LALNUNPUII - 11
LALNUNPUII
Sbk Pachuau
Chapter 11
Nunsânga mitmengah chuan eng nge a ngaihtuah ang tih chu rin ngaihna ka hre lova, khawdang hawi map lovin min melh ngar a, a bula ding Kimkimi ṭawng mawlh mawlh pawh chu ngaihsak awmin a lang hek lo.
Ka nu-in ṭhu lut tura min tih takah chuan ka lut ta vat a, kan tlanchhuah thleng chuan min la thlir zui tih ka hria a, engvang teh kher nge ni a hmêlah khan khawhar rukna riau awma ka hriat tlat pek ni!
Haw kawng tluanin ka nu chuan Zâma felzia leh pasal atâna rintlak a nihzia a sawi char char a, ka ngaithla liam vel mai mai a, a thil sawi âi chuan Nunsânga hmel awmdan khan ka rilru a luah zawk a. A hmêl ka hmuh ringawt pawha keimaha nghawng a la neih nasatzia kha mak ka ti a, engtikah mah amah ka hmuh leh ngaihtuah apianga danglamna ka neih hi a reh thei dawn tawh lo tih ka hrechiang ta tawlh tawlh mai a ni.
Ka lo intiam tawh ang ngei chuan ka hun neih hmasak berah u Mâ-i kawm tur chuan ka lêng ta a, ka rin âi daihin a lo zia a. A vunte chu a hmaa dâng bel kha tisen a lo nei ve leh tawh a, a hmêl pawh hmuh a nuamin a awte pawh a lo zang deuh vah a, amah pawh a hlim hle a ni tih a hriat theih a ni. Zâma chu doctors' conference a awm avangin tlai lamah pawh a rawn haw hma vakin a rinawm loh a, ka awmlaia a rawn thleng hman ta hlauh a nih loh chuan kan inhmuh hman pawh ka ring chiah lova. Hmannia kan inbiak khan a doctorpui hmeichhe pakhat nen an in-chu-kha ve ṭan deuh niawm khan min hrilh a, han zawh chian deuh ka chak viau naa a lo haw hun nghah kher erawh ka tum lem lova.
Nilêngin u Mâ-i bulah chuan ka awm ta a, tlaia u Thlamuana hna kal haw a rawn thlen chuan haw ka tum ta chauh a. U Thlamuana hian hunawl a neih phawt chuan a awmpui reng zel a, u Mâ-i te bulah zanriah pawh ei nghalin zanah mu turin an inah a haw chauh ṭhin a. Tlangval senior a ni tawh a, a chhûngte pawhin han sawisel vak ngaihna an hre tawh lo niawm tak a ni. An sawidan hmangah a nu pawh u Mâ-i lakah a nêm tawh vîau niawm tak a ni a, senior tawh lamah an la innei mai lovang tih pawh a sawi theih loh a ni.
Kan in ka thleng chu u Peka a lo awm ve tehmial a, ani hi ṭul tawpah lo chuan kan inah hian a rawn kal ngai lem loh avangin chutia ani meuh a lo kal ta chu a pawimawh vîau a nih ka ring mai a. Sitting roomah chuan ka nâute pahnih leh Hruaii nen an lo awm a, ka nu chu room lamah a awm leh tawh a nih ka ring mai a. Mâmi te chhûngkua hrim hrim hi a ngaithei lo vek ni maiin ka hria a, ka nu damlâia chhûngte bera a va neih vang nge pawh ka hre tawh bik lo an lo len châng pawhin a lo be ngai lova, a lo uksak ngai eih lo a ni tawp mai a ni.
Ka nu khan unau pianpui a nei lova, Mâmi pa chu a nuṭa anga enin ani pawhin a nâu ang maia lo enin a ngaihsak êm êm ṭhin a, Mâmi nu nen an inkawmngeih leh ta zel bawk nen chhûngkhat ang maiin kan awm ṭhin a ni.
"Ngati nge phone i lak theih miah loh a?" U Peka chuan min hmuh rûalin a lo ti nghal a.
Ka phone chu ka han phawrh a, silent-ah a lo awm chu niin! Missed call pawh a lo awm nual a, en ta lem lo chuan ka ak leh nghal mai a.
"Eng thil nge ni rêng rêng a? A pawimawh hle a niang chu maw nang meuh i lo kal tak hial ni!" ka lo tih chuan za lo zetin a lo ṭhen suk a.
"In dawrah min lo kalpui lawk teh!" nuam tih hmel chiah lo hian a rawn ti a, a awmdan aṭang chuan eng emaw buaina a nei a nih ka lo ring thiam nghal mai a.
"In intithiam lo lehpek tawh a ni maw! Mahni'n sawifel thei mang si lo hian ti nge maw in buai leh ṭhin le!" nui har har chung chuan ka lo ti a.
"A thikthu a chhe mah mah alawm! Hmeichhe dang biak leh kalpui hlekin a thik vek zel a, a buaithlak khawp mai," a tih chuan ka lo ner nâng a.
"A thik tih i hriatte chuan kalpuiin be tawh lo a ni mai alawm. A hrim hrimin i hmeichhe kalpui ber kher kha nangmah ngaizâwng êm êmtu che a nia, midang kalpui ni la chuan a thik bik kher nang," ka lo ti thung a. Nuni khan hmanni khan min hrilh niah niah tak a, u Peka'n hmeichhe dang a phur a lo hmu a, a hmeichhe phurh chungchâng a zawh chuan Peka chuan a lo zep ve khanglâng a. Nuni chuan amah Peka duh deuhtu a ni tih a lo hre ve kar bawk si nen an lo intithiam lo zui ta reng a lo ni awm a.
Peka'n ngaihdam a dil ngial pawhin dawt a hrilh avangin ani Nuni chuan a lo ngaidam thei mai bik si lova, biak takngial pawh a biak duh tlat loh avangin Peka mangang chuan min rawn pun a lo ni a.
Ka intifai thuak thuak a, ka inthlak leh sawk sawk a, Hruaii hnenah ka kalna tur ka hrilh hnu chuan kan inzuichhuak dun ta nghal a, scooty keng lovin Peka bike-ah chuan ka chuang ve mai a.
Dawr kan thlen chuan dawrtu pahnih khat bak an lo awm loh avangin an lo buai lem lova. Nuni chu kovin godownah ka chhukpui ta a, Peka erawh chu dawra lo la awm rih turin ka ti thung a.
Kan dawr hnuai chiahah hian godown kan nei a, chutah chuan inthiarnate pawh a awm nghal a. Choka angreng deuh awm ve-in gas-te kan dah ve a, thingpui lumnan leh chhun eitur siamna atan kan zu hmang ṭhin a. Christmas vuakvetah phei chuan induhthawh a nat ṭhin avangin zíngkarah kalin chutah chuan rawng kan bawl mai ṭhin a, tukṭhuan pawh kan ei nghal mai ṭhin a ni.
Nuni chu Peka inthiamlohzia leh inchhirzia te chu ka sawipui nghal mawlh mawlh a, ngaidam mai tur leh chance vawikhat tal pe leh tur chuan kan inthlem a. A tawpah chuan a rilru a la dam zan lo naa Peka nena sawidun chu a remti ta hram a, dawrah chuan chho vatin Peka chu inhnuai lamah chuan ka chhuktîr ta thung a.
Eng emaw chen an pil vang vang hnu chuan an rawn chho dun ta ral ral a, an rawn inthlem lungawi tawh ni ngei tur a ni Peka chuan min rawn siai suk a, ka lo nuih sak a. Dawr khar a hun tawh avang chuan kan nghak ta law law a, Peka chuan Nuni chu a thlah a, kei ka pa rualin ka haw ve ta thung a.
In kan thlen hnu chuan ka inbual nghal sawk sawk a, KṬP-in program kan neih avangin chaw chu hmanhmawh takin ka ei a, ka eikham veleh inthlakin ka kal ta nghal a.
Thui pawh ka la kal hman lo tihah chuan ka bulah motor a rawn ding chat a, Zâma motor ang deuha ka hriat avang chuan ka ding a, a lo ni ngei reng a, a motor aṭanga rawn dakchhuakin motora lut tur chuan min rawn au a.
"Lo lut rawh, ka lo thlah ang che."
"Khawnge i kal dawn?" ṭhut luh pah chuan ka zawt a.
"Nula ka rim dawn," a tih chuan ka lo nui hak a.
"Min duh ve lotu rim reng ai chuan min duh vetu ngei rim ila a zia zawk ang ka ti deuh a," a rawn tih leh chuan amah pawh chu a nui ve hawk hawk a.
"Hmannia i sawi zauh kha em ni? Ka hrechiang chak a, inhmuhna hun kan nei leh ta mai si lova," ka lo ti a.
"Aw, ni e. A fel reuh riau a, a hmel pawh a chhe lem lo. Mahse, a tluk lo deuh che chuan ka hria a ni," fiamthu titak deuhin a ti a.
"Ka tluk lo zawk a nih dawn chu. Tak takin i duhzâwng i tawng ta chu ka lawmpui lutuk che!" ka tih chuan min rawn melh zauh a.
"Ka duhzâwng chu ka tawng daih tawh a, mahse, ani chuan ṭhian angin min en tlat a!" nui vur vur chung chuan a ti a, a ruk tak chuan nuam lo tihna deuh ka lo nei a. Mahse, fiamthu nena a rik zawm tak hlutah chuan ka pangngai ve leh nghal mai a.
Biak in bulah chuan a ding a, ka chhuk fel chiah tihah chuan Mâmi'n min lo au a, ka va hawi chuan ani pawh bike aṭangin a chhuk fel ve chiah tih hriat takin a lo inpawt ṭha mawlh mawlh a. Zâma'n min biak leh avang chuan kunin kan han inbe leh zuai a, a tlan tak hnu chuan Mâmi lo dinna lamah chuan ka phei nghal a.
Nunsânga'n chiang fahrana min lo en ka hmuh rual chuan ka ding chawt a, a hma khan hmuh ka lo inrin lutuk loh vang nge Mâmi rawn phurtu chu ka lo ngaihven vak lova. Helmet a khum chu thuhran ni se ka lo melh lem loh avang khan ka lo hre hauh lo a lo ni a, chutia ka hmuh thut takah chuan ka che chu a buai titih der a.
Muangchânga pen phei lehin hreh tak chungin an bulah chuan ka va ding a, an bula ka din thleng chuan a mit chu a lasawn lo rêng rêng a, ka lai deuh tihngaihna hre lo chuan luh nghal mai chu ka rawt ta ngawt a. Chutia luh ka rawt chuan Nunsânga chuan a bike chu dahṭha-in kan bulah chuan kal mai inringin a rawn ding a.
Kan kal ta chu Mâmi chuan a û chu a en leh zauh ṭhin a, kei lah chuan kal hran vat duhin ka lo pawt ru deuh sek a. Hmanhmawh rilruk nak alâi chuan a la ding leh ta nghal a.
"I lo kal ve leh si dawn em ni?" Nunsânga en chung chuan a ti ta hâ a.
"Aw!" A chhâng tawi ṭha tek tawk hle a, kei chuan a ngaihna hre lovin ka lo en reng ringawt a.
"Ka sâwm ka sâwm che a, i duh tawp si lova, tunah i tum leh bawk sia!" a ti niah niah a, Nunsânga lah chu min melh run chung chuan a lo khi suk duh chauh a.
Hall-ah chuan an lo ṭhu deuh ṭhup tawh a, hmalam kan chan tawh loh avangin hnung deuhah chuan kan ṭhu ve ta a. Nunsânga chu ka bulah tak a ṭhut avang chuan ka awm chu a nuam lo ru hle a, han tih vak ngaihna ka hre lo nen thawpik ru ṭeuh chuan ka ṭhu a. Ani lah chu engah mah ngai lo niawm takin a awm a, ka awm ve chu a theng thawngah a kal ve lo emaw tih mai turin a awm thung a.
Mâmi chu a bula ṭhu nen chuan an inbe mawlh mawlh reng a, music a rin êm avang chuan ka ning ang reng hle a. A tir lamah thusawi lam dahin a hnuhnung lamah a hlawmin zai lam an dah thung a, tlêma a sáhawk zual deuhte chu an kûk deuh rúih rúih a. Mâmi chuan haw rawt se ka ti hle a, a rawttu zawka ṭan chu ka duh bik chiah si lova, bet lo zet chuan ka ṭhu ve reng a.
Thawm bengchheng ka ning chu thuhran ka bula ṭhu avang pawh chuan haw thuai chu ka duh a, a tum lui nge a tipalh ve reng tih pawh hriat loh hian min ngheng hnai mah mah a, tawlhsawnna tur a awm bawk si lova, a midip a na ve hrim hrim bawk nen pawna chhuah daih maite chu ka duh ut ut mai a ni.
Mâmi'n zun a rawt takah chuan ka thaw huai a, zun zawh hnuah pawh lut tawh lova pâwna awm tlang mai chu ka tum rilru nghal a. Mahse, ka tumloh dan deuhin thil a thleng leh ta tlat mai! Mâmi kal ta chu zui mai tuma thawh ka tum chu ka kutah a rawn man chat a, min pawt ṭhu ta tlat a. Talchhuah tuma ka beihna chu a ngaimawh tham lo nasa mai si a, min vuan nget zual sauh a. Midangin an hria ang tih ka hlauh avang chuan duh angin ka che ngam bawk si lova, mi hmuh theih loh tur ang ber chuan ka kut a vawnna chubthlahtir tum chuan ka bei ngat ngat a, awmzia erawh a awm lo khawp mai.
"Chhuah i duh chuan kan pahnihin chhuak dun ang," ka bengbulah a rawn ti sup a, rum fahranin ka lo melh ringawt a.
Ka kut a vawnna chu na deuha han hmer salh pah chuan a mitmei chuan kal turin min ti a, kei lah chu ka luhlul chhuahin ka ṭhutdan ngai reng chuan ka ṭhu ngal a.
"Helai hmuna mite hmuha pawhchhuah kher i duh loh chuan chhuak mai la."
A aw chu a ring lo naa a ti duh tak tak ang tih a mitmeng aṭang chuan ka hmu thei a, chuti taka min zuam mai chu ka ṭahte a chhuak hial zawk a.
Pawn kan thlen chuan ka kutah rawn kai leh nghalin gate pâwn lamah chuan min chhuahpui nghal a, ka ṭang ve teh naa awmzia a awm lem lo hle a, hneh zeta min vuanbetin min kalpui dawr dawr a, a bike dahna kan thlen chuan min vawnna thlah chuang hauh lovin a lawn a, chuang ve tura min tih chuan min pawh tlat avangin ka kalsawn thei chuang si lova, duh lo hle mah ila ka chuang ta ringawt a. Ka chuan ve tak hnu chuan tinungin a tlan ta nghal a.
An in lamah tlanin kawtah chuan a ding a, chhuk tura min hrilh hma chu ka chuang lui ve ngat a.
"Tikhan i ṭhu reng dawn nge i chhuk dawn?"
"Helaiah chhuak ka ngaih awm ka hre lo tlat!" ka lo ti hlak a.
Chutia chhuk ka tum tak si lovah chuan a bike chu stand ṭha-in amah chu a chhuk a, ka lo inrin hman hma chuan min pawmthla thut a, ka lo ṭe deuh ṭhat a.
"Eng vanga ka chunga hetianga awm hi nge i nih?" ka aw chu a ring lem lo naa a chang ṭha ve khawp mai.
"Chu chu inchhûngah kan sawidun dawn nia," a lo tih chuan ka lû chu ka lo thing nar nar a.
"Teuh lo mai! Ka rawn lut dawn rêng rêng lo, i duh duha min tihkual chu tum lo mai teh!" ka lo ti hlar a, kal mai tum chuan ka inher a.
Ka kutah bawk chuan rawn man lehin inchhûng lam chu min panpui a, ka kut a vawnna chu phelh ka tum nasat poh leh a nghet tulh tulh mai si a. Ka thinur lutuk chuan ṭe chhuah chiam mai chu ka chák a, inchhûnga a pa lo ṭhu ka hmuh chuan ka inbengdai lui hram hram a.
"In rawn bâng tawh a ni maw? Puite, khawnge i ṭhiannu?" tiin min lo zawt nghal a.
"Puitei hi thil enpui lawk ka duh a,ban hma-in kan lo haw a nih hi. Ka roomah ka chhohpui lawk dawn a nia aw!" Chhan pawh ka chhan ve hma chuan lo tiin a room lam chu min panpui ta nghal daih a.
A rooma kan luh chuan a phone chu phawrhin a hmet nghal mual mual a, a bengbulah keng chhovin a ngâithla vang vang a.
"Mâmi, tihtur pawimawh kan neih avangin Puitei nen kan haw a, hawpui tur lo zawng mai ta che."
A biak zawh chuan a phone chu khumah thehthla-in min rawn en a, kei lah chuan thinur lutukin ka lo melh ngar a.
"Kha doctor pa nen khan in inkârah hian eng thil chiah nge awm min han hrilh teh!" Min melh ngur chung chuan a ti nghut a.
"I hriat a ṭulna ka hre hauh lo mai." Ka sawi zo hman ṭawk tih chuan ka bânah a rawn hmer chawt a, ka lo phu deuh zawk a.
"Ka hriat a ṭul nia ka hriat avangin ka zawt che a nih chu! Khatia luhlul kual vel lo khan sawi vat teh!" A aw chu a zawi hle naa a chiang fek fawk hle a ni.
Sbk Pachuau
Chapter 11
Nunsânga mitmengah chuan eng nge a ngaihtuah ang tih chu rin ngaihna ka hre lova, khawdang hawi map lovin min melh ngar a, a bula ding Kimkimi ṭawng mawlh mawlh pawh chu ngaihsak awmin a lang hek lo.
Ka nu-in ṭhu lut tura min tih takah chuan ka lut ta vat a, kan tlanchhuah thleng chuan min la thlir zui tih ka hria a, engvang teh kher nge ni a hmêlah khan khawhar rukna riau awma ka hriat tlat pek ni!
Haw kawng tluanin ka nu chuan Zâma felzia leh pasal atâna rintlak a nihzia a sawi char char a, ka ngaithla liam vel mai mai a, a thil sawi âi chuan Nunsânga hmel awmdan khan ka rilru a luah zawk a. A hmêl ka hmuh ringawt pawha keimaha nghawng a la neih nasatzia kha mak ka ti a, engtikah mah amah ka hmuh leh ngaihtuah apianga danglamna ka neih hi a reh thei dawn tawh lo tih ka hrechiang ta tawlh tawlh mai a ni.
Ka lo intiam tawh ang ngei chuan ka hun neih hmasak berah u Mâ-i kawm tur chuan ka lêng ta a, ka rin âi daihin a lo zia a. A vunte chu a hmaa dâng bel kha tisen a lo nei ve leh tawh a, a hmêl pawh hmuh a nuamin a awte pawh a lo zang deuh vah a, amah pawh a hlim hle a ni tih a hriat theih a ni. Zâma chu doctors' conference a awm avangin tlai lamah pawh a rawn haw hma vakin a rinawm loh a, ka awmlaia a rawn thleng hman ta hlauh a nih loh chuan kan inhmuh hman pawh ka ring chiah lova. Hmannia kan inbiak khan a doctorpui hmeichhe pakhat nen an in-chu-kha ve ṭan deuh niawm khan min hrilh a, han zawh chian deuh ka chak viau naa a lo haw hun nghah kher erawh ka tum lem lova.
Nilêngin u Mâ-i bulah chuan ka awm ta a, tlaia u Thlamuana hna kal haw a rawn thlen chuan haw ka tum ta chauh a. U Thlamuana hian hunawl a neih phawt chuan a awmpui reng zel a, u Mâ-i te bulah zanriah pawh ei nghalin zanah mu turin an inah a haw chauh ṭhin a. Tlangval senior a ni tawh a, a chhûngte pawhin han sawisel vak ngaihna an hre tawh lo niawm tak a ni. An sawidan hmangah a nu pawh u Mâ-i lakah a nêm tawh vîau niawm tak a ni a, senior tawh lamah an la innei mai lovang tih pawh a sawi theih loh a ni.
Kan in ka thleng chu u Peka a lo awm ve tehmial a, ani hi ṭul tawpah lo chuan kan inah hian a rawn kal ngai lem loh avangin chutia ani meuh a lo kal ta chu a pawimawh vîau a nih ka ring mai a. Sitting roomah chuan ka nâute pahnih leh Hruaii nen an lo awm a, ka nu chu room lamah a awm leh tawh a nih ka ring mai a. Mâmi te chhûngkua hrim hrim hi a ngaithei lo vek ni maiin ka hria a, ka nu damlâia chhûngte bera a va neih vang nge pawh ka hre tawh bik lo an lo len châng pawhin a lo be ngai lova, a lo uksak ngai eih lo a ni tawp mai a ni.
Ka nu khan unau pianpui a nei lova, Mâmi pa chu a nuṭa anga enin ani pawhin a nâu ang maia lo enin a ngaihsak êm êm ṭhin a, Mâmi nu nen an inkawmngeih leh ta zel bawk nen chhûngkhat ang maiin kan awm ṭhin a ni.
"Ngati nge phone i lak theih miah loh a?" U Peka chuan min hmuh rûalin a lo ti nghal a.
Ka phone chu ka han phawrh a, silent-ah a lo awm chu niin! Missed call pawh a lo awm nual a, en ta lem lo chuan ka ak leh nghal mai a.
"Eng thil nge ni rêng rêng a? A pawimawh hle a niang chu maw nang meuh i lo kal tak hial ni!" ka lo tih chuan za lo zetin a lo ṭhen suk a.
"In dawrah min lo kalpui lawk teh!" nuam tih hmel chiah lo hian a rawn ti a, a awmdan aṭang chuan eng emaw buaina a nei a nih ka lo ring thiam nghal mai a.
"In intithiam lo lehpek tawh a ni maw! Mahni'n sawifel thei mang si lo hian ti nge maw in buai leh ṭhin le!" nui har har chung chuan ka lo ti a.
"A thikthu a chhe mah mah alawm! Hmeichhe dang biak leh kalpui hlekin a thik vek zel a, a buaithlak khawp mai," a tih chuan ka lo ner nâng a.
"A thik tih i hriatte chuan kalpuiin be tawh lo a ni mai alawm. A hrim hrimin i hmeichhe kalpui ber kher kha nangmah ngaizâwng êm êmtu che a nia, midang kalpui ni la chuan a thik bik kher nang," ka lo ti thung a. Nuni khan hmanni khan min hrilh niah niah tak a, u Peka'n hmeichhe dang a phur a lo hmu a, a hmeichhe phurh chungchâng a zawh chuan Peka chuan a lo zep ve khanglâng a. Nuni chuan amah Peka duh deuhtu a ni tih a lo hre ve kar bawk si nen an lo intithiam lo zui ta reng a lo ni awm a.
Peka'n ngaihdam a dil ngial pawhin dawt a hrilh avangin ani Nuni chuan a lo ngaidam thei mai bik si lova, biak takngial pawh a biak duh tlat loh avangin Peka mangang chuan min rawn pun a lo ni a.
Ka intifai thuak thuak a, ka inthlak leh sawk sawk a, Hruaii hnenah ka kalna tur ka hrilh hnu chuan kan inzuichhuak dun ta nghal a, scooty keng lovin Peka bike-ah chuan ka chuang ve mai a.
Dawr kan thlen chuan dawrtu pahnih khat bak an lo awm loh avangin an lo buai lem lova. Nuni chu kovin godownah ka chhukpui ta a, Peka erawh chu dawra lo la awm rih turin ka ti thung a.
Kan dawr hnuai chiahah hian godown kan nei a, chutah chuan inthiarnate pawh a awm nghal a. Choka angreng deuh awm ve-in gas-te kan dah ve a, thingpui lumnan leh chhun eitur siamna atan kan zu hmang ṭhin a. Christmas vuakvetah phei chuan induhthawh a nat ṭhin avangin zíngkarah kalin chutah chuan rawng kan bawl mai ṭhin a, tukṭhuan pawh kan ei nghal mai ṭhin a ni.
Nuni chu Peka inthiamlohzia leh inchhirzia te chu ka sawipui nghal mawlh mawlh a, ngaidam mai tur leh chance vawikhat tal pe leh tur chuan kan inthlem a. A tawpah chuan a rilru a la dam zan lo naa Peka nena sawidun chu a remti ta hram a, dawrah chuan chho vatin Peka chu inhnuai lamah chuan ka chhuktîr ta thung a.
Eng emaw chen an pil vang vang hnu chuan an rawn chho dun ta ral ral a, an rawn inthlem lungawi tawh ni ngei tur a ni Peka chuan min rawn siai suk a, ka lo nuih sak a. Dawr khar a hun tawh avang chuan kan nghak ta law law a, Peka chuan Nuni chu a thlah a, kei ka pa rualin ka haw ve ta thung a.
In kan thlen hnu chuan ka inbual nghal sawk sawk a, KṬP-in program kan neih avangin chaw chu hmanhmawh takin ka ei a, ka eikham veleh inthlakin ka kal ta nghal a.
Thui pawh ka la kal hman lo tihah chuan ka bulah motor a rawn ding chat a, Zâma motor ang deuha ka hriat avang chuan ka ding a, a lo ni ngei reng a, a motor aṭanga rawn dakchhuakin motora lut tur chuan min rawn au a.
"Lo lut rawh, ka lo thlah ang che."
"Khawnge i kal dawn?" ṭhut luh pah chuan ka zawt a.
"Nula ka rim dawn," a tih chuan ka lo nui hak a.
"Min duh ve lotu rim reng ai chuan min duh vetu ngei rim ila a zia zawk ang ka ti deuh a," a rawn tih leh chuan amah pawh chu a nui ve hawk hawk a.
"Hmannia i sawi zauh kha em ni? Ka hrechiang chak a, inhmuhna hun kan nei leh ta mai si lova," ka lo ti a.
"Aw, ni e. A fel reuh riau a, a hmel pawh a chhe lem lo. Mahse, a tluk lo deuh che chuan ka hria a ni," fiamthu titak deuhin a ti a.
"Ka tluk lo zawk a nih dawn chu. Tak takin i duhzâwng i tawng ta chu ka lawmpui lutuk che!" ka tih chuan min rawn melh zauh a.
"Ka duhzâwng chu ka tawng daih tawh a, mahse, ani chuan ṭhian angin min en tlat a!" nui vur vur chung chuan a ti a, a ruk tak chuan nuam lo tihna deuh ka lo nei a. Mahse, fiamthu nena a rik zawm tak hlutah chuan ka pangngai ve leh nghal mai a.
Biak in bulah chuan a ding a, ka chhuk fel chiah tihah chuan Mâmi'n min lo au a, ka va hawi chuan ani pawh bike aṭangin a chhuk fel ve chiah tih hriat takin a lo inpawt ṭha mawlh mawlh a. Zâma'n min biak leh avang chuan kunin kan han inbe leh zuai a, a tlan tak hnu chuan Mâmi lo dinna lamah chuan ka phei nghal a.
Nunsânga'n chiang fahrana min lo en ka hmuh rual chuan ka ding chawt a, a hma khan hmuh ka lo inrin lutuk loh vang nge Mâmi rawn phurtu chu ka lo ngaihven vak lova. Helmet a khum chu thuhran ni se ka lo melh lem loh avang khan ka lo hre hauh lo a lo ni a, chutia ka hmuh thut takah chuan ka che chu a buai titih der a.
Muangchânga pen phei lehin hreh tak chungin an bulah chuan ka va ding a, an bula ka din thleng chuan a mit chu a lasawn lo rêng rêng a, ka lai deuh tihngaihna hre lo chuan luh nghal mai chu ka rawt ta ngawt a. Chutia luh ka rawt chuan Nunsânga chuan a bike chu dahṭha-in kan bulah chuan kal mai inringin a rawn ding a.
Kan kal ta chu Mâmi chuan a û chu a en leh zauh ṭhin a, kei lah chuan kal hran vat duhin ka lo pawt ru deuh sek a. Hmanhmawh rilruk nak alâi chuan a la ding leh ta nghal a.
"I lo kal ve leh si dawn em ni?" Nunsânga en chung chuan a ti ta hâ a.
"Aw!" A chhâng tawi ṭha tek tawk hle a, kei chuan a ngaihna hre lovin ka lo en reng ringawt a.
"Ka sâwm ka sâwm che a, i duh tawp si lova, tunah i tum leh bawk sia!" a ti niah niah a, Nunsânga lah chu min melh run chung chuan a lo khi suk duh chauh a.
Hall-ah chuan an lo ṭhu deuh ṭhup tawh a, hmalam kan chan tawh loh avangin hnung deuhah chuan kan ṭhu ve ta a. Nunsânga chu ka bulah tak a ṭhut avang chuan ka awm chu a nuam lo ru hle a, han tih vak ngaihna ka hre lo nen thawpik ru ṭeuh chuan ka ṭhu a. Ani lah chu engah mah ngai lo niawm takin a awm a, ka awm ve chu a theng thawngah a kal ve lo emaw tih mai turin a awm thung a.
Mâmi chu a bula ṭhu nen chuan an inbe mawlh mawlh reng a, music a rin êm avang chuan ka ning ang reng hle a. A tir lamah thusawi lam dahin a hnuhnung lamah a hlawmin zai lam an dah thung a, tlêma a sáhawk zual deuhte chu an kûk deuh rúih rúih a. Mâmi chuan haw rawt se ka ti hle a, a rawttu zawka ṭan chu ka duh bik chiah si lova, bet lo zet chuan ka ṭhu ve reng a.
Thawm bengchheng ka ning chu thuhran ka bula ṭhu avang pawh chuan haw thuai chu ka duh a, a tum lui nge a tipalh ve reng tih pawh hriat loh hian min ngheng hnai mah mah a, tawlhsawnna tur a awm bawk si lova, a midip a na ve hrim hrim bawk nen pawna chhuah daih maite chu ka duh ut ut mai a ni.
Mâmi'n zun a rawt takah chuan ka thaw huai a, zun zawh hnuah pawh lut tawh lova pâwna awm tlang mai chu ka tum rilru nghal a. Mahse, ka tumloh dan deuhin thil a thleng leh ta tlat mai! Mâmi kal ta chu zui mai tuma thawh ka tum chu ka kutah a rawn man chat a, min pawt ṭhu ta tlat a. Talchhuah tuma ka beihna chu a ngaimawh tham lo nasa mai si a, min vuan nget zual sauh a. Midangin an hria ang tih ka hlauh avang chuan duh angin ka che ngam bawk si lova, mi hmuh theih loh tur ang ber chuan ka kut a vawnna chubthlahtir tum chuan ka bei ngat ngat a, awmzia erawh a awm lo khawp mai.
"Chhuah i duh chuan kan pahnihin chhuak dun ang," ka bengbulah a rawn ti sup a, rum fahranin ka lo melh ringawt a.
Ka kut a vawnna chu na deuha han hmer salh pah chuan a mitmei chuan kal turin min ti a, kei lah chu ka luhlul chhuahin ka ṭhutdan ngai reng chuan ka ṭhu ngal a.
"Helai hmuna mite hmuha pawhchhuah kher i duh loh chuan chhuak mai la."
A aw chu a ring lo naa a ti duh tak tak ang tih a mitmeng aṭang chuan ka hmu thei a, chuti taka min zuam mai chu ka ṭahte a chhuak hial zawk a.
Pawn kan thlen chuan ka kutah rawn kai leh nghalin gate pâwn lamah chuan min chhuahpui nghal a, ka ṭang ve teh naa awmzia a awm lem lo hle a, hneh zeta min vuanbetin min kalpui dawr dawr a, a bike dahna kan thlen chuan min vawnna thlah chuang hauh lovin a lawn a, chuang ve tura min tih chuan min pawh tlat avangin ka kalsawn thei chuang si lova, duh lo hle mah ila ka chuang ta ringawt a. Ka chuan ve tak hnu chuan tinungin a tlan ta nghal a.
An in lamah tlanin kawtah chuan a ding a, chhuk tura min hrilh hma chu ka chuang lui ve ngat a.
"Tikhan i ṭhu reng dawn nge i chhuk dawn?"
"Helaiah chhuak ka ngaih awm ka hre lo tlat!" ka lo ti hlak a.
Chutia chhuk ka tum tak si lovah chuan a bike chu stand ṭha-in amah chu a chhuk a, ka lo inrin hman hma chuan min pawmthla thut a, ka lo ṭe deuh ṭhat a.
"Eng vanga ka chunga hetianga awm hi nge i nih?" ka aw chu a ring lem lo naa a chang ṭha ve khawp mai.
"Chu chu inchhûngah kan sawidun dawn nia," a lo tih chuan ka lû chu ka lo thing nar nar a.
"Teuh lo mai! Ka rawn lut dawn rêng rêng lo, i duh duha min tihkual chu tum lo mai teh!" ka lo ti hlar a, kal mai tum chuan ka inher a.
Ka kutah bawk chuan rawn man lehin inchhûng lam chu min panpui a, ka kut a vawnna chu phelh ka tum nasat poh leh a nghet tulh tulh mai si a. Ka thinur lutuk chuan ṭe chhuah chiam mai chu ka chák a, inchhûnga a pa lo ṭhu ka hmuh chuan ka inbengdai lui hram hram a.
"In rawn bâng tawh a ni maw? Puite, khawnge i ṭhiannu?" tiin min lo zawt nghal a.
"Puitei hi thil enpui lawk ka duh a,ban hma-in kan lo haw a nih hi. Ka roomah ka chhohpui lawk dawn a nia aw!" Chhan pawh ka chhan ve hma chuan lo tiin a room lam chu min panpui ta nghal daih a.
A rooma kan luh chuan a phone chu phawrhin a hmet nghal mual mual a, a bengbulah keng chhovin a ngâithla vang vang a.
"Mâmi, tihtur pawimawh kan neih avangin Puitei nen kan haw a, hawpui tur lo zawng mai ta che."
A biak zawh chuan a phone chu khumah thehthla-in min rawn en a, kei lah chuan thinur lutukin ka lo melh ngar a.
"Kha doctor pa nen khan in inkârah hian eng thil chiah nge awm min han hrilh teh!" Min melh ngur chung chuan a ti nghut a.
"I hriat a ṭulna ka hre hauh lo mai." Ka sawi zo hman ṭawk tih chuan ka bânah a rawn hmer chawt a, ka lo phu deuh zawk a.
"Ka hriat a ṭul nia ka hriat avangin ka zawt che a nih chu! Khatia luhlul kual vel lo khan sawi vat teh!" A aw chu a zawi hle naa a chiang fek fawk hle a ni.
Comments
Post a Comment