut chu ka hmer vang vang a, a hmêl lo tla leh dâk tawh chu ka thlir vawng vawng a, a sam chu an lo ziat kawlh vek bawk a, ka thinlung chhûngril chu a rum tak meuh a ni.
"Ka duat..." A bengbulah chuan zawitê-in ka au a, a mit chu men tum ni awm takin a rawn chet a.
"Ka duat, ka lo thleng tawh a nia! Tinge min lo biak miah loh?" Zawitê te chuan ka phun mawlh mawlh a, midang lo awm ve pawh chu ka zah zo tawh lo a ni ber e.
A kut ka vawnna chu a rawn hum let a, a mit chu men tumin a rawn bei leh a, fiah lo riaia rawn mengin a chhîng leh nghal daih a.
"Hriat...?" A aw chu a ri chhuak zo mang lova, a hmel ka en reng avang leh ka hnaih êm avangin ka hre thei a ni mai a.
"Ka duat, heta hi ka awm a nia," kunhniamin ka ti a, a nu chu ka bulah a rawn ṭhu thla ve thuai a.
"Mâmbawih, i u Hriatzuala a lo thlen tawh hi i hria maw?" a fanu chu en ngawih ngawih chungin a ti a.
"Umm..."
"Ei chak i nei em?"
Chhâng lova a awm ngai renga a awm takah chuan a duh lo tih ka hrethiam mai a. 'Aw' leh 'aih' bakin mi a chhâng peih lova, ngawi rengin ka ṭawng a lo ngaithla a, nikhua a hria chu ka lawm tawk êm êm tho a ni.
A muthilh leh tak hnu chuan inbuala inthlak phawtte ka la ngaih avangin kan hawsan ta a, in kan thlen chuan ka nu leh ka pa chu varandaa lo chhuakin min lo hmuak a, ka nu hmelah chuan lungngaihna hmu-in ka inhria a. A demawm love, a fapa-in damlo thi mai tura ngaih a hmangaih miau a, tu nu mahin an fate chanah an duh bikin a rinawm loh a ni.
Ka inbual zawh chuan Ramesh nen kan inbia a, ka thlen tluan leh tluan lohte min zawt a, Dinsângi chanchin min zawt bawk a. Kan inbiak zawh hnu chuan insiam sa vekin inhnuai lamah ka chhukthla ta a, ka nu leh pa leh ka farnu chu sitting roomah an lo awm a, an bulah chuan ka ṭhu ve nghal a.
"Mama, damdawiin lama phei leh nghal mai i tum em ni?" ka pa chuan a lo ti a.
"Chaw eikhamah ka phei leh nghal mai ang chu ka ti!"
"Reilote tal mu hahdam ve phawt la, i chau hle awm si a, nizan lamah i muthilh ka ring miah lo," ka nu chuan a lo ti ve a.
"Nu, mu mah ila ka muhil thei chuang lovang, hei ka hahdam tawh alawm, min ngaihtuah suh," ka lo ti thung a.
Zanriah ei kham veleh damdawiin lam panin ka chhuak leh ta nghal a, ka va thlen chuan Ramdina pawh a lo awm ve tawh a. Ani pawh kumin kumtir lam khan a thawhna Serchhip aṭangin Aizawl lamah an transfer ve ta hlauh a, chhûng kimin an awm ve leh thei ta a ni.
Roberta leh a bialnu kumhlun Muani chu an rawn inzui lut a, tleirawl chhuah hlim aṭanga inngâizâwng tawh an ni a, thla leh lawka innei tawh mai tur an ni nghe nghe a ni.
"Oxygen tel lovin ka awm thei ang," amah berin a ti mauh mai si a, Roberta chuan en chhinna rei vak lote chu han phawi chhin pawh a pawi love tiin a hlihsak ta rih a.
"Damdawi mumlian a lo thleng chho leh tawh bawk a, oxygen pawh kan hlip rawk rawk mai alawm," tiin Dinsângi chu a fiamzui a, a zak chu rizaiin a inlukhup ta daih a, midang awm vete chuan an lo nuih dar dar a.
Ṭhianpa Hlua'n min lo callin ka awmna min rawn zawt a, ka lo hrilh ve mai a. A hnu rei lutuk lovah chuan Lawmi nen an rawn inzui lut ve ta ral ral a, Roberta te pahnih pawh chu kal mai lovin an ṭhu ve deuh reng a. Dinsângi pawh rinai takin a harh chho reuh phian a, Roberta chuan a zia chho ve zel dawn nia a rinthu chu a sawi a, kei pawhin tlemin beiseina ka nei leh ta deuh a.
Chumi kâr chho chu a ṭha chho ta viau mai reng a, thil tlêm tlêm a ei ve chhoh takah phei chuan amah pawh a hawiharh sawt hle a, in lama haw a chák tawhzia a sawi reng bawk a. Kâr khat dang a vei leh hnu chuan an inlachhuak ta nge nge a, engtin emaw awm a nih chuan damdawiin lama tlan leh nghal vat turin Roberta chuan a chah a, a ṭul a nih phawt chuan amah pawh be hreh lo turin a chah tel bawk a.
Ka pa hmelhriat neih ṭhat azârah min ruaitu ka hmu ve ta nual a, result chhuah hma hauhvin ka hna chu ka thawk ta nual mai a, ka nu-in Pathian malsawmna vang liau liau a ni tih a sawi chu ka pawmpui hle a ni.
Ka hun neihdan azirin a tam thei ang ber Dinsângi bulah hun ka hmang ṭhin a, a chemotherapy lak vanga a sam tla nasa lutuk an ziahkawlhsak tak kha nuam lo a tiin a inkiltawih phaha ka hriat avangin ka sam chu ka mehkawlhtîr ve ta daih a. Ka metkawlh ve tih a hmuh ṭum chuan nasa takin min ṭahkhum a, kalsan turin min ngen leh a, ka kalsan ngai dawn lo a ni tih ka hrilh pawh chuan min tikhawtlaitu mai mai nia a inhriat tlat avangin a hmaa ka rilrua la awm ngai miah lo chu ka ngaihtuah phah ta a.
Chumi ṭuma ka lêng ka haw chu ka nu leh pate hnenah chuan thil pawimawha biak ka duhthu ka hrilh a, an room lamah kan inzuilut a.
"Ka nu, ka pa, nupui neih ka duh!"
"Maw..?" Ka nu chuan maktih hmel zetin a rawn tichhuak hluai a.
"Ramdinsângi saw nupuia neih ka duh, a rang lamin!"
"Mama, i thil sawi chu i hrechiang maw?" ka nu bawk chuan a lo ti leh a.
"Aw, ngun taka ka ngaihtuah hnuah thutlukna ka siam chauh a ni a, ka hrechiang e."
"I hmangaih em?" ka pa chuan min zawt a.
"Ka thinlung zawng zawngin," ka lo ti vat a.
"A dinhmun i hrechiang a, chuti chunga nupui atân i la duh a nih chuan i thu a ni e. Thutlukna dik i siam ngei ka beisei, hmangaihna avangin hlim takin i awm ang a, hmangaihna avang bawkin i la ṭap dawn a ni tih erawh i inhriat lawk a ngai ang," ka pa bawk chuan a ti leh a.
"Aw le, ka hria e. Chumi hre chunga ka rilru pawh siamfel ka ni e."
"Anmahni lamin an hre tawh em?"
"La hre lo. Zaninah a nu leh pate ka ti tipui ang chu ka ti a."
"A ṭha e, in inbiakdan azirin palâi tirhdan kan ruahman dawn nia," ka pa chuan a ti ta a.
Dinsângi nu leh pa hnena ka thiltum ka hrilh chuan ka nu leh pate ang bawkin mak tiin an mengphawk hle a, thi mai thei dinhmuna ding mêk an fanu chu nupuia neih ka dil miau mai si a, mak an ti viau pawh chu a awm hle a ni.
Dinsângi pa chuan,"Vâla, i thil min dil hi i hrechiang maw? Sûn tur ringawta nupui neih chu i ngam meuh ang maw?" muang charh hian a ti dap dap a, kan inhriat tirha min kohdan angin min la ko zui ta zel a ni.
"Uluk taka ka ngaihtuah hnuah rilru fîm tak pû-in thutlukna ka sîam a, ka thiltih hi ka hrechiang khawp mai."
"Hlimna aiin lungngaihnain a hmuak nasa zawk dawn che u tih hre chung pawhin i nei duh tho amaw?" Dinsângi nu chuan mittui tla zawih zawih chungin a lo ti a.
"Aw, ka pi, in fanu hi ka hmangaih a, ka nupui ni hman lovin min kalsan ang tih ka hlau a ni."
"Ka la enkawl kham lo asin! Pasal a neih daihte chuan ka enkawl phak tawh dawn lo asin!" ṭah aw deuhin a nu chuan a ti a, a mittui chu a hru pah mawlh mawlh a.
"Kan inneih hnuah pawh i la enkawl thei dawn tho alawm, in fanu a nihna a bo dawn chuang hleinem," ka lo ti vat a.
"I chhûngte lakah pawh inthlahrun a na duh dawn hle a ni, damṭha lo chunga pasal kan neihtir chuan mi pawhin min dem lutuk ang tih pawh a hlauhawm a, i nu leh pate pawhin mo atan an lo duh lo mai thei bawk," a pa chuan a ti leh a.
"Ka nu leh pate remtihna leh hriatpuina ngei a he thu hi in hnena rawn sawi ka ni e, ka chhûngte lamah chuan venthawn tur a awm a ni," ka ti a.
"Mi phurrit ni tur ringawta han thlahliam chu kan ngam dawn em ni le! Amah Mâmbawihi ngaihdante pawh han hre ve phawt ila, kan la sawiṭha leh dawn nia," pa ber chuan a ti ta a.
A chhûngte mut hnu chuan Dinsângi chu inneih chungchâng chu ka sawipui ta a.
"Ka duat, palâi ka rawn tîr dawn a nia aw?" ka tih chuan ka kuahna aṭanga inlahrangin mak tih hmel zetin min melh reng a.
"Pasal atân min duh em?" a ngawih reng avang chuan ka ti leh a.
"Duh e. Mahse, ka nei dawn lo che!"
"Engvangin?"
"A chhan chu nang hi ka nei che a nih chuan hrehawmna leh rilru hahna bak ka thlen dawn lo che. Chutiang atan chuan ka phal lo che a ni."
"Ni love, nang nen hian kan innei ang a, hlim takin kan awmdun ang. Tun aṭang chuan pasal nei turin i rilru i lo siam ṭan tawh dawn nia."
"Khawngaihin hriatthiam tum hram teh. Ka dinhmun i hria a, pasal nei thei ka ni lo tih pawh i hria alawm."
"Pasal nei thei i ni tih ka hria a, chuvangin, ka nei dawn che, chu chu thutawp a ni," kuah leh pah chuan ka ti a, min hnaih thei ang berin ka pawthnai nghal bawk a.
"Hriat, min hre..." a sawi zawh hma chuan ka fawp ta hmiah a, hawisawn a tum chuan a tukkhumah ka vuanbet tlat a, duhthawh takin ka fawp tawn tawn a, hawisawn thei miau hek lo le min chhânglet ve leh ta nge nge a.
"Hriat, mo ni tlak ka ni lo. Khawngaihin i thiltum hi ngaihtuah chiang teh," kan inthlah rual rual chuan a rawn tichhuak nghal a.
"I dinhmun engkim ka hre chiang a, ka chhûngte pawhin an hre vek. Chuti chuang chuan nang hi kan chhûngkuaa lo tel ve turin kan duh vek che, i inthlahrunna kha dahbo la, hmalam hun hlim takin thlirdun zawk teh ang," tiin min hnial leh hma chuan thildang ka sawipui ta daih a.
Marini hla zir a lo haw a, Thantea'n a rawn zui haw a, a hnu rei vak lovah Ramdina lengchhuak a rawn haw bawk a, eng eng emaw sawiin kan ti ti zui ta luam a.
Sbk Pachuau
Chapter 10
Mumbai lama ka chhukthlakna pawh thla a chuang leh tawh a, Dinsângi chu zuallam pan lem lovin ṭha lutuk tia sawi tur ni bawk si lovin a awm a, thlahnih a vei leh meuh chuan min biak peih loh ṭum a nei leh ta zauh zauh a. Damdawiinah an lut leh ta zut a, Mumbai lama check-up tura rawn kal leh an tum pawh a dinhmunin a zir tak ngang lovah chuan a hun takah an rawn chhuk thei ta lova, thlathum teh meuh a liam leh hnuah an rawn kal thei ta hram a.
Mumbai-a thlahnih vel an inenkawl hnu chuan a zia leh ta viau a, thlathum an awm pum lo deuh tihah chuan a ziaawm chhoh tak zel avangin an haw chho leh thei ta a. Tunhma zawng aia damṭhaa ka hriat avangin a damṭha chho ve zel turah ngaiin ka beisei ru hle bawk a ni.
Exam a hnai tawh hle a, final exam tur ka nih avangin ka theihtawp chu ka chhuah ve a, rilru-in vei dang a neih miau avangin ṭum dang angin ka rilru-ah lehkha zir a lut mawh hle a. Ka chhûngte pawh chuan ka tihchhiat phah hlauvin min fuih ve reng a, tuna ka zir ṭhat leh ṭhat loh hian ka hun lo la kal lehzel tura ka awmdan tur a hril lawk dawn tih hria-in thildang ngaihtuah hauh lova insawrbing chu ka tum ta a.
Dinsângi nena kan inbiak leh hmasak ber ṭum chuan ka tumdan chu hrilhin ka be khât deuh rih dawn a ni tih chu ka sawi a, ani pawh chuan huphurh hle mah se ka tâna ṭha ber tur a ni tih hriain min lo hrethiam hle a. Exam lâi phei chuan ka han biak pawhin chhuanlam eng emaw siamin min lo be duh ṭhin lova, a u Marini hlirin a phone pawh chu a lo chhâng ṭhin a. Kan inbiak chuan ka zirṭhat loh phah a hlau niin a sawi mai a, ngaihṭhat lohna pawh ka nei lem lova.
Ka exam zawh nî chuan ka thaw huai a, ka tiṭha thawkhatin ka hria a, result chhe lutuk lo ka neih ka ring ve hle a ni. Ramdinsângi ka call nghal a, ka exam zawh hun tur pawh a hre vek a, amah ngeiin min lo chhan tawh ngei ringin ka phur hle a, ka vawikhat callna chu a inring quit ta ṭhak a. A buai emaw, a bulhnaiah a phone a dah lo emaw anih ringin a hman huna min be mai turin message ka hnutchhiah ta ringawt a.
Ka inbual zo, bathroom aṭanga ka chhuah chuan ka phone ri chu a tawplam ka hre hman hram a, ka en vat a, ka duati ngei a lo ni a, phur takin ka call let nghal a.
"Hello.."
Ramdinsângi aw a ni hauh lo, a u Marini zawk a lo la ni cheu!
"Khawnge...."
"Hriatzual, i exam vangin kan hrilh duh lo che a, Mâmtei chu kârhnih kal ta khan damdawiinah kan dah lut leh a!" A insût hraih ri chu ka hre pha a.
"Eng a?" ka tum ni miah lovin ka aw ki chu a ring ṭha kher mai!
"Damdawiinah kan lut leh a, amah hi a chau angreng viau bawk."
Ka thu hriat chuan min ṭhâwng tak zet a, hlim taka biak ka tumlâia chutiang thu ka hre ta mai chuan min barakhaih hle a, ka thisen kallâite chu chawl ta ṭhuap ni maiin ka hre hîal a ni.
"Tun thlatir lam aṭang khan a chau leh deuh a, a la ṭawng peih deuh lâi pawh khan a aw aṭangin i hrethiam ang tih hlauvin keimah hlir kha be tur che-in min ti a. I exam i tihchhiat phah ang tih kha a hlau a, a chauh zual tak hnu pawh khan i exam zawh hnua hrilh mai che kha ṭha-in kan hria a, kan rawn hrilh ta lo che a ni," a rawn tihzawm leh a.
Ka bîng deuh mup mup a, ka chhûngril aṭangin hlauhthawnna nasa lutuk a rawn irhchhuak a, ka ke chuan min zo lo ni awm fahranin sofaah chuan ka ṭhuthla hnawk a. Ka phone a rawn rik chuan lak tumna pawh ka nei lova, a rawn rik leh takah chuan ka la ta hram a, Ramesh a lo ni a.
Ka aw aṭangin thil dik lo a awm a ni tih a rawn manthiam nghal mai a, min zawt ta chat mai reng a, thil awmdan ka hrilh hnu chuan a lo kal tur thu chu sawiin a dah ta nghal a.
A damṭha nia ka hriat avangin exam zawh tuka haw nghal lovin a thil tur eng emaw leia bazar phawta a tuk leha haw chhoh chu ka lo rilruk dan a ni a. Ka in luah chu ka luahzawm tawh dawn loh avangin tihfel vek a ngai bawk a, exam zawh tuka haw rum rum thei ka ni lo hrim hrim a ni.
Ramesh a lo thlen chuan a tuka haw chhohna tur flight ticket min ngaihtuahsak turin ka ti a, milian chhûngkuaa seilian tih takah hmelhriat leh ṭhian a ngah a, awlsam takin a tuka haw chhohna tur chu min hmuhsak ta mai reng a. Ka in luah pawh chu a kutah ka dah tawp a, luahman ka pe fel vek tawh a, bungrua ka hawn bak chu a duh duha a lo tihral turin ka ti a, a kutah ka nghat tawp mai a ni.
Ka nu-in min rawn phone chuan ka nat hlau takin Dinsângi dinhmun chu a dam thei ang berin min hrilh a, haw chhoh ka tumdante min zawt a. Ka tumdan leh Ramesh kuta engkim ka dah thu chu ka hrilh a, kan inbiak zawh chuan ka theih ang angin ka in pack ta nghal a.
Airport thleng Ramesha'n min thlah a, buaina tawk lovin Mizoram kan thleng a, Lengpui Airportah ka nau leh driverin min lo nghak a. In lama haw nghal lova damdawiin lama tlang ka duh avang chuan damdawiin lam panin kan tlan nghal a, traffic jama kan tan chhungte chuan ka hmanhmawh tawh lutuk chuan kea kal maite chu ka duh rum rum a, a tawp a tawpah chuan damdawiin chu kan thleng ta hram a.
Ka nau-in a awmna room a hriat avangin kan pan ding ta nghal a, driver erawh motorah a lo awm thung a. Room chhûnga kan luh chuan awm an lo awm deuh nual a, min hmuh veleh Marini chuan min lo chiau-au vat a, a nu pawh chuan mittui tling piau chungin min lo chibai vat a.
Ramdinsângi chu khumah chuan a lo mu dâng bei a, oxygen an pe a, drip an lo khai bawk a, a landanah chuan tui taka muhil ni mai awm a ni. A kut chu ka hmer vang vang a, a hmêl lo tla leh dâk tawh chu ka thlir vawng vawng a, a sam chu an lo ziat kawlh vek bawk a, ka thinlung chhûngril chu a rum tak meuh a ni.
"Ka duat..." A bengbulah chuan zawitê-in ka au a, a mit chu men tum ni awm takin a rawn chet a.
"Ka duat, ka lo thleng tawh a nia! Tinge min lo biak miah loh?" Zawitê te chuan ka phun mawlh mawlh a, midang lo awm ve pawh chu ka zah zo tawh lo a ni ber e.
A kut ka vawnna chu a rawn hum let a, a mit chu men tumin a rawn bei leh a, fiah lo riaia rawn mengin a chhîng leh nghal daih a.
"Hriat...?" A aw chu a ri chhuak zo mang lova, a hmel ka en reng avang leh ka hnaih êm avangin ka hre thei a ni mai a.
"Ka duat, heta hi ka awm a nia," kunhniamin ka ti a, a nu chu ka bulah a rawn ṭhu thla ve thuai a.
"Mâmbawih, i u Hriatzuala a lo thlen tawh hi i hria maw?" a fanu chu en ngawih ngawih chungin a ti a.
"Umm..."
"Ei chak i nei em?"
Chhâng lova a awm ngai renga a awm takah chuan a duh lo tih ka hrethiam mai a. 'Aw' leh 'aih' bakin mi a chhâng peih lova, ngawi rengin ka ṭawng a lo ngaithla a, nikhua a hria chu ka lawm tawk êm êm tho a ni.
A muthilh leh tak hnu chuan inbuala inthlak phawtte ka la ngaih avangin kan hawsan ta a, in kan thlen chuan ka nu leh ka pa chu varandaa lo chhuakin min lo hmuak a, ka nu hmelah chuan lungngaihna hmu-in ka inhria a. A demawm love, a fapa-in damlo thi mai tura ngaih a hmangaih miau a, tu nu mahin an fate chanah an duh bikin a rinawm loh a ni.
Ka inbual zawh chuan Ramesh nen kan inbia a, ka thlen tluan leh tluan lohte min zawt a, Dinsângi chanchin min zawt bawk a. Kan inbiak zawh hnu chuan insiam sa vekin inhnuai lamah ka chhukthla ta a, ka nu leh pa leh ka farnu chu sitting roomah an lo awm a, an bulah chuan ka ṭhu ve nghal a.
"Mama, damdawiin lama phei leh nghal mai i tum em ni?" ka pa chuan a lo ti a.
"Chaw eikhamah ka phei leh nghal mai ang chu ka ti!"
"Reilote tal mu hahdam ve phawt la, i chau hle awm si a, nizan lamah i muthilh ka ring miah lo," ka nu chuan a lo ti ve a.
"Nu, mu mah ila ka muhil thei chuang lovang, hei ka hahdam tawh alawm, min ngaihtuah suh," ka lo ti thung a.
Zanriah ei kham veleh damdawiin lam panin ka chhuak leh ta nghal a, ka va thlen chuan Ramdina pawh a lo awm ve tawh a. Ani pawh kumin kumtir lam khan a thawhna Serchhip aṭangin Aizawl lamah an transfer ve ta hlauh a, chhûng kimin an awm ve leh thei ta a ni.
Roberta leh a bialnu kumhlun Muani chu an rawn inzui lut a, tleirawl chhuah hlim aṭanga inngâizâwng tawh an ni a, thla leh lawka innei tawh mai tur an ni nghe nghe a ni.
"Oxygen tel lovin ka awm thei ang," amah berin a ti mauh mai si a, Roberta chuan en chhinna rei vak lote chu han phawi chhin pawh a pawi love tiin a hlihsak ta rih a.
"Damdawi mumlian a lo thleng chho leh tawh bawk a, oxygen pawh kan hlip rawk rawk mai alawm," tiin Dinsângi chu a fiamzui a, a zak chu rizaiin a inlukhup ta daih a, midang awm vete chuan an lo nuih dar dar a.
Ṭhianpa Hlua'n min lo callin ka awmna min rawn zawt a, ka lo hrilh ve mai a. A hnu rei lutuk lovah chuan Lawmi nen an rawn inzui lut ve ta ral ral a, Roberta te pahnih pawh chu kal mai lovin an ṭhu ve deuh reng a. Dinsângi pawh rinai takin a harh chho reuh phian a, Roberta chuan a zia chho ve zel dawn nia a rinthu chu a sawi a, kei pawhin tlemin beiseina ka nei leh ta deuh a.
Chumi kâr chho chu a ṭha chho ta viau mai reng a, thil tlêm tlêm a ei ve chhoh takah phei chuan amah pawh a hawiharh sawt hle a, in lama haw a chák tawhzia a sawi reng bawk a. Kâr khat dang a vei leh hnu chuan an inlachhuak ta nge nge a, engtin emaw awm a nih chuan damdawiin lama tlan leh nghal vat turin Roberta chuan a chah a, a ṭul a nih phawt chuan amah pawh be hreh lo turin a chah tel bawk a.
Ka pa hmelhriat neih ṭhat azârah min ruaitu ka hmu ve ta nual a, result chhuah hma hauhvin ka hna chu ka thawk ta nual mai a, ka nu-in Pathian malsawmna vang liau liau a ni tih a sawi chu ka pawmpui hle a ni.
Ka hun neihdan azirin a tam thei ang ber Dinsângi bulah hun ka hmang ṭhin a, a chemotherapy lak vanga a sam tla nasa lutuk an ziahkawlhsak tak kha nuam lo a tiin a inkiltawih phaha ka hriat avangin ka sam chu ka mehkawlhtîr ve ta daih a. Ka metkawlh ve tih a hmuh ṭum chuan nasa takin min ṭahkhum a, kalsan turin min ngen leh a, ka kalsan ngai dawn lo a ni tih ka hrilh pawh chuan min tikhawtlaitu mai mai nia a inhriat tlat avangin a hmaa ka rilrua la awm ngai miah lo chu ka ngaihtuah phah ta a.
Chumi ṭuma ka lêng ka haw chu ka nu leh pate hnenah chuan thil pawimawha biak ka duhthu ka hrilh a, an room lamah kan inzuilut a.
"Ka nu, ka pa, nupui neih ka duh!"
"Maw..?" Ka nu chuan maktih hmel zetin a rawn tichhuak hluai a.
"Ramdinsângi saw nupuia neih ka duh, a rang lamin!"
"Mama, i thil sawi chu i hrechiang maw?" ka nu bawk chuan a lo ti leh a.
"Aw, ngun taka ka ngaihtuah hnuah thutlukna ka siam chauh a ni a, ka hrechiang e."
"I hmangaih em?" ka pa chuan min zawt a.
"Ka thinlung zawng zawngin," ka lo ti vat a.
"A dinhmun i hrechiang a, chuti chunga nupui atân i la duh a nih chuan i thu a ni e. Thutlukna dik i siam ngei ka beisei, hmangaihna avangin hlim takin i awm ang a, hmangaihna avang bawkin i la ṭap dawn a ni tih erawh i inhriat lawk a ngai ang," ka pa bawk chuan a ti leh a.
"Aw le, ka hria e. Chumi hre chunga ka rilru pawh siamfel ka ni e."
"Anmahni lamin an hre tawh em?"
"La hre lo. Zaninah a nu leh pate ka ti tipui ang chu ka ti a."
"A ṭha e, in inbiakdan azirin palâi tirhdan kan ruahman dawn nia," ka pa chuan a ti ta a.
Dinsângi nu leh pa hnena ka thiltum ka hrilh chuan ka nu leh pate ang bawkin mak tiin an mengphawk hle a, thi mai thei dinhmuna ding mêk an fanu chu nupuia neih ka dil miau mai si a, mak an ti viau pawh chu a awm hle a ni.
Dinsângi pa chuan,"Vâla, i thil min dil hi i hrechiang maw? Sûn tur ringawta nupui neih chu i ngam meuh ang maw?" muang charh hian a ti dap dap a, kan inhriat tirha min kohdan angin min la ko zui ta zel a ni.
"Uluk taka ka ngaihtuah hnuah rilru fîm tak pû-in thutlukna ka sîam a, ka thiltih hi ka hrechiang khawp mai."
"Hlimna aiin lungngaihnain a hmuak nasa zawk dawn che u tih hre chung pawhin i nei duh tho amaw?" Dinsângi nu chuan mittui tla zawih zawih chungin a lo ti a.
"Aw, ka pi, in fanu hi ka hmangaih a, ka nupui ni hman lovin min kalsan ang tih ka hlau a ni."
"Ka la enkawl kham lo asin! Pasal a neih daihte chuan ka enkawl phak tawh dawn lo asin!" ṭah aw deuhin a nu chuan a ti a, a mittui chu a hru pah mawlh mawlh a.
"Kan inneih hnuah pawh i la enkawl thei dawn tho alawm, in fanu a nihna a bo dawn chuang hleinem," ka lo ti vat a.
"I chhûngte lakah pawh inthlahrun a na duh dawn hle a ni, damṭha lo chunga pasal kan neihtir chuan mi pawhin min dem lutuk ang tih pawh a hlauhawm a, i nu leh pate pawhin mo atan an lo duh lo mai thei bawk," a pa chuan a ti leh a.
"Ka nu leh pate remtihna leh hriatpuina ngei a he thu hi in hnena rawn sawi ka ni e, ka chhûngte lamah chuan venthawn tur a awm a ni," ka ti a.
"Mi phurrit ni tur ringawta han thlahliam chu kan ngam dawn em ni le! Amah Mâmbawihi ngaihdante pawh han hre ve phawt ila, kan la sawiṭha leh dawn nia," pa ber chuan a ti ta a.
A chhûngte mut hnu chuan Dinsângi chu inneih chungchâng chu ka sawipui ta a.
"Ka duat, palâi ka rawn tîr dawn a nia aw?" ka tih chuan ka kuahna aṭanga inlahrangin mak tih hmel zetin min melh reng a.
"Pasal atân min duh em?" a ngawih reng avang chuan ka ti leh a.
"Duh e. Mahse, ka nei dawn lo che!"
"Engvangin?"
"A chhan chu nang hi ka nei che a nih chuan hrehawmna leh rilru hahna bak ka thlen dawn lo che. Chutiang atan chuan ka phal lo che a ni."
"Ni love, nang nen hian kan innei ang a, hlim takin kan awmdun ang. Tun aṭang chuan pasal nei turin i rilru i lo siam ṭan tawh dawn nia."
"Khawngaihin hriatthiam tum hram teh. Ka dinhmun i hria a, pasal nei thei ka ni lo tih pawh i hria alawm."
"Pasal nei thei i ni tih ka hria a, chuvangin, ka nei dawn che, chu chu thutawp a ni," kuah leh pah chuan ka ti a, min hnaih thei ang berin ka pawthnai nghal bawk a.
"Hriat, min hre..." a sawi zawh hma chuan ka fawp ta hmiah a, hawisawn a tum chuan a tukkhumah ka vuanbet tlat a, duhthawh takin ka fawp tawn tawn a, hawisawn thei miau hek lo le min chhânglet ve leh ta nge nge a.
"Hriat, mo ni tlak ka ni lo. Khawngaihin i thiltum hi ngaihtuah chiang teh," kan inthlah rual rual chuan a rawn tichhuak nghal a.
"I dinhmun engkim ka hre chiang a, ka chhûngte pawhin an hre vek. Chuti chuang chuan nang hi kan chhûngkuaa lo tel ve turin kan duh vek che, i inthlahrunna kha dahbo la, hmalam hun hlim takin thlirdun zawk teh ang," tiin min hnial leh hma chuan thildang ka sawipui ta daih a.
Marini hla zir a lo haw a, Thantea'n a rawn zui haw a, a hnu rei vak lovah Ramdina lengchhuak a rawn haw bawk a, eng eng emaw sawiin kan ti ti zui ta luam a.
Comments
Post a Comment