PEKSANGA 1

 PEKSANGA

Sbk Pachuau

               CHAPTER 1

     "Ka sawi ang kha a ni mai. Hetianga dawta inpuh hi ka duh lo rêng rêng! Sum bawlhhlawh tel lo hian ka khawsa thei ve tawk, ka nunah hian lo inrawlh buai sek hlawm tawh lo teh se!"

     Ka hmaa hmeichhe thinur inhrosa tan tan chu enin ka bu nghat a; nuvalai, kum 40 bawr vel niin a lang. Hmaihnawih eng ilo a uar mah mahin a mit pawh a hnawih dur țha khawp mai. A hmui lah tan thar hlim ang maia senin a hnawih bawk nen a hmel chu ziah chawpte pawh a ang lek lem zawkin ka hria. A mitmeng lian kel kawl tak chu a thinur meng ling hlar nen phei chuan rapawm lam a kâi lek lek a, a țawngkam bungraw hman lah a ngaihnawm fahran lo hlawm hle bawk.

     Damdawi vawrh chungchanga man a ni a, a pha nasa ngang mai. A thusawi ngawtah innghat dawn ta ila thiam a chang nghal var var ang tih tur khawpin a insawi thiam a, a mitmeng lian leh rum zet en erawh chuan nunrawnna leh dawt sawi pawisak lohna hmu-in ka inhre thung.

     An case ka zir chian hnuah, an dik ngei nia ka hriat hnuah chauh min dawrtute ka dinsak țhin. Ka hna ka thawh țan tirh lamah khan vawikhat chet sual ka lo nei tawh a, ka client fing khekrek lutuk leh dawt sawi timna eih nei lo vang khan dik lohna nei miah lo kha thiam loh chantirin a awm a nih kha! 

     Ka hriat chhuah meuh chuan kha pa khawngaihthlak tak khan a tawrh tur ang ang chu a lo tuar zo vek tawh a, tih luihnaa sum fai tlem azawng  ka pek khan a hunlaia a rilru hahna leh natna kha a tih ziaawm phah ka ring hauh lo naa ka inthiam lohna tlem tala min chhawk takin tih thil thuah ka pe lui ta kha a ni a, ka zangkhai phah falua lo hle thung.

     "Hetiang case hi lehlamin finfiahna an neih țhat viau chuan inphenna tur a vâng duh khawp mai a, thiam lohna nei lo tak tak i nih erawh chuan tih dan kawng a awm thei tho ang chu," rilru bet zan lovin ka ti a.

     "Eng anga finfiahna țha pawh nei rawh se, ka fihlim a ni tih hi ka lantir khawp ang. An duh duha dawta an puh kual tur hi ka ni lo, dik taka sawi te chuan hetianga min titute zingah hian ruih theih thil laka fihlim lo an awm tih ka hre ve kar alawm, ka duh chuan ka ti mualpho ve thei tih an ngaihtuah thleng pha lo a nih chuan an ti sual hle ang," a ti leh bawrh bawrh a. 

     A hawiher chapo lam mah leh a țawngkam mawihnai fahran lo chu inhmeh ka lo ti ru hle pek!

    "Khawngaihin min dinsak hram teh! Ka țhianpa khan Mizo ukil zingah nang tluka țha leh hna thiam an awm lo tiin min hrilh a, midang zawn buai ka tum hauh lo a nia."

     "Ka lo ngaihtuah dawn nia. Case buaipui lai dang ka nei a, țum khata case hrang hrang khawih pawlh tam lutuk chu a buaithlak ve țhin riau a, chanchin kan inhrilh leh dawn nia," tiin a mawiah ka card chu ka pe a, ka rilruah erawh ka dinsak dawn lo tih ka hre chiang nghal hle.

     A hmel leh hawiher bakah a țawng dan velah ka rin zawng a ni tlat lo pek a, inham buai loh law law țha zawkin ka hria a ni. Aizawl pa challang tak pakhatin min rawih țumin amah khingtupa chu a thiam lohna ni miah lovah chiang takin ka khing thla a, a hnua thudik ka hriat leh hnuah ka theih tawp chhuahin ka tih sual siam țhat hna thawk leh mah ila, a hunlaia an rilru natna leh mualphona kha eng mahin a lei zo tawh si lo. 

     Rilrua inthiam lohna lian tak nei reng chungin ka fimkhur phah ta hlauh thung a, min ruaitu turte chanchin a chipchiar thei ang berin ka chhui hmasa phawt a, chumi hnuah thu tlukna ka siam ta chauh țhin a ni.

     Case khawih tur neuh neuh ka neih nual avangin ka buai chho viau a, lian tham êm êm awm  lo mah se thluak hman ngai tak vek tho chu a ni hlawm lawi si; hunawl ka nei thei meuh lo chu a ni ber e.

     Ka û te fapa piancham a ni a, a kum khatna a ni bawk nen lawm ropui an tum khawp mai. Ka kal tlai ang tih hlauvin ka nu leh ka ûte'n min call reng a, ka hun neih te siam remin chawhnu lamah an in lam panin ka inkhalh chhuak thei ta hram a. 

     Ka va thlen chuan an misawmte pawh an lo kim thawkhat hmel viau tawh mai. Ka hmel a hmuh rualin ka û chuan min pan vat a, a beisei aia ka thlen hma thu sawiin hlim zetin min lawm chul a.

     Ka û hi hmeichhe luhlul zet, a duh tawhnaah chuan dan theih miah loh ang chi kha a ni ve țhin a. A tleirawl chhuah hlim vela len chhuah leh han ruih vel nuam ti ve tak ni țhin kha ka nu(hrawn) vang liau liauvin a zia a thlak thawk ti ila kan sawi sual hauh lo ang. A hrin chhuah ang maia kan unau hmangaiha min enkawltu ka nu vanga tun dinhmun thleng thei hi kan ni bawk.

     Ka nu min enkawlna avangin râwlthar sual leh daipelh nei hauh lovin tun hi ka thleng a, ka û erawh hun eng emaw chhung kha chu ka nu tana luhaithlak ram ram khawpin a tal nu thung(PEKHLUZUALI chanchin chhiar tawh chuan in hriat ngei ka ring e😊). Dawhthei taka a enkawl hram hramna chuan rah duhawm chhuahin nula fel, lehkhathiam leh mahni inenkawl thei khawpa puitling ni turin a chher chhuak ta hial rêng a; ka nu laka inthiam lova ngaihdam a dil ațanga tun thleng hian hmeichhe țha leh zahawm, mite entawn tlak leh nu leh pa leh unaute tana chhuanawm a la ni ta zel a ni.

     Hunserh a zo a, ruai an buatsaih chhunzawm nghal deuh mai a. Catering tih a awlsam viau rualin naute piin(ka û pasal nu) a piancham pual liau liauva vawk leh ar a lo vulh avangin fatu tur ruatin rawng an bawl ta zawk a ni. 

     Kan ril a țam vak loh avangin chaw ei kan  hmanhmawh lem lo. Ka naupanlai ațanga tun thlenga ka țhian la ni ta reng Lalhriata leh Freddy te nen balcony lamah țhu chhuakin kan titi a, mi hnukhâwiah ei turin kan tho chhuak ta chauh a. 

     Ka û pasal, Ropuia farnu tleirawl tê, Sangpuii hi chawhmeh vel viltu-ah a țhiante ni awm tak, amah ang rual vel tur pahnih nen an lo țang ve a, kan țhianho nena innel sa kan nih avangin kan chaw dawh chhung chuan min lo fiam bawrh bawrh a. Kan țhian zinga phawk ber leh hmeichhe chhaih peih deuh ber Lalhriata chuan fiam let vein kan chaw dawh thawm chu a țha phian mai. 

     "Ka pu, hmarcha bawl hi i duh lo em ni? A tui teh mai a nia aw," tia min betu tleirawl tê chu ka en vat a.

     Hmelțha tia sawi vul chûk tur ni lo mah se eng emaw ti zawng takin a hmel chuan ngaih a la reuh a, a ngo viau lo a, hang chhia erawh a ni leh si hauh lo. A nui hmel phena a mitmeng tak ngal mai leh fiah țha kel kawl zet mai chu hmuh hmaih theih a ni lo a, a hnar ngul invuah fuh zet chu Zonu chhul chhuak ni awm lo khawpa nalh a ni bawk. A hmui chhah lam lek lek chuan a ti lang duhawm zaw phian a, hmai hnawih eng ilo a uar lem lo chuan a ti lang thianghlim viau reuh lehnghal. 

     Chung thil zawng zawng chu second reilote chhungin ka hmu kim hman vek a; hmeichhia, ka vawikhat hmuhnaa chutiang taka ka rilru-in a hmel landan a chhui kim chu an la awm kher awm lo e. 

     "I pu chu ka ni lo naa min lo suah mai dâwn em ni ang? I sawi hmangin a tui hmel bawk a," tiin ka thleng chu ka va dawh hnai a, ner deuh sak pahin min suah ve mai bawk a. 

     "U Peksanga chu Azuali hi chhe lo i ti chiang! Chawhmeh dang zawng pawh nangmahin i insuah a, hmarcha i ngam loh tehreng nen i insuahtir vel a," nui har har chunga Sangpuii'n a rawn tih chuan zah hmel zetin ka hmaa tleirawl ding chuan Sangpuii chu a va chhiat khum zauh a, ka lo nui hawk thung. 

     Chaw kan ei kham a, veranda lamah țhu-in Sangpuiite țhianho thil seng fela an vei vel chu 'bik' neiin ka lo thlir leh reng țhin. Țhiante titi pawh zawm lem lo chuan Azuali che vel chu ka en zui reng a, a che a felin a zei thlarh bik ni mai hian a lang a, rei pawh ka la hriat loh chu hmeichhe tleirawl tê chuan ka lung phû a ti rang tlat mai. 

     Hmeichhia hi ka ti hurh ngai lem lo, chet ka lak hmasak ngai miah lova chet la ngam hmeichhia hi an lo tam khawp mai. Han lak run vak ka nei ngai lo a, ka nin chin a thlen tawh chuan eng ang pawhin min umzui mah se ka kawp nawn tawh ngai hek lo. Ka naupang chhe tawh lem lo bawk nen kawp pawh ka ngah tawh viau. Hmeichhia zawk inhawng ta na nâ nâ chu khum han kaipui lâwp lâwp pawh ka nei nual bawk. 

     Hmeichhe kawp lawr vak chu ka nu duhdan a ni lo viau a, min khap fo mai. Kei lahin a pawina êm êm ka hre lo bawk nen a hmeichhe lamin min zar reng ta chu ka kawp hmiah hmiah mai a, ka duhtawk a thlen chinah erawh ka thauhthla zui chiang thei viau thung. 

     Ka hmeichhe kawp tawhte zingah Baby-i a danglam fal nalh a, ka inlak hran pawhin min hnaih lui tlat a, amah a lo chhe lovin a lo zei bawk nen kan inkawp rei ta phian. A lakah nuam ka chen a, chu chu amah pawhin a duhthusam tho a ni. Ngaihzawng nghet angin ka en lem lo a, ka sex partner a ni mai a, chutiang chiah chuan ka en bawk. Ani pawh keimah ang thovin,  ngaihzawnna êm êm tel lem lovin, ka laka a duh a hmuh tho avangin a lung a awi tawk niin a lang. Mite ngaih danah erawh inngaizawng pangngai ang kan ni a, inngaizawng nghet tak angin min hmu vek bawk. 

     "U Peksang, ka țhiante hi thlah an ngai a, i motor-in min thlahpui lawk peih em?" Freddy nupui neih tur chungchang kan lo sep tui lai takin Sangpuii'n a rawn ti a. 

     Ka țhiante pahnih chu min lo nghak tura hrilhin Sangpuii te țhianho nen chuan kan inphur chhuak a. Lalhriata leh Freddy hi ka kawm berte mah ni se hna nei vek kan nih avangin inhmuh kan harsat ve hle a, inhmuh khawm theih chhunah kan am viau zel. Zanin pawh hian ka ute ina kan awm tlang a nih loh chuan kan țhianho zinga tu emaw ber inah kan lut ang a, zanlai pelh rawk thlengin kan inkawm leh dawn tih chu sawi lawk kher lo pawhin kan hre tlang nghal vek mai. 

     Azualite awmna a hnai zawk naa an țhiani chu thlah hmasak ka rawt a, ka rilru hre hauh lo chuan an lo 'aw' ve mai bawk a. An țhiannu kan thlah hnu chuan Azuali te in awmna nia an sawi lam pan chuan ka tlan leh ta nghal a. 

     Azuali te in chu Aizawl pa awmthei hmasa pawlin a duhthusam taka a sak ni mai awma mawi a ni. A building a hlui deuh tawh naa a la langsar hle a, a hunlai na nâ nâ chuan a ropui ve viauvin a rinawm. A compound pawh a zau țha thawkhat a, a kawt zawla pangpar par vul chûk chu Azuali hmel nen ka lo tehkhin hmanhmawh a, inhmeh ka ti viau mai. 

    Lêng lut turin min sawm naa kan remti ang tih hlau ni awm tak hian ka hmu pek a, a mitmeng fiah zet chu eng thil emaw ti buaitu nei ang mai hian ngui deuh riauvin ka hmu bawk. 

    In lama kir leh thuai a duh thu sawia Sangpuii'n a hnial tàkah chuan inmangțha-in kan let leh ta nghal a. Rilru kawma mûk zeta ka inngaihtuah zui avang chuan Sangpuii titi bawrh bawrh chuan eng thil te nge a sawi pawh ka hre mang bar lo. Azuali chuan ka ngaihtuahna a luah zui veng veng a, ka ngaizawng ta mai em ni tih dawnin ka hmeichhe lo kawp tawhte nen an inang lo nasa mai si, țha lutuk tia han sawi vul chûk tur ni bawk si lo chu a eng zun berin nge min zem tehreng ni ka vei zui viau lawi a. Ka hmu zui ta reng a nih lem loh chuan ka theihnghilh leh mai chu ka'n ring rilru ngawt a! 

*****

     DC office kawta ukil pakhat nen hna chungchang sawia kan inbiak mawlh mawlh lai chuan ka hminga min ko ri ka hriat avangin ka hawi chhuak a, min kotu hmel ka hmuh chuan tu nge a nih ka hriat mai loh avangin ka chhang let nghal mai lo. Ka hming pum ngeia chiang zeta min koh leh tàkah chuan ka dinpuipa hnena thupha chawiin min autu lam pan chuan ka pen phei a. 

     "Min hre tawh lo a ni maw! Ni e, kan dinhmun a inthlau ta êm a, min hre lo pawh a awm viau mai. Ruatpuia kha ka nia, Hyderabad-ah kan awmho țhin kha," a tih chuan ka hre chhuak ta chiah a. 

      Mipa hmelțha leh invawng fel tak, taksa sawizawi ngai pawimawh êm êm, lehkha thiam thei tak ni țhin Lalruatpuia kha tuna ka hmaa ding Ruatpuia hian anna a nei mang tawh lo tlat! Ka hmuh tirha ka hre mai lo pawh kha thil mak a ni lo. Tuna ka hmaa ding hi chu ruihhlovin a tih buai rih hai rual loh, kut vung lian tak nei a ni tlat! A ke erawh pheikhawk a bun avangin a lang thei lo a, a pheikhawk a tawn mar țhat danah a ke pawh eng rûai a nih a rinawm loh. A mitmeng, mahni inring tawk tak leh fin hmel zet kha awm tawh lovin, mitmeng phe dai, zahzum hmel zet a nei ta zawk bawk. 

     Ruatpuia nen hian NALSAR(National Academy of Legal Studies And Research), Hyderabad-ah dan lam zirin kan kal dun țhin a, heta kan kal chhung zawng hian ruih theih thil a khawih ngai lo mai ni lovin mite țanpui nuam ti mi, a bikin ruihhlovin a tih buai(hnam dangte pawh) te a buaipui nasa viau țhin a, Mizo awm ve dangte tan kawng engkimah a tangkai êm êm bawk. Tuna heti taka a danglam ta hi amah lo hre tawhtu tan chuan thil mak a tling ve hial mai. 

     "I dam maw?" tiin chibai tumin ka phar chhuak nghal a, a kut vûng lian bûr mai chu ka hmuh hlau tih hriat takin fimkhur taka rawn lek chhuakin min chibai a, a kut pawh a la let rang viau e. 

     "Dam a ni mai e. Nang pawh kha i dam țha a nih hmel, tun hma lam ai mah khan i țha-in i lang zahawm zual ta," nui suk chungin a ti a. 

     Eng ti tura chu lai hmuna lo kal nge a nih tih ka zawh chuan court-a a kal ni a nih thu a sawi awlsam et a. 

     Damdawi a khawih țhin mai bakah a zuar tel ve leh zauh țhin a, a zawrh țum erawh a tam lo viau naa a vanduai aleiah man a tawk ta si, a pa a boral tawh avangin a patea'n a bail chhuak a, court kal a ngaih ni-ah a lo han inlan zak zak țhin a lo nia, a tunhma nun ngaihtuahin a tla chhe ta lutuk chu chhan eng emaw tak a awm ka ring. 

     Treasury lam pana step-a a chhuk thla chu ka thlir zui reng a, kawngpui a kàn phei hnua a hmeichhe va biak hmel ka hmuh chiah chuan nghing lawihin ka inhria a. Kha hmeichhia, vei zui miah lo tura ka inrin, ka vei ruk zui tak êm êm kha a ni tlat! 

     Inpawh hmel taka an inbia leh inzui ka hmuh chuan Ruatpuia chu ka thik riau pek a, hmuhnawm ti miah lo chungin ka thlir zui reng thung si. An liam hnu pawh chuan che châng mai lovin an liamna lam chu ka la thlir zui reng a, rei fê hnuah muang chânga inherin ka kalsawn ta chauh a. 

     Office ka thlen hnuah pawh ka rilruah an la awm zui ta reng a, ngaihtuah lova thil danga rilru pek ka tum nasat poh leh ka hlawhchhamna a sang mai si. Ka beidawng chuan ka phone chu la kangin ka biak duh number chu ka call zui nghal zat a. 

     "Aw, u Peksang, eng nge i duh ve teh mial a?" aw zangkhai vaha Sangpuii rawn țawng ri ka hriat chuan ka khi suk a. 

     "I țhiannu number kha min lo pe teh!" 

     "Teh tawp che chuan! A tu ka țhiannu ber maw?" 

     "Hmanzana kan thlah kha." 

     "Sawmi kha maw?" nui har har chunga a rawn tih chuan ka hriat duh loh zawk a sawi lui tih ka lo man nghal mai. 

     "Muang lo khan mi'n hrilh vat mai teh!" Ka tih pawh chuan a la nui har har reng a. 

     "Nang pui hi, i ti ve deuh tak tak emaw ni le! Chhai kual vel mai mai chi a ni ve miah lo a nia aw!" a aw chu a thutak ta deuh. 

     "Min han pe phawt mai teh. Chhai kual chi a nih leh nih lohte pawh ka en hmasa ang chu!" Ka tih chuan huat hmel zetin a rawn chek hlak a. 

     "Ka ti tak tak a nia aw! Azuali hi chu hmeichhe dang i kawp anga i tih kual vel ka phal dawn lo. A rilru natna tura i awm dawn ai chuan ka pe lo ang che." 

     Buan ahmaa kherh tih ang deuhin a biak pawh ka la biak hma hauh ațang chuan a țhiannu thlavang hauh chu a rawn ti na ngang mai. 

    "Chu'ngah chuan lo buai duh suh. A number chu min lo thawn ang che. Ka dah a nia." 

     A rawn țawng ve leh hma chuan ka dah nghal daih a. A lung a awi lo lehpek ang chu! 

     Khualchhawn nula-in inlêng ka nei tih min rawn hrilh chuan hna lam kaihhnawih a nih ringin rawn luhtir turin ka hrilh a, rei vak lo hnua ka room-a lo lut ka hmuh chuan lungawi fahran lovin ka ner ru sawk a. A langah erawh țawngkam pangngai ka hmang hram thung.