PEKSANGA 10

 PEKSANGA 10

Sbk Pachuau

     Azuali rilru chu a insual nasa ngei mai. Chutia mihrang ina han chen ve ngawt chu ni theiin a hre ngang lo a, mihrangah mah a bialpa te in a la ni lehnghal a, miin eng angin nge an ngaih ang tih a ngaihtuah a, mi khawlo tak angin ang ngai ngei ang le!

     Peksanga nu bula a sawi chuan ani pawh chuan a lo hriat thiam pui viau a, Peksanga'n rem ti lo mah se hmun dang ngaihtuah chu țha-in an hre dun a.

     "Heta i awm hi keini chuan pawi kan ti hauh lo a; mahse, nangmah berin rilru nawm loh phahna atana i hman miau si chuan dan che hi ka tum lem lo. Mama pawh țha takin sawipui la, a remti lo bur bikin ka ring lo," Peksanga nu'n a tih chuan Peksanga sawipui chu a lo huphurh ru hle. 

    "Min hnial leh thovin ka ring! Hmun danga kal ka sawi chuan a lungawi lo zel a, engtia han sawipui chi nge ni ang ka hre thiam lo a ni."

     "Mi dangin an sawi dan tur che leh an ngaih dan tur che avangin i buai a ni maithei; keini chuan kan nun, kan chhungkua kan ngai pawimawh ber țhin. Thil sual kan ti a nih loh chuan mi dang ngaihdan lam ngaihtuah lovin țha kan tih angin kan kal a, hnung lama min reltute avanga kan dikna leh duhdante huai taka kan lan chhuahpui ngam lo a nih chuan kan dawihzep hle niah kan ngai mai, " a tih leh chuan dik a lo ti ve hle a.

     A u nen in luah hran mai chu țhaa hria-in an sawi dun leh kha a ni a, in luah tur an hmu remchang rih loh chu thuhran Peksanga thu lova thutlukna lo siam ngawt kha Ruatpuia'n țha a ti lo a. Engkima buaipuitu leh ngaihsaktu a nih avangin anmahni thu ringawt chuan eng mah puitlin loh țha-in a hria a ni. 

     Engtia rei nge chutianga an awm chu ngai ang tih lah hriat a ni si lo, Peksanga te fin ngawt reng pawh chu thil țha leh tih chi ber a ni dawn lo a, a case chinfel chhung a rei leh rei lohah a innghat thui ve viau bawk. 

     Tunah chet han lak nghal dawnin tih vut vut theih a ni lo a, muang chânga lehlam chet chhiat hun nghah leh a tam thei ang ber evidence lo neih kha a pawimawh ber leh an tih theih awm chhun a la ni rih mai a, hmanhmawhin awmzia a nei lem lo. 

     An rin lawk ang ngeiin pi Siami thiam channa turin Azuali chu an hmang țangkai ta chiah a, amah pi Siami chuan eng mah a hriatpui loh thu leh hmeichhe khaw lo leh thuawih lo tak angin Azuali chu a puh a. Police officer-in a mit ngeiin ruihhlo a pe lai a lo hmu bawk si nen Azuali tan kawng a la ping rih hle.

     Peksanga'n theihtawp chhuahin case close a nih mai lohna turin a bei a, an close palh hlauh a nih chuan Azuali chan a chhe dawn lutuk a ni tih a lang reng a, chu tak chu pi Siami te chuan hre ve karin case close a nih theihna turin țan an la ve nasa hle bawk. Pawisaa thlem theih apiang an lamțangah siamin an sum bâwm a len phah dawn phawt chuan tia dawt pawh sawi hreh hauh lo eng emaw zat chu dawta thu hretu atan an lei nual a, tunah rih chuan chan țha chang inti takin an hawi chapo ve hle ringawt mai a ni. 

      An ina a let leh lo ringawt pawh chu an nufa tana lawma lamna tham a tling a, an hminga in leh lo dah a nih theihna atana chet lak hun a ni tih pawh hrilh hriat an ngai lo chiang hle. Sum an chelek nasa mai si a, an duhnaah zah an hre bawk si lo; an hlawhtling mai ang tih pawh hlauhthawnawm tak a ni.

    

*****

PEKSANGA

     "I țhianpa hi a duhna lamah chuan che na thei ve tak mai a ni a, tunah pawh nangni him piala in awm laiin a rawn thler haw leh bik tawh pek hi! Cindy kha bai lauh lauh chung hian va rim leh se a țha ang," Lalhriata nupui ruk Sangtei chuan a ti barh barh a, a hmelah erawh lungawi lo leh thinrim hmel a lang lem lo.

     Lalhriata a țha viau tawh a, tlemin a la kal bai deuh e tih lohah chuan an țhuina pawh a dam țha tawh viau mai. Inhmuh khawm hun a awm lo țhin êma tiin Sunday chawhnu remchang kan neih hmasa berah an inah kan lêng a, zanriah tura min tih avangin haw lam hmanhmawh lovin kan inkawm a, kan hlim phian mai. 

    "Țhiante tan tiin kan bei ve a ni mai a, min sawisel reng lo khan min duat tawp la, nupui țha i ni mai, " Lalhriata'n mit siai suk paha a tih chuan Sangtei chuan a lo chhiat khum zauh thung.

     "Cindy nen khan an induat nasa hman viauvin ka hre tlat! Ngaih tih țhatna chi niin ka hre lo," ka lo ti ve zauh a, Freddy lahin a ze ngai chhuahin a lo tuihnih ve zat bawk. 

     Tun hnaiah buaina neuh neuh kan neih avangin kan inhmuh pawhin fiamthu a leng ngai lo a, tun hi za taka kan nuihho lehna hmasa ber a ni. Sangtei chu a nui nasa berah țang zuiin Cindy leh Lalhriata chu a hmehbel lui a, Lalhriata zawk chu a lungawi lo ta lek lek zawk a. Rilru pik a dah bo țhaka han nuihho dar dar tàkah chuan hun pawh a liam chak hle a, reilote emaw kan tih chhungin chaw ei an peih thu min rawn hrilh ta mai a. 

    Azuali pawh ka țhiante ngainat a hlawhin ani pawhin a ngaina ve tih hriat takin a be bawrh bawrh reng a. Lalhriata phei chuan a fiam peih nasa mai si, a tir lamah han zak deuh mah se an inkawm nel tàk hnuah chuan fiamthu hmang bawkin a kap let ve a, an inkawm thei phian mai.

     Ka țhiante hian ka ngaihzawngte hi han ngainat tak leh min han duhpui êm êm an la nei lem lo a, mi pangngai an nih avangin an be chhe ngai hauh lo thung. Baby-i kha a à lem lo bawk a, an inkawm thei viau bawk. Mahse, nupui atan êm erawh min duhpui lem lo tih chiang takin sawi lo mah se an țawngkam eng emaw laiah an ti lang leh zauh țhin.

     Ka nu pawhin kan chhungkaw ze milpui ni lo nupuia ka neih a hlau ber a, Baby-i chu mo atana a it loh thu leh kawp lo tura min duh thu tlang takin min hrilh nghe nghe. Ka nun danah a inrawlh lutuk lem lo naa ka nupui tur thuah erawh min zilh ve leh zauh țhin.

     Ka pa erawh pa țawng tam lo tih takah ngaihzawng chungchang phei chu min sawipui ngai lo a, ka nu a ring tawk bawk nen ka mimal nunah a inrawlh lutuk lem lo. Ka nu leh pate hi ka zahin ka ngaisang a, a riin Pathian thu sawi lê lû lo mah se an nun danah entawn tlak an nihzia an ti lang a, Pathian duh dan mil zela ke an pen țhin avangin an fate pawhin an hnung kan zui lo thei lo a ni.

     Zanriah ei kham hnuah hmanhmawh bik awm lovin kan țhu khawmuang leh a, eng eng emaw sawiin kan titi hlut a. Ka phone a rawn rika ka'n en chuan Ruatpuia a lo ni a, pawimawh a awm a nih ringin ka chhang vat a.

     "Inah ka lo kal a, in lo awm lo a. Inhmuh ka va duh ve!" a rawn ti a.

     "Tunah khaw'nge i awm?"

     "In in kawtah ka ding." 

     "Anih chuan kan inah khan lo awm la, kan lo haw nghal dawn nia," tiin phone ka off a. 

     Ka țhiante hnenah thil awmdan ka  sawi a, kan boruak hre sa vek an ni bawk nen a pawimawh ang tih hriain min chelh khawtlai duh lo a, kan 'inmangțha' ta hlawm a. 

    "I țha êm?"

     Țawngkaa min chhang lovin a bu nghat ringawt a. 

     Motor-a kan luh ațanga kan tlan chhuah thlengin a ngawi reng a, ngaihtuah ding tak nei anga langin a thaw leh halh țhin.

     "Min hrilh la," a kuta vawnsakin ka ti leh a.

     "Ka u hi ka hlauhthawnpui riau! Hmanni pawh khan kha Inspector khan a lo vau vel a, keimah ang khan an thangkama awkin a che chhe ve ang tih ka hlau a ni," rilru hah hmel zetin a ti a.

     "Tih sual a nei a nih loh chuan chuti maiin a awk lo ang. Fimkhur taka chet lak dan hre tur khawpin a fing tawk a, amah hrim hrim chu a inveng zo viau ang. Ngaihtuah hah duh suh," tiin ka hnem vat a.

     "Palh awm thei a ni ve tlat a, ka rilru a nuam lo țhin."

     "I ngaihtuah hah viau khan awmzia a awm miah lo a nia. Rilru paukhauh leh chak taka i awm a ngai tih kha hre reng bawk la."

     "Ka hria alawm. Mahse, ka paukhauh zo lovang tih hi ka hlau ru fo mai! Nang leh ka u hi awm lo ula chuan eng mah ka ni tawh lo ang."

     "Ni lo e, keini awm lo pawh ni ila hmeichhe chak leh huaisen tak i ni a, nangmah chauh pawhin i theih chhung chu i bei ngei ang tih ka hria a ni," ka lo ti thuai a.

     "Ka u hian a nghei hlen theih i ring em?" in kan thleng țep tawh tihah chuan a rawn ti hliai a.

     "Ring e. Nghei hlen thei turin a puitling tawk alawm. Mi dawihzepte anga hnuchhawn tawh lama let leh chi mihring a ni lo."

     Ka chhannaah chuan a lungawi nge ni a ngawi zui leh mai a. In chhunga kan luh chuan Ruatpuia chu ka nu leh pate nen an lo titi muk hle. 

    "Zanriah ei khamin ka țhianpa nen a chhungte damlo kan turin kan chhuak a, damdawi in kawtah pu Liana nen kan inhmu hlawl a. Pu Liana chu kan veng pa, kan naupanlai vela kan ina lo lêng lut ve țhin a ni. Amah hmu tura ka nu a kal thu min hrilh a," Ruatpuia'n a ti a.

    "Revenue department-a thawk kha em ni?" tiin Azuali'n a zawt a.

     "Aw, ni e. LSC kengin ka nu chu a va kal a ni awm e. LSC chu ka pa khan hmun hnihah țhenin kan unau hming hian a lo dah a, chu chu a fate pahnih hminga thlaktir dan a awm em tih a va zawt a."

    "Chutianga thlaktir chu a theih em ni?" Ka nu'n Ruatpuia thusawi chu pawt  chatin a lo zawt a.

     "Theih e, lehkha pawimawh an neih kima a dan dik taka an tihin thlak theih a ni a. Dik lo deuha thlak duh tan pawh sum a awm chuan a harsa ngai lo," ka pa'n a lo ti bung nghut a.

     "Pu Liana chu ka nu damlai ațang tawha kan chhungkaw hre chiangtu a ni a, ka pain nupui dang a neih tàk ațang khan kan inah a rawn chuang kai ngai ta lo mai chauh a ni. Ka nuhrawnin chutianga a va be rawn chu beiseina a lo siamsak duh vak lo a, thil harsa tak nia sawiin a buaithlak thu a lo hrilh a ni awm e, "Ruatpuia'n a sawi zawm leh a.

    "Tuna kan chhungkaw boruak hi lo ral khat hriat ve deuhin zanin khan inhmu lo mah ila min zawn chhuah a tum tho a lo nia, ka nuhrawn chu a beidawn mai a rin loh thu leh theih ang anga a chet lakna tur lo dang ve zel turin min hrilh a. Ka nau an man chungchangah pawh tih sual a neih a rin loh thu leh a fate hovin Cindy te unau khawsa zia an hriat chian avangin anmahni zawk chu an rinhlelh thute thlengin min hrilh nghe nghe," tiin pu Liana nen an inbiakna te chu a sawi nual a. 

    "Revenue lama thawk kan hriatte biak kual a țhat ka ring! Theih ang anga thil nihphung sawipuia in nuhrawnin LSC-a hming chuang chu thlak tuma a bei leh a nih pawha lo hnial tura hrilh an ngai a ni. In unau hminga awm a nih angin in ta a ni tlat! In la dam ve ve miau a, chiang taka LSC chu in hminga awm a nih si chuan thlak danglam chu a har ve țalh ang," ka pa'n a ti a.

     Ruatpuia'n,"Pu Liana pawhin a thawhpuite hnena lo sawi chu a tum a; mahse, suma lei theih an awm nual avangin kan dang seng lovang tih erawh min hlauhpui khawp mai," a lo ti ve leh zat a.

     "Sum a theh chhuah țhat chuan hming thlak chu a harsa dawn hauh lo. Chu chu a tih puitlin lohna tura kan tlan chak ve deuh  erawh a ngai dawn thung a ni," ka pa bawkin a ti leh a.

     "Kei chu ka hlauthawng êm mai! In sawi hmangin an rapthlakin an pamham hmel nasa mai si a, an duh an hmuhna a nih dawn phawt chuan eng thil pawh tih hreh an neih ka ring lo. An duhnaah chuan an chak țha par par ngawtin ka ring. Chuvangin, engtik lai pawha thlithlai ruk reng a țha ka ti," ka nu chuan a lo ti ve hluai a.

     Ka pa rawtna ang khan Revenue department lama kan hmelhriat neih ang ang biak pawh vat chu țha ka ti a, court lamah duh angin thil a chin fel zung zung theih bawk si loh nen kan nghah chhungin an lo che fê hman ang tih a hlauhawm riau a ni.

      A tuka Directorate of Land Revenue and Settlement office lama ka pa leng chu a hlawhtling thawkhat hle. An director nen chuan inhmelhriat țha tak niin inpawh takin thil an sawi dun thei hlauh a, thawk khat chu a veng ta rih phawt e.

     Azuali leh Ruatpuia'n in hran luah an tum pawh buaina neuh neuh kan neih reng bakah pi Siami te chhungkaw khawsakzia kan mitmei reng avangin kan ngaihtuah hleithei rih lo a, in luah tur a lo vang kher bawk nen ngaihtuah hleih theih pawh a la ni rih lo a ni ber mai.

     Hun rei a ni dawn lo a, thubuai chai zawh hun emaw an in ațanga pi Siami te nufa an chhuah hun nghahna tur chauh tak tak a nih avangin an duhtui lutuk lem lo. Mahse, an duhtui leh duhtui loh lamin kawngro a su viau lem lo. Kan in hnaiha awm turin ka duh si a, in ruak a lo awm mai si lo nen ka nu phei chuan kan inhnuai ber chu chei țhata awmtir maite a rawt hial a.

     Inhnuai ber hi ar vulhna atana kan hnan țhin a ni a, kan vulh lohna a rei deuh tawh naa a rim a la tui fahran lo hle. Bungraw eng eng emaw vawm luhna atan kan hmang zui a, tih fai a hlawh ngai lo bawk nen mihring luah atan chuan a itawm fahran loh a ni.

     In luah tur dang kan hmu ta mai si lo a, kan inhnuai chu kan chei țha ta poh a. Rawng te hnawih țha-a uluk zawka han tuaihnum hnu chuan a zia ve ta hle a, an han insuan luh tàkah phei chuan a zau fahran lo naa a nuam vei phian mai.

     Kan hnena Azuali khawsa ve kha kan tan a hnawk lo mai ni lovin a lo awm ve kha ka naute hlei hleiin nuam an ti a, hmun danga insuan chhuah kher kha țul ka ti lem lo hle a. Mahse, ngaihtuah chianin Azuali'n mite min sawi dan tur a vengthawng leh kan hnena awm ve reng chu thil mawi a nih lohzia chu ka hrethiam ve ta deuh a. Inngaizawng te chu ni lo ila chuan a pawina a awm hauh lo; inngaizawng kan ni miau mai si a, keiin pawi ti lo ngawt mah ila Azuali hming chhe taka a awm ka phal miau loh avangin ka dang duh ta lo a ni.

     Bungbel leh inchhung bungrua chu anmahniin an ngaihtuah vek a, ka nu-in thleng vel a pek luih tih loh chu eng mah ka leisak pawh an duh lo. A pa pawisa dahsak kha a lo tlem lem lo bawk nen an duh leh mamawh chu an lei vek a, awm rei lutuk lo tura inngaihna nen a țul chin bak erawh eng mah an lei lo thung.

     Sangpuii te hnena chen pawh a rem viau rualin midang tih buai a duh tlat si lo a, a u nena in khata khawsak dun a lo thlahlel ve tawh bawk nen an han luah hrang ve ta chu a ni a, keimah ber hi a tel lova awm har ti tur chu ka ni.

     Thawk khat han veng deuh mah se LSC kha tu emaw pamham deuh țawng fuhin an thlak thei tho tih kan hriatna chuan min la kam țeuh a, a pa thurochhiah ziahna lah an khungbo daih bawk si nen an lo khawih chingpen ang tih mawlh chu kan hlau a, a chhunga khawsa ve lo tan chuan han zawn vak ngaihna a vang rih khawp mai.

     Lalhriata chet a hun leh tawh niin ka hria a, ka call nghal a.

     "Hello..."

     Sangtei zawkin min lo chhang a, anpa  chu a inbual thu a rawn sawi a.

      "Inpa kha ka mamawh leh tawh a nia. A inbual zawhah min rawn be teh se," ka ti a.

     "Hmeichhe dang bulah i tir leh dawn chiang!" nui har har chungin a rawn ti a.

     "Hmeichhe dang bulah ni lovin a ngai tho kha a nia," ka tih chuan a rawn nui ring kher mai.

     "Kanpa hi ka lak ațanga a uire a nih vaih chuan mawh i phur ang," tiin min vau fiam ve ngial a, amah ka hriat chian êm avangin a ti tak tak lo tih ka hria a, ka lo nui mai a.

     Sangtei hi hmeithai fa niin nuța pahnih a nei a, an khawsak a harsa lutuk lo naa awm thei lutuk tia sawi theih erawh an ni lem lo. An neih mil tawka khawsak an thiamin ho mai mai leh awh zawng satliahah sum an dek ral ngai lo a, an inkhawl thei phian nghe nghe. In pawh an phak ang tawka lian leh țha-in an sa nghe nghe a, an luah luh hma-in pasal a um ta daih si a, a tel lovin a chhungte'n an lo luah tawh mai a ni ang chu.

     Hetia Cindy ngaizawng der tura Lalhriata ka hmang hi a tirah chuan hrethiam lovin a phal lo deuh a, thil awmdan dik tak a hriat hnuah erawh keini ai aiin țhahnem a ngai zawk emaw tih mai turin tih dan tur țha nia a hriat te a lo sawi ve zung zung ta țhin a, anpa chuan Cindy a kherh thluk zawh loh a hlau ta zaw mah a.

     "Hetia ka phalna i hmuh tàk avang hian i lo va ngaizawng tak tak roh ang e aw!" Lalhriata en paha nui deuh saih chungin a ti a, ani lah chuan lu a lo thinsan ringawt a.

     "I ngaihzawn tak tak vaih!" nuihza insum țeuh chungin a ti leh a.

     "Sawtiang mihring ang saw duh ni ila harsa takin i rilru hneh tumin ka zâr buai reng lo tawp ang che maw le," Lalhriata'n a lo tih ve takah chuan lungawi hmel zetin a nui ta var var a.

     Ka țhianpa-in hmeichhe fel leh țha tak nupuia a nei thei tur chu ka lawmpui hle a, an inchhaih vel chu hmuhnawm ti takin ka thlir reng a.

    "Ngaizawng der tih vang khan tihte i lo va tum ringawt ang e!," kan chhuak tur Sangtei'n min auh zui chuan kan nui chhuak dun ta hawk hawk a.