VANMALSAWMA Chapter - 23

VANMALSAWMA

Chapter 23




           Lalhminga'n ka bânréka a vawnna chu thinthlak tum chuan ka bei a, min vawn ngheh êm avang chuan ka thingthla thei si lova, ka bánrék chu a thip hlur tawh a.

          Zovi leh Teruata pawh an rawn thleng phei ve nghal a, u Malsawma chu rawn tawlh hnai lehin ka bânah chuan a rawn vuan a.

          "A kut hi thlah rawh!' Rum lutuka Lalhminga melh pah chuan chang béng báwng tak mai chuan a rawn ti a.

          "Nangmah hi em ni a bîalpa inti kha? I fanu a ni zawk lo maw, ka pu?" ti-el tih hriat lutukin Lalhminga chuan a lo ti a, a ruih phût avang chuan a páwr êm êm a, a cho hi tunge a nih a hrechiang lo a ni!

         Ka bân a hmerna chu u Malsawma chuan a phihthlaksak sawk a, "Kut ka thlak hmâ che hian inthiarfihlim rang rawh," a ti chhum hmak a.

          "Tunge ka nih hi i hre lo a ni maw! Khatiang tea min han tih ngam chu le!" tih pah chuan Lalhminga chuan u Malsawma chu a bawh phei a, hnek tum chuan a kut chu a vai fua a.

          Ka lo ṭe tuarh a, mahse, ka hlauh angin thil a thleng ta lo! U Malsawma chuan hneh lutukin Lalhminga kut chu lo mansakin a khabe-ah tak chuan a hneksak ta sawk  a, a pai nghal chawn chawn a, a rui deuh bawk nen piah deuhah chuan a va tlu ta hnawk a.

         A kawr nghawngah chuan va ṭham lehin a phih tho nawk a, "Tunge i nih ka hre lova, eng ang mi nge i nih erawh ka hre chiang e! Kal la, hmeichhe duh lo chung tihbuai hi ching nawn tawh hlek suh," aw ki hniam, fiah tak si chuan a ti fak fak a.

          Lalhminga hmélah chuan a hmaa a  chapo hmêl kha hmuh tur a awm tawh lova, hlau leh tlâwm hmél a pu dâk tawh zawk a, a rui a reh tawh niawm tak a ni a mitmeng pawh harhfîm mitmeng ang mai a ni tawh a ni.

          Engmah sawi tawh lo chuan ngâwi rengin a kalsawn ta hnú hnú a, a hnungah chuan a ṭhiante chuan an zui dam dam a, milian fa te a ni bawk a, ṭhuihruai pawh a ngah viau a ni.

          Ka tha chu a la khur dar dar a, ka bula u Malsawma a rawn din a min rawn kuah pawh chuan ka la khurh nasat em avang chuan min kuah ang ang chuan ka lo ding mawl tawp a, Zovi chuan Lalhminga chu phone-a lo chhângtu kha a nih thu a lo hrilh ve mawlh mawlh thung a.

          "I ṭha em?" min ngaihtuah tih hriat taka min en pah chuan a rawn ti sup a, ka lu chu ka lo bu nghat a.

          Ka bânrék, Lalhminga hmerna kha ka tuai vat vat reng a, chu chu a rawn hmuhin ka kut chu la-in ka tuaina lâi chu dim takin min tuaisak a, dam huai huaiin ka hria a!

          Reilotê kan awm leh hnu chuan kan boruak tawnin a zir lo deuh bawk nen haw chu kan rawt ta thuai a, Bawihtei chu chulâi hmuna lêng ve naupang dangte nen an lo infîam a, a pa-in a koh chuan a rawn tlan phei nghal vat a. Zovi'n thla lak a rawt avang chuan kan han la nial nual a, kan lak zawh chuan kan haw ta nghal vang vang a.

          Zanah chuan inkhawm lovin inah kan awm a, khua a vawh zual deuh avangin inthuam lumin heater aiin kan ṭhu ṭhap a, ka nu pawh inkhawm peih bik lovin kan bulah chuan puanlum sin chungin a ṭhu ve reng a, u Malsawma nen chuan eng eng emaw sawiin an ti ti a, Bawihtei nen chuan movie kan lo en thung a.

          Zovi leh Teruata inkhawm bâng chu an  lo lêng kawi a, khua a vawh êm avang chuan an rawn khur lut deuh titih a, thlasik a nat êm avangin pâwn boruak phei chu a hit var mai a ni.

          Ka nu chu rei ṭhu peih lovin mu turin a kal ta vat a. Ka nu mut hnu chuan chhun lama kan lénnaa thil thleng kha Zovi chuan a rawn sawichhuak a. A rawn sawi chhuah nachhan pawh a inkhawm kal tur Lalhminga nen an inhmu a, a inthiam loh thu hrilhin  ngaihdam lo dilsak turin a  chah a lo ni a.

          "Mapuii nen hian pafa ni awmin kan lang rêng rêng em ni?" nuihzat hmel deuh hian u Malsawma chuan a rawn tichhuak a, Lalhminga thil sawi kha a ngaihtuah chhuak ni ngei tur a ni.

          Midang ho pawh chu kan lo nui hak hlawm a, Zovi chuan fiamthu-in a káp zui a, ani pawh chu a lo nui ve suk suk a.

          "Pathlawi zúna uai chu a nâ ngang a niang, tute emaw chuan nuihdan an theihnghilh hman ṭep alawm," nui chunga Zovi'n a tih chuan ka lo zak ang reng hle a.

          "A luhlul reuh êm alawm!" min nghen hnaih pah chuan a ti a, Zovi chuan a lo pawmpui hle a.

          "Dik chiah! Khati khawpa hrehawm ti si kha thil awmzia sawifiah tura ka tih pawhin zu duh ṭhak lova maw le! A luhlul mah mah a ni," a lo ti ve zat a.

          Teruata chu a lo ṭhen ṭhâ a, a nuih a zat hmel hle a, engmah sawi ve lem lo chuan a lo nui leh suk suk ṭhin a.

          Ngaihawma lêngchhuak rawn haw chu a rawn ṭhu ve a, Zovi te haw hnu chuan mu turin a kal ve zui mai a. Bawihtei chu a muthilh tawh avangin a pa chuan a pawm a, ka room lamah a kalpui ta nghal a, an awm chhûng chu ka bula mut a tum tlat a, a pa pawhin a ui ngam lo a ni.

          Khumah chuan a muttîr a, puan vel ka sin ṭhattîr zawh chuan a hmel pawisawi lo tak chu ka thlek zui vang vang a, chutia ka lo thlek lai chuan u Malsawma chuan min rawn kuah a, a âwm ngheng chuan min kuahbet a, ka lû-ah chuan a khabe chu a rawn nghat a.

          "Zantina mu tura inṭhenhran ngái ziah hi ka ning hle a ni," a rawn ti sup a, kei pawh hian ka thlahlel a, engtik lâi pawha a bula awm reng ka chak êm êm a ni.

          A tukah chuan an chhûngte ina mon lenpui a tumthu chu a sawi a, Lunglei an lo pheia an thlenna ṭhinte an ni a. Tun ṭum an rawn phei hi an hnena an innghah tak loh avangin an lo vui hle a lo ni a, chuvangin, tlawh ngei a duh a ni.

          Kumthar ruaiṭhehnaah chuan a kal ve duh ka rin loh avangin ruai ṭheh tumna pawh ka lo nei lem lova. Mahse, ka nu-in a han sawi chuan rin loh takin a lo phur phian a.

          Chutia ruai ṭheh kan tum leh tak si-ah chuan hma deuh hlekah lêng tur chuan kan chhuak a, kan va thlen chuan an lo awm deuh ṭhap a, ka zak deuh viau na'ngin chhuanlam tur Bawihtei a awm avang chuan ka che lai lutuk ta lo hlauh a.

          Ka huphurh lawk ang aiin kan lenna te chu an lo fel phian a, Bawihtei chu an lo lawm hlawm hle a, an lo be tlângnêl thuai a.  Anpa ber chuan ka pa kha a lo hre hle mai a, department khatah an lo thawk ho ṭhin a lo ni a, ka rilru chuan ka tlângnel phah ta phian a.

          Ruai la ṭheh tur kan nih avang chuan rei lutuk awm lovin kan haw leh ta thuai a, in kan thlen chuan ka nu chu a ṭhiante ho nen an lo awm laih laih a. Kumthar vuakveta hetia lo lénkhawm hi ka pa boral aṭang khan an la ṭhulh lo rêng rêng a, hunpui lâia ka nu khawhar tur hi an rawn awmpui ṭhin a, ka nu khawhar pawh an hnem hle ṭhin réng a ni.

          Ka nu leh a ṭhiante chu zaikhawmnaa tel turin an kal ta dial a, Bawihtei chu a hruai ve nghal daih a, ani lahin a lo chák phian a, Ngaihawma a awm bawk si lo nen u Malsawma nen chauh chuan kan awm ta ran a.

          Ka inbual zawh chuan a inbualna tur chu ka siamsak ve nghal a, towel chauh venga a ding chu ka en ṭha ngam vak lova. A pian nalh tak mai chu a lang chiang hle a, a palianin a inkhâithli nalh  si a, Mizo mipa-ah ani anga piannalh chu an vâng ve vîau-in ka ring!

          Ka bula a rawn din chuan ka lo zam ru hle a, nidangah hetiang taka chiang hian a taksa hi ka la hmu ngai tlat lo a ni. Ka bân aṭanga chûl chhovin ka darah chuan a kutzungṭang sei leh lianṭha tak chuan a chûl kal rîak rîak a, ka taksa chu a za chuai chuai a, a mi tawhna chuan keimahah danglamna nasa lutuk a thlen mêk a ni.

          Ka khabe-ah dawmin min kuai dak a, rilṭâm lutukin chaw eitur a hmu a a ei ang maiin duhthawh lutukin min rawn fawp a, ka lo chhânglet ṭha kher mai. Amah ka mamawhna chuan chintawk min neihtîr thei lova, ka thlakhlelhna chuan ngaihtuahna fîm min puttîr thei hek lo.

          "Zanin chu i bulah a tam thei ang ber awm ka duh dâwn a nia," ka beng bulah chuan a rawn ti thawp sut a, ka lo bu nghat ringawt a, ṭawngkâa chhâng tur chuan ka la mumal lo mah mah a ni.

          A ngawih leh vang vang hnu chuan, "Kan rûalin lo phei ve mai teh," a rawn ti leh sup a.

          Ka aw chu ka thian kharh a, "I hria alawm, ka chawlh chhûng zawng awm a ngâi tih chu. Ka nu hian min thlahlel ve si a," ka aw chu a la pângngai chiah lova.

          "Kei pawhin ka thlahlel lo bik che em ni?" thawk a la zui ham ham a.

          "Inbûal tawh la," aw lai râtin ka lo ti thung a.

          "Min bual dawn lo em ni?"

          Phawk lutuka ka lo meng a hmuh chuan a rawn nui chhuak hawk a, hreh hmel zeta min kuahna chu la thla-in bathroomah chuan a lut ta a.

           Ka lo insiam mawlh mawlh lái chuan Zovi pawh a rawn thleng phei a, Teruata a fatu avangin amahin a rawn kal a, u Malsawma inbúal zo pawh chu a insíam zui ve nghal mawlh mawlh a.

          Ruai ṭhehna hmun kan thlen chuan an lo ei mawlh mawlh hlawm tawh a, keini pawh chu intlar ve nghalin kan dawh zawh chuan kan ei ve nghal mai a.

         Mipa-in min lo biak apîang chuan a  chaw bar ṭhulh ṭhakin min lo en reng zel a, chu chu a hmuhin Zovi nuih chu a za hle a, thikthu chhia tia a sawi chuan u Malsawma chu a lo nui suk duh chauh a.

          Zanah chuan midang mut vek hnuah kan pahnih chauhin kan meng fâl a, insi riala ṭhudunin a tuk an haw phei hun a nih tawh avangin kan hun neih ang ang chu ám takin kan hmang dun a.

          Engkimah a insûm thei zawk a ni zel a, chuti ni lo se chuan ka thianghlimna ka vawnghim tawh hauh lovang le! A awmdan leh min ngaihsak danah hi chuan min hmangaih ve niin ka hre ṭhin a, mahse, amah ngeiin a sawi si lova, ka ring ngam leh meuh ṭhin lo a ni.

           A tuka haw phei tur an nih avang chuan men rei lutuk chu a ṭha ber lovin ka hria a, mut a kham loh chuan a mit a thip ang a, motor khalh chhawktu a nei dawn si lova, an chetsual phah ang tih ka hlau a ni.

          Mut ka rawt takah chuan hreh hmel zet chuan a aw ve ta hram a, min fawp leh vang vang phawt a,mu tur chuan kan inmangṭha ta nghal a.

           Ka muhil chu ka kawnga rawn kuahtu an awm avang chuan ka harh a, harh chiang mang lo chuan Bawihtei emaw tiin a kut chu ka vuan a, Bawihtei kut a ni lo tih ka hriat rûal rûal chuan ka harh chiang nghal kawk a.

           Ka tal deuh chu min rawn kuah nghet sauh a, a bawp chuan min rawn khan nghal hmiah bawk a.

          "Shhh..... rei lotê i bulah ka mu duh, ka ngai che!" ka tal leh chiah chu a rawn ti thawp sat a.

          Che lo chuan ka mu ve ta reng a, ka beng bulah chuan a rawn thaw ham ham a, ka mutchhuahna a bo nghal vek bawk.

          Bawihtei a harh ka hlauh avang chuan ka che ngam tawh lo hrim hrim a, u Malsawma chuan ka kawngah rawn zenlutin ka hnute lamah a chûl chho zel a, ka lo dang vat a. Ani pawh chuan a tumlui ta bik lova, a aia thui kalpui ka hlau hluah hluah tawh a ni.

          Ka pang a kham avang chuan tlemin ka mutdan chu ka siamrem hret a, a hmel hmu theiin ka mu ta a. Min lo en reng ka hmuh chuan ka lai angreng hle a, lehlam chu ka hawisan leh ta nghal daih a.

          A nui nghawr dat chu ka hria a, "Naupang chhia lutuk!" a ti zui hluk a.

          A taksa chuan min rawn ur lum ham ham a, khaw vawt hnuaia han mutpui atan chuan duhthusam tak zet a ni. A taksa chu ka va ngheng hnai talh talh a, a lumna chu ka âi a ni ber e.

          A lumna chuan min timuhil leh a niang chu ka harh leh chuan khua a lo eng uar tawh a, a mutna chu a lo ruak huai a, a thawhlâi rêng rêng ka hre lo.

          Ka va thawh ve chuan ka nu rawngbawlna bula awmin a phone chu a lo khawih a, min rawn melh zawk a, a phone bawk chu a bih leh nghal a.

          Ka intihfai hnu chuan ka nu rawngbâwl chu ka pui ve nghal a, u Malsawma chu a phone a rawn rik takah chuan chhângin a kalsawn ta nghal a.

           Bawihtei a rawn thawh ve takah chuan ka nu chuan a lo be chûl a, bawnghnute thlitsakin biscuit nen chuan a chhawpsak nghal bawk a.

          U Malsawma phone hmang zo rawn let leh chu a hmel a dik lo riauvin ka hria a, ka lo en reng a.

          "Kan hmanhmawh deuh a ngaih hmel, tukinah ka nu a ṭha lo leh deuh a, damdawiinah an tlanpui nghal a ni awm e," a rawn tih chuan ka lo hawi phawk hrâ a.

           Ka nu chuan, "A va zialo ṭhin em aw! Amah chu engtin nge a awm rêng rêng?" a lo ti vat a.

          "Tunah tak chuan a la chau ang reng viau a ni awm e. A bp sâng leh a zunthlum kha a lo nasa leh deuh a,chu chuan a tichau a ni ber."

          Ka nu chuan chaw ei sawk sawka chaw ei kham veleha chhuak mai turin a ti a, a theih veleh chaw chu kan ei ta nghal a.

         Chaw eikham hnu chuan rei vak lo an ṭhut hnu chuan an chhuak ta nghal a,  Bawihtei chuan an ruala phei ve tur chuan min ti a, ka khawngaih reuh hle a, an pafaa an phei tur chu ka ngaihtuah hle a ni.

          Chumi ni nilêng chuan an pafa ringawt chu ka rilru-ah an awm a. Biak inah ṬKP-in hnatlâng kan nei a, miin min biakna te chu ka chhang liam mai mai hlawm a, Zovi chuan min hrethiam takin midang awm lohna lai deuhah chuan min awmpui a, no leh thleng vel chu kan remdun mawlh mawlh a.

          Hnatlan zawh hnu chuan Teruata nen min thlah kual a, kan in pêngah chuan rei vak lo dingin eng eng u Malsawma chungchângte chu kan sawi dun a, Teruata chuan min lo chhaih ve zuk zuk a.

          "I lunglêng lutuk tur hnem tur chuan Lalhminga te pawh an awm tho kha, lungngâi mah ta che," a lo tih chuan chhan vak ngaihna hre hek lo i ka va chhiatkhum ringawt a, amah lah chu a lo nui hawk hawk zui a.

          In ka thlen chuan ka inbual nghal a, ka inbual zo ka thawmhnaw ka haklâi chuan ka phone chu a rawn ri a. U Malsawma a ni tih ka hriat chuan rang fahranin ka chhâng nghal a.

          "In thleng tluang maw?"

          "Aw, tluang e. Hei damdawiinah kan tlang nghal a."

          "Eng nge tunah a an tawh? Zing lam ai khan a zia deuh tawh em?" ka lo ti vat a.

          "A zia deuh e. Tunah tak chuan a muhil a."

          "Bawihtei a chau em?"

          "Chau ve deuh a niang, a muhil leh nghal daih a."

          "Nangmah kha i chau em? Nizan i mu tlem bawk si a, ka ngaihtuah deuh che a," ka lo ti leh a.

          "Chau love, ka ngaihtuahna i chhuahsan duh miah lo hian min tibuai tih mai chauh hi a ni e."

          Ka lo nui hak a.