VANMALSAWMA Chapter - 4

VANMALSAWMA


Chapter 4



          Ka thu hriatin min ṭhawn em avang chuan han hnial mai tur pawhin ka ṭawngchhuak thei tlat lo! Bawihtei kut chu nghet taka hmer chungin ka ding khur dar dar a, kalsawn tur lahin chakna ka nei hek lo.

          "Engtin nge khatiang ngaihdan tenawm lutuk kha i neih theih zawk? I ngaihtuahna thianghlim lo tak kha midang tihnatna atân chuan hmang lo hram teh!"

          U Malsawma rawn ṭawngchhuak chu a chang ṭha beng bawng hle a, ka lo ip chawih a, boruak ṭha lo tak lo thleng tur chu a inmûng mêk a ni si a, ka hlauthawng a, ka ṭah a chhuak em em bawk.

          "Ka ringhlel e te min han tikual vel a, nangmah i lo rinawm loh vang lek a nih kha min lo rinhlelh. Tenawm lutuk!  " min rawn en pah chuan, "Nang pawh nupui nei lai ni lo an tam tehreng nen nupui nei lai kher han ngaihzawnte chu zah pawh i zak lawm ni?" a tih zawm zat a.

          "Ka....ih...englo...i ngaihdan ang kha a ni miah lo a nia!" ka ṭawng chu a bah nawk a, thil dang han sawibelh leh turin chakna ka nei lova, sawibelh tur ka hre hek lo, ṭawngchhuah ka harsat hluah hluah a ni ber.

          "Pha kual vel lo mai teh, sawi tur bar pawh i hriat loh tawp kha. A tir aṭang khan ka ringhlel tawh hrim hrim che, i melh no kual vel leh amah hip tuma i inlak fel dante pawh kha ka hre vek! I mitmengah khan i duh tih a lang reng alawm," rum em ema min melh pahin u Rosie-i chuan min ṭawngkhum sak sak a.

          Min puhna chu hnialin chhâng let ve thei ila ka ti takzet a, mahse, ka lei chu phuar beh ang mai niin ka aw lah chu ka dangah a thâmral vek emaw tih mai turin ri chhuak tur a awm miah lova. Bawihtei kut ka vawn lohna lam zawk chu ka humruh ngawt ngawt a, ka khur hlawk hlawk tawh a ni ber e.

          U Malsawma chuan, "Khawngaihin  khatia dawta mi puh kha duhtawk tawh rawh, i ngaihdan kha a dik lo hulhual a ni tih lo hre bawk la, duh aiin i ṭawng nasa ta mah mah e," a rawn ti charh charh a. "Mapui, Bawihtei nen khan i roomah lo va awm rawh u, i u Rosie-i thusawi kha chu engah mah ngai duh suh, rilru nawm loh phah nante khan i lo hmang ang e." a ti zui zat a.

          Engtin nge engah mah ngai lova ka awm theih tehlul ang ni! A thusawi khan ka thluak a fan a, min hnuaichhiah lutuk leh min hmusit tih hriat taka inzahpahna nei miah lova khatianga min ṭawngkhum kha ka tan chuan a kha-in a na ngawih ngawih mai a ni.

          U Rosie-i chuan kal tauh nghawng nghawng pahin, "A thlavâng ka hauhsak e te in han inti vel a, in inen danah hian in inkarah eng emaw chu a awm chiang alawm! Mi a ka nih loh hi, min bum chuang lovang," a ti lawng lawng a.

          U Malsawma chuan chhan enah pawh a en tawh bik lo a niang lainat hmel deuhin min rawn melh vang vang a, room lama awm hahdam rih tur chuan min hrilh leh sup a.

          Ka rooma kan awm hnu pawh chuan ka pangngai mai thei lova, ka chhûngrilah chuan hrehawm tihna, hlauhthawnna leh rilru natna ten min chamchilh tlat a, ṭahchhuah hawm hawm mai hi ka chãk takzet a, Bawihtei a awm ve avang chuan ka insûm ṭang ṭang thung a.

           Bawihtei pawh chuan min khawngaih tih hriat deuh hian min en kiau a, "Ânu hi tinge a sual em em bik le!  School-a ka ṭhiannu Cindy nu chu a fel lutuk a, Cindy chu a duat thei lutuk! Schoolah pawh a rawn hruai ziah a, ânu chuan min la hruai ve miah lo," a ti sep sep a, ka lainat tak zet a ni.

          Zanriah chu kan ei mumal lo hlawm hle a, ka ei thei thlawt lova, u Malsawma pawhin eng tham mah a ei bik lo. U Rosie-i phei chu chaw ei turin a rawn chhukthla lo hrim hrim a ni.

          Inchhûng boruak chu a hrehawm ngawih ngawih a ni ber mai, Bawihtei chu awm lo se ka chhuak nghal vang vang tawhin ka ring!

          Zanah pawh muthilh harsa ka ti hle a, Bawihtein ka bula riah a ngen leh avangin ka bulah a riak a. A muhil hmel chu ka thlir reng a, a hmel pawisawi lo leh hmelṭha tak mai chu ka en ngawih ngawih a, a nu-in heti taka a ngaihsak lo thei hi mak ka ti a, ka khawngaih reuh hle a.

          U Rosie-i min puhna kha ka ngaihtuah let leh a, ka zak a, a ngaihna ka hrethiam lo hle bawk. U Malsawma hian nula angin min en ngai lova, a farnu ang chiahin min en niin a lang. Khatiang a min puhna tur khân vawikhat pawh nulat tlangvalna lam hawiin kan la inkawm lo bawk a, kan fihlim ve tawk a ni tih ka ngaihtuahna chuan tlemin ka rilru a tinuam deuh a. Eng ang pawhin min puh mah se a mipuhna kha dawt a nih miau avangin engah mah ngai lo turin ka infuih ru mawlh mawlh a, mahse, ka hlawhtling lem hlei lova.

          Ka tân chuan u Malsawma hi ka u ang mai a ni a, a ṭawng tam lem lova, ṭul a tih bak hi chu a sawi ngai meuh lo. Nula mit aṭanga thlir chuan a chhe lova, a pa em em bawk a, a cool deuh ruih avang leh amah palian ve tawk tak a lo nihna hian mi a hîp em em bawk a ni tih ka hai bik lova. Amaherawh chu, nupui nei lai a nih bakah nuṭa ang maia ka en vang hian ngaihzawn enin ka en ngai lova, ka duh bawk hek lo.

          Ka muthilh meuh chuan khua a vâr hnai thuak a, thawh hai leh ka hlauh avangin alarm ka set thlap a, mut erawh ka kham lo hle dawn tih ka chiang ngang mai.

          Ka lo huphurh ang aiin boruak a ṭha chho ta phian a, thil ṭhalo zawk a thlen palh ka hlauh avangin u Malsawma erawh ka theih ang angin ka hel a, class kal dawn leh haw lamah pawh a ruala haw duh lovin Benate ho ka inthlahtir mai ṭhin a, dik lo taka puh nih leh kha ka hlau zek zek tawh mai a ni.

          Nikhat kan class bâng chu ṭhiante chuan lenkual an rawt a, ka hman ve loh thu ka sawi ngial pawhin kan rei loh tur thu sawiin min nawrlui tlat hlawm a, kei pawh chuan han len khawthawn ve chu ka lo châk ve deuh avang chuan haw hma ngei inbeiseiin ka aw ve ta a.

          Judithi chuan Muthi parka kal a rawt a, a panna kawng an siamṭhat tawh avangin a tlan par par theih ang a, kan haw leh hma thei deuh ang tiin kan kal ta a. Marama leh Judithi chu inphurin kei leh Kima chu Bena motorah kan chûang thung a.

          A hmun kan han thlen chhoh chuan mi lêng vel pawh an lo awm nual a, a hmun a thengthaw nuam a, hawi vel pawh a nuam hle a. Ka hawikualna lamah chuan thlang lama kalna tura an siam kawng te deuhah chuan mipa leh hneichhia inkai riala kal hi ka zu hmu a, ka hawisawn leh mai dawn a, mahse, a hmeichhia zawk chu ka hmuh hnu ni tlata ka hriat avangin ka zu ennawn leh ngat a, tlemin an lo kal hnai ta deuh bawk nen u Rosie-i hmel chu chiang takin ka zu hmu ta a!

          Mak ka ti lutuk chu hawisawn leh mai nachâng pawh ka hre lova, nula leh tlangval inngaizawng lengdun ang maiin inkai rialin an kal a, ka thinphu nasa lutuk chu a rawn zuangchhuak mai ang tih a hlauhawm zawk a ni.
         
          Inchhûnga kan hmuh ngai reng reng loh a nui hmêl chu pawnlamah, a pasal ni lo mipa dang bula a awmlaiin ka hmu ta chu a ni a, hmuhnawm ka ti hauh si lo! Engtin nge pasal fel leh ṭha em em nei siin hetiang hian a awm theih zawk chu le! Mak hi ka ti ngawih ngawih a, u Malsawma te pafa ka ngaihtuah a, ka hnuk a ulh ṭeuh mai a ni.

          "Mawh... nang eng nge i ngaihdan?" min rawn nghawk zauh pah chuan Judithi chuan min zawt a, eng chungchâng nge an sawi tih ka hre lo hrim hrim.

          "Engtin maw in tih? Ka lo hawi nasa lutuk a, in thil sawi ka lo hre miah lova," tiin ka lo zawt let a.

          "Khaw chhûngah leng kual ila kan ti a nih chu, i ngaihdan rawn thawh ve la."

          "A chakawm viau a, mahse, haw ka duh tawh tlat! Zanah u Malsawma chhuah a ngaih avangin rawngbawl hma ka ngai a, haw tawh zawk mai ang u. Nidangah, hun thawl deuhah kan la leng leh zawk dawn nia,"

          Ka dinhmun min hriatthiampui tute an ni a, ka rawtna chu pawmin kan haw ta dial a. Ka rilru erawh park-ah khan a la awm ta reng a!

          Eirawng ka bawl laite chuan ka rilru-ah thildang a lut thei hlawl lova, ka lo ngaihtuah leh veng veng ṭhin a. Tunge a kalpuipa kha ni ang a tlangval nge amah anga pawmlai nei ve tho tihte ka ngaihtuah a, ka lo ngaihtuah buai ve hle ringawt mai a ni.

          U Malsawma hi hrilh ta ila, eng angin nge a lo dawnsawn ang tih lah hriat a ni si lova, ka hrilh loh chuan ka rilru a nuam theiin ka ring bawk si lo, ka inkhâp buai hle a. Hrilh ta ila an nupa inṭhenna hial a thlen vaih chuan ka inthiam thei ngai tawh dawn lo a ni tihte ka ngaihtuah chuan hrilh rih loh mai chu ka titlu ta a.

          Rawng ka bawl zawh chuan a la tlai chhe lem lo bawk a, Bawihtei home-work ka tihpui a, u Malsawma chu sitting roomah lehkha chhiarin a ṭhu bawk a. Chutih lai chuan u Rosie-i chhuak chu lo haw-in office lama an buai thu leh hna laklawh a awm avanga lo haw har a nih thu a rawn sawi a nih chu! A hmêlah inthiam lohna a lang lova, thil sual ti hmel a pu hek lo. An sawi ai daihin a lo nasa a nih ka ring ta hial mai.

          Chaw eikham hnu chuan u Malsawma chu a chhuak nghal a, Bawihtei nen sitting roomah TV enin kan awm  a, u Rosie-i erawh chu room lamah a awm thung a.


          U Malsawma chhuah hnu lawk chuan u Rosie-i chu nalh deuha inchei chungin a rawn chhukthla a, a nute inah
 kal lawk a ngaihthu sawiin a chhuak nghal a. A nu a kalchhuak fel chiah tih chuan Bawihtei chuan min rawn en ang hê hâw a, " U Mapui, nangmah hi ânu ni zawk la ka ti ê," a rawn tichhuak phawng a!
   
          Ka hamhaih atalâng chuan ka chhâng mai thei lova, ka bulah chuan ka pawthnai a, ka kuah ta ringawt a.

          "Bawihte, i nu nilo mah ila i bulah ka awm reng dawn alawm, nu ṭha deuh i nei a, khatiang thu kha midang hriatah phei chuan sawi reng reng loh tur aw," tih pah chuan nghet deuhin ka kuah vawng vawng a. Mahni nute ngei pawh thlahlel miah lova a awm hi ka lainat ngawih ngawih a, ka ṭahpui lo chauh chu a ni e.

          Rin ai takin u Malsawma chu a rawn haw hma a, a inthlak zawh hnu chuan a rawn chhuk leh a, kan bulah lehkha chhiarin a lo ṭhu ve a. Bawihtei chu a mut a chhuah tawh avang chuan mutpui ka tum a, a pa chuan an bula riak tura a tih avangin an roomah ka chhohpui ta zawk a.

          Bawihtei chu ka muttir a, a bula ṭhu chungin thawnthu ka hrilh pah a, reilote-ah a muhil ta mai a.

          Thawm ring takin min tiharh zawk a, khum bawhin ka lo muthlu ve reng a lo nia. Inhnuai lam aṭang chuan hmeichhe thinur âng thawm a rawn chhuak a, a ṭawngkam a chhe bawk si a, Bawihtei chu a harh ang tih ka hlau hle a.

          Ka hlauh ang ngeiin a nu thinur ṭe ri chuan Bawihtei chu a tiharh ta nge nge a, hlauhthawn hmel deuhin min rawn melh a, ka lo kuah vat a.
         
          "Awle, i duh dan ang chu ni rawh se, i duh dan angin awm la, kei leh ka fanu hi i tân he khawvelah hian awm ve miah lo anga min ngaih a ṭha ang. Vawikhat pawh inchhirin rawn let tum ngai suh, a chhan chu engtikah mah ka ngaihdam ngai dawn loh che avangin! I chhuak a nih chuan rawn kir leh tawh lo turin chhuak la, kan nun aṭang hian kalbo vang vang ang che, i duh ang anga awm turin i zalen e."
       
           Zanin zet chu u Malsawma pawh a insûm sêng tawh lo a ni ber e, a thutlûkna chu a siam sual loh ngei ka beisei.

END OF FLASHBACK..
       

          Ka bula Bawihtei mu chu a rawn tal deuh a, min rawn tlawh takah chuan ka ngaihtuahna aṭang chuan ka harhchhuak ta chauh a, ka lo inngaihtuah nasat em avang chuan khaw lo vâr uar tawh pawh chu ka lo hmu lova. Ka lo inngaihtuah tlaivâr ṭhak a nih chu! U Malsawma pawh a muhil hauh bikin ka ring lo

          Muthilh tum tawh lovin ka tho ta zawk a, pawnah chhuakin pangpar tui ka pe nghal a, a la hma tho bawk a tiin muangchângin ka pe a, ka rilru ka kawm pah mawlh mawlh bawk a.

          "I va tho hma ve! I mu tlem awm hle mai."

          Ka lo hmu lawk si lova, chutia min rawn be thut chu ka phu chiang kher mai! Varanda aṭang chuan u Malsawma chuan nuihzat hmel takin min lo en reng a.