VANMALSAWMA Chapter - 2

VANMALSAWMA

Sbk Pachuau

CHAPTER 2

          Ka thaw huai a, mahni-a an in zawn  huphurh ruk em em laia amah ka hmu hlauh chu ka lawm tak zet a ni!

          " Ka rin aiin in lo thleng hma a, i chau em?" ka bul a lo thlen phei rual chuan min be nghal a.

          "Chau love, kan rawn tluang em a, kawngah kan chawl mang lo bawk a, kan lo thleng hma ta phian a nih hi," tiin ka lo chhang ve nghal zat a. 

          Ka bungrua khai nawlh pah chuan, "Motor dahna hi a buaithlak ṭhin a, sawlai deuhah sawn ka dah a, tikhan lo ding la, i bag hi ka va dah phawt ang a, vawihnih kalah kan zawh mai dawn kha, bungrua i ngah lo em mai," tiin a kal ta nghal a.

          Suitcase pahnih leh air-bag lian tâwk pakhatah ka inbeng leng hram a, commerce ka lak avangin ka lehkhabu hlui ho ka keng deuh vek a, college-ah pawh a la ṭangkai an tih vangin a pawimawh tura ka rin chu ka keng tawp a, bungrua ka ngah phah ta réng  a ni.

          A hnunglam aṭang chuan ka thlir zui vang vang a, a palianin a inkhaithli ṭha bawk si a, hmuhnawm a tling a ni!

          A lo let leh chuan suitcase chu a pahnihin a khai leh nghal a, khai ve tuma ka lo ban pawh chu engah mah ngai lovin ka hma-ah chuan a kal phei nul nul a. Tihngaihna dang awm ta lo chu ka zui phei ve ta hnak hnak a.

          An in kan thlen chuan ka lo rin lawk ang ai daihin a nuam tih ka hmu nghal a! An in kawta pangpâr mâwi tak tak lo awm chuan min hip nghal zar mai a ni.

          Inchhûng kan luh rual chuan hmeichhe naupang nui har har ri kan hre nghal a, choka aṭang chuan hmeichhe naupang duhawm em em mai leh nu pakhat, kum 35 bawr vel tur hi nui chungin an rawn in-um chhuak a. Ka hmel a hmuh rual chuan hmeichhe naupangtê chu a ding chat a, a bula nu pawnfenah chuan a vuan nghal bawk a.

          "Bawihte, hei hi anih hi i u Mapuii chu, rawn chibai rawh le," u Malsawma chuan a rawn ti a.

          Keimah zawk chuan va pan hnaiin a bianga piaisak zeuh pah chuan, "Bawihtei maw i nih? I hmel a va han ṭha em em ve! I hmingpum min hrilh phal em?" ka han ti a.

          "Lalhruaizeli..." nui sen senin min chhâng a, a duhawm takzet a ni!

          U Malsawma chu lo ṭawngchhuak lehin, " I room turah i bungruate hi dah phawt ila, inbual faia awm hahdamte pawh i duh ang, i room tur ka lo kawhhmuh phawt ang che," a ti a.

          Bawihtei kuta vawn pah chuan ka bula kal ve tur chuan ka sâwm a, a lo kal ve mai bawk a. A nu awmna ka zawt  a, a zin thu-in min chhâng a. A zinna hmunte ka zawt a, ṭha deuhin min chhâng zel a, hmeichhe naupang fel tak chu a ni phawt ang mawle!

          Ka inbual zawh chuan nu pakhat lo awm ve khan thingpui in turin min rawn ko a, nu nelawm pui hi a ni roh a. Min be lumlam peih phian a, a hming Tluangi a nih thu leh 'nu Tluang' ti-a ko mai tura min duhthute a sawi bawk a. Bawihtei pian hma deuh aṭanga inhrawn tawh an lo ni awm e, amah vang chuan ka tlangnel phah ve sawt a, Bawihtei pawh chuan min nêl nghalin ka bulah a tawlh ve hrat hrat reng a.

          Class ṭan ni chuan u Malsawma rualin ka kal a, Lunglei lama kan vênga mi  Judith-i a lo lut ve hlauh a, ani pawhin ṭhian leh hmelhriat dang a lo nei em em bik lo bawk nen kan inkawp nghal chat a, a zia phian!

          Kan ban hma deuh avangin mamawh eng eng emaw lei tura bazar kal kan rawt a, college piah deuha taxi changa kan lo dinlai chuan u Malsawma  a rawn tlan phei a, min hmuh chuan kan bulah a rawn ding a.

          "Mapui, in haw hman tawh em ni?"

          "Hei ka ṭhiannu nen hian mamawh leia bazâr kal kan lo tum deuh a."

          "A nih chuan ka rûalin bazâr thleng chu in lo kal thei alawm, lo lut ula," a motor kawngkhar hawn pah chuan a rawn ti a.

          Motora kan chuan chhûng zawng chu Judith-i ti ti ngaihthlakna atân kan hmang a ni ringawt, a ṭawng duh mai bakah fiamthu a duh ve hmel phian a, thil nuihzatthlak deuha sawi dante a thiam a, u Malsawma pawh a nui ve hawk hawk reng a.

          Kan vêng lamah kha chuan kan inhnaih em em loh bakah amah hi thawveng ve angreng tak a lo ni bawk nen kan inkawm ngai vak lova,  luruh ring deuh, ri ve hawr hawr chi a nih vangte pawh a niang chu 'lerh' ti-a sawi pawh a hlawh viau.

          Zarkawtah kan chhuk a, u Malsawma erawh annu zin a lo haw dâwn avangin a haw tlang nghal thung a.

          Kan duh angte kan lei zawh hnu chuan a la hma deuh bawk a, restaurant-ah inhnawhpuar turin kan chawl a. Kan thil chah nghah paha kan ti ti mawlh mawlh lai chuan tlangval pathum hi an lo lut ve a, an zînga pakhat chuan min rawn melh leh vang vang ṭhin a, ka awm a tinuam chiah lo hle a.

          Rei pawh an la ṭhut ve hma chuan pakhat chu thochhuakin kan ṭhutna lamah a rawn phei a, " Min lo hrethiam ula, vawiina kan class a mite kha in niin ka hria a, commerce student in ni ve tho tiraw?" nui sâng chungin min rawn zawt a. 

          Judith-i chuan, "Aw, ni e..... Nangni in ni ve tho em ni? Tumah hriat kan la nei lova, min lo hre hlauh lo la chu kan hre dawn miah lo che a nia," nui var var  chungin a lo chhâng vat a.

          "Nula hmelṭhate chu hriat in har hleinem, in hmel kan hmuh rualin in thlalak kan thinlungah a in-print nghal a, kan hre nghal mai che u alawm," nui hawk hawk chung chuan a ti a, "Ka ṭhiante pawh saw kan class ami an ni ve tho a," a ṭhiante lam hawi zauh pah chuan a tih zawm zat a.

          "I ṭhiante chu ko phei la, kan bulah lo ṭhu ve r'u. Kan inhmu hlauh chu tihzia e, hmelhriat kan la nei ve mang si lova, ka ṭhiannu lah hi a zakzum ang reng bawk si. Class kal leh hunah nangmahni avangin kan mikhual lutuk dawn tawh bik lo a nih chu!" Judith-i chuan a lo ti leh zung zung a.

            A ṭhiante a koh phei hnu chuan hmingte kan inhrilh tawn a,min rawn betu ber kha Kima a ni a, nichina min rawn en rengtu kha Bena, an ṭhianpa chu Marama a ni thung. An felin an hawihhawm hmel a, an bula awm pawh a nawm hmel viau.

          Marama leh Kima chu an ṭawngduh ve hle a, Judithi te nen chuan an ti ti bawrh bawrh a, kei erawh chu engvak sawi lovin an thil sawi nuihzatthlak deuhah ka lo nui ve vel mai mai a. Bena pawh eng emaw changa an thil sawi a lo tuihnih veleh zauh ṭhin tih loh chu a ṭawng tam lem lo.

          Thil kan la ei mawlh mawlh lai chuan Bena chu a tho tharh a, counter lam pan chuan a phei a, reilo te-ah a lo let veleh mai bawk a. Amah ka va melh apianga min lo en leh vung vung ṭhin chuan ka awm a tinuam lo tak zet a ni.

          Judithi chuan nuam a tih hmel hle a, a ṭawng barh barh reng a, a nui har har reng bawk a. Hetianga ṭhiante zinga hlim thei tak, tu pawh kawm ngeih nghal mai thei ang chi hi ka awt ṭhin a, a chhan chu ṭhian hi ka kawm tam lem lova, midang bula tlângnêl taka awm nghal bawrh bawrh hi ka thei ve tlat ṭhin lova, mi zîngah ka inkiltawih phah fo reng a ni.

          Thil eina man pek kan han tum chuan pek vek a nih tawh thu an lo sawi ta mai a, nichina Bena thawh tharh chhan kha hei ngei hi a lo nih hi! Tlem tal ka lo pe ve ang ka tih lah chuan an ngai pawimawh lo nasa mai a.

          " Ho lutuk Mapui, officer fapa tân khatiang lek chu eng tham mah a ni lo," Kima chuan a lo ti sam et a.

          Haw nghal mai ka duh thu ka sawi chuan Bena chuan min rawn melh vat a,  "Kan lo thlah ang che u, in awmna sawi ula," a lo ti vut a.

          "A ngai lo, in tân a buaithlak lutuk ang,  kei Republic vengah ka awm a, ka ṭhiannu hi Mission vêngah daih a awm bawk si a, kan haw kawng a inpersan lutuk!" tiin ka lo hnial vat a.

          Marama chuan, " Chuti a nih chuan tih dan ka hria e, keiin Judithi hi ka thlah ang a, Kima leh Bena te tân Mapuii thlah a rem bawk a, an thlah nghal thung ang a, a ṭha mai lawm ni?" a ṭhiante rawn pah chuan a lo ti a.

          A ṭhiante pawh chuan Marama rawtna chu ṭha an ti a, keini pawh chuan kan hnial duh ta bik lova.

          

           Marama bike chu a tunlai  thawkhat ve hle a, Judithi lah chuan fiamthu-in, "Min thlauh palh ang a, min tlansan daih ang e aw! Ka ṭap vak a ni mai, i bialnu kan hmuh pawhin min tlansan miah suh aw!" a lo ti ve reng a, Marama chuan chhâng lem lovin a lo nuih liampui mai mai thung a.

          Marama te tlanliam hnu chuan keini pawh Bena motorah chuan lutin kan vêng lam pan chuan kan tlan chhuak ve nghal a. Kan awmna kan thlen chuan chhuk pahin lawmthute chu ka han sawi ve luam a.

          "Lêng turin min sâwm dâwn lo em ni? Ṭhenkhat lo len châk deuh an awmin ka hre tlat!" nui ṭhâ chung chuan Kima chuan min zawt a.

          "In lo len duh ka ring lova, ka sâwm ngam lo che u alawm! In duh phawt chuan lo leng rawh u," ka lo ti let vat a. 

          Bena chuan, "Lo len i phal chuan nidangah kan lo la lêng dawn nia, tunah chuan kan lo lut hrih lo mai ang," lo ti ve  vatin kan inmangṭha hnu chuan an tlan liam ta nghal a.

          Kawngkâ hawn tuma ka ban lai tak chuan chhûnglam aṭangin a rawn inhawng a, nu Tluangi leh Bawihte-i chu an rawn inkai chhuak a, Bawihte-i chu lungchhiat hmel takin a men pár  a.

          "E he! Tunge Bawihtei hi lo hau a? Ka nau hmelṭhatê hi a fel tehreng nen tunge lo hau mai mai?" tih pahin ka bulah ka pawt hnai a, ka kuah nghal bawk a.

          Nu Tluangi chuan lungawi lo hmel a pu deuhin ka hria a, ka mitmei chuan thil awmzia ka han zawt a.

          "Rosie-i ina a awm tawh hi chuan khua a vâr lo ṭhin a nih hi! Malsawma hi a dawhthei em a, an la innei hram hram a ni ber e, i la hriat tur tho a nih vangin ka hrilh che a nih chu. Bawihtei hi a nu awm aiin a awm lohin a hlim zawk. Hmeichhe rapthlak lutuk mai!" a thinur ngang a niang, nu zaidam tak nia ka lo hriat kha a insehruh nasa mai a.

          Thil awmdan tur awm-ang chu ka manthiamin ka inhria a, Bawihtei chu ka rooma lo kal a duh em tih ka zawt a, a duhthu a sawi hnu chuan inchhûngah chuan ka luhpui nghal a.

          Sitting room sofa-ah chuan Bawihtei nu chu bawp khawkherhin hahdam hmel zetin a lo ṭhu awn diai a, kan thawm hria chuan a lo hawichhuak zawk a, min ngai pawimawh lo tih hriat zetin a phone kenlai chu a bih leh nghal zat a.

          "U Rosie, i lo thleng tawh a ni maw? I chau em?" bengvar chhuahin châk lo tak chung chuan ka'n be hrâm a.

          "Aw.."

          A bak chhanna ka dawng lo! 

          Chuti taka min tham lotu chu ka be zui châk bik lem lova , Bawihtei chu kaiin ka room lam pan chuan kan kal nghal a. Inchung aṭanga u Malsawma lo chhukthla thauh thauh chu ka han melh zawk a, be ta lem lo chuan ka roomah chuan kan luhsan mai a.

          Ka inthlak chhûng chuan Bawihtei chuan ka phone-ah a duhzawng a lo en a, naupang tih takah a lungawi lohna pawh a hre zui leh tawh lova, hlim deuhin phone-a zaite chu a thiam ang angin a lo zawm ve rât rât a.

          Ka inthlak zawh hnu pawh chuan kan la awm ta reng a, youtube-ah eng eng emaw ka enkual pui a, kan tlei phian a ni.

          Sitting room lama hmeichhe thinur râwl a rawn rikchhuah rual chuan hlauhthawn hmel zetin Bawihtei chuan min rawn ngheng hnai nghal rawk rawk a, kei pawh chu hlauhthawnna-in min rawn bual ve nghal bawk a.

          "Khati khân au vak kher zel teh suh, Bawihtei hi ngaihtuah ve deuh la, hlauhlawpin i awmtir ziah hi a ṭha lo. I fanu a ni a, tlem talin ngaihtuah ve deuh teh. A thuhrimah ka thil zawhah che khan thinurna tur a awmin ka hre hauh lo, i lo haw hun tura i sawi aia tlaia ilo haw chhan ka zawt mai chauh che a nih kha."

          U Malsawma ṭawngka chhuak chu vin lo mah se a lungawi bik lutuk lo tih a hriat theih mai a, hetianga inhau ri hi ka la hre ngai si lova, chhungrilah ka khur ru zawih zawih a, Bawihtei hriat hlau tak chuan ka inhumruh ngat ngat a!

          "Ka ning lutuk!  Min ringhlel niawm fahrana thil min zawtkual ziah hi ka hne tawh, ka lo haw hma lo a nih chuan chhan neiin ka tlai tihna a ni mai.  Zin haw chauh nen ninawm hlawm lutuk mai!" A auvin a au a ni ber zawk alawm le!

          Hetiang tehhrepa nupa han nih mai chu a va hrehawm dawn ve aw! Pasal neih pawh a châkawm loh rawih rawih mai alawm. A rang thei ang bera insawnchhuah vat ka duh takzet!

          A nute thawm a hriat lohna turin Bawihtei chu earphone vuahtirin a hla duhzawng nia ka hriat chu ka play sak ta ngawt a! Khatiang thawm kha naupang hriat chi a ni mawlh si lova, an sawi ai daihin a lo nasa a nih hmel tlat, Bawihtei chu ka lainat reuh khawp mai.

          Thawm a reh tak deuh hnu pawh chuan ka la chhuahpui duh lawk lova, nu Tluangin min rawn auh hnu-ah kan chhuak ta chauh a.

          Choka-ah chuan thingpui pahin nu Tluangi ti ti ka ngaithla a, ka rilru-ah erawh a lut lo hle thung. Bawihtei erawh chu thil a ei zawh rualin ka phone-ah games khelin a bur lehnghal chat a,a nu lam ngaihtuahna hun nei lova a awm chu a ṭha phian e.

          U Malsawma lo kal lai pawh chuan nu Tluangi chu a la ti ti bawrh bawrh reng a, fridge-a tuivawt chu la-in ngawi rengin an room lamah a chho lehnghal a, ka khawngaih phak ni mah suh se ka khawngaih ngawih ngawih!

          Nu Tluangi ei rawngbawl chu ka theih ang angin ka lo pui a, a zualpui ka tihpui zawh hnu-in Bawihtei home-work ka enpui leh phawt a, chumi hnu-ah ka inbual ta chauh a. 

          Ka inbual zo, ka inthlak lai chuan ka room kawngkhar ri rak thawm chu ka hria a, Bawihtei a nih ka ring mai a, ka inthlak laklawh em avang chuan ka lo ngaihsak lem lova.

          "He inah hian engtia rei nge khawsak ve i tum?" rawn titu aw ka hriat rual chuan ka phu zawk a, thla chu nei ila ka thlawk thui khawp ang le!