VANMALSAWMA Chapter - 7

VANMALSAWMA

Chapter 7




          Beisei ai takin ka exam chu tiṭha ve-in ka inhria a. Exam zawh ni chuan ka ṭhiante ho chu an lo lêng a, Judithi chu a dan pângngai tê-in a ri leh bawrh bawrh tawh a, Bawihtei pawh hian a ngaina viau a, a lo lenluh ve zauh ṭumte hian an inchhaih nui nasa thei hle a ni.

          Tunah pawh an inchhaih nui leh ar ar tawh a, choka lama thingpui lum tura ka pheisan laite chuan an khek dun nasa mai a, Bawihtei hlim thawm hriat hi nuam ka ti em em a, hlim reng se ka duh em em bawk a ni.

          Thingpui ka lo siam mawlh mawlh lai chuan Bena chu ngawi rengin ka bulah a lo ding a, ka siam zo ka kalsawn tur chu ka kutah lo vuanin a lamah min pawt hnai nghal a.

          "Mapui, engtia rei nge min nghahtir i tum? Kei chuan engtik lai pawhin ka ngaihtuah che a, ka ngai em em bawk che a, tlemte tal pawhin min ngaihtuah ve miah lo em ni?"

          "Ben, khawngaihin min hrethiam la, ngaihzawng neih hi ka la inpeih lo a nih ka ring, ṭhian ang bakin ka en thei tlat lo che. Kei aia fel leh hmelṭha an tam  ang, kei chu min nghak duh tawh suh. I ṭhian ṭha tak erawh ka ni reng ang," tiin ka rilru dik tak ka hrilh leh a.

          Beidawn hmel taka min en chung chuan, "Engtin nge nang hmangaih chung che hian midang ka ngaihzawn theih ang? Ka ngaihtuahnaah hian awmloh lai i nei ngai lova, hmeichhe dang tan hmun a awm lo," a ti leh a, ka khawngaih viau na'ngin ṭhian ang bakin ka en thei ngang si lo.

          "A ṭha e, ṭhian anga en tur che chuan ka rilru ka lo siam dawn nia. Mahse, hun erawh a duh rei viau-in ka ring. Ka thei ang em tih pawh ka chiang ngam lo!" a ti chuai raih a, ka khawngaih em avang chuan ngaihzâwng anga en ve theih ka duh rum rum mai!

          Ka ṭhiante haw hnu chuan kawta pangpâr ho chu ka sawnkual a, leiṭhate ka vur belh bawk a. Tunlai chu nu Mawii hi chawhma lam chauh a lo kal ṭhin a, a fapa a damloh avangin a haw hma ṭhin a. U Malsawma phei chuan a fapa damṭhat loh chhung chu lo kal lo mai turin a ti a, mahse, nu Mawii hi mi inthlahrung deuh mai a ni a, chawhma lamah a theih ang ang a rawn thawk hram ṭhin a ni.

          Eirawngbawl a hautak loh avangin ka hmanhmawh lem lova, ka thiltih lai chu tihzawh law law ka duh a, ka lo inham berh hle lai chuan ka bulah mi lo kal an awm tih hria-in ka han hawichhuak a, ka rin loh lutuk ka hmu avang chuan ka dingchhuak nghal hluai a.

          Eng nge a awm duh tawh lohna inah hian rawn tih a tum? Amahin Bawihtei'n inchhungah movie a en a, u Malsawma a awm lo tih ka ngaihtuah chhuah rualin hlauhthawnna chuan min rawn fan nghal a.

          "Eng.... eng nge i duh?" ka hlauthawng lutuk chuan ṭawngkam mawihnâi pawh ka chhakchhuak thei lo.

          Ka zawhna ngai pawimawh lo zetin u Rosie-i chuan, "Khawnge Lalhruaizeli a awm? Han ko teh!" a ti nghal tâwng a.

          Min ngai pawimawh lo lutuk leh min hmusit lutuk chu ka sa ve ta phat mai a, ka hlauhna chu dahṭha-in Bawihtei vang chauh pawhin pachang tak leh huaisen taka ka hmachhawn a ngai dawn tiin ka infuih ru mawlh mawlh a.

          "Ka koh nachhan tur ka va hre lo ve! I duh leh tikhan nangmah khan ko mai ta che. Eng atan nge i tih reng reng?" ka aw khur thup hram hram chung chuan ka lo ti let khauh a.
         
          Thinrim lutuk tih hriat taka meng alh phat chung chuan min rawn melh a, "I va zakthei lo ve a! Tunge nia i inhriata khatia min han chhan ngam chu le! Nang ang mi ina awma mi pasal ngaihzawn hreh lotu hi ka hlauh che i ring a nih chuan i tisual hle ang, han ko vat mai teh!" a vin ṭha ngang mai!

          "Keimah ang bawkin ṭawngna turin kâ i nei a, i râwl a ring ṭha bawk a, nangmah khan ko ve mai rawh. I chhiahhlawh ka ni lova, i duh duha i tirh tur leh i ankhum tur hi ka ni bik lo,"

          "I lo va inla huai sawt reuh ve maw  le! Aia upa zah nachang pawh i hre lo a nih hi. Ka awm lo chu nuam i lo ti hle mai a ni maw!"

          "Zah tlakin i awm miau si lo alawm le! Chuan, dawta min puh kha bansan tawh ang che. Tu pasal mah ka ngaizâwng lova, ka ngaizâwng ngai hek lovang. Nupui pasal nei reng chunga ngaihzâwng nei hi ka ngaisang lo tih i lo hre dawn nia,"

          Ka nu chuan ka ṭawngkam leh thusawi duh dante hi hria se chuan rapthlak min va ti dawn em! Mahse, he nu bawlhhlawh lutuk vang hian Bawihtei thlabâr takin a awm fo a, ka chhûngrila amah ka huatna nasa lutuk vang hian ka insum thei tawh bik lo a ni. Min hmusit ve khanglang lehnghal a!

          Bawihtei'n kan thawm a hria ang tih chu ka hlau rilru hle a, a nu hi a ngai lo mai pawh ni lovin a hlauhin a hlau a ni ber a, a hmuh chuan a thinlunga hlauhna kha a lo chhuak leh lo thei dawn lova, chumi chu thleng turin ka duh lo a ni.

          Ka hlauh ang ngeiin Bawihtei chuan kawngkapui aṭanga rawn tlanchhuah pah chuan min rawn au a, a nu hmel a hmuh rual chuan a ding chawt a, a nui hmel chu hlau hmelin a rawn thlak riai riai a.

          U Rosie-i chuan lo nuih pahin, "Bawihte, lo kal teh. Ka ngai lutuk che a, rawn hmu tur che-in ka lo kal a nih hi!" a lo ti vat a.

           Ka thil hriat chu ka hresual emaw ka ti hman hial a, a hmaa a thinur hmel kha nui hmelin a lo thlak fel leh vek tawh a. Hetianga ṭawngkam nem leh nui chunga a fanu a biak hi ka la hre lova, ka makti lutuk chu ka ka ho mai a, eng ang lemchanna nge a rawn neih tak mai le!

          Bawihtei chu a dinna ngaiah chuan a la ding reng a, ka bula kal tur chuan ka lo hui zauh a.

          Ka bula rawn kal tum chuan a rawn phei a, a nu chuan lo dangin a lo kai ding a. Min rawn melh zui ṭawk ṭawk ka hmuh chuan an dinna bulah chuan ka pen phei ve vat a.

          A fanu dara dawm chung chuan, "Bawihte, ka bulah lo riak ta che. Barbie leh toys dang i duh ang ang ka leisak dawn che nia," a han ti a.

          Bawihtei chuan chhang lovin min rawn en a, a ṭah a chhuak hle a ni tih hriat takin a mitko vel chu a sen vek a. Ka khawngaih em avang chuan ka va ban a, a nu chuan lo kuaisawnin a ko vuan nghet sauh a.

          "Barbie tam deuh chu i duh lo em ni? Kan bazar dun ang a, ka leisak ṭeuh dawn che alawm," a ti leh a.

          Bawihtei chuan, "Aih, ka duh lo. Barbie chu tam deuh ka nei tawh," ṭap aw ṭeuha tih pah chuan min rawn ban leh a.

          A kut chu ka lo chelhsak vat a, ka bula kaih phei mai tum chuan ka lo pawt a. Chu chu ngaithei lovin u Rosie-i chuan a lo pawt let sawk a, Bawihtei chu a sawi nghal nawk nawk a.

           A insum theihna in a tlin ta lo tih hriat zet hian, "Ṭha te tea engmah sawipui thei loha i awm luih tlat reuh le!  Luhlul lutuk mai! Ka hruai lui tho tho ang che, ka bula i awm hi a pawimawh lutuk!"

          "Chutin a pa thu lovin i hruai lui ngawt thei lovang. Amah pawhin a duh loh kha," tih pah chuan Bawihtei chu ka va ban leh a.

          Ka kut chu lei ka khawihna avang khan a bal hle a, lei ka la kai nual bawk a. Mahse, chutiang mai mai ngaimawh hman ka ni tawh lo. Bawihtei hlau hmel chuan engmah pawisak lohna min pe a.

          Ka kut chu lo vai per lawp pahin rum lutuk hian min rawn melh a, "Engmah lo sawi ve suh. Ka fanu a ni a, ka duh duhin ka ti ang, i lo inrawlhna tur a awm lo," min tihkhum salh salh a.

          "Ka fanu kha thlah nghal rawh. Engtin nge helai hmunah hian i lo la kal ngam zawk a? Vawikhatmah rawn kal tawh lo turin ka hrilh che a ni lawm ni? Ka la insum theih hram hram lai hian heta ṭang hian kal bo rawh!"

          Engtik lai khan nge u Malsawma chu a rawn thlen ka hre hauh lova, ka thla a muang nghal sawng sawng tih erawh ka hre thung.  Bawihtei pawh chuan a pa hmel a hmuh chuan a thlamuan phah ve hle tih a hmel aṭang chuan ka hmu thei a ni.

          Bawihtei chu ka kaisawn ta vat a, u Malsawma a awm tawh avang chuan a nu chuan a lo thlah ve mai a, inchhungah ka hruai lut nghal daih a.

          A bula Bawihtei awm kha pawimawh viau ni awm khan a sawi a, eng nge chuti taka a pawimawhna chu ni ang le! Ka rindan kha a lo dik chiah a ni, chhan nei lo chuan awmpui a tum dawn lo chiang a, a chhan erawh ka la hre thei si lo!
 
          Rei vak lo hnu-ah chuan u Malsawma chu a rawn lut ve a, a hun takah lo haw hman ta lo se engtin nge kan lo awm ang tih ngaihtuah chuan ka hlauthawng thar leh a, ka tirilah ka khur dar dar a.

          "Nidangah ka awm loh laia a lo kal leh a nih chuan min rawn phone nghal vat tawh la a ṭha ang, Bawihtei pawh mahni chauhin pawnah chhuah lo tur a nia," a rawn ti nghal tâwng a.

          Ka hmel a rawn en chuan ka hlauhthawnna chu a lo la langchhuak a niang chu min ngaihtuah hmel zeta min rawn pan hnaih nghal ruak pah chuan, "Engtin nge a lo ṭawngkhum che? Kut a thlak che em? Engmah zep lovin sawi teh," a rawn ti a, ka bânah chuan a rawn vuan nghal a.

          Ka lu lo thin pah chuan, "Engtin vak min ti lo. Ka insum zo lovin ka lo chhâng ve deuh a, kha khan a tithinur mai mai alawm," la khur ru dar dar chung chuan ka lo ti vat a.

          "Ni lo, chutiang ringawt a ni lovang, i hmelah khan a hriat vek! I hlauthawng hmel kha ka hmuh hmaih hauh lo a nia,"

           Tunah tak hi chuan pawnlam boruak ai mah khan ka bâna a vawnna chuan min tibuai tawh zawk a, ka ngaihtuahna a tichawmawlh vek a, ka sawifiah thiam si loh eng emaw takin min fan chiai chiai ni berin ka hria a ni.

          "I ṭha tak zet maw, Mapui?"

          "Aaaa.....aw....ka ṭha lutuk! Ka ṭha lutuk a nia...." ka ti bah nawk a.

          Min thlek leh vang vang phawt a, chutah, ka bana a vawnna chu laksawn pahin, "A nih chuan va intifai la," a ti ta a.

          "Pangpâr saw ka  .......... "

          "Naktukah nu Mawii'n chhunzawm mai rawh se, tunah chuan va intifai phawt rawh."

          Ka inbual lai chuan ka inngaihtuah nasa hle a. Khatianga huaisar taka kan awmlai pawha ina a lo kal ngam a nih chuan chhunlamah kan awm loh hlanin a lo kal ang a, a lo hruai chhuak daih ang tih pawh a hlauhawm hle dawnin ka hria a. Thisena inzawmna nei lo mah ila kan thinlung a inzawm tlat avangin ka ngaihtuah lo thei lova, ka tan chuan fanu ang a ni a, ani pawhin min ngai a, a nu ang maiin min en a, ka bula awm a thlahlel ve em em a ni si a. Ka theihtawpin a himna atân ka bei dawn a ni.

          U Malsawma ka ngaihtuah rual chuan ka danglam leh nghal vek a, ka awmdan hi ka inhrethiam hlawl lo a ni ber e! Tunhma ang khan nel taka biak harsa ka ti a, a mita en chunga biak phei chu ka ngam lo hrim hrim. Min tawh hleka ka awmdan danglam nghal zelte hi mak ka ti a, nuṭa angin ka en ṭhin kha a ni a, tunah hian nuṭa angin ka la en chiah em tih hi ka inzawt ru bawk a ni.
         
          Rawng ka bawl lai chuan ka bulah Bawihtei nen an lo awm ve reng a, eng eng emaw sawiin ani leh ni lo angin a ti ti ve luam a.
           
          "U Mapui...?"

          "Eng nge Bawihte?"

          "Âpa'n a bia che a, i chhâng miah lova!"

          Kei hi ka rilru ka lo kawm leh veng veng pek a nih chu!

          "Aw.....nia, ka lo inngaihtuah nasa deuh a."

          U Malsawma chuan, "A pawi love. Englo a nia... Naktuk kha ka nute'n chaw ei turin min beisei a, i thei ang tiraw?" nuihzat hmel deuha min en chung chuan a lo ti vat a.

          "Theih loh nachhan tur a awm pawh ka hre hleinem. Mahse, naktuk kha Bawihtei te schoola kal a ngaih kha aw!"

          "A ni tak! Sawi lo la chu ka lo mangnghilh der tawh asin! In aṭangin kan chhuak hma deuh ang a, kan kal kawi nghal mai dawn nia."

          Hmanni deuh aṭang khan U Malsawma hian min en leh vung vung ṭhin a, ka ngaihbel nge a mitmengah chuan min thlakhlelhna niawm tak hi hmu-in ka inhre ṭhin a, mahse, a rei lo ṭhin em a, ka chiang ngam chiah lo thung.

          A tuka Bawihtei te schoola kan va kal chuan nu leh pa dang pawh an lo awm nual a. Bawihtei te class result lamna turah chuan kan lut ve nghal a, an zirtirtute chuan min lo chiau-au vat a.

          Bawihtei chu kan rinloh tak maiin pakhatna a lo ni a, a result kan han hre chiah chu u Malsawma chuan ka kuta rawn vuan chungin, "Ka lawm e aw!" a rawn ti sup a. Ka hamhaih atalângin chhanna chang ka hre leh pek lo!

          Room aṭanga kan chhuak chiah chu pa pakhat hian u Malsawma chu a lo ko a, kan bula lo kal hnaih pahin chu pa chuan Bawihtei result te chu a rawn zawt luam a. U Malsawma nen chuan an inbe mawlh mawlh a, an sirah Bawihtei nen chuan kan lo ding ve ran a.

          "Hei hi em ni in nu chu?" tih pah chuan min chibai tumin a kut a rawn pharchhuak nghal a.

          "Ni lo ...... " ka sawi zo hman lo.

          "La ni lo deuh, nih hunte pawh a la awm ang chu!"

          Phawk lutukin u Malsawma chu ka en a, mit min siai zauh pah chuan a lo nui suk a.

          Motora kan chuan leh hnu pawh chuan a thil sawi khan min ṭhawn em avangin ṭawng zai pawh ka rel lova, a fiamthu nge a ti tak tak ni ang tih chu ka ngaihtuah a.

          "I va inngaihtuah nasa leh tawh ve!"

          Ka harhchhuak zawk a, ka va hawi phei chuan a motor khalh chauh chu ngaihtuah ni awm takin hmalam a lo en run a.

          "Nia, nasa a ni mai" ka chhâng tawi tek tawk viau.

           "Ka thil sawi kha i lawm meuh na nge?" a rawn tichhuak leh bauh a.