VANMALSAWMA Chapter - 22

VANMALSAWMA

Chapter 22




          Room chhûangah chuan rawn pen lutin muangchângin ka lam pan chuan a rawn pen a, chetsawn nachâng hre lovin ka lo ding mawl tawp a. Ka mitah tak enin ka lam pana a rawn kal chhûng zawng chuan a mit chu a lasawn eih lo.

          Ka bul a rawn thlen chuan ka lo insangmar ṭeuh a, ka bân tawn tawnah vuanin a taksa siin min pawthnai salh a,   ka puan ken chu min laksakin chhuatah a theh thla a, ka khabe-ah rawn vuanin min kuai dak a.

          Lo dang tur ka ni tih chu ka inhria a, dang turin chakna ka nei si lo a ni. A mi tawhdan ang ang chuan ka awm a, dam thlupa min rawn fawh chuan chhânglet lovin ka lo dawh mawl tawp mai a ni.

          Uar zawka min rawn fawh takah chuan engtik laiin nge ka fawhlet tih ka hre hman lo, ka lo fawplet tawn tawn a. Ka taksa chu a ṭek chhuai chhuai ni berin ka hria a, amah ka lo ngaihzia leh thlakhlelhzia ka hrechhuak chiang hle bawk.

          Chutia ka lo fawhlet takah chuan a hma aia duhthawh zawk chuan min rawn fawp a, kan inthlah meuh chuan kan thaw a rang dun hle a, kan lungphû chu a inrawn tluk tluk bawk a.
 
          Chiang taka ka hriatchhuah leh tak chu he mihringpa ka hmangaihna hi engtikah mah a reh dawn lova, a tel lovin ka awm thei dawn lo tawp tih hi a ni.

          Nghet takin min kuah a, a kawngah chuan ka lo kuah ve a, a âwmah beiin a lungphu ri dat dat chu ka ngâithla a.

           "Mapui, ka ngâi lutuk che! Engvangin nge khati chena rei kha min hrem?" A aw-ah chuan na tak tuar ang mai niin a lang a.

          "Kei pawhin ka ngâi che. Mahse, nangmah khan min be duh lo a nih kha," ka lung a chhia a, ka mittui chu a rawn lûangthla a.

          "Pawi ka ti! Mahse, i phone lo chhângtu khan i bialpa a nih thu leh in inkawp nghehzia a rawn sawi a, ka beisei miah loh thil a nih avangin min ṭhâwng a, ka thin a rim bawk. Ka be châk che a, ka chapona avangin be lo tur che-in ka inkhapdai hram ṭhin."

          "Min ring duh lova, ka insawifiahna i pawm duh lo bawk a," ṭap aw ṭiau-in ka lo ti a.

           "Zantin nangmah biak chákin ka awm a, ka chapona-in min dál ve tlat si a. Ka ngái che a, kuaha fawh che ka chák a, i taksa kuahbeha duat taka chûl leh che ka châk êm êm bawk,"

          "I message a awm leh awm loh hi ka check reng a, hmuh tur a awm ngai si lova, min theihnghilh tawh emaw, hmeichhe dang i tawng emaw a nih ka lo ring a." ka hnuk chu a la ulh ṭeuh a.

          Ṭawngkaa min chhâng mai lovin nghet lehzualin min kuah bet a, ka samah chuan a rawn chûl a. Ka khabe-ah chuan rawn dawmin amah en tur chuan min kuai dak a.

          "Nang hi ka theihnghilh theih che ring hlek suh." A sawi zawh rual chuan ka hmuiah a rawn fawp zauh a.

          Zan inkhawm a ngaih avangin zanriah chu kan ei hma deuh a, u Malsawma te pawh inkhawm tur chuan an insîam ve a.

          Biak inah chuan u Malsawma chu mipa ṭhutna lama ṭhu turin ka ti a, a duh lova.  Ngaihawma bula ṭhu tura ka tih ngial pawh chuan a duh tlat si lova, kan ṭhu ho ta ringawt a. Bawihtei chu kan inkârah ka ṭhuttîr a, rei pawh a la ṭhut hma chuan a pawm ta daih a, min si chêtin a rawn tawlh phei nghal hmak a.

          Ka rilru chu thuhriltu thusawi lamah chuan a lut thei hlawl lova, ka bula ṭhû chuan ka ngaihtuahna a luahkhat vek a, a hmingin ka inkhawm ve mai mai a ni ber e.

          Inkhawm bana biak in kawta kan dinlâi chuan Zovi chu ka bulah a rawn kal a, u Malsawma chu tunge a nih tih chu a mitmeiin min rawn zawt a, ka lo bu nghat a hmuh chuan hrethiam takin min rawn siai sak a.

          Inhmêlhriatttîrna te neiin an inchibai a, Zovi chuan Bawihtei chu a bîanga piaisak zauhin a be nghal chúl a, Bawihtei pawh chuan fel takin a lo chhâng ve zêl a.

          Zovi leh a bîalpa, Teruata chu ina haw phawta inthlak fel vek hnua lo kal an tum avangin kan hawsan ta a. Ka nu zaikhawmnaah a kal bawk a, in kan thlen chuan Ngaihawma chhuak leh tur kan va hmu hman hram a. Hmeichhe tleirawl tê tête nen âr kan an tum ve a, phur takin a tlan liam thuai a.

          Inchhûng kan luh rual chuan heater chu ka on nghal a, ka inthlak zawh chuan Bawihtei chu thlak ve lehin ka thuamlum nghal a. A vawh êm avang chuan coffee siam tur chuan ka kal a, chokâ-ah chuan u Malsawma chu a lo awm a, thil zawn nei niawm tak hian a lo enkual vel a.

          "Eng nge i zawn a?" ka va tih chuan min rawn melh zawk a, a mit chuan hmundang chu a melh kual leh nghal a.

          "A vawt si a, coffee i in duh ka ring a, siamsak che ka tum a," a tih chuan ka lo nui hak a.

          "Keiman ka lo sîam ang, Bawihtei lo va awmpui rawh," sitting room lam chu melh zauh pahin ka ti a.

          "Hmanraw awmna min hrilh la, keiman ka siam mai ang. Ka coffee siam i la in loh kha," a lo tih leh tákah chuan hmanrua vêl chu ka kawhhmuh a, Bawihtei bulah ka pheisan ta a.

          Coffee no châwia a rawn luh chuan ka nuih chu a za ru ang reng vîau a, an ina ka awm chhûng khân vawikhatmah coffee emaw, thingpui emaw pawh a siam ka hre lova, ka rilru tak chuan a siam thiam vakin ka lo ring lo ve tawp a.

          Mahse, ka lo ring sual hle a ni tih chu coffee ka han in chiah chuan ka hre nghal a, ka rin phak bakin a siam tui a, a tui tak zet a ni! Min lo en reng avang chuan ka va nuih sak a.

          "Ka siam tui loh i ring niin ka hria!" nui suk chung chuan a rawn ti a.

          "Aw.....nia, dik tak chuan i siam thiam ka ring miah lo. Mahse, a tui tak zet a ni!" ka lo ti hliai a.

          Nui var var chunga min rawn en chuan ka hmangaihzia ka lo ngaihtuah a. Khati khawpa rilru nâ leh thinrim khan min sîam a, amah ka hmuh rüala ka lo pawm leh nghal hmiah thei te kha ka hmangaih êm vang a ni tih ka hre chiang hle a ni.

          No ruak ka han sil zo ka chhuk leh chuan ka ṭhutnaah a lo ṭhu a, a bula ṭhu tur chuan min lo mitmei nghal zat a.

         Heater ai paha TV en chung chuan insi rialin kan ṭhu a, Bawihtei chuan a pîte chu phonea bia-in a inkhawm ve thute chu a hrilh a, an inbiak chhûng zawng chu ngawi rengin kan lo ngaithla a.

          An inbiak zawh chuan a pa phone-ah chuan games a khel zui nghal a. U Malsawma chuan ka kawngah rawn kuahin ka kawr chhûngah a kut chu a zen lut a, ka kawng vel chu a kut lawng chuan a rawn tawk a.

          Ka taksa lawng a rawn tawhna chuan keimahah danglamna a thlen nghal a, ka thisen zâm fanin ka thlîng thleng chuan a fanin ka hria a. A kut chu mansakin dahchhuahsak ka tum a, awmzia a awm lo hle. Ka kut chu a kut lehlam chuan rawn manbetin ka malchungah chuan a humbet nghal hmiah a, Bawihtei a awm reng avang chuan ka duh angin ka tal ngam bawk si lova. Ka hmui phun chuan duhtawk turin ka hrilh a, chu pawh awmzia a awm chuang lo.

          Ka bîanga a rawh fawh zauh chuan ka lo hawisawn vat a, a lo nui hak a. Bawihtei'n min hmuh ka hlau tak zet a, sawina hun leh hmunte a thliar thiam leh dawn si lova, a rilrua a lan hun hunah a sawi leh pawp mai dawn si a, chuvang chuan min hmuh chu ka hlau ngawih ngawih mai a ni.

          Chutia kan lo innawr ruk lâi tak chuan Zovi leh Teruata chu an lo thleng ta hlauh a, ka thaw huai a. Mahse, min kuahna chu a la lasawn duh chuang lova, ka kawr chhünga a kut zenluh erawh ka lakchhuahsak thei ta hrâm a.

          "E he! Nangni chhungkua teh ṭhap chu!" Zovi chuan nui ar ar chungin a rawn ti a, kan awmdanin a lo zir lo bawk nen ka zak ru hle a.

          "Bawihte, lo kal teh. I pate khan an mamawh vak lo che a nih kha, inkawm daih ang," a rawn tih zawm leh zat a, ka lo melh rum hle thung.

           Teruata chu ngawi rengin a lo nui ve vur vur a. Ani hi ṭawng tam lem lo tak, mize zawi deuh mai a ni a. A felin kohhranah pawh a ṭangkâi hle a, ṬKP-ah phei chuan kut ke bera an neih zîng ami a ni ve a. Zovi nen hian an inzui rei ve tawh viau a, inngaizâwng pawh ang lo khawpin an inkawm ngeih a, ṭhian inkawm ang mai hian an inkawm bawrh bawrh zel a, an bula awm pawh a nuam thei hle a ni.

          Zovi hi kei aiin a upa a, amah berin 'u' a duh miau loh avangin ka rualpui koh ve ta ngawt a, a felin kawm a nuam a, a zia a puitling a, kawng tam takah kei aia a upatna chu a lang ṭhin a ni.

          Kan âr kan tur chu kan buaipui ve laih laih a, u Malsawma leh Teruata chu an inkawm thei phian a, purun eng ila vel chu chan pahin an lo ti ti dun ve mawlh mawlh a.

          "A zûna i uai viau kha a lo mak lo tawp mai!" Zovi chuan a rawn ti sa sa a, a hriat hlau lutukin ka va en nghal vat a,  Teruata ṭawng chu ngaithla ngun hle ni awm taka a awm avang chuan a hre lo turah ngaiin ka thaw huai a.

          Bawihtei chu ka nu zâikhawm bâng rawn haw chuan a mutpui ta daih a, chhun lamah khân motorah a rawn muthilh nasat êm avangin a mengrei ve ta phian kha a ni a, a mut meuh chuan zanlâi a hnai thuak tawh mai a ni.

          Kan tam lem lo naa kan hlim ve hle a, kan ti ti a rûal a, an vawikhat inhmuhna mah ni se u Malsawma chu an nêl ve phîan a. Ani lah a mize pângngai pelin a nelawm ve vîau a, an inkawm thei hle a ni.

          Kan thil siam kan ei zawh hnu reilote-ah chuan Zovi te chu an haw nghal deuh mai a, kan pahnih chauha kan awm tâkah min rawn hnaih nghal rûak a.

          "He thil hi tih ka châkna a rei tawh lutuk!" tih sup pah chuan min rawn fawp nghal a.Min tawh hlek apîanga danglamna keimaha a thlen hi eng tikah tak reh ang maw!

          Min kai a, ka roomah min luhpui a,  a chhuak leh mai dawn nia ka ngaih laiin khumah chuan min pawt ṭhu a, min fawp zui leh nghal a.

         Min fawp uar tawlh tawlh a, khumah chuan min nam mû-in min rawn bawh nghal a,  ka taksa a chûl kual reng bawk nen ngaihtuahna fîm pawh ka pu hlei thei lova.

          Ka kawr chhûngah zen lutin ka taksa láwng chu a chûl kûal a, ka ngaihtuahna a vai rûai a, amah ka mamawhna nasa lutuk chuan ngaihtuahna fîm min puttîr thei lova. Thil dang rêng rêng ka rilru-ah a lut thei lova, tuna kan thil tih lâi mêkah chauh chuan ka rilru a awm a ni.

          Ka hnute a rawn ṭham takah chuan ka lo thaw halh a, ani pawh a awmdanah chuan a dang bik chuang lo tih ka hria a ni. Kan thaw a pângngai lo dun hle a, kan chetdanah chuan ramri kham chin pelh mai pawh kan pawisa lo dun hle tawh tih a lang reng a ni.

          A nghawnga kuahin ka thiam ang tawka uar chuan ka lo fawp let ve a, min hipna nasa lutuk avang chuan mu leh mal pawh ka nei tawh meuh lo a ni ber.

          Thawk leh khatah min fawhna chu titawpin ka chung aṭang chuan a letthla nghal bawk a, ka vawt nghal rawih rawihin ka hria a. Engvanga tawp ta daih nge a nih ka hre si lova, mak ti taka ka va en chuan chung lam enin inthunun tum tih hriat tak hian thawk a lo la ham ham a.

          Chutia ka lo en reng lai chuan ka lam chu rawn hawi pheiin min rawn kuah a, ka lû-ah chuan chûlin ka chhipah chuan a fawp vang vang a.

          "Nakina i inchhir lehna turin ka awmpui thei lo che a ni. Tunah kan duhdan ang kha kal tlangpui ta ila i rilru fîm hunah hrehawm tiin i inchhir ang a, awmzia a awm tawh dawn si lova, i natna thlentu nih fo hi ka duh lo a ni." A ṭawng zâwng chuan min nghawr dat dat a.

          A sawi dik chiah a ni! Ka tisa duhdân ringawt ngaihtuahin ka awm a, a hnua min dendan tur ka lo ngaihtuah pha leh si lova, u Malsawma'n rilru fîm pu ta lo se ka chan chhiatdan tur chu ka ngaihtuah ngam lo hial a ni.

          "Ka lawm e aw!" Amah en chung chuan ka phun sep a, ka mittui chu a rawn lûang chhuak ngîai ngîai a.

          Ka mittui chu min hruksakin eng emaw chen min kuah leh hnu chuan a tho a, kei pawh chu min kaitho ve nghal bawk a.

          Min mangṭha nan min fawh leh vang vang hnu chuan room aṭang chuan a chhuak ta a, ka ngai zui vawng vawng a, mal ta riaua inhriatna ka nei chawpchilh bawk.

          A tuk zînga ka harh chuan khua a lo eng uar tawh a, ka va thawh chhuah chuan ka nu chuan eirawng pawh a lo bâwl peih diam tawh a.

          Hla rem tur kan nih avangin chaw chu kan ei nghal deuh mai a, inkhawm ṭan hmaa vawikhat tal ennawn an tih avangin ka insiam sawk sawk a, ka kal nghal a. Midang chu muangchângin an lo kal dawn a ni.
         
          Inkhawm ban hnu chuan pâwnah Bawihtei te pafa chuan min lo nghak a, Zovi te ina kal kawi kan tum avangin kan lo nghak deuh a. Rei pawh kan nghah hma chuan Teruata nen chuan an rawn thleng ve mai a, kan kal ta nghal a.

          Zovi te inah chuan thingpui te inin kan awm deuh reng a, Zovi'n lenkual a rawt takah chuan midang pawhin kan lo thlâwp hle hlawm a. Zaikhawmnaa kan kal loh tak rau rauah chuan han len khawthawn vel chu a boruakin a zir bawk nen a chakawm ve riau a ni.

          U Malsawma motor chuan kan lêngkual ta a, Serkawn lamah tlan chhovin Kâwmzâwl lamah kan tlan phei zel a, kan va thlen chuan midang lêng pawh an lo awm nual a.

         Bawihtei nuam ti chu a khek râih râih reng a, phûl chungah te chuan a let kual tap tap a, chutia hlim taka a awm vel chu hmuhnawm ti takin ka lo thlir reng a.

          Hmun pakhatah chuan ṭhuthmun remin nulâ leh tlangvâl kal vel leh infîamte chu kan en a, Zovi chu a ti ti barh barh a, a khât tawkin u Malsawma leh Teruata chuan an lo zawm ve zauh bawk a.

          Bawihtei tlankual vel chu a tlu ta niai a, ka va tlan phei nghal vat a, a kiu chu a lo sawh pilh deuh a. Amah lah chuan engah mah ngai lovin infiam zui zêl chu a tum a, indim deuh tur leh fimkhur tura ka chah hnu chuan midang ṭhutna lam pan chuan ka phei leh nghal a.

          Piah deuh aṭang chuan Lalhminga te ṭhianho hi an rawn phei ṭhâm ṭhâm a,  ka biak chak lem loh avang chuan ka kal chak deuh a. Mahse, awmzia a awm viau lova, ka awmna bul an rawn thlen chuan min rawn be nghal a.

          Zu rim an nam avang chuan ka be chak lo zual a, a rul tawk lekin min biakna pawh chu ka lo chhâng a. Kal mai tuma ka pen leh chiah chu Lahminga chuan ka bâna rawn vuanin a lamah min pawt phei nghal nawk a, ka ṭe ṭhawt a.

          "Min induh khum rei tawh riau mai, vawiin chu lengkûal dun ve rëng rêng teh ang. Hmelṭha bula kal ve te pawh kan châk a," min manbeh pah chuan a ti lûng lüng a.

          "Min thlah rawh! Chuti lo chu...."

         "Chuti lo chu eng nge? I bîalpa kha i ko dâwn em ni? Nge phone aṭang khân kan be leh zawk dâwn?" Ngeiawm lutuka nuih sâwng pah chuan a lo ti leh a.

          "Phone ngai lovin hetah hian ka awm e!"

          U Malsawma aw ka hria chu ka thawven huai rualin hlauhthâwnna keimahah a rawn awm nghal bawk a.